KOLOSE

KOLOSE

¹ Surat enda i bas aku nari, Paulus rasul Kristus Jesus erkiteken ipilih Dibata, ras i bas seninanta Timotius nari. ² Man perpulungen i Kolose: e me senina-senina si tutus erkiniteken man Jesus Kristus. Ngarap kami maka Dibata Bapanta, mereken lias ate ras kemalemen ate man bandu. ³ Adi kami ertoto kerna kam, ikataken kami bujur man Dibata, Bapa Tuhanta Jesus Kristus, ⁴ sabap enggo ibegi kami berita kam tek man Kristus Jesus janah keleng atendu anak-anak Dibata. ⁵ Kam tek dingen keleng atendu, sabap lit pengarapenndu kerna kai si enggo isikapken Dibata man bandu i Surga. Enggo ibegindu kerna si e, sanga Berita Si Meriah i bas Dibata nari ipeseh man bandu. Berita e berita si tuhu-tuhu. ⁶ Berita Si Meriah e tetap maba pasu-pasu janah enggo mbar i tengah-tengah doni enda, bagi mbarna i tengah-tengahndu. Tangtangna kin nai ibegindu lias ate Dibata, mulai kin nai iangkandu, geluhndu pe enggo ipasu-pasu Dibata. ⁷ Si enda ibegindu i bas Epapras nari teman si ikelengindu. Ia kalak tutus erdahin i bas dahin Kristus guna nampati kami. ⁸ Iturikenna man kami kerna keleng ate si ibereken Kesah Dibata man bandu. ⁹ Erkiteken si e me, maka mulai kin ibegi kami kerna kam, rusur kam itotoken kami man Dibata. Ipindoken kami man baNa gelah banci ietehndu kerina sura-suraNa, alu pemeteh ras kepentaren si ibereken KesahNa. ¹⁰ Alu bage ngasup kam nggeluh bagi si ngena ate Tuhan dingen erbahan meriah ukurNa. Seh maka kegeluhenndu erbuahken perbahanen si mehuli, janah erbagesna pe penandaindu Dibata. ¹¹ Mbera-mbera reh gegehna kam ibahan gegeh si reh i bas kuasaNa si mbelin e nari, gelah megenggeng kam i bas kai pe. ¹² Katakenlah bujur man Bapa alu meriah ukur, sabap Ia me si erbahanca kam metunggung dat bagin i bas si enggo isikapkenNa man anak-anakNa, i bas Kerajan Terang. ¹³ Kita enggo ipulahi Dibata i bas kuasa si gelap nari. IbabaNa kita ku bas Kinirajan Anak kekelengenNa. ¹⁴ Erkiteken anakNa maka kita enggo itebusi, dosa-dosanta enggo ialemi Dibata. ¹⁵ Dibata la teridah, Kristus nge rupa Dibata si teridah. Ia lit ope denga ijadiken kerina si nasa lit. ¹⁶ Sabap arah Ia Dibata njadiken kerina si nasa lit subuk i Surga bage pe i doni, barang si teridah bage pe barang si la teridah, ikut pe kerina kesah si erkuasa ras merentah. Kerina si nasa lit ijadiken Dibata arah Kristus guna Kristus. ¹⁷ Leben nge Kristus lit asangken kerinana, janah i bas persadan ras Ia kerina si nasa lit e ndatken inganna si payo. ¹⁸ Ia me takal kulaNa, e me kepala Gereja. Ia me ulu kegeluhen kulaNa. Ia me si tangtangna ipekeke Dibata i bas si mate nari gelah Ia ngenca banci ngaloken ingan si mehergana i bas kai pe. ¹⁹ Arah peraten Dibata i bas diri AnakNa ringan alu serta si lit i bas diri Dibata. ²⁰ Arah Ia me pe itetapken Dibata ndameken kerina si nasa lit ras DiriNa. Dibata mereken perdamen arah kematen AnakNa i kayu persilang, gelah kerina si nasa lit, subuk i doni bage pe i Surga mulihken man baNa. ²¹ I bas sada paksa nai, sirang kam ras Dibata. Kam jadi imbangNa erkiteken perbahanen ras perukurenndu si jahat. ²² Tapi genduari, erkiteken kematen kula AnakNa, iperdameken Dibata kam ras DiriNa, gelah kam badia, bersih dingen la erpandangen i adep-adepenNa. ²³ Erkiteken si e patut kam tetap patuh i bas palas si nteguh, janah ola pulahi pengarapen si enggo idatndu asum tangtangna nai ibegindu Berita Si Meriah i bas Dibata nari e. Sabap Berita Si Meriah i bas Dibata nari enggo mbar ku belang-belang doni enda. E me sabapna maka aku, Paulus enggo jadi sekalak si erdahin. ²⁴ Genduari meriah ukurku ngenanami kiniseran guna kam. Sabap arah kiniseran kulangku, kudungi dahin si arus idahiken Kristus alu kiniseran guna kulaNa, e me perpulungen. ²⁵ Aku ibahan Dibata jadi si erdahin guna perpulungen. Dahin ibereken Dibata man bangku guna keperlunndu. Dahin e mpembarken kata Dibata alu serta, ²⁶ e me rahasia si ibuniken Dibata nai-nai nari man kerina manusia, tapi genduari ipetangkasNa man anak-anakNa. ²⁷ Sura-sura Dibata mpetangkasken rahasiaNa man anak-anakNa, uga ulina dingen belinna rahasiaNa e man kalak si labo Jahudi pe. Rahasia e, e me: Kristus lit i bas kam, janah mereken pengarapen maka kam dat bagin i bas kemulian Dibata. ²⁸ Kristus kap si ipembarken kami man kerina manusia. Kerina ipersingeti dingen iajari kami alu kepentaren, gelah ibaba kami ngadap man Dibata bagi kalak si enggo dewasa i bas persadan ras Kristus. ²⁹ Guna si enda me aku latih dingen erbebe alu gegeh ras kuasa si ibereken Kristus, si erdahin i bas aku.

¹ Ateku gelah ietehndu kuga latihna kuakap erdahin man gunandu, man guna kalak si ringan i Laodikea ras kerina kalak si langa pernah jumpa ras aku. ² Si enda kubahan gelah tetap kal ukurna bage pe gelah banci ersada ia i bas keleng ate, gelah i bas ia dem kinibayaken pengertin si serta. Alu bage ietehna rahasia Dibata, e me Kristus. ³ Kristus me kunci si nalangi kerina erta-erta kepentaren ras pemeteh Dibata si terligen. ⁴ Enda kukataken bandu gelah ola kam itokoh-tokohi ise pe si nuriken cakap mehuli man bandu. ⁵ Sabap aminna gia ndauh aku sirang ras kam, tapi ukurku ras kam kap. Meriah ukurku ngidah kuga raturna dingen tetapna kam erkiniteken man Kristus. ⁶ Bagi enggo ialokenndu Kristus Jesus jadi Tuhanndu, nggeluhlah kam ersada ras Ia. ⁷ Ruratlah kam i bas Ia, geluhkenlah geluhndu i bas Ia, janah reh gegehna lah min kinitekenndu bagi si niajarken man bandu. Rusurlah ngataken bujur man Dibata. ⁸ E maka jagalah, gelah ola ise pe nebu-nebu kam, alu kepentaren si la erguna si dem taki pacik, si reh i bas pengajaren manusia nari erpalasken pengertinna kerna biak doni enda, janah labo i bas Kristus nari. ⁹ Sabap biak Dibata si serta lit i bas Kristus, i bas kemanusianNa. ¹⁰ Janah man bandu enggo ibereken kegeluhen si serta erkiteken persadanndu ras Ia. Sabap Kristus ganjangen asangken kerina kuasa-kuasa ras kerina pemerentah-pemerentah si la teridah. ¹¹ I bas persadanndu ras Ia kam enggo isunatken, labo alu sunat si ibahan manusia, tapi alu sunat Kristus, e me kematenNa, si gunana mulahi kam i bas kuasa biak manusia si erdosa nari. ¹² Sabap asum kam iperidiken, kam ikuburken ras Kristus, janah alu peridinndu, kam ipekeke i bas si mate nari erkiteken tek kam man kuasa Dibata si enggo mpekeke Kristus i bas si mate nari. ¹³ Nai mate pertendinndu erkiteken dosa-dosandu, dingen erkiteken kam langa isunatken, e me la ngikutken perentah-perentah Dibata. Tapi genduari enggo ipegeluh Dibata kam ras Kristus, kerina dosa-dosandu enggo ialemi Dibata. ¹⁴ ImasapkenNa surat utang si isina e me kap perentah si nuntut kita. Alu makuken surat utang e ku kayu persilang, isasapken Dibata kerina tuntutenNa man banta. ¹⁵ I kayu persilang Kristus ngerampas senjata kuasa-kuasa ras pemerentah si la teridah e. IbahanNa si e jadi dedahen kalak si nterem alu maba kuasa-kuasa e selaku tabanen i bas arak-araken kemenangenNa. ¹⁶ E maka ola pelepas ise pe erbahan aturen-aturen kerna pangan ras inemenndu, ntah kerna wari-wari mehuli, ntah kerna bulan nguda, ntah kerna wari Sabat. ¹⁷ Si enda kerina kerna awih-awih si nandangi reh nge ngenca. Tapi si tuhu-tuhuna e me Kristus. ¹⁸ Ola pelepas isalahken kalak kam si ngataken maka belinen ia asangken kam erkiteken sada-sada pengenehenen. Kalak si bage pekulah-kulah ermeteruk ukur dingen meseksek nembah man malekat-malekat. Kalak si bagenda megombang alu la lit alasenna sitik pe, sabap perukurenna e me perukuren manusia. ¹⁹ Janah lanai icikepna Kristus si jadi takal kula e, e me perpulungen. I bas kepkepen Kristus, kerinana kula e ikawali dingen ipersadaken alu buku-buku ras urat-urat, janah reh belinna bagi si ngena ate Dibata. ²⁰ Kam enggo mate ras Kristus, janah enggo ibebasken i bas kuasa-kuasa si la teridah nari. Engkai maka kam nggeluh tempa-tempa kam sikerajangen doni enda? Engkai maka ikutkenndu aturen-aturen: ²¹ "Ola jemak si enda," "Ola cecap ah," "Ola kuit si deban ah!" ²² Kerina peraturen si enda ma kerna barang-barang si lanai bo lit gunana kenca ipake? Si enda aturen-aturen dingen ajaren-ajaren si ibahan manusia saja ngenca. ²³ Aturen-aturen enda, aminna pe tempa-tempa dem kepentaren i bas ersembah man malekat alu paksan, mpeteruk ukur alu pekulah-kulah, bage pe nakiti kula, tapi la lit gunana i bas naluken peraten kula.

¹ Kam enggo ipekeke Dibata ras Kristus. E maka darami lah erta-erta si i Surga, i bas ingan Kristus kundul arah kemuhen Dibata. ² Bulatkenlah ukurndu nandangi erta-erta Surga, labo nandangi perkara-perkara doni enda. ³ Sabap kam enggo mate janah kegeluhenndu si tuhu-tuhu genduari la iidah doni enda sabap terbuni ras Kristus i bas Dibata. ⁴ Kegeluhenndu si tuhu-tuhu e me kap Kristus, janah asum Ia teridah pagin, kam pe ikut teridah ras Ia, dingen dat bagin i bas KemulianNa. ⁵ Dage bunuhlah biak-biak doni si la mehuli, umpamana: erlua-lua, erlagu la mehuli, peraten daging, sura-sura si jahat, bage pe rangap (sabap rangap e me nembah man berhala). ⁶ Sabap erkiteken si e maka reh rawa Dibata nandangi kalak si la ngikutken kataNa. ⁷ Nai kam nggeluh rikutken lagu langkah si la mehuli, e me asum kam ercebah i bas kubang dosa. ⁸ Tapi genduari ambekkenlah kerina si bage rupa: merawa, ngamuk, ras segat ate. Ola cekurak ntah pe melasken cakap melket. ⁹ Ola perguak, sabap enggo itangtangindu manusia si male ras kerina kebiasanna, ¹⁰ janah genduari enggo ipakendu manusia si mbaru. Kam genduari manusia si mbaru si tetap ipebarui Dibata si njadiken kam rikutken tempasNa jine. Tujunna e me gelah itandaindu alu serta Dibata. ¹¹ E maka lanai bo erndobah kalak Jahudi ntah la kalak Jahudi, si ersunat ntah la ersunat; lanai erndobah suku-suku asing, kalak Sekyt si ianggap hina, budak ntah bebas; sabap Kristus kap kerina. Kristus ersada ras kerinana. ¹² Kam anak-anak Dibata. Kam ikelengi dingen ipilih Dibata jadi sikerajangenNa. E maka pakekenlah paken ate perkuah, mehuli, rukur meteruk, lemah-lembut dingen saber. ¹³ Ola kam pergelut dingen si alem-alemen salah adi kitik ukurndu ibahan kalak. Kam arus sialem-alemen salah bagi Tuhan enggo ngalemi salahndu. ¹⁴ Janah i babo si e kerina, arus kam sikeleng-kelengen sabap keleng ate mpersadaken kerinana alu serta. ¹⁵ Dame si ibereken Kristus i bas pusuhndu min si ngajari kam i bas erbahan keputusen-keputusenndu. Sabap guna dame kam ipilih Dibata jadi sada kula. E maka ngataken bujurlah. ¹⁶ Kata Kristus si dem alu kinibayaken nggeluh min i bas pusuh peratenndu. Siajar-ajarenlah kam alu kepentaren. Endekenlah masmur, ende-enden pujin ras ende-enden pertendin. Rendelah muji Dibata dingen ngataken bujur i bas ukurndu. ¹⁷ Dage ntah kai gia ibahanndu, subuk i bas ngerana ntah i bas perbahanen, bahanlah e i bas gelar Tuhan Jesus janah ngataken bujur man Dibata Bapa arah Ia. ¹⁸ O, kam ndehara, patuhlah man perbulangenndu, sabap bage me arusna ibahanndu selaku kalak Kristen. ¹⁹ O, kam perbulangen, kelengilah ndeharandu janah ola kasar man bana. ²⁰ O, kam anak-anak, kalak Kristen, patut kam tetap patuh man orang-tuandu sabap bage nge si ngena ate Dibata. ²¹ O, kam orang-tua ola rusursa junguti anakndu gelah ola bene ukurna. ²² O, kam budak-budak patuhlah man tuanndu i bas kai pe. Labo saja tupung ia i je tempa-tempa kam ndarami pujin i bas manusia nari saja; tapi bahanlah e alu ukurndu bulat, erkiteken kemalangenndu man Tuhan. ²³ Kai pe si ibahanndu, dahikenlah e alu tutus, tempa-tempa kam erdahin guna Tuhan, labo guna manusia. ²⁴ Ingetlah, i bas Tuhan nari kap upahndu. Ialokenndu me kai si enggo isikapken Tuhan man anak-anakNa. Sabap Kristus nge Tuanndu si tuhu-tuhu, janah kam budakNa. ²⁵ Janah kalak si erbahan salah, ise pe jelmana iukum rikutken salahna, sabap kerina manusia la erndobah i lebe-lebe Dibata.

¹ O, kam tuan-tuan, bujur dingen patutlah perbahanenndu man budak-budakndu. Ingetlah maka kam pe lit nge Tuanndu i Surga. ² Tutuslah i bas ertoto, janah sanga kam ertoto ersikaplah dingen kataken bujur man Dibata. ³ Bage pe ertotolah kerna kami, gelah ibereken Dibata man kami kesempaten si mehuli guna meritaken kataNa, guna nuriken rahasia Kristus. Sabap erkiteken si e me aku genduari i bas penjara. ⁴ Ertotolah kerna aku gelah banci aku ngerana alu mehuli, maka banci kupetangkas rahasia e bagi patutna. ⁵ Pentar min kam i bas perbahanenndu nandangi si la tek man Kristus alu makeken kesempaten si lit alu mehuli. ⁶ Mehuli dingen ngena min ate kalak cakapndu. Janah arus ietehndu mereken jabap si tepat man ise pe. ⁷ Gelah ietehndu kuga percibalku, ituriken Tikikus me man bandu kerna aku. Seninanta Tikikus enda, kalak tutus i bas dahin Tuhan. ⁸ Kusuruh ia ndahi kam nuriken kerna percibal kami kerina, gelah meriah iakapndu. ⁹ Ikut pe ras ia seninanta si Erguna. Ia i bas golongenndu nari janah ia kalak tutus. Kalak enda me nurikenca man bandu kerina si jadi i jenda. ¹⁰ Seninanta Aristarkus, temanku i bas penjara, nehken salam man bandu, bage pe Markus, bebere Barnabas. (Enggo ibegindu berita kerna ia, gelah ia ialo-alondu pagi asum ia reh.) ¹¹ Josua pe, si igelari Justus, nehken mejuah-juah man bandu. Kalak enda ngenca teluna kalak Jahudi si enggo tek man Kristus si erdahin ras aku i bas Kinirajan Dibata. Mbelin kal penampatna man bangku. ¹² Mejuah-juah nina Epapras. Ia i bas golongenndu nari janah ia enggo jadi si erdahin i bas dahin Kristus Jesus. Rusur kam itotokenna man Dibata alu tutus ate. Ipindokenna man Dibata gelah tetap ukurndu, erpemeteh kam, la monce-once kinitekenndu, bage pe gelah patuh kam i bas si ngena ate Dibata. ¹³ Kuidah tutus kal atena erdahin man gunandu bage pe man guna kalak si ringan i Laodikea ras i Hierapolis. ¹⁴ Lukas, dokter si ikelengi kita ras Demas nehkenmejuah-juah man bandu. ¹⁵ Kataken mejuah-juah i bas kami nari man senina-seninanta si sada kiniteken si ringan i Laodikea, bage pe man Nimpa ras perpulungen si erbahan kebaktin i rumahna. ¹⁶ Kenca iogendu surat enda usahakenlah maka i perpulungen Laodikea pe iogeken. Janah raduken si e, ogeken pe surat si man perpulungen Laodikea si ikiremkenna pagi man bandu. ¹⁷ Janah kataken man Arkipus, "Usahakenlah ndungisa dahin si ibereken man bandu i bas ndahiken dahin Tuhan." ¹⁸ Alu tanku kusuratken kata pendungi enda: Mejuah-juah i bas aku nari, Paulus. Ola lupa maka aku sangana i bas penjara! Lias ate Dibata rembak ras kam gelah.