3 JOHANES

¹ I bas Pertua nari. Man kekelengenku Gayus, si kukelengi tuhu-tuhu. ² O temanku si kukelengi, ertoto aku gelah kai si mehuli jadilah man bandu, janah mejuah-juahlah bagi kueteh maka kegeluhen pertendinndu pe mehuli. ³ Meriah kal kuakap kenca reh piga-piga kalak seninanta kalak Kristen, janah nuriken man bangku kuga bujurna kam bagi biasana pe kam nggeluh i bas kebujuren nge. ⁴ La lit si banci erbahanca ukurku teriahen asangken megi anak-anakku nggeluh i bas kebujuren. ⁵ Temanku si kukelengi, tutus kal atendu ndahiken dahin si ilakokenndu guna senina-seninanta kalak Kristen, aminna gia pe ia la itandaindu. ⁶ Enggo isaksiken senina-seninanta e i lebe-lebe perpulungen si i jenda kerna kekelengenndu e. Mehuli kal adi isampatindu ia rikutken si ngena ate Dibata i bas ia nerusken perdalanenna. ⁷ Sabap kalak enda lit i bas perdalanen guna Kristus, alu la ngaloken kai pe i bas kalak perbegu nari. ⁸ Dage kita kalak Kristen rutang nampati kalak si bage, gelah kita pe ikut muat bagin i bas pembarken Berita Si Meriah i bas Dibata nari e. ⁹ Pernah kukirim sada surat man perpulungen enda, tapi Diotrepes si pebeluh-beluhken minpin e, la mperdiateken aku. ¹⁰ Erkiteken si e, sanga aku reh pagi ku bongkar nge kai si enggo ibahanna e, e me penggombangi ras cakap si la tuhu si ikatakenna kerna kami. Labo terjeng je saja; lebih asa si e la ia nggit ngalokenca senina-seninanta kalak Kristen e adi ia reh, janah iambatina pe kalak gelah ola ngaloken senina-seninanta e, dingen iusahakenna pedaratsa i bas perpulungen nari! ¹¹ Teman si kukelengi, ola usih kai si jahat, tapi usihlah kai si mehuli. Ise erbahan si mehuli asalna i bas Dibata nari; ise si erbahan jahat la enggo idahna Dibata. ¹² Kerina kalak mujiken Demetrius; kebenaren e jine pe mujiken ia. Kami pe ikut nambahi kesaksin e, janah ietehndu maka kai si ikataken kami e tuhu kap. ¹³ Melala denga ateku si kuturiken man bandu, tapi la kubahan e alu pena ras tinta. ¹⁴ Kuarap maka lanai ndekahsa banci kita jumpa, gelah banci kita ngerana sebabah. ¹⁵ Kemalemen ate ras kam gelah. Teman-teman si i jenda ngataken mejuah-juah man bandu. Kataken pe mejuah-juah man teman-teman si i jena sada-sadai.