2 TESALONIKA

¹ Surat enda i bas kami nari, Paulus, Silas ras Timotius. Surat enda man perpulungen i Tesalonika, si enggo jadi sikerajangen Dibata Bapanta ras Tuhan Jesus Kristus. ² Ibereken Dibata Bapa ras Tuhan Jesus Kristus min lias ate ras kemalemen ate man bandu. ³ O senina-senina, patut iakap kami ngkataken bujur man Dibata katawari pe erkiteken kam. Enggo patut ibahan kami bage, sabap reh bagesna kal kinitekenndu dingen reh belinna keleng atendu sapih-sapih kam. ⁴ Perbahan si e ipujiken kami kam i bas perpulungen-perpulungen Dibata. Ipujiken kami kam, sabap i tengah-tengah kepiceten ras kiniseran si reh man bandu tetap kam megenggeng dingen tek man Kristus. ⁵ Si enda kerina ngataken, maka bujur ukumen si reh i bas Dibata nari, sabap erkiteken kiniseran si reh man bandu, ibahan Dibata kam metunggung bengket ku bas KinirajanNa. ⁶ Idalanken Dibata me pagi si bujur: ibahanNa me kiniseran man kalak si erbahanca kam ngenanami kiniseran, ⁷ janah man bandu si ngenanami kiniseran e, ibereken Dibata kemalemen ate, bage pe man kami. Si enda idalanken Dibata asum reh pagi Tuhan Jesus i Surga nari ras malekat-malekatNa si erkuasa, ⁸ dingen ras api si ernala-ernala, guna ngukum kalak si la nggit nandai Dibata, si la patuh nandangi Berita Si Meriah kerna Tuhanta Jesus. ⁹ Kalak enda pagi iukum Dibata bene rasa lalap. Ipedauh pagi i lebe-lebe Tuhan nari bage pe i bas kuasa Tuhan si mbelin nari, ¹⁰ asum Tuhan reh i bas wari e guna ngaloken pujin i bas kerina perpulungenNa nari, bage pe guna ipehaga kerina kalak si tek man baNa. Kam pe pagi ikut ras perpulungen e, sabap tek kam Berita Si Meriah si enggo ipeseh kami man bandu. ¹¹ Erkiteken si e me maka katawari pe ertoto kami kerna kam. Ipindo kami man Dibatanta gelah ipetunggung Dibata kam guna kegeluhen si erkiteken si e kam ipilihNa. Mbera-mbera Dibata, alu kuasaNa, nehken kerina sura-surandu guna si mehuli, bage pe kerina usahandu si erpalasken kiniteken man Kristus sertalah min ibahanNa. ¹² Alu bage ipehagandu me Tuhanta Jesus, janah kam pe ipehagaNa, erkiteken lias ate Dibatanta ras Tuhan Jesus Kristus.

¹ Kerna kerehen Tuhanta Jesus Kristus bage pe kerna kita ipepulung ersada ras Ia, kupindoken man bandu o senina-senina: ² Ola mesunahsa bene ukurndu adi ikataken kalak maka Wari Tuhan e enggo seh. Banci jadi si enda ikataken kalak si sangana ikuasai kesah-kesah, ntah kalak si ngajar. Ntah pe banci jadi ikataken kalak maka pernah isuratken kami bage i bas surat kami. ³ Ola bere kam itipu kalak i bas kai pe. Sabap Wari Tuhan e langa bo seh adi langa kin seh pemberontaken si perpudi dingen teridah si Jahat si itetapken ku bas naraka e. ⁴ Ilawan si Jahat e me pagi kerina si isembah manusia bage pe kerina dibata-dibata manusia. Ipeganjangkenna bana i babo si e kerina. Lebih asangken si e bengket dingen kundul pe ia i bas Rumah Pertoton Dibata janah ikatakenna ia Dibata. ⁵ Ma ingetndu denga kin si enda kerina enggo kuturiken bandu asum aku i tengah-tengahndu? ⁶ Amin bage gia lit si ngolangisa maka la jadi si e genduari, janah ietehndu nge kai si ngolangisa e. Denggo, i bas paksa si itetapken Dibata teridah me si Jahat e. ⁷ Kejahaten si terbuni e mulai erdahin, tapi kai si nandangi jadi e labo jadi adi langa kin iagui si ngolangisa e. ⁸ Kenca bage maka teridah si Jahat e. Jenari asum Tuhan Jesus reh ibunuhNa me si Jahat e alu kesah si ndarat i bas babahNa nari, janah ikernepkenNa alu kerehenNa si mulia. ⁹ Si Jahat e pagi reh alu kuasa Iblis. Ibahanna pagi erbage-bage tanda sengget ras tanda-tanda si palsu bage pe kejadin-kejadin si erbahanca mamang ate. ¹⁰ Itipuna pagi alu pertipun si Jahat kalak si nandangi bene. Kalak e bene erkiteken la ia nggit ngaloken dingen ngkelengi pengajaren si tuhu-tuhu, e me pengajaren si arah e ia maka selamat. ¹¹ Erkiteken persuruhen Dibata erdahin i bas ia kuasa si erbahanca papak, gelah tek ia kai si la tuhu. ¹² E maka, iukum Dibata kerina kalak si la tek nandangi pengajaren si tuhu-tuhu e, e me kalak si muat kesenangen i bas dosa. ¹³ O senina-senina, si ikelengi Tuhan, katawari pe arus ikataken kami bujur man Dibata erkiteken kam. Sabap kam ipilih Dibata jadi si pemenana guna iselamatken alu kuasa Kesah Si Badia dingen alu kinitekenndu nandangi pengajaren si tuhu-tuhu e. Ibahan Dibata kam jadi anak-anak si iserapken guna Ia. ¹⁴ Kam ipilih Dibata arah Berita Si Meriah si iberitaken kami man bandu. IpilihNa kam gelah ialokenndu baginndu i bas Tuhanta Jesus Kristus. ¹⁵ E maka, o senina-senina, tetaplah tek dingen ernalem nandangi pengajaren si tuhu-tuhu, si iajarken kami man bandu subuk asum kami ngajar bage pe arah surat kami. ¹⁶ Tuhanta Jesus Kristus, ras Dibata Bapanta, si ngkelengi kita dingen arah lias ateNa enggo mereken pengapul si tetap ras pengarapen si paguh man banta, ¹⁷ ipetetapNa min ukurndu janah ipegegehiNa kam guna ndahiken dingen nuriken kerina si mehuli.

¹ Kedungenna o senina-senina, ertotolah kerna kami, gelah Kata Tuhan pedas min reh mbarna dingen ialoken kalak si nterem bagi enggo jadi i tengah-tengahndu. ² Ertoto pe min gelah ipulahi Dibata kami i bas kalak si kejam dingen si jahat nari. Sabap labo kerina kalak tek nandangi berita e. ³ Tapi Tuhan e tetap setia. IpegegehiNa kam dingen ikawaliNa i bas si jahat nari. ⁴ Tetap ukur kami ngenehen kam ibahan Tuhan. Tek kami maka idalankenndu nge kai si enggo ikataken kami janah terus pe idalankenndu. ⁵ Mbera-mbera Tuhan negu-negu pusuhndu guna ngkelengi Dibata dingen megenggeng kam alu kinigenggengen si ibereken Kristus. ⁶ I bas gelar Tuhan Jesus Kristus ikataken kami man bandu o senina-senina, sirangindulah kerina senina-senina si perkisat, si la nggit ngikutken ajaren si ibereken kami. ⁷ Ietehndu maka arus idalankenndu bagi si ibahan kami. Labo kami perkisat asum kami i tengah-tengahndu. ⁸ La ipan kami nakan kalak la nggalar. Tapi erdahin kami alu latih. Erdahin kami suari ras berngi gelah ola lit i tengah-tengahndu si mberat iakapna erkiteken kami. ⁹ Si enda ibahan kami, labo perbahan la lit hak kami mindo penampat man bandu; si enda ibahan kami gelah jadi usihen si mehuli man bandu. ¹⁰ Asum kami ras kam usur ikataken kami man bandu, "Kalak si la nggit erdahin ola bere man." ¹¹ Si enda ikataken kami perbahan ibegi kami lit piga-piga i bas kam perkisat, si la kai pe ibahanna seakaten ncampuri sikerajangen kalak. ¹² I bas gelar Tuhanta Jesus Kristus, ikataken kami man kalak si bagenda dingen ipersingeti kami maka arus idalankenna kegeluhen si metunggung dingen erdahin ncariken keperlunna. ¹³ Tapi kam, o senina-senina, ola erleja-leja erbahan si mehuli. ¹⁴ Banci jadi lit i tengah-tengahndu kalak si la nggit ngikutken kai si ikataken kami i bas surat enda. Adi lit kin perdiatekenlah ia janah olanai perkuanken gelah mela iakapna. ¹⁵ Tapi ola kam erpengakap maka ia imbang; tapi ajarken ia bagi sekalak senina. ¹⁶ Mbera-mbera Tuhan, ulu kemalemen ateta, mereken kemalemen ate man bandu katawari pe dingen i bas kai pe. Tuhan min nemani kam kerina. ¹⁷ Alu tanku kusuratken bagin enda: Mejuah-juah i bas aku nari, Paulus. Bagenda me aku nandatangani kerina suratku; bagenda me aku nuratkenca. ¹⁸ Lias ate Tuhanta Jesus Kristus nemani kam kerina.