2 PETRUS

¹ Surat enda i bas aku nari, Simon Petrus, suruh-suruhen dingen rasul Jesus Kristus. Surat enda man senina-senina si bali ras kami enggo ndat kengasupen gelah tek man Jesus Kristus, e me Dibata ras Singkelini kita. Ia me si enggo mereken kengasupen si meherga e man banta, sabap ateNa erbahan kai si benar. ² Dibatalah si mereken dem lias ate ras kemalemen ate man bandu, erkiteken enggo itandaindu Dibata ras Jesus Tuhanta. ³ Dibata enggo ndilo kita gelah kita dat bagin i bas kemulian ras kiniulinNa. Alu kuasaNa ras arah penandainta kerna Ia enggo iberekenNa man banta kai keperlunta guna nggeluh nembah man baNa. ⁴ Arah padan si mbelin dingen meherga si iberekenNa man banta e, ngasup kam mulahi bandu i bas kerincuhen daging nari, si ncedaken si lit i doni enda, jenari dat bagin kam i bas kinidibatanna. ⁵ Erkiteken si e usahakenlah maka irakutkenndu ku kinitekenndu kai si mehuli, tapi aminna gia enggo ibahanndu kai si mehuli, rakutken ka lah ku perbahanen si mehuli e pemeteh kerna Dibata. ⁶ Adi enggo lit pemetehndu kerna Dibata, arus maka irakutkenndu ku pemetehndu e penguasan diri; janah adi enggo ngasup kam ngkuasai dirindu, rakutken ka ku je ate megenggeng. Adi enggo lit i bas kam ate megenggeng, arus irakutkenndu ku ate megenggeng e ate tutus er-Dibata. ⁷ Tapi aminna gia enggo lit i bas kam ate tutus ngikutken sura-sura Dibata, rakutken ka lah ku je ate keleng man teman sapih-sapih Kristen; janah adi enggo lit i bas kam ate keleng nandangi teman-teman sapih-sapih Kristen, arus maka irakutkenndu ku je ate keleng nandangi kerina manusia. ⁸ Enda me kerina biak-biak si iperlukenndu, janah adi biak-biak enda turah alu mehumur i bas kam, si e erbahanca maka pemetehndu kerna Tuhanta Jesus Kristus nggeluh janah erbuah. ⁹ Tapi kalak si la lit i bas ia biak-biak si bage, pentang kap mata perukurenna; la ia ngasup ngidahsa, janah enggo ilupakenna maka dosa-dosana si enggo lepas enggo ibersihken. ¹⁰ Dage, o senina-seninangku, usahaken tole gelah pendilo ras pemilihen Dibata nandangi kam tetap erteguhna. Adi bage perbahanndu, ndigan pe la kam banci ndabuh ku bas dosa. ¹¹ Alu bage ibereken man bandu dem hak bengket ku bas Kinirajan si la ermasap-masap, Kinirajan Tuhanta ras Si Engkelini kita Jesus Kristus. ¹² Erkiteken si e rusur ateku kam kupersingeti kerna perkara-perkara si enda, aminna pe enggo ietehndu janah kam tetap paguh i bas berita si rehna i bas Dibata nari si enggo ialokenndu. ¹³ Adi nggeluh dengalah aku, rutang kuakap aku mpersingeti kam kerna si enda kerina. ¹⁴ Sabap kueteh maka lanai ndekah mate me aku, sue ras si enggo ikataken Tuhanta Jesus Kristus alu terang-terang man bangku. ¹⁵ Dage, asa ngasupku kuusahaken nikapken dalan man bandu gelah iingetndu katawari pe si enda kerina kenca aku enggo mate. ¹⁶ Ipebetehken kami man bandu uga muliana kerehen Tuhanta Jesus Kristus. Si e la ituriken kami erpalasken turi-turin si iban-ban manusia. Alu mata kami jine nge kemulianNa enggo idah kami. ¹⁷ I je kap kami sanga Dibata Bapa mereken kehagan ras kemulian man baNa. Asum si e reh sora man baNa i bas Kemulian si Meganjangna nari nina, "Enda me Anakku si Kukelengi, senang kal ukurKu ibahanna!" ¹⁸ Kami jine megi sora e reh i Surga nari, sanga kami ras Ia i das deleng si badia e. ¹⁹ Erkiteken si e reh tekna kami nandangi berita si iberitaken nabi-nabi. Seh kal ulina adi iperdiatekenndu berita e, sabap berita e desken sada lampu si ersinalsal i bas ingan si gelap, seh wari enggo terang janah terang bintang erpagi-pagi ersinalsal i bas pusuhndu. ²⁰ Tapi i babo si e kerina, ingetlah enda: nubuat-nubuat si lit i bas Pustaka Si Badia la banci iterangken rikutken penggejapen sekalak-sekalak. ²¹ Sabap la pernah lit kalak ngasup nehken berita nubuat arah peratenna jine. Tapi si njemba kalak ngerana nehken berita si rehna i bas Dibata nari e me Kesah Si Badia.

¹ I bas paksa si lepas lit nabi-nabi perguak i tengah-tengah anak-anak Dibata. Bage pe nandangi reh me ku tengah-tengahndu guru-guru perguak. Guru-guru perguak e erbuni-buni maba ajaren-ajaren si ncedai ras mecah-mecah perpulungen. Janah la ia ngakui Tuanna si enggo nukur ia. Alu bage ilegina kap si erbahanca ia pedas kernep. ² Aminna bage gia melala nge si ngikutken lagu langkahna si la meteh mela e; janah erkiteken lagu langkah guru-guru perguak e, nterem kalak ngerana megombang nandangi Dalan si Benar si ikuti kita e. ³ Alu merangap guru-guru perguak e ncari untung arah nuriken turi-turin si iban-banna saja. Ukumen man kalak enda enggo ndekah me isikapken, janah si erbahanca ia kernep enggo nimai! ⁴ Malekat-malekat si erdosa pe labo pulah i bas ukumen Dibata nari, tapi ibenterkenNa ku naraka. I je me malekat-malekat e iranteken i bas lubang si mbages si lanai kal langlang gelapna, nimai Wari Pengukumen. ⁵ Bage ka pe kerna doni i bas paksa si nai; la ipelepas Dibata ia pulah i bas ukumen nari. Irehken Dibata banjir si mbelin ku doni si ingani manusia si la nggit nembah man Dibata i bas paksa si e. Nuah ras pitu kalak si debanna nge ngenca si iselamatken Dibata, erkiteken ipembarken Nuah berita si ngena ate Dibata. ⁶ Kuta-kuta Sodom ras Gomora pe bage ka nge. Ikernepken Dibata kuta-kuta e alu api, gelah jadi sada usihen kerna kai si pagi jadi nandangi kalak si la nggit nembah man Dibata. ⁷ Tapi Dibata nelamatken Lut erkiteken ia ngikutken sura-sura Dibata; ia isuhsahi lagu langkah kalak si la meteh mela si la radat. ⁸ I tengah-tengah kalak si bage, Lut, kalak si bujur e, nggeluh alu pusuh si tersiksa, erkiteken tep-tep wari ia megi janah ngidah lagu langkah kalak si la meteh mela e. ⁹ Dage ieteh Tuhan nge uga engkelini kalak si tek man baNa i bas percuban-percuban nari, janah ietehNa ka pe kuga ngukum kalak jahat ngayaksa seh pagi Wari Pengadilen, ¹⁰ terlebih-lebih kalak si ngikutken kerincuhen dagingna si erbahanca ia melket janah la nggit iaturken Tuhan. Bage pangna ras metudana guru-guru perguak e seh maka kerina mahluk-mahluk si mulia pe la alang-alangen nggombangisa! ¹¹ Sedangken malekat-malekat si ndauh gegehen ras belinen kuasana asangken guru-guru perguak e la nalahken mahluk-mahluk si mulia e alu nggombangisa i adep-adepen Tuhan. ¹² Tapi pengelako guru-guru perguak e bali ras rubia-rubia si la rukur si tubuh guna itangkap ras ibunuh; kasa si la iangkana ipandangina ras igombangina. Nandangi ikernepken nge ia kerina bagi rubia-rubia merawa. ¹³ Nandangi ibalasken me man bana kiniseran sue ras kiniseran si enggo ibahanna nandangi kalak si deban. Si jadi kesenangen man bana e me i ciger wari e pe ilakokenna kai saja pe si banci pepuasken kerincuhen dagingna; asum kam man-man ras ia, kalak enda desken rintep si melket si erbahanca kam mbau, janah tupung si e meriah iakapna nipu kam. ¹⁴ La ia erleja-leja erbahan dosa, e maka kerincuhenna e me, ngenehen diberu-diberu alu mata perlua-lua. Kalak si la tetap ukurna, igodana. Pusuh peratenna enggo terbiasa merangap. Kalak enda kalak si kena sumpah Dibata kap. ¹⁵ Sabap la nggit ia ngikutken dalan pinter, e maka papak ia. Iikutkenna lagu langkah Bileam anak Beor nai. Bileam enda merincuh kal ndatken upah i bas perbahanenna si jahat nari. ¹⁶ Tapi dat persinget ia kerna kejahatenna sanga kaldena si biakna kin la banci ngerana e ngerana alu cakap manusia, gelah olanai iteruskenna perbahanenna si mehado e. ¹⁷ Guru-guru perguak e bali ras sumur si enggo kerah; ia bali ras remang si iembusken angin si meter. Dibata enggo nikapken sada ingan si seh kal gelapna man kalak enda. ¹⁸ Rananna seh kal ganjangna, tapi la lit isina; ipakena kerincuhen daging si la meteh mela e guna nidingi kalak si mbaru denga pulah i tengah-tengah manusia-manusia si geluhna enggo papak gelah kena ragum. ¹⁹ Erpadan ia mereken kebebasen, aminna ia jine iperbudak kebiasan-kebiasan si ncedaken, sabap kai si naluken sekalak jelma, ia jadi budak si naluken ia e kap. ²⁰ Adi kalak enggo pulah i bas kemelketen doni enda nari erkiteken enggo itandaina Tuhanta ras Si Engkelini kita Jesus Kristus, janah kenca e mulihken ka ia kena siding ras ikuasai kemelketen doni enda, maka kedungenna kecibal kalak si bage ndauh melketen asangken si tangtangna ndube. ²¹ Madin kalak si bage la pernah nandai dalan si ngena ate Dibata asangken itandaina, tapi dungna la nggit ngikutken perentah si badia si ibereken man bana. ²² Kai si ilakoken kalak enda payo kal bagi si ikataken perumpaman enda, "Biang ipanna mulihken kai si enggo iutahkenna," janah "Babi si enggo iperidi mulihi ercebah i bas kubang."

¹ O, teman-temanku si kukelengi, enda me suratku si peduaken si kubahan man bandu. I bas surat e duana enggo kucubaken pekeke perukuren si bersih i bas kam alu mpersingeti kai-kai si enggo ietehndu. ² Ateku gelah iingetndu kata-kata si enggo ibelasken nabi-nabi si badia nai ras perentah si rehna i bas Tuhan dingen Si ngkelini nari si enggo ibereken rasul-rasulndu man bandu. ³ I babo si e kerina, arus iangkandu maka i bas wari si pendungi e pagi, reh me kalak si kegeluhenna ikuasai kerincuhen dagingna. Alu megombang, ⁴ nungkun ia nina, "Ma kin erpadan Tuhan maka Ia reh? I ja dage Ia? Bapa-bapanta enggo mate, tapi kerina bali denga ka nge ras asum doni enda ijadiken!" ⁵ Alu sengaja la ia nggit mperdiatekenca maka langit ras doni enggo ijadiken nai alu perentah Dibata. Doni ijadiken i bas lau nari, janah alu lau. ⁶ Bage pe maka alu lau ka, e me lau banjir si mbelin doni si nai enggo ikernepken. ⁷ Kata Dibata e ka nge miara langit ras doni si lit genduari enda guna ikernepken alu api. Langit ras doni e ipiara ngayak seh paksana kalak si la tek man Dibata iukum ras ikernepken. ⁸ Tapi, o teman-temanku si kukelengi, ola kam lupa si sada enda: I bas Tuhan sada wari bali kap ras seribu tahun janah seribu tahun bali ras sada wari. ⁹ Tuhan la kap melet ngelakoken kai si enggo ipadankenNa, bagi lit kalak si erpengakap bage. Tapi saber ia nandangi kam, sabap la ateNa sekalak pe ikernepken, tapi gelah kerina min jera i bas dosa-dosana nari. ¹⁰ Tapi wari kerehen Tuhan bali ras kerehen sekalak penangko. I bas wari e lesap me langit alu sora si erlenggur janah barang-barang si i langit meseng dingen ikernepken, janah doni ras kerina isina lesap me. ¹¹ Adi si enda kerina bagenda me jadina, kuga nge arusna kegeluhenndu? Kam arus nggeluh bagi si ngena ate Tuhan, janah erpengendes man Dibata, ¹² sanga itimaindu Wari Dibata janah ngusahakenca gelah reh pedasna Ia reh. I bas Wari e langit keri meseng, janah erkiteken lasna barang-barang si i langit jadi melebur. ¹³ Tapi kita nimai kai si enggo ipadnken Dibata e me langit si mbaru ras doni si mbaru; i je me inganna keadilen. ¹⁴ Erkiteken si e, o teman-temanku si kukelengi, i bas kam nimai Wari e, pala-palailah gelah kam bersih dingen la erpandangen i lebe-lebe Dibata janah nggeluh alu dame ras Ia. ¹⁵ Bahanlah maka kesabaren Tuhan e jadi kesempaten man bandu gelah kam terkelin, bagi si enggo isuratken seninanta Paulus si ikelengi kita man bandu, rikutken kepentaren si ibereken Dibata man bana. ¹⁶ Kerna si enda me ituriken seninanta Paulus e i bas kerina surat-suratna. Tuhu lit piga-piga si mesera i bas suratna e, janah kalak si la erpemeteh ras si la tetap ukurna enggo pegeduk isi surat e, bagi ibahanna nandangi piga-piga bagin i bas Pustaka Si Badia. Kalak si bagenda perbahanenna ilegina kap si erbahanca ia bene. ¹⁷ Tapi kam o teman-temanku, enggo kap leben iangkandu si enda. E maka metengetlah gelah ola kam papak ibahan kesalahen-kesalahen kalak si la meteh aturen e, jenari ndabuh kam i bas inganndu si nteguh nari. ¹⁸ Tapi tetaplah kam ertambah-tambah i bas lias ate Dibata bage pe ertambahna pemetehndu kerna Tuhan ras Singkelini kita, Jesus Kristus. Terpujilah Ia genduari seh rasa lalap. Amin!