2 JOHANES

¹ I bas Pertua nari. Man Kemberahen si ipilih Dibata ras anak-anakna si kukelengi. Labo aku saja si erkeleng ate man bandu, tapi pe kerina kalak si meteh kai si benar ngkelengi kam. ² Sabap kai si benar e ringan i bas kita janah lit i bas kita seh rasa lalap. ³ Dibata Bapa ras Jesus Kristus Anak Bapa e mereken lias ate, perkuah ate, ras kemalemen ate man banta gelah; kerina si enda jadi sikerajangenta i bas kita nggeluh alu bujur ras dem keleng ate. ⁴ Seh kal riahna kuakap meteh maka lit anak-anakndu si nggeluh i bas kebujuren bali ras si iperentahken Bapa e man banta. ⁵ Janah genduari kupindo man bandu o, Kemberahen: Sikeleng-kelengenlah kita. Labo perentah si mbaru si kusuratken man bandu enda, tapi si enggo lit i bas kita mula-mulana nari kin. ⁶ Kekelengen e ertina nggeluh sue ras perentah-perentah Dibata. Perentah e, sue ras si enggo ibegindu mula-mulana nari, arus jadi palas kegeluhenndu. ⁷ Nterem penipu enggo merap i doni enda si la ngakui maka Jesus Kristus reh jadi manusia. Kalak si bage penipu janah musuh Kristus kap. ⁸ Jagalah bandu, gelah ola bene kai si enggo idahikenndu e, tapi dem pagi ialokenndu upahndu. ⁹ Kalak si la ringan i bas ajaren Kristus, tapi ndarat i jenari, ia la er-Dibata. Ise si ringan i bas ajaren e, Bapa ras Anak e lit i bas ia. ¹⁰ Dage, adi lit kalak si ndahi kam la maba ajaren Kristus e, ola aloken ia i bas rumahndu, janah ola kataken mejuah-juah man bana. ¹¹ Sabap ise si ngatakenca mejuah-juah man kalak si bage, ia ikut i bas perbahanenna si jahat e. ¹² Melala kal ateku si kuturiken man bandu, tapi la pada kulakoken e alu kertas ras tinta, tapi kuarap maka banci kudahi kam janah ngerana sebabah ras kam, gelah dem kal keriahenta. ¹³ Anak-anak seninandu, si enggo ipilih Dibata, ngataken mejuah-juah man bandu.