2 KORINTI
11 Surat enda i bas aku nari, Paulus, Rasul Kristus Jesus erpalasken peraten Dibata, ras i bas seninanta Timotius nari. Surat enda man perpulungen anak-anak Dibata i Korinti, ras man kerina kalak si iserapken jadi sikerajangen Dibata i belang-belang propinsi Akaya. 2 Lias ate dingen kemalemen ate i bas Dibata Bapanta ras i bas Tuhan Jesus Kristus nari man bandu gelah. 3 Bujur man Dibata, Bapa Tuhanta Jesus Kristus, Bapa si perkuah, Dibata sumbul kerina pengapul. 4 Enggo iapulina kami i bas kerina kiniseran kami, gelah ngasup kami ngapuli kalak si lit i bas erbage-bage kiniseran. Si enda banci ilakoken kami erpalasken pengapul si ialoken kami i bas Dibata nari. 5 Bali ras kiniseran Kristus sampur seh man kami, bage me pe sampur ka pengapul Dibata ialoken kami arah Kristus. 6 Adi kami ngenanami kiniseran, si e guna ngapuli kam dingen guna keterkelinenndu kap. Adi kami iapuli Dibata, e pe erguna jadi pengapul man bandu, gelah e njadiken kam megenggeng adi inanamindu kiniseran bagi si inanami kami genduari e. 7 Pengarapen kami kerna kam enteguh kap, sabap ieteh kami maka bagi kam ikut ngenanami kiniseran, bage pe ikut nge kam ngaloken pengapul. 8 O senina-senina, la ate kami la ietehndu kerna kiniseran si inanami kami i Propinsi Asia. Kiniseran si nindih kami e, lebih asa si ngasup kami nggengkenca, seh maka lanai lit arapen kami nggeluh. 9 Bage beratna, seh maka enggo iakap kami idabuhken ukumen mate man kami. Tapi si enda jadi gelah ola kami ernalem man diri kami, tapi man Dibata saja, si mpekeke kalak si enggo mate. 10 Enggo ipulahiNa kami i bas erbage-bage ancamen kematen si ngeri nari, janah tetap nge kami ipulahiNa; enggo itamaken kami pengarapen kami man baNa maka Ia ka nge tole si mulahi kami. 11 Kam pe isampatindu ka kami alu pertoton. Alu bage, erkiteken nterem kalak ertoto guna kami, nterem ka pe kalak si ngataken bujur erkiteken kami, sabap Dibata enggo encidahken lias ateNa man kami. 12 Si erbahanca megah iakap kami e me: pusuh peraten kami naksiken maka i bas hubungen kami ras kalak si deban, terlebih-lebih ras kam, perbahanen kami tetap erpalasken kinibujuren ras ukur si bersih i adep-adepen Dibata. Si enda ilakoken kami labo erkiteken kepentaren kami selaku manusia, tapi erkiteken lias ate Dibata. 13 - 14 Kai si isuratken kami man bandu e me si banci iogendu ras iantusindu saja nge ngenca. Tapi aminna pe langa payo kal kami itandaindu, ngarap aku maka kedungenna banci kami itandaindu alu serta, gelah bagi megahna iakap kami kerna kam, bage ka pe megahna iakapndu kerna kami i bas wari kerehen Tuhanta Jesus. 15 Erkiteken tek aku maka mehuli kal ukurndu man bangku, e maka ersura-sura aku maka kam me lebe kudahi, gelah banci kam dua kali ndatken pasu-pasu. 16 Sabap mbarenda ateku ndahi kam muat aku ku Makedoni bage pe kenca aku mulih i Makedoni nari, gelah ipeberkatndu aku ku Judea. 17 Bali kin aku ras sanggar uruk-uruk erkiteken la sahun rencanangku e? Ntah percakap longgar kin iakapndu aku erbahan rencana? "Ue!" ningku tempa, tapi i bas ukurku "Lang!"? 18 I bas gelar Dibata si setia, padan kami man bandu labo "Ue" tapi ngataken "Lang". 19 Sabap Jesus Kristus Anak Dibata, si kuberitaken ras Silas bage pe Timotius man bandu, labo biakna "Ue" ras "Lang", tapi i bas Ia tetap nge "Ue". 20 Sabap kerina padan-padan Dibata enggo "iueken" i bas Jesus. Erkiteken si e me maka arah Jesus sikataken "Amin", guna kemulian Dibata. 21 Dibata sendiri jine si enggo mereken man kami ras man bandu ingan si nteguh i bas Kristus. Dibata me si enggo nangkuhken kita. 22 Dingen si enggo encap kita, tandana kita enggo jadi sikerajangenNa, janah selaku panjarna enggo iberekenNa Kesah Si Badia ku bas pusuhta. 23 Kulebuh Dibata jadi saksingku, itandaiNa kap pusuhku. Maka la aku surung reh ku Korinti e me gelah ola kam kena ukumen. 24 La ate kami engkuasai kinitekenndu; sabap ieteh kami maka tetap nge paguh pertedisndu i bas kiniteken. Tapi ras-ras kita erdahin guna keriahenndu.
21 Em sabapna maka enggo kuputusken la aku sahun reh ndahi kam gelah ola arah kerehenku e ka nambahi ate menek. 2 Sabap adi menek atendu kubahan, ise nari nge erbahanca ukurku meriah? Tentu kam ka nge ngenca, si enggo kubahan menek atendu e. 3 Erkiteken si e me maka pernah mbarenda kubahan surat man bandu, gelah kune aku reh ndahi kam, la menek ateku ibahan kalak si kin arusna erbahan kuakap meriah. Sabap tek aku maka adi meriah ukurku, kam pe kerina meriah nge ukurndu. 4 Surat e kubahan alu ate ceda dingen pusuh sedak, rikut pe iluhku mambur erdire-dire. Kuturiken enda labo ateku gelah menek atendu, tapi gelah ietehndu maka tuhu-tuhu keleng kal ateku man bandu. 5 Adi lit kalak si erbahanca turah ate menek, si tuhuna kal labo ateku si ibahanna menek e, tapi kerina nge kam ibahanna ermenek ate, aminna deba la gia mekeleksa. Si enda kukataken gelah ola mberatca ukumen si ibereken man bana. 6 Teremen i bas kam enggo mereken ukumen si bage man bana. Enggo me bias si e saja pe. 7 Dage genduari arus ialemindu salahna ras ngapuli ia gelah ola ia gedap ibahan menek ate si bage sangatna. 8 Kupindoken man bandu gelah icidahkenndu maka tuhu-tuhu kam erkeleng ate man bana. 9 Surat e kubahan mbarenda man bandu, sabap ateku nguji kam ntah kin kam patuh man bangku i bas kerinana. 10 Adi ialemindu kalak si ersalah, aku pe kualemi nge ia. Sabap adi aku ngalemi salah kalak -- adi lit kin si perlu ialemi -- si e kulakoken i lebe-lebe Kristus guna kam kap. 11 Si enda kulakoken gelah ola lit kesempaten man Iblis guna ngkuasai kita, sabap sieteh nge kai sura-surana. 12 Asum aku seh i Troas guna meritaken Berita Si Meriah kerna Kristus, kudapeti maka Tuhan enggo nalangi pintun man bangku guna erdahin i je. 13 Tapi la teneng ukurku sabap la aku jumpa ras seninangku Titus. E maka kenca aku erkata man kalak si i je, kuterusken perdalanenku ku Makedoni. 14 Tapi bujur ningku man Dibata sabap ibereNa kami ikut selaku tawanen i bas arak-araken kemenangen Kristus. Janah ipake Dibata kami guna pembarken pemeteh kerna Kristus ku japa pe bali ras bau kumenen si merim. 15 Sabap kami bali ras kumenen si merim si ipersembahken Kristus man Dibata, si mbar i tengah-tengah kalak si nuju ku keselamaten, bage pe i tengah-tengah kalak si nuju ku kebenen. 16 Nandangi kalak si nuju ku kebenen, kami enda bali ras bau si nandaken kematen; tapi nandangi kalak si nuju ku keselamaten, kami enda bali ras bau si merim si nandaken kegeluhen si tuhu-tuhu. Dage ise ngasup ndahiken dahin si bagenda? 17 Silang-langna kami labo bali ras nterem kalak si deban, si njajaken Kata Dibata guna keuntungenna jine. Tapi tujun kami murni kap. E maka selaku kami kalak persuruhen Dibata, janah wakil Kristus, ibelasken kami kata ketuhu-tuhun selaku kalak si nggeluh i adep-adepen Dibata.
31 Ntah kin enda ertina ibenaken kami ka mujiken diri kami? Perlu kin kami surat pujin i bas kam nari ntah pe surat pujin si man cidahenken man bandu bagi piga-piga kalak si deban? 2 Kam kap surat kami, si tersurat i bas pusuh kami si banci ieteh dingen ioge kerina jelma. 3 Enggo terang maka kam kap surat Kristus si isuratkenNa arah pendahin kami. Surat e la itulis alu tinta, tapi alu Kesah Dibata si nggeluh; la itulis i bas papan batu, tapi i bas pusuh manusia. 4 Si enda pang kami ngatakenca i adep-adepen Dibata, sabap ibelasken kami e erpalasken kiniteken man Kristus. 5 Enda labo ngataken maka lit kengasupen i bas diri kami jine. Tapi pang kami ngataken si enda erkiteken kengasupen kami si rehna i bas Dibata nari. 6 Ia me si erbahanca kami ngasup jadi si erdahin i bas iketen padan si mbaru e. Iketen padan si mbaru e biakna labo biak tulisen, tapi biak Kesah kap. Undang-undang si tersurat e maba kematen, tapi Kesah mereken kegeluhen. 7 Undang-undang e isuratken i bas batu, janah asum Undang-undang e ibereken man Musa, teridah terang sinalsal Dibata. Terang e ersinalsal i bas ayo Musa, janah amin minter pe bene, ergegeh kap, seh maka kalak Israel la ngasup natap ia. Adi pendahin si maba kematen e reh i bas kemulian si bage belinna, 8 la kin beliden nge kemulian Kesah? 9 Adi pendahin si nuduhken kesalahen ras ukumen manusia pe mulia nge, tentu ndauh lebih mulia pendahin si njadiken manusia ndeher ras Dibata. 10 Banci sikataken maka: sinalsal si nai seh kal terangna, lanai lit ertina erkiteken sinalsal si genduari ndauh terangen. 11 Sabap adi si nandangi masap e pe ersinalsal, tentu beliden pe sinalsal i bas si la ermasap-masap! 12 Erkiteken bagenda pengarapen kami, e maka pang kami erterus terang. 13 Kami labo bali ras Musa si make penutup ayo gelah ola idah kalak Israel sinalsal e lesap seh bene. 14 Ukur kalak Israel e enggo batu-batun, janah seh ku bas wari enda adi iogeken kitap-kitap iketen padan si ndekah e, penutup si ndai tetap nutupi ukurna. Ukurna e la banci talang pala ersada ia ras Kristus. 15 Seh wari enda pe adi iogeken kitap-kitap Musa, penutup si ndai tetap nutupi ukurna. 16 Tapi adi sekalak "erkusur kempak Tuhan", bali ras si ilakoken Musa, e maka penutup e nangtang. 17 "Tuhan" si imaksudken i jenda e me Kesah Dibata. Janah i ja lit Kesah Tuhan, i je me lit kebebasen. 18 Janah kita kerina natap dingen pembincarken sinalsal kemulian Tuhan alu ayo si la itutupi. Kemulian e, si rehna i bas Tuhan nari, e me Kesah, ngobah kita reh dekahna reh muliana, seh maka kita dungna segambar ras Tuhan.
41 Erkiteken pendahin kami e erpalasken perkuah ate Dibata, e maka la kami erleja-leja. 2 Enggo itulak kami kerina perbahanen si erbuni-buni si erbahanca mela iakap kami. Kami labo nggeluh nipui, bage pe labo iputar balikken kami Kata Dibata. Tapi kebenaren si icidahken kami e jadi sada pujin kerna diri kami gelah kami ialoken kerina pusuh peraten manusia i adep-adepen Dibata. 3 Janah adi kin Berita Si Meriah si iberitaken kami e tertutup denga man kalak, e tertutup man kalak si perlawesna kempak kebenen nge ngenca. 4 Kalak e kalak si la tek, si ukurna enggo ipepentang dibata palsu jaman enda. La ipelepasna kalak e ngidah terang sinalsal erpagi-pagi si sangana mbincar man bana. Terang e, e me Berita Si Meriah si encidahken kemulian Kristus si segambar ras Dibata. 5 Labo kerna diri kami si iberitaken kami, tapi kerna Jesus Kristus selaku Tuhan, janah kami enda budakndu erkiteken Jesus. 6 Dibata kap si ngataken, "Ersinalsallah terang i bas gelap nari." Ia me pe Dibata si erbahanca terang e ersinalsal i bas pusuhta, gelah jelas man banta pemeteh kerna kemulian Dibata si teridah i bas ayo Kristus. 7 Kami si jadi ingan nimpan erta-erta pertendin e, desken kudin taneh saja ngenca, gelah teridah maka gegeh si mbelin e i bas Dibata nari kap, labo i bas kami nari. 8 Arah apai pe kami itindih, tapi la kami meripuk. Bingung kami, tapi la seh putus asa. 9 Iayak-ayak musuh kami, tapi la kami itadingken Dibata. Idampesken kalak kami, tapi la seh getem. 10 Kiniseran Jesus si maba kematen lalap ipersan kami jadi baban kula kami, gelah kegeluhenNa pe jadi tangkas i bas kula kami. 11 I bas gedang-gedang geluh kami, lalap kami iendesken kempak kematen erkiteken Jesus, gelah kegeluhenNa banci tangkas ia bas kula kami si ermasap-masap enda. 12 Dage kematen e erdahin i bas kami, tapi kegeluhen erdahin i bas kam. 13 I bas Pustaka Si Badia lit tersurat, "Erkiteken aku tek, e maka aku ngerana." Erkiteken perukuren kami i bas erkiniteken bali ras si enda, e maka kami ngerana, erkiteken kami tek. 14 Ieteh kami maka Dibata si enggo mpekeke Tuhan Jesus i bas si mate nari, mpekeke kita ka pe pagin ras Jesus, jenari ibabaNa kita ku lebe-lebe Dibata. 15 Kerina si enda man gunandu kap. Janah erkiteken reh teremna rusur kalak si ngaloken lias ate Dibata, reh sampurna ka pe isehken pengataken bujur man Dibata; alu bage Dibata imuliaken. 16 Enda me sabapna maka la kami erleja-leja dingen la lesek ate kami. Aminna pe kula kami enda reh burukna reh dekahna, tapi ukur kami tep-tep wari ipelimbarui. 17 Janah kiniseran si genduari e menahang nge dingen labo ndekah, janah ulihna e me kemulian si rasa lalap si la terturiken beratna ertimbangken kiniseran si menahang e. 18 Sabap kami labo natap kempak si teridah, tapi kempak si la teridah. Sabap si teridah kentisik nge ngenca; tapi kai si la teridah tetap seh rasa lalap.
51 Sabap ieteh kami maka adi kemah si jadi rumahta i doni enda e me kulanta enda, itangtangi, lit kap rumahta i Surga, si tahan rasa lalap, la bekas tan manusia, tapi bekas Dibata erbahan. 2 Kidekah kita ringan i bas kemah enda, kelsehen kita, sabap metedeh kal ateta make rumahta si asalna i Surga nari e i babo kemahta si genduari e. 3 Alu make rumah e, la kap kita ketunduken manjang-anjang. 4 Kidekah kita ringan i bas kemah si i doni enda, kelsehen kita erkiteken bage beratna babanta. Labo perban ateta nangtangi si male e, tapi sura-suranta e me makeken si mbaru i babona, gelah si ermasap-masap e itelen kegeluhen. 5 Dibata nge si nikapken kita guna si e, janah selaku jaminenna, Dibata enggo mereken KesahNa man banta. 6 E maka tetap kami pang ngalaken kematen. Ieteh kami maka kidekah kami i bas rumah enda, e me kula enda, kami langa serumahen ras Tuhan. -- 7 Sabap kami nggeluh erpalasken kiniteken, labo erpalasken kai si teridah. -- 8 Sitik kal pe labo kami mbiar, janah pangen kal kami nadingken kula enda gelah banci kami serumahen ras Tuhan. 9 Tapi lebih asa si e, perayaken kami e me kap ndarami uga maka ngena ateNa, subuk i bas rumah kami si i jenda tah pe i jah. 10 Sabap kerina kita la banci lang ngadap ku lebe-lebe Kristus guna iadiliNa, gelah sekalak-sekalak ngaloken kai si patut ialokenna rikutken kai si enggo ibahanna arah kulana paksa ia nggeluh, subuk perbahanen si mehuli ntah si jahat. 11 Ieteh kami kai ertina erkemalangen man Tuhan, e maka iusahaken kami alu meseksek gelah tek kalak. Perukuren kami tangkas kap man Dibata, janah ngarap pe aku maka pusuh peratenndu enggo tangkas nandai perukurenku. 12 Labo ate kami mujiken diri kami ka i lebe-lebendu. Saja ngenca isehken kami man bandu alasen si mehuli gelah megah iakapndu kerna kami, gelah lit i bas kam bekal guna ngelawan kalak si megah iakapna kerna kai si teridah saja, tapi la ia ngenehen ku bas pusuh. 13 Adi tuhu kin kami adon, guna Dibata kap e. Janah adi jore ukur kami, man gunandu kap e. 14 Erkiteken kekelengen Kristus ngkuasai kami nge maka enggo kami seh ku bas sada pengertin, e me: sekalak Manusia enggo mate guna kerina manusia. Enda ertina maka kerina manusia e enggo mate. 15 Ia mate guna kerina manusia, gelah kalak si nggeluh lanai nggeluh erbana-bana, tapi guna Ia si enggo mate dingen si enggo ipekeke Dibata i bas si mate nari. 16 Dage genduari pengerganta nandangi sekalak manusia lanai bo rikutken pertimbangen manusia. Aminna gia nai pengerganta nandangi Kristus e rikutken pertimbangen manusia, tapi genduari lanai bage sibahan. 17 Adi kalak ersada ras Kristus, ia me tinepa si mbaru, si male enggo lepas janah nehenlah, si mbaru enggo reh. 18 Kerina si enda Dibata erbahanca, maka arah Kristus, kita si gelgel nari ermusuhen ras Ia, enggo ibahanNa jadi temanNa. Janah man kami iberekenNa dahin guna njadiken musuhNa jadi temanNa. 19 Alu kata si deban: Dibata enggo nai reh i bas Kristus; enggo ijadikenNa manusia jadi teman Dibata. Dibata la mperkiraken kelepaken manusia. Janah man kami enggo iendeskenNa Berita perdamen e. 20 Dage kami enda me utusen-utusen Kristus, bali ras Dibata jine si mindo man bandu arah kami. I bas gelar Kristus ipindo kami alu mesangat man bandu: bere min maka kam si gelgel nari ermusuhen ras Dibata banci ibahan Dibata jadi temanNa! 21 Aminna pe Kristus la erdosa, enggo ibahan Dibata maka Ia si mersan dosa-dosanta, gelah i bas persadan ras Kristus kita irembakken mulihken ras Dibata.
61 Kami selaku teman Tuhan erdahin mindo man bandu: gelah ola isia-siakenndu lias ate Dibata e si enggo ialokenndu. 2 Begikenlah kai si ikataken Dibata i bas Pustaka Si Badia, "I bas paksa si mehuli Kuakap enggo Kubegiken kam. I bas wari keselamaten, enggo Kusampati kam." Nehenlah! Genduari kap paksa si mehuli e, janah genduari kap wari keterkelinen e! 3 La pernah tondel ukur ise pe ibahan kami, gelah dahin Tuhan la tersalahken kalak. 4 Tapi i bas kerina perbahanen kami icidahken kami maka kami si erdahin Dibata kap. Si enda icidahken kami arah megenggeng i bas ngenanami kiniseran-kiniseran, kepiceten, ras kebiaren. 5 Megenggeng kami asum kami ipekpeki, ipenjaraken, bage pe iurup kalak. Megenggeng kami i bas latih erdahin, la tunduh, janah erpuasa. 6 Icidahken kami maka kami si erdahin Dibata alu kinibujuren, alu pemeteh kami, alu ate saber, alu kiniulin, alu penampat Kesah Si Badia, alu keleng ate si tuhu-tuhu. 7 Alu meritaken berita si tuhu-tuhu janah alu gegeh si rehna i bas Dibata nari. Kinibujuren ipake kami jadi senjata kami, subuk i bas ngelawan bage pe i bas njaga diri kami. 8 Kami ipehaga bage pe igombang-gombangi; kami ipuji bage pe ihina. Bujur pe kami, ikataken kalak nge kami perguak. 9 Kami tempa la itandai, tapi kerina kalak nandai kami. Kami tempa enggo mate, tapi bagi idahndu, nggeluh denga nge kami. Kami iligas alu kiniseran, tapi la kami mate. 10 Aminna pe ceda ate kami, lalap nge kami ermeriah ukur. Kami tempa-tempa musil, tapi enggo nterem kalak jadi bayak ibahan kami. Tempa-tempa la lit kai pe i bas kami, tapi si tuhuna kai pe lit nge i bas kami. 11 O kalak Korinti! Enggo terang-terangen kami ngerana man bandu. Pusuh peraten kami enggo talang man bandu. 12 Keleng ate si lit i bas pusuh kami italangi kami kap man bandu, tapi keleng ate si lit i bas pusuhndu la italangindu man kami. 13 Genduari gelah bujur, selaku balasna kupindoken man bandu: talangilah pusuh peratenndu man kami. Enda kukataken man bandu bali ras man anakku jine. 14 Ola kam nggit teriket i bas sada pasangen ras kalak si la tek man Tuhan. Ja nge banci kebenaren erkongsi ras kejahaten! Ja nge banci terang ersada ras gelap! 15 Banci kin ersadakata Kristus ras Iblis? Kai kin perkongsin kalak si tek ras kalak si la tek man Tuhan? 16 Banci kin sada tujunna Rumah Pertoton Dibata ras berhala? Sabap kita kap Rumah Pertoton Dibata, si nggeluh. Bagi nina Dibata, "Nggeluh me aku ras ia janah ringan aku i tengah-tengahna. Aku me jadi Dibatana janah ia jadi bangsangKu." 17 Bage pe tole, "Nina Tuhan, ’Ndaratlah kam i tengah-tengahna nari, janah peserap bandu i bas ia nari. Ola kuit si la bersih, maka Kualoken kam. 18 Aku me jadi Bapandu, janah kam jadi anakKu si dilaki ras si diberu,’ bage me nina Tuhan si Mada Kuasa."
71 Kerina padan enda ibahan Dibata man banta, o teman-temanku. E maka sibersihkenlah banta i bas kerina sierbahanca kula ras tendinta meluat. Kita enggo khusus jadi sikerajangen Dibata; sibahanlah e jadi serta alu erkemalangen man baNa. 2 Alokenlah kami i bas pusuh peratenndu. La pernah ibahan kami salah man ise pe. La pernah ise pe irugiken kami. La pernah ise pe iperalat kami guna keuntungen kami. 3 Si enda kukataken labo guna nalahken kam; sabap bagi si enggo kukataken ndai, maka kam enggo ialoken kami i bas pusuh kami seh maka kita tetap ersada, subuk mate ntah nggeluh. 4 Tek kal aku nandangi kam janah megah kal kuakap kerna kam. Keriahen kami ngelebihi kerina kiniseran kami, e maka terapul kal aku. 5 Kenca kami seh pe i Makedoni labo lit ketenengen i bas kami. Arah dampar si apai pe kami ikenai kiniseran: arah dampar si arah darat, perubaten; arah dampar si arah bas, aru ate. 6 Tapi Dibata, si ngapuli kalak si lit i bas kepiceten ukur, enggo ngapuli kami alu kerehen Titus. 7 Labo saja alu kerehenna, tapi pe alu berita si ibabana maka kam enggo mpegegehi ia. Iturikenna kerna uga tedehna atendu aku, uga erkadiolana kam, janah uga gegehna kam mbela aku. Erkiteken si e reh tambahna keriahenku. 8 Aminna pe menek atendu ibahan suratku e, labo aku erkadiola. Tuhu kentisik erkadiola aku sabap kuidah maka menek atendu erkiteken suratku e. 9 Tapi genduari meriah ukurku -- labo erkiteken menek atendu, tapi erkiteken menek atendu e erbahanca kam jera. Menek atendu e sue kap ras peraten Dibata, seh maka la kam sitik pe irugiken kami. 10 Menek ate si sue ras peraten Dibata erbahan kalak jera kap, gelah ia selamat; janah kerna si e la perlu kalak erkadiola. Tapi menek ate si pelin-pelin erkiteken soal doni enda mabai ku kematen kap. 11 Nehenlah! Uga ulina menek atendu si sue ras peraten Dibata e: genduari enggo tutus atendu encidahkenca maka pengadun kerna kam lanai tuhu. Nembeh kal atendu man kalak si ngguluti e. Mbiar kam, tedeh atendu. Ergiah-giah ukurndu ndalanken si bujur. Enggo icidahkenndu maka i bas kerina persoalen e la kam ersalah. 12 Dage, amin kubahan pe surat e, si pentingna labo erkiteken kalak si ersalah e, ntah pe kalak si isalahken e. Tapi surat e kubahan gelah teridah man bandu kuga tutusna atendu mperdiateken kami i lebe-lebe Dibata. 13 Si enda me erbahanca maka malem kal ate kami. Labo saja malem ate kami, tapi pe sampur keriahen kami ngidah uga riahna ukur Titus, erkiteken kerina kam enggo pesalangken ukurna. 14 Nai kupujiken kam i lebe-lebena, janah la aku kemalun ibahanndu. Bagi kerina si ikataken kami man bandu tuhu kap, bage pe kai si ipujiken kami i lebe-lebe Titus enggo teridah maka e tuhu kap. 15 E maka genduari reh sampurna atena keleng nandangi kam, nginget kepatuhenndu man bana, janah nginget kuga nai kam ngaloken ia alu mehamat dingen erkemalangen man bana. 16 E maka meriah ukurku sabap banci kam kupenalem tuhu-tuhu.
81 O senina-senina, ate kami gelah ietehndu kai si enggo ibahan Dibata arah lias ateNa nandangi perpulungen-perpulungen si i Makedoni enda. 2 Perpulungen-perpulungen e enggo iuji alu mesangat alu kiniseran-kiniseran si inanamina. Tapi keriahenna si simpar dingen kemusilenna si la teralang e erbahanca ia melumbar mere, tempa-tempa ia bayak. 3 Pang aku ngatakenca, maka perpulungen e enggo mere asa ngasupna -- lebih nge pe asa ngasupna -- alu ukurna ersuruh. 4 Alu meseksek ipindokenna man kami gelah ibereken kesempaten man bana guna ikut muat bagin i bas nampati kalak Kristen si i Judea. 5 Labo terjeng si iarapken kami e saja! Si pentingna e me iendeskenna dirina man Tuhan. Jenari, alu peraten Dibata, iendeskenna pe dirina man kami. 6 Ngidah si e, e maka ipindo kami man Titus gelah ia mulihken ndahi kam guna nerusken dahin keleng ate si enggo ibenakenna e maka idungina. 7 Kam sampur kap i bas kai pe: i bas kiniteken, i bas ngerana, i bas pemeteh, i bas ketutusen i bas kai-kai pe, bage pe i bas keleng atendu nandangi kami. E maka sampur ka lah min kam i bas dahin keleng ate enda pe. 8 Si enda kukataken labo selaku perentah. Tapi alu encidahken kuga kalak si deban ergiah-giah i bas nampati, ateku nguji ntah kin kekelengenndu e tuhu-tuhu tulen. 9 Ietehndu uga liasna Tuhanta Jesus Kristus: maka aminna bayak gia Ia, tapi guna kiniulinndu, ipemusilNa baNa, gelah arah kemusilenNa e jadi bayak kam. 10 Rikutken pengakapku: guna kiniulinndu, dungilah dahin si enggo ibenakenndu tahun nderbih. Kam me si pemenana kal ndahiken dahin e, labo saja ndahikenca, tapi pe ukur ersuruh ndahiken dahin e i bas kam me si pemenana turah. 11 Genduari teruskenlah, dingen dungi dahin e! Ergiah-giahlah ukurndu ndungisa, bagi ergiah-giah nai ukurndu menakenca. Dahikenlah e rikutken kai si lit i bas kam genduari. 12 Adi litlah ukur ersuruh guna mere, maka ialoken Dibata me pemere e erpalasken kai si lit i bas kita, labo erpalasken kai si la lit i bas kita. 13 Labo ateku mpenahangi kalak si deban alu nambahi babanndu; tapi gelah ola si tualen 14 kelebihen si lit i bas kam genduari ras kekurangen si lit i bas kalak e genduari. Kune denggo kelebihen ka kalak e, ia ka denggo encukupi kekurangenndu. Alu bage lanai situalen. 15 Bagi si lit tersurat i bas Pustaka Si Badia, "Kalak si mbue ipepulungna la ia kelebihen, janah kalak si sitik ipepulungna la ia kekurangen." 16 Bujur ningkami man Dibata si erbahanca maka bali ras kami ergiah-giah ukur Titus erdahin guna kiniulinndu. 17 Labo saja meriah ukurna ngaloken pemindon kami, tapi pe ergiah-giah ukurna seh maka alu ukurna ersuruh enggo itetapkenna ndahi kam. 18 Isuruh kami pe ikut ras ia sekalak senina si ipujiken perpulungen-perpulungen i japa pe erkiteken dahinna meritaken Berita Si Meriah. 19 Labo e saja, tapi pe ia enggo ipilih dingen itetapken perpulungen-perpulungen jadi teman kami i bas perdalanen ndahiken dahin keleng ate e. Si e ilakoken kami guna kiniulin Tuhan dingen guna encidahken ukur kami ersuruh ndahiken dahin e. 20 Isilahken kami kal maka ise pe la nalahken kami i bas kami ngurus pemere si ibereken alu melumbar e. 21 Tujun kami e me guna ndalanken si mehuli, labo saja i lebe-lebe Tuhan, tapi pe i lebe-lebe manusia. 22 Bage pe isuruh kami sekalak nari seninanta ikut ras kalak e duana. Enggo megati ia iuji kami alu erbage-bage cara, janah teridah maka tetap ergiah-giah ukurna. Janah genduari reh ergiah-giahna ia perbahan bage belinna kinitekenna kerna kam. 23 Adi kerna Titus, ia kap temanku sada dahin kal guna kam. Adi senina-senina si dua kalak nari e, ia me utusen perpulungen-perpulungen si jadi kemulian Kristus. 24 Cidahkenlah keleng atendu man kalak enda, gelah arah ia kerina perpulungen-perpulungen meteh kerna kekelengenndu e. Alu bage kai si ipujiken kami kerna kam teridah maka tuhu kap.
91 Si tuhuna labo perlu kusuratken kerna penampat si isehken man kalak Kristen si sangana i bas kekurangen e. 2 Kueteh maka ersuruh nge ukurndu guna nampati, janah kupujiken pe kam i tengah-tengah kalak Makedoni enda. Kukataken man bana, "Senina-senina si i propinsi Akaya tahun nderbih kin enggo sikap nampati." Janah erkiteken ketutusenndu e teremen i bas ia enggo keke ukurna. 3 Aminna pe bage isuruh kami ka nge senina-senina enda, gelah kai si enggo ipujiken kami kerna kam la sia-sia. Dage bagi si enggo kukataken e, sikap dage kam. 4 Adi lang, maka adi reh kalak Makedoni ras aku janah idapeti kami kam la sikap, tentu mela iakap kami, apai denga ka kam -- sabap tek kal kami man bandu. 5 E maka perlu kuakap mindo kempak senina-seninanta enda berkat leben asa aku ndahi kam gelah isikapkenna leben perkuah ate si enggo ipadankenndu e. Adi enggo pagi leben sikap perkuah atendu e, bekas ukurndu meriah kap e, labo erkiteken terpaksa. 6 Inget lah maka kalak si sitik ngerdangken benih, sitik ka iperanina; kalak si melala ngerdangken benih, melala ka iperanina. 7 Sekalak-sekalak iberekennalah sue ras si enggo itetapkenna i bas ukurna; ola alu pusuh jungut-jungut tah pe bagi si terpaksa, sabap Dibata engkelengi kalak si mere alu ukur meriah. 8 Dibata ngasup mereken man bandu kasakai pemereNa alu sampur. Alu bage kerina keperlun guna dirindu i bas kai pe icukupi, seh maka sampur pe guna banci kam ndahiken dahin-dahin si mehuli si apai pe. 9 Kerna kalak si bage lit tersurat i bas Pustaka Si Badia, "Enggo iambur-amburna pemerena man si musil, kiniulinna e tahan seh rasa lalap." 10 Dibata si nikapken benih man kalak si merdang bage pe nakan si man pangan. Ia pe si nikapken benih si iperlukenndu. Ia ka nge si peturah benih e dingen si mereken ulih si erlipat ganda i bas kiniulinndu e nari. 11 Dibata erbahanca kam bayak i bas kai pe, seh maka kam melumbar mere katawari pe, janah nterem kalak ngataken bujur man Dibata erkiteken pemerendu si ialokenna bekas pendahin kami. 12 Sabap penampat si ipersembahkenndu e labo saja encukupi keperlun kalak Kristen si lit i bas kekurangen, tapi pe sampur jadi pengataken bujur man Dibata. 13 Kam ngaku maka patuh kam nandangi Berita Si Meriah kerna Kristus. Pengakunndu e payo adi teridah kam menang i bas soal nampati. Janah erkiteken penampatndu e, nterem me pagi kalak muji Dibata. Tole pe ipujina Dibata erkiteken persadanndu si enteguh e, si teridah man bana ras man kerina kalak Kristen si deban. 14 Itotokenna pe kam alu dem keleng ate, nginget lias ate Dibata si la tersipati si seh man bandu. 15 Bujur ninta man Dibata kerna pemereNa si la terkataken nari uga ulina.
101 Aku, Paulus, mindo man bandu, aku si ikataken kalak melemuk adi ngerana petala-tala ras kam, tapi pang merawa adi sangana pedauh-dauh. I bas gelar Kristus si melias dingen lemah lembut kupindo man bandu. 2 Adi reh pagi aku, ola pagi aku terpaksa merawa i lebe-lebendu; sabap tek aku maka pang nge aku merawa nandangi piga-piga kalak i bas kam si erpengakap maka kami nggeluh rikutken biak manusia si ndekah denga. 3 Tuhu maka kami manusia biasa nge, tapi labo kami erjuang rikutken biak manusia si ndekah. 4 Senjata si ipake kami biakna labo bali ras senjata si ipake kalak, tapi senjata Dibata si erkuasa, si ngasup ngeruntuhken benteng-benteng, e me kepantasen perukuren manusia. 5 Iruntuhken kami kerina tembok kesombongen si ipajekken guna ngambati manusia nandai Dibata. Itaban kami kerina perukuren manusia, jenari ibaba kami gelah erkemalangen man Kristus. 6 Janah adi kepatuhenndu enggo bulat tuhu-tuhu, kami enggo sikap guna ngukum kerina kinilapatuhen. 7 Nehenlah kai si lit i lebe-lebendu. Adi lit kalak erpengakap maka ia me suruh-suruhen Kristus, iukurkenna ka lah min maka kami pe suruh-suruhen Kristus ka nge bali ras ia. 8 Adi teridah maka meganjangsa aku ngerana kerna kuasa si ibereken Tuhan man kami -- si gunana pegegehi kam, labo ngeruntuhkenca -- labo pagi aku juru. 9 Ola iakapndu maka kupebiar-biar kam alu surat-suratku e. 10 Sabap lit si ngatakenca, "Surat-surat Paulus tegas dingen meser kal, tapi asum ia i tengah-tengahta, labo ia erdolat, janah carana ngerana pe labo terpake." 11 Kalak si ngerana bage arus ietehna maka labo lit lainna ranan kami si isuratken kami ras perbahanen kami asum kami lit i tengah-tengahndu. 12 Tuhu, labo kami pang mpeseri dingen mbandingken diri kami ras kalak si mujiken bana man kalak si deban e. Dirina jine ipakena jadi sibar-sibarna janah ibanding-bandingkenna dirina sapih-sapih ia. Perbahanen si bage bodoh tuhu-tuhu! 13 Si imegahken kami labo daerah si la ersibar belangna, tapi rikutken daerah si enggo ibagi-bagiken Dibata man kami. I bas si e ikut pe kam. 14 Erkiteken kam pe bengket ku bas daerah si man dahin kami, labo kami ngelanggar batas sabap kami kap si perlebe ndahi kam maba Berita Si Meriah kerna Kristus. 15 Bage pe labo imegahken kami kerna pendahin kalak si deban si labo bengket ku bas lingkungen si enggo itetapken Dibata man kami. Tapi ngarap kami gelah kinitekenndu reh belinna, janah e erbahanca maka reh belinna pendahin kami i tengah-tengahndu, tapi tuhu la ndarat i bas daerah si enggo itetapken Dibata man kami. 16 Kenca bage maka banci iberitaken kami Berita Si Meriah ku daerah-daerah si terdauhen asa kam, sabap la ate kami ermegah kerna pendahin kalak si deban si enggo idahina i bas daerah e. 17 Bagi lit tersurat i bas Pustaka Si Badia, "Kalak si ermegah ate, megahlah akapna kerna Tuhan." 18 Sabap labo kalak si muji dirina si terbukti kalak si tutus, tapi si ipujiken Tuhan nge.
111 Ngarap aku maka ola kam megelut erkiteken kebodohen si sitik enda! Kugapa pe labo kam megelut. 2 Mecimberu ateku ngenehen kam e, e me cemburu ate Dibata kap, sabap kam enggo kupertunangken bagi sekalak singuda-nguda si la keliamen man dilaki si Sada e, e me Kristus jine. 3 Aru ateku perukurenndu tergoda, seh maka ukurndu lanai bulat dingen lanai bersih man Kristus, bali ras si Hawa itipu si Iblis alu kinipantasenna. 4 Sabap adi reh kalak man bandu meritaken kerna "Jesus" si lain asangken si iberitaken kami, labo kam megelut. Bage pe ialokenndu denga ka nge kesah tah pe "berita si mehuli" si lain kal ras Kesah Dibata bage pe Berita Si Meriah si ialokenndu i bas kami nari! 5 Kuakap labo aku sitik kal pe ketadingen i bas rasul-rasulndu "si mbelin la teralang e". 6 Banci jadi kurang beluhku ngerana, tapi labo si e nuduhkenca maka kurang pemetehku. Si enda enggo tangkas ibahan kami i bas kai-kai pe arah erbage-bage cara. 7 Asum kuberitaken nai Berita Si Meriah si rehna i bas Dibata nari man bandu la aku ngaloken upah i bas kam nari. Alu si e kupeteruk diringku gelah kam ipeganjang. Salah kin aku i bas si e? 8 Perpulungen-perpulungen si deban nge mereken keperlunku; tempa-tempa kurampasi perpulungen-perpulungen e gelah aku banci erdahin i tengah-tengahndu. 9 Asum aku i tengah-tengahndu, adi kekurangen aku, la aku jadi tanggungen ise pe. Kerina kekurangenku icukupi senina-senina si reh i Makedoni nari. Subuk asum si e, bage pe i bas wari-wari si reh enda kujaga kal maka ola aku jadi babanndu. 10 Erkiteken kebenaren Kristus si lit i bas aku, la kupelepas ise pe i belang-belang propinsi Akaya ena ngambati kemegahenku e. 11 Engkai maka bage ningku? Perbahan la kin ateku keleng kam? Ieteh Dibata kap maka keleng ateku kam. 12 Kai sikubahan i bas paksa enda terus nge kulakoken gelah ola lit alasen "rasul-rasul" si deban e mujiken dirina alu ngataken maka pendahinna bali ras pendahin kami. 13 Sabap kalak si bage rasul-rasul palsu kap. Nipui ia i bas dahinna alu encidahken bana tempa-tempa bali ia ras rasul-rasul Kristus. 14 Si enda labo ate mamang! Sabap Iblis pe banci nalihken rupana gelah teridah ia bali ras malekat terang! 15 Jadi labo perkara si mbelin kal e adi persuruhen Iblis e nalihken rupana gelah teridah bali ras persuruhen si mehuli. Kedungenna ugapa pe idatna nge balasen sue ras perbahanenna. 16 Sekali nari kukataken: ola ise pe erpengakap maka aku la sehsa. Tapi adi bage pengakapndu, alokenlah aku bagi kalak si la sehsa, gelah banci meganjang sitik cakapku. 17 Kai si nandangi kukataken enda labo bekas penjemba Tuhan, tapi aku ngerana bagi kalak si la sehsa. 18 Bagi nterem kalak meganjang cakapna erkiteken kemegahen doni, aku pe meganjang ka ateku kubahan cakapku. 19 Erkiteken kam kalak pentar, alu ukur menahang la kam megelut man kalak si la sehsa. 20 Aminna pe kam iperbudak, tah itipu, tah icari kalak untung i bas kam, tah megombang kalak man bandu, dingen iparap kalak ayondu, la kam megelut man kalak si erbahan bage. 21 Si tuhuna mela kuakap ngakuisa, maka kami la ngasup ngelakoken si bage. Tapi adi lit kalak si pang ngerana alu cakap meganjang kerna kai-kai gia, aku pe pang ka nge. Aku ngerana bagi kalak si la sehsa. 22 Kalak Jahudi kin ia? Aku pe kalak Jahudi nge. Kalak Israel kin ia? Aku pe kalak Israel nge. Kesusuren Abraham kin ia? Aku pe kesusuren Abraham nge. 23 Persuruhen Kristus kin ia? Bagi kalak adon tempa pengeranangku -- aku lebihen asangken kalak e. Buen aku erdahin. Usuren aku ipenjaraken. Usuren aku iligasi. Gatin aku menam mate. 24 Lima nembas aku iligasi kalak Jahudi; telu puluh siwah kali tep-tep nembas. 25 Telu kali aku igudam kalak Roma janah sekali aku ibenteri alu batu. Telu kali karam kapal si kutumpangi, janah sekali bombang-bombang aku i babo lawit sada wari sada berngi dekahna. 26 I bas perdalanen-perdalanenku, megati aku jumpa bahaya: bahaya lau mbelin, bahaya kena rampok, bahaya erkiteken teman sebangsangku ras i bas bangsa si deban nari, bahaya i bas kota ras i bas ingan si mesawang, bahaya i lawit, bage pe bahaya i bas teman si pekulah-kulahna erkiniteken. 27 I bas aku erdahin mberat dingen latih suhsah e, megati aku la terpedem, megati muas dingen melihe; megati la lit si man panganenku, megati bergehen erkiteken kurang uis. 28 Tambah-tambah si debanna si la kuturiken i jenda, tep-tep wari leket i bas ukurku kecibal kerina perpulungen. 29 Adi lit kalak si mesera akapna, ndiganai kin la kugejapken kiniseranna e? Adi lit kalak si idabuhken ku bas dosa, ndiganai kin la gara pusuh peratenku? 30 Adi la banci lang meganjang cakapku, kerna gegehku si kuranglah cakapku meganjang. 31 Dibata, Bapa Tuhan Jesus, si terpuji seh rasa lalap, Ia metehsa maka aku labo erbual. 32 Asum aku i Damaskus, wakil raja Aretas nuruh perajurit-perajuritna erjaga i gerbang kota guna nangkap aku. 33 Tapi arah sada jendela si lit i bas tembok kuta itantan kalak aku ku teruh tare raga, ndarat i bas kuta e nari. Alu bage pulah aku i bas ia nari.
121 Aminna pe la lit gunana, la banci lang meganjang cakapku. Genduari kuturiken kerna pengenehenen ras ketangkasen i bas Tuhan nari. 2 Lit kutandai sekalak Kristen; sepuluh empat tahun si enggo lewat ia rempet iangkat ku adep-adepen Dibata i Surga. Ntah kulana ikut terangkat ntah lang, la kueteh -- Dibata metehsa. 3 Sekali nari kukataken: kueteh maka ia rempet iangkat ku Pardis. (Ntah kin e jadi ikut ras kula ntah lang, la kueteh -- Dibata si metehsa.) 4 I je ibegina kata-kata si la terbelasken, si la banci ibelasken manusia. 5 Kerna kalak si bage me si ku megahken tapi kerna diringku jine gegehku si kurang nge cakapku meganjang. 6 Bahanlah maka nggit aku meganjang ngerana; aku labo seri ras kalak si la sehsa, sabap si tuhu-tuhu nge si kukataken e. Tapi kutahan kal maka la meganjang cakapku, sabap la ateku ikira kalak aku lebih asa si iidahna i bas aku dingen si enggo ibegina i bas aku nari. 7 Gelah ola meganjang ukurku kerna pengenehenen si mejin e, ibereken duri i bas dagingku, e me persuruhen Iblis guna ngeligas aku gelah ola meganjang ukurku. 8 Telu kali aku ertoto man Tuhan kerna si enda, gelah ipedauhna min si e i bas aku nari. 9 Tapi ngaloi Tuhan, "Cukup kap lias ateKu man bandu; sabap gegehKu serta kap i bas gegeh si kurang." Erkiteken si e meriah kal ukurku meganjang ngerana kerna gegehku si kurang gelah gegeh Kristus mengketi aku. 10 E maka senang kuakap i bas gegehku si kurang, i bas aku igombang-gombangi kalak, i bas aku kepiceten, bage pe i bas aku isiksa kalak, i bas kesusahen erkiteken Kristus. Sabap adi gegehku kurang, i je me maka aku megegeh. 11 Perbahanenku enda bali kal ras perbahanen kalak bodoh -- tapi kam nge si maksasa maka aku bage. Kam nge arusna mujiken aku. Sabap aminna gia labo kai pe aku, si tuhuna labo aku sitik pe ketadingen asangken rasul-rasulndu "si mbelin la teralang e". 12 Tandana maka aku rasul tangkas kap teridah man bandu arah dahinku, e me: megenggeng aku i bas kai-kai pe, idahndu tanda-tanda sengget si kubahan, kulakoken perbahanen-perbahanen si ngelebihi kuasa manusia, bage pe perbahanen-perbahanen si mejin. 13 I bas kai kin kam kurang kuperdiateken ibandingken ras perpulungen-perpulungen si deban, seakatan la aku jadi tanggungenndu? Mahapkenlah kesalahenku e. 14 Enda me petelu kaliken aku enggo ersikap lako ndahi kam, janah i bas si e pe labo ateku aku jadi tanggungenndu. Labo sikerajangenndu, tapi kam kap ateku. Sabap labo metunggung anak-anak pepulung erta guna orang tuana, tapi orang tua nge si pepulung erta guna anakna. 15 Senang ukurku engkeriken si lit i bas aku, janah lebih asa si e, diringku jine pe nggit aku engkorbankenca guna kam. Reh kurangna kin kekelengenndu man bangku adi sampur kekelengenku man bandu? 16 Tentu iakuindu nge maka labo pernah kam kuberati. Tapi lit ka nge si ngatakenca maka kusidingi kam alu tipu ras akalku. 17 Kuga kin? Pernah kin kubuat untung i bas kam nari arah kalak si kusuruh ndahi kam? 18 Kupindo man Titus gelah idahina kam, bage pe kusuruh senina si deban ikut ras ia. Lit kin Titus muat untung i bas kam nari? Ma bali nge perukuren ras perbahanen kami? 19 Iakapndu kin kidekah enda iusahaken kami mbela diri kami i adep-adepenndu? Lang! I adep-adepen Dibata, i bas persadan ras Kristus nge si tuhuna kami ngerana. Janah kerina si ilakoken kami e, o si kukelengi, gunana majekken kam kap. 20 Mbiar aku maka adi reh pagi aku ndahi kam, kudapeti kam la bagi si kuarapken, bage pe aku la bagi si iarapkenndu. Mbiar aku maka kudapeti kam pagi rubat, sician-cianen, gara ukur, pengilas ukur teman alu peganjangken bana, mahan-mahani si la tuhu kerna teman, sicekurak-cekuraken, sigombang-gombangen, ras perpulungen la ratur. 21 Mbiar aku maka adi reh pagi aku ndahi kam, mela kuakap ibahan Dibatangku i lebe-lebendu erkiteken kegagalenku. Mbiar ka pe aku maka nterem kalak si enggo erbahan dosa i bas paksa si enggo lewat tangis aku ibahanna sabap lalap ia la nggit jera erlagu la mehuli, erlua-lua, dingen ndalanken perbahanen si la meteh mela.
131 Enda me petelu kaliken ateku reh ndahi kam. I bas Pustaka Si Badia lit tersurat, "Tep-tep pengadun maka banci esah arus lit dua tah telu kalak saksina." 2 Lit si man katankenku man bandu, kam si enggo erbahan dosa i bas paksa si enggo lewat, bage pe man kerina kalak si deban. Sanga kerehenku si pedua kaliken enggo kukataken e man bandu, janah genduari pe tupung aku la ras kam, kupersingeti ka maka adi reh ka aku, kerina kalak si erbahan dosa i bas paksa si enggo lepas la banci pulah i bas ukumen nari. 3 Tupung si e pagi idatndu nge bukti si ipindondu e, maka Kristus ngerana kap arah aku. Adi Kristus erbahan tindaken man bandu, labo Ia la megegeh, tapi icidahkenNa gegehNa i tengah-tengahndu. 4 Tuhu asum Ia ipakuken ku kayu persilang seh mate, Ia la kap ergegeh, tapi Ia nggeluh erkiteken gegeh Dibata. I bas persadan ras Ia, kami pe la kap ergegeh; tapi i bas dahin kami guna kam, kami pe nggeluh ras Kristus erkiteken kuasa Dibata. 5 Pereksalah man bandu: tuhu-tuhu kin kam erkiniteken? Ujilah man bandu! Ntah la kin ietehndu maka Jesus Kristus ringan i tengah-tengahndu? -- Pala la kin kam menang i bas ujian e. 6 Kuarap ietehndu maka kami jine labo talu i bas ujian e. 7 Ertoto kami man Dibata gelah ola ibahanndu si salah -- labo gelah teridah maka kami enggo menang i bas pengujin e, tapi gelah banci idalankenndu si mehuli, aminna pe tempa teridah kami talu i bas ujian e. 8 Sabap la kami ngasup ngelawan kebenaren, tapi ngikutkenca ngenca maka kami ngasup. 9 Senang nge ukur kami bicara la gia kami ergegeh, asal kam megegeh. Erkiteken si e ertoto kami man Dibata maka kam mehuli ka mulihken. 10 Perbahan si e me maka kubahan surat enda man bandu asum ndauh denga kita sirang; gelah pagi kenca aku reh, la pedah kasar perbahanenku i bas makeken kuasa si enggo ibereken Tuhan man bangku, kuasa si gunana majekken kam, labo ngeruntuhken kam. 11 Dungna, mejuah-juah man bandu o senina-senina! Pekenalah man bandu mulihi, janah tamakenlah ku bas ukurndu pemindon kami e. Ersadalah arihndu kerina janah erdamelah. Janah Dibata si dem keleng ate dingen kemalemen ate ras kam gelah. 12 Sisalam-salamenlah kam alu dem keleng ate bagi si ersenina. Kerina anak-anak Dibata si i jenda ngataken mejuah-juah man bandu. 13 Lias ate Tuhan Jesus Kristus, kekelengen Dibata, kerembaken Kesah Si Badia ras kam kerina gelah.