1 TIMOTIUS

¹ Surat enda i bas aku nari, Paulus, si enggo jadi rasul Kristus erkiteken isuruh Dibata Si Ngkelini kita ras Kristus Jesus pengarapenta. ² Surat enda man Timotius, anakku si tuhu-tuhu i bas kiniteken. Dibata Bapa ras Kristus Jesus Tuhantalah mereken lias ate, perkuah ate, ras kemalemen ate man bandu. ³ Ateku min gelah tetap kam ringan i Epesus, bagi enggo kupindoken man bandu asum aku nerusken perdalanenku ku Makedoni. I Epesus lit piga-piga kalak si ngajar alu pengajaren si la tuhu. Pengadilah e. ⁴ Suruh gelah ingadikenna ngajarken turi-turin si la tuhu bage pe terombo nini-nininta nai si la erpeltep-peltep, sabap si enda peturah perubaten saja ngenca janah la erguna nandangi rencana Dibata si ieteh kita erdandanken kiniteken. ⁵ Tujun perentahku enda guna mpekeke kekelengen si reh i bas pusuh peraten si bersih nari, i bas ukur si bujur nari, bage pe i bas kiniteken si tuhu-tuhu nari. ⁶ Tapi lit piga-piga si nilah i bas tujun enda nari, papak ia erkiteken cakap si sia-sia. ⁷ Sura-surana jadi guru Undang-undang Dibata, tapi cakapna pe la iangkana bage pe la iangkana kerna kai si ibelaskenna i bas kiniteken. ⁸ Sieteh maka Undang-undang e mehuli, adi ipakeken bagi patutna. ⁹ Arus pe i inget maka Undang-undang ibahan labo guna kalak si bujur, tapi guna kalak si ngelanggar undang-undang ras si erbahan jahat, la nandai Dibata, si erdosa, si la eragama dingen si la nggit rukur kerna pertendin, guna kalak si munuh nande-bapana, guna pemunuh-pemunuh, ¹⁰ guna kalak si erlua-lua, dingen kalak si campur sapih-sapih ia dilaki, guna penculik, guna kalak perguak kesaksinna dingen kalak si la tuhu cakapna, bage pe guna kerina kalak si ndalanken perbahanenna la rikutken pengajaren si payo. ¹¹ Pengajaren si tuhu e lit i bas Berita Si Meriah si ibereken man bangku guna iberitaken. Berita Si Meriah e rehna i bas Dibata nari, e me Dibata si mulia si arus ipuji. ¹² Kukataken bujur man Kristus Jesus Tuhanta, si enggo mereken gegeh man bangku i bas aku ndahiken dahinku. Kukataken bujur man baNa sabap metunggung iakapNa aku, itangkuhkenNa aku jadi si erdahinNa, ¹³ aminna pe nai kucekuraki Ia kusiksa dingen kugombang-gombangi. Tapi mekuah ate Dibata aku, sabap paksa si e nai langa aku tek man Jesus Kristus janah la kuangka kai si kubahan. ¹⁴ Iuseken Tuhanta man bangku lias ateNa si la erkeri-kerin radu ras kiniteken bage pe keleng ate si jadi sikerajangenta erkiteken persadanta ras Kristus Jesus. ¹⁵ Kata si tuhu-tuhu si patut ialoken dingen tek kal kita e me, "Kristus Jesus enggo reh ku doni enda guna nelamatken kalak perdosa." I bas si e aku me si perdosana kal. ¹⁶ Tapi erkiteken si e me maka mekuah ate Dibata aku, gelah Kristus Jesus banci ncidahken kesabarenNa si serta i bas nelamatken aku, kalak si mbelinna dosana enda. Janah si enda jadi usihen man kerina kalak si nandangi tek man baNa dingen ngaloken kegeluhen si rasa lalap. ¹⁷ Raja si rasa lalap, Dibata si sada, si rasa lalap, si la teridah, man baNalah kehagan ras kemulian seh rasa lalap. Amin. ¹⁸ O anakku Timotius, man bandu kusehken dahin enda. Si enda rikutken kata si enggo ndekah me inubuatken kerna kam. Bahanlah kata nubuat e jadi senjatandu asum kam erbebe kerna si mehuli. ¹⁹ Tetaplah kam tek man Jesus Kristus dingen bersihlah pusuh peratenndu. Piga-piga kalak lit si la nggit megiken isi pusuh peratenNa; janah kalak si bage ibunuhna kinitekenna. ²⁰ Jelmana e me Himeneus ras Aleksander. Si dua kalak enda enggo kuendesken man Iblis, guna ngajarken ia gelah olanai ipebau-bauna Dibata.

¹ Perlebe kukataken gelah isehkenndu sapaat, pemindon, pertoton ras pengataken bujur man Dibata guna kerina manusia; ² guna raja-raja ras kerina si erkuasa, gelah banci kita nggeluh senang dingen dame, erkemalangen man Dibata alu lagu langkah si payo. ³ Enda me si mehuli dingen si ngena ate Dibata, Si Ngkelini kita, ⁴ si ersura-sura gelah kerina manusia selamat dingen meteh kai si tuhu-tuhu. ⁵ Sabap sada ngenca Dibata janah sada ka ngenca kelang-kelang si mpersadaken Dibata ras manusia, e me manusia Jesus Kristus. ⁶ Jesus Kristus e enggo ngasamken kesahNa guna nebusi kerina manusia i bas dosa-dosana nari. Enda jadi sada bukti maka i bas paksa si enggo itetapken Dibata, Ia ersura-sura gelah kerina manusia iselamatken. ⁷ Janah erkiteken si enda me maka aku jadi rasul dingen guru nandangi bangsa si labo kalak Jahudi, guna meritaken kerna kiniteken man Jesus Kristus. Si kukataken enda tuhu nge, labo aku erbual. ⁸ Sura-surangku gelah kerina dilaki amin i japa pe ertoto min man Dibata. Kerina min erkemalangen man Dibata janah ertoto ngelipat tanna alu la lit i bas ia ate nembeh ras perubaten. ⁹ Bage pe si diberu, mehamat dingen mehuli min peruisna. Potongen bukna sederhana saja; ola make perhiasen emas ntah mutiara ntah paken-paken si meherga. ¹⁰ Tapi cidahkenlah perbahanen si mehuli, si sentudu ras sekalak diberu si ngaku maka ia nembah man Dibata. ¹¹ Diberu arus erlajar alu megi-megi saja, ola njabapi. ¹² La ateku senang diberu ngajar ntah pe erkuasa nandangi dilaki. Ia arus sinik-sinik saja. ¹³ Sabap Adam nge lebe ijadiken Dibata, e maka Hawa. ¹⁴ Janah labo Adam si kena tipu, tapi diberu e nge, janah ia nge si ngelanggar pedah Dibata. ¹⁵ Tapi sekalak diberu selamat nge arah ia mupus, adi tutus atena erkiniteken, erkeleng ate dingen nggeluh badia janah mehamat.

¹ Adi sekalak ersura-sura jadi peminpin perpulungen, ersura-sura kap ia nandangi dahin si mehuli. Kata enda tuhu me! ² Sekalak si ngepkep perpulungen arus la erpandangen. Ndeharana arus sada ngenca. Ia arus ersabar, terkuasaisa dirina janah ratur lagu langkahna. Arus meriah ukurna ngalo-ngalo kalak si kesilang ku rumahna aminna pe la itandaina. Ia arus ngasup ngajari. ³ Ia la banci sekalak pemabuk, ntah pe sekalak perampang. Ia arus sekalak si lemah-lembut dingen ngena atena kedamen. Ia la banci mata duiten. ⁴ Arus ietehna ngepkep jabuna alu mehuli janah ngasup erbahanca anak-anakna ngikutken katana dingen mehamat man bana. ⁵ Sabap adi la ia ngasup ngepkep jabuna, labo ia ngasup ngepkep perpulungen Dibata. ⁶ Si ngepkep perpulungen la banci kalak si mbaru jadi Kristen, sabap banci pagi meganjang ukurna jenari iukum Dibata ia bagi Iblis nai. ⁷ Ia arus sekalak si ihamati jelma si nterem, gelah ola ia icekuraki kalak jenari kena siding Iblis. ⁸ Si nampati i bas perpulungen pe arus kalak bujur tutus. La banci mbuesa minem minuman keras, ntah pe merangap. ⁹ Arus tetap pusuh peratenna kerna pengajaren si enggo ibereken Dibata. ¹⁰ Ia arus iuji lebe, jenari adi la lit ibahanna si man pandangen, banci ia erdahin. ¹¹ Ndeharana pe arus kalak si mehuli. Ndeharana e la banci ncekuraki kalak si deban. Ia arus ngasup ngkuasai dirina janah bujur i bas kai pe. ¹² Si nampati i bas perpulungen e arus sada ngenca ndeharana. Arus ngasup ia ngepkep anak-anakna ras jabuna alu mehuli. ¹³ Kalak si ndahiken dahinna alu mehuli, reh hamatna kalak man bana, janah reh pangna ia ngerana man kalak kerna kinitekenna nandangi Kristus Jesus. ¹⁴ Asum kubahan surat enda man bandu, ngarap aku maka la nai ndekah sa reh aku ndahi kam. ¹⁵ Tapi adi ndekah denga maka aku reh, surat enda me mpebetehkenca man bandu kuga arusna perlangkahta i bas keluarga Dibata, perpulungen Dibata si nggeluh, binangun dingen palas ajaren si tuhu-tuhu. ¹⁶ Ise pe la ngasup nimbaksa kerna belinna rahasia agamanta. "Jesus Kristus reh i bas rupa manusia, ipetangkas Kesah Dibata Ia la ersalah, janah teridah man malekat-malekat. Kerna Ia ipembar ku kerina bangsa-bangsa, kerina manusia i doni tek man baNa, janah Ia enggo iangkat Dibata ku Surga."

¹ Tangkas ikataken Kesah Dibata maka lit pagin piga-piga kalak si lanai tek man Jesus Kristus. Patuh ia man kesah-kesah si erbual janah iikutkenna pengajaren setan-setan. ² Pengajaren-pengajaren e rehna i bas kalak si nipu nari, e me kalak perguak si enggo batu-batun pusuh peratenna, tempa-tempa enggo itutung alu besi si merara. ³ Kalak si bage, iajarkenna maka la banci kita erjabu, bage pe la banci sipan piga-piga erbage pangan. Tapi Dibata ngelitken pangan e kerina guna ipan kalak si erkiniteken man Kristus, si meteh kai si benar, kenca ertoto ngataken bujur man Dibata. ⁴ Kerina si enggo ijadiken Dibata e mehuli nge. Sada pe labo man pantangenken. Tapi alokenlah kerina alu ngataken bujur man Dibata, ⁵ sabap Kata Dibata ras pertoton njadikenca mehuli pangan e i lebe-lebe Dibata. ⁶ Adi iturikenndu pedah-pedah enda man senina-seninanta si enggo tek man Jesus Kristus, kam jadi suruh-suruhenNa si mehuli. Pegegehilah pertendinndu alu kata Dibata si iteki kita, ras alu ajaren-ajaren si benar si ikutkenndu alu tutus kidekah enda. ⁷ Sirangilah turi-turin si la tuhu si la erguna. Biasakenlah dirindu nggeluh bagi si ngena ate Dibata. ⁸ Latihen gerak badan lit piga-piga gunana, tapi latihen pertendin erguna i bas kai pe, sabap latihen pertendin e njamin geluhta subuk si genduari bage pe si pagin. ⁹ Kata enda tuhu janah arus kita tek dingen sialoken alu bulat ukur. ¹⁰ Erkiteken si e kita arus erbebe dingen erdahin. Sabap man Dibata si nggeluh saja ngenca kita erpengarapen, e me Dibata si enggo jadi Si Engkelini kerina manusia, terlebih-lebih Si Engkelini kalak si tek man baNa. ¹¹ Suruh dingen ajarkenlah si enda. ¹² Ola kal pelepas ise pe mapas man bandu erkiteken kam nguda denga. Tapi jadilah kam man usihen kalak si tek, subuk i bas pengeranandu, i bas lagu langkahndu, i bas kam nehken keleng ate, i bas kinitekenndu bage pe i bas ukurndu bujur. ¹³ Pakekenlah paksa si lit guna ngogeken Pustaka Si Badia man perpulungen seh aku reh pagi. Iah-iahi janah ajari kalak e. ¹⁴ Ola sia-siaken pemere si isehken Dibata man bandu asum nabi-nabi ernubuat dingen asum pertua-pertua nangkuhken kam. ¹⁵ Dalankenlah si enda kerina alu tutus, gelah kerina kalak ngidah kemajunndu. ¹⁶ Jagalah dirindu ras kai si iajarkenndu. Tetaplah dalanken si enda sabap i bas kam ndahiken dahin e iselamatkenndu me dirindu bage pe kalak si deban si megiken kam.

¹ Ola rawai kalak si umurna tuan asangken kam, tapi beluhlah min kam muat ukurna, bahan ia tempa-tempa bagi bapandu. Kalak si nguda bahanlah bagi agindu. ² Diberu si enggo metua bahanlah bagi nandendu, janah man diberu si nguda denga arus bersih lagu langkahndu, janah bahanlah bagi turangndu. ³ Mehamatlah kam nandangi diberu-diberu si enggo mbalu si lanai ersima-sima. ⁴ Tapi adi sekalak si enggo mbalu lit anakna ntah kempuna, anak ntah kempuna e lah lebe nehken tanggung jababna man keluargana e. I bas si e ersimulih ia man orang-tuana bage pe man ninina, sabap si enda me si ngena ate Dibata. ⁵ Diberu si tuhu-tuhu enggo mbalu, si lanai lit sima-simana, ia erpengarapen man Dibata. Ertoto ia man Dibata suari ras berngi mindo penampat. ⁶ Tapi diberu si enggo mbalu si nggeluh guna pesenangken dirina saja, ia enggo mate aminna pe ia nggeluh denga. ⁷ Pesehlah bana ajar enda gelah ia nggeluh alu la erpandangen. ⁸ Adi lit si la mperdiateken kade-kadena, terlebih-lebih keluargana, enggo ipersokenna kinitekenna. Jahaten me ia asangken kalak si la tek man Jesus Kristus. ⁹ Sekalak si enggo mbalu, adi langa dem umurna enem puluh tahun ola suratken gelarna ku bas gelar-gelar kalak si enggo mbalu. Arus pe maka sekali denga ngenca ia erjabu, ¹⁰ janah terberita kerna perbahanenna si mehuli: i bas ngepkep anak-anakna, i bas ngalo-ngalo kalak si kesilang ku rumahna, aminna pe la itandaina, i bas ia ngaloken kalak si erkiniteken i bas rumahna, i bas ia nampati kalak si ngenanami kiniseran, bage pe i bas ndahiken erbage-bage dahin si mehuli. ¹¹ Ola suratken gelar kalak si mbalu e adi nguda denga ia. Sabap adi sereh denga atena la ia erkemalangen man Kristus, ¹² ilanggarna padanna ndube si enggo ibahanna. ¹³ Tambah si e, isia-siakenna paksa si lit guna kirumah-kirumah alu la lit tujunna; janah si la mehulina i bas si e, e me erlajar cekurak ia, icampurina urusen kalak, bage pe icakapkenna si la perlu. ¹⁴ E maka ulin kuakap kalak si mbalu erjabu mulihi adi nguda denga ia. Ipupusna anak janah ipekena-kenana jabuna, gelah ola erkiteken ia, icekuraki imbang-imbangta kita. ¹⁵ Sabap lit piga-piga diberu si enggo mbalu papak jenari ikutkenna Iblis. ¹⁶ Tapi adi sekalak diberu si enggo tek man Jesus Kristus lit piga-piga kade-kadena enggo mbalu, isampatinalah kade-kadena si mbalu e. Alu bage perpulungen banci nampati diberu-diberu si enggo mbalu si lanai lit sima-simana. ¹⁷ Pertua-pertua si erdahin alu mehuli selaku peminpin patut iergaken dua kali lipat, terlebih-lebih kalak si tutus erdahin i bas meritaken Berita Si Meriah dingen ngajar. ¹⁸ Sabap lit tersurat i bas Pustaka Si Badia, "Ola tutupi babah lembu si ipake sangana ngerik," bage pe, "kalak si erdahin arus dat upah." ¹⁹ Ola begiken kalak si nalahken pertua, pala si nalahkenca e lit dua ntah telu kalak. ²⁰ Si ersalah ajarkenlah i lebe-lebe perpulungen gelah teman si deban pe mbiar. ²¹ I lebe-lebe Dibata, Kristus Jesus, ras i lebe-lebe malekat-malekat si badia kupindoken kal man bandu gelah ikutkenlah pedah-pedah enda alu tutus janah rembang-tengahlah min kam rukur man ise pe. ²² Ola pedassa tangkuhken kalak si erdahin i bas dahin Tuhan. Adi kalak si deban erbahan dosa ola ikutken. Jagalah dirindu gelah tetap bersih. ²³ Ola kam minem lau saja, tapi inem pe sitik anggur maka sikap beltekndu, sabap megati kam sakit. ²⁴ Lit deba jelma minter teridah dosa-dosana, janah si e tangkas ope denga ia iadili. Tapi deba seh ndekah maka teridah dosa-dosana. ²⁵ Bage pe perbahanen-perbahanen si mehuli minter nge teridah, tapi si mesera kal pe ngidahsa labo terbuniken.

¹ Kerina si jadi budak arus erpengakap maka tuanna patut ndatken kerina kehamaten, gelah ola ipebau-bau kalak gelar Dibata ras pengajarenta. ² Budak-budak si kalak Kristen tuanna, ola la mehamat man tuanna, sabap tuanna e seninana kap. Tapi reh ulina min perbahanenna man tuanna, sabap dahin si idahikenna e man guna kalak si tek, si ikelengina. Ajarken dingen beritakenlah enda. ³ Kalak si ngajarken kiniteken si deban si la sue ras Kata Tuhanta Jesus Kristus dingen la sue ras pengajaren kinitekenta, ⁴ petua-tuaken dingen pebeluh-beluhken kap ia. Kai pe labo ietehna. Sura-surana la mehuli. Nggit kal sisimbaken; janah si enda erbahanca turah cian ate, perubaten, cekurak, sangka-sangkan si la mehuli, ⁵ bage pe perubaten si la erngadi-ngadi ras kalak si la pinter ukurna dingen si lanai lit i bas ia kebujuren. Iakapna agama dalan ncari kebayaken. ⁶ Tuhu, agama erbahanca kalak bayak, adi puas iakapna erkiteken kai si lit i bas ia. ⁷ Lit kin tah kai gia sibaba ku doni enda? Lang! Banci ntah kai gia sibaba ndarat i doni enda nari? Lang! ⁸ E maka cukup min siakap adi lit nakanta ras uista. ⁹ Kalak si ersura-sura bayak ndabuh me ku bas percuban janah bene me ibahan erbage-bage sura-sura si bodoh dingen jahat, si erbahanca kalak gedap dingen kernep. ¹⁰ Sabap merangap nandangi duit e me sumbul kerina kejahaten. Enggo lit piga-piga kalak si merangap nandangi duit lanai tetap i bas kiniteken janah gulut ukurna ibahan erbage-bage kecedan ate. ¹¹ Tapi kam, o suruh-suruhen Dibata, tadingkenlah si enda ndai kerina. Usahakenlah ndalanken si ngena ate Dibata, tutus ersembah man baNa, tetap ernalem ku Ia, cidahken keleng atendu, megenggeng dingen lemah lembut! ¹² Erlumbalah asa gegehndu i bas perlumban kiniteken, guna ndatken kegeluhen si tuhu-tuhu man gunandu. Sabap guna kegeluhen si e me maka ipilih Dibata kam asum iakukenndu kinitekenndu i lebe-lebe nterem saksi. ¹³ I lebe-lebe Dibata, si mereken kegeluhen man si nasa lit bage pe i lebe-lebe Kristus Jesus, si erbahan pengakun si tuhu-tuhu i lebe-lebe Pontius Pilatus, kukataken man bandu gelah ¹⁴ ikutkenlah pedah-pedah e dingen jagalah gelah tetap bersih dingen la ceda, seh ku warina Tuhanta Jesus Kristus reh peduakaliken. ¹⁵ KerehenNa pagi Dibata ngaturkenca i bas paksana. Dibata Pemerentah Si Tonggal dingen Badia, Raja i bas kerina raja, dingen Tuhan i bas kerina tuan. ¹⁶ Dibata ngenca nggeluh rasa lalap. Ia nggeluh i bas sinalsal si ise pe la ngasup ndeherisa. Ise pe la pernah ngidah Ia, ise pe la banci ngidah Ia, terpujilah Ia janah iakuilah kuasaNa seh rasa lalap! Amin. ¹⁷ Ajarkenlah kalak bayak i bas erta doni gelah ola meganjang ukurna dingen gelah ola ia ernalem man erta-ertana si la tetap, e me kinibayakenna, tapi ernalemlah man Dibata, si mere alu melumbar kerina keperlunta guna kesenangenta. ¹⁸ Ajarkenlah gelah idalankenna si mehuli, gelah bayak ia i bas perbahanen si mehuli, gelah nggit ia mere janah meriah ukurna mereken si lit i bas ia man kalak si deban. ¹⁹ Alu bage ipepulungna erta guna dirina si banci iarapkenna i bas paksa si reh, gelah idatna kegeluhen si tuhu-tuhu. ²⁰ O, Timotius, kepkeplah alu mehuli kai si enggo iendesken Dibata man kepkepenndu. Ola kam nggit ikut ibas percakapen-percakapen si la erguna si la ngena ate Dibata. Bage pe ola kam nggit ersoal kerna perkara-perkara si niakap kalak e "pemeteh" tapi si tuhuna labo. ²¹ Sabap lit piga-piga kalak si ngataken dirina erpemeteh, tapi erkiteken si e lanai ia tek man Jesus Kristus. Lias ate Dibata rembak min ras kam kerina.