1 TESALONIKA

¹ Surat enda i bas aku nari, Paulus, ras Silas bage pe Timotius. Surat enda isehken man perpulungen i Tesalonika, si enggo jadi sikerajangen Dibata Bapa ras Tuhan Jesus Kristus. Dibatalah si mereken lias ate ras dameNa man bandu. ² Tetap kami ngataken bujur man Dibata erkiteken kam kerina, janah lalap pe kam inget kami i bas pertoton. ³ Sabap asum kami ertoto man Dibata Bapanta inget kami kuga kam ncidahken kinitekenndu arah perbahanenndu, kuga kam latih erdahin erkiteken keleng atendu, janah kuga tetapna ukurndu erpengarapen man Tuhanta Jesus Kristus. ⁴ Ieteh kami nge o senina-senina, maka keleng ate Dibata kam janah enggo ipilihNa jadi sikerajangenNa. ⁵ Sabap Berita Si Meriah e ibaba kami nai man bandu, labo saja alu kata, tapi pe alu kuasa ras Kesah Si Badia, ras alu kiniteken si tetap nandangi pengajaren si tuhu-tuhu e. Ietehndu kap kai si ibahan kami asum kami ringan i tengah-tengahndu; si e guna kiniulinndu kap. ⁶ Enggo iusihndu kami bage pe iusihndu Tuhan. Janah aminna pe melala kiniseran inanamindu, ialokenndu Berita Si Meriah e alu keriahen si reh i bas Kesah Si Badia nari. ⁷ Bage me kam enggo jadi usihen nandangi kerina kalak si tek si ringan i daerah Makedoni ras Akaya enda. ⁸ Sabap Berita Si Meriah kerna Tuhan enggo mbar i bas kam nari labo saja ku belang-belang daerah Makedoni ras ku Akaya, tapi berita kerna kam erkiniteken man Dibata e enggo mbar ku japa pe. Lanai lit si perlu man katanken kami. ⁹ Kerina kalak ncakapken kuga nai kam ngalo-ngalo kami asum kami reh ndahi kam, janah kuga kam nadingken sembah-sembahenndu guna ndahi Dibata, jenari nembah man Dibata si nggeluh dingen si tuhu-tuhu. ¹⁰ Icakapkenna pe kerna kuga kam nimai kerehen AnakNa i Surga nari, e me Jesus si ipekekeNa i bas si mate nari, dingen si mulahi kita i bas ukumen si nandangi reh i bas Dibata nari.

¹ O senina-senina, ietehndu maka kerehen kami ku kam e labo sia-sia. ² Ietehndu ope denga kami reh ndahi kam ku Tesalonika enggo leben kami isiksa dingen igombang-gombangi kalak i Pilipi. Tapi ipetetap Dibatanta ukur kami guna nuriken Berita Si Meriah man bandu, e me Berita Si Meriah si reh i bas Ia nari, aminna pe erbage-bage kiniseran si man bentasen. ³ Kata pengajuk si isehken kami man bandu labo erpalasken kepapaken, ntah sura-sura si la mehuli. Labo ate kami nipu ise pe. ⁴ Tapi kami tetap ngerana rikutken si ngena ate Dibata, sabap enggo ipetunggung Dibata kami guna meritaken Berita Si Meriah e. Kami ngerana labo gelah ngena ate manusia, tapi gelah ngena ate Dibata, si nguji sura-sura ukur kami. ⁵ Tangkas ietehndu labo alu ranan medate kami reh ndahi kam, ntah pe pekulah-kulah nutupi kinirangapen kami. Dibata jadi saksi. ⁶ Labo kami ersura-sura gelah ipujiken kalak, subuk i bas kam nari ntah i bas kalak si deban nari, ⁷ aminna pe lit hak kami mindo kai-kai pe i bas kam nari erkiteken kami rasul Kristus. Tapi asum kami i tengah-tengahndu melias kami man bandu, bagi sekalak nande nandangi anakna. ⁸ Erkiteken kelengna ate kami nandangi kam meriah ukur kami merekenca man bandu labo Berita Si Meriah si rehna i bas Dibata nari saja tapi geluh kami pe. Keleng kal ate kami kam! ⁹ O senina-senina, tentu ingetndu denga kelatihen kami erdahin! Erdahin kami suari ras berngi gelah ola kami jadi tanggungenndu kidekah kami meritaken Berita Si Meriah si rehna i bas Dibata nari man bandu. ¹⁰ Kam me saksi kami, bage pe Dibata; lagu langkah kami man bandu, kam si tek man Jesus Kristus mehuli nge, bujur dingen la salah. ¹¹ Ietehndu kai si ibahan kami man bandu sekalak-sekalak bali ras perbahanen sekalak bapa nandangi anak-anakna. ¹² Iajuk kami kam dingen ipetetap kami ukurndu, bage pe ipindo kami gelah kam nggeluh rikutken si ngena ate Dibata, e me Dibata si ndilo kam gelah ikut ngenanami kemalemen ate i bas KinirajanNa ras KemulianNa. ¹³ Janah lit denga sabap si deban si erbahanca kami tetap ngataken bujur man Dibata. Asum iberitaken kami man bandu Kata Dibata, ibegikenndu dingen ialokenndu Kata e labo bagi kata si rehna i bas manusia nari tapi bagi Kata si rehna i bas Dibata nari. Janah si tuhuna kin Kata e i bas Dibata nari. Sabap Dibata sangana erdahin i bas kam si tek man baNa. ¹⁴ O senina-seninangku, kai si enggo inanamindu bali me ras kai si enggo inanami perpulungen-perpulungen Dibata si lit i Judea, e me kalak si enggo jadi sikerajangen Kristus Jesus i jah. Kam pe ngenanami kiniseran-kiniseran si rehna i bas bangsandu nari bagi kalak e enggo ngenanami kiniseran i bas kalak Jahudi nari, ¹⁵ e me kalak Jahudi si munuh Tuhan Jesus ras nabi-nabi, dingen si pesega-sega kami. Seh kal jahatna ia i lebe-lebe Dibata! Ise pe jadi imbangna. ¹⁶ Tole pe, iambatina atena kami meritaken Berita si maba keselamaten e man bangsa si deban. Alu kejahatenna e itambahi kalak Jahudi e ku dosa-dosa si ibahanna gelgel nari seh enggo dem kal. E maka genduari ia enggo kena pernembeh ate Dibata. ¹⁷ Tapi kami, o senina-senina asum kami sirang kentisik ras kam labo i bas ukur, tapi i bas kula ngenca. Metedeh kal ate kami nandangi kam! Janah usahaken kami kal ndahi kam mulihi. ¹⁸ Ersura-sura kal kami gelah jumpa mulihi ras kam. Aku, Paulus, la sekali ngenca ersura-sura gelah mulihi ndahi kam, tapi iambati Iblis kami. ¹⁹ Ma kin kam nge pengarapen ras keriahen kami, sabap kam la kurang asangken kalak si deban? Erkiteken kam me maka megah iakap kami kerna kemenangen kami i lebe-lebe Tuhanta Jesus asum Ia reh pagi. ²⁰ Tuhu-tuhu kam me erbahanca megah dingen meriah iakap kami.

¹ Dungna lanai tergengken kami. E maka itetapken kami tading i kota Atena ² janah isuruh kami Timotius berkat ndahi kam, e me seninanta si erdahin ras kami guna Dibata i bas meritaken Berita Si Meriah kerna Kristus. Isuruh kami ia ndahi kam guna nampati dingen mpegegehi kinitekenndu, ³ gelah ola kam murtad sekalak pe erkiteken kiniseran-kiniseran e. Ietehndu maka kiniseran-kiniseran e sada bagin i bas sura-sura Dibata nandangi kita. ⁴ Asum kami i tengah-tengahndu denga, enggo leben ikataken kami man bandu maka kita nandangi isiksa; janah genduari bagi enggo ietehndu si e tuhu-tuhu jadi. ⁵ Erkiteken si e maka terpaksa kusuruh Timotius. Lanai tergengken aku, e maka kusuruh ia ndahi kam guna pepayo ntah tetap denga kam tek man Dibata ntah lang. Labo mungkin kam icubai Iblis seh maka sia-sia kerina pendahin kami! ⁶ Genduari enggo mulih Timotius, janah ibabana berita kerna kiniteken ras keleng atendu. Iturikenna pe man kami, maka tetap nge mehuli pengakapndu kerna kami janah mesikel kal kam jumpa ras kami bagi kami pe mesikel jumpa ras kam. ⁷ E maka i bas kerina kesusahen ras kiniseran kami, o senina-senina terapul kami erkiteken kam. Kinitekenndu e erbahanca kami terapul. ⁸ Sabap genduari tuhu-tuhu kami nggeluh, adi tetap kam nggeluh rembak ras Tuhan. ⁹ Genduari banci kami ngataken bujur man Dibata erkiteken keriahen si lit i bas kami i lebe-lebe Dibatanta erkiteken kam. ¹⁰ Suari ras berngi ertoto kami man Dibata alu ukur tutus, gelah banci min kami jumpa ras kam, jenari itambahi kami kai si iperlukenndu guna kinitekenndu. ¹¹ Dibata Bapanta, ras Tuhanta Jesus min nikapken dalan man kami gelah jumpa ras kam. ¹² Ertambah-tambalah min ibahan Tuhan keleng atendu sekalak nandangi si debanna bage pe nandangi kerina manusia seh maka keleng atendu e bali belinna ras keleng ate kami nandangi kam. ¹³ Alu bage ipegegehi Tuhan me ukurndu, janah jadi serta dingen badia me kam i lebe-lebe Dibata Bapanta asum reh pagi Tuhanta Jesus ras kerina jelma si enggo jadi sikerajangenna.

¹ Kedungenna, o senina-senina, kam enggo iajari kami kuga arus nggeluh gelah sentudu ras peraten Dibata. Tuhu bagenda nge kegeluhenndu gelgel nari. Janah genduari ipindoken kami kal man bandu i bas gelar Tuhan Jesus dalankenlah lebih asa si e! ² Sabap ietehndu nge pedah si ipeseh kami man bandu alu kuasa Tuhan Jesus. ³ Sura-sura Dibata nandangi kam e me gelah kam iserapken jadi sikerajangenNa nggeluh la erlua-lua. ⁴ Kerina dilaki i tengah-tengahndu arus ietehna min kuga muat ndeharana alu cara badia dingen terpuji, ⁵ labo erpalasken sura-sura kula saja, bagi kalak si deban si la nandai Dibata. ⁶ I bas si enda, ola min ise pe erbahan salah nandangi senina si sada kiniteken ntah pe meneken ia. Enggo ikataken kami man bandu mbaru enda. Enggo ikataken kami man bandu alu terang-terangen maka kalak si ndalanken kesalahen-kesalahen si bage iukum Tuhan nge pagi. ⁷ Kita ipilih Dibata labo gelah nggeluh erlua-lua. Dibata ersura-sura gelah kita nggeluh badia. ⁸ E maka kalak si nulak pengajaren enda labo manusia si itulakna, tapi Dibata si mereken Kesah Si Badia man bandu nge si itulakna. ⁹ Labo perlu isuratken kami man bandu kerna keleng ate nandangi teman-temanndu si sada kiniteken. Dibata enggo ngajari kam kuga kam arus sikeleng-kelengen. ¹⁰ Janah kerna si enda enggo idalankenndu nandangi kerina senina-senina si enggo tek man Jesus Kristus i belang-belang Makedoni. E maka ipindo kami man bandu, o senina-senina dalankenlah lebih asa si e! ¹¹ Usahakenlah nggeluh alu tenang, ola campuri perkara kalak si deban, janah erdahinlah guna keperlunndu, bagi si enggo ikataken kami nai man bandu. ¹² Alu bage, mehamat me man bandu kalak si la tek man Jesus Kristus, janah la kam perlu ernalem man kalak si deban kerna keperlunndu. ¹³ O senina-senina, ate kami maka ietehndu min kuga si tuhuna kerna kalak si enggo mate, gelah ola ceda atendu bagi kalak si la erpengarapen. ¹⁴ Tek kita maka Jesus enggo mate janah enggo nggeluh mulihi. Bage pe tek kita maka kalak si enggo mate si tek man Jesus ibaba Dibata pagi ku Jesus gelah ersada ras Ia. ¹⁵ Pengajaren Tuhan si ituriken kami man bandu e me: Kita si nggeluh denga asum reh pagi Tuhan mulihken labo pagi silebei kalak si enggo mate. ¹⁶ Lit pagi sora erlebuh, sora malekat si mbelin ras sora terompet Dibata janah nusur me Tuhan i Surga nari. Kalak si enggo mate si tek man Kristus me pagin si pemenana ipegeluh mulihi. ¹⁷ Kenca bage maka kita si nggeluh denga paksa si e ipepulungNa ras kalak ndai i datas embun guna njumpai Tuhan i awang-awang. Kenca bage tetap kita ras Tuhan. ¹⁸ E maka si apul-apulenlah kam alu kata enda.

¹ O senina-senina, la perlu isuratken kami man bandu kerna ndigan tah katawari si enda jadi. ² Sabap kam pe tangkas ietehndu maka Wari Tuhan e reh bagi penangko si reh asum berngi. ³ Asum ikataken kalak, "Kerinana tenang dingen aman," paksa si e me reh rempet si ngkernepken ia! Kiniseran e rempet reh bagi suina iakap diberu si nandangi mupus. E maka lanai terkiamkenca. ⁴ Tapi kam, o senina-senina, labo kam i bas gelap, janah wari e pagi labo min aturenna kam sengget ibahanna bagi si ibahan penangko. ⁵ Kerina kam anak-anak terang dingen anak-anak suari. Asalta labo i bas berngi ntah pe i bas gelap nari. ⁶ E maka la kita patut tunduh bagi kalak si deban. Kita arus metenget dingen jore ukurta. ⁷ Berngi nge kalak tunduh; berngi nge kalak mabuk. ⁸ Tapi kita sikerajangen suari kap; arus maka jore ukurta. Arus sipake kiniteken ras keleng ate jadi ampang-ampang tententa, janah pengarapenta guna selamat e me jadi tengkulukta. ⁹ Kita ipilih Dibata labo gelah si nanami ukumen si reh i bas Ia nari, tapi gelah sialoken keselamaten arah Tuhanta Jesus Kristus, ¹⁰ si enggo mate man gunanta gelah banci kita nggeluh ersada ras Ia, subuk kita nggeluh denga ntah enggo mate asum Ia reh pagi. ¹¹ Erkiteken si e sitatang-tatangenlah janah sisampat-sampatenlah kam bagi si sangana ibahan kam genduari e. ¹² O senina-senina, ipindoken kami man bandu gelah ipehagandulah kalak si erdahin i tengah-tengahndu, e me kalak si enggo ipilih Tuhan guna ngepkep dingen ngajari kam. ¹³ Pehaga kal dingen kelengilah ia, erkiteken dahin si idahikenna. Ola kam si rubat-rubat. ¹⁴ Ipindoken kami man bandu o senina-senina: Ajarkenlah kalak si perkisat, tetapkenlah ukur kalak si perbiar, sampatilah kalak si kote janah sabarlah kam nandangi ise pe. ¹⁵ Metengetlah gelah ola lit si erbalas alu kesalahen nandangi kalak si erbahan salah, tapi bahanlah si mehuli nandangi teman bage pe nandangi kerina manusia. ¹⁶ Meriahlah atendu katawari pe. ¹⁷ Ertotolah katawari pe, ¹⁸ janah katakenlah bujur man Dibata i bas si kugapana pe. Enda me si ngena ate Dibata ibahanndu i bas geluhndu selaku kam kalak si enggo ersada ras Kristus Jesus. ¹⁹ Ola ambati pendahin Kesah Si Badia. ²⁰ Ola kam anggap enteng nandangi berita kerna sura-sura Dibata. ²¹ Kai pe ujilah lebe; cikep si mehuli, ²² silahken kerina si jahat. ²³ Dibata, si mereken kemalemen ate man banta, erbahanca kam badia i bas kai pe; janah Ia si engkawali kam, kesahndu, tendindu ras kulandu bersih i bas kesalahen nari asum kerehen Tuhanta Jesus Kristus pagi. ²⁴ Dibata si ndilo kam e setia kap, janah Ia si erbahanca maka si enda banci jadi. ²⁵ Ertotolah kerna kami pe o senina-senina. ²⁶ Sisalam-salamenlah kam alu dem keleng ate bagi si ersenina. ²⁷ Kupindoken man bandu alu kuasa Tuhan: Ogekenlah surat enda man kerina senina-senina si enggo tek man Kristus. ²⁸ Lias ate Tuhan Jesus Kristus min nemani kam.