1 PETRUS

¹ Surat enda i bas aku nari, Petrus rasul Jesus Kristus. Surat enda man anak-anak Dibata si enggo ipilih, e me kalak perlajang si merap i belang-belang propinsi Pontus, Galati, Kapadokia, Asia ras Bitinia. ² Kam enggo ipilih rikutken sura-sura Dibata Bapa, janah ijadiken KesahNa jadi anak-anakNa si badia, gelah kam ngikutken Jesus Kristus dingen bersih kam ibahan darehNa. Lias ate ras kemalemen ate si la erkeri-kerin, si rehna i bas Dibata nari, jadi sikerajangenndu gelah. ³ Sikatakenlah bujur man Dibata, Bapa Tuhanta Jesus Kristus! Erkiteken perkuah ateNa si mbelin, iberekenNa man banta kegeluhen si mbaru, alu mpekeke Jesus Kristus i bas si mate nari. Si enda mereken pengarapen si nggeluh man banta. ⁴ Erkiteken si enda me maka siarapken pasu-pasu si mbelin jadi sikerajangenta, si isikapken Dibata man anak-anakNa. Pasu-pasu si man bandu e ibuniken Dibata i Surga, i ja pasu-pasu e la banci ceda, macik, ntah pe luntur. ⁵ Pasu-pasu e man bandu, e me kam si arah kiniteken ikawali kuasa Dibata guna keselamaten si enggo sikap guna ipetangkas Dibata i bas paksa pendungi pagi. ⁶ Ermeriah ukurlah kerna si enda, aminna pe genduari kam arus erceda ate i bas paksa si kentisik erkiteken erbage-bage percuban si inanamindu. ⁷ Percuban e tujunna guna ncidahken ntah kinitekenndu tuhu-tuhu ntah lang. Emas si banci ceda e pe isepuh alu api, apai denga ka kinitekenndu si ndauh ergan asangken emas e. Kinitekenndu arus isepuh gelah ermurnina. Kenca bage maka i bas wari e pagi, sanga kerehen Jesus Kristus ku doni enda, ialokenndu pujin, kemulian, dingen kehamaten. ⁸ Keleng atendu Kristus aminna pe langa idahndu Ia. Tek kam man baNa amin pe la Ia idahndu. Erkiteken si e ermeriah ukur kam alu keriahen si mbelin ras mulia si la terbelasken alu kata, ⁹ sabap ialokenndu keselamaten tendindu, e me ulih kinitekenndu man baNa. ¹⁰ Keselamaten enda me si idarami dingen si ipepayo nabi-nabi nai, janah ernubuat ia kerna pemere lias ate si nandangi ibereken Dibata man bandu. ¹¹ Ipepayona ntah ndigan e jadi, janah uga kerehenna. Janah kerna si e enggo ipetangkas Kesah Kristus si erdahin i bas nabi-nabi e, asum kalak enda ernubuat kerna kiniseran-kiniseran si la banci lang ibentasi Kristus dingen kerna kemulian si reh kenca kiniseran e. ¹² Ipetangkas Dibata man nabi-nabi e maka nabi-nabi e erdahin man gunandu labo man bana; e me kerna si genduari si enggo ibegindu alu tangkas arah perberita Berita Si Meriah kerna Jesus Kristus. Si enda kerina isehkenna man bandu alu kuasa Kesah Si Badia si ipesusur Dibata i Surga nari. Janah kerna si enda, malekat-malekat pe mesikel metehsa. ¹³ E maka sikapkenlah ukurndu katawari pe. Metengetlah dingen tuhu-tuhu lah erpengarapen nandangi pasu-pasu si pagin ibereken Dibata man bandu, sanga kerehen Jesus Kristus ku doni enda. ¹⁴ Erkemalangenlah man Dibata, janah ola pelepas geluhndu ibabai sura-surandu si ndekah, e me sura-sura paksa kam langa erpemeteh kerna Dibata. ¹⁵ Tapi badia min kam i bas kerina perbahanenndu, bagi Dibata si ndilo kam pe badia kap. ¹⁶ I bas Pustaka Si Badia ikataken Dibata, "Kam arus badia, sabap Aku pe badia." ¹⁷ Tupung kam ertoto man Dibata, ikatakenndu Ia Bapa. Ia me si ngadili kerina manusia alu la erndobahen rikutken perbahanen sekalak-sekalak. Erkiteken si e pakeken kesempaten si lit guna pemuliaken Dibata, kidekah kam nggeluh denga i doni enda. ¹⁸ Ietehndu kap alu kai kam itebusi i bas kegeluhenndu si la erguna, si ialokenndu i bas nini-ninindu nai nari. Kam itebusi labo alu barang si banci masap, umpamana emas ntah pirak. ¹⁹ Kam itebusi alu dareh Kristus si meherga, bagi sada anak biri-biri si la cacat dingen la erpandangen si igeleh. ²⁰ Ia enggo ipilih Dibata ope denga doni enda ijadiken, janah enggo ipetangkas i bas wari-wari si arah pudi enda guna kiniulinndu. ²¹ Arah Ia, tek kam man Dibata si pekeke Ia i bas si mate nari dingen si mereken kemulian man baNa. E maka kiniteken ras pengarapenndu itamakenndu i bas Dibata. ²² Erkiteken patuh kam ngikutken pengajaren si tuhu-tuhu e, enggo ibersihkenndu dirindu seh maka lit i bas kam keleng ate si tuhu-tuhu nandangi temanndu si sada kiniteken. E maka sikeleng-kelengenlah kam alu bulat ukur. ²³ Sabap arah kata Dibata si nggeluh dingen tetap rasa lalap, kam enggo tubuh jadi manusia si mbaru si labo tubuh arah manusia tapi i bas Bapa si rasa lalap nari. ²⁴ Bagi lit tersurat i bas Pustaka Si Badia, "Kerina manusia desken dukut-dukut, janah kerina kemulianna desken rudang dukut. Dukut melus, rudangna pe nartar; ²⁵ tapi kata Tuhan tetap seh rasa lalap." Kata enda me Berita Si Meriah si enggo iberitaken man bandu.

¹ Erkite-kiteken si e tadingkenlah kerina si jahat; olanai erbual, ntah pekulah-kulah, ntah ercian ate, ntah pe cekurak. ² Bagi anak-anak si mbaru tubuh min kam, si rusur muas nandangi susu pertendin si la lit campurna, gelah alu nginem susu e reh belinna kam dingen selamat. ³ Bagi lit tersurat i bas Pustaka Si Badia, "Enggo inanamindu kap uga ulina Tuhan e." ⁴ Dahilah Tuhan, batu si nggeluh si itulak ras si la iergaken manusia, tapi ipilih dingen iergaken Dibata. ⁵ Rehlah kam bagi batu-batu si nggeluh janah berelah min dirindu ipake guna majekken rumah pertoton kesah. I bas ingan e me kam erdahin jadi imam-imam si badia, guna mpersembahken man Dibata persembahen pertendin si ngena ate Dibata erkelang-kelangken Jesus Kristus. ⁶ Sabap lit tersurat i bas Pustaka Si Badia, "Enggo kupilih sada batu si meherga, si kutamaken i Sion jadi batu palas, janah ise si tek man baNa, la ndigan pe kecewa." ⁷ Batu enda meherga kal man bandu, kam si tek. Tapi man kalak si la tek, "Batu si iambekken tukang e, kepeken e me batu si si jadi palas." ⁸ Bage pe lit tersurat i bas Pustaka Si Badia, "Enda me batu si erbahanca pagi kalak tertuktuk, batu si erbahanca kalak jongkang." Tertuktuk ia perbahan la ia tek kata e. Bage me kap peraten Dibata man bana. ⁹ Tapi kam e me bangsa pilihen, imam-imam Raja, bangsa sikerajangen Dibata, anak-anak Dibata si ipilih guna meritaken perbahanen-perbahanen Dibata si mbelin. Dibata enggo ndilo kam ndarat i bas si gelap nari ku bas terangNa si lanai kal langlang ulina. ¹⁰ Nai kam labo anak-anak Dibata, tapi genduari kam enggo jadi anak-anakNa. Nai la ietehndu perkuah ate Dibata, tapi genduari enggo ialokenndu perkuah ateNa. ¹¹ O teman-temanku si kesilang ras mengongsi i bas doni enda, kupindo alu mesangat man bandu gelah ola ikutkenndu kininggiten daging si rusur erperang ras tendi. ¹² Mehulilah min lagu langkahndu i tengah-tengah kalak si langa nandai Dibata, gelah adi ikatakenna kam kalak jahat, idahna perbahanenndu si mehuli, e maka erkiteken si e ipujina Dibata i bas wari kerehenNa ku tengah-tengah kegeluhen kalak e. ¹³ Erkiteken Tuhan, patuhlah kam nandangi kerina pemerentah i doni enda subuk nandangi raja, pemerentah si meganjangna, ¹⁴ bage pe man gubernur-gubernur si itugasken raja guna ngukum kalak si erbahan jahat ras muji kalak si erbahan mehuli. ¹⁵ Sabap sura-sura Dibata e me kap gelah arah perbahanenndu si mehuli ipesinikndu kalak bodoh si luam cakapna. ¹⁶ Nggeluhlah bagi kalak bebas; tapi ola bahan kebebasenndu nutupi si jahat, tapi nggeluhlah bagi budak Dibata. ¹⁷ Mehamatlah man kerina manusia, kelengilah temanndu si sada kiniteken, erkemalangenlah man Dibata, janah mehamatlah man raja. ¹⁸ Kam budak-budak arus patuh nandangi tuanndu, janah cidahkenlah maka tuhu-tuhu kam mehamat man bana, labo saja man tuan si mehuli dingen si ngangka ukurndu, tapi pe man tuan si kejam. ¹⁹ Ipasu-pasu Dibata me kam erkite-kiteken si enda, adi megenggeng kam i bas kiniseran si la patut ialokenndu, sabap ietehndu kai si ngena ate Dibata. ²⁰ Sabap kai kin si man pujinken adi igengkenndu gia parap-parap si patut ialokenndu erkiteken kam enggo erbahan salah? Tapi adi megenggeng kam i bas kiniseran aminna pe mehuli perbahanenndu, ipasu-pasu Dibata me kam erkiteken si e. ²¹ Guna si enda me kam idilo Dibata; sabap Kristus jine pe enggo ngenanami kiniseran man gunandu, janah itadingkenNa sada usihen si man usihenndu, gelah iikutkenndu dalanNa. ²² Ia la erdosa. Ise pe la enggo megi kata si la tuhu i bas biberNa nari. ²³ Asum Ia igombang-gombangi kalak, la ibalasNa alu kata megombang. Janah asum Ia ngenanami kiniseran, la ilawanNa kalak, tapi erpengendes Ia man Dibata, Hakim si bujur. ²⁴ Kristus jine enggo ngangkut dosa-dosanta i bas kulaNa i kayu persilang, gelah kita mate nandangi dosa, jenari nggeluh nandangi si ngena ate Dibata. Erkiteken lukaNa, kam enggo ipepalem. ²⁵ Nai kam bagi biri-biri si enggo papak, tapi genduari kam enggo ibaba mulihken guna ngikutken Permakan Singkawali tendindu e.

¹ Bage pe kam o ndehara, patuhlah man perbulangenndu, gelah adi perbulangen la tek nandangi Kata Dibata, banci ia tek erkiteken lagu langkahndu aminna gia la kam ngerana sengkebabah pe, ² sabap idahna maka mehuli dingen mehamat lagu langkahndu. ³ La perlu ibahanndu barang-barang tambahen si arah darat guna nambahi jilendu, umpamana i bas kam pejile-jile bukndu, makeken perhiasen emas, ntah pe makeken uis mejile. ⁴ Tapi bahanlah maka jilendu e rehna i bas pusuhndu nari, kejilen si la ermasap-masap, e me lemah lembut dingen ukur teneng. Enda me kejilen si meherga kal i lebe-lebe Dibata. ⁵ Alu bagenda me diberu-diberu si nai si erkiniteken dingen erpengarapen man Dibata ipejilena bana alu patuh man perbulangenna. ⁶ Sarah pe nai bage nge, patuh ia man Abraham dingen igelarina Abraham, "Tuan". Kam me genduari anakna si diberu, adi idalankenndu perbahanen-perbahanen si mehuli dingen la kam mbiar i bas kai pe. ⁷ Bage pe kam o perbulangen nggeluhlah kam alu dem pengertin nandangi ndeharandu, janah arus iangkandu maka gegehen kam asang ia. Mehamatlah kam man bana, sabap ia pe radu ras kam, ngaloken kiniulin kegeluhen si ibereken Dibata. Bagendalah perbahanenndu gelah ola lit si ngolangi pertotonndu ku Tuhan. ⁸ Dage kedungenna ersada min ukurndu ras ersada min penggejapenndu. Sikeleng-kelengen min kam bagi ersenina, dingen mesayang janah meteruk min ukurndu sekalak nandangi si debanna. ⁹ Ola balas perbahanen si jahat alu si jahat, ntah sumpah alu sumpah. Tapi balaslah alu pasu-pasu, sabap pasu-pasu me si ipadanken Dibata iberekenNa man bandu, asum kam idiloNa. ¹⁰ Bagi lit tersurat i bas Pustaka Si Badia, "Kalak si mesikel nggeluh cawir metua dingen senang, la banci melasken si jahat, bage pe la banci erbual. ¹¹ Arus jera ia i bas perbahanen-perbahanen si jahat nari, jenari ibahannalah si mehuli; arus idaramina tuhu-tuhu perdamen alu bulat ukur. ¹² Sabap Tuhan tetap natap kempak kalak bujur, janah tetap ibegikenNa pertotonna; tapi ilawanNa kalak si ndalanken perbahanen si jahat." ¹³ Ise kin nuhsahi kam adi ergiah-giah ukurndu ndalanken si mehuli? ¹⁴ Tapi aminna pe arus kam ngenanami kiniseran erkiteken kam ndalanken si mehuli, malem me atendu! Ola kam mbiar nandangi ancamen kalak janah ola aru atendu. ¹⁵ Tapi mehamatlah kam man Kristus i bas pusuhndu, janah pehagalah Ia selaku Tuhan. Ersikaplah katawari pe guna njabap kalak si mindo gelah iterangkenndu pengarapen si lit i bas kam. ¹⁶ Tapi bahanlah e alu lemah lembut dingen mehamat. Jagalah maka pusuh peratenndu tetap bersih. Alu bage adi ihina kalak kam, kalak si ncekuraki lagu langkahndu si mehuli selaku kam pengikut Kristus, jadi mela iakapna erkiteken kai si ikatakenna. ¹⁷ Sabap ulin me ngenanami kiniseran erkiteken perbahanen si mehuli, adi kin enda sura-sura Dibata, asangken erkiteken perbahanen si jahat. ¹⁸ Sabap Kristus mate cukup sekali saja ngenca erkiteken dosa-dosa manusia, janah sekali saja ngenca Ia mate. Ia kalak bujur, mate man guna kalak perdosa, gelah banci kam ibabaiNa rembak ras Dibata. Ia mate secara daging, tapi ipegeluh secara Kesah Si Badia. ¹⁹ Janah i bas kuasa Kesah e lawes Ia meritaken berita i bas Dibata nari man tendi-tendi si tertaban, ²⁰ e me kalak si la erkemalangen man Dibata asum Dibata alu saber nimai wari-wari Nuah ndungi perahuna. Lit piga-piga kalak ngenca si i bas perahu e, e me waluh kalak; janah kerina selamat arah lau e. ²¹ Lau e nggambarken lakon peridin si nelamatken kam genduari. Lakon peridin e labo mbersihken kula i bas si melket nari, tapi lakon peridin e, e me padan si ibahan man Dibata alu pusuh peraten si bersih. Lakon peridin e nelamatken kam arah kekeken Jesus Kristus i bas si mate nari, ²² si enggo lawes ku Surga, janah genduari Ia ringan arah kemuhen Dibata. Ia merentah subuk nandangi malekat-malekat ras penguasa-penguasa bage pe gegeh si debanna.

¹ Erkiteken Kristus enggo ngenanami kiniseran kula, kam pe arus ipersenjataindu bandu alu perukuren si lit i bas Ia tupung e. Sabap kalak si ersada ras Kristus i bas kiniseranNa, enggo ngadi erbahan dosa. ² E maka kidekah kam nggeluh denga i doni enda, kegeluhenndu arus ikuasai peraten Dibata, labo kerincuhen manusia. ³ I bas paksa si enggo lepas enggo cukup ndekah kam ngaloken perbahanen-perbahanen si merincuh usur kalak si la nandai Dibata ngelakokenca. Kam nggeluh alu la meteh mela, iikutkenndu kerincuhen dagingndu, mabuk-mabuk, pesta minem-minem si nggesuh, nagih minem inemen si erbahanca mabuk, janah nembah man berhala-berhala e me perbahanen si erbahanca manusia mbau. ⁴ Tapi genduari mamang ate kalak si la nandai Tuhan kenca lanai ikutkenndu ia i bas kegeluhen si la mehuli e. Perbahan si e me maka kam igombangina. ⁵ Tapi man Dibata arus ipertanggung jawabkenna dirina, e me man Dibata si enggo sikap ngadili kalak si nggeluh ras si enggo mate. ⁶ Erkiteken si e maka Berita Si Meriah enggo iberitaken man kalak si genduari enggo mate, gelah aminna pe ia enggo kena ukumen kematen secara daging bagi kerina manusia, tapi secara pertendin ia terus nggeluh alu kegeluhen Dibata. ⁷ Kerina si nasa lit enggo ndeher kedungenna. Dage kuasailah dirindu janah petenenglah ukurndu gelah ngasup kam ertoto. ⁸ I babo si e kerina, sikeleng-kelengenlah kam alu tutus, sabap keleng ate namburi melala dosa. ⁹ Metemue lah kam alu la jungut-jungut. ¹⁰ Sekalak-sekalak, selaku pengurus si mehuli i bas pemere Dibata si pelain-lain e, si iberekenNa erpalasken lias ateNa, arus nggunaken pemere e guna kiniulin kalak si deban. ¹¹ Kalak si ngerana, ngeranalah alu kata-kata si tempa-tempa rehna i bas Dibata nari. Kalak si nampati, isampatinalah kalak alu gegeh si ibereken Dibata man bana, gelah i bas kai pe ipuji kalak Dibata arah Jesus Kristus. Ia me si mada kemulian kuasa seh rasa lalap. Amin! ¹² O senina-seninangku si kukelengi, ola kam sengget erkiteken percuban si mberat si sangana ngkenai kam, tempa-tempa kejadin si luar biasa sangana reh man bandu. ¹³ Tapi meriahlah atendu sabap kam ikut muat bagin i bas kiniseran Kristus, gelah kam dem alu keriahen asum kemulian Kristus ipetangkas. ¹⁴ Ketuahen kam adi igombang-gombangi kalak kam erkiteken kam ajar-ajar Kristus. Si enda nuduhkenca maka i bas kam ringan kesah si mulia, e me Kesah Dibata. ¹⁵ Adi ngenanami kiniseran kin kam ola erkiteken ia sekalak pemunuh, ntah penangko, ntah kalak jahat, ntah pe icampurina urusen kalak si deban. ¹⁶ Tapi adi kam ngenanami kiniseran erkiteken kam kalak Kristen, ola iakapndu mela kerna si e. Tapi katakenlah bujur man Dibata erkiteken kam igelari alu gelar Kristus. ¹⁷ Enggo seh paksana Dibata mulai ngadili doni enda. Anak-anak Dibata me si perlebena iadili. Janah adi kita lebe iadili kuga nge dungna kalak si la nggit ngikutken Berita Si Meriah si rehna i bas Dibata e nari? ¹⁸ Bagi lit tersurat i bas Pustaka Si Badia, "Kalak si bujur pe mesera guna iselamatken, apai denga ka kalak si la ngakui Dibata ras kalak perdosa!" ¹⁹ E maka kalak si ngenanami kiniseran rikutken peraten Dibata, alu perbahanenna si mehuli iendeskenna min kerina geluhna man Si nepa ia, si tetap nehken padanNa.

¹ Ngerana aku man pertua-pertua perpulungen si lit i tengah-tengahndu. Aku pe sekalak pertua nge bali ras kam. Kusaksiken kerna kiniseran Kristus janah dat bagin me aku i bas kemulianNa si ipetangkas pagi. ² Kupindo man bandu gelah mpermakani rarasen biri-biri si enggo ibereken Dibata man bandu, janah kepkeplah e alu ukur meriah bagi si ngena ate Dibata, ola alu ukur mberat. Ola erkiteken mata duiten maka idalankenndu, tapi lakokenlah e erkiteken ukurndu ersuruh guna ngelayani. ³ Ola atendu iperentahindu kalak si enggo iendesken jadi si man kepkepenndu, tapi bahanlah kam jadi usihen biri-biri e. ⁴ Janah asum reh pagi Kepala Permakan e, ialokenndu me rudang-rudang tanda kehagan si la ermelus-melus. ⁵ Bage pe kam si nguda denga, patuhlah kam nandangi kalak si metua. Alu meteruk ukur erbentingkibullah kam kerina guna sisampat-sampaten. Sabap i bas Pustaka Si Badia lit tersurat, "Kalak si meganjang ukurna itulak Dibata, tapi man kalak si meteruk ukurna icidahkenNa lias ateNa." ⁶ E maka peteruklah bandu iteruh tan Dibata si erkuasa, gelah i bas paksa si payo, ipeganjangkenNa kam. ⁷ Ampekenlah kerina kearun atendu man Dibata, sabap Ia kap si mperdiateken kam. ⁸ Tenanglah kam tapi metengetlah! Sabap Iblis imbangndu e gawah-gawah ku jah ku je bagi sada singa si erngaung ndarami si man jerngemenna. ⁹ Tetaplah paguh kinitekenndu janah lawanlah imbangndu e, sabap ietehndu maka teman-temanndu si sada kiniteken i belang-belang doni enda ngenanami kiniseran bagi si inanamindu. ¹⁰ Tapi kenca kam ngenanami kiniseran kentisik, serta me kam ibahan Dibata, Si dem lias ate, Si ndilo kam gelah ngenanami kemulianNa si rasa lalap erkiteken persadanndu ras Kristus; ipetetapNa dingen ipegegehiNa kam janah iberekenNa man bandu palas si nteguh. ¹¹ Dibata kap erkuasa seh rasa lalap. Amin! ¹² Surat si gendek enda kubahan man bandu alu penampat Silas, e me sekalak seninanta kalak Kristen si kuakui kalak si tutus. Ateku pegegehi kam ras mereken kesaksinku maka enda lias ate Dibata si tuhu-tuhu. Tetaplah kam i bas lias ate e. ¹³ Teman-temanndu si sada kiniteken si ringan i Babil e me si ipilih Dibata ka, bage pe anakku Markus ngataken mejuah-juah man bandu. ¹⁴ Sisalam-salamenlah kam alu dem keleng ate bagi si ersenina. Dame man bandu kerina gelah, kam si enggo jadi sikerajangen Kristus.