12345678910111213141516171819202122232425262728
12345678910111213141516
123456789101112131415161718192021222324
123456789101112131415161718192021
12345678910111213141516171819202122232425262728
12345678910111213141516
12345678910111213141516
12345678910111213
123456
123456
1234
1234
12345
123
123456
1234
123
1
12345678910111213
12345
12345
123
12345
1
1
1
12345678910111213141516171819202122

1 JOHANES

1

1 Isuratken kami man bandu kerna Kata si mereken kegeluhen, si enggo lit ope denga kai pe lit. Enggo ibegi kami Kata e, enggo idah kami alu mata kami; tuhu-tuhu enggo idah kami, janah enggo pe idadap kami alu tan kami. 2 Kenca kegeluhen e ncidahken diriNa, enggo idah kami Ia, e maka ngerana kami kerna si e, janah ituriken kami man bandu kerna kegeluhen si tuhu-tuhu si la erkeri-kerin si lit i bas Bapa si enggo ipetangkas man kami. 3 Kai si enggo idah kami dingen ibegi kami e, iberitaken kami man bandu pe gelah kam ikut ras kami ersada ras Bapa dingen ras AnakNa Jesus Kristus. 4 Isuratken kami enda man bandu gelah kuh keriahenta. 5 Enda me berita si enggo ibegi kami i bas AnakNa e nari janah ipeseh kami man bandu: Dibata terang kap janah la lit sitik pe si gelap i bas Ia. 6 Dage, adi ninta ersada kita ras Ia, tapi nggeluh kita i bas gelap, erbual kap kita i bas kata ras perbahanenta. 7 Tapi adi nggeluh kita i bas terang bali e ras Ia nggeluh i bas terang; lit persadanta sapih-sapih kita janah kematen Jesus, AnakNa e mbersihken kita i bas kerina dosa nari. 8 Adi ninta maka la lit dosanta, sitipu kap dirinta, janah Kata si tuhu-tuhu i bas Dibata nari la lit i bas kita. 9 Tapi adi siakuken dosanta man Dibata, isehkenNa me padanNa, ilakokenNa kai si bujur, ialemiNa dosa-dosanta, janah ibersihkenNa kita i bas kerina perbahanenta si la payo. 10 Adi ninta maka la kita erdosa, sibahan Dibata jadi perguak, janah KataNa la lit i bas kita.

2

1 O anakku, si enda kusuratken man bandu gelah ola ibahanndu dosa. Tapi adi lit kalak si erbahan dosa, lit kap kelang-kelangta mindo man Dibata, e me Jesus Kristus si ndalanken si bujur. 2 Ia nanggung ukumenta erkiteken dosa-dosanta man Dibata, gelah kita iperdameken ras Dibata, janah labo dosanta saja, tapi pe dosa-dosa kerina manusia. 3 Adi patuh kita ngikutken perentah Dibata tandana kita nandai Dibata. 4 Adi lit kalak ngatakenca maka itandaina Dibata, tapi la ikutkenna perentahNa, perguak kap ia, janah Kata si tuhu-tuhu i bas Dibata nari la lit i bas ia. 5 Tapi ise si ngikutken Kata Dibata, ia me si ngkelengi Dibata alu sempurna. Alu enda si eteh maka kita enggo ersada ras Dibata. 6 Kalak si ngataken maka ia nggeluh ersada ras Dibata, ia arus nggeluh bagi Jesus Kristus. 7 O teman-temanku si kukelengi! Perentah si kusuratken man bandu enda labo perentah si mbaru, tapi perentah si ndekah nge si enggo ipeseh man bandu mula-mulana nari. Perentah si ndekah e me berita si enggo ialokenndu i bas Dibata nari. 8 Amin bage gia, pedah si kusuratken enda banci ikataken pedah si mbaru, erkiteken kebenaren perentah e teridah i bas Jesus Kristus bage pe i bas kam. Sabap kegelapen enggo lepas, janah terang si tuhu-tuhu enggo ersinalsal. 9 Kalak si ngataken maka ia nggeluh i bas terang, tapi nembeh atena seninana, situhuna ia i bas gelap denga nge seh paksa enda. 10 Kalak si ngkelengi seninana, i bas terang kap ia nggeluh, janah i bas ia la lit si erbahanca kalak si deban ndabuh ku bas dosa. 11 Tapi kalak si nembeh atena seninana, i bas gelap kap ia. Ia erdalan i bas gelap janah la ietehna ku ja ia lawes, sabap la ia erpengidah ibahan gelap e. 12 O anakku, kusuratken enda man bandu, sabap dosandu enggo ialemi Dibata erkiteken Kristus. 13 Kam orang tua, kusuratken enda man bandu, sabap itandaindu Ia si enggo lit ope denga kai pe lit. Man bandu kam si nguda denga, kusuratken enda sabap enggo italukenndu si jahat. 14 O anak-anak si kitik denga, kusuratken enda man bandu, sabap itandaindu Bapa. Kusuratken enda man bandu orang tua, sabap itandaindu Ia si enggo lit ope denga tembe doni enda. Kusuratken enda man bandu kam si nguda denga, sabap kam megegeh; Kata Dibata nggeluh i bas kam janah enggo italukenndu si Jahat. 15 Ola kelengi doni enda ntah pe kai si lit i bas doni enda. Sabap adi ikelengindu doni enda la ikelengindu Bapa. 16 Kerina si lit i doni enda, si mengga ate kalak perdosa -- e me kai si idahna janah ngena atena seh maka man bana atena, ras kai si lit i doni enda si erbahanca meganjang ukur kalak; si e sada pe labo reh i bas Bapa nari, tapi i doni nari. 17 Doni ras kerina isina masap kap pagi; tapi si ndalanken peraten Dibata nggeluh kap rasa lalap. 18 O, anak-anakku, wari pendungi enggo ndeher! Bagi enggo ikataken man bandu maka musuh-musuh Kristus reh me; bage me genduari enggo teridah melala musuh-musuh Kristus. Arah e sieteh maka wari pendungi e enggo ndeher. 19 Kalak enda si tuhuna labo i bas persadanta, e me sabapna maka itadingkenna kita. Sabap adi tuhu-tuhu kin ia i bas persadanta, labo kita itadingkenna. Tapi ia nadingken kita gelah tangkas maka sekalak pe ia labo i bas persadanta nari. 20 Tapi Kristus enggo mereken Kesah Si Badia man bandu, gelah kerina kam meteh Kata si tuhu-tuhu i bas Dibata nari. 21 Dage kubahan surat enda man bandu, labo erkiteken la ietehndu ketuhu-tuhun e, tapi erkiteken ietehndu nge. Janah kam pe ietehndu maka i bas pengajaren si benar e, la terdat kata guak. 22 Dage, ise kin si perguak e? E me kalak si ngataken maka Jesus e labo Mesias si ipadanken Dibata. Ia me musuh Kristus; itulakna Bapa ras Anak e. 23 Sabap kalak si nulak Anak e, itulakna pe Bapa e. Janah kalak si ngaloken Anak e, ialokenna pe Bapa e. 24 Dage, berita si enggo ibegindu tangtangna nari arus maka tetap ibunikenndu alu mehuli i bas ukurndu. Sabap adi berita e tetap iperdiatekenndu alu mehuli, kam tetap nggeluh ersada ras Anak bage pe ras Bapa e. 25 Janah enda me si ipadanken Kristus man banta, e me kegeluhen si tuhu-tuhu si la erkeri-kerin. 26 Si kusuratken man bandu enda e me kerna kalak si sangana ersura-sura mabai kam papak. 27 Tapi man bandu enggo ibereken Kristus KesahNa. Kidekah KesahNa e lit i bas kam, la perlu kalak ngajari kam. Sabap iajari KesahNa e me kam kerna kai pe, janah kai si iajarkenNa tuhu kap, labo salah. Dage, ikutkenlah pengajaren Kesah e, janah tetaplah kam ersada i bas persadan ras Kristus. 28 O, anak-anakku, tetaplah kam i bas persadan ras Kristus, gelah katawari pe Ia reh, tetap ukurta dingen la perlu kita cebuni i bas Ia nari erkiteken mela siakap i bas Wari kerehenNa. 29 Enggo itehndu maka Kristus nggeluh rikutken si ngena ate Dibata. Sabap e arus ka itehndu maka kasa kalak si nggeluh rikutken si ngena ate Dibata, ia me anak Dibata.

3

1 Nehen uga kelengna ate Bapa man banta! Bage belinna kekelengenNa man banta seh maka kita igelari anak-anak Dibata. Janah labo gelar saja, tapi tuhu-tuhu me kita anak-anak Dibata. Enda me sabapna maka doni si jahat enda la nandai kita: sabap doni la nandai Dibata. 2 O kam si kukelengi, kita enda genduari anak-anak Dibata, tapi kuga kita pagi, langa ipetangkas man banta. Tapi sieteh maka kenca pagi reh Kristus, bali me kita ras Ia, sabap siidah me Ia bagi si tuhu-tuhuna. 3 Kalak si bagenda pengarapenna nandangi Kristus, ijagana bana gelah tetap bersih i bas dosa-dosa nari, bali ras Kristus pe bersih i bas dosa nari. 4 Kalak si erbahan dosa, ilanggarna pe perentah Dibata, sabap dosa e me ngelanggar perentah Dibata. 5 Itehndu maka Kristus enggo reh ku doni enda guna ngangkut dosa manusia, janah Ia jine la erdosa. 6 Jadi kerina kalak si nggeluh i bas persadan ras Kristus lanai iteruskenna erbahan dosa; tapi si terus erbahan dosa, langa idahna Kristus ntah pe langa itandaina Ia. 7 O anak-anakku, ola pelepas ise pe mabai kam papak! Kalak si ngelakoken si ngena ate Dibata asalna i bas Dibata nari, bali ras Kristus pe asalna i bas Dibata nari. 8 Tapi kalak si terus erbahan dosa ia sikerajangen Iblis kap, sabap Iblis e erdosa mula-mula nari kin. Anak Dibata reh ku doni enda guna engkernepken pendahin Iblis. 9 Ise si enggo jadi anak Dibata la iteruskenna erbahan dosa, sabap biak Dibata lit i bas ia. Janah erkiteken Dibata kap Bapana, lanai banci iteruskenna erbahan dosa. 10 Enda me lainna anak-anak Dibata ras anak-anak Iblis: ise si la ngelakoken si ngena ate Dibata, ntah pe la ikelengina seninana ia labo anak Dibata. 11 Mula-mulana nari kin enggo ibegindu berita enda, e me kita arus sikeleng-kelengen. 12 Ola bagi Kain si jadi anak Iblis, agina pe ibunuhna. Engkai kin maka ibunuh Kain agina? E me erkiteken kai si ibahan Kain salah, janah kai si ibahan agina, rikutken si ngena ate Dibata. 13 Jadi ola mamang atendu o senina-senina, adi nembeh ate bangsa doni enda man bandu. 14 Sieteh kap maka enggo sitadingken kematen janah lawes kita ku kegeluhen; si enda sieteh perbahan keleng ateta seninanta. Kalak si la erkeleng ate, tandana ia tetap denga i teruh kuasa kematen. 15 Kalak si nembeh atena seninana, pemunuh kap. Janah ietehndu maka kalak pemunuh la lit i bas ia kegeluhen si tuhu-tuhu si la erkeri-kerin. 16 Arah enda me sieteh kekelengen e: Kristus enggo ngendesken geluhNa man gunanta. E maka kita pe arus ngendesken geluhta guna seninanta. 17 Adi lit sekalak bayak idahna seninana kekurangen, tapi la atena mekuah man seninana e, kuga banci kalak si bage ngatakenca maka keleng atena Dibata? 18 O anak-anakku, kekelengenta ola terjeng biber saja ntah pe i bas cakap saja ngenca. Arus maka tuhu-tuhu kekelengenta e, si teridah arah perbahanenta. 19 Bagenda me dalanna maka si eteh kita bengket ku bas si asalna i bas Dibata nari, seh maka tetap ukurta i adep-adepen Dibata. 20 Adi pusuh peratenta nalahken kita, sieteh maka Dibata belinen asa pusuh peratenta, janah kai pe ietehNa. 21 E maka o senina-senina si kukelengi, adi pusuh peratenta la nalahken kita, tetap kap ukurta i adep-adepen Dibata. 22 Kai pe si ipindo kita man baNa iberekenNa nge, sabap patuh kita ngikutken perentahNa janah sibahan si ngena ateNa. 23 Si iperentahkenNa man banta e me kap arus maka kita tek man AnakNa, e me Jesus Kristus; janah kita arus sikeleng-kelengen bagi enggo ipedahken Kristus man banta. 24 Ise si patuh ngikutken perentah-perentah Dibata, ia nggeluh i bas persadan ras Dibata janah Dibata nggeluh i bas persadan ras ia. Janah sieteh maka Dibata nggeluh i bas persadan ras kita erkiteken KesahNa si iberekenNa man banta.

4

1 O kam si kukelengi, ola kam tek man kerina kalak si ngaku maka i bas ia lit Kesah Dibata. Tapi ujilah lebe guna metehsa ntah kin payo kesah si lit i bas ia e rehna i bas Dibata nari. Sabap enggo nterem nabi perguak i japa pe. 2 Bagenda me dalanna metehsa ntah kin payo kesah e Kesah Dibata: kalak si ngakui maka Jesus Kristus reh ku doni enda selaku manusia, kalak si bage lit i bas ia Kesah si rehna i bas Dibata nari. 3 Tapi kalak si la ngakui si enda ndai kerna Jesus, la lit i bas ia kesah si rehna i bas Dibata nari. Kesah si lit i bas ia e, e me kesah si rehna i bas musuh Kristus nari. Kerna si enda enggo ibegindu maka reh me ia, janah genduari enggo ia lit i bas doni enda. 4 Tapi kam sikerajangen Dibata kap, o anak-anakku. Enggo italukenndu nabi-nabi perguak e, sabap Kesah si lit i bas kam gegehen asa kesah si lit i bas kalak sikerajangen doni si jahat enda. 5 Nabi-nabi perguak e ngerana kerna perkara-perkara doni, janah doni enda megiken cakapna sabap ia sikerajangen doni enda. 6 Tapi kita sikerajangen Dibata kap. Ise si nandai Dibata ibegikenna cakapta; ise si la nandai Dibata la ibegikenna cakapta. Dage bagenda me dalanna metehsa lainna Kesah si tuhu-tuhu si rehna i bas Dibata nari ras kesah si la tuhu-tuhu si mabai kalak papak. 7 O kam si kukelengi, sikeleng-kelengenlah kita, sabap kekelengen e rehna i bas Dibata nari kap. Kalak si erkeleng ate, anak Dibata kap ia janah itandaina Dibata. 8 Kalak si la erkeleng ate, labo itandaina Dibata, sabap Dibata kekelengen kap. 9 Dibata enggo ncidahken kekelengenNa man banta alu nuruh anakNa Si Tonggal ku doni enda, gelah kita nggeluh arah Ia. 10 Enda me kekelengen e: labo kita si enggo ngkelengi Dibata, tapi Ia nge si ngkelengi kita. E maka isuruhNa AnakNa ku doni enda gelah arah Ia kita iperdameken ras Dibata alu ngalemi dosa-dosanta. 11 O kam si kukelengi, adi bagenda kin kelengna ate Dibata man banta, kita rutang sikeleng-kelengen sapih-sapih kita. 12 Aminna ise pe la enggo ngidah Dibata, tapi adi sikeleng-kelengen kita, Dibata ringan i tengah-tengahta janah kekelengenNa jadi serta i tengah-tengahta. 13 Alu bage sieteh kita ringan i bas Dibata, janah Dibata ringan i bas kita, sabap enggo kita dat bagin i bas Kesah si iberekenNa man banta. 14 Janah enggo siidah ras siberitaken man kalak si deban maka Bapa enggo nuruh AnakNa ngkelini doni enda. 15 Adi lit kalak si ngatakenca maka Jesus e me Anak Dibata, Dibata ringan i bas ia janah ia ringan i bas Dibata. 16 Janah kita jine enggo meteh janah tek nandangi kekelengen Dibata man banta. Dibata kekelengen kap, janah ise si erkeleng ate ia ringan i bas Dibata janah Dibata ringan i bas ia. 17 Kekelengen e ibahan jadi serta i bas kita gelah kita la mbiar jumpa ras Dibata i bas Wari Pengadilen. La kita mbiar sabap kegeluhenta i bas doni enda bali ras kegeluhen Kristus sangana Ia i doni enda denga. 18 I bas keleng ate la lit kebiaren. Kekelengen si serta erbahanca kita lanai mbiar. Ukumen nge si erbahanca turah kebiaren; e maka kalak si mbiar denga, e tandana langa lit i bas ia keleng ate si serta. 19 Kita ngkelengi, sabap leben Ia ngkelengi kita. 20 Adi lit kalak si ngatakenca maka keleng atena Dibata, tapi nembeh atena man seninana, kalak si bage perguak. Sabap kalak si la ngkelengi seninana si idahna, labo tuhu ia ngkelengi Dibata si la idahna. 21 Enda me perentah si enggo sialoken i bas Kristus nari: ise si ngkelengi Dibata, arus maka ikelengina pe seninana.

5

1 Ise si tek maka Jesus e me Mesias si ipadanken e, ia me kap anak Dibata; janah ise si ngkelengi Bapa, ikelengina pe anak Bapa e. 2 Bagenda me dalanna maka sieteh kita ngkelengi anak-anak Dibata, e me: alu ngkelengi Dibata ras patuh man perentah-perentahNa. 3 Ngkelengi Dibata ertina patuh man perentah-perentahNa. Perentah-perentah e labo mberat, 4 sabap kerina anak-anak Dibata enggo naluken doni enda. Janah doni enda sitaluken alu kinitekenta man Jesus Kristus. 5 Ise kin si naluken doni enda? E me kalak si tek maka Jesus e me Anak Dibata. 6 Jesus Kristus me si enggo reh ku doni enda. Ia reh alu lau lakon peridinNa ras dareh kematenNa. Ia reh labo alu lau saja tapi alu lau ras dareh. Janah Kesah e jine naksiken maka si enda tuhu me, sabap Kesah e kebenaren kap. 7 Dage lit telu saksi: 8 Kesah, lau ras dareh; janah teluna sada kesaksinna. 9 Tek kita nandangi kesaksin manusia; tapi ndauh gegehen kesaksin si ibereken Dibata. Janah enda kesaksin si enggo ibereken Dibata kerna AnakNa. 10 E maka kalak si tek Anak Dibata, enggo lit kesaksin enda i bas dirina jine. Tapi kalak si la tek Dibata, enggo ibahanna Dibata e perguak, sabap la ia tek kai si enggo isaksiken Dibata kerna AnakNa. 11 Enda me kesaksin e: Dibata enggo mereken man banta kegeluhen si tuhu-tuhu si la erkeri-kerin, janah AnakNa e me sumbul kegeluhen e. 12 Kalak si lit i bas ia Anak e, i bas ia lit kegeluhen e; kalak si la lit i bas ia Anak Dibata e, la lit i bas ia kegeluhen. 13 Kusuratken enda man bandu gelah itehndu kegeluhen si tuhu-tuhu si la erkeri-kerin enggo jadi sikerajangenndu e me kam si tek i bas gelar Anak Dibata. 14 La kita mbiar i bas adep-adepen Dibata sabap ibegikenNa kita adi sipindo man baNa kai si sentudu ras peratenNa. 15 IbegikenNa kita katawari pe adi kita mindo man baNa; erkiteken sieteh maka enda tuhu me, sieteh pe maka iberekenNa man banta kai si ipindo kita i bas Ia nari. 16 Adi idahndu seninandu erbahan dosa si la maba kematen, arus maka kam ertoto man Dibata, janah iberekenNa nge kegeluhen man kalak si erdosa e. Enda ibahan man kalak si dosana la maba kematen. Tapi lit dosa si maba kematen, janah la kukataken maka arus kam ertoto man Dibata kerna dosa si bage. 17 Kerina perbahanen si salah dosa kap, tapi lit dosa si la maba kematen. 18 Sieteh maka kalak si enggo jadi anak Dibata labo terus erbahan dosa, sabap Anak Dibata njagai ia, janah si Jahat e la ngasup erbahan kai pe man bana. 19 Sieteh maka asalta i bas Dibata nari aminna gia kerina doni enda lit i bas kuasa si Jahat e. 20 Sieteh maka Anak Dibata enggo reh ku doni enda. Enggo iberekenNa man banta kepentaren gelah sitandai Dibata si tuhu-tuhu. Kita kerina lit i bas Dibata si tuhu-tuhu e arah AnakNa Jesus Kristus. Ia me Dibata si tuhu-tuhu, janah enda me kegeluhen si tuhu-tuhu si la erkeri-kerin e. 21 O anak-anakku, jagai dirindu i bas dibata-dibata si perguak nari!