Titus

Titus

¹ Mi Uporl angwu mì yi uboyi Unim, mi mbee shi unwaa-isom Ujeso Ukristi na᷅ mı᷆ fee ’ushia ahwun. Unim a som mi le mì lè shi abongale bendi abe ufe a waa kung à kwu kang-kang, mi hwua ābe bè ngye ’igyang puu gbe lè ’ukwo Unim, ² ahwu ’u᷆ shi bendi be᷆ ndor lishi likpan angi lì yi ngyor igye. Unim angwu u᷆ bè uman ye a ke li úkyébb likpan limen i mà ukpong u hà shi igye anyin. ³ Nyong ’unyong ’u ma fel há, ufe Unim angwu ù yi Undi-likpan utyan a fem likpan limen i be he igye gbe he igie ima. A kung aki abunale ’isom ’ima fe-m he ’ubwo, u de le mì bun āshi kpe-kpe-kpe. ⁴ Mi fee ’ushia ahwun hwaa lè wo Utaitus angwu wò yi unwaa-gi ugyang a he abongale angwu ù yi ke li puu. Unim Atyetyan lè Ujeso Ukristi, Undi-likpan utyan, bè hā ka-a ’ukwun, be shi hè ’ì kwun-a he lityam kpatiaa. ⁵ Atan-lengi angwu mi ndor-a he Ukrit ù yi le ha-a à mbee biwom shi abi bi teng lè ashele, wo waa bekaandi ndor he liwu bendi abongale he ’ubong ’uyang-yang. Well utebb angwu mi ka-a le: ⁶ kì yi kpe-kpe le ukaandi liwu bendi abongale ù kwu faale ungwu atimale, u kee-kee kwu lè ungye ken a, bebwaa-ma be kwu bendi abe be᷆ fe Unim a, be shi akpe abibi ye, be kpo lishi ye. ⁷ Bwo ’ì yi le atie-lishi liwu bendi abongale u nda gba lè biwom Unim a, kì yi kpe-kpe le ù kwu faale ungwu atimale, u kwu undi idim a ye, u kwu undi ’agbugbel a ye, u kwu undi ibwom a ye, u kwu undi linaa ashele a ye, u kwu undi angwu u᷆ kee lifem he ’ukwo ’ubibi a ye. ⁸ Kì yi kpe-kpe le ù gor kpē begaandi gye ha ahe ushu, u kwu undi angwu ’i nyin he lè ’inunung. Ù kwu undi angwu u᷆ gim ugim kpa-kpa, u shi biwom puu kpa-kpa, u ndor ’uhwo-ma utaa-utaa lè he ’iban, u ngye ná ù kwu ’uhwo-ma. ⁹ Kì yi kpe-kpe le ù kwu undi angwu a naa genn he ’isom ’igyang ashi bel li hwua, saa u ha᷅ kwa lè ikeb angi u᷆ hwua bendi ’igyang he-e ù fe be ingie. U mbee kwu lè ikeb angi u᷆ tyung bendi abe be shi atyetye lè ha ’isom ashin le bè yi liketye. ¹⁰ Kì yi lè bendi gbamm abe be kpo lishi, mbee-mbee lè bendi Ijuus abe be de le undi uyang-yang angwu a fel undi Unim ù ten kpe-kpe. Be kong akpel-ye a, be lam bendi ilam. ¹¹ Kì yi kpe-kpe le wò shi ābe bè shib ungwu, likorye be hwua bendi biwom abi ’ì yi le hang be hwua ye, be hwua ābi kee únde a, ashina ’ì yi ishwia-ishwia. Gbe he ashin be sha bikwu-lihwan bi tyang ’ukwo Unim. ¹² Undi ubell ugyang ken angwu u᷆ ndè benim a de le: "Bendi Ukrit bè yi bendi-uman a, bè yi ná inyia ibibi nà, be hwun lihwun ukpor be gwul ye." ¹³ Ashi a kong ana ’ì yi ’igyang. He ashina, ndè le wo kong ha abe igie ikaa-ikaa hè be bè bong àshi ’ì yi ’igyang, ¹⁴ hè be bè tem gye ’ushu gyo ikorli itim Ijuus angi ì yi lè lifem ye ana ye, be pwom iten bendi abe be swan ’igyang ana ye. ¹⁵ Undi angwu lityam lima lì yi litaa-litaa, biwom puu bi kwa he bitaa-bitaa, ukpor undi angwu ù yi ubibi, u bong ha Ujeso ye, kì yi le ashi ’ì yi-e ’itaa-itaa ye, likorye ugim uma a ban, u ngya atyetye ’inunung lè ’ibibi ye. ¹⁶ Be kong he ungwu le befe be ngye Unim, ukpor likpe libell li tyung gboo le be ngye-e ye. Be ban tang abwo tang abee, be ka Unim ife ye. Kì yi lè ’inunung ashi be᷆ shi mbee ye.

¹ Wo-gyang ufe, ndè le wo hwua biwom abi bi keè he ’igyang ashi li hwua bendi. ² Tebb bengikye abe gbel le bè shi ’iwom ’iyang-yang he ’uhwo ūkee᷅, be kwu gbelakaa ye, bè kwu dangg, abongale ubell ha Ujeso Ukristi ù kwu ugyang-ugyang, be kwu lè benyin begyang abell ha bendi, be kwu bendi lityam angibale. ³ Wō tebb bengingye abe gbel le bè ke Unim ife he ’iwom ’iyang-yang ashi be᷆ shi. Bè kong bendi he ungwu ’ibibi ye, bè kwu ufee ke ’utyuo ye. Bè hwua bebwaasul ashi ’ì yi ’inunung, ⁴ le hè be bè tebb ābe le ’ì nyin ābe lè bekyebell, ki nyin ābe lè bebwaa-bell. ⁵ Bè mbee hwua bebwaasul le bè kwu dangg, be kwu lè àtyám ataa-ataa, be ndè gbe lè ishu bekyebell ngbebb-ngbebb, be kwu benunung, be keb ke bekyebell, le hè bendi bè ndè ashi bè be kong ’ibibi gbe lè igie Unim ye. ⁶ Tebb ishomate or titi le bè kwu dangg. ⁷ Ndè le wo-gyang wo shi ’iwom ’iyang-yang dell-dell, le hè bendi abe be teng bè ndè kung lè ha awo. Nya a na wo᷆ hwua bendi, ndè le abwo agang agyang or à yi ataa-ataa. ⁸ Nyong wo᷆ hwua, kong igie inunung angi undi u᷆ tim āngi ungwu ye, le hè ishwia ì shi bendi-linaa betyan likorye be nda ’ibibi ashi be᷆ kong ban li ye. ⁹ Tebb ifee le bè keb ke betyabell hè be bè shi ngbebb betyabell he ’iwom ’iyang-yang. Bè naa fan ābe ye, ¹⁰ be bee he abwo ye. Bè kwu bendi abe betyabell bè fe lityam ha abe kangg, le hè ’iwom ’iyang-yang ashi be᷆ shi ’ì shi bendi bè kong ’inunung gbe lè uhwuale utyan gbe lè Unim angwu ù yi Undi-likpan utyan. ¹¹ Unim a fem inung ima lè beshi bema tyung he igye gboo le hè bendi puu bè fel kwu lè likpan ’unyong. ¹² Inung lè beshi ana na᷅ bı᷆ tyung li le lì tyang ashele biwom abi bi ngbebb Unim ye, lè bigyor puu abi igye anyin. Bi hwua li le lì fel kwu dangg, li kwu benunung, li shi nyin Unim he biwom puu abi lı᷆ shi he igye anyin. ¹³ Nyin i ná li kwu lı᷆ nyong Liti igor angi lı᷆ ndor lishi nyong lı᷆ be nde ifem Ujeso Ukristi angwu ù yi Unim utyan angwu a hwò puu, u shi Undi-likpan utyan. ¹⁴ Ufe na᷅ a ma kung ’uhwo-ma ke he ’uhwo ’utyan le he-e ù pong li lè he abwo ’iban, u shi li li fel betaa-betaa lè ha ’iban le lî fel bendi abe ufe a waa kung, abe be᷆ shi ’inunung mbee ’unyong puu. ¹⁵ Biwom abina na᷅ ’ì yi le wò hwua bendi. Unim a ka-a ikeb le wò fe bendi ingie, wo tyung ābe imbeb ibell. Undi ù bia-a ye.

¹ Gye ’ushu well bendi le bè keb ke besu lè bendi puu abe bè yi he ābwò akaandi. Bè ke be ife, be kam ashele ’inunung ’iyang-yang. ² De be le bè kong undi he ungwu ’ibibi ye, bè tyua anaa ye, bè kwu lè ’uhwo ambwele, bè gim ’uhwo-bell a ’ushu ye. ³ Bel-agyang or, leěti li ma yi kpel-ye, li ma kaa lishi, igim ityan i ma yi liketye. Li ma yi ifee a ke bigyor biwom atyetye-atyetye. Li maa gim bìbíbı᷆ mbee ’unyong, li ban lityam fe biwom bendi. Bendi be maa tel li, bel li tel bende. ⁴ Ukpor he ’unyong ahwu Unim angwu ù yi Undi-likpan utyan a ma fem inung ima lè benyin bema he igye, ⁵ a ma kpan li. A ma shi ashin le bwo bel li maa shi ’inunung a ye, ukpor a ma shi āshi gbe he beshi abe bema begyang a. A kpan li, u to li lè he ’iban ndor betaa-betaa, u ke li likpan lifufe gbe he ikeb Ukatia Kunyong Unim. ⁶ Unim a mbò Ukatia Kunyong uma wu li kyo-kyo-kyo gbe ha Ujeso Ukristi, Undi-likpan utyan. ⁷ A shi ná le hè gbe he inung ima lî fel bendi benunung he ashi ama, li fel lè likpan angi lı᷆ ngyor igye angi lı᷆ ndor lishi. ⁸ Biwom abina puu bì yi ’igyang. Mi kee-a le wò kong ābi hwa᷅-hwa᷅ ye le hè bendi abe be bong ha Unim ana, bè kung ugim ubell ndor he ashele binunung. Biwom abina bi ngbebb, bi shi lè lifem ke bendi. ⁹ Gbe lè abwo agang fe he ifung angi akpel-ye ye, ban ’unyong kwu kwell ’ikwu betyamen ye, wo shwan ’ushwan ye, wo kwu kwell Iten Ijuus ye. Likpe angi ’itaa ana lì yi lè lifem ye, lì yi ’idideng. ¹⁰ Undi uyang-yang angwu u᷆ ban liwu, ke-e utebb ’ugbe ken. Gbe wo mbee ke-e ubwan lefee a kpē ye, mbee lè abwo lè he ’uhwo-ma. ¹¹ Ngye le ’itaa undi ashina, ugim uma a ban tang abwo tang abee, ù yi undi-iban a, ufe-gyang a tang libi ke ’uhwo-ma. ¹² Mi ba som undi hwaa lè wo, pisoye mi som Atemas a, pisoye mi som Utikikes a. Nyong undi angwu mi som a wu há, ban ’unyong ye, be nde-m he Unikopolis likorye mi kam le mi kwa há kpamm ’akwuo ’a mbee. ¹³ Kaa kangg kpell Uzinas angwu ù yi uloya lè Aporlos he litan angi be kam ana hè ’iwom ’ì baa ābe ye. ¹⁴ Kì yi kpe-kpe le bendi betyan bè hwua ná bè kung ’ùnyōng ’ubell shi binunung, hè be bè kpell bendi abe ’i gben ābe, be mbee hwua ná bè ban ’unyong kwu ’idideng ye. ¹⁵ Bendi puu abe bè yi ipel ha ami hen, be kong lè wo. Kong li lè bendi abe ’i nyin ābe lè bel, be mbee bong ha Ujeso ná bel. Unim ù hā ke men puu ’ukwun.