Romans

Romans

¹ Mi Uporl, angwu mì yi uboyi Ujeso Ukristi, na᷅ mı᷆ fee ’ushia ahwun. Unim a waa kung mi le mì kwu unwaa-isom uma, u som mi le mì lè bun ’isom ’inunung Unim. ² Kisom ’inunung ’imen i na᷅ leěti Unim a ma ke úkyébb gbe ha bendi abe be᷆ tye ugie ’isom ’ima, befe be fee āshi he ’ushia Unim. ³ Kisom ’inunung ’imen i ’ì yi gbe lè Atyetyan Ujeso Ukristi angwu ù yi Unwaa-ma á. Ná undigye, a be ūbū lè he ’ikwu-lihwan Udebid á. ⁴ Ná Unim, kife na᷅ a wum lè he lihwu gbe he ikeb Ukatia Kunyong Unim. Ashina ’i tyung gboo le ù yi Unwaa Unim a. ⁵ Gbe ha ahe, Unim a tyung inung ima ha ami, u waa mi le mì kwu unwaa-isom uma le he lizen lima mî be lè bendi lè he abong puu be be bong ha ahe, be ke-e ife. ⁶ Men or titi mà yi he liwu bendi abe Unim a ko le bè kwu bendi Ujeso Ukristi. ⁷ Mi fee ’ushia ahwun hwaa lè men puu he Urom abe ’i nyin Unim lè men, abe a waa kung le mà kwu bendi bema. Unim Atyetyan lè Atyetyan Ujeso Ukristi bè hā ke men ’ukwun, be shi ’ì kwun amen he atyam kpatiaa. ⁸ He lizen Ujeso Ukristi, mi pee Unim ugi he ’uhwo ’umen, likorye bendi mbee igye puu be gyo ná ma bong ha Ujeso Ukristi. ⁹ Unim angwu mı᷆ shi-e aki lityam ken he abunale ’isom ’inunung gbe lè Unwaa-ma, a naa mi ushada le mi kong ha ahe mbee ’unyong ka amen. ¹⁰ Mbee ’unyong puu mi kong ha Unim, mi bii he le gbe ’i ngbebb he, ù ma buu mi ’ukwo mî be ha amen há. ¹¹ Mì yi lè ’igyor kangg le hang mi nde men, hè abele ugi há ù be lè ’ukwun lè ha Ukatia Kunyong Unim ke men, ’u shi amen ma naa genn fe Unim. ¹² Àshi mı᷆ kong ana ’i ze le, mi kee le bel lè men lì kpell bende, ugi abongale u fa amen ingie, umen u fe-m mi ingie. ¹³ Bebuye, mi kee amen le mà ngye le, kpamm be wu ’unyin i, mi kaa le mî be ha amen há, mi nda ’unyong ye. Mi kee le mi ba há, mi shi aki angi a᷆ kwu lè lifem linunung he liwu līme᷅n ná mi shi he abong angi a teng. ¹⁴ Kì yi kpe-kpe le mì bun ’isom ’inunung de bendi puu. Kì yi le mì bun āshi de bendi abe be buu àshì, lè abe bè so àshì kpi-kpi, mì bun de abe be ngye ’ushia, lè abe be ngye ’ushia ye. ¹⁵ He ashin, mì yi lè ’igyor kangg le mi bun ’isom ’inunung da amen abe he Urom or titi. ¹⁶ Ishwia i sha-m he abunale ’isom ’inunung ashin ye. Gbe he ’isom ’inunung ’imen i na᷅ Unim u᷆ kpan bendi puu abe be bong ha ahe. Be bun āshi de Ijuus, saa be hà bun de abe bè yi Ijuus a ye. ¹⁷ Kisom ’inunung ’imen i ’i tyung ná ’anaa-anaa i Unim u᷆ shi bendi be᷆ fel benunung he ashi ama kee-kee gbe he abongale ufe-ufe, gbe he ’isuso pel ha abongale ye. Kì yi nya a na be fee he ’ushia Unim a le: "Undi angwu Unim a shi-e a fel ununung he ashi ama likorye a bong ha ahe na᷅ u᷆ kwu lè likpan ligyang angyell." ¹⁸ Unim u tyung le ù yi lè ingywo ha biban lè bibibi abi bendi be᷆ shi, likorye ’ibibi ’ibell ’i shī ndyell ’igyang. ¹⁹ Unim a ke be ’ingie, likorye be shi ’iban mà na be ngye gbe lè Unim or, likorye Unim ugyang a tyung ābe abin. ²⁰ Kung lè há ’unyong ahwu Unim a shi igye anyin puu, biwom abi a shi bi tyung bendi gboo ’itaa Unim ù yi, mà na be᷆ nde-e lè atong-shi ye or. Bi tyung gboo le ikeb ima ì yi ’itaa ken ngyor igye, bi tyung le ù yi Unim ugyang angwell a. He atan-lengi anwun, bendi-biban abena bè yi lè ashi be᷆ kwu ’ubwo hwaa ingywo Unim ye. ²¹ Mà na be ngye gbe lè Unim or, be ke-e ife angi i keè ha ahe or, ngwu bè pee he or ye. Igim ibell i fel ’idideng, be fel he ’ifufebb, ashi ’ì yi kpa-kpa ’ì tem nung ābe ye. ²² Be kong le bè yi dangg, ukpor bè yi bikwo a. ²³ Àshi le bè fe Unim angwu a dyam, u᷆ hwō ye, be tem fel fa litelakpa angi be tān ná bendigye abe be᷆ hwō, lè linyun, lè inyia, lè bishishi biwom puu abi bı᷆ su lifung he itang a. ²⁴ He ashina Unim a tyang ābe abwo le bè ndo shi bibibi abi be kee, be mbee shi biwom ishwia ha bende. ²⁵ Be swan ’igyang ashi gbe lè Unim, be fel tàn he akwo iman. Be fa biwom abi Unim a shi a, fem Unim ugyang angwu a shi biwom puu tyang. Ki shi le Unim a kpè le bè pee he ngyor igye kpamm. Kì ngyor ná Unim a kong. ²⁶ He atan-lengi anwuna Unim a tyang ābe abwo le bè ndo shi biwom ishwia abi bì yi bigyor bibell. Bengingye bebell or be tyang bengikye tem fel gbà ipel ha bende ashi ’i tel Unim kangg. ²⁷ Bengikye or titi, be tyang andēle ipel ha bengingye tem fel nda᷆ ipel ha bende. Biwom abi be᷆ shi bì yi ishwia-ishwia. Be ba lè ushe Unim angwu a keè nya swa ’uhwo-bell he lishi. ²⁸ Bwo be fe ukaa swan le be ka Unim ife ye, Unim a tyang ābe abwo le bè ndo pwom igim ibibi ibell he biwom ashele abi bì yi le undi ù shi ye. ²⁹ Àtyám abell à yi sho lè biban lè bibibi, be ndor lishi biwom bendi, be sha ’ibibi ha bende, be ban lityam fe ’iwom undi, be gwu bendi, be shwan ’ushwan, be ndo ’undo, be lam bendi, be bell bendi ’ibibi, be kèm bende, ³⁰ be kong bia bendi, be shi bendi-linaa Unim, be kaa lishi, be dim idim, be pwom ungwu, mbee ’unyong puu be gim ’ukwo ’ufufe ahwu bè shi ’iban, be fa betyabell or, ngwu bendabell or ye. ³¹ Bè tem ngya atyetye ’inunung lè ’ibibi ye, be ndor íkyébb ibell ye, bè yi lè inung or, ngwu beshi or, ha bendi ye. ³² Mà na be ngye le Unim a de le bendi abe be᷆ shi bitaa biwom abina be ba lè lihwu ka ’uhwo-bell or, bè so-i gya ’ushu sha ābi. Ashina ’ife-ife a ye, nyong bendi be᷆ shi biwom abin, befe be bong le be shi ’i ngbebb.

¹ Udim-gi, wo angwu wo᷆ de le bendi abe be teng be sha ’i ngbebb ye, ndè le wo ngye le wo-gyang or wò yi lè ashi wo᷆ kwu ’ubwo hwaa ingywo Unim ye? Nyong wo᷆ de le undi-iso a shi ’i ngbebb ye, hà wo de le wo-gyang na᷅ wo shi ’i ngbebb ye, likorye wo-gyang wo sha bimen abi befe be᷆ shi ana. ² Li ngye le nyong Unim u᷆ maa ushe tang libi ke bendi abe be᷆ shi bitaa biwom bimen ana, ushe uma ù yi kpa-kpa. ³ Wo da le bendi abe be᷆ shi biwom abi ’itaa ana be shi ’i ngbebb ye, ukpor wo-o sha biwom bimen ana. Wo-o gim le wo ba hwaa ushe Unim bee? ⁴ Pisoye wo gim le, le bwo Unim a ngbebb inung kangg, u shi lè lityam angibale, ù tem ba maa-a ushe ye. Ndè le wo ngye le atan-lengi angwu Unim ù yi lè inung lè beshi ha awo ù yi le he-e ù ka-a ’ukwo ha-a à gie᷆ lè he akwo agang? ⁵ Ukpor wo kaa lishi, wo swan le wo gie᷆ lè he akwo agang ye, wo shì ’ingie ’igang ’i fel ba dyam kangg. Wo ba kpa ’ingie ’igang ana nyá Liti angi Unim u᷆ be tyung ingywo ima gboo, u maa bendi puu ushe dell-dell. ⁶ Nya Liti limen ana Unim u ba ka undi uyang-yang ’uke keè ha ashi angwu há a shi. ⁷ Bendi abe be᷆ gye ’ushu shi ’inunung, be kung àshì abell ndor he ifem lè ife lè likpan angi lı᷆ ngyor igye, Unim u ba ka ābe likpan angi lı᷆ ngyor igye kpamm. ⁸ Bendi besuso be gim ’uhwo-bell ’ufe-ufe a, be kpē ’igyang ye, be shi bibibi he akwo ayang-yang. Befe na᷅ Unim, he ingywo ima, u ba ka ābe ’ingie ’i gba itie. ⁹ Bendi puu abe be shi ’iban, be ba kpa ’ingie ’i dyam kangg, mà bè kwu Ijuus or, mà bè kwu Ijuus a ye or. ¹⁰ Ukpor Unim u ba dyam bendi puu abe be shi ’inunung, u fem ābe, u shi ābe be kwu he ikwun, mà bè yi Ijuus or, mà bè yi Ijuus a ye or. ¹¹ Bendi puu bè yi Unim ’itaa ken. ¹² Bendi abe bè yi Ijuus a ye, be ngye Iten Umosis ye; mà na or, gbe be shi ’iban, be nim likpan ’ūnyōng libell faale ushe amaale gbe he Iten imen ana. Bendi Ijuus abe be ngye Iten imen ana or titi, gbe be shi ’iban, Unim u maa ushe ka ābe libi, likorye be ngye Iten imen ana ukpor be ndor āngi ye. ¹³ Unim u kpā undi le ù yi ununung le bwo a gyo Iten imen ana a ye, u fel ununung he ashi Unim le bwo a ndor āngi a. ¹⁴ Nyong bendi abe bè yi Ijuus a ye, abe be ngye Iten imen ana ye, be᷆ shi nya a na Iten imen ana i kong, be tyung le be ngye he atyam abell ashi ’ì yi kpa-kpa le bè shi, mà na be ngye Iten imen ana ye or. ¹⁵ Abi be᷆ shi bi tyung le Iten imen ana ì yi he atyam abell. Igim ibell i tyung ābe ashi ’i ngbebb lè ashi ’i ban. I da ābe nyong be᷆ shi a᷆shi ’i ngbebb lè nyong be shi a᷆shi ’i ban. ¹⁶ Kitaa ana na᷅ Unim u᷆ be maa bendi ushe gbe ha Ujeso Ukristi nya Liti limen angi u᷆ be maa bendi ushe he biwom ’undyell abi be᷆ shi. U ba sha ashin nya a na mi bun de men he ’isom ’inunung ashi mı᷆ bun. ¹⁷ Kì yi lè bendi há liwu līme᷅n abe be de le, befe bè yi Ijuus a. Wo ’itaa undi ’imen ana, wo da le ’i kwun-a awo he ’uhwo, likorye wo ngye Iten imen ana, wo pwom ungwu le wo-ò yi undi Unim a. ¹⁸ Wo ngye ashi Unim a kee le wò shi, bwo be hwua-a Iten imen ana; wo fel ngye ashi ’i ngbebb, wo ngye ashi ’i ngbebb ye. ¹⁹ Wo gim ha awo lityam le wo kpè angwu wo tyung uhwua-ashi ’ukwo, wo kwu ’ikung-gbo ke abe bè yi he ’ifufebb; ²⁰ wo gim le wo kpè angwu wo tebb àbe bè yi kpel-ye, wo hwua àbe be wa ngye ’iwom ye. Wo gim le Iten imen ana i ka-a lingye, i fem ’igyang tyung-a. ²¹ Ki ngbebb! Bwo wo na᷅ wo᷆ hwua àbe be teng, kibang a, wo᷆ hwua ’uhwo-gang ufe ye? Wo-o bun da bendi le, bè zì ’azi ye. Hà wo ufe? Wo zà a? ²² Wo da bendi le bè kee ungye undi ye. Hà wo ufe? Wo kee ungye undi a? Wo da bendi le bè shi ikem ye. Wo zì kung biwom lè he ishom ikem a? ²³ Wo pwom ungwu le wo ngye Iten imen ana. Kibang a, wo᷆ be lè ibia ke lizen Unim gbe he abanale Iten imen ana a? ²⁴ Kì yi nya a na be fee he ’ushia Unim a le: "Bendi abe bè yi Ijuus a ye be kong bia lizen Unim gba he likpe līme᷅n Ijuus." ²⁵ Lìte᷆n lì yi ’itaa ashi ’ı᷆ tyung le men Ijuus mà yi bendi Unim a, gbe ma ndor Iten imen ana; ukpor gbe ma ban āngi, hà lìte᷆n līme᷅n lì yi ’idideng. Mà ndo tyang atenale ’ugbe ken. ²⁶ Gbe undi a ten ye, ukpor u᷆ ndor Iten imen ana, Unim u kpa he le ù yi undi uma nya a na abe be ten a. ²⁷ Kitaa ana na᷅ bendi abe be᷆ ndor Iten imen ana, mà na be ten ye or, be tyung gboo le men abe ma ngye Iten ma zī libi. Men ma ngye Iten imen angi be fee fe he ’ushia, ma mbee ten, ukpor ma ndor Iten imen ana ye. ²⁸ Mà undi ù ten or, ashina ’i shi-e a fel undi Ijuus ugyang angwell a ye. Lìte᷆n ligyang angyell lì yi ’iwom ashi be᷆ ndè lè atong-shi a ye. ²⁹ Undi Ijuus ugyang angwell ù yi undi angwu Unim a gié he lìtyám gbe ha Ukatia Kunyong uma a, gbe he Iten a ye. Undi angwu ’itaa ana, Unim na᷅ u pee he, undigye a ye.

¹ Nyong ’ì yi nyin, kibang ’ì hà yi lifem le undi ù kwu Ijuus? Kibang ’ì hà yi lifem le undi ù ten? ² Kì yi lè lifem he akwo gbamm. Ukpi-ikwu, bendi Ijuus na᷅ Unim a ma kpi ’ikwu kung igie ima fe be he ’ubwo. ³ Bwo bendi Ijuus besuso be shi a᷆shi Unim a kong ye, kutyung akwomale ’ubell ’ú nya shi Unim le ù tem shi a᷆shi a kong le u sha ye a? ⁴ Dia! Mà bendi puu he igye anyin bè swan le be fa Unim ye or, mbee ’unyong puu Unim ufe u sha a᷆shi a kong. Kì yi nya a na be fee he ’ushia Unim a le: "Wo Unim, kunyong ’uyang-yang wo kong igie, ki nung nwongg le igie igang ì yi ’igyang. Nyong be kaa-a ndè, mbee ’unyong puu wo hwà." ⁵ Ukpor pisoye bendi besuso be da le ’ibibi ashi lı᷆ shi ’i sha bendi be ndà ’inunung Unim, hà ashina ’i ze le ana a? Ki ze le Unim u sha ’ibibi a, nyong u᷆ ke li ’ingie he biban bityan a? ⁶ Dia! Abi bendi be᷆ tan kong ana. Gbe Unim ù yi ununung ye, u ba tang bendigye ushe ná a? ⁷ Pisoye undi-iso u da le uman uma u sha bendi be nda ’igyang Unim gboo, be pee Unim. He ashina, kibang a, Unim u᷆ tang libi ke-e le ù yi undi-iban a? ⁸ Bitaa bendi abena be da le: "Bwo ’ì yi ’itaa ana a, mà lì gye ’ushu shi ’ibibi le hè bendi bè ndè ’inunung Unim." Bendi besuso be fel bà iman or le bel na᷅ li kong ashina. Unim u ka ābe ’ingie ashi ’i keè nya dell-dell. ⁹ Fe, bel Ijuus ife lì yi he libwo linunung hwò bendi abe be teng a? Kpaa ye! Mi bè kong mà le, bendi puu, mà Ijuus or, mà bendi abe be teng or, befe puu bè yi ’itaa ken, puu ubell bè yi he abwo ’iban. ¹⁰ Kì yi nya a na be fee he ’ushia Unim a le: "Kì yi lè undi ken or angwu ù yi ununung he ashi Unim ye. ¹¹ Kì yi lè undi angwu ’igyang ’i nung he ye. Kì yi lè undi angwu u᷆ pwom ’ukwo Unim ye. ¹² Undi uyang-yang a swan ’ukwo Unim. Befe a puu be fel ’idideng. Undi ken-ken or a teng angwu u᷆ shi ’inunung ye. ¹³ Igie ibell i ban ná likwun ungwu hwuo. Be lam bendi lè iman angi i sho he ingwu ibell gbamm. Igie ibell i do nya a na bezu ūshiı᷅ a. ¹⁴ Ingwu ibell i sho lè àtyé, i sho lè igie ibibi. ¹⁵ Be buù he abee mbee bipi hà do bendi, be gwu bendi. ¹⁶ He ’iteng ’iyang-yang be᷆ gye, be tan lè ’utor lè linim ka bendi. ¹⁷ Be ngye ná be᷆ kwu ikwun-ikwun ye gbangg. ¹⁸ Be shell Unim or ye." ¹⁹ Li ngye le Iten angi Unim a ma ke, ì yi ke bendi abe a ke be ángi a. He ashina ’ì yi lè ’iwom ashi undi u᷆ kwu ’ubwo hwaa ye; undi uyang-yang u ba naa maa ushe he ’ushu Unim. ²⁰ Kì yi lè undi angwu a ndor Iten he-e ù kwu ununung he ashi Unim ye. Àshi Iten ife i shi ’ì yi le i tyung undi ’iban ’ima a. ²¹ Ukpor ’anaa-anaa i Unim a tyung gboo ’ukwo ahwu u᷆ shi bendi be᷆ fel benunung he ashi ama. Kukwo ahwun ’u gbe kpee Iten Umosis ye, mà na Iten imen ana lè bendi abe be᷆ tye ugie ’isom Unim be ma kong gbe lè hwu or. ²² Unim u sha bendi be fel benunung he ashi ama gba he abongale ubell ha Ujeso Ukristi a. U sha ashin ka bendi puu abe be bong, mà bè yi Ijuus or, mà bè yi Ijuus a ye or, kì yi lè atyetye ye. ²³ Bendi puu be shi ’iban, be gyan ìfém Unim. ²⁴ Ukpor gbe he inung Unim lè beshi bema, u shà bendi be tem fel benunung gba ha Ujeso Ukristi angwu a pong li ’uke. ²⁵ Unim a kung he ke le bè shang, le gbe he anung ama Unim ù tyang biban bityan ke li, bel abe li bong ha ahe. Unim a shi ashin he-e ù tyung ’inunung ’ima a. Leěti a maa ngib lityam nda biban bendi gba àshì wa. ²⁶ Ukpor ’anaa-anaa i a shi ’ukwo ahwu u᷆ tyang biban ke bendi, u tyung le ù yi ununung, u mbee tyung le u sha undi uyang-yang angwu a bong ha Ujeso u kwa ununung. ²⁷ He ashina, kì nya yi lè ’iwom ashi bel lì kung pwom ungwu a? Kpaa ye! Kì yi le bwo li ndor Iten imen ana na᷅ lì yi benunung i ye, kì yi le bwo li bong ha Ujeso Ukristi a. ²⁸ Ki nung nwongg le undi u fel ununung he ashi Unim, gbe a bong ha Ujeso Ukristi a, ki gbe kpee Iten Umosis ye gbangg. ²⁹ Unim ù yi ke Ijuus ife-ife â? Ù yi ke bendi abe be teng befe ye a? Ù yi ke bendi puu, ³⁰ bwo Unim ù kee-kee yi a ken a. U kpa bendi Ijuus abe be ten le bè yi benunung, gbe be bong ha Ujeso Ukristi a. Kitaa a ken, u᷆ kpe bendi abe be ten ye le bè yi benunung, gbe be bong ha Ujeso Ukristi. ³¹ Bwo ’ì yi le undi u fel ununung he ashi Unim gba he abongale a, ashin ’i ze le Iten ife i mbee â? Dia, li tyung bendi ashi ’ì yi ’ikwu Iten a.

¹ Hà Ebraham angwu ù yi atietyan, bel Ijuus ufe? Unim a ma kpe-e le ù yi ununung le bwo a shi aki â? ² Kì be kwu le Unim ù kpē Ebraham le ù yi ununung he áshi a shi a, hang ù yi lè ashi u᷆ pwom ungwu gbe lè shi. Ukpor ù yi lè ashi u᷆ pwom ungwu gbe lè shi he ashi Unim ye. ³ Be fee he ’ushia Unim le: "Ebraham a ma fe lityam ha Unim, he ashina Unim a kpe-e ná undi ununung he ashi ama." ⁴ Nyong undi u᷆ shi aki, be ka he únde he aki angi a shi. Ashina ’ì yi ’uke a ye, ki yi he ’ingie ’ima a. ⁵ Gbe undi u᷆ fe lityam he aki angi ufe-gyang a shi a ye, ukpor u᷆ fe lityam ha Unim angwu u᷆ shi bendi-iban be᷆ fel benunung a, Unim u kpa undi umen ana le ù yi ununung gbe he abongale uma. ⁶ Udebid or a kong ’itaa a ken, nyong a kong gbe lè igor angi ì yi ke undi angwu Unim a kpe-e ná undi ununung he ashi ama fem aki ama tyang. ⁷ A de le: "Igor ì yi ke bendi abe Unim a tyang biban bibell ke be, u mbee lè bibibi bibell. ⁸ Igor ì yi ke undi uyang-yang angwu biban bima, Unim u᷆ tem well ābi ye." ⁹ Bendi abe be ten befe-befe na᷅ igor imen i ì yi ke be a, hà ì yi ke abe be ten ye or titi? Li bè kong mà le Unim a ma kpē Ebraham le ù yi ununung gbe he abongale uma a. ¹⁰ He ’unyong ahwu a ma kpe Ebraham le ù yi undi ununung ana, a ma ten mà a? Dia, nya he ’unyong ’umen ana a ma wa ten ye. ¹¹ He ’unyong ahwu a ma so ’ididim, a ma bong ha Unim; he ashina Unim a ma kpe-e le ù yi ununung. Unim a hà kung de-e le ù ten hè ’ì kwu ’itaa le Unim a kpe-e le ù yi ununung. Kitaa ana na᷅ Ebraham a fel ātyām bendi puu abe be bong ha Unim, Unim u kpe be le bè yi benunung, mà na be ten ye or. ¹² U mbee shi ātyām bendi abe be ten, gbe be bong ha Unim ná Ebraham a ma bong kung lè há ’unyong ahwu a ma so ’ididim. ¹³ Leěti Unim a ma ke Ebraham lè igia ima úkyébb le u ba kung igye anyin fa abe he ’ubwo. Unim a ma ke be úkyébb anwun le bwo be ndor Iten Umosis a ye, a ma ke be ahe le bwo Ebraham a bong ha ufe Unim a, he ashina Unim a kpe-e ná undi ununung he ashi ama. ¹⁴ Kì be kwu le abe be᷆ ndor Iten Umosis na᷅ be᷆ kpe abi Unim a kyebb, hang ashin ’i ze le abongale ù yi ’idideng, úkyébb Unim u shi lè lifem ye. ¹⁵ Gbe undi a ngye Iten Umosis, hà ban āngi, u kpa ’ingie. Ukpor he ’ipi iten ì yi ye, bendi be ban iten ye. ¹⁶ He ashina, gbe he abongale na᷅ undi u᷆ kpe úkyébb Unim hè ’ì tyung gboo le ’ì kee-kee yi he inung Unim na᷅ a ke li úkyébb uma. U sha úkyébb anwun ka igia Ebraham puu ’uke, u kee-kee ka igia a᷆ngi i ndor Iten Umosis a ye, u ka a᷆ngi i bong ha ufe Unim ná Ebraham a ma bong. Ebraham ù yi atyetyan, bel puu abe li bong ha Unim. ¹⁷ Kì yi nya a na be fee he ’ushia Unim a le Unim a de Ebraham le: "Mi sha-a wo fel ātyām abong gbamm." Ebraham a kpē úkyébb anwun nya he ashi Unim ugyang a, Unim angwu ufe a bong ha ahe. Unim umen i na᷅ u᷆ wum akwom, u ko bendi abe be wa hwan ābe ye or le bè kwu bendi bema, u kung ābe fel ná be hwan ābe mà á nà. ¹⁸ Ebraham a ma gye ’ushu fe lityam ha Unim, mà na àshī Unim a kyebb he ’i maa ndo gba ishu or. He ashin Ebraham a ma fel ātyām abong gbamm nya a na Unim a de-e. Be fee he ’ushia Unim le Unim a de Ebraham le: "Igia igang i ba go ’ugii kangg ná ikpen he ’usi." ¹⁹ Nya he ’unyong ’umen ana Ebraham a maa ndo fel aze asi adyong, a ma ndè ’uhwo-ma a fel ná likwom nà, u ngye le ungye-ma a gbe ìshù lihwan. Mà na or, a ma gye ’ushu fe lityam ha Unim. ²⁰ A ma fel igim ifee gbe lè úkyébb Unim ana ye. A ma tem fel pee Unim a. He ashina a ma fel fe lityam ha Unim fel gbe gyong. ²¹ A ngye dangg le Unim ù yi lè ikeb le u sha nya a na a ke úkyébb. ²² Gbe he abongale uma na᷅ Unim a ma kpe-e le ù yi ununung. ²³ Ukpor Ebraham ufe-ufe na᷅ Unim a kpe-e le ù yi ununung ye, ²⁴ a kpe li bel puu titi ná. U kpa li le lì yi benunung, gbe li bong ha ufe Unim angwu a wum Atyetyan Ujeso lè he lihwu. ²⁵ Ujeso umen i na᷅ leěti be ma gwu-e he ’uhwo biban bityan, ukpor Unim a wum he lè he lihwu le he-e ù shi li lì fel benunung he ashi ama.

¹ Le bwo ’ì yi le Unim a kpe li le li fel benunung gbe he abongale utyan, li fel ikwun ha Unim gbe ha Atyetyan Ujeso Ukristi. ² Ujeso Ukristi na᷅ a buu li ’ukwo le lì ngye inung Unim gbe he abongale utyan ha ahe. U tyung inung Unim ha abel, bel li yal gor, likorye li ndor lishi le li ba kwa ipel ha Unim he ifem ima. ³ Li yal gor he bingie or titi, likorye li ngye le ’ingie ’i sha li li naa genn, ⁴ anaale genn u shi li li kaa kpè, akaale kpè u shi li li kwu lè lishi andorale ha Unim le u sha ná a kyebb. ⁵ Gbe lì yi lè lishi andorale ’itaa ana, lishi andorale lityan li kwa ’idideng ye, likorye Unim a ke li Ukatia Kunyong uma angwu u᷆ shi li lı᷆ kwu lè benyin Unim he atyam atyan kangg. ⁶ He ’unyong ahwu li ma yi lè ukpell ke ’uhwo-tyan ye, Ujeso Ukristi a ma be hwō ke li bel bendi-iban he ’unyong ahwu Unim a ndor. ⁷ Kì yi lè ’ingie ná undi u᷆ bong hwō ke undi ununung or. Pisoye undi u nya mba lityam kam le u hwa᷆ ka undi angwu a ngbebb. ⁸ Ukpor Ujeso Ukristi a hwō ke li bel, nyong li ma so bendi-iban. Kitaa ana na᷅ Unim a tyung ná ’i nyin he lè bel ’indee-indee. ⁹ Le bwo Unwaa-ma, Ujeso Ukristi, a wu anung he ’uhwo ’utyan, Unim a kpe li le lì yi benunung. He ashina, kì yi faale ifung le u fel kpan li lè he ingywo Unim. ¹⁰ Nyong li ma yi bendi-linaa Unim a, gbe he lihwu Ujeso Ukristi a shi li li fel ikwun ha Unim. Bwo ’anaa-anaa i li fel ikwun ha Unim a, Ujeso angwu ù yi uwum u ba kpan li mbee akekel puu. ¹¹ Ashin ’ife-ife a ye. Li yal gor he ’uhwo ashi Unim a shi ke li gbe ha Atyetyan Ujeso Ukristi, angwu a shi li li fel ikwun ha Unim. ¹² Leěti undi ken angwu ù yi Adam a ma shi ’iban. He ashina ’iban ’i fel he igye anyin, ki be lè lihwu. Kitaa ana na᷅ lihwu li keb li fel gwu bendi puu likorye bendi puu be shi ’iban. ¹³ Ki nung nwongg le ’iban ’i ma fel hen he igye mà ukpong Unim u hà ke Umosis Iten. Ukpor he ’ipi uten ù yi ye, be bo ’iban fa undi ye. ¹⁴ Kpi kung lè he ’unyong ahwu Adam a shi ’iban kpamm be wu he ’unyong Umosis na᷅ lihwu li keb li fel gwu bendi puu, mà besuso bè yi lè abwo he abanale uten Unim ipel ha Adam ye or. Mà lì ndè ná Adam ù yi ’itaa ken ha undi angwu Unim a kyebb le u ba ba. ¹⁵ Bè yi lè atyetye. Adam a be lè ’iban, ukpor Ujeso Ukristi a be lè inung Unim. Bwo Adam a shi ’iban, lihwu li fel gwa bendi. Ukpor inung Unim i dyam gbe gyong. Undi ken angwu ù yi Ujeso Ukristi na᷅ a be lè inung Unim imen ana ke li ’uke. ¹⁶ Lifem ’iban Adam lì yi atyetye lè ha lifem inung Unim. He ’uhwo ’iban Adam ’imen ana, Unim a tang bendi puu ushe le be zī libi, ukpor mà na bendi be shi biban gbamm or, he ’uhwo inung Unim, be fel benunung he ashi ama. ¹⁷ He ’uhwo ’iban undi ken, lihwu li keb li fel gwa bendi he ’uhwo undi umen ken ana. Ukpor àshī undi angwu ken, Ujeso Ukristi, a shi ’i dyam gbe gyong. Bendi puu abe be kpe inung Unim ’uke, Unim a shi ābe be fel benunung he ashi ama, be ba kwa lè likpan angi lı᷆ ngyor igye, be be kwu besu gbe ha ufe, Ujeso Ukristi. ¹⁸ Li ndè le nya a na ’iban undi ken ’i be lè linim be ke bendi puu, kitaa ’imen na᷅ gbe he inung undi ken, bendi be hwaa lè he linim, be fel lè likpan ’unyong. ¹⁹ Le bwo undi ken a kpo utebb Unim, bendi puu be fel bendi-iban. Kitaa ’imen na᷅ le bwo undi angwu ken a ke Unim ife, a shi bendi be fel benunung he ashi Unim. ²⁰ Unim a hà kung Iten ke Umosis, he ashina bendi bè ha᷅ fel sha biban gba gyong. Nya a na bendi be fel shi biban gbe gyong, Unim or u tyung inung ima lè beshi bema ha abe kangg. ²¹ Nya a na ikeb ’iban i be lè lihwu, na᷅ inung Unim ì yi lè ikeb le i sha li li fel benunung, li kwu lè likpan ’unyong angi lı᷆ ngyor igye kpamm gbe ha Atyetyan Ujeso Ukristi.

¹ Ashin ’i hà ze le ana a? Lì ndo gye ’ushu shi ’iban le hè Unim ù gye ’ushu tyung inung ima lè beshi bema ha abel a? ² Dia! Bwo li tang he abwo lè he ’iban mà, ki nya sha ná a, lı᷆ tem geb lè abwo tye há ’iban? ³ Ndè le má ngye le nyong be ma kib li he umbwo, li tyung le li ma gwaa ’uhwo-tyan ipel ha Ujeso Ukristi a? He ashina li hwō ipel ha ahe. ⁴ Nyong li ma gwaa ’uhwo-tyan ipel ha Ujeso Ukristi, li hwō ipel ha ahe, be ngi li ipel ha ahe, le hè nya a na Unim Atyetyan a ma wum Ujeso Ukristi lè he lihwu gbe he ikeb ikaandi ima, na᷅ bel or lı᷆ be kwu lè likpan lifufe. ⁵ Bel li gwaa ’uhwo-tyan ipel ha ahe he lihwu lima. He ashina, faale ifung li ba wum lè he lihwu utung ha ahe. ⁶ Li ngye le be ma maa gwu likpe lìtı᷅m lityan angi lı᷆ shi li lı᷆ shi likpe libibi bee he ’ikpakpaa ipel ha ahe, le hè udaa ’iban ù hwō gbangg, hè li lì tem kwu he abwo ’iban ye, ⁷ likorye undi angwu a hwō a mbee lè abwo lè he ’iban. ⁸ Li bong le nya a na li hwō ipel ha Ujeso Ukristi na᷅ lı᷆ be kwu bewum ipel ha ahe titi. ⁹ Li ngye le Ujeso Ukristi a ma wum lè he lihwu, ù tem hwa᷆ ye. Lihwu lì tem yi lè ikeb le li gwa he ye. ¹⁰ Nyong a hwō, kiban ’ì tem yi lè ikeb angi ’ı᷆ shi-e ’iwom ye, a kung likpan lima fe Unim he ’ubwo. ¹¹ Men or titi mà well le nyong ma hwō ipel ha Ujeso Ukristi, ma mbee lè abwo lè he ’iban mà. Há ’unyong ’umen ana ma kung likpan līme᷅n fe Unim he ’ubwo gbe ha Ujeso Ukristi. ¹² He atan-lengi anwun, mà ndè le ma bong ’iban ’ì kpe men ityuu ye, teng ’i nyii amen fa abwo he ashele bigyor bibibi. Mà well le inyiahwo īme᷅n, baa ı᷆ hwō. ¹³ Mà ndè le ma kung ligwo līme᷅n ken or keb ke he ’ibibi ashele ye. Mà keb āngi ke Unim hwan, bwo mà yi ná bendi abe be hwō, be tem wum nà. Mà kung ligwo līme᷅n liyang-yang shi ’inunung. ¹⁴ Kì yi le ’iban ’ì kpe men ityuu ye, likorye mà tem kaa le hè men mà kwu benunung gbe he andorale Iten a ye, ukpor ma fel benunung gbe he inung Unim a. ¹⁵ Ashin ’i hà ze le ana a? Ki nya ze le lì ndo fel shi ’iban zii le bwo lı᷆ fel benunung gbe he inung Unim a, gbe he Iten a ye a? Dia! ¹⁶ Má ngye dangg le gbe undi a keb ’uhwo-ma fel ufee undi le hè-e ù ke-e ife, ashin ’i ze le a fel ufee undi umen angwu u᷆ ke-e ife ana a. Ù hà ndo kwa ufee ’iban, u kwu ufee Unim nya ’ugbe ken ye. Gbe ù yi ufee ’iban a, lifem áshi lì yi lihwu. Ukpor gbe ù yi ufee he akele Unim ife a, lifem áshi lì yi le Unim u kpa he le ù yi ununung. ¹⁷ Ipee ì kwu ke Unim, likorye leěti ma ma yi ifee ’iban, ukpor ’anaa-anaa i ma ke ife lè lityam līme᷅n puu he biwom abi li hwua amen. ¹⁸ Nyong ma mbee lè abwo lè he ’iban, ma fel ifee Unim hè men mà shi ’inunung. ¹⁹ Mi kung biwom igye anyin paa tyung amen le hè ’ì nung amen nwongg a, likorye ná bendigye, biwom bi shwie nung amen ye. Leěti ma maa keb inyiahwo īme᷅n puu ka ’iban lè ’ibibi le hè men mà shi bibibi gye ’ushu. Kanaa-anaa i ufe, mà ndè le ma keb ’uhwo-men puu ke he ’inunung ashele le hè men mà kwu bendi Unim a ’igyang-igyang. ²⁰ Leěti nyong ma ma yi ifee ’iban, ma ma yi lè abwo he ’inunung ashele ye. ²¹ Bibibi abi bi fel amen ishwia-ishwia ’unyin i, kibang ’i ma yi lifem līme᷅n nyong ma maa shi ābi? Lifem ábi lì yi lihwu a. ²² Ukpor ’anaa-anaa i ma mbee lè abwo lè he ’iban, ma fel ifee Unim a. Lifem ashina lì yi le ma fel bendi Unim a ’igyang-igyang. He ashin, he umbee-likel ma be kwu lè likpan angi lı᷆ ngyor igye kpamm. ²³ Lifem ’iban lì yi lihwu, ukpor ’uke Unim ’ù yi likpan akwele ngyor igye kpamm gbe he agwaale ipel ha Atyetyan Ujeso Ukristi.

¹ Bebuye, mi kong ha amen ná bendi abe be ngye gbe lè uten a. Faale atyangale men ma ngye le uten u kee-kee bua undi nyong ù yi uwum a. ² Hà iten libee ife? Uten a bua ungingye le ù tyang ukyema ye, lè ’igbe ná ukyema ù yi uwum. Ukpor gbe ukyema a hwō, ù ha᷅ fel porr lè he uten angwu a de le ù tyang ukyema ye ana. ³ Ashin ’i ze le, gbe a tyang ukyema nya gye lè bee lè ungikye ususo, hà u tan akpela a. Ukpor gbe ukyema a hwō, ù ha᷅ fel porr lè he uten angwu a bua he ana. Gbe a fel gye libee, hà a tem tan akpela a ye. ⁴ Bebuye, kì yi ’itaa ken ke men or titi. Iten Umosis i tem bua amen ye, likorye ma ma hwō ipel ha Ujeso Ukristi. Kanaa-anaa i ma fel ke Ujeso Ukristi angwu Unim a wum lè he lihwu, le hè li bel puu lì shi aki anunung ke Unim. ⁵ Leěti mà ukpong li hà ngye Unim, Iten Umosis i maa wum bigyor bibibi abi bì yi ha abel, bi shi li li shi bibibi abi bı᷆ be lè lihwu gwu li. ⁶ Ukpor ’anaa-anaa i, li fel porr lè he Iten Umosis angi leěti i ma bua li fe he lifee, li tem kaa le lî pwom Unim gbe he andorale Iten angi be fee fe he ’ushia ana a ye, ukpor lì fel pwom he he ’ukwo ’ufufe gbe ha Ukatia Kunyong Unim hwan. ⁷ Ashin ’i hà ze le ana a? Ki nya ze le Iten Umosis ì yi ibibi â? Dia! Ukpor, kì be kwu le Iten ana i be ye, hang mi ngye ’iban ye. Uten a de le: "Bell ’iwom undi ye." Kì be kwu le uten ù kong ná ye, hang mi ngye úbéll ye. ⁸ Ukpor he ’uhwo uten umen ana, kiban ’i ndè libwo shi-m mi fel bell mbee bishishi biwom puu. Kì be kwu lè uten a ye, hang ’iban ’ì yi lè ikeb ye. ⁹ Ki ma yi lè ’unyong ’ususo ahwu mi ma ngye uten ye. Ukpor nyong mi be ngye uten Unim, kigyor ’iban ashele ’i wum, mi hwō. ¹⁰ Unim a ma ke Iten le hè bendi bè kpan a, ukpor i fel be lè lihwu a gwu-m mi. ¹¹ Gbe he uten umen ana, kiban ’i ndè libwo lam mi fe abwo he ’ibibi ashele, ki tan lè lihwu gwu-m. ¹² He ashin, ki nung nwongg le Iten Umosis i be lè ha Unim a, uten uyang-yang ù yi gelalala, u shi kpa-kpa, u shi lè ukpell ke bendi. ¹³ Fe ashin ’i ze le ’iwom ’imen ashi ’i ngbebb i na᷅ ’i be lè lihwu gwu-m a? Dia! Iten na᷅ i be lè lihwu ye, kiban a. Gbe he Iten inunung anyina na᷅ ’iban ’i be lè lihwu gwu-m hè ’ì tyung gboo ashi ’i ze le ’iban. He ashin, gbe he uten Unim ’i nung nwongg le ’iban ’i ban ná afong-afong. ¹⁴ Li ngye le Iten ana i be lè ha Unim a, ukpor mi ufe mì yi undigye a, mi shi ufee ’iban. ¹⁵ Biwom abi mi-gyang mı᷆ shi or bì nem nung mi ye, likorye mi sha binunung abi mi kee le mi sha a ye, mi bel sha bibibi abi mi kee ye a. ¹⁶ Bwo mi kee le mi sha bibibi abi mı᷆ shi i a ye, ashin ’i tyung le mi bong le Iten ana i ngbebb a. ¹⁷ Ashin ’i ze le mi-gyang na᷅ mi fe ukaa shi bibibi bimen ana ye, kiban ashi ’ì yi ha ami lityam na᷅ ’ı᷆ shi-m mı᷆ shi ābi. ¹⁸ Mi ufe ná undigye, mi ngye le ’ì yi lè ’inunung ha ami lityam ye. Mi sha ugim ufe le mî shi a᷆shi ’ì yi ’inunung, ukpor mì yi lè ikeb angi mı᷆ shi āshi ye. ¹⁹ Mi sha ’inunung ashi mi kee a ye, mi tem bel sha ’ibibi ashi mi kee ye a. ²⁰ Bwo mı᷆ shi ’ibibi ashi mi kee ye a, ashin ’i tyung le mi-gyang na᷅ mı᷆ shi ye, kiban àshī. ²¹ He ashin, mi ndè shi ’i fel a ná uten a le ’unyong ’uyang-yang mı᷆ kee le mi sha ’inunung, kiban ’i bong mi ye. ²² Ha ami unwaa lityam, Iten Unim i nyin mi kangg. ²³ Ukpor mi ndè ha ami inyiahwo, kiwom ’isuso ’i ndo ’ukye ha ashi ugim ugi a ngye le ’i ngbebb. Kiban ashi ’ì yi ha ami lityam a, kife na᷅ ’ı᷆ shi-m mì yi ufee ’iban. ²⁴ He ugim ugi ufe, mi ka Iten Unim ife, ukpor bwo mì yi undigye a, mi ka iten ’iban ife. Mi nim ’i mbee! Ayang ù nya kpan mi lè he ’ukwo ahwu ’u᷆ be lè lihwu? Ipee ì kwu ke Unim! Ufe na᷅ u᷆ kpan bendi gbe ha Ujeso Ukristi Atyetyan.

¹ He ashina, bendi abe be gwaa ’uhwo-bell ipel ha Ujeso Ukristi, kì tem yi lè linim ke be ye, ² likorye ikeb Ukatia Kunyong Unim angwu a be lè likpan gbe ha Ujeso Ukristi, a fem kung li lè he abwo ’iban lè lihwu. ³ Iten i ma yi lè ikeb le i kpan li ye, likorye bel bendigye li ma yi lè ikeb angi lı᷆ ndor āngi ye. Ukpor Unim a shi a᷆shi Iten ana i maa shi mbeè ye. A shi āshi gbe he asomale Unwaa-ma angwu be hwan ná bel abe lı᷆ shi ’iban i. Unwaa-ma umen i a mbee lè ikeb ’iban ashi ’ì yi ha abel. ⁴ Unim a shi ashin le lî fel benunung ná Iten i kee li le lì kwu. Li kwa ná gbe lì mā ma᷆ tan ná Ukatia Kunyong Unim u᷆ teng li a, li tan ná bigyor agwo atyan bı᷆ teng li a ye. ⁵ Bendi abe be᷆ tan ná bigyor agwo abell bı᷆ teng ābe a, be kee-kee gim ná be᷆ shi nyin ’uhwo-bell ufe-ufe a. Ukpor bendi abe be᷆ tan ná Ukatia Kunyong Unim u᷆ teng ābe a, be kee-kee gim ná be᷆ shi a᷆shi Ukatia Kunyong Unim a kee a. ⁶ Bendi abe be᷆ kung igim ibell ndor he bigyor agwo abell a, be tan lè lihwu gwa ’uhwo-bell. Ukpor bendi abe be᷆ kung igim ibell ndor ha Ukatia Kunyong Unim a, be kwa lè likpan lè ikwun ngyor igye kpamm. ⁷ Undi angwu u᷆ tan ná bigyor agwo ama bı᷆ teng he a, u kwa undi-linaa Unim a, likorye u ka Iten Unim ife ye. Ù hà ndo kwa lè ikeb ka āngi ife ye. ⁸ Kigyang-igyang, bendi abe be᷆ tan ná bigyor agwo abell bı᷆ teng ābe a, bè hà ndo sha nyin Unim ye. ⁹ Ukpor men ufe, gbe ’ì yi le Ukatia Kunyong Unim ù yi ha amen atyam ’igyang, ma tan ná bigyor agwo āme᷅n bı᷆ teng amen a ye, ma tan ná Ukatia Kunyong Unim u᷆ teng amen a. Undi uyang-yang angwu ù yi lè Ukatia Kunyong Ukristi ha ahe lityam ye, hà ù yi ke Ujeso Ukristi a ye. ¹⁰ Gbe Ujeso Ukristi ù yi ha amen atyam a, mà na inyiahwo īme᷅n ı᷆ be hwō he ’uhwo ’iban or, Ukatia Kunyong Unim u ba ka amen likpan ’unyong likorye Ujeso a shi amen ma fel benunung he ashi Unim. ¹¹ Unim angwu a wum Ujeso lè he lihwu, gbe Ukatia Kunyong uma ù yi ha atyam āme᷅n, hà ’i nung nwongg le ufe angwu a wum Ujeso Ukristi lè he lihwu u ba wum amen or titi lè he lihwu gba he ikeb Ukatia Kunyong uma umen angwu ù yi ha amen ana. ¹² Bebuye, he ashin, kì yi kpe-kpe le lì bong bigyor agwo bì teng li ye. ¹³ Gbe ma bong bigyor agwo bi teng amen, hà ma hwa᷆. Ukpor gbe ma kung ikeb Ukatia Kunyong Unim gwu bigyor agwo, ma kwa lè likpan ligyang angyell. ¹⁴ Bendi puu abe Ukatia Kunyong Unim u᷆ teng ābe, bè yi bebwaa Unim a. ¹⁵ Ukatia Kunyong Unim angwu ma kpē, a shi amen lifee a, ngwu ù shi amen le mà fel he ’ushell a ye. A shi amen ma fel bebwaa Unim a. Ufe na᷅ u᷆ shi li lı᷆ ko Unim le: "Ada, Adida." ¹⁶ Kitaa ana na᷅ Ukatia Kunyong Unim u᷆ de li he atyam atyan le lì yi bebwaa Unim a ’igyang-igyang. ¹⁷ Bwo lì yi bebwaa-ma a, bel or li ba kpa àbi a kam ndor bendi bema. Bel lè Ujeso Ukristi li ba kpa àbi a kam ndor he, likorye gbe li bong kpē ’ingie utung ha ahe, hà li ba kwa he ífém utung ha ahe. ¹⁸ Mi ngye dangg le bingie abi lı᷆ kpē ’anaa-anaa i bi kpee᷆ ìfém angi Unim u᷆ be ke li ye. ¹⁹ Biwom puu abi Unim a shi he igye anyin bi fel ngib lityam a kwa nyong ’unyong ahwu Unim u᷆ be tyung ìfém bebwaa-ma he igye gboo. ²⁰ Biwom abi Unim a shi bi fel faale lifem. Bife-gyang na᷅ bi kee le bi kwa faale lifem ye, ukpor Unim na᷅ a de le bì kwu ná. Unim a shi ugim ndor fel kwu u nyong ’unyong ahwu u᷆ pell biwom puu abi a shi tyang abwo lè he ushang ubibi, le hè bi bì tem ban ye. Bi ba fel porr, Unim u fem ābi ná u᷆ fem bebwaa-ma. ²² Li ngye le kpamm be wu ’unyin i, biwom abi Unim a shi bi kpa ’ingie lè lishi andorale ná ungingye angwu u᷆ shi uzwaa nà. ²³ Biwom abi bi teng iteng abi Unim a shi bife-bife na᷅ bı᷆ kpe ’ingie ye, ukpor bel-agyang abe a ke li Ukatia Kunyong uma ná ukpi-ikwu ’uke ’uma or lì yi lè ’ibebebb he lityam nyin i ná li kwu lı᷆ nyong le ù tyung gboo le lì yi bebwaa-ma a. Li mbee kwu lı᷆ nyong ’unyong ahwu u᷆ be kpan inyiahwo ityan lè he lihwu i. ²⁴ Bel abe li fel lè likpan ’unyong mà, li fel lè lishi andorale he biwom abin. Gbe li kpē ’iwom mà, lì tem ndor lishi a le lî kwu lè shi ye. Ki nya sha ná a, undi u᷆ mbee ndor lishi ’iwom ashi a fel lè shi? ²⁵ Ukpor bwo li ndor lishi ’iwom ashi li wa fel lè shi ye a, li ngib lityam kwa nyong āshi. ²⁶ Kitaa ’imen na᷅ Ukatia Kunyong Unim or u᷆ kpell li likorye lì yi kang-kang he ’ukwo Unim ye. Li ngye ná lì kong ha Unim ná hang ’ì yi le lì kong or ye. Ukpor Ukatia Kunyong Unim u kong ha Unim he ’uhwo ’utyan, u kong igie angi undigye u᷆ kong mbee ye. ²⁷ Unim angwu a ngye àtyám atyan, a mbee ngye ugim Ukatia Kunyong uma. Ukatia Kunyong Unim u kong ha Unim ka bendi Unim, nya a na Unim ugyang a kee a. ²⁸ Li ngye le ’iwom ’iyang-yang ashi ’ı᷆ shi, Unim u sha āshi ’i ba lè ’inunung ka bendi abe ’i nyin abe lè he, abe a ko le bè shi a᷆shi a kee. ²⁹ Bendi abe Unim a ma gia le bè kwu bema, a kam ndor or mà le be ba kwa ná Unwaa-ma, le hè Unwaa-ma ana ù kwu ukpi-ikwu unwaa he liwu bebwende gbamm. ³⁰ Abe a shi ābe be fel ta-ta ke-e, u ko ābe le be fel bema. Abe a ko ābe le be fel bema, u shi ābe be fel betaa-betaa he ashi ama. Abe a shi ābe be fěl he betaa-betaa, u shi ābe be kwu he ifem utung ha ahe. ³¹ Kibang ’i teng le lì kong? Gbe Unim ù yi li he item, ki gbeě li lè angwu u᷆ tel li ye. ³² Unim a nyim li Unwaa-ma ye, a kung he ke li puu. He ashin, faale ifung u ka li biwom puu ’uke. ³³ Ayang ù nya tyung li bel bendi abe Unim a gia kung ’ubwo he ’iban? Unim ugyang na᷅ a de le lì yi-e betaa-betaa gelalala. ³⁴ Ayang ù nya de le li zī libi? Kì yi Ujeso Ukristi a ye! A hwō ke li, Unim a wum he lè he lihwu, kanaa-anaa i ù yi kwu he ’ubwo lizen Unim, u kya fa Unim he ’uhwo ’utyan. ³⁵ Kibang ’ì nya tang li he abwo lè ha Ujeso Ukristi angwu ’i nyin he lè bel? Mà ’ì kwu ugilale or, ki kwu ’ingie or, be teb lè bel or, li kwu itung or, li kwu uten-ibong or, li kwu he begyong or, ki kwu lihwu or, abin puu, kì yi lè ashi ’ì tang li he abwo lè he benyin Ujeso Ukristi ye a kpamm! ³⁶ Kì yi nya a na be fee he ’ushia Unim a le: "He ’uhwo ’ugang, wo Unim, na᷅ be᷆ gwu li mbee ’unyong puu. Be kung li ná ìtiā angi be᷆ lè gwu nà." ³⁷ Ukpor he biwom abin puu, bel li hwò mbee akekel puu gbe ha Ujeso Ukristi angwu ’i nyin he lè bel. ³⁸ Mi ngye dangg le ’ì yi lè ashi ’ì tang li he abwo lè he benyin Ujeso Ukristi ye. Mà likpan or, mà lihwu or, mà idengell Unim or, mà biwom bisuso abi bì yi lè ikeb he lifung-atabe or, mà biwom abi ’anaa-anaa i or, mà abi lè he ’ushu or, ³⁹ mà abi he lifung-atabe or, mà abi he ’usu behwu or, kì yi lè ashi ’ì yi lè ikeb le ’i tang li he abwo lè he benyin abe Unim ù yi lè be ha abel gbe ha Atyetyan Ujeso Ukristi ye a kpamm.

¹ Igie angi mi ndo kong i, mì yi ke Ujeso Ukristi a, mi kong ’igyang a, mi bà uman a ye. Ugim ugi a naa mi ushada, Ukatia Kunyong Unim u tyung le ’ì yi ná. ² Lityam ligi li sho lè ’imbwee lè ’utor ahwu ’u᷆ tor mi ishu or, kusu or, ³ gbe lè bendi begi, Izwell. Gbe ’ì nya kpell ābe, hang mi kong ha Unim bii he le ù ke ushang ubibi fe-m mi hwan, u tang mi he abwo lè ha Ujeso Ukristi. ⁴ Bè yi bendi Izwell a, Unim a waa kung ābe le bè kwu bebwaa-ma, u kung ìfém ima tyung ābe, u kong ndor ha abe, u ke be Iten ima, u tyung ābe ’ukwo ’ugyang ahwu be᷆ fe-e, u ke be íkyébb. ⁵ Be shi igia betietyan a abe gbel. Umizaya ugyang, undi angwu a hwan he, ù yi ’ubong ’ubell ’ugyang a. Ufe angwu ù yi Unim angwu a hwò puu, ipee ì kwu ke-e ngyor igye kpamm. Kì ngyor ná li kong. ⁶ Mà na bendi Ijuus be gyo Unim ye or, ashin ’i ze le Unim a ndor úkyébb uma ye a ye. Bendi Izwell puu na᷅ bè yi igia ima igyang-igyang, ngwu igia Ebraham or, puu na᷅ ì yi igia ima igyang angyell a ye. Unim a ma de Ebraham le: "Igia unwaa-gang Azik na᷅ ı᷆ be kwu igia igang igyang angyell." ⁸ Ashin ’i ze le, bebwaa abe be ma hwan he úkyébb Unim na᷅ bè yi bebwaa Unim, abe be hwan faale úkyébb Unim a ye. ⁹ Nyong Unim a ma ke Ebraham úkyébb, a ma kong igie anyin: "Ùzé ’igbe ashin mi ba tem ba ka ungye-gang Usara unwaa-ngikye." ¹⁰ Ashin ’ife-ife a ye. Uribeka ungye Azik a ma shi lizam, hwan begbe. Ātyām begbe ana na᷅ ù yi Azik. ¹¹ Nyong be ma wa hwan ābe or, ngwu bè shi ’iwom or mà ye, mà ’ibibi or, ngwu ’inunung or ye, Unim a ma de Uribeka le: "Angwu gbel u ba kwa he ’ubwo angwu ’isun a." Ashin ’i tyung le Unim ugyang u gia ugia he ugim uma, ki gbe kpee᷆ àshi bendi be shi ye. ¹³ Kì yi nya a na be fee he ’ushia Unim a le: "Mi gia kung Ujekob, ukpor mi swan Isor." ¹⁴ Ashin ’i ze le Unim ù yi ubibi â? Kpaa ye! ¹⁵ Leěti a ma de Umosis le: "Mi kwa lè inung lè beshi ha undi angwu mi-gyang mi kee." ¹⁶ Ashin ’i tyung le ūgia᷅ angwu Unim u᷆ gia a gbe kpee᷆ igim bendigye or, ngwu aki abell or ye, u kee-kee ba lè he beshi bema a. ¹⁷ Be fee he ’ushia Unim le Unim a ma de Ufero, Usu Igyept le: "Mi kwa-a ’usu le mî kung-a shi ’asu ’agi ’à fem mbee igye puu a." ¹⁸ Ki nung nwongg le Unim a tyung beshi ha undi nyong ufe a kee, u shi undi u teb lityam nyong ufe a kee. ¹⁹ Pisoye undi-iso u bii mi le: "Gbe Unim u gia bendi ’itaa a kee a, kibang a, Unim ù ha᷅ ben bendi he ashi be shi, bwo ’itaa Unim a shi undi le ù kwu na᷅ u᷆ kwu?" ²⁰ Udim-gi, ayang ù yi-a wo angwu wo᷆ mbe lityam bii Unim ’ibibi? Kiki ’i nya bii undi angwu a mbe shī le: "Ki shi ná a, wo mbe-m ’itaa i?" a? ²¹ Undi angwu u᷆ mbe biki ù yi lè ikeb le u mba biki bifee lè he ūbībī limbe ken. U mba a᷆shi ken ’i kwa ka ’unyong ’ipam, u mbe ashell ’i kwu àshi ke liti liyang-yang. ²² Kì yi ’itaa ken ha Unim. Mà na Unim a kee le ù tyung ingywo ima ha abe be waa ndor linim hè be bè ndè ikeb ima or, ù so-i ngib lityam a ndor ābe. ²³ U ngib lityam le he-e ù tyung inung ikaandi ima ha bendi abe ù yi lè beshi ha abe, abe a kam sa-sa ndor le bè kwu he ifem ima a. ²⁴ Bel na᷅ lì yi bendi bemen abe a gia le bè kwu bema i. A gia li lè he bendi Ijuus ufe-ufe a ye, a gia bendi lè he abong angi a teng or titi. ²⁵ He ’ushia Uhozaya, be fee le Unim a de le: "Bendi abe leěti be ma yi bendi begi a ye, mi ba ko ābe le, ’Bendi begi.’ Kubong ahwu leěti ’i ma nyin mi lè hwu ye, mi fel ko ābe le, ’Kùnyin-mi.’ ²⁶ Bendi he ’iteng ashi mi ma de be le, ’Mà yi bendi begi a ye,’ bendi bemen ana na᷅ be᷆ be de be le, ’Mà yi bebwaa Unim angwu ù yi uwum a.’ " ²⁷ Azaya angwu a maa tye ugie ’isom Unim a ma kong gbe lè bendi Izwell le: "Mà na bendi Izwell be go ’ugii ná ayia lishor or, bendi zangg na᷅ be teng. ²⁸ Unim ù tem ban ’unyong ye, u ndo tang ushe igye puu a." ²⁹ Azaya a ma mbee kong le: "Kì be kwu le Unim ikeb puu ù be teng ubu utyan zangg or ndor ye, hang li mbee kò lishi ná ’ubong Usodem lè Ugomora." ³⁰ Ashin ’i hà ze le ana a? Kì yi le bendi abe bè yi Ijuus a ye, abe be maa bè kaa ikaa or le hè be bè kwu benunung ye, Unim a kpe be le bè yi benunung likorye be bong ha Ujeso Ukristi. ³¹ Ukpor bendi Izwell abe be maa kaa ndor Iten Umosis le hè be bè kwu benunung, be ma ndor Iten imen ana mbeè ye. ³² Kibang a, be ma fel benunung ye? Be ma fel benunung ye, likorye be maa kaa le hè be bè kwu benunung gbe he andorale Iten a, gbe he abongale ha Ujeso Ukristi a ye. Be ma gbaa limbu he ’ukor ahwu undi-iso a fee gbe lè hwu he ’ushia Unim le Unim a de le: "Ndè, mi beb ’ukor he Uzayon ahwu ’u᷆ shi bendi be᷆ gbaa mbu. Ukpor undi uyang-yang angwu a bong ha ufe angwu ù yi ’ukor ’umen ana, u lam he ye."

¹ Bebuye, mì yi lè ’igyor he lityam kangg le bendi begi, Izwell, bè kwu lè likpan ’unyong. Mi kong ha Unim le ù kpan ābe. ² Mi ngye le ’i nyin ābe lè Unim ’igyang-igyang, ukpor ’igyang ’i nung ābe ye. ³ Kukwo ahwu Unim u᷆ shi bendi be᷆ fel benunung he ashi ama, ’u nung ābe ye. Ukpor be kaa lè ’uhwo-bell le hè be bè fel benunung he ashi Unim. He ashin be swan le be keb ’uhwo-bell ka Unim he-e ù shi ābe bè fel benunung ye. ⁴ Bwo ’ì yi le Ujeso Ukristi a be mbeè shi a᷆shi ’i ma yi le hang Iten ana ì shi, le hè undi uyang-yang angwu a bong ha ahe ù fel ununung he ashi Unim. ⁵ Leěti Umosis a ma fee gbe lè ’ukwo ahwu undi u᷆ fel ununung he ashi Unim gbe he andorale Iten. A fee le: "Gbe undi a ndor Iten puu u kwa lè likpan." ⁶ Ukpor be fee he ’ushia Unim gbe lè ’ukwo ahwu undi u᷆ fel ununung he ashi Unim gbe he abongale le: "Shī bii ’uhwo-gang ’ibibi ashin ye. ’Ayang ù nya mbo gye he ’usi lifung-atabe?’ " (Ashin ’i ze le be fel gim le ’ì yi kpe-kpe le undi ù gye he lifung-atabe le he-e ù lè be lè Ujeso Ukristi he itang.) ⁷ Be mbee fee le: "Shī bii ’uhwo-gang ’ibibi ashin ye. ’Ayang ù nya shul gye he ’usu behwu?’ " (Ashin ’i ze le, be fel gim le ’ì yi kpe-kpe le undi ù shul gye he ’usu behwu le he-e ù wum Ujeso Ukristi lè he lihwu.) ⁸ Ashi be fee he ’ushia Unim na᷅ ’ì yi le: "Kisom Unim ’i fel kpee-kpee ha amen. Kife na᷅ bendi be᷆ kong gbe lè shi, be gim gbe lè shi he atyam abell." Kisom ’imen i ’ì yi ’isom gbe lè abongale ashi lı᷆ bun a. ⁹ Gbe wo buu ungwu ugang kong gboo le Ujeso ù yi Atyetyan a, wo bong lityam ken le Unim a wum he lè he lihwu, wo kwa lè likpan ’unyong. ¹⁰ Gbe undi a bong ha Ujeso Ukristi lityam ken, Unim u kpa he le ù yi ununung. Gbe undi a buu ungwu uma kong gboo le Ujeso ù yi Atyetyan a, u kwa lè likpan ’unyong. ¹¹ Be fee he ’ushia Unim le: "Undi uyang-yang angwu a bong ha ahe, u lam he ye." ¹² Ashin ’ì yi ke undi uyang-yang, mà ù yi Ijuus a or, mà ù yi Ijuus a ye or. Unim a ken ù yi Atyabell puu ’itaa ken. Bendi puu abe be bii he ukpell, u ka ābe ’ukwun kyoo. ¹³ Kì yi nya a na be fee he ’ushia Unim a le: "Undi uyang-yang angwu a bii Atyetyan ukpell, u kwa lè likpan ’unyong." ¹⁴ Ki nya sha ná a, bendi be᷆ bii Atyetyan Ujeso Ukristi ukpell gbe be wa bong ha ahe ye? Ki nya sha ná a, be bong ha ahe gbe be wa gyo gbe lè he ye? Ki nya sha ná a, be᷆ gyo gbe lè he faale afaale undi a lè bun de be? ¹⁵ Ki nya sha ná a, undi u᷆ lè bun de be faale angwu a som he? Kì yi nya a na be fee he ’ushia Unim a le: "Abele unwaa-isom a ngbebb he ashi bendi abe be kpē ’isom ’inunung." ¹⁶ Ukpor undi uyang-yang angwu a gyo ’isom ’inunung na᷅ a kpē shi ye. Azaya angwu u᷆ tye ugie ’isom Unim a de le: "Atyetyan, nyong ’ì yi i, ayang a hà kpē ashi li bun?" ¹⁷ Ki nung nwongg le bebwaa-isom be bun ’isom gba lè Ujeso Ukristi, mà ukpong bendi be hà gyo āshi. Bendi be gyo ’isom ana, mà ukpong be hà bong ha ahe. ¹⁸ Mi-i bii le, kì nya yi ’igyang a le bendi Izwell be wa gyo ’isom ’inunung ye a? Dia, be gyo. Kì yi nya a na be ma fee he ’ushia Unim a le: "Kisom ashi bebwaa-isom bema be bun ’i gye mbee ugugem uyang-yang puu he igye i." ¹⁹ Mi mbee bii le, kì nya yi ’igyang a le ’isom ’imen i ’í nya nung bendi Izwell ye a? Ki nung ābe. Ukpi-ikwu mî kung igie Umosis fan ’ibibi. Umosis a kong le Unim a de le: "Mi Unim, mi ka bendi abe bè yi he ’ukpo ye ’ukwun, le hè ’ì ban amen he atyam. Mi mbee ka bendi abe bè yi kpel-ye ’ukwun, le hè men nà ngywo." ²⁰ Azaya or titi a kong gboo faale ’ushell le Unim a de le: "Mi fem ’uhwo-gi tyung bendi abe be maa shun mi ye. Abe be maa shun mi ye, be nde-m." ²¹ Ukpor Azaya a kong gbe lè bendi Izwell le Unim a de le: "Kung leèti kpamm gye ’usu, mi ndaa abwo le mî kpe bendi begi fe he ’uhwo, ukpor be kwom ’utyung, be swan le be gyo mi ye."

¹ Mî mbee bii ’ibibi ’isuso. Unim a nya zob bendi bema gbang-gbang a? Kpaa ye! Mi-gyang ufe, mì yi undi Izwell a, mi be ubu lè ha atyetyan Ebraham a, mi shi ’ikwu-lihwan Ubenjamen a. ² Unim a zob bendi bema ye, a waa kung ābe kung lè há linde a. Ma naa lityam ashi be fee he ’ushia Unim gbe lè Ilaja a? Be fee le he ’unyong ken a maa kya da Unim gba lè bendi Izwell. ³ A de Unim le: "Atyetyan, bendi aben be gwu bendi abe be᷆ tye ugie ’isom ’igang, be gyebb ’imbe ashi be᷆ shang-a. Mi ututeb na᷅ mi fel teng angwu mı᷆ fa-a, be tan kee mi le hè be bè gwu." ⁴ Unim a ma hà fan he le ana? A ma fan he le: "Mi kam bengikye ndor ’uhwo-gi abe be wa fe ukem ukaandi angwu be᷆ ko le Ubal ye. Bè yi bengikye asi lihwo ’ugbe adyong he biteng bidyong-ifee." ⁵ Kitaa ’imen na᷅ ’ì yi ’unyin i, ki gia teng lè bendi Izwell zangg abe Unim a gia kung gbe he inung ima lè beshi bema. ⁶ Bwo Unim a gia kung ābe gbe he beshi bema lè inung ima a, ashin ’i ze le a gia ābe gbe he ashi befe be shi a ye. Ù be gia ābe gbe he ashi be shi a, hang inung ima imen i ì yi inung igyang a ye. ⁷ Lì hà de le ana? Bendi Izwell be ndè ashi be maa kee ye. Inwaa bendi zangg bemen abe Unim a gia na᷅ be nde shī. Unim a shi a᷆be be teng iteng be kwom ’utyung. ⁸ Kì yi nya a na be fee he ’ushia Unim a le: "Unim a shi ābe be fel faale ugim lè lityam. A shi ābe be fel ná bendi abe be hwuà àshi, be kwom ’utyung kpamm be ná ’unyin i." ⁹ Udebid or titi a kong le: "Unim ù shi ābe bè mbu he bikpam nyong be᷆ shi bipam, bè mbu, Unim ù ke be ’ingie he ashi be shi. ¹⁰ Atong-shi à hwua hè be bè tem ndè ye, ù so ābe bengbebb abe be᷆ keb ābe ugang ngyor igye kpamm ngyor igye kpamm." ¹¹ Mi mbee bii le, ashin ’i ze le bendi Izwell be mbu le hè be bè tem bo ’inaa ye a? Dia! Le bwo bendi Izwell be shi ’iban, Unim a buu ’ukwo ke bendi abe be teng le bè kwu lè likpan ’unyong, hè ’ì shi bendi Izwell bè kee likpan limen i. ¹² Bwo ’iban ’ibell ’i be lè ’inunung ke bendi abe be teng he igye anyin, umbeb ubell u be lè ’inunung ke bendi abe bè yi Ijuus a ye, nyong bendi Izwell puu be᷆ be ke Unim ife, ná Unim u᷆ be ke bendi ’ukwun ’ù go lè kwom? ¹³ Men abe mà yi Ijuus a ye, na᷅ mi ndo kong ha amen i. Mì yi unwaa-isom Ujeso Ukristi angwu Unim a som le mì bun ’isom de men, mi kung aki anyin le à yi he ’ukpo kangg. ¹⁴ Pisoye mi sha bendi begi, Izwell, be fel he ubell abellale le hè be bè fel lè likpan ’unyong. ¹⁵ Nyong Unim a ma zob bendi Izwell, ashina ’i ma shi ’ukwo ke bendi abe be teng puu he igye i be fel ikwun ha Unim. Ná ’ı᷆ be kwu nyong Unim u᷆ be tem kpe be le be fel bema a? Ki ba kwa a ná bendi be hwō tem wum a. ¹⁶ Gbe undi a te lè ūhwaā ’iwom lè ha ahe utia lè ke Unim, ashin ’i ze le ashi ’i teng puu or ’ì yi ashi Unim a. Gbe idaa ukwan ’ì yi angi Unim a, hà ibubu or ì yi angi Unim a. ¹⁷ Kì yi lè ùkwán angwu be᷆ ko le olif. Be ma già ibubu ima kpi tang wu lè hell, be be lè ibubu bífee ukwan umen ana lè he libeb, be tim gwaa nya le hè ngi ì kpan. Men abe mà yi Ijuus a ye na᷅ mà yi ná ibubu bífee ukwan angi be tim gwaa ana, men ma fel kpa ’ukwun lè he idaa ukwan ugyang. ¹⁸ Bwo ashin ’ì yi ’itel i a, mà ndè le ma kong bia a᷆be bè yi ná ibubu igyang angi be kpi tang ana ye. Kibang a, ma᷆ dim? Men na᷅ ma᷆ kwu idaa naa ye, idaa na᷅ ı᷆ kwu amen naa. ¹⁹ Pisoye ma da le bè kpi tang ibubu imen ana wu lè hell, le hè be bè bé lè men tim gwaa nya a. ²⁰ Kì yi ná ’igyang. Be kpi tang ibubu imen ana angi ì yi bendi Izwell, likorye be bong ha Ujeso Ukristi ye a. Men ufe, be tim amen gwaa nya ukwan likorye ma bong ha Ujeso Ukristi a. He ashin, mà kwu lè idim ye, mà kwu lè ’ushell hwan. ²¹ Bendi Izwell bè yi a ná ibubu ukwan ugyang a. Gbe Unim a ma bia ābe, men ma gim le u ba tyang amen, gbe ma tem bong ha Ujeso Ukristi ye a? ²² Ashin ’i tyung li ná Unim a ngbebb inung, u shi ukaa-ukaa. Ù yi ukaa-ukaa ha bendi abe be tyang ’ukwo ’uma; u ngbebb inung ha amen, gbe ma gye ’ushu ngyor kwu he ’ukwo ’uma. Ukpor gbe ná a ye, u kpya tang amen or titi. ²³ Bendi Izwell or titi, gbe be tyang abwo lè ’utyung akwomale, tem bong ha Ujeso Ukristi, Unim u tem lè be tim gwaa nya he ukwan he ’ipi be ma yi, likorye ù yi lè ikeb angi u᷆ shi ná. ²⁴ Men abe mà yi Ijuus a ye, mà yi ná ibubu bífee ukwan, lī ndè le Unim ù yi lè ikeb angi a tang amen lè há be tim gwaa he ukwan ugyang. He ashin li ngye dangg le ù yi lè ikeb angi u᷆ tem lè bendi Izwell abe bè yi ná ibubu ukwan umen ana ugyang be tim gwaa nya kaa ye. ²⁵ Bebuye, mi kee le likong likaandi angi Unim a fem tyung he igye gboo nyin lì nung amen nwongg, teng ma sha gim le ma ngye mbee biwom puu. Likong angi há lì yi le bendi Izwell be kwom ’utyung ngyor igye kpamm a ye. Unim a gia a᷆be be teb lityam le bè kwom ’utyung kpamm bendi abe bè yi Ijuus a ye, abe ’ì yi le bè kwu lè likpan, be gbe sho ’ugii. ²⁶ Kitaa i na᷅ bendi Izwell puu be᷆ be kwu lè likpan ’unyong nya a na be fee he ’ushia Unim. Be fee le: "Undi-likpan u ba ba lè he Uzayon, u ba mbee lè ’ibibi puu lè ha igia Ujekob. ²⁷ Ashin na᷅ mi kong ndor le mi ba sha ka ābe, nyong mi mbee lè biban bibell." ²⁸ Bendi Izwell be fel bendi-linaa Unim a, likorye be swan le be kpa ’isom ’inunung ye. He ashina, men abe mà yi Ijuus a ye ma ndè libwo fel lè likpan. Ukpor Unim a waa kung ābe le bè yi bema a, kì so-i nyin he lè be he ’uhwo úkyébb angwu a ke betiebell. ²⁹ Gbe Unim a waa kung bendi le bè kwu bema, u ke be ’ukwun, ù tem gie ugim uma ye. ³⁰ Leěti men abe mà yi Ijuus a ye ma maa ka Unim ife ye, ukpor ’anaa-anaa i Unim a tyung beshi ha amen likorye bendi Izwell be ka he ife ye. ³¹ Kitaa ’imen na᷅ bendi Izwell be kpo utebb Unim le hè Unim ù be kwu lè beshi ha abe he umbee-likel nya a na ù yi lè beshi ha amen ’unyin i. ³² Unim a ngib bendi puu fe, be fel ná igaadye a he ’utyung akwomale ’ubell, le he-e ù be tyung beshi bema ha abe puu. ³³ Inung Unim i dyam, u bi lishi kangg, u ngye biwom puu. Ayang ù nya ngye ashi Unim a fe he lityam? Ayang ù nya shob igbaakwo Unim? ³⁴ Kì yi nya a na be fee he ’ushia Unim a le: "Ayang a ngye ugim Unim? Ayang a nya kpè le ū tebb Unim? ³⁵ Ayang a ke Unim ’iwom fe-e lihwua?" ³⁶ Unim na᷅ a shi biwom puu, ufe na᷅ u᷆ kam ābi puu, puu abi bi shi ke-e ufe a. Ipee ì kwu ke-e ngyor igye kpamm. Kì ngyor ná mi kong.

¹ Bebuye, bwo Unim a tyung beshi ha abel kangg, mi tim amen anung le mà kung ’uhwo-men bewum shang gbangg ke Unim ná ’ityuale ashi be᷆ gwu shang he nà. Mà kung ’uhwo-men ndor ta-ta ke-e ufe-ufe, mà shi ngbebb he. Kitaa i na᷅ ’ì yi ’ukwo ’ugyang ahwu ma᷆ fe-e. ² Mà hwua kpe kung likpe bendi abe bè yi ke igye i ye; mà tyang Unim ù gie igim īme᷅n hè men mà fel bendi befufe. Mà ha᷅ ngya àshi Unim a kee amen le mà shi. Ma hà ngye ashi ’i ngbebb Unim, ma ngye ashi ’i nyin he, lè ashi ’ì yi kpa-kpa. ³ Le bwo Unim a ke-m libwo likaandi he inung ima, mi da amen puu le, undi ù dyam ’uhwo-ma gbe gyong libwo angi Unim a ndor he ye, ù shun ’uhwo-ma ngbebb-ngbebb hwan le he-e ù ngye ’uke ahwu Unim a ke-e gbe he abongale uma. ⁴ Má ngye le undigye ù yi lè agwo gbamm, ligwo liyang-yang lì yi lè ama aki atyetye-atyetye. ⁵ Ashin ’ì yi ’itaa ken ha abel or titi, mà na bel abe li gwaa ’uhwo-tyan ipel ha Ujeso Ukristi lì yi gbamm or, li fel ná inyiahwo undi ken a, bel puu li fel ke bende. ⁶ Unim, he inung ima, a ke li beke gbamm, mà lì shi aki lè be. Undi angwu Unim a ke-e ’uke aki ashele le ù bun ’isom ’ima a, ù bun ’isom ana ná Unim a ke-e abongale kwom. ⁷ Angwu ’úma ’ù yi le ù kpell bendi abe be bong ha Unim a, ù kwu ’iken kpell. Angwu ’úma ’ù yi le ù hwua bendi ’iwom a, ù kwu ’iken hwua ābe. ⁸ Angwu ’úma ’ù yi le ù fe bendi ingie a, ù fe be ingie; angwu ’úma ’ù yi le ù ke bendi-likaa ’uke a, ù ke faale ’akwukwell. Angwu ’úma ’ù yi le ù kam bendi a, ù shi aki kangg; angwu ’úma ’ù yi le ù shi ’inunung ha bendi a, ù shi āshi igor-igor. ⁹ Kì nyin amen lè bende lityam ken, mà tel ’ibibi, ki nyin amen lè ’inunung. ¹⁰ Kì nyin amen lè bende kangg ná bebwanam bende. Undi uyang-yang ù gim unde-ma hwan ’ushu. ¹¹ Mà shi aki kang-kang, mà hwun lihwun ye. Mà fe Unim lityam ken, ma kwu ’iken kangg shi-e aki. ¹² Lishi andorale līme᷅n he úkyébb Unim lì shi amen mà yal gor. Mà ngyor naa genn nyong bingie bı᷆ be hwaa lè men; mà kong ha Unim mbee ’unyong. ¹³ Mà kpell bebwandamen, bendi Unim, he ’unyong ’uyang-yang ’i gben ābe. Mà kpe begaandi be he ishu īme᷅n igor-igor. ¹⁴ Mà bii Unim le ù ke bendi abe be᷆ shi ’ibibi ha amen ’ukwun, mà bii he le ù ke be ’ukwun hwan, mà ke ushang ubibi a fe be ye. ¹⁵ Mà yal gor utung ha bendi abe be᷆ yal gor, mà mbwee utung ha bendi abe be᷆ mbwee. ¹⁶ Mà zī ’ihwan ha bendi puu ’itaa ken, mà dim idim ye, ma ngwee utyang bendi abe bè yi mbiloo, mà gim le ma bi lishi ’indee-indee ye. ¹⁷ Gbe undi a shi amen ’ibibi, mà tem he utyang ye, mà shi a᷆shi undi uyang-yang a bong le ’i ngbebb hwan. ¹⁸ Mà kaa kangg kwu ikwun ha bendi puu. ¹⁹ Bedim-gi, gbe undi a shi amen ’ibibi, mà tem he utyang ye, mà tyang he hè Unim hwan ù ke-e ’ingie. Be fee he ’ushia Unim le Unim a de le: "Utyang atemale ù yi ugi a, mi ba tem utyang." ²⁰ Mà shi a᷆shi be fee he ’ushia Unim hwan. Be fee le: "Gbe itung ı᷆ ndo undi-linaa ūme᷅n, mà ke-e lizi; gbe umbwo u᷆ gyor he, mà ke-e umbwo. Gbe ma shi ’itaa ana, hà ma kwuo akee-indee a wu-e he lishi, he-e ù fel lè ishwia." ²¹ Mà bong ’ibibi ’ì kpe men ityuu ye, ukpor mà shi ’inunung hè men mà hwò āshi.

¹ Undi uyang-yang ù keb ’uhwo-ma ke abe bè yi atie-lishi ’ubong, likorye Unim nà a ndor ābe nya. Bendi puu abe bè yi atie-lishi ’ubong, Unim na᷅ a waa ābe ndor nya. ² Ashin ’i ze le undi angwu a swan ābe, hà a swan àshi Unim a kong a. Undi angwu a ke be ife ye, u kpa ushe Unim swa ’uhwo-ma he lishi. ³ Undi uyang-yang angwu u᷆ shi ’inunung, u shell a᷆be bè yi atie-lishi ’ubong ye, ukpor undi angwu u᷆ shi ’ibibi na᷅ u᷆ shell ābe. Undi angwu a kee le u shell atie-lishi ’ubong ye, ù shi ’inunung, mà atie-lishi ’ubong u pee he, ⁴ likorye atie-lishi ’ubong u sha aki Unim he ’inunung ’īme᷅n a. Ukpor gbe undi a shi ’ibibi, ù shell ābe, likorye Unim a ke be ikeb le bè ke undi angwu a shi ’ibibi ’ingie. Nyong be᷆ ke undi angwu a shi ’ibibi ’ingie, be sha aki Unim a. ⁵ He ashin, undi uyang-yang ù ndè le a keb ’uhwo-ma ke atie-lishi ’ubong he ’ushell ’ingie ufe-ufe a ye, ù keb ke be le bwo a ngye he lityam le ’ì yi kpa-kpa le ù shi ná á. ⁶ Ashin na᷅ ’ì yi atan-lengi angwu ù yi le mà tye ukpanda or titi, likorye abe be᷆ kpe ukpanda or be sha aki Unim a. ⁷ He ashin, mà tye ukpanda angwu ù yi le mà tye. Mà tye bitaa ikpanda puu abi bì yi le mà tye. Bendi abe ’ì yi le bè shell ābe, be ke be ife, mà ndè le ma shell ābe, ma ke be ife. ⁸ Mà zī undi lihwua ye. Lihwua angi ma᷆ kee-kee zī na᷅ lì yi le ’ì nyin amen lè bende. Undi angwu ’i nyin he lè unde-ma, hà a ndor mbee Iten puu. ⁹ Iten Unim ì yi le: "Kee ungye undi ye. Gwu undi ye. Zì ’azi ye. Ban lityam fe ’iwom undi ye." Iten Unim anyin lè angi i teng puu i fe lishi le: "Kì nyin-a lè unde-gang ná ’i nyin-a lè ’uhwo-gang." ¹⁰ Undi angwu ’i nyin he lè unde-ma, ù hà ndo sha he ’ibibi ye. He ashin, undi angwu ’i nyin he lè unde-ma, hà a ndor mbee Iten puu. ¹¹ Mà ndo shi biwom abin puu, likorye ma ngye le ’unyong ’u fel ahwu ma᷆ wum lè he ’unde, bo ’inaa. Kunyong ahwu Unim u᷆ kpan li ’u fel kpee-kpee hwò ’unyong ahwu li ma kpi ’ikwu bong ha Ujeso Ukristi. ¹² Kusu ’u gye ’igbe-igbe, ashi a ndo taa. He ashin, lì kung abwo lè he bibibi abi bendi abe be᷆ tan he ’ifufebb be᷆ shi. Bel lì yi bendi ’ikung-gbo a, mà lì kung bigbor ’ukye bityan kwu he abwo. ¹³ Lì shi likpe angi li keè le bendi ’ikung-gbo bè shi; li gbe lè abwo fe he awu abibi angi à yi awu ibwom ana ye. Lì mbee kung abwo lè he akpela, lè ashele ’ibibi faale abwo akwele. Lì kung abwo lè he ’ushwan lè ashi abungale. ¹⁴ Mà tyang Atyetyan Ujeso Ukristi ù shī ndyell amen. Mà bong shì bigyor bibibi bīme᷅n abi bi be lè he ugim ūme᷅n ana ye.

¹ Undi angwu a bong ha Ujeso Ukristi, mà kpe-e he liwu līme᷅n, mà na a wa kaa kpè he ’ukwo Unim ye or. Mà kwell fe-e he ashi a gim le ’ì yi kpe-kpe le bendi Unim bè shi ana ye. ² Bendi besuso be bong le be tel ’iwom ye, be za᷆ ’iyang-yang; ukpor besuso abe be wa kaa kpè he ’ukwo Unim ye, be tel inyia puu. ³ Undi angwu u᷆ zī ’iwom ’iyang-yang, ù ben angwu u᷆ tel āshi ana ye. Kitaa a ken, angwu u᷆ tel ’iwom ù ben angwu u᷆ zī āshi ana ye, likorye Unim a kpe be a puu. ⁴ Ayang ù yi-a wo angwu wo᷆ kong bia undi aki undi? Atyam ugyang na᷅ ’ì yi le ù pee he or, u ben he or, he ashi a shi. U mbeb ’ukwo ye, likorye Atyetyan Ujeso ù yi lè ikeb le u kpell he. ⁵ Undi-iso u gim le liti lisuso li dyam hwò a᷆ngi a teng; ususo u gim le ati puu à yi ’itaa ken. Undi uyang-yang ù naa genn he ashi a ngye le ’ì yi kpa-kpa. ⁶ Undi angwu liti lisuso li dyam he hwò a᷆ngi a teng u sha ná he-e ù ke Unim ife a. Angwu ’iwom ’ı᷆ tel he ye, u᷆ zī ’iyang-yang, u shi ná he-e ù ke Unim ife a, likorye u pee Unim. Angwu ’iwom ’ı᷆ tel he, u sha ná he-e ù ke Unim ife a. Ufe or titi u pee Unim. ⁷ Bel puu, kì yi lè undi angwu u᷆ kwu uwum ke ’uhwo-ma ututeb ye; ki shi lè angwu u᷆ hwō lihwu ke ’uhwo-ma ututeb ye. ⁸ Gbe lì yi bewum, li kwa bewum le lî fe Atyetyan a; gbe li hwō, li hwa᷆ le lî fe Atyetyan a. He ashin, mà lì kwu bewum or, mà lì hwō or, lì yi ke Atyetyan a. ⁹ Atan-lengi angwu Ujeso Ukristi a hwō, u tem wum, ù yi le he-e ù kwu Usu bendi bewum lè abe be hwō a. ¹⁰ Bwo abin bì yi ’itel i, ki shi ná a, men besuso ma᷆ kong bia unde-men? Ki shi ná a, ma᷆ ben he? Má ngye le bel puu li ba naa he ’ushu Unim, he-e ù tang li ushe. ¹¹ Be ma fee he ’ushia Unim le: "Atyetyan Unim a de le, ’Mi Unim na᷅ mi kong le, undi uyang-yang u ba keb anung he itang ka-m; undi uyang-yang u be kong gboo le mi na᷅ mì yi Unim.’ " ¹² Nya he liti limen ana, bel puu, undi uyang-yang u ba naa he ’ushu Unim dǎ he àshi a shi he igye i. ¹³ He atan-lengi anwun, mà lì tem gye ’ushu ben bende ye. Ashi ’i ngbebb le lì shi ’ì yi le lì zam le li sha ’iwom ashi ’ı᷆ be lè limbu ke unwandatyan ye. ¹⁴ Ná undi angwu ù yi ke Atyetyan Ujeso Ukristi, mi ngye dangg le ’ì yi lè ’itaa lizi ashi ’i ban lè ’uhwo-shi ye; ukpor undi angwu a ndè gia le u tel ’itaa lizi ’isuso, ù tyang āngi azēle. ¹⁵ Gbe wo zī àshi wo ngye le ’i ban ugim unde-gang, hà wò yi lè benyin ha ahe ye. Kiwom ’iyang-yang ashi wo ngye le ’i sha undi angwu Ujeso Ukristi a hwō ke-e u tyang ’ukwo Unim, ndè le wo zī āshi ye. ¹⁶ Gbe wo ngye le ’iwom ’i ngbebb ka-a le wò shi, gbe wo ngye le ’iwom ashi há ’i ba sha bendi be kong ’ibibi gba lè shi, ndè le wo shi āshi ye. ¹⁷ Kusu Unim ’ù yi he bizizi azele a or, ngwu bingwungwo angwele a or ye. Kù yi he ’inunung ashele, lè ikwun lè igor á. Abin puu bi ba lè ha Ukatia Kunyong Unim a. ¹⁸ Undi uyang-yang angwu u᷆ pwom Ujeso Ukristi he ’ukwo ahwun a, u sha nyin Unim, bendigye or be pee he le a shi dell-dell. ¹⁹ Mbee ’unyong puu, lì kaa hè li lì shi a᷆shi ’ı᷆ shi bendi be᷆ kwu ikwun, be naa genn fe Unim. ²⁰ Shī zī lizi angi lı᷆ ban aki angi Unim a shi he lityam unde-gang ye. Kì yi ’igyang a le Unim a bong le lì zī lizi liyang-yang, ukpor wo shi liketye gbe wo zī lizi angi lı᷆ shi bendi besuso be tyang ’ukwo Unim. ²¹ Kiwom ’iyang-yang ashi ’ì yi le ’i sha unde-gang u tyang ’ukwo Unim, ki ngbebb le wò shi āshi ye, mà ’ì yi bizizi or, mà bingwungwo or, mà ’ì yi ’iwom ’iyang-yang or. ²² Gbe wo bong le Unim a tel bendi bema biwom abina, tyang ashina ’ì kwu ke men ha Unim àshī afee. Igor ì yi ke undi angwu a ngye ashi ’ì yi kpa-kpa ke-e le ù shi, i hà shi āshi faale uben he ugim uma. ²³ Ukpor gbe undi a ngye dangg ashi ’ì yi kpa-kpa ke-e le ù shi ye, gbe a gye ’ushu shi āshi, hà a shi ’iban he ashi Unim, likorye a shi āshi, mà na a ngye dangg le hà ’i ngbebb le ù shi āshi or, hà ’i ban or ye. Kiwom ’iyang-yang ashi lı᷆ shi, gbe li ngye dangg le ’i ngbebb mà ukpong li hà shi āshi ye, hà li shi ’iban a.

¹ Bel abe li kaa kpè he ’ukwo Unim lì ndè le li kpell àbe be wa kaa kpè he abongale ye, lì kaa le lî shi ngbebb ’uhwo-tyan a ye. ² Bel, undi-undi ù gim àshi ’ì kwu ’inunung ke unde-ma he-e ù kpell he ù naa genn he abongale. ³ Ujeso Ukristi ugyang or a maa kee le u sha ngbebb ’uhwo-ma a ye. Kì yi nya a na be fee he ’ushia Unim le a de le: "Unim, ibia angi be ma kong bia-a, mi kpē ngi puu so." ⁴ Biwom abi leěti be ma fee he ’ushia Unim, be fee ābi le bì hwua li ’igyang, bi fe li ingie, bi shi li li naa genn nya a na lì yi lè lishi andorale ha Unim. ⁵ Unim angwu u᷆ shi bendi be᷆ naa genn, be kwu lè ingie, ù hā kpell amen hè men mà kwu ikwun-ikwun ha bende nya a na Ujeso Ukristi a ma yi, ⁶ le hè men puu ūbībī ken mà kung igie ken pee Unim angwu ù yi Atyam Atyetyan Ujeso Ukristi. ⁷ Nya a na Ujeso Ukristi a kpe men, na᷅ men or mà kpē bende, le hè bendi bè pee Unim. ⁸ Mi da amen le Ujeso Ukristi a fel undi aki Ijuus le he-e ù tyung le Unim u bel igie ye he-e ù shi ’ì kwu nya a na Unim a ma kyebb betiebell. ⁹ Atan-lengi ususo u shi le hè bendi abe bè yi Ijuus a ye or titi bè pee Unim he ’uhwo beshi bema. Kì yi nya a na be fee he ’ushia Unim a le: "He ashin, mi ba pee-a he liwu bendi abe bè yi Ijuus a ye, mi gyam agyam pee-a." ¹⁰ Be mbee fee le: "Men abe mà yi Ijuus a ye, mà yal gor utung ha bendi Unim." ¹¹ He ’iteng ’isuso nya he ’ushia Unim be mbee fee le: "Men puu abe mà yi Ijuus a ye, mà pee Unim, men bendi abong puu, ma pee he." ¹² Azaya u de le: "Igia Ujesi u ba ba, u ba he-e ù tyung bendi abe bè yi Ijuus a ye ’ukwo likpan, be ba ndor lishi ha ufe a le ù kpan ābe." ¹³ Unim angwu ufe na᷅ u᷆ ke bendi lishi andorale, ù hā shi àtyám āme᷅n à sho lè igor lè ikwun nya a na ma bong ha ahe, hè men mà gye ’ushu kwu lè lishi andorale sho yilelele gbe he ikeb Ukatia Kunyong uma. ¹⁴ Bebuye, mi bong le mà yi benunung, ma ngye ’iwom dangg le ma fel hwua bende or mbeè. ¹⁵ Ukpor igie isuso he ’ushia ahwu mi fee hwaa lè men i, mi kong a᷆ngi ì yi ikaa-ikaa faale ’ushell le hè men mà naa lityam ángi ye. Mi fee kong abin faale ’ushell likorye Unim, he inung ima, a waa mi, ¹⁶ le mì bun ’isom ’inunung gbe lè Ujeso Ukristi de men abe mà yi Ijuus a ye. Mi sha aki abunale ’isom ’inunung nya a na bendi ashangale be᷆ shi aki abell. Mi sha ashin le hè men abe mà yi Ijuus a ye, Unim ù kpe men ná ’uke ahwu ’u ngbebb he, likorye Ukatia Kunyong Unim a shi amen ma fel ta-ta ke-e. ¹⁷ Ná undi angwu ù yi ke Ujeso Ukristi, mì yi lè igor he aki Unim angi mı᷆ shi. ¹⁸ Mi kee-kee kong porr gba lè ashi Ujeso Ukristi a shi gbe ha ami he abele lè bendi abe bè yi Ijuus a ye le bè fel fe Unim a. Mi kong gbà lè abi a shi lè abi a kong. ¹⁹ A shi biwom abin gbe he bikwele-uhwo abi bı᷆ tyung ikeb ima, u shi gbe ha Ukatia Kunyong uma. Kung lè he Ujeruselem lè wu he Ilirikem, mi bun ’isom ’inunung gbe lè Ujeso Ukristi puu. ²⁰ Mbee ’unyong puu mi kaa le mi bun ’isom ’inunung he ’iteng ashi undi a wa gyo gbe lè Ujeso Ukristi ye, mî ndè le mi kwa undi angwu u᷆ tye ushom he líshiı᷆ angi undi-iso na᷅ a fe ye. ²¹ Kì yi nya a na be fee he ’ushia Unim a le: "Bendi abe be wa de be gbe lè he ngye ye, be ba ngya he; abe be wa gyo gbe lè he ngye ye, ki ba nung ābe gba lè he." ²² Ashin na᷅ ’i tan lè shi, mà na mi maa kaa he aze gbamm le mî be ha amen há or, aki a maa ke-m ’ukwo ye. Ukpor ’anaa-anaa i mi mbeè aki agi he ’igie ashin, mi kam le mi ba ha amen há. ²⁴ Mi kam le mi ba gya he Usipen, nyong mı᷆ gye há, mi kee le mi bel ha amen há, mi kwu há igor-igor zī ati zangg, ma ukpong ma hà kpell mi he litan ligi gye ’ushu. ²⁵ Ukpor mi gya he Ujeruselem a ’ushu mî te lè ’uke lè ke bendi Unim abe bè yi há. ²⁶ Bendi abongale abe he bigie Umasedonia lè Akaya be ndè shī ’i ngbebb ābe le bè dye úndē le hè be bè lè kpell bendi Unim abe bè yi likaa he Ujeruselem. ²⁷ Be shi ashin lè he benyin bebell a, ukpor ’ì yi aki abell a le bè shi ná. Gbe ha bendi Ijuus na᷅ bendi lè he abong asuso be fel lè abwo he binunung abi Unim a kyebb le u ka Ijuus. He ashina, kì yi le bendi lè he abong asuso or titi be zī binunung bibell ke bendi Ijuus. ²⁸ Gbe mi te lè úndē angwu be dye i lè ke be, mà mì ha᷅ ba gba ha amen há gya he Usipen. ²⁹ Mí ngye le abele ugi ha amen há u ba ba lè ’ukwun kangg lè ha Ujeso Ukristi ka amen. ³⁰ Bebuye, he lizen Atyetyan Ujeso Ukristi lè he ’uhwo benyin abe Ukatia Kunyong Unim a ke men, mi tim amen anung le mà gwaa abwo ha ami kong ha Unim ke-m. Mà bii he le u kpell mi, ³¹ kpan mi lè he abwo bendi Ujudia abe be swan ’isom ’inunung. Mà mbee bii he le ù shi bendi bema abe he Ujeruselem bè kpe ’uke ahwun igor-igor. ³² Nyong mi mbee, gbe Unim a bong, mi ba ha amen há igor-igor, mi be sho ’unyong há. ³³ Ushang angwu mi ke ù yi le, Unim angwu u᷆ ke ikwun, ù kwu utung ha amen puu. Kì ngyor ná mi kong.

¹ Mi kee le mi sha amen mà ngye Ufibi, unwandatyan ungingye. U sha aki kangg he liwu bendi abongale angi he Usinkria. ² Gbe a be ha amen há, mà kpe-e abwo afee-afee, likorye ù yi undi Unim a ná men a. Ma kpe-e nya a na ’ì yi le bendi Unim bè shi. Ma ke-e ukpell uyang-yang angwu a kee lè ha amen. A ke bendi gbamm ukpell, u ke-m mi-gyang i or. ³ Mà kong mi lè Uprisila lè Akwila. Be maa sha aki Ujeso Ukristi utung ha ami. ⁴ Be ma bong lihwu or he ’uhwo ’ugi, mi pee ābe kangg, mi-mi a ye, bendi abongale puu abe bè yi Ijuus a ye, be pee ābe titi. ⁵ Mà mbee kong mi lè liwu bendi abongale angi lı᷆ kpee ha abe ushom fe Unim. Mà kong mi lè Ipenites, udim-gi lityam. Ufe na᷅ a kpi ’ikwu bong ha Ujeso Ukristi ’ushu he ’igie Eshia. ⁶ Mà kong mi lè Umeri angwu a shi aki kangg he liwu līme᷅n. ⁷ Mà mbee kong mi lè Andronikes lè Ujuniyas, bendi ’ubong ’ugi abe be ma yi he igaadye utung ha ami. Bè yi bebwaa-isom Ujeso Ukristi abe be fem lizen a, be bong ha Unim teng mi. ⁸ Mà kong mi lè Ampiatus, udim-gi lityam angwu u᷆ fe Atyetyan lityam ken ana. ⁹ Mà kong mi lè Ubanes angwu a maa shi aki Ujeso Ukristi utung ha ami ana. Mà mbee kong mi lè Ustakis, udim-gi lityam. ¹⁰ Ma kong mi lè Apelis angwu bendi be ngye-e dangg le u fa Ujeso Ukristi lityam ken ana. Ma kong mi lè bendi Alistobulos. ¹¹ Ma kong mi lè Uherodiyon, unde-gi undi Ijuus. Mà mbee kong mi lè bendi Unasises abe bè yi ke Ujeso Ukristi. ¹² Mà kong mi lè Utirafena lè Utirafosa. Bengingye aben be shi Atyetyan Ujeso aki. Ma kong mi lè Upesis, udim-gi lityam. Ungingye anwun or a fe ikeb kangg shi Atyetyan Ujeso aki. ¹³ Mà kong mi lè Urufus angwu Atyetyan a waa kung le ù shi-e aki ana. Ma kong lè anam angwu a kung mi ná unwaa-ma. ¹⁴ Ma kong mi lè baa Asinkirites, Ufelegon, Uhemiz, Upatrobas, Uhemas, lè bebwandatyan, bendi Unim, abe bè yi ha abe há. ¹⁵ Mà mbee kong mi lè baa Ufilologes lè Ujulia, Uniriyas lè unwanam ungingye, lè Olimpas lè bendi Unim puu abe bè yi ha abe há. ¹⁶ Ná bebwanam bende gbe ha Ujeso Ukristi, mà gaa bende lè uko lè uko. Awu bendi abongale puu a kong lè men. ¹⁷ Bebuye, mi tim amen anung le mà baa bendi abe be tan lè bikwu agieale, be mbeb bendi. Biwom abi bı᷆ hwua amen bì yi linaa ha ’igyang ashi ma ngye. Mà gbe kpee bendi abe ’itaa ana ye. ¹⁸ Atan-leshi ù yi le be fa Atyetyan Ujeso Ukristi a ye, be kee-kee shi ashi ’i ngbebb abe befe-gyang a. Be kung igie inunung kong ngbebb bendi le hè be bè lam kwu bendi abe be ndè shob ’ibibi ye a. ¹⁹ Bendi puu be ngye le men ma ka igie Unim ife. Mì yi lè igor kangg he ’uhwo ’umen. Ukpor mi kee amen le mà bi lishi he angyele ’inunung. Kìbíbı᷆ ’ife, mi hwua amen le mà gbe lè abwo fe há ye. ²⁰ Mà Unim angwu u᷆ ke ikwun u hwà Usetan, ma tem he abee lishi fa he itang. Ushang ugi ù yi le Atyetyan Ujeso ù ke men puu ’ukwun. ²¹ Utimoti angwu u᷆ shi aki utung ha ami a kong lè men. Ulusiyes lè Ujesen lè Usosipate abe lì yi ’ubong ken be kong lè men. ²² Mi Utetiyes angwu mi kpell Uporl fee ’ushia ahwun, mi kong lè men ná unde-men, undi Unim. ²³ Ugayas angwu mi ngwee ha ahe ushom a, liwu bendi abongale or li kpee fa Unim ha ahe ushom a, u kong lè men. Irastes angwu u kam úndē ’ubong lè Ukwates, be kong lè men. [ ²⁴ Atyetyan Ujeso Ukristi ù hā ke men puu ’ukwun. Kì ngyor ná mi kong.] ²⁵ Mà lì kung ipee ke Unim! Ù yi lè ikeb le u sha àtyám āme᷅n a naa genn he ’igyang. Ashin na᷅ mi de men nyong mi bun ’isom ’inunung gbe lè Ujeso Ukristi. Ashin na᷅ ’ì yi ’igyang ashi Unim a fem āshi tyung he igye gboo. Lè há linde ’i ma yi he ’undyell, ²⁶ ukpor ’anaa-anaa i gbe he igie angi bendi abe be᷆ tye ugie ’isom Unim be fee he ’ushia Unim, be fem ’igyang ’imen ana tyung he igye gboo. Be bun āshi de bendi mbee abong puu he igye i, nya a na Unim a kong le hè bendi bè kpē shi, be ke shī ife. ²⁷ Unim ufe-ufe na᷅ a bi lishi! Ipee ì kwu ke-e ngyor igye kpamm gbe ha Ujeso Ukristi. Kì ngyor ná mi kong.