Revelation

Revelation

¹ Kushia ahwun ’ù yi gbe lè biwom abi Unim a fem tyung Ujeso Ukristi le ù tyung bendi abe be᷆ fe-e, biwom abi bì yi kpe-kpe le baale bì shi. He ashin Ujeso a ma hà som udengell uma a lè tyung Ujon angwu u᷆ fe-e biwom bimen ana. ² Ujon a fee biwom bimen abi a ndè ana he-e ù tyung bendi gboo le bisom Unim bimen i, Ujeso or titi a naa ushada le bì yi ’igyang. ³ Biwom bimen Unim a kong le baale bì shi ana, undi angwu a bo ābi he atyung bendi, lè bendi abe be gyo ābi, gbe be shi ābi, hà ’i kwun ābe he ’uhwo, likorye ’unyong ahwu biwom abin bı᷆ be shi ’u fel kpee-kpee. ⁴ Mi Ujon na᷆ mi fee ’ushia ahwun hwaa lè men awu bendi abongale angi he Eshia. Unim angwu ù yi lè há linde, ù so ’unyin i, u mbee tem be he igye anyin, ù ke men ’ukwun, u shi ’i kwun amen he atyam kpatiaa. Ikeb Ukatia Kunyong Unim idyong-ifee angi ı᷆ naa he ’ushu ’idem ’usu Unim ì ke men ’ukwun, i shi ’i kwun amen he atyam kpatiaa. ⁵ Ujeso Ukristi angwu u᷆ kong ’igyang mbee ’unyong puu, angwu a ma wum lè he lihwu ’ushu, u mbeē shi usu besu puu he igye i, ù ke men ’ukwun, u shi ’i kwun amen he atyam kpatiaa. Ki nyin he lè bel, a bong hwō he-e ù pell li tyang abwo lè he ikeb biban bityan. ⁶ A shi li li fel bendi abe be᷆ shang Unim Atyam he ’iteng-usu ’ima. Kusu lè ifem bì yi ke-e ufe a ngyor igye kpamm! Kì kwu ná. ⁷ Mà gyo! Baale u᷆ be. U ba he bibu; bendi puu be ba nda he lè ashi. Bendi abe be ma tim he likung or titi be ba nda he. Bendi mbee igegem puu he igye i be ba kya fa akpen he ’uhwo ’uma. Faale ifung, ki ba sha ná. Kì yi lè ashi ’ı᷆ gie āshi ye. ⁸ Atyetyan Unim a de le: "Mì yi Alfa, ashi ’i ze le ukpi-ikwu; mi shi Ombeega, ashi ’i ze le umbee-likel." Ikeb puu ì yi he ’ubwo ’uma a, ù yi lè há linde, ù so ’unyin i, u ba kwa ngyor igye kpamm. ⁹ Mi angwu mi fee ’ushia ahwun mì yi Ujon, unwandamen angwu bel lè men li gwaa ipel ha Ujeso, li naa genn kpe ’ingie likorye lì yi ke Kiteng-usu ’ima. Be kwu-m lè ndor he ’ipi umbwo a bel bigie, ashi be᷆ ko le Upatimos, likorye mi bun de bendi gbe lè ’isom Unim ashi Ujeso or a naa ushada le ’ì yi ’igyang. ¹⁰ He liti Usundee lisuso, Ukatia Kunyong Unim a ma be shì-m kpemm, mi gyo igie i kong mi lè he item fem kangg ná be᷆ gwee usom nà. ¹¹ Igie ana i de le: "Kung ’ushia, fee biwom abi wo ndo ndè i fe há, wo som āhwu lè ke awu bendi abongale adyong-ifee angi he Efesos, Usimana, Upegamem, Utayitara, Usadis, Ufiladellfia lè Uleyodisia." ¹² Mi hà bel àshì he item le mî ndè angwu u᷆ kong ha ami. Nyong mi bel àshì, mi ndè bidem abi be᷆ pwom bimor-inde bidyong-ifee abi be kung igold a shi ābi. ¹³ Há liwu bimor-inde ana, kiwom ’i naa há ashi ’i bi undigye. Ki shī aliga uwulu angi a wu āshi he bityung abee, ki shi lè ukwob angwu be kung igold a shi-e bua he anyong. ¹⁴ Ìbí i tee he lishi hwongg ná uwuu; atong-shi áshi a ndeb melang-melang-melang ná umor-inde. ¹⁵ Abee áshi a taa ná nyong be᷆ gyong upii he ’índe, be mbee gbaa he u᷆ taa nà. Ki kong igie ashi ná ’ipuupuu umbwo ’ı᷆ bua nà. ¹⁶ Ki shi lè ikpen idyong-ifee kwu he ’ubwo lizen. Kashwia benyin befee ake ’a᷆ nyin dan-dan-dan ’a bé shī lè he ungwu. Kùshú áshi ’u taa ná libwee lı᷆ taa nyong lı᷆ pwom he ’udyan lishi. ¹⁷ Nyong mi nde shi, mi mbu shī he itang fel ná likwom. Ukpor, ki kung ’ubwo lizen áshi pwom mi, ki de-m le: "Shell ye, mi na᷅ mì yi ukpi-ikwu, mi shi umbee-likel biwom puu. ¹⁸ Mi na᷅ mì yi angwu ù yi uwum. Leěti mi ma hwō, ukpor ’anaa-anaa i mì yi uwum, mi fel kwa uwum ngyor igye kpamm. Lihwu lè ’usu behwu bì yi he ’ubwo ’ugi a. Mi na᷅ mì yi lè ukukol ábi. ¹⁹ He ashin mi da-a le, biwom abi wo᷆ ndè i lè abi wo᷆ be ndè lè he ’ushu, fee ābi. ²⁰ Ndor mî da-a likpe ikpen idyong-ifee angi wo᷆ ndè ha ami ’ubwo lizen lè bimor-inde bidyong-ifee abi be kung igold a shi ana. Ikpen idyong-ifee i naa ke idengell Unim idyong-ifee angi ı᷆ ndè gbe lè awu bendi abongale adyong-ifee ana. Bimor-inde bidyong-ifee bi naa ke awu bendi abongale adyong-ifee ana."

¹ Undi umen mi ndè ana a de-m le mì fee igie anyin som lè ke udengell Unim angwu u᷆ ndè gbe lè liwu bendi abongale angi he Efesos. A de le mì fee le: "Mi angwu mi kwu ikpen idyong-ifee he ’ubwo lizen, mi mbee tan he liwu bidem abi be᷆ pwom bimor-inde bidyong-ifee abi be kung igold a shi ābi ana na᷅ mi kong igie anyin. ² Mi ngye likpe līme᷅n; mi ngye ná ma᷆ shi aki lè ikeb īme᷅n puu, ma naa genn kpe ’ingie. Mi ngye le ma bong bendi bebibi he liwu līme᷅n ye. Bendi-uman abe be kung ’uhwo-bell le bè yi bebwaa-isom Ujeso a, ma shun ābe li-li-li, ma ndè shob ābe le bè yi befe a ye, be bà uman a. ³ Mi ngye le ma naa genn he ’iwom ’iyang-yang, ma bong kpe ’ingie he ’uhwo ’ugi, ma wee abwo ye. ⁴ Ukpor, kì yi lè ’iwom ken a᷆shi ma shi a᷆shi mi kee ye. Kì yi le, ki tem nyin amen lè mi ná leěti ye. ⁵ Mà well ná ’i ma nyin amen lè mi leěti, mà tyang abwo lè likpe libibi ana, fel shi biwom abi ma maa shi leěti. Gbe ma tyang abwo lè likpe libibi ana ye, hà mi ba kung ’imor-inde gbe lè shī lè ha amen. ⁶ Ukpor, kì yi lè ’iwom ken ashi mı᷆ pee amen. Kì yi le ma tel bibibi abi bendi-utung Unikolas be᷆ shi nya a na mi or mi tel a. ⁷ "Undi uyang-yang angwu ù yi lè ’utyung ’igyo ù gyo a᷆shi Ukatia Kunyong Unim u᷆ kong de bendi abongale he biteng atyetye-atyetye. Undi uyang-yang angwu a ngyor naa genn he-e ù yi lè ahwe᷅le, mi ba tyang he u za᷆ ágbe ukwan angwu u᷆ ke likpan angwu a naa he ’ipi igor ashi Unim a kam." ⁸ Undi angwu mi ndè ana a de-m le mì fee igie anyin som lè ke udengell Unim angwu u᷆ ndè gbe lè liwu bendi abongale angi he Usimana. A de le mì fee le: "Mi angwu mì yi ukpi-ikwu, mi shi umbee-likel biwom puu, mi ma hwō, ukpor mi tem wum lè he lihwu na᷅ mi kong igie anyin. ⁹ Mí ngye ná ma kpē ’ingie kangg; mi ngye ná ma mbu likaa he biwom igye anyin, ukpor ’igyang-igyang ma mbu ’ingbebb he ashi Unim. Mi mbee ngye ná bendi abe be kung ’uhwo-bell le bè yi Ijuus be᷆ kong bia amen, ukpor bè yi Ijuus a ye, bè yi he likwu bendi Usetan, usu bibibi a. ¹⁰ Mà gyo! Mà ndè le ma shell ’ingie ashi ma ndo kpē ye. Baale Usetan u᷆ kwu amen besuso fe he igaadye he-e ù kaà abongale ūme᷅n ndè. Kingie ’īme᷅n ’i ba kee-kee kwa ati lihwo a. Mà ’ì kwu le be gwa amen or, mà gye ’ushu bong ha ami lityam ken. Likpan angi lı᷆ ngyor igye na᷅ lì yi lifem angi mı᷆ be ke men hè men mà dyam he lifung-atabe. ¹¹ "Undi uyang-yang angwu ù yi lè ’utyung ’igyo ù gyo a᷆shi Ukatia Kunyong Unim u᷆ kong de bendi abongale he biteng atyetye-atyetye. Undi uyang-yang angwu a ngyor naa genn he-e ù yi lè ahwe᷅le, ù tem hwa᷆ lihwu ’ugbe ’afee ye." ¹² Undi angwu mi ndè ana a de-m le mì fee igie anyin som lè ke udengell Unim angwu u᷆ ndè gbe lè liwu bendi abongale angi he Upegamem. A de le mì fee le: "Mi angwu mì yi lè ’ashwia benyin befee ake ’a᷆ nyin dan-dan-dan na᷅ mi kong igie anyin. ¹³ Mí ngye ’iteng ashi mà yi; nya na᷅ Usetan a kie ’idem ’usu ’ima. Má gye ’ushu fe-m lityam ken, ma tyang abwo lè abongale ha ami ye, mà he ’unyong ahwu be ma gwu Antipas nya he liwu līme᷅n he ’ipi Usetan a fe ushu or. Be gwu-e likorye a fe-m lityam ken, u mbee bun gboo le a bong ha ami. ¹⁴ Ukpor, kì yi lè biwom abi ma᷆ shi a᷆bi mi kee ye. Kì yi lè bendi há he liwu līme᷅n abe be shi biwom abi Ubelem a hwua. Ubelem umen ana na᷅ a ma tebb Ubelak ná ù shi bendi Izwell bè tyang ’ukwo ahwu kpa-kpa. A shi ābe be maa fel za᷆ biwom abi be shang ikem, be mbee tan akpela. ¹⁵ Men or ma fel sha bibibi bimen ana, ma sha biwom abi Unikolas lè bendi bema be hwua. ¹⁶ Mà tyang abwo lè likpe libibi anyin. Gbe ma mā ma᷆ tyang āngi ye, mi ba ha amen há nyin i ’ukwo-ukwo i, mi kung ’ashwia ake ’a be lè ha ami ungwu ba ndo ha bendi abe be᷆ shi bibibi bimen ana. ¹⁷ "Undi uyang-yang angwu ù yi lè ’utyung ’igyo, ù gyo a᷆shi Ukatia Kunyong Unim u᷆ kong de bendi abongale he biteng atyetye-atyetye. Undi uyang-yang angwu a ngyor naa genn he-e ù yi lè ahwe᷅le, mi ba ka he lizi angi lì yi ndor he lifung-atabe. Mi mbee ke-e ’ukor ’ūfūng ahwu be fee lizen lifufe fe há. Undi-iso u ngya lizen limen ana fem angwu mi ke-e áhwu tyang ye." ¹⁸ Undi angwu mi ndè ana a de-m le mì fee igie anyin som lè ke udengell Unim angwu u᷆ ndè gbe lè liwu bendi abongale angi he Utayitara. A de le mì fee le: "Mi Unwaa Unim angwu atong-shi agi à ndeb melang-melang-melang ná umor-inde, abee agi a taa ná nyong be᷆ gyong upii he ’índe, be mbee gbaa he ù taa, na᷅ mi kong igie anyin. ¹⁹ Mi ngye likpe līme᷅n. Mi ngye le ’i nyin amen lè bende, ma kpell bende, ma bong ha ami, ma gye ’ushu naa genn. Biwom abi ma fel shi ’anaa-anaa i or, bi fel ngbebb hwò a᷆bi ma maa shi leěti. ²⁰ Ukpor, kì yi lè ’iwom ken a᷆shi ma shi a᷆shi mi kee ye. Kì yi le, ma bong kpē ungingye angwu ù yi Ujezebell ana he liwu līme᷅n. Ufe-gyang u ko ’uhwo-ma le undi angwu u᷆ tye ugie ’isom Unim. Ukpor a ban bendi begi; a teng ābe gye he atanale akpela lè azele biwom abi be shang ikem. ²¹ Mi ke-e ’unyong le ù tyang abwo lè likpe libibi anyina, ukpor a gye ’ushu lè ngi. ²² Mi ba tya he lingmam shǎ he u fel ’ikwu itang. Bendi abe be᷆ tan ha ahe or, mi ba ba lè ’ingie ’ikaa-ikaa swa ābe he lishi, gbe be mā ma᷆ tyang abwo lè bibibi bibell ana ye. ²³ Mi ba gwa bendi puu abe be pwom he. He ashin bendi abongale he ’iteng ’iyang-yang bè ha᷅ ngya le mi ngye ’iwom ashi ’ì yi he ugim lè lityam undi uyang-yang. Mi ba ka undi uyang-yang ashi ’i keè ha ashi a shi. ²⁴ "Men besuso abe ma teng há he Utayitara abe ma᷆ shi bibibi abi Ujezebell a hwua ana ye, abe ma᷆ shi bibibi biwom abi bendi besuso be᷆ ko le ’undyell Usetan ana ye, mì yi lè biwom gbamm abi mı᷆ de men ufe ye. ²⁵ Kiwom ken ashi mi kee le mi da amen ’ì yi le mà gye ’ushu naa genn he biwom abi ma ngye ana kpamm mi gbe be. ²⁶ "Undi uyang-yang angwu a ngyor naa genn he-e ù yi lè ahwe᷅le, angwu a gye ’ushu shi a᷆shi ’i ngbebb mi lè wu he umbee-likel, mi ba shǎ he u fel usu igegem puu he igye i, ²⁷ ná Atyagi a shi-m mi fel usu igegem puu he igye i. U ba kwa utyuu usu he ’ubwo angwu be kung ’índe᷆ a shi-e, hà teng ābe he ikeb-ikeb, u kem ti ābe ná undi u᷆ kem ti ’iki. ²⁸ Mi ba ka undi umen angwu a hwò ana ukpen ashi-liti. ²⁹ Undi uyang-yang angwu ù yi lè ’utyung ’igyo, ù gyo a᷆shi Ukatia Kunyong Unim u᷆ kong de bendi abongale he biteng atyetye-atyetye."

¹ Undi angwu mi ndè ana a de-m le mì fee igie anyin som lè ke udengell Unim angwu u᷆ ndè gbe lè liwu bendi abongale angi he Usadis. A de le mì fee le: "Mi angwu mì yi lè ikeb Ukatia Kunyong Unim idyong-ifee, mi shi lè ikpen idyong-ifee kwu he ’ubwo, na᷅ mi kong igie anyin. Mi ngye likpe līme᷅n; bendi be kong le mà yi bewum, ukpor mà yi bewum ye, ma hwō. ² Mà bo ’inaa! Mà kin ’anwaa likpan zangg ake ’a teng ha amen teng ’a mbee kwun, likorye mi ndè likpe līme᷅n li wa wu he ūkee᷅ Unim ugi ye. ³ He ashin mà well biwom abi ma gyo, abi be hwua amen. Mà tyang abwo lè likpe libibi līme᷅n hè men mà shi biwom bigyang abi be hwua amen. Gbe ma swan le ma bo ’inaa ye, mi tya amen imbul ná uzi nà, ma ngya ’unyong ahwu mı᷆ be ye. ⁴ "Ukpor, ki già teng lè men besuso nya he Usadis abe ma shi ban Unim ye, ma mbe bihwom bīme᷅n ye. Ma ba shā bihwom bifung tan utung ha ami likorye ma kpè. ⁵ Undi uyang-yang angwu a ngyor naa genn he-e ù yi lè ahwe᷅le, mi ba shá he ’ihwom ’ifung ’itaa ana. Mi mbee gbel nim lizen lima lè he ’ushia azen bendi abe bè yi lè likpan ’unyong ana ye. Mi ba naa he ’ushu Atyagi lè idengell ima bun gboo le ù yi ugi a. ⁶ Undi uyang-yang angwu ù yi lè ’utyung ’igyo, ù gyo a᷆shi Ukatia Kunyong Unim u᷆ kong de bendi abongale he biteng atyetye-atyetye." ⁷ Undi angwu mi ndè ana a de-m le mì fee igie anyin som lè ke udengell Unim angwu u᷆ ndè gbe lè liwu bendi abongale angi he Ufiladellfia. A de le mì fee le: "Mi angwu mı᷆ be lè ha Unim, mi shi undi ’igyang, na᷅ mi kong igie anyin. Ukukol angwu leěti Udebid a ma yi lè he, ù yi he ’ubwo ’ugi a. Nyong mi buu lishi, kì yi lè undi-iso angwu ù yi lè ikeb le u shā āngi ye; nyong mi ngib āngi, ki shi lè undi angwu ù yi lè ikeb le u buu āngi ye. ⁸ Mi ngye likpe līme᷅n. Mi ngye le mà yi lè ikeb gbungg ye, ukpor ma shi a᷆shi mi kong. Ma fe-m lityam ken. He ashin mi buu lishi ndor amen hwuo; kì yi lè undi angwu ù yi lè ikeb le u shā āngi ye. ⁹ Ukpor abe bè yi he likwu Usetan, abe be kung ’uhwo-bell le bè yi Ijuus ana, mi ba sha bendi-uman abena be ba tim anung he itang fa amen, hè ’ì nung ābe le ’i nyin mi lè men. ¹⁰ Má naa genn ná mi de men. He ashin mi ba kpan amen lè he ’ingie ’ikaa-ikaa ashi ’i ndo be hwaa lè igye puu hè shi ’ì kaa bendi abe bè yi hen igye ndè. ¹¹ "Baale mı᷆ tem be! Mà gye ’ushu naa genn he biwom abi ma gyo, abi ma bong ana, hè ’uke ahwu Unim a kam ndor bendi abe be ngyor naa genn, hè undi ù kpē kung amen áhwu ye. ¹² Undi uyang-yang angwu a ngyor naa genn he-e ù yi lè ahwe᷅le, mi ba shǎ he u kwa ’ìhwuà he ushom Unim ugi; u ngyor kwa nya he ushom ana ngyor igye kpamm. Mi ba fee lizen Unim ugi fa he ’ushu ’uma, mi fee ùshù Unim ugi angwu ù yi Ujeruselem Ufufe angwu u᷆ be be lè he lifung-atabe; mi mbee fee lizen ligi angi lifufe. ¹³ Undi uyang-yang angwu ù yi lè ’utyung ’igyo, ù gyo a᷆shi Ukatia Kunyong Unim u᷆ kong de bendi abongale he biteng atyetye-atyetye." ¹⁴ Undi angwu mi nde ana a de-m le mì fee igie anyin som lè ke udengell Unim angwu u᷆ ndè gbe lè liwu bendi abongale angi he Uleyodisia. A de le mì fee le: "Mi angwu mì yi ’A kong, mà ’i mbee,’ mi shi undi ’igyang, igie igi i kpè a᷆ngi undi uyang-yang ù fe lityam ha angi, biwom puu abi Unim a mbe bi be ubu lè he ’ubwo ’ugi a, mi na᷅ mi kong igie anyin. ¹⁵ Mi ngye likpe līme᷅n. Ma fa-m lityam ken ye, mà swan mi iswan a ye. Ki ngbebb le mà gia ken. Gbe ma᷆ fe-m lityam ken ye, hà mà tem fe-m ye gbang-gbang. Mà yi ná lizi angi lı᷆ shī ye, li kwun ye, li gbal he ungwu nà. ¹⁶ Le bwo ma᷆ gbal he ungwu, mi shwa amen wa he itang. ¹⁷ Men ma kung ’uhwo-men le ma mbu ’ingbebb, le ’ì yi lè ashi ’ı᷆ tem gben amen ye, le ’i kwun amen he ’uhwo. Kì yi le mà ngye le ma mbu ’indee, ma hwuà àshì, ma shi libong, ma shi beshi-beshi. ¹⁸ He ashin mi tebb amen le mà be hwaa lè mi hè men mà ndyebb igold angi be so angi i bi, hè men mà mbu ’ingbebb ’igyang ashell. Ma mbee ndyebb ’ihwom ’ifung fe, hè men mà tem kwu libong ye, hè men mà tem kwu lè ishwia ye. Mà mbee ndyebb usi tye he atong-shi amen hè men mà ndè nwongg. ¹⁹ Bendi abe ’i nyin mi lè be na᷅ mı᷆ tyung ābe biban abi be shi, mi tebb ābe gbe he ’ingie akele. Mà bo ’inaa, mà tyang abwo lè likpe libibi anyin. ²⁰ Mà gyo! Mì yi naa he ungwu lishi, mi kem abwo mì yii ko lìngma᷅m. Undi uyang-yang angwu a gyo lingmam ligi, u buu lishi, mî ngwee he afee ushom, bel lè he li zī lizi abwo ukem. ²¹ "Undi uyang-yang angwu a ngyor naa genn he-e ù yi lè ahwe᷅le, mi ba bong he le ù kwu ipel ha ami he ’idem ’usu ’igi, nya a na mi or mi ma ngyor naa genn hwò ugilale, mi fel kwu ipel ha Atyagi he ’idem ’usu ’ima. ²² Undi uyang-yang angwu ù yi lè ’utyung ’igyo, ù gyo a᷆shi Ukatia Kunyong Unim u᷆ kong de bendi abongale he biteng atyetye-atyetye."

¹ Nyong ashin ’i mbee, mi mbee ndè ’iwom ’isuso, mi ndè lìshì há ’usi li buu ndor hwuo. Mi mbee gyo igie Undi angwu á yi há bè kong ha ami ana. U kong igie i fem kangg ná be᷆ gwee usom nà. A de-m le: "Mbo be he ’usi nyin, mî tyung-a biwom abi bì yi kpe-kpe le bì be shi lè he ’ushu." ² Nya ’ukwo-ukwo Ukatia Kunyong Unim a be shí-m kpemm. Mi ndè ’idem ’usu kie he lifung-atabe, mi ndè Undi ù yi kwu nya ’idem ’imen ana. ³ Undi angwu a ma yi kwu há ’idem ana a maa taa ngyal-ngyal-ngyal ná akor angi a ngbebb ’unung angi be᷆ ko le udaimon lè urubi. Umia ukwun-ukwun u kaa kel-kel fe ’idem ana, u taa kil-kil-kil ná ’ukor ahwu be᷆ ko le emered. ⁴ Be kie bidem ’usu lisi lè bi binde kel-kel-kel fe ashi ’ikaandi he ’udyan. Bekaandi lisi lè be bende be ma yi kwu nya bidem ’usu ana. Ukaandi uyang-yang a shī ’ihwom ’ifung, u shī ’ishilishi usu ashi be kung igold a shì āshī. ⁵ He ’ipi ’idem ’usu ’i kie, kindeb-nwaa ’i ndeb lè há nwaa-nwaa-nwaa, itaa ì yi tya lè há. Be gbē àgòr adyong-ifee ndor he ’ushu ’idem ana. Àgòr ana a naa ke ikeb Ukatia Kunyong Unim idyong-ifee. ⁶ Nya he ’ushu ’idem ana, kiwom ná ’idyeshor ’i ma yi tyung há, ashi ’ì yi udang-udang gelalala ná ’inde-ushu. Biwom binde abi bì yi biwum bi ma yi naa kel-kel-kel fe ’idem ’usu he ’udyan, bi shi lè atong-shi mbee inyiahwo puu. ⁷ Kiwom ashi ukpi-ikwu, ki bi ’ugaba; ashi utepwom, ki bi ùkyēbb ’igundu; ashi lekie, ki shì lè ’ùshú ná ahwu undigye; ashi lende, ki shi ná agamafe nyong u᷆ ndo. ⁸ Biwom bimen bì yi biwum ana, kiyang-yang ’i ma yi lè abebaa adyong-ken, ki shi lè atong-shi mbee inyiahwo puu. Ishu or, kusu or, bi maa gyam agyam faale ’unyong ashwele. Bi gyam le: "Wo Unim wò yi Usu, wò yi lè ikeb puu, wò yi gelalala, wo shi ununung. Wò yi lè há linde, wò yi ’unyin i, wo kwa ngyor igye kpamm." ⁹ Nya a na biwom binde abi bì yi biwum bı᷆ gyam agyam ipee fem Undi angwu ù yi kwu he ’idem ’usu u kwu ngyor igye ana, ¹⁰ na᷅ bekaandi lisi lè be bende ana be buu bishilishi usu ndor he itang mbu tim anung he itang nya he ’ushu angwu ù yi kwu he ’idem ’usu, be fe-e. Be gyam agyam le: ¹¹ "Wo Unim, wò yi Usu utyan a. Wo kpè angwu lı᷆ pee-a, li fem-a, li kwa-a ’usu. Wo na᷅ wo shi biwom puu; ki shi ugim ugang a le biwom puu bì fel, bi kwu biwum."

¹ Mi ndè Undi angwu ù yi kwu he ’idem ’usu, ù yi lè ’ushia kwu há he ’ubwo lizen. Kushia ’umen ana, be fee āhwu sho puu afung afee, be kan āhwu, be tyell āhwu ànyōng adyong-ifee. ² Mi hà ndè udengell Unim angwu ù yi lè ikeb kangg, u gaa kangg le: "Ayang a kpè le u bor àbi be tyell shī ’ushia ahwun he-e ù bo āhwu?" ³ Ki ma yi lè undi he igye i or, he ’usu behwu or, há lifung-atabe or, angwu a kpè le u buu ’ushia ana he-e ù bo āhwu ye. ⁴ Mi ma ki kangg likorye ’ì yi lè undi angwu a kpè he-e ù buu ’ushia ana bo ye. ⁵ Lè he liwu bekaandi lisi lè be bende ana, undi ken a de-m le: "Tem ki ye! Gyo, undi angwu be᷆ ko le Kugaba ’ikwu-lihwan Ujuda, u be ubu lè ha Usu Udebid ana, a hwò biwom puu. He ashin a kpè le u bor àbi be tyell āhwu ànyōng adyong-ifee ana, u buu āhwu bo." ⁶ Mi kung ndè Unwaa Utia naa gwaa lè ’idem ’usu. Biwom binde abi bì yi biwum lè bekaandi lisi lè be bende be naa kel-kel-kel fe-e he ’udyan. Utia ana a ma yi fel ná be ma bè gwu-e ngye nà. U shi lè isom idyong-ifee lè atong-shi adyong-ifee. Atong-shi ama a naa ke ikeb Ukatia Kunyong Unim idyong-ifee angi Unim a som gye mbee bipi puu he igye i. ⁷ Utia ana a ma bo lè ndaa ’ubwo kpē ’ushia ahwu ’ù yi he ’ubwo lizen undi angwu ù yi kwu he ’idem ’usu. ⁸ Nya a na a ndaa ’ubwo kpē hwu, biwom binde abi bì yi biwum lè bekaandi lisi lè be bende i be keb tim anung he itang he ’ushu Utia. Befe a puu, undi-undi a ma yi lè litung, u shi lè ukem-undor angwu be shǐ-e lè igold, u shi lè behwu abe be᷆ nung nyin. Kinung behwu ana ’i naa ke ushang angwu bendi Unim bè ke. ⁹ Befe be maa gyam ’ugyam ’ufufe le: "Wo na᷅ wo kpè le wo kpa ’ushia ana buu āhwu likorye wo na᷅ be ma gwu, wo kung anung agang a pong bendi ke Unim. Bendi abe wo pong bè yi lè he ’ikwu-lihwan ’iyang-yang, mbee igegem puu he igye i, abe be᷆ kong igie atyetye-atyetye. ¹⁰ Wo shi bemen abe wo pong ana be fel bendi abe be᷆ shang Unim he ’iteng-usu ’igang. Be ba fel besu a he igye anyin." ¹¹ Mi mbee ndè ’iwom ’isuso, mi ndè idengell Unim i sho tim-tim-tim, sho kel-kel-kel tang ’idem ’usu or, biwom binde abi bì yi biwum or, bekaandi lisi lè be bende or, fe há ’udyan. Idengell Unim ana i go gbe aboale. ¹² Mi gyo āngi i gyam agyam a hwaa kangg. I gyam le: "Wo Utia angwu be ma gwu na᷅ ikeb puu, kingbebb lè lishi abyele bì yi he ’ubwo ’ugang. Wo na᷅ wò yi usu puu. Wo kpè le lì fem-a, li fa-a, li pee-a." ¹³ Mi gyo a᷆bi he lifung-atabe lè abi he igye i, lè abi he ’usu behwu, lè abi he umbwo, bi gyam agyam le: "Lì pee undi angwu ù yi kwu he ’idem ’usu, lì pee Utia, lì fe be, li fem ābe. Bè ngyor kwu besu biwom puu ngyor igye kpamm." ¹⁴ Biwom binde abi bì yi biwum ana bi maa fel shà le: "Amen! Kì ngyor ná li kong!" Bekaandi ana be keb tim anung he itang kung ipee lè ifem puu ke angwu ù yi kwu he ’idem ’usu or, Utia or.

¹ He ’unyong ahwun, mi ndè Unwaa Utia a bor ’ùnyōng ken lè he ànyōng adyong-ifee angi be tyell ’ushia ana. Mi kung gyo ’iwom ken lè he biwom binde abi bì yi biwum, ki kong lingmam likaa-likaa ná ìtaà. Ki de le: "Fem be he igye!" ² Mi kung ndè ’ukaa-inyia ’ufung ’u fem be he igye. Undi angwu a ma pwom āhwu, a ma yi lè usinde kwu he ’ubwo, be hà kung ’ishilishi ahwe᷅le ke-e. Ufe angwu a hwò ’ukye mà, a mbee bo u la hwà ’ukye ’ususo. ³ Ashina ’i gbe, Utia ana a mbee bor ’ùnyōng lefee ahwu be tyell ’ushia ana. Mi gyo ’iwom lefee lè he biwom binde abi bì yi biwum ’i de le: "Fem be he igye!" ⁴ Mi ndè ’ukaa-inyia ’ususo ’u fem be he igye. Ku bung ’ubwaa-ubwaa gbuu. Undi angwu a pwom āhwu, be ke-e ikeb le ù kung ikwun lè he igye hè bendi bè ndo gwu bende. Be kung ’ashwia benyin befee ake ’akaandi ke-e. ⁵ Ashin ’i gbe, Utia ana a bor ’ùnyōng lekie ahwu be tyell ’ushia ana. Mi gyo ’iwom lekie lè he biwom binde abi bì yi biwum, ki de le: "Fem be he igye!" Mi kung ndè ’ukaa-inyia ’ùshì-ùshì ’u fem be he igye. Undi angwu a pwom āhwu a ma yi lè ugbogo kwu he ’ubwo. ⁶ Mi mbee kung gyo igie ná igie undi nà lè he liwu biwom binde abi bì yi biwum ana, i de le: "Bè fel keè ugbogo ityungkafa he únde angwu undi u᷆ shi aki kpē he liti. Bè keè igbogo igali ikie he únde angwu undi u᷆ shi aki kpē he liti. Ukpor, behwu lè ’utyuo, mà shi ābi bì baa ye." ⁷ Ashin ’i mbee gbe, Utia ana a bor ’ùnyōng lende ahwu be tyell ’ushia ana. Mi gyo ’iwom lende lè he biwom binde abi bì yi biwum, ki de le: "Fem be he igye!" ⁸ Mi kung ndè ’ukaa-inyia ahwu ’u tee felaa ’u fem be he igye. Undi angwu a ma pwom āhwu, be ko he le Lihwu. Angwu a pwom Lihwu lè he item, be ko he le Likwun. Be kung igye puu hwua akwu ande, be kung likwu ken ke Lihwu befe lè Likwun le bè gwu. Biwom abin na᷅ be kung gwu likwu ana: kùkyē, ubwaa, àngma᷆m lè inyia ibibi. ⁹ Ashin ’i mbee gbe, Utia ana a mbee bor ’ùnyōng ledyong ahwu be tyell ’ushia ana. Mi ndè bēnyōng bendi abe be ma gwu ābe likorye be bun gboo le be bong igie Unim, be mbee bun āngi porr. Bēnyōng ana be ma yi he liten ’iteng ashi be᷆ shang Unim he lifung-atabe. ¹⁰ Be ma gaa kangg kong le: "Wo Atyetyan Unim angwu lì yi he ’ubwo ’ugang, wo angwu wo᷆ kong ’igyang; lì hà kwu lè ’igbe ná a, saa wo hà tang ushe bendigye abe be gwu li, ha-a à tem ābe utyang?" ¹¹ Undi a kung aliga uwulu afung ke be ken-ken-ken, u de be le: "Mà mbee ngib lityam kwu he ’anwaa ’unyong zangg, likorye ’ugii bendi ’u wa sho ye. Bebwandamen besuso be teng há he itang abe be᷆ fe Ujeso abe ’ì yi le bè gwu ābe ná be gwu amen." ¹² Ashina ’i mbee gbe, Utia ana a mbee bor ’ùnyōng ledyong-ken ahwu be tyell ’ushia ana. Mi ndè isun i kwuo. Libwee li gib fel lishi-lishi kpenn ná ’ihwom akpen; kufell ’u bel fel ’ubwaa-ubwaa gbuu ná anung. ¹³ Ikpen i mbu lè he ’usi wu be he itang ná ’ufem ’u᷆ shī well bikpukpo agbe ikwan nà. ¹⁴ Lifung-atabe li kan ngele-ngele-ngele ná ugaa nà, li nyong. Ikwell lè itang angi umbwo a tang kel-kel fe ngi bi gie biteng gye he biteng bisuso. ¹⁵ Bendi puu, besu igye or, bekaandi or, bekaandi ishogya or, bendi ’ingbebb or, besu ikeb or, ifee or, bebwaa or, be hà buu lè ndyell he ibung, be ndyell he áhwóm akor angi he ikwell. ¹⁶ Be kùng ko ikwell lè akor angi há le: "Mà be mbu shí li, hè men mà ndyell li, hè undi angwu ù yi kwu he ’idem ’usu ù ndě li ye, li mbee hwaa ingywo Utia, ¹⁷ likorye liti likaandi angi angwu a kwu he ’idem ’usu befe lè Utia be᷆ tyung ingywo ibell li fel. Yang ù nya naa mbee?"

¹ Nyong ashina ’i mbee puu, mi ndè idengell Unim inde, i naa ken-ken-ken he bigie igye a puu binde. Angwu ken a naa lè he likwu, angwu ken u naa lè he atong angyell, angwell u naa lè he atong angi ken. I ma naa i kwun ’ufem ahwu ’u maa be lè he bigie a puu binde, le ’û shi itang or imbwo or, ìkwán or ’iwom ye. ² Mi hà mbee ndè udengell Unim ususo u ba lè he ’igie ashi libwee lı᷆ fem, u shi lè ’iwom kwu he ’ubwo ashi u᷆ fe bendi ūfee᷅ Unim angwu ù yi uwum. A keb u fel gaa kangg da idengell Unim inde angi be ke ngi ikeb le ì kung ’ufem ban itang lè imbwo, ³ a de ngi le: "Mà naa atye. Mà wa shi itang or, imbwo or, ìkwán or ’iwom ye kpamm li fe bendi abe be fe Unim utyan ūfee᷅ uma he ’ushu." ⁴ I hà kung de-m ’ugii bendi Izwell abe be fe be ūfee᷅ umen ana mà. I de-m le bè yi bendi asi lisi ’ugbe lisi lè ’ugbe lihwo he biteng lihwo ’afee. ⁵ - ⁸ Kikwu-lihwan ’iyang-yang, be fe bendi asi lisi ’ugbe akie he biteng lihwo ūfee᷅: Kikwu-lihwan Ujuda, bendi asi lisi ’ugbe akie he biteng lihwo. Kikwu-lihwan Uruben, kitaa a ken, kikwu-lihwan Ugad, kitaa a ken, kikwu-lihwan Asha, kitaa a ken, kikwu-lihwan Unafatali, kitaa a ken, kikwu-lihwan Unafatali, kitaa a ken, kikwu-lihwan Umanasa, kitaa a ken, kikwu-lihwan Usimiyen, kitaa a ken, kikwu-lihwan Ulibai, kitaa a ken, kikwu-lihwan Isaka, kitaa a ken, kikwu-lihwan Uzebulon, kitaa a ken, kikwu-lihwan Ujosef, kitaa a ken, lè ’ikwu-lihwan Ubenjamen, kitaa a ken. ⁹ Ashina ’i mbee gbe, mi mbee ndè bendi be go gbe aboale. Be be lè he ’ikwu-lihwan ’iyang-yang, kubong ’uyang-yang, ugugem uyang-yang lè igie iyang-yang he igye i. Be ma yi naa he ’ushu ’idem ’usu he ’ipi Unwaa Utia ana ù yi. Be ma shī aliga uwulu afung, be shi lè akikie kwu he abwo. ¹⁰ Befe puu be maa yal gor kong le: "Wo Unim utyan, wo angwu wò yi kwu he ’idem ’usu, men ha Unwaa Utia na᷅ ma kpan li." ¹¹ Idengell Unim puu i ma naa kel-kel-kel tang ’idem ’usu or, bekaandi lisi lè be bende or, biwom binde abi bì yi biwum or fe he ’udyan. I gyebb shī he itang yal gor fem Unim, ¹² kong le: "Wo Unim utyan, wò yi lè ikeb puu, wo shi lè ifem puu, wo shi lè lishi abyele puu. Li bong le wò yi usu puu. Li pee-a, li fem-a. Abin bì ngyor ’itel i kpamm! Amen!" ¹³ Ukaandi ken lè he bekaandi lisi lè be bende a bii mi le: "Bendi abe be shī aliga uwulu afung ana, baa ayang a? Be ba lè hung a?" ¹⁴ Mi fan he le: "Ukaandi, mi ngye ye, wo na᷅ wo ngye be." A kung de-m le: "Bendi aben bè yi bendi abe be kpē ’ingie ashi ’ì yi ’ikaa-ikaa, ukpor be ngyor naa genn. Be kung anung Unwaa Utia ana a to bihwom bibell taa fel kpeladadada. ¹⁵ He atan-lengi anwun na᷅ be naa he ’ushu ’idem ’usu Unim he ushom uma, be᷆ fe-e ishu or, kusu or. Ufe angwu ù yi kwu he ’idem ’usu, u kwa utung ha abe, u ndè gbe lè be hè ’iwom ’ì do ābe ye. ¹⁶ Itung or ì tem ba ndo ābe ye, umbwo or u tem ba gyor ābe ye, ishu i tem be bi ābe ye, ¹⁷ likorye Unwaa Utia ana angwu ù yi he ’udyan ’idem ’usu, u kam ābe, u teng ābe gye he lishi umbwo, he ’ipi umbwo angwu u᷆ ke likpan u᷆ ko. Unim u ba shell ābe àkye᷅ lè he ashi."

¹ Nyong ashina ’i mbee gbe, mi ndè Unwaa Utia a bor ’ùnyōng ledyong-ifee ahwu be tyell ’ushia ana. Nyong a bor āhwu, atyung a kwun shangg he lifung-atabe, gbe ’anwaa ’igbe kpoo. ² Mi hà ndè idengell Unim idyong-ifee ana ì yi naa he ’ushu Unim, be kung isom a idyong-ifee kung ke ngi undi-undi ken-ken-ken. ³ Udengell Unim ususo a be naa he ’imbe ashi be᷆ shang Unim ashi be kung igold a shi. A ma yi lè ’igbor ashi be kung igold a shì āshi kwu he ’ubwo, he ’ipi be᷆ fe behwu abe be᷆ nung nyin. Be kung behwu ana kangg ke-e, u kung ābe ipel lè ushang bendi Unim gye há ’imbe ’imen ana, ki shì he ’ushu ’idem ’usu Unim. ⁴ Udengell Unim a kung behwu ana, u gbe ’inde ting ābe, angyu a waa tyuu᷅ ipel ha ushang bendi Unim gye hwaa lè Unim. ⁵ Udengell Unim a kwuo ’inde nya ’imbe ana fe he ’igbor ’imen ana, kung bel wu be he igye. Nyong a bel wu, itaa i tye gbang-gbang-gbang; kindeb-nwaa ’i fel ndeb nwaa-nwaa-nwaa; itang i nyung ti-ti-ti. ⁶ Ashina ’i gbe, mi mbee ndè idengell Unim idyong-ifee ana, i kwu isom idyong-ifee he abwo kam agweeale. ⁷ Ukpi-ikwu udengell Unim a gwee uma. Nya ’ukwo-ukwo abo umbwo lè ’ìndē bi be bell-bell lè anung be wu he itang. Itang i ma yi he akwu akie, ìkwán i shi he akwu akie. Kìndē ’i shī dim likwu itang ken lè likwu ikwan ken gbangg. Ki shī dim abia lè bikwukwan puu. ⁸ Udengell Unim angwu lefee a gwee uma, mi ndè ’iwom ’isuso i mung ba, ’i dyam ná ukwell, kì yii mor ’ìndē gedi-gedi-gedi, be tye he umbwo ukaandi. Imbwo or, likwu ken lè he akwu akie li bel fel anung-anung borr. ⁹ Biwom puu abi bì yi he umbwo or, likwu ken lè he akwu akie li hwō. Binong lishor or, likwu ken lè he akwu akie li ban. ¹⁰ Udengell Unim angwu lekie a gwee uma usom. Ukpen ukaandi angwu u᷆ paa bìndē gem-gem-gem a mbu lè he ’usi be mbu he likwu umbwo ken lè he akwu akie, lè likwu lishi umbwo ken lè he akwu akie. A be mbu há kpuuwaa paa bìndē gemm. ¹¹ Lizen ukpen ana lì yi le Bezu. Likwu umbwo ken lè he akwu akie li fel zwa. Bendi gbamm be ngwo-e hwō. ¹² Udengell Unim angwu lende a gwee uma usom. Likwu ken lè he akwu akie angi libwee or, kufell or, ikpen or, li fel bin shorr. Likwu ken lè he akwu akie angi liti or, kusu or, li gye ’ifufebb kpenn. ¹³ Mi hà ndè agamafe u ndo há he ’usi lè ’ùkye᷅ he ungwu, u kong fem he igye le: "Wò’o᷆! Wò’o᷆! Wò’o᷆! Kibibi ’i ba iba! Kì yi beshi-beshi kè bendi abe be᷆ be kwu hen igye nyong idengell Unim angi i teng ikie ı᷆ gwee ibell isom."

¹ Udengell Unim angwu ledyong a gwee uma usom. Mi ndè ukpen angwu a ma mbu lè he ’usi be he itang. Be kung ukukol ke-e le ù buu ungwu lishi ’ubell angwu ’ù yi lè likel ye. ² A kung ukukol buu lishi ’ubell ana. Angyu a dim be lè há kwun-kwun-kwun ná a᷆ dim nyong ūkōr u᷆ shī ’ìndē. Angyu ana a shī libwee kpemm, kifufebb ’i kung gye kpenn. ³ Igwom i fem lè há angyu, i shul be kpe mbee igye puu. Be ke ngi bezu abe bè yi ná àbe īnòng. ⁴ Be ke ngi ikeb le ì shì abia or, ìkwán or, bikwukwan or, he igye i ’iwom ye. Ukpor ì kee-kee shì bendi abe bè yi lè ūfee᷅ Unim he ’ushu ’ubell ye befe-befe a ’iwom. ⁵ Be ke ngi ikeb le ì teb lè bendi abena afell adyong, ukpor ì gwu ābe ye. Kutor ahwu ı᷆ be lè hwu ke be ’ù yi ’itaa ken ha ahwu īnòng. ⁶ Nya he afell adyong ana, bendi ana be ba tan lè abee kee lihwu le hè be bè waa ’inde, ukpor lihwu li ba gwa ābe ye. ⁷ Igwom imen ana ì yi ná bekaa-inyia abe be kam ’ukye nà, i shī ’iwom he lishi ná ’ishilishi usu ashi be kung igold a shi, i shi lè beshu ná bendigye. ⁸ Igil ángi i wee ná angi bengingye. Ishang ángi i nyin ná angi begaba. ⁹ I shī ’iwom he ’akem ashi be kung ’índe᷆ a shì. Abebaa ángi a bua ná ateng bekaa-inyia nyong be᷆ su lè utrok gye ’ukye. ¹⁰ I shi lè itell angi ı᷆ tung ná ìnòng. Itell ángi ì yi lè bezu abe be᷆ be lè ’utor ke bendi abena he afell adyong. ¹¹ Undi angwu ù yi usu igwom ana na᷅ u᷆ ndè gbe lè ’ubell ahwu ’ù yi lè likel ye. He igie Ihibru, lizen lima lì yi le Abadon. He igie Igrik, lizen lima li shi le Aporliyon, ashi ’i ze le, Ùbān-ipi. ¹² Ukpi-ikwu ’ingie ’ibibi na᷅ ’ì yi ana, bingie bibibi bi teng bifee abi bi ndo be. ¹³ Ashina ’i gbe, udengell Unim angwu ledyong-ken a gwee uma usom. Mi gyo igie lè he ’udyan ’iteng ashangale Unim ashi be kung igold a shì āshi, ki shi naa he ’ushu Unim. ¹⁴ Igie ana i de udengell Unim ledyong-ken angwu a ma kwu usom le: "Pell idengell inde angi be kwu tyuu gwaa lè umbwo ukaandi angwu be᷆ ko le Uyufretis ana tyang abwo." ¹⁵ Idengell inde ana, be ma kwu āngi tyuu nyong lize anyin, he i ’ufell ahwun, he i liti anyin, he i ’unyong ahwun a. Be hà pell āngi tyang abwo le ì gwu undi ken lè he bendi bekie-bekie-bekie he igye puu. ¹⁶ Be be lè ishogya i go ’ugii kangg, ì yi asisilisi asisilisi. ¹⁷ Mi ndè bekaa-inyia aben lè bendi abe be pwom ābe. Be shī bíndē he ’akem, bì yi ùnìm angwu a bung gbuu ná ’ìndē, u shi ukwun-ukwun, u shi aligem-aligem. Àshī bekaa-inyia ana a bi àngi begaba. Kìndē lè angyu lè ’inung ubi bi bé bē lè he ungwu. ¹⁸ Biwom bedye bikie ana, kìndē, angyu lè ’inung ubi, bi ma gwu undi ken lè he bendi bekie-bekie-bekie he igye puu. ¹⁹ Bekaa-inyia bè yi lè ikeb he ingwu ibell lè itell ibell. Itell ábe i shi lè àshī ná ìshiı᷅ hè ngi ì do bendi. ²⁰ Mà na or, kigem bendi abe be teng àbe biwom bedye ana bi gwu ābe ye, be tyang abwo lè afele biwom abi be kung abwo abell shi ana ye, biwom ná litelakpa angi be᷆ kung igold, isiliba, upii àkór lè ’ikwán shì, bi nda or, ngwu bì gyo or, ngwu bì tan or ye. Be fa baa Usetan lè ikem. ²¹ Be tyang abwo lè bendi agwele lè isi ibibi ashele, lè akpela atanale lè ’azi aze᷅le ye.

¹ Mi mbee ndè udengell Unim ususo angwu ù yi lè ikeb kangg, u shul ba lè he lifung-atabe. Kibu ’i shi-e he inyiahwo, u shi lè umia nii fe-e he lishi. Kushu ’uma ’u taa ná libwee, abee ama à yi lè ’ìndē ná ’ishinde. ² U shi lè ’anwaa ’ushia buu kwu he ’ubwo. A be naa tem ’ubee lizen he lishor, u tem àhwu limbell he igye. ³ A kung lingmam gaa li fem ná angi ’ugaba. Nyong a gaa, ìtaà i tye ’ugbe adyong-ifee. ⁴ Nyong i tye, mi kung mı᷆ fee àshī mi ndè, mi gyo lingmam lè he lifung-atabe, li de le: "Ndyell àshī ìtaà i kong, fee āshī ye." ⁵ Udengell Unim angwu mi ndè a naa tem ’ubee ken he lishor, u tem àhwu ken he igye ana, a kung ’ubwo lizen tyung gye he ’usi, ⁶ kung tam le: "He lizen Unim angwu ù yi ngyor igye, angwu a shi lifung-atabe lè abi bì yi há, u shi itang lè abi bì yi hen, lè imbwo lè abi bì yi há, lì tem ban ’unyong ye. ⁷ Nyong udengell Unim ledyong-ifee u᷆ gwee uma usom na᷅ Unim u᷆ be shì biwom puu abi leěti a ma kam ndor le u ba sha nya a na a ma de abe be᷆ fe-e, be tye ugie ’isom ’ima." ⁸ Igie angi í yi bè kong ha ami lè he lifung-atabe, i mbee kong ha ami de-m le: "Te lè kpē ’ushia ahwu udengell Unim angwu a naa tem ’ubee ken he lishor, u tem àhwu ken he igye a buu kwu he ’ubwo ana." ⁹ Mi bo lè hwaa lè he, mi de-e le ù kung ’anwaa ’ushia ana ke-m. A de-m le: "Kpe hwu zī. Ku ba ban-a he lifung, mà na ’u᷆ be nyin-a he ungwu ná ìhwaà or." ¹⁰ Mi hà ndaa ’ubwo kpē ’anwaa ’ushia ana lè ha ahe kung fe he ungwu. Nyong mi zī, ku nyin mi he ungwu ná ìhwaà, ukpor nyong mi mbell āhwu, ku ban mi he lifung kangg. ¹¹ Mi gyo igie i kong de le: "Gye ’ushu tye ugie ’isom Unim gbe lè bendi he abong atyetye-atyetye abe be᷆ kong igie atyetye-atyetye lè besu bebell."

¹ Nyong ashin ’i mbee, undi a kung ùkwán angwu be᷆ keè biwom ke-m, a de-m le: "Bo lè keè ushom Unim, wo keè ’iteng ashi be᷆ shang Unim. Wò bo bendi abe be᷆ fe Unim nya. ² Ukpor utemkung ushom Unim, tyang he, keě he ye, likorye ù yi ke bendi abe be᷆ fe Unim ye a, be ba tem abee ban ushu angwu ushom Unim ù yi, be tem ban he he afell asi afee lè ngi afee. ³ Mi ba som bendi befee hè be bè tye ugie ’isom Unim ati asi adyong ’ugbe lihwo lè ’ugbe ’afee lè ati asi akie. Be fa bihwom akpen a." ⁴ Bendi befee ana bè yi ’itaa ken ha ìkwán ifee angi be᷆ ko le olif lè bimor-inde bifee. Ìkwán ana lè bimor-inde bì yi naa he ’ushu Unim angwu ù yi lè igye puu. ⁵ Gbe undi uyang-yang a kaà le u do bendi befee ana, kìndē ’i ba lè he ingwu ibell sha᷆ gwa bendi-linaa bebell. Kitaa ana na᷅ undi angwu a kaà le u do ābe, u᷆ hwō. ⁶ Nya he ’unyong ahwu abe be᷆ bun ’isom Unim ana bè yi lè ikeb angi be᷆ swan de umbwo le ù ndor ye, u ndor ye. Be shi lè ikeb angi be᷆ shì imbwo puu he igye i i bel fel ibwaa-ibwaa ná anung. Be mbee shi lè ikeb angi be᷆ be lè ’itaa língmām ’iyang-yang he igye i he ’unyong ahwu be kee. ⁷ Nyong ’unyong ahwu be᷆ bun ’isom Unim ana ’u mbee, kibibi inyia ’i ba fem lè he ’ubell ahwu ’ù yi lè likel ye, ki ndo ha abe, ki hwò ābe, kwu ābe gwu. ⁸ Akwom abell a ba ngyor wa he ’ukwo nya he ’ubong ’ukaandi ahwu be ma maa gwu atyabell bee he ’ikpakpaa. Kìnyìn lízen ’ubong ’ukaandi ana, kì yi le Usodem lè Igyept. ⁹ Bendi abe be᷆ be lè he ’ikwu-lihwan ’iyang-yang, mbee igegem puu he igye i, abe be᷆ kong igie atyetye-atyetye, be ba nda akwom abell ati akie lè ’igem, be ba bong le bè ngi ābe ye. ¹⁰ Bendi abe bè yi ke igye anyin a, be ba yal gor, be shi ’ipam, be ke bende beke, likorye bendi befee abe be᷆ tye ugie ’isom Unim, abe be maa teb lè be, be hwō. ¹¹ Nyong ati akie lè ’igem ana a mbee, Unim a dim ’unyong ahwu ’u᷆ ke likpan fe be, be wum, be bo ’inaa. Bendi puu abe be ndè be, ’ushell ’u kwu ābe kangg. ¹² Bendi bemen befee ana, be gyo igie angi i be lè he lifung-atabe, i kong fem he igye kangg de be le: "Mà be he ’usi nyin!" He atong-shi bendi-linaa bebell puu, kibu ’i be shī ābe, be bo ndo he ’usi lifung-atabe. ¹³ Nya he ’unyong ’umen ana, itang i ma nyung he abwo kangg, likwu ken lè he akwu lihwo he ’ubong ’ukaandi ana li ma gyebb. Bendi asi adyong ’ugbe lihwo he biteng bidyong-ifee be ma hwō. Bendi abe be teng be ma fel lè ’ushell kangg, be keb anung he itang fe Unim angwu he lifung-atabe. ¹⁴ Kanaa-anaa i ’ingie ’ibibi ashi lefee ’i mbee, kingie ’ibibi ashi lekie ’i ba lè há. ¹⁵ Ashina ’i mbee-mbee, mi hà ndè udengell Unim angwu ledyong-ifee a gwee uma usom. Mi gyo angmam lè he lifung-atabe a gaa kangg kong le: "Atyetyan Unim befe lè Ukristi angwu a som be he igye anyin, be kpe kung ’usu igye anyin. Ufe na᷅ a fel Usu ngyor igye kpam-kpam-kpam." ¹⁶ Bekaandi lisi lè be bende abe be kwu he bidem ’usu bibell he ’ushu Unim, be keb lè ’ushu ’ubell kpi he itang fe Unim. ¹⁷ Be de le: "Wo Atyetyan Unim, ikeb puu ì yi he ’ubwo ’ugang a, wò yi kung lè há linde, wo shi ’unyin i! Li pee-a likorye wo tem lè ikeb igang angi i hwò puu kpe kung tem fel usu. ¹⁸ Bendi abe be᷆ fa-a ye, be maā gbel fa-a, Ukpor ’ùnyong ’u fel ahwu, wo Unim or, wo ngywo fe be, wo mbee tang ushe bebell abe be hwō. Kunyong ’u fel ahwu wo gwu nim ūbū bendi abe be᷆ ban igye. Kunyong ’u mbee fel ahwu wo᷆ shi ’inunung ha abe be᷆ tye ugie ’isom ’igang lè bendi begang puu abe be᷆ shell-a, be fa-a, mà abe gbel or, abe ’isun or." ¹⁹ Lìshì ushom Unim he lifung-atabe li ma buu, mi ndè Kakpa Ukyebb Unim ha afee ushom. Kindeb-nwaa ’i fel ndeb nwaa-nwaa-nwaa, itaa i tye gbang-gbang-gbang, itang i nyung ti-ti-ti, abo umbwo akaandi a wu kputu-kputu-kputu.

¹ Mi hà ndè ’ikaa ’iwom ’i fem há he lifung-atabe. Mi ndè ungingye ususo a shī libwee ùkyèkyè aliga, u shì naa he ’ufell, u shī ikpen lihwo lè ngi ifee he líshī ukyekye ’ishilishi ahwe᷅le. ² A maa sha uzwaa, u ki kangg likorye uzwaa u tor he. ³ Mi mbee ndè ’ikaa ’iwom ’isuso ’i mbee fem há he lifung-atabe. Mi ndè ’ibibi ushii ’ibwaa-ibwaa, kì yi ’ushell-ushell. Kì shi lè àshī adyong-ifee, ki mbi isom lihwo, ki shī ’ishilishi usu he líshī liyang-yang. ⁴ Ki kung utell áshi nyii likwu ikpen ken lè he akwu akie há he lifung-atabe wu be he igye. Ùshiı᷅ ana a bel lè naa he ’ushu ungingye angwu u᷆ shi uzwaa ana, kwu u nyong le ù hwan he-e ù kung unwaa mbell. ⁵ Ungingye ana a kung unwaa ungikye hwan, angwu ù fel usu igegem puu he igye i, u kwa utyuu usu he ’ubwo angwu be kung ’índe᷆ a shi-e, teng igye puu he ikeb-ikeb. Nyong unwaa ana a shul-shul, be tim kung he buu lè he lè hwaa lè Unim he ’ipi a kwu he ’idem ’usu ’ima. ⁶ Angwu ungingye a tie bo ’inaa buu gye he ’igbaa-libeb. Nya na᷅ Unim a kam ’iteng ndor he, he ’ipi be᷆ ndè gbe lè he ati asi adyong ’ugbe lihwo lè ’ugbe ’afee lè ati asi akie. ⁷ Kùkyē ’u hà kung be᷆b há he lifung-atabe. Umaikell, usu idengell Unim, lè idengell Unim angi i teng i ndo ha ùshiı᷅ ana. Ùshiı᷅ lè ima idengell be ndo ha baà Umaikell, ⁸ ukpor baà Umaikell be ma hwò ābe. Be tem bong ùshiı᷅ ana lè ’ubwo bendi bema le bè gye ’ushu kwu há lifung-atabe ye. ⁹ Be ma kwu ābe nyii lè há lifung-atabe gin be hen igye. Ùshiı᷅ ubibi ubwaa-ubwaa ana na᷅ ù yi ùshiı᷅ utim angwu lizen lima lì yi le Usetan, usu bibibi puu. Ufe na᷅ a lam igye puu. ¹⁰ Mi kung gyo lingmam lè he lifung-atabe, li gaa kangg de le: "Unim utyan a hwò ’ukye! Bendi puu be fel nda ikeb Kusu ’uma, be ndè ikeb Ujeso Ukristi angwu Unim a som. Usetan angwu leěti a maa naa he ’ushu Unim ishu or, kusu or, bun de Unim biban bebwandatyan, be nyii he lè hen tye gye he igye. ¹¹ Gbe he anung Unwaa Utia lè ’isom Ujeso ashi be bun na᷅ be hwo-e. Be ma kam le lihwu or, be hwa᷆ he ’uhwo ashi. ¹² Igor ì kwu he lifung-atabe, men abe mà yi há, mà yal gor lè ububo he ungwu! Ukpor igye lè imbwo, ayuo! Beshi-beshi lè men, likorye Usetan a fel ha amen há. Ù yi lè ingywo kangg likorye a ngye le ’unyong ’uma ’u teng zangg a." ¹³ Nyong ushii ana a ndè le be ndó he lè he lifung-atabe tyang be he igye, a keb u fel ndeb lè ungingye angwu a ma hwan unwaa ungikye ana. ¹⁴ Ukpor be ma ke ungingye ana abebaa agamafe ukaandi afee he-e ù ndo hwaā ùshiı᷅ ana gye he ’iteng ’ima he ’igbaa-libeb, he ’ipi be᷆ lè ndè gbe lè he aze akie lè afell adyong-ken. ¹⁵ Ùshiı᷅ ana a faā umbwo kangg wu pwom he lè he item le hè umbwo ù ko kung he. ¹⁶ Ukpor itang i kpe ungingye ana tyang, i ging uhwuu kpē kung umbwo angwu ùshiı᷅ a faa fe gye he itang. ¹⁷ He ashina, ùshiı᷅ a ma fel lè ingywo fe ungingye ana kangg, a mà bo u la ndo ’ukye ha igia ima angi i teng, angi ì yi bendi abe be᷆ shi igie Unim, be kpē ashi Ujeso a de be. ¹⁸ Ùshiı᷅ ana a lè naa he ungwu lishor.

¹ Ashina ’i gbe, mi hà ndè ’ibibi inyia, kì yi ’ushell-ushell, ki fem ba lè he umbwo ukaandi. Kì yi lè àshī adyong-ifee, ki mbi isom lihwo. Ki shī ’ishilishi usu he usom uyang-yang, be fee lizen ibia angi lı᷆ bia Unim fe shi he líshī liyang-yang. ² Inyia ana i bi ùkpòng, abee ángi a dyam ná angi inyia angi be᷆ ko le ubeya, ungwu ángi u shi ná angwu ’ugaba. Ùshiı᷅ ana a kung ’usu ’uma lè ikeb ima ná angi ufe-gyang ù yi lè ngi ke inyia imen ana. ³ Inyia ana, be nem āngi he líshī ken, ki go kangg fel ná i la hwa᷆ or, ukpor ’i tem bi. Ki ma kwu bendi he igye i puu he ’uhwo gbe lè inyia ana, be ti kwuo pwom āngi. ⁴ Bendi puu be ma fe ùshiı᷅ or, likorye a ke inyia ana ikeb ima, be fēm inyia kong le: "Ayang a dyam bizang ha inyia anyin? Ayang ù nya mbe lityam naa ndo ha angi?" ⁵ Be ma ke ngi ikeb porr le ì kong ’ugwu, i kong bia Unim; be mbee ke ngi ikeb porr le ì zī ’usu afell asi afee lè ngi afee. ⁶ Inyia ana i keb i kong bia Unim, i bia lizen lima, i bia ushu uma, i bia bendi puu abe bè yi há lifung-atabe. ⁷ Be ma mbee ke ngi ikeb le ì ndo ’ukye ha bendi Unim, i hwò ābe. Be ke ngi ikeb le ì fel usu ugugem uyang-yang, kubong ’uyang-yang lè igie iyang-yang he igye i. ⁸ Bendi puu abe bè yi he igye i be ba fa inyia ana, kee-kee teng àbe leěti be ma fee azen abell fe he ’ushia Unwaa Utia angwu be ma gwu. Leěti, mà ukpong Unim u hà shì igye anyin, be ma fee azen abell fe he ’ushia azen bendi abe bè yi lè likpan ’unyong. ⁹ "Undi angwu ù yi lè ’utyung ’igyo, ù gyo igie anyin! ¹⁰ Undi angwu ’i fee ndor he le ù fel hē līfee, u ba kwa hē līfee kpe-kpe-kpe. Undi angwu ’i fee ndor he le u ba hwa᷆ he ’ashwia a, u ba hwa᷆ nya ’ashwia kpe-kpe-kpe. Kì yi le bendi Unim bè ngyor naa genn, be gye ’ushu fe lityam ha Unim." ¹¹ Mi mbee ndè ’ibibi inyia ’isuso, ki fem be lè he itang. Ki mbi isom ifee ná unwaa utia, ki kong igie ife ná angi ushiı᷅ ana. ¹² Ki kung ikeb àngi ukpi-ikwu inyia, shì biwom he ashi ukpi-ikwu inyia, ki shì igye puu lè bendi abe bè yi hen be fe ukpi-ikwu inyia angi be nèm ’i go kangg, ukpor ’i bi ana. ¹³ Ki shì bikwele-uhwo gbamm, ki shi ’ìndē or ’i be lè he lifung-atabe be he itang he ashi bendi. ¹⁴ Gbe he bikwele-uhwo abi be ma ke inyia ana ikeb le ì shì he ashi ukpi-ikwu inyia, i lam bendi puu abe bè yi he igye i. I de be le bè shì ’atelakpa ná ukpi-ikwu inyia angi be ma kpi nem āngi he líshī, ukpor ì so iwum ana. ¹⁵ Be ma mbee ke ngi ikeb le ì shì ’atelakpa ana ’à dim ’unyong le hè ke ’à fel kong likong mbee. Be mbee bong āke le ’à ke ikeb le bè gwu bendi puu abe be bong fe ’atelakpa ana ye. ¹⁶ I som bendi le bè lè fe bendi ūfee᷅. Gbe be fé be he ’ubwo lizen a ye, bè fé be he ’ushu. Be fe bekaandi or, bebwani or, bendi-ingbebb or, bendi-likaa or, ifee or, bebwaa or. ¹⁷ Undi uyang-yang angwu a bong fe ūfee᷅ ana ye, be bong he ù ndyebb ’iwom or, ngwu ù ndyebb zi or ye. Ūfee᷅ ana ù yi lizen, u shi ubo ukpi-ikwu inyia. ¹⁸ Kì yi le bendi bè ngye ’ikwu ashin. Undi uyang-yang angwu a bi lishi, u ngya likpe ubo ukpi-ikwu inyia. Ubo ana a naa ke undigye a, ù yi le, asi adyong ’ugbe ’adyong-ken lè lihwo ’ugbe ’adyong-ken lè ’adyong-ken (666).

¹ Nyong ashin ’i gbe, mi ndè ’iwom ’isuso. Mi ndè Unwaa Utia ù yi naa he ukwell Uzayon. Mi ndè bendi puu abe be fee lizen lima lè angi Atyam fe be he ’ushu naa ipel ha ahe há. Bè yi asi lisi ’ugbe lisi lè ’ugbe lihwo he biteng lihwo ’afee. ² Mi gyo ’ugyam lè he lifung-atabe ’u kwom ’ihwee ná ’ipuupuu umbwo, ku nem ateng ná ìtaà, ku nyin he ’utyung ná litung. ³ Bendi abena bè yi naa he ’ushu ’idem ’usu Unim, lè biwom binde abi bì yi biwum lè bekaandi lisi lè be bende, be gyam ’ugyam ’ufufe. Kì yi lè undi angwu u᷆ hwua ngye ’ugyam ’umen ana ye, kee-kee kwom ha abe asi lisi ’ugbe lisi lè ’ugbe lihwo he biteng lihwo ’afee, abe Unwaa Utia a pong. ⁴ Be kee-kee pwom Unwaa Utia ana ufe-ufe a, be wa gbe ipel ha undi ngye ye. Be tan utung ha Unwaa Utia gya he ’iteng ’iyang-yang ashi u᷆ gye. Aben na᷅ Unwaa Utia a pong, u shi ābe be fel ta-ta ke Unim lè ’uhwo-ma. ⁵ Kì yi lè uman he ungwu ubell ye, bè yi faale uben. ⁶ Mi hà mbee ndè udengell Unim ususo u ndo ha ’usi. U bun ’isom ’inunung Unim ashi ı᷆ ngyor igye da abong ayang-yang, bikwu-lihwan biyang-yang, igie iyang-yang, lè bendi beyang-yang he igye i. ⁷ U bun fem he igye gboo de le: "Mà shell Unim, ma pee he, likorye ’unyong ahwu u᷆ tang bendi ushe ’u fel. He ashin mà fe Unim angwu a shi lifung-atabe lè itang lè imbwo lè àshī imbwo." ⁸ Udengell Unim angwu lefee a be, u kong le: "Ubabilon, kubong ’ukaandi ’u mbu, kima ’i mbee. Ku teng bendi puu gye he ibwom atanale akpela utung ha ’uhwo-bell." ⁹ Udengell Unim angwu lekie a be, u kong fem he igye gboo le: "Undi uyang-yang angwu a fē inyia, lè ’atelakpa ’ama, u bong be fe-e ūfee᷅ inyia ana, mà he ’ushu or, mà he ’ubwo or, ¹⁰ ingywo Unim angi ı᷆ shī i ba hwaa lè he. Kingie ashi u᷆ kpē ’i kwa ’ikaa-ikaa ná ’utyuo ahwu ’ukaa-ukaa, u kpa āshi kpe-kpe-kpe, u hwaa āshi ye. Be ba kung ’ìndē lè ubi ka he ’ingie he ’ushu idengell Unim lè Unwaa Utia uma. ¹¹ Angyu ’inde ashi be᷆ ke he ’ingie a ngyor ngib kpamm ngyor igye. Kitaa ana na᷅ bendi abe be fē inyia lè ’atelakpa ’ama, be bong fē ūfee᷅ lizen lima, be᷆ be kwu lè ’ùnyōng ’ūnyōng ashwele ye, ishu or, kusu or." ¹² Kì yi le bendi Unim bè ngyor naa genn, be ndor iten ima, be bong ha Ujeso. ¹³ Mi gyo igie lè he lifung-atabe i de le: "Fee ashin, kung lè he liti angi ’unyin gye ’ushu, bendi puu abe be fel hwō le bwo be bong ha Atyetyan Ujeso, ki kwun ābe he ’uhwo." Ukatia Kunyong Unim a bong, u de le: "Kì yi ná, ki kwun ābe he ’uhwo, likorye aki akaandi abell a mbee. Ki fel le bè sho ’unyong. Be kpē ’uke he biwom abi be shì." ¹⁴ Ashin ’i gbe, mi kung ndè ’ibu ’ifung. Kiwom ashi ’i kwu nya he ’ibu ’i bi undigye. Ki shī ’ishilishi usu ashi be kung igold a shì āshi, ki shì lè ’andi bikwukwan atamale ake ’a᷆ nyin kwu he ’ubwo. ¹⁵ Udengell Unim ususo a hà fem be lè he ushom Unim, a ko de undi angwu a kwu he ’ibu le: "Bikwukwan bi bi, kùnyong ’u fel ahwu be᷆ tam ābi, kung ’andi ’agang ndo lè tam ābi." ¹⁶ He ashin a kung ’andi ’ama mbu há igye. A tam bikwukwan puu he igye. ¹⁷ Mi mbee ndè udengell Unim ususo a fem be lè he ushom Unim he lifung-atabe. Ufe or ù yi lè ’andi bikwukwan atamale ake ’a᷆ nyin. ¹⁸ Udengell Unim angwu u᷆ ndè gbe lè ’ìndē he ’imbe ashi be᷆ shang Unim, a fem be lè nya, u ko da angwu a kwu ’andi bikwukwan atamale le: "Ndè, ìkwán angi ı᷆ wum agbe angi be᷆ ko le igrep i bung. Kung ’andi ’agang ndo lè kpi tang āngi he angyo-angyo, wo gbong āngi." ¹⁹ He ashin udengell Unim ana a mà kung ’andi ’ama mbu he igye keb āngi ashebbale tang, u kwuo āngi lè fe he ’ania he ’ipi be᷆ shor shwie kung udung. Kania ana ’à yi he igye a; kà yi he ’ubong Unim a ye. Kania ana ’a naa ke ingywo Unim a. Be shor agbe ikwan ana nya he ’ania, anung a ko lè há gbung-gbung-gbung ná bekuko umbwo, a sho be he ’usi abee adyong, a ko lè wu ilamba asi lihwo.

¹ Mi hà mbee ndè ’iwom ’isuso hen ’usi ’i kwu he ’uhwo, kì yi lè ’itaa be᷆ kong ye. Mi ndè idengell Unim idyong-ifee i be lè bingie bibibi bidyong-ifee. Bingie bibibi abin na᷅ bì yi umbee-likel ingywo Unim. ² Mi kung ndè ’iwom ná ’idyeshor tyung. Kì yi ná be kung ’inde-ushu a shì āshī, ki shi bell-bell pel ha ’índe᷆. Bendi abe be hwò inyia ana, be hwò inyia ana, be hwò ’atelakpa ángi, be hwò ubo ángi, be ma yi naa gwaa nya he umbwo, be shi lè atung angi Unim a ke be kwu he abwo. ³ Be gyam ’ugyam Umosis angwu a shi aki Unim lè ahwu Unwaa Utia, be gyam le: "Wo Atyetyan Unim, ikeb igang i hwò puu! Biwom abi wo shi bi dyam, bi kwu he ’uhwo! Wo na᷅ wò yi Usu abong puu he igye i. Biwom abi wo shi bì yi ’igyang, wo tang ushe he bilebale ye. ⁴ Atyetyan, ayang ù nya shell-a ye? Ayang ù nya fem-a ye? Wo-wo na᷅ wò kee-kee yi Unim. Bendi abong puu be ba fa-a, likorye be ndè le wo shi biwom puu bì yi faale ungwu atimale." ⁵ Nyong ashina ’i gbe, mi ndè ’iteng he lifung-atabe ashi ’ì yi ta-ta ke Unim he ’ubuu ahwu ’u᷆ tyung le Unim ù yi nya. Kiteng ’imen ana ’i buu, ⁶ idengell Unim idyong-ifee angi ì yi lè bingie bibibi bidyong-ifee i fem be he igye. I shī bihwom bifung abi bı᷆ taa, i shi lè ikwob angi be shì āngi lè igold bua he anyong. ⁷ Kiwom ken lè he biwom binde abi bì yi biwum, ki be lè ikem-undor idyong-ifee angi be shi āngi lè igold, be ke idengell Unim idyong-ifee. Ukem-undor uyang-yang u shi sho lè ingywo Unim angwu ù yi ngyor igye kpamm. ⁸ Ifem Unim lè ikeb ima bi sho nya he ’ipi Unim ù yi ná angyu. Undi a maa gya há afee mbee ye, kpamm bingie bibibi abi idengell Unim idyong-ifee i maa be lè bi bi gbe shi.

¹ Nyong ashina ’i mbee, mi kung gyo lingmam lè he ’ipi Unim ù yi, li kong fem he igye gboo de idengell Unim idyong-ifee le: "Mà ndo lè be᷆l ingywo Unim angi ì yi he ikem-undor idyong-ifee ana wu he igye anyin." ² He ashina, ukpi-ikwu udengell Unim a be᷆l àshī ’ì yi he uma ukem-undor wu be he itang. Bendi puu abe be ma bong fe ūfee᷅ inyia ana lè abe be fe ’atelakpa inyia, bibaa bibibi bi gbel ābe àshì pwob-pwob-pwob. ³ Udengell Unim angwu lefee a hà be᷆l àshī ’ì yi he uma ukem-undor wu he umbwo ukaandi. Nya ’ukwo-ukwo umbwo u be᷆l fel ná anung ūndì angwu a hwō. Biwom biwum abi bì yi he umbwo bi hwō puu. ⁴ Udengell Unim angwu lekie a hà be᷆l àshī ’ì yi he uma ukem-undor wu he imbwo lè àshī imbwo, imbwo puu i be᷆l fel anung-anung. ⁵ Mi gyo udengell Unim angwu u᷆ ndè gbe lè imbwo a de le: "Wo undi angwu wo᷆-wō na᷅ wò kee-kee yi Unim. Wò yi lè há linde, wo shi ’unyin i. Wo tang ushe dell-dell. ⁶ Bendi abe be ma gwu bendi begang wu anung, be gwu a᷆be be maa tye ugie ’isom ’igang wu anung, wo or wo ke be anung le bè ngwo; kingie ashin ’i keè nya." ⁷ Mi kung gyo igie lè he ’imbe ashi be᷆ shang Unim i bong de le: "Eng-heng! Wo Atyetyan Unim, wò yi lè ikeb hwò puu. Wo tang ushe he ’igyang, wo tang liketye ye." ⁸ Udengell Unim angwu lende a hà be᷆l àshī ’ì yi he uma ukem-undor wu he libwee. Be ke libwee ikeb le lì shī ná ’ìndē, li shī bendi be fel kolo-kolo-kolo. ⁹ Ukpor àshī le bè tyang abwo lè bibibi ashele kung ipee ke Unim, be tem fel kong bia he ufe angwu bingie bibibi abina bì yi he ’ubwo ’uma. ¹⁰ Udengell Unim angwu ledyong a hà be᷆l àshī ’ì yi he uma ukem-undor wu he ’idem ’usu inyia ana. Kifufebb ’i ma gye a kpenn kpe mbee ’iteng ashi inyia ì yi usu ana puu. Kutor ’u tor ābe, be naa lè ishang ngmam lìbe᷆ll líbēll. ¹¹ Ukpor àshī le bè tyang abwo lè bibibi ashele, be tem fel kong bia Unim angwu há lifung-atabe he ’uhwo bingie lè bibaa abi bı᷆ tor ābe. ¹² Udengell Unim angwu ledyong-ken a hà be᷆l àshī ’ì yi he uma ukem-undor wu he umbwo ukaandi angwu be᷆ ko le Uyufretis. Nya ’ukwo-ukwo umbwo a nyung gogololoo, le hè ’ukwo ’ù buu ndor besu abe be᷆ be lè he ’igie ashi libwee lı᷆ fem. ¹³ Mi kung ndè ikeb ibibi ikie angi i bi bishor. I fem ba lè he ungwu ūshiı᷅ ana, i be lè he ungwu inyia ibibi ana, i be lè he ungwu undi-uman angwu u᷆ kung ’uhwo-ma le u tya ugie ’isom Unim. ¹⁴ Ikeb ibibi ikie ana ì yi idengell Usetan a, i shi bikwele-uhwo. I bo gye mbee igegem puu he igye i hè ngi ì lè gbong besu igye ukem kwu nyong ’ukye he Liti likaandi angi Unim ikeb puu u᷆ be tyung ikeb ima. ¹⁵ Ujeso a de le: "Mà gyo! Mi tya imbul ba nya a na uzi a. Ki ba kwa ’inunung ka bendi abe be kam kwu be᷆ kang, be kam aliga abell a nim ye, hè be bè be tan libong ye, ishwia or i be shi ābe ye." ¹⁶ Ikeb ibibi ikie ana i gbong besu he igye i puu ukem he ’iteng ashi be᷆ ko he igie Ihibru le Amagedon. ¹⁷ Udengell Unim angwu ledyong-ifee a hà be᷆l àshī ’ì yi he uma ukem-undor wu he ’ufem. Mi kung gyo lingmam li gaa lè he ’idem ’usu Unim he ushom Unim de le: "Ki mbee!" ¹⁸ Kindeb-nwaa ’i ndeb, ìtaà i tye, itang i nyung he abwo kangg. Bwo undigye a fem, i bè nyung àshi ’ibibi-ibibi ’itaa ana ye. ¹⁹ Kubong ’ukaandi ahwuna, uhwuu a ma ging tang āhwu he akwu akie. Abong puu he igye i a paa. He ’ukwo ahwun na᷅ Unim a ma well ’ubong ’ukaandi ahwu be᷆ ko le Ubabilon, u shì āhwu ’u ngye ingywo ima mbee akekel ángi puu. A shì āhwu ’u kpē mbee ’ingie ’ikaa-ikaa ana nya a na be᷆ kwu undi u᷆ ngwo mbee ugbaala ’utyuo ’ukaa-ukaa a. ²⁰ Itang puu angi umbwo a kaa āngi fe he ’udyan, mbee lè ikwell puu bi nyòng. ²¹ Abo umbwo akaandi a be lè he lifung-atabe ti kpe bendi shī he itang. Libo umbwo liyang-yang li ngbe᷆bb ná igaa bendo ifee. Bendi be kong bia Unim he ’uhwo bingie bibibi abi abo umbwo a be lè bi ke be.

¹ Ashin ’i mbee gbe, mi hà mbee ndè udengell Unim ken lè he liwu idengell Unim idyong-ifee angi i ma yi lè ikem-undor idyong-ifee, a be de-m le: "Be, mî tyung-a ná usu akpela ana u᷆ be kpē ’ingie, ufe a naa ke ’ubong ahwu be tye gwaa ha umbwo ukaandi. ² Besu igye anyin be gbe ipel ha ahe, bendi abe bè yi ke igye anyin or be fel he ibwom akpela atanale ná bendi abe ’utyuo ’u᷆ bwom ābe." ³ Ukatia Kunyong Unim a hà be shí-m kpemm, udengell Unim u kpe-m gbe lè mi he ’igbaa-libeb. Nya na᷅ mi ndè ungingye kwu he item inyia angi ì yi ibwaa-ibwaa gbuu. Inyia ana, be fee azen abibi angi a᷆ bia Unim fe ngi mbee inyiahwo puu. Ì yi lè àshī adyong-ifee, i mbi isom lihwo. ⁴ Angwu ungingye ufe, a bwee idem kangg, u fe ’ihwom ’ibwaa ashi ùnìm áshi u᷆ taa, u fe biwell-atyung lè inwaa-ashor umbell abi be kung igold a shì, u fe ukpana he umbell, u kwu ugbaala he ’ubwo angwu be shi-e he igold. Ugbaala ana, biwom abi bi sho há bì yi abel-abel. ⁵ Be fee ’ìnyìn lízen fe-e he ’ushu, lì yi le: "Ubabilon ’ubong ’ukaandi, usu akpela lè usu biwom bibibi puu he igye i." ⁶ Mi ndè ungingye ana u ngwa anung bendi Unim, mbee-mbee lè angi bendi abe be hwō he ’uhwo Ujeso. A ngwo āngi kpamm fel he ibwom. Nyong mi nde-e, ki kwu-m he ’uhwo kangg. ⁷ Udengell Unim a kung bii mi le: "Kibang a, ’ı᷆ kwa-a he ’uhwo? Ndor mî da-a ’iwom gbe lè ungingye ana lè inyia ibibi angi i kung he, angi ì yi lè àshī adyong-ifee, i mbi isom lihwo. ⁸ Inyia angi wo ndè ana, i ma yi iwum, ukpor ’unyin i ì tem yi iwum ye. I la ndo fem ba lè he ’ubell ahwu ’ù yi lè likel ye, hè ngi ì gye he ’iteng ashi be mbee lè ngi gbang-gbang. Bendigye abe kung lè há linde nyong Unim a shi igye be ma yi lè azen he ’ushia azen bendi abe bè yi lè likpan ana ye, ki ba kwa ābe he ’uhwo lè inyia ana kangg, likorye leěti i ma yi iwum, kunyin i ì tem yi iwum ye, ukpor i tem ba fem. ⁹ "Ndor mî shì ashin ’ì nung bendi. Àshī adyong-ifee ana a naa ke ikwell idyong-ifee angi ungingye ana ù yi kwu, a mbee naa ke besu bedyong-ifee. ¹⁰ Besu abe bedyong, kusu ’ubell ’u mbee; angwu ledyong-ken ù so usu; angwu ledyong-ifee a wa be ye. Nyong u᷆ be be, kusu ’uma ’u kwa he ’anwaa ’unyong zangg a. ¹¹ Inyia ibibi angi leěti i ma yi iwum, ukpor ì tem yi iwum ye ana, ì yi usu angwu ledyong-ikie, i shi hé líkwu besu bedyong-ifee ana. Undi u ba mbee lè ngi. ¹² "Isom lihwo angi wo ndè, i naa ke besu lihwo abe be wa kwu ābe ’usu ye. Ukpor be ba kwa besu ipel ha inyia ibibi ana he awa ken. ¹³ Besu lihwo aben bè yi ungwu ken, be kung ikeb lè ’usu ’ubell ka inyia ana. ¹⁴ Be ba la ndo ’ukye ha Unwaa Utia, ukpor Utia ana u hwà ābe, likorye ufe ù yi Usu besu, u shi Atyam bekaandi puu. Bendi abe a gia kung, be fe-e lityam ken, be ba kwa lè abwo ipel ha ahe he ahwe᷅le." ¹⁵ Udengell Unim ana a gye ’ushu de-m le: "Umbwo ukaandi angwu wo ndè usu akpela ù yi kwu há ana, a naa ke awu bendi he abong puu, he ugugem uyang-yang he igye i. ¹⁶ Isom lihwo angi wo ndè i naa ke besu lihwo ana, be ba naa ùtén ken ha inyia ana tel usu akpela. Be kpa kung biwom bima tyǎng he abubwo, be pell he tyang uten-ibong, be zī inyia ima, be ting ’ìndē shī ’igem ’ima ashi ’i teng. ¹⁷ Unim na᷅ a shì ābe le bè kwu ungwu ken, be kung ikeb lè ’usu ’ubell ke inyia ana, le hè be bè shi a᷆shi ufe Unim a kam, hè ’ì ngyor ná ufe a kong. ¹⁸ "He ’ukwo ahwun na᷅ ungingye umen wo ndè ana a naa ke ’ubong ’ukaandi ahwu besu igye puu bè yi he ’ubwo ’ubell."

¹ Nyong ashina ’i gbe, mi ndè udengell Unim ususo u shul lè he lifung-atabe ba he itang. Ù yi lè ikeb angi i dyam, u taa kangg le ’i kung he igye i gboo. ² A kung ikeb ima puu gaa kong le: "Wò’o᷆! Wò’o᷆! Ubabilon, kubong ’ukaandi ’u mbu, kima ’i mbee. Ku fel bíshií-bíshií, ku fel ushu ihwutang, ikeb ibibi, bipuuzabung, bikung lè bibibi biwom puu. ³ Bendi abong puu be ngwo ’utyuo ’uma ahwu ’ù yi akpela atanale ipel ha ahe. Besu puu be gbe ipel ha usu akpela umen angwu ù yi ’ubong Ubabilon ana. Bendi-ushi be fel mbu ’ingbebb likorye ù yi lè ’igyor biwom igye kangg." ⁴ Mi mbee gyo igie isuso lè he lifung-atabe i de le: "Men bendi begi, mà buù ungingye ana lè he ’uhwo! Gbe ma shi ná ye, ma gba lè abwo fa he biban bima, ma kpē ’ingie utung ha ahe. ⁵ Le bwo biban bima bi sho ukong-ukong lè wu he lifung-atabe, Unim a naa lityam biban bima ye. ⁶ Bibibi abi a shi bì tem be so-e ufe-gyang he lishi. Bingie abi a be lè bi ke bendi, bì tem so-e ufe-gyang he lishi gbe gyong abi a shi ’ugbe ’afee. Mà ke-e ’utyuo ’ubibi ù ngwo àhwu ’u ban hwò a᷆hwu ufe a maa ke bendi ’ugbe ’afee. ⁷ Nya a na ufe a dyam ’uhwo-ma, u kung àshì ama ndor he bigyor biwom igye, men or mà ke-e ’ingie lè akpen abi bi keè he bibibi bima. He idim u gim he lityam le, ’Mì yi usu a, mì yi ungye-uhwuu a ye, mì hà ndo fa akpen ye.’ ⁸ Ukpor, kutor, kingie, lingmam, ubwaa, abin puu bi ba hwaa lè he nya a liti ken. Kìndē or ’i shá he nya liti limen ana, likorye Atyetyan Unim angwu a tang ushe uma, ù yi lè ikeb kangg." ⁹ Besu igye abe be maa tan ha ahe, be kwu ukem ha ahe zī igye fe he ’uhwo, be ba swa abwo he lishi kya nyong be᷆ ndè angyu ’índe᷆ ashi ’ı᷆ shí-e. ¹⁰ Be fel ba naa ’igbe-igbe, likorye be shell ’ingie ’ima, be de le: "Wò’o᷆, Ubabilon, kubong ’ukaandi, beshi-beshi lè wo, kingie ’i be hwaa lè wo nya a ’ugbe ken." ¹¹ Bendi-ūshī or, be ba swa abwo he lishi kya, be fe akpen, likorye ’ì tem yi lè undi angwu u᷆ ndyebb ābe biwom ye. ¹² Azen biwom ūshī bibell i: igold, isiliba, ukpana, bihwom binunung he īnìm atyetye-atyetye ná ijorge lè ibellbeti lè ilesi lè ishiliki; lè ìkwán inunung ná liswa lè iloko lè eboni; biwom abi be᷆ kung ishang uto lè eboni tan; biwom abi be᷆ kung upii lè bínde᷆ atyetye-atyetye lè ’ukor ’ununung shi; ¹³ behwu abe be᷆ nung nyin ná itelali lè isinamon lè umuru lè ifrankinsens; kutyuo lè behwu azēle, lè ikwul lè umuu ikwul; bigundu, ìtiā, bekaa-inyia, itrok lè ìfeè. Biwom abin puu bi ngyor. Kì tem yi lè undi angwu u᷆ ndyebb ābe ábi ye. ¹⁴ Bendi-ūshī ana be de ’ubong ana le: "Biwom abi wo maa ndor àshì bi mbee; bingbebb lè binunung bigang bi mbee. Wò hà tem ndo nda ābi ye." ¹⁵ Bendi-ūshī bemen ana abe be ndyebb biwom abina zī mbu ’ingbebb, be fel ba naa ’igbe-igbe likorye be shell ’ingie ’ima. Be ba swa abwo he lishi kùng le: ¹⁶ "Wò’o᷆, beshi-beshi lè ’ubong ’ukaandi ana! Kù yi ná ungingye angwu a bwee idem kangg, u fe bihwom binunung abi bifung or, bibwaa or, u fe biwom abi be shì lè igold, u fe ukpana he umbell. ¹⁷ Nya a ’ugbe ken bingbebb bima puu bi mbee!" Bekaandi binong lishor puu, bendi abe be gye litan he binong lishor puu lè bendi puu abe be᷆ shi aki he binong lishor, befe or be ba naa ’igbe-igbe. ¹⁸ Be ndè angyu ’inde ashi ’ı᷆ shī ’ubong ahwuna, be kùng kangg le: "Bwo ukong-ukong ’ì bè yi lè ’ubong ahwu ’u dyam ná ahwun ye." ¹⁹ Be bè atyung kem wu ’uhwo-bell mbee lìshī, be kùng le: "Wò’o᷆! Wò’o᷆! Wò’o᷆! Beshi-beshi lè ’ubong ’ukaandi ahwun. Lè he ’ingbebb áhwu na᷅ bendi abe bè yi lè binong lishor be᷆ be lè bingbebb bibell. Ukpor he awa ken, kubong ’u fel bíshií-bíshií!" ²⁰ Men bendi puu abe he lifung-atabe, mà yal gor; men bebwaa-isom Ujeso lè bendi abe be᷆ tye ugie ’isom Unim lè bendi Unim puu, mà yal gor, likorye Unim a ke hwu ’ingie he ’ibibi ashi ’u shi ha amen. ²¹ Udengell Unim angwu ù yi lè ikeb kangg a ndaa kung ’ukor ahwu ’u dyam ná ’ukor bikuko maa tye he umbwo, a kung de le: "Kitaa i na᷅ be᷆ be kpam ti Ubabilon ’ubong ’ukaandi. Umbee-likel áhwu ana. ²² Nya he ’ubong ’umen i, bendi abe be᷆ kem atung be tem teng nya ye, abe be᷆ gyam agyam be teng nya ye, abe be᷆ gwee ipipi be teng nya ye, abe be᷆ gwee isom be teng nya ye, abe bè yi lè abwo aki be teng nya ye. Undi ù tem ba gyo ukpee nya ye. ²³ Kimor-inde or ’ì tem ba taa lè nya ye. Kì tem ba kwa lè libee nya ye. Leěti, bendi-ūshī ’ubong ahwun na᷅ be ma yi besu ’ingbebb he igye i puu, ukpor Unim a kpam tye hwu likorye ’u shì isi ibibi lam bendi he abong puu he igye i. ²⁴ Anung bendi abe be᷆ tye ugie ’isom Unim lè anung bendi Unim puu abe be gwu he igye i à yi he líshī áhwu."

¹ Nyong ashina ’i mbee, mi gyo ’iwom ná igie liwu bendi angi li dyam he lifung-atabe, be gaa kangg le: "Aleluya! Ipee ì kwu ke Unim. Unim na᷅ a kpan li, ù yi lè ikeb hwò puu, ifem ì kwu ke-e. ² U tang ushe he ’igyang, u tang ushe he ’ilebale ye. A tang ushe usu akpela, a ke-e libi likorye akpela ama a ban igye. Unim a ke-e ’ingie tyang lishi bendi bema abe a gwu." ³ Be mbee gaa le: "Aleluya! Ipee ì kwu ke Unim. Angyu ’inde ashi ’ı᷆ shī dim āhwu a dim ngyor igye." ⁴ Bekaandi lisi lè be bende or, biwom binde abi bì yi biwum or, be gyebb shī he itang fem Unim angwu ù yi kwu he ’idem ’usu kong le: "Kì yi ’igyang! Amen! Aleluya! Ipee ’ì kwu ke Unim." ⁵ Mi hà gyo igie i be lè he ’idem ’usu Unim, i de le: "Men bendi aki Unim puu abe ma᷆ shell he, mà bekaandi or, mà bebwani or, mà pee Unim utyan." ⁶ Mi mbee kung gyo igie ná angi liwu bendi angi li dyam kangg nà. I nem ateng ná ’ipuupuu umbwo lè ìtaà. I gaa le: "Aleluya! Ipee ì kwu ke Unim, likorye ufe Unim angwu ù yi Atyetyan ù yi lè ikeb hwò puu, a tyung le ù yi Usu. ⁷ Mà lì yal gor lè ibubo he ungwu pee Unim, likorye ’ùnyong ’u fel ahwu Unwaa Utia Unim u᷆ shi ’ipam libee. Ungye-ma a kam ’uhwo mà. ⁸ Utia ana a ke-e ’ihwom ’ifung ’itaa-itaa ashi ’ı᷆ taa ngyal-ngyal-ngyal." Kihwom ’ifung ana ’i naa ke binunung abi bendi Unim be᷆ shi. ⁹ Udengell Unim a kung de-m le: "Fee igie anyin: Ki ba kwa ’inunung ka bendi puu abe bé ko ābe be he ’ipam libee ashin." A mbee de-m le: "Igie anyin, Unim ugyang na᷅ a kong āngi, ì yi ’igyang." ¹⁰ Mi keb anung he itang le mî fe udengell Unim, ukpor a de-m le: "Tyang, shi ná ye! Mi or mi sha aki Unim ’itaa ken ha amen lè bebwanaa, men abe ma kpē àshi Ujeso a kong. Unim ufe-ufe na᷅ ’ì yi le lì fe-e." Ashi Ujeso a kong na᷅ ’ì yi lìshī biwom àbi àbe be᷆ tye ugie ’isom Unim be᷆ kong. ¹¹ Mi hà ndè lìshì lifung-atabe li buu ndor hwuo, kukaa-inyia ’ufung ’u fem naa há. Be maa ko undi angwu ù yi kwu há he ’ukaa-inyia ana lizen le Adell-dell lè ’igyang. U tang ushe or, u ndo ’ukye or he ’ukwo ahwu dell-dell. ¹² Atong-shi ama a ndeb melang-melang-melang ná umor-inde. U shī bishilishi usu gbamm. Be fee lizen fe-e angi undi-iso a ngye ngi fem he ufe-gyang tyang ye. ¹³ A shī aliga uwulu angi anung a paa wu āngi. Lizen lima li shì le Igie Unim. ¹⁴ Ishogya puu angi he lifung-atabe i shī bihwom bifung bitaa-bitaa, pwom bekaa-inyia befung pwom he lè he item. ¹⁵ Kashwia benyin befee ake ’a᷆ nyin dan-dan-dan ka be-e lè he ungwu ake u᷆ gwu bendi abong puu abe be naa linaa ha ahe. U kwa utyuu usu he ’ubwo angwu be shi-e he ’índe᷆ a, teng ābe he ikeb-ikeb. U tem shor agbe ikwan he ’ania; kitaa ana na᷅ a tyung ingywo ikaa-ikaa Unim, Unim angwu ù yi lè ikeb hwò puu. ¹⁶ He aliga uwulu ama lè ’unaa ’uma, be fee lizen lima fe nya le: "Usu besu, Atyam bekaandi puu." ¹⁷ Mi hà ndè udengell Unim ù yi naa he libwee. A gaa kangg ko bipuuzabung puu lè linyun likwu ábi puu, u de bi le: "Mà be gbong ukem he ’ipam ’ikaandi Unim, ¹⁸ hè men mà zī akwom bendi abe Unim u᷆ be gwu. Mà be zī akwom besu, bekaandi ishogya, besu ikeb, bekaa-inyia lè abe be᷆ pwom ābe, mà be zī akwom bendi puu, mà ifee or, mà bebwaa or, mà bekaandi or, mà bebwani or." ¹⁹ Mi hà ndè inyia ibibi ana, lè besu igye anyin lè ishogya ibell be gbong ukem hè be bè ndo ’ukye ha undi angwu a pwom ’ukaa-inyia ’ufung ana lè ishogya ima. ²⁰ A kwu inyia ana, u kwu undi-uman angwu u᷆ de le ufe u tya ugie ’isom Unim. Undi-uman ana, gbe he bikwele-uhwo abi leěti a maa shi he ’ushu inyia ana, na᷅ a maa lam bendi abe be bong fe ūfee᷅ inyia, be fe ’atelakpa ángi. A ma kwu inyia lè undi-uman ana bewum nyii tye gye he ’ubell ’inde ahwu ’ìndē lè ubi bı᷆ mor gedi-gedi-gedi kpamm ngyor igye. ²¹ Undi angwu a kwu he ’ukaa-inyia ’ufung a kung ’ashwia ake ’a᷆ be-e lè he ungwu gwu mbee ’igem ishogya ashi ’i maa pwom inyia. Bipuuzabung ana bi be zī akwom kwom ’itaa ’i ngie ābi.

¹ Ashina ’i mbee gbe, mi hà ndè udengell Unim ususo u shul lè he lifung-atabe ba he itang, u shi lè ukukol ’úbēll ahwu ’ù yi lè likel ye kwu he ’ubwo, u mbee shì lè ashishilika angi a teb kangg. ² A kwu ùshiı᷅ angwu ù yi lè há linde angwu be᷆ ko le Usetan, usu bibibi ana, a kung ashishilika ana fe ùshiı᷅, ³ kwu-e nyii tye gye he ’ubell, u ngib āhwu, u tyell āhwu he-e ù kwu há he ’ubell aze asi lihwo ’ugbe ’adyong le he-e ù tem ndè ’ukwo lam bendi he abong puu ye kpamm aze ana a mbee. Nyong aze ana a mbee, be buu he tyang abwo he ’anwaa ’unyong zangg. ⁴ Mi hà ndè bidem ’usu gbamm. Bendi abe bè yi kwu há, Unim a ke be ikeb le bè tang ishe. Mi ndè bēnyōng bendi abe be ma gwu ābe likorye be bun gboo ’igyang ashi Ujeso a fem tyung ābe ashi ’ì yi igie Unim. Abin na᷅ be fē inyia ibibi or, ngwu ’atelakpa ángi or ye; be bong fē ūfee᷅ inyia he ’ushu or, ngwu he ’ubwo or ye. Be wum lè he lihwu be fel besu ipel ha Ujeso Ukristi aze asi lihwo ’adyong. ⁵ Aben na᷅ be᷆ be wum ’ushu. Bendi abe be teng, abe be ma hwō be waa wum ye kpamm aze asi lihwo ’adyong a mbee. ⁶ Ki ba kwa ’inunung ka bendi abe be᷆ be wum ’ushu. Bè yi ta-ta ke Unim. Lihwu ’ugbe ’afee lì tem shà ābe ’iwom ye. Be ba shang Unim befe lè Ujeso Ukristi. Be ba za᷆ ’usu ipel ha Ujeso Ukristi aze asi lihwo ’adyong. ⁷ Nyong aze asi lihwo ’adyong ana a gbe, be ba waa Usetan lè he igaadye. ⁸ Nyong a fem be he igye, u ba gya mbee bipi puu he igye i lam bendi he abong puu. Abong anyina na᷅ be᷆ ko le Ugog lè Umegog, u la ko ābe le bè be he ’iteng ken hè be bè ndo ’ukye ha Unim. Bendi bemen ana be go ’ugii a ná ’uyia lishor a. ⁹ Mi ndè be be dim utung hwul-hwul-hwul be mbee biteng puu he igye i, be kaa kel-kel-kel fe ’iteng ashi bendi Unim be᷆ gbong, ashi ’ì yi ’ubong ahwu ’u nyin Unim. Ukpor, kìndē ’i be lè he lifung-atabe be shī dim bendi-linaa bendi Unim puu. ¹⁰ Usetan ufe, ufe angwu a ma lam ābe, be ma kwu-e fe he ’ubell ’inde ahwu ’ìndē lè ubi bı᷆ mor gedi-gedi-gedi kpamm ngyor igye. Nya na᷅ inyia ibibi ana lè undi angwu u᷆ bè uman le u tya ugie ’isom Unim bè yi. Be kwa he ’utor ishu or, kusu or, ngyor igye kpamm. ¹¹ Mi kung ndè ’idem ’usu ’ikaandi ’ifung-ifung ana, mi mbee ndè undi angwu ù yi kwu há. Nyong a be, itang lè ’usi bi nyòng mbee he ’ushu ’uma. ¹² Mi kung ndè bendi abe be hwō, bekaandi or, bebwani or, bè yi naa he ’ushu ’idem ’usu ana, be buu ashia ndor ābe he ’ushu. Be mbee buu ’ushia ’ususo, ahwu ’ù yi ’ushia azen bendi abe bè yi lè likpan. Undi angwu a kwu he ’idem ’usu a maa ābe ushe keè he biwom abi be ma shi nya a na be fee nya he ashia ana. ¹³ Bendi abe be ma hwō he umbwo or, abe be hwō lihwu liyang-yang, be shì he ’usu behwu, be fem be he igye, undi u maa ābe ushe keè he biwom abi bi shi nya a na be fee nya ashia ana. ¹⁴ Undi a kwu lihwu lè ’usu behwu fe he ’ubell ’inde. Kubell ’inde ahwun na᷅ ’ù yi lihwu ’ugbe ’afee. ¹⁵ Undi uyang-yang angwu lizen lima lì yi he ’ushia azen bendi abe bè yi lè likpan ana ye, be kwá he tyang gya há ’ubell ’inde ana a.

¹ Ukpi-ikwu lifung-atabe lè ukpi-ikwu igye, lè imbwo or, bi mbee. Mi hà ndè lifung-atabe lifufe lè igye ifufe. ² Mi mbee ndè Ujeruselem ufufe angwu ù yi ushu Unim ná u᷆ shul be lè he ’ipi Unim be he itang. A ma bwee idem ná ungye ufufe u᷆ bwee gye libee nà. ³ Mi kung gyo lingmam li be lè he ’idem ’usu Unim, li ko fem he igye kangg le: "Mà gyo! Kung lè ha ’unyin i gye ’ushu, Unim ù yi he liwu bendigye. Unim ufe-gyang u kwa ipel ha abe, befe be be kwu bendi bema, ⁴ u shell ābe akye puu lè he ashi. Undi ù tem ba hwa᷆ ye, lityam lì tem ba ban undi ye, kùkye᷅ ’u tem be kwu ye, kutor ’u tem be kwu ye, likorye biwom bitim bi mbee." ⁵ Undi angwu a ma yi kwu nya he ’idem ’usu ana a hà de le: "Kanaa-anaa i, mi sha biwom puu bi fel bifufe." A mbee kung de-m le: "Fee igie anyin, likorye ì yi ’igyang, i kpè angi undi u᷆ fe lityam ha angi." ⁶ A mbee de-m le: "Kiyang-yang ’i mbee. Mì yi Alfa lè Ombeega, ashi ’i ze le, Ukpi-ikwu lè umbee-likel biwom puu. Undi uyang-yang angwu umbwo angwu u᷆ ke likpan u᷆ gyor he, mi ka he ahe ’uke lè he lishi umbwo. ⁷ Undi uyang-yang angwu a ngyor naa genn he-e ù yi lè ahwe᷅le, mi ba ka he biwom abina puu. Mi kwa Unim uma, ufe u kwu unwaa-gi. ⁸ Ukpor bendi abe be bi lityam ye, befe be shi ungwu ken ye, be shì biwom abi bı᷆ tel Unim, be gwu bendi, be tan akpela, be shi ’ukee, be shì ikem, be bè iman, bendi puu abe be᷆ shì bitaa biwom abina, umbee-likel ubell u ba kwa he ’ubell ’inde ahwu ’ìndē lè ubi bı᷆ mor gedi-gedi-gedi kpamm ngyor igye. Lihwu ’ugbe ’afee na᷅ lì yi ana." ⁹ Udengell ken lè he liwu idengell Unim idyong-ifee angi i ma yi lè ikem-undor idyong-ifee angi ì yi lè umbee-likel bingie bibibi bidyong-ifee ana, a be de-m le: "Be, mî tyung-a ungye ufufe angwu Unwaa Utia a kpebb." ¹⁰ Ukatia Kunyong Unim a be shí-m kpemm, udengell Unim a ma kpe-m gbe lè mi gye he líshi ukwell angwu a wee bedung kangg. A kung tyung mi ushu Unim angwu be᷆ ko le Ujeruselem ná u᷆ shul be lè he ’ipi Unim be he itang. ¹¹ Kikung-gbo Unim ’i taa nya. Ushu Unim u taa ngyal-ngyal-ngyal ná ’ukor ahwu ’u ngbebb ’unung be᷆ ko le udaimon ’u᷆ taa nà. ¹² Uging uma u wee bedung gye he ’usi kangg. U shì lè ingwu likong lihwo lè ngi ifee. Idengell Unim lihwo lè ngi ifee i kwa kang ingwu likong lihwo lè ngi ifee ana. He ingwu likong be fee azen bikwu-lihwan bendi Izwell lihwo lè bi bifee fe nya. ¹³ Be ma fe ingwu likong ikie he ’igie ’iyang-yang; ikie lè he ’igie ashi libwee lı᷆ fem, ikie lè he ’igie ashi libwee lı᷆ ngwee, ikie lè he lizen, ikie lè he limbell. ¹⁴ Be fe lìshií uging ana he likwu akor lihwo lè ngi afee. He likwu akor ana, be fee azen bebwaa-isom Unwaa Utia, bendi lihwo lè be befee, fe nya. ¹⁵ Udengell Unim angwu u᷆ kong ha ami a ma yi lè ùkwán angwu be᷆ keè ’iwom angwu be shǐ-e lè igold. A ma kam le u keè ushu lè ingwu likong lè uging. ¹⁶ Bègie᷅ ushu lè likwob lima bi ma yi bizang. A keè bègie᷅, likwob lè bedung, bi ma yi bizang, bi ma yi ilamba asi adyong ’ugbe lihwo lè ’ugbe ’adyong. ¹⁷ A mbee keè uging or titi. Ūkee᷅ udengell Unim ana a ma yi he ūkee᷅ angwu bendigye, abee asi lihwo lè abee lihwo lè ngi adyong-ken. ¹⁸ Be ma kung akor angi a ngbebb ’unung, a taa, be᷆ ko le idaimon a tye uging, be kung igold inunung tye ushu ı᷆ taa ná ’inde-ushu nà. ¹⁹ Lìshií ushu ana be ma fe akor anunung lihwo lè ngi afee bitaa atyetye-atyetye. Ukpi-ikwu ’ukor ’u taa ná ’inde-ushu, be ko āhwu le udaimon. Utepwom ’ukor ’u taa kil-kil-kil, be ko āhwu le usafaya. Lekie ’ukor ’u taa ìnìm ikwun gbamm, be ko āhwu le aget. Lende ’ukor ’u taa ná ùnìm abia akwun, be ko āhwu le emered. ²⁰ Ledyong ’ukor ’u shi seke-seke, be ko āhwu le oniks. Ledyong-ken ’ukor ’u bung gbuu, be ko āhwu le ukaniliyan. Ledyong-ifee ’ukor ’u shì ùnìm aligem-aligem, be ko āhwu le ukwots. Ledyong-ikie ’ukor ’u shì ùnìm ukwun-ukwun ngyashii, be ko āhwu le beril. Ledyong-inde ’ukor ’u bung ná ’ugbe umogol ’ubwaa, be ko āhwu le utopaz. Lihwo ’ukor ’u taa ùnìm ukwun kangg, be ko āhwu le ukrisopreiz. Lihwo leken ’ukor ’u taa kil-kil-kil, be ko āhwu le ujasint. Lihwo lefee ’ukor ’u taa bell ’ukwun lè ’ubwaa, be ko āhwu le ametist. ²¹ Be kung akor lihwo lefee angi a ngbebb ’unung kangg, be᷆ ko le upel, shi ushu ana ingwu likong lihwo lefee. Ugbaakwo há ushu ana, be kung igold igyang angi inunung a shǐ-e, ı᷆ taa ná ’inde-ushu nà. ²² Ki ma yi lè ushom nya angwu be᷆ lè fe Unim há ye, likorye Unim Atyetyan angwu ù yi lè ikeb puu befe lè Unwaa Utia ana na᷅ bè yi ushom ana, bè yi mbee ’ipi nya puu. ²³ Ki maa fong bendi lè libwee or, ngwu ’ufell or ye, likorye ’ikung-gbo Unim ’i taa nya. Unwaa Utia ana ugyang nà ù yi ’ikung-gbo ushu umen ana. ²⁴ Kikung-gbo ushu ana na᷅ ’ı᷆ be taa tyung bendi abong puu ’ukwo ahwu be᷆ gbe. Besu igye be be tem lè bingbebb bibell puu lè ifem ibell be nya. ²⁵ Ingwu likong ima i ba ngyor ndor hwuo kpamm, be ba shā āngi ye, likorye ’ùsū ’u ba gya há ye. ²⁶ Be ba tem ba lè bingbebb puu lè ifem puu lè he abong puu he igye i ba nya. ²⁷ Ukpor ’ibibi ’i ba gba nya ye. Bendi abe be᷆ shì bibibi biwom abi Unim a tel, be mbee bè iman, be ba ngwee há afee ye. Bendi abe bè yi lè azen he ’ushia Unwaa Utia ahwu be fee azen bendi abe bè yi lè likpan, befe-befe na᷅ be᷆ be ngwee há afee.

¹ Udengell Unim ana a tyung mi umbwo ukaandi angwu ù yi lè umbwo angwu u᷆ ke likpan, ù yi udang-udang ná ’ukor ahwu be᷆ ko le ukristal. U kò ba lè he ’idem ’usu Unim befe lè Unwaa Utia ana, ² kò ta lè ’udyan ubo ukaandi angwu a gbe nya he ushu. Ùkwán angwu u᷆ ke likpan u shi naa he ufaa umbwo ana indi hen indi hen. Ùkwán ana u wum bitaa agbe lihwo lè bi bifee he lize. U wum bitaa agbe atyetye he ’ufell ’uyang-yang. Ashia ama à yi usi angwu u᷆ mbee bendi-angmam mbee abong puu. ³ Kiwom ’iyang-yang ashi ’i ban he ashi Unim ’i ba kwa nya ye. Kidem ’usu Unim befe lè Unwaa Utia na᷅ ’ı᷆ be kwu nya, bendi abe be᷆ shi-e aki ama be be fe-e nya. ⁴ Befe be ba nda ’ushu ’uma nwongg, be fee lizen lima fe be he ’ushu. ⁵ Kùsū ’ù tem ba gya ye. Kì tem ba fong bendi lè bimor-inde or, ngwu libwee or ye, likorye Atyetyan Unim na᷅ u᷆ be kwu ’ikung-gbo ’ibell, befe be be zī ’ùsù ngyor igye kpamm. ⁶ Udengell Unim a de-m le: "Igie anyin ì yi ’igyang, i kpè le undi ù fe lityam ha angi. Unim Atyetyan angwu a ke abe be᷆ tye ugie ’isom ’ima Ukatia Kunyong angwu u᷆ ke be ikeb angi be᷆ tye ugie, a som i-mi, udengell uma, le mì be tyung bendi aki ama biwom abi baale bì be shi." ⁷ Ujeso a de le: "Mà gyo! Baale mı᷆ be. Ki ba kwa ’inunung ka undi angwu a fe igie angi i be lè ha Unim, be fee fe he ’ushia ahwun." ⁸ Mi Ujon, mi-gyang mi gyo biwom abin lè atyung agi, mi mbee ndè bi lè ashi agi. Nyong mi gyo ābi, mi ndè bi, mi keb he itang he abee udengell Unim angwu a tyung mi ábi le mî fe-e, ⁹ ukpor a de-m le: "Tyang, shi ná ye! Mi or mi sha aki Unim ’itaa ken ha amen lè bendi bēme᷅n abe be᷆ tye ugie ’isom Unim, lè bendi puu abe be᷆ fe igie angi be fee he ’ushia ahwun a. Kee-kee fe Unim ufe-ufe." ¹⁰ A mbee de-m le: "Igie angi Unim a kong, be fee he ’ushia ahwun, ndè le wo ndyell āngi lè ha bendi ye, likorye ’ùnyong ahwu biwom bimen i bı᷆ be shi ’u fel kpee-kpee. ¹¹ Undi angwu a ndè gia le u sha bibibi a, tyang he ù hâ shi bibibi, angwu a ndè gia le u sha biwom ibia a, tyang he ù hâ shi ābi. Undi angwu ù yi ununung he ashi Unim, ù gye ’ushu shi a᷆shi ’ì yi ’inunung. Undi angwu ù yi undi Unim, ù gye ’ushu fe Unim." ¹² Ujeso a de le: "Mà gyo! Baale mı᷆ be. Mi ba ka undi ashi ’i keè ’itaa a shi. ¹³ Mì yi Alfa lè Ombeega, ashi ’i ze le Ukpi-ikwu lè umbee-likel biwom puu. Mì yi ’ikwu biwom puu, mi shi lìshī biwom puu." ¹⁴ Ki ba kwa ’inunung ka bendi abe be to inditen ibell ndor itaa-itaa. Befe na᷅ be kpè abe be᷆ zī agbe ukwan angwu u᷆ ke likpan, be mbee kpè le be gbà he ungwu likong ūshù Unim. ¹⁵ Ukpor bendi abe be᷆ shi ’igbang ná ibua, bendi ’ukee, abe akpela, abe be᷆ gwu bendi, abe ikem, lè abe be᷆ bè iman pwom ungwu, bendi puu abe be᷆ shì biwom abin, be ba gya he afee ushu ana ye, be ngyor kwa he igye. ¹⁶ Ujeso a mbee de le: "Mi na᷅ mi som udengell ugi hwaa lè men le ù bun biwom abin he ’uhwo awu bendi abongale. Mì yi igia Usu Udebid a. Mi mbee shi ukpen ashi-liti angwu u᷆ taa." ¹⁷ Ukatia Kunyong Unim befe lè ungye ufufe be de le: "Be!" Undi uyang-yang angwu a gyo igie anyin, ufe or u᷆ de le: "Be!" Undi angwu umbwo angwu u᷆ ke likpan u᷆ gyor he, ù be kpe-e ’uke. ¹⁸ Mi Ujon, mi tuu undi uyang-yang angwu a gyo igie angi Unim a kong be fee he ’ushia ahwun ’ubwo he ’utyung le, gbe a kung ’iwom ’isuso-isuso fe ipel ha igie anyin, Unim u kung bingie bibibi abi be fee gbe lè bi he ’ushia ahwun, fá he ipel ha bima. ¹⁹ Gbe undi a waa ’iwom tyang lè hell lè he igie anyin, Unim u waa he tyang lè hell, u bong he le ù zī agbe ukwan angwu u᷆ ke likpan or, ngwu ù bong he le ù ngwee he ushu uma, ufe Unim or ye. Ùkwán lè ushu ana, be fee gbe lè bi he ’ushia ahwun. ²⁰ Undi angwu a de le igie anyin ì yi ’igyang, a de le: "Kigyang-igyang, baale mı᷆ be." Kì ngyor ná a kong. Atyetyan Ujeso hā be! ²¹ Atyetyan Ujeso ù hā ke bendi Unim puu ’ukwun.