Philippians

Philippians

¹ Mi Uporl lè Utimoti abe lì yi iboyi Ujeso Ukristi, li fee ’ushia ahwun hwaa lè men puu abe mà yi bendi Unim he Ufilipai, men abe ma gwaa ’uhwo-men ipel ha Ujeso Ukristi. Li mbee fee āhwu hwaa lè bekaandi abe be᷆ ndè gbe lè bendi abongale lè bendi-ukpell bebell he ushom Unim. ² Unim Atyetyan befe lè Ujeso Ukristi angwu ù yi usu utyan bè hā ke men ’ukwun, be shi ’i kwun amen he atyam kpatiaa. ³ He ’unyong ’uyang-yang mı᷆ gim gbe lè men, ki sha-m mi pee Unim ugi angwu he lifung-atabe he ’uhwo ’umen. ⁴ He ’unyong ’uyang-yang mı᷆ ke ushang hwaa lè Unim ke men, mi ke ushang lè igor, likorye men ma kpell mi he abunale ’isom ’inunung gbe lè Ujeso kung lè há he ukpi-ikwu kpamm be wu ’unyin i. ⁶ Mi-i ngye dangg le Unim angwu a kpi aki anunung ashele ha amen atyam, u gya ’ushu sha āngi kpamm a gbe mbee he Liti angi Ujeso Ukristi u᷆ tem be. ⁷ Mà yi-m he lityam-lityam. Ashin ’i shi-m mi gim gba lè men ná likorye bel lè men puu li ndè binunung abi Unim a shi-m nyin i ná mì yi he igaadye i, lè abi a shi-m he ’unyong ahwu mi maa bun ’isom ’inunung gbe lè Ujeso gboo, mi shi ’i nung bendi le ’ì yi ’igyang a. ⁸ Unim a ngye le mi kong ’igyang a, nyong mı᷆ de le ’i nyin mi lè men lityam ken nya a ná ’i nyin Ujeso Ukristi lè bel. ⁹ Mi ka ushang le benyin bēme᷅n bè gye ’ushu ngbebb-ngbebb, ma mbee kwu lè lingye, ma nde shob biwom abi bì yi kpa-kpa he akwo puu. ¹⁰ He ashin mà ha᷅ ngya ná mà gia biwom abi bi ngbebb hwò puu. Saa mà hà ndo ba kwa bendi abe bè yi gelalala faale uben he Liti angi Ujeso Ukristi u᷆ be tem be, ¹¹ mà kwu lè likpe linunung angi Ujeso Ukristi u᷆ ke men, ma mbee shi biwom binunung. Bendi abe be ndè binunung bimen i, be pee Unim, be fem he. ¹² Bebuye, mi kee le mà ngye le, biwom bimen abi bı᷆ kem fe-m i bi fel kpell shi ’isom ’inunung gbe lè Ujeso ’i gye ’ushu a, bi ban āshi iban ye. ¹³ He ashin na᷅ ishogya angi ı᷆ kang ushaale usu or, bendi abe be teng iteng hen or, kì hà nung ābe nwongg le mì yi he igaadye he ’uhwo Ujeso Ukristi a. ¹⁴ Kiwom ashi ken ’i shi le, bwo bebuye gbamm abe be bong ha Atyetyan Ujeso be ndè le mì yi he igaadye, be fel fe lityam ha ahe kangg, be mbee fel porr hwò leěti he abunale ’isom Unim de bendi faale ’ushell. ¹⁵ Kì yi ’igyang a le, kì yi lè bendi abe be᷆ bun de bendi gbe lè Ujeso Ukristi likorye bè yi lè lityam abanale ha ami, be kee le be tyua linaa tyang mi. Ukpor, kì yi lè bendi besuso abe bè yi lè ugim ununung he abunale gbe lè he. ¹⁶ Bendi bemen abe be᷆ bun lè ugim ununung i, ki nyin ābe lè mi, fe na᷅ be shi ashin, bwo be ngye le Unim na᷅ a shi-m mì yi nyin mî shi bendi bè ngye le, kisom ’inunung gbe lè Ujeso ’ì yi ’igyang a. ¹⁷ Bendi bemen abe be᷆ bun de bendi gbe lè Ujeso Ukristi lè ugim liketye le bwo be kee le be dyam hwa-m, bè yi ungwu ken ye, be kee le be sha tor mi nyin i ná mì yi he igaadye i. ¹⁸ Ashina ’i maa anung ye! Mà igim ibell ì ngbebb or, mà ì ban or, mì yi lè igor likorye ashi ’i dyam i-mi ’ì yi le bendi bè gyo gbe lè Ujeso Ukristi. Kigyang a, mi yal gor i ’itel i mbee ’unyong kpamm, bwo mi ngye le mi ba fem lè he ’ingie ashin, likorye men ma kong ha Unim ka-m, Ukatia Kunyong Ujeso Ukristi u kpell mi. ²⁰ Kiwom ashi mi gim, mi shi lè lishi andorale, kì yi le mì hà ndo sha ’iwom ashi ’ı᷆ be lè ishwia ke-m ye. Ashi mı᷆ shi ’ì yi le, mi bun igie Unim faale ’ushell, mi nde le ’anaa-anaa i or, mbee ’unyong puu or, mi ke Ujeso Ukristi ife mbee akwo agi puu, mà likpan or, lihwu or. ²¹ Mi kwa uwum le mî shi ’ibang a? Kiwom ashi ’i dyam mi hwò puu le mì kwu uwum shi ’ì yi le, mî fēm Ujeso Ukristi. Ukpor gbe mi hwo or, ki ka-m lifem hwà akwele uwum. ²² Gbe ’ì yi le, gbe mi kwu uwum hen igye i gye ’ushu, mi sha ’iwom ashi ’ı᷆ be lè lifem ke bendi, mì hà gia a᷆shi yang a? Mi ngye ye. ²³ Biwom bifee i bi kin mi puu. Kiwom ashi mi-gyang ’i ngbebb mi hwò na᷅ ’ì yi le mì hwō, mî lè kwu ipel ha Ujeso Ukristi, likorye ashin ’i ngbebb hwò akwele uwum he igye i. ²⁴ Ki shi le, kì yi ’indee-indee kangg le mì ngyor kwu uwum he igye i he ’uhwo ’umen. ²⁵ Le bwo mi ngye le ashin ’ì yi ’indee-indee, mi kam le mi ngyor kwa he igye anyin. Mi ngyor kwa utung ha amen le mî kpell amen ma gye ’ushu bong ha Ujeso ngbebb-ngbebb, ma mbee kwu lè igor he ashele ’imen i, ²⁶ le he ’unyong ahwu mi mbee be be ha amen há, hè men mà yal gor kangg pee Ujeso Ukristi he ’uhwo ’ugi. ²⁷ Kiwom ashi ’i dyam ’indee-indee ’ì yi le likpe angi ma᷆ tyung ha bende lì keè ha ’isom ’inunung ashi gbe lè Ujeso Ukristi. Mà mì be há or, mà mì be ye or, mi kee le mi gyo le mà yi naa kang-kang lityam ken, ma shi ugim ken nya a na ma ma naa ukem ken, mā ndo ’ukye he ’uhwo biwom abi ma bong, abi bı᷆ be lè he ’isom ’inunung ’imen ana. ²⁸ Mi mbee kee le mi gyo le ma shell bendi-linaa bēme᷅n ye. Ashin ’i ba tyung ābe le be ba nim, ukpor men ufe ma ba hwaa. Unim ugyang na᷅ u᷆ be tyung ābe áshi. ²⁹ Unim angwu a shi libwo le mà bong ha Ujeso Ukristi, a shi libwo le mà kpe ’ingie he ’uhwo ’uma titi. ³⁰ Kùkyē ahwu leěti ma maa nde-m mi maa ndo, ahwu ma gyo le mì so-i ndo hen abwo, mà fe abwo ipel ha ami hè li lì ndo āhwu.

¹ Le bwo men mà yi ke Ujeso Ukristi a, ki shi àtyám āme᷅n à yi lè ingie, benyin bema be tie lè men. Mà yi gwaa ipel ha Ukatia Kunyong Unim; ki nyin amen lè bende lityam ken. ² He abin, mi kee amen le mà gye ’ushu kwu lè ugim ken, ki nyin amen lè bende, ma gwaa ha bende, ma kwu ikwun ha bende. Ashin na᷅ ’ı᷆ shi-m mi kwu lè igor. ³ Undi ù shī gim ’uhwo-ma ufe-ufe or, ngwu ù fel undi idim or ye. Ashi ’i ngbebb ’ì yi le, undi ù keb ’uhwo-ma be he itang, u ndè ’uhwo-ma ná ufe a dyam hwò bendi abe be teng ye. ⁴ Undi uyang-yang ù shi ’iwom ashi ’ı᷆ kpell he ufe-gyang ufe-ufe a ye, ù shi a᷆shi ’ı᷆ kpell bendi abe be teng iteng or titi. ⁵ Men mà kwu lè ugim ’itaa ken ná Ujeso Ukristi a ma yi lè he. ⁶ Mà na a ma yi Unim a lè he ukpi-ikwu or, a ma kung ’uhwo-ma ndor bizang ha Unim ye. ⁷ Ukpor a keb ’uhwo-ma be he itang fel ’itaa ken ha ufee, be hwan he ná undigye. ⁸ Ná undigye, a ma ke átyám ife, u bong lè hwō lihwu ishwia. Lihwu angi a hwō i, be ma maa gwu-e bee he ’ikpakpaa a. ⁹ Le bwo a ma keb ’uhwo-ma ’itaa ana na᷅ Unim a fem he kangg, u mbee kwu-e lizen angi li dyam hwò azen angi a teng iteng puu, ¹⁰ le he ’unyong ahwu bendi be gyo lizen Ujeso, hè befe puu abe he lifung-atabe or, abe he igye i or, abe he ’usu behwu or, bè tim anung he itang fe-e. ¹¹ Puu ubell be ba kong gboo le Ujeso Ukristi ù yi Usu ubell a. Ashin ’i ba ka Unim Atyam ìfém. ¹² Bedim-gi lityam, bwo ma ngye likpe linunung angi Ujeso Ukristi a shi tyung li, nya a na ma shii ke-m ife he ’unyong ’uyang-yang ahwu mi ma yi utung ha amen, kanaa-anaa ná mi fel lè ’igbe lè ha amen i or, mà fel ke-m ife gbe gyong. Mà shell Unim, ma kwu lè lityam ife, ma kaa kangg shi binunung, hè likpan ’unyong līme᷅n lì sho yilididi, ¹³ le bwo Unim u᷆ shi aki he atyam āme᷅n; ufe u sha amen ma kwa lè ’igyor le ma sha nyin he, u ke men ikeb angi ma᷆ shi biwom abi bimen bı᷆ nyin he i. ¹⁴ He ’iwom ’iyang-yang ashi ma᷆ shi, mà tim ungwu or, ngwu mà fe ifung or ye, ¹⁵ hè men mà kwu gelalala faale uben. He ashin men ma fel bebwaa Unim abe bè yi betaa-betaa faale ’iban, nya a na mà yi ndē he igye angi i sho lè bendi bebibi abe be ban àtyám. Men mà kwu i he igye anyin ná ikpen angi ı᷆ taa he ’usi, ¹⁶ nya a na ma᷆ bun ’isom ’inunung ashi likpan ’unyong de bendi. Gbe ma shi abin, ki ba sha-m mi ba yal gor he Liti angi Ujeso Ukristi u᷆ tem be, likorye ’i ba tyung mi le aki angi mi shi lè ’iken ashi mi kwu, bì yi ’idideng ye. ¹⁷ Abongale ūme᷅n ha Ujeso Ukristi ù yi ná ’ityuale ashi ma᷆ gwu shang Unim nà. Pisoye mi or, mi ba pwom lishi nya ana a. Gbe ’ì yi ná, ki ba nyin mi kangg, mi be yal gor utung ha amen. ¹⁸ Men or, kì nyin amen kangg, ma kwu utung ha ami igor-igor. ¹⁹ Gbe Atyetyan Ujeso a bong, libwo li buu ke-m, mi ndor lishi le baale mı᷆ som Utimoti le ù be ndè men. He ’unyong ahwu a tem be de-m atye āme᷅n, ki ba kwun mi he lityam kpatiaa. ²⁰ Ufe-ufe na᷅ u᷆ kee-kee gim gbe lè men ná mı᷆ gim. U ba kpell amen kangg. ²¹ Abe be teng, undi-undi u gim ’ima a. Ki gbee ābe gbe lè biwom abi Ujeso Ukristi ye. ²² Men-agyang puu ma ngye ná Utimoti a tyung ’uhwo-ma gboo le ù yi undi ununung a. Ma mbee ngye ná bel ha ahe li ngwee ná unwaa ha átyám he atanale bun ’isom ’inunung gbe lè Ujeso de bendi. ²³ Ufe na᷅ mi ndor lishi le mi som le ù be ndè men nya ’ukwo-ukwo he ’unyong ahwu mi ngye ná likong ligi li ndor lishi gye. ²⁴ Mi fe lityam ha Atyetyan Ujeso le gbe a shi ’ukwo ke-m, hà baale mi-gyang or, mı᷆ be ndè men. ²⁵ Unwandatyan Ipafrodates angwu ma som le ù be kpell mi he ’unyong ahwu ’i fong mi lè ukpell, mi ndè shī ’ì yi kpe-kpe le mì tem lè he som hwaa lè men. Ufe na᷅ bel ha ahe li kpe ’ingie shi aki Unim ukem ná ishogya. ²⁶ Àshì a ban he lè men hen kangg; ufung a mbee waa he hen le bwo ma ma gyo le ù yi gogo ye. ²⁷ Kì yi ’igyang a le a ma ngmam teng he lihwu-lihwu. Ukpor Unim a ma yi lè beshi ha ahe, a mbee he; hā ufe-ufe a ye, u shi lè beshi ha ami or titi. A bong le ’utor ’ususo ’ù mbee be fe ipel ha ahwu mì yi lè hwu ye. ²⁸ He ashin mì yi lè ’igyor kangg le mi som he tem hwaa lè men, he ’unyong ahwu ma nde-e, hè men mà gor kangg, hè ’ì be kwun i-mi or he lityam. ²⁹ He atan-lengi anwun, he ’unyong ahwu a be, mà kpe-e igor-igor likorye ’i nyin he lè Atyetyan Ujeso kangg a ná men a. Ki ngbebb le men mà ke bendi abe ’itel i ife. ³⁰ Kì yi faale ifung, ki teng zangg hang a hwō he ’uhwo aki angi u᷆ shi ke Ujeso Ukristi. He ’uhwo ’umen na᷅ a bong lihwu he-e ù ndè le u ka-m ukpell angwu men-agyang ma kpi ndor ’igem.

¹ Bebuye, kiwom ashi mı᷆ kong umbee-likel ’ì yi le, mà yal gor likorye mà yi ke Atyetyan Ujeso. Mà na mı᷆ fee ’iwom ken ’ugbe ibwan-ibwan or, ki tal mi ye. Mi kpell amen le ’iwom ’ì shi amen ye a. ² Mà baa ’uhwo-men lè ha bendi abe be᷆ tan lè bikwu ikong, bife na᷅ bı᷆ be lè linaa, bè yi ná ibua ibibi nà. Be de le undi u kwa undi Unim faale àtēnālē a ye. ³ Bel abe lı᷆ fe Unim lè he atyam atyan, li pee Ujeso Ukristi he ’iwom ashi a shi, li fe lityam he biwom abi bı᷆ gyor agwo ye, bel na᷅ li tyung ’itaa lìte᷆n angi kpa-kpa. ⁴ Gbe ’ì nya yi le biwom agwo bi dyam ’indee-indee, hà ’ì yi lè undi ken or angwu a hwo-m ye. ⁵ Mi be ubu lè ha Ubenjamen. Atyagi or, andagi or, bè yi Ihibru a; mi shi Ihibru a. Be hwan mi he ’ubong Izwell, be ma ten mi nyong mi fel ati adyong-ikie nya a na likpe lityan, bel Ijuus, li ma yi. Mi ma yi he likwu besu Iten abe be᷆ ko le Iferesis. ⁶ Lè he item mi ma zam izam le mi ndà le Iten Ijuus, undi a ban he ken or ye. Fe na᷅ mi maa ke bendi abe be bong ha Ujeso Ukristi ’ingie. Mi-gyang or mi ma ban uten ken or ye. He ashin mi ma yi gelalala faale uben. ⁷ Ashi le mì kung biwom abina ná lifem ligi, mi fel ndà ābi bì tem yi-m he ’ukpo ye gbang-gbang. Mi shi ashin he ’uhwo Ujeso Ukristi a. ⁸ Ashin ’ife-ife a ye, biwom puu abi mì yi lè bi bì tem yi-m he ’ukpo ye gbang-gbang, likorye gbe mi ngye Ujeso Ukristi angwu ù yi Atyagi, hà ’i dyam mi hwò biwom puu. He ’uhwo ’uma na᷅ mi kung abwo agi lè he biwom abin puu, bi fel mi nya a na ’ibia likor a. Mi shi ashin le mî kwu lè Ujeso Ukristi angwu ù yi-m lè lifem, mi mbee kwu ke-e. Unim u fel nda-m mì yi gelalala, likorye mi bong ha Ujeso Ukristi. Akwele gelalala anwun a be lè he ’iwom ashi mi shi a or, ngwu ’ì kwu le bwo mi ndor Iten Ijuus a or ye; a kee-kee be lè ha Unim a. Ashin ’i shi ’itel i le bwo mi bong ha Ujeso Ukristi. ¹⁰ Mi fel kee-kee kee le mi ngya Ujeso Ukristi, mi ngye ikeb angi ı᷆ be gbe he awumale uma lè he lihwu. Mi mbee kee le mi kpa ’ingie ná ufe a ma kpe, mi keb ’uhwo-gi kangg fel ’itaa ken ná Ujeso Ukristi nyong a ma hwō. ¹¹ Mi sha ashin, ndor lishi le Unim u ba wum mi lè he lihwu. ¹² Mi kong i le mi fel lè biwom bimen abi mı᷆ ndor lishi ana mà a ye; mi kong le mi fel gelalala faale uben mà a or ye. Ukpor mi gya ’ushu le mî ndè le biwom bimen i bi fel bigi bigyang, likorye he atan-lengi anwun na᷅ Ujeso Ukristi a shi-m mi fel uma gbangg. ¹³ Bebuye, mi gim le mi wa wu he libwo angi mi fel lè biwom bimen i mà ye. Kiwom ken-ken ashi mı᷆ shi ’ì yi le mi naa lityam tyang biwom puu abi bi gbe lè he item, mi kaa lè ikeb igi puu ta ’ushu-ushu ndor àshì ha abi bì so lè he ’ushu. ¹⁴ Mi ta ’ushu le mî wu he ’iteng ashi mı᷆ ndor lishi. Mi sha ashin le mî kpe ’uke ahwu Unim a ko mi gbe ha Ujeso Ukristi le mì kpe a. Kuke ’umen i ’ù yi le mì lè kwu ipel ha ahe he lifung-atabe. ¹⁵ Bel abe lì tem yi ’isun a he likong Unim ye, ki ngbebb le lì kwu lè ugim angwu ’itaa i. Gbe ’ì yi lè undi angwu ugim uma ù yi atyetye lè he anwun, Unim u ba sha ’i nung he. ¹⁶ Kiwom ashi ’i dyam hwò puu na᷅ ’ì yi le, lì gye ’ushu shi biwom he ’ukwo ahwu kpa-kpa nya a na li shi kpamm be wu ’unyin i. ¹⁷ Bebuye, men puu mà gye ’ushu shi ná mı᷆ shi. Mà mbee ndè ha abe be᷆ shi likpe linunung ’itaa ana. Bel li tyung amen likpe linunung angi mà shi. ¹⁸ Biwom abi mi de men ábi ’ugbe ibwan-ibwan, kanaa-anaa i mi mbee bwan ābi da amen lè àkye᷅ he ashi le, kì yi lè bendi gbamm abe be᷆ shi likpe angi lı᷆ tyung le bè yi linaa ha ’ikpakpaa ashi Ujeso Ukristi a hwō. ¹⁹ He ’unyong ahwu igye anyin ı᷆ be mbee, Unim u ba kung bendi bemen i fa he ’inde, likorye bigyor biwom igye anyin na᷅ bi fel Unim ubell. Be pwom ungwu lè biwom abi ’ì yi le hang bi shi ābe ishwia. Be kee-kee gim biwom abi igye anyin bife-bife a. ²⁰ Ukpor bel ufe, ushu utyan ù yi he lifung-atabe a. Nyin i ná li kwu lı᷆ nyong Atyetyan Ujeso Ukristi i, li ndor lishi le ù tem be lè he lifung-atabe be kpan li. ²¹ He ’unyong ahwu u᷆ be be, ikeb ikaandi angi u᷆ shi biwom bı᷆ te ’itaa a kee, u ba kung āngi sha li bel abe lì yi he ’ukpo ye i, li gie fel taa ná ufe-gyang.

¹ Bebuye, ki nyin mi lè men, mi shi lè ’igyor le hang mi ndè men. Men na᷅ ma shi-m mì yi lè igor; he ’uhwo ’umen na᷅ mı᷆ yal gor le mi hwò. Bedim-gi lityam, he ’uhwo biwom abi Ujeso Ukristi u᷆ shi ke men, mà naa genn nya a na mà yi ke-e ufe a nyin. ² Kiwom ashi mi kee le mi kong ha Uyodia befe lè Usintike ’ì yi le, mi tim ābe anung kangg le bè shi ikwun ha bende, likorye bè yi ke Atyetyan Ujeso Ukristi a. ³ Ki ngbebb le wo angwu wo᷆ shi aki utung ha ami, wò kpell bengingye bemen befee i, likorye be kpe ’ingie shi aki utung ha ami he abunale ’isom ’inunung gbe lè Ujeso de bendi. Be kpe ’ingie shi aki utung ha ami ná Uklemit lè abe be teng be shi. Unim a fee azen abell fe he ’ushia azen bendi abe bè yi lè likpan ’unyong. ⁴ Men abe mà yi ke Ujeso Ukristi, mà yal gor mbee ’unyong puu; mi mbee bwan kong le, mà yal gor. ⁵ Mà shi bendi puu bè ngye men gbe he ’uhwo ambwele ’ūme᷅n. Atyetyan Ujeso Ukristi a fel kpee-kpee lè abele. ⁶ Mà maa anung ’iwom ’iyang-yang ye. Ashi ’i ngbebb le mà shi ’ì yi le, mà bun de Unim biwom puu abi ’i fong amen lè bi. Mbee ’unyong puu ma᷆ bii he ukpell, mà pee he. ⁷ Gbe ma shi ashin, Unim u ka amen ikwun. Ikwun ima imen i, i dyam gbe lishi ’itaa ashi bendi be᷆ gim gbe lè ngi. Men abe ma gwaa ipel ha Ujeso Ukristi, ikwun imen i ì kam àtyám āme᷅n lè igim īme᷅n le hè ’iwom ’ì do amen ye. ⁸ Bebuye, kiwom ashi mı᷆ kong umbee-likel ’ì yi le, mà kung igim īme᷅n ndor he ashele biwom abi bi ngbebb, abi bì yi ’igyang, abi bì yi lè ife, abi bì yi kpa-kpa, bi mbee shi gelalala, biwom abi bi ngbebb bendi be᷆ nyòng ābi. Biwom binunung puu abi bì yi lè ife, abin na᷅ ma᷆ gim gbe lè bi. ⁹ Biwom abi mi hwua amen, mi mbee kung ābi fe men he ’ubwo, ma gyo ābi lè he ungwu ugi a, ma nde-m ná mı᷆ shi ābi, men or mà shi ābi. Mà Unim angwu u᷆ ke li ikwun u kwa ipel ha amen. ¹⁰ Mi ná undi-utyang Atyetyan Ujeso Ukristi, ki nyin mi kangg, likorye men ma tem kpi ande᷅le gbe lè mi. Mi fel kong i le mà naa lityam tyang mi a ye. Kì yi ’igyang a le men ma gim gbà lè mi, ukpor ki gbe ’igbe ná mà tem yi lè libwo hè men mà kpell mi ye. ¹¹ Ashi mi kong ana ’i ze le mi kya ’akiki a ye, bwo mi ngye ná mı᷆ kwu ’uhwo-gi he ’iwom ’iyang-yang ashi ’ı᷆ be hwaa lè mi. ¹² Mi ngye ná mı᷆ kwu ’uhwo-gi he ’unyong igben, mi ngye ná mı᷆ kwu ’uhwo-gi he ’unyong mì yi lè ’iwom. Mi ngye ’undyell ahwun. Mbee ’unyong puu he ’iwom ’iyang-yang, mà itung ì ndo mi or, ì ndo mi ye or, mà mì kwu lè biwom or, mì kwu lè bi ye or, mi ngye ná mı᷆ kwu ’uhwo-gi. ¹³ Ikeb angi Ujeso Ukristi u᷆ ke-m na᷅ ı᷆ shi-m mì yi lè ’iken ashi mı᷆ shi biwom bimen i puu. ¹⁴ Ukpor men ma shi ’i ngbebb ná ma kpell mi nyong mì yi he igben i. ¹⁵ Men bendi Ufilipai, men-agyang ma ngye le nyong mi kpi ’ikwu abunale ’isom ’inunung gbe lè Ujeso, kung lè há he ’unyong ahwu mi ma bo lè he ’ubong Umasedonia, men ufe-ufe na᷅ mà kee-kee yi liwu bendi abongale angi li kpell mi som únde ke-m le mì hwua igben igi. Ki ma yi lè liwu bendi abongale lisuso angi li ke-m ukpell ye. ¹⁶ He ’unyong ahwu mi ma yi he ’ubong Utesalonaika or, men ma maa som biwom gbamm ’ugbe ibwan-ibwan hwaa lè mi abi bi hwua mi igben. ¹⁷ Yi le ugim ugi ù yi he biwom abi ma᷆ ke-m a ye, ukpor ù yi he lifem angi Unim u᷆ be ke men gbe he biwom abi ma ke-m a. ¹⁸ Biwom abi ma som ke-m, bi keè nya dell-dell-dell, ma ke bi fel go gbe gyong ’itaa mi ndor lishi. He ’unyong ahwu Ipafrodates a be lè bi ke-m, kì tem yi lè ’iwom ashi ’i gben mi ye. Biwom bimen abin bì yi-m ná ’iwom ashi undi u᷆ ting shī ’inde shang Unim ashi ’ı᷆ nung nyin he. Kitaa ashangale anwun a nyin he ’indee-indee. ¹⁹ Unim ugi u ba ka amen biwom puu abi bi fong amen gbe he ’ingbebb ’ima ashi ’i dyam, ashi ’ì yi ha Ujeso Ukristi. ²⁰ Mà lì pee Atyetyan Unim ngyor igye kpamm! Kì ngyor ná mi kong. ²¹ Bendi puu abe bè yi ke Ujeso Ukristi, mà kong mi lè be. Bebuye bendi Unim abe lè hen be kong lè men titi. ²² Bendi Unim abe hen puu be kong lè men. Mbee-mbee lè bendi abe lè he ushu Usu ukaandi angwu he Urom angwu be᷆ ko le Usiza be kong lè men puu. ²³ Atyetyan Ujeso Ukristi ù hā ke men puu ’ukwun.