Philemon

Philemon

¹ Mi Uporl angwu mì yi igaadye he ’uhwo Ujeso Ukristi lè unwandatyan Utimoti na᷅ lı᷆ fee ’ushia ahwun hwaa lè wo, udim-tyan Ufilimon. Ki nyin li lè wo nya a na wo᷆ shi aki Ujeso Ukristi utung ha abel i. ² Li kee le wò kong li lè Afia angwu ù yi unwandatyan ungingye lè Akipes angwu u᷆ shi aki kang-kang utung ha abel ná undi ishogya. Kong li lè liwu bendi abongale angi lı᷆ kpee fe Unim ha awo ushom or titi. ³ Unim Atyetyan lè Atyetyan Ujeso Ukristi bè hā ke men ’ukwun, be mbee shi hè ’ì kwun amen he atyam kpatiaa. ⁴ Unwandagi Ufilimon, mbee ’unyong kpamm mı᷆ kong ha Unim ugi, mi mbu lè wo, mi pee he he ’uhwo ’ugang, ⁵ likorye mi gyo le ’i nyin-a lè bendi Unim puu, wo mbee fe lityam ha Atyetyan Ujeso. ⁶ Mi kong ha Unim le utyang ugang ha bendi abongale ù shi ’ì nung-a dangg le Ujeso Ukristi a ke li ’ukwun kangg gbe he agwaale ipel ha ahe. ⁷ Unwandagi, benyin begang abe wo tyung bendi Unim be shi-m mi fel lè igor kangg, be mbee fe-m ingie likorye be shi bendi Unim mbee bipi be fel lè ingie. ⁸ He atan-lengi anwun ’ì yi le hang mi ka-a uten faale ’ushell le wò shi a᷆shi ’ì yi dell-dell, le bwo mì yi unwanaa he Atyetyan Ujeso Ukristi, ⁹ ukpor mi tya-a uten ye, mi tim-a anung á likorye ’i nyin mi lè wo. Mà na mi Uporl angwu mì yi unwaa-isom Ujeso Ukristi, mì yi he igaadye ’anaa-anaa i likorye mi fa Ujeso Ukristi or, ¹⁰ mi tim-a anung he lishi Undesimes angwu ù yi-m ná unwaa angwu mi hwan ihwan nà. Mi shi-e a fel lè lityam afele ha Ujeso Ukristi nyin ná mì yi hen he igaadye nyin. ¹¹ Mi ngye le, lè he item a ma yi lè lifem ka-a ye, ukpor ’anaa-anaa i a fel lè lifem ke li, bel lè wo puu. ¹² Mi ndo tem lè Undesimes angwu ’i nyin mi lè he som ka-a, ¹³ mà na mi ma kee le mi tyang he u kwa ha ami hen or. Mi kee he le hang a ke-m ukpell lishi ligang nya a na mì so hen he igaadye angi be kwu-m fe le bwo mi bun ’isom ’inunung i. ¹⁴ Mi tyang he kwu hen ye likorye mi wa ngye ugim ugang gbe lè shi ye. Mà na or, mi kee le mi ngie fa-a le wò kpell mi kpe-kpe-kpe a ye, ukpor mi kee le wo-gyang wò shi a᷆shi ’i nyin-a he lityam. ¹⁵ Pisoye ’i ngbebb le Undesimes a tyang-a he ’anwaa ’unyong zangg le he-e ù tem be kwu ha awo há kpamm. ¹⁶ Kanaa-anaa i ù nem yi ufee ufe-ufe a ye. A fel dyam hwò ufee. Ki nyin li lè he ná unwandatyan ha Ujeso Ukristi. Ki nyin mi lè he kangg. Mi ngye le wo or titi, ki ba nyin-a lè he fel gbe gyong i-mi or, likorye ù yi-a he ’ukpo ná ufee lè unwanaa ha Atyetyan Ujeso Ukristi. ¹⁷ Nya a na mi ndo som Undesimes ka-a i, gbe wo ngye le bel lè wo li sha aki Unim ukem a, wo kpe-e nya a na hang wò kpe-m mi. ¹⁸ Gbe a ma shi ’iwom ban-a or, u zi-a lihwua or, bo ābi fe-m. ¹⁹ Mi ndo fee ashin lè ’ubwo ’ugi le: Mi Uporl, mi ba hwee-a ángi. Kì yi le mi mbee da-a he ungwu a le gbe he aki Unim angi mi shi na᷅ wo fel lè likpan ’unyong ye. ²⁰ Ungwiye, mi tim-a anung le wò ke-m ukpell angwu mi bii-a he ’uhwo Atyetyan Ujeso. Ashin ’i ba fa-m ingie ná unwanaa ha Ujeso Ukristi. ²¹ Mi fee ’ushia hwaa lè wo likorye mi fe lityam ha awo le wo ba sha ’iwom ashi mi bii-a le wò shi i nyin. Mi ngye le faale ifung wo ba sha gba gyong ’itaa mi bii or. ²² He ’unyong ’umen i wo baā lishi ligi. Mi ndor lishi ha Unim le u fan ’ukye ’ūme᷅n, sha ’ukwo ka-m mî be kong lè men. ²³ Ipafras angwu ù yi he igaadye utung ha ami he ’uhwo Ujeso Ukristi u kong lè wo. ²⁴ Baà Umak, lè Alistakes, lè Udimas, lè Uluk abe be᷆ shi aki Unim utung ha ami, Uporl, be mbee kong lè wo. ²⁵ Atyetyan Ujeso Ukristi ù hā ke men puu ’ukwun.