Jude
11 Mi Ujud angwu mì yi unwanam Ujems, mi shi uboyi Ujeso Ukristi na᷅ mı᷆ fee ’ushia ahwun. Mi fee āhwu hwaa lè men abe ’i nyin Atyetyan Unim lè men, u waa kung amen le mà kwu bema, men abe mà yi he abwo Ujeso Ukristi. 2 Unim ù hā kwu lè beshi ha amen kpamm, u shi hè ’ì kwun amen he atyam kpatiaa, u shi benyin bema be sho ha amen yilididi. 3 Bedim-gi lityam, mi ma yi lè ’igyor kangg le mi fee da amen gbà lè likpan ’unyong angi Unim a ke li bel lè men puu i a, ukpor mi tem fel nde shi ’ì yi kpe-kpe le mi fe men ingie le mà kwu ’igyang gbe lè Ujeso Ukristi abwo kpebakaa, ma kang āshi hè bendi bè gie āshi ye. Kigyang ashi Unim a ma ke bendi bema ’i sho yilididi, ki ngyor ’itaa ken ngyor igye kpamm. 4 Mi kong ashin likorye bendi besuso abe be᷆ ke Unim ife ye, be nyia gbe be fel he liwu līme᷅n. Bendi aben be da le bwo Unim ù yi lè inung ’indee-indee, be kwu ’ubwo he inung Unim a, be shi bibibi ’itaa be kee. He ashele ’itaa ana be swan Atyetyan Ujeso Ukristi angwu ù yi Usu utyan. Be ma fee he ’ushia Unim leěti le bendi abe be᷆ shi biwom abina be nim. 5 Mà na ma ngye biwom abi mi ndo kong i mà or, mi kee le mi well amen ábi. Mà well le leěti Unim a ma fem bendi Izwell lè há ’ubong Igyept, lè he ’ushu a ma gwu a᷆be be bong ha ahe ’igyang-igyang ye. 6 Idengell Unim angi i ma kpo utebb Unim or, i ma ngyor kwu he libwo angi Unim a ndor āngi ye, i bo tyang ’iteng kpa-kpa ashi Unim a ke ngi. He ashina Unim a ma kwu āngi lè fe he lifee he ’ipi ’ifufebb ’ì yi kpenn, be fe ngi ashishilika tyuu há ngyor igye kpamm. He Liti likaandi angi Unim u᷆ be tang bendigye ushe, u tang āngi ife or titi. 7 Mà well likong ’ubong Usodem lè ’ubong Ugomora lè abe be ma ndē há kel-kel or titi. Bendi abong anyina be maa tan akpela, be shi ’itaa ’ibibi ’iyang-yang ashi lityam libell li de be le bè shi a᷆shi ’ì yi le hang undigye ù shi ye. He ashina Unim a ma kung ’ìndē ashi ’ı᷆ ngyor igye kpamm ke be ’ingie hè ’ì kwu utebb ke bendi puu le Unim u ka bendi abe be ke-e ife ye ’ingie. 8 Bendi bemen abe be fem he liwu līme᷅n i, be sha bitaa bibibi atyetye-atyetye nya a na bendi abena be maa shi a. Be nda biwom he itam, be de le Unim na᷅ a tyung ābe ábi. He ashina be tan akpela ban inyiahwo ibell; be bong le be kwa he ’ubwo Unim ye; be kong bia idengell Unim angi i dyam ’indee-indee he lifung-atabe. 9 He ’unyong ahwu Umaikell angwu ù yi atie-lishi idengell Unim puu a ma kin likwom Umosis lè Usetan, Umaikell a ma naa lè ’uhwo-ma kong ’ibibi ha Usetan or, ngwu ù nyan he or ye. Ukpor a ma de-e le: "Unim-Unim na᷅ u᷆ ben-a." 10 Bendi bemen abe be fem he liwu līme᷅n i, be kong ban biwom abi be ngye ye. Bè yi lè ugim ye a ná inyia libeb a; kiwom ’iyang-yang ashi ’i bé be he lityam mà ’i mbee a, be sha āshi ’i bé be he lityam mà ’i mbee a, be sha āshi. Nya a na be shi ashin be be lè linim ke ’uhwo-bell. 11 Ki ba kwa ’ibibi ka ābe. Be pwom abee abibi angi Uken. Be shang ’uhwo-bell puu ke he ’ibibi ashele hè be bè ndè úndē ná Ubelem a ma shi. Bè yi lìshī likaa-likaa nya a na Ukora a ma yi a; be ba nim nya a na ufe a ma nim a. 12 Nyong ahwu ma᷆ kpee ukem zī lizi, bè yi he liwu līme᷅n ná bikpaa umbe he ’ihwom ’ifung nà, bè yi ibia a ke liwu līme᷅n, likorye be sha likpe libibi. Be kwa ipel ha amen nya, be za᷆ be gwul ye, be ngwo ’i kpè be ye, be gim ’uhwo-bell ’ufe-ufe-ufe, bè yi lè ishwia he lishi ye. Bè yi lè lifem ye a ná ’ibu ashi ’ufem ’u᷆ shì paa āshi ’i ndor umbwo ye a. Be shi ná ìkwán angi ı᷆ wum ye nà. Mà na ’unyong ahwu be᷆ bung āngi ’u fel or, i kwa lè agbe ye. Be mbee shi ná ìkwán angi be wob āngi, i hwō lè idaa lè idaa nà. 13 Bè yi lè ’ipi bè naa ye ná ’ipuupuu umbwo nà. Biban bibell bi fem he igye gboo ná bihwu umbe bı᷆ fem ndē he likwu umbwo nà. Be mbee shi ná ikpen angi ı᷆ kwu he ’iteng ken kporr ye nà. Kiteng ashi ’ifufebb ’i gye há kpenn hwò puu na᷅ ’ì yi kam ndor ābe, be ba kwa nya a ngyor igye kpamm. 14 Leěti Inok angwu ù yi he ūgbè ledyong-ifee kung lè ha Adam, a ma kong ’iwom ashi ’ı᷆ be shi fe bendi abe ’itaa ana. A ma de le: "Atyetyan u ba ba lè idengell ima asisilisi asisilisi. 15 U ba tang ushe bendi puu. U ba ka bendi abe be ke-e ife ye ana libi he ’uhwo bibibi abi be᷆ shi fe-e gbe gyong akongale, lè igie ibibi angi bendi bebibi ana be᷆ shi fe-e gbe gyong akongale, lè igie ibibi angi bendi bebibi ana be᷆ kong bia he." 16 Mbee ’unyong puu bendi bemen i be nem inem, be ben bendi. Kiwom ’iyang-yang ashi ’i bé be he lityam, mà ’i mbee a, be sha āshi. Be kung ’uhwo-bell pwom ungwu, be kong ungwu benyin-benyin hè bendi bè shi a᷆shi befe be kee. 17 Bedim-gi lityam, men ufe mà well biwom abi leěti bebwaa-isom Atyetyan Ujeso Ukristi be maa de le bi ba sha. 18 Be maa da amen le: "He ati umbee-likel igye anyin bendi-inyan be ba ba àbe be᷆ be nyan bendi Unim, be ke Unim ife ye. Be kee-kee sha a᷆bi àtyám abell a de be le bè shi a." 19 Bendi bemen i na᷅ be᷆ tan lè bikwu agieale he liwu bendi Unim. Ukatia Kunyong Unim na᷅ u᷆ teng ābe hé abi be᷆ shi ye, be kee-kee sha a᷆bi bi be lè he igim ibell ife-ife a. 20 Bedim-gi lityam, men ufe mà fe bende ingie hè men mà kaā naa genn he biwom abi ma bong, abi Unim ugyang na᷅ a tyung amen. Mà kong ha Unim mbee ’unyong puu he ikeb Ukatia Kunyong Unim. 21 Mà ngyor kwu he benyin Unim nya a na mà yi kwu ma᷆ nyong ’unyong ahwu Atyetyan Ujeso Ukristi u᷆ be kpē men he beshi bema lè kwu ipel ha ’uhwo-ma ngyor igye kpamm. 22 Kì yi lè bendi abe be fel lè igim ifee, mà shi ābe hè ’igyang ’ì nung ābe. 23 Kì yi lè bendi besuso abe ’ì yi le mà kin fem ābe lè he ’inde. Ki mbee shi lè bendi besuso abe ’ì yi le mà kwu lè beshi ha abe, ukpor mà baa ’uhwo-men kangg, teng befe be tem lè men lam kpa fa he liwu libell. Mà gbe lè abwo fe he ’iwom ’ibell ’iyang-yang ye, mà tel-tel lè inditen ibell or, likorye i fel àbēl-àbēl gbe he bigyor bibibi bibell. 24 Mà lì pee Unim. Ufe na᷅ ù yi lè ikeb le u kpell amen ma naa genn hè men mà tyang ’ukwo ’uma ye. U shi lè ikeb le u sha amen mà fel gelalala faale ’iban, he-e ù te lè men lè naa he ’ushu ’uma, ufe Unim angwu a dyam hwò puu. Nya na᷅ ma᷆ yal gor igor lè ibubo he ungwu. 25 Mà lì pee Unim angwu ufe-ufe na᷅ a dyam hwò puu. Ufe na᷅ a kpan li gbe ha Atyetyan Ujeso Ukristi. Ipee puu lè ifem puu ì kwu ke-e. Ufe na᷅ u yi Usu, u teng li, ikeb ima ì yi ngyor igye kpamm! Kì yi nya ’itaa i kung lè há linde, kì so ná ’unyin i, ki kwa ná ngyor igye kpamm! Kì ngyor ná mi kong.