John

John

¹ Lè há linde-linde nyong igye anyin i ma wa fel ye, igie Unim i ma yi. Ufe angwu ù yi igie imen ana, a ma yi ipel ha Unim, u shi Unim ugyang a. ² Kung lè há linde-linde ufe lè Unim be ma yi ubibi ken. ³ Unim a mbe bendi lè biwom puu gbe ha ufe a. Kì yi lè ’iwom ’iyang-yang or ashi Unim a mbe faale he ye. ⁴ Ufe na᷅ a be lè likpan ke bendi puu. Kikung-gbo ’i be lè ha likpan limen ana a, ki shi bendigye be ngye ’igyang. ⁵ Kikung-gbo ana ’i taa he ’ifufebb, ukpor ’ifufebb ’i nim āshi mbee ye. ⁶ Leěti, Unim a ma som undi ususo angwu be maa ko le Ujon. ⁷ Unim a ma som he le ù be bun de bendi gbe lè ’ikung-gbo ana, le hè bendi puu bè gyo, be bong kpe ’isom ’imen ashi Ujon a maa bun ana. ⁸ Ufe-gyang na᷅ a ma yi ’ikung-gbo ’imen ana ye, ufe a kee-kee be le he-e ù bun de bendi gbe lè ’ikung-gbo ’imen ana a. ⁹ Kikung-gbo ’imen ’igyang ashell ashi ’ı᷆ ke bendi puu ’ikung-gbo i, ki ma ndor àshì ’i ba he igye anyin. ¹⁰ Ufe angwu ù yi ’ikung-gbo ’igyang ashell a be he igye i. Mà na Unim a mbe igye anyin gbe ha ufe a or, bendigye be ngye-e ye. ¹¹ A be he ’ubong ’uma, ukpor bendi bema be swan he. ¹² Ukpor abe be kpe-e, be mbee bong ha ahe ’igyang-igyang, u buu ’ukwo ke be le bè fel bebwaa Unim. ¹³ Lihwan libell limen ana li be lè he ubu a or, ngwu lì be gbe he ugim undigye a or ye. Unim ugyang na᷅ a hwan kung ābe. ¹⁴ Igie angi i ma yi Unim ana i bel undigye, a be kwu ipel ha abel he ’anwaa ’unyong zangg. Li nde ìfém ima angi i be lè ha Unim Atyam angwu a hwan he a he unwaa ken. A ngbebb inung kangg, kigyang ’i shi ha ahe mbee ’unyong. ¹⁵ Ujon a de bendi gbe lè he le: "Mà nde undi angwu leěti mi maa de men gbe lè he le angwu u᷆ be-m lè há item a dyam hwo-m likorye ufe ù yi mà ukpong be hà hwan mi." ¹⁶ Le bwo a ngbebb inung kangg, a ke li bel puu ’ukwun ’ugbe ibwan-ibwan. ¹⁷ Unim a ke li Iten ima gbe ha Umosis, ukpor gbe ha Ujeso Ukristi, igie ima, na᷅ a tyung inung lè beshi ha abel, u mbee fem ’igyang he igye gboo tyung li. ¹⁸ Kung lè há ukpi-ikwu igye anyin, kì yi lè undi angwu a wa nde Unim lè ashi ngye ye. Ujeso Ukristi ’ugbe Unwaa-ma a ken angwu ù yi gwaa lè Atyam, ufe na᷅ a tyung li ’itaa Atyam ù yi. ¹⁹ He ’unyong ken bekaandi Ijuus abe he Ujeruselem be som bendi abe be᷆ shang Unim lè bendi abe be᷆ be ubu lè ha ’ikwu Ulibai le bè lè bii Ujon ’itaa undi ashi ù yi. ²⁰ Ujon a ma fan ābe le: "Mì yi Ukristi angwu Unim a waa le ù kwu Undi-likpan igye anyin a ye." A ma kong igie anyina gboo he atyung bendi abena puu. ²¹ Be mbee bii he le: "Fe wò hà yi ayang a? Wo na᷅ wò yi Ilaja a?" Ujon a swan. Be mbee kung bii he le: "Wo na᷅ wò yi undi angwu u᷆ tye ugie ’isom Unim angwu ’ushia Unim ’u᷆ kong gbe lè he ana a?" Ujon a swan le ù yi ufe a ye. ²² He ashina be mbee kung bii he le: "Fe wò hà yi ayang a? De li lî lè de abe be som li. Kibang ashi wo᷆ de li gbe lè ’uhwo-gang?" ²³ A fan ābe le: "Mi na᷅ Azaya angwu leěti a maa tye ugie ’isom Unim a maa kong gbe lè mi nyong a ma de le, ’Undi u ba gaa lè he libeb le, Atyetyan u ba lè há, mà shi ’ukwo ahwu ’u᷆ ngbebb ndor he he-e ù be gbe.’ " ²⁴ He liwu bendi abe be som ana, Iferesis i ma gia yi há; ²⁵ be kung bii Ujon le: "Bwo wò yi Ukristi, Undi-likpan angwu Unim a som be he igye a ye, wo shi Ilaja a, ngwu wò kwu undi umen angwu u᷆ tye ugie ’isom Unim angwu ’ushia Unim ’u kong gbe lè he ana a ye, bang a, wò hà kib bendi he umbwo?" ²⁶ Ujon a fan ābe le: "Mi kib bendi he umbwo, ukpor undi ususo ù yi naa he liwu līme᷅n angwu ma ngye-e ye. ²⁷ Ù yi undi angwu u᷆ be-m lè há item a, mi kpee he he ’ubee or ye." ²⁸ Leěti biwom abin bi ma shi he Beteni he igbindi umbwo angwu be᷆ ko le Ujodan he ’ipi Ujon a maa kib bendi he umbwo a. ²⁹ Ashi a fem taa, Ujon a nde Ujeso u ba hwaa lè he, Ujon a kung de le: "Mà nde Unwaa Utia Unim angwu a mbee lè biban bendigye. ³⁰ Ufe na᷅ mi ma kong gbe lè he nyong mi ma de le angwu u᷆ be-m lè há item a dyam hwo-m kangg, likorye ufe ù yi-m lè he ’ushu. ³¹ Leěti mi or mi ma ngye-e ye; ukpor atan-lengi angwu mi maa kib bendi he umbwo ù yi le hè men bendi Izwell mà ngye-e a." ³² Ujon a ma mbee kong gboo gbe lè Ujeso Ukristi le: "Mi ma nde Ukatia Kunyong Unim ná a shul lè he lifung-atabe be he itang. A ma shul ná ’alulu be so-e he lishi. ³³ Kpamm be wu he ’unyong ’umen ana, mi ma wa ngye-e ye, ukpor Unim angwu a ma som mi le mì be kib bendi he umbwo, a ma de-m le, mi ba nda Ukatia Kunyong Unim ná u᷆ shul lè he ’usi be he itang be so undi-iso he lishi. Kitaa ana na᷅ mi shī ngye undi ùmén angwu u᷆ be kung Ukatia Kunyong Unim kib bendi i. ³⁴ Mi nde biwom abin puu ’itaa a ma de-m. Kife na᷅ mi de men gboo le ufe anwun ù yi Unwaa Unim a." ³⁵ Ashi a mbee kung taa, Ujon a ma mbee yi naa nya lè bendi-utung bema befee. ³⁶ A nde Ujeso a be, u gba, a de be le: "Mà nde Unwaa Utia Unim ana." ³⁷ Bendi-utung Ujon befee ana be gyo he a kong ashin, be mà bo pwom Ujeso. ³⁸ Ujeso a bel àshì he item nde be be pwom he, a bii ābe le: "Mā kee ’ibang a?" Be fan he le: "Urabai, wò yi he hung a?" (Likpe angi le Urabai li ze le Itisha.) ³⁹ Ujeso a de be le: "Mà bé nde." Be ma gbe utung ha ahe lè nde he ’ipi ù yi, be ngyor kwu ha ahe há kpamm gyebb likwulukwu. (Kunyong ahwu Ujeso a kong ha abe, ku ma yi índē ìndè angi ishu likwulukwu a.) ⁴⁰ Bendi bemen befee abe be ma gyo Ujon, be gbe pwom Ujeso ana, be ko angwu ken le Andru. Ù yi unwanam Usaimun Ipita a. ⁴¹ Andru ana a buu akye lè ndè ungwende Usaimun, a kung de-e le: "Bel li ndè Umizaya." (Likpe angi le Umizaya lì yi itaa ken ha likpe angi le Ukristi. Likpe anyin lì yi le Undi-likpan angwu Unim a som be he igye anyin.) ⁴² Andru a ma te lè Usaimun lè hwaa lè Ujeso. Ujeso a nde-e, a kung de-e le: "Usaimun, unwaa Ujon, lizen ligang angi ken li fel le Usifas." (Lizen angi le Usifas lì yi ’itaa ken ha angi le Ipita; puu angi afee a ze le kukor.) ⁴³ Ashi a fem taa, Ujeso a bo u gya he ’igie Ugalili. A nde Ufilip angwu ù yi ’ubong Besaida ahwu Andru lè Ipita be᷆ be. A de Ufilip le: "Bo lì gye." ⁴⁵ Ufilip a bo lè nde Unatandyell, u de-e le: "Li nde undi angwu leěti Umosis a ma fee gbe lè he he ’ushia Iten Unim, bendi abe be maa tye ugie ’isom Unim or titi be fee gbe lè he. Be ko he le Ujeso; ù yi ’ubong Unazaret, u shi unwaa Ujosef a." ⁴⁶ Unatandyell a bii he le: "Kinunung ’isuso ’i ba lè he Unazaret â?" Ufilip a de-e le: "Be, mà wo nda ā!" ⁴⁷ Ujeso a nde Unatandyell u ba hwaa lè he, a kung kong gbe lè he le: "Angwu u᷆ be ana ù yi undi Izwell ugyang kpa-kpa faale uman a." ⁴⁸ Unatandyell a bii he le: "Ná wo shi nyong wo ngye-m?" Ujeso a fan he le: "Mí yi nda-a he ’unyong ahwu wó yi yi he liten ukwan angwu be᷆ ko le ufik, mà ukpong Ufilip u hà lè ko-a." ⁴⁹ Unatandyell a kung de-e le: "Urabai, wò yi Unwaa Unim a; wo shi Usu Izwell a!" ⁵⁰ Ujeso a de-e le: "Wo tia bong le mì yi Unwaa Unim a le bwo mi da-a le mí yi nda-a he liten ukwan a? Kigyang-igyang, wò hà ndo nda biwom bi gba gyong ashin." ⁵¹ Ujeso a mbee de be le: "Mi da amen ’igyang a le, ma ba nda lifung-atabe li buu ndor gboo, ma nde idengell Unim ná ı᷆ gye he ’usi, i tem shul be he itang gbe ha ami Unwaa Undigye."

¹ Ati a gbe afee, ki ma yi lè ’ipam libee he lishi Ugalili angi be᷆ ko le Ukena. Anam Ujeso a ma yi há. ² Be ma hwaà Ujeso lè bendi-utung bema gye ’ipam ’imen ana. ³ Be shi ’ipam fel he ’ukwo, kutyuo ahwu be maa ngwo ’u mbee. Anam Ujeso a kung bo lè de Ujeso le: "Kutyuo ’u mbee." ⁴ Ujeso a fan he le: "Iye, wo fel da-m mi â? Kunyong ’ugi ’u wa fel ye." ⁵ Anam a tem lè de abe be᷆ ke lizi he ’udyan le: "Kiyang-yang ashi a de men le mà shi, mà shi āshi." ⁶ Ki ma yi lè itetel Ijuus a le be to bituto. He ashina, nya ’iteng ’imen ana be ma tyung bishang umbwo bidyong-ken abi be᷆ fe umbwo shi itetel ibell. Bishang abina bi ma dyam kangg le ’ishang ken ’i za᷆ igung-gung umbwo kung lè ha lisi gya ha lisi lè ngi lihwo. ⁷ Ujeso a kung de abe be᷆ ke lizi nya he ’udyan le: "Mà fe umbwo sho bishang abina puu." Be ma fe umbwo sho ābi puu ndor he atyung yilidididi. ⁸ Ujeso a hà kung de be le: "Mà ndo kwan umbwo lè he bishang ana lè ke angwu a kwu lishi ’idem." Be mà kwan umbwo angwu a bel ’utyuo ana lè ke-e. ⁹ Abe be᷆ ke lizi nya he ’udyan be ngye he ’ipi ’utyuo ’u᷆ be, ukpor angwu a kwu lishi ’idem a ngye ye. Nyong a tim āhwu he ungwu, ki kwu-e he ’uhwo kangg. A ko ukyebb ungye, ¹⁰ de-e le: "Bendi be kung ’utyuo ahwu ’u ngbebb a ka bendi ’ushu. He ’unyong ahwu be ngwo ’utyuo kangg, be hà be lè ahwu ’u ngbebb ye be ke be. Ukpor, wo ufe wo shi ná ye, wo be lè ahwu ’u ngbebb hwò a ke likel." ¹¹ Kikwele-uhwo ashi Ujeso a ma shi he Ukena he ’ubong Ugalili i na᷅ ’i ma yi ukpi-ikwu ’ikwele-uhwo ashi a shi. Gbe he ’ikwele-uhwo ashina Ujeso a ma tyung ikeb ima. He ’uhwo ashi bendi-utung bema be bong le ù yi Unwaa Unim a. ¹² Be mbee ’ipam puu, Ujeso lè anam lè bebwanam lè bendi-utung bema be bo gye he Ukapanyam. Be kwu há ati zangg a. ¹³ Nya he ’unyong ’umen ana, kunyong ’ipam Ijuus ashi be᷆ ko le Kipam Agbele-gyong ’u ma fel kpee-kpee. He ashina, Ujeso a ma bo gye ’ipam ana he Ujeruselem. ¹⁴ A lè wu há, a gbe gye he Ushom Unim lè nde bendi há abe be maa ndyebb bityuale lè inwaa ukwuo abakpa zi, lè abe be maa gie únde. ¹⁵ A kung udong-si ndeb lè bendi puu lè bityuale lè há wu he igye. U nyii itebul bendi abe be᷆ gie únde wu hell, paa únde ubell wu shaha-shaha-shaha. ¹⁶ A kung de abe be maa ndyebb inwaa ukwuo abakpa zi le: "Mà kung biwom bīme᷅n be gbe gye! Mà mā ma᷆ tyang abwo lè ashele ushom Atyagi le ù fel ’ipi ūshī o." ¹⁷ Nyong bendi-utung bema be nde ashina, be well le be fee he ’ushia Unim leěti le: "Benyin abe mì yi lè be ha Ushom Unim, be dyam gbe ūkee᷅." ¹⁸ Bekaandi Ijuus be ngib na᷆ nya bii he le: "Kikwele-uhwo ashi hung wò nya shi hè ’ì tyung li le wò yi lè ikeb le wo sha ashin?" ¹⁹ Ujeso a fan ābe le: "Gbe ma kem ti Ushom Unim anwun, mi kung ati akie a tem lè he tya." ²⁰ Be fan he le: "Kpash! Wó ngye le be kung aze asi afee lè ngi adyong-ken hà tye-e ukpor? Wo gim le wo kung ati akie a tya he a?" ²¹ Ushom angwu Ujeso a maa kong gbe lè he a ma yi inyiahwo ima a. A maa kong gba lè ’ukwo ahwu u᷆ be hwō, lè ’itaa u᷆ be wum a. ²² He ’unyong ahwu Ujeso a ma wum lè he lihwu, bendi-utung bema be ma well igie angi a kong ana. He ’uhwo ashin be ma bong biwom abi be fee he ’ushia Unim lè igie Ujeso. ²³ Nyong Ujeso a ma yi he Ujeruselem he ’unyong Kipam Agbele-gyong, a ma shi bikwele-uhwo. He ’uhwo abi, bendi gbamm be ma bong ha ahe. ²⁴ Ukpor Ujeso a ma fe lityam ha abe ye, ²⁵ likorye a ngye àtyám bendigye puu. Kì yi le undi na᷅ ù ha᷅ de-e ashi ’ì yi he atyam bendi ye, likorye ufe-gyang a ngye biwom puu abi bì yi he atyam abell.

¹ Ki ma yi lè ungikye Ijuus angwu be maa ko le Unikodimes. A ma yi usu a, u shi undi likwu Iferesis a. ² He liti ken lè ’usu, a ma bo lè hwaa lè Ujeso, de-e le: "Urabai, li ngye le Unim na᷅ a som-a le wò be hwua bendi biwom. Kì yi le undi angwu ù hà ndo kwu lè ikeb shi bikwele-uhwo abi wo᷆ shi kpam-kpam i mbee ye, hà gbe Unim na᷅ a ke-e ikeb a a." ³ Ujeso a fan he le: "Ndor mi da-a ’igyang ’ima. Gbe undi a tem lè ’uhwo-ma hwan ’ugbe ’afee ye, ù hà ndo nda Kiteng-usu Unim ye." ⁴ Unikodimes a kung bii he le: "Ná undi gbel u᷆ tem lè ’uhwo-ma hwan mbee? U nya tem la ngwee he ’utyor anam, u hà mbee tem hwan â?" ⁵ Ujeso a fan he le: "Mi da-a ’igyang a le, gbe undi ù yi lè lihwan angi gbe he umbwo lè ikeb Ukatia Kunyong Unim ye, ù hà ndo gya he Kiteng-usu Unim ye. ⁶ Undigye u hwan unde-ma undigye, u fel lè likpan angi he agwo. Ukpor he ’unyong ahwu Ukatia Kunyong Unim u᷆ tem lè undi hwan, undi umen ana u fel lè likpan lifufe angi lı᷆ be lè ha Unim. ⁷ Ashi le mi de le ’ì yi kpe-kpe le bendigye bè kwu lè lihwan ’ugbe ’afee, kì shī kwa-a he ’uhwo ye. ⁸ Ndè, kiwom ná ’ufem i, ku shà gya he ’iteng ’iyang-yang ashi ’i nyin āhwu. Undi u gyo ’ihwee ashi ’u᷆ shi, ukpor u ngya he ’ipi ’u᷆ be or, ngwu ù ngye he ’ipi ’u᷆ gye or ye. Kitaa ’imen ana na᷅ ’ì yi ha undi uyang-yang angwu ù yi lè lihwan gbe he ikeb Ukatia Kunyong Unim." ⁹ Unikodimes a bii he le: "Ashi wo kong ana ’i hà ze le ana a?" ¹⁰ Ujeso a fan he le: "Wo itisha ubo-ubo he Izwell i, fe likong anyin lı᷆ nung-a ye a? ¹¹ "Mi da-a le, bel li kong gba lè biwom abi li ngye, li mbee de men gbe lè biwom abi li nde lè ashi atyan, ukpor men ma bong abi li kong ye. ¹² Nyong mi de men gbe lè biwom abi he igye anyin, mà ha᷅ bong ye i, ki nya sha ná a, ma᷆ be bong gbe mi de men gbe lè abi he lifung-atabe? ¹³ Kì yi lè undi angwu a bè mbo lè wu he ushu Unim ye, kee-kee kwom ha ami Unwaa Undigye angwu mi shul be he itang ufe-ufe a. ¹⁴ "Nya a na leěti Umosis a ma kung ùshiı᷅ angwu be kung ’índe᷆ a shi-e faa he ukwan kung ndor he ’usi nyong be ma yi he libeb, kitaa ’imen na᷅ ’ì yi kpe-kpe le ìtí-ishi bè be kung i-mi Unwaa Undigye ndor he ’usi. ¹⁵ Be ba sha ná le hè undi uyang-yang angwu a bong ha ami ù kwu lè likpan ligyang angyell ngyor igye kpamm." ¹⁶ Ki nyin Unim lè bendigye kangg. Benyin be shi-e a som ’iken Unwaa-ma be he igye anyin le hè undi uyang-yang angwu a bong ha ahe ’igyang-igyang ù nim ye, ukpor ù kwu lè likpan ligyang angyell ngyor igye kpamm. ¹⁷ Unim a kee le ushe uma ù kwu bendigye i ye. He ashina a som Unwaa-ma be le he-e ù kpan bendigye puu gbe ha ahe. ¹⁸ Undi uyang-yang angwu a bong ha ahe, ushe Unim u ba kwa he ye. Ukpor undi uyang-yang angwu a bong ha ahe ye, ushe Unim a kwu-e or mà, likorye a bong ha ’iken Unwaa Unim ana ye. ¹⁹ Atan-lengi angwu ushe Unim a kwu bendi abe be bong ha Unwaa-ma ye, ù yi le ’ikung-gbo ’i be he igye anyin, ukpor ’i nyin bendi lè ’ifufebb hwo ’ikung-gbo ashina, likorye be shi bibibi a. ²⁰ Undi uyang-yang angwu u᷆ shi bibibi u tel ’ikung-gbo, u pam āshi le hè bendi bè ndè bibibi abi u᷆ shi ye. ²¹ Ukpor undi uyang-yang angwu u᷆ shi biwom kpa-kpa, ki nyin he lè ’ikung-gbo le hè bendi be ndè gboo le u sha biwom abi bi ngbebb Unim. ²² Nyong ashin ’i mbee, Ujeso lè bendi-utung bema be bo gbe ndo he ’igie Ujudia. A kwu lè be há, ù yii kib bendi he umbwo. ²³ He ’unyong ’umen ana Ujon ufe a ma yi he Anon gwaa he Uselim, ufe or a maa kib bendi he umbwo. A ma yi kwu he ’iteng ’imen ana likorye umbwo a ma go há. Bendi be maa gya hwaa lè he há, u kib ābe he umbwo. ²⁴ (Nya ’unyong ’umen ana be ma wa kwu Ujon fe he igaadye ye.) ²⁵ He liti ken, bendi-utung Ujon be maa fa ifung ha undi Ijuus ken gba lè itetel bituto. ²⁶ Be hà bo lè hwaa lè Ujon, be de-e le: "Itisha, undi angwu a ma be hwaa lè wo he igbindi umbwo Ujodan, angwu wo maa kong gbe lè he ana, ù yi há, u kib bendi he umbwo. Bendi puu be gbe tyang li gye lè hwaa lè he." ²⁷ Ujon a kung de be le: "Kì yi lè undi angwu ù yi lè ikeb le u sha ’iwom ’iyang-yang fem angi Unim na᷅ a ke-e tyang ye. ²⁸ Men-agyang ma gyo mi nyong mi de le mì yi Ukristi, Undi-likpan a ye. Mi ufe mì kee-kee yi unwaa-isom angwu u᷆ te-e lè he ’ushu kam ’ukwo a. ²⁹ Ùkyēbb na᷅ ù yi lè ungye. Ukpor udim ukyebb angwu u᷆ kwu gyo udim-ma, u kwa lè igor kangg nyong a gyo igie ima. Kitaa ana na᷅ ’ì yi-m mi fel lè igor kangg likorye mi gyo igie ima mà. ³⁰ Kì yi kpe-kpe le ufe ù fel dyam, mi-i fel zen." ³¹ "Undi angwu a be lè ha Unim ana a dyam hwò puu. Mi angwu mì yi he igye i a, mì yi ke igye a, mi kee-kee kong gba lè biwom igye anyin a. Ukpor undi angwu a be lè ha Unim ana a dyam hwò puu. ³² U da bendi gba lè biwom abi ufe-gyang a nde lè ashi, lè abi a gyo lè ’utyung ’uma, ukpor bendi be kpa he áshi ye. ³³ Ukpor undi uyang-yang angwu a kpe ashi a kong, hà a bong le Unim ù yi ’igyang. ³⁴ Undi umen angwu Unim a som ana u kong ’itaa Unim a de-e a, likorye Unim a ke-e Ukatia Kunyong uma faale ’akwukwell. ³⁵ Ki nyin Atyam Unim lè Unwaa-ma, a kung biwom puu fe-e he ’ubwo. ³⁶ Undi uyang-yang angwu a bong ha Unwaa Unim, u kwa lè likpan angi lı᷆ ngyor igye. Ukpor undi uyang-yang angwu u᷆ ke Unwaa Unim ana ife ye, u kwa lè likpan limen i ye, ingywo Unim i so-e he lishi ngyor igye kpamm."

¹ Bendi Iferesis be gyo le bendi abe be fel pwom Ujeso abe a kib ābe he umbwo be fel go hwà a᷆be Ujon. ² Ukpor Ujeso ugyang a ma kib bendi he umbwo ye, bendi-utung bema na᷅ be maa kib ābe he umbwo. ³ Nyong Ujeso a ngye le Iferesis i fel kong ashin, a bo lè he Ujudia tem ndo he Ugalili. ⁴ Ki ma yi kpe-kpe le ù lè gbe he Usameria a. ⁵ Nya a na Ujeso a tan gbe he Usameria, a lè wu he ’iteng Usameria ashi be᷆ ko le Usakaa. Kiteng ashina ’ì yi gwaa lè ufel angwu leěti Ujekob a ma kung ke unwaa-ma, Ujosef. ⁶ Libell umbwo Ujekob li ma yi nya. Nyong Ujeso a ma wu nya libell umbwo ana, libwee li maa ndo pwom he ’udyan lishi. A bel kwu ko nya likorye litan li ma ngie he. ⁷ Ungingye angwu ù yi ’ubong Usameria a be nya le hè-e ù tyuo umbwo. Ujeso a de-e le: "Bè umbwo ke-m mî ngwo." ⁸ (Nya he ’unyong ’umen ana bendi-utung Ujeso be ma gbe lè há tyang he ututeb, be ma gye he ishu angi ì yi há kpee-kpee hè be bè lè ndyebb lizi.) ⁹ Gyo ungingye ana le: "Kpash! Wo angwu wò yi Ijuus, fe wo de-m mi angwu mì yi Usameria le mì ka-a umbwo a?" Ki kwu-e he ’uhwo likorye Ijuus lè abe he Usameria, be gba kpee bende ye. ¹⁰ Ujeso a fan he le: "Kì kwu le wo ngye gbe lè ’uke ahwu Unim u᷆ ke bendi, wo mbee ngye-m mi angwu mi bii-a le wò ke-m umbwo mî ngwo i, hang wo na᷅ wo de-m le mì ka-a umbwo angwu u᷆ ke likpan, hang mi ka-a ahe." ¹¹ Ungingye ana a de-e le: "Ukaandi, libell umbwo anyin li shul lishi, wo mbee shi lè ’igbor ashi wo᷆ kung tyuo ye, he hung nyin wo᷆ be lè umbwo angwu há angwu u᷆ ke likpan? ¹² Wo kong i le ugang umbwo a fel ngbebb hwò anwun â? Atietyan Ujekob ugyang na᷅ a ma tem li libell umbwo limen i. Ufe or, bebwaa-ma or, be maa ngwa umbwo umen i a, bityuale bima or bi ngwo-e titi." ¹³ Ujeso a kung de-e le: "Undi uyang-yang angwu a ngwo umbwo lè he libell anyin, umbwo a mbee gyor he; ¹⁴ ukpor undi uyang-yang angwu a ngwo umbwo angwu mī-ì ke-e, ù tem kwa lè ’igyor ususo ye ngyor igye kpamm. Umbwo angwu mı᷆ ke-e ana ù yi ná lishi umbwo, u ka he likpan ’unyong angi lı᷆ ngyor igye kpamm." ¹⁵ Ungingye ana a kung de-e le: "Ukaandi, kusi hā ke-m umbwo umen ana, mî ngwo hè umbwo ù tem gyor mi ye, mi tem be he lishor or ye." ¹⁶ Ujeso a kung de-e le: "Tem lè de ukyegang ù be." ¹⁷ Angwu ungingye a fan he le: "Mì yi lè ùkyēbb ye." ¹⁸ Ujeso a kung de-e le: "Wo kong dell-dell a le wò yi lè ùkyēbb ye. Wo bee lè bekyebb be fel bedyong. Angwu wò yi kwu ha ahe há nyin or, ù yi ukyegang a ye. Wo kong ’igyang." ¹⁹ Ungingye umen ana a kung de-e le: "Ukaandi, ki nung mi gboo le wò yi undi angwu u᷆ tye ugie ’isom Unim a. ²⁰ Leěti betietyan be maa fa Unim he ukwell anwun a, ukpor men bendi Ijuus ma de le bè fel gye he Ujeruselem hwan." ²¹ Ujeso a fan he le: "Iye, kunyong ’u ndo fel ahwu be᷆ tem be fe Atyagi Unim he biteng abin bife-bife a ye. ²² Men bendi Usameria ma ngye angwu ma᷆ fe ye. Ukpor bel Ijuus li ngye angwu lı᷆ fe, likorye gbe ha abel Ijuus na᷅ Unim u᷆ be kpan bendi puu. ²³ Kunyong ’u ba ba ahwu bendi be᷆ fe Unim he ’ukwo kpa-kpa, be fe-e lityam ken ’igyang-igyang. Mi de le ’unyong ahwu há ’u fel or mà. Unim u kee bendi abe be᷆ fe-e ’itaa ana a. ²⁴ Unim ù yi ’ūnyōng a. He ashin ’ì yi kpe-kpe le abe be᷆ fe-e bè fe-e lityam ken he ikeb Ukatia Kunyong uma." ²⁵ Ungingye umen ana a de-e le: "Mi ngye le Ukristi angwu Unim u᷆ som le ù be kpan bendi u ba lè há. Nyong u᷆ be be, u sha biwom puu bi nung li." ²⁶ Ujeso a de-e le: "Mi angwu mı᷆ kong ha awo i mì yi ufe a." ²⁷ Nya he ’unyong ’umen ana bendi-utung Ujeso be tem be. Nyong be nde-e u᷆ kong ha ungingye, ki kwu ābe he ’uhwo. Ukpor undi ubell ken or a bii angwu ungingye ashi a kee, ngwu bè bii Ujeso atan-lengi angwu u᷆ kong ha ahe ye. ²⁸ Ungingye umen ana a hà tyang ’iki ’ima ndor nya gbe ligbe-ligbe gye he lifung-ushu, u fel da bendi le: ²⁹ "Mà be nde undi angwu a de-m biwom abi mi shi kung lè há ’isun ’igi. Hà ù nya yi Ukristi angwu Unim a som le ù kwu Undi-likpan a or?" ³⁰ Bendi be mà ti kwuo ndo he ’ipi Ujeso ù yi. ³¹ Nyong angwu ungingye a gbe ndo há he lifung-ushu, bendi-utung Ujeso be tim he anung le ù zī lizi. ³² Ujeso a fan ābe le: "Mì yi lè lizi angi men ma ngye ngi ye." ³³ Bè ha᷅ fel kong ha bende le: "Hà undi a be lè lizi ke-e hen or?" ³⁴ Ujeso a de be le: "Dia! Lizi ligi lì yi le mì shi nyin Atyagi angwu a som mi le mì shi aki ama kpamm mi gbe mbee āngi. ³⁵ Men ma bun ityang le ’i teng afell ande mà ukpong bikwukwan bi hà bi, ukpor mi da amen le, mà bel àshì nde gye he útiá hè men mà nde ná bikwukwan bi bī fel atamale. ³⁶ Undi angwu u᷆ tam a nde lifem aki ama, le hè undi angwu a ma kwan lè angwu u᷆ tam bè kwu ukem yal gor. Kitaa ’imen na᷅ ’ì yi ke bendi abe be᷆ be lè bendi le bè be kwu lè likpan ligyang angyell angi lı᷆ ngyor igye. ³⁷ Kì yi nya a na ityang i kong a le, undi-iso u kwan, unde-ma u fem. ³⁸ Mi som amen le mà lè fem biwom abi men na᷅ ma kwan ye. Bendi besuso na᷅ be kwan ābi, men ma fel la za᷆ lifem abi bendi be shi a." ³⁹ Bendi Usameria gbamm abe be ma be lè he lifung-ushu, be ma bong ha Ujeso le bwo ungingye umen ana a de be le Ujeso a de-e biwom puu abi a shi. ⁴⁰ He ashina be tim he anung le ù ngyor kwu ha abe há. A bong ngyor kwu há ati afee. ⁴¹ He ’uhwo igie Ujeso, bendi besuso gbamm be mbee bong ha ahe. ⁴² Be kung de ungingye umen ana le: "Igie igang na᷅ i tem shi li li bong ha ungikye anwun ye, li bong likorye bel-agyang li gyo he lè atyung atyan a. He ashina li ngye le ’igyang-igyang a, ù yi Ukristi, Undi-likpan bendigye a." ⁴³ Ujeso a kwu nya ati afee, a hà bo tem ndo he ’igie Ugalili. ⁴⁴ A gye he Ugalili ’ubong ’uma ’ugyang, likorye a ngye le, "Angwu u᷆ tye ugie ’isom Unim u kwa lè ife he ’ubong ’uma ye," nya a na ufe-gyang u shii kong a. ⁴⁵ Nyong a wu há he Ugalili, bendi be kpe-e igor-igor likorye befe or be ma yi há he Ujeruselem he Kipam Agbele-gyong, be nde bikwele-uhwo abi a ma shi há he ’unyong ’umen ana. ⁴⁶ Nya ’unyong ’umen ana Ujeso a hà tem item gye he Ukena he ’igie Ugalili ashi leěti a ma kung umbwo bel ’utyuo. Ki ma yi lè unwaa úkaandi ususo angwu a ma yi gogo ye he Ukapanyam. ⁴⁷ Nyong ukaandi umen ana a gyo le Ujeso a gbe lè he Ujudia be fel he Ugalili, a lè hwaa lè he há, u tim he anung le ù gye he Ukapanyam he-e ù lè mbee he unwaa, likorye a kwun teng he lityam lityam. ⁴⁸ Ujeso a kung de ukaandi ana le: "Men ma swan le ma bong ha ami faale afaale ma nde bikwele-uhwo ye." ⁴⁹ Ukaandi ana a kung de Ujeso le: "Ukaandi, bé lì hā gye akikye teng unwaa-gi u hwa᷆." ⁵⁰ Ujeso a de-e le: "Tem ndo gye he ushu, unwaa-gang u hwa᷆ ye." Ungikye ana a bong igie angi Ujeso a kong, u gbe ligye. ⁵¹ A lè fel kpee-kpee he ushu, bebwaa-ushom bema be be kpee lè he, be de-e le unwaa-ma a mbee. ⁵² A bii ābe le: "Kunyong ahwu hung inyiahwo ima i kwun he?" Be fan he le: "Uhwuhwo lè ishu nyong libwee li bel ’ubwo bel-bel na᷅ inyiahwo i ma kwun he." ⁵³ Ātyām unwaa umen ana a ngye le nya he ’unyong ’umen ana na᷅ Ujeso a ma de-e le unwaa-ma u hwa᷆ ye. He ’uhwo ashina, ufe lè bendi bema puu be bong ha Ujeso. ⁵⁴ Kikwele-uhwo ashi Ujeso a ma shi he Ugalili he ’unyong ahwun nyong a be lè he Ujudia na᷅ ’ì yi utepwom ’ikwele-uhwo ashi a shi, hè ’ì tyung bendi ikeb ima.

¹ Nyong ashin ’i mbee, le bwo ’i ma fel ’unyong ahwu Ijuus i maa shi ’ipam ’ibell, Ujeso a mbee gye he Ujeruselem. ² Ki ma yi lè umbwo ususo há he Ujeruselem gwaa he ungwu likong ’ipo itia. Be maa ko umbwo umen ana he igie Ihibru le Betezeta. He nya, ki ma yi lè bigigyo bidyong há ungwu likong. ³ Nya na᷅ bendi-angmam gbamm be maa ndē, abe be hwuà ashi or, abe be hwō abee or, abe be hwō agwo atyetye-atyetye or. [Be maa kwa nyong ’unyong ahwu umbwo u᷆ nyùng he abwo. ⁴ He ’unyong-unyong udengell Unim u shul ba he itang ba nyùng umbwo ana. Nyong umbwo a nyùng, ukpi-ikwu undi angwu a shul gye há umbwo, u mbee, mà ù mbu ’itaa lingmam ’iyang-yang or.] ⁵ Ki ma yi lè ungikye ususo angwu a ngmam ’i fel aze lisi lè ngi lihwo lè ngi adyong-ikie. ⁶ Ujeso a lè wu nya, a nde-e ù yi ndē nya, a ngye le a ngmam ’i gbe ’igbe mà. A kung bii he le: "Wo kee le wo mbee a?" ⁷ A fan he le: "Ukaandi, nyong umbwo u᷆ nyùng, kì yi lè undi angwu u᷆ kwu-m abwo gye he umbwo ye, te-te mi kaa le mi shul gya há, undi-iso a tang teng mi." ⁸ Ujeso a de-e le: "Bo ’inaa, kan ugaa ugang ndo gye." ⁹ Nya abwo-abwo a bo, kung ugaa uma tan gbe ligye. Liti angi Ujeso a ma mbee ungikye umen i li ma yi liti uwell Ijuus a. ¹⁰ He ashina, bekaandi Ijuus be de angwu a ma mbee ana le: "Kpash! Wó ngye le ’unyin ’ì yi liti uwell lityan a ye a? Ugaa angwu wo kung, wo᷆ tan lè he ana, wo kpe linaa." ¹¹ Undi umen ana a fan ābe le: "Undi angwu a mbee mi, ufe na᷅ a de-m le mì kung ugaa ugi ndo gye." ¹² Be kung bii he le: "Ayang a da-a le wò kung ugaa ugang ndo gye?" ¹³ Ungikye umen i a ngye undi angwu a mbee he ye, likorye Ujeso a shang gbe, le bwo bendi be ma sho há gbamm. ¹⁴ Ki gbe ’igbe ye, Ujeso a hà lè nde-e he Ushom Unim, a kung de-e le: "Nde, wo mbee mà. Tem shi ’iban ye, teng ’ibibi ashi ’i ban hwò ashin ’i ba hwaa lè wo." ¹⁵ Ungikye umen i a lè de bekaandi Ijuus le Ujeso na᷅ a mbee he. ¹⁶ He ’uhwo ashi le Ujeso a mbee ungikye umen i na᷅ bekaandi Ijuus be maa fel tel Ujeso. ¹⁷ Nya he ’unyong ’umen ana Ujeso a ma de Ijuus le: "Atyagi u sha aki mbee ’unyong, kì yi kpe-kpe le mi or mì shi aki ná ufe." ¹⁸ Igie anyina i ban bekaandi Ijuus, be fel kam le be gwa he likorye a ban uten liti uwell libell, u mbee ko Unim le Atyam, ashi ’i ze le a kung ’uhwo-ma le a fel bizang ha Unim. ¹⁹ Ujeso a fan bekaandi Ijuus ana le: "Kigyang-igyang na᷅ mı᷆ de men i le mi Unwaa Unim, mì yi lè ikeb le mi sha ’iwom ’iyang-yang lè ’uhwo-gi ye, mi kee-kee sha a᷆bi mi nde Atyagi u᷆ shi a, likorye ’iwom ’iyang-yang ashi Unim u᷆ shi na᷅ mi Unwaa-ma or mı᷆ shi. ²⁰ Le bwo ’i nyin Unim lè mi, Unwaa-ma, u tyung mi biwom puu abi ufe-gyang u᷆ shi. U ba tyung mi biwom abi bi dyam hwò a᷆bi ma᷆ nde i or, hè ’ì kwu amen he ’uhwo. ²¹ Nya a na Unim u᷆ shi bendi abe be hwō be᷆ tem wum, u ke be likpan, kitaa a ken na᷅ mi Unwaa-ma or mı᷆ kung likpan ke undi uyang-yang angwu ufe-gyang a kee. ²² Ufe-gyang u tang ushe undi ye, a kung ikeb ke-m, mi Unwaa-ma a, le mì tang ushe bendi puu. ²³ A shi ’itaa ana le hè bendi puu bè ke-m, mi Unwaa-ma, ife nya a na be᷆ ke Unim Atyagi. Undi uyang-yang angwu a ke-m, mi Unwaa-ma, ife ye, hà a ke Atyagi or ife ye, likorye Atyagi na᷅ a ma som mi be he igye anyin." ²⁴ Ujeso a gye ’ushu kong le: "Mî de men le undi uyang-yang angwu a gyo igie igi, u bong ha Atyagi Unim angwu a som mi be he igye i, u kwa lè likpan ’unyong angi lı᷆ ngyor igye. Ù tem hwa᷆ ye ngyor igye kpamm. Ù tem gya he ushe Unim ye. ²⁵ Kigyang-igyang na᷅ mı᷆ de men le ’unyong ’u ba lè há, mi de le ’u fel or mà, ahwu bendi abe be hwō be᷆ gyo lingmam ligi, mi Unwaa Unim. Bendi abe be gyo lingmam limen i be wum. ²⁶ Nya a na Unim Atyetyan ù yi lè ikeb le u ka likpan, kitaa ’imen na᷅ a ke-m, mi Unwaa-ma, ikeb le mì ke likpan. ²⁷ A mbee ke-m, mi Unwaa-ma, ikeb le mì tang ushe bendi likorye mì yi Unwaa Undigye a. ²⁸ Ashi mi kong i ’ì kwu amen he ’uhwo ye. Baale ’unyong ’u᷆ fel ahwu bendi puu abe be hwō be᷆ gyo lingmam ligi, ²⁹ be wum lè he lihwu. Bendi abe be maa shi binunung, be wum ba fel lè likpan ligyang angyell angi lı᷆ ngyor igye. Abe be maa shi bibibi, be wum gya he ushe Unim angwu be᷆ lè kpe ’ingie." ³⁰ Ujeso a gye ’ushu kong le: "Mi-gyang mì yi lè ikeb le mi sha ’iwom ’iyang-yang lè ’uhwo-gi ye, mi kee-kee sha ’iwom he ikeb Unim angwu a som mi be he igye i a. Mi tang ushe or ná a de-m le mì tang a. He ashin, ushe ugi ù yi kpa-kpa likorye mi sha a᷆shi ’ı᷆ nyin mi a ye, mi sha a᷆shi ’ı᷆ nyin Atyagi angwu a som mi a. ³¹ "Gbe mi de le mi kong ’igyang, mi bà uman ye, ki nya sha ná a bendi be᷆ bong le mi kong ’igyang a? ³² Kì yi lè undi-iso angwu u᷆ kong gbe lè mi le mì yi Unwaa Unim a. Mí ngye le u kong ’igyang gba lè mi. ³³ Undi umen ana na᷅ ù yi Ujon. Ufe na᷅ leěti men ma ma som ’isom bii he le ù de men ashi ’ì yi ’igyang, a mà de men ’igyang. ³⁴ "Mi-i kee undi a le ù kong ke-m ye, mi kung igie angi undigye u᷆ kong gbe lè mi a ’indee-indee ye. Ukpor mi kee-kee kong abin le hè men mà fel lè likpan ’unyong a. ³⁵ Ujon a ma yi ná ’imor-inde ashi ’ı᷆ taa kangg, ma kpe igie ima he ’anwaa ’unyong zangg, ma ma yi lè igor likorye ’ikung-gbo ’ima ’i tyung amen ’igyang. ³⁶ Ukpor ’ì yi lè biwom bisuso abi bi dyam hwò igie Ujon abi bı᷆ tyung le Atyagi na᷅ a som mi. Bikwele-uhwo abi Atyagi a ke-m ikeb le mı᷆ shi, bi tyung le ’igyang-igyang Atyagi na᷅ a som mi. ³⁷ Atyagi angwu a som mi, ufe-gyang a kong gbe lè mi le mì yi Unwaa-ma a. Ukpor men ma wa gyo lingmam lima ngye ye, ma wa nde-e ngye ye, ³⁸ ma shi lè igie ima he atyam āme᷅n ye, likorye ma bong ha ami, Unwaa-ma angwu a som, ye. ³⁹ Men má kung ’unyong kangg shun ’ushia Unim li-li-li-li-li lè ugim le ’ushia ana ’ù tyung amen ’ukwo likpan angi lı᷆ ngyor igye kpamm. Kigyang-igyang, kushia ahwuna ’u kong gba lè mi. ⁴⁰ Mà na or, ma swan le ma ba hwaa lè mi hè men mà kpe likpan limen ana ye. ⁴¹ "Mi-i kung ipee bendigye ná ’iwom a ye. Unim na᷅ mi ndor ugim le mi sha nyin he. ⁴² Ukpor mi ngye amen, mi ngye le ’i nyin amen lè Unim ye. ⁴³ Ki nung nwongg le ’i nyin amen lè Unim ye likorye ma swan i-mi angwu mi be he lizen Unim Atyagi. Ukpor gbe undi a be hwaa lè men he lizen lima ligyang, ma kpá he. ⁴⁴ Men ma kee-kee ndor àshì he ipee bende a. Unim angwu ufe-ufe na᷅ ù yi he ’ukpo, ki gbee amen le u pee amen ye or ye. Kife na᷅ ’i shi amen ma bong ha ami or ye. ⁴⁵ "Mi na᷅ mı᷆ bé bun ’ibibi ’īme᷅n de Unim ye, Umosis angwu ma fe lityam ha ahe a. ⁴⁶ Gbe ma bong igie Umosis mà, hang ma bong ha ami a, likorye Umosis a ma fee gbe lè mi a. ⁴⁷ Gbé ma bong àbi a fee ye, ki sha ná a, ma᷆ bong igie igi ife?"

¹ Nyong ashin ’i mbee, Ujeso a bo gbe ndo he igbindi umbwo angwu be᷆ ko le Ugalili. Bé mbeē ko umbwo umen ana le Utaiberias. ² Nya a na a maa ndor àshì gye há, bendi be ti kwuo pwom he likorye be nde bikwele-uhwo biwom abi a shi he bendi-angmam ambeeale. ³ Ujeso lè bendi-utung bema be ma mbo ’igugo tang he ’usi, bel kwu ko. ⁴ Nya he ’unyong ’umen ana, kunyong ’ipam Ijuus ashi be᷆ ko le Kipam Agbele-gyong ’u ma fel kpee-kpee. ⁵ Ujeso a bel àshì shun kel-kel-kel, a nde le bendi be ti kwuo be ba hwaa lè he. A kung bii Ufilip le: "He hung nyin lì ndè ibred ndyebb ke bendi aben puu bè zi?" ⁶ Ujeso a kung Ufilip lè he ’usi he-e ù gyo a᷆shi u᷆ kong a. Ujeso ugyang a ngye ashi nyin ù shi or mà. ⁷ Ufilip a fan he le: "Mà lì kung igaa ikwudi ifee or ndyebb ibred, i kpà ka ābe le undi-undi ù zī zangg na ana or ye." ⁸ Undi-utung Ujeso ken angwu be᷆ ko le Andru, u shi unwanam Usaimun Ipita, a kung de Ujeso le: ⁹ "Unwan ungikye ù yi nyin angwu ù yi lè bíkém ibred bidyong, u shi lè ìkwǎn ifee. Ukpor inwaa biwom anyin i kpell ’igegang bendi ashina ná a?" ¹⁰ Ujeso a de bendi-utung bema le bè de bendi abena le bè kwu ko. Bendi puu be bel kwu ko. He liwu libell, bekaandi bengikye befe-befe be maa mbee asi lisi ’ugbe lihwo lè ’ugbe ’afee. (Bikpam bi ma go nya kangg.) ¹¹ Ujeso a kung ibred ana kwu he ’ubwo, u pee Unim. A kung āngi bun puu kung ke bendi abe be᷆ kwu ko. A mbee kung ìkwǎn shi ’itaa a ken. Undi uyang-yang a zī gwul ’itaa a kee. ¹² Be gwul puu, Ujeso a de bendi-utung bema le: "Mà gbong bigem abi be zī bi teng, hè uwun ken or ù ban ’idideng ye." ¹³ Bendi-utung bema be gbong ābi puu, bi sho bitetel lihwo lè bi bifee. ¹⁴ Bendi puu abe bè yi nya, be nde ’ikwele-uhwo ashi Ujeso a shi, be kung de le: "Kigyang-igyang, ungikye anwun ù yi undi angwu u᷆ tye ugie ’isom Unim angwu leěti Unim a ma de le u ba ba he igye anyin a." ¹⁵ Ujeso a ngye le bendi abena be ma kam le be kwa he ’usu he ikeb. He ashina a bo gbe lè há gye he ’igie ’igugo ashi lè hell ututeb. ¹⁶ Likwulukwu li gyebb, bendi-utung Ujeso be shul gye he ungwu umbwo ukaandi, ¹⁷ lè ngwee he ’inong lishor tem, be gya he igbindi umbwo angwell, hè be bè gye he Ukapanyam. Nya a na be maa gye, kusu ’u gye be. Nya he ’unyong ’umen ana, Ujeso a ma wa lè hwaa lè be ye. ¹⁸ Kufem ’u keb apuale a, umbwo u keb atōale ’ibibi-ibibi-ibibi. ¹⁹ Be gye ’ushu wu mbee ilamba ikie ha inde, be nde Ujeso u᷆ tan he likwu umbwo ndor àshì hwaa lè be. Be fel he ’ushell kangg. ²⁰ Ujeso a kung de be le: "Kì yi-m mi a, mà shell ye." ²¹ Be ma gor igor kpe-e ngwee há he ’inong. Nyong a ngwee há ngwee-ngwee, kinong ’i wu he ugo-igye he ’ipi be maa ndor àshì gye. ²² Ashi a kung taa, bendi abe be ma so lè he igbindi umbwo he ’ipi Ujeso lè bendi-utung bema be ma be, be nde le ’inong ’i ma teng nya ken a, be ngye le nyong bendi-utung Ujeso be ma kung ’inong ashina gbe, Ujeso a ma gye utung ha abe ye. ²³ Binong bisuso bi ma be lè he Utaiberias be naa gwaa ha ’iteng ’imen ashi uhwuhwo bendi be ma zī lizi angi Atyetyan Ujeso a ma pee Unim he ’uhwo angi. ²⁴ Nyong bendi abena be nde le Ujeso ù tem yi nya ye, bendi-utung bema or be tem shi nya ye, be mbo ngwee he binong abina bo ndo he Ukapanyam, be la shun Ujeso. ²⁵ Nyong bendi abena be wu he ungwu umbwo, be gbe kpe igbindi, be nde Ujeso há, be bii he le: "Itisha, kunyong ahwu hung wo gbe tang hen?" ²⁶ Ujeso a fan ābe le: "Mi da amen ’igyang-igyang, ma tan kee mi likorye ma ma zī ibred angyell gwul a, ma kee mi le bwo ma nde bikwele-uhwo abi mi shi a ye. ²⁷ Mà mbu gbèl kee lizi angi he ’anwaa ’unyong zangg li mbee i a ye, ma mbu gbèl kee a᷆ngi lı᷆ ngyor igye kpamm hwan. Life li ka bendi likpan ligyang angyell angi lì yi lè likel ye. Kitaa lizi ashina na᷅ mi Unwaa Undigye, mi ke men abe Unim Atyagi a tyung amen gboo le ufe na᷅ a som mi." ²⁸ Be kung bii Ujeso le: "Kibang ’itaa ’iwom ashi lì shi hè ’ì nyin Unim?" ²⁹ Ujeso a fan ābe le: "Kiwom ashi mà shi hè ’ì nyin Unim ’ì yi le mà bong ha ami angwu ufe a som be he igye anyin." ³⁰ Be kung de-e le: "Gbe ’ì yi ’itaa ana, ’ibang ’ikwele-uhwo ashi wo᷆ shi lî nde shi lè ashi atyan, li hà bong ha awo? Kibang ashi wo shi tyung li? ³¹ Leěti nyong betietyan be maa tan he ’igbaa-libeb, be ma zī lizi angi lı᷆ be lè he ’usi angi be᷆ ko le imana, nya a na be fee he ’ushia Unim le, ’Unim a som lizi lè he ’usi ke be le bè zī.’ " ³² Ujeso a kung de be le: "Ndor mî de men ’igyang, lizi angi leěti Umosis a ma ke betiemen ana, lì yi ligyang angi lè he lifung-atabe a ye. Atyagi na᷅ u᷆ ke men ligyang angi lè he lifung-atabe. ³³ Lizi angi Unim u᷆ ke bendi, lì yi angi lı᷆ be lè he lifung-atabe, bé lè likpan ke bendigye a." ³⁴ Be kung de-e le: "Atyetyan, ke li lizi limen ana mbee ’unyong." ³⁵ Ujeso a fan ābe le: "Mi na᷅ mì yi lizi limen ana angi lı᷆ ke bendi likpan. Undi uyang-yang angwu a be hwaa lè mi, itung i tem ndó he ye. Undi uyang-yang angwu a bong ha ami, kigyor ’i tem gyor he ye. ³⁶ Ukpor, kì yi nya a na mi bè de men a. Mà na men ma nde-m lè ashi or, ma bong ha ami ye. ³⁷ Bendi puu abe Atyagi a kung fe-m he ’ubwo, be ba hwaa lè mi. Undi uyang-yang angwu a be hwaa lè mi, mi ndó he tem item ye, ³⁸ likorye mi be lè he lifung-atabe le mî shi nyin Atyagi angwu a som mi a, mi be le mî shi nyin ’uhwo-gi a ye. ³⁹ Kiwom ashi ’i nyin Atyagi angwu a som mi ’ì yi le mì nim undi ken or lè he liwu bendi abe a kung fe-m he ’ubwo ye, mi kam ābe, mi be wum ābe he liti angi igye anyin ı᷆ be mbee. ⁴⁰ Atyagi a kee le bendi puu abe be nde-m, mi Unwaa-ma, be bong ha ami, bè kwu lè likpan ’unyong angi lı᷆ ngyor igye. Mi ba wum ābe lè he lihwu he liti angi igye anyin ı᷆ mbee." ⁴¹ Bekaandi Ijuus be keb inem anemale gbe lè Ujeso likorye a de le ufe ù yi lizi angi lı᷆ shul lè he lifung-atabe be he itang. ⁴² Be de le, "Ujeso ugyang, nde le unwaa Ujosef a ukpor? Li ngye atyam lè anam. Fe, ki shi ná a, u fel de le ufe a be lè he lifung-atabe a?" ⁴³ Ujeso a de be le: "Mà tyang inem anemale he liwu līme᷅n. ⁴⁴ Kì yi lè undi angwu ù hà ndo be hwaa lè mi faale afaale Atyagi angwu a som mi be he igye anyin na᷅ a be lè he ye. Undi uyang-yang angwu a be hwaa lè mi, mi ba wum he lè he lihwu he liti angi igye anyin ı᷆ mbee. ⁴⁵ Bendi abe be maa tye ugie ’isom Unim be ma fee ndor leěti le: ’Unim u hwua bendi puu.’ Undi uyang-yang angwu a gyo Igie Atyagi, u hwua kpe ’iwom lè há, u ba hwaa lè mi. ⁴⁶ Mi fel kong i le undi-iso a bè nde Atyagi lè ashi a ye, mi angwu mi be lè ha ahe ufe-ufe na᷅ mi nde-e. ⁴⁷ Mi da amen ’igyang a le undi uyang-yang angwu a bong ha ami u kwa lè likpan angi lì yi lè likel ye. ⁴⁸ Mi na᷅ mì yi lizi angi lı᷆ ke bendi likpan. ⁴⁹ Mà na leěti betiemen be maa zī lizi angi be᷆ ko le imana he ’igbaa-libeb or, befe puu be ma hwō. ⁵⁰ Ukpor lizi ligyang angyell angi lı᷆ be lè he lifung-atabe be he itang, undi uyang-yang angwu a zi āngi, u tem hwa᷆ ye. ⁵¹ Mi na᷅ mì yi lizi limen angi li be lè he lifung-atabe be he itang angi lı᷆ ke bendi likpan. Undi uyang-yang angwu a zī lizi limen i, u kwa lè likpan ngyor igye kpamm. Lizi angi mı᷆ ke bendi le hè be bè kwu lè likpan lì yi inyiahwo igi a." ⁵² He ’uhwo igie angi Ujeso a kong ana, bekaandi Ijuus be ma fel he ingywo keb abiale bende le: "Ki shi ná a, u᷆ de le u kung inyiahwo ima ka li lî zī?" ⁵³ He ashina, Ujeso a kung de be le: "Mi da amen ’igyang a le, gbe ma zī inyiahwo igi ye, ma ngwo anung agi ye, hà ma kwa lè likpan ligyang angyell ye. ⁵⁴ Ukpor undi uyang-yang angwu a zī inyiahwo igi, u ngwo anung agi, u kwa lè likpan angi lı᷆ ngyor igye kpamm, mi be wum he lè he lihwu he liti angi igye anyin ı᷆ mbee. ⁵⁵ Inyiahwo igi na᷅ ì yi lizi ligyang angyell, anung agi a shi ’ingwungwo ’igyang ashell. ⁵⁶ Undi uyang-yang angwu a zī inyiahwo igi, u mbee ngwo anung agi, hà ù yi ūbībī ken ha ami, mi shi ūbībī ken ha ahe. ⁵⁷ Atyagi angwu a som mi na᷅ u᷆ ke likpan. Nya a na mi kpe likpan lè ha ufe a, na᷅ undi uyang-yang angwu a zī inyiahwo igi u᷆ kwu lè likpan gbe ha ami. ⁵⁸ Mi mbee bwan da amen le, inyiahwo igi na᷅ ì yi lizi ligyang angyell angi lı᷆ be lè he lifung-atabe be he itang; lizi angi betiemen be ma zī he libeb ana na᷅ lì yi lizi ligyang angyell ye, likorye mà na be ma zī āngi or, be ma hwō, ukpor undi uyang-yang angwu a zī lizi angi mi ke-e, u tem hwa᷆ ye." ⁵⁹ Ujeso a ma kong igie anyina leěti nyong a maa hwua bendi he ushom angwu be᷆ kwu liwu he ’ubong Ukapanyam. ⁶⁰ Bendi-utung Ujeso gbamm abe be ma gyo igie angi Ujeso a kong ana, be de le: "Igie anyin ì yi ikaa-ikaa o. Ayang ù shi imen ana mbee?" ⁶¹ Ujeso a ngye ha lityam lima le be nem inem gba lè igie ima. A kung bii ābe le: "Ashi mi kong i i wee amen abwo a? ⁶² Kibang ashi ma᷆ be kong, gbe ma be nde-m mi Unwaa Undigye mi tem item gye he ’ipi mi be? ⁶³ Ukatia Kunyong Unim na᷅ u᷆ ke undigye likpan, undigye ù yi lè ikeb le u ka likpan ye. He igie angi mi kong ha amen i na᷅ ma nde Ukatia Kunyong Unim, ma nde likpan. ⁶⁴ Ukpor men besuso ma bong ha ami ye." (Kung lè há linde-linde, Ujeso a ngye bendi abe be᷆ be bong ha ahe ye, u mbee ngye angwu u᷆ be ndyebb he zi.) ⁶⁵ Ujeso a mbee de le: "Fe na᷅ ’i tan lè shi mī de men le, kì yi lè undi angwu ù hà ndo be hwaa lè mi faale afaale Atyagi na᷅ a ke-e ikeb ná ye." ⁶⁶ He ashin bendi gbamm abe be maa pwom Ujeso be tem item, tem pwom he gye ’ushu ye. ⁶⁷ Ujeso a kung bii bendi-utung bema abe lihwo lè be befee le: "Hà men ufe? Men or ma mbee tem a?" ⁶⁸ Usaimun Ipita a fan he le: "Atyetyan, ayang angwu bel ufe li mbee tem lè hwaa lè he, bwo wo ufe-ufe na᷅ igie igang i ke li likpan angi lı᷆ ngyor igye. ⁶⁹ Bel li bong ha awo, li mbee ngye le wò yi undi gelalala angwu a be lè ha Unim a." ⁷⁰ Ujeso a kung de be le: "Nde le ma ngye le mi na᷅ mi waa amen bendi lihwo lè be befee? Ukpor undi ken ù yi undi ubibi lè ha Usetan a." ⁷¹ (Ashi a ma kong ana, u kong gbe lè Ujudas, unwaa Usaimun Isikariyot a. Mà na Ujudas a ma yi he liwu bendi-utung bema abe lihwo lè be befee or, a maa kam le u ndyebb he za.)

¹ Nyong ashin ’i mbee, Ujeso a maa tan mbee bipi he Ugalili. A ma kee le u gya he ’igie Ujudia ye, likorye bekaandi Ijuus be maa kee ’ukwo ahwu be᷆ gwu-e. ² Kunyong ahwu Ijuus i shi ’ipam ’ibell ashi be᷆ ko le Kipam Kubuu ’u ma fel. ³ He ashin, bebwanam Ujeso be de-e le ù gye he Ujudia hè bendi-utung bema abe há bè nde bikwele-uhwo abi u᷆ shi. ⁴ Be mbee de-e le: "Undi angwu a kee le bè ngye-e, u ndyell ’uhwo-ma ye. Bwo wo shi bikwele-uhwo abin, shi ābi he ’ugbo hè bendi bè ngya-a." ⁵ (Bebwanam begyang or be bong ha ahe ye.) ⁶ Ujeso a fan bebwanam le: "Kunyong ahwu Unim a ndor le mì shi ná ’u wa fel ye. Ukpor men ufe, kunyong ’uyang-yang ’u ngbebb amen. ⁷ Bendi abe igye anyin be tel amen a ye, be tèl i-mi a, likorye mi da ābe le biwom abi be᷆ shi bì yi bibibi. ⁸ Men ma ndo te há he ’ipam, mi ufe mi waa ta ye, likorye ’unyong ahwu mi te há ’u wa fel ye." ⁹ A ma kong ’itaa ana ngyor kwu he Ugalili. ¹⁰ Nyong bebwende be gbe puu ndo há ’ipam, ufe or a hà bo. Ukpor a te há gboo a ye, a nyia inyia te. ¹¹ Bekaandi Ijuus be maa shun he há he ’ipam, be maa bii le: "A be ye a?" ¹² Bendi gbamm be maa kem Ujeso há he liwu. Besuso be da le: "Ù yi undi ununung a." Besuso be de le: "Dia! U mbeb bendi ’i go." ¹³ Kì yi lè undi angwu a maa kong gbe lè he gboo ye, likorye be shell bekaandi Ijuus. ¹⁴ Nyong be shi ’ipam fel he bedye-bedye, Ujeso a bo gbe he Ushom Unim, u fel hwua bendi biwom há. ¹⁵ Ki kwu bekaandi Ijuus he ’uhwo kangg, be kung bii le: "Ki shi ná a, a ngye ’iwom ’itel i, gbé a ngye ’ushia ye?" ¹⁶ Ujeso a fan ābe le: "Biwom abi mı᷆ hwua bi ba lè he lingye ligi a ye, Unim angwu a som mi na᷅ u᷆ tyung mi ábi. ¹⁷ Undi uyang-yang angwu a kee le u sha nyin Unim ’igyang-igyang a, u ngya le hà abi mı᷆ hwua bi ba lè he ugim ugi ugyang or, hà bi ba lè ha Unim or. ¹⁸ Gbe undi u kong ’iwom he ikeb ima igyang, ashina ’i ze le a kee ipee bendi a. Ukpor gbe undi a kee le bendi be pee angwu a som he a, ashina ’i ze le u kong ’igyang a, u kwu lè uben ye." ¹⁹ "Nde le Umosis na᷅ a ma ke men Iten? Mà na or, he liwu līme᷅n, kì yi lè undi ken or angwu a ndor āngi puu ye. Fe ’ibang a, ma᷆ kee ’ukwo ahwu ma᷆ gwu-m?" ²⁰ Bendi be kung fan he le: "Wo ngyor lityuo! Baà ayang be kee le be gwa-a?" ²¹ Ujeso a de be le: "Ki kwu amen puu he ’uhwo likorye mi shi ’ikwele-uhwo he liti uwell. ²² Mà nde atenale, Umosis na᷅ a ma ke men uten le mà ten bebwaa-men bengikye. (Umosis na᷅ a ma kpi ’ikwu de bendi le bè ten ye, betietyan na᷅ be ma kpi ’ikwu lè lìte᷆n.) He ’uhwo uten umen i, ma ten bebwaa-men he liti uwell. ²³ Bwo men ma ten bebwaa-men he liti uwell hè men mà ban Iten Umosis ye, ki shi ná a, ma᷆ mbu linaa ha ami le bwo mi mbee undi he liti uwell? ²⁴ Mà tyang abwo lè ushe angwu ma maa he likpam nyin, mà maa ushe he ’igyang hwan." ²⁵ Bendi besuso lè he Ujeruselem be de le: "Undi anwun na᷅ be kee le be gwa. ²⁶ Mà nde-e, a naa u kong nya gboo, kì yi lè undi angwu u᷆ fan he or ye. Pisoye ’i nung bekaandi betyan le ù yi Ukristi, Undi-likpan angwu Unim a som be he igye anyin a ’igyang. ²⁷ Li ngye le nyong Undi-likpan umen i u᷆ be be, undi u ngya he ’ipi a be ye, ukpor ungikye anwun ufe, li ngye he ’ipi u᷆ be." ²⁸ Nyong Ujeso a maa hwua bendi he Ushom Unim, a gaa kong kangg le: "Men ma de le ma ngye-m, ma mbee de le ma ngye he ’ipi mı᷆ be a? Nde le ma ngye le mi be he ikeb igi igyang a ye? Mi be he ikeb ángwu ù yi ’igyang, ukpor men ma ngye-e ye. ²⁹ Mi ngye-e likorye mi be lè ha ufe a, ufe na᷅ a som mi be he igye anyin or." ³⁰ He ashina be kaa le be kwa he, ukpor ’ì yi lè undi angwu a tyua he ’ubwo ye likorye ’unyong ’uma ’u ma wa fel ye. ³¹ Bendi gbamm be bong ha ahe. Be de le: "Kigyang-igyang ù yi Ukristi, Undi-likpan ùmén angwu Unim a som a. Ki nya sha ná a, undi-iso u᷆ mbee shi bikwele-uhwo hwò a᷆bi u᷆ shi i?" ³² Bendi Iferesis be gyo ’itaa bendi be kem Ujeso. Be lè tim ha bekaandi abe be᷆ shang Unim som bendi abe be᷆ kang Ushom Unim le bè lè kwu Ujeso. ³³ Nya he ’unyong ’umen ana Ujeso a de le: "Mi mbee kwa ipel ha amen he ’anwaa ’unyong zangg, mi tem lè hwaa lè Atyagi angwu a som mi. ³⁴ Men ma ba shun mi shun-shun kaa likorye mi ba kwa he ’ipi men ma᷆ wu há mbee ye a." ³⁵ Bekaandi Ijuus be ma kong ha bende le: "Ukyebb ungikye anwun u kong le u gya hung a, bel lì wu há mbee ye? U ba gya he ’ubong Igrik he ’ipi bendi betyan bè yi a, he-e ù lè hwua bendi Igrik a? ³⁶ Nyong a de le li ba shun he kaa, li mbee wu he ’ipi ù yi mbee ye, u kong ’ibang ikong?" ³⁷ Ki ma fel he umbee-likel liti ’ipam, liti limen ana li ma dyam ’indee-indee. Nya he liti limen ana, Ujeso a bo naa ’inaa kung kong fem he igye gboo le: "Undi uyang-yang angwu umbwo u᷆ gyor he, ù be hwaa lè mi, mi ke-e umbwo he-e ù ngwo. ³⁸ Ki yi nya a na be ma fee he ’ushia Unim leěti le undi uyang-yang angwu a bong ha ami, umbwo angwu u᷆ ke likpan u ba ko u go kangg lè ha ahe lityam." ³⁹ Ashi Ujeso a ma kong ana a maa kong gba lè Ukatia Kunyong Unim angwu Unim u᷆ be som ke abe be bong ha ufe Ujeso a. Nya he ’unyong ’umen ana Unim a ma wa ke bendi Ukatia Kunyong uma mà ye, likorye Ujeso a ma wa kwu ko he ’idem ’usu ’ima ye. ⁴⁰ Nyong be gyo igie anyina, bendi besuso há he liwu be de le: "Kigyang-igyang a, ungikye anwun ù yi undi angwu u᷆ tye ugie ’isom Unim angwu li kwu lı᷆ nyong a." ⁴¹ Bendi-iso be de le: "Eng, ungikye anwun ù yi Ukristi, Undi-likpan angwu Unim a som a." Besuso be de le: "Kpaa ye! Ukristi ù hà ndo ba lè he Ugalili a ye. ⁴² Be fee he ’ushia Unim le Ukristi u ba kwa igia Usu Udebid a, u ba ba lè he Betelehem he ’ipi leěti Usu Udebid a ma yi." ⁴³ Kitaa ana na᷅ bendi be tang he abwo fel akwu-akwu he ’uhwo Ujeso. ⁴⁴ Bendi-iso be ma kee le be kwa he, ukpor undi ken or a ma tyua he ’ubwo ye. ⁴⁵ Bendi abe be᷆ kang Ushom Unim abe be ma som be tem be hwaa lè bekaandi abe be᷆ shang Unim lè bendi Iferesis. Bekaandi ana be hà kung bii ābe le: "Ki shi ná a, ma be lè he ye?" ⁴⁶ Be de bekaandi ana le: "Bwo ukong-ukong li wa gyo undi a kong ’iwom ná ungikye anwun ye." ⁴⁷ Bendi Iferesis be de le: "Men aben or, a mbee mbeb amen a? ⁴⁸ Kì nya yi lè undi ken or lè he liwu bekaandi Ijuus, mbee lè ha bendi Iferesis angwu a bong ha ahe a? Dia, ⁴⁹ ukpor bendi item zii abe be᷆ ngye Iten Umosis ye na᷅ be bong ha ahe, Unim a zob ābe." ⁵⁰ Unikodimes angwu leěti a ma gye lè hwaa lè Ujeso a ma yi he liwu bendi Iferesis limen i. Ufe a kung de bema le: ⁵¹ "Nya a na Iten ityan ì yi, li tang ushe undi faale afaale li gyo he igie ye. Li gyo he, saa lì ha᷅ ngya a᷆shi a shi." ⁵² Be de le: "Hā ndo wo or wò yi ’ubong Ugalili á? Shun he ’ushia Unim li-li-li, wo nda le be fee ’iwom há le undi angwu u᷆ tye ugie ’isom Unim u ba lè he Ugalili a ye." ⁵³ Bendi puu be gbe ligye.

¹ Nya a na bendi be maa gye, Ujeso a gye he ukwell angwu be᷆ ko le Olif. ² Ashi a taa nya leèti-leèti, a tem gye he Ushom Unim, bendi be mbee gbong be sho ha ahe nya. A bel kwu ko, u fel hwua ābe biwom. ³ Bendi abe be᷆ hwua bendi Iten, lè abe Iferesis, be be lè ungye libee angwu be kwu-e ha ungikye, be kpe-e lè naa he he ’ushu. ⁴ Be kung de Ujeso le: "Ukaandi, li kwu ungingye anwun ha ungikye. ⁵ He ’ushia Iten, Umosis a fee nya le, gbe undi a shi ’itete ’iwom ashin, lì maa akor gwu-e. Kibang ’ì yi ugim ugang he likong anyin?" ⁶ Be kong ashin kee ’ukwo ahwu bè kwu-e, gbe a kong pwell a. Ujeso a keb, u fel fee udyong-bwo he itang. ⁷ Be gye ’ushu bii he bibibi kpamm a bo ’inaa, u de be le: "He liwu līme᷅n, undi angwu a wa shi ’iban ngye ye, ufe ù kpi ’ikwu kung ’ukor maa he." ⁸ A mbee keb, u fee udyongbwo he itang. ⁹ Nyong be gyo igie anyina, be gbe lè há he ’uken-uken kpi lè ha bekaandi. Ujeso ufe-ufe na᷅ a teng naa nya lè angwu ungingye naa he lè he ’ushu. ¹⁰ Ujeso a bo ’inaa, kung de-e le: "Iye, abe be ben-a bè yi hung a? Kì yi lè undi angwu a tem maa-a ushe le bè gwu-a ye a?" ¹¹ A fan Ujeso le: "Ukaandi, kì yi lè undi ye." Ujeso a kung de-e le: "Mi or mi ben-a ye. Ndo gye, tem shi ’iban ye."] ¹² Ujeso a mbee kong ha bendi le: "Mi na᷅ mì yi ’ikung-gbo ke igye anyin. Undi uyang-yang angwu u᷆ pwom mi, u tan he ’ifufebb ye, u kwa lè ’ikung-gbo ashi ’ı᷆ ke bendi likpan." ¹³ Bendi Iferesis be de-e le: "Wo-o naa ’uhwo-gang ushada, ushada ugang ù yi ’igyang ye." ¹⁴ Ujeso a fan ābe le: "Mi naa ushada gba lè ’uhwo-gi, ushada ugi u shi ’igyang likorye mi ngye he ’ipi mı᷆ be, mi mbee ngye he ’ipi mı᷆ tem gye. Men ma ngye he ’ipi mı᷆ be or, ngwu mà ngye he ’ipi mı᷆ gye or ye. ¹⁵ Men bendi igye anyin, ma maa undi ushe he ugim undigye a, mi ufe mi be mi maa undi ushe a ye. ¹⁶ Mà mi maa undi ushe or, ugi u kwa ’igyang, likorye mì yi ututeb ye. Bel lè Atyagi angwu a som mi be he igye anyin na᷅ li maa. ¹⁷ Men mà ndè he ’ushia Iten īme᷅n, be fee nya le, gbe bendi befee be naa ushada he ’iwom ken, hà ’iwom ashi há ’ì yi ’igyang a. ¹⁸ Mà nde, mi naa ’uhwo-gi ushada, Atyagi angwu a som mi or u naa ushada ugi le mi kong ’igyang." ¹⁹ Be bii he le: "Atia ugyang ù yi hung a?" Ujeso a fan le: "Ma ngye-m ye, ma ngye Atyagi or ye. Kí yi yi le má ngye-m, hang ma ngye Atyagi or titi." ²⁰ Ujeso a ma kong igie anyina nyong a maa hwua bendi biwom he Ushom Unim, u shi kwu gwaa he ’ipi be᷆ fe únde. Undi a ma kwu-e ye, likorye ’unyong ’uma ’u ma wa fel ye. ²¹ Ujeso a de be le: "Mi ndo gya; ma ba shun mi kaa. Nyong ma hwō, biban bīme᷅n bi ba ngyor amen he abwo. Ma ba kwa lè ikeb le ma gya he ’ipi mı᷆ gye ye." ²² Bekaandi Ijuus be de le: "Ashi u᷆ de le u gya he ’ipi bel lı᷆ be gye mbee ye ana, ki ze le ana a? Hà u ba gwa ’uhwo-ma or?" ²³ Ujeso a fan ābe le: "Men mà yi ke igye anyin a, ukpor mi-ì yi ke igye anyin a ye. Ushu ūme᷅n ù yi igye anyin a, ukpor ushu ugi ù yi igye anyin a ye, ù yi he lifung-atabe a. ²⁴ Mi bè de men le biban bīme᷅n bi ba ngyor amen he abwo. Mi kong ’igyang a, gbe ma bong le mì yi undi angwu mì yi i a ye, ma ba hwa᷆, biban bīme᷅n bi ngyor amen he abwo." ²⁵ Be bii he le: "Ayang ù yi-a wo?" A de be le: "Mì yi undi angwu kung lè he ukpi-ikwu mi de men le mì yi a. ²⁶ Men ma zī libi he biwom gbamm abi hang mi nya de le ma nim. Ukpor mi mbee bwan da amen le Atyagi angwu a som mi ù yi ’igyang. Mi da bendi biwom abi a tyung mi a." ²⁷ Ki ma nung ābe le u kong ha abe gba lè Unim Atyam a ye. ²⁸ He ashina Ujeso a kung de be le: "Nyong ma᷆ be kung i-mi Unwaa Undigye ndor he ’usi, na᷅ mà ha᷅ be ngye le mì yi undi angwu mi de men le mì yi a, ma mbee ngye le mi sha ’iwom he ikeb igi a ye, mi kong a᷆shi Atyagi a tyung mi a. ²⁹ Angwu a som mi ù yi utung ha ami, u tyang mi ututeb ye, likorye mbee ’unyong puu mi sha a᷆shi ’i nyin he." ³⁰ Bendi gbamm abe be gyo igie angi Ujeso a kong ana, be bong ha ahe. ³¹ Ujeso a hà kung kong ha abe be bong ha ahe le: "Gbe ma gye ’ushu ke igie igi ife, hà mà yi bendi begi a ’igyang. ³² Ma ba ngya ’igyang, mà ’igyang ’i ba sha amen ma kwa porr." ³³ Bendi-iso be fan he le: "Bel lì yi igia Ebraham a, li ma bè yi he lifee ngye ye. Ki shi ná a, wo᷆ de le li ba kwa porr?" ³⁴ Ujeso a kung de be le: "Mà ngye dangg le undi uyang-yang angwu u᷆ shi ’iban ù yi ufee ’iban a. ³⁵ Ufee u kwa he ushu atyam ngyor igye ye; unwaa na᷅ u᷆ kwu he ushu atyam ngyor igye. ³⁶ Gbe mi Unwaa Unim, mi fem amen lè he lifee, ma fel porr na afong. ³⁷ Mi ngye le mà yi igia Ebraham a. Mà na or, ma kee ’ukwo ahwu mà gwu-m, likorye ma bong igie igi ye. ³⁸ Mi-i da amen ashi mi nde lè he ’ipi Atyagi a, ukpor men ma sha a᷆bi umen atyamen a de men a." ³⁹ Be de-e le: "Bel ufe, Ebraham na᷅ ù yi atyetyan." Ujeso a fan ābe le: "Mà kwu igia Ebraham a ’igyang, hang ma sha ná Ebraham a maa shi. ⁴⁰ Ukpor ma fel kam le ma gwa-m, mi undi angwu mi de men ’igyang ashi mi gyo lè ha Unim. Ebraham a maa shi ’itete ’iwom ashina ye. ⁴¹ Ma sha likpe bya atyamen a." Be de-e le: "Atyetyan ù yi ken a, Unim ufe-ufe a. Be hwan li he akpela a ye." ⁴² Ujeso a fan ābe le: "Kì be kwu ’igyang a le Unim na᷅ ù yi atyamen, hang ’i nyin amen lè mi, likorye mi be lè ha ufe a be nyin. Mi be he ikeb igi igyang a ye, ufe na᷅ a som mi. ⁴³ Ki shi ná a, abi mi kong bı᷆ nung amen ye? Atan-lengi uma ù yi le igie igi i keè ha amen ye. ⁴⁴ Usetan, usu bibibi, na᷅ ù yi atyamen. Biwom abi bi nyin atyamen le mà shi na᷅ bi nyin amen or titi. Ù yi undi ’ihwu a uwell-uwell. U kong ’igyang ye, likorye ’igyang ’i keè ha ahe ye gbang-gbang. Nyong u᷆ bè uman, u sha a᷆shi ’ì yi likpe lima a, likorye ù yi undi-uman a, u shi usu uman a. ⁴⁵ Bwo mi ufe, mi de men ’igyang gbe lè biwom Unim, kife na᷅ ’i tan lè shi ma bong ha ami ye. ⁴⁶ Kì nya yi lè undi he liwu līme᷅n angwu ù nya tyung ’iban ashi mi shi a? Kì yi lè undi ye. Gbé mi de men ’igyang a, ki shi ná a, ma᷆ bong ha ami ye? ⁴⁷ Undi angwu ù yi unwaa Unim a, u dang ’utyung gyo igie ima. Atan-lengi angwu men ma dang ’utyung gyo āngi ye ù yi le mà yi bebwaa Unim a ye." ⁴⁸ Bekaandi Ijuus be bii Ujeso le: "Bel li de le wò yi ’ubong Usameria a, ikeb ibibi i ngwee-a, i bel-a lishi. Li bà uman a?" ⁴⁹ Ujeso a fan ābe le: "Ikeb ibibi ì yi ha ami ye. Atyagi angwu mi fe-e na᷅ ù yi ha ami, ukpor men ma fa-m ye. ⁵⁰ Mi na᷅ mi kee le bendi bè fe-m ye. Atyagi na᷅ u kee le bendi bè fe-m; ufe na᷅ u᷆ be tang ushe biwom puu. ⁵¹ Mi da amen ’igyang, undi uyang-yang angwu u᷆ shi igie igi u tem hwa᷆ ye ngyor igye kpamm." ⁵² Be kung de-e le: "Igie igang i shi li li ngye dangg le ikeb ibibi i ngwee-a, i bel-a lishi. Ebraham ugyang or a hwō; abe be᷆ tye ugie ’isom Unim or be hwō. Fe, ki shi ná a, wo᷆ de le undi angwu a shi igie igang ù tem hwa᷆ ye? ⁵³ Atietyan Ebraham a hwō. Wo-o dyam hwo-e a? Abe leěti be maa tye ugie ’isom Unim be hwō. Wo kung ’uhwo-gang le wò yi ayang a?" ⁵⁴ Ujeso a fan ābe le: "Kì kwu le mi-gyang na᷅ mı᷆ lem ’uhwo-gi, hang ilem igi ì yi ’idideng. Ukpor Atyagi na᷅ u᷆ lem mi; ufe umen na᷅ men ma de le ù yi Unim ūme᷅n. ⁵⁵ Mà na ma de le ufe ù yi Unim ūme᷅n or, ma ngye-e ye. Mi na᷅ mi ngye-e. Gbe mi de le mi ngye-e ye, hà mi fel undi-uman nya a na men a. Ukpor mi da amen le mi ngye-e, mi ke igie ima ife. ⁵⁶ Atiemen Ebraham a ma yi lè igor, nyong Unim a ma de-e le u ba nda liti angi mı᷆ be. A mà nde ngi, u yal gor kangg." ⁵⁷ Be kung fan he le: "Wo a? Wo angwu wo wa wu aze asi afee lè ngi lihwo or ye, wo ma nde Ebraham ugyang he bifem â?" ⁵⁸ Ujeso a kung de be le: "Mi da amen le mi-ì yi, mà ukpong be hà hwan Ebraham." ⁵⁹ Be bung akor hè be bè maa gwu-e, ukpor be tem nde-e ye. A nyia gbe lè há Ushom Unim.

¹ He liti ken, Ujeso a maa tan gba he ’ukwo, a nde undi-iso angwu a hwuà ashi kung lè he lifung anam. ² Bendi-utung bema be bii he le: "Itisha, kiban ayang ’i shi be hwan ungikye anwun ashi kpi-kpi? Kiban ’ima ’igyang â, hà ashi átyám lè anam a?" ³ Ujeso a fan ābe le: "A hwuà ashi he ’iban ashi ’ima ’igyang or, ngwu atyam lè anam a or ye. A hwuà ashi le hè bendi bè ndè ikeb Unim ha ahe a. ⁴ Kì yi kpe-kpe le lì shi aki Atyagi angwu a som mi ná kusu ’u wa gye ye i. Baale ’usu ’u᷆ gye. Nyong u᷆ gye, undi u tem sha aki mbee ye. ⁵ Nya a na mì so he igye i, mì yi ’ikung-gbo a ke igye anyin." ⁶ A kong igie anyina i mbee, a sho akung wu he itang, kung udyong-bwo naa āngi. A hà shi āngi gbaa uhwua-ashi ana he itong-shi. ⁷ A kung de-e le: "Ndo gye lè to àshì he umbwo angwu be᷆ ko le Usalom." (Lizen angi le Usalom li ze le asomale.) Uhwua-ashi ana a bo gbe ndo há, a lè to àshì puu. Nyong a tem be, u fel nda. ⁸ Bendi bema lè bendi puu abe be bè nde-e nyong u᷆ kwu he ’ukwo nyong ’inyong, be de le: "Aye, uhwua-ashi angwu u shaa kwu he ’ukwo nyong ’inyong i ye a?" ⁹ Bendi-iso be de le ufe a. Besuso be de le ufe a ye. A bi-e ibi. Ufe-gyang a hà kung kong le: "Mi a." ¹⁰ Be kung bii he le: "Ná wo shi nyong ashi agang a buu?" ¹¹ A fan ābe le: "Undi angwu be᷆ ko le Ujeso, a naa itang shi gbaa mi he ashi; u de-m le mì gye lè to āngi he umbwo Usalom. Mi lè to āngi to-to, a mà buu, mi fel nda." ¹² Be kung bii he le: "Ungikye umen ana ù yi hung a?" A fan ābe le: "Mi ngye ye." ¹³ Bendi abe be ma yi há be kpe kung ungikye umen angwu leěti a ma hwuà ashi ana gbe lè he lè hwaa lè bendi Iferesis. ¹⁴ He liti uwell Ijuus na᷅ Ujeso a ma naa itang shi atong-shi ungikye anwuna a ma buu. ¹⁵ Bendi Iferesis or titi be bii he ná a shi atong-shi ama a buu. A de be le: "A shi itang gbaa mi he ashi, mi lè to āngi, mi fel nda." ¹⁶ Bendi Iferesis besuso be de le: "Ungikye anwun a be lè ha Unim a ye. Ù be lè ha Unim a, hang u ndor uten liti uwell." Besuso be de le: "Ù kwu undi ubibi a, hang u sha ’ikwele-uhwo ashi ’itel i mbee ye." He ashin be tang he abwo fel akwu-akwu. ¹⁷ Be mbee kung bii he le: "Wo de le ungikye anwuna na᷅ a sha-a wo fel nde, wo-gyang ufe, wo nya gim le ù yi ’ibang ’itaa undi a?" A fan ābe le ù yi undi angwu u᷆ tye ugie ’isom Unim a. ¹⁸ Bekaandi Ijuus be swan le ungikye anwun a bè hwuà ashi, saa u hà fel nde ana ye. Be som ko atyam lè anam, ¹⁹ be bii ābe le: "Unwaa-men i a? Kigyang a le a ma hwuà ashi kung lè há liti angi ma hwan he a? Ná ’i shi u fel nde?" ²⁰ Atyam lè anam be fan le: "Li ngye le ù yi unwaa-tyan a. Ki shi ’igyang a le nyong li ma hwan he, a hwuà ashi. ²¹ Ukpor li ngye ná a shi nyong u fel nde ye. Li ngye undi angwu a buu he ashi ye. Mà bii he ufe-gyang. Ù nem yi unwani a ye. Ufe-gyang u da amen." ²² Atyam lè anam be ma kong igie anyina, likorye be maa shell bekaandi Ijuus. Be shell ābe likorye be ma kong ndor le undi angwu a kong gboo le Ujeso ù yi Ukristi, Undi-likpan angwu Unim a som a, be tem bong he u gba he ushom ubell angwu be᷆ kwu liwu ye. ²³ Ashina na᷅ ’i tan lè shi be de le: "A kpè, bii he ufe-gyang." ²⁴ Be hà ko he ufe-gyang ’ugbe ahwu lefee, be de-e le: "Unim ù yi nyin, kong ’igyang. Ndè le undi angwu wo de le a sha-a wo fel nda i ù yi undi-iban a?" ²⁵ A fan ābe le: "Hà ù yi undi-iban a or, hà ù yi undi-iban a ye or, mi ngye ’ife ye. Kiwom ken ashi mi ngye ’ife ’ì yi le, leěti mi ma hwuà ashi, ukpor ’anaa-anaa i mi fel nda." ²⁶ Be kung bii he le: "Ná a shi nyong ashi agang a buu?" ²⁷ A fan ābe le: "Mi bè de men mà, ukpor ma kee le ma kpa ye. Kibang a, ma᷆ mbee bii mi? Sha-m ná men or ma la fel bendi-utung bema nà?" ²⁸ Be buu he atye de-e le: "Wo na᷅ wò yi undi-utung uma; bel ufe, lì yi bendi-utung Umosis a. ²⁹ Li ngye le leěti Unim a maa kong ha Umosis. Ungikye anwun ufe, li ngye he ’ipi u᷆ be ye." ³⁰ Ungikye anwuna a fan le: "Wô! Wo᷆! Ma kong ’iwom ’i ban he ’utyung! Men ma ngye he ’ipi u᷆ be ye or, ufe na᷅ a shi-m mi fel nde. ³¹ Li ngye le Unim u gyo undi-iban ye. Bendi abe be fe-e, be mbee shi a᷆shi a kee na᷅ u᷆ gyo ābe. ³² Bwo ukong-ukong li wa gyo he ’ipi undi a shi undi angwu a hwuà ashi u fel nde ngye ye. Undi a wa gyo ashina ngye ye. ³³ Kigyang-igyang, ungikye anwun u ba lè ha Unim a. Kì kwu ná a ye, hang u sha biwom abin mbee ye." ³⁴ Be de le: "Wô! Wo᷆! Wo angwu be ma hwan lè ’iban, wo kaa le ha-a à hwua li bel ihwua a?" Be ndó he lè há ushom ubell angwu be᷆ kwu liwu tyang he igye. ³⁵ Ujeso a gyo le be ndō ungikye anwuna. A kee he kpamm lè nde-e, u bii he le: "Wo bong ha Unwaa Undigye a?" ³⁶ A fan Ujeso le: "Ukaandi, de-m undi angwu há, mî bong ha ahe." ³⁷ Ujeso a de-e le: "Wo nde undi umen ana or mà. Ufe na᷅ u᷆ kong ha awo i." ³⁸ A kung de le: "Atyagi, mi bong ha awo." A bel tim anung he itang nya he ’ushu Ujeso. ³⁹ Ujeso a de le: "Atan-lengi angwu mi be he igye anyin ù yi le, hè be bè ngye a᷆be be fe Unim lè abe be fe-e ye. U shi le, hè bendi abe be nde ye bè fel nde, abe be kung ’uhwo-bell le be nda, hè be bè fel àshì kpi-kpi." ⁴⁰ Bendi Iferesis besuso abe bè yi há be gyo igie anyin, be kung bii he le: "Wo kong i le bel or li hwuà ashi â?" ⁴¹ Ujeso a fan le: "Kì kwu le ma hwuà ashi, ma ngye ashi ma shi ye, hang ma za᷆ libi ye. Ukpor bwo ma de le ma nda, mā zī libi."

¹ Ujeso a de le: "Mi da amen ’igyang a le, undi uyang-yang angwu a kee le u ngwee he ’ipo itia, gbe a gbe he ungwu lishi a gye há afee ye, a bel gbe he ’iteng ’isuso a gye há, hà ù yi uzi korlorkpokpo a. ² Undi angwu a gbe he ungwu lishi a gye há afee, hà ù yi undi angwu u᷆ kam ìtiā a. ³ Undi angwu u᷆ kang ungwu lishi u buu he ufe lishi he-e ù gbe. Ìtiā ima or i shob igie ima nyong u ko āngi he azen, u mbee teng āngi gye he igye. ⁴ Nyong a tang lè ngi he igye, u gba āngi ’ushu, ife i pwom he, likorye i shob igie ima. ⁵ Ukpor i bong pwom undi-iso ye, i buu he ibuu, likorye i ngye igie ima ye." ⁶ Ujeso a bun ityang anyin de be, ukpor ashi a maa kong ’i nung ābe ye. ⁷ He ashina Ujeso a de be le: "Mi da amen ’igyang a le mi na᷅ mì yi ná ungwu lishi ’ipo itia. ⁸ Bendi puu abe be be teng mi, bè yi ná bezi a, ìtiā i gyo ābe ye. ⁹ Mi na᷅ mì yi ná ungwu lishi. Undi uyang-yang angwu a gbe ha ami a gye he afee, u kwa lè likpan ’unyong. U tan gya he afee tan ba he igye ’itaa a kee, u kwa lè biwom puu abi ’i fong he lè bi he igye. ¹⁰ Uzi u kee-kee ba le he-e ù zì kung biwom, u gwu bendi, u ban biwom a. Ukpor mi ufe, mi be le hè bendi bè kwu lè likpan ligyang angyell angi lı᷆ ngyor igye, be kwu lè ngi mbee akekel puu. ¹¹ "Mì yi ná undi angwu u᷆ kam ìtiā ngbebb-ngbebb. Undi angwu u᷆ kam ìtiā ngbebb-ngbebb u bong lihwu he ’uhwo itia ima. ¹² Undi angwu be hwaà ihwaa, ù yi undi angwu u᷆ kam itia a ye, itia imen ana i shi ima ye. Gbe undi angwu ’itaa i a nde ùkpòng u᷆ be lè hell, u buu tyang āngi. Ùkpòng u be kwu itia zi, angi i teng i paa he abwo. ¹³ Undi angwu be hwaà ihwaa ana, u buu tyang ìtiā likorye ’i gbee he lè ngi ye, i shi ima a or ye. ¹⁴ Mì yi undi angwu u᷆ kam ìtiā ngbebb-ngbebb, mi ngye ìtiā igi, ife i ngye-m, ¹⁵ nya a na Atyagi a ngye-m, mi ngye-e. Mi kam le mi hwa᷆ he ’uhwo angi. ¹⁶ Mi teng lè ìtiā isuso angi i wa fel he liwu i ye. Kì yi kpe-kpe le mì be lè ngi ife or titi. I ba dang ’utyung gyo mi, i be fel ipel ha anyin hè ngi ì fel ukem, undi ken u kam āngi. ¹⁷ "Ki nyin Atyagi lè mi likorye ma kam le mi hwa᷆, mî kpe likpan he umbee-likel. ¹⁸ Kì yi le undi u fel kwa-m he ikeb a kpa kung likpan ligi ye. Mi-gyang na᷅ mi bong le mi hwa᷆. Gbe mi kee le mi hwa᷆, mi hwa᷆; gbe mi kee le mi tem wum, mi tem wum. Ashin na᷅ Atyagi a de-m le mì shi." ¹⁹ Ashi a kong ana ’i shi bekaandi Ijuus be mbee tang fel akwu-akwu. ²⁰ He liwu libell, besuso be maa da le: "Ikeb ibibi i ngwee he, i bel he lishi, u fel ngyor lityuo. Bel li ndor ’utyung gyo anwuna ye o." ²¹ Besuso be de le: "Undi angwu ikeb ibibi i ngwee he, i bel he lishi, u kong ’itaa i a ye. Ikeb ibibi i sha bihwua-ashi bi nda a? Kpaa ye." ²² Kunyong ’u ma fel ahwu be shi ’ipam he awellale ’unyong ahwu be ma kung Ushom Unim angwu he Ujeruselem fe Unim he ’ubwo. Ki ma yi ’unyong ’akwuo a. ²³ He liti ken Ujeso a maa tan he Ushom Unim he ’iteng ashi be᷆ ko le ’igigyo Usolomon. ²⁴ Bendi Ijuus be be há, be lè sho fe-e. Be de-e le: "Wo ko le ’i gbe ’igbe ná a, wo hà de li ’itaa undi ashi wò yi? De li gboo, hà wò yi Ukristi, Undi-likpan or." ²⁵ Ujeso a fan ābe le: "Mi bè de men undi angwu mì yi, ukpor ma bong ye. Bikwele-uhwo abi mi shi he ikeb Atyagi, bi tyung amen undi angwu mì yi, ²⁶ ukpor ma swan le ma bong ha ami ye, likorye mà yi bendi begi a ye. ²⁷ Bendi begi befe, be ngye igie igi, bè yi ná ùtiā angwu a ngye igie atyam be pwom he. Mi mi ngye be, befe be pwom i-mi. ²⁸ Mi ka ābe likpan ligyang angyell angi lì yi ngyor igye, bè hà tem ndo hwa᷆ ye; ki shi lè undi angwu u᷆ kpe kung ābe lè ha ami mbee ye. ²⁹ Atyagi na᷅ a kung ābe fe-m he ’ubwo, ufe a dyam hwò puu. He ashin, kì yi lè undi angwu u᷆ kpe kung ābe lè he ’ubwo Atyagi mbee ye. ³⁰ Bel ha Atyagi lì yi ken." ³¹ Bendi Ijuus be mbee bung akor hè be bè maa gwu-e. ³² Ujeso a de be le: "Men ma nde binunung gbamm abi mi shi he ikeb Atyagi. He liwu binunung abin, ashi yang ma kee le ma maa mi akor he ’uhwo ashi?" ³³ Be fan he le: "Kì yi he ’uhwo binunung abi wo shi na᷅ li maa-a akor i ye, li maa-a likorye wo kong bia Unim a. Wo angwu wò yi undigye a, fe wo de le wò yi Unim a." ³⁴ Ujeso a de be le: "He ’ushia Iten īme᷅n, be fee há le Unim a de le, ’Mi Unim, mi de le men mà yi ìnīm a.’ ³⁵ Kì yi lè uman he ’ushia Unim zangg or ye. He ashin, bwo Unim a de le bendi aben abe be gyo igie ima bè yi ’itaa ken ha ufe-gyang, ³⁶ fe ’i shi ná a ngwu mà de le mi bia Unim, nyong mi de le mì yi Unwaa Unim a? Mi na᷅ Atyagi Unim a waa som be he igye anyin. ³⁷ Gbe mi shi ná Atyagi a de-m a ye, ma bong ha ami ye. ³⁸ Ukpor gbe mi shi ná Atyagi a de-m a, mà ma bong ha ami ye or, kì yi le mà bong ha ami he ’uhwo biwom abi mi shi, abi ma nde lè ashi, hè ’ì nung amen le Atyagi ù yi ipel ha ami, mi shi ipel ha ahe." ³⁹ Bendi abena be mbee kaa le be kwa Ujeso, ukpor a shang hwaa ābe lè he abwo. ⁴⁰ Ujeso a mbee tem tia umbwo Ujodan kpe indi tem gye he ’ipi leěti Ujon a maa kib bendi he umbwo, a ngyor kwu nya. ⁴¹ Bendi gbamm be ma be hwaa lè he nya. Be de le: "Mà na Ujon a ma shi ’ikwele-uhwo ye or, ukpor ’iyang-yang ashi a ma kong gbe lè ungikye anwun ’ì yi ’igyang." ⁴² He ashina bendi gbamm be bong ha Ujeso nya he ’iteng ’imen ana.

¹ Ki ma yi lè ungikye ususo angwu be᷆ ko le Ulazorlos he ’ubong Beteni. Nya na᷅ bebwende, bendi befee, be ma yi. Be maa ko angwu ken le Umeri, be ko angwell le Umata. Umeri umen i na᷅ leěti a ma kung behwu benunung wu Ujeso ha abee, u bel lè igil ima shell he ángi. Ungwende Ulazorlos a ma yi gogo ye. ³ He ashin bebwende be som ’isom hwaa lè Ujeso le udim-ma lityam ù yi gogo ye. ⁴ Nyong Ujeso a gyo ’isom ashin, a de le: "Lingmam anyin lì yi angi lihwu a ye, li mbu-e le hè bendi bè nde ikeb Unim, be kung ipee puu ke Unwaa Unim a he ’uhwo angi." ⁵ Mà na ’i nyin Ujeso lè Umata lè ungwende Umeri lè Ulazorlos or, nyong a gyo le Ulazorlos ù yi gogo ye, a ngyor kwu nya ’iteng ’imen ana ati afee. ⁷ Ati a gbe afee, a hà de bendi-utung bema le: "Mà lì tem gye he Ujudia." ⁸ Be fan he le: "Itisha, nde le nyin ingyesu-ingyesu i na᷅ bendi Ijuus be maa kaa le be maa akor gwa-a lè há, fe wo de le wo tem gya há a?" ⁹ Ujeso a fan ābe le: "Ki kwa gboo kung leèti gyebb likwulukwu. He ’unyong ’umen i, gbe undi u᷆ tan litan, u tya abee fa ’iwom ye, likorye kikung-gbo ashi igye anyin ’ì yi ha ahe. ¹⁰ Ukpor undi angwu u᷆ tan lè ’ifufebb na᷅ u᷆ ti fe, likorye kikung-gbo ’ì yi ha ahe ye." ¹¹ Nyong a kong ashina, a mbee kong le: "Udim-tyan Ulazorlos a mbu ’unde, mi ta la wum he." ¹² Be de-e le: "Ukaandi, gbe a mbu ’unde a, hà ’i ndo die he." ¹³ Ukpor Ujeso a maa kong ashi le Ulazorlos a hwō a; befe be ma kong le u mbwa ’unde ’ugyang a. ¹⁴ Ujeso a hà tem lè igie anyina kong gboo le: "Ulazorlos a hwō. ¹⁵ He ’uhwo ’umen mì yi lè igor le mi ma yi há ye, likorye biwom abin bi shi le hè men mà bong ha ami a. Mà bo, li gye lè nde-e." ¹⁶ Utormas (angwu be᷆ mbee ko le bégbé) a de bende-ma le: "Mà be, li te utung ha ahe, hè li bel puu lì lè hwō ’ugbe ken." ¹⁷ Ujeso a lè wu há, be de-e le be ngi Ulazorlos ’i fel ati ande mà. ¹⁸ Kung lè he Ujeruselem gye he Beteni ’ì yi lè ’igbe ye, ki mbee ilamba ifee a. ¹⁹ Ijuus gbamm i ma gye Umata befe lè Umeri lihwu. ²⁰ Nyong Umata a gyo le Ujeso u ba lè há, a bo lè kpee lè he lè he ’ukwo; ukpor Umeri a ngyor kwu há he ushom. ²¹ Umata a kung de-e le: "Atyagi, wò bé kwu nyin, hang unwandagi a hwō ye. ²² Ukpor mi ngye le mà na a hwō mà or, Unim u ka-a ’iyang-yang ashi wo bii he." ²³ Ujeso a de-e le: "Unwanaa u wum lè he lihwu." ²⁴ Umata a de-e le: "Mi ngye le u ba wum lè he lihwu nyong bendi puu be᷆ be wum he liti angi igye anyin ı᷆ mbee." ²⁵ Ujeso a de-e le: "Mi na᷅ mı᷆ wum bendi lè he lihwu, ke be likpan. Undi uyang-yang angwu a bong ha ami, mà ù hwō or, u tem kwa uwum ngyor igye kpamm. ²⁶ Undi angwu a bong ha ami, u shi lè likpan anyin, u tem hwa᷆ ye ngyor igye kpamm. Wo bong igie anyin a?" ²⁷ A fan Ujeso le: "Atyagi, mi bong. Mi bong le wò yi Ukristi, Unwaa Unim angwu Unim a som be he igye anyin a." ²⁸ Umata a kong ashin puu, a hà tem lè nyia de ungwende Umeri le: "Ukaandi a fel i, a le wò te." ²⁹ Umeri a gyo igie anyin gyo-gyo, a tie bo buu gbe gye he ’ipi Ujeso ù yi. ³⁰ Ujeso a ma wa wu ha ahe ushu ye. A ma so lè he ’ukwo he ’ipi Umata a ma kpee lè he. ³¹ Bendi abe be ma sho há he ushom be᷆ tie lè Umeri, be nde ná a tie bo tang he igye, be pwom he, likorye be maa kong le u gya he likwun Ulazorlos he-e ù lè ki a. ³² Umeri a lè wu há, nyong a bel àshì nde Ujeso, a gyebb shī he itang, kung de-e le: "Atyagi, wò bé kwu nyin, hang unwandagi a hwō ye." ³³ Ujeso a nde ná Umeri u᷆ ki, u nde ná bendi abe be te utung ha Umeri be᷆ ki, ki ban he he lityam kangg. ³⁴ A kung bii ābe le: "Ma ngi-e hung a?" Be de-e le: "Atyetyan, bé nde." ³⁵ Ujeso or a ki. ³⁶ Bendi abena be de le: "Kpash! Ki ma nyin he lè he dii." ³⁷ Besuso be de le: "Ndè le ufe na᷅ a ma shi uhwua-ashi u fel nde? Fe, ki shi ná a, hang a ma nya mbee Ulazorlos kaa?" ³⁸ Ki mbee ban Ujeso he lityam kangg. A kung gbe gye he likwun Ulazorlos angi li ma yi ubung a. Be mung ’ukor shī há he ungwu ángi. ³⁹ A de be le: "Mà kung ’ukor lè há." Umata, unwanam Ulazorlos angwu a hwō ana, a de-e le: "Atyagi, kikpong likwom nyin ’i go gba gyong, likorye be ngi-e ’i fel ati ande." ⁴⁰ Ujeso a de-e le: "Mí yi bè da-a ’igyang a le, gbe wo bong ha ami, wo nda ikeb Unim." ⁴¹ Be mung ’ukor lè há likwun. Ujeso a nde àshì gye he ’usi kung kong le: "Ada, mi pee-a ná wo᷆ gyo mi. ⁴² Mi ngye le wo gyo mi mbee ’unyong. Mi fel kong ashin le hè bendi abe be sho i bè bong le wo na᷅ wo som mi be he igye anyin a." ⁴³ Nyong a kong ha Unim ’i mbee puu, a kung gaa kangg le: "Ulazorlos! Bo be he igye!" ⁴⁴ Nya ’ukwo-ukwo, Ulazorlos angwu a ma hwō ana a bo be he igye. Bihwom bi ma yi nii he he abwo lè abee lè lishi. Ujeso a de be le: "Mà pell he ábi he-e ù gye." ⁴⁵ Bendi Ijuus abe be ma yi utung ha Umeri be nde ashi Ujeso a shi, be bong ha ahe gbamm. ⁴⁶ Ukpor besuso be gbe lè há lè bun de bendi Iferesis ashi Ujeso a shi. ⁴⁷ Nyong be gyo āshi, Iferesis lè bekaandi abe be᷆ shang Unim be ko liwu bekaandi puu. Nyong be kpee ukem, be bii bende le: "Lì ha᷅ sha ná a? Ungikye anwun ù so-i sha bikwele-uhwo gya ’ushu. ⁴⁸ Gbe li tyang he le ù gye ’ushu shi biwom abin, hà bendi puu be ba bong ha ahe. Ashin ’i ze le bendi Urom be ba ban li Ushom Unim, be mbee ban li ’ubong puu." ⁴⁹ Undi-iso a ma yi há, be᷆ ko he le Ukayafas. Ufe na᷅ a ma yi Usu bekaandi abe be᷆ shang Unim nya lize limen ana. A bo ’inaa de be le: "Má ngye ’iwom ye gbangg! ⁵⁰ Ki wa nung amen le ’ì yi ngbebb-ngbebb le undi ken ù hwō he lishi bendi puu hwò a᷆shi le ’ubong ’ubo-ubo ’ù nim ye a?" ⁵¹ Ufe-gyang na᷅ a gim igie anyina kong ye, i be lè ha Unim a, bwo ufe na᷅ a ma yi Usu bekaandi abe be᷆ shang Unim nya lize limen ana. A ma de bendi ’iwom ashi ’ı᷆ shi, ashi ’ì yi le Ujeso u hwa᷆ he lishi Ijuus puu. ⁵² Kì yi le u hwa᷆ ka Ijuus ife-ife a ye, u hwa᷆ ka bendi Unim puu he-e ù be lè be lè he biteng puu abi be paa wu, be gbong ābe ukem. ⁵³ He ’uhwo igie Ukayafas, kpi kung lè nya liti limen ana, bekaandi Ijuus be maa fel kee ’ukwo ahwu bè gwu Ujeso. ⁵⁴ He ashina Ujeso a tem tan há he Ujudia gboo ye. A bo gbe lè há he Ujudia gye he ’ubong ahwu be᷆ ko le Ifram. Ku ma yi ’anwaa ’ubong a, ku shi gwaa ha ’iteng ashi undi a ndē há ye a. Ujeso a fel kwu nya lè bendi-utung bema. ⁵⁵ Kunyong ahwu Ijuus ì shi Kipam Agbele-gyong ’u ma fel kpee-kpee. Bendi be ma bo mbee biteng puu há ufam ubell gye he Ujeruselem. Be maa ta hè be bè lè shi ’uhwo-bell be fel betaa-betaa ná likpe ’ubong ’ubell lì yi, mà ukpong ’ipam ’i hà fel. ⁵⁶ Be maa shun Ujeso. Nyong be gbong ukem he Ushom Unim, be bii bende le: "Ma gim le ana a? U nya ba ’ipam ashin ye a?" ⁵⁷ Bekaandi abe be᷆ shang Unim lè bendi Iferesis be ma ke uten le, undi angwu a ndè he ’ipi Ujeso ù yi, ù be de be hè be bè lè kwu-e.

¹ Nyong ’i ma teng ati adyong-ken gye he Kipam Agbele-gyong, Ujeso a ma tem gye he Beteni, kipi ashi ushu Ulazorlos ù yi. Ulazorlos umen i na᷅ Ujeso a ma wum lè he lihwu. ² Nya likwulukwu limen ana be shi Ujeso lizi ngbebb-ngbebb. Umata na᷅ a maa kung lizi be ke be. Ulazorlos a maa za᷆ lizi ipel ha baa Ujeso. ³ Umeri a be nya, a be lè ’itityuo behwu abe be᷆ kaa ’ate kangg. Be kung ashia angi be᷆ ko le unad a shi behwu bemen abe be nung nyin ana. A kung behwu ana bel wu Ujeso he abee, u bel lè igil ima shell he ángi. Kinung ábe ’i sho kpe mbee ushom puu. ⁴ Undi-utung Ujeso ken, angwu be᷆ ko le Ujudas Isikariyot, angwu a ma fel ndyebb he zi, a kung de le: ⁵ "Behwu abena be wa igaa ikwudi ikie. Ndè le hang li kung behwu abena ndyebb zi kung únde anwuna ke bendi-likaa?" ⁶ Ujudas a maa kong ’azi a, a maa kong le bwo ’i gbee he lè bendi-likaa a ye. Ufe na᷅ a maa kam únde, ù yii zà gia sha bima bifong. ⁷ Ujeso a de-e le: "Tyang he. Ki ngbebb ná a ndor nyong ’unyong angyele ugi á. ⁸ Bendi-likaa bè yi utung ha amen mbee ’unyong, ukpor mi ufe, mi ba kwa utung ha amen mbee ’unyong ye." ⁹ Nyong bendi be gyo le Ujeso ù yi he Beteni, bendi ’ipam be ti kwuo be há. Ujeso ufe-ufe na᷅ be ma kee le be nda ye. Be ma kee le be nda Ulazorlos angwu Ujeso a wum lè he lihwu or titi. ¹⁰ He ashin bekaandi abe be᷆ shang Unim be tim le bè gwu Ulazorlos or titi, ¹¹ likorye he ’uhwo ’uma bendi gbamm be maa fel gba tyang ābe la bong ha Ujeso. ¹² Ashi a taa, bendi abe be gye Kipam Agbele-gyong he Ujeruselem be gyo le Ujeso a ndor àshì u ba há he Ujeruselem. ¹³ He ashina be gbel akikie biwua kwu he abwo bo, be la kpee lè Ujeso. Be maa gyam agyam hwaa temm le: "Ipee ì kwu ke Unim. Unim ù ke undi angwu u᷆ be he lizen Atyetyan Unim ana ’ukwun. Unim ù ke Usu Ijuus ’ukwun." ¹⁴ Ujeso a nde ūshōm ’izaaki, u pwom āshi nya a na leěti be ma fee he ’ushia Unim a. Be fee le: ¹⁵ "Men bendi Uzayon, mà shī shell ye. Usu ūme᷅n u ba lè há, u pwom ūshōm ’izaaki." ¹⁶ He ’unyong ahwu a shi ashin, ki nung bendi-utung bema nya abwo-abwo ye. Ukpor nyong ifem Ujeso i tyung gboo lè he lifung-atabe na᷅ ki hà nung ābe. Be hà well le be ma fee he ’ushia Unim le ashin ’i sha, be mbee well le ’itaa abin puu bi shi. ¹⁷ Bendi puu abe be ma yi há nyong Ujeso a wum Ulazorlos lè he lihwu, be fel bun da bendi ashi be ma nde. ¹⁸ Bendi gbamm be bo lè hwaa lè Ujeso likorye be gyo gbe lè ’ikwele-uhwo ashi a shi. ¹⁹ Nyong Iferesis i ndè ná bendi be ti kwuo lè hwaa lè Ujeso, be de bende le: "Mà nde, aki atyan a fel ’idideng. Bendi puu be ti kwuo pwom he." ²⁰ Bendi Igrik be ma yi he liwu bendi abe be ma gye he Ujeruselem hè be bè fe Unim há ’ipam. ²¹ Igrik ana i lè hwaa lè Ufilip angwu u᷆ be lè he ’igie Ugalili, ashi be᷆ ko le Besaida. Be de-e le: "Ukaandi, li kee le li nda Ujeso." ²² Ufilip a kung lè de Andru gbe lè shi, befe ha ahe a, puu befee, be hà te lè de Ujeso gbe lè shi. ²³ Gyo Ujeso le: "Kunyong ’u fel ahwu bendi be᷆ ke-m mi Unwaa Undigye ife. ²⁴ Mi da amen ’igyang, gbe utong ukwul a mbu tyang he itang, gbe a hwō ye, u ngyor ’itaa ù yi, u ba lè isuso ye. Ukpor gbe a mbu tyang he itang, a hwō, ù ha᷅ ba lè isuso gbamm. ²⁵ Undi uyang-yang angwu ’i nyin he lè likpan lima he igye i, u ba nim likpan lima ligyang angyell. Ukpor angwu ’i nyin he lè likpan lima he igye i ye, u ba kwa lè likpan ligyang angyell ngyor igye kpamm. ²⁶ Undi uyang-yang angwu a kong le u kwa undi aki ugi a, ù pwom mi. Kiteng ashi mı᷆ gye, u gya utung ha ami há. Undi angwu a be pwom mi le he-e ù shi-m aki, Atyagi u fem he ufe or titi." ²⁷ Ujeso a de le: "Lityam li ngbebb mi ye. Mì hà de le ana a? Mì de Atyagi le ù kpe kung ’ingie ashin lè ha ami â? Ki ngbebb ná ye, likorye kife kpa-kpa na᷅ mi be. ²⁸ Ashi mi fel kong ’ì yi le, ’Atyagi, shi a᷆shi ’ì shi bendi bè fem lizen ligang.’ " A hà gyo igie lè he lifung-atabe le: "Mi tyung ifem igi mà, mi mbee ba tyung āngi." ²⁹ Bendi abe be ma yi naa nya, besuso be de le, itaa na᷅ i tye; besuso be de le, udengell Unim na᷅ a kong ha ahe. ³⁰ Ujeso a kung de be le: "Igie anyina i kong he ’uhwo ’ugi a ye, i kong he ’uhwo ’umen a. ³¹ Kunyong ’u fel ahwu Unim u᷆ tang ushe bendigye. Kunyong ’u fel ahwu Unim u᷆ waa Usetan lè he ’usu he igye anyin. ³² Mi ufe, nyong be᷆ kung mi ndor he ’usi, kunyong ’umen ana na᷅ mı᷆ be lè bendi puu hwaa lè ’uhwo-gi." ³³ (Ujeso a kong igie anyina le hè bendi bè ngye ’itaa lihwu ashi u᷆ be hwō a.) ³⁴ Bendi abena be de-e le: "Be fee he ’ushia Iten Unim le, Ukristi u kwa ngyor igye. Fe, ki shi ná a, wò so-i de le be ba kung Unwaa Undigye ana ndor he ’usi? Ayang ù yi Unwaa Undigye angwu há?" ³⁵ Ujeso a de le: "Kikung-gbo ’i fel taa ha amen he ’anwaa ’unyong zangg a. Ná ’ikung-gbo ’ì so utung ha amen i, mà ndo tan akikye, le hè ’ifufebb ’ì gye tel amen he ’ukwo ye. Undi angwu u᷆ tan he ’ifufebb u ngya he ’ipi u᷆ gye ye. ³⁶ Ná ’ikung-gbo ’ì so utung ha amen i, mà bong ha ashi, hè men mà fel bendi ’ikung-gbo." Ujeso a kong igie anyin puu, a hà buu lè ndyell he ’ipi undi u᷆ ngye ye. ³⁷ Mà na be ma nde bikwele-uhwo gbamm abi Ujeso a shì or, be bong ha ahe ye. ³⁸ Biwom abina bi shi nya a na leěti Azaya angwu a maa tye ugie ’isom Unim a ma kong a. A ma kong le: "Atyagi, kì nya yi lè undi angwu a bong ha ashi li kong a? Kì nya yi lè undi angwu a nde shob ikeb igang a?" ³⁹ Bendi abena be maa bong ha Ujeso mbee ye nya a na Azaya a kong le: ⁴⁰ "Unim a hwuà ābe àshì, u teb ābe àtyám, le hè be bè nde ye, hè biwom abin or bì nung ābe ye, hè be bè bel àtyám abell hwaa lè he le ù kpan ābe ye." ⁴¹ Azaya a ma kong igie anyin le bwo a nde ìfém Ujeso, a kong gbe lè ufe a. ⁴² Mà na or, bekaandi Ijuus gbamm be bong ha Ujeso. Ukpor be shell ná be kong gboo le be bong ha ahe teng bendi Iferesis be ndō ābe lè he ushom ubell angwu be᷆ kwu liwu. ⁴³ Ki nyin ābe befe Ijuus lè ipee bendigye hwò a᷆ngi Unim. ⁴⁴ Ujeso a kung gaa kangg kong le: "Undi uyang-yang angwu a bong ha ami, a bong ha ami ufe-ufe a ye, a bong ha Atyagi angwu a som mi be he igye i or titi. ⁴⁵ Undi uyang-yang angwu a nde-m, hà a nde Atyagi angwu a som mi be he igye i. ⁴⁶ Mi be he igye i ná ’ikung-gbo, le hè undi uyang-yang angwu a bong ha ami he-e ù ngyor kwu he ’ifufebb ye. ⁴⁷ Undi uyang-yang angwu a gyo igie igi, ukpor a ke ngi ife ye, mi na᷅ mi maa ushe uma ye. Mi be he igye i le mî be maa bendigye ishe a ye, mi be le mî kpan ābe a. ⁴⁸ Ukpor undi angwu a swan mi, u kpe igie igi ye, u ba naa he ushe he liti angi Unim u᷆ tang ushe bendi puu. Igie igi na᷅ ı᷆ be tang libi ke undi umen ana, ⁴⁹ likorye igie angi mı᷆ kong i ba lè he ugim ugi a ye. Atyagi angwu a som mi be he igye i na᷅ u᷆ de-m ashi mì kong. ⁵⁰ Mi ngye le likpan angi lı᷆ ngyor igye li ba lè he igie ima. Ashin na᷅ ’i tan lè shi igie angi mi kong ì yi angi a de-m le mì kong a."

¹ Kunyong ’u ma fel le ’uhwo be sha Kipam Agbele-gyong. Ujeso a ngye le ’i fel ’unyong ahwu ù tyang igye anyin tem lè hwaa lè Atyam. Kung lè há ukpi-ikwu ’i nyin he lè bendi bema abe be ma yi he igye anyin. He ’unyong ahwun a tyung ābe benyin bema sho yilidididi. ² Likwulukwu li gyebb, Ujeso befe lè bendi-utung bema be maa za᷆ lizi abwo ukem. Ki ma yi le Usetan a ma kung ugim ubibi fe Ujudas Isikariyot, Unwaa Usaimun, he lityam lè he item le ù ndyebb Ujeso zi. ³ Ujeso a ma ngye le Atyam a kung biwom puu fe-e ufe he ’ubwo, u ngye le a be lè ha Unim a, u ba tem la hwaa lè ufe umen a. ⁴ Nya a na be ma yi ukem, a bo ’inaa waa ùkpè aliga ken ndor he itang, u kung igedie nii fe he uten; ⁵ a kung umbwo bel fe he ’igbor, keb bendi-utung bema abee atoale, u kung igedie shell ābe ángi. ⁶ A to be fel ha Usaimun Ipita, Ipita a kung de-e le: "Atyagi, wo na᷅ wò tem to i-mi abee a?" ⁷ Ujeso a fan he le: "Ki nung-a ashi mı᷆ shi i mà ye. Ukpor kunyong ’u ba lè ha ahwu ’ı᷆ be nung-a." ⁸ Ipita a kung de-e le: "Mì hà ndo bong le wò to i-mi abee ye." Ujeso a de-e le: "Gbe mi to-a abee ye, hà bel ha awo li mbee." ⁹ Gyo Ipita le: "Atyagi, tem to mi abee afe-afe a ye, fel to mi abwo or, lishi or." ¹⁰ Ujeso a de-e le: "Undi angwu a kwob umbwo mà, a fel utaa-utaa; abee ama afe-afe na᷅ a fel teng le bè to. Men puu mà yi betaa-betaa, kee-kee teng undi ken ufe-ufe a." ¹¹ Ujeso a ma ngye undi angwu u᷆ be ndyebb he zi, fe na᷅ a de le befe puu na᷅ bè yi betaa-betaa ye. ¹² A to ābe abee puu, a tem lè aliga ama shī, tem lè kwu ko. A bii ābe le: "Ashi mi shi amen nyin ’i nung amen a?" A kung de be le: ¹³ "Men ma shi ’i ngbebb ná ma ko mi le Itisha, ma mbee ko mi le Atyamen. Mì yi ufe a ’igyang. ¹⁴ Bwo mi angwu mì yi Itisha ūme᷅n, mi shi Atyamen, mi to amen abee, kì yi le men or mà shi ha bende ná mi shi i. ¹⁵ Mi tyung amen ashi ’ì yi le mà shi mà, ki fel teng le mà shi ha bende ná mi shi a. ¹⁶ Mi da amen ’igyang, unwaa ushom u dyam hwà atyam ye, unwaa-isom u dyam hwà angwu a som he ye. ¹⁷ Má ngye biwom abin. Unim u ka amen ’ukwun, gbe ma shi ābi. ¹⁸ Ashi mi kong i ’ì yi ke men puu a ye. Mi ngye bendi begi abe mi gia. Kigyang-igyang, ashi be fee he ’ushia Unim ’i sha ná be fee āshi. Be ma fee le: ’Undi angwu bel ha abe li zī lizi abwo ukem, a bel fel linaa ha ami.’ ¹⁹ Mi da amen biwom abin ndor he itang ’anaa-anaa i, le nyong bı᷆ be shi, hè men mà bong le mì yi undi angwu mì yi a. ²⁰ Mi da amen ’igyang, undi uyang-yang angwu a kpe unwaa-isom angwu mi som, hà a kpe-m mi a. Undi uyang-yang angwu a kpe-m, hà a kpe Atyagi angwu a som mi be he igye i a." ²¹ Ujeso a kong igie anyin puu, lityam li ban he kangg. A kung kong gboo le: "Mi da amen ’igyang, undi ken lè he liwu līme᷅n i a kam le u ndo ndyebb mi za." ²² Bendi-utung bema be bel àshì shun bende, fel tyāng undi angwu u᷆ kong gbe lè he. ²³ Undi-utung Ujeso angwu ’i nyin Ujeso lè he kangg ana, a ma yi kwu gwaa ha Ujeso. ²⁴ Usaimun Ipita a kung ’ubwo tyung hwaa lè he de-e le, ù bii Ujeso undi angwu u᷆ kong igie anyina gbe lè he. ²⁵ He ashina undi-utung ana a die ngie Ujeso kung bii he le: "Atyagi, ayang a?" ²⁶ Ujeso a fan le: "Undi angwu há na᷅ mi ndo tib ’ahwaa lizi ke-e i." A ndaa ’ubwo kung lizi tib ke Ujudas, unwaa Usaimun Isikariyot. ²⁷ Nya ’ukwo-ukwo nyong Ujudas a ndaa ’ubwo kpe lizi ana, Usetan a ngwee he. Ujeso a kung de-e le: "Ndo shi a᷆shi wo kam le wo sha ana akikye, shī ban ’unyong ye." ²⁸ Bendi-utung bema abe be teng, ki nung ābe ashi a de-e ana ye. ²⁹ Bwo Ujudas na᷅ a maa kam ābe únde, besuso be maa kong le Ujeso a som he le ù lè ndyebb biwom abi nyin be᷆ shi ’ipam a, besuso be gim le hà Ujeso a de-e le ù lè ke bendi-likaa biwom a or. ³⁰ Ujudas a kpe lizi ana kpe-kpe, a shul gbe he igye. (Ki ma yi lè ’usu a.) ³¹ Nyong Ujudas a shul gbe, Ujeso a kung de bendi-utung bema abe be teng le: "Kunyong ’u fel ahwu bendi be᷆ nde ifem igi, mi Unwaa Undigye, be mbee nde ifem Unim gbe ha ami. ³² Bwo bendi be nde ifem Unim gbe ha ami Unwaa Undigye a, Unim or, u ba kung mi ndor he lībwò likaandi he-e ù tyung bendi ifem igi, mi Unwaa Undigye. Kunyong ahwu u᷆ shi ashin ’u fel or mà. ³³ Bebwaa-gi, mi ndo tyang amen, kunyong ’ugi ’u mbee puu. Ukpor ’ì yi nya a na mi ma de bekaandi Ijuus a. Ma ba shun mi kaa, ma ba wa he ’ipi mi ndo gye i ye. ³⁴ Uten ufufe angwu mi ke men ù yi le, kì nyin amen lè bende. Kitaa benyin abe mi-ì yi lè be ha amen, na᷅ ’ì yi kpe-kpe le mà kwu lè be ha bende. ³⁵ Gbe he ashi le ’i nyin amen lè bende, bendi puu be ngya le mà yi bendi-utung begi a." ³⁶ Usaimun Ipita a kung bii Ujeso le: "Atyetyan, wo gya hung a?" Ujeso a fan he le: "Kiteng ashi mı᷆ gye, kanaa-anaa i ufe, ma wa gye há utung ha ami mbee ye. Ukpor liti li ba lè há angi ma᷆ be lè hwaa lè mi há." ³⁷ Ipita a de-e le: "Atyagi, kibang a, mı᷆ pwom-a ’anaa-anaa i ye? Mi kam le mi hwa᷆ he ’uhwo ’ugang." ³⁸ Ujeso a fan he le: "Wo kam ’igyang-igyang a le wo hwa᷆ he ’uhwo ’ugi a? Mi da-a ’igyang le nyin wo swan ’ugbe ’akie le wo ngye-m ye, mà ukpong ’igia ukwuo ’i hà ko."

¹ Ujeso a mbee de be le: "Ufung ù tem be men ye, mà gye ’ushu bong ha Unim, ma gye ’ushu bong ha ami or titi. ² He ushu Atyagi, ishom ì yi há gbamm. Kì kwu ná ye, hang mi de men. Mi gya há, mî lè kam ’iteng ndor amen. ³ Nyong mi kam amen áshi ’i mbee puu, mi tem ba gbong amen la hwaa lè ’uhwo-gi, le he ’ipi mi-ì yi, hè men mà kwu ipel ha ami nya. ⁴ Men ma ngye ’ukwo ahwu mà gbe lè wu he ’ipi mı᷆ gye i." ⁵ Utormas a fan he le: "Atyetyan, li ngye he ’ipi wo᷆ gye ye, ki sha ná a, lı᷆ ngye ’ukwo lè wu há?" ⁶ Ujeso a de be le: "Mi na᷅ mì yi ’ukwo, mi shi ’igyang, mi shi likpan. Kì yi lè undi angwu u᷆ gbe lè hwaa Atyagi fem i-mi tyang ye. ⁷ Gbe ma ngye-m, hà ma ba ngya Atyagi or titi. Kung lè há ’unyin, ma ngye-e, ma mbee nde-e lè ashi." ⁸ Ufilip a de-e le: "Atyetyan, tyung li Atia. Ashin ’ife-ife na᷅ ’ı᷆ kee-kee kwun li ’igyor." ⁹ Ujeso a fan he le: "Ufilip, kongukpaa angwu mì yi utung ha amen i, wo wa ngye-m ye a? Undi uyang-yang angwu a nde-m, hà a nde Atyagi. Ki shi ná a, wo᷆ de-m le mì tyung amen Atyagi? ¹⁰ Wo bong le mì yi ipel ha Atyagi, Atyagi u shi ipel ha ami a? Igie angi mi kong, mi kong āngi he ikeb igi a ye, mi kong he ikeb Atyagi angwu ù yi ha ami, u shi aki ama gbe ha ami a. ¹¹ Men mà bong le bel ha Atyagi lì yi ubibi ken. Gbe ma kee le ma bong he ’uhwo igie igi ye or, mà bong he ’uhwo biwom abi ma nde-m mi shi. ¹² "Mi da amen ’igyang, undi uyang-yang angwu a bong ha ami u sha biwom abi mı᷆ shi. U sha a᷆bi bi dyam hwà a᷆bi mı᷆ shi or, likorye mi gya hwaa lè Atyagi a. ¹³ Kiwom ’iyang-yang ashi ma bii mi he lizen ligi, mi sha āshi ka amen, hè bendi bè fem Atyagi gbe ha ami, Unwaa-ma. ¹⁴ Gbe ma bii mi ’iwom ’iyang-yang he lizen ligi, mi sha āshi." ¹⁵ Ujeso a kong gye ’ushu le: "Gbe ’i nyin amen lè mi, mà ndor iten igi. ¹⁶ Mi ba kong ha Atyagi, mà u ba som amen Undi-Ukpell ususo. U ba kwa ipel ha amen ngyor igye kpamm. ¹⁷ Undi-Ukpell umen i ù yi Ukatia Kunyong Unim angwu u᷆ be tyung amen ’igyang, u shi àtyám āme᷅n a kwu genn. Bendi abe bè yi ke igye anyin, be kpa he ye, likorye be nda he or, ngwu bè ngye-e or ye. Men ufe, ma ngye-e, likorye ù yi ipel ha amen, u shi he atyam āme᷅n. ¹⁸ "Mi gba tyang amen le ma fel ututeb a ye. Mi mbee tem ba hwaa lè men. ¹⁹ Ki teng zangg, bendi abe bè yi ke igye anyin be tem nda-m ye, ukpor men ma nda-m. Le bwo mì yi uwum, men or titi ma ba kwa bewum. ²⁰ He liti limen Ukatia Kunyong Unim u᷆ be hwaa lè men ana, mà ha᷅ ngya le bel ha Atyagi lì yi ubibi ken, bel ha amen li shi ubibi ken, mì yi he atyam āme᷅n. ²¹ Undi uyang-yang angwu a ngye iten igi, u shi āngi, ufe na᷅ ’i nyin he lè mi. Undi angwu ’i nyin he lè mi, ki nyin Atyagi lè he, ki nyin mi lè he titi, mi kung ’uhwo-gi tyung he." ²² Ujudas (angwu Isikariyot a ye) a bii he le: "Atyetyan, he ’ukwo ahwu yang wo᷆ be kung ’uhwo-gang tyung li bel ufe-ufe, wo tyung àbe bè yi ke igye anyin ye?" ²³ Ujeso a fan he le: "Undi uyang-yang angwu ’i nyin he lè mi, u sha a᷆shi mı᷆ kong. Ki nyin Atyagi lè he, bel ha ahe li ba kwa ipel ha undi umen ana. ²⁴ Undi angwu ’i nyin he lè mi ye, ù hà ndo sha a᷆shi mı᷆ kong ye. Mà well le igie angi ma gyo i, i ba lè ha ami a ye, i ba lè ha Atyagi angwu a som mi a. ²⁵ "Mi de men biwom abin nya a na mì so utung ha amen i. ²⁶ Ukatia Kunyong Unim angwu ù yi Undi-Ukpell, Atyagi u ba som he ka amen he lizen ligi, u ba hwua amen ’igyang puu, u mbee shi amen ma well biwom puu abi mi de men. ²⁷ "Nyin i ná mi ndo tyang amen, ikwun igi na᷅ mı᷆ kung ke men. Ikwun imen anyin i ba lè he biwom igye a ye. Ufung ù tem bè men ye, ma tem kwu lè ’ushell or ye. ²⁸ Mi bè de men le mi ndo gya, ukpor mi tem ba hwaa lè men. Gbe ’i nyin amen lè mi, hà mà yal gor lè ibubo he ungwu likorye mi gya hwaa lè Atyagi a, ma ngye le Atyagi a dyam hwo-m. ²⁹ Mi de men abin kie he itang, le he ’unyong ahwu bı᷆ shi, hè men mà bong igie igi. ³⁰ Mi tem kong ha amen lè ’igbe ye, likorye baale Usetan, usu igye anyin, u᷆ fel i. Ukpor ù yi lè ikeb le u da-m ashi mì shi ye. ³¹ Mi kee-kee sha ná Atyagi a ke-m uten a, le hè undi uyang-yang ù ngye le ’i nyin mi lè Atyagi. Mà bo ’inaa, li gye he ’iteng ’isuso."

¹ Ujeso a mbee de bendi-utung bema le: "Mì yi ná ùkwán ugyang. Atyagi u shi ná undi angwu u᷆ kam ùkwán ana. ² Ububu ugi uyang-yang angwu a wum agbe ye, u tang he tyang hell. Angwu u᷆ wum, u kam he he-e ù fel wum kangg. ³ Men mà yi ná ’ibubu ’imen ana. Igie igi angi mi bun de men i kam àtyám āme᷅n, i shi āngi a fel ataa-ataa. ⁴ Mà ngyor gwaa ha ami kpebaa, mi or mi ngyor gwaa ha amen kpebaa. Ububu ufe-ufe faale liten ukwan u wum agbe ye, u kee-kee wum agbe, gbe ù yi gwaa he ubim a. Kitaa ’imen na᷅ men or, gbe ma ngyor gwaa ha ami ye, ma᷆ kwu lè lifem ye. ⁵ "Mi yi ná ùkwán ana, men ma shi ná ibubu igi. Undi uyang-yang angwu a ngyor gwaa ha ami kpebaa, angwu mi or mì yi gwaa ha ahe kpebaa, u kwa ná ububu angwu u᷆ wum shal-shal-shal nà. Ukpor gbe men ma tang lè ha ami, kì yi lè ashi mà tem shi mbee ye. ⁶ Undi uyang-yang angwu a tang lè ha ami, Unim u tem sha lè he ’iwom ye, nya a na ububu angwu be tang tyang lè hell, u hwa᷆ a. Be gbong ibubu angi ’itaa i fa he ’inde, i shī dim bel atyung. ⁷ Ukpor, gbe ma ngyor gwaa ha ami kpebaa, igie igi i ngyor kwu ha amen atyam, ma bii Atyagi ’iwom ’iyang-yang ashi ma᷆ kee, u ka amen áshi. ⁸ Gbe ma shi binunung mbee ’unyong, hà ma sha bendi be fem Atyagi. Kitaa i na᷅ ma᷆ tyung bendi gboo le mà yi bendi-utung begi a. ⁹ Kitaa benyin abe Atyagi ù yi lè be ha ami, na᷅ mì yi lè be ha amen. Mà ngyor kwu he benyin begi. ¹⁰ Gbe ma shi a᷆bi mi de men, hà ma ngyor kwa he benyin begi, nya a na mi shi biwom abi Atyagi a de-m, mi ngyor kwu he benyin bema i. ¹¹ Mi de men ashin le hè men mà kwu lè ’itaa igor angi mì yi lè ngi, le hè igor īme᷅n ì sho yilidididi. ¹² "Uten angwu mi ndo ke men ù yi le: Kì nyin amen lè bende ná ’i nyin i-mi lè men. ¹³ Benyin abe be dyam hwò puu na᷅ bè yi le undi ù hwō he ’uhwo udim-ma. ¹⁴ Men ma kwa bedim-gi a, gbe ma shi a᷆shi mi de men. ¹⁵ Mì tem kung amen ná bebwaa-isom a ye, likorye unwaa-isom u ngya ugim atyam ye. Mi fel kung amen ná bedim-gi hwan, likorye mi de men biwom puu abi Atyagi a de-m. ¹⁶ Men na᷅ ma gia mi le mì kwu atyamen ye; mi na᷅ mi gia amen le mà kwu bebwaa-isom begi. Mi mbee som amen le mà tan shi aki lishi ligi. Lifem aki āme᷅n li dyam, li kwu ngyor igye. He ashin, kiwom ’iyang-yang ashi ma bii Atyagi he lizen ligi, Atyagi u sha āshi ka amen. ¹⁷ Ashin na᷅ ’i shi-m mi ke men uten le ’ì nyin amen lè bende." ¹⁸ Ujeso a gye ’ushu kong le: "Gbe bendi abe bè yi ke igye i be tel amen, mà well le be tel i-mi a mà ukpong be hà tel amen. ¹⁹ Mà kwu ke igye anyin a, hang ’i nyin àbe bè yi ke igye i lè men, likorye mà yi bendi bebell a. Ukpor mi gia kung amen, mi tang amen he abwo lè ha abe, mà tem yi ke igye anyin a ye. Ashina na᷅ ’ı᷆ shi bendi abe bè yi ke igye i be fel tel amen. ²⁰ Mà well le, mi ma de men le, unwaa-ushom u dyam hwà átyám ye. Bendi aben be ma ke-m ’ingie, faale ifung be ba ka amen or ’ingie. Abe be ke igie igi ife, be ba ka amen or ife. ²¹ Bingie abi be᷆ be ke men, be ka amen ábi he ’uhwo ’ugi likorye be ngye angwu a som mi be he igye i ye. ²² Kì kwu le mi bè kong ha abe ye, hang undi u da le be zī libi ye. Ukpor, bwo mi bè tyung ābe ashi ’ì yi ’iban, gbe be fel gye ’ushu shi ’iban, be kwa lè ’ikwu ’ubwo hwaa ye. ²³ Undi angwu a tel mi, hà u tel Atyagi or titi. ²⁴ Kì kwu le mi shi bikwele-uhwo he ashi abell abi undi a bè shi ngye ye ye, hang undi u da le be zī libi ye. Ukpor, mà na be nde biwom abin lè ashi abell or, bè so-i tel mi or, be tel Atyagi or titi. ²⁵ Biwom abin, kì yi le bì shi, hè ’ì kwu ná be ma fee he ’ushia Unim le: ’Be tel mi faale ashi mi shi.’ ²⁶ "Mà well le Undi-Ukpell u ba lè há. Nyong mí gye hwaa lè Atyagi, mi ba som he hwaa lè men. Undi-Ukpell umen ana ù yi Ukatia Kunyong Unim, u ba lè ha Atyagi a. U ba tyung amen ’igyang puu. U ba tyung amen ’igyang gba lè mi. ²⁷ Men ma ndo bun de bendi ’igyang gbe lè mi, likorye mà yi utung ha ami kung lè há he ukpi-ikwu kpamm.

¹ "Mi de men abin le he ’unyong ahwu ’ingie ’ı᷆ be be hwaa lè men, hè men mà naa genn fe-m a. ² Kunyong ’u ba lè há ahwu bè hà be ndō amen lè he ishom angi ma᷆ kwu liwu. Kunyong ’u ba ahwu be᷆ be gwu amen, be gim le be sha a᷆shi Unim a kee a. ³ Be ba sha abin likorye be ngye Atyagi or, ngwu bè ngye-m mi or ye. ⁴ Ukpor mi de men biwom abin kie he itang, le gbe ’unyong ’u fel ahwu be᷆ shi amen biwom bimen i, hè men mà well le mi ma de men abin ndor he itang." Ujeso a gye ’ushu kong le: "Lè he ukpi-ikwu, mi ma de men biwom abin ye, likorye mi ma yi ipel ha amen. ⁵ Kanaa-anaa i, mi fel da amen ábi likorye mi ndo tem la hwaa lè Atyagi angwu a som mi be he igye anyin. Ukpor ’ì yi lè undi he liwu līme᷅n angwu u᷆ bii mi le mi gya hung a ye a? ⁶ Le bwo mi de men biwom abin, ma tem fel he ’imbwee a. ⁷ Mi de men ’igyang a le ’i kwa ngbebb-ngbebb ka amen gbe mi gbe tyang amen, likorye gbe mi gbe tyang amen ye, Undi-Ukpell anwuna u ba hwaa lè men ye. Ukpor gbe mi gbe lè nyin, lè wu he ’ipi Atyagi, mi som he hwaa lè men. ⁸ Nyong a be, u ba tem fem ’igyang tyung bendi abe igye anyin hè be bè ngye le be shi ’iban, be ngye le bè yi kpa-kpa he ashi Unim ye. Be mbee ngye le be za᷆ libi he ushe Unim. ⁹ U ba tyung bendi gboo le be shi ’iban likorye be bong ha ami ye. ¹⁰ U mbee tyung bendi gboo le mì yi ununung gelalala gbe he atemale ugi lè hwaa lè Atyagi, he ’ipi mà tem nde-m ye. ¹¹ A mbee ba tyung bendi gboo le Unim u ba maa bendigye ushe, likorye be nde ná a tang ushe Usetan angwu ù yi usu igye anyin. ¹² "Kì yi lè biwom gbamm abi mi kee le mi da amen, ukpor mi wa da amen ábi ye, likorye bi go gbe men. ¹³ Nyong Ukatia Kunyong Unim angwu u᷆ fem ’igyang tyung amen u᷆ be, u ba tyung amen ’igyang puu. U ba naa kong ’iwom he ikeb ima a ye, u ba kong nya a na u᷆ gyo lè ha Atyagi a. U ba tyung amen biwom abi bı᷆ be shi lè he ’ushu or. ¹⁴ Ukatia Kunyong ana u ba sha bendi be fem mi, likorye biwom abi u᷆ be tyung amen bi ba lè ha ami a. ¹⁵ Biwom Atyagi puu bì yi bigi a. Kife na᷅ ’i shi-m mi de le Ukatia Kunyong ana u ba kung biwom bigi a tyung amen." ¹⁶ Ujeso a mbee de bendi-utung bema le: "Ki teng ’anwaa ’unyong zangg ma tem ba nda-m ye. Nyong ’unyong ana ’u mbee, ma tem be nde-m he ’anwaa ’unyong zangg." ¹⁷ Bendi-utung bema besuso be kong ha bende le: "Ashi a kong ana ’i ze le ana a? Kibang a, u᷆ de le li tem ba nda he ye he ’anwaa ’unyong zangg, he ’anwaa ’unyong zangg li tem nde-e? Ashi le u tem la hwaa lè Atyam ’imen â? ¹⁸ Ashi u de le, ’Kanwaa ’unyong zangg,’ kife ’i ze le ana? Igie anyina i nung li ye." ¹⁹ Ujeso a ngye le be kee le be bii he ’ibibi gbe lè likong limen ana, a kung de be le: "Igie igi i nung amen ye a? Kife na᷅ ma bii bende gbe lè shi a? ²⁰ Mi da amen ’igyang le ma ba kya, fa akpen, ukpor bendi abe bè yi ke igye anyin be ba yal gor. He ukpi-ikwu na᷅ ma᷆ be mbwee, ukpor ’ùkye᷅ ’ūme᷅n ’u ba gie bel fel igor. ²¹ Ki ba kwa ná ungingye u᷆ shi uzwaa nà. He ukpi-ikwu u mbwee likorye ’unyong ’utor ’uma ’u fel. Ukpor gbe unwaa a shul, u naa lityam ’utor ’uma, u fel gor likorye a shi ugaandi. ²² Kitaa ana na᷅ ’ì yi ha ’uhwo-men or. Kanaa-anaa i ma fel lè ’imbwee, ukpor ’unyong ’u ba lè há ahwu bel ha amen lì mbee be nde bende. He ’unyong ’umen ana ma ba yal gor lè ububo he ungwu. Igor īme᷅n i tem ba mbee ye. ²³ "He liti limen ana ma tem ba bii mi ’iwom ye. Mi da amen ’igyang le ’iwom ’iyang-yang ashi ma bii Atyagi he lizen ligi, u sha āshi ka amen. ²⁴ Kpamm be wu ’unyin i, ma wa bii Atyagi ’iwom he lizen ligi ye. Ma ndo bii he biwom he-e ù shi ābi ke men, hè igor īme᷅n ì sho yilidididi." ²⁵ Ujeso a mbee de bendi-utung bema le: "Mi shaa kong biwom ha amen he ityang a. Baale ’unyong ’u᷆ fel ahwu mı᷆ tem kong ha amen he ityang ye. Mi ba bun da amen gba lè Atyagi gboo. ²⁶ Nya he ’unyong ’umen ana ma ba bii Atyagi biwom he lizen ligi. Mi de le, mi ba bii Atyagi biwom ka amen a ye. ²⁷ Ki nyin Atyagi lè men, likorye ’i nyin amen lè mi, ma bong le mi ba lè ha ufe a. ²⁸ Kigyang a, mi be lè ha ufe á be he igye i. Kanaa-anaa i ’unyong ’u fel ahwu mi tem ndo gye hwaa lè Atyagi." ²⁹ Bendi-utung bema be de-e le: "Eng-hengg! Wo fel kong gboo, wo tem kong he ityang a ye. ³⁰ Ki nung li le wo ngye biwom puu. Bìbībī abi li kam le li bii-a or, wo ngya ābi tang teng. He ashina li bong le ’igyang-igyang a, wo ba lè ha Unim a." ³¹ Ujeso a fan ābe le: "Ki ze le ma bong he ’uhwo ashin â? ³² Kunyong ’u ba lè há ahwu men puu ma᷆ be paa he abwo, undi uyang-yang u gye he ushu uma. Ma ba buu tyang mi ututeb. Ukpor mi ba kwa ututeb ye, likorye Atyagi ù yi utung ha ami mbee ’unyong. Mi de le ’unyong ’umen i ’u fel or mà. ³³ Mi de men ashin le hè men abe ma gwaa ha ami kpebaa hè ’ì kwun amen he atyam kpatiaa. He igye i, ma kpa ’ingie, ukpor mà ngyor naa genn. Mi hwò igye anyin mà!"

¹ Nyong Ujeso a kong igie anyin puu, a kung àshì nde gye he lifung-atabe kung kong le: "Atyagi, kunyong ’u fel ahwu wò tyung bendi ifem igi, mi Unwaa-gang, le hè mi Unwaa-gang or mì tyung bendi ifem igang. ² Wo kung bendigye puu fe-m he ’ubwo, le mì kung likpan angi lı᷆ ngyor igye ke bendi abe wo kung fe-m he ’ubwo. ³ Likpan angi lı᷆ ngyor igye lì yi le undi ù ngya-a wo angwu wo ufe-ufe na᷅ wò yi Unim ugyang, u mbee ngye-m, mi Ujeso Ukristi angwu wo som be he igye i. ⁴ Nyong mì yi he igye i, mi tyung bendi ifem igang. Mi shi mbee aki angi wo som mi le mì be shi. ⁵ He ashin, Atyagi, kpe-m mî tem be hwaa lè ’uhwo-gang, tem lè mi kwu he ifem ipel ha ’uhwo-gang nya a na leěti mi ma yi lè ngi nyong igye anyin i ma wa fel ye. ⁶ "Mi kung-a tyung bendi begang abe wo fem kung lè he igye i kung ke-m. Bè yi bendi begang a, wo kung ābe fe-m he ’ubwo a. Be ke igie igang ife. ⁷ Ki fel nung ābe le ’iwom ’iyang-yang ashi mì yi lè shi, ’i be lè ha awo a. ⁸ Mi bun de be ’isom ashi wo som mi, be kpe shi, be mbee ngye dangg le mi be lè ha awo a. Be bong le wo na᷅ wo som mi. ⁹ "Mi ka ushang ka ābe, mi ka ka a᷆be bè yi ke igye anyin a ye, mi ka ka a᷆be wo kung ke-m a, likorye bè yi ka-a wo a. ¹⁰ Bendi puu abe bè yi begi bè yi begang a; puu abe bè yi begang, be shi begi a. Bendi be nda ifem igi gba ha abe. ¹¹ Kanaa-anaa i ’unyong ’u fel ahwu mì tem be hwaa lè wo. Mi-i tyang igye anyin, ukpor befe bè so hen. Atyagi, wo angwu wò kee-kee yi Unim, bong ’iwom ’ì do ābe ye. Kam ābe gbe he lizen ligang angi wo kung kwǔ-m. Kam ābe hè be bè kwu ūbībī ken nya a na bel lè wo lì yi ūbībī ken. ¹² Nyong mi ma yi ipel ha abe, mi kung lizen ligang angi wo kung kwǔ-m kam ābe. Mi kam ābe le hè ’iwom ’ì do ābe ye. He ashina undi ken or lè he liwu libell a waa nim ye, kee-kee kwom ha angwu be fee ndor le ù nim ufe-ufe. Ki shi nya a na leěti be ma fee he ’ushia ’ugang le ’ì shi a. ¹³ Mi ndo tem ba hwaa lè wo, mi kong abin nyin ná mì so he igye i, le hè be bè kwu lè ’itaa igor angi mì yi lè ngi, be kwu lè ngi i go kangg a. ¹⁴ Mi de be ’isom ’igang, bè tem yi ke igye anyin a ye, nya a na mi or mì yi ke igye i a ye a. He ashin bendi abe bè yi ke igye i be tel ābe. ¹⁵ Mi ka ushang le wò gbe lè be lè he igye anyin a ye, mi ka ushang le wò kam ābe ha-a à bong Usetan, usu bibibi, ù do ābe ye. ¹⁶ Bè yi ke igye anyin a ye, nya a na mi or mì yi ke igye anyin a ye a. ¹⁷ To ābe ndor betaa-betaa gbe he ’igyang ’igang le hè be bè fel bendi begang abe bè yi gelalala. Igie igang na᷅ ì yi ’igyang. ¹⁸ Nya a na wo som mi be he igye i, na᷅ mi or mi ndo som ābe le bè shi-m aki he igye i. ¹⁹ Mi kung ’uhwo-gi gbangg fa-a he ’ubwo le hè be befe or bè kung ’uhwo-bell gbangg fa-a he ’ubwo. ²⁰ "Mi ka ushang ka a᷆be bè yi i befe-befe a ye, mi ka ka bendi puu abe be᷆ be bong ha ami gbe he igie igang angi be᷆ be bun de bendi lè he ’ushu or. ²¹ Mi ka ushang le befe puu bè kwu ūbībī ken. Atyagi, mi ka ushang le nya a na wo gwaa ipel ha ami, mi gwaa ipel ha awo, na᷅ befe or be gwaa ipel ha abel, hè bendi abe igye i bè bong le wo na᷅ wo som mi ’igyang. ²² Nya a na wo fem mi na᷅ mi or mi fem ābe, hè be bè gwaa ūbībī ken ná bel lè wo li gwaa. ²³ Mi kwa ipel ha abe nya a na wò yi ipel ha ami. Kitaa ana na᷅ befe puu be᷆ be gwaa ubibi ken kpebaa, hè bendi abe igye i bè ngye le wo na᷅ wo som mi, be ngye le ’i nyin-a lè be ná ’i nyin-a lè mi. ²⁴ "Atyagi, mi kee le bendi aben abe wo kung ke-m, bè kwu ipel ha ami he ’ipi mì yi, hè be bè nde ifem igi angi wo ke-m leěti mà ukpong wo hà mbe igye anyin. Wo ke-m ifem anyina likorye ’i nyin-a lè mi. ²⁵ Atyagi, wò yi gelalala hwò puu. Bendi abe igye anyin be ngya-a ye, ukpor mi ngya-a; bendi begang aben be ngye le wo na᷅ wo som mi be he igye i. ²⁶ Mi shi ābe be ngya-a, mi gya ’ushu sha ābe be ngya-a, le hè be bè kwu lè ’itaa benyin abe wò yi lè be ha ami, mi or mi kwu ha abe atyam."

¹ Nyong Ujeso a kong ha Unim ’i mbee puu, a bo lè bendi-utung bema lè tia umbwo angwu be᷆ ko le Ukidron, be gbe gye he utia angwu a ma yi nya. ² Ujudas angwu a ndyebb Ujeso zi or, a ngye ùtiá umen ana, likorye Ujeso lè bendi-utung bema be shaa kpee nya kpam-kpam. ³ He ashina Ujudas a bo lè likwu ishogya lè abe be᷆ kang Ushom Unim gye nya. (Bekaandi abe be᷆ shang Unim lè Iferesis na᷅ be ma som ābe.) Be kwu bishinde lè agor lè biwom bedye gye nya. ⁴ Ujeso a ma ngye ashi ’ı᷆ be-e lè há ’ushu. He ashin a die hwaa lè be, bii ābe le: "Ma shun ayang a?" ⁵ Be fan he le: "Li shun Ujeso angwu Unazaret a." A kung de be le: "Mà nde-m." Ujudas ugyang angwu a ndyebb he zi a ma yi naa nya ipel ha abe. ⁶ Nyong Ujeso a de be le, "Mà nde-m," be gbaa gye item item lè mbu he itang. ⁷ Ujeso a mbee kung bii ābe le: "Ma shun ayang a?" Be fan he le: "Li shun Ujeso angwu Unazaret a." ⁸ Ujeso a de be le: "Bwo mi de men le ma nde-m i, gbe ma᷆ shun i-mi a, ma tyang bendi-utung begi bè gye." ⁹ Ujeso a kong ’itaa ashina le hè ’ì ngyor he igie ima angi ingyesu a de Atyam Unim. A ma de-e le: "He liwu bendi abe wo kung fe-m he ’ubwo i, undi ken or a waa nim ye." ¹⁰ Usaimun Ipita angwu a ma yi lè ’ashwia, a shwia waa āke lè he ’ubor kpi shia ungikye ken ’utyung ahwu lizen. Ungikye umen be kpi shia he ’utyung ana a maa sha Usu bekaandi abe be᷆ shang Unim aki. Lizen lima lì yi le Umalkes. ¹¹ Ujeso a kung de Ipita le: "Kung ’ashwia ’agang kil he ’ubor. Wo kee le mì kpe ’ingie ashi Atyagi a ke-m le mì kpe ye a?" ¹² Ukaandi ishogya lè ishogya ima be kwu Ujeso, be bua he indi he abwo. Abe be᷆ kang Ushom Unim or be ma kpell ābe. ¹³ Be kpi ’ikwu te lè he lè hwaa lè Anas. Anas umen i na᷅ a ma yi ātyām ungye Ukayafas; Ukayafas a ma yi Usu bekaandi abe be᷆ shang Unim nya he lize limen ana a. ¹⁴ Ukayafas na᷅ a ma tebb bekaandi Ijuus le ’i ngbebb le undi ken ù hwō he lishi bendi puu. ¹⁵ Usaimun Ipita lè undi-utung Ujeso ususo be pwom Ujeso. Undi-utung uma umen ana, Usu bekaandi abe be᷆ shang Unim a ngye-e dangg. He ashina a pwom Ujeso lè wu he ushu Úsu bekaandi abe be᷆ shang Unim. ¹⁶ Ukpor, Ipita a ngyor naa he ungwu likong. He ashin undi-utung umen angwu Usu bekaandi abe be᷆ shang Unim a ngye ana a tem gye há lè kong ha unwaasul angwu u᷆ kang ungwu likong, a hà kpe kung Ipita gye he afee. ¹⁷ Unwaasul ana a de Ipita le: "Kigyang a, wò yi undi-utung ungikye anwuna a." Ipita a fan he le: "Mi ye o!" ¹⁸ Nya he ’usu ’umen ana ligwu li maa sha ’ibibi-bibi-bibi. He ashina iboyi úkaandi angwu u᷆ shang Unim lè bendi abe be᷆ kang Ushom Unim be ma hwee ’inde nya, be gwee. Ipita or a lè naa utung ha abe nya, u gwee ’inde. ¹⁹ Anas angwu a ma yi Usu bekaandi abe be᷆ shang Unim a bii Ujeso gbe lè bendi-utung bema, u bii he gbe lè abi u᷆ hwua bendi. ²⁰ Ujeso a fan he le: "Mi-i bun ’isom ’igi de bendi puu gboo. Mbee ’unyong mi hwua bendi he ishom angi be᷆ kwu liwu, mi hwua he Ushom Unim angwu he Ujeruselem, biteng abi Ijuus ı᷆ gbong ukem. Kì yi lè ashi mi kong he ’undyell ngye ye. ²¹ Fe, ki shi ná a, wo᷆ bii i-mi ashi mı᷆ hwua bendi? Bii ābe be gyo mi hwan, hè be bè da-a abi mi hwua ābe. Be ngye a᷆bi mi hwua puu." ²² Nyong a kong igie anyina, undi ken lè he liwu abe be᷆ kang Ushom Unim a ma yi naa nya, a kung ’ubwo kpam Ujeso he ’unaa. A kung de-e le: "Kpash! Ki shi ná a, wo᷆ mbe lityam fan ukaandi ’itaa ana?" ²³ Ujeso a fan he le: "Gbe ’ì yi le mi kong ’ibibi a, bun āshi be he igye. Gbe mi kong ’ibibi a ye, ki shi ná a, wo᷆ kpam mi ’ubwo he ’unaa?" ²⁴ Anas a mà tem lè he nya lè indi angi be ma bua he som lè ke Ukayafas, Usu bekaandi abe be᷆ shang Unim. ²⁵ Usaimun Ipita a ma so naa nya u᷆ gwee ’inde, bendi-iso be de-e le: "Li ngye dangg le wo or wò yi undi-utung ungikye anwuna a." Ipita a mbee swan de le: "Mi ye o!" ²⁶ Uboyi Úsu bekaandi abe be᷆ shang Unim a ma yi nya, u shi unwanam undi angwu Ipita a ma kpi shia he ’utyung a. Uboyi ana a de Ipita le: "Nde le wo na᷅ mi ma ndè he utia utung ha ahe?" ²⁷ Ipita a mbee swan le ufe a ye. Nya ’ukwo-ukwo kigia ukwuo ’i kung ko. ²⁸ Leèti-leèti be bo lè Ujeso lè he ushu Ukayafas gbe ndo he ukoto he ushaale Upalet angwu a ma yi ukaandi Urom. Ijuus ife i ngwee he afee ukoto ye, likorye be kee le bè ndor ’uhwo-bell betaa-betaa, le hè be bè shi Kipam Agbele-gyong. ²⁹ Upalet a fem lè há afee be hwaa lè be nya, kung bii ābe le: "Ungikye anwun a shi ’ibang a?" ³⁰ Be fan he le: "Ù shi ’ibibi a ye, hang li kwu-e be lè he hwaa lè wo ye." ³¹ Upalet a de le: "Men-agyang mà te lè he lè maa he ushe ná iten īme᷅n ì yi." Be fan le: "Bel lì yi lè ikeb le li tang ushe le bè gwu undi ye." ³² (Ashin ’i shi ’itaa i le hè Ujeso ù hwō lihwu angi a maa de bendi le u ba hwa᷆ a.) ³³ Upalet a tem lè ngwee he ukoto, a ko Ujeso be naa nya, u bii he le: "Wo na᷅ wò yi usu Ijuus a?" ³⁴ Ujeso a fan he le: "Kìbībī ashin, wo-gyang na᷅ wo gim bii āshi a, hà igie angi bendi be kong na᷅ i shi-a wo bii ’itaa ana?" ³⁵ Upalet a fan le: "Nde le wo ngye le mì yi Ijuus a ye? Bendi begang lè bekaandi bebell abe be᷆ shang Unim na᷅ be be lè ushe ugang hwaa lè mi. Bun de-m ashi wo shi ngwu be kwa-a." ³⁶ Ujeso a fan he le: "Mi za᷆ ’ùsù he igye anyin a ye. Kì kwu le mi za᷆ ’ùsù he igye anyin a, hang bendi-utung begi be kpe-m ’utyong ndo ’undo le hè Ijuus ì shi-m ’iwom ye. Ukpor mi da amen ’igyang a le mi za᷆ ’ùsù he igye i a ye." ³⁷ Upalet a fan he le: "Ashin ’i ze le wò yi usu â?" Ujeso a fan he le: "Wo kong nya. Atan-lengi angwu mi be he igye anyin ù yi le mî fem ’igyang tyung bendi. Ashina na᷅ ’i shi be hwan mi he igye i. Undi uyang-yang angwu ’i nyin he lè ’igyang, ù dang ’utyung gyo mi." ³⁸ Upalet a bii he le: "Kibang ’ì yi ’igyang?" Upalet a hà mbee bo gye he igye lè hwaa lè bendi Ijuus abe bè yi há, a de be le: "Mi nde ’ibibi ashi ungikye anwun a shi ye. ³⁹ Ná likpe ’ubong ’umen lì yi, he lishi lize nyong ’i fel le mà shi Kipam Agbele-gyong, mi shaa waa undi ken lè he igaadye tyang abwo. Ki nya ngbebb amen le mì waa usu Ijuus tyang abwo a?" ⁴⁰ Be kwu gaa kangg le: "Kpaa ye o! Ufe na᷅ wo᷆ waa tyang abwo ye. Waa Ubarabas hwan tyang abwo." (Ki shi le Ubarabas umen i a maa zà lè biwom bedye he abwo. A maa mòr imor.)

¹ Upalet a hà kung Ujeso ke le bè lè kpam. ² Ishogya i tim ’ishilishi ītōng shi-e he lishi. Be kung aliga uwulu abwaa shi-e ná usu. ³ Be keb be fel nyan he, be keb tim anung he itang de-e le: "Usu Ijuus, kukwun ’u kwa-a he ’uhwo." Be kpam he abwo he anaa. ⁴ Upalet a mbee tem lè hwaa lè bendi Ijuus há he igye, u de be le: "Mà gyo, mi ndo la ba lè ungikye anwun he igye hè men mà ngye dangg le mi nde ’ibibi ashi a shi ye." ⁵ Ujeso a fem be he igye, a ma so lè ’ishilishi ītōng shī, u so lè aliga usu uwulu abwaa shī. Upalet a de be le: "Mà ndè undi ūme᷅n." ⁶ Nyong bekaandi abe be᷆ shang Unim lè abe be᷆ kang Ushom Unim be nde-e, be gaa le: "Maa he bee he ’ikpakpaa. Maa gwu-e." Upalet a kung de be le: "Men-agyang mà te lè he lè maa bee he ’ikpakpaa. Mi ufe mi ndè ’ibibi ashi a shi ye." ⁷ Ijuus i fan he le: "Ná ’ì yi he iten ityan, kitaa undi ’itel i, kì yi le ù hwō, likorye u kung ’uhwo-ma le ù yi Unwaa Unim a." ⁸ Igie anyin i shi Upalet a fel he ’ushell kangg. ⁹ A mbee tem gye he afee ukoto, a bii Ujeso le: "Wo ba lè hung a?" Ujeso a fan he ye. ¹⁰ Upalet a kung de-e le: "Kibang a, wo᷆ fan mi ye? Nde le wo ngye le mi-ì yi lè ikeb le mi tyang-a abwo le wò gye, mi shi lè ikeb le mi gwa-a?" ¹¹ Ujeso a fan he le: "Unim na᷅ a ka-a ikeb anyin. Kì kwu ná ye, hang wò yi lè ikeb le wo sha-m ’iwom ye. Kife na᷅ ’i tan lè shi ngwu ’iban undi angwu a be lè ushe ugi hwaa lè wo ’i ban hwò a᷆shi ’igang." ¹² Nyong Upalet a gyo igie anyin, a la tyang Ujeso abwo, ukpor Ijuus i fel gaa kangg le: "Gbe wo hà tyang ungikye anwun abwo, hà wo fel undi-linaa Usiza, Usu ukaandi angwu he Urom a, likorye gbe undi uyang-yang a de le ufe ù yi usu a, ashina ’i ze le u kin ’ùsù lè Usiza a." ¹³ Upalet a hà be lè Ujeso he igye be bel kwu he ’idem ashi u᷆ kwu maa ushe, he ’iteng ashi be᷆ ko le Kigigyo ’ukor. Be ko āshi he igie Ihibru le Ugabata. ¹⁴ Liti limen ana li ma yi liti angi liti uwell libell li pwom lè ngi a, he ’unyong ahwu be maa shi Kipam Agbele-gyong. Libwee li maa ndo pwom he ’udyan lishi. Upalet a de be le: "Mà kpe usu ūme᷅n nyin." ¹⁵ Be gaa de-e le: "Mà kpe-e gbe lè he lè há, ma maa he bee he ’ikpakpaa." Upalet a bii ābe le: "Ma kee le bè kung usu ūme᷅n maa bee he ’ikpakpaa a?" Bekaandi abe be᷆ shang Unim be fan he le: "Lì kee-kee yi lè usu ken a, Usiza ufe-ufe a." ¹⁶ He ashina Upalet a kung Ujeso ke le bè ndo lè maa he bee he ’ikpakpaa. Ishogya i kpe Ujeso gbe lè he. ¹⁷ Ufe-gyang a so ’ikpakpaa ’ima gye he ’iteng ashi be᷆ ko le Kiteng ’ikpukpo lishi. Be ko āshi he igie Ihibru le Ugorgorta. ¹⁸ Nya na᷅ be maa he bee he ’ikpakpaa. Be mbee kung bendi befee, maa angwu ken bee he ’ikpakpaa lè ha ahe ’ubwo limbell, be maa angwell lè ha ahe ’ubwo lizen. Ujeso a ma yi he ’udyan. ¹⁹ Upalet a ma fee ’iwom ke be lè bee nya he ’ikpakpaa. A fee le: "Ujeso angwu Unazaret, Usu Ijuus a." ²⁰ Be fee āshi he igie abong akie—he igie Ihibru, Ilatin lè Igrik. Bendi gbamm be bo a᷆shi be fee bee ana likorye ’i ma yi he ungwu ’ukwo a. ²¹ Bekaandi abe be᷆ shang Unim be nde ashina, be lè de Upalet le: "Fee le ù yi Usu Ijuus a ye; fee le a de le ufe ù yi Usu Ijuus a." ²² Upalet a de be le: "Ashi mi fee, undi ù gie āshi ye." ²³ Nyong ishogya i maa Ujeso bee he ’ikpakpaa ’i mbee puu, be kung inditen ima hwua akwu ande le undi ishogya uyang-yang ù kung likwu ken. Ukpor be kung aliga ama angi be tim faale agwaale he ’iteng ken or, ²⁴ be de bende le: "Aliga anyin a ngbebb gbe gyong, lì gie āngi ye. Mà lì tye isasa a zī āngi." Ashin ’i shi nya a na leěti be ma fee he ’ushia Unim a. Be fee le: "Be kung inditen igi hwua ha bende; be tye isasa zī aliga agi." Kitaa ana na᷅ ishogya i shi. ²⁵ Bendi abe be ma yi naa kpee-kpee gye he ’ikpakpaa ashi be maa Ujeso bè yi anam Ujeso lè unwanam anam Ujeso, lè Umeri angwu a ma yi ungye Uklopas lè Umeri Umadelen. ²⁶ Ujeso a bel àshì nde anam befe lè undi-utung uma angwu ’i nyin he lè he be naa gwaa, Ujeso a de anam le: "Iye, ndè unwaa-gang." ²⁷ A mbee de undi-utung uma ana le: "Ndè anaa." Kung lè he liti limen ana undi-utung ana a kpe anam Ujeso le ù lè kwu ha ahe ushu. ²⁸ Nyong ashina ’i mbee, Ujeso a ngye le aki ama a mbee. A kung kong le: "Umbwo u gyor mi." A kong ashin hè ’ì ngyor ná leěti be ma fee he ’ushia Unim a. ²⁹ Ki ma yi lè ’imia ’utyuo fe he ’igbor tyung nya. Be kung ’udedell kib há he ’utyuo, kung kil he úkwān angwu be᷆ ko le uhisop. kung ndaa tyua he he ungwu. ³⁰ Ujeso a ndeb ’utyuo ana, kung de le: "Ki mbee." A mbo lishi lima be he itang hwō. ³¹ Liti limen ana li ma yi angi be kam nyong liti uwell angi lì yi ābe likaandi a. He likpe libell, ki ma yi le likwom li kwa he ’usi he liti uwell ye. He ashina Ijuus i bii Upalet le ù ke ikeb hè be bè bun abee akwom anyina hè be bè kung āngi lè ngi. ³² He ashina ishogya i lè bun abee bendi abe be maa bee utung ha Ujeso. ³³ Ukpor nyong be fel ha Ujeso, be nde le a hwo mà. Be tem bun ama abee ye. ³⁴ Undi ishogya ken a kung likung tim Ujeso he ufaa. Anung lè umbwo bi wu be he igye. ³⁵ (Undi angwu a nde ashina lè ashi, a bun āshi kong ’igyang, ufe-gyang a ngye le u kong ’igyang, u da amen ashin le hè men mà bong ha Ujeso a.) ³⁶ Abin puu bi shi hè ’ì ngyor ná leěti be ma fee he ’ushia Unim le: "Be ba bun he ukeb ken-ken or ye." ³⁷ Be mbee fee he ’iteng ’isuso le: "Be ba nda undi angwu be tim he likung he ufaa." ³⁸ Ujosef angwu a be lè he Alimatia a be nya. Ujosef umen i a maa nyia inyia pwom Ujeso likorye u shell Ijuus. A lè tim Upalet anung le ù kung likwom Ujeso ke-e. A kung ke-e. Ujosef a lè shul āngi kung gbe lè ngi. ³⁹ Unikodimes angwu a ma bé hwaa lè Ujeso lè ’usu or, a be utung ha Ujosef, a be lè isi angi i nung nyin angi be᷆ ko le umuru lè alos. Isi ana i ngbe᷆bb áshiá ha igaa bendo ifee. ⁴⁰ Bendi befee ana be kung bihwom bifung abi be gbaa ābi isi nii likwom Ujeso puu, nya a na likpe Ijuus lì yi. ⁴¹ Nya he ’ipi be maa he bee he ’ikpakpaa, ùtiá a ma yi há. Likwun ’ukor li shi nya he utia angi be ngi undi nya ngye ye. ⁴² Bwo liti uwell na᷅ li maa be he ashi-ataa, be kung he lè ngi nya likorye likwun li ma yi nya kpee-kpee.

¹ He ukpi-ikwu liti utyong Beke, Umeri Umadelen a ngyù bo he ashi liti gye he likwun Ujeso. A lè nde le ’ukor ahwu be shī ungwu likwun, be mung āhwu lè há. ² A buu gbe lè há ligbe-ligbe lè hwaa lè Ipita befe lè undi-utung angwu a ma nyin Ujeso kangg ana, u de be le: "Be fem kung likwom Atyetyan lè he likwun, li ngye ’ipi be gbe lè ngi lè ndor ye." ³ Ipita lè undi-utung ana be hà buu gbe ndo há he likwun. ⁴ Undi-utung ana a buu gbe tyang Ipita lè wu há ’ushu. ⁵ A keb nii nde gye he afee likwun, a nde bihwom bifung abi be ma nii he kie há, ukpor a shul gye há afee ye. ⁶ Usaimun Ipita a be wu nya, gbe ligbe-ligbe gye há afee likwun, a nde bihwom bifung wu há. ⁷ Ukpebeshi angwu be ma nii he lishi ’ì yi kan ndor ta-ta. ⁸ Undi-utung Ujeso angwu a wu há ’ushu ana a gbe pwom Ipita gye há afee titi, lè nde biwom abin, u bong le Ujeso a wum ’igyang. ⁹ (Ashi be ma fee he ’ushia Unim leěti le Ujeso u ba wum lè he lihwu ana, ki wa nung ābe ye.) ¹⁰ Ipita befe lè Ujon be tem gye he ushu. ¹¹ Umeri Umadelen a tem gye he likwun, ù yi naa há ungwu likwun, u kya. A nii nde gye he afee likwun, ¹² a nde idengell Unim ifee angi i shī aliga afung-afung. I ma yi kwu he ’ipi be ma kie Ujeso. Angwu ken a ma yi kwu lè he ’ipi be ma kie he ndor lishi, angwell u shi lè he ’ipi be ma ndor he abee. ¹³ Be bii he le: "Iye, wo kya ’ibang a?" A fan le: "Be fem kung likwom Atyagi lè nyin, mi ngye he ’ipi be kung āngi lè ndor ye." ¹⁴ A kung bel àshì gye he item nde Ujeso, ukpor u shob he ye. ¹⁵ Ujeso a bii he le: "Iye, wo kya ’ibang a? Wo shun ayang a?" Umeri u kong le angwu u᷆ kang ’iteng ’imen ana. A kung de-e le: "Ukaandi, gbe wo nà wo fem kung he lè i, wò hā tyung mi ’iteng ashi wo kie he mî lè kung he gye lè he." ¹⁶ Ujeso a kwu-e ko, "Umeri." A bel àshì nde-e, u fan he he igie Ihibru le Uraboni. Ashi le Uraboni ’i ze le itisha. ¹⁷ Ujeso a de-e le: "Kwu-m abwo ye, likorye mi wa tem gye he ’usi lè hwaa lè Atyagi ye. Ndo te lè de bebwandagi le mi ndo tem la hwaa lè Atyagi angwu ù yi Atyamen or titi. Ùyi Unim ugi, u shi Unim ūme᷅n." ¹⁸ Umeri a bo gbe lè de bendi-utung Ujeso le a nde Atyabell Ujeso, u bun igie ima puu de be. ¹⁹ Nya he ukpi-ikwu liti utyong Beke limen ana leekwulukwu bendi-utung Ujeso be gbong bende lè sho he ushom, be ngib àshì fe ’uhwo-bell likorye be maa shell bekaandi Ijuus. Ujeso a hà fem naa nya he liwu libell, u de be le: "Ikwun ì kwu amen he ’uhwo." ²⁰ A kong ashin puu, u bel bikpaa abwo lè ufaa uma tyung ābe. Bendi-utung bema be ma yi lè igor kangg ná be nde-e. ²¹ A mbee kung de be le: "Ikwun ì kwu amen he ’uhwo. Nya a na Atyagi a som mi be he igye i, na᷅ mi or mi som amen." ²² A hà ti ’unyong wu ābe, u de le: "Mà kpe Ukatia Kunyong Unim. ²³ Undi uyang-yang angwu ma tyang biban bima ke-e, Unim or u tyang ābi ka he. Ukpor angwu ma tyang biban bima ke-e ye, Unim or u tyang ābi ka he ye." ²⁴ He ’unyong ahwu Ujeso a kpi ’ikwu te lè ’uhwo-ma lè tyung bendi-utung bema, Utormas angwu be᷆ ko le bégbé a ma yi utung ha bende-ma nya ye. ²⁵ Nyong a be, be de-e le: "Bel lí yi nde Atyetyan Ujeso." Utormas a fan ābe le: "Gbe mi-gyang mi nde bikpaa ikaa angi be ma maa he lè ashi agi ye, mi kung udyong-bwo ugi tyua há ye, mi tyua ’ubwo ha ahe ufaa he ’ipi be ma tim he likung ye, mì hà ndo bong le ma kong ’igyang a ye." ²⁶ Ati a gbe adyong-ikie, bendi-utung Ujeso be mbee gbong nya ushom umen ana. Utormas a ma fel yi utung ha abe há. Mà na be ma ngib àshì or, Ujeso a fem naa nya he liwu libell, u kong de be le: "Ikwun ì kwu amen he ’uhwo." ²⁷ A hà kung de Utormas le: "Bel àshì ndè, wo kung udyong-bwo ugang tyua mi he i bikpaa ikaa, wo ndaa ’ubwo tyua mi he ufaa. Tem tyāng ityang ye, fel bong ha ami a." ²⁸ Utormas a de le: "Wò yi Unim ugi lè Atyagi a." ²⁹ Ujeso a kung de-e le: "Wo fel bong likorye wo nde-m lè ashi agang. Ki kwa ’inunung ka a᷆be be nde abin ye, ukpor be bong ha ami." ³⁰ Ujeso a ma shi bikwele-uhwo gbamm he ashi bendi-utung bema. Be fee ābi puu fe he ’ushia ahwun ye. ³¹ Abi be fee fe nyin, be fee le hè bendi bè bong le Ujeso ù yi Ukristi, u shi Unwaa Unim, hè be bè fel lè likpan ’unyong gbe he abongale ha ahe.

¹ He ’unyong ’ususo Ujeso a mbee te lè ’uhwo-ma lè tyung bendi-utung bema besuso he ’unyong ahwu be ma yi gwaa he umbwo angwu be᷆ ko le Utaiberias. Ashin na᷅ ’i ma shi: ² He liti ken, Usaimun Ipita, lè Utormas angwu be᷆ ko le bégbé, lè Unatandyell angwu u᷆ be lè he Ukena he ’ubong Ugalili lè bebwaa Uzebedi befee lè bendi-utung bema befee, be ma yi nya ukem. ³ Usaimun Ipita a de bema le: "Mi gya ìkwǎn." Abe be teng be de le: "Li te utung." Befe puu be mà bo lè ngwee he ’inong lishor gbe ìkwǎn. Be tan lè ’usu kpamm taa ashi ukpor be kwu ùkwǎn ken or ye. ⁴ Nya leèti-leèti, Ujeso a fem naa há ungwu umbwo. Bendi-utung bema be wa ngye le Ujeso a ye. ⁵ Ujeso a bii ābe le: "Ishomate, ma wa kwu ’iwom ye a?" Be fan he le: "Dia." ⁶ A kung de be le: "Mà kung ’ataa ana tyang lè he ’igie ’inong ashi lizen, mà ma gia kwa ìkwǎn." Be kung āke tyang nya ’igie ana. Ikwan i sho há gbamm. Bè tem yi lè ikeb angi bè shwia fem āke be he ugo-igye ye, likorye ikwan i fel go há afee ’ataa gbe gyong. ⁷ Undi-utung angwu ’i nyin Ujeso lè he ana a de Ipita le: "Atyetyan Ujeso a!" Nyong Ipita a gyo ashin, aliga angi a ma waa ndor he itang le he-e ù shi aki, a tem lè ngi shī, geb tye gye há he umbwo. ⁸ Ukpor bendi-utung bema abell be ma yi he ’inong, be die te, be su lè ’ataa ake ’a sho lè ìkwǎn hwulo-hwulo-hwulo ana. Kung lè he ’ipi be ma yi gye he ungwu umbwo, ki ma yi lè ’igbe ye, ki mbee abee asi adyong ’ugbe akie. ⁹ Nyong be wu he ugo-igye, be nde ’inde úkee᷆ nya. Ki ma yi lè ìkwǎn ndor há ’inde lè ibred. ¹⁰ Ujeso a de be le: "Mà gia ìkwǎn angi ma kwu ana, be lè ngi." ¹¹ Usaimun Ipita a tem lè ngwee he ’inong, a su lè ’ataa ana gye he ugo-igye. Ìkwǎn ikaandi i ma go há gbamm. I ma yi asi adyong-ifee lè ikwan lihwo lè ngi ikie. Mà na i ma go ’itaa ana or, kataa ’a ma ti paa ye. ¹² Ujeso a de be le: "Mà be zī lizi." He liwu libell, undi ken or a ma mbe lityam bii he le, ufe ayang a ye. Be ngye le Atyabell a. ¹³ Ujeso a die hwaa lè be nya, a kung ibred lè ìkwǎn ke be. ¹⁴ Kung lè he ’unyong ahwu Ujeso a wum lè he lihwu, kugbe ahwun na᷅ ’u ma yi àhwu lekie ná u te lè ’uhwo-ma lè tyung bendi-utung bema. ¹⁵ Be zī lizi li mbee puu, Ujeso a bii Usaimun Ipita le: "Usaimun, unwaa Ujon, ki nyin-a lè mi ’igyang-igyang hwò biwom abin puu a?" Ipita a fan he le: "Eng, Atyagi, wo ngye le ’i nyin mi lè wo." Ujeso a de-e le: "Gbe ’i nyin-a lè mi ’igyang-igyang a, kam mi inwaa ítiā." ¹⁶ He ’ugbe ahwu lefee, Ujeso a mbee bii Ipita le: "Usaimun, unwaa Ujon, ki nyin-a lè mi ’igyang-igyang a?" A fan he le: "Eng, Atyagi, wo ngye le ’i nyin mi lè wo." A mbee de Ipita le: "Kam mi ìtiā." ¹⁷ Ujeso a mbee bii Ipita ’ugbe ahwu lekie le: "Usaimun, unwaa Ujon, ki nyin-a lè mi a?" Ki fel ban Ipita he lityam likorye Ujeso a bii he ’ugbe ’akie le ’i nyin he lè he a. A kung de-e le: "Atyagi, wo ngye biwom puu, wo ngye le ’i nyin mi lè wo." Ujeso a mbee de-e le: "Kam mi ìtiā. ¹⁸ Mi da-a ’igyang le leěti nyong wo ma so ushomate, wo maa kam ’uhwo bo gya he ’ipi wo kee. Ukpor ìtí nyong wo᷆ be kaa, wo ba ndaa abwo ndor undi-iso u kung-a gba lè wo gya he ’ipi wo kee ye." ¹⁹ Ujeso a ma kong ashin hè ’ì tyung Ipita ’itaa lihwu ashi Ipita u᷆ be hwō, ashi ’ı᷆ be lè ipee ke Unim. A hà de Ipita le: "Pwom mi." ²⁰ Ipita a bel àshì nde undi-utung Ujeso angwu ’i nyin Ujeso lè he kangg, u pwom ābe. Ufe umen na᷅ leěti a ma die hwaa lè Ujeso nyong be zī lizi bii he le: "Atyetyan, ayang u᷆ be ndyebb-a zi?" ²¹ Nyong Ipita a nde-e, a kung de Ujeso le: "Atyagi, hà angwu u᷆ be i ufe?" ²² Ujeso a de-e le: "Gbe ’i nyin mi le ù kwu uwum kpamm mi gbe tem be he igye i or, ashina ’ì yi likong ligang a ye. Wo-ò pwom mi." ²³ Ki kung ti ’ihwee gbungg he liwu bendi-utung Ujeso le, Ujeso a de le undi-utung uma umen ana u tem hwa᷆ ye. Ujeso a ma de le u hwa᷆ ye a ye. Ashi a ma de Ipita ’ì yi le: "Gbe ’i nyin mi le ù kwu uwum kpamm mi gbe tem be he igye i, ashina ’ì yi likong ligang a ye." ²⁴ Undi-utung umen angwu a kong ashin gbe lè he ana, na᷅ u᷆ de men biwom abin, u fee ’ushia ahwun. Li ngye le igie anyin ì yi ’igyang. ²⁵ Biwom bisuso abi Ujeso a ma shi bi go gbamm. Bè be fee ābi puu he ’uken-uken, hang igye puu or i kpà ndor ashia angi be fee ābi ye.