James

James

¹ Mi Ujems angwu mì yi uboyi Unim befe lè Atyetyan Ujeso Ukristi, na᷅ mı᷆ fee ’ushia ahwun hwaa lè men bendi Ijuus abe ma fe Unim, abe ma paa wu mbee igegem he igye i. Mi kong lè men puu. ² Bebuye, he ’unyong ’uyang-yang ahwu bingie bitaa atyetye-atyetye bı᷆ kem fe men, mà kpe bi igor-igor, ³ likorye bingie abin bi kaa amen nda le ma fe lityam ha Unim’igyang-igyang â? Bingie bimen ana bi ba sha amen ma fel naa genn fa Unim. ⁴ Mà ngyor naa genn fe Unimlè wu he umbee-likel, hè men mà fel kpa-kpa he ashi Unim faale uben, ma mbu gyan he ’inunung ’iyang-yang ye. ⁵ Gbe ’ì yi lè undi he liwu līme᷅n angwu a bi lishi ye, ù bii Unim le ù ke-e lishi abyele. Unim a ngbebb inung ’indee-indee; ufe na᷅ u᷆ ke bendi biwom puu, u kwell ’akwukwell ye. Undi uyang-yang angwu a bii he lishi abyele, u ka he ángi lityam ken. ⁶ Ukpor undi angwu a bii Unim le ù ke-e ’iwom, ù fe lityam ha ahe le u ka he, u fel lè atyāngale le hà ù ke-e or, hà ù ke-e ye or, ye. Undi angwu u᷆ tyāng ityang ù yi ná umbwo angwu u᷆ tim puu-puu-puu mbee ’unyong. ⁷ Undi angwu ’itaa i, u ndor lityam he ’iteng ken ye, u fe lityam ha Unim ye, ù ndor lishi le u kpa ’iwom lè ha Unim ye. ⁹ Undi Unim angwu ’ù yi he ’ukpo he igye anyin ye, ù kwu lè igor, bwo a dyam he ashi Unim. ¹⁰ Undi Unim angwu a mbu ’ingbebb or, ù kwu lè igor nyong Unim a be lè he he itang likorye a ngye le undi-ingbebb u za᷆ igye ye nya a na bibubo ukwan bı᷆ zī igye ye i a. ¹¹ Nya a na ishu ı᷆ bi kangg, bibubo bı᷆ nia, bi well wu he itang, kunung ábi ’u mbee. Kitaa ’imen i na᷅ undi-ingbebb u᷆ be hwō tyang bingbebb bima shal-shal-shal. ¹² Undi angwu a ngyor naa genn fe Unim he ’unyong ugilale, u ba kwa lè igor likorye gbe a hwò igilale puu, Unim u be ke-e likpan ligyang angyell.Life na᷅ lì yi lifem angi Unim a kyebb le u ba ka bendi puu abe ’i nyin ābe lè he. ¹³ Undi uyang-yang angwu ’itaa ugilale ’iyang-yang ’i be hwaa lè he, ù fel lè ugim le Unim na᷅ u᷆ gil he ye. Kì yi lè ashi ’ı᷆ lam Unim shi-e u᷆ shi ’ibibi ye. Ufe-gyang or, u sha undi le ù shi ’ibibi ye. ¹⁴ Bigyor bibibi abi bì yi he lityam undi na᷅ bı᷆ lam he shi-e u᷆ shi bibibi. Gbe a shi āshi puu, ki be lè lihwu. ¹⁶ Bebwandagi lityam, mà tyang ’iyang-yang ’ì lam amen ye. ¹⁷ Kinunung ’iyang-yang ashi ’ì yi lè àbēl ye, hà ’i ba lè ha Unim a. Puu abi bi ba lè ha Unim angwu a shi libwee, lè ’ufell lè ikpen ndor he usi a. Ufe u gie or, ngwu ù tan ná libwee lı᷆ tan he-e ù gbe tyang li he ’ifufebb or ye. ¹⁸ Ufe-gyang na᷅ a fe ukaa ndè waa le gbe he igie ima angi ì yi ’igyang i, u sha li li fel bebwaa-ma, hè li lì fel utie-ushu bendi puu abe a ke be likpan ’unyong. ¹⁹ Bebwandagi lityam, má ngye abin. Undi uyang-yang ù gyo ’igyo dangg, ukpor ù shwie fan likong ye, u shwie ngywo ingywo ye, ²⁰ likorye undi u᷆ ngywa ingywo á ha᷅ sha ’inunung ashi ’ı᷆ nyin Unim ye. ²¹ He ashin mi da amen le, mà mbeè lè ’ibibi ’iyang-yang lè he likpe līme᷅n. Mà kung abwo āme᷅n lè he ’ibibi ’iyang-yang. Mà keb’uhwo-men ke Unim, ma gyo igie ima angi a fe men he atyam, likorye igie ima ana na᷅ ì yi lè ikeb le i kpan amen lè he ’iban. ²² Mà shi biwom he ’ukwo ahwu igie Unim i hwua amen, mà kee-kee gyo agyoale ufe-ufe a ye. Undi angwu u᷆ gyo agyoale ufe-ufe, u᷆ shi a᷆shi a gyo ana ye, u sòm ’uhwo-ma isòm. ²³ Undi uyang-yang angwu u᷆ gyo agyoale ufe-ufe, u shi ashele ye, hà ù yi ’itaa ken ha undi angwu a ndè ’uhwo-ma li-li-li he ’inde-ushu, nyong a gbe lè há, nya ’ukwo-ukwo u tem well ná á yi ndè ’uhwo-ma á yi yi ye. ²⁵ Ukpor undi angwu u᷆ shun igie Unim li-li-li, u gye ’ushu shi biwom he ’ukwo ahwu igie Unim i hwua he, gbe u᷆ kee-kee gyo, mà u naa lityam a ye, u᷆ gyo u shi a᷆bi a gyo, Unim u ka he ’ukwun kangg, likorye igie Unim ì yi gelalala, i shi lè ikeb le ì kpan li lè he ’iban. ²⁶ Undi uyang-yang angwu a kung ’uhwo-ma le ù yi undi Unim a, gbe u᷆ ndor ’abell ’ama kporr mbee ye, hà u lam ’uhwo-ma ilam le ù yi undi Unim, hà biwom abi u᷆ shi ná undi Unim ana or, bì yi ’idideng. ²⁷ Likpe undi Unim angi lì yi kpa-kpa he ashi Unim lì yi le ù kpell bebwaa-aban, u kpell bengye-uhwuu abe be᷆ kpē ’ingie, u ndor ’uhwo-ma’igbe-igbe lè ha biwom igye anyin puu abi bì yi bibibi he ashi Unim.

¹ Bebuye, bwo men ma bong ha Atyetyan Ujeso Ukristi angwu ’asu ’ama ’a dyam hwò puu a, ki ngbebb le mà taā bendi itaa ke be ife ye. ² Pisoye bendi befee be be he ’ipi ma kpee liwu. Angwu ken ù yi undi-ingbebb, a fe biwom abi bı᷆ kaa ’ate, u fe unwaande angwu be kung igold shi-e. Angwu ken u shi undi-likaa, u fe bigegem bihwom. Má gor kpē angwu a bwee idem i bwo-e he ashi ’indee-indee ana, ma kie he ’idem ishagba, de-e le, "Ukaandi, kwu ana." Angwu likaa ufe, ma de-e le ù naa ana; pisoye ma de-e le ù bel kwu he itang a. Likpe linunung na᷅ lì nya yi ana a? ⁴ Undi angwu a shi ’itaa ana, hà a shi likpe liketye likorye a shi tyung le undi-iso a dyam hwò unde-ma. Kitaa likpe anyin lì yi likpe libibi a. ⁵ Bebwandagi lityam, mà gyo. Bendi abe be mbu likaa he igye i, na᷅ Unim a waa le bè bong ha Atyetyan Ujeso Ukristi, hè be bè fel mbu ’ingbebb he ashi Unim. Be mbee fel lè abwo he ’iteng-usu ashi Unim a kyebb leěti le u ka bendi abe ’i nyin abe lè ufe Unim. ⁶ Bwo ’ì yi ná, kibang a, ma bia bendi-likaa? Ndè le bendi-ingbebb na᷅ be᷆ shi amen zī, be kwu amen gye lè men he ukoto? ⁷ Bendi-ingbebb na᷅ be᷆ kong bia lizen ishagba angi Ujeso Ukristi. Lizen limen ana na᷅ Unim a kung shì le gbe ha angi be᷆ fel ko li le bendi bema ufe Unim. ⁸ Uten angwu Ujeso Ukristi, Usu utyan, a tye, be fee fe he ’ushia Unim, ù yi le: "Kì nyin-a lè unde-gang ná ’i nyin-a lè ’uhwo-gang." Bendi abe be ke ife shi-e, hà be shi ’i ngbebb. ⁹ Ukpor, gbe undi a hà fel ke undi-iso ife hwò unde-ma, hà a shi ’iban, hà a zī libi he abanale Iten Unim. ¹⁰ Mà undi ù shi iten Unim puu, fel kee-kee ban ken ufe-ufe or, hà a ban Iten Unim puu. ¹¹ Unim umen angwu a tye uten le undi ù gbe ipel ha undi-iso fem ungye-ma tyang ye i, ufe umen na᷅ a mbee tye uten le undi ù gwu undi ye. He ashin gbe undi a gbe ipel ha undi-iso fem ungye-ma tyang ye, ukpor a gwu undi ufe, hà a ban iten Unim a puu. ¹² He ashin mi kee le mà ngye le, he ’iwom ’iyang-yang ashi ma᷆ kong lè ashi ma᷆ shi, mà well le he liti ken Unim u ba maa amen ushe le hà ma ke ife shi iten ima angi ı᷆ kpan amen lè he biban a or. ¹³ Undi angwu u᷆ kwu lè beshi ha bendi ye, Unim or u ba kwa lè beshi ha ahe he liti ushe ye. Ukpor undi angwu u᷆ kwu lè beshi ha bendi, u ba nda le beshi abe Unim u᷆ kwu lè be ha ahe he liti ushe be sha he u za᷆ likpong. ¹⁴ Bebuye, gbe undi a bong ha Unim, ukpor u᷆ shi aki anunung ye, kitaa abongale ashina ’ì yi ’idideng a zii. Kidideng abongale ashina ’i ba kpa he tyang abwo he ushe Unim ye. ¹⁵ Gbe ’ì nya yi le lì yi lè unwandatyan ken angwu a bong ha Unim, angwu ù yi lè lizi or, ngwu inditen or ye, undi he liwu līme᷅n a de-e le, "Gye lè ’ukwun, Unim u hā ka-a lizi lè inditen," ukpor ufe u ke-e lizi lè inditen ye, ashi a kong ana ’ì yi ’idideng a zii. ¹⁷ Kitaa ana nà abongale ha Unim or a᷆ kwu ’idideng zii, gbe à yi faale aki anunung. ¹⁸ Pisoye undi u da le: "Undi ken a bong ha Unim a, angwell u shi aki anunung a." Mi fan undi angwu há le: "Kì yi lè ’ukwo ’ususo-ususo ahwu undi u᷆ tyung le a bong ha Unim fem aki anunung ashele tyang ye. Kinunung ashi undi u᷆ shi na᷅ ’ı᷆ tyung le a bong ha Unim." ¹⁹ Ndè le wo bong le Unim ù kee-kee yi ken a? Gbe wo bong ná, hà wo shi ’i ngbebb. Ukpor wò ngye le ikeb ibibi or i ngye le Unim ù kee-kee yi ken a, ki shi āngi i shell, tung for-for-for. ²⁰ Wò yi dangg ye! Mì shi ná a, mî sha-a ’ì nung-a le, gbe undi a bong ha Unim, a shi aki anunung ye, hà abongale uma ù yi á ’idideng zii? ²¹ Ndè atietyan Abraham, kibang a ma shi a᷆shi ’i shi Unim a kung he ná undi ununung he ashi ama? Kiwom ashi Ebraham a ma shi ’ì yi le a ma kung unwaa-ma Azik te lè he le u la shang Unim. ²² Ki nung nwongg lè he likpe Ebraham le a ma yi lè abongale or, u shi aki anunung or. Kinunung ashi a ma shi na᷅ ’i ma shi abongale uma a ma hà fel kpa-kpa. ²³ Ashi ’i ma shi i, ki shi nya a na be fee ndor he ’ushia Unim a. Be fee le: "Le bwo Ebraham a fe lityam ha Unim na᷅ Unim a kpe-e ná undi ununung he ashi ama." Be mbee fee le, Unim a ko Ebraham le udim-ma. ²⁴ Ashin ’i tyung amen le undi u fel ununung he ashi Unim gbe a shi aki anunung or, ki kwom he abongale mà ’i mbee a ye. ²⁵ Mà mbee ndè undi ná Urehab angwu a ma yi ungingye akpela. Leěti nyong Ijuus i ma som bendi gye he ’igie ashi ù yi, a ma kpe be ngbebb-ngbebb, u tyung ābe ’ukwo ahwu be᷆ gbe wu he ushu lè ’ukwun. He ashi a ma shi ana, Unim a ma kpe-e ná undi ununung he ashi ama. ²⁶ Gbe ’ūnyōng ’u gbe lè ha undigye, hà undi umen ana a fel likwom a, a fel ’idideng zii. Kitaa ’imen ana na᷅ abongale ha Unim or a᷆ kwu ’idideng zii, gbe à yi faale aki anunung.

¹ Bebuye, ki ngbebb le bendi bēme᷅n gbamm bè fel bitisha ye, likorye men ma ngye le ushe angwu be᷆ be maa li bel bitisha u ba dyam hwà angwu bendi abe be teng iteng. ² Bel puu li sha imbeb gbamm. Gbe ’ì yi lè undi angwu ’abell ’ama ’a᷆ shi umbeb ye, hà undi umen ana ù yi faale uben he akwo ama puu. U shi lè ikeb le u ndor agwo ama puu le a shi biwom puu kpa-kpa. ³ Mà ndè ’iwom ná ’ukaa-inyia i, gbe undi a kee āhwu le ’ù ke-e ife, u kung ’anwaa ’igem ’inde bua kwa āhwu he ungwu atong, le nyong ’i fong he le he-e ù pwom āhwu gye he ’iteng ’iyang-yang ashi ’i fong he. ⁴ Mà mbee ndè ’iwom ná ’inong lishor, mà na ’i dyam or, kufem ahwu ’ukaa-ukaa ’u sob lè shi lo-lo-lo or, undi angwu u᷆ naa ’inong u kung unwaa ’ikpe a, tan lè shi gya he ’ipi a kee. ⁵ Kitaa ana na᷅ ’abell ’à yi. Mà na ’a zen or, kà yi lè ikeb he inyiahwo undigye ’indee-indee, ka kong biwom or bi dyam kangg. Men ma ngye le umbee-inde ù yi lè ikeb le u gba ’ìndē sha᷆ mbee ukor gbangg. ⁶ Kabell ’à yi ’itaa ken ha ’ìndē. He ’abell ’atyan na᷅ bibibi he igye anyin puu bi fe ushu. Kafe na᷅ ’a᷆ tan lè bibibi ke agwo undigye puu. Ka nim lè undigye kung lè he ’unyong be hwan he lè wu he ’unyong ahwu u᷆ hwō. Kà yi ’ìndē ashi ’ı᷆ be lè ha Usetan ugyang a. ⁷ Bendi bè yi lè ikeb le be kwun bitaa inyia puu, be bè kwun inyia libeb, linyun, ìshiı᷅, lè abi lishor. ⁸ Ukpor kabell ’afe-afe na᷅ ’ì yi lè undi angwu u᷆ kwun āke mbee ye. Kà yi ’ibibi ’iwom ashi ’ì yi lè abwo akwele ye gbangg. Bezu abe be᷆ tan lè lihwu be ba lè ha ’abell a. ⁹ Kabell ’amen a ken, lı᷆ kung pee Atyetyan Unim angwu a gyan li puu; kafe a ken, lı᷆ tem lè ke buu bendi abe Unim a mbe bi ’uhwo-ma atye. ¹⁰ Kabell a ken, lı᷆ kung āke ke ipee, fe lı᷆ mbee tem lè ke buu unde-tyan atye. Bebuye, kitaa ’iwom ashin ’i ngbebb le lì shi ná ye. ¹¹ Linwan a ken, umbwo u nyin he ungwu, u zu he ungwu a? ¹² Bebuye, umogol ú nya fel wum agbe ulyom, ngwu ulyom na᷅ ù nya fel wum agbe umogol ye. Umbwo ununung u ba lè he linwan angi lı᷆ tal he azor ye. ¹³ Kì nya yi lè undi he liwu līme᷅n angwu a bi lishi, biwom bi nung he à? Ù shi binunung, u keb ’uhwo-ma likorye binunung lè ’uhwo akebale na᷅ bı᷆ tyung le a bi lishi. ¹⁴ Ukpor, gbe mà yi lè ubell ubibi lè lityam abanale, ma᷆ gim ’uhwo-men ufe-ufe-ufe, hà ’i ngbebb le mà pwom ungwu le ma bi lishi ye, hà ma mbee bè uman fe ’igyang. ¹⁵ Lishi abyele angi ’itaa i, li be lè ha Unim a ye, lì yi angi igye anyin a. Li be lè he igim ibibi angi bendigye, li be lè ha Usetan, usu bibibi. ¹⁶ He ’iteng ’iyang-yang ashi bendi bè yi lè lityam abanale, undi-undi u gim ’uhwo-ma ufe-ufe, anaa lè akpe abibi bi kwa há titi. ¹⁷ Lishi abyele angi lı᷆ be lè ha Unim lì yi atyetye. Undi angwu ù yi lè lishi abyele angi ’itaa i, u kwa gelalala, u kwu ikwun ha bendi, u mbu ’uhwo ha bendi, u kpo ’utyung ye, u kwu lè beshi kangg ha bendi, u shi ’inunung mbee ’unyong. Undi angwu ù yi lè lishi abyele angi ’itaa i, ù yi kpell-kpell-kpell ye, u lam bendi ye. ¹⁸ Bendi bemen abe bè yi bendi-ikwun, abe be᷆ yi bendi-ikwun, abe be᷆ gwell bendi, be ba nda ’inunung kangg lè he ’iwom ’iyang-yang ashi be᷆ shi. Kinunung ’imen ana ’ì yi ná lifem angi lı᷆ be lè he ’iwom ashi undi u᷆ kwan.

¹ Kibang ashi ’ı᷆ be lè anaa lè beshwan he liwu līme᷅n mbee ’unyong? Ma mbwa linaa likorye igim ibibi īme᷅n i fell amen ’uhwo he atyam. ² Mà yi lè ’igyor le hang mà kwu lè biwom, ukpor mà shi na ana or le hè men mà fel lè bi, ma fel lè bi ye. Ashin ’i shi amen ma kam bendi or agwele. Ma bell biwom bendi or, ma fel lè bi ye, ashin ’i shi amen ma ndo shwan beshwan, ma ndo bendo. Ashi ’i shi amen ma ndè biwom abi ma᷆ kee ye, kì yi le ma bii Unim a le ù ke men ábi ye. ³ Pisoye ma bii Unim ábi, ukpor a ke men ábi ye, likorye ma bii he lè ugim liketye. Ma bii he biwom abi bı᷆ ke men-agyang ufe-ufe igor a. ⁴ Aye, men bendi bikpellale! Ki ze le ma ngye le undi angwu ù yi utyang ha igye anyin ù yi undi-linaa Unim a ye a? Undi uyang-yang angwu a kee le ù fel utyang ha igye anyin, hà a fel undi-linaa Unim a. ⁵ Be fee fe he ’ushia Unim le: "Kūnyōng ahwu Unim a shi fe undigye ’u bung ashi kangg." Mà shī gim le ashi be fee i ’ì yi ’idideng zii a ye. ⁶ Ukpor, kiken ashi Unim u᷆ ke li he inung ima, kì yi lè ikeb hwò igim ibibi angi ì yi ha abel. Kì yi nya a na be fee fe he ’ushia a le: "Unim ù yi linaa ha bendi idim, ukpor u sha ’inunung ha abe be keb ’uhwo-bell." ⁷ He ashin mà keb ’uhwo-ma fe Unim he ’ubwo. Mà swan Usetan, mà u buu tyang amen. ⁸ Mà die ngie Unim, he-e ù fel kpee-kpee ha amen. Men abe mà yi bendi-iban, mà kung abwo āme᷅n lè he ’iban. Men bendi bikpellale, mà mbee lè bibibi lè he atyam āme᷅n gbangg. ⁹ Mà shi ugim gbe lè biban abi ma shi, mà mbwee, ma ki, ma fe akpen he ’uhwo abi. Mà tyang ābi inyin, mâ fel fe akpen hwan; mà tem gor igor aye, mà fel mbwee imbwee. ¹⁰ Men mà keb ’uhwo-men fe Unim he ’ubwo, he-e ù hà bo amen ’inaa. ¹¹ Bebuye, mà bia bende ye. Undi uyang-yang angwu a ban lizen unde-ma, u bia he, hà a ban Iten Unim, u mbee bia āngi. Gbe men ma fel bendi abe be bia Iten Unim a, hà mà yi bendi abe be᷆ ke Iten ife a ye, hà ma sha ’uhwo-men ma fel bendi abe be bia Iten Unim a. ¹² Unim ufe-ufe na᷅ ù yi lè ikeb le u ka uten, u shi lè ikeb le u gie he. Ufe umen na᷅ ù kee-kee yi lè ikeb le u kpan bendi, u ke ikeb le bendi bè hwō. Wo ufe, ayang ù hà yi-a wo angwu wo᷆ bia unde-gang? ¹³ Mà dang ’utyung gyo mi, men abe ma᷆ de le, "Liti anyin, liti anyin, bel li ba gya he ’ubong ahwell ee, li ba kwa há lize libo sha ūshī hè li lì nde lifem." ¹⁴ Men-agyang ufe, ma ngye ashi ’ı᷆ shi ’uhwo a? Men ufe, ma ba kwa ná a? Men mà yi ná ’ibu ashi ’ı᷆ mbu leèti, he ’anwaa ’unyong zangg ’i taa. ¹⁵ Kì yi ngbebb-ngbebb le mà de le, "Gbe ’i ngbebb Unim, a ndor li bewum, li ba sha ’iwom ’itaa i ’itaa i." ¹⁶ Kukwo-ukwo i ufe, mà so lè idim, mà yii pwom ungwu. Ungwu apwomale angwu ’itaa i ù yi liketye. ¹⁷ Ki ngbebb le mà well le undi angwu a ngye ’iwom ashi ’ì yi le ù shi, a mor āshi ashele, hà a shi ’iban.

¹ Men bendi-ingbebb, mà dang ’utyung gyo mi! Ki ngbebb le mà ndo kung ki, fe akpen, likorye ’ingie ashi ’ı᷆ be hwaa lè men ’i dyam kangg. ² Bingbebb bīme᷅n bi hwee ban, ikung i ndeb ban amen bihwom idem. ³ Únde ūme᷅n or, bindebekpen bi mbe ban he; bindebekpen ana bì yi ’itaa a ashi ’ı᷆ tyung le, nya a na bi mbe ban únde ana na᷅ bı᷆ be mbe ban inyiahwo īme᷅n fel ná wò ko le ’ìndē na᷅ ’i shī āngi nà. Men mà so-i kam bingbebb bīme᷅n ndor he ’usi. Ashin ’i ze le ma ngye le umbee-likel ati igye anyin na᷅ à yi he abwo i ye a? ⁴ Mà yii gya ’ushu lam bendi abe be᷆ shi amen aki he utia, ma kung únde angwu be shi amen aki ke be ye. He ashin be ki hwaa lè Unim le ù ndè lè be. Kùkye᷅ ’ubell ’u wu ha Unim angwu biwom puu bì yi he ’ubwo ’uma a. ⁵ Mà yi kib he binunung abi igye anyin, ma shi ’iyang-yang ’itaa ma kee.Ma za᷆ dyam kwa nyong liti linim nya a ná be᷆ ke bigundu lizi le bì zī dyam nyong liti agwele a. ⁶ Men ma maa ushe tang libi ke bendi benunung, ma gwu ābe, be shi ’ukaa ha amen ye. ⁷ Bebuye, mà ngib lityam naa genn kwu kpamm Atyetyan Ujeso u gbe be. Mà ndè undi-utia, u ngib lityam kwa baā utia uma lishi, u kwa umbwo ligbe undor, u kwu ’ungmam ’u te, u mbee kwu ’unyong ahwu be᷆ fem agbudyu ’u fel. ⁸ Men or mà ngib lityam ’itaa ken. Mà naa genn he afele Unim, likorye ’unyong ahwu Atyetyan Ujeso u᷆ be ’u fel kpee-kpee. ⁹ Bebuye, mà shī nem inem fe bende ye, hè men mà zī libi ha Unim ye. Mà nde, Atyetyan Ujeso angwu u᷆ be tang ushe a fel kpee-kpee. ¹⁰ Bebuye, mà shi ugim gbe lè bendi abe leěti be maa tye ugie ’isom Unim. Lè há íti, nyong be maa kpē ’ingie, be ma ngib lityam naa genn.Men or mà ngib lityam naa genn ná befe be ma naa. ¹¹ Li dè le Unim a ke be ’ukwun likorye be ngib lityam naa genn lè wu he umbee-likel. Mā ndè ná Ujob a ma ngib lityam nyong bingie bi ma yi fe-e; ma mbee ndè ná Unim a ma shi ’ingie Ujob ’i ma be lè ’ukwun ke-e. Kì yi faale atyangale le Unim u ngya ’ingie undi, u shi lè beshi ha bendi bema. ¹² Bebuye, kigyang ashi ’i hwò puu na᷅ ’ì yi le undi ù tam ’iwom ye.Undi ù tam lifung-atabe or, ngwu ù tam igye or, ngwu ù tam ’iwom ’iyang-yang he igye i or ye. Mà ’ibang-ibang ’ì shi, undi ù tam ye gbangg. Gbe ma bong ibong, kì ngyor le ma bong; gbe ma swan iswan, kì ngyor le ma swan, hè men mà zī libi he ushe Unim ye. ¹³ Gbe ’i yi lè undi he liwu līme᷅n angwu u᷆ kpē ’ingie, undi umen ana ù bii Unim ukpell. Gbe ’ì yi lè undi he liwu līme᷅n angwu ù yi lè igor, ufe ù gyam agyam pee Unim. ¹⁴ Gbe ’ì yi lè undi he liwu līme᷅n angwu ù yi gogo ye, ù ko bekaandi liwu bendi abongale hè be bè kong ha Unim le ù mbee he. Nyong bendo kong ha Unim, bè kung behwu gbaa he he lizen Atyetyan Ujeso. ¹⁵ Gbe be kong ha Unim, be bong le u sha a᷆shi be bii, ki sha Unim u mbee undi-lingmam ana, u shi-e u fel kang-kang. Mà undi-lingmam umen ana a ma shi ’iban or, Unim u tyang āshi ka he. ¹⁶ He ashin mà bun biban bīme᷅n de bende, ma kong ha Unim ke bende, hè Unim ù mbee amen. Akongale ha Unim angwu undi ununung u᷆ kong ù yi lè lifem kangg, likorye Unim u kpa he abwo afee-afee. ¹⁷ Mà ndè undi ná Ilaja, a ma yi undigye nya a na bel lì yi i a.Leěti a ma kong ha Unim lityam ken le umbwo ù ndor ye. Umbwo a ma ndor ye aze akie lè ’igem. ¹⁸ He umbee-likel aze anyina a ma mbee kong ha Unim le umbwo ù ndor lè.Umbwo a ma keb andorale lè he ’usi a kya-kya-kya, itang i wum, biwom bi tem keb ambyele. ¹⁹ Bebuye, mà ngye dangg le, gbe undi ūme᷅n a tyang ’ukwo ahwu ’ù yi ’igyang, unde-ma a kpell he a tem item hwaa lè Unim, u kpell he u kung abwo lè he biban ashele, hà unde-ma angwu há a kpan ’ūnyōng undi-iban ana lè he linim a. Ki sha Unim u tyang biban bima abi a shi gbamm ana ka he.