Galatians

Galatians

¹ Mi Uporl, unwaa-isom Ujeso Ukristi, na᷅ mı᷆ fee ’ushia ahwun. Undigye na᷅ kpe-m he aki anyin or, ngwu undigye na᷅ ù som mi le mì shi aki amen i or ye. Ujeso Ukristi ufe-gyang lè ’uhwo-ma na᷅ a kpe-m he aki anyin, mbee lè Atyetyan Unim angwu a wum Ujeso Ukristi lè he lihwu. ² Mi or, bende-gi bendi Unim abe bè yi utung ha ami or, li kong lè men awu bendi abongale puu angi he Ugalesha. ³ Unim Atyetyan befe lè Ujeso Ukristi angwu ù yi Usu utyan bè hā ke men ’ukwun, be shi hè ’ì kwun amen he atyam kpatiaa. ⁴ Ujeso Ukristi na᷅ a hwō he ’uhwo ’utyan le hè Unim ù tyang biban bityan ke li, hè bibibi abi bì yi he igye ’unyin i bì do li ye. A hwō ke li nya a na Unim angwu ù yi Atyetyan a shi ugim ndor a. ⁵ Ipee puu ì kwu ke Unim ngyor igye kpamm. Kì ngyor ná mi kong. ⁶ Abwo a kwun mi lè ’iwom ashi ma shi! Unim a ko amen le mà fel bendi bema gbe he ’iwom ashi Ujeso Ukristi a ma shi ke men gbe he inung ima. Mà na or, nyin ’anaa-anaa a, ma tyang Unim tem, ma la pwom ’ukwo ’ususo ahwu ma gim le ’u be lè ha Unim. ⁷ He likong ligyang-ligyang, kì tem yi lè ’ukwo ’ususo-ususo ahwu ’u be lè ha Unim a fem a᷆hwu mi bun de men tyang ye. Ukpor bendi besuso na᷅ be teb lè men, be kaa le hè be bè bell ban ’isom ’inunung ashi gbe lè Ujeso Ukristi. ⁸ Mii kee le mà ngye le gbe undi uyang-yang a bun ’isom Unim de men ashi ’ì yi atyetye lè ha ashi bel li maa bun de men kpam-kpam, mà bel-agyang or, mà idengell angi ı᷆ be lè he lifung-atabe or, Unim ù te lè he ’utete. ⁹ Mi mbee bwan da amen ashi li ma bè de men le gbe undi uyang-yang a bun ’isom Unim de men ashi ’ì yi atyetye lè he ashi ma gyo or mà, ma kpe shi or mà, unemale, Unim ù gwu-e. ¹⁰ Ashi mi kong i ’i tyung amen hà le mi sha kee ipee bendigye â? Dia! Mi kee ipee Unim a. Bendigye na᷅ mi kee le mi sha nyin ābe i a? Dia, kì kwu le mi kee le mî shi nyin bendigye a, hang mi fa Ujeso Ukristi ye. ¹¹ Bebuye, mi kee le ’ì nung amen le ’isom ’inunung gbe lè Ujeso ashi mi maa bun de men nyong mi ma yi utung ha amen, ki be lè he abwo undigye a ye. ¹² Kisom ’imen ana ’i be lè he ungwu undigye a ye, undigye na᷅ a hwua mi biwom bimen i ye. Ujeso Ukristi ugyang lè ’uhwo-ma na᷅ a shi-m mi ngye biwom bimen ana. ¹³ Men-agyang ma ngye likpe ligi ná leěti mi maa fe Unim he ’ukwo kpa-kpa ná bel Ijuus lı᷆ shi. Nya he ’unyong ’umen ana, mi maa ka bendi abe be maa pwom Ujeso Ukristi ’ingie lè ikeb igi puu. Mi maa kaa kangg le mî mbee lè awu bendi abongale ana puu. ¹⁴ He ugbe ugi puu, mi ma shi likong Unim lityan bel Ijuus hwò a᷆be he ufam utyan. Akpe atim angi betietyan be maa shi, hà teng ndor li, mi maa sha āngi lityam ken. ¹⁵ Mà na mi ma yi ’itaa ana or, Unim a ma tyung inung ha ami. Nyong mi ma so he ’utyor andagi na᷅ a ma gia mi le mì kwu ta-ta ke-e ufe Unim. Nyong ’unyong ahwu a ndor ’u fel há, ¹⁶ a shi-m mi ngye Unwaa-ma, u ko mi le mì lè bun ’isom ’inunung gbe lè he de bendi abong angi à yi Ijuus a ye titi. Nya he ’unyong ’umen ana, mi ma kwu itim gbe lè likong anyin ha undigye ye. ¹⁷ Mi ma gye he Ujeruselem le mî lè ndè bebwaa-isom Ujeso Ukristi abe be kpi aki amen i teng mi ye. Ashi mi ma shi ’ì yi le mi ma bo a ligbe-ligbe gye he Arebia, mi kwu há, saa mi hà tem be he Udamasikos. ¹⁸ Nyong aze akie a gbe, mi hà bo gye he Ujeruselem le mî lè ndè Ipita, mi kwu ha ahe há ati lihwo lè adyong. ¹⁹ Mi ndè unwaa-isom Ujeso Ukristi uyang-yang or ye, kee-kee kwom ha Ujems, unwanam Atyetyan Ujeso Ukristi ufe-ufe. ²⁰ Biwom abi mı᷆ kong ha amen i puu bì yi ’igyang a, Unim a ngye le mi bà uman a ye. ²¹ Nyong mi bo lè he Ujeruselem, mi fel gbe gye he Usiria lè Usilisia. ²² Há he ’unyong ’umen ana, bendi abe be bong ha Ujeso Ukristi he ’igie Ujudia, be ma wa ngye-m mi-gyang lè ’uhwo-gi ye. ²³ Be maa gyo igyo pi bendi be᷆ kong gbe lè mi le: "Ungikye angwu a maa ke li bel abe li bong ha Ujeso Ukristi ’ingie ana, kanaa-anaa i u fel tan bun ’isom ’inunung ashi gbe lè Ujeso da bendi le bè bong ha Ujeso Ukristi, kiwom ashi a ma kaa le he-e ù mbee lè shi." ²⁴ Ashin ’i shi ābe be kung ipee ke Unim he ’inunung ashi a shi ha ami.

¹ Aze lihwo lè ngi ande a gbe, bel ha Ubanabas li hà mbee gye he Ujeruselem, Utaitus or a fe utung ha ami. ² Mi gye há likorye Unim a de-m gboo le mì te há. Mi lè wu há, mi kpee ha bekaandi awu bendi abongale zangg he ushom. Mi bun de be tele-tele ’isom ’inunung gbe lè Ujeso ashi mi maa bun de bendi abe bè yi Ijuus a ye or titi, hè ’ì kwu le, aki angi mi shi mà, lè angi mı᷆ shi i he abwo, à kwu ’idideng ye. ³ Mà na Utaitus angwu a ma yi utung ha ami ù yi Ugrik a or, be ma de-e le ù ten kpe-kpe-kpe ye. ⁴ Atan-lengi angwu be ma kung likong anyin kong ù yi le bendi besuso abe be᷆ bong lizen a le be fa Ujeso Ukristi, be ma nyia be ngwee nya he liwu. Be ma nyia be ngwee hè be bè shun ndè ná bel abe lì yi ke Ujeso Ukristi li waa ’inde, iten Ijuus i tem bua li ye. Be kee le be tem lè bel la ka iten ana hè ngi ì tem bua li. ⁵ Bel li bong ke be ’ukwo zangg or ye, hè li lì ndè le li kam ’isom ’inunung ’igyang ashell ndor faale agieale, hè men mà ngye shi nya a na ’ì yi i. ⁶ Nyong mi bun de be ’isom ’inunung gbe lè Ujeso ashi mi maa bun de bendi, bendi bemen abe bendi be kung ābe ná bekaandi awu bendi abongale be kpe ashi mi shi abwo afee-afee. Ukpor a᷆shi le bè yi bekaandi a or, bekaandi a ye or, kì yi-m he ’ukpo ye, likorye bendi puu bè yi Unim bizang. Kì yi lè ’iwom ’ifufe ashi bekaandi ana be ma de-m le mì shi ye. ⁷ Be bong ibong le Unim na᷅ a som mi lè ’isom ’inunung ’imen ana, u som mi le mì lè bun āshi de bendi abe bè yi Ijuus a ye, nya a na a ma som Ipita lè ’isom ’inunung ’imen ana le ù lè bun de Ijuus a. ⁸ Be nde shob le Unim umen angwu a ma ke Ipita ikeb le ù kwu unwaa-isom uma angwu u᷆ gye lè bun ’isom ’inunung de Ijuus, ufe umen na᷅ a ke-m ikeb le mì kwu unwaa-isom uma angwu u᷆ gye lè bun ’isom ’inunung de bendi abe bè yi Ijuus a ye. ⁹ Ujems lè Ipita lè Ujon abe awu bendi abongale a ma kung ābe ná bekaandi bebell be bong le Unim na᷅ a ke-m libwo le mì shi aki akaandi amen ana. He ashina, be ke li bel ha Ubanabas abwo tyung le bel lè befe li fa abwo ukem sha aki amen i. Bel puu li bong le bel li bun da abong angi à yi Ijuus a ye, befe be bun de Ijuus. ¹⁰ Kiwom ken ’ife-ife na᷅ be de li le lì shi. Be de le lì naa lityam akpellale bendi-likaa he liwu libell ye. Kimen ana, mi-gyang mi ma yi lè ’igyor kangg le mî shi āshi. ¹¹ He ’unyong ahwu Ipita a ma be he Antiyok, mi ma ben he ufe-gyang he ashi bendi likorye ’i ma yi nya a gboo le a mbeb. ¹² Lè he ukpi-ikwu Ipita a maa fel za᷆ lizi ipel ha bendi abe bè yi Ijuus a ye. Ukpor nyong bendi Ijuus abe Ujems a som be wu nya, Ipita a maa tem za᷆ lizi ipel ha abe ye, likorye u shell àbe be de le bè ten àbe bè yi Ijuus a ye, hè be bè fel ná bendi Ijuus. ¹³ Bendi Ijuus besuso abe be maa fel pwom Ujeso Ukristi, befe or be ma fel ingwu ifee. Ubanabas or, be shi-e a kung abee abell. ¹⁴ Nyong mi ndè le bè tem pwom ’isom ’inunung ’igyang he ’ukwo ahwu ù yi kpa-kpa ye, mi ben Ipita nya he ashi bendi puu, mi bii he le: "Wo angwu wò yi Ijuus a, na᷅ wo᷆ shi likpe ná bendi abong asuso abe bè yi bendi Unim a ye nà a? Wo shi likpe li bi undi angwu u᷆ fe Unim ye. He likpe angi wo shi ana, wo nya mbee da bendi abe bè yi Ijuus a ye le bè shi akpe Ijuus kpe-kpe a?" ¹⁵ Bel abe lì yi Ijuus igyang, lì yi ná bendi abong asuso abe be᷆ ban Iten Unim a ye. ¹⁶ Mà na bel lì yi Ijuus a or, bel li fel ngye le undi u ndor Iten Ijuus a, hà fel kpa-kpa he ashi Unim ye. Afele lityam ha Ujeso Ukristi ufe-ufe na᷅ u᷆ kee-kee shi undi u᷆ fel kpa-kpa he ashi Unim. He atan-lengi anwun li fe lityam ha Ujeso Ukristi hè li lì fel kpa-kpa he ashi Unim gbe he afele lityam ha Ujeso Ukristi a, gbe he andorale Iten Ijuus a ye. Be fee ashin ndor he ’ushia Unim leěti le: "Undi u ndor Iten Ijuus a, hà fel kpa-kpa he ashi Unim ye." ¹⁷ Ukpor bel abe lı᷆ ndor lishi le akwele utyan ke Ujeso Ukristi a shi li li fel kpa-kpa he ashi Unim, kì hà kwu le ’ì yi ’igyang a le lì so bendi-biban a he ashi Unim likorye li ndor Iten Ijuus ye, hang ashina ’i ze le Ujeso Ukristi a mbeb li imbeb. Ukpor, ki nya sha ná a, Ujeso Ukristi u᷆ mbeb undi? Ù hà ndo mbeb undi ye gbangg. ¹⁸ Ukpor, gbe undi a swan Iten Ijuus le bwo ì yi lè ikeb le i sha he u fel kpa-kpa he ashi Unim ye, a kwu kwu kwu, a mbee tem ndor abwo kpe ngi le ì yi-e ’indee-indee, faale ifung hà u fel sha ban Unim a. ¹⁹ Iten imen ana igyang na᷅ i shi ’i nung mi nwongg le mi hwō mà, likorye Iten na᷅ i shi-m mi ngye le mì yi undi-iban a. Mì tem fa lityam ha iten ana ye, mi ndè le gbe he afele lityam ha Ujeso Ukristi na᷅ mı᷆ kwu uwum ke Unim. Leěti he ’unyong ahwu be ma maa Ujeso Ukristi bee he ’ikpakpaa, nya mi or mi hwō utung ha ahe. ²⁰ Ashina na᷅ ’i tan lè shi mi-gyang ufe mì tem so uwum ye, likpan ligi angi mì yi lè ngi, lì yi angi Ujeso Ukristi. Nyin i ná mì yi he igye i, mì fel yi uwum le bwo mi fe lityam ha ufe Unwaa Unim a. Ufe, ki nyin he lè mi, u mbee hwō he ’uhwo ’ugi. ²¹ Gbe ’í yi nya yi le andorale Iten Ijuus na᷅ u᷆ shi undi u᷆ fel kpa-kpa he ashi Unim, hà ’i ze le Ujeso Ukristi a hwō ban ’idideng a. Mì hà ndo bia inung Unim ’itaa ana ye gbangg.

¹ Men bendi Ugalesha, mà yi kpel-ye atyuo! Ki fel a ná undi a zī amen he ’ūkeè a. Bel li bun tele-tele-tele de men ’itaa be ma maa gwu Ujeso Ukristi bee he ’ikpakpaa. Ki ze le men ma naa lityam â? ² Mi kee amen le mà kee-kee de-m ’iwom ken ’ife-ife. Nyong Ukatia Kunyong Unim a ma be hwaa lè men, a ma be ná le bwo men ma ndor Iten angi Unim a tye Ijuus à? Dia, a ma be ná likorye men ma gyo ’isom ’inunung gbe lè Ujeso, ma kpe shī abwo afee-afee a. ³ Ki shi ná a, mà hà yi kpel-ye ’itaa ana? Lè he item men ma fe lityam ha ikeb Ukatia Kunyong Unim le i sha amen ma kwa kpa-kpa he ashi Unim. Ukpor ’anaa-anaa i, ’ibang ’ì hà yi atan-lengi ma tem fel fe lityam ha ’uhwo-men le ma kung ikeb īme᷅n igyang sha ’uhwo-men ma kwu kpa-kpa he ashi Unim? ⁴ Ukatia Kunyong Unim a shi biwom bikaandi abi men ma ndè lè atong-shi āme᷅n. Ma kung biwom bimen ana ná bì yi he ’ukpo ye a? Faale ifung, bì yi he ’ukpo! ⁵ Men ma kong i le, le bwo men ma maa ndor Iten Ijuus a, kife na᷅ ’ı᷆ shi Unim u᷆ ke men Ukatia Kunyong uma, u mbee shi bikwele-uhwo he liwu līme᷅n i a? Dia, Unim a shi bimen ana likorye ma gyo ’isom ’inunung gbe lè Ujeso, ma kpe shi abwo afee-afee a. ⁶ Mà ndè undi ná Ebraham, be fee ndor he ’ushia Unim leěti le: "Ebraham a ma fe lityam ha Unim, he ashina Unim a kpe-e ná undi ununung he ashi ama." ⁷ Ashin ’i tyung li le bendi abe be fe lityam ha Unim na᷅ bè yi igia Ebraham igyang angyell. ⁸ Be fee ndor he ’ushia Unim leěti le, Unim u ba kpa bendi ná bendi benunung he ashi ama, gbe be fe lityam ha ahe a. Be fee ndor há he ’ushia Unim ná leěti Unim a ma bun ’isom ’inunung de Ebraham le, "Gbe he ’uhwo-gang mi ba sha ’inunung kangg ha bendi puu he igye i." ⁹ Ashin ’i ze le, nya a na leěti Unim a ma shi ’inunung kangg ha Ebraham likorye a fe lityam ha ahe, kitaa ’imen ana na᷅ u᷆ be shi ’inunung kangg ha bendi puu abe be fe lityam ha ahe titi. ¹⁰ Bendi puu abe be᷆ ndor àshì le be fel kpa-kpa he ashi Unim likorye be ndor Iten angi Unim a tye Ijuus, ki ma so á le ushe Unim a fel kwu nyong ābe inyong, likorye ’i ngyor nya a na be fee he ’ushia Unim le: "Undi uyang-yang angwu a gye ’ushu ndor Iten puu angi be fee he ’ushia Unim mbee ’unyong ye, u ndor āngi puu yilididi ye, hà ushe Unim a fel kwu nyong he inyong." ¹¹ Ki tyung gboo le, kì yi lè undi angwu ù hà ndo ndor Iten yilididi le hè Unim ù kpe-e le ù yi kpa-kpa he ashi ama ye. Ki ngyor nya a na be fee he ’ushia Unim a le: "Bendi abe be fel kpa-kpa he ashi Unim gbe he afele lityam ha ahe na᷅ be᷆ kwu lè likpan ligyang angyell." ¹² Andorale Iten ù yi ’itaa ken ha afele lityam ha Unim ye. Ki ngyor nya a na be fee he ’ushia Unim le: "Undi ù ndor Iten puu yilididi mbee, hang ’ife na᷅ u᷆ kpan gbe ha angi." ¹³ Ashin ’i ze le, bel puu li zī libi he ashi Unim likorye li ndor Iten puu mbee ye. He ’uhwo ’utyan na᷅ Ujeso Ukristi a ma kpe ’ingie biban bityan so he-e ù ndè le u pong li lî tem zī libi he ashi Unim ye. Ki ngyor nya a na be fee he ’ushia Unim le: "Undi uyang-yang angwu be shwia he, hà a zī libi he ashi Unim." ¹⁴ Ujeso Ukristi a kpe ’ingie ashina he lishi lityan a, hè gbe ha ahe, bendi abe bè yi Ijuus a ye or bè fel kpe ’ukwun ahwu Unim a kyebb le u ka Ebraham. Bel puu abe li bong ha Ujeso Ukristi or, li fel kpe Ukatia Kunyong Unim angwu a kyebb le u ka li. ¹⁵ Bebuye, mî bun ityang gbe lè ’iwom ashi ma᷆ shi mbee ’unyong tyung amen ashi mı᷆ kong. Mà shi ugim gbe lè ìtı᷆m angi bendi befee be᷆ tim ndor igie ken. Gbe bendi befee be bong le be sha ’iwom abwo ukem, be kung abwo fe he ’ushia, kì yi lè undi-iso angwu u᷆ ban ìtı᷆m anyina ye, ngwu ’ì kwu lè undi angwu ı᷆ fe ’iwom ’isuso há ye, likorye begyang be fe abwo he ’ushia ana mà. ¹⁶ Kitaa ’imen na᷅ ’ì yi ashi Unim a kong ndor. Leěti Unim a ma ke Ebraham befe lè igia ima íkyébb. Be fee nya le Unim a ma ke Ebraham befe lè igia ima gbamm a íkyébb ye, be fee gbe lè igia ima ken a. Ujeso Ukristi na᷅ ù yi igia ima imen ana. ¹⁷ Kiwom ashi mı᷆ kaa le mi kong ’ì yi le, leěti na᷅ Unim a ma kong ndor ha Ebraham. Aze asi lisi lè aze lisi lè ngi lihwo a gbe mà ukpong Unim u hà tye Iten ke bendi Ijuus. Ashin ’i ze le Iten imen ana ì yi lè ikeb le i ban íkyébb angi Unim a ma ke Ebraham ana ye, i shi lè ikeb le i mbee lè ngi ye. ¹⁸ Kì be kwu le gbe he Iten na᷅ Unim a ke bendi ’iwom ’inunung, hang ashina ’i ze le ’inunung ’i ba lè he úkyébb a ye. Ukpor li ngye dangg le úkyébb angwu Unim a ma ke Ebraham na᷅ ’i shi Unim a ke Ebraham ’iwom ’inunung ’imen ana. ¹⁹ Fe ’ibang ’ì hà yi atan-lengi angwu Unim a ke Ijuus Iten imen ana? A ke Iten le hè ngi ì tyung li atyetye ashi ’ì yi ’inunung lè ’ibibi he ashi ama, ufe Unim. Iten imen i na᷅ i tyung li ’ukwo ’itaa ana he ’anwaa ’unyong zangg a, i kwu li kpamm igia Ebraham umen ana u gbe be. Ufe na᷅ Unim a ma ke úkyébb le u kǎ he ’iwom ’inunung ’imen ana. Leěti Unim a ma kung Iten imen ana fe idengell ima a he ’ubwo le ì be lè ngi ke unwaa-udyan Unim lè bendigye. ²⁰ Gbe ’ì yi lè unwaa-udyan, hà u naa he ’udyan bendi befee. Ukpor leěti nyong Unim a ma ke Ebraham úkyébb, a ma som unwaa-udyan a hwaa lè he ye, ufe-gyang lè ’uhwo-ma na᷅ a ma ke-e ahe. ²¹ Ashin ’i ze le Iten i keè ha íkyébb angi Unim a ke ye â? Dia, kì yi ’itaa ana a ye. Likong angi lì yi he afee lì yi le, kì be kwu le ’ì yi lè iten angi ì yi lè ikeb le i ka bendi likpan ligyang angyell, hang i ma shi ābe be fel kpa-kpa he ashi Unim or titi. Ukpor ’ì yi lè iten angi itaa ana ye. ²² Ukpor, ki ngyor nya a na be fee he ’ushia Unim a. Be fee le, ikeb ’íbibi i bua biwom or, bendigye or puu. Ashin ’i ze le bendi abe be bong ha ashi Unim a kong na᷅ Unim u᷆ ke be beke abe a kyebb le u ka bendi abe be fe lityam ha Ujeso Ukristi. ²³ Leěti nyong ahwu ’ukwo ’u ma wa buu le lì fe lityam ha Ujeso Ukristi ye, ki ma yi a ná bè ko le Iten imen ana i ngib li fe ná be᷆ ngib bendi fe he igaadye a. Bel li kwu he ’ubwo Iten ná igaadye kpamm Unim a gbe buu ’ukwo ke li le lì fe lityam ha Ujeso Ukristi. ²⁴ Iten i tyung li ’ukwo kpamm Ujeso Ukristi a gbe be le he ’unyong ahwu Ujeso Ukristi a be ana, bel abe li fe lityam ha ahe lì fel kpa-kpa he ashi Unim. ²⁵ Ukpor ’anaa-anaa i, bwo ’ukwo ’u buu ke li le lì fe lityam ha Ujeso Ukristi mà, Iten ì tem bua li ye. ²⁶ Men puu mà yi bebwaa Unim ipel ha Ujeso Ukristi a, likorye ma fe lityam ha ahe. ²⁷ Men abe ma fel gwaa ipel ha Ujeso Ukristi, ma fel sha akpe ná ufe nà. ²⁸ He ashin, mà undi ù kwu Ijuus a or, ù kwu Ijuus a ye or, kì tem yi lè atyetye ye; mà ù kwu ufee or, ù kwu unwaa or, kì tem yi lè atyetye ye; mà ù kwu ungikye or, ù kwu ungingye or, kì tem yi lè atyetye ye. Kì tem yi lè atyetye ye, likorye befe puu be fel ūbībī ken ha Ujeso Ukristi. ²⁹ Gbe mà yi ke Ujeso Ukristi a, hà mà yi igia Ebraham a. He ashina men ma ba kpa biwom puu abi Unim a kyebb le u ka Ebraham lè igia ima.

¹ Mî shi a᷆bi mi kong lè he item bì nung amen. Mî bun ityang de men angi gbe lè unwaa angwu u᷆ be kwu lè ùshù átyám. Mà na unwaa umen ana na᷅ u᷆ be kwu lè ùshù puu or, nyong ù so ’isun, u kwa he abwo bendi nya a na ufee a. ² Nya he ’unyong ahwu ù so ’isun ana, kì yi lè bendi abe be᷆ nde gbe lè he, be mbee kam biwom bima lishi lima, kpamm la wa he ’unyong ahwu átyám a ndor le ù fel lè ’uhwo-ma. ³ Kitaa ’imen ana na᷅ ’ì yi ke li bel or. Leěti nyong li ma so ná bebwani he ’ukwo Unim, li ma yi ifee a ke iten lè ikeb ibibi, abi bì yi biwom igye anyin a. ⁴ Ukpor nyong ’unyong ahwu Unim a ndor ’u fel, a som Unwaa-ma be he igye i. Be ma hwan he nya a na be hwan undi uyang-yang a. Há he ’unyong ahwu be ma hwan he, ki ma yi ’unyong Iten Ijuus a, u ndor Iten imen ana. ⁵ Unim a som he be ná le he-e ù pong li bel abe li ma yi he abwo Iten, hè Unim ù kpe li ná bebwaa lityam bema. ⁶ Kiwom ashi ’ı᷆ tyung le lì yi bebwaa lityam bema ’ì yi Ukatia Kunyong Unwaa-ma angwu a kung fe li he atyam, u shi li lı᷆ ko he le, "Atyetyan, ada." ⁷ Gbe he ashi Unim a shi na᷅ men mà tem yi ifee a ye, ma fel Unim bebwaa lityam. Bwo Unim a shi amen ma fel he bebwaa lityam mà, u fel ka amen biwom puu abi a kam ndor bebwaa lityam bema. ⁸ Leěti nyong ma ma wa ngye Unim ye, ma ma yi a ná ifee a he abwo ikeb angi ì yi ìnīm a ye. ⁹ Kanaa-anaa i, men ma fel kpē likong Unim, kì yi le hang mi de le Unim na᷅ a kpē men ná bebwaa-ma. Ná ’i shi ngwu mà ha᷅ kee le ma tyang likong Unim, tem fel ndor iten angi ì yi he ’ukpo ye, i shi lè ikeb le i kpan undi ye? Kibang a, ma᷆ tem lè ’uhwo-men lè fel ifee ábi? ¹⁰ Ndè há lè! Ma fel ndor ati asuso le a dyam amen hwò asuso, ma ndor afell or asuso, bènyōng or, aze or ná. ¹¹ Abwo a kwun mi lè likpe angi ma shi i! Ashin ’i ze i le aki puu angi mi maa shi he ’uhwo ’umen, mi shi āngi wu abwo likor â? ¹² Bebuye, mi fel ’itaa ken ha amen abe mà yi Ijuus a ye, bwo mì tem yi he abwo Iten ye. Kusi, mi tim amen anung le mà kung abwo lè he iten nya a na mi tyang abwo lè há. Ma shi ban mi ngye ye. ¹³ Mà well le nyong mi ma be bun ’isom ’inunung ha amen há he ukpi-ikwu, agogo-ye na᷅ a ma shi-m mi ma fel ngyor kwu ha amen há bun āshi. ¹⁴ Mà na agogo-ye ugi a ma be lè ’ingie ke men or, ma ma fel nde-m ilaa-ilaa or, ngwu mà swan mi or ye. Ukpor ma ma kpe-m lityam ken ná hang mà kpe udengell Unim. Faale ifung, ma ma kpe-m ná hang mà kpe Ujeso Ukristi ugyang a. ¹⁵ Há he ’unyong ’umen ana ma ma yi lè igor kangg he ’uhwo ’ugi. Fe ’ibang ’i hà baā ngwu mà tem yi ná ye? Mi ngye dangg le há he ’unyong ’umen ana, kì be kwu le ’ì yi pie-pie le ma yii waa itong-shi īme᷅n ka-m mbee or, hang ma ma yii waa ke-m. ¹⁶ Ki ze i le ma fel linaa ha ami le bwo mı᷆ de men ’igyang a? ¹⁷ Bendi bemen abe be᷆ mbeb amen ana be kaa kangg le hè be bè kwu amen ’udim, ukpor atan-lengi ubell he ashele ashina a ngbebb ye. Be kee le be tang amen he abwo lè ha ami a, hè be bè ndè le ’udim ’ūme᷅n ha abe ’u kwa kpebaa. ¹⁸ Ki ngbebb le bendi bè kwu bende ’udim, gbe ’ì yi le be sha ná lè atan-lengi angwu ununung a. Mi kee amen le mà gye ’ushu kwu ’udim-udim ha ami, mà na mì yi utung ha amen há ye i or. ¹⁹ Bebwaa-gi lityam, mi mbee kpa ’utor he ’uhwo ’umen ná ungingye u᷆ kpe nyong u᷆ shi uzwaa, mi kpa ahwu i ’itel i kpamm mi gbe ndè likpe Ujeso Ukristi ha amen. ²⁰ Ayang a kpe-m tyang ha amen há, mî hà ngye ná mì fan amen, likorye likong līme᷅n li kpo mi ’unde hen kangg. ²¹ Men abe ma kee le ma tem lè ’uhwo-men la ka Iten ì shib fe, mā gyo a᷆shi Iten imen ana i kong ye a? ²² Be fee fe nya he ’ushia Unim le, Ebraham a ma yi lè bebwaa-ngikye befee. Unwaa angwu ken, anam a ma yi ufee a; angwu ken, uma anam a ma yi ufee a ye. Ungingye angwu a ma yi ufee a ana, be ko he le Uhaga; angwu a ma yi ufee a ye ana, be ko he le Usara. ²³ Unwaa angwu ufee a ma hwan ana, a hwan he nya a na be᷆ hwan unwaa uyang-yang i a. Ukpor, angwu ufee a ye a ma hwan ana, a hwan he likorye Unim a ma kyebb Ebraham ná a. ²⁴ Ashi mı᷆ kong ana, mi bun ityang a da amen. Bengingye befee ana be naa ke ìtı᷆m ifee angi Unim a shi. Uhaga angwu ù yi ufee a ana, a naa ke ìtı᷆m angi Unim a ma shi ha Umosis he ukwell Usanai. Bebwaa-ma bè yi bibun ufee a. ²⁵ Nya a na Uhaga a naa ke ìtı᷆m imen he ukwell Usanai he ’ubong Arebia ana, na᷅ a mbee naa ke ’ubong Ujeruselem ahwu ’ù yi ’unyin i, likorye Ujeruselem or, bendi abe bè yi he ’ubwo ’ubell or, puu ubell bè yi he abwo lifee ke Iten angi Unim a ma ke Umosis. ²⁶ Ukpor ùshù Unim angwu ù yi ùshù ugyang-ugyang na᷅ ù yi Ujeruselem angwu he lifung-atabe. Ùshù umen ana ufe ù yi he abwo lifee he ’ukwo ’uyang-yang ye. Ufe na᷅ ù yi ùshù utyan, u shi a ná andatyan a. ²⁷ Kì yi nya a na be ma fee he ’ushia Unim leěti a. Be fee le: "Wo ungye-ukwom ungingye, yal gor. Wo angwu wo wu anung or ngye ye, gbel ububo yal gor, likorye wo ungye angwu ukyegang u᷆ gbe kpee-a ye, wo na᷅ wo᷆ be kwu lè igia ì go hwò angwu ù yi ipel ha ùkyēbb umen ana." ²⁸ Bebuye, bel ufe, nya a na gbe he úkyébb angwu Unim a ke Ebraham na᷅ Usara a ma hwan Azik, na᷅ bel or, li fel bebwaa Unim gbe he úkyébb uma. ²⁹ Leěti he ’unyong ’umen ana, unwaa angwu Uhaga a ma hwan nya a na be᷆ hwan unwaa uyang-yang ana, a maa teb lè unwaa angwu Usara a hwan gbe he ikeb Ukatia Kunyong Unim. Kunyin i or, kì yi fe li bel ná. ³⁰ Be fee he ’ushia Unim le: "Ndō ufee ungingye befe lè unwaa-ma. Ndō ābe likorye ’i ngbebb le unwaa ufee ana ù zī lishi atyam ipel ha unwaa ugyang ye." ³¹ Bebuye, ashin ’i nung li le, bel lì yi bebwaa ufee a ye, lì yi bebwaa ungingye angwu ù yi ufee ye a.

¹ Ujeso Ukristi a kpe li tyang abwo le Iten Ijuus ì tem bua li ye, hè li lì tem kwu ifee a ye. He ashina mà ngyor naa genn ná bendi abe be fel porr, ma bong le bè tem lè men lè fe he abwo lifee ye. ² Mi Uporl, mi ndo da amen le, gbe ma bong ten le bwo ma kee le ma fel Ijuus a, hà ashin ’i ze le lihwu Ujeso Ukristi lì yi amen he ’ukpo ye. ³ Mi mbee bwan tebb amen le, gbe undi uyang-yang a bong ten, hà ’i fel kpe-kpe le ù ndor Iten Ijuus pu-puu. ⁴ Men abe ma᷆ kaa le ma fel kpa-kpa he ashi Unim gbe he andorale Iten Ijuus a, má tang ’uhwo-men he abwo lè ha Ujeso Ukristi. Kinunung ashi Ujeso Ukristi a shi ke men or, mà tem gya ’ushu kpa āshi ye. ⁵ Bel abe li fe lityam ha Ujeso Ukristi, lí ndor lishi le ikeb Ukatia Kunyong Unim na᷅ ı᷆ shi li lı᷆ fel kpa-kpa he ashi Unim, likorye li fe lityam ha Ujeso Ukristi. ⁶ Gbe li gwaa ipel ha Ujeso Ukristi kpebaa, mà undi ù ten or, ù ten ye or, kì yi ’iwom ’ukpo a ke li ye. Ukpor, kiwom ashi ’ì yi he ’ukpo ’ì yi le lì fe lityam ha Ujeso Ukristi. Gbe ’i nyin li lè bende ’i tyung le li fe lityam ha ahe. ⁷ Leěti ma maa sha ngbebb-ngbebb, fe ayang a hà mbeb amen ngwu ma tem gye ’ushu bong ha ’isom ’inunung ’igyang ashell ye? ⁸ Unim angwu a ko amen hwaa lè ’uhwo-ma na᷅ u᷆ fe-fe men le mà shi ’itete ’iwom ashina ye. ⁹ Kì yi nya a na ityang isuso i kong a. I de le: "Be sha iyist zangg fa he ibred, iyist i gbo kpa mbee ibred puu sha ibred i mbwee." ¹⁰ Ukpor, le bwo bel puu li gwaa ha Ujeso Ukristi kpebaa, ashin ’i shi-m mi ngye dangg le mà hà ndo sha ugim atyetye lè ha ami ye, mi mbee ngye le undi angwu u᷆ teb lè men ana ù dyam na na na or, Unim u ka he ’ingie. ¹¹ Bebuye, mi ufe, faale ifung ’i nung gboo le mi kong le bendi bè ten ye a. Kì be kwu le mi kong le bè ten a, hang be ka-m ’ingie ná be᷆ ke-m i ye. Kì be kwu le mi da bendi ’igyang-igyang le bè ten zii, hang biwom abi mı᷆ bun gbe lè lihwu angi Ujeso Ukristi a hwō he ’ikpakpaa i, bi tor bendi ye. ¹² Bendi bemen abe be᷆ teb lè men ana, mà de be le bè gye lè fee᷆ ’uhwo-bell. ¹³ Bebuye, men ufe, Unim a ko amen hwaa lè ’uhwo-ma le hè Iten Ijuus ì tem bua amen ye. Bwo Iten ife a i tem bua amen ye mà, mà ndo fel lè ugim le ma fel sha ’itaa ma kee ye. Ashi ’i ngbebb le mà fel shi ’ì yi le mà kpell bende lè lityam benyin. ¹⁴ Iten imen ana puu i fe lishi he uten ken a le: "Kì nyin undi-undi lè unde-ma ná ’i nyin he lè ’uhwo-ma." ¹⁵ Gbe má mā ma᷆ kung likpe inyia libeb a, ma᷆ shi tor bende, mà baā. Gbe ma baā ye, hà ma gwa mbee bende. ¹⁶ Ashi mı᷆ kong ha amen i ’ì yi le mà tyang Ukatia Kunyong Unim ù teng amen he ’iwom ’iyang-yang ashi ma᷆ shi, hè bigyor agwo bì fe de men ashi mà shi ye. ¹⁷ Biwom abi bı᷆ gyor agwo bi gwaa ha abi Ukatia Kunyong Unim ye; abi Ukatia Kunyong Unim bi gwaa ha abi agwo ye. Bigyor bimen akwu afee ana bì yi ’ukye ikwa a ha bende. Ashin ’i ze le undi uyang-yang ù hà ndo sha a᷆shi ’i nyin he le ù shi a ye. ¹⁸ Ukpor gbe Ukatia Kunyong Unim na᷅ u᷆ teng amen, hà mà tem yi he abwo Iten a ye. ¹⁹ - ²¹ Biwom bibibi abi bı᷆ be lè he ’igyor undi bì yi nya gboo. Bife i: akpela atanale, kigbang ashele, awulale ná bityuale, ikem ashele, kukee ashele, ipe aboale, katel, beshwan, bendo, ashi abungale, kagbugbel, anyinale undi lè ’uhwo-ma ufe-ufe, bikwu agieale, awu abibi, lityam abanale fe ’iwom undi, ibwom, binunung azele kangg lè abi bi teng iteng gbamm nya ’itaa ana. Mi mbee ka amen utebb anwun kangg nya a na leěti mi ma há bè ke men le bendi abe be᷆ shi biwom abi ’itaa ana bè hà ndo kwa lè libwo he Kusu Unim ye. ²² Ukpor Ukatia Kunyong Unim ufe u sha undi u kwa lè benyin, igor, ikwun, inung, lityam angibale, lityam angbebbale, abelale undi item ye, ²³ akwele mbiloo, lè ashele biwom he ’uhwo ūkee᷅. Kì yi lè uten angwu a tel undi ashele biwom abi ’itaa i ye. ²⁴ Bendi bemen abe bè yi ke Ujeso Ukristi ana bē tyang abwo lè he akwo abibi abell or, bigyor bibibi or puu. Ki fel ná bè ko le be kung biwom bimen ana maa bee he ’ikpakpaa ipel ha Ujeso Ukristi a nà. ²⁵ Bwo Ukatia Kunyong Unim na᷅ a ke li likpan ’unyong, kì yi kpe-kpe le lì tyang he ù teng li he ’iwom ’iyang-yang ashi lı᷆ shi. ²⁶ Lì fel bendi idim a or, ngwu lì tyua bende bè mbu anaa or, ngwu lì ban lityam fe biwom bende or ye.

¹ Bebuye, gbe ma tang lè undi lè he liwu lityan u᷆ shi ’iban, men abe Ukatia Kunyong Unim u᷆ teng amen mà mbu ’uhwo kpell he he-e ù tem be he ’ukwo ahwu kpa-kpa. Nya a na ma᷆ shi ashina, mà keb ’uhwo-men, hè ’iwom ’ì su lè men lè fe abwo he ’iban ye. ² Mà kpell bende so bengbebb bende. Gbe ma kpell ná, hà ma shi uten Ujeso Ukristi dell-dell. ³ Undi uyang-yang angwu ù nde ’uhwo-ma há le ù yi ’indee-indee, ki shi le ù yi ’iwom ye, u lam ’uhwo-ma ilam. ⁴ Undi uyang-yang ù shun biwom abi ufe-gyang u᷆ shi bife-bife. Gbe a nde bi bi ngbebb, hà ū yal gor he ’uhwo abi ufe-gyang a shi, ū yal gor le bwo a shi ’i ngbebb hwò bendi abe be teng a ye. ⁵ Kì yi le undi uyang-yang ù shi aki angi Unim a ke-e le ù shi. ⁶ Undi angwu be᷆ hwuá he igie Unim, binunung biyang-yang abi ù yi lè bi, ù zī ābi ke abe be᷆ hwuá he. ⁷ Undi ù lam ’uhwo-ma ye. Kì yi lè undi angwu u᷆ shi Unim zi ye, likorye ’ì yi nya a na be kong a le, kiwom ’iyang-yang ashi undi a kwan, kife na᷅ u᷆ fem. ⁸ Undi uyang-yang angwu u᷆ shi biwom ’itaa ufe-gyang a kee a, u fa lishi he lihwu ahwele a. Ukpor undi angwu u᷆ shi biwom ’itaa Ukatia Kunyong Unim a kee a, u fa lishi he akwele lè likpan ’unyong angi lı᷆ ngyor igye kpamm. ⁹ Mà lì gye ’ushu shi binunung, li wee abwo ye, likorye gbe lí gye ’ushu shi ābi kpamm lè wu he umbee-likel, li ba nda lifem linunung. Kitaa ana na᷅ lı᷆ fem a᷆shi li kwan. ¹⁰ He ashina, he ’unyong ’uyang-yang ahwu ’ukwo ’u buu ke li, lì shi ’inunung ha bendi puu. Bendi abe ’ì yi le lì shi ’inunung ha abe hwò puu na᷅ bè yi bende-tyan abe be fe lityam ha Ujeso Ukristi. ¹¹ Mà nde abwo ’ushia angi à yi akaandi-akaandi i mi fee amen lè ’uhwo-gi a. ¹² Mi da amen le bendi bemen abe be᷆ teb lè men le mà ten kpe-kpe-kpe ana be sha ná hè bendi bè de le befe be shi ’i ngbebb ’indee-indee, be mbee hwaa᷆ bingie abi bendi be᷆ ke a᷆be be᷆ bun gbe lè lihwu angi Ujeso Ukristi a hwō he ’ikpakpaa á. ¹³ Bendi bemen abe lìte᷆n li dyam ābe ’indee-indee ana, befe-gyang or be ndor Iten puu angi Unim a ke Ijuus ye. Atan-lengi angwu be᷆ kee amen le mà ten kpe-kpe ù yi le hè be bè pwom ungwu le ma shi ná befe be kong a. ¹⁴ Mi ufe, mì hà ndo pwom ungwu lè ’iwom ’isuso-isuso ye; mi kee-kee pwom ungwu lè lihwu angi Atyetyan Ujeso Ukristi a hwō he ’ikpakpaa life-life a. Ashin ’i ze le, gbe he ’ikpakpaa ’imen ana biwom igye anyin bi fel ’idideng ná likwom a ke-m mi, mi or titi mi fel ná likwom a ke bi. ¹⁵ Mà undi ù ten or, ù ten ye or, kì yi he ’ukpo ye. Ukpor ashi ’ì yi he ’ukpo ’ì yi le Unim a ke li likpan lifufe. ¹⁶ Bendi puu abe be᷆ pwom ’ukwo likpan lifufe anyin na᷅ bè yi Izwell igyang angi Unim a waa kung. Unim ù hā shi ’ì kwun ābe he atyam kpatiaa, u kwu lè beshi ha abe. ¹⁷ Kung lè ha ’unyin gye ’ushu, undi ù tem fem mi ’ushun lè likong anyin ye, likorye bikpaa abi bì yi he inyiahwo igi bì yi ūfee᷅ angwu a tyung le mì yi ke Ujeso a. ¹⁸ Bebuye, Atyetyan Ujeso Ukristi ù hā ke men puu ’ukwun. Kì ngyor ná mi kong.