Ephesians

Ephesians

¹ Mi Uporl angwu Unim a waa kung mi le mì kwu unwaa-isom Ujeso Ukristi na᷅ mı᷆ fee ’ushia ahwun. Mi fee āhwu hwaa lè men, bendi Unim abe he Efesos. Mi ngye le mà yi he utyang ha Ujeso Ukristi, ma mbee fe-e lityam ken. ² Unim Atyetyan lè Atyetyan Ujeso Ukristi bè hā ke men ’ukwun, be shi ’i kwun amen he atyam kpatiaa. ³ Mà lì pee Unim angwu ù yi Atyam Atyetyan Ujeso Ukristi, u shi Unim uma. A kung bekwun atyetye-atyetye abe he ’iteng-usu ’ima ke li he atyam atyan likorye lì yi gwaa ipel ha Ujeso Ukristi. ⁴ Leěti hell mà ukpong Unim u hà shi igye anyin na᷅ a ma waa kung li le lì kwu bendi bema gbe he agwaale ipel ha Ujeso Ukristi. A shi ashin le hè li lì kwu gelalala faale uben he ashi ama. He ’uhwo benyin abe Unim ù yi lè be ha abel, ⁵ leěti a ma shi ugim fe-e lishi le lì kwu bebwaa-ma gbe ha Ujeso Ukristi. Ashin ’i ngbebb he, fe na᷅ a shi ná. ⁶ He ashina mà lì pee Unim he inung ima angi i dyam, li mbee pee he he ’uke ahwu a ke li ahwu ’u᷆ be lè ha Unwaa-ma lityam umen ana. ⁷ Unwaa-ma umen i na᷅ a wu anung pong li le hè Unim ù tyang biban bityan ke li. Inung ima angi a tyung ha abel i dyam gbe gyong ūkee᷅! Unim ū ke li lishi abyele ligyang angyell le hè biwom abi gbe lè he bì nung li. ⁹ Unim a shi a᷆shi ’i ma yi he ugim uma. A shi li li fel ngye ’imen ashi ’i ma yi ha ahe ugim ana, ashi leěti hell a maa kam he ’undyell le u ba sha gba ha Ujeso Ukristi. ¹⁰ Kiwom ashi leěti Unim a maa kam he ’undyell le u ba sha ’ì yi le, gbe ’unyong ’u fěl he há, u gwaa biwom puu he ’usi, lè abi he itang, lè bendi puu, fa he ’iteng ken, hè Ujeso ù kwu usu ábi puu. ¹¹ Biwom puu bi shi nya a na Unim a ma shi ugim ndor le bì shi. Bel Ijuus, Unim a ma waa kung li le lì kwu bendi bema gbe he agwaale ipel ha Ujeso Ukristi, a ma shi ashin likorye ’ì yi he ugim uma a. A shi ashin nya a na a ma gim ndor kung lè há ukpi-ikwu. ¹² A ma mbee shi ugim ndor le bel abe li kpi ’ikwu ndor lishi ha Ujeso Ukristi lì shi bendi bè fem bedyan bema. ¹³ Men abe mà yi Ijuus a ye or, ma gyo ’isom ’inunung ’igyang ashell ashi ’i de men ná Unim u᷆ kpan amen. Men ma bong le Ujeso Ukristi ù yi ’igyang. Unim a fe men ūfee᷅ tyung bendi le mà yi ke Ujeso Ukristi. Ūfee᷅ umen ana ù yi Ukatia Kunyong Unim angwu leěti Unim a ma ke ukyebb le u ba ka bendi bema. ¹⁴ Ukatia Kunyong ana ù yi ’itaa a ashi ’i tyung li le liti li ba lè há, angi lı᷆ be kpe biwom puu abi Unim a kyebb le u ka bendi bema. Ashin ’i shi li ’i nung li nwongg le Unim u ba kpan li, bendi be fem bedyan bema. ¹⁵ He ’uhwo biwom abin puu, mi pee Unim he ’uhwo ’umen mbee ’unyong puu, nyong mi gyo ná ma bong ha Atyetyan Ujeso Ukristi, ma mbee shi lè benyin ha bendi Unim puu. Kung lè há na᷅ mi ke ushang le Unim ù ke men ’ukwun. ¹⁷ Mi ka ushang le Unim angwu a dyam hwò puu, u shi Atyam Atyetyan Ujeso Ukristi, ù ke men Ukatia Kunyong uma, angwu u᷆ shi amen ma᷆ bi lishi, u mbee tyung amen biwom Unim, hè men mà ngye-e dell-dell. ¹⁸ Mi mbee ke ushang le Unim ù buu igim īme᷅n, hè men mà ngye biwom bimen abi a ko amen abi ma᷆ ndor lishi kung lè he ’unyong ahwu a waa kung amen, ma mbee ngye ’inunung ’ikaandi ashi a kam ndor bendi bema. ¹⁹ Unim ù kpell amen hè men mà ngye ikeb ikaandi ima angi i dyam hwò biwom puu ana. Ife na᷅ u᷆ kung shi aki he atyam atyan, bel abe li bong ha ahe. Ikeb angi u᷆ kung shi aki he atyam atyan ana, ì yi ikeb ikaandi imen, ²⁰ angi leěti a ma kung wum Ujeso Ukristi lè he lihwu, u te lè he lè kwu he ’ubwo lizen ’uma há he ’usi lifung-atabe. ²¹ Ujeso Ukristi ù yi usu biwom puu abi bì yi lè ikeb há he ’usi; idengell Unim or, bēnyōng or puu bè yi he ’ubwo ’uma, u shi usu biwom puu abi bì yi he igye anyin lè igye angi ı᷆ be be. ²² Unim a kung biwom puu fe-e he ’ubwo, u shi-e a fel atie-lishi angwu ù yi usu biwom puu, fe-fe lè bendi abongale puu or. ²³ Awu bendi abongale puu tye fe he ’iteng ken à yi ná inyiahwo Ujeso Ukristi nà. He liwu bendi abongale limen i na᷅ biwom Ujeso Ukristi bi sho yilididi; ufe u fe sho biwom puu yilididi he ’iteng ’iyang-yang he igye i.

¹ Leěti men ma ma nim likpan līme᷅n ligyang angyell, likorye ma ma kpo utebb Unim, ma shi ’iban. ² Nya he ’unyong ’umen ana, men ma maa tan sha akpe abibi angi he igye anyin puu, ma mbee fe usu ikeb ibibi angwu ù yi lè ikeb he ’usi. Ufe umen na᷅ u᷆ teng bendi abe be᷆ kpo utebb Unim. ³ Bel or, li ma yi lè liwu bibibi ana ashele, bwo ’ì yi le li maa sha keè ’itaa agwo atyan lè igim ityan bi kee a. He biwom abi li maa shi ana, bel or, bendi abe be teng or, li ma kpè le Unim ù ngywo fe li. ⁴ Ukpor beshi Unim be dyam gbe gyong, a kung benyin bema abe be dyam ’indee-indee tyung ha abel. ⁵ Nya he ’unyong ’umen ana nyong li ma nim likpan lityan ligyang angyell he ’uhwo bibibi abi li shi, Unim a ma ke li likpan lifufe, u shi li li kwu bewum ipel ha Ujeso Ukristi. Gbe he inung Unim ufe-ufe na᷅ a kpan li lè he biban bityan. ⁶ Le bwo lì yi ke Ujeso Ukristi, Unim a wum li lè he lihwu ipel ha ahe, u shi li le lì be kwu besu ipel ha ahe he lifung-atabe. ⁷ Unim a shi biwom abin puu hè ti ’ì be tyung bendi ná benyin lè inung abi ù yi lè bi ha abel bi dyam. Gbe ha Ujeso Ukristi na᷅ a tyung benyin lè inung ana ha abel. ⁸ Gbe he inung Unim ufe-ufe na᷅ bel li fel lè likpan ’unyong gbe he abongale ha Ujeso Ukristi. A kpan li le bwo li shi ’iwom ashi ’ı᷆ ke li likpan a ye. Unim ugyang na᷅ a ke li likpan limen ana ’uke. ⁹ Undigye ù pwom ungwu ná a fel lè likpan anyin ye, likorye ’ì yi lè ashi a shi kpe ngi ye. ¹⁰ Unim na᷅ a mbe li. A shi li li fel befufe gbe he agwaale ha Ujeso Ukristi le lì shi binunung abi a kam ndor li leěti le lì shi. ¹¹ Men mà well le men abe mà yi Ijuus a ye, leěti ma ma yi bendi Unim a ye. Bendi Ijuus na᷅ bè yi lè ūfee᷅ Unim angwu ù yi lìte᷆n. Ashin na᷅ ’i shi Ijuus ı᷆ ko amen le begaandi likorye ma ten ye. Ūfee᷅ ana ù kee-kee yi ’iwom inyiahwo ’ife-ife a. ¹² Leěti men ma ma ngye Ujeso Ukristi or, ngwu mà yi ke-e or ye. Ma ma yi begaandi a ke bendi Unim, ma shi bendi Unim a ye gbang-gbang. Kiwom ashi Unim a ma kong ndor le u sha, ma ma yi lè abwo há ye. Nya a na ma ma yi hen igye, ma ma ngye Unim or, ngwu mà kwu lè lishi andorale or ye. ¹³ Ukpor ’anaa-anaa i ma fel ke Ujeso Ukristi a. Mà na leěti ma ma yi ’igbe-igbe lè ha ahe or, ma fel gwaa ha ahe kpebaa gbe he lihwu angi a hwō he ’ikpakpaa. ¹⁴ Ufe na᷅ a be lè ikwum ke li. A shi Ijuus lè bendi abe bè yi Ijuus a ye be fel bendi ken. A kung inyiahwo ima a ti uging angwu a ma shi ābe bè yi linaa, be tang he abwo. ¹⁵ A mbee lè Iten Ijuus puu angi Unim a ma ke Umosis. Ashina na᷅ a shi, hà be lè abong afee ana he ’iteng ken, u shi āngi a fel ’ubong ’ufufe ha ’uhwo-ma. Kukwo ahwun na᷅ Ujeso Ukristi a be lè ikwun. ¹⁶ Gbe he lihwu lima he ’ikpakpaa a mbee lè linaa angi Ijuus i ma yi lè ngi ha bendi abe bè yi Ijuus a ye; gbe he lihwu lima he ’ikpakpaa a shi abong afee ana a fel bendi ken abe be᷆ fe Unim. ¹⁷ He ashin Ujeso Ukristi a be bun ’isom ’inunung ashi ’ı᷆ be lè ikwun de bendi puu. A bun āshi de Ijuus angi ife ì yi kpee-kpee ha Unim; u bun āshi de men abe mà yi Ijuus a ye abe mà yi ’igbe-igbe lè ha ahe. ¹⁸ Gbe ha Ujeso Ukristi na᷅ bel puu, Ijuus lè bendi abe bè yi Ijuus a ye, li fel lè Ukatia Kunyong ken angwu u᷆ be lè ha Unim, hè li lì fel lè libwo porr le li naa he ’ushu Unim Atyetyan. ¹⁹ He ashin, men abe mà yi Ijuus a ye, mà tem yi begaandi a ye, ma fel ’ubong ken ha bendi Unim, ma fel he ’ikwu-lihwan Unim. ²⁰ Awu bendi abongale puu tye fe he ’iteng ken à yi ná ushom angwu Unim u᷆ tye nà. Men ma mbee shi ’ufung ushom umen bebwaa-isom Ujeso lè bendi abe bè tye ugie ’isom Unim be fe lìshií ana. Ujeso Ukristi na᷅ u᷆ kwu ushom umen ana naa genn. ²¹ Ufe na᷅ a kwu ushom anwun fe he ’iteng ken, u shi-e u kwu ta-ta ke Unim. ²² A mbee shi amen ma gwaa he ’iteng ken ha ufe-gyang, ma fel ná ’ufung nya he ushom umen ana, hè Unim ù kwu nya gbe ha Ukatia Kunyong uma.

¹ He ’uhwo biwom abin na᷅ mi Uporl angwu mì yi he igaadye mı᷆ kong ha Unim ke men. Men ma ngye le Ujeso Ukristi a shi-m mi fel ná undi igaadye a he ’uhwo ’umen, abe mà yi Ijuus a ye. ² Men má ngye dangg le gbe he inung Unim na᷅ a waa kung mi le mì shi aki anyin he ’uhwo ’umen a. ³ Unim a fem ’iwom ’undyell ’ima tyung mi shi-m mí ngye shi, mi bè fee zangg gbe lè shi or mà. ⁴ He ’unyong ahwu ma᷆ bo àshi mi fee nyin, mà ha᷅ ngya le ’iwom ’undyell gbe lè Ujeso Ukristi ’i nung mi nwongg ’igyang-igyang. ⁵ Leěti Unim a ma fem ’undyell ’umen i tyung bendi ye. Kanaa-anaa i a som Ukatia Kunyong uma be, angwu a fem ’undyell ana tyung bendi abe be᷆ tye ugie ’isom Unim, lè bebwaa-isom Ujeso, angwu leěti a ma waa ābe ndor ta-ta le bè shi-e aki. ⁶ Kundyell ’umen ana ’ù yi le, gbe he ’isom ’inunung gbe lè Ujeso, bendi abe bè yi Ijuus a ye lè Ijuus ukem-ukem be fel lè abwo he ukyebb angwu Unim a ke bendi abe be gwaa ipel ha Ujeso Ukristi. Bendi Ijuus lè bendi abe bè yi Ijuus a ye be fel ūbībī ken. ⁷ Unim ugyang na᷅ a ma waa kung mi le mì bun ’isom ’inunung ashi gbe lè Ujeso Ukristi i. A kung ikeb ima a shi aki ha ami. He inung ima na᷅ a ke-m aki angi mı᷆ shi i. ⁸ Mì yi he ’ukpo ye hwò bendi Unim puu. Mà na or, Unim he inung ima, a waa kung mi ke-m libwo le mì be lè ’isom ’ima bun de men, abe mà yi Ijuus a ye. A waa kung mi le mì bun de men gbe lè binunung bikaandi abi bı᷆ be lè ha Ujeso Ukristi. Binunung bikaandi bimen ana bi dyam gbe lishi. ⁹ Unim a waa kung mi le mì be lè ’undyell ’uma ana he igye gboo. Kundyell ’umen ana ’ù yi ndyell ha Unim ugyang mà ukpong u hà shi biwom puu. ¹⁰ Kanaa-anaa i, Unim a kung awu bendi abongale ukem-ukem a shi idengell Unim lè biwom abi bi teng abi bì yi lè ikeb há he ’usi bi ngye ná lishi abyele Unim lì yi he akwo atyetye-atyetye puu. ¹¹ Biwom puu abi leěti a maa kam le u ba sha, kanaa-anaa i a shi ābi gbe he asomale Atyetyan Ujeso Ukristi be he igye i. ¹² Gbe he agwaale utyan ha Ujeso Ukristi li fel lè libwo le li die ngie Unim faale ’ushell, li gye lè naa he ’ushu ’uma likorye li fe lityam ha ahe. ¹³ He ashina, mi tim amen anung le he ’uhwo ’ingie ashi mı᷆ kpē he ’uhwo ’umen i ’ì wee amen abwo ye. Kingie ashin ’i sha ’inunung a ka amen. ¹⁴ He ’uhwo áshi mi kong ana, mi tim anung he itang ke ushang hwaa lè Atyetyan Unim. ¹⁵ Ufe na᷅ u᷆ kwù ’ikwu-lihwan ’iyang-yang há he ’usi lè ashi hen itang azen. ¹⁶ Mi ka ushang hwaa lè Unim le gbe he binunung bikaandi bima abi bi dyam hwò biwom puu, ù ke men Ukatia Kunyong uma he-e ù ke men ikeb angi ı᷆ shi benyong bēme᷅n lè àtyám āme᷅n bì kwu kang-kang. ¹⁷ Mi mbee ka ushang le Ujeso Ukristi ù be fe ushu he atyam āme᷅n bwo ma fe lityam ha ahe. Mi ke ushang le mà mbee kwu lè ikeb angi ı᷆ be lè he benyin angi ı᷆ shi amen ma᷆ naa genn faale ’ushell, ¹⁸ le hè men lè bendi Unim puu ukem-ukem mà ngye ná benyin Ujeso ha abel be dyam. Mā ngye ná bè yi ungwu ugie-ugie, be wee likwob, be shul lishi, be wee bedung. ¹⁹ Mi ka ushang le, mà na benyin abena be dyam gbe abe undigye u᷆ ngye bedyan ábe or, men ufe ma ngye be, le hè binunung puu abi bi sho ha Unim bì sho ha amen. ²⁰ Ipee ì kwu ke Unim angwu u᷆ kung ikeb ima shi aki he atyam atyan, ù yi lè ikeb le u sha biwom ka li gba gyong ’itaa li bii he or, kitaa li gim or. ²¹ Ifem puu ì kwu ke-e he awu bendi abongale ukem-ukem gbe ha Ujeso Ukristi ngyor igye kpamm! Kì ngyor ná mi kong.

¹ Mi angwu mì yi he igaadye he ’uhwo ’isom Atyetyan Ujeso, mi tim amen anung le mà shi akpe angi a keè ha libwo angi Unim a waa amen ndor. ² Mà keb ’uhwo-men be he itang, mà kwu mbiloo, mà mbu ’uhwo ha bende lè lityam benyin. ³ Bwo Ukatia Kunyong Unim a shi amen mà yi ūbībī ken, mà kaa kangg hè men mà ngyor kwu ūbībī ken ikwun-ikwun gye ’ushu. ⁴ Bendi abongale puu bè yi ūbībī ken, Ukatia Kunyong Unim or ù yi ken, kitaa a ken na᷅ úkyébb angwu Unim a ko amen le mà ndor lishi lima ù yi ken. ⁵ Bel puu li fa Atyetyan ken, li bong ha Unim ’itaa ken, lì yi lè agwaale ha Ujeso Ukristi ken. ⁶ Unim angwu ù yi Atyam bendi puu, ù yi ken. U kung biwom puu sha aki ama, u shi he ’udyan biwom puu. Ufe na᷅ ù yi Usu puu. ⁷ He inung ima, Ujeso Ukristi a ke li beke abe lı᷆ shi-e aki bitaa atyetye-atyetye. A ke undi-undi ikeb he ūkee᷅ uma ufe-gyang a. ⁸ Kì yi nya a na be ma fee he ’ushia Unim leěti le: "A mbo gye he ’usi, bēnyōng abe a ma hwò ābe, a ma gye lè be. U som beke ke bendigye." ⁹ (Ashi ’imen le a mbo gye he ’usi ana ’ı᷆ tyung le ana? Ki tyung le a ma shul lè há he ’usi hell a be he itang gungg. ¹⁰ Ufe umen angwu a ma shul lè he ’usi be he itang, na᷅ a tem gye há he ’usi, a wu he ’iteng ashi ’i kwob gye he ’usi hwò puu le hè ikeb puu ì kwu ima a há he ’usi or, he itang or.) ¹¹ Beke aki ashele abe a ke bendi na᷅ bè yi le: a waa bendi besuso le bè kwu bebwaa-isom bema, u waa besuso le bè tye ugie ’isom Unim. A waa besuso le bè tan bun ’isom ’inunung gbe lè Ujeso de bendi, u waa besuso le bè kam liwu bendi abongale, be mbee hwua ābe igie Unim. ¹² Kitel i na᷅ Ujeso Ukristi a kam bendi Unim le hè be bè shi-e aki, hè be bè kaa, naa genn he biwom abi be bong, bwo befe na᷅ bè yi inyiahwo ima. ¹³ Ashin ’i sha kpamm bel puu li fel ūbībī ken he abongale utyan lè angyele Unwaa Unim; li kaa kpè he ashele biwom Ujeso Ukristi puu yilididi. ¹⁴ He ashin bel lì tem kwa ná bebwani a he likong Unim ye; bendi-uman bè tem ba sǒm li tan lè bel ná ’ufem ’u᷆ tan lè ’inong he likwu umbwo ana ye. Bendi-uman bemen ana be kung beshu a bà iman sha bendi be tyang ’ukwo ahwu kpa-kpa. Bè be shi na a na or, be sha li li fel igim ifee gba lè ashi li bong i ye kpamm! ¹⁵ He atan-lengi anwun, mà lì kong ’igyang ha bende lè lityam benyin, hè li lì kaa kpè fel ’itaa ken ha Ujeso Ukristi he ’ukwo ’uyang-yang. Ufe na᷅ ù yi lìshī, ¹⁶ a gwaa agwo puu fe he ’iteng ken. Ufe na᷅ a shi bendi bema puu be gwaa he ’iteng ken, be shi aki he ’ukwo ken, be kpell bende ná ate a᷆ gwaa ikeb puu fe he ’iteng ken nà. Ashin ’i sha li bel abe lì yi inyiahwo ima li kaa fel kang-kang gba he benyin. ¹⁷ He atan-lengi anwuna, mi kung lizen Atyetyan Ujeso tim amen anung le mà tem gye ’ushu shi akpe ná bendi abe be ngye Unim ye be᷆ shi ye. Igim ibell ì yi liketye. ¹⁸ Kifufebb ’i shī àtyám abell kpemm. Likpan angi lı᷆ be lè ha Unim, bè yi lè abwo há ye, likorye be kaa lishi gbe gyong, be ngye ’iwom gbe lè Unim ye. ¹⁹ Ishwia or ì tem yi he lishi libell ye, be kung inyiahwo ibell sha bitaa bibibi biyang-yang, be sha ābi tem kwa litel ye. ²⁰ Ukpor men ufe, biwom abi be hwua amen gbe lè Ujeso Ukristi bì yi ’itaa ana a ye. ²¹ Kì yi faale ifung a le ma gyo gbe lè Ujeso, be hwua amen bigyang abi bı᷆ be lè ha ahe. ²² He ashin mà tyang abwo lè he likpe litim limen angi leěti ma maa shi. Likpe limen ana li ma ban gbe he igim ibibi angi i maa mbeb amen. ²³ Mà tyang Unim he-e ù shi igim īme᷅n lè atyam āme᷅n bì tem fel bifufe. ²⁴ Men mà ndo shi likpe lifufe limen Unim a shi bi ’uhwo-ma ana. Likpe limen i lì yi silididi, li shi litaa-litaa he ’ukwo ahwu ’u ngbebb Unim. ²⁵ He atan-lengi anwuna mà mbee lè abwo lè he iman abele. Undi uyang-yang ù ndè le a de unde-ma ’igyang, bwo bel puu lì yi agwo he inyiahwo Ujeso Ukristi a. ²⁶ Gbe ma ngywo ingywo, mà tyang āngi ì teng amen mà shi ’iban ye. Mà tyang ’usu ’ù gye fe ingywo ana he atyam āme᷅n ye. ²⁷ Mà ke Usetan, usu bibibi, libwo ye. ²⁸ Undi angwu u shii zì, ù ndè le a tyang ’azi azele. Ashi ’i ngbebb ’ì yi le ù fel shi aki lè abwo ama he-e ù fel lè ’ima he ’ukwo ahwu kpa-kpa, u mbee kwu lè ashi u᷆ kpell bendi-likaa. ²⁹ Gbe lè likong akongale, mà kong igie ibibi angi ı᷆ do undi lè he ungwu ye. Ukpor mà kong igie inunung angi ı᷆ kpell bendi be᷆ naa genn, i mbee keè he ’unyong ’uyang-yang, i be lè ’ukwun ke bendi abe be gyo igie imen ana. ³⁰ Mà shi Ukatia Kunyong Unim ù mbwee ye, likorye ufe na᷅ ù yi ’itaa ashi ’ı᷆ tyung le men mà yi ke Unim a, u mbee tyung le Liti li ba angi Unim u᷆ be kpan amen. ³¹ He ashin, mà ndè le ma tyang ashi abungale, lè lityam anyungale, lè ingywo, lè ’atel, lè beshwan, lè akongale bia bende. ³² Ashi ’i ngbebb le mà shi ’ì yi le, mà ngbebb inung ha bende, mà kwu lè beshi ha bende. Mà tyang biban bende ke bende nya a na Unim a tyang ke men he ’uhwo Ujeso Ukristi.

¹ Men mà yi bebwaa Unim a, mà yi-e he lityam-lityam. He ashin, mà nde le ma shi likpe bi-e. ² Kì nyin amen lè bendi mbee akekel puu nya a na ’i nyin Ujeso Ukristi lè bel, a kung likpan lima ke he ’uhwo ’utyan. A kung ’uhwo-ma shang Unim, ashangale angwu a ngbebb Unim. ³ Bwo mà yi bendi Unim a, mà tan akpela ye, ma tem shi likpe liketye ye, ma ndor lishi ’iwom undi ye, mà fel kong akongale ufe-ufe or gbe lè abin ye gbang-gbang. ⁴ Mà kong ’ibibi lè he ungwu ūme᷅n ye, īnyı᷅n or, mà shi a᷆ngi ibibi ye. Ashi ’i ngbebb ’ì yi le mà pee Unim he ’iwom ’iyang-yang ashi a shi. ⁵ Mà ngye le undi uyang-yang angwu u᷆ tan akpela, u shi likpe liketye, u ba kwa lè abwo he Kusu Ujeso Ukristi lè ahwu Unim ye. Undi angwu u᷆ ndor lishi ’iwom undi, ufe or u ba kwa lè abwo nya ye, likorye biwom bimen ana bi ngbebb he hwò Unim. ⁶ Mà tyang bendi bè kung igie akpel-ye lam amen ye. Kigyang-igyang, bibibi abi ’itaa ana na᷅ bı᷆ nyung Unim lityam, shi-e u᷆ ngywo fe bendi abe be ke-e ife ye. ⁷ He ashin men mà shi ’iwom ’iyang-yang ipel ha bendi abe be᷆ shi bitaa biwom abin ye. ⁸ Leěti hell men ma ma yi he ’ifufebb, ukpor ’anaa-anaa i ma fel bendi Atyetyan Ujeso Ukristi a, ma fel lè ’ikung-gbo ashi ’ı᷆ be lè ha ufe. He ashin, mà ndo shi likpe ná bendi abe bè yi he ’ikung-gbo. ⁹ Kikung-gbo ’i sha undi u sha binunung, u shi ’ukwo ahwu kpa-kpa he ashi Unim, u shi biwom abi bì yi ’igyang. ¹⁰ Mà shun li-li hè men mà ngye biwom abi bi ngbebb Atyetyan Ujeso. ¹¹ Mà gbe lè abwo āme᷅n fe he biwom ’ifufebb ye, likorye bì yi lè lifem libibi. Ashi ’i ngbebb ’ì yi le mà be lè bi he igye he ’ipi ’ikung-gbo ’ì yi. ¹² Kì yi-m ishwia-ishwia ná mı᷆ kong gbe lè biwom abi bendi ’ifufebb be᷆ nyia shì he ’undyell. ¹³ Gbe biwom ’ifufebb ana bi fem be he igye gboo, bendi be ndà ābi ná bì yi, be ngye bi titi, ¹⁴ le hè bi bì fel biwom ’ikung-gbo. Ashina na᷅ ’ı᷆ shi bendi be᷆ kong le: "Wo angwu wo᷆ mbu ’unde, wò wum lè he lihwu! Ujeso Ukristi u sha-a wo ndà ’ikung-gbo ’ima." ¹⁵ He ashin mi da amen le, mà kang likpe līme᷅n. Mà shi likpe ná bendi abe be bi lishi, ma shi likpe akpel-ye ye. ¹⁶ Ati angi ’unyin i à yi ati angi bibibi bi fel go gbe gyong. He ashin, libwo liyang-yang angi ma ndè, mà shi ’inunung. ¹⁷ Mà kwu bendi lisom ye a. Ashi ’i ngbebb ’ì yi le mà shun li-li hè men mà ngye ashi ’i ngbebb Atyetyan Ujeso le mà shi. ¹⁸ Mà bwom ’utyuo ye. Ibwom ’utyuo ì yi ibia a. Ashi ’i ngbebb ’ì yi le mà tyang Ukatia Kunyong Unim ù ngyor sho he atyam āme᷅n. ¹⁹ Mà gyam agyam Unim bitaa atyetye-atyetye tyung bende igim īme᷅n. Mà pee Unim gyam agyam angi Ukatia Kunyong uma a ke men. Nya a na ma᷆ gyam agyam ipee, mà pee he lè he atyam āme᷅n. ²⁰ Mà pee Unim Atyetyan he biwom puu mbee ’unyong gbe he lizen Atyetyan Ujeso Ukristi. ²¹ Men abe ma᷆ fe Ujeso Ukristi, mà keb ’uhwo-men ke bende. ²² Men bengye libee, mà keb ’uhwo-men ke bekyemen ná ’ì yi le bendi abe be᷆ fe Atyetyan Ujeso bè shi. ²³ Ungye ù yi he ’ubwo ukyema a, nya a na liwu bendi abongale puu lì yi he ’ubwo Ujeso Ukristi a. Ujeso Ukristi u mbee shi Undi-likpan angwu a kpan liwu bendi abongale puu angi life or lì yi inyiahwo ima. ²⁴ He ashin, kì yi kpe-kpe le bengye bè keb ’uhwo-bell ke bekyebell ’itaa ken ná liwu bendi abongale puu lı᷆ keb ke Ujeso Ukristi. ²⁵ Men bekyebb, kì nyin amen lè bengye-men lityam ken nya a na ’i nyin Ujeso Ukristi lè liwu bendi abongale puu lityam ken, u mbee kung ’uhwo-ma ke he ’uhwo angi. ²⁶ A kung umbwo lè Igie Unim shi liwu bendi abongale puu li fel litaa-litaa, u shi āngi li fel ta-ta ke Unim, ²⁷ le hè ngi lì kwu gelalala, li taa, li ngbebb ’unung. Kitaa ana na᷅ a shi āngi nyong lì tem yi lè ’ibibi or, ngwu uben or ye. A kung āngi ndor ke ’uhwo-ma. ²⁸ He ashin, kì nyin bengikye lè bengye-bell nya a na ’i nyin ābe lè ’uhwo-bell. Ungikye angwu ’i nyin he lè ungye-ma, hà ’i nyin he lè ’uhwo-ma. ²⁹ Undi ū tel inyiahwo ima ye, u kwob āngi ikwob, u mbee kam āngi nya a na Ujeso Ukristi u᷆ kam liwu bendi abongale puu angi life lì yi inyiahwo ima. ³⁰ Bel puu lì yi agwo nya he inyiahwo ima ana. ³¹ Be fee fe he ’ushia Unim le: "Ungikye ù tyang átyám lè anam, u gwaa ’uhwo-ma ipel ha ungye-ma. Befe bendi befee ana be fel ná undi ken." ³² Igie anyin i teb kangg. Mi ndè shi le ì yi gbe lè Ujeso Ukristi befe lè liwu bendi abongale puu, ³³ i mbee shi ke men undi-undi he usi-lishi uma. He ashin, kì yi kpe-kpe le ’ì nyin ùkyēbb uyang-yang lè ungye-ma ’itaa ’i nyin he lè ’uhwo-ma; ungye uyang-yang ù ndè le a ke ukyema ife.

¹ Men bebwani, mà ke betyamen lè bendamen ife. Ki ngbebb le men abe ma gwaa ipel ha Atyetyan Ujeso mà shi ’itaa ana. ² "Fe atia lè anaa!" Uten anwun na᷅ ù yi ukpi-ikwu uten angwu Unim a ke li úkyébb ununung. A kyebb le: ³ "Biwom puu bi ba ta ngbebb-ngbebb lè undi angwu a ndor uten anwun; undi umen i u zī igye." ⁴ Men betyam bebwaa, mà shi bebwaa-men bè fel he ingywo ye. Ashi ’ì yi le mà shi ’ì yi le mà hwua ābe he ’ukwo ’ununung, hè be bè ngye Atyetyan Ujeso, be mbee kwu lè ife. ⁵ Men ifee, mà ke bendi ife abe mà yi he ’ubwo ’ubell he igye i. Mà kwu lè ’ushell kangg, ma shi ābe aki lityam ken, nà hang mà fe Ujeso Ukristi. ⁶ Mà shi aki lityam ken he ’unyong ahwu bendi be᷆ kang amen ufe-ufe a ye, mà shi biwom abi Unim a kee lè àtyám āme᷅n puu, ma well le mà yi ifee angi ı᷆ fe Ujeso Ukristi a. ⁷ He ashin mà shi aki āme᷅n igor-igor ná wò ko le ma sha a᷆ngi Atyetyan Ujeso ugyang a, ma sha a᷆ngi bendigye a ye nà. ⁸ Mà well le mà undi ù yi ufee a or, ù yi ufee a ye or, kinunung ’iyang-yang ashi a shi, Atyetyan u ba ka he ’uke áshi. ⁹ Men abe bendi bè yi he ’ubwo ’ūme᷅n, mà shi likpe linunung ha bendi bemen ana, ma tem shi a᷆shi ’ı᷆ fe be ’ushell ye. Mà well le Atyetyan angwu u᷆ nde gbe lè men or, ifee īme᷅n or, ù yi ken. Atyetyan umen ana ù yi he lifung-atabe, u shell ’ùshú undi ye. ¹⁰ Utebb angwu mi kee le mi ka amen umbee-likel ù yi le mà gwaa ha Atyetyan Ujeso kpebaa, ma kpe ikeb lè ha ahe hè men mà naa genn, likorye ikeb ima i dyam hwò ikeb puu. ¹¹ Unim a ke men bigbor ’ukye gbamm abi ma᷆ kung ndo ha Usetan, usu bibibi. Mà kung bigbor ana kwu he abwo gie ’ukye ngbebb-ngbebb hè Usetan ù shi beshu hwò amen ye. ¹² Má ngye le ’ukye ahwu lı᷆ ndo i li ndo ha bendigye a ye, li ndo ha biwom bibibi abi bì yi lè ikeb he ’usi, lè besu ikeb ibibi abe bè yi lè ikeb he ’ifufebb he igye anyin. ¹³ He ashin, mà kung bigbor ’ukye bīme᷅n abi Unim a ke men ana kwu he abwo gie ’ukye, mà ndo ’ukye kangg le he liti libibi hè men mà ngyor naa genn lè wu he umbee-likel, ma ke ’ikwu he item ye, bendi-linaa bēme᷅n be hwò amen ye. ¹⁴ Mà gie ’ukye ngbebb-ngbebb! Mà shi ’igyang. Kigyang ’ì yi ná ukwob angwu undi u᷆ bua he uten kam ’uhwo-ma nà. Likpe līme᷅n lì kwu kpa-kpa. Kitaa likpe ashin ’i bong ’iwom ’i do lityam ye nya a na aliga ’ukye angi be kung ’índe᷆ shi a. ¹⁵ Mà kam hè men mà bong ’isom ’inunung ashi ’ı᷆ be lè ikwun. Akamale anwun ù yi ná ikwob abee angi ı᷆ shi amen ma᷆ naa genn, ma mbu ye. ¹⁶ Kiwom ashi ken ’i shi le, mà fe lityam ha Atyetyan Ujeso. Lityam afele ana lì yi ná ’īgbē ashi ’ı᷆ bong ’iwom ’ì do amen ye mbee ’unyong puu, hè men mà buu hwaa bebun Usetan. Mà bebun bema abe há bè be ’inde-inde or, lityam afele līme᷅n ha Ujeso li bong ’iwom ’ì do amen ye. ¹⁷ Mà tyang likpan ’unyong angi Unim u᷆ ke men lì kwu ná ’ishilishi ’ukye ashi ’ı᷆ bong ’iwom ’ì shi amen he lishi ye. Mà mbee kung Igie Unim kwu he ’ubwo. Ife ì yi ná ’ashwia ake Ukatia Kunyong Unim u᷆ ke nà. ¹⁸ Mbee ’unyong puu mà kong ha Unim, ma bii he ukpell. Mà kong ha Unim ’itaa ashi Ukatia Kunyong Unim u᷆ teng amen. Mà kwu lè ’akang. Mà wee abwo ye, ma gye ’ushu bii Unim mbee ’unyong le ù kpell bendi bema puu. ¹⁹ Mà mbee bii Unim le ù kpell i-mi or titi, le he ’unyong ahwu mı᷆ bun ’isom ’inunung de bendi, mî shi biwom ’undyell gbe lè shi bì nung ābe, mi bun porr faale ’ushell. ²⁰ He ’uhwo ’isom ’inunung ’imen ana na᷅ Ujeso a waa kung mi le mì kwu unwaa-isom uma, mà na ’unyin i mì yi he igaadye or. Mà kong ha Unim le ù shi-m mì fel lè lityam uteb le mî kwu porr mi bun ’isom ’ima gboo he ’ukwo ahwu ’ì yi le mì bun. ²¹ Utikikes ù yi unwandatyan he aki Unim, kí nyin li lè he kangg. A gwaa ipel ha Atyetyan Ujeso kpebaa, u shi-e aki lityam ken. U ba da amen gba lè mi. ²² Ashin na᷅ ’ı᷆ shi-m mı᷆ som he hwaa lè men, le he-e ù de men ’itaa lì yi hen, u fe men ingie. ²³ Unim Atyetyan befe lè Atyetyan Ujeso Ukristi bè hā shi ’i kwun bendi abongale puu he atyam kpatiaa, be shi ’i nyin ābe lè bende, be mbee fe lityam ha Ujeso Ukristi. ²⁴ Men abe ’i nyin amen lè Atyetyan Ujeso Ukristi lityam ken, ushang angwu mı᷆ ke ù yi le, he inung Unim ù ke men puu ’ukwun.