Colossians

Colossians

¹ Mi Uporl angwu Unim a waa kung mi le mì kwu unwaa-isom Ujeso Ukristi bel ha unwandatyan Utimoti na᷅ lı᷆ fee ’ushia ahwun. ² Li fee āhwu hwaa lè men bebuye bendi Unim abe he Ukolorsi a. Mí ngye le ma gwaa ha Ujeso Ukristi kpebaa, ma mbee fe-e lityam ken. Atyetyan Unim ù hā ke men ’ukwun, u mbee shi hè ’ì kwun amen he atyam kpatiaa. ³ Mbee ’unyong puu lı᷆ kong ha Unim ke men, li pee Unim angwu ù yi Atyam Atyetyan Ujeso Ukristi. ⁴ Li pee he likorye li gyo ná ma bong ha Ujeso Ukristi, ma mbee shi lè benyin ha bendi Unim puu. ⁵ Atan-lengi angwu ma᷆ shi abina ù yi le ma ndor àshì āme᷅n he biwom abi Unim a kam ndor amen he lifung-atabe. Ma gyo gbe lè biwom bimen abi Unim a kam ndor amen i he ’unyong ahwu ma gyo ’isom ’inunung ’igyang ashell gbe lè Ujeso. ⁶ Kisom ’inunung ’i gye mbee igegem puu he igye anyin, ki shi bendi be gie be fel sha likpe linunung. Bendi bè yii ngya gba lè shi ta ita ita. Nya a na ’i shi abina há, na᷅ ’i shi he liwu līme᷅n kung lè he liti angi ma gyo āshi, ma nde shob ’igyang-igyang ’ukwo ahwu Unim ù yi lè inung. ⁷ Ipafras, udim-tyan lityam, na᷅ a bun ’isom ’inunung de men. Bel lè he lì yi iboyi Ujeso Ukristi a. U sha aki ka Ujeso Ukristi lityam ken, u sha āngi he liwu līme᷅n lishi lityan a. ⁸ Ufe na᷅ a de li ná mà yi lè benyin abe be᷆ be lè ha Ukatia Kunyong Unim. ⁹ He atan-lengi anwun, kung lè he liti angi li gyo ’inunung ashin gbe lè men, li keb li fel kong ha Unim ka amen mbee ’unyong puu. Li kong ha ahe le ù shi amen mà ngye gboo ashi a kee amen le mà shi. Ukatia Kunyong uma ù shi amen mà kwu lè lishi abyele le hè biwom Unim puu bì nung amen. ¹⁰ Li kong ha Unim le ù ke men lingye anyina le hè men mà ndor ’uhwo-men he ’ukwo ahwu Atyetyan a kee, ma shi a᷆shi ’ı᷆ nyin he mbee akekel puu, ma mbee shi ’inunung he akwo atyetye-atyetye, ma gye ’ushu ngye-e te ite ite. ¹¹ Li mbee kong ha Unim le ù kung ikeb ima angi i dyam hwò puu ke men hè men mà naa genn he akwo puu, le hè men mà ngyor naa genn he ’ingie ’iyang-yang, ma wee abwo ye. Mà kpe bi igor-igor. ¹² Mà pee Atyetyan Unim mbee ’unyong puu. Ufe na᷅ a shi amen ma fel kpè le ma ba la kpā ukpo ūme᷅n he biwom abi a kam ndor bendi bema he lifung-atabe pi ’ikung-gbo ’ima ’ı᷆ taa. ¹³ A kpan li lè he bibibi abi bi kpe li ityuu, be lè bel he ’iteng-usu Unwaa-ma angwu ù yi-e he lityam-lityam. ¹⁴ Unwaa-ma umen ana na᷅ a pong li, u tyang biban bityan ke li. ¹⁵ Undigye u ndà Unim lè atong-shi ye, ukpor gbe a ngye Ujeso Ukristi, hà a ngye Unim or titi. Ujeso Ukristi na᷅ ù yi uhwaa Unwaa Unim, u dyam hwò biwom puu abi Unim a shi he igye anyin. ¹⁶ Gbe he ’ubwo ’uma na᷅ Unim a shi biwom puu abi há he ’usi or, abi hen itang or, abi be᷆ ndè bi lè ashi or, abi be᷆ ndè bi ye or. Gbe he ’ubwo ’uma Unim a shi idengell ima angi ì yi he ābwò atyetye-atyetye. Kiyang-yang ashi ’ì yi ’unyin i, a shi āshi gbe ha ufe a, hè bife puu bì kwu ke-e. ¹⁷ Ujeso Ukristi ù yi lè há linde, mà ukpong Unim a hà shi ’iwom ’iyang-yang. Biwom puu bi gwaa ha bende gbe he ’ubwo ’uma a, u shi lè bi puu kwu he ’ubwo ’uma. ¹⁸ Ufe na᷅ ù yi atie-lishi awu bendi abongale puu. Nya a na lìshī na᷅ lì yi lè inyiahwo puu, na᷅ Ujeso Ukristi ù yi lè awu bendi abongale puu. Biwom puu bi be lè ha ufe a. Ufe na᷅ a kpi ’ikwu wum lè he lihwu ’ushu. Ashin ’ì tyung lè ikeb ima i dyam hwò a᷆ngi biwom puu. ¹⁹ Unim ugyang na᷅ a ma kong ndor le Unwaa-ma Ujeso ù kwu ’itaa ken ha ufe-gyang he akpe puu. ²⁰ Ki mbee ngbebb Unim le ù tem lè biwom puu lè bendi puu be hwaa lè ’uhwo-ma gbe he ’ubwo Unwaa-ma. Gbe he anung angi Unwaa-ma a ma wu nyong a ma hwō he ’ikpakpaa na᷅ Unim a buu ’ukwo ke bendi puu lè biwom puu há he ’usi or, hen itang or, le bè tem fel ikwun ha ufe. ²¹ Men ufe, leěti ma ma yi bendi-linaa Unim a, likorye ma ma gim igim ibibi, ma shi biwom bibibi. ²² Ukpor ’anaa-anaa i, Unim a buu ’ukwo le mà fel ikwun ha ahe. Ashin ’i shi ná likorye Ujeso Ukristi a ma bong be gwu-e he ’uhwo ’umen. A ma hwō le he-e ù shi amen, bendi bema, mà kwu lè àtyám ataa-ataa faale ’iban, u be lè men faale uben be hwaa lè Unim. ²³ Ujeso Ukristi u kee-kee sha ’itaa ana, gbe men ma mā ma᷆ gye ’ushu bong ha ahe ’igyang-igyang, ma naa genn he biwom abin, ma gye ’ushu ndor lishi biwom abi ma gyo gbe lè bi he ’isom ’inunung. Kisom ’inunung ashi be bun de undi uyang-yang he igye anyin, kife ’imen na᷅ mi Uporl or mı᷆ bun de bendi. ²⁴ Nyin i ná mı᷆ kpe ’ingie he ’uhwo ’umen i, mì yi lè igor kangg, likorye nya a na Ujeso Ukristi a ma kpe ’ingie he ’uhwo inyiahwo ima angi ’ì yi liwu bendi abongale na᷅ mi or mı᷆ kpe ’utor he inyiahwo igi he ’uhwo liwu bendi abongale puu. Mi kpa ’utor ahwun le mî mbee ’igem aki ashi ’i teng shi a. ²⁵ Unim na᷅ a waa kung mi le mì shi aki he awu bendi abongale puu. Aki angi a kung fe-m he ’ubwo le mì shi he ’uhwo ’umen à yi le mì bun ’isom ’inunung puu de undi uyang-yang. ²⁶ Leěti bendi be ma wa ngye ’isom ’inunung ashin ye, ukpor nyong Ujeso Ukristi a be, Unim a be lè shi he igye gboo tyung bendi bema. ²⁷ Ki ngbebb Unim le ù shi bendi bema bè ngye ná ’isom ’inunung ’i dyam ’indee-indee, ki shi lè lifem kangg ke bendi he abong puu. Kisom ’inunung ’imen ashi Unim a be lè shi he igye gboo ana, kì yi le Ujeso Ukristi ù yi he átyám āme᷅n bendi Unim. He ashin na᷅ ma fel lè lishi andorale le ma ba kwa ipel ha ahe he ifem ima. ²⁸ Ufe na᷅ lı᷆ bun de bendi gbe lè he, li tuu undi uyang-yang ’ubwo, li kung lishi abyele angi Unim a ke li á hwua undi uyang-yang gbe lè he, le hè bendi abe be gwaa ha Ujeso Ukristi kpebaa, bè tem kwu bebwani a he likong Unim ye, li shi ābe be kaa kpè he ’uhwo ’uma, li be lè be hwaa lè Unim. ²⁹ Kife na᷅ ’i tan lè shi, kiken ashi Ujeso Ukristi a ke-m, mi kwu ’uhwo lè shi kangg, mî ndè le mi mbee aki angi Unim a ke-m le mì shi.

¹ Mi kee le ’ì nung amen ná mı᷆ kwu ’iken shi aki he ’uhwo ’umen bendi Unim abe he Ukolorsi lè abe he Uleyodisia lè bendi puu abe be wa nde-m lè ashi ye. ² Mi sha aki ’itaa ana le hè àtyám āme᷅n puu à kwu kang-kang, hè ’ì nyin amen lè bende, ma mbee gwaa ha bende. Mi kee amen le mà ngye ’undyell gbe lè Ujeso Ukristi ahwu Unim a be lè hwu he igye gboo, ma ngye hwu ngbebb-ngbebb-ngbebb. Kì nung amen dangg le ’ù yi ’itaa ana, ku kwu lè lifem kangg ke men. Kundyell ahwu Unim a be lè hwu he igye gboo ana, kù yi Ujeso Ukristi a. ³ Ujeso Ukristi u yi ná ukukol. Ufe na᷅ u᷆ buu bendi ’ukwo ahwu be᷆ kwù lè lishi abyele Unim, hè be bè kwu lè lingye ligyang angi kpa-kpa. Kitaa lishi abyele lì yi lè lifem linunung ke bendi. ⁴ Mi kong abin le hè bendi abe be᷆ kong binyin bè lam amen ye a. ⁵ Mà ngye le mà na mì yi utung ha amen há ye or, mì yi lè men he lityam. Mì yi lè igor kangg nyong mı᷆ ngye le mà yi lè likpe linunung, ma mbee naa genn he abongale ūme᷅n ha Ujeso Ukristi. ⁶ Bwo men ma kpe Ujeso Ukristi ná Atyamen, mà gye ’ushu shi likpe angi lì yi le bendi abe be gwaa ipel ha ahe bè shi. ⁷ Lè ha ufe na᷅ ma᷆ ndè likpan ’unyong lè ikeb. Mà gye ’ushu bong ha ahe, ma ngyor naa genn he ’ukwo Unim nya a na be hwua amen le mà shi. Mà mbee gye ’ushu pee Unim kangg he biwom puu. ⁸ Mà baa kangg, le hè undi ù kung lingye igye anyin lam amen shi amen mà tyang biwom binunung abina ye. Kitaa lingye anyina lì yi ’idideng, li be lè he akpe bendigye angi atim a, li mbee be lè ha ikeb ibibi angi ı᷆ teng igye anyin a. Ujeso Ukristi na᷅ u᷆ ke ’itaa lingye anyina ye. ⁹ Ujeso Ukristi angwu be ma hwan he ná be hwan undigye i, na᷅ likpe Unim puu lì yi ha ahe. ¹⁰ Ufe na᷅ ù yi lè ikeb puu, u shi usu besu puu. Gbe ma gwaa ipel ha ahe, men or ma kwa lè likpan lima limen ana yilidididi. ¹¹ Agwaale angwu ma gwaa ipel ha Ujeso Ukristi na᷅ a shi Unim a fe men ūfee᷅ tyung le mà yi bema a. Ūfee᷅ angwu Unim a ma fe Ijuus leěti a ma yi lìte᷆n, ukpor men ufe, ūfee᷅ angwu Unim a fe men a be lè he abwo bendigye a ye. Ujeso Ukristi na᷅ a fe men ahe he ’unyong ahwu a kpe kung likpe līme᷅n angi litim wu lè hell. ¹² He ’unyong ahwu be kib amen he umbwo, ki ma yi nya a na bè ko le be ngi amen utung ha Ujeso Ukristi a. Nya he ’unyong ’umen ana, ki ma mbee yi nya a na bè ko le Unim a wum amen utung ha Ujeso Ukristi a, u ke men likpan lifufe, likorye ma fe lityam he ikeb Unim angwu a wum Ujeso Ukristi lè he lihwu. ¹³ Leěti men ma ma yi a ná akwom a, ma ma yi lè likpan ligyang angyell ye, likorye ma shi ’iban, ma shi bendi Unim nà Ijuus angi ı᷆ ten a ye. Ukpor Unim a tyang biban bityan puu ke li, u shi li li fel lè likpan utung ha Ujeso Ukristi. ¹⁴ Li ma mbee zī libi ha Unim likorye li ban iten ima, ukpor biban abi bi ma shi li li zī libi ha Unim ana, Unim a kpe kung ābi puu wu lè hell, a mbee lè bi puu. Ki ma yi nya a na bè ko le a maa ābi bee he ’ikpakpaa ashi Ujeso a hwō a. ¹⁵ Nyong Ujeso Ukristi a ma hwō he ’ikpakpaa, a ma hwò ikeb ibibi puu angi he ’usi, u tyung gboo ná a dyam hwò āngi puu. ¹⁶ He atan-lengi anwuna, mà bong bendi bè tye iten fe men gbe lè abi mà zī, lè abi mà ngwo ye. Mà bong bè tye iten fe men gbe lè bipam ashele he lize or, kufell or, ati uwell or ye. ¹⁷ Biwom abi ’itaa ana bì yi bitaa abi leěti bi maa tyung bendi biwom abi bı᷆ be lè he ’ushu a. Kiwom ’igyang ashi biwom bimen ana bi maa tyung ’ubwo hwaa lè shi, kì yi Ujeso Ukristi ugyang a. ¹⁸ He atan-lengi anwuna, mà bong bendi abe be kwu ’uhwo-bell ’ùsù le bè de men àshi mà shi ye. Bendi bemen ana be de le Unim a tyung ābe biwom, be mbee de men le mà keb ’uhwo-men he ’ukwo ahwu Unim a kee ye, mà fe idengell Unim. Be dyam ’uhwo-bell gbe gyong, ki shi le bè yi ’iwom ye. Be kee-kee gim kwom he igye i ufe-ufe a. ¹⁹ Be bong le be gwaa ipel ha Ujeso Ukristi angwu ù yi atie-lishi utyan ye. Ujeso umen i na᷅ u᷆ teng awu bendi abongale puu angi à yi inyiahwo ima. Bendi puu abe be gwaa ipel ha ahe, u ka ābe ikeb, u shi ābe be gwaa ipel ha bende hè be bè kaa kpè he biwom Ujeso Ukristi ná Unim a kee. Nya a na agwo undigye a gwaa ha ate-ate, na᷅ Ujeso Ukristi u᷆ gwaa bendi bema ipel ha ’uhwo-ma. ²⁰ Men-agyang ma ngye le ma hwō ipel ha Ujeso Ukristi. He ashina ikeb ibibi he igye i ì tem fa da amen ashi mà shi ye. Bwo ashin ’ì yi ná, fe ki shi ná a, ma tem fel shi likpe ná wò ko le mà so ke igye anyin a nà? Kibang a, ma᷆ so-i bong shi iten angi bendi bemen ana be᷆ fe de men? ²¹ Be fa iten da amen le mà naa ’igbe-igbe lè he biwom bisuso, ma tyua bisuso abwo ye, ma tyua biwom abina he ungwu ye. ²² Iten angi ’itaa ana ì yi gbe lè biwom abi bi ban nya a na bendi be᷆ shi ’iwom lè bi; bendigye na᷅ be fe iten imen i, be kung āngi hwua bendi. ²³ Kì yi bendi nya a na iten imen i i ba lè he lishi abyele a, likorye i kwa bendi he ikeb le bè fe biwom abi befe-gyang be᷆ fe, bê keb ’uhwo-bell, be ke inyiahwo ibell ’ingie, ukpor iten imen i ì yi ’idideng zii; ì yi lè ikeb le i kpell undi hè bigyor agwo bì kpe-e ityuu ye ye.

¹ Men ma ngye le men abe ma gwaa ipel ha Ujeso Ukristi, Unim a wum amen lè he lihwu utung ha ahe. He ashina mà kung àshì āme᷅n ndor he biwom abi he lifung-atabe. Há na᷅ Ujeso Ukristi ù yi, ù yi kwu he ’ubwo lizen Unim. ² Mà gye ’ushu gim gbe lè biwom abi he lifung-atabe hwan, ma kung igim īme᷅n ndor he biwom abi he igye i a ye. ³ Bwo likpe litim līme᷅n li mbee, likpan līme᷅n angi lifufe lì yi ndyell he ’ubwo Ujeso Ukristi he ’ipi Unim ù yi. Ujeso Ukristi u kam āngi ndor amen há he ’ipi undi u᷆ nde ngi ye. ⁴ Ujeso Ukristi na᷅ ù yi likpan līme᷅n ligyang angyell. He ’unyong ahwu u᷆ be tem be, men or ma ba fel utung ha ahe he ifem ima. ⁵ Bwo likpan līme᷅n lì yi gwaa ipel ha Ujeso há he lifung-atabe a, mà ndè le ma kung abwo āme᷅n lè he ’iwom ’iyang-yang ashi ’ì yi gbe lè likpe litim līme᷅n he igye i. Mà kung ābi a ná biwom abi bi hwō mà, bì tem yi lè ikeb he likpan līme᷅n ye gbangg a. Mà tem tan akpela ye, mà kung abwo āme᷅n lè he ’ibibi ’iyang-yang. Mà bong bigyor agwo bì kpe men ityuu ye; mà kwu lè ’igyor ’ibibi ’iyang-yang ye. Mà bell biwom bendi ye, likorye gbe mà yi lè ’igyor biwom bendi, hà biwom bimen ana bi dyam amen hwò Unim. ⁶ Bibibi abi ’itaa ana na᷅ bı᷆ shi Unim u᷆ kung ’ingie ke bendi abe be᷆ fe-e ye. ⁷ Leěti men or ma maa sha bitaa akpe abina, bitaa bigyor abina bi kpe men ityuu. ⁸ Ukpor ’anaa-anaa i bwo men ma fel lè likpan lifufe, mà ndè le ma kung abwo āme᷅n lè he bibibi abin puu. Mà tem ngywo or, ngwu mà gbel ’agbugbel ye; mà shi ìtīm ibibi fe bende ye; mà kong bia bende ye; ma bun ikorli ibibi ye. ⁹ Mà bè uman de bende ye, likorye ma kung abwo āme᷅n lè he likpe litim angi li maa shi amen ma᷆ shi bibibi. ¹⁰ Ukpor Unim a fel shi amen ma tem fel befufe. Unim angwu a shi amen ma fel befufe, u ngyor lè men he abweeale kpamm le hè men mà fel ná ufe-gyang, hè men mà ngye-e dangg. ¹¹ Bwo ma fel bendi befufe, kì tem yi lè atyetye he ’udyan ’ūme᷅n ye. Abe bè yi Ijuus or, abe bè yi Ijuus a ye or, kì tem yi lè atyetye ye. Undi ù fel ten or, ù ten ye or, kì tem yi lè atyetye ye. Begaandi abe be buu àshì or, abe bè so àshì kpi-kpi or, kì tem yi lè atyetye ye. Ifee or, bebwaa or, kì tem yi lè atyetye ye. Bendi puu be fel bizang, likorye Ujeso Ukristi a dyam hwò biwom puu, u shi ipel ha bendi puu abe be gwaa ipel ha ahe. ¹² Mà well le Unim a waa kung amen le mà kwu bendi bema abe bè yi-e he lityam-lityam a. He atan-lengi anwun mà shi likpe angi li keè le bendi bema bè shi. Mà ngye igben bende, ma shi ’inunung ha bende, ma keb ’uhwo-men, ma kwu mbiloo, ma mbee kwu lè ’uhwo ambwele ha bende, ¹³ mà gbel sha-sha fe bende ye. Gbe undi a shi ban unde-ma or, ù tyang ke-e. Atyetyan Unim a tyang biban abi men ma shi fe-e ke men, ki ngbebb le men or mà tyang ke bende. ¹⁴ Kiwom ashi ’i dyam hwò puu ’ì yi le, kì nyin amen lè bende, likorye benyin be gwaa biwom puu dell-dell ná Unim a kee. ¹⁵ Ikwun angi ı᷆ be lè ha Ujeso Ukristi ì teng amen he ’iwom ’iyang-yang ashi ma᷆ shi, likorye Unim a ko amen le mà be kwu ūbībī ken he ikwun angi ’itaa ana a. Mà pee he he ’unyong ’uyang-yang. ¹⁶ Mà shi ugim gbe lè igie Ujeso Ukristi mbee ’unyong puu likorye i ngbebb ’indee-indee. Mà hwua bende, ma ke bende utebb gbe he lishi abyele angi Unim a ke men. Mà gyam agyam atyetye-atyetye pee Unim. Mà mbee pee he lè agyam angi Ukatia Kunyong uma u᷆ ke men. Nya a na ma᷆ gyam agyam ipee, mà pee he lè àtyám āme᷅n. ¹⁷ Kiwom ’iyang-yang ashi ma᷆ shi, lè igie iyang-yang angi ma᷆ kong, mà shi puu he ifem Atyetyan Ujeso Ukristi, mà mbee pee Unim Atyetyan gbe ha ahe. ¹⁸ Men bengye libee, mi da amen le ungye uyang-yang ù keb ’uhwo-ma ke ukyema ná ’ì yi le bendi abe bè yi ke Ujeso Ukristi bè shi. ¹⁹ Men bekyebb bengye, kì nyin amen lè bengye-men, kì tor amen lè bengye-men ye. ²⁰ Men inwaabwan, mà fe betyamen lè bendamen he ’iwom ’iyang-yang, likorye ki ngbebb le bebwani abe be᷆ fe Ujeso Ukristi bè shi ’itaa ana. ²¹ Men betyam bebwaa, mà gbel ’agbugbel fe bebwaa-men ye, teng be wee abwo. ²² Men ifee, betyamen abe mà yi he ’ubwo ’ubell he igye anyin, mà ke be ife he ’iwom ’iyang-yang. Mà kee-kee ke be ife nyong be᷆ ndè men lè ashi ufe-ufe a ye. Gbe ma shi ná a, hà mà yi ná bendi abe be᷆ kee ipee bendigye a. Ashi ’i ngbebb ’ì yi le mà shi betyamen aki lityam ken ná ’ì yi le bendi Unim bè shi. ²³ Aki ayang-yang angi be ke men le mà shi, mà shi āngi lityam ken, likorye ma kee-kee sha āngi ka bendigye befe-befe a ye, ma sha āngi ka Atyetyan Ujeso Ukristi or titi. ²⁴ Atyetyan Ujeso Ukristi na᷅ ù yi Atyamen. Men ma ngye le ufe na᷅ u᷆ be ke men ’uke he aki angi ma᷆ shi. Kuke ’umen ana na᷅ ’ù yi biwom puu abi a kam ndor bendi bema he lifung-atabe. ²⁵ Bendi abe be᷆ shi bibibi or, u ba ka ābe ’ingie he ’ibibi ashi be᷆ shi, u shell ’ushu undi ye.

¹ Men abe bendi bè yi he ’ubwo ’ūme᷅n or titi, mà ndè le ma shi ’inunung ha abe, mà shi ābe ngbebb-ngbebb. Mà well le men or mà yi he ’ubwo Atyamen angwu ù yi he lifung-atabe. ² Mà shī tyang abwo lè akongale ha Unim ye. Nya a na ma᷆ kong ha Unim, kì ngie amen ye, ma mbee pee Unim he ’iwom ’iyang-yang. ³ Kunyong ’uyang-yang ma᷆ kong ha Unim, mà kong ha ahe le ù kpell li, ma bii he le ù buu li ’ukwo lî bun ’isom ’inunung ashi ’undyell gbe lè Ujeso Ukristi ashi Unim a tyung li, de bendi. Men ma ngye le mì yi he igaadye i he ’imen ashin a. ⁴ Mà bii Unim le ù ke-m ikeb mî ndè le mi bun ’isom ’inunung ’i nung ná ’ì yi le hang mi bun āshi. ⁵ Mà kwu lè lishi abyele kangg hè men mà tyung likpe linunung ha bendi abe be bong ha Ujeso Ukristi ye; libwo liyang-yang angi ma᷆ ndè mà ban ’unyong ye, mà shi ’inunung ha abe. ⁶ Igie iyang-yang angi ı᷆ be lè he ungwu ūme᷅n, ì kwu benyin-benyin. Mà mbee ngye ná mà fan ’ibibi undi uyang-yang he ’ukwo ’ununung. ⁷ Utikikes, angwu ù yi unwandatyan lityam he likong Unim, u ba da amen biwom puu gba lè mi. Bel lè he li gwu abwo fe he ’iteng ken he ashele aki Atyetyan Ujeso Ukristi, u shi aki amen i lityam ken. ⁸ Mi som he le û be de men gbe lè bel, u mbee fe men ingie. ⁹ Undesimes or titi u ba utung ha ahe, ufe ù yi ’ubong ’ūme᷅n a. Ufe or ù yi unwandatyan angwu ’i nyin li lè he a, u fa Ujeso Ukristi lityam ken. Befe a puu befe be ba da amen ’itaa ’iwom ’iyang-yang ’ı᷆ gye ’ushu hen. ¹⁰ Alistakes angwu ù yi ha ami hen he igaadye, a de le mì kong lè men. Umak or titi a de le mì kong lè men. Ufe lè Ubanabas bè yi bebwaa bebwanam bende a. Mi ke men utebb gbe lè he mà; mi ma de men le gbe a be ha amen há, mà shi-e ngbebb-ngbebb. ¹¹ Ujoshua angwu be᷆ mbee ko le Ujestes a de le mì kong lè men. Bendi abe bekie ana befe-befe na᷅ bè yi bendi Ijuus abe be᷆ shi aki utung ha ami he adele bendi gbe lè Kusu Unim. Be kpell mi kangg. ¹² Ipafras or titi a de le mì kong lè men, ù yi ’ubong ’ūme᷅n a; ufe or u sha aki Ujeso Ukristi. U kong ha Unim mbee ’unyong lè lityam lima puu le Unim ù shi amen mà tem kwu ná inwaabwan a he likong Unim ye, hè men mà ngye àshi ’i ngbebb he, ma mbee ke-e ife he biwom puu. ¹³ Mi-gyang mi nde-e lè ashi agi ná u᷆ kpe ’ingie shi aki kangg he-e ù kpell amen abe he Ukolorsi, lè abe he Uleyodisia, lè abe he Uhirapelis. ¹⁴ Uluk angwu ù yi undi-usi angwu ’i nyin li lè he, lè Udimas or titi be kong lè men. ¹⁵ Mà kong li bel lè bebuye bendi Unim abe he Uleyodisia, lè Unimfa, lè bendi Unim abe be᷆ kpee fe Unim ha ahe ushom kpam-kpam. ¹⁶ Mà ndè le ma bo ’ushia ahwun he liwu līme᷅n he ’utyung undi uyang-yang. Gbe ma bo āhwu mà, ma hà som āhwu ke liwu bendi abongale angi he Uleyodisia hè be befe or titi bè bo āhwu. Kushia ’ubell, befe or be ba som ka amen, mà ndè le ma bo āhwu he atyung bendi puu. ¹⁷ Mà de Akipes le mi de le ù ndè le a shi aki angi Atyetyan Ujeso Ukristi a ke-e, ù shi āngi puu à kwu yilididi. ¹⁸ Igie angi mi ndo kong umbee-likel i, mi-gyang na᷅ mı᷆ kung ’ubwo ’ugi fee āngi. Mi fee le: Mi Uporl, mi kong lè men. Mà well le mì yi he igaadye. Unim ù hā ke men ’ukwun.