Acts

Acts

¹ Utiafilus ugi: He ukpi-ikwu ’ushia ahwu mi ma fee-a, mi ma da-a gbe lè biwom abi Ujeso a ma shi lè abi a ma hwua bendi, kung lè he ’unyong ahwu a ma kpi aki ama ² kpamm lè kwom he liti angi a ma gye he ’usi lifung-atabe. Bebwaa-isom bema abe a waa a ma nong ābe ashi bè shi, mà ukpong a ma hà gbe gye he ’usi lifung-atabe. A ma shi ná gbe he ikeb Ukatia Kunyong Unim. ³ He ’unyong ahwu a ma wum lè he lihwu a ma kwu hen he igye ati asi afee. Há he ’unyong ’umen ana a maa fem he liwu libell he akwo atyetye-atyetye mbee ’unyong kpamm hè ’ì tyung ābe le ù yi uwum ’igyang a. Be maa nda he, u kong ha abe gbe lè Kusu Unim. ⁴ He ’unyong ahwu Ujeso a ma yi utung ha abe há, a ma de be le: "Mà gbe lè he Ujeruselem ye kpamm Atyagi Unim u gbe ke men ’uke ahwu a ma kyebb le u ba ka amen. Mi de men gbe lè hwu he ’unyong ahwu mi de le, ⁵ Ujon ufe a maa kib bendi he umbwo a, ukpor he ati amen i Unim u ba kib amen he Ukatia Kunyong uma." ⁶ He ’unyong ahwu be ma mbee kpee ukem, be bii Ujeso le: "Atyetyan, wo ndo sha bendi Izwell bè tem fel lè ’uhwo-bell ’anaa-anaa i a?" ⁷ Ujeso a kung fan ābe le: "Atyagi ugyang na᷅ ù yi lè ikeb le u ndor ’unyong ahwu biwom bì shi. Kì yi kpe-kpe le mà ngye ’unyong ahwu há ye. ⁸ Ukpor mà ngye le ma ba kpa ikeb he ’unyong ahwu UkatiaKunyong Unim u᷆ be hwaa lè men. Ma ba bun da bendi gba lè mi he Ujeruselem lè Ujudia lè Usameria lè abong angi a teng iteng puu." ⁹ A kong ashin kong-kong, a kung gbe ndo he lifung-atabe.Be nde-e kpamm a gbe lè nim àshì fe he bibu. ¹⁰ Nya a na be maa so nde àshì gye he ’usi, bendi befee abe be ma shī aliga afung-afung be be imbul-imbul, be naa ha abe nya. ¹¹ Be de bebwaa-isom Ujeso le: "Men bendi Ugalili, mà ngyor naa nyin nde àshì gye he lifung-atabe ye. Ujeso umen angwu ma nde-e u᷆ gye he lifung-atabe nyin, u ba tem ba nya a na ma nde-e u᷆ gye he lifung-atabe ana." ¹² Kung lè há ukwell angwu be᷆ ko le Olif gye he Ujeruselem, ki maa mbee ’igem ulamba. Bebwaa-isom Ujeso bekung tem lè há ukwell gye he Ujeruselem. ¹³ Be lè wu he Ujeruselem lè kwu he ushom ’usi he ’ipi be maa ndē. Bendi aben na᷅ be ma yi há: Ipita lè Ujon lè Ujems lè Andru lè Ufilip lè Utormas lè Ubatilomi lè Umatyuo lè Ujems angwu a ma yi unwaa Alfiyes lè Usaimun angwu ù yi he liwu Ijuus angi li kee le be kwa lè ’uhwo-bell, lè Ujudas, unwaa Ujems. ¹⁴ Befe puu be maa gbong liwu lè ugim ken kong ha Unim mbee ’unyong kpamm. Bengingye besuso lè Umeri, anam Ujeso lè bebwende be ma gbong utung ha abe. ¹⁵ He inwaa ati zangg bendi abongale abe be ma mbee bendi asi adyong-ken, be mbee lè kpee. Ipita a kung bo ’inaa, keb akongale ha abe. ¹⁶ A de le: "Bebuye, ashi be ma fee leěti le UkatiaKunyong Unim a ma kong gbe ha Udebid gbe lè Ujudas, kì yi kpe-kpe le ’ì shi. Mà na Ujudas a ma yi he liwu lityan or, le bwo Ujeso a ma waa he le ù shi aki angi lı᷆ shi or, a ma teng bendi abe be kwu Ujeso." ( ¹⁸ Úndē angwu a ma kpe lè he ’ibibi ashi a ma shi, a kung he ndyebb itang. Nya he itang imen ana na᷅ a ma mbu lè he ’usi be tim lishi he itang, u paa ìfùng wu he igye. ¹⁹ Bendi puu he Ujeruselem be gyo gbe lè lihwu lima. Bekung lizen kwu itang imen ana he igie ibell le Akaldama ashi ’i ze le Itang anung.) ²⁰ Ipita a gye ’ushu kong le: "Be ma fee ndor he ’ushia Usam le: ’Ushu uma u fel bishii-bishii, undi ù ndē há ye.’ Be mbee fee le: ’Undi ususo ù kpe-e lishi he aki.’ ²¹ "Kì yi le undi ù be fe utung ha abel hè li lì naa ushada gbe lè awumale Atyetyan Ujeso. Lì waa angwu há lè he liwu bendi abe be᷆ tan utung ha abel lè Ujeso mbee ’unyong kpamm, kung lè há ’unyong ahwu Ujon a ma kib bendi he umbwo kpamm be kwom he ’unyong ahwu Ujeso a gbe tyang li gye he lifung-atabe." ²³ Be kung bendi befee waa. Be waa Umatayas lè Ujosef angwu be maa ko le Ubasabas, be mbee ko he le Ujestes. ²⁴ Be hà kung kong ha Unim le: "Atyetyan, wo ngye àtyám bendi puu. He bendi befee i, tyung li undi angwu wo waa ²⁵ le ù shi aki ná unwaa-isom Ujeso angi Ujudas a tyang gbe he ’iban ’ima ndo he ’ipi u᷆ lè kpe ’ingie ashi ’ì yi ke-e." ²⁶ Be keb isasa atyele hè be bè ndè undi angwu ’ì yi le bè waa. Isasa i ma mbu ke Umatayas. A fel undi liwu bebwaa-isom abe lihwo lè he ken.

¹ He liti Kipam Upentikos bendi abongale be ma so kwu he ’iteng ken. ² Nya ’ukwo-ukwo be gyo ’ihwee ’i be lè he ’usi ná ’ufem ’ukaandi be sho há he ushom. ³ Be ndè ’iwom ná umor-inde ’i paa wu he afee ushom le undi uyang-yang a ma yi lè shi pwom ha ahe lishi. ⁴ Befe puu be ma kpe Ukatia Kunyong Unim. Be keb akongale he igie isuso nya a na Ukatia Kunyong Unim a ke be ikeb le bè kong. ⁵ Ki ma yi lè Ijuus há he Ujeruselem abe be ma be mbee lè he abong angi à yi he igye i puu. Ijuus imen i i ma yi bendi abe be᷆ fe Unim a. ⁶ He ’unyong ahwu be ma gyo ’ihwee ashin, be buu be sho há. Ki kwu ābe he ’uhwo likorye undi uyang-yang u fel gyo bendi abongale be kong igie ima. ⁷ Le bwo ’i ma kwu ābe he ’uhwo kangg, be maa fel kong ha bende le: "Bendi aben be be lè he Ugalili a. ⁸ Ná ’i shi ngwu be fel kong igie ityan a? ⁹ Bel aben li ba lè he Upatia, lè Umidia, lè Ilam, lè Umesipotemia, lè Ujudia, lè Ukapadosia, lè Upontes, lè Eshia, ¹⁰ lè Ufrigia, lè Upamfilia, lè Igyept, lè ’igie Ulibia ashi he Usarin. Bel besuso li ba lè he Urom a. ¹¹ Bel besuso lì yi Ijuus a; besuso be shi Ijuus a ye, ukpor be ndor iten Ijuus. Besuso be ba lè he Ukrit lè Arebia. Mà na or, bel puu li gyo ābe be kong igie ityan; be kong gbe lè bikwele-uhwo abi Unim a shi." ¹² Ki kwu ābe he ’uhwo, be fel tyāng ashi ’i ze. Be bii bende le: "Ashi ’imen ashin ’i ze le ana?" ¹³ Bendi besuso be fel nyan bendi abongale, be de le be bwom ’utyuo a. ¹⁴ Ipita a kung bo ’inaa he liwu bebwaa-isom Ujeso abe lihwo lè undi ken, kong ha bendi le: "Men bendi Ujudia lè bendi puu abe mà yi ndē he Ujeruselem, mà ndor ’utyung gyo mi mî de men àshi ashin ’i ze. ¹⁵ Li bwom ibwom a ná ma᷆ gim ana ye. Kì so liti ’ì go. Inde idyong-inde na᷅ i fel i. ¹⁶ Ashin na᷅ ’ì yi àshi Unim a ma kong leěti gbe ha Ujowell, unwaa angwu u᷆ tye ugie ’isom ’ima. ¹⁷ Ujowell a de le: ’Unim a de le ashi u᷆ be shi he ’unyong ahwu igye i ndo be mbee, kì yi le u ba som Ukatia Kunyong uma hwaa lè bendi puu. Bebwaa-men bengikye or, abe bengingye or, be ba kpa ’isom lè ha Unim kong; Unim u be tyung ishomate īme᷅n bifem; bekaashi bēme᷅n be be kong itam. ¹⁸ He ’unyong ’umen ana u ba som Ukatia Kunyong uma hwaa lè bengikye or, bengingye or, abe be᷆ fe-e. Be ba kpa ’isom ’ima kong. ¹⁹ U ba sha bikwele-uhwo he ’usi; u be shi bikwele-uhwo abi bı᷆ tyung ikeb ima he igye i. Anung lè ’inde lè angyu bi ba kwa bitaa hen igye. ²⁰ Libwee li ba gya ’ifufebb, kufell ’u be bung fel ná anung, mà ukpong Liti likaandi angi Atyetyan Unim u᷆ be tyung ikeb ima li hà be. ²¹ He ’unyong ’umen ana undi uyang-yang angwu a be ko he lizen Atyetyan Unim u ba kwa lè likpan ’unyong.’ ²² "Men bendi Izwell, mà dang ’utyung gyo igie anyin.Ujeso angwu Unazaret a ma yi undi angwu Unim a som a. Unim a kung tyung amen ashin gbe he bikwele-uhwo abi a ma shi gbe ha ahe. Men-agyang ma ma ngye ashin likorye ’i ma shi ha amen inyin a. ²³ Unim ugyang a ma ngye le be ba kwa Ujeso lè ka amen, ma shi bendi-iban be maa gwu-e bee he ’ikpakpaa, u bong le bè shí āshi. ²⁴ Ukpor Unim a wum he lè he lihwu. A shi-e a hwaa lè he ’utor lihwu, gbé lihwu li ma yi lè ikeb angi lı᷆ kwu-e ndor mbee ye. ²⁵ Udebid a ma kong lishi Ujeso le: ’Atyagi, mi ngye le wò yi utung ha ami mbee ’unyong. Wò yi he ’ubwo lizen ’ugi le ufung ù waa mi ye. ²⁶ Ashin ’i shi-m mi fel lè igor he lityam. Ungwu ugi u shi lè ipee. Mà na mi fel undigye a or, mi kwa lè lishi andorale, ²⁷ le wo ba tyang ’ūnyōng ’ugi le ’ù hwō ngyor he ’usu behwu, ngwu wò be tyang i-mi Unwaa-gang angwu wo waa le likwom ligi lì hwee ye. ²⁸ Wo tyung mi ’ukwo ahwu mı᷆ gbe kwu lè likpan. Wo sha-m mi shwa lè igor le bwo wò yi utung ha ami.’ ²⁹ "Bebuye, kì yi kpe-kpe le mì kong ha amen porr gbe lè Udebid angwu a ma yi atietyan. A ma hwō, be ngi. Likwun lima lì yi ha abel nyin ’unyin i or. ³⁰ A maa tya ugie ’isom Unim a, u mbee ngye a᷆shi Unim a kyebb ndor he. Unim a ma ke ùkyèbb le u ba kwa igia Udebid ken ’usu nya a na Udebid a ma yi. ³¹ Udebid a ma nde a᷆shi Unim u᷆ be shi. Kife na᷅ akung kong gbe lè awumale Ujeso Ukristi, Undi-likpan, le: ’A ma hwō ngyor he ’usu behwu ye. Inyiahwo ima or i ma hwee ye.’ ³² Bel puu li naa ushada le Unim a wum Ujeso umen i lè he lihwu. ³³ Unim a kpe-e gye he ’usi lè fem he he ’ubwo lizen ’uma. Unim u ke-e Ukatia Kunyong uma. Ashi ma nde, ma gyo ’unyin i, kì yi ’uke ahwu Unim a kyebb ahwu Ujeso a som hwaa lè bel a. ³⁴ Udebid ufe-gyang a ma gye he lifung-atabe ye. A maa kong gbe lè Ujeso, nyong a de le: ’Unim a de Atyagi le: "Be kwu ha ami ’ubwo lizen ³⁵ kpamm mi gbe tem bendi-linaa begang abee fe he itang." ’ ³⁶ "Men bendi Izwell puu, mà ngye ashin dangg le Ujeso umen angwu ma ma maa gwu bee he ’ikpakpaa i na᷅ Unim a shi-e a fel Atyetyan, u shi Ukristi." (Ukristi na᷅ Unim a kyebb le u ba som ba he igye anyin le ù kwu Undi-likpan.) ³⁷ He ’unyong ahwu bendi abena be ma gyo a᷆shi a kong, be fel lè ufung awaale kangg. Be kung bii Ipita lè bebwaa-isom Ujeso abe be teng le: "Bebuye, lì hà shi ná a?" ³⁸ Ipita a kung fan ābe le: "Undi-undi ù shi beshi he biban, u tyang ābi ashele, be kib amen he umbwo he lizen Ujeso Ukristi, hè Unim ù tyang biban ke men, mà ma kpa ’uke Unim ahwu ’ù yi Ukatia Kunyong uma. ³⁹ Unim a ma shi úkyébb umen i ke men lè bebwaa-men lè igia īme᷅n angi ı᷆ be lè há ’ushu. Atyetyan Unim a ke úkyébb umen i hwaa lè bendi puu abe u᷆ be ko le bè be hwaa lè he." ⁴⁰ Ipita a gye ’ushu kong kangg de be le, bè baa ’uhwo-bell lè he bendigye bebibi i. ⁴¹ Bendi gbamm be bong ’isom ’ima, be kib ābe he umbwo.He liti limen ana bendi abe be fel bong utung ha abe be maa mbee asi lisi ’ugbe ’adyong-ifee. ⁴² Bebwaa-isom Ujeso be maa fel hwua ābe biwom ’unyong ’uyang-yang. Be maa sha biwom utung ha bendi abongale besuso. Nyong be zī lizi abwo ipel, be bun ibred zī hè be bè well gbe lè lihwu Atyetyan Ujeso, be kong ha Unim or utung ha abe. ⁴³ Bebwaa-isom Ujeso be maa sha bikwele-uhwo gbamm abi bı᷆ tyung ikeb Unim, bi shi bendi be fel he ’ushell, be gung he ungwu. ⁴⁴ Bendi abongale puu be maa gya ’ushu sha biwom he utyang ken, be kung biwom bibell fe ukem. ⁴⁵ Be maa kung biwom bibell ndyebb za. Be kung únde umen ana kwuu hwua nya a na ’ifong undi-undi ’ì yi kwom. ⁴⁶ Liti liyang-yang be maa kpee liwu he Ushom Unim. Be tem gye he ishu bende lè bun ibred zī hè be bè well gbe lè lihwu Atyetyan Ujeso. Be zī azi lè igor lè ugim ken. ⁴⁷ Be maa pee Unim. Be shi nyin bendi puu. Mbee ati puu Atyetyan Unim a maa ba lè bendi abe u᷆ kpan lè he biban le bè fel bong utung ha abe.

¹ He liti ken Ipita befe lè Ujon be maa nda àshì gya he Ushom Unim he inde ikie lè ishu hè be bè lè kong ha Unim nya a na be shaa shi. ² Bendi besuso be kung ungikye angwu a ma hwō abee lè há lifung anam lè ndor há he ungwu likong Ushom Unim angwu be᷆ ko le Ungwu likong ’unung. Be maa kung he la ndor há liti liyang-yang he-e ù nyong únde lè ha bendi abe be᷆ gbe gye he Ushom Unim. ³ A nde Ipita befe lè Ujon be gya he afee Ushom Unim, a nyong ābe ’iwom. ⁴ Be nde-e kporr. Ipita a kung de-e le, "Nde li." ⁵ A bel àshì nde be lè lishi andorale le be ka he ’iwom. ⁶ Ipita a kung de-e le: "Mì yi lè únde ye gbangg, ukpor ashi mì yi lè shi mi kung ka-a. He lizen Ujeso Ukristi angwu Unazaret, mi da-a le wò bo ndo tan." ⁷ A kung ’ubwo kwu-e he ’ubwo lizen bo ’inaa. Nya ’ukwo-ukwo abee ama lè bityung abee bima bi fel kang-kang. ⁸ A tie bo ’inaa, u fel tan. A gbe utung ha abe gye he afee Ushom Unim, u fel geb lè he ’usi, u pee Unim. ⁹ Bendi puu be nde-e u fel tan litan, u pee Unim. ¹⁰ Be shob le undi angwu u shaa kwu he ungwu likong Ushom Unim nyong inyong a. Ki kwu ābe he ’uhwo kangg gbe lè limbee limen ana. ¹¹ Ungikye anwuna a maa fel kwa Ipita befe lè Ujon abwo. Ki kwu bendi he ’uhwo kangg, be fel buu la hwaa lè be he Ushom Unim he ’ipi be maa ko le Kigigyo Usolomon. ¹² Ipita a nde be. A bii ābe le: "Men bendi Izwell, kibang a, ’ı᷆ kwu amen he ’uhwo, ma fel ndě li ’itaa i? Ma kong le li shi ungikye anwun a tan gbe he ikeb lè ’inunung ashi ’ityan ’igyang â? Kì yi ná ye. ¹³ Unim angwu ù yi Unim Ebraham lè Azik lè Ujekob lè betietyan puu na᷅ a fem Unwaa-ma Ujeso. Má kung he ke bekaandi. Ma swan he he ashi Upalet he ’unyong ahwu Upalet a shi ugim le u tyang he abwo or. ¹⁴ Men ma mor undi ununung angwu ù yi kpa-kpa he ashi Unim. Ma de Upalet le ù waa undi-ihwu a tyang abwo. ¹⁵ Ma gwu undi angwu u᷆ ke likpan, ukpor Unim a tem lè he wum lè he lihwu. Li naa ushada ashin. ¹⁶ Ikeb lizen Ujeso lè abongale ha ahe na᷅ i shi ungikye umen i a mbee, fel kang-kang ná men puu ma nde i. ¹⁷ "Bebuye, mi ngye le men lè bekaandi bēme᷅n ma ma shi āshi le ma ngye ye a. ¹⁸ Leěti Unim a ma kong gbe ha bendi abe be᷆ tye ugie ’isom ’ima le Ukristi, Undi-likpan, u ba kpa ’ingie. A shi āshi ’i shi gbe ha amen. ¹⁹ Ma᷆ shi beshi he biban, ma tyang ābi ashele, be hwaa lè Unim he-e ù kpe kung biban bīme᷅n wu lè hell, u kwu utung ha amen he-e ù fe men ingie, u som Ujeso angwu ù yi Ukristi, Undi-likpan ùmén angwu a waa ndor ke men. ²¹ Kì yi kpe-kpe le Ujeso ù kwu he lifung-atabe kpamm ’unyong ’u gbe fel ahwu Unim ù tem lè biwom igye anyin puu shi bì fel ná bi ma yi lè he ukpi-ikwu. Ashin na᷅ Unim a ma kong gbe ha bendi abe be᷆ tye ugie ’isom ’ima leěti. ²² Umosis a ma de le: ’Atyamen Unim u ba som undi angwu u᷆ tye ugie ’isom ’ima hwaa lè men ná a som mi. U ba kwa undi ūme᷅n ugyang a. Mà dang ’utyung gyo ’iwom ’iyang-yang ashi u᷆ be de men. ²³ Kì yi le undi uyang-yang angwu u᷆ dang ’utyung gyo a᷆shi u᷆ kong ye, be ba waa he lè he liwu bendi Unim, be gwu-e.’ ²⁴ Usamuwell lè bendi abe be᷆ tye ugie ’isom Unim abe be ma pwom he puu be ma kong gbe lè ati anyin. ²⁵ Men mà yi igia bendi abe be᷆ tye ugie ’isom Unim a. He ashin, kiwom ashi Unim a ma kong ndor ha betiemen or ’ì yi ke men a. A ma kong ndor ha Ebraham le: ’Mi ba ka bendi puu he igye ’ukwun gba ha igia igang.’ ²⁶ Unim a waa Unwaa-ma som hwaa lè men a ’ushu le ù be ke men ’ukwun gbe he ashele ūme᷅n le mà bel lè he bibibi bīme᷅n."

¹ Ipita befe lè Ujon be maa so-i kong ha bendi he ’unyong ahwu bendi abe be᷆ shang Unim lè ukaandi bendi abe be᷆ kang Ushom Unim lè Isadusis be be hwaa lè be. ² Lityam li maa nyung ābe likorye bebwaa-isom Ujeso bemen befee ana be maa hwua bendi le Ujeso a tem wum lè he lihwu, ashi ’i tyung le bendi abe be hwō be ba wum. ³ Likwulukwu li ma gyebb. Be kwu ābe lè fe he igaadye taa ashi. ⁴ Bendi gbamm abe be ma gyo ’isom ’imen ana be bong. Bengikye befe-befe be maa mbee asi lisi ’ugbe lihwo lè ’ugbe afee. ⁵ Ashi a taa, besu Ijuus lè bekaandi abe he ’ubong lè bendi abe be᷆ hwua bendi Iten be gbong liwu he Ujeruselem. ⁶ Be lè kpee ha Anas angwu ù yi Usu bekaandi abe be᷆ shang Unim lè bendi ’ikwu-lihwan ’ima lè Ukayafas lè Ujon lè Alezanda. ⁷ Be kpe baà Ipita be naa ābe he ’ushu. Be bii ābe le: "Ayang a de men le mà shi ’imen ashi ma shi i? Ma shi āshi he lizen ayang a?" ⁸ Ipita angwu a ma kong gbe he ikeb Ukatia Kunyong Unim a de be le: "Bekaandi, ⁹ má bii li gba lè ’inunung ashi li shi ha uhwo-abee anwun lè ’itaa li shi-e a mbee â? ¹⁰ Gbe ná a, men lè bendi Izwell puu mà ngye le ungikye angwu ma᷆ nde-e a naa nyin a mbee gbe he ikeb Ujeso Ukristi angwu Unazaret angwu ma maa gwu bee he ’ikpakpaa, Unim a wum he lè he lihwu a. ¹¹ Ujeso na᷅ be ma fee gbe lè he le: ’Kukor ahwu men abe ma᷆ tye ushom ma swan āhwu le ’u ngbebb he ushom atyele ye, kufe na᷅ ’u tem fel kwu ushom naa genn.’ ¹² Ufe-ufe na᷅ u᷆ kee-kee kpan li. Kì nem yi lè undi ususo he igye anyin puu angwu Unim a ke le ù kpan li ye." ¹³ Bìkēm ukoto bi nde ná Ipita befe lè Ujon be kong porr faale ’ushell. Ki kwu ābe he ’uhwo kangg likorye bengye le Ipita lè Ujon be ngye ’ushia ye a. Be ndè shob le be maa tan utung ha Ujeso a. ¹⁴ Kì tem yi lè ashi be kong ye, likorye ugyang angwu a mbee ù yi naa nya. ¹⁵ Be de Ipita lè Ujon le bè gye he igye. Be keb azu ashele. ¹⁶ Be bii bende le: "Lì shi bendi aben ná a? Undi uyang-yang he Ujeruselem a ngye le befe na᷅ be shi ’ikwele-uhwo ashi ’i dyam kangg nyin. Lì hà ndo fung āshi ye. ¹⁷ Lì ngywo fe be, li tye ābe uten le bè tem kong gbe lè Ujeso ye teng bendi gbamm be gyo gba lè he." ¹⁸ Be tem lè be ko, de be le bè tem kong likong or, ngwu bè hwua bendi or he lizen Ujeso ye. ¹⁹ Ipita befe lè Ujon be kung de be le: "Men-agyang mà gim àshi ’i ngbebb he ashi Unim hwò. Lì fe amen â, hà lì fe Unim á? ²⁰ Bel lì hà ndo tyàng akongale ashi li ndè, lè ashi li gyo ye." ²¹ Bìkēm ukoto ana bi mbee kung kong ha abe linaa-linaa. Be hà tyang ābe abwo. Be ngye ’ukwo ahwu be᷆ kwu abwo ke be ’ingie ye, likorye bendi puu be maa pee Unim he ’ikwele-uhwo ashi ’i shi. ²² Ungikye umen angwu a ma mbee nyin a ma gbe gyong aze asi afee. ²³ Be tyang Ipita befe lè Ujon abwo tyang-tyang, be tem lè de bebell àshi bekaandi abe be᷆ shang Unim lè abe he’ubong be kong ha abe. ²⁴ He ’unyong ahwu bebell be gyo a᷆shi be kong, be keb akongale ha Unim he utyang ken le: "Unim Atyetyan angwu ashi lifung-atabe lè itang lè umbwo ukaandi lè bendi or, inyia or, lè biwom puu abi bì yi hen! ²⁵ Gbe ha Ukatia Kunyong Unim wo ma kong gbe ha atietyan Udebid angwu a ma yi ha awo ’ubwo le: ’Ingywo angi bendi abe bè yi Ijuus a ye be ma fel lè ngi i ma yi ’idideng; kiwom ’ibibi ashi bendi be ma tim ’i shi ’idideng. ²⁶ Besu abe he igye anyin be kam, bekaandi be gbong ukem tim ’ibibi fe Atyetyan Unim lè Ukristi, Undi-likpan uma.’ ²⁷ Kì yi ’igyang a le Uherod befe lè Upontiyes Upalet lè bendi Izwell lè abe bè yi Ijuus a ye be gbong ukem hen Ujeruselem a tim ’ibibi fe Ujeso, Unwaa-gang angwu wo waa le ù kwu Undi-likpan. ²⁸ Be gbong hè be bè shi ’iwom ashi wo-gyang wo kong ndor gbe he ugim ugang lè ikeb igang le ’ì shi. ²⁹ Atyetyan Unim, hā gyo a᷆shi be kong ha abel linaa-linaa. Lì yi ha awo ’ubwo. Shi li hè li lì bun ’isom ’igang faale ’ushell. ³⁰ Som ikeb igang angi ı᷆ mbee bendi, wò kpell li hè li lì shi bikwele-uhwo gbe he lizen Ujeso, Unwaa-gang angwu wo som be he igye anyin." ³¹ Be kong ha Unim wee puu, ushom angwu be ma be kpee a maa fel nyung. Befe puu be kpe Ukatia Kunyong Unim. Be fel bun igie Unim faale ’ushell. ³² Bendi abongale puu be ma yi ugim ken lè lityam ken. Undi ken or a maa gim le ’iwom ashi ù yi lè shi ì yi ’ima ufe-ufe a ye. Kiwom ūndi uyang-yang ’i ma fel ābe ukem. ³³ Bebwaa-isom Ujeso be gye ’ushu bun de bendi lè ikeb kangg gbe lè awumale Atyetyan Ujeso. Unim a ke be befe puu ’ukwun ’ukaandi. ³⁴ Ki ma yi lè undi há he liwu libell angwu ’i ma nem gben he ye. Undi uyang-yang angwu a ma yi lè itang or, ishom or, a maa ndyebb ābi za ba lè únde ka bebwaa-isom Ujeso. ³⁵ Be maa hwua únde umen ana ka undi-undi ná igben ima ì yi kwom. ³⁶ Ki ma yi lè ungikye ken lè he ’ikwu-lihwan Ulibai angwu be maa ko le Ujosef. Be ma hwan he he Usaipres a. Bebwaa-isom Ujeso be ma kwu-e lizen le Ubanabas ashi ’i ze le Undi angwu u᷆ fe ingie. ³⁷ Ufe or titi a ma ndyebb itang ima zi be lè únde uma ke bebwaa-isom Ujeso.

¹ Ungikye ususo angwu be maa ko le Ananayas angwu be maako ungye-ma le Usafara, ufe or titi a ma ndyebb itang ima zi. ² U waa únde ndor ’uhwo-ma kung ’igem be fe bebwaa-isom Ujeso he abwo. Ungye-ma a ma ngye gbe lè shi. ³ Ipita a bii he le: "Ananayas, ki shi ná a, wo tyang Usetan, usu bibibi, a kpe kung-a lityam, u shi-a wo bè uman de Ukatia Kunyong Unim, ki shi le wo waa ’igem únde ndor he item? ⁴ Mà ukpong wo hà ndyebb itang imen ana zi, i ma yi igang a. Ná wo ndyebb āngi zi nyin or, únde ángi ù yi ugang a. Ki shi ná a, wo gim le hang wo shi ’itaa i? Wo bè uman de bendi a ye, wo bè de Unim a." ⁵ Ananayas a gyo igie anyin gyo-gyo, a mbu hwō. Bendi puu abe be gyo a᷆shi ’i shi be fel lè ’ushell kangg. ⁶ Ishomate i be kung ’ihwom nii he gbe lè he gye he igye lè ngi. ⁷ Awa a gbe akie, ungye-ma a be. A ngye ashi ’i shi háye. ⁸ Ipita a kung bii he le: "Únde angwu men ha ukyegang ma ndyebb itang zi puu nyin a?" A bong le ufe a. ⁹ Ipita a kung de-e le: "Ki shi ná a, ngwu men ha ukyegang ma gim le hang ma lam Ukatia Kunyong Unim? Ndè, bendi abe be ngi ukyegang bè yi naa he ungwu lishi. Bendo kung-a wo or la ngya." ¹⁰ Nya ’ukwo-ukwo a mbu hwō he ’ushu Ipita. Ishomate imen ana i be nde-e a hwō; i kung he lè ngi gwaa ha ukyema. ¹¹ Liwu bendi abongale abe be ma yi há puu lè abe be teng àbe be gyo igyo or be fel lè ’ushell kangg. ¹² Bebwaa-isom Ujeso be maa sha bikwele-uhwo abi bı᷆ tyung ikeb Unim he ashi bendi. He ’unyong ’umen ana bendi abongale be maa kpee he Ushom Unim he ’ipi ashi be᷆ ko le Kigigyo Usolomon. ¹³ Bendi abe he item be maa shell ná be᷆ lè hwaa lè be, ukpor befe puu be maa pee bendi abongale. ¹⁴ Bengikye gbamm lè bengingye gbamm abe be bong ha Atyabell Ujeso be maa fel he liwu libell. ¹⁵ Kiwom ashi bebwaa-isom Ujeso be shi ’i shi bendi be fel ba lè bendi-angmam ba kie he igaa he ’ukwo le gbe Ipita a be gbe, kushun ’uma ’ufe-ufe or ’ù shī besuso hè be bè mbee. ¹⁶ Bendi gbamm be maa ba lè bendi-angmam lè abe ikeb ibibi ì yi ha abe lè he ashi ’ubong angi a ndē gwaa ha Ujeruselem. A maa mbee ābe puu. ¹⁷ Usu bekaandi abe be᷆ shang Unim lè Isadusis angi ì yi utung ha ahe be fel bung ashi ha bebwaa-isom Ujeso. Be shi ugim ashi be᷆ shi ābe. ¹⁸ Be kwu ābe lè fe he igaadye. ¹⁹ Nya ’usu ’umen ana udengell Unim a be buu àshì igaadye. U kpe kung bebwaa-isom Ujeso gye lè be he igye de be le: ²⁰ "Mà gye lè naa he Ushom Unim de bendi gbe lè likpan lifufe anyin." ²¹ Be bong. Ashi a taa-taa, be gbe gye he Ushom Unim lè hwua bendi biwom. Usu bekaandi abe be᷆ shang Unim lè bendi-utung bema be ko bìkēm ukoto liwu. Be kung idashanda som gye há he igaadye le bè lè be lè Ipita befe lè Ujon. ²² He ’unyong ahwu idashanda i nde bebwaa-isom Ujeso háye, be tem lè de bekaandi le: ²³ "Li lè wu há, li ndè be ngib àshì. Bendi puu abe be᷆ kang ungwu likong be shi há. Ukpor li buu lishi, li ndè undi ha afee ye." ²⁴ He ’unyong ahwu ukaandi bendi abe be᷆ kang Ushom Unimlè bekaandi abe be᷆ shang Unim be gyo ashin, be fel tyāng ná bebwaa-isom Ujeso be shi. ²⁵ Ungikye ususo a hà be de be le bendi abe be fe he igaadye bè yi naa he Ushom Unim, be hwua bendi. ²⁶ Ukaandi umen ana a bo lè bendi bema lè kwu bebwaa-isom Ujeso be lè be. Be kwu ābe he ikeb a ye, likorye be shell le hà bendi bè kpe bebwaa-isom Ujeso ’utyong maa akor gwu ābe or. ²⁷ Be de be le bè be naa há he ashi bikem ukoto. Usu bekaandi abe be᷆ shang Unim a bii ābe bibibi. ²⁸ A hà de be le: "Li bè tye men uten le mà tem hwua bendi he lizen ungikye anwun ye. Ma nde a᷆shi ma shi a? Ma tan lè he hwua bendi Ujeruselem puu. Ma kee le ma kung uben lihwu lima swa li bel a?" ²⁹ Ipita lè bebwaa-isom Ujeso abe be teng be kung kong le: "Kì yi kpe-kpe le lì fe Unim a, lì fe bendi a ye. ³⁰ Unim bétietyan na᷅ a wum Ujeso angwu men ma ma maa gwu bee he ’ikpakpaa. ³¹ Unim a kpe-e gye he ’usi lè fem he ha ahe ’ubwo lizen le ù kwu Ukaandi, u mbee kwu Undi-likpan, he-e ù ke bendi Izwell libwo hè be bè shi beshi he biban bibell, bel àtyám abell lè he abi, Unim u tyang ke be. ³² Bel lè Ukatia Kunyong angwu Unim u᷆ ke bendi abe be᷆ fe-e li tyung bendi le biwom abin bì yi ’igyang a." ³³ He ’unyong ahwu bìkēm ukoto bi gyo ashin, ki nyung ābe he atyam, be tim le bè gwu ābe. ³⁴ Ki ma yi lè undi ken há he liwu libell angwu be maako le Ugamaliyell. Ufe or a ma yi he likwu Iferesis. A ma yi undi angwu u᷆ hwua bendi Iten a. Bendi puu be maa ka he ife. A bo ’inaa de le, bè gye lè bebwaa-isom Ujeso he igye, be kwu há ’unyong zangg. ³⁵ A hà de liwu bikem ukoto le: "Men bendi Izwell, mà baa he ’iwom ashi ma laa shi bendi aben. ³⁶ Ítī ungikye angwu be᷆ ko le Utyudas a ma be pwom ungwu le ufe ù yi undi ukaandi a. Bendi abe be mbee asi lisi be maa fel tan utung ha ahe. Bendi-iso be ma gwu-e. Bendi-utung bema puu be ma paa wu mbee bipi. Undi a ma tem gyo gbe lè liwu limen ana ye. ³⁷ Ashin ’i shi gbe, Ujudas angwu a maa be lè he Ugalili a mbee fem he ’unyong ahwu be᷆ bo bendi. Bendi gbamm be maa fel tan utung ha ufe or. Bendi-iso be ma gwu-e ufe or. Bendi-utung bema puu be paa wu mbee bipi. ³⁸ Kanaa-anaa i mi da amen le mà shi bendi aben ’iwom ye. Gbe be᷆ shi biwom abin he ikeb undi a, liwu libell li ba paa. ³⁹ Gbe be᷆ shi ābi he ikeb Unim a, mà yi lè ikeb le ma kwom ābe ’ukwo ye. Hà ma ndo ha Unim a." Bìkēm ukoto bi bong àshi Ugamaliyell a kong. ⁴⁰ Be ko bebwaa-isom Ujeso be he afee. Be kpam ābe. Be tye be uten le bè nem kong ’iwom he lizen Ujeso ye. Be hà tyang ābe abwo. ⁴¹ Be gbe lè há he ukoto lè igor le Unim a gim le be kpè le bendi bè bia ābe he ’uhwo Ujeso. ⁴² He liti liyang-yang be maa gya ’ushu kwa he Ushom Unimlè ishaale bendi bun ’isom ’inunung le Ujeso ù yi Ukristi angwu Unim a waa le ù kwu Undi-likpan. Be mbee hwua ābe.

¹ Nya he ’unyong ’umen ahwu ’ugii bendi abe be pwom Ujeso ’u maa kaa ana, Ijuus angi ı᷆ kong igie Igrik i maa fel nem fa Ijuus angi ı᷆ kong igie ibell, Ihibru, le be nyim bengye-uhwuu bebell lizi liti liyang-yang he ’unyong ahwu be᷆ hwua azi. ² Bebwaa-isom Ujeso abe lihwo lè be befee be ko liwu bendi abongale be he ’iteng ken kung de be le: "Ki ngbebb le lì mor igie Unim abunale hè li lì fel hwua azi ye. ³ Bebuye, mà waa bendi bedyong-ifee lè he liwu līme᷅n abe ma ngye le bè yi gelalala, be shi lè Ukatia Kunyong Unim, be bi lishi, hè li lì kung aki àmén i ke be. ⁴ Bel ufe li kung ’unyong kong ha Unim, li bun igie ima." ⁵ Ugim anwun a ngbebb liwu anyina. Be waa Ustibin angwu a bong ha Ujeso kangg, u shi lè Ukatia Kunyong Unim. Be mbee waa Ufilip, lè Uprokores, lè Unikanor, lè Utimon, lè Upaminas, lè Unikolas angwu a maa be lè he Antiyok. A ma yi ugaandi angwu a bel fel undi angwu u᷆ pwom Unim nya a na Ijuus i shi. ⁶ Be be lè bendi aben hwaa lè bebwaa-isom Ujeso. Be kong ha Unim, be pwom ābe abwo. ⁷ Be ma gye ’ushu bun igie Unim mbee bipi puu. Kugii bendi abe be᷆ pwom Ujeso he Ujeruselem ’u maa go igo igo. Bendi gbamm abe be᷆ shang Unim be bong ha ’isom ashina. ⁸ Ustibin angwu Unim a ma ke-e ’ukwun lè ikeb, a maa sha bikwele-uhwo abi bı᷆ tyung ikeb Unim he liwu bendi. ⁹ Bendi besuso be ma yi kwu he ushom angwu be᷆ kwu liwu angwu be maa ko le Ushom bendi abe be fel porr. Bendi bemen i be ma yi Ijuus angi ı᷆ be lè he Usarin lè Alezandria a. Befe lè bendi Ijuus besuso abe be maa be lè he Usilisia lè Eshia be ma keb fe ifung ha Ustibin. ¹⁰ Be fung hwo-e ye, likorye Ukatia Kunyong Unim a ke-e lishi abyele. ¹¹ Be ndyebb abwo lè bendi le bè de le be gyo he a kong bia Umosis lè Unim. ¹² Ashin ’i shi bendi abe be ma yi sho há lè bekaandi abe he ’ubong lè abe be᷆ hwua bendi Iten be fel he ingywo. Be kwu-e lè ke bìkēm ukoto. ¹³ Be be lè bendi le bè be bè iman fe-e. Be de le: "Ungikye anwun u kong ban Ushom angwu li ndor ta-ta ke Unim, u kong ban Iten Umosis. ¹⁴ Li gyo he a de le, Ujeso umen angwu Unazaret i u ba tya Ushom Unim utyan wa he itang, u gie li akpe angi Umosis a hwua li." ¹⁵ Bìkēm ukoto puu abi bi ma yi sho há, be nde ’ushu Ustibin ’u fel taa ná ahwu udengell Unim nà.

¹ Usu bekaandi abe be᷆ shang Unim a kung bii he le: "Be kong ’igyang â?" ² Ustibin a kung fan le: "Betyagi lè bebuye, mà dang ’utyung gyo mi. He ’unyong ahwu atietyan Ebraham a ma so ndē he Umesipotemia mà ukpong u hà lè ndē he ’ubong ahwu be᷆ ko le Uharan, Unim angwu lı᷆ fe-e a be hwaa lè he. ³ A de-e le ù bo tyang ’ikwu-lihwan ’ima lè ’ubong ’uma gye he ’ubong ahwu u᷆ lè tyung he. ⁴ Ebraham a kung bo lè he Ukaldia lè ndē he Uharan. A kwu há kpamm atyam a gbe hwō. Unim a hà de-e le ù be ndē he ’ipi men ma fel ndē ’unyin i. ⁵ Unim a ma wa gem āshi zangg or ke-e le ’ì kwu ’ima ’igyang ye. Unim a ma ke-e úkyébb le u ba kung āshi ka he. A ma mbee de-e le, kipi ’imen i ’i ba kwa ’ibell, befe lè igia ima a. He ’unyong ahwu Unim a ma ke-e úkyébb umen i a ma wa yi lè unwaa ye. ⁶ Unim a ma de-e le: ’Igia igang i ba la ndā he ’ubong bendi. Be ba fel ifee a há. Be ba kpa ’ingie aze asi lisi. ⁷ Mi ba kung ’ingie ka bendi abe be᷆ be shi igia igang lifee. Saa be hà be lè há ’ubong ’umen ana be fe-m he ’iteng ashin.’ ⁸ Unim a hà de Ebraham le ù ten bebwaa-ma abe bengikye hè ’ì tyung ’itaa ’iwom ashi a kong ndor ha abe. Ebraham a hwan Azik. A ten he he liti ledyong-ikie. Azik a ten unwaa-ma, Ujekob. Ujekob u ten bebwaa-ma lihwo lè be befee abe bè yi betietyan. ⁹ "Ujekob a kwu unwaa ken le Ujosef. Bebwanam be maa bung àshì ha ahe. Be kwu-e ndyebb zi ha bendi abe be te lè he le ù lè kwu ufee he ’ubong Igyept. Unim a ma yi utung ha ahe; ¹⁰ a fem he lè he bingie puu. Unim a shi Ujosef a shi nyin Ufero, Usu Igyept, u mbee ke Ujosef lishi abyele. Ufero a kung ’ubong Igyept puu lè ’ikwu-lihwan ’ima ke Ujosef le ù kwu ukaandi. ¹¹ "Ubwaa a ma be kwu kangg. Bendi abe he ’ubong Igyept lè abe he Ukenan be ma kpe ’ingie kangg. Betietyan be maa nda lizi za᷆ ye. ¹² He ’unyong ahwu Ujekob a gyo le lizi lì yi he Igyept, a som bebwaa-ma abe bè yi betietyan le bè lè ndyebb be lè ngi. ¹³ Be te ’ugbe ahwu lefee, Ujosef a de be le ù yi unwandabell a. U mbee shi Ufero u ngye ’ikwu-lihwan ’ima. ¹⁴ Ujosef a som ko atyam, Ujekob, lè bendi bema puu le bè be he Igyept. Puu ubell be ma yi bendi asi akie lè bendi lihwo lè be bedyong. ¹⁵ Ujekob a gye he Igyept. Nya na᷅ befe lè bebwaa-ma be ndē kpamm be gbe hwō. ¹⁶ Ki gbe ’igbe, mà ukpong bendi be hà gye lè akwom abell he Ushekem lè kie he ubung angwu Ebraham a ma ndyebb lè ha bebwaa Uhamor ndor le ù kwu likwun. ¹⁷ "He ’unyong ahwu ’i ma fel kpee-kpee le Unim u ndo sha ukyebb uma angwu a ma ke Abraham, betietyan abe bè yi he Igyept be maa fel go ’ugii kangg. ¹⁸ Kunyong ’u be fel ahwu bendi Igyept be kwu usu ususo angwu a ngye Ujosef ye. ¹⁹ A fel sha betietyan biwom beshu-beshu, u mbee ban lityam ha abe. A maa sha ābe be tyang bebwaa-bell ndor he igye hè be bè hwō. ²⁰ Nyin he ’unyong ’umen i na᷅ be ma hwan Umosis. A ngbebb ’unung kangg he ashi Unim. Bendi bema be kwob he he ushu ubell afell akie. ²¹ Be hà te lè he lè ndor he igye. Unwaa Ufero angwu ungingye a nde-e, kung he gye lè he lè kwob le a fel unwaa-ma. ²² Be hwua he biwom puu abi bendi abe be bi lishi he Igyept be᷆ ngye. A fel undi ukaandi he likong or, aki ashele or. ²³ "He ’unyong ahwu a ma fel aze asi afee, a shi ugim le u la kong lè bebwende Izwell. ²⁴ A lè ndè undi Igyept ken u ndò ha undi Izwell. A lè kpell he, kwu angwu Igyept gwu. ( ²⁵ A maa kong le bebwende be nda shob le Unim u ba som he le ù lè kpan ābe, ukpor be nde shob ye.) ²⁶ He liti angi lefee a nde bendi Izwell befee be ndò. A lè kwu ābe abwo. A de be le: ’Mà yi bebwanam bende a. Ki shi ná a, ma᷆ ndo?’ ²⁷ Angwu a maa zī libi a nyii he gye he item, bii he le: ’Ayang a ka-a ikeb le wò ndè gbe lè bel, wo maa li ushe? ²⁸ Kì yi-a le wò gwu-m ná uhwuhwo wo ma gwu angwu Igyept a?’ ²⁹ Nyong Umosis a gyo ashin, a buu gye he ’ubong Umidyan. A hwan bebwaa há befee. ³⁰ "Aze asi afee a gbe. He liti ken Umosis a ma yi he libeb gwaa ha ukwell angwu be᷆ ko le Usanai. Udengell Unim a be kong ha ahe lè he úkwán angwu ’ìndē ’i maa mor. ³¹ Umosis a nde shi, ki kwu-e he ’uhwo kangg. A die te he-e ù lè nde shi ’inunung. A gyo lingmam Atyetyan Unim lè há le: ³² ’Mì yi Unim betiegang a. Mì yi Unim Ebraham lè Azik lè Ujekob.’ Umosis a fel he ’ushell, u tung for-for. A nem kaa or le u bel àshì nda ye. ³³ Atyetyan Unim a kung de-e le: ’Waa ikwob igang lè he abee likorye wò yi naa he ashi agi, mi Unim a. ³⁴ Mi nde ’ingie ashi bendi begi be᷆ kpe he Igyept dangg. Mi gyo ’ukye ’ubell. Mi be le mî kpan ābe. Bé ’anaa-anaa i, mî som-a gye he Igyept.’ ³⁵ "Umosis umen i na᷅ bendi Izwell be ma mor he, be bii he le, ’Ayang a ka-a ikeb le wò nde gbe lè bel, wo maa li ushe?’ Ufe na᷅ Unim a ma som udengell angwu a maa kong ha ahe lè he úkwán angwu ’ìndē ’i maa mor, hwaa lè he le ù kwu usu ubell lè undi-likpan ubell. ³⁶ A ma shi bikwele-uhwo abi bı᷆ tyung ikeb Unim he Igyept lè he umbwo ukaandi angwu be᷆ ko le Umbwo Ubwaa lè he libeb aze asi afee, he ’unyong ahwu a maa be lè bendi lè he Igyept. ³⁷ Umosis umen i na᷅ a ma de bendi Izwell le: ’Unim u ba som undi angwu u᷆ tye ugie ’isom ’ima hwaa lè men ná a som mi. U ba kwa undi ūme᷅n ugyang a.’ ³⁸ Ufe na᷅ a ma yi utung ha bendi Izwell he ’ipi be ma gbong liwu he libeb. A ma yi utung ha udengell angwu a ma kong ha ahe he ukwell Usanai, u shi utung ha betietyan. A ma kpe ’isom Unim ke li, ashi ’i tyung li ná lı᷆ kpe likpan. ³⁹ "Betietyan be ma ke-e ife ye. Be bel lè ha ahe fel keē le hang be tem gye he Igyept a. ⁴⁰ He ’unyong ahwu Umosis a ma yi he ukwell ’usi be de Eron le: ’Shi li litelakpa angi lì teng li. Li ngye ashi ’i shi Umosis angwu a be lè bel lè he Igyept ye.’ ⁴¹ He ’unyong ’umen ana be shi ’atelakpa bi ’igundu, be fel shang āke. Be shi ’ipam, be gor igor he ’iwom ashi befe-gyang be shi. ⁴² Unim a bel lè ha abe, u tyang ābe le bè ndo fe ikpen angi he lifung-atabe nya a na undi angwu a maa tye ugie ’isom Unim a ma fee leěti le Unim a de le: ’Men bendi Izwell, ma maa gwa bityuale shang i-mi a he libeb aze asi afee ye. ⁴³ Ma maa so ’ubuu Umolok angwu ù yi ùnīm ūme᷅n lè ’atelakpa ake ma shi bi ukpen angwu ù yi ùnīm ūme᷅n angwu ma᷆ ko le Urefan. Ma ma shi litelakpa anyin hè men mà fe a. He atan-lengi anwun mi ba ndō amen gba gyong Ubabilon.’ " ⁴⁴ Ustibin a mbee kong gye ’ushu le: "Betietyan be ma yi lè ’ubuu ahwu be kung bihwom lè ikwob inyia shi, ahwu ’u᷆ tyung le Unim a ma yi utung ha abe há he libeb. Be ma shi āhwu nya a na Unim a ma tyung Umosis le ù shi. ⁴⁵ Aze a gbe gbamm, betietyan be kung ’ubuu ’umen i ke igia ibell. Igia ibell i kung āhwu gye lè hwu he ’unyong ahwu Ujoshua a ma teng ābe le bè be kpe itang angi Unim a ndeb lè abong angi a ma yi há, kung itang imen ana ke be. Kubuu ’umen ana ’u ma ngyor kwu há kpamm lè kwom he ’unyong ahwu Udebid a ma fel usu. ⁴⁶ Udebid a shi nyin Unim. A ma de Unim angwu ù yi Unim Ujekob le ù ke-e ikeb he-e ù tye-e ushom. ⁴⁷ Ukpor unwaa-ma Usolomon na᷅ a ma tye-e. ⁴⁸ "Unim angwu ù yi lè ikeb puu u kwa he ushom angwu undigye a tye a ye. ⁴⁹ Atyetyan Unim a kong gbe ha undi angwu u᷆ tye ugie ’isom ’ima le: ’Lifung-atabe lì yi ’idem ’usu ’igi; igye anyin i shi he ’ipi mi pwom abee agi. Kibang ’itaa ushom ashi wo᷆ be tye-m? Mi ba shwa ’unyong hung a? ⁵⁰ Mi-gyang na᷅ mi shi biwom bimen i puu ye a?’ " ⁵¹ Ustibin a gye ’ushu kong le: "Ma kpo lishi. Àtyám āme᷅n a teb; ma dang ’utyung gyo ’isom Unim ye. Mà yi nya a na betiemen a. Ma ndo ha Ukatia Kunyong Unim mbee ’unyong. ⁵² Kì yi lè undi angwu u᷆ tye ugie ’isom Unim ken or angwu betiemen be ma mor he ’ingie akele ye. Be maa gwa bendi-isom Unim angwu be ma kong leěti le Unwaa-ma ununung u ba ba. A be, ma kwu-e ndyebb zi ha bendi besuso le bè gwu-e. ⁵³ Men na᷅ ma kpe iten angi Unim a ma ke gbe ha idengell ima, ukpor ma ndor āngi ye." ⁵⁴ Bekaandi Ijuus be gyo ashin, ki nyung ābe lityam, be zī he ungwu fe-e. ⁵⁵ Ustibin angwu a ma yi lè ikeb Ukatia Kunyong Unim kangg, a kung àshì gye he lifung-atabe, a nde ’ikung-gbo Unim ’i taa, u nde Ujeso ù yi naa he ’ubwo lizen Unim. ⁵⁶ A de le: "Mi nde lifung-atabe lì yi hwuo. Unwaa Undigye ù yi naa he ’ubwo lizen Unim." ⁵⁷ - ⁵⁸ Be gyo ashin gyo-gyo, be kwom ’ihwee tem-tem-tem shī abwo he atyung. Be bo liwu-liwu kwu-e gbe lè he lifung-ushu lè maa akor gwu-e. Bendi abe be naa ushada be waa aliga abell ke ungikye angwu be᷆ ko le Usorl le ù kwu ābe. ⁵⁹ Nya a na be maa Ustibin akor, a maa kong le: "Atyagi Ujeso, kung ’ūnyōng ’ugi." ⁶⁰ A bel tim anung he itang, u kong gboo le: "Atyagi, shi bo ’iban ashin fe be ye." A hà hwō. (1) Ki nyin Usorl ná be gwu-e.

¹ Kung lè há liti limen i, liwu bendi abongale he Ujeruselem be ma kpi ’ingie akpele kangg. Bendi abongale bemen ana be ma paa wu mbee Ujudia lè Usameria puu, kee-kee teng bebwaa-isom Ujeso befe-befe. ² Bendi besuso abe be᷆ fe Unim be kung Ustibin lè ngi, be kung ki-e. ³ Usorl a maa kaa le he-e ù paa liwu bendi abongale. A maa gya mbee ishom puu la swà lè bengikye or, bengingye or, la fa he igaadye. ⁴ Bendi abongale abe be ma paa he abwo, be gye mbee bipi bun ’isom ’inunung. ⁵ Ufilip a gye he lishi Usameria, a fel bun da bendi há gba lè Ukristi, Undi-likpan angwu Unim a som be he igye anyin. ⁶ Bendi gbamm be dang ’utyung gyo a᷆shi Ufilip u᷆ bun. Befe puu be gyo he, be mbee ndè bikwele-uhwo abi a ma shi. ⁷ Ikeb ibibi i fem lè ha bendi gbamm lè ’ikukung he ungwu. Bigwun bendi or, bi mbee. ⁸ Bendi Usameria be fel lè igor kangg. ⁹ Ungikye ususo a ma yi há angwu a maa shi anong a᷆ kwu bendi Usameria he ’uhwo. Be maa ko he le Usaimun. A maa lam bendi le ufe na᷅ a mbee igye. ¹⁰ Bekaandi or, bebwan or, be maa dang ’utyung gyo he le bwo ’i gbe ’igbe ná a maa shi anong a᷆ kwu ābe he ’uhwo. Be de le: "Ikeb angi be᷆ ko le Ikeb Unim angi i dyam na᷅ i be fel undigye nyin." ¹² He ’unyong ahwu bengikye or, bengingye or, be bong àshi Ufilip a bun gbe lè ’isom ’inunung gbe lè Kusu Unim lè Ujeso Ukristi, a kib ābe he umbwo. ¹³ Usaimun ugyang or a bong. A kib he he umbwo, u ngyor kwu utung ha Ufilip. Ki maa kwa he he ’uhwo ná u᷆ ndè Ufilip u᷆ shi bikwele-uhwo. ¹⁴ Bebwaa-isom Ujeso abe bè yi he Ujeruselem be gyo le bendi Usameria be kpe ’isom ’inunung. Be kung Ipita befe lè Ujon som hwaa lè be. ¹⁵ - ¹⁶ Há he ’unyong ’umen ana Ukatia Kunyong Unim ufe a ma wa be hwaa lè bendi abongale ye. Be kee-kee kib ābe he umbwo he lizen Atyetyan Ujeso a. Ipita befe lè Ujon be lè wu há wu-wu, be kong ha Unim le ù ke bendi abongale Ukatia Kunyong uma. ¹⁷ Be pwom ābe abwo he lishi; be kpe Ukatia Kunyong Unim. ¹⁸ Usaimun a nde le be kpe Ukatia Kunyong Unim he ’unyong ahwu bebwaa-isom Ujeso be pwom ābe abwo. A lè be lè únde he-e ù ke be. ¹⁹ A de be le: "Ke-m, mi or titi, ikeb imen i hè gbe mì pwom undi uyang-yang abwo, he-e ù kpe Ukatia Kunyong Unim." ²⁰ Ipita a kung de-e le: "Linim lì kwu ke men ha únde ugang likorye wo gim le wo nya ndyebb ’uke Unim indyebb. ²¹ Wò yi lè libwo he aki atyan ye, likorye lityam ligang lì yi kpa-kpa he ashi Unim ye. ²² Bel lityam ligang lè he agimale ’ibibi ashin, wo kong ha Unim le ù tyang ugim ubibi ugang ka-a. ²³ Mi ndè lityam ligang li sho lè ashi abungale, wo shi ufee ’iban." ²⁴ Usaimun a kung de be le: "Men mà kong ha Atyamen ke-m hè biwom abi ma kong nyin, ken or ’ì shi-m ye." ²⁵ Ipita befe lè Ujon be bun ’isom Atyetyan Unim de bendi. Be hà tem gye he Ujeruselem. Be lè fel he ’ukwo, be nda àshì gya he Ujeruselem, be bel he ashi Usameria gbamm bun ’isom ’inunung da ābe. ²⁶ Udengell Unim a be de Ufilip le ù bo gbe he ’ukwo ahwu ’u᷆ be lè he Ujeruselem gye he Ugaza. (Bè nem gba he ’ukwo ’umen i ye.) ²⁷ Ufilip a kung bo ’inaa gbe ndo há. Ungikye Itiopia a ma yi undi ukaandi angwu a maa kam ungingye angwu ù yi usu Itiopia únde a. Be maa ko usu umen i le Ukandas. Ungikye ana a tem lè he Ujeruselem he ’ipi a ma lè fe Unim, u nda àshì gya he ushu. ²⁸ Nya a na a maa pwom utrok uma angwu ’ukaa-inyia ’u᷆ su lè he, a maa bo ’ushia ahwu Azaya, undi angwu a maa tye ugie ’isom Unim, a ma fee. ²⁹ Ukatia Kunyong Unim a kung de Ufilip le ù lè tan gwaa ha utrok ana. ³⁰ Ufilip a buu tel he, a gyo ungikye ana u bo ’ushia Azaya. A kung bii he le: "Ashi wo᷆ bo ana, ki nung-a há a?" ³¹ Ukaandi anwuna a kung bii he le: "Kì ha᷅ nung mi ná a, faale undi angwu u᷆ hwua mi?" A kung de Ufilip le ù mbo hwaa lè he. ³² Ashi a maa bo lè he ’ushia, ki ma yi le: "A ma yi ná ùtiā angwu be kwu le be la gwa; u shi ná unwaa utia angwu u᷆ kwu womm he ’unyong ahwu be᷆ shia he indib. A ma kong ’iwom ye. ³³ Be ma shi-e a fel he ashi ilaa-ilaa; be tang ushe uma ’inunung ye. A hwō lihwu likpo, he ashin a shi ūbū ye. Ayang ù ha᷆ be kong gbe lè he?" ³⁴ Ukaandi ana a kung bii Ufilip le Azaya a maa kong gba lè ayang á? A maa kong gba lè ’uhwo-ma â, hà a maa kong gba lè undi ususo a? ³⁵ Ufilip a keb abunale ’isom ’inunung de-e gbe lè Ujeso, kung lè há he lishi ’ushia limen angi á yii bo ana. ³⁶ Be te lè ’ukwo lè ’ukwo lè nde lishor. Ukaandi Itiopia a kung de Ufilip le: "Ndè umbwo. Kibang ’ı᷆ mbee kwuu mi ’ukwo umbwo akibale?" [ ³⁷ Ufilip a kung de-e le, gbe a bong lè lityam lima puu, u kib he he umbwo. Ufe a kung de le a bong le Ujeso Ukristi ù yi Unwaa Unim a.] ³⁸ Ukaandi ana a shi ’ukaa-inyia ahwu ’u᷆ su lè utrok ’u naa. Puu abe befee be gbe gye he afee lishor. Ufilip a lè kib he he umbwo. ³⁹ Be fem tang he igye. Ukatia Kunyong Unim a kung gbe lè Ufilip lè há. Ungikye Itiopia a nem nde-e ye. A gbe ligye igor-igor. ⁴⁰ Ufilip a nde le ù fel yi he Azotes a. A gye ’ushu bun ’isom ’inunung de bendi he ashi angi à yi há kpamm be wu he Usesaria.

¹ Usorl a maa so-i kong fa bendi abe be bong ha Atyetyan Ujeso ’ushell le u ba gwa ābe. A lè hwaa lè usu bekaandi abe be᷆ shang Unim. ² A de-e le ù fee ’ushia he-e ù lè ke bekaandi abe he ishom angi Ijuus ı᷆ kwu liwu angi he Udamasikos, gbe a ndè bendi abe be᷆ pwom ’ukwo Atyetyan Ujeso há, he-e u᷆ kwu lè ikeb kwu ābe gye lè be he Ujeruselem. ³ A lè fel he ’ukwo le u ndo wa he Udamasikos. Kikung-gbo ’i taa lè he lifung-atabe fe-e nya imbul-imbul. ⁴ A mbu shī he itang; u gyo lingmam li kong ha ahe le: "Usorl, Usorl, kibang a, wo᷆ ke-m ’ingie?" ⁵ Usorl a kung bii le: "Wo ayang a, Atyagi?" Gyo lingmam anyina le: "Mi Ujeso angwu wo᷆ ke-m ’ingie a. ⁶ Bo ’inaa gye he lifung-ushu lè kwu nyong undi angwu u᷆ be da-a ashi wò shi." ⁷ Bendi abe be ma yi utung ha ahe be fel naa kporr faale likong. Be maa gyo lingmam, ukpor be ndè undi ye. ⁸ Usorl a ma bo ’inaa. Atong-shi ama a ma yi peē, ukpor a maa nda ye. Be fel kwu-e abwo he ’ubwo, gye lè he he Udamasikos. ⁹ Ashi ama a ma hwuà ati akie. U zī lizi or, ngwu u᷆ ngwo umbwo or ye. ¹⁰ Undi abongale ususo a ma yi há he Udamasikos. Be ko he le Ananayas. Atyetyan Ujeso a hà be fem ko he le: "Ananayas." A fan he le: "Atyagi, nde-m mì yi nyin." ¹¹ Atyetyan Ujeso a de-e le: "Kam ha-a a᷆ gye he ’ukwo ahwu be᷆ ko le Kukwo ahwu ’u nong sii, wo gye he ushom Ujudas lè bii gbe lè ungikye angwu u᷆ be lè he Utaasos angwu be᷆ ko le Usorl. U kong ha ami há. ¹² Mi tyung he undi angwu be᷆ ko le Ananayas. A be pwom he abwo hè atong-shi ama à buu." ¹³ Ananayas a de-e le: "Atyagi, bendi gbamm be de-m gbe lè biwom bibibi puu abi ungikye anwun a shi ha bendi begang abe he Ujeruselem. ¹⁴ A kpe ikeb lè ha bekaandi abe be᷆ shang Unim he-e ù be kwu bendi lè he Udamasikos abe be᷆ bong ha awo." ¹⁵ Atyetyan Ujeso a de-e le: "Ndo te likorye mi waa Usorl le ù kwu-m undi angwu u᷆ ke-m ife, u de bendi abe lè he abong asuso lè besu bebell lè bendi Izwell puu gbe lè mi. ¹⁶ Mi ba tyung he ’itaa ashi u᷆ be kpe ’ingie kangg he ’uhwo ’ugi." ¹⁷ Ananayas a kung bo gye há he ushom umen ana lè pwom he abwo. U de le: "Unwandagi Usorl, Atyetyan Ujeso angwu wo ndè he ’unyong ahwu wó yii ndè àshì be nyin na᷅ a som mi. A som mi le mì be shi-a wo᷆ mbee ndè, wo mbee kpe Ukatia Kunyong Unim." ¹⁸ A kong ashin kong-kong, biwom bi bor Usorl lè ha atong-shi ná bibubor ukwan tyang he itang. U fel ndà. A bo ’inaa, be kib he he umbwo. ¹⁹ A zī lizi tem fel kang-kang. A ngyor kwu utung ha bendi abongale he Udamasikos he inwaa ati zangg. ²⁰ A gbe ligbe-ligbe gye he ishom angi Ijuus ı᷆ kwu liwu lè bun gbe lè Ujeso le ù yi Unwaa Unim a. ²¹ Bendi puu abe be gyo he, ki kwu ābe he ’uhwo kangg. Be fel bii le: "Ungikye anwun na᷅ u᷆ gwu bendi abe be bong ha Ujeso ye a? A be nyin he-e ù be kwu bitaa bendi bimen i lè ke bekaandi abe be᷆ shang Unim a ye a?" ²² Usorl u fel bun da ābe lè ikeb kangg. A tyung bendi Ijuus abe be ma yi ndē he Udamasikos le Ujeso ù yi Ukristi, Undi-likpan angwu Unim a waa som a. Be nem fan he ye, likorye biwom abi a kong gbe lè Ujeso bi hwò ābe ungwu. ²³ Ati a gbe gbamm, Ijuus i gbong ukem tim le bè gwu-e. ²⁴ A gyo a᷆shi be kam le be sha he. Be maa kang ingwu likong ’ubong, ishu or, kusu or, hè be bè kwu-e gwu. ²⁵ Ukpor he liti ken lè ’usu bendi-utung bema be hà kung he fe he ’itetel, be tye indi fe shi, be ngyu gbe lè he he uwindo uging lè ndor he itang lè he igye. ²⁶ Usorl a gye he Ujeruselem lè kaa le he-e u᷆ kwu utung ha bendi abongale abe há he Ujeruselem. Be maa shell he likorye be ma bong le ufe or ù yi undi abongale a ye. ²⁷ Ubanabas a hà kpe-e lè hwaa lè bebwaa-isom Ujeso. A bun de be ná Usorl a ndè Atyetyan Ujeso he ’unyong ahwu a maa nde àshì gye he Udamasikos, u de be le Ujeso a kong ha Usorl, u de be ná Usorl a bun ’isom faale ’ushell he lizen Ujeso he Udamasikos. ²⁸ Usorl a maa fel tan utung ha abe mbee Ujeruselem bun ’isom Unim he lizen Atyetyan Ujeso porr. ²⁹ A fung ha Ijuus angi ı᷆ kong igie Igrik. Be fel kaa hè be bè gwu-e. ³⁰ Bendi abongale be gyo ashin. Be kpe-e gye lè he he Usesaria. Be lè wu há, be de-e le u᷆ ndo gye he Utaasos. ³¹ Bendi abongale puu he Ujudia or, he Ugalili or, he Usameria or, be fel lè ikwun. Be maa go ’ugii kangg gba he ikeb Ukatia Kunyong Unim. Be maa ka Atyetyan Unim ife. ³² Ipita a maa tan mbee bipi. He ’unyong ken a hà lè kong lè bendi abe bè yi ke Unim abe he Ulida. ³³ A nde ungikye ususo há angwu be maa ko le Anias. A ma yi ’ikwu itang aze adyong-ikie likorye a ma hwō abee. ³⁴ Ipita a de-e le: "Anias, Ujeso Ukristi a mbee-a. Bo ’inaa ha-a à kung unong ugang." A kung bo ’inaa nya ’ukwo-ukwo. ³⁵ Bendi Ulida lè abe he Usheron gbamm be nde-e. Be bel àtyám ke Atyetyan Ujeso. ³⁶ Ungingye ususo angwu a bong ha Ujeso a ma yi he Ujopa. Be maa ko he le Utabita. Bendi Igrik be maa ko he le Udokas ashi ’ı᷆ ze le ùtyùng. Mbee ’unyong kpamm a maa sha binunung, u kpell bendi-likaa. ³⁷ A hà mbu lingmam hwō. Be kwob he umbwo te lè he lè kie he ushom ’usi. ³⁸ Bendi abongale abe há he Ujopa be gyo le Ipita ù yi he Ulida. (Ki ma yi lè ’igbe kung lè he Ujopa gye he Ulida ye.) Be kung som bendi befee hwaa lè he le ù te akikye. ³⁹ Ipita a kung kam gbe utung ha abe. A lè wu há wu-wu, be kpe-e gye há he ushom ’usi. Bengye-uhwuu be kaa kel-kel fe Ipita, be kya. Bè yii tyung he aliga angi Udokas a ma kpi ke be he ’unyong ahwu a ma so uwum. ⁴⁰ Ipita a ndō abe, befe puu, gye igye. A tim anung he itang kong ha Unim. A bel àshì ndè likwom, a de le: "Utabita, bo ’inaa." A buu àshì ndè Ipita, u bo bel kwu ko. ⁴¹ Ipita a lè kwu-e abwo bo ’inaa. A ko bendi abongale lè bengye-uhwuu, tyung ābe áhe uwum. ⁴² Bendi Ujopa puu be gyo gbe lè shi. Bendi gbamm be bong ha Atyetyan Ujeso. ⁴³ Ipita a ngyor kwu he Ujopa gbe ’igbe he ushom Usaimun angwu a maa kung ikwob inyia shı᷆ biwom.

¹ Ki ma yi lè ungikye ususo he Usesaria angwu be maa ko le Ukoleniyes. A ma yi ukaandi liwu ishogya angi be᷆ ko le Liwu Itali. ² A ma yi undi angwu u᷆ fe Unim a. Ufe-gyang lè ’ikwu-lihwan ’ima be maa shell Unim. A maa kpell bendi Ijuus abe be mbu likaa kangg. A maa kong ha Unim mbee ’unyong. ³ He liti ken Unim a tyung he ’iwom lè ishu he inde ikie. A ndè udengell Unim dangg, a be fem ko he le "Ukoleniyes." ⁴ Ukoleniyes a bel àshì nde-e kporr, u fel he ’ushell. A kung bii he le: "Kibang a, Atyagi?" Udengell Unim a de-e le: "Unim a gyo ná wo᷆ kong ha ahe. A ndè binunung abi wo᷆ shi; u well-a. ⁵ Ndo som bendi gye he Ujopa le bè lè ko-a ungikye ken angwu be᷆ ko le Usaimun angwu be᷆ mbee ko le Ipita. ⁶ Ù yi he ushom Usaimun angwu a ndē gwaa ha ungwu umbwo ukaandi. Ungikye umen i ù yi undi angwu u᷆ kung ikwob inyia shì biwom a." ⁷ Udengell Unim anwuna a kung gbe ligye. Ukoleniyes a kung ko bebwaa ushom bema befee lè undi ishogya angwu u᷆ fe Unim, u shi-e aki mbee ’unyong. ⁸ A de be ashi ’i shi; u som ābe gye he Ujopa. ⁹ Ashi a taa, be lè fel kpee-kpee ha Ujopa. Ipita a kung mbo gye he ushom ’usi nya lè ishu he-e ù lè kong ha Unim. ¹⁰ Itung i maa fel ndo he; u fel gim le hang a ndè lizi zī. Nya a na be maa shi lizi há abwo, Unim a tyung he ’iwom. ¹¹ A nde lifung-atabe lì yi hwuo. U nde ’iwom ’i be lè he lifung-atabe ná be᷆ kwu ’ihwom abwo he ashi ama puu ande tyang be he itang. ¹² Bishishi inyia puu angi abee ande or, angi ı᷆ su lifung he itang or, linyun or, bi ma yi he afee áshi. ¹³ A gyo lingmam li de-e le: "Ipita, bo ’inaa gwu ha-a à zī." ¹⁴ Ipita a kung de le: "Dia, Atyagi. Mi wa zī ’iwom ashi iten i kong le ’ì yi lè abel ngye ye." ¹⁵ A mbee gyo lingmam le: "Kiwom ashi Unim a de le ’ì yi gelalala, wo-ò shi ko āshi le ’iwom abel ye." ¹⁶ Kimen ashin ’i ma shi ’ugbe ’akie. Kihwom ashina ’i kung tem gye he lifung-atabe. ¹⁷ Nya a na Ipita a maa tyāng gbe lè ashi ’iwom ashi a ndè ’i ze, bendi abe Ukoleniyes a som, be bii gyo he ’ipi ushu Usaimun ù yi. Be be naa he ungwu likong. ¹⁸ Be ko bii le: "Ugaandi ù yi nyin nyin angwu be᷆ ko le Usaimun Ipita a?" ¹⁹ Ipita a maa so-i tyāng gba lè ’iwom ashi a ndè he ’unyong ahwu Ukatia Kunyong Unim a de-e le: "Ndè! Bendi bekie be shun-a há he igye. ²⁰ Ndo kam ha-a à gye há he liten. Shī kam kamm he agyele utung ha abe ye, likorye mi na᷅ mi som ābe." ²¹ Ipita a kung gye há he liten lè de be le: "Mi na᷅ ma᷆ shun. Kibang a, ma᷆ kee mi?" ²² Be kung de-e le: "Ukaandi angwu be᷆ ko le Ukoleniyes na᷅ a som li. Ù yi undi ununung a, u ke Unim ife. Ijuus puu i ka he ife. Udengell Unim a de-e le ù shī ko-a gye ha ahe ushom he-e ù gyo a᷆shi wo᷆ kong." ²³ Ipita a kpe be gye he afee ushom. Be lè ngyor há taa ashi. Ashi a taa-taa, a kam gbe utung ha abe. Bendi abongale besuso lè he Ujopa be te utung ha abe. ²⁴ Ashi a mbee taa, be wu há he Usesaria. Ukoleniyes lè bendi bema lè bedim-ma abe a ma ko, be ma yi kwu há, be nyong Ipita. ²⁵ Nya a na Ipita a maa ndo gye he afee ushom, Ukoleniyes a be kpee lè he, u bel tim anung he itang, u keb lishi he itang fe-e. ²⁶ Ipita a de-e le: "Bo ’inaa atye, mi or titi mì yi undigye a." ²⁷ Nya a na be maa gye he afee, Ipita a ma kong ha ahe. A lè nde bendi bè yi sho há kangg. ²⁸ A kung de be le: "Men-agyang ma ngye dangg le iten Ijuus i bong le undi Ijuus ù gbe kpee bendi ’ubong ’ususo ye. Ukpor Unim a tyung mi ’iwom he-m mì nem de le undi uyang-yang ù yi undi abel a ye. ²⁹ He atan-lengi anwun he ’unyong ahwu ma som ko mi, mi kam kamm he abele ye. Kanaa-anaa i, mà de-m àshi ma som ko mi." ³⁰ Ukoleniyes a kung de-e le: "Ati a gbe akie ná ’igbe ashin, mi maa kong ha Unim ná mi shaa shi lè ishu. Undi angwu a shī aliga angi a taa, a be naa mi he ’ushu nya imbul-imbul; ³¹ a de-m le: ’Ukoleniyes, Unim a gyo ná wo᷆ kong ha ahe. A ndè ’inunung ashi wo᷆ shi, u well-a. ³² Som bendi gye he Ujopa hè be bè lè ko-a ungikye angwu be᷆ ko le Usaimun Ipita. Ù yi he ushom Usaimun angwu ù yi ndē gwaa he ungwu umbwo ukaandi. Ungikye umen i u kung ikwob inyia shà biwom.’ ³³ Mi kung bendi som nya ’ukwo-ukwo. Wo or wo shi ’indee-indee ná wo bong be. Bel puu lì yi sho nyin he ashi Unim. Li nyong-a hè li lì gyo a᷆shi Atyetyan Unim a da-a le wò kong." ³⁴ Ipita a kung de be le: "Kanaa-anaa i mi ngye dangg le ’ì yi ’igyang a le bendi puu bè yi Unim nya ’itaa a ken. ³⁵ Undi uyang-yang lè he ’ubong ’uyang-yang angwu u᷆ shell Unim, u shi ’inunung na᷅ u᷆ shi nyin Unim. ³⁶ Má ngye ’isom ashi Unim a ma som hwaa lè bendi Izwell le be fel lè ikwun gbe ha Ujeso Ukristi angwu ù yi Atyam bendi puu. ³⁷ Kì yi kpe-kpe le mì de men ashi ’i ma shi kung lè he Ugalili mbee lè ’ubong Ujudia puu he ’unyong ahwu Ujon a ma kib bendi he umbwo ye. Má ngye shi. ³⁸ Ma mbee ngye gbe lè Ujeso angwu Unazaret lè ’itaa ashi Unim a ma ke-e Ukatia Kunyong uma lè ikeb. Le bwo Unim a ma yi utung ha ahe, a maa tan mbee bipi sha binunung, u mbee bendi abe bè yi he abwo usu bibibi. ³⁹ Bel li nde biwom abi a maa shi he ’igie Ijuus lè Ujeruselem hè li lì bun de men. Be ma maa gwu-e bee he ’ikpakpaa. ⁴⁰ Unim a ma wum he lè he lihwu he liti lekie, u shi-e u fem hè bendi bè nde-e. ⁴¹ Bendi puu na᷅ be ma nde-e ye. Bel abe Unim a waa le lì bun gbe lè he befe-befe na᷅ li ma nde-e. Li ma zī, li ngwo utung ha ahe he ’unyong ahwu a ma wum lè he lihwu. ⁴² A de li le lì bun ’isom ’inunung de bendi, li mbee de be le ufe na᷅ Unim a waa le ù tang ushe bendi bewum lè abe be hwō. ⁴³ Bendi abe be᷆ tye ugie ’isom Unim puu be kong gbe lè he leěti le undi uyang-yang angwu a bong ha ahe, Unim u tyang biban bima ka he gbe he ikeb lizen lima." ⁴⁴ Nya a na Ipita a maa so-i kong ashin, Ukatia Kunyong Unim a be hwaa lè bendi abe be maa gyo ’isom ’imen i. ⁴⁵ Bendi Ijuus abe be ma yi bendi abongale abe be be utung ha Ipita, ki kwu ābe he ’uhwo ná Unim a ke bendi abe bè yi Ijuus a ye or ’uke ’uma ahwu Ukatia Kunyong uma. ⁴⁶ Be gyo ābe be kong igie angi be hwua āngī ye, be gyo ābe be pee Unim angwu a dyam. Ipita a kung de be le: ⁴⁷ "Bendi aben be kpe Ukatia Kunyong Unim a ná li ma kpe a. Undi u nya mbee kwuu ābe ’ukwo umbwo akibale a?" ⁴⁸ A kung de le bè kib ābe he umbwo he lizen Ujeso Ukristi. Be hà de-e le ù kwu ha abe há he inwaa ati zangg.

¹ Bebwaa-isom Ujeso lè bendi abongale puu abe he Ujudia be gyo le bendi abe bè yi Ijuus a ye or be gyo igie Unim, be kpe ngi. ² Ipita a gye he Ujeruselem. Bendi Ijuus abe be᷆ gim le ’ì yi kpe-kpe le bendi abe bè yi Ijuus a ye bè ten, be fel ben he le, ³ a gye he ushom bendi abe bè yi bididim, u zī lizi or utung ha abe. ⁴ Ipita a kung bun biwom puu abi bi shi kung lè há ukpi-ikwu de be. ⁵ A kong le: "He liti ken mi maa kong ha Unim he Ujopa. Unim a tyung mi ’iwom ’isuso ná ’ihwom ’i be lè he lifung-atabe ashi be kwu abwo he ashi ama puu ande be fel ha ami nyin. ⁶ Mi shun àshì há he afee. Mi nde bityuale lè inyia libeb lè angi ı᷆ su lifung he itang lè linyun. ⁷ Mi kung gyo lingmam li kong ha ami le: ’Ipita, bo ’inaa gwu ha-a à zī.’ ⁸ Mi-i kung kong le: ’Dia, Atyagi. Kiwom ashi iten ityan i kong le ’ì yi lè abel ’i wa gbe ha ami ungwu ngye ye.’ ⁹ Mi mbee gyo lingmam lè he lifung-atabe le: ’Kiwom ashi Unim a de le ’ì yi gelalala, wo-ò shi ko āshi le ’iwom abel ye.’ ¹⁰ Kimen ashin ’i ma shi ’ugbe ’akie. Biwom abin puu bi kung tem gye he lifung-atabe. ¹¹ He ’unyong ’umen ana bendi bekie abe be ma som hwaa lè mi lè he Usesaria, be kung fel há he ’ipi mi ma yi. ¹² Ukatia Kunyong Unim a kung de-m le mì te utung ha abe faale ungwu atimale. Bebuye abe bedyong-ken nyin or be gye há he Usesaria utung ha ami. Bel puu li lè wu he ushu ungikye umen ana. ¹³ A de li ná a ndè udengell Unim a be naa ha ahe ushom de-e le: ’Som bendi gye he Ujopa lè ko ungikye angwu be᷆ ko le Usaimun Ipita. ¹⁴ U ba da-a ná men lè bendi begang mà shi hè men mà kwu lè likpan ’unyong.’ ¹⁵ Nya a na mi maa kong ha abe, Ukatia Kunyong Unim a be hwaa lè be ná a ma be hwaa lè bel he ukpi-ikwu. ¹⁶ Mi kung well le Atyetyan Ujeso a ma de le: ’Ujon a maa kib bendi he umbwo a, ukpor Unim u ba kib amen he Ukatia Kunyong uma.’ ¹⁷ Ki nung nwongg le Unim a ke bendi abe bè yi Ijuus a ye or ’itaa ’uke ahwu a ma ke li he ’unyong ahwu li bong ha Atyetyan Ujeso Ukristi. Ayang ù hà yi-m mi angwu mı᷆ kaa le mi kwom Unim ’ukwo he ashi a kee le u sha?" ¹⁸ Be gyo ashin gyo-gyo, be tyǎng he abenale. Be fel pee Unim da le: "Unim a ke bendi abe bè yi Ijuus a ye libwo le bè bel àtyám lè he biban hè be bè kwu lè likpan ’unyong." ¹⁹ Bendi abongale be ma paa wu mbee bipi gbe he ’ingie ashi ’i ma be he ’unyong ahwu be ma gwu Ustibin. Besuso be ma gye he Ufenishia, besuso be gye he Usaipres, besuso be gye he Antiyok. Be maa bun igie Unim da Ijuus ife-ife a. ²⁰ Bendi abongale besuso abe be maa be lè he Usaipres lè abe be᷆ be lè he Usarin be ma gye he Antiyok lè bun ’isom ’inunung gbe lè Atyetyan Ujeso de bendi abe bè yi Ijuus a ye or titi. ²¹ Ikeb Atyetyan Ujeso i ma yi ha abe. Bendi gbamm be bong, be bel àtyám ke Atyetyan Ujeso. ²² Liwu bendi abongale angi lì yi he Ujeruselem li gyo ashin, be kung Ubanabas som gye há he Antiyok. ²³ A lè wu há, a nde ná Unim a ke be ’ukwun, a fel lè igor. A fe be ingie le bè kwu bendi abe be kung ’uhwo-bell ke Atyetyan Ujeso lè àtyám abell puu. ²⁴ Ubanabas a ma yi undi ununung angwu a ma yi lè ikeb Ukatia Kunyong Unim kangg, u shi lè abongale. Bendi gbamm be kung ’uhwo-bell fe Atyetyan Ujeso he abwo. ²⁵ Ubanabas a hà gbe ndo he Utaasos le u la shun Usorl. ²⁶ A lè nde-e; a kpe-e be lè he he Antiyok. Puu abe befee be kwu há he liwu bendi abongale lize libo hwua bendi gbamm. Nyin he Antiyok i na᷅ be kpi ’ikwu ko bendi abongale le bendi Ukristi. ²⁷ Nya he ’unyong ’umen ana bendi abe be᷆ tye ugie ’isom Unim be bo lè he Ujeruselem gye he Antiyok. ²⁸ Undi ken lè he liwu libell angwu be maa ko le Agabes a bo ’inaa kung kong gbe he ikeb Ukatia Kunyong Unim le baale ubwaa ubibi u᷆ kwu bendi hen igye puu. (Ubwaa umen i a kwu he ’unyong Ukeladiyes a ma yi Usu ukaandi he Urom.) ²⁹ Bendi abongale be tim le undi-undi ù ke ’iwom ashi ù yi lè shi hè be bè kpe fe ukem lè ke bebell abe he Ujudia. ³⁰ Be dye puu, be hà kung som Ubanabas befe lè Usorl le bè lè ke bekaandi abe be᷆ nde gbe lè liwu bendi abongale he Ujudia.

¹ Nyin he ’unyong ’umen i Usu Uherod a maa fel teb lè bendi abongale besuso. ² A kong, be kung ’ashwia gwu Ujems, unwanam Ujon. ³ A nde le ’i nyin Ijuus. A mbee kong, be kwu Ipita. (Ashin ’i shi he ’unyong ahwu be maa shi ’ipam ashi be᷆ zī ibred angi i mbwee ye a.) ⁴ Be kwu Ipita lè fe he igaadye. Be ma som ishogya lihwo lè ngi idyong-ken le ì lè kang he he bēndè-bēndè. Uherod a gim le gbe Kipam Agbele-gyong ’i mbee, u ba lè he ka Ijuus. ⁵ Nya he ’unyong ahwu Ipita a ma yi he igaadye, bendi abongale be maa kong ha Unim kangg ka he. ⁶ He ’usu ahwu ’u ma yi le ashi a taa Uherod u kung he ka bendi, Ipita a ma mbu ’unde ndē he ’udyan ishogya ifee. Be ma fe-e ashishilika afee; ishogya i shì he ungwu likong i kang. ⁷ Kikung-gbo ’i kung taa há he ’ipo igaadye. Udengell Atyetyan Unim a fem há imbul-imbul. A yii Ipita ’ubwo he ’igbong, a wum. A kung de-e le: "Bo ’inaa akikye." Ashishilika a wung he lè he abwo. ⁸ Udengell a kung de-e le: "Kung ukwob ugang bua, wo kung ikwob abee fe." A kung fe. A mbee de-e le ù kung aliga shī, pwom he. ⁹ Ipita a gbe lè há igaadye utung ha udengell. A ngye le ’ì yi ’igyang a ye. A maa kong le itam na᷅ ı᷆ shi-e. ¹⁰ Be gbe ukpi-ikwu likwu ishogya angi ı᷆ kang igaadye; be gbe ángi lefee. He umbee-likel be be fel he ungwu likong angwu be᷆ gbe gye he lifung-ushu. Be shì lishi ’índe᷆ a shī há. Lishi limen ana li buu lè ’uhwo-ngi; be gbe tang he igye. Be lè fel he ’ukwo fel-fel, udengell ana a nyong gbe tyang Ipita. ¹¹ Ki kung buu Ipita nwongg, a hà ngye ’iwom ashi ’i shi. A kung kong le: "Kanaa-anaa i mi ngye dangg le Atyagi Unim na᷅ a som udengell uma le ù be kpan mi lè he abwo Uherod, u kpan mi lè he biwom abi Ijuus i kam le i sha-m." ¹² Nya a na a gim gbe lè ashin, a gbe ndo he ushu Umeri angwu ù yi anam Ujon Umak. Bendi abongale gbamm be ma yi sho há; be kong ha Unim. ¹³ Ipita a be naa he ungwu likong kem abwo he lishi. Unwaa ushom angwu be maa ko le Uroda a be he-e ù ndè angwu há. ¹⁴ A shob igie Ipita; a fel lè igor; a tem buu lishi or ye. A buu tem lè de abe be teng le Ipita ù yi naa he ungwu likong. ¹⁵ Be de-e le: "Wo ngyor lityuo." A de be le u kong ’igyang a. Gyo ābe le: "Ufe a ye, udengell Unim angwu u᷆ ndè gbe lè he a." ¹⁶ Ipita ù yii kem abwo he lishi. Be hà buu lishi nde-e; ki kwu ābe he ’uhwo kangg. ¹⁷ A yor abwo de be le bè kwun atyung, u de be ná Atyetyan Unim a fem he lè he igaadye. A de be le bè lè de Ujems lè bendi abongale abe be teng or. A hà gbe lè há ndo he ’iteng ’isuso. ¹⁸ Ashi a taa, ishogya angi ı᷆ kang igaadye i maa fel waa ufung, i tyāng ashi ’i shi. Be bii le: "Ipita a shi ná a?" ¹⁹ Uherod a de ishogya le ì lè shun he. I lè shun he, ukpor i nde-e ye. Uherod a de le bè bii ishogya angi ı᷆ kang igaadye bibibi. A hà de be le bè gwu ishogya imen i. Uherod a gbe lè he Ujudia lè kwu he Usesaria. ²⁰ He ’unyong ken Uherod a ma ngywo fe bendi Utaya lè abe Usaidon. Be hà te liwu-liwu le be la hwaa lè he. Be kpi ’ikwu kpe kung Ublastus hwaa lè ’uhwo-bell. Ublastus umen i na᷅ a maa ndè gbe lè ushom usu. Bendi abena be hà lè hwaa lè Usu Uherod le bè shi ikwun likorye ’ubong ’ubell ’u kpa lizi lè he ’ubong ’uma a. ²¹ He liti angi be ma ndor, Uherod a kung bigbor usu bima shī lè kwu he ’idem ’usu keb akongale ha bendi. ²² Be fel gaa kong le: "Undigye na᷅ u᷆ kong ye, Unim a." ²³ Udengell Atyetyan Unim a shi Uherod a mbu lingmam nya ’ukwo-ukwo, likorye a ke Unim ife ye. Īnyiǎ i zī gwu-e. ²⁴ Bendi abongale be gye ’ushu bun igie Unim mbee bipi puu. Bendi gbamm be bong ha Ujeso. ²⁵ Ubanabas befe lè Usorl be mbee aki abell. He Ujeruselem be kpe Ujon Umak gye lè he he Antiyok.

¹ Bendi abe be᷆ tye ugie ’isom Unim lè bendi abe be᷆ hwua bendi be ma yi he liwu bendi abongale he Antiyok. Azen abell na᷅ à yi nyin: Ubanabas lè Usimiyen (angwu be maa ko le Undi ùshì) lè Ulusiyes (angwu u᷆ be lè he Usarin) lè Usorl lè Umanayen (angwu be ma kwob utung ha Usu Uherod). ² Nya a na be maa fe Atyetyan Unim, be fe ukaa kong ha ahe lè itung andoale, Ukatia Kunyong Unim a de be le: "Mà waa Ubanabas befe lè Usorl ndor ta-ta ke-m hè be bè shi aki angi mi ko ābe le bè shi." ³ Be kong ha Unim lè itung andoale. Be pwom ābe abwo de be le bè ndo te. ⁴ Le bwo Ukatia Kunyong Unim a som Ubanabas lè Usorl, be bo ndo he Uselusia lè ngwee ’inong lishor lè há gye he ’ubong Usaipres ahwu ’ù yi he ’udyan umbwo. ⁵ Be lè wu há, be gye he lifung-ushu Usalamis; be bun igie Unim he ishom angi Ijuus ı᷆ kwu liwu. Ujon Umak a ma yi utung ha abe he-e ù lè kpell ābe. ⁶ Be gbe mbee ashi ’ubong ahwuna puu, be hà gye wu he lishi Upafos. Be nde undi-anong ususo há angwu be᷆ ko le Ubaa-ujeso. A ma yi undi Ijuus a, u lam bendi le ufe ù yi undi angwu u᷆ tye ugie ’isom Unim a. ⁷ A ma yi udim úkaandi angwu be maa ko le Usagiyes Uporles angwu u᷆ nde gbe lè ’ubong ’umen ana a. Ukaandi umen i a bi lishi kangg. A ko Ubanabas befe lè Usorl lè hwaa lè he le bwo a kee le u gyo igie Unim. ⁸ Undi-anong umen i a fung fe be. (Be maa ko undi-anong umen i he igie Igrik le Elimas.) A maa kaa he-e ù shi ukaandi ana ù bong ha Ujeso ye. ⁹ Usorl umen angwu be fel ko le Uporl, angwu a ma yi lè ikeb Ukatia Kunyong Unim kangg, a bel àshì nde-e kporr. ¹⁰ A de-e le: "Wo unwaa Usetan, wò yi linaa ha ’iwom ’iyang-yang ashi ’ì yi ’inunung. Wo sho lè bitaa beshu bebibi puu ha awo lityam. Mbee ’unyong kpamm wo kaa ha-a à shi biwom Atyetyan Unim abi bì yi ’igyang bì fel iman. ¹¹ Atyetyan Unim u ndo ba ka-a ’ingie ’anaa-anaa nyin. Wo ba hwuà ashi; wò nem nda libwee ye he ati zangg." Nya ’ukwo-ukwo ’ifufebb ’i kung gye Elimas he atong-shi kpenn, u fel wua mbee bipi keē undi angwu u᷆ kwu-e abwo he ’ubwo teng he. ¹² Ukaandi umen ana a nde ashi ’i shi, a bong ha Ujeso. Ashi be ma hwua bendi gbe lè Atyetyan Ujeso ’i kwu-e he ’uhwo. ¹³ Uporl befe lè bendi-utung bema be ngwee ’inong lishor lè he Upafos lè shul he Upaga he ’ubong Upamfilia. Ujon Umak ufe a gbe tyang ābe lè há tem gye he Ujeruselem. ¹⁴ Be bo lè he Upaga gye he lishi Upisidia angi be᷆ ko le Antiyok. He liti uwell Ijuus be lè kwu he ushom angwu Ijuus ı᷆ kwu liwu. ¹⁵ Bekaandi abe be᷆ nde gbe lè ushom umen ana be bo lè he ashia Iten Umosis lè ashia bendi abe be᷆ tye ugie ’isom Unim puu, be som undi de baa Uporl le: "Bebuye, gbe mà yi lè igie angi ma᷆ bun de bendi hè be bè kwu lè ingie, mà bun." ¹⁶ Uporl a kung bo ’inaa yor ābe abwo le bè tyang ’ihwee, u keb akongale le: "Men bendi begi Izwell lè begaandi puu abe ma᷆ fe Unim, men puu mà gyo mi. ¹⁷ Unim angwu bendi Izwell be᷆ fe-e a ma waa kung betietyan, u shi ābe be dyam he ’unyong ahwu be ma yi begaandi he ’ubong Igyept. Unim a fem ābe lè há gbe he ikeb ima angi i dyam. ¹⁸ Be shi tor he nya a na u᷆ nde gbe lè be he libeb aze asi afee. ¹⁹ A ndo ’ukye hwò abong adyong-ifee he Ukenan kung itang ibell ke bendi Izwell. ²⁰ "He ’unyong ahwu be ma kwu há aze asi lisi lè aze asi afee lè ngi lihwo, a ke be bekaandi abe be᷆ maa ābe ushe kpamm be kwom he ’unyong ahwu Usamuwell a maa tye ugie ’isom Unim. ²¹ He liti ken be de le Unim ù ke be usu. He ashina Unim a kung Usorl, unwaa Ukish, angwu ù yi he ’ikwu-lihwan Ubenjamen le ù kwu usu ubell. Usorl a kam ābe aze asi afee. ²² He ’unyong ahwu Unim a waa he, a kwu Udebid ’usu le ù kpe ’idem ’usu Usorl. Unim a kong gbe lè he le: ’Mi nde le Udebid, unwaa Ujesi, na᷅ ù yi ’itaa undi ashi ’ı᷆ shi nyin mi he lityam. Ù yi undi angwu u᷆ be shi biwom puu abi mi kee he le ù shi a.’ ²³ Udebid umen i na᷅ Unim a shi igia ima, Ujeso, le ù kwu Undi-likpan bendi Izwell nya a na a ma ke úkyébb. ²⁴ Mà ukpong Ujeso u hà keb bendi ahwuale, Ujon a maa bun da bendi Izwell puu le bè bel àtyám lè he biban bibell, be be he-e ù kib ābe he umbwo. ²⁵ Nya a na Ujon a maa ndo mbee aki ama, a maa da bendi le: ’Mā gim le mì yi undi angwu ma᷆ baa lishi á. Mi ufe a ye. Ufe u pwom mi lè há. Mi kpee he he ’ubee or ye.’ " ²⁶ Uporl a mbee gye ’ushu kong le: "Bebuye, men igia Ebraham lè begaandi puu abe ma᷆ fe Unim, kisom ’imen ashi gbe lè likpan ’unyong i ’ì yi ke li bel a. ²⁷ Bendi abe he Ujeruselem lè bekaandi bebell be ngye le Ujeso ù yi Undi-likpan a, ngwu igie bendi abe be᷆ tye ugie ’isom Unim angi be᷆ bo he liti uwell liyang-yang ì nung ābe ye. Ukpor be shi igie angi bendi abe be᷆ tye ugie ’isom Unim be ma fee i shi gbe he amaale ushe le bè gwu Ujeso. ²⁸ Mà na be maa ndè ’iwom ashi a shi hè be bè gwu-e ye or, be de Upalet le ù de bè gwu-e. ²⁹ He ’unyong ahwu be ma shi-e biwom abi be fee gbe lè he he ’ushia Unim leěti puu, be shul he lè he ’ikpakpaa lè ngì. ³⁰ Unim a wum he lè he lihwu. ³¹ Bendi abe be ma be utung ha ahe lè he Ugalili be he Ujeruselem be nde-e ati gbamm. Kanaa-anaa i be fel bun da bendi Izwell gba lè he. ³² Li be hè li lì bun ’isom ’inunung a de men le, kiwom ashi Unim a ma ke betietyan úkyébb le u sha, a shi āshi ke li, bel abe lì yi igia ibell, gbe he awumale Ujeso lè he lihwu. Ashi Udebid a ma fee he ’ushia Usam lishi angi lefee, kì yi àshi Unim a kong a, kì yi le: ’Wò yi Unwaa-gi a. Kunyin mi fel Atia a.’ ³⁴ Unim a maa kong gba lè awumale Ujeso lè he lihwu, angwu likwom lima lì hà ndo hwee ye a, he ’unyong ahwu a de le: ’Ki shi na ana mi ba ka-a ’ukwun ahwu mi ma kyebb ndor Udebid.’ ³⁵ Udebid a mbee kong he ’iteng ’isuso há he ’ushia Usam lishi Ujeso le: ’Wo ba tyang i-mi, Unwaa-gang angwu wo waa, le likwom ligi lì hwee ye!’ ³⁶ He ’unyong ahwu Udebid a ma so uwum, a maa sha a᷆shi Unim a kee. A hwō; be ngi-e gwaa ha betiema; likwom lima li hwee. ³⁷ Likwom undi angwu Unim a ma wum lè he lihwu li hwee ye. ³⁸ Bebuye, men puu mà ngye dangg le Ujeso na᷅ be᷆ bun ’isom ashi gbe lè biban atyangale ke gbe ha ahe i de men. ³⁹ Mà ngye le undi uyang-yang angwu a bong ha ahe u fel porr lè he biban abi Iten Umosis i ma tyang ke ye. ⁴⁰ Mà baa teng ’iwom ashi bendi abe be᷆ tye ugie ’isom Unim be ma kong ’i sha ha amen. Be de le: ⁴¹ ’Men bendi inyan, mà nde, ufung ù waa gwu amen. Aki angi mı᷆ shi nyin nya a na mà so bewum i, à yi aki angi undi u᷆ de men gbe lè ngi or, hang ma bong ye á.’ " ⁴² He ’unyong ahwu Uporl befe lè Ubanabas be maa ndo gbe lè há he ushom angwu Ijuus ı᷆ kwu liwu, bendi be de be le bè tem be he liti uwell angi li pwom lè ngi, hè be bè mbee de be gbe lè biwom bimen i. ⁴³ He ’unyong ahwu bendi be maa ndo gye, bendi Ijuus gbamm lè bendi abe be bong nya a na Ijuus i bong be gbe pwom Uporl befe lè Ubanabas. Bebwaa-isom Ujeso bemen i be kong ha bendi, be fe be ingie le bè gye ’ushu fe Unim angwu a tyung inung ha abe. ⁴⁴ He liti uwell angi li pwom lè ngi, ki teng zangg hang bendi puu há he lishi limen ana be be hè be bè gyo igie Unim. ⁴⁵ Bendi Ijuus be nde liwu bendi, be fel lè ashi abungale. Be maa fel kong ban àshi Uporl a kong, be kong bia he. ⁴⁶ Uporl befe lè Ubanabas be hà bun faale ’ushell de Ijuus le: "Ki ma yi kpe-kpe le lì bun igie Unim de men a ’ushu. Ukpor bel li tyang amen lè hwaa lè bendi abe bè yi Ijuus a ye, likorye ma swan āngi, ma mbee gim le ma kpè le ma kwa lè likpan angi lı᷆ ngyor igye ye. ⁴⁷ Uten angwu Atyetyan Unim a ke li ù yi le: ’Mi kung amen ndor ná ’ikung-gbo ashi ’ì taa tyung bendi abe bè yi Ijuus a ye ’ukwo ahwu bendigye puu bè gbe kwu lè likpan ’unyong.’ " ⁴⁸ Bendi abe bè yi Ijuus a ye be ma yi lè igor he ’unyong ahwu be gyo ashin; be mbee pee Unim he ’isom ’imen i. Bendi puu abe Unim a ma waa le bè kwu lè likpan angi lı᷆ ngyor igye be bong ha Ujeso. ⁴⁹ Be bun igie Atyetyan Unim mbee bipi puu há he ’igie ’imen ana. ⁵⁰ Bekaandi abe be᷆ ndè gbe lè ’ubong lè bengingye abe be fem lizen abe be maa fem Unim, Ijuus i fe be ingie le bè ke Uporl befe lè Ubanabas ’ingie. Be ndeb lè be lè ha abe ’igie. ⁵¹ Uporl befe lè Ubanabas be hà shell ’umbulmbul lè he abee wu há hè ’ì kwu ’itaa tyung bendi há le be shi ’iban, gbe ndo he Ikoniyem. ⁵² Bendi abongale he Antiyok be ma yi lè ikeb Ukatia Kunyong Unim lè igor kangg.

¹ Ki shi ’itaa a ken he Ikoniyem. Uporl befe lè Ubanabas be gye he ushom angwu Ijuus ı᷆ kwu liwu lè bun igie Unim lè ikeb kangg le bendi Ijuus gbamm lè begaandi be bong ha Ujeso. ² Ukpor Ijuus angi i bong ha Ujeso ye i ma fe begaandi ingie le bè bel fel linaa ha bendi abongale. ³ Uporl befe lè Ubanabas be kwu há gbe ’igbe kangg. Be maa kong gboo gba lè Atyetyan Unim angwu a tyung le ’isom ashi be᷆ bun gbe lè inung ima ’ì yi ’igyang a, gbe he akele ubell ikeb le bè shi bikwele-uhwo. ⁴ Liwu limen he lishi ana li tang he abwo. Besuso bè yi ke Ijuus; besuso be shi ke Uporl befe lè Ubanabas. ⁵ Bendi Ijuus lè bekaandi bebell lè begaandi be tim le bè shi ābe lifee, be maa ābe akor. ⁶ Bebwaa-isom Ujeso bemen i be gyo gbe lè shi; be buu gye he ashi Ulaikonia angi be᷆ ko le Ulistra lè Udaabi lè abong angi a ndē kel-kel fe Ikoniyem. ⁷ Be bun ’isom ’inunung mbee abong amen ana puu. ⁸ Ungikye ususo a ma yi he Ulistra angwu a maa tan mbee ye. A ma hwō abee lè há lifung anam a. ⁹ A dang ’utyung gyo igie angi Uporl u᷆ bun. Uporl a nde-e kporr, u ngye le ungikye anwun a fel lè abongale le Unim ú nya mbee he. ¹⁰ Uporl a kung kong lè ikeb de-e le: "Bo naa ’inaa kpa-kpa." Ungikye ana a tie bo ’inaa keb litan atanale. ¹¹ Liwu bendi be nde ashi Uporl a shi, be fel gaa he igie ibell angi Ulaikonia le: "Inīm i bel fel bendigye be hwaa lè bel." ¹² Be kung ābe kwù ikem ibell. Be kwù Ubanabas lizen le Uzus, be kwù Uporl le Uhemiz, likorye ufe na᷅ a maa kong de be. ¹³ Undi angwu u᷆ shang Uzus angwu ’iteng ashangale ’ima ’ì yi he item uging, a be lè ìkyēbb bigundu lè bibubo ikwan be naa he ungwu likong. Ufe or, liwu bendi or, be kee le be shang bebwaa-isom Ujeso. ¹⁴ He ’unyong ahwu Ubanabas befe lè Uporl, bebwaa-isom Ujeso, be gyo a᷆shi be kam le be sha, be shwia gie aliga abell hè ’ì tyung le ’i ngbebb ābe ye. Be buu gye há he liwu bendi keb agaale. ¹⁵ Be kong lè ikeb le: "Bebuye, kibang a, ma᷆ shi ashin? Lì yi bendigye nya a na men mà yi a. Li be nyin hè li lì be de men ’isom ’inunung hè men mà bel lè he biwom ilaa hè men mà ndè àshì hwaa lè Unim angwu ù yi uwum a. Unim umen i na᷅ a shi lifung-atabe lè abi bì yi há, itang lè abi bì yi hen, lè umbwo ukaandi lè abi bì yi há. ¹⁶ Lè he ’unyong ahwu ’u ma gbe lè he item a maa tyàng bendi abe he abong puu le bè shi a᷆shi be kee. ¹⁷ Ukpor a tyung ’uhwo-ma gbe he binunung abi u᷆ shi. U sha umbwo u ndor lè he lifung-atabe. U sha ìtiá īme᷅n i mbwa he ’unyong ahwu ’ù yi kpa-kpa, hè men mà kwu lè lizi angi mà zi gwul. U shi àtyám āme᷅n a sho lè igor." ¹⁸ Mà na bebwaa-isom Ujeso be kong ashin de be or, bendi be maa la tyàng ābe ashangale ye. ¹⁹ Bendi Ijuus besuso be ma be lè he lishi Upisidia angi be᷆ ko le Antiyok; besuso be be lè he Ikoniyem. Be shi bendi abena be tem fel linaa ha Uporl. Befe puu be maa Uporl akor; be su lè he lè há lifung-ushu lè tyang he igye. Be maa kong le a hwō. ²⁰ Bendi abongale be be kaa kel-kel fe-e. A bo ’inaa tem gye há he lifung-ushu. Ashi a taa, befe lè Ubanabas be tem gye he Udaabi. ²¹ Uporl befe lè Ubanabas be lè wu há he Udaabi, be hà bun ’isom ’inunung de bendi. Bendi gbamm be bong ha Ujeso. Be hà tem gye he Ulistra. Be bo lè he Ulistra gye he Ikoniyem. Be hà gye he lishi Upisidia angi be᷆ ko le Antiyok. ²² Be maa fa bendi abongale ingie le bè tyang abongale ha Unim ye, be naa genn. Be hwua bendi le: "Kì yi kpe-kpe le lì kpe bingie gbamm mà ukpong li hà ngwee Kiteng-usu Unim." ²³ Be gye he liwu bendi abongale liyang-yang lè waa bekaandi abe be᷆ ndè gbe lè be, ka ābe. Be kung àbe be bong ha Atyetyan Ujeso fe-e he ’ubwo gbe he akongale ha Unim lè itung andoale. ²⁴ Be tan mbee Upisidia puu. Be hà gye he ’ubong Upamfilia. ²⁵ Be bun igie Unim de bendi he lishi Upaga, be hà gye he Atalia. ²⁶ Be ngwee ’inong lishor lè há gye he lishi Usiria angi be᷆ ko le Antiyok he ’ipi bendi abongale be ma kung ābe fe Unim he ’ubwo le bè shi aki angi be lè shi a mbee nyin. ²⁷ Be lè wu he Antiyok, be gbong bendi abongale be he ’iteng ken. Be de be biwom puu abi Unim a shi gbe ha abe; be mbee de be gbe lè libwo angi Unim a shi ke bendi abe bè yi Ijuus a ye le befe or bè bong ha Ujeso. ²⁸ Be kwu ha liwu bendi abongale he Antiyok gbe ’igbe kangg.

¹ Bendi besuso abe be bo lè he Ujudia be he Antiyok be hwua bendi abongale le bè hà ndo kwa lè likpan ’unyong faale afaale be ten ná Iten Umosis i kong ye. ² Uporl befe lè Ubanabas be fung fe be kangg gbe lè shi. Be shi ugim le Uporl befe lè Ubanabas lè bendi besuso lè há Antiyok bè gye he Ujeruselem lè kong ha bebwaa-isom Ujeso lè bekaandi gbe lè likong limen i. ³ Liwu bendi abongale li som ābe gbe. Nya a na be maa lè gbe he Ufenishia lè Usameria be maa bun da bendi ná bendi abe bè yi Ijuus a ye be bel àtyám hwaa lè Unim. Kisom ashin ’i shi bendi abongale puu be fel lè igor kangg. ⁴ Be lè wu he Ujeruselem. Bebwaa-isom Ujeso lè bendi abongale lè bekaandi bebell be kpe be lè igor. Uporl befe lè Ubanabas be de be biwom puu abi Unim a ma shi gbe ha abe. ⁵ Bendi abongale besuso abe bè yi he likwu bendi abe bè yi Iferesis be bo ’inaa kung kong le, kì yi kpe-kpe le bè ten bendi abe bè yi Ijuus a ye, be de be le bè ndor Iten Umosis. ⁶ Bebwaa-isom Ujeso lè bekaandi bendi abongale be lè kpee hè be bè shi ugim gbe lè likong anyin. ⁷ Be kong gbe ’igbe. Ipita a hà bo ’inaa kong le: "Bebuye, má ngye le leěti Unim a ma waa mi lè he liwu līme᷅n le mì bun ’isom ’inunung de bendi abe bè yi Ijuus a ye hè be bè gyo, be mbee bong ha Ujeso. ⁸ Unim umen angwu a ngye àtyám bendi puu i, a tyung le a kpē be gbe he akele ubell Ukatia Kunyong uma nya a na a ma ke li. ⁹ A shi li lì yi atyetye lè ha abe ye. A tyang biban bibell ke be, le bwo be bong ha Ujeso. ¹⁰ Kibang a, ma᷆ haa gil Unim gbe he akungale bèngbébb so bendi abongale? Bèngbébb bemen i, betietyan or be ma so ābe mbee, ngwu bel or lì so ābe mbee ye. ¹¹ Bel li bong le li fel lè likpan ’unyong gbe he inung Atyetyan Ujeso nya a na befe be᷆ kwu lè ngi." ¹² Liwu limen ana li kwun atyung shangg. Be dang ’utyung gyo ná Uporl befe lè Ubanabas be᷆ de be bikwele-uhwo abi Unim a shi gbe ha abe he abong bendi abe bè yi Ijuus a ye he-e ù tyung ikeb ima. ¹³ Be kong ’i mbee puu, Ujems a kung kong le: "Bebuye, mà gyo mi. ¹⁴ Usaimun a kong ná ’i shi nyong Unim a be hwaa lè bendi abe bè yi Ijuus a ye he-e ù waa kung bendi lè ha abe le bè kwu bema. ¹⁵ Ashin ’i tem lè keè ha igie angi bendi abe be᷆ tye ugie ’isom Unim be fee fe he ’ushia Unim leěti. Be ma fee le: ¹⁶ ’Unim a de le, mi ba tem ba. Mi ba tem lè ’ikwu-lihwan Udebid ashi ’i paa, gbong ukem; mi be tem lè ’ùsù ke undi ’ikwu-lihwan Udebid. ¹⁷ Mi ba sha biwom abin hè bendi abe bè yi Ijuus a ye, abe mi ko le bè kwu begi begyang, bè be kee i-mi, Atyabell Unim. ¹⁸ Unim angwu a ma shi bendi be ngye gbe lè shi leěti a kong āshi.’ " ¹⁹ Ujems a gye ’ushu de le: "Bendi abe bè yi Ijuus a ye, abe be be hwaa lè Unim, ugi ugim ù yi le lì shī ke be ’ingie ye. ²⁰ Lì fee ’ushia hwan hwaa lè be de be le, bè zī biwom ūkèm ye likorye bì yi biwom abel a, bè ndor ’uhwo-bell betaa-betaa lè he akpela atanale, be zī inyia angi be ngib gwu he abwo ye, be zī anung inyia ye. ²¹ Lì de be biwom abin, likorye kung lè há item na᷅ li keb lı᷆ bo gbe lè bi lè he ashia Iten Umosis he ishom ityan angi lı᷆ kwu liwu he liti uwell liyang-yang. Li bun igie ima mbee biteng puu." ²² Bebwaa-isom Ujeso lè bendi abongale puu lè bekaandi bebell be tim waa bendi lè he liwu libell som le bè te utung ha Uporl befe lè Ubanabas gye he Antiyok. Be waa Ujudas angwu be maa mbee ko le Ubasabas befe lè Usalas. Bendi bemen befee i be ma yi bendi abe bendi abongale be fe lityam ha abe a. ²³ Be som ābe lè ’ushia ahwu be fee le bè lè ke. Be fee le: "Bel bebwandamen abe lì yi bebwaa-isom Ujeso lè bendi abongale lè bekaandi li kong lè men, bendi abongale abe mà yi Ijuus a ye abe he Antiyok lè Usiria lè abe he Usilisia. ²⁴ Li gyo le bendi besuso lè he liwu lityan be be hwaa lè men há, be ke men ’ingie, be kong biwom abi bı᷆ waa amen ufung. Bel na᷅ li som ābe ye. ²⁵ Bel puu li kwu liwu tim le lì waa bendi som hwaa lè men. Be ba utung ha Ubanabas befe lè Uporl abe ’i nyin li lè be, ²⁶ abe be kung likpan libell ndor he begyong hè be bè shi aki Atyetyan Ujeso Ukristi. ²⁷ Li som Ujudas befe lè Usalas hwaa lè men hè be bè be de men biwom abi li fee lè ungwu lè ungwu. ²⁸ Bel lè Ukatia Kunyong Unim li bong le lì so amen bèngbébb besuso fem iten angi ì yi kpe-kpe nyin tyang ye. ²⁹ Mà zī biwom ūkèm ye; mà zī anung inyia ye; ma zī inyia angi be ngib gwu he abwo ye; mà ndor ’uhwo-men betaa-betaa lè he akpela atanale. Gbe ma ndor ’uhwo-men lè he biwom abin puu, hà ma shi ’inunung. Ki fel mbee ati." ³⁰ Bebwaa-isom bemen i be bo ndo he Antiyok. Be lè gbong bendi abongale sho he ’iteng ken kung ’ushia ana ke be. ³¹ Bendi abena be bo ’ushia ’umen i. Be fel lè igor he ’isom ashi ’i fe be ingie nyin. ³² Ujudas befe lè Usalas abe be ma yi bendi abe be᷆ tye ugie ’isom Unim a, be kong ha abe, fe be ingie gbe ’igbe kangg. ³³ Be kwu ha abe há gbe ’igbe. Ki ma fel le be ndo gya, bendi abongale be de be le bè gye lè ’ukwun lè hwaa lè bendi abe be som ābe. [ ³⁴ Ukpor Usalas a shi ugim le u ngyor kwa há.] ³⁵ Uporl befe lè Ubanabas be ngyor kwu he Antiyok. Befe lè bendi besuso gbamm be bun ’isom gbe lè Atyetyan Ujeso de bendi; be mbee hwua ābe. ³⁶ Ati a gbe, Uporl a de Ubanabas le: "Lì tem lè kong lè bendi abongale he ’iteng ’iyang-yang he ’ipi li bun ’isom gbe lè Atyetyan Ujeso hè li lì ndè ná bè yi há." ³⁷ Ubanabas a bong, ukpor a kee le bè te lè Ujon Umak há. ³⁸ Uporl a gim le bè te lè he ye, likorye a ma kwu utung ha abe lè kwom he umbee-likel aki abell ye. A ma gbe tyang ābe lè he Upamfilia. ³⁹ Be fung fe bende kangg. Be hà tang he abwo lè ha bende. Ubanabas a kpe Umak gbe lè he lè ngwee ’inong lishor gye he Usaipres. ⁴⁰ Uporl u waa kung Usalas gbe. Bendi abongale be kung ābe fe Unim he ’ubwo le ù ke he ’ukwun. ⁴¹ Baà Uporl be lè gbe he Usiria lè Usilisia fe awu bendi abongale ingie.

¹ Uporl befe lè Usalas be gye ’ushu tan gbe he Udaabi lè Ulistra. Undi abongale ususo a ma yi há he Ulistra. Be ko he le Utimoti. Anam or a bong ha Ujeso, ù yi undi Ijuus. Átyám u shi Igrik. ² Bendi abongale gbamm he Ulistra lè Ikoniyem be maa kong ’inunung gba lè Utimoti. ³ Uporl a kee le u kpa he he-e ù fel tan utung ha ahe. A ten he, le bwo bendi Ijuus puu abe bè yi he biteng bimen ana be ngye le ātyām Utimoti a ma yi Igrik a. ⁴ Nya a na be maa tan mbee he ashi atyetye-atyetye, be maa bun iten da bendi abongale. Iten imen i na᷅ bebwaa-isom Ujeso lè bekaandi abe he Ujeruselem be ma ke. Be de be le bè ndor iten imen i. ⁵ Awu bendi abongale a fel lè ingie, kugii bendi abongale ’u fel go igo igo. ⁶ Be lè gbe he bigie abi Ifrigia lè Ugalesha. Ukatia Kunyong Unim a bong ābe le bè bun igie Unim he ’ubong Eshia ye. ⁷ Be lè wu he Umisia. Be kaa le be gya he Ubitinia, ukpor Ukatia Kunyong Ujeso a bong ābe ye. ⁸ Be fel gbe há he Umisia ana gye he Utrowas gwaa ha umbwo ukaandi. ⁹ Nya he ’usu ’umen ana Unim a tyung Uporl ’iwom. A ndè undi Umasedonia a be naa, u tim he anung le: "Hā be he Umasedonia ha-a à be kpell li." ¹⁰ Nya ’ukwo-ukwo, mi Uluk, mi bo utung ha abe ndo he Umasedonia, likorye li gim le Unim a kee le lì lè bun ’isom ’inunung de bendi há. ¹¹ Li ngwee ’inong lishor lè he Utrowas gbe ligbe-ligbe gye he ’ubong Usamotras ahwu ’ù yi he ’udyan umbwo. Ashi a kung fem taa, li gye he Uniapolis. ¹² Li bo lè há gye he Ufilipai. Ufilipai a ma yi lishi angi li dyam kangg he ’ubong Umasedonia. Be ma yi he abwo Urom. Li kwu há zī ati. ¹³ He liti uwell li gbe lè há he lishi gye he ungwu umbwo he ’ipi li maa kong le Ijuus i kong ha Unim há. Li bel kwu ko; li kong ha bengingye abe bè yi kwu há. ¹⁴ Ungingye ken angwu be᷆ ko le Uledia a ma yi há. A maa ba lè he Utayitara a. A maa ndyebb bihwom bibwaa za. A ma yi undi angwu u᷆ fe Unim a. Atyetyan Unim a hà shi-e le ù dang ’utyung gyo a᷆shi Uporl a maa kong. ¹⁵ Ufe-gyang or, bendi bema or, li kib ābe he umbwo. A kung de li le: "Gbe ma gim le mi bong ha Atyetyan Ujeso ’igyang a, mà be kwu ha ami ushom." A fe fe li kangg le lì te. Li te há. ¹⁶ He liti ken li maa gya he ’iteng ashi be᷆ kong ha Unim, li kpee lè unwan ungingye angwu a ma yi ufee. Ikeb ibibi i shi ha ahe. I maa sha he u kong a᷆shi ’ı᷆ be shi. A maa sha únde kangg ka bekaandi bema gba he adele bendi ashi ’ı᷆ be shi fe be. ¹⁷ A maa tan pwom li, bel baà Uporl, ù yii gaa kong le: "Bendi aben bè yi bebwaa Unim angwu ù yi lè ikeb puu a. Be da amen ’itaa mà shi, ma hà kwu lè likpan ’unyong." ¹⁸ A ma shi ná he ati gbamm. Ki hà nyung Uporl he lityam. A bel àshì, u de ikeb ibibi imen ana le: "Mi da-a le wò fem lè ha ahe he lizen Ujeso Ukristi." Ikeb imen ana i fem lè ha ahe nya ’ukwo-ukwo. ¹⁹ Bendi abe bè yi lè he be nde le ù nem sha únde ka ābe mbee ye. Be kwu Uporl befe lè Usalas, su lè be lè hwaa lè bekaandi he ushokwo ’ate. ²⁰ Be te lè be lè hwaa lè bekaandi Urom. Be de le: "Bendi aben bè yi Ijuus a. Bè yii sha linaa ha abel ’ubong. ²¹ Be hwua bendi akpe angi iten ityan i bong le lì shi ye. Lì hà ndo sha akpe amen i ye, likorye bel lì yi bendi Urom a." ²² Liwu bendi li fe abwo he linaa limen ana. Bekaandi be shwia gie ābe aliga; be de bendi le bè kpam ābe. ²³ Be kpam ābe kangg. Be hà te lè be lè fe he igaadye. Be de undi angwu u᷆ kang igaadye le ù nde be ’inunung. ²⁴ A te lè be lè ngib fe he ’ipo ashi lè he afee-afee, a fe be afung he abee nya a na be tebb he. ²⁵ He ’ididyan ’usu, Uporl befe lè Usalas be maa kong ha Unim, be gyam agyam pee Unim. Igaadye angi i teng i fel kwu gyo ābe. ²⁶ Itang i nyung he abwo nya imbul-imbul. Lìshií ushom igaadye or li nyung he abwo. Àshì puu a kung buu nya ’ukwo-ukwo; ashishilika a waa igaadye puu lè he abwo. ²⁷ Undi angwu u᷆ kang igaadye a wum lè he ’unde. A ndè àshì à yi hwuo, u kong le igaadye i paa nim. A shwia waa ’ashwia le u gwa ’uhwo-ma. ²⁸ Uporl a kung gaa kangg de-e le: "Shī do ’uhwo-gang ye. Lì yi nyin puu." ²⁹ Undi angwu u᷆ kang igaadye a de le bè be lè ’imor-inde. A buu gye há afee lè tim anung he ’ushu Uporl befe lè Usalas; ù yii tung. ³⁰ A bo kpe be gye lè be he igye. U de be le: "Bekaandi, mì shi ná a, mî kwu lè likpan ’unyong?" ³¹ Be de-e le: "Bong ha Atyetyan Ujeso, mà men lè ’ikwu-lihwan ’igang ma kwa lè likpan ’unyong." ³² Be lè bun ’isom gbe lè Atyetyan Ujeso de be, befe lè bendi bema abe be teng. ³³ Nya lè ’usu undi umen angwu u᷆ kang igaadye ana a lè to ābe bibaa bibell. Ufe-gyang or, bendi bema or, be ma kib ābe he umbwo nya ’ukwo-ukwo. ³⁴ A kpe Uporl befe lè Usalas gye lè be ha ahe ushom lè ke be lizi be zī. Ufe-gyang lè ’ikwu-lihwan ’ima bè yi lè igor likorye be bong ha Unim. ³⁵ Ashi a taa, bekaandi Urom be som idashanda le ì lè de undi angwu u᷆ kang igaadye le ù lè de baa Uporl bè ndo gye. ³⁶ Undi umen ana a lè de Uporl le: "Bekaandi Urom be som isom le mì tyang amen abwo. Mà ndo gye unwaa-men or." ³⁷ Uporl a kung de abe idashanda le: "Kpaa ye. Be kpam li ikwun he udyeshi faale ashi li shi; be te lè bel lè fe he igaadye; ki shi le lì yi bendi Urom a. Kanaa-anaa i be kee le be nyia inyia fem li. Befe-gyang bè be fem li." ³⁸ Idashanda i te lè igie anyin lè de bekaandi Urom. He ’unyong ahwu bekaandi be gyo le Uporl befe lè Usalas bè yi bendi Urom a, be fel he ’ushell. ³⁹ Be be tim ābe anung le bè tyang ke be. Be fem ābe lè he igaadye. Be de be le bè gbe lè há he ’ubong. ⁴⁰ Uporl befe lè Usalas be gbe gye he ushom Uledia. Be ndè bendi abongale há; be fe be ingie. Be hà gbe lè há.

¹ Be tan lè gbe he Amfipolis lè Aporlonia be he Utesalonaika he ’ipi ushom angwu Ijuus ı᷆ kwu liwu ù yi. ² Uporl a ma gbe gye há nya a na u shaa shi. A maa kung ati uwell akie fung fa bendi gba lè biwom abi be ma fee ndor he ’ushia Unim leěti. ³ A maa bun da ābe, u tyung ābe le ’i ma yi kpe-kpe le Ujeso Ukristi ù kpe ’ingie hwō, u wum lè he lihwu. Uporl a de be le: "Ujeso umen angwu mı᷆ de men i ù yi Ukristi, Undi-likpan angwu Unim a som be he igye anyin a." ⁴ Bendi Ijuus besuso lè bendi Igrik gbamm abe be᷆ fe Unim lè bekaandi bengingye or be bong àshi Uporl a kong, be fel utyang ha Uporl befe lè Usalas. ⁵ Bendi Ijuus abe be bong ye be ma fel he ashi abungale. Be lè gbong bendi bebibi abe be hwun lihwun be sho liwu. Be shi ’ihwee ’i fel há ’ubong ’umen ana. Be gye he afee ushom Ujesen lè ikeb hè be bè lè kee kwu Uporl befe lè Usalas ke bendi. ⁶ Be be, be nde be ye. Be su lè Ujesen lè bendi abongale besuso lè hwaa lè bekaandi abe he ’ubong, be gaa le: "Uporl befe lè Usalas be tan lè linaa mbee bipi puu. Kanaa-anaa i be fel hen ha abel ’ubong. ⁷ Ungikye umen angwu be᷆ ko le Ujesen i, a kpe be ndor ha ahe ushom. Puu ubell be ban iten Usu ukaandi angwu Urom a, nyong be᷆ de le usu ususo ù yi nyin, be ko le Ujeso." ⁸ Be kong ashin kong-kong, liwu bendi lè bekaandi bebell be gie he abwo lè ingywo. ⁹ Bekaandi be de Ujesen lè abe be teng le bè ke únde. Be hà tyang ābe abwo. ¹⁰ Kusu ’u gye-gye, bendi abongale be de Uporl befe lè Usalas, bé gye he Beria. Be lè wu há. Be gye he ushom angwu Ijuus ı᷆ kwu liwu. ¹¹ Bendi abe he Beria be ngbèbb àtyám hwò a᷆be he Utesalonaika. Be dang ’utyung gyo igie Unim lè ’igyor. Be maa bo ashia Unim angi be fee leěti mbee ati kpamm hè be bè nde le biwom abi Uporl u᷆ kong bì yi ’igyang â? ¹² Bendi Ijuus gbamm lè bendi Igrik abe bengikye lè abe bengingye bebell abe be fem lizen be bong ha Ujeso. ¹³ Bendi Ijuus abe bè yi he Utesalonaika be gyo le Uporl u bun igie Unim da bendi he Beria or. Be be há, be shi bendi abena be fel lè Uporl he linaa. ¹⁴ Bendi abongale be gbe lè Uporl nya ’ukwo-ukwo gye he ungwu umbwo ukaandi. Ukpor Usalas befe lè Utimoti be ngyor kwu há he Beria. ¹⁵ Bendi abe be gye le be la teng Uporl be lè wu he Atens. Be tem lè de Usalas befe lè Utimoti le Uporl a de le bè pwom he akikye. ¹⁶ Nya a na Uporl a ma yi kwu he Atens, u᷆ nyong Usalas befe lè Utimoti, ki ban he he lityam ná a nde ’ubong ’umen ana ’u sho lè ikem. ¹⁷ A maa fung fa Ijuus lè bendi besuso abe be᷆ fe Unim he ushom angwu Ijuus ı᷆ kwu liwu; u mbee fung fe bendi he ushokwo ’ate liti liyang-yang. ¹⁸ Bendi besuso abe be᷆ hwua bendi or titi be fung fe-e, be pwom ahwuale akwu bendi angi be᷆ ko le Epikyuriyen lè Istoik. Besuso be bii le: "Ukong-likong undi umen i u kong gba lè ’ibang a?" Besuso be de le: "Pisoye u kong gba lè ìnīm ’ubong ’ususo a." Be maa kong ná le bwo Uporl a maa bun gbe lè Ujeso lè awumale lè he lihwu. ¹⁹ Be kung Uporl gye lè he he ’ipi bekaandi be kwu ukoto angwu be᷆ ko le Aliapages. Be de-e le: "Li kee le li ngya uhwuale ufufe angwu wo᷆ kong gbe lè he i. ²⁰ Biwom bisuso abi li gyo-a wo kong bì yi li bifufe. Li kee le li ngya àshi bi ze." ²¹ (Bendi Atens puu lè begaandi abe bè yi ndē há be kee le be kung ’ùnyong ’ubell gyo gba lè biwom bifufe biyang-yang, be mbee kong gbe lè bi.) ²² Uporl a bo naa há he ukoto angwu be᷆ ko le Aliapages kung kong le: "Men bendi abe he Atens, mi ndè le ma kaa le ma fa inim īme᷅n gba he biwom puu abi ma᷆ shi. ²³ Nya a na mı᷆ tan gbe ha amen ’ubong, mi nde biteng abi ma᷆ fe inim īme᷅n; mi mbee nde ’iteng ashangale ashi ma fee bee há le: ’Ashin ’ì yi ke ùnīm angwu li ngye-e ye a.’ Unim angwu ma᷆ fe faale afaale ma ngye-e na᷅ mı᷆ bun de men gbe lè he i. ²⁴ Unim umen angwu a shi igye lè biwom puu abi bì yi hen i na᷅ ù yi lè lifung-atabe lè itang. U nda᷆ he ishom angi be tye ngi he abwo a ye. ²⁵ Ki fong he lè ’iwom ’iyang-yang ashi undigye u᷆ shi gbe he aki ashele ke-e ye. Ufe-gyang na᷅ u᷆ ke bendigye likpan lè ’ūnyōng ahwu ’u᷆ dim lè biwom puu abi bi teng. ²⁶ A shi bendigye puu lè ha undi a ken a. A shi ābe be ndē mbee igye puu. Ufe-gyang na᷅ a ma ndor ’unyong lè biteng abi be᷆ be ndē. ²⁷ A ma shi bendi puu le bè kee he, hè be bè ndè le be ndǎ he, he ’unyong ahwu be shun he. Unim ù yi ’igbe-igbe lè ha abel ye, ²⁸ likorye ’Ufe na᷅ u᷆ ke li likpan lè ’iken lè ’ūnyōng.’ Kì yi nya a na bendi bēme᷅n abe be bi lishi be ma kong a. Be ma de le: ’Bel or titi lì yi bebwaa-ma a.’ ²⁹ Gbè lì yi bebwaa-ma a, lì shī gim le Unim ù yi ’atelakpa ake undigye a kung igold lè isiliba lè akor shi gbe he lingye lima lè ugim uma a ye. ³⁰ Unim a maa kpam àshì wa biban bendi he ’unyong ahwu be ma wa ngye-e ye, ukpor ’anaa-anaa i a de le bendi puu he ’iteng ’iyang-yang bè bel lè he bibibi bibell. ³¹ A ndor liti angi u᷆ be tang ushe bendigye puu kpa-kpa gbe ha undi angwu a waa ndor ta-ta. A tyung le ashin ’ì yi ’igyang a gbe he awumale undi umen i lè he lihwu." ³² Be gyo Uporl a kong gbe le awumale lè he lihwu; besuso be fel nyan he. Besuso be de-e le: "Li kee le wò mbee bun likong anyin de li ’unyong ’ususo." ³³ Uporl a kung gbe lè há he liwu bendi. ³⁴ Bendi besuso be fel utyang ha ahe, be bong ha Ujeso. Udayonisiyes angwu a ma yi he liwu bekaandi abe be᷆ kwu ukoto angwu be᷆ ko le Aliapages lè ungingye angwu be maa ko le Udamaris lè bendi besuso be ma yi he liwu bendi abongale limen i.

¹ Uporl a hà gbe lè he Atens gye he Ukorint. ² A lè nde undi Ijuus há angwu be᷆ ko le Akwila. Be ma hwan he he Upontes a. Befe lè ungye-ma, Uprisila, be ma hà be lè he ’ubong Itali ibe, likorye Usu ukaandi Urom angwu be᷆ ko le Ukeladiyes a ma ke uten le Ijuus puu ì gbe lè he Urom. (Urom ù yi he ’ubong Itali a.) Uporl a te le u la kong lè be. ³ A ngyor kwu shi aki utung ha abe likorye be maa sha ishom bihwom nya a na ufe or a maa shi a. ⁴ A maa gya he ushom angwu Ijuus ı᷆ kwu liwu he liti uwell Ijuus liyang-yang la fa ifung hè Ijuus or, Igrik or, bè bong àshi u᷆ kong. ⁵ Usalas befe lè Utimoti be be lè he Umasedonia. Uporl a kung ’ùnyōng ’uma puu bun ’isom Unim, u de Ijuus le Ujeso ù yi Ukristi, Undi-likpan angwu Unim a som be he igye anyin a. ⁶ Bendi Ijuus be tel he, be kong ban he. A kem ’umbulmbul lè ha ahe aliga, u de be le: "Gbe ma nim, uben u kwa umen ugyang a. Abwo agi à yi ataa. Mi ndo gya he bendi abe bè yi Ijuus a ye a." ⁷ A gbe lè há lè ngwee he ushom Utitiyes Ujestes. A ma yi ugaandi angwu u᷆ fe Unim a. Ushom uma a ma yi gwaa ha ushom angwu Ijuus ı᷆ kwu liwu. ⁸ Ukrispes angwu a ma yi ukaandi há he ushom angwu Ijuus ı᷆ kwu liwu befe lè ’ikwu-lihwan ’ima be bong ha Atyetyan Ujeso. Bendi besuso gbamm he Ukorint be gyo ’isom ’inunung, be bong ha Ujeso, be kib ābe he umbwo. ⁹ He liti ken lè ’usu itam i shi Uporl le Unim a de-e le: "Shī shell ye. Gye ’ushu bun igie igi. Shī tyàng ye. ¹⁰ Mì yi utung ha awo. Undi ù hà ndo do-a ye, likorye bendi gbamm he ’ubong ’umen i bè yi begi a." ¹¹ Uporl a ngyor kwu há lize ken lè afell adyong-ken hwua bendi igie Unim. ¹² Ugalio angwu ù yi undi Urom a fel usu Akaya. He ’unyong ’umen ana bendi Ijuus be gbong liwu lè kwu Uporl gye lè he he ukoto. ¹³ Be de usu le: "Ungikye anwun a kaa he-e ù shi bendi bè fel fe Unim he ’ukwo ahwu iten ityan i bong ye a." ¹⁴ Uporl a kung he-e ù kong likong, Ugalio a de Ijuus le: "Men Ijuus, kì kwu le a gwu undi or, ù shi ’itaa ’iban ’isuso a or, hang mi dang ’utyung gyo amen ’inunung. ¹⁵ Ukpor bwo ’ì yi ifung gbe lè akpe lè azen āme᷅n agyang lè iten īme᷅n a, men-agyang ma᷆ kong āshi. Mi-i maa bitaa ishe abina ye." ¹⁶ A ndō ābe lè há ukoto. ¹⁷ Puu ubell be kwu Usosteniz angwu a ma yi ukaandi há he ushom angwu Ijuus ı᷆ kwu liwu kpam há he ukoto. Ugalio a kpam àshì wu àshi be shi. ¹⁸ Uporl a ngyor kwu ha bendi abongale he Ukorint gbe ’igbe. A hà gbe tyang ābe lè há gye he lishi Usinkria utung ha Uprisila befe lè Akwila. Be lè wu há, Uporl a hwaā lishi lima, likorye a ma ke Unim ùkyèbb. Saa be hà ngwee ’inong lishor gye he ’ubong Usiria. ¹⁹ Be lè wu he Efesos. Uporl a gbe tyang Uprisila befe lè Akwila. A gye he ushom angwu Ijuus ı᷆ kwu liwu lè fung fe be. ²⁰ Be de-e le ù kwu ha abe há zī ati. A swan. ²¹ He ’unyong ahwu a maa ndo gbe ligye, a de be le: "Gbe ’ì yi ugim Unim a, mi ba tem ba." A hà lè ngwee ’inong lishor lè he Efesos gye. ²² A lè wu he Usesaria. A gbe gye he Ujeruselem lè kong lè liwu bendi abongale. A hà gbe gye he Antiyok. ²³ A kwu há he ’anwaa ’unyong zangg a, hà gbe lè há. A lè gbe he ’igie Ugalesha lè Ufrigia fe bendi abongale ingie. ²⁴ Undi Ijuus angwu be maa ko le Aporlos a ma be he Efesos. A maa ba lè he Alezandria a. A ngye ná ù kong likong ’indee-indee, u ngye gbe lè igie Unim angi be ma fee leěti kangg. ²⁵ Be ma hwuá he ’ukwo Atyetyan Ujeso. A maa hwua bendi ’igyang gba lè Ujeso lè lityam ken, mà na a ngye gbe lè uhwuale Ujon lè umbwo akibale uma ufe-ufe a or. ²⁶ A keb ’iwom akongale he ushom angwu Ijuus ı᷆ kwu liwu porr. Uprisila befe lè Akwila be gyo he; be kpe-e gye lè he he ushu mbee lè bun de-e ’inunung gbe lè ’ukwo Unim. ²⁷ Aporlos a shi ugim le hang a gye he Akaya. Bendi abongale be kpell he gbe he afeeale ’ushia hwaa lè bebell abe há he Akaya de be le gbe a be, bè kpe-e. A lè wu há, a kpell bendi abe be bong ha Ujeso gbe he inung Unim. ²⁸ A fe ifung hwò Ijuus he udyeshi gbe he atyungale ubell lè he ashia Unim angi be fee leěti le Ujeso ù yi Ukristi, Undi-likpan angwu Unim a waa som a.

¹ He ’unyong ahwu Aporlos a ma yi he Ukorint, Uporl a ma gbe afee-afee be wu he Efesos. A ndè bendi abongale besuso há. ² A bii ābe le: "Gbé ma bong ha Ujeso, ma kpe Ukatia Kunyong Unim ngye a?" Be de-e le: "Li gyo gbe lè Ukatia Kunyong Unim ngye ye." ³ Uporl a kung bii ābe le: "Be hà kib amen he umbwo angwu hung a?" Be de-e le: "Umbwo akibale angwu Ujon a." ⁴ A de be le: "Ujon a maa kib bendi abe be bel àtyám lè he biban a he umbwo. A maa da bendi Izwell le bè bong ha undi angwu u᷆ pwom he lè há angwu be᷆ ko le Ujeso." ⁵ Be gyo ashin gyo-gyo, be kib ābe he umbwo he lizen Atyetyan Ujeso. ⁶ Uporl a kung abwo pwom ābe; Ukatia Kunyong Unim a be hwaa lè be; be fel kong igie ’ubong ’ususo, be kpe ’isom lè ha Unim kong. ⁷ Be maa mbee bendi lihwo lè be befee. ⁸ Uporl a gye he ushom angwu Ijuus ı᷆ kwu liwu. A kong ha abe porr afell akie; u fung fe be; u kaa he-e u᷆ hwua ābe gbe lè Kusu Unim. ⁹ Besuso be kpo àshi, be kee le be bong ye; be kong ban ’ukwo Atyetyan Ujeso há he liwu bendi. Uporl a kpe bendi abongale gbe lè be lè há. A ko bendi le bè be azu he ushom angwu undi angwu be᷆ ko lè Utiranes u᷆ hwua bendi. ¹⁰ A shi ashin aze afee. Bendi Eshia puu abe be ma yi Ijuus or, begaandi or, be gyo ’isom gbe lè Atyetyan Ujeso. ¹¹ Unim a shi bikwele-uhwo lè ikeb kangg gbe ha Uporl. ¹² Akatifu lè ábeé ’ihwom angi a gbe tyua Uporl or, be maa kung la ka bendi-angmam lè abe ikeb ibibi ì yi ha abe; be mbee, ikeb ibibi i gbe lè ha abe. ¹³ Bendi Ijuus besuso abe be maa tan mbee bipi ndō ikeb ibibi or, be maa kaa le be fel sha āshi he lizen Atyetyan Ujeso a. Undi-undi a de ikeb ibibi le: "Mi ndo-a he lizen Ujeso angwu Uporl u᷆ bun gbe lè he." ¹⁴ Bebwaa úkaandi angwu be᷆ ko le Usiba angwu u᷆ shang Unim na᷅ be maa shi ’imen i. Be ma yi bedyong-ifee. ¹⁵ Ikeb ibibi ana i kung de be le: "Mi ngye Ujeso, mi mbee ngye gbe lè Uporl. Ayang ù hà yi amen ufe?" ¹⁶ Ungikye umen angwu ikeb ibibi i ma yi ha ahe ana a buu lè kwu ābe he abwo kpam. A hwò ābe ikeb. Be fel bibaa-bibaa; bihwom bibell bi gie. Be fel buu ibuu shul lè há he ushom ungikye anwuna. ¹⁷ Bendi Ijuus puu lè begaandi he Efesos be gyo gbe lè shi, be fel he ’ushell. Bendi be mbee fem lizen Atyetyan Ujeso. ¹⁸ Bendi abongale gbamm be be, kong de bendi he ’ugbo gbe lè biwom bibibi abi be maa shi mà ukpong be hà bong ha Ujeso. ¹⁹ Besuso gbamm abe be maa shi anong be gbong àshia anong abell he ukem ting shī ’inde he ashi bendi puu. Be ma kwuu únde ashia amen ana, a ma yi igaa ikwudi asisilisi asisilisi. ²⁰ Be gye ’ushu bun igie Atyetyan Unim mbee bipi puu lè ikeb kangg. Bendi gbamm be bong ha Ujeso. ²¹ Biwom abin bi shi gbe puu, Uporl a hà shi ugim le hang a lè gbe he Umasedonia lè Akaya gye he Ujeruselem. A de le: "Gbe mi lè wu há, mi gya he Urom or titi." ²² A waa Utimoti befe lè Irastes lè he liwu bendi-utung bema som gye he Umasedonia. Ufe-gyang a ngyor kwu he Eshia. ²³ Nya he ’unyong ’umen ana na᷅ linaa li ma yi he Efesos kangg he ’uhwo bendi abe be᷆ pwom ’ukwo Atyetyan Ujeso. ²⁴ Ungikye angwu be maa ko le Udemitriyes angwu a maa shi aki isiliba a ma kung isiliba shi inwaa litelakpa ná ’atelakpa ake ’à yi he ushom únīm angwu be᷆ ko le Atemis. Aki ama a ma be lè únde ke bendi aki bema. ²⁵ A ko ābe puu lè bendi abe be maa shi ’itaa aki ’ibell be sho he ’iteng ken, u de be le: "Bebuye, ma ngye le ligbo lityan li be lè he aki amen i a. ²⁶ Men-agyang ma ndè, ma mbee gyo a᷆shi ungikye angwu be᷆ ko le Uporl i u᷆ shi. A de le litelakpa angi bendi be shi he abwo lì yi Unim a ye; u shi bendi gbamm hen he Efesos or, he ’ubong Eshia or, be gie igim ibell. ²⁷ Ki sha ’inunung ye, aki atyan a ba lè lizen libibi. Ashina ’ife-ife a ye, ki sha ’inunung ye, ushom únīm angwu be᷆ ko le Atemis u ba fel ’idideng, bedyan únīm umen angwu bendi Eshia puu kpe mbeè igye puu be᷆ fe-e be ba ban." ²⁸ Be gyo he a kong ashin. Lityam li nyung ābe; be fel gaa le: "Atemis angwu he Efesos a dyam!" ²⁹ Kihwee ’i ma yi mbeè Efesos puu. Bendi bemen gbamm ana be kwu Ugayas befe lè Alistakes. Bendi bemen befee i be maa ba utung ha Uporl lè he Umasedonia a. Be buu gbe lè be gya he ushokwo. ³⁰ Uporl a kung he-e ù gye há he liwu, bendi abongale be bong he le ù te ye. ³¹ Bekaandi ’ubong besuso abe be ma yi bedim-ma be som bendi le bè lè tim he anung le ù shi gye há he liwu ye. ³² Bendi puu be maa so-i hwee ’ihwee. Puu ubell, undi-undi a maa kong ’ima, undi-undi u kong ’ima. Bendi gbamm be ngye ná ’i baā nyong be fel há or ye. ³³ Besuso be de le Alezanda na᷅ u᷆ tan lè shi likorye Ijuus i ma be lè he, be naa he ’ushu. Alezanda a yor abwo de be le bè tyang lè ’ihwee he-e ù kong ke Ijuus he ashi bendi. ³⁴ Be nde shob le ù yi Ijuus a. Be keb agaale kong ’itaa ’iwom a ken le: "Atemis angwu he Efesos a dyam." Be gaa kpamm lè kwom he awa afee. ³⁵ He umbee-likel undi angwu a ma yi akawu há he ’ubong na᷅ a hà ndo shi ābe be kwun atyung. A kong le: "Men bendi abe he Efesos, bendi puu bé ngye le bendi abe hen he Efesos be fa ùnīm angwu be᷆ ko le Atemis angwu a dyam kangg. Ushom uma u᷆ yi hen. Há he ushom umen ana na᷅ be ma ndor ’ukor ahwu ’u ma mbu lè he lifung-atabe or. ³⁶ Undi ù hà ndo fung biwom abin ye. Mà kwun atyung. Mà shi ’iwom faale ugim ye. ³⁷ Má kwu bendi aben be lè be nyin. Ki shi le bē zì biwom he ishom Unim a or, ngwu wò ko le be kong ban ùnīm utyan ye. ³⁸ Gbe Udemitriyes befe lè bendi aki bema bè yi lè ushe ha undi, kì yi lè ati angi be᷆ maa ushe, ki shi lè bendi abe be᷆ maa ushe. Bè lè kpee há kong ban bende. ³⁹ Gbe ’iwom ’isuso ’ì yi há he afee pel àshi ma kee, mà kwu kpamm bendi Efesos be kpee hè be bè maa ushe, be kong amen áshi. ⁴⁰ Gbe li shi ’inunung ye, bekaandi Urom be ben li le li shi linaa nyin ’unyin. Kì yi lè atan-lengi angwu hang ’ihwee ’i kwu ’itel i ye. Gbe be bii li, li ngya atan-lengi angwu lì ke be ye." ⁴¹ A kong āshi puu, a hà de be le bè ndo gye.

¹ Linaa anyin li mbee puu, Uporl a hà ko bendi abongale be he ’iteng ken. A fe be ingie, u de be le: "Ishu ì so." A gbe ndo he Umasedonia. ² A lè tan mbee bipi há he ’igie ’imen ana bun biwom ingie de bendi. ³ A gye he Akaya lè kwu há afell akie. He ’unyong ahwu a maa kam le u gya he ’ubong Usiria, a gyo le Ijuus i kam le i gwa he; a shi ugim le u fel la gba he Umasedonia a, gya he Ufilipai. ⁴ Usopata, unwaa Upayires angwu a maa be lè he Beria, a te utung ha ahe. Alistakes befe lè Usekundes abe be᷆ be lè he Utesalonaika, lè Ugayas angwu u᷆ be lè he Udaabi lè Utikikes befe lè Utrofimes abe be᷆ be lè he Eshia be te utung ha ahe lè Utimoti. ⁵ Be lè wu he Ufilipai he ’ipi, mi Uluk, mi ma yi. Puu ubell be ma gbe ’ushu lè kwu he Utrowas nyong li. ⁶ Nyong be mbee lè ’ipam ibred angi i mbwee ye, li hà ngwee ’inong lishor lè he Ufilipai pwom ābe gye há he Utrowas. Li wu há he liti ledyong. Li ngyor kwu há ati adyong-ifee. ⁷ He ukpi-ikwu liti utyong leekwulukwu li lè kpee he ’iteng ken hè li lì bun ibred zī, li well gbe lè lihwu Atyetyan Ujeso nyong lı᷆ zī lizi abwo ipel. Uporl a kong ha bendi kpamm lè wu he ’ididyan ’usu lè ugim le ashi a taa u gba lè há. ⁸ Bimor-inde bi ma yi há he ushom ’usi he ’ipi li ma yi. ⁹ Ushomate ususo a ma yi há, be ko le Uyutikes. A ma yi kwu he uwindo. Le bwo Uporl a kong ha bendi gbe ’igbe, Uyutikes a mbu ’unde. Kunde ’u shi-e a mbu lè há he ushom ’usi angwu lekie be he itang. Be lè kung he, a fel likwom a. ¹⁰ Uporl a shul gye há lè mbu kpo he; u mam kwu-e. A de abe be sho há le: "Ufung ù be men ye. A tem wum." ¹¹ A tem mbo gye he ushom ’usi lè bun ibred zī. A kong ha abe kpamm ashi a gbe taa. A hà gbe lè há. ¹² Bendi be gbe lè ushomate angwu a ma mbu lè he uwindo ana uwum gye lè he he ushu. Bè yi lè igor kangg. ¹³ Li gbe lè ngwee ’inong lishor gye he Asos le li la kung Uporl. A de li le lì lè kwu há nyong he likorye ufe u tan ha abee a gya há. ¹⁴ A be tel li he Asos. Li kpe-e gye lè he he Umitilini. ¹⁵ He liti angi lefee li gye lè nya he ’inong lishor lè gbe gwaa ha Ukiyos. Ki zī liti ken, li kung be he Usamos. Ashi a mbee fem taa, li wu he Umalites. ¹⁶ Uporl a shi ugim le u ngwee ’inong lishor là gba he Efesos abee-abee teng u la ban ’unyong há he Eshia. A maa buu he-e ù nde le u wa he Ujeruselem he liti Kipam Upentikos a. ¹⁷ Uporl a som ’isom lè he Umalites gye he Efesos le bekaandi bendi abongale bè be hwaa lè he. ¹⁸ Be be. A de be le: "Má ngye ná mi shi aki lè ’ùnyong ’ugi kung lè há he ukpi-ikwu liti angi mi ma be he Eshia. ¹⁹ Mi shi aki agi nya a na undi angwu u᷆ fe Unim ù shi lè ’uhwo ambwele lè àkye᷅ he ashi lè bingie abi mi maa kpe le bwo bendi Ijuus be kam le be gwa-m. ²⁰ Ma ngye le mi ma mor amen adele ’iwom ’iyang-yang ashi mi ngye le ’i kwa lè lifem ka amen ye. Mi bun igie Unim de men, mi hwua amen he udyeshi or, he ishaale īme᷅n or. ²¹ Mi bun de Ijuus or, begaandi or, le bè bel lè he biban hwaa lè Unim, be bong ha Atyetyan Ujeso. ²² Kanaa-anaa i mi ndo ka Ukatia Kunyong Unim ife gya he Ujeruselem. Mi hà ngye ’iwom ashi ’ı᷆ be shi-m há or ye. ²³ Ashi mi kee-kee ngye ’ì yi le ’ubong ’uyang-yang ahwu mı᷆ gye, Ukatia Kunyong Unim u da-m le mi ba gya igaadye, mi kpe bingie há. ²⁴ Mi di le likpan ligi lì yi-m he ’ukpo ye gbangg, mi kee-kee kee le mì mbee aki angi Atyagi Ujeso a kung ke-m le mì shi. Aki angi há à yi le mì bun ’isom gbe lè inung angi Unim a tyung li gbe ha Ujeso. ²⁵ "Mi maa tan mbee ’ubong ’ūme᷅n bun gba lè Kusu Unim. Kanaa-anaa i mi ngye le mà nem ba nda-m ye. ²⁶ He atan-lengi anwun mi da amen ’unyin i le gbe undi ken or a waa nim lè he liwu līme᷅n, hà uben ù nem yi ugi a ye. ²⁷ Mi mor le mi de men gbe lè ugim Unim puu ye. ²⁸ Mà baa ’uhwo-men lè bendi puu abe Ukatia Kunyong Unim a ke men. Bè yi nya a na ìtiā. Mà kam bendi abe Unim a shi ābe be fel bema begyang gbe he lihwu Unwaa-ma. ²⁹ Mi ngye le mi gba lè nyin, bendi-ilam be ba ba he liwu līme᷅n, hè be bè lam amen mà tyang abongale. Bè yi nya a na inyia ibibi angi ı᷆ gwu ìtiā. ³⁰ Kunyong ’u mbee ba lè há ahwu bendi besuso lè ha amen liwu be᷆ be bè iman hè be bè shi bendi abongale bè bel fel pwom ābe befe a. ³¹ Mà kwu lè ’akang. Mà well le mi hwua amen lè àkye᷅ he ashi mbee ’unyong kpamm lè wu he aze akie. ³² "Kanaa-anaa i mi kung amen fe Unim lè igie inung ima he ’ubwo. Ù yi lè ikeb le u sha amen ma naa genn, u ke men ’ukwun ahwu a ndor ke bendi bema puu. ³³ Mi bell únde undi or, ngwu mì bell inditen undi or ye. ³⁴ Men-agyang ma ngye le aki angi mi-gyang mi shi lè abwo agi na᷅ a᷆ hwua igben ityan, bel ha bendi-utung begi. ³⁵ Mi tyung amen gbe he biwom puu abe mı᷆ shi le gbe he ashele aki ’itaa i li kpell bendi abe bè yi lè ukpell ke ’uhwo-bell ye. Lì well igie angi Atyetyan Ujeso ugyang a kong le: ’Igor i ba lè he ’iwom akele hwa akpēle.’ " ³⁶ Uporl a kong puu, a hà tim anung he itang kong ha Unim utung ha abe puu. ³⁷ Puu ubell be maa kya nya a na be maa gaǎ he lè uko le u ndo gya. ³⁸ Igie angi a ma de be le bè nem ba nda he ye na᷅ i maa ban ābe kangg. Be teng he lè wu he ’ipi ù ngwee ’inong.

¹ Li de be le ishu ì so; li gbe ligye. Li ngwee ’inong lishor gbe ligbe-ligbe gye he Ukos. Ashi a taa, li wu he Urodes. Li bo lè há gye he Upatara. ² Li ma nde ’inong há ashi ’ı᷆ ndè àshì gye he Ufenishia he ’ubong Usiria. Li lè ngwee āshi gbe. ³ Li lè wu he ’ipi lı᷆ naa ndè Usaipres; li gbe he ’igie Usaipres ashi he lizen ndo he ’ubong Usiria. Li lè shul he Utaya he ’ipi be maa ndo lè fem bigbor lè he afee ’inong. ⁴ Li ndè bendi abongale besuso há. Li ngyor kwu ha abe há zī ati adyong-ifee. Be de Uporl gbe he ikeb Ukatia Kunyong Unim le ù shī gye he Ujeruselem ye. ⁵ Kùnyong ’utyan ahwu le lì kwu ha abe nya ’u mbee, li gbe lè há gye ’ushu. Befe puu lè bengye-bell lè bebwaa-bell be teng li. Bel puu li tim anung he itang gwaa ha ’ibam kong ha Unim. ⁶ Li hà de bende le ishu ì so. Bel li lè ngwee ’inong; befe be tem gye he ushu. ⁷ Li bo lè he Utaya he ’inong lishor lè wu he Utolemayes. Li shul lè kong lè bendi abongale abe bè yi há; li kwu ha abe liti ken. ⁸ Ashi a taa, li bo lè há gye he Usesaria. Li gye he ushu Ufilip angwu a maa bun ’isom ’inunung mbee bipi lè kwu ha ahe há. A ma yi he liwu bendi bedyong-ifee abe be ma waa he Ujeruselem le bè hwua lizi ke bendi abongale. ⁹ A ma yi lè bebwaa bengingye bèndè abe be ma wa gye abee ye. Bebwaa-ma bemen ana be maa kpa ’isom lè ha Unim kong. ¹⁰ Li kwu há zī ati. Undi angwu u᷆ tye ugie ’isom Unim angwu be᷆ ko le Agabes a be lè he Ujudia. ¹¹ A be hwaa lè bel. A kung ukwob Uporl bua ’uhwo-ma abwo lè abee; u de le: "Ukatia Kunyong Unim a de le, ’Kitaa i na᷅ Ijuus ı᷆ be bua undi angwu ù yi lè ukwob anwun he Ujeruselem, be kung he ke bendi abe bè yi Ijuus a ye.’ " ¹² Bel lè bendi abe be teng li tim Uporl anung le ù gye he Ujeruselem ye. ¹³ A de li le: "Ma sha ’ibang a? Ma kya nyin le mì wee abwo â? Mi kam le bè bua mi indi ife-ife a he Ujeruselem ye. Mi kam le bè gwu-m igwu or he ’uhwo Atyetyan Ujeso." ¹⁴ Li kong na ana a bong ye. Li tyang he: li de le: "Kì shi nya a na Unim a kee." ¹⁵ Li kwu há gbe ’anwaa ’igbe, li hà kam biwom bityan gbe ndo he Ujeruselem. ¹⁶ Bendi abongale besuso lè he Usesaria be te utung ha abel. Be te lè bel gye he ushaale undi angwu be᷆ ko le Unesen angwu ’ı᷆ ma yi le lì lè kwu ha ahe. Unesen umen i a maa ba lè he Usaipres a. A bong ha Ujeso kung lè há ukpi-ikwu a. ¹⁷ Li lè wu he Ujeruselem. Bendi abongale be kpe li lè igor. ¹⁸ Ashi a taa, Uporl a gbe utung ha abel le u la ndà Ujems. Bekaandi bendi abongale or be ma yi há. ¹⁹ Uporl a kong lè be; u de be biwom puu abi Unim a shi ha bendi abe bè yi Ijuus a ye gbe he aki angi a shi. ²⁰ Puu ubell be pee Unim he ’unyong ahwu be gyo he. Be de Uporl le: "Unwandatyan, wo-gyang wo ndè ná Ijuus gbamm or i bong ha Ujeso. Ki shi le be ndor Iten Ijuus kangg. ²¹ Be gyo le wo hwua Ijuus mbee abong bendi besuso puu mbee ’unyong le bè tyang Iten Umosis, bè nem ten bebwaa-bell or, ngwu bè shi akpe angi befe Ijuus be᷆ shi or ye. ²² Ki shi na ana be ba gyo le wo be. Wò ha᷅ sha ná a? ²³ Shi ’iwom ashi lı᷆ da-a le wò shi. Bendi bè yi i nyin bèndè abe be shi ukyebb ke Unim. ²⁴ Te ha-a à lè shi ’uhwo-gang wò fel utaa-utaa utung ha abe nya a na Iten ityan, bel Ijuus, i kong. Wo-ò ke únde angwu ’ì yi le bè ke hè be bè hà hwaā ābe lishi nya a na bendi be᷆ shi nyong be᷆ ke úkyébb anwun. Gbe wo shi ná, mà undi uyang-yang u ngya le biwom abi be gyo gbe lè wo bì yi uman a. Undi uyang-yang u ngye le wo-o ndor Iten Umosis. ²⁵ Bendi abe bè yi Ijuus a ye abe be fel bendi abongale befe, li fee ’ushia de be le li shi ugim le bè zī biwom ūkèm ye, be zī anung inyia or, ngwu inyia angi be ngib gwu he abwo or ye, be mbee ndor ’uhwo-bell betaa-betaa lè he akpela atanale." ²⁶ Ashi a taa, Uporl a gbe lè bendi abena, lè shi ’uhwo-ma he-e ù fel utaa-utaa utung ha abe nya a na Iten ityan, bel Ijuus, i kong. A kung gye he Ushom Unim; u la da bendi ’ugii ati angi a teng gye he umbee-likel liti mà ukpong be hà shang Unim ke be. ²⁷ He ’unyong ahwu ati amen adyong-ifee i a maa ndo mbee, bendi Ijuus besuso abe be᷆ be lè he Eshia be nde Uporl he Ushom Unim. Be shi bendi puu abe bè yi há be fel he ingywo fe Uporl. Be lè shwia kwu-e. ²⁸ Be gaa le: "Men bendi Izwell, mà be kpell li. Ungikye anwun na᷅ u᷆ tan mbee bipi kong ban bendi betyan lè Iten ityan lè Ushom Unim anwun. A mbee be lè bendi abe bè yi Ijuus a ye or he Ushom Unim be ban ’iteng ashi ’ì yi ndor ta-ta ke Unim!" ²⁹ (Be kong ashin likorye be ma ndè Utrofimes angwu u᷆ be lè he Efesos há he lifung-ushu utung ha Uporl. Be kong le Uporl a gye lè he há he Ushom Unim.) ³⁰ Ki fel há he ’ubong yia-yia-yia. Bendi be buu lè kwu Uporl; be shwia gbe lè he lè há he Ushom Unim. Nya ’ukwo-ukwo be shī àshì he Ushom Unim. ³¹ He ’unyong ahwu be maa fel kaa le be gwa Uporl, bendi besuso be som undi le ù lè de ukaandi ishogya angi Urom le linaa likaandi lì yi mbeè Ujeruselem puu. ³² Nya ’ukwo-ukwo ukaandi anwuna a kpe bekaandi besuso lè ishogya ibell buu lè be gye há. Bendi be nde-e utung ha ishogya, be tyang Uporl ikwun akpamale. ³³ Ukaandi anwuna a lè kwu Uporl; u de le bè fe-e ashishilika afee. A bii liwu anyina le: "Ungikye umen i u ba lè hung a? A shi ’ibang a?" ³⁴ Puu abe há he liwu, undi-undi a maa gaa da he ’ima, undi-undi u gaa de-e ’ima. Kihwee ’i ma go gbe le ukaandi anwuna a gyo ’iwom ashi Uporl a shi ye. A hà de le bè gye lè Uporl he ushaale ishogya. ³⁵ Be gye lè he lè wu he ’ipi be᷆ mbo gye he afee, ishogya i fel kung he ikung likorye liwu bendi li ma yi lè ingywo kangg. ³⁶ Bendi puu be kwuo pwom ābe, bè yii gaa le: "Mà gwu-e! Mà gwu-e!" ³⁷ He ’unyong ahwu be maa ndo mbo gye he afee, Uporl a kung de ukaandi ishogya le: "Mì nya da-a ’iwom a?" Ukaandi a bii he le: "Wo kong igie Igrik mbee a? ³⁸ Ki ze le wò yi ungikye Igyept angwu íti a ma gbong bendi asi lisi ’ugbe lihwo abe be kam ’ukye gye he libeb a ye a?" ³⁹ Uporl a fan he le: "Mì ye ufe a ye. Mì yi undi Ijuus a. Be hwan mi he lishi Usilisia angi be᷆ ko le Utaasos angi lì yi he ’ukpo a. Kusi hā tyang mi mî kong ha bendi aben." ⁴⁰ Ukaandi anwuna a bong. Uporl a bo naa ’inaa há he ungwu likong, yor abwo de be le bè kwun atyung. Be kwun atyung. Uporl a kung kong ha abe he igie Ihibru le:

¹ "Betyagi lè bebuye, mà dang ’utyung mî de men gbe lè ’uhwo-gi." ² Be gyo he u kong he igie Ihibru. Be hà kwun atyung shangg. Uporl a gye ’ushu kong le: ³ "Mì yi undi Ijuus a. Be hwan mi he lishi Usilisia angi be᷆ ko le Utaasos a. Hen he Ujeruselem na᷅ mi ma kwu kpè. Ugamaliyell na᷅ a ma hwua mi iten betietyan kangg. Mì yi lè ’igyor he ashele aki Unim nya a na men abe ma sho nyin a. ⁴ Mi maa ka bendi abe be᷆ pwom ’ukwo Ujeso Ukristi ’ingie kpamm be gbe hwō. Mi kwu bengikye or, bengingye or, fe igaadye. ⁵ Usu bekaandi abe be᷆ shang Unim lè bekaandi abe be teng be naa mi ushada le mi kong ’igyang a. Be ke-m ashia le mì lè ke betyan Ijuus he Udamasikos. Mi kung bo ndo há, he-m mì lè kwu àbe be᷆ pwom ’ukwo Ujeso Ukristi, mi fe be ashishilika be lè be he Ujeruselem be ke be ’ingie." ⁶ "Nya a na mi maa tan be fel kpee-kpee ha Udamasikos he libwee ’udyan lishi, kikung-gbo ashi lè he lifung-atabe ’i kung taa imbul-imbul fe-m kel-kel kpe lishi. ⁷ Mi mbu tyang he itang, mi gyo igie i da-m le: ’Usorl, Usorl, ’ibang a, wo᷆ ke-m ’ingie?’ ⁸ Mi-i kung bii le: ’Atyagi, wo ayang a?’ A kung de-m le: ’Mi Ujeso angwu he Unazaret angwu wo᷆ ke-m ’ingie a.’ ⁹ Bendi abe be ma yi utung ha ami be ndè ’ikung-gbo, ukpor be gyo igie undi angwu a maa kong ha ami ye. ¹⁰ Mi kung bii le: ’Atyagi, mì shi ná a?’ Atyagi Ujeso a de-m le: ’Bo ’inaa gye he Udamasikos. Nya na᷅ be᷆ be da-a biwom puu abi Unim a kee le wò shi.’ ¹¹ Bendi-utung begi be kwu-m abwo gye lè mi he Udamasikos likorye ’ikung-gbo ’imen ana ’i ma hwuǎ mi àshì. ¹² "Ungikye ususo a ma yi há angwu be᷆ ko le Ananayas. A ma yi undi angwu u᷆ fe Unim, u ndor Iten ityan a. Ijuus puu he Udamasikos i maa ka he ife. ¹³ A be naa gwaa ha ami, u de-m le: ’Unwandagi Usorl, fel ndè.’ Nya ’ukwo-ukwo mi fel nda. Mi bel àshì nde-e. ¹⁴ A de le: ’Unim betietyan a waa kung-a le wò ngye ugim uma, wo ndè Unwaa-ma ununung, wo gyo igie ima igyang angi u᷆ kong. ¹⁵ Wo ba naá he ushada gba he abunale de bendi puu biwom abi wo ndè lè abi wo gyo. ¹⁶ Wo mbee kwa nyong ’ibang a? Bo ’inaa hè be bè kib-a he umbwo hè Unim u᷆ to taa-a lè he biban bigang ná wo᷆ kong ha ahe.’ " ¹⁷ "Mi tem gye he Ujeruselem. He liti ken nyong mi ma yi he Ushom Unim mi maa kong ha Unim, Unim a tyung mi le Atyagi Ujeso a be de-m le: ¹⁸ ’Gbe lè hen he Ujeruselem akikye likorye bendi be ba bong kpa àshi wo᷆ be bun de be gbe lè mi ye.’ ¹⁹ Mi kung fan le: ’Atyagi, bé ngye dangg le mi maa gya he ishom angi Ijuus ı᷆ kwu liwu la kwa bendi abe be bong ha awo, mi kpam ābe. ²⁰ He ’unyong ahwu be ma gwu Ustibin angwu a maa bun gbe lè wo, mi or mi ma yi há. Mi ma bong le bendi abe be gwu-e be shi ’i ngbebb, mi kpē aliga abell kwu ābe.’ ²¹ Atyagi a kung de-m le: ’Ndo te, mi som-a gya hwaa lè bendi abe bè yi Ijuus a ye he ’ipi ’ì yi lè ’igbe.’ " ²² Bendi abena be dang ’utyung gyo Uporl kpamm a gbe kong ashin. Be keb agaale le: "Mà gwu-e. A kpè le u kwa uwum ye." ²³ Be maa gaa, be yor bihwom bibell, be shi ’umbulmbul ’u teb gye he ’usi. ²⁴ Ukaandi umen angwu lè he Urom ana a de bendi bema le bè gye lè he he afee ushaale ishogya, bè kpam he he-e ù de be atan-lengi angwu Ijuus ı᷆ gaa fe-e ’itaa i. ²⁵ Be bua he indi le be ndo kpam he. Uporl a bii undi ishogya angwu ù yi naa há le: "Uten a bong le wò kpam undi Urom angwu be wa maa he ushe le a shi ’iwom a or ye a?" ²⁶ Undi ishogya anwuna a gyo ashin, a lè bii ukaandi le: "Kibang wo la shi nyin? Ungikye anwuna ù yi undi Urom a." ²⁷ Ukaandi a lè bii Uporl le: "De-m, wò yi undi Urom â?" Uporl a bong. ²⁸ Ukaandi umen ana a kung de le: "Mi-i ma ke únde a go kangg, mi hà fel undi Urom." Uporl a de-e le: "Undi Urom na᷅ a hwan i-mi." ²⁹ Bendi abe be ma be le be bii Uporl bibibi be tem item. Ukaandi angwu a gyo le Uporl ù yi undi Urom a ana, u fel he ’ushell likorye a fe-e ashishilika. ³⁰ Ukaandi umen angwu lè he Urom ana a kee le u ngya ’iwom kpa-kpa ashi Ijuus i de le Uporl a shi. Ashi a taa, a kong, be waa Uporl ashishilika; u de bekaandi abe be᷆ shang Unim lè bìkēm ukoto abi bi teng le bè lè kpee ukem. A kpē Uporl lè naa ābe he ’ushu.

¹ Uporl a ndè bìkēm ukoto kporr. A hà de be le: "Bebuye, ugim ugi ù yi-m utaa-utaa gbe lè biwom puu abi mı᷆ shi he ashi Unim kpamm be wu ’unyin nyin." ² Ananayas angwu ù yi Usu bekaandi abe be᷆ shang Unim a de bendi abe bè yi naa gwaa ha Uporl le bè kpam he ’ubwo he ungwu. ³ Uporl a kung de-e le: "Wo angwu wo ngbèbb item, ban afee, Unim u ba kpam-a awo or titi. Wò yi kwu há ana le wo maa mi ushe ná Iten i kong, ukpor wo-o ban Iten a nyong wo᷆ de le bè kpam mi ana." ⁴ Bendi abe be naa gwaa ha Uporl be de-e le: "Taa! Shī kong ban ukaandi ye." ⁵ Uporl a kung de be le: "Bebuye, mi ngye le ù yi Usu bekaandi abe bè shang Unim a ye. Be ma fee ndor he ’ushia Unim leěti le: ’Undi ù kong ban ukaandi angwu u᷆ nde gbe lè bendi ye.’ " ⁶ Uporl a ndè le bendi besuso há he liwu be ma yi Isadusis, besuso be shi Iferesis. He atan-lengi anwun a kung gaa há he liwu libell le: "Bebuye, mi-ì yi Iferesis a, mi shi unwaa Iferesis a. Mì yi he ukoto nyin, le bwo mi ndor lishi le bendi abe be hwō be ba wum a." ⁷ A kong ashin kong-kong, Iferesis befe lè Isadusis be fel shwan lè bende. Liwu anyina li ma tang he abwo. ⁸ (Bendi Isadusis be de le bendi be ba wum lè he lihwu ye. Be mbee de le idengell Unim or ì yi, nyong ihwutang ì yi ye. Iferesis ife i bong le bimen bikie nyin bì yi.) ⁹ Be fel gaa kangg. Bendi besuso abe be᷆ hwua bendi Iten abe bè yi he likwu Iferesis be bo ’inaa, be fel gaa fe be le: "Li ndè ’ibibi ashi ungikye anwun a shi ye. Pisoye udengell Unim a kong ha ahe ’igyang a; pisoye uhwutang a." ¹⁰ Be fel shwan kangg. Ukaandi ishogya a fel he ’ushell le hà nyin bè shwia wal Uporl abwo or. A som ishogya ima gye há he liwu bendi le bè lè kpe Uporl lè ikeb gbe lè he lè há gye he ushaale ishogya. ¹¹ Kusu ’u gye, Atyetyan Ujeso a be naa gwaa ha Uporl de-e le: "Shī shell ye. Wo ma bun de bendi gbe lè mi he Ujeruselem. Wo ba bun da bendi abe he Urom or titi." ¹² Ashi a taa leèti, bendi Ijuus be lè kpee ukem shi ugim ná bè be shi. Be tam le kì yi lè ’iwom ashi ’ì hà ndo shi ābe bè zī lizi or, ngwu bè ngwo umbwo or ye kpamm be gbe gwu Uporl. ¹³ Bendi abe be ma tam ashin be maa gba gyong asi afee. ¹⁴ Be lè hwaa lè bekaandi abe be᷆ shang Unim lè bekaandi abe he ’ubong, de be le: "Bel puu li kwu he ’iteng ken tam le li za᷆ lizi ye kpamm li gbe gwu Uporl. ¹⁵ Kanaa-anaa i men lè bìkēm ukoto puu mà som ’isom hwaa lè ukaandi ishogya angwu u᷆ be lè he Urom le ù be lè Uporl hwaa lè men. Mà lam he le ma kee le ma mbee gyo he ’inunung. Li ba la gwa he há he ’ukwo mà ukpong u hà wu hen." ¹⁶ Unwaa unwanam Uporl a gyo le be tim le bè gie he ’ukwo nyong he. A gye há he ushaale ishogya lè de Uporl gbe lè shi. ¹⁷ Uporl a kung undi ishogya ken ko. A de-e le: "Te lè ushomate anwun lè hwaa lè ukaandi ugang. U yi lè ’iwom ashi a kee le u da ukaandi." ¹⁸ Angwu ishogya ana a kpe-e gye lè he he ’ipi ùkaandi. A de ukaandi le: "Undi igaadye angwu be᷆ ko le Uporl ana a ko mi. A de-m le mì be lè ushomate anwun be hwaa lè wo likorye ù yi lè ashi u la da-a." ¹⁹ Ukaandi ana a kwu-e abwo he ’ubwo, gbe lè he gye he ufaa lè bii he le: "Wò yi lè ’ibang a le wo da-m?" ²⁰ A fan he le: "Ijuus i tim le, kuhwo bè be lam-a le wò te lè Uporl hè bìkēm ukoto bì mbee gyo he ’inunung. ²¹ Shī dang ’utyung gyo ābe ye, likorye bendi bè yi há, be gba gyong asi afee abe nyin be᷆ ndyell he ’ukwo nyong Uporl. Puu ubell be tam le be za᷆ lizi or, ngwu bè ngwo umbwo or ye kpamm be gbe gwu-e. Bè fel yi kwu, be nyong-a awo a le wò bong." ²² Ukaandi ishogya anwuna a de-e le ù de undi le a be bun ashin de-e ye. A hà de-e le ù ndo gye. ²³ Ukaandi ana a hà ko ishogya ima, bendi befee, de be le: "Mà lè be lè ishogya asi lihwo. Mà be lè bendi asi akie lè be lihwo abe be᷆ pwom bekaa-inyia lè bendi asi lihwo abe be᷆ kwu akung. Mà de be le bè kam hè be nyin bè bo he inde idyong-inde lè ’usu gye he Usesaria. ²⁴ Mà shun bekaa-inyia ke Uporl he-e ù pwom; ma te lè he lè ke Ukaandi Ufelis faale ’idoale." ²⁵ Ukaandi umen ana a kung ’ushia fee hwaa lè Ufelis le: ²⁶ "Ufelis ukaandi utyan, mi Ukeladiyes Ulisias, mi kong lè wo. ²⁷ Bendi Ijuus be ma kwu ungikye anwun, be kaa he agwele. Mi ma gyo le ù yi undi Urom a. Bel ha ishogya igi li lè kpan he. ²⁸ Mi gye lè he hwaa lè bìkēm ukoto bibell, likorye mi kee le mi ngya ’iwom ’ibibi ashi be de le a shi. ²⁹ Mi nde le a shi ’iwom ashi ’i kpè le bè gwu-e or, ngwu bè fe-e he igaadye or ye. Kiwom ashi be kee-kee kong fe-e ’ì yi ’iwom gbe lè iten ibell ife-ife a. ³⁰ Undi a be de-m le Ijuus i kam le i gwa he. Mi hà shi ugim le mi som he hwaa lè wo. Mi de bendi-linaa bema le bè te lè ushe uma lè hwaa lè wo." ³¹ Ishogya i lè shi a᷆shi a de be. Be te lè Uporl nya lè ’usu lè wu he Antipatris. ³² Ashi a taa, ishogya angi he abee i tem gye he ushu le angi he bekaa-inyia bè ndo te lè Uporl. ³³ Be te lè he lè wu he Usesaria. Be kung ’ushia or, Uporl or, ke ukaandi. ³⁴ Ukaandi ana a bo ’ushia. A hà bii Uporl ’ubong ahwu u᷆ be. Uporl a de-e le u ba lè he Usilisia a. ³⁵ Ukaandi a de-e le: "Bendi-linaa begang be ba, mà mi gyo-a." A hà de le bè gye lè Uporl he ukoto Uherod, be kang he há.

¹ Ati a gbe adyong, Ananayas angwu ù yi Usu bekaandi abe be᷆ shang Unim befe lè bekaandi besuso lè Utateles angwu a ma yi uloya be gye he Usesaria. Be lè hwaa lè Ufelis hè be bè de-e ’ibibi ashi Uporl a shi. ² Be ko Uporl, Utateles a fel kong fe-e le: "Ukaandi, le bwo wo bi lishi, li fel lè ikwun ’i gbe ’igbe. Wo gie biwom gbamm ha abel ’ubong hè hwu ’ù kwu ’ununung. ³ Mbee ’unyong kpamm lì yi lè igor he ashin mbee bipi puu. Li pee-a kangg. ⁴ Mi kee le mi ban-a ’unyong gba gyong ye. Mi tim-a anung le wò hā kwu lè inung ha-a à dang ’utyung gyo li he ’anwaa ’unyong zangg. ⁵ Ungikye anwun ù yi undi linaa ashele kangg a. A kpi linaa ashele he liwu Ijuus angi ì yi mbee igye puu. Ufe na᷅ u᷆ teng likwu bendi abe be᷆ ko le Unazarin likorye be bong ha Ujeso angwu u᷆ be lè he Unazaret. ⁶ A maa kaa le he-e ù ban Ushom Unim. Li hà kwu-e. [Li ma kam le li maa he ushe keè ha iten ityan, ⁷ ukpor Ulisias angwu a ma yi ukaandi ishogya a ma be shwia kpe kung he lè ha abel lè ikeb kangg. ⁸ Ulisias a hà ke uten le bendi-linaa bema bè be hwaa lè wo.] Wò bii he bibibi, mà wo-gyang wo ndà biwom abi lı᷆ kong fe-e i." ⁹ Ijuus i kong fe-e, be bong le abin puu bì yi ’igyang a. ¹⁰ Ukaandi anwuna a yor abwo de Uporl le ù ndo kong igie ima. Uporl a kung kong le: "Mì yi lè igor ná mi ndo maa ushe ugi he ashi agang nyin, likorye mi ngye le ’i fel aze gbamm ná wo kwu ná undi angwu u᷆ maa bendi ’ubong ahwun ushe. ¹¹ Bendi or be ba da-a le ati lihwo lè ngi afee a gbe ná mi ma gye he Ujeruselem, mí-ì lè fe Unim. ¹² Ijuus i ma nde-m mi fa undi ifung he Ushom Unim or, ngwu bè nde-m mi shi linaa ha bendi he ishom ibell angi be᷆ kwu liwu or, ngwu he ’iteng ’iyang-yang or ye. ¹³ Bè yi lè ’iwom ashi bè hà ndo shi tyung le ashi be᷆ kong fe-m ’ì yi ’igyang a ye. ¹⁴ Ashi mi da-a ’ì yi le be kong ’igyang a le, mi-i fa Unim betietyan he ’ukwo ahwu befe be de le ’ù yi dell-dell ye. Ukpor mi bong biwom puu abi be fee he ’ushia Iten Umosis lè ashia bendi abe be᷆ tye ugie ’isom Unim. ¹⁵ Kitaa ashi befe be bong le bendi puu abe benunung or, abe bebibi or, be ba wum lè he lihwu, kitaa ’imen na᷅ mi bong. ¹⁶ He atan-lengi anwun mi kaa he ’unyong ’uyang-yang hè ugim ugi ù kwu-m utaa-utaa ha Unim or, bendigye or. ¹⁷ "Mi ma kwu lè ’igbe lè he Ujeruselem he aze gbamm. Mi hà tem gye há lè únde le mi la shang Unim, mi mbee kpell bendi begi. ¹⁸ He ’unyong ahwu mi maa shi ’imen ashin na᷅ be nde-m he Ushom Unim, mi ma mbee lè ashele ’uhwo-gi le mì fel utaa-utaa nya a na Iten ityan i kong. Bendi gbamm be ma yi utung ha ami há ye; linaa li shi há ye. ¹⁹ Ukpor bendi Ijuus besuso abe be maa be lè he ’ubong Eshia be ma yi há. Bè kwu lè ’iwom ashi bè kong fe-m, hang befe na᷅ be᷆ be naa-a he ’ushu kong a᷆shi mi shi. ²⁰ Gbe ná a ye, wo de abe bè yi nyin le bè kong ’ibibi ashi be ma nde le mi shi he ’unyong ahwu mi ma naa he ashi bikem ukoto, ²¹ fem ’iwom ken ashi mi ma gaa kong há tyang. Mi gaa le: ’Má maa mi ushe ’unyin i likorye mi bong le bendi abe be hwō be ba wum.’ " ²² Ufelis angwu a ngye dangg gbe lè ’ukwo Ujeso a fe likong Uporl lishi le: "Ukaandi angwu be᷆ ko le Ulisias u ba, mà mi tang-a ushe." ²³ A de undi ishogya angwu u᷆ kang Uporl le ù kang he, ukpor ù tyang he he-e ù kwu porr ’unyong ’ususo, u tyang bedim-ma bè be kong lè he, be kpell he. ²⁴ Ati a gbe, Ufelis a be lè ungye-ma angwu a ma yi Ijuus, be᷆ ko le Udrusila. A kong, be be lè Uporl. A dang ’utyung gyo Uporl ná u᷆ bun gbe lè abongale ha Ujeso Ukristi. ²⁵ Ukpor he ’unyong ahwu Uporl a gye ’ushu bun gbe lè ’inunung ashele lè ’uhwo akwele lè Liti Ushe Unim angi lı᷆ be, Ufelis a fel he ’ushell. A de-e le: "Ndo gye. Mi ndà ’unyong, mà mi mbee ko-a." ²⁶ U kong ashin, ù yii ndor lishi le Uporl u ndyebb abwo lè he. He atan-lengi anwun a maa ko he akikye-akikye kong ha ahe. ²⁷ Aze a gbe afee, Uporshus Ufestes a fel ukaandi lishi Ufelis. Ufelis a ma tyang Uporl he igaadye likorye a kee le u sha nyin Ijuus.

¹ Ki zī ati akie ná Ukaandi Ufestes a be wu he Usesaria. A bo lè há gye he Ujeruselem. ² Bekaandi abe be᷆ shang Unim lè bekaandi Ijuus be be de-e gbe lè ushe ubell ha Uporl. Be tim Ufestes anung le, ³ ù shi nyin ābe gbe he asomale ko Uporl be he Ujeruselem. Be kee le ù shi ashin likorye be kam le be la gie he ’ukwo gwa he. ⁴ Ufestes a kung de be le: "Uporl ù yi he igaadye angi he Usesaria a. Ki shi le baale mì tem gye há. ⁵ Gbe ’ì yi le a shi ’iwom ’ibibi, mà tyang bekaandi bēme᷅n bè fe utung ha ami gye há he Usesaria lè kong ’iwom ashi a shi." ⁶ Ufestes a kwu há lè wu he ati adyong-ikie or, lihwo or, u hà bo ndo he Usesaria. Ashi a taa, a lè kwu he ukoto. A som ko Uporl. ⁷ Uporl a be. Bendi Ijuus abe be᷆ be lè he Ujeruselem, be be naa kel-kel fe-e keb akongale biwom bibibi gbamm fe-e. Be ma yi lè ’iwom ashi ’ı᷆ tyung le abi be kong bì yi ’igyang a ye. ⁸ Uporl a kung maa ushe uma le: "Mi shi ’iban fe Iten Ijuus or, ngwu mì shi fe Ushom Unim or, ngwu mì shi fe Usu ukaandi angwu he Urom or ye." ⁹ Ufestes a ma kee le u sha nyin Ijuus. Kife na᷅ ’i shi-e a bii Uporl le: "Wo kee le wo gya he Ujeruselem, mî lè maa-a ushe há he abi be kong fa-a nyin a?" ¹⁰ Uporl a de-e le: "Mi-ì yi naa he ukoto Usu ukaandi Urom he ’ipi ’ì yi le bè maa mi ushe a. Wo-gyang wo ngye dangg le mi shi Ijuus ’iwom ’ibibi ye. ¹¹ Mì bia uten, mi shi ’iwom ashi le ’ì kpè le bè gwu-m, hang mi swan lihwu ye. Gbe abi be kong fe-m bì yi ’igyang a ye, hà ’ì yi lè undi angwu ù hà ndo kung mi ke be ye. Mi kpo ushe gye he ’ipi Usu ukaandi angwu he Urom." ¹² Ufestes a shi azu ha bendi bema puu. A hà de Uporl le: "Wo kpo ushe gye he ’ipi Usu ukaandi angwu he Urom. Há na᷅ wo᷆ be gye." ¹³ Ki zī ati, usu ususo angwu be᷆ ko le Agripa befe lè Ubanis be be le be ba kong lè Ufestes. ¹⁴ Be kwu há zī ati. Ufestes a de usu gbe lè Uporl le: "Ungikye ususo ù yi hen angwu Ufelis a ma tyang he fe he igaadye. ¹⁵ He ’unyong ahwu mi ma gye he Ujeruselem, bekaandi Ijuus abe be᷆ shang Unim lè abe he ’ubong be ma be hwaa lè mi, kong biwom gbamm fe-e. Be de-m le mì bong le bè gwu-e. ¹⁶ Mi de be le undi Urom ù hà ndo kung undi angwu be de le a bia uten ka faale afaale a ndè bendi-linaa abe be kong ’imen i fe-e, u maa ushe ha abe ye. ¹⁷ Befe puu be be. Ashi a taa, mi bo faale ’unyong abanale lè kwu he ukoto, mi som ko Uporl. ¹⁸ Bendi-linaa bema be bo ’inaa kong, ukpor biwom abi be ma kong fe-e bi ma yi biwom bibibi abi mi gim he lityam ligi le be kong a ye. ¹⁹ Be maa kee-kee fung fá he gba lè akpe abell lè ungikye ususo angwu be maa ko le Ujeso angwu a ma hwō angwu Uporl u᷆ de le ù yi uwum a. ²⁰ Mi ma tyāng ná mì tang ushe umen i. Mi hà kung bii Uporl le a kee le u gya he Ujeruselem mî lè maa he ushe há a? ²¹ Uporl a kpo ushe. A de le bè ngyor lè he kwu he igaadye kpamm hè Usu ukaandi hwan ù tang ushe uma. Mi de le bè kang he kpamm mi gbe som le bè te lè he he ’ipi Usu ukaandi Urom." ²² Agripa a de Ufestes le: "Mi-í kee le mi gyo ungikye umen i." Ufestes a kung de-e le: "Kuhwo mà wo gyo he." ²³ Ashi a taa, Agripa befe lè Ubanis be be ’ugwu-ugwu be he afee ukoto he ’ipi bekaandi ishogya lè bekaandi he ’ubong be sho. Ufestes a ma ke ikeb le bè be lè Uporl. ²⁴ Ufestes a kung kong le: "Usu Agripa lè men puu abe mà yi utung ha abel nyin, mà nde ungikye angwu Ijuus puu he i nyin or, he Ujeruselem or, be᷆ de-m biwom bibibi gbe lè he. Befe puu be kung gaa kong le bè gwu-e. ²⁵ Ukpor mi ndè ashi a shi ngwu mì de le bè gwu-e ye. Le bwo ufe-gyang a kpo ushe gye he ’ipi Usu ukaandi angwu he Urom, mi de le mi kong hè be bè te lè he há. ²⁶ Mì yi lè ’iwom kpa-kpa ashi mì fee de Usu ukaandi Urom gbe lè he ye. Mi be lè he le ù be naa amen he ashi le ha-a wo Usu Agripa, wò maa he ushe ha-a à de-m ashi mì fee. ²⁷ Mi gim le ’ì yi ’inunung a le mì som undi igaadye lè hwaa lè Usu ukaandi Urom faale afeeale biwom bibibi abi be kong fe-e ye."

¹ Agripa a kung de Uporl le: "Wo fel lè libwo le wo maa ushe ugang." Uporl a yor ’ubwo ’uma kong lè usu, u keb akongale le: ² "Usu Agripa, mi ndè le mi zī ’ufe a ná mi naa he ashi agang, mi maa ushe he biwom bibibi puu abi Ijuus i de le mi shi. ³ Le bwo wo ngye dangg gbe lè akpe Ijuus lè ifung ibell, mi tim-a anung le wò mbu ’uhwo dang ’utyung gyo mi. ⁴ "Bendi Ijuus puu be ngye ná mi ma yi kung lè há he ’isun ’igi. Bé ngye le mi kwu he ’ubong ’ugi lè he Ujeruselem a kung lè he ukpi-ikwu. ⁵ Befe-gyang be ngye le mi ma yi he likwu Iferesis angi lı᷆ ndor iten ’indee-indee a. Gbe ’ì yi le be bong ibong, befe-gyang or be da-a gba lè shi. ⁶ Mi naa i le mà maa mi ushe, le bwo mi ndor lishi ha úkyébb angwu Unim a ma ke betietyan le u wum bendi lè he lihwu a. ⁷ Úkyébb umen i na᷅ bendi puu he ashi atyan lihwo lè ngi afee be᷆ ndor lishi le be kpa nya a na be᷆ fe Unim ishu or, kusu or. Usu, Ijuus i kong abin puu fa-m, le bwo mi ndor lishi ha úkyébb umen i a. ⁸ Ki shi ná a, men Ijuus, ma bong le Unim u wum bendi lè he lihwu ye? ⁹ "Mi-i maa kong le ’ì yi kpe-kpe le mì kaa he ’ukwo ’uyang-yang le mì shi ban lizen Ujeso angwu Unazaret. ¹⁰ Kife na᷅ mi maa shi he Ujeruselem. Mi ma kpe ikeb lè ha bekaandi abe be᷆ shang Unim lè kwu bendi gbamm abe be bong ha Ujeso fe he igaadye. He ’unyong ahwu be maa de le bè gwu ābe, mi bong utung ha abe. ¹¹ Mi maa ka ābe ’ingie he ishom puu angi be᷆ kwu liwu mbee ’unyong kpamm. Mi kaa le mì shi ābe bè tyang abongale ha Ujeso. Mi maa ngywa fa ābe ’indee-indee le mi maa gya he abong bendi or la ka ābe ’ingie." ¹² "Kimen ashin na᷅ ’i ma shi-m mi ma kpe ikeb lè ’isom lè ha bekaandi abe be᷆ shang Unim gye he Udamasikos le mi la kwa bendi abongale. ¹³ Usu, he ’unyong ahwu mi ma nde àshì gye há he libwee ’udyan lishi na᷅ mi ma nde ’ikung-gbo lè he lifung-atabe ashi ’ı᷆ taa hwò libwee, ki taa kel-kel fe li, bel ha bendi abe li ma yi utung. ¹⁴ Bel puu li mbu shī he itang. Mi-i gyo igie i kong ha ami he igie Ihibru le: ’Usorl, Usorl! Kibang a, wo᷆ ke-m ’ingie? Wo do ’uhwo-gang gba he ’ingie ashi wo ke-m ná ’igundu ashi ’ı᷆ ti ’ubee fe he unwaa ukwan undi angwu ù yi lè shi nà.’ ¹⁵ Mi kung bii le: ’Atyagi, wo ayang a?’ Atyagi Ujeso a kung de-m le: ’Mi Ujeso angwu wo᷆ ke-m ’ingie a. ¹⁶ Bo naa ’inaa. Mi be hwaa lè wo mî waa kung-a ha-a à shi aki ke-m. Kì yi le wò de bendi biwom abi wo ndè lè ha ami ’unyin lè abi mi mbee be tyung-a. ¹⁷ Mi ba som-a hwaa lè bendi abe bè yi Ijuus a ye; mi be kpan-a lè he abwo abell, befe lè bendi Izwell. ¹⁸ Kì yi le wò be buu ābe àshì, wo shi ābe bè bel lè he ’ifufebb be he ’ikung-gbo, be bel lè he ikeb Usetan be hwaa lè Unim he-e ù tyang biban bibell ke be gbe he abongale ha ami, hè be bè kwu lè ’iteng he liwu bendi abe Unim a waa ndor ta-ta ke ’uhwo-ma.’ " ¹⁹ Uporl a gye ’ushu kong le: "Usu Agripa, mi ma bia igie angi Ujeso a ma be kong ha ami lè he lifung-atabe ana ye. ²⁰ Mi bun igie Unim de bendi puu le bè bel àtyám lè he biban, be hwaa lè Unim, be shi biwom abi bı᷆ tyung le be bel àtyám lè he biban. Mi kpi ’imen ashin he Udamasikos lè Ujeruselem, mi hà gye mbee ’ubong Ujudia puu lè abong bendi abe bè yi Ijuus a ye. ²¹ Kife na᷅ ’i ma tan lè shi ngwu Ijuus i ma kwu-m he Ushom Unim le be gwa. ²² Unim a kpell mi kung lè há kpamm be wu he liti angi ’unyin i he-m mì bun ’isom de bendi puu, bekaandi or, bebwani or. Kiwom ashi bendi abe be᷆ tye ugie ’isom Unim lè Umosis be ma de le ’i ba sha na᷅ mı᷆ kong i. Be ma de le: ²³ ’Kì yi kpe-kpe le Ujeso Ukristi, Undi-likpan, ù be kpe ’ingie hwō, u kwu ukpi-ikwu undi angwu u᷆ wum lè he lihwu he-e ù de Ijuus or, bendi abe bè yi Ijuus a ye or, gbe lè ’ikung-gbo ashi likpan ’unyong.’ " ²⁴ Nya a na Uporl a maa maa ushe uma, Ufestes a kong ikaa-ikaa le: "Uporl, wo fel ngyor lityuo. Lingye ligang li shi-a wo fel ngyor lityuo." ²⁵ Uporl a kung de-e le: "Ukaandi Ufestes, mi ngyor lityuo ye. Igie angi mı᷆ kong i ì yi ’igyang a, inyin a ye. ²⁶ Usu Agripa, mi kong ha awo porr likorye wo ngye gbe lè biwom bimen i. Mí ngye dangg le wo kwu àshì ábi puu likorye biwom bimen i bi ma shi he ’undyell a ye. ²⁷ Usu Agripa, wo bong àshi bendi abe be᷆ tye ugie ’isom Unim be fee a? Mi ngye le wo bong." ²⁸ Usu Agripa a kung bii Uporl le: "Wo kong le wo sha-m mi fel undi Ukristi he ’anwaa ’unyong aken a?" ²⁹ Uporl a de-e le: "Mi kong ha Unim le mà he ’anwaa ’unyong zangg or, mà lè ’igbe or, men lè bendi puu abe ma᷆ gyo mi i mà fel ná mì yi, fem a᷆shi le be fe-m ashishilika he igaadye tyang!" ³⁰ Usu Agripa lè Ukaandi Ufestes lè Ubanis lè abe be teng puu be bo ’inaa gbe he igye. ³¹ Be hà de bende le: "Ungikye anwun a shi ’iwom ashi bè gwu-e or, ngwu bè fe-e he igaadye or ye." ³² Usu Agripa a de Ufestes le: "Ungikye anwun ù kpo ushe gye he ’ipi Usu ukaandi Urom ye, hang wo tyang he abwo."

¹ Be hà tim le bè som Uporl gye he Itali. Mi Uluk or, mi gye utung ha abe. Be kung Uporl lè bendi igaadye abe be teng fe Ujuliyes he ’ubwo. Ujuliyes umen i a ma yi ukaandi ishogya angi be᷆ ko le Liwu ishogya Agestes, Usu ukaandi Urom. ² Li lè ngwee he ’inong lishor ashi ’i maa ndo gbe lè he Adramitiyem lè gbe he Eshia gye he abong angi he ’ibam. Alistakes angwu a maa be lè he ’iteng Umasedonia ashi be᷆ ko le Utesalonaika a ma yi utung ha abel. ³ Ashi a taa, li wu he Usaidon. Ujuliyes a ma yi lè inung ha Uporl, u tyang he le ù lè kong lè bedim-ma abe be ke-e biwom abi bi baa he. ⁴ Li bo lè há ana gye ’ushu. Le bwo ’ufem ’u maa shi ndè àshì hwaa lè bel, li gbe lè ’inong gwaa ha ’ubong Usaipres ahwu ’ù yi he ’udyan umbwo he ’igie ashi ’ufem ’u maa shi kangg ye. ⁵ Li lè gbe gwaa ha Usilisia lè Upamfilia be he lishi Ulisia angi be᷆ ko le Umayira. ⁶ Ukaandi ishogya a ma ndè ’inong há ashi ’i maa ndè àshì be lè he Alezandria gye he Itali. A de le lì lè ngwee āshi. ⁷ Li te tyuo-tyuo ati gbamm. Li kpe ’ingie kpamm li gbe gwaa ha Unades. Kufem ’u nem bong li li te ’ushu ye. Li hà fel lè gbe gwaa ha ’ubong Ukrit ahwu ’ù yi he ’udyan umbwo he ’igie ashi ’ufem ’u maa shi kangg ye. Li lè gbe gwaa ha Usalmoni. ⁸ Li maa gba gwaa he ’ibam; lì yii kpa ’ingie kangg kpamm li gbe be wu he ’ipi be᷆ ko le ’ibam ashi ’ı᷆ ngbebb ndor binong. Ki ma yi lè ’igbe lè he Ulasia ye. ⁹ Li kwu há kpamm ’i gbe fel li lè begyong he agyele ’ushu likorye ’ifong ’i shul. Uporl a ke be utebb le: ¹⁰ "Bendi begi, mi gim le kung lè nyin gye ’ushu litan lityan li ba kwa lè begyong. Bigbor abi bì yi hen he afee ’inong or, ’inong ’igyang or, bi ba ban; bendi be be hwō." ¹¹ Ukaandi ishogya a bong àshi ugyang ’inong befe lè undi angwu u᷆ naa ’inong be kong, fem utebb angwu Uporl a ma ke tyang. ¹² Kiteng ’imen ashi be᷆ ndor binong ana ’i ma ngbebb a᷆shi be᷆ kwu lè ’ifong ye. He atan-lengi anwun bendi gbamm he liwu libell, ki ngbebb ābe le bè kaa hè be bè ndè le be nya wa he Ufinis angwu ù yi he ’ubong Ukrit umen ana a? Ki ngbebb a᷆shi be᷆ ndor ’inong há lè ’ifong likorye ’ufem ’u maa sha há kangg ye. ¹³ Kanwaa ’ufem ’a keb ashele lè he ’igie umbwo. Bendi abena be maa kong le ’i ngbebb le bè gye ’ushu. Be shwia lè bínde᷆ abi bı᷆ shi ’inong ’ı᷆ naa fe gye he afee ’inong. Be bo litan. Be gbe gwaa ha ungwu ’ibam ashi he Ukrit ’ife-ife-ife. ¹⁴ He ’anwaa ’unyong zangg ’ufem ’ukaandi ’u keb ashele lè he ugo-igye. Kufem ’umen i, be ko āhwu he igie Beke le northeastern. ¹⁵ Ku shi kung ’inong. Li maa nem naa āshī gba he ’ufem mbee ye. Li tyang āshi le ’ufem ’ù ndo te lè shi he ’ipi ’u kee. ¹⁶ Li gbe gwaa ha kakiti ’ubong ake ’à yi he ’udyan umbwo ake be᷆ ko le Ukorda he ’igie ashi ’ufem ’u maa shi kangg ye. Li kpe ’ingie shwia lè unwaa ’inong lè fe he ’inong ’ikaandi. ¹⁷ Be hà bua āshī indi ikaandi kel-kel kpe lishi hè shi ’ì ngie. Kitapwell ashi be ma gyam tye fe ’inong lè he ’usi ’i shi ’ufem ’u maa kung ’inong gye he ’ushu. Le bwo be shell le ’inong ’ibell ’i ba tim fa he ’uyia gwaa ha Ulibia, be pell ’itapwell be he itang le ’ufem ’ù tem kung ’inong ’ikaa-ikaa ye. ¹⁸ Kufem ’ukaandi ’u shi kpamm ashi a gbe taa. Be hà keb biwom abungale lè he afee ’inong wu gye he umbwo le ’inong ’ì fel fěē. ¹⁹ Àshì a mbee fem taa, be mbee bung bigbor ’inong wu he umbwo lè ’uhwo-bell. ²⁰ Kufem ’ukaandi ’u shi kpamm li ndè libwee or, ngwu ikpen or ye gbe ’igbe kangg. He umbee-likel li wee abwo le li ndo nim. ²¹ Bendi abena be zī lizi ye gbe ’igbe. Uporl a bo ’inaa de be le: "Bendi begi, hang ma ma dang ’utyung gyo mi nyong li ma so he Ukrit. Mà gyo mi, hang li pam biwom abi bi shi fe li nyin. ²² Kanaa-anaa i mi tim amen anung le mà wee abwo ye. Undi ken or lè he liwu lityan u ba nim fem ’inong tyang ye. ²³ Unim angwu mì yi ha ahe ’ubwo, mi fe-e, a som udengell uma hwaa lè mi uhwuhwo lè ’usu. ²⁴ A de-m le: ’Uporl, shī shell ye. Kì yi kpe-kpe le wò be lè hwaa lè Usu ukaandi angwu he Urom. He ’uhwo ’ugang Unim angwu ù yi lè inung u ba kpan bendi abe bè yi utung ha awo he ’inong.’ ²⁵ Bendi begi, mà wee abwo ye, likorye mi fe lityam ha Unim le ’i ba kwa nya a na udengell uma a be de-m. ²⁶ Kinong ’i ba la tim fa he ungwu ’ibam ’ubong ’ususo ahwu ’ù yi he ’udyan umbwo." ²⁷ He ati lihwo lè ngi ande ’ufem ’ukaandi ’u maa kung li ’inong gye ’ushu he umbwo ukaandi angwu be᷆ ko le Umeditereniyen. He ’ididyan ’usu bendi abe be᷆ naa ’inong be tyāng le li ndo fel kpee-kpee he ugo-igye. ²⁸ Be kung undindi tye fe ’iwom ashi ’ı᷆ ngbe᷆bb tyàng gye há he umbwo. Be ndè kung lè hen he likwu lè wu he liten umbwo ’i ma yi abee asi adyong-ken. He ’anwaa ’unyong zangg be mbee shi ’itaa ’iwom ken. Be ndè le ’i fel abee asi ande lè ngi lihwo a. ²⁹ Be maa shell le nyin ’inong ’i la tya fa he akor akaandi. Be kung bínde᷆ bìndè abi be fe bi indi ikaandi tyuu he item ’inong tyàng gye há he umbwo hè bi bì shi ’inong ’ì naa. Be maa fel kong ha Unim le ashi a᷆ taa akikye. ³⁰ Bendi besuso abe be᷆ naa ’inong be kaa hè be bè paa. Be kung unwaa ’inong tyàng he umbwo. Be lam li le be kung bínde᷆ a tyàng lè he ’ushu ’inong. ³¹ Uporl a kung de ukaandi ishogya lè ishogya angi i teng le: "Gbe bendi aben be ngyor kwu hen he ’inong ye, hà ma kpan ye." ³² Ishogya ana i kung tang indi angi ı᷆ kwu unwaa ’inong naa. Unwaa ’inong a kò gbe. ³³ Ashi a maa ndo taa, Uporl a tim ābe anung le bè zī lizi. A de be le: "Ki fel ati lihwo lè ngi ande ná ma kwu faale lizi azele. ³⁴ Mi tim amen anung le mà hā zī lizi. Kì yi kpe-kpe le mà zī lizi hè men mà hwō ye. Udal ugil ken or u ba nim lè ha amen lishi ye." ³⁵ Uporl a kong ashin puu, a kung ibred kwu he ’ubwo; u pee Unim he ashi bendi puu, u hà kung bun zī. ³⁶ Be fel lè ingie. Befe puu be zī lizi. ³⁷ Puu utyan há he afee ’inong li ma yi bendi asi lihwo lè asi bendi akie lè bendi lihwo lè be bedyong-ken. ³⁸ Be zī lizi puu, be hà bung bigem azi abi bi teng wu gye he afee umbwo hè ’inong ’ì fel fěē. ³⁹ Ashi a taa, bendi ’inong be ndè itang, ukpor be shob āngi ye. Be nde ’iteng ashi umbwo a nyii gye he ugo-igye a. Kiteng ’imen ana ’i ma yi ’uyia-uyia. Be tim le bè kaa hè be bè nde le be nya ta lè ’inong há a? ⁴⁰ Be kung indindi bínde᷆ abi bı᷆ shi ’inong ’ı᷆ naa tang tyàng gye he umbwo. Be pell indi angi be bua bikpakpaa ’inong hè be bè nong āshi ’ushu gye he ’ipi be kee. Be gyam ’itapwell ashi lè he ’ushu ’inong hè ’ufem ’ù nyii kung āshi gye he ’ushu. Be bo ndo he ugo-igye. ⁴¹ Kinong ’i lè tim fe he ’uyia he afee umbwo. Kushu ’inong ’u lè gbe fe he ’uyia, kù nem fem lè há ye. Kufem ’ukaandi ’u shi; ushob umbwo a paa item ’inong. ⁴² Ishogya i shi ugim le ì gwu igaadye teng i kwob umbwo gya he ugo-igye, i paa nim. ⁴³ Ukaandi ishogya a swan likorye a kee le u gwa Uporl ye. A de bendi abe be᷆ kwob umbwo mbeè le befe hwan bè geb tye he umbwo ’ushu hè be bè kwob umbwo gye he ugo-igye, ⁴⁴ hè abe be teng bè kwu abwo he bigie bikpakpaa pwom ābe lè he item. Nyin ’itaa i na᷅ bel puu li gbe tang he ugo-igye.

¹ Li tang he ugo-igye, li bii gyo le be ko ’ubong ’umen ahwu ’ù yi he ’udyan umbwo ana le Umalta. ² Bendi ’ubong ’umen ana be ma yi lè inung ha abel kangg. Umbwo a maa ndo ndor; ligwu lì yii sha. Be hwee ’inde ndor li bel puu le lì gwee. ³ Uporl a tor ìkwán fong he ’ubwo be fe he ’inde. Kinde ’i shī ùshiı᷅ angwu a ma yi há he ikwan, a fem be ngmam Uporl he ’ubwo ngyor tyuu há. ⁴ Bendi abe há he ’ubong ’umen ana be nde ùshiı᷅ ù yi tyuú he he ’ubwo. Be de bendi le: "Kì shi na ana ungikye anwun ù yi undi-ihwu a. Mà na a hwaa᷆ lè he umbwo ukaandi or, u hwa᷆ he ’ibibi ashi a shi." ⁵ Uporl a mbi ùshiı᷅ tyàng he ’inde. Ùshiı᷅ a shi-e ’iwom ye. ⁶ Be baa lishi ná ’ubwo ’uma ’u᷆ mbwee kaa; be baa ná u᷆ mbu hwō kaa. Be baa lishi gbe ’igbe hè be bè ndè ná ’iwom ashi ’i wa shi ngye ye, kı᷆ shi-e. Be nde ye, be gie ugim ubell. Be fel da le ù yi unim a. ⁷ Itang ungikye angwu be᷆ ko le Upubliyes i ma yi há kpee-kpee. Ungikye umen i a ma yi usu ’ubong ’umen ana a. A kpe li gye lè bel ha ahe ushaale lè shi li ngbebb-ngbebb. Li kwu há ati akie. ⁸ Ātyām Upubliyes umen i a ma yi gogo ye. Inyiahwo i maa shá he; kutaa ’u taa he. Uporl a gye ha ahe ’ipo lè kong ha Unim ke-e; u pwom he abwo, a mbee. ⁹ He ’unyong ahwu ashin ’i shi, bendi-angmam gbamm be be há, be mbee. ¹⁰ Be ke li beke gbamm. He ’unyong ahwu li maa ndo gye, be fe li biwom gbamm he ’inong abi bì lè kpell li he litan. ¹¹ Afell akie a gbe, li ngwee ’inong ashi ’i ma yi há lè ’ifong. Kinong ’imen ana ’i maa ba lè he Alezandria a. Be ko āshi le Ìnīm angi ì yi bégbé. ¹² Li gbe lè he ’ubong Umalta lè wu he Usirakuz. Li kwu há ati akie. ¹³ Li ngwee ’inong lè há gye he Uregyem. Ashi a taa, kufem ’u keb ashele lè he ’igie umbwo. He liti angi lefee li wu he Uputiyoli. Li shul lè he ’inong. ¹⁴ Li ndè bendi abongale besuso há. Be ngie fe li le lì kwu ha abe há ati adyong-ifee. Li hà gbe ndo he Urom ha abee. ¹⁵ Bendi abongale abe há he Urom be gyo le li fel he ’ukwo. Be be kwu he ’ate ake he Apiyes lè lishi angi be᷆ ko le Ìshōm begaandi ikie, nyong li. Uporl a nde be; a pee Unim; u fel lè ingie. ¹⁶ Li lè wu he Urom. Ukaandi ishogya a ke Uporl ikeb le befe lè undi ishogya angwu u᷆ kang he bè kwu he ushom angwu ù yi ta-ta. ¹⁷ Ati a gbe akie, Uporl a ko bekaandi Ijuus abe be ndē he Urom be he ’iteng ken. Be be puu. A de be le: "Bebuye, mà na mi shi ’iwom ban bendi betyan or, ngwu itetel angi li kpe lè ha betietyan ye or, be kwu-m fe he igaadye he Ujeruselem. Be kung mi ke bendi Urom. ¹⁸ Bendi Urom be bii mi bibibi. Be maa la tyang mi abwo, likorye be ndè ’iwom ashi mi shi ngwu bè gwu-m ye. ¹⁹ Ijuus i swan ashin. He atan-lengi anwun, ki ma yi-m kpe-kpe le mì kpo ushe gye he ’ipi Usu ukaandi angwu he Urom, mà na mi ma yi lè ’iwom ashi mì kong fe bendi begi ye or. ²⁰ Atan-lengi angwu mi ko amen mî kong ha amen ù yi le be fe-m ashishilika anyin, likorye mi bong ha undi angwu bel, bendi Izwell, li ndor lishi nyong he a." ²¹ Be hà de-e le: "Li wa kpē ’ushia ahwu Ijuus i fee lè he Ujudia gbe lè wo ngye ye. Bendi betyan or be wa be lè há, be kong ’ibibi gbe lè wo ngye ye. ²² Li kee le li ngya àshi wo-o gim gbe lè ’imen i. Lí ngye le bendi be kong ban likwu bendi bemen abe wò yi he liwu libell i mbee bipi puu." ²³ Befe lè Uporl be kung liti ndor. Bendi abe be ma be he ’ipi Uporl a ma yi nya he liti limen ana be fel go hwò a᷆be lè he ukpi-ikwu. A bun ’isom ’ima ashi gbe lè Kusu Unim de be, kung leèti gyebb likwulukwu. A maa kaa he-e ù shi ābe bè bong ha Ujeso gbe he aboale lè he ashia Iten Umosis lè ashia bendi abe be᷆ tye ugie ’isom Unim. ²⁴ Besuso be bong gbe he ashi a kong, ukpor besuso be bong ye. ²⁵ Be gbe lè há lè ifung ha bende. Ashi ’i shi ābe be gbe lè há lè ifung ’ì yi le Uporl a de le: "Ukatia Kunyong Unim a ma kong ’igyang a, he ’unyong ahwu a ma kong ha betiemen gbe ha Azaya, undi angwu u᷆ tye ugie ’isom Unim. ²⁶ A ma de le: ’Lè de bendi bemen i le Unim a de le, "Ma ba gyo agyoale ufe-ufe-ufe, ukpor ’i nung amen ye; ma nde andele ufe-ufe-ufe, ukpor ma shob ye." ²⁷ Unim a de ashin, likorye be teb àtyám, be kpo ’utyung, be shi àshì kpi-kpi. Gbe ’ì yi ná a ye, kiwom ’i nung ābe, be gyo, be nde shob, mà be bel hwaa lè mi Unim, mà mi kpan ābe.’ " ²⁸ Uporl a mbee de be le: "Mi kee le mà ngye le Unim a som ’isom ’ima ashi gbe lè likpan ’unyong hwaa lè bendi abe bè yi Ijuus a ye. Be ba dang ’utyung gyo āshi." [ ²⁹ Uporl a kong ashin puu, Ijuus i gbe lè há, ì yi fa ifung ha bende kangg.] ³⁰ Uporl a kwu aze afee he ushom angwu a ma kpē. A gor kpē bendi puu abe be maa be le be ba kong lè he. ³¹ A maa bun ’isom ’inunung gba lè Kusu Unim, u hwua bendi gbe lè Atyetyan Ujeso Ukristi. A maa kong porr faale ’ushell.