3 John

¹ Mi angwu mì yi ukaandi bendi abongale na᷅ mı᷆ fee ’ushia ahwun hwaa lè wo Ugayas, udim lityam angwu ’i nyin mi lè wo lityam ken. ² Udim-gi lityam, kigyor ’igi ’ì yi le, kiwom ’iyang-yang gbe lè wo ’ì te ngbebb-ngbebb-ngbebb, inyiahwo igang or ì kwu kang-kang nya a na lityam ligang lì yi kpa-kpa he ashi Unim. ³ Nyong bebuye bendi Unim be wu hen, be de li le wo fa Unim lityam ken nya a na mi ngye le wo shī shà mbee ’unyong puu. Ashin ’i ke-m igor kangg. ⁴ Kunyong ’uyang-yang mı᷆ gyo le bebwaa-gi be fa Unim kpa-kpa, ki ka-m igor angi i dyam hwò biwom puu abi bi teng iteng. ⁵ Udim-gi lityam, wo sha ’inunung a nyong wo᷆ kpell bebuye bendi Unim abe bè yi begaandi a or. ⁶ Bendi bemen wo kpell ana, besuso be bè de liwu bendi abongale hen ná wo tyung benyin ha abe mbee ’unyong. Mi tim-a anung le wò gye ’ushu ke bendi abe ’itaa ana ukpell nya he ’ukwo ahwu ’u᷆ nyin Unim ana, he ’unyong ’uyang-yang be᷆ bel gbe ha awo há. ⁷ Atan-lengi angwu be᷆ bo gye he igye ù yi le hè be bè lè bun de bendi gbe lè Ujeso Ukristi, ki shi le be kpa ’iwom lè ha bendi abe be bong ha Ujeso Ukristi ye ye. ⁸ He ashina ’ì yi kpe-kpe le lì ke be ukpell, hè li lì fel lè abwo ipel ha abe he aki igie Unim abunale. ⁹ Mi ma fee ’ushia hwaa lè liwu bendi abongale līme᷅n, ukpor Udiyortrefis a swan le u gyo li ye, likorye a kee le be gyo he ufe-ufe a. ¹⁰ Nyong mı᷆ be be há, mi ba ba lè biwom puu abi a shi he igye gboo, mi ba da bendi ná u᷆ bun ibubun fe li. Ashi ’i ban hwò puu ’ì yi le, bebuye bendi Unim abe be᷆ be ha amen há, u bong kpa ābe ye, u bong àbe be kee le be kpa ābe or, le bè kpē be ye. U ndō àbe be kpe be lè he liwu bendi abongale. ¹¹ Udim-gi lityam, ndè le wo hwua kung likpe libibi ye, ukpor wo hwua kung likpe linunung. Undi uyang-yang angwu u᷆ shi ’inunung ù yi unwaa Unim a. Ukpor undi angwu u᷆ shi ’ibibi, hà a ngye Unim ye. ¹² Udemitriyes ufe, undi uyang-yang u kong he he ungwu ’inunung. Ki tyung gboo le u pwom ’ukwo Unim kpa-kpa. Bel or li da-a le ù yi ununung. Wo-gyang wo ngye le li bà uman ye. ¹³ Mì so lè biwom gbamm abi mi kee le mi da-a, ukpor mi kee le mi fee ābi ifee hwaa lè wo ye. ¹⁴ Mi ndor lishi le baale mı᷆ be ha amen há, hè li lì kwu ukem kong ābi. ¹⁵ Ikwun Unim ì kwu ha awo lityam. Bebuye bendi Unim abe hen puu be de le mì kong lè wo. Wo-ò kong li lè bebuye bendi Unim abe há he ’uken-uken.