2 Timothy

¹ Mi Uporl angwu Unim a waa mi le mì kwu unwaa-isom Ujeso Ukristi le mî bun de bendi le Unim a ke úkyébb le u ka likpan gba he agwaale ipel ha Ujeso Ukristi na᷅ mı᷆ fee ’ushia ahwun. ² Mi fee āhwu hwaa lè wo Utimoti, unwaa-gi lityam. Unim Atyetyan lè Ujeso Ukristi angwu ù yi usu utyan bè hā ka-a ’ukwun, be kwu lè beshi ha awo, be shi hè ’ì kwun-a he lityam kpatiaa. ³ Mi pee Unim angwu mı᷆ fe-e lityam ligi a ken ná betiegi be maa fe. Mbee ’unyong puu, ishu or, kusu or, mi kong ha Unim ka-a. ⁴ Mi well ná wo ma ki wu akye nyong mi ma gbe tyang-a. Mì yi lè ’igyor kangg le mi nda-a mî kwu lè igor kangg. ⁵ Mi ngye le wo bong ha Ujeso lityam ken ná andiegang Ulowis lè anaa Uyunis be ma bong. Mi ngye dangg le wo or wò yi lè ’itaa abongale umen ana titi. ⁶ He atan-lengi anwuna na᷅ mi well-a le wò kam ’uke aki ashele ahwu Unim a ma ka-a nyong mi ma pwom-a abwo he lishi. ⁷ Kì yi le Unim a ke li Ukatia Kunyong uma le ù shi li lì kwu lè ’ushell a ye, a ke li le he-e ù shi li lì kwu lè ikeb, li kwu lè benyin, li ngye ná lì kwu ’uhwo-tyan a. ⁸ He ashin, ishwia ì shi-a ná wò bun de bendi gboo gbe lè Atyetyan Ujeso ye. Mi angwu mì yi he igaadye he ’uhwo ’uma or, mì fel-a ishwia-ishwia ye. Ndè le wo naa genn kpē ’igang ’ingie he ’uhwo ’isom ’inunung gbe lè Ujeso ná Unim a ka-a ikeb. ⁹ Unim a kpan li, a shi li li fel bendi bema. A shi ná he ’uhwo ’inunung ashi bel li shi a ye, a shi li ná he ’uhwo inung ima lè ashi ufe-gyang a kong ndor a. A tyung inung anyin ha abel gbe ha Ujeso Ukristi, mà ukpong igye anyin i hà kpi. ¹⁰ Kanaa-anaa i a tyung inung ima ha abel gboo gbe he asomale Ujeso Ukristi, Undi-likpan utyan, be he igye anyin. A mbee lè ikeb lihwu, gbe he ’isom ’inunung a fem likpan angi lı᷆ ngyor igye tyung gboo. ¹¹ Kisom ’inunung ’imen i na᷅ Unim a waa mi le mì kwu unwaa-isom angwu mı᷆ bun āshi, mi mbee hwua bendi áshi. ¹² He ’uhwo áshi na᷅ mı᷆ kpe bingie abin. Mà na or, mi wee abwo ye, likorye mi ngye angwu mi bong ha ahe; mi ngye dangg le aki angi a ke-m le mì shi, ufe-gyang u kam āngi kpamm la wa nya Liti angi ufe-gyang a ndor. ¹³ Ngyor naa genn he ’igyang ashi mi hwua-a, mi mbee shi āshi tyung-a ná wò shi. Wò gye ’ushu kwu lè ’itaa abongale lè benyin abi bì yi ke li bel abe li gwaa ipel ha Ujeso Ukristi. ¹⁴ Gbe he ikeb Ukatia Kunyong Unim angwu ù yi ha abel, kam biwom binunung abi Unim a kung fa-a he ’ubwo. ¹⁵ Wó ngye le he ’ubong Eshia, undi uyang-yang a buu tyang mi, Ufigeles befe lè Uhamorgenes or be buu tyang mi. ¹⁶ Unim ù tyung beshi ha bendi Undesiforles, likorye a fe-m ingie ’ugbe ibwan-ibwan. Ashi le mì yi he igaadye or, ki shi-e ishwia ye. ¹⁷ A be wu he Urom wu-wu, a keb mi ashunale kpamm a gbe nde-m. ¹⁸ Wó mbee ngye dangg gbe lè aki anunung angi a ma shi he Efesos. Atyetyan ù hā tyung beshi bema ha ahe he Liti limen angi a ndor.

¹ Unwaa-gi, wo ufe wò naa genn gbe he ikeb àngi Unim, he inung ima, u᷆ ke li gbe li gwaa ha Ujeso Ukristi. ² Biwom abi wo gyo mi mi hwua he ashi bendi gbamm, kung ābi fe bendi abe wo fe lityam ha abe he ’ubwo. Bè kwu bendi abe be kpè le be tem lè bi hwua bendi besuso titi a. ³ Kam le wo kpā ’ingie utung ha abel ná undi ishogya ununung angwu Ujeso Ukristi. ⁴ Undi ishogya he ungwu aki u gba lè abwo ama fa he biwom abi ūshù ye. U kee-kee kaa kangg he-e ù shi nyin ukaandi uma a. ⁵ Undi angwu u᷆ paa akye, u kee-kee kpa ’uke gbe a buu ná iten akye i kong a. ⁶ Undi utia or titi, angwu u᷆ shi aki kang-kang na᷅ ù zī uhwaa ’iwom lè ha ahe utia. ⁷ Shi ugim gbe lè biwom abi mı᷆ kong i, Atyetyan Ujeso ù hā sha-a hè biwom abin puu bì nung-a. ⁸ Gye ’ushu shi ugim gbe lè Ujeso Ukristi angwu a wum lè he lihwu, u be ubu lè ha Udebid. Ashin na᷅ ’ì yi lishi ’isom ’inunung ashi mı᷆ bun de bendi. ⁹ He ashi le mi bun ’isom ’inunung imen i na᷅ mı᷆ kpe ’ingie i, be fe-m he igaadye ná be᷆ fe uzi nà. Ukpor igie Unim ife, be fe ngi he igaadye ye. ¹⁰ Ashin ’i shi-m mi kam le mi kpa bingie abin puu he ’uhwo bendi abe Unim a waa kung, le hè be bè kwu lè likpan ’unyong gbe ha Ujeso Ukristi angi lı᷆ be lè ifem ngyor igye kpamm. ¹¹ Dang ’utyung gyo ’igyang ashin: "Gbe ’ì yi le li hwō utung ha ahe, li ba kwa bewum utung ha ahe. ¹² Gbe li gye ’ushu naa genn kpe ’ingie puu, li ba kwa besu utung ha ahe. Ukpor gbe li swan he, ufe or u ba swan li. ¹³ Mà bel lì yi àtyám afee gbe lè he or, ufe u ba sha nya a na a kong, likorye ù yi libell lifee ye." ¹⁴ Gye ’ushu well bendi Unim gbe lè biwom abi wo gyo i, wo tuu abe ’ubwo he ’utyung he ’ushu Unim le bè fe ifung ye. I sha ’inunung zangg or ye, i kee-kee ban igim bendi abe be gyo āngi iban. ¹⁵ Kaa kangg ha-a à shi a᷆shi ’i ngbebb Unim, wo bun ’isom ’igyang ashi Unim dell-dell, ha-a à kwu undi aki angwu ishwia ı᷆ shi-e lè aki ama a ye. ¹⁶ Gbe lè abwo agang fe he ikorli ilaa ye. Ki nyin Unim lè ngi ye, i sha undi u tyang ’ukwo Unim. ¹⁷ Kitaa likong ashina ’ì yi ná ’ibaa ukpasho ashi ’ı᷆ bi ye, kı᷆ gang igang igang nà. Bendi befee abe be᷆ shi ’imen i bè yi Uhimenayes lè Ufilitus. ¹⁸ Be tyang ’ukwo ahwu ’igyang, be fel da le bendi be wum lè he lihwu mà. He ashin be do abongale bendi besuso. ¹⁹ Ukpor lìshií angi Unim a fe, li ngie kangg, kì yi lè ashi ’ı᷆ nyung āngi ye. Be fee nya he likwu ángi le: "Unim a ngye bendi abe bè yi bema." Be mbee fee nya le: "Undi uyang-yang angwu a de le ù yi undi Unim a, ù tyang bibibi ashele." ²⁰ He ushom ukaandi uyang-yang, kì yi lè bigbor lizi bitaa atyetye-atyetye. Bisuso, be kung igold lè isiliba a shi ābi; bisuso, be kung ìkwán lè limbe a shi ābi. Bisuso, be ndor ābi ka ’unyong ’ipam; bisuso, be shi ’iwom lè bi he liti liyang-yang. ²¹ Gbe undi a ndor lityam lima litaa-litaa lè he bibibi, u kwa ná ’igbor ashi ’i ngbebb aki ashele he liti ’ipam ashi ’ì yi ta-ta ke átyám le ù kung fe ’iwom. ²² He atan-lengi anwuna mi da-a le wò ndè le wo gbe lè abwo agang fe he biwom akpel-ye abi bebwaa-idem be᷆ shi ana ye. Ndè le wo kung lityam ligang ndor he ashele binunung, lè afele lityam ha Ujeso Ukristi, lè akwele lè benyin, lè akwele ikwun ha bendi, nya a na bendi puu abe be teng àbe àtyám abell à yi ataa-ataa, be mbee fe lityam ha Atyetyan le u kpell ābe. ²³ Ndè le wo gbe lè abwo agang fe he ifung akpel-ye angi ì yi lè lifem ye ana ye. Ifung angi ’itaa ana i ba lè ’ushwan. ²⁴ Kì yi le undi angwu u᷆ shi Atyetyan Ujeso aki ù shwan ’ushwan ye. Kì yi le ù kwu ikwun ha bendi puu, u kwu lè lityam angibale, u hwua bendi biwom he ’ukwo ’ununung. ²⁵ Nyong bendi be᷆ kpē ashi u᷆ hwua ye, ù mbu ’uhwo tebb ābe. Pisoye Unim u kpell ābe be gie ugim tem item hè be bè ngye ’igyang. ²⁶ Mà na Usetan, usu bibibi, a ma kwu ābe fe, u shi ābe be fel kee-kee shi a᷆shi ufe a kee a or, pisoye ’i nung ābe be buu hwaa lè he abwo ama.

¹ Mi kee le wò ngye le he ’unyong ahwu igye anyin i ndo be mbee i, biwom bi ba kwa bikaa-bikaa. ² Nya he ’unyong ’umen ana, ki fel ba nyin bendi lè ’uhwo-bell, be ba fel lè ’igyor únde, be kung ’uhwo-bell pwom ungwu. Bendi be fel ba dim idim, be kong bia bendi, be ke betyabell lè bendabell ife ye. Bendi bè tem ba kwa lè ipee he ungwu ye, be ke Unim ife ye. ³ Kì tem ba gbee ābe lè bendi ye, be tyang ke bende ye, be kong ban azen bende. Bendi be fel ba sha bibibi faale abwo akwele ná inyia ibibi nà, be tel ’inunung. ⁴ Bendi be fel ba kung ’undyell bendi bun da bendi-linaa bebell, be fel ba sha biwom ha ’akem ’abell. Idim i ba kpa kung bendi lishi. Kì tem ba nyin bendi lè Unim ye; ki fel ba nyin ābe lè biwom abi bi ngbebb ābe a. ⁵ Bendi be fel ba fa Unim he bikpe-ashi, ukpor be swan ikeb Unim. Ndè le wo ndor ’uhwo-gang ’igbe-igbe lè ha bendi abe ’itaa ana. ⁶ Bendi bemen i, besuso be gya he ishom bendi hà lam kwa bikpel-ye bengingye abe biban bibell bi go, bì yi fem ābe ’ushun, bengingye abe igim ibell or titi ì yi ābe kpatiaa ye. ⁷ Bengingye abe ’itaa ana be ndor ’utyung gyo ihwuale iyang-yang, ukpor be nde shob àshi ’ì yi ’igyang ye. ⁸ Nya a na leěti Ujanis lè Ujambris be ma kpē ashi Umosis a maa kong ye, na᷅ bendi aben ’unyin i be᷆ kpe ’igyang ye. Igim ibell i ban, abongale ubell u shi angwu ugyang-ugyang a ye. ⁹ Ukpor baā be᷆ be fe lishi, likorye baa ’ı᷆ nung undi uyang-yang le ashi be᷆ shi ’ì yi akpel-ye a, nya a na leěti ’i ma nung bendi le ashi Ujanis lè Ujambris be maa shi ’ì yi akpel-ye a a. ¹⁰ Ukpor wo ufe, wō pwom biwom abi mi hwua, wō ndè kung likpe ligi. Wó ngye ashi ’ì yi-m he lityam-lityam, wo ngye abongale ugi. Wo mbee ngye ná mi ngib lityam kpē ’ingie lè ’itaa mì yi lè benyin ha bendi, wo ngye ná mi ngyor naa genn kpē ’ingie. ¹¹ Wō ndè lè ashi agang ná bendi be᷆ teb lè mi, lè ’itaa mi kpē bibibi bingie abi be ke-m he Antiyok, lè Ikoniyem lè Ulistra, ukpor Atyetyan Ujeso a fem mi lè há puu. ¹² Undi uyang-yang angwu a kee le u gwaa ’uhwo-ma ipel ha Ujeso Ukristi, u shi a᷆shi Unim a kee, u kpa ’ingie. ¹³ Bendi bebibi lè abe be shi biwom he bikpe-ashi be gya ’ushu sha bibibi ta ita ita ita, befe be lam bendi, bendi be lam ābe. ¹⁴ Ukpor wo ufe, wò gye ’ushu shi biwom abi mi hwua-a, abi wo bong lityam ken. Wó ngye àbe be᷆ hwua-a biwom bimen ana. ¹⁵ Wó well le kung lè há ’isun ’igang na᷅ wo ngye Kushia Unim ahwu ’u᷆ tyung undi ná u᷆ kwu lè likpan ’unyong gbe he abongale ha Ujeso Ukristi. ¹⁶ Puu abi be fee he Kushia Unim puu ’i be lè ha Unim a, bi ngbebb ahwuale bendi ’igyang, atyungale bendi biban bibell, anongale bendi ’ukwo ahwu kpa-kpa, lè ahwuale bendi ná bè shi biwom kpa-kpa. ¹⁷ Gbe undi Unim u᷆ shi ābi, u kpè mbee akekel puu le u sha ’itaa aki anunung ayang-yang.

¹ Well le Ujeso Ukristi u tem ba he igye anyin, ba kwa Usu, u be maa bendi bewum lè abe be hwō ushe. He ashina he ’ushu Unim lè ahwu Ujeso Ukristi, mi tuu-a ’ubwo he ’utyung le, ² wò bun igie Unim, gye ’ushu bun āngi, maa anung ’unyong ye, tyung bendi biban bibell, tuu ābe ’ubwo he ’utyung le bè shi a᷆shi ’ì yi kpa-kpa, gye ’ushu mbu ’uhwo hwua bendi biwom. ³ Mi kong ashin likorye ’unyong ’u ba lè há, ahwu bendi be᷆ tem be dang ’utyung gyo ihwuale igyang angyell ye. Be fel ba kee-kee bong gyo a᷆bi bi ngbebb ābe a; he ashina be ba gbong bendi le be hwua ābe abi befe be kee. ⁴ Bè tem ba dang ’utyung gyo ’igyang ye; be fel ba gyo ikorli itim angi ì yi lè lifem ye a. ⁵ Ukpor wo ufe, wò ngyor naa he ’igyang mbee ’unyong puu, naa genn kpē ’ingie, shi aki undi angwu u᷆ tan bun igie Unim, shi aki puu yilididi angi Unim a ka-a le wò shi. ⁶ Mi ufe, kunyong ’u fel ahwu mì pwom lishi he aki Unim, mi be kwu ’itaa ken ha ’ityuale ashi be᷆ shang Unim. Kunyong ahwu mì tyang igye anyin ’u fel há. ⁷ Mi kwu ’iken ndo ’ukye hwò, mi buu akye wu he ’ubi, mi gye ’ushu bong ha Ujeso be wu he umbee-likel. ⁸ Ashi ’i fel teng ’ì yi ’uke ahwe᷅le ahwu ’ù yi ke bendi abe be shi a᷆shi ’ì yi kpa-kpa, ahwu Atyetyan Ujeso angwu u᷆ shi bilebale ye a ndor mi he Liti angi a ndor. A ndor imi-imi a ye, a ndor bendi puu abe bè yi lè ’igyor abele uma. ⁹ Kaa kangg ha-a à be akikye, ¹⁰ likorye Udimas a buu tyang mi. Benyin igye be kpe-e ityuu a gbe ndo he ’ubong Utesalonaika. Ukresen u gbe ndo he Ugalesha, Utaitus u gbe ndo he Udalmashia. ¹¹ Uluk ufe-ufe na᷅ a fel teng utung ha ami hen. Be lè Umak utung ha awo, ù yi-m lè lifem he aki agi. ¹² Mi som Utikikes gye he Efesos. ¹³ Nyong wo᷆ be, be lè ’iteteb aliga ’igi ashi mi tyang ndor he ’ipi Ukapes he Utrowas. Wò be lè ashia agi or titi; angi a dyam mi hwò puu na᷅ à yi angi mi fee ’iwom. ¹⁴ Alezanda angwu u᷆ ndè ’ùndè a shi-m ’ibibi kangg. Atyetyan Ujeso na᷅ u᷆ be hwee he he ashi a shi. ¹⁵ Wo or titi ndo baa he, likorye u fa ifung kangg gbà lè ’isom ashi lı᷆ bun. ¹⁶ Kushu-ushu nyong mi ma naa mı᷆ maa ushe, undi ken or a ma naa mi he item ye; undi uyang-yang a ma buu tyang mi. Unim ù hā tyang ke be. ¹⁷ Ukpor Atyetyan Ujeso a naa mi he item, u ke-m ikeb angi mı᷆ bun ’isom ’inunung mbee akekel ashi puu hè bendi abe bè yi Ijuus a ye or bè gyo āshi. A kpan mi lè he abwo begaba. ¹⁸ Mí ngye dangg le Atyetyan u kpan mi lè he bibibi puu, u te lè mi ikwun-ikwun lè wu he Kiteng-usu ’ima he lifung-atabe. Ifem ì kwu ke-e ngyor igye kpamm. Kì ngyor a ’itaa ana. ¹⁹ Kong mi lè Uprisila lè Akwila, wo mbee kong lè bendi Undesiforles. ²⁰ Irastes ù so he Ukorint, mi tyang Utrofimes he Umalites likorye a ma yi gogo ye. ²¹ Kaa kangg ha-a à be mà ukpong ’akwuo ’a hà beb. Uyubulus, lè Upudens, lè Ulainus lè Ukeladia be de-m le mì kong lè wo; bebuye bendi Unim hen puu be de-m le mì kong lè wo. ²² Atyetyan Ujeso ù kwu utung ha awo. Unim ù ke men puu ’ukwun.