2 Peter
11 Mi Usaimun Ipita angwu mì yi uboyi Ujeso Ukristi, mi mbee shi unwaa-isom uma na᷅ mı᷆ fee ’ushia ahwun. Mi fee āhwu hwaa lè men puu abe ma bong ha Ujeso Ukristi ’itaa ken ha abel. He ’uhwo inung Ujeso Ukristi na᷅ a ke li bel puu ikeb bizang-bizang le lì bong ha ahe, abongale angwu ù yi lè lifem kangg. Ujeso Ukristi ù yi Unim, u mbee shi Undi-likpan utyan. 2 Unim ù hā ke men ’ukwun, u shi āhwu ’ù gbo shal-shal-shal. U shi hè ’ì kwun amen he atyam kpatiaa mbee ’unyong nya a na men ma᷆ gye ’ushu ngye Unim lè Atyetyan Ujeso Ukristi. 3 Ujeso Ukristi na᷅ a shi li li ngye Unim angwu a ko li le lì kwu ipel ha ahe he ifem ima, li mbee pwom he shi a᷆shi ’i ngbebb gbe gyong. Bwo li ngye Unim ’itaa ana, a kung ikeb ima shi li li fel lè ’iwom ’iyang-yang ashi ’ı᷆ kpell li lı᷆ kwu lè likpan ’unyong, li mbee shi a᷆shi ’ı᷆ nyin he. 4 He ’ukwo ahwun na᷅ Unim a ke li biwom bikaandi bimen abi leěti a ma kyebb li, abi bì yi lè lifem kangg ke li. Atan-lengi angwu a ke li biwom bimen ana ù yi le, hè men mà buu hwaa lè he biwom bibibi abi bì yi he igye anyin abi bendigye bè yi lè ’igyor ábi, mà mbee pwom he shi likpe ’itaa ken ha ufe-gyang. 5 He ’uhwo biwom abina mà bong abongale ufe-ufe a ye, mà kwu ’iken gye ’ushu shi likpe linunung or titi. Gbe ma shi likpe linunung, ma kaa kangg ngye Unim gye ’ushu. 6 Gbe má ngye Unim, ma ngib lityam kangg. Gbe ma ngib lityam, ma gye ’ushu naa genn he biwom abin. Gbe ma naa genn he biwom abin, ma gye ’ushu ke Unim ife. 7 Gbe ma ke Unim ife, ma gye ’ushu kwu lè benyin ha bende ná bebwanam bende, ki nyin amen lè bendi lityam ken. 8 Gbe ma gye ’ushu shi biwom abin ishi ishi ishi, hà angyele ūme᷅n Atyetyan Ujeso Ukristi u kwa lè lifem, likpan līme᷅n li kwu linwom-linwom ye. 9 Ukpor undi uyang-yang angwu a shi biwom abin ye, hà ’i ze le ù yi ná uhwua-ashi angwu u᷆ ndè ye gbangg nà. Undi umen i u naa lityam lè biban bima abi leěti Unim a tyang ābi ke-e. 10 He ashin, bebuye, mà kaa kangg hè men mà shi likpe angi lı᷆ tyung le Unim a ko amen shi amen mà fel bendi bema. Gbe ma shi ’itaa ana, mà ha᷅ tyang ’ukwo Unim ye. 11 Kitaa ana na᷅ Unim u᷆ be buu amen ’ukwo gye he Kiteng-usu Ujeso Ukristi, angwu ù yi Atyetyan, u shi Undi-likpan utyan. Bendi bema be ba kwa ipel ha ahe nya ngyor igye kpamm. 12 Ashina na᷅ ’ı᷆ shi-m mı᷆ well amen biwom abin mbee ’unyong puu. Mí ngye le ma ngye bi, ma mbee shi naa genn he biwom bimen abi ma ngye i. 13 Lè ’igbe ná mì so uwum, ki ngbebb mi le mì well amen biwom abin hè men mà bo ’inaa he ashele ábi. 14 Mí ngye le ati agi he igye i a mbee pu, nya a na Atyetyan Ujeso Ukristi a ma de-m. 15 Mi mbee kee le mi kaa ’itaa ikeb igi ì yi kwom, mi shi ’iwom ashi ’ı᷆ shi amen ma᷆ well biwom abin mbee ’unyong puu, mà mì hwō or. 16 Leěti bel li maa da amen ná ifem lè ikeb Atyetyan Ujeso Ukristi bi ma fem tyung he igye gboo. Biwom bimen abi li maa de men ana, bì yi ishob angi bendigye be fe a ye, ukpor bel-agyang li ma ndè ifem ima lè atong-shi atyan. 17 He ’unyong ahwu Unim Atyetyan a ma ke-e ifem angi i dyam ’indee-indee i, bel li ma ndè, li gyo Unim angwu ifem ima i dyam gbe a᷆ngi undi u᷆ kong gbe lè ngi mbee, a de le: "Anwun na᷅ ù yi ’iken Unwaa-gi. Ki nyin mi lè he ’indee-indee." 18 Bel-agyang li ma yi utung ha Ujeso Ukristi he ukwell angwu Unim a ma kong ha ahe, li ma gyo igie imen angi lè he lifung-atabe ana lè atyung atyan. 19 Igie angi bendi abe be᷆ tye ugie ’isom Unim be kong gbe lè Ujeso Ukristi, i dyam hwò puu. Gbe ma dang ’utyung gyo āngi, hà ma shi ’i ngbebb, likorye ì yi ná ’imor-inde ashi ’ı᷆ taa lè ’usu kpamm taa ashi nà. Há ’unyong ’umen nyong ukpen ashi-liti, ashi ’ı᷆ ze le Ujeso Ukristi, u᷆ be he atyam āme᷅n, biwom puu bì ha᷅ ba nung amen nwongg. 20 Kiwom ashi ’i dyam hwò puu ashi mà ngye ’ì yi le, igie angi bendi abe be᷆ tye ugie ’isom Unim be maa kong be fee fe he ’ushia Unim i. Befe-gyang na᷅ be maa gim āngi kong ye, 21 likorye ’ì yi lè undi angwu a maa kong ’isom Unim lè he lishi abyele lima ligyang ye. Ukatia Kunyong Unim na᷅ a maa ke be igie angi be maa kong.
21 Leěti bendi abe be᷆ bè uman le be tya ugie ’isom Unim, be ma fel he liwu bendi Unim. Kitaa ’imen i na᷅ bendi abe be᷆ hwua bendi biwom uman be᷆ be fel he liwu līme᷅n. Bendi aben be ba sha beshu hwua bendi biwom abi bı᷆ teng ābe gye he ’ukwo liketye. Bendi bemen be᷆ hwua biwom uman i, be mbee swan-swan lè Ujeso Ukristi or, ki shi le ufe na᷅ ù yi Usu utyan, angwu a pong ābe. He ashina be be lè ushe Unim so ’uhwo-bell he lishi imbul-imbul. 2 Bendi gbamm be ba nda᷆ ha abe sha likpe libibi. He ashina bendi be ndo kong bia ’ukwo Unim. 3 Bendi bemen be᷆ hwua biwom uman i, be ndor lishi he biwom bendi. He ashina be ba bà iman da amen, hè be bè lam kpe men biwom. Nya a leěti a, ná Unim a tang ushe ubell, u kong ’ingie ashi u᷆ ke be. Unim angwu u᷆ ke be ’ingie ’imen ana ù yi he ’unde ye. 4 Leěti nyong idengell Unim igyang or i ma shi ’iban, Unim a ma tyang āngi i gye ’idideng ye, ukpor a ma kwu āngi fe he ’inde. Nya na᷅ be fe ngi ashishilika tyuu he ’ipi ’ifufebb ’i gye kpenn, i kwa nya kpamm nyong Liti angi Unim u᷆ be tang bendigye puu ushe. 5 He ’unyong ahwu Unuwa bendi abe be ma kpo utebb Unim, Unim a ma tyang ābe be gye ’idideng ye. A ma som umbwo ukaandi a ma be sho nim lè igye puu. Unuwa ufe-ufe lè bendi bema bedyong-ifee na᷅ Unim a ma kpan, umbwo a ma shi ābe ’iwom ye. A ma kpan ābe ná likorye Unuwa a maa bun da bendi le bè shi a᷆shi ’ì yi kpa-kpa he ashi Unim. 6 He ’unyong ahwu bendi Usodem lè Ugomora be maa shi bibibi, Unim a ma ke be ’ingie ting ’inde shī dim, abong afee ana a fel atyung-atyung. Kitaa ana na᷅ a tyung ná u᷆ be ke bendi puu abe be ke-e ife ye ’ingie. 7 Nya he ’unyong ’umen ana Unim a ma kpan Ulot. Ulot a ma yi undi ununung a. Akpe abibi angi bendi abena be maa shi, a maa tor he he lityam kangg. 8 Ulot a ma yi ndē utung ha bendi bemen ana a. He liti liyang-yang a maa nda bibibi abi be᷆ shi, u gyo bibibi abi be᷆ kong. Biwom abina bi maa tor he kangg likorye a ma yi undi ununung a. 9 Likong Unuwa lè Ulot li tyung gboo le Unim a ngye ná ù fem bendi abe be᷆ ke-e ife lè he ’ingie. Biwom abi a shi ha abe be᷆ ke-e ife ye, bife bi tyung gboo le Unim a ngye ná ù ke bendi bebibi ’ingie kpamm kwu nyong Liti Ushe bendi puu. 10 Bendi bemen i abe be᷆ kee-kee shi biwom bibibi ’itaa inyiahwo ibell i kee a, be mbee swan le be kwa he ’ubwo Unim ye, kíbell ’ingie ’i ba dyam hwà puu. Bendi bemen be᷆ hwua bendi biwom uman ana, be shell undi ye, be kpe utebb undi ye. Idengell Unim angi ì yi he ifem Unim he lifung-atabe or, be shell ná be᷆ kong bia āngi ye. 11 Ukpor idengell Unim imen ana, mà na ife ì yi lè ikeb hwò bendi-uman bemen ana or, nya a na ı᷆ naa he ’ushu Unim i ben ābe ye. 12 Ukpor bendi bemen ana be geb lè ingwu ibell tya he biwom abi be ngye gbe lè bi ye, ndo kong bia ābi. Be sha biwom faale ugim nya a na inyia libeb angi Unim a shi ndor le bè gwu ziì a. Linim lì yi gie li nyong ābe nya a na li gie lı᷆ nyong inyia i a. 13 Nya a na befe be᷆ shi bendi be᷆ kpē ’ingie ’unyin i, na᷅ Unim or u᷆ be ke be ’ingie tyang lishi. Bendi bemen i be kwa awu za᷆ igye fa he ’uhwo. Be kung liti libo or sha ashina. Nyong be᷆ kwu ipel ha amen be za᷆ azi igor-igor likorye be nda ’ukwo lam amen, ukpor bè yi ibia a ke liwu līme᷅n. 14 Be kung àshì abell ndor ha bengingye akpela befe-befe, be shi ’iban ’i kwun ābe ’igyor ye. Bendi abe be naa genn he ’ukwo Unim ye, bendi-uman bemen i be kaà hè be bè lam kwu ābe, shi ābe be tyang ’ukwo Unim. Mbee ’unyong puu àshì abell à yi he biwom bendi. Ushe Unim a fel kwu nyong ābe. 15 - 16 Bendi-uman bemen ana be tyang ukwo Unim, kung ’ukwo linim a. Be kung abee Ubelem angwu ù yi unwaa Ubiyor. Ubelem, he liti ken, a ma bo u la sha ’ibibi ashi ’ı᷆ ke-e lifem, ukpor ’izaaki ’ima ’i ben he likorye a ke Unim ife ye. Kizaaki ashi ’ı᷆ kong likong ye, ki ma kong nya a na undigye, shi angwu u᷆ tye ugie ’isom Unim ana a tem gye ’ushu shi akpel-ye angwu a maa la lè shi ye. 17 Bendi-uman bemen ana be lam bendi nya a na abell umbwo a᷆ nyung a, be mbee shi ’itaa ken ha ’ibu ashi ’ufem ’u᷆ shi paa āshi wu mbee bipi, umbwo u tem ndor ye. Unim a kam ’iteng ashi be᷆ be kwu ndor ābe he ’ifufebb ashi ’i gye kpenn. 18 Be pwom ungwu nya ’idideng zii, be kaà hè be bè lam bendi abe be᷆ kaà nya he abwo le hè be bè fem lè he liwu bendi abe be ngye ’igyang ye. Be kaà hè be bè kwu kung ābe tem lè be lè ngwee abwo fe he ashele bigyor agwo àbi befe-gyang be᷆ shi. Kitaa ana na᷅ be shi ābe be tyang ’ukwo Unim. 19 Be hwua bendi abe be hà ngye ’ukwo Unim ingye ana le, gbe be shi a᷆bi befe be hwua ābe, be fel lè ’uhwo-bell. Ukpor befe-gyang or, bè yi lè ’uhwo-bell ye, bè yi ìfeè a ke bibibi abi be᷆ shi, likorye ’iwom ’iyang-yang ashi ’i kpē undi ityuu, hà undi umen ana a fel ùfeè a ke shi. 20 Gbe undi a kung abwo ama lè he bibibi igye anyin abi bı᷆ ban bendi le bwo a ngye Atyetyan Ujeso Ukristi angwu ù yi Undi-likpan utyan, u ha᷅ tem item lè mbu fe he bibibi bimen ana, bi kpe-e ityuu, u kpa ’ingie ’i go hwà a᷆shi hang a ma bè ngye Ujeso Ukristi ye gbang-gbang. 21 Ù ngye ’ukwo ahwu ’ù yi kpa-kpa ye, hang ’ì yi ngbebb-ngbebb ke-e hwò a᷆shi le a ngye hwu, saa a hà tem item tyang ’ukwo ’umen ana, u tem ke a᷆shi Unim a kong ife ye. 22 Kitaa ’iwom ashi undi anwuna a shi, kì yi nya a na ityang angi be bun a. Be bun le: "Ubua a faa ifaa wu, tem lè ngi zī." Be bun isuso le: "Be kwob ukagbo umbwo, a tem lè ngywal he bisor."
31 Bedim-gi lityam, kushia ahwu lefee na᷅ mı᷆ fee hwaa lè men i. Biwom puu abi mi kong he ashia amen afee i, mi kong ābi mî well amen biwom abi ma ngye mà a. Mi well amen le hè men mà bo ’inaa, gye ’ushu fe Unim lityam ken. 2 Mi kong abin le hè men mà well biwom abi bendi abe be᷆ tye ugie ’isom Unim be maa kong leěti le bi ba sha; ma mbee well àshi Atyetyan Ujeso angwu ù yi Undi-likpan utyan a kong de bebwaa-isom bema, be bun de men. 3 Mà kpi ’ikwu ngye le he ati umbee-likel igye anyin, bendi-inyan be ba ba àbe be᷆ kee-kee shi biwom he ’akem ’abell. 4 Be ba nyan amen da le: "Ndè le men ma de le Ujeso Ukristi a ma ke úkyébb le u tem ba? He hung ù hà yi? Kung lè há ’unyong ’umen ana betietyan be kwu nyong he nyong-nyong gbe hwō. ukpor ’iwom ’i shi ye. Biwom puu bì so nya a na bi ma yi nyong Unim a ma mbe igye anyin a." 5 Bendi-inyan abena be ngye biwom abi Unim a ma shi leěti dangg, ukpor be fe ukaa kpam àshì wu ābi, likorye be ngye le, leěti Unim a ma kong igie ife-ife a mbe itang lè ’usi. Umbwo na᷅ Unim a ma kong a bel itang. Ashin ’i ze le itang i be lè he umbwo a. 6 Leěti umbwo na᷅ Unim a ma kung ban igye anyin puu, gwu nim ubu ’iwom ’iyang-yang. 7 Unim a mbee kong igie-igie a shì lè itang lè ’usi abi lı᷆ ndè i, bì kwu kpamm nyong liti angi ’ìndē ’ı᷆ be shī dim ābi puu. A kam ābi ndor nyong liti angi u᷆ be tang ushe bendi puu. Bendi bebibi bemen abe be᷆ fe Unim ye ana, Unim u ba tang ābe he abwo lè ha ’uhwo-ma gbang-gbang. 8 Bedim-gi lityam, kì yi lè ’iwom ken ashi ’ì yi le mà naa lityam áshi ye. Kiwom ashi há ’ì yi le, liti ken lì yi Unim ná aze asisilisi, aze asisilisi a shi-e ná liti ken. 9 Bendi besuso be fel gim le Unim a fel gbelakaa gbe lè ashi a kyebb le u sha. Kì yi ’itaa ana a ye, u ngib lityam á kwa nyong le bendi puu bè tyang abwo lè biban ashele be hwaa lè he a, likorye a kee le undi ken or ù nim ’ūnyōng ’uma ye. 10 Mà na ’ì yi ’itaa ana or, Atyetyan u ba kpe-kpe-kpe. U ba ba imbul-imbul ná uzi nà. Nya he Liti limen ana, lifung-atabe he ’ipi libwee lè ’ufell lè ikpen bì yi, li ba sha ’ihwee kangg, li hà nyòng. Kìndē ’i ba sha᷆ dim biwom puu abi Unim a kung shì igye anyin. Itang lè biwom puu abi bì yi hen bi ba dim mbee puu. 11 Bwo men ma ngye le biwom puu bi ba mbee ’itaa ana, mà shi ugim gbe lè ’itaa likpe angi lì yi le mà kwu lè ngi. Kì yi le mà shang ’uhwo-men ke Unim, ma ke-e ife mbee akekel puu. 12 Mà ndor ashi ha Liti angi Unim u᷆ be be; ma mbee kaa kangg shi a᷆shi Unim a kee, hè ’ì shi-e ù be akikye. Nya he Liti limen ana, kusi ana ’u ba shā ’inde dim mbee, biwom puu abi Unim a kung shi igye anyin bi be shī ’inde dim mbee titi. 13 Ukpor Unim a ke li úkyébb le u ba sha itang lè ’usi abi bifufe. Bife na᷅ li fel kwu lı᷆ nyong. Nya na᷅ undi uyang-yang u᷆ be shi a᷆shi Unim a keē mbee ’unyong puu. 14 He ashina, bedim-gi lityam, nya a na ma kwu ma᷆ nyong Unim le ù shi abina, mà kaa kangg hè men mà kwu gelalala faale uben he ashi Unim le hè men mà be kpee lè he he ikwun-ikwun. 15 Mà well le Atyetyan a ngib lityam a kwu, likorye a kee le u ka bendi libwo hè be bè fel lè likpan ’unyong. Uporl, unwandatyan lityam, a ma fee ’ushia hwaa lè men, ke men utebb gbe he lishi abyele angi Unim a ke-e a. 16 He ashia puu angi a fee a ke ’itaa utebb umen i. Biwom bisuso abi a kong he ashia amen ana bì yi bikaa-bikaa, bi shwie nung bendi ye. Bendi abe be ngye ’iwom ye, be mbee naa genn he ’ukwo Unim ye ana, be gie biwom bimen a fee he ashia amen ana. Be gie ābi nya a na be᷆ gie igie Unim angi i teng iteng a. He ’ukwo ahwuna na᷅ be᷆ be lè linim ke ’uhwo-bell. 17 Bedim-gi lityam, men ufe ma ngye biwom abin mà. He ashina, mà ndo baa ’uhwo-men teng bendi abe be᷆ ke iten Unim ife ye ana, be sha amen ma tyang ’ukwo ’ununung ahwu ma naa genn ana la pwom ābe sha bibibi. 18 Kiwom ashi ’i ngbebb le mà shi ’ì yi le, mà gye ’ushu fe Atyetyan Ujeso Ukristi angwu ù yi Undi-likpan utyan, ma mbee ngye-e te ite ite, he-e ù gye ’ushu tyung inung ha amen. Ifem puu ì kwu ke-e ngyor igye kpamm! Kì ngyor ná mi kong.