2 John

¹ Mi angwu mì yi ukaandi bendi abongale na᷅ mı᷆ fee ’ushia ahwun hwaa lè wo, andagi angwu Unim a waa kung. Mi fee āhwu hwaa lè wo lè bebwaa-gang, men abe ’i nyin mi lè men lityam ken. Mi-mi na᷅ ’i nyin mi lè men ye, bendi puu abe be ngye igie Unim, ki nyin ābe lè men titi. ² Igie imen angi ì yi he atyam atyan ana na᷅ ’i shi li, ki nyin li lè men; igie imen ana i kwa ha abel ngyor igye kpamm. ³ Nya a na lı᷆ gye ’ushu ke igie Unim ife, ki mbee nyin li lè bende, Unim Atyetyan befe lè Ujeso Ukristi, Unwaa-ma, be ka li ’ukwun, be kwu lè beshi ha abel, be mbee shi ’i kwun li he atyam atyan kpatiaa. ⁴ Nyong mi ndè bebwaa-gang besuso be᷆ shi igie Unim he ’ukwo kpa-kpa ná Unim Atyetyan a de li, ki ke-m igor kangg. ⁵ Andagi, mi kee le mi well-a le bel puu lì kwu lè benyin ha bende. Uten umen ana ù yi angwu ufufe a ye, ù yi angwu li ngye kung lè há ’unyong li ma kpi ’ikwu fe Ujeso Ukristi a. ⁶ Ayang angwu ’i nyin he lè Unim? Undi angwu u᷆ ndor iten Unim na᷅ ’i nyin he lè Unim. Uten angwu li gyo kung lè há ’unyong ahwu li kpi ’ikwu fe Ujeso Ukristi ana ù yi le, kì nyin li lè bendi mbee ’unyong. ⁷ Ashi mi kong ana, mi kong āshi likorye bendi-ilam gbamm be fel hen igye, be paa wu mbee igye puu. Bendi bemen ana be swan le Ujeso Ukristi a be he igye anyin ná undigye ye. Befe bè yi ke Undi-linaa Ujeso Ukristi a. Undi-linaa umen ana na᷅ u᷆ lam bendi kpam-kpam. ⁸ He ashina, kì yi ngbebb-ngbebb le men ufe mà kang ’uhwo-men, hè ’iwom ’iyang-yang ashi ma᷆ shi mà shi āshi wu abwo likor a ye, ukpor hè men mà be kpē ’uke ’ūme᷅n sho yilididi lè ha Unim. ⁹ Undi uyang-yang angwu u᷆ gye ’ushu shi biwom abi Ujeso Ukristi a hwua li a ye, u᷆ fe bima ipel ha abi Ujeso Ukristi a hwua li, undi umen ana ù yi ke Unim a ye. Ukpor undi uyang-yang angwu u᷆ gye ’ushu shi biwom abi Ujeso Ukristi a hwua li, ufe na᷅ ù yi ke Unim Atyetyan lè Unwaa-ma. ¹⁰ He ashin mi da amen le, undi uyang-yang angwu a be u᷆ hwua amen ’iwom ashi ’ì yi atyetye lè ha ashi Ujeso Ukristi a hwua amen, mà kpe-e kwu ha amen ushom or, ngwu mà kong lè he or ye gbangg. ¹¹ Mi kong ashina likorye undi uyang-yang angwu a kong lè he, hà a fel lè abwo he bibibi bima. ¹² Mì so lè biwom gbamm abi mi kee le mi da amen, ukpor mi kee le mi fee bife ifee hwaa lè men ye. Mi ndor lishi le mi ba ha amen há, hè li lì kwu ukem kong ābi, lî yal gor ’iteng ken. ¹³ Unwanaa ungingye angwu ù yi hen, angwu Unim a waa kung titi, bebwaa-ma be bii atye.