2 Corinthinas

2 Corinthinas

¹ Mi Uporl angwu Unim a waa kung mi le mì kwu unwaa-isom Ujeso Ukristi, bel ha unwandatyan Utimoti na᷅ lı᷆ fee ’ushia ahwun. Li fee āhwu hwaa lè men, liwu bendi abongale angi he Ukorint, mbee lè bendi Unim puu he ’igie Akaya. ² Unim Atyetyan lè Atyetyan Ujeso Ukristi bè hā ke men ’ukwun, be shi hè ’ì kwun amen he atyam kpatiaa. ³ Mà lì pee Unim angwu ù yi Atyam Atyetyan Ujeso Ukristi, u shi Unim uma. Unim na᷅ ù yi Atyetyan angwu ù yi lè beshi ha bendi, angwu ukpell puu u be lè ha ahe a. ⁴ U kpell li he bingie puu abi bı᷆ be hwaa lè bel, le lì ngye ná lì kung ukpell umen ana ke bendi he bingie atyetye-atyetye abi bı᷆ be hwaa lè be. ⁵ Nya a na lı᷆ kpe bingie gbamm ná Ujeso Ukristi a ma kpe na᷅ gbe ha Ujeso Ukristi lı᷆ kpe ukpell ukaandi lè ha Unim. ⁶ Bingie bimen abi bel lı᷆ kpe i bi ba lè ukpell lè likpan ka amen. Ukpell angwu Unim u᷆ ke li u sha amen ma ngib lityam naa genn he ’unyong ahwu bingie bı᷆ be be hwaa lè men nya a na bì yi fe li i. ⁷ Li fe lityam ha amen kangg le bingie bi hwà amen ye, likorye li ngye le nya a na mà yi lè abwo utung ha abel he bingie na᷅ mà yi lè abwo utung ha abel he ukpell angwu Unim u᷆ ke li. ⁸ Bebuye, li kee le li sha amen mà ngye bibibi bingie abi bi ma yi fe li he ’igie Eshia. Bingie abi há bi ma dyam kangg le bi shi li li tem ndor lishi akwele bewum ye. ⁹ Nya he ’unyong ’umen ana ’i ma fel a ná be tang ushe le bè gwu li a. Biwom abin puu bi ma kem fe li le hè bi bì shi li lì fe lityam ha ’uhwo-tyan ye, li fel fe lityam ha Unim angwu u᷆ wum akwom hwan. ¹⁰ Bwo a kpan li lè he abwo lihwu anyin, kitaa ana na᷅ u᷆ kpan li lè he bibibi puu. Li fe lityam ha ahe le u kpan li mbee ’unyong puu. ¹¹ Ki ngbebb le mbee ’unyong puu mà kong ha Unim ke li, bii he le ù kpell li. He ’uhwo ushang angwu ma᷆ ke, Unim u ka li ’ukwun kyoo, bendi gbamm be pee Unim ná a ke li ’ukwun. ¹² Atan-lengi angwu lı᷆ yal gor, ù yi le li ngye ’igyang-igyang he atyam atyan le likpe lityan he igye anyin, mbee-mbee lè agwaale utyan ha amen, li kung likpe linunung a shi biwom gboo ná bendi abe bè yi lè lingye angi li be lè ha bendigye a ye, li be gbe he inung Unim a. ¹³ Bel li fee amen biwom abi ma bo, bi nung amen a. Ukpor, mà na ’anaa-anaa i bı᷆ nung amen puu ye or, kunyong ’u ba lè há ahwu bı᷆ be nung amen puu, le he Liti angi Atyetyan Ujeso u᷆ be be, hè men mà yal gor he ’uhwo ’utyan ná bel lı᷆ yal gor he ’uhwo ’umen. ¹⁵ Ashin na᷅ ’i tan lè shi, he ukpi-ikwu mi ma kam le mî be ha amen há le hè men mà kpe ’ukwun ’ugbe ’afee. ¹⁶ Mi kam le mi bel ha amen há nyong mı᷆ gye he Umasedonia or, nyong mı᷆ tem lè há or, le hè men mà kpell mi he litan ligi gye he Ujudia. ¹⁷ Ugim angwu mi ma shi le mi ba ha amen há, ma nya gim le mi maa tyua ityua a? Ma nya gim le mi maa kong he ungwu ufe le mi ba há, mi gim he lityam life le mi ba ye a? ¹⁸ He ’ushu Unim angwu u᷆ bel he ungwu ye, mi kong ’igyang le, úkyébb angwu mi ke men, mi bong, mi swan nya ’unyong ken ye. ¹⁹ Ujeso Ukristi, Unwaa Unim, angwu leěti bel ha Usalas, lè Utimoti li maa bun de men gbe lè he, u gie ye. Ufe na᷅ Unim a kong gbe ha ahe biwom puu abi ufe Unim u᷆ shi. ²⁰ Kigyang-igyang ufe na᷅ a tyung ashele ikyebb puu angi Unim a ke le u sha. Ashin na᷅ ’i tan lè shi, ngwu gbe ha ahe lı᷆ kong le, "Kì ngyor ná Unim a kong," hè li lì pee he. ²¹ Unim na᷅ a shi li bel lè men li naa genn he agwaale utyan ha Ujeso Ukristi. A waa kung li ndor ta-ta ke ’uhwo-ma, ²² u fe li ùfee᷅ uma, tyung le ufe na᷅ ù yi lè bel, u kung Ukatia Kunyong uma fe he atyam atyan tyung ’itaa ashi ’ı᷆ shi li lı᷆ ngye le u sha biwom puu abi a kyebb ka li. ²³ Unim ù yi ushada ugi le mi kong ’igyang a le, atan-lengi angwu mi wa be há he Ukorint ye ù yi le mî ke men ’ingie ye a. ²⁴ Li kam le li fa da amen ashi mà bong a ye, likorye ma naa genn he abongale ūme᷅n ha Unim mà, ukpor li ka amen ukpell angwu u᷆ shi amen ma᷆ kwu lè igor a.

¹ Ashin na᷅ ’i tan lè shi mi shi ugim le mi tem ba ha amen há ye, mî be lè ’imbwee ke men ye, ² likorye gbe mi shi amen ma fel lè ’imbwee, ayang u᷆ shi-m mı᷆ kwu lè igor? Men abe mi shi amen ma fel lè ’imbwee na᷅ ’ì yi le hang mà shi-m mì kwu lè igor. ³ Atan-lengi anwuna na᷅ mi ma fee amen ’ushia ahwuna. Mi fee ná likorye mi kee le gbe mi be há, men abe ’ì yi le hang mà shi-m mì kwu lè igor, mà fel shi-m mì kwu lè ’imbwee a ye. Mi ngye dangg le gbe mì yi lè igor, men or titi ma kwa lè ngi. ⁴ Kushia ahwu leěti mi ma fee amen, mi ma fee āhwu lè ’utor he lityam, lè akye he ashi; mi fee āhwu le ’ù shi amen mà fel lè ’imbwee a ye, mi fee āhwu le ’ù tyung amen ná ’i nyin mi lè men kangg a. ⁵ Gbe undi a shi ’ibibi, a shi-m mi a ye. Mi kee le mi dyam āshi ye. Gbe mi ndè shi li-li-li, ma ndà le a shi āshi ha amen puu a. ⁶ Kingie ashi liwu li bong lingmam ken le bè ke undi umen ana ’i kpè. ⁷ He ashin, kunyong ’u fel ahwu mà tyang ke-e, ma fe-e ingie, le hè ’imbwee ’ì kpe-e ityuu ye. ⁸ Mi tim amen anung le mà tyung he le ’i nyin amen lè he. ⁹ Atan-lengi angwu mi ma fee amen ’ushia ahwell ù yi le mi kee le mi kaa amen ndà le hà ma kam le ma kpa utebb ugi mbee ’unyong puu or. ¹⁰ Gbe ma tyang ke undi angwu a shi ’ibibi, mi or mi tyang ke-e. Gbe ’ì yi le mi tyang ka, mi tyang ka he he ’uhwo ’umen he ’ushu Ujeso Ukristi, ¹¹ le hè Usetan ù ndè libwo kpe li ityuu ye; likorye li ngye abi u᷆ kam le u sha li. ¹² Mi ma gye he Utrowas le mî lè bun ’isom ’inunung gbe lè Ujeso Ukristi. Nyong mi lè wu há, mi ma ndè le Atyetyan Ujeso a buu ’ukwo ke-m le mì shi aki ke-e há. ¹³ Ukpor mi ma yi lè ufung awaale kangg, likorye mi ma ndè unwandatyan Utaitus ye. He ashina mi ma de bendi abe bè yi nya le ’i fel mbee ati, mi kung bo gbe ndo he Umasedonia. ¹⁴ Ipee ì kwu ke Unim! Ufe na᷅ u᷆ teng li bel abe li gwaa ipel ha Ujeso Ukristi, gbe ha abel u shi bendi he igye i be ngye le Ujeso Ukristi a hwò biwom puu. A shi li lì yi ná behwu abe be᷆ nung nyin, abe be᷆ wu mbee bipi le hè bendi bè ngye ’itaa ashi Ujeso Ukristi ù yi. ¹⁵ Bel lì yi ná behwu abe be᷆ nung nyin, abe Ujeso Ukristi a ting shī ’inde ke Unim. Kinung ábe ’i wu ha bendi, abe be fel lè likpan lè abe bè so ke linim. ¹⁶ Bendi abe bè yi ke linim, befe, kinung béhwu aben ’i ba lè lihwu a gwa ābe. Ukpor abe be fel lè likpan, kinung béhwu aben ’i ka ābe likpan a. Ayang a kpè le u sha ashin? ¹⁷ Bendi besuso bè yi há abe be᷆ kung ’isom Unim ná ’iwom ashi ’i mbu alemtu nà. Kitaa ana na᷅ bel lì yi ye, bel lì yi bebwaa-isom Unim abe li gwaa ha Ujeso Ukristi, li kong ’igyang he ’ushu ’uma.

¹ Ashin ’i nya tyung le li fel pwom ungwu â? Ki nya ngbebb le bel lì fel ná bendi abe be teng, lì kpe ashia angi lı᷆ tyung bendi le lì yi benunung ná bendi abe be teng a? ² Dia! Men-agyang mà yi ’ushia ’umen ana, ahwu ’ù yi fee fe he atyam atyan, ahwu lı᷆ kung tyung bendi bè bo, be ngye. ³ Ki nung nwongg le Ujeso Ukristi ugyang lè ’uhwo-ma na᷅ a fee ’ushia ’umen ana gbe ha abel a. A kung ùnìm a fee or, ngwu ù fee āshi he ’ikpakpaa a ye. A kung Ukatia Kunyong Unim angwu ù yi uwum a fee āshi he atyam bendigye. ⁴ Li kong igie anyina likorye li fe lityam ha Unim gbe ha Ujeso Ukristi. ⁵ Kì yi lè ’iyang-yang ha abel ashi ’ı᷆ shi li lı᷆ kpè le li sha aki anyin ye. Ikeb angi lì yi lè ngi i be lè ha Unim a. ⁶ Ufe na᷅ a shi li lì yi lè ikeb angi lı᷆ shi bendi be᷆ ngye gbe lè ’iwom ’ifufe ashi a kong ndor le u sha ka bendi bema. Akongale ndor umen ana a be lè he iten angi be fee ndor a ye, a be lè ha Ukatia Kunyong Unim a. Iten angi leěti be ma fee ndor i be lè lihwu. Ukpor Ukatia Kunyong ufe a be lè likpan a. ⁷ Iten imen angi leěti Unim a ma ke Umosis, a ma fee āngi fe he bikpishia akor bifee. Kikung-gbo Unim ’i ma taa Umosis he ’ushu he ’unyong ahwu a kpe Iten ana. Kushu ’uma ’u taa kangg le bendi Izwell be maa tem ndǎ he ashi he ’ushu mbee ye, mà na ’i ma gbe ’igbe ye or. Iten imen angi i be lè lihwu i, bwo i be lè ’ikung-gbo ’i dyam ’itaa ana, ⁸ liti angi Ukatia Kunyong Unim u᷆ be, u ba lè ifem Unim angi i dyam kangg. ⁹ Iten angi í be lè linim a, Unim a ma tyung ataale ’itaa ana, Ukatia Kunyong angwu a be lè likpan ’unyong a, Unim u ba sha ’ima ’i taa gba gyong. ¹⁰ Bwo ifem Unim angi i dyam kangg i be, kikung-gbo ashi ’ushu ’i mbee. ¹¹ Bwo ’iwom ashi Unim a kong ndor, ashi ’i ma yi he ’anwaa ’unyong zangg a, ’i ma be lè ifem Unim angi i dyam, kiwom ashi ’ì yi ngyor igye ’ì yi lè ifem angi i dyam gbe gyong gbe gyong. ¹² Bwo lì yi lè lishi andorale anyin ha Unim, li kong porr faale ’ushell. ¹³ Bel lì yi ná Umosis a ye. Ufe a ma kung ’ihwom shī ’ushu ’uma le hè bendi Izwell bè ndè ’ikung-gbo liti ken ana ye. ¹⁴ Àtyám abell a ma yi shī kpemm kpamm be wu ’unyin i or, kihwom ana ’ì so shī àtyám abell. Ashin na᷅ ’i tan lè shi ’unyong ’uyang-yang be᷆ bo ashia akongale ndor Unim angwu ukpi-ikwu, ki nung ābe ye. Undi angwu ù yi gwaa ipel ha Ujeso Ukristi ufe-ufe na᷅ Unim u buú he ’ihwom lè he lityam. ¹⁵ Kpamm ’unyin i or, nyong be᷆ bo ’ushia Iten Umosis, kihwom ana ’ì so shī há he atyam abell. ¹⁶ Kì yi nya a na be fee nya he ’ushia Iten Umosis le: "Gbe undi a bel lityam lima ke Atyetyan, u buú he ’ihwom ’imen ana lè he lityam." ¹⁷ Ashi be fee nyin le Atyetyan, ki ze le Ukatia Kunyong Unim. He ’iteng ’iyang-yang ashi Ukatia Kunyong Unim ù yi, bendi be kwa he abwo lifee nya ye. ¹⁸ He atan-lengi anwun, bel puu abe be buu li ’ihwom ana lè he ’ushu, kikung-gbo Atyetyan Ujeso ’i taa he ’ushu ’utyan. Kikung-gbo ana ’i gye ’ushu taa kpamm ’i gbe gie li li fel ná ufe-gyang. Ashin ’i ba lè ha Atyetyan angwu ù yi Ukatia Kunyong Unim.

¹ Bwo Unim he beshi bema a kung aki anyin ke li, lī wee abwo ye. ² Biwom ’undyell lè biwom ishwia abi li maa shi, lī tyang ābi abwo ma. Li lam ilam or, ngwu lì kee uman fe he igie Unim or ye. Kiwom ashi li shi na᷅ ’ì yi le li be lè ’igyang Unim he igye gboo le hè bendi bè nde ashin, be ngye he atyam abell le likpe lityan lì yi linunung he ’ushu Unim. ³ Gbe ’ì yi le ’isom ’inunung ashi lı᷆ bun ’ì so he ’undyell lè ha undi uyang-yang, hà angwu há ù yi ke linim a. ⁴ Atan-lengi angwu be᷆ kpe ’isom ana ye ù yi le, usu bibibi angwu igye anyin a kwu igim ibell ndor he ’ifufebb. Ufe a shi ná le hè be bè ndè ’ikung-gbo Unim ye. Kikung-gbo ashin ’i be lè he ’isom ’inunung ashi gbe lè ifem Ujeso Ukristi angwu ù yi bizang ha Unim. ⁵ Bel lī bun ityang gba lè ’uhwo-tyan a ye, li bun gba lè Ujeso Ukristi le ufe na᷅ ù yi Usu, bel li shi bendi abe lı᷆ shi aki kpell amen he ’uhwo Ujeso. ⁶ Unim angwu a de le, kikung-gbo ’ì taa he afee ’ifufebb, ufe umen na᷅ a shi ’ikung-gbo ’ima ’i taa he atyam atyan, le hè li lì ngye ifem Unim angi i taa he ’ushu Ujeso Ukristi. ⁷ Gbe undi a ngye ashin, kì yi-e a ná ’ìngbèbb ’ikaandi ashi ’ı᷆ be lè ha Ukatia Kunyong Unim á. Bel abe lì yi lè ’ìngbèbb ’ikaandi ’imen i he atyam atyan, lì yi ná ’iki itang ashi ’ì yi he ’ukpo ye, le hè bendi puu bè ngye le ikeb angi i hwò puu i ba lè ha Unim a, i ba lè ha abel a ye. ⁸ Kingie ’i ba hwaa lè bel mbee ’unyong, ukpor ’i do li ye. He ’unyong ’ususo ’i kwa li he ’uhwo, ukpor li wee abwo ye. ⁹ Bendi-linaa betyan be go gbamm, ukpor Unim u tyang li ye. Mà na lì yi lè ’idoale he ’unyong gbamm or, li hwa᷆ ye. ¹⁰ He ’unyong ’uyang-yang li ngib lityam kpe ’ingie ná Ujeso a ma kpe he ’unyong lihwu lima, le hè gbe he ashi li shi, bendi bè ndè likpan Ujeso ha abel. ¹¹ Nya a na lì yi bewum i, lì yi he ashi lihwu he ’uhwo Ujeso, le he ashin, hè bendi bè ndè likpan Ujeso ha abel abe lı᷆ hwō. ¹² Ashin ’i ze le bel li kpe ’ingie bong lihwu, lî nde le ma kwa lè likpan ligyang angyell. ¹³ Be fee he ’ushia Unim le: "Mi kong ná likorye mi fe lityam ha Unim." He ashina, bel or li kong ná likorye li fe lityam ha Unim. ¹⁴ Li ngye le Unim angwu a wum Atyetyan Ujeso lè he lihwu, u ba wum li utung ha ahe, u kung li bel lè men lè ndor he ’iteng ken he ’ushu ’uma. ¹⁵ Biwom abina puu bi shi he ’uhwo ’umen hè inung Unim angi ì yi ha amen ì gye ’ushu wu ha bendi gbamm. Ashin ’i sha ābe be pee Unim, be fem he. ¹⁶ He atan-lengi anwun li wee abwo ye. Mà na inyiahwo ityan i ndor àshì i ndo kaa or, bēnyōng betyan befe be die fel befufe he liti-liti. ¹⁷ Kanwaa ’ingie ake lı᷆ kpe he ’anwaa ’unyong zangg i, ki ba ba li lè ifem angi ı᷆ ngyor igye kpamm i dyam hwò ’ingie ashi lı᷆ kpe i. ¹⁸ Bel li ndor lishi he biwom abi lı᷆ ndè bi lè atong-shi i a ye, li ndor lishi he abi lı᷆ ndè bi lè atong-shi ye a, likorye abi lı᷆ ndè bi lè àshì bi za᷆ igye ye, abi lı᷆ ndè bi lè ashi ye na᷅ bì yi ngyor igye.

¹ Ushom angwu lì yi ha afee nyin, angwu ù yi inyiahwo igye anyin, lí ngye le nyong u᷆ gyebb wu he itang, Unim u ka li ushom he lifung-atabe angwu lı᷆ kwu. Ushom umen ana u ba kwa ná ushom angwu bendigye be tye a ye. U ba kwa ushom angwu Unim ugyang a tye-e le ù ngyor igye. ² Kunyin i, li shom ushang lè ’ibebebb, likorye li gim gba lè ushom angwu Unim a kam ndor li he ushu uma, kì yi li lè ’igyor le hang li fel kung he shī he ’uhwo ná ’ihwom ashi ’i ngbebb li a, ³ likorye gbe li kung he shī ná, li kwa faale inyiahwo ye. ⁴ Nyin i ná lì so kwu he ushom igye anyin, li shom ushang lè ’ibebebb he ’ingie ashi ’ì yi fe li. Ashin ’i ze le li kee le li mbeè lè inyiahwo angi igye anyin a ye, ukpor lì yi lè ’igyor le li kung ushom angwu he lifung-atabe shī, li ndè le inyiahwo angi ì yi le i hwa᷆ i gie fel lè likpan. ⁵ Unim ugyang na᷅ u᷆ kam li ndor nyong ugieale anwun, a ke li Ukatia Kunyong uma, hè ’ì tyung le u ba ka li biwom puu abi a kam ndor li faale ifung. ⁶ He ashin, mbee ’unyong puu lì yi le ìngié. Li ngye le nyin i ná lì yi he inyiahwo ityan he igye anyin, lì yi he ushu Atyetyan Ujeso a ye, ⁷ likorye likpe angi lı᷆ shi he igye anyin lī fel he ’uhwo biwom abi li ndor lishi a, abi lı᷆ ndè lè ashi a ye. ⁸ Lì yi lè ingie, ki ngbebb li le lì gbe tyang inyiahwo angi igye anyin gye lè kwu ipel ha Atyetyan Unim he ushu uma. ⁹ Kiwom ashi ’i dyam hwò puu ’ì yi le, li kee le li sha nyin Atyetyan, mà he igye anyin or, mà he lifung-atabe or. ¹⁰ Liti li ba ba angi bel puu lı᷆ be naa he ’ushu Ujeso Ukristi le ù tang li ushe, u kwa ’itaa ashi undi-undi a shi biwom he igye anyin a, gbe undi a shi ’inunung, gbe a shi ’ibibi or. Undi uyang-yang u ba kpa àshi ’i keè ha abi a shi he igye anyin kam ndor ’uhwo-ma he ’usi. ¹¹ Bel li ngye ’ushell Unim. Ashina na᷅ ’i tan lè shi lı᷆ teb lè bendi le bè be fe-e. Unim a ngye àtyám atyan mbee akekel ángi puu, mi ndor lishi le ma ngye likpe ligi he atyam āme᷅n. ¹² Bel lì tem pee ’uhwo-tyan ipee he ’ushu ’ūme᷅n ye, li kee-kee kaa ikaa a le li de men atan-lengi ununung angwu ma᷆ yal gor he ’uhwo aki atyan a, le hè men mà ngye ná mà fan bendi abe be᷆ pwom ungwu lè undi he libwo lima a, he likpe lima a ye. ¹³ Gbe ’ì yi le li ngyor lityuo a, li ngyor āngi he ’uhwo Unim a; gbe ’ì yi le ugim utyan ù yi kpa-kpa, ù yi he ’uhwo ’umen a. ¹⁴ Benyin Ujeso Ukristi na᷅ be᷆ shi li lı᷆ shi ’ukwo Unim, likorye li ngye le leěti ufe-ufe na᷅ a ma hwō he lishi bendi puu. Ashin ’i ze le bendi puu be fel lè abwo he lihwu lima. ¹⁵ A ma hwō ke bendi puu, le hè bendi abe bè yi bewum, bè tem shi ’iwom ashi ’ı᷆ nyin ’uhwo-bell a ye, bè fel shi ’iwom ashi ’ı᷆ nyin angwu a hwō, u wum ke be. ¹⁶ Lì tem pee undi or, ngwu lì ben he or, ná bendi he igye anyin be᷆ shi a ye. Mà ’ì kwu le leěti li maa kung Ujeso ná undigye a or, lì tem sha ná ye. ¹⁷ Gbe undi a gwaa ’uhwo-ma ipel ha Ujeso Ukristi, u fel undi ufufe. Biwom bìtı᷅m bi mbee, biwom puu bi fel bifufe. ¹⁸ Biwom abin puu bi be lè ha Unim a, Unim angwu gbe ha Ujeso Ukristi a gie li bel puu abe leěti li ma yi bendi-linaa bema, shi li li fel ikwun ha ahe. U ke li aki le lì be lè bendi hè be bè fel ikwun ha ahe. ¹⁹ Kisom ’ityan ’ì yi le, gbe ha Ujeso Ukristi, Unim u sha bendi puu be fel ikwun ha ahe, u ban ushe biban bibell. Kisom ashin na᷅ a ke li le lì shi bendi bè ngye le ’ukwo ’u buu le bè fel ikwun ha Unim. ²⁰ He atan-lengi anwun lì yi bebwaa-isom Ujeso Ukristi, li naa he lishi lima. Gbe ha abel, Unim a ko amen. He lizen Ujeso Ukristi, men abe mà yi bendi-linaa Unim, li tim amen anung le mà gie be fel ikwun ha Unim. ²¹ Ujeso Ukristi ufe-gyang a shi ’iban ye, Unim a hà shi-e a kung biban bityan so ’uhwo-ma, le gbe ha ahe, lî fel benunung he ashi Unim.

¹ He ashin, bel abe lı᷆ shi aki anyin ipel ha Unim, lì so-i tim amen anung le, men abe Unim a tyung inung ha amen, mà ban āngi ye. ² Mà gyo a᷆shi Unim a kong le: "He ’unyong ahwu ’ì yi le mì kwu lè beshi ha amen, mi gyo amen ’ukye; he liti angi lì yi le mì kpan amen, mi kpell amen." Mà gyo, kunyin na᷅ ’ì yi liti beshi. Kunyin na᷅ ’ì yi liti likpan. ³ Le bwo bel li kee le undi ù nde uben he aki atyan ye, li kaa kangg le lî ndè le li sha a᷆shi ’ı᷆ be lè limbu ke undi ye. ⁴ Ashin na᷅ ’i tan lè shi, he ’iwom ’iyang-yang ashi lı᷆ shi, lı᷆ tyung le lì yi bebwaa-isom Unim gbe he lityam angibale he ’unyong ’ingie, lè igben lè ’unyong be᷆ teb lè bel. ⁵ Li ngib lityam he ’unyong be᷆ kpam li ikwun, nyong be᷆ fe li he igaadye lè ’unyong be᷆ kwu li. Li ngib lityam sha aki atyan, mà na a hwǒ li ikeb or, mà na itung ı᷆ ndo li or, mà na lı᷆ mbu ’unde ye or. ⁶ Li ndor ’uhwo-tyan betaa-betaa, li tyung likpe linunung, li kwu lè lingye, li ngib lityam, li ngbebb inung, le hè bendi bè ngye le lì yi bebwaa-isom Unim a. Ukatia Kunyong Unim ù yi ha abel, li shi lè benyin begyang abell, ⁷ li bun ’igyang da bendi, ikeb Unim ì yi ha abel, kinunung ashi lı᷆ shi ’ì yi ná bigbor ’ukye abi lı᷆ kung kin lishi lityan, li kung ndo ’ukye. ⁸ Bendi besuso be ka li ife, besuso be bia li; besuso be buu li atye, besuso be pee li; besuso be kung li ná bendi-uman, mà na lı᷆ kong ’igyang or. ⁹ Bendi gbamm be ngye li, ukpor besuso be de le lì yi he ’ukpo ye. Lì yi fel ná akwom a nà, ukpor lì yi bewum. Mà na bendi be᷆ teb lè bel or, be gwu li ye. ¹⁰ Mà na lì yi lè ’imbwee or, li yal gor mbee ’unyong. Mà na lì yi likaa or, li shi bendi gbamm be mbu ’ingbebb he ashi Unim. Lì yi bendi ná lì yi lè ’iwom zangg or ye nà, ukpor lì yi lè biwom puu. Biwom abin puu bi tyung le lì yi bebwaa-isom Unim. ¹¹ Men bendi Ukorint, biwom puu abi bì yi he atyam atyan, li bun ābi gboo de men. Li kpe men fe he átyám atyan. ¹² Kì yi lè ’iwom ken or he atyam atyan ashi li de men ’i teng ye; men na᷅ ma wa kpe li fe he atyam āme᷅n ye. ¹³ Mi kong ha amen ná undi u᷆ kong ha bebwaa-ma á. Mà gim gbe lè bel he ’ukwo ahwu bel li gim gbe lè men. Mà kpe li fe he atyam āme᷅n. ¹⁴ Bendi abe be bong ha Ujeso Ukristi ye, mà ngwee utyang ubell ye. Utyang angwu ’itaa ana a ngbebb ye. Kinunung lè ’ibibi bi gwaa ha bende ye, kikung-gbo lè ’ifufebb bi gwaa ha bende ye. ¹⁵ Ujeso Ukristi lè Usetan, usu bibibi, be ngwee befee ha bende ye. Undi angwu a bong ha Ujeso Ukristi lè angwu a bong ha ahe ye, be gwaa ha bende he ’iwom ’iyang-yang ye. ¹⁶ Ushom Unim lè ushom ikem i kpee bende ye. Bel na᷅ lì yi ushom Unim angwu ù yi uwum. Leěti Unim ugyang a ma kong le: "Mi sha ushu ugi he inyiahwo bendi begi, mi kwu he liwu libell. Mi kwa Unim ubell, befe be kwu bebwaa-gi." ¹⁷ Kife na᷅ ’i tan lè shi, Unim Atyetyan a de le: "Mà fem lè he liwu libell, mà ndor ’uhwo-men atyetye, ma tang ’uhwo-men lè he ’iwom ’iyang-yang ashi ’ì yi kpa-kpa he ashi Unim ye. Gbe ma shi ná, mì ha᷅ kung amen ná bendi begi. ¹⁸ Mi na᷅ mi fel Atyamen, men ma fel bebwaa-gi. Mi Atyamen angwu mì yi lè ikeb puu mi kong igie anyin."

¹ Bedim-gi lityam, bel puu na᷅ a ke li ikyebb imen ana. He ashin, mà lì tang ’uhwo-tyan lè he biwom puu abi bı᷆ shi inyiahwo ityan lè ’ūnyōng ’utyan bı᷆ kwu lè umbe he ashi Unim. Kushell Unim ’ù shi li lì ndor ’uhwo-tyan betaa-betaa faale ’iban. ² He atyam āme᷅n, mà kwu lè benyin ha abel, likorye li shi undi ūme᷅n ’ibibi ye, li shi ban undi or, ngwu lì kpe kung ’iwom undi ye. ³ Mi kong ashin le mi ben amen a ye, likorye ki nyin li lè men kangg nya a na mi ma bè kong. Mà ’ì kwu likpan or, lihwu or, mà yi li he lityam-lityam mbee ’unyong puu. ⁴ Mi fe lityam ha amen kangg, mi mbee yal gor he ’uhwo ’umen. He bingie puu abi bı᷆ be hwaa lè bel, mi wee abwo ye, mì yi lè igor kangg. ⁵ He ’unyong ahwu li ma lè wu he Umasedonia, li ma yi lè ’ūnyōng ashwele ye. Bingie bi ma yi fe li kel-kel. Bendi be maa shwan lè bel, kushell ’u shi he atyam atyan. ⁶ Ukpor Unim a kwu li abwo he lityam gbe he asomale Utaitus hwaa lè bel nya a na u᷆ kwu undi angwu a wee abwo. ⁷ Abele uma ufe-ufe na᷅ a fe li ingie ye, adele utyan ná má fe-e ingie, a fe li ingie kangg. U de li le mà yi lè ’igyor kangg le hang ma nda-m, ma shi lè ’imbwee kangg he ’uhwo ’ugi, ma mbee kam le ma naa mi he item. Abin puu bi fe sho igor igi kangg. ⁸ Mà ’ushia ahwu mi ma fee amen ’u shi amen ma fel lè ’imbwee or, mì yi lè ’imbwee ye. Mà leěti mi ma yi lè ’imbwee le bwo ’u shi amen ma fel lè ’imbwee he ’anwaa ’unyong zangg or, ⁹ kanaa-anaa i mi fel lè igor a. Mì yi lè igor le bwo ma᷆ mbwee a ye, mì yi lè igor likorye ’imbwee ’īme᷅n ’i shi amen ma tyang abwo lè biban ashele a. Kimbwee ’imen na᷅ Unim a kung gie lityam līme᷅n lè he biban ashele. Ashina na᷅ ’i tan lè shi mi de men le, li do amen ye. ¹⁰ Kimbwee ashi Unim u᷆ kung shi aki gie lityam undi, ki kpell undi angwu há u kwa lè likpan ’unyong. Kife ’ì yi lè ’ubwo ambyele ye. Ukpor ’imbwee ashi ’ı᷆ be lè ha Unim a ye, ki ba lè lihwu á. ¹¹ Mà ndè ná Unim a kung ’imbwee ’īme᷅n shi aki anunung ke men. Kanaa-anaa i ma fel lè benyin he biwom Unim hwò leěti, ki mbee shi amen ma kee le ma tyung bendi le mà yi bendi bebibi a ye. Mà ndè ná ma swan ’ibibi, ma shi lè ’ushell, ma shi lè ’igyor le ma kpell mi, ma kaa kangg nong bendi abe be᷆ shi imbeb. He biwom abin puu, ma tyung le mà yi faale uben. ¹² He ashin, mà na mi ma fee amen ’ushia ’umen ana or, mi ma fee āhwu he ’uhwo undi angwu a shi ’ibibi or, ngwu mì fee āhwu he ’uhwo undi angwu be shi-e ’ibibi a ye. Mi ma fee āhwu le hè ’ì nung amen he ’ushu Unim ná ’i nyin amen lè bel kangg. ¹³ Ashina na᷅ ’i fe li ingie kangg. Bel ufe-ufe na᷅ lì yi lè ingie ye. Kiwom ashi ’i shi li li fel lè igor kangg ’ì yi le, li ndè ná Utaitus ù yi lè igor likorye ma fe-e ingie nyong a ma yi ha amen há. ¹⁴ Mi ma kung amen pwom ungwu ha Utaitus, ma mà fe-m ishwia he ’uhwo ye. Bel li kong ’igyang de men mbee ’unyong. Kitaa ’imen na᷅ nyong lí kung amen pwom ungwu ha Utaitus, ashi li kong gbe lè men ’ì yi ’igyang. ¹⁵ Benyin abe ù yi lè be ha amen be fel dyam kangg likorye a well ná men puu ma ma ke-e ife, u mbee well ná ma ma kpe-e, ma tung for-for kpe-e. ¹⁶ Mì yi lè igor kangg likorye ma kpè le undi ù fe lityam ha amen.

¹ Bebuye, li kee le li sha amen mà ngye ná Unim u᷆ shi aki gbe he inung ima he awu bendi abongale angi he ’igie Umasedonia. ² Mà na igilale ikaa-ikaa ı᷆ be hwaa lè be or, bè yi lè igor kangg. Igor i shi ābe be ke ’uke kangg, mà na bè yi likaa or. ³ Mi da amen ’igyang le be ke ’uke ná ikeb ibell ì yi kwom, be ke gbe gyong ikeb ibell or. Ki be lè he igim ibell igyang a, ⁴ be tim li anung le lì ke be libwo hè be bè gbong beke abe lì kung lè kpell bendi Unim he Ujudia. ⁵ Be ma shi gbe gyong ’itaa li ndor lishi, likorye ukpi-ikwu be kung ’uhwo-bell ke Atyetyan Ujeso, he ugim Unim be hà kung ’uhwo-bell ke li or titi. ⁶ Kife na᷅ ’i tan lè shi li bii Utaitus le ufe angwu a kpi aki beke agbongale anyin ù be gye lè ngi ’ushu, u kpell amen ma kung benyin shi mbee āngi. ⁷ Ma sha ngbebb-ngbebb he biwom puu, mà yi lè abongale, ma ngbebb ungwu, ma shi lè lingye. Mà yi lè ’igyor le ma sha aki amen i lityam ken, ki nyin amen lè bel kangg. Fe na᷅ lı᷆ de men le, mà tyung bendi ná mā ke ’uke faale ’akwukwell he aki benyin. ⁸ Mi kwa amen he ikeb a le mà shi ’itaa ana ye. Mi de men ná bendi aben bè yi lè ’igyor le be kpell a, le mi ngye le hà benyin bēme᷅n bè yi ’igyang or. ⁹ Men ma ngye inung Atyetyan Ujeso Ukristi ná a mbu ’ingbebb hwò bendi puu, ukpor a tyang āshi bel fel undi-likaa he ashi bendi he ’uhwo ’umen, le men mà fel bendi-ingbebb he ashi Unim gbe he likaa lima. ¹⁰ Ugim ugi he likong anyin ù yi le ’i ngbebb le mà shi mbee aki angi úze᷆ ma ma kpi. Men na᷅ ma ma kpi ’ikwu shi ugim le ma kpell bendi, ma mbee kpi ’ikwu kpell ābe. ¹¹ Ashin na᷅ ’i tan lè shi mı᷆ de men le mà gye ’ushu shi mbee aki ana. Mà kwu lè ’igyor he ambeeale ángi shì nya a na úze᷆ ma ma yi lè ’igyor he akpyele ángi. Mà shi aki anyin ná ikeb īme᷅n ì yi kwom. ¹² Gbe undi ù yi lè ’igyor le u ka ’uke, Unim u kee he le ù ke ashi ù yi lè shi ye a ye, u kee he le ù ke ashi ù yi lè shi a. ¹³ Ashi le ’i ngbebb lè bendi, ukpor ’i ban lè men ufe, mi kee ná ye. Ashi mı᷆ kong ’ì yi le, kanaa-anaa i ná men mà yi lè ’iwom i, mà kpell hwua igben bendi; nyong tí ’ı᷆ be gben amen, befe be kpell hwua igben angi īme᷅n. Kitaa i na᷅ ma᷆ kpell bende puu ’itaa ken. ¹⁵ Kì yi a ná be fee he ’ushia Unim a le: "Undi angwu a gbong biwom bi go, u fel lè bi bi go gba gyong ye; angwu a gbong biwom zangg a, u fel lè bi bi zen gba gyong ye." ¹⁶ Li pee Unim ná a shi Utaitus ù yi lè ’igyor le u kpell amen ná bel. ¹⁷ Ashi le li de-e le ù be kpell amen ’ife-ife na᷅ ’i shi-e a be ye, ufe-gyang or a ma yi lè ’igyor le u ba kpell amen. ¹⁸ Undi angwu lı᷆ som be utung ha ahe ù yi undi angwu awu bendi abongale puu be bong he ungwu le a shi aki he abunale ’isom ’inunung. ¹⁹ Fem ashina tyang, awu bendi abongale a waa he le ù tan utung ha abel li shi aki anunung amen angi a dyam Atyetyan Ujeso i, a shi bendi be ngye le lì yi lè ’igyor le li kpell ābe. ²⁰ Li kee le bendi bè ben li he ’ukwo ahwu lı᷆ ndè gbe lè ’uke benyin ahwu ’u dyam i ye. ²¹ Ugim utyan ù yi le lì shi ’inunung he ashi Atyetyan Ujeso ufe-ufe a ye, he ashi bendigye or titi. ²² Li mbee som unwandatyan ususo ba utung ha baa Utaitus. Li kaǎ he ndè mbee akwo puu, li ndè le ù yi lè ’igyor le u kpell. Bwo a ngye le men mà yi bendi abe undi u᷆ fe lityam ha amen a, a fel lè ’igyor fel gbe gyong le hang a be kpell amen. ²³ Utaitus ufe, bel lè he li fe abwo ipel shi aki Unim kpell amen. Bebwandatyan befee abe be᷆ be utung ha ahe ha amen há, be be he lishi awu bendi abongale le hè bendi bè pee Ujeso Ukristi. ²⁴ Mà tyung benyin ha abe, le hè awu bendi abongale puu à ngye dangg le li pwom ungwu gba lè men ’idideng a ye.

¹ Kì tem yi ’indee-indee le mì fee de men ide le mà kpell bendi Unim he Ujudia ye, bwo ashin na᷅ men-agyang or ma᷆ shi. ² Mi ngye le, men mà yi lè ’igyor le ma kpell. Mi kung amen pwom ungwu da bendi Umasedonia. Mi da ābe le kung lè há uze a ná, men bendi Akaya, ma kpi ma᷆ kpell bendi aben. Benyin bēme᷅n he ukpell akele, be shi bendi gbamm he liwu libell, be wum lè he ’unde. ³ Mī som bebuye aben le hè ungwu angwu mı᷆ pwom gbe lè men ù kwu ’idideng ye, mi som ābe le hè be bè kpell amen hè men mà gye ’ushu ke ukpell nya a na mı᷆ kong gbe lè men. ⁴ Mi sha ashin likorye gbe bendi lè he Umasedonia be be utung ha ami ha amen há, be ndè le ma kam le ma ka ukpell ye, ki kwa ishwia a ka-m, likorye ma sha ná mi de be ye. Ishwia angi īme᷅n i dyam gba gyong. ⁵ Ashin ’i tan lè shi ngwu ’i ngbebb le mì som bebuye aben hwaa lè men, mà ukpong mi hà be. Bebuye aben be ba kpell amen ma kam beke abe ma kyebb le ma ka ndor mi, hè ’únyong ahwu mi wu há, hè men mà ke ’uke ahwu ’u᷆ tyung le ’i nyin amen inyin, hè ’i kwu ná be kwu amen he ikeb a ye. ⁶ Mà well le undi angwu a kwan bikwukwan bi go ye u ba fem gbungg ye, ukpor angwu a kwan bi go u ba fem bi go. ⁷ Undi uyang-yang ù ke ’uke ’itaa a fe he lityam, ù ke lè ’imbwee he lityam or, ngwu ù ke ná ’ì yi uten a or ye. Ki nyin Unim lè undi angwu u᷆ ke igor-igor. ⁸ Unim ù yi lè ikeb angi u᷆ ke men biwom bi go hwà ’itaa ’i fong amen lè bi, le hè ’unyong ’uyang-yang hè men mà kwu lè biwom ’itaa ma kee, ma kwu lè bi gbe gyong hè men mà kung ābi shi ’inunung ha bendi. ⁹ Kì yi nya a na be fee he ’ushia Unim a le: "U ka bendi-likaa biwom kyo-kyo-kyo, inung ima ì yi ngyor igye kpamm." ¹⁰ Unim angwu u᷆ ke bendi-utia akim angi be᷆ kwan, u ke bendi lizi angi be᷆ zi, u ba ka amen abi ma᷆ kwan, u shi ābi bi kaa, u shi ābi bi mbu kangg le bwo mà yi lè benyin he ’uke akele. ¹¹ U ba sha amen ma mbwa ’ingbebb kangg, hè men mà kwu lè biwom kyo-kyo-kyo abi ma᷆ ke bendi mbee ’unyong, hè bendi bè pee Unim he ’uhwo beke abe ma᷆ ke gbe ha abel. ¹² Kuke ahwu ma᷆ ke i, ku hwua igben bendi Unim ife-ife a ye, ku mbee shi bendi gbamm be pee Unim kangg. ¹³ Kuke ’ūme᷅n ’u tyung le ’isom ’inunung gbe lè Ujeso Ukristi ashi ma bong, ma ke shī ife. He ashin, bendi be pee Unim he ’uhwo ife angi be ndè ha amen, be mbee pee Unim he ’ukwo ahwu ma ke be befe lè bendi abe be teng puu faale ’akwukwell. ¹⁴ Bendi be ba nda ná Unim u᷆ ke men ’ukwun kyo-kyo-kyo, be kong ha Unim lè benyin he atyam abell kangg bii he le ù kpell amen. ¹⁵ Mà lì pee Unim he ’uhwo ’uke ahwu a ke li àhwu ’u dyam gbe gyong ūkee᷅.

¹ Mi Uporl, mi kee le mà dang ’utyung gyo mi, mi angwu men besuso ma᷆ de le nyong mì yi utung ha amen, mi kong he ungwu men-men, ukpor nyong mı᷆ gbe lè há, mi fel fee kong igie ikaa-ikaa. He lityam angibale lè inung Ujeso Ukristi mi tim amen anung le nyong mı᷆ be ha amen há, mà shi-m mì kong igie ingywo ye. Gbe bendi be de le he ’uhwo biwom igye anyin na᷅ mı᷆ shi aki ndor lishi, hà mi ngywa fa ābe. ³ Kì yi ’igyang a le, mà na lì yi he igye anyin a or, abi lı᷆ shi aki ndor lishi bì yi biwom igye anyin a ye. ⁴ Bigbor ’ukye abi lı᷆ kwu ndo ’ukye or bì yi abi igye anyin a ye, bi be lè ha Unim angwu ù yi lè ikeb a. Abin na᷅ lı᷆ kung ābi ban biwom abi bendi-linaa Unim be fe lityam ha abi. Li mbeè lè lingye libibi liyang-yang, ⁵ li dyell bee ungwu he itang, lè idim iyang-yang angi i kwom bendi ’ukwo angyele Unim. Li nong igim bendi, shi ābe be ke Ujeso Ukristi ife. ⁶ Gbe men ma keb ’uhwo-men gbangg ke Ujeso Ukristi, undi uyang-yang angwu ù so-i kaa lishi, li ka he ’ingie. ⁷ Mà gim gbe lè ashi ’ì yi ndor amen he ’ushu i. Kì nya yi lè undi há angwu a bong le ufe ù yi ke Ujeso Ukristi a? Ki ngbebb! Ukpor, ù ngye le bel or, lì yi ke Ujeso Ukristi a titi, nya a na ufe a. ⁸ Pisoye mi pwom ungwu he ’uhwo ikeb angi Atyetyan Ujeso a ma ke li, ukpor ishwia i shi-m ye likorye a ma ke-m ikeb imen ana le mì kpell bendi bè naa genn he ’ukwo Unim a, le mì kpē bendi mbu imbu a ye. ⁹ Mi kee le ’ì fel ná mi fee ashia fa amen ’ushell a ye. ¹⁰ Pisoye undi-iso u da le: "Ashia angi Uporl a fee à yi akaa-akaa, ukpor nyong ufe-gyang ù yi nyin, u kwa undi ukwun, u kong igie men-men-men." ¹¹ Undi angwu u᷆ kong ’itaa ana, kì yi le ù ngye le, ashi mi fee he ’ushia hwaa lè men, kife na᷅ mı᷆ be ha amen há be shi. ¹² Bel lì hà ndo mba lityam kung ’uhwo-tyan le lì yi bizang ha bendi abe be᷆ kung ’uhwo-bell gamadye ana ye. Bè yi kpel ye, be kung ’uhwo-bell paa ha bende a. ¹³ Ukpor bel ufe, li kee-kee pwom ungwu kwom he aki angi Unim ugyang a ke li ikeb le lì shi a. Aki amen ana, men bendi Ukorint mà yi ha afee. ¹⁴ Bel na᷅ li kpi ’ikwu be lè ’isom ’inunung gbe lè Ujeso Ukristi ha amen há. He ashin, gbe li pwom ungwu gbe lè men, hà li gbe gyong ūkee᷅ angwu Unim a ke li ye. ¹⁵ Bel li pwom ungwu lè aki angi bendi-iso be shi a ye, likorye li kee le li gba gyong ūkee᷅ angwu Unim a ke li ye. Bel li ndor lishi le, men ma kaa he abongale, le hè li bel or lì shi aki à kaa gye he ’ushu he liwu līme᷅n nya a na Unim a ke li ūkee᷅. ¹⁶ Nyong li mbeè lè ha amen ana, li gya ’ushu bun ’isom ’inunung gba lè Ujeso he abong asuso or titi. Li kee le li pwom ungwu lè aki angi bendi-iso be shi a ye. ¹⁷ Be fee he ’ushia Unim le: "Undi angwu a kee le u pwom ungwu, ù kee-kee pwom ungwu he ashi Atyetyan Unim a shi a." ¹⁸ Gbe undi a pee ’uhwo-ma, ipee ima i kwa ’idideng, ipee Atyetyan Unim na᷅ ì yi he ’ukpo.

¹ Mi tim amen anung le mà dang ’utyung gyo ūnwāa lisom ligi. Mi tim amen anung, mà shi ná. ² Men mà yi ná unwaasul angwu a wa ngye ungikye ye, angwu mi ke úkyébb le ù bee lè ùkyēbb ken a, angwu ù yi Ujeso Ukristi a. Gbe ma mā ma᷆ de le ma fel tan ha ungikye ususo a, ki ban mi lè men nya a na ’ı᷆ ban Unim a. ³ Mì yi lè ’ushell le be ba lam amen ma tyang ’ukwo Ujeso Ukristi ahwu leěti ma ma shi lityam ken nya a ná ùshiı᷅ a ma lam Ifu gbe he beshu bema nà. ⁴ Mi kong ashin likorye ma gor igor dang ’utyung gyo undi uyang-yang angwu a be ha amen há, u᷆ bun gbe lè Ujeso ususo fem angwu li bun de men kpam-kpam tyang. Men ma bong, ma fel lè ikeb isuso angi ì yi atyetye lè he angi ma ma yi lè ngi ’ushu, ma kpe ’isom gbe lè Unim atyetye lè he ashi ma kpe leěti. ⁵ Mi gim lè bendi abe be᷆ ko ’uhwo-bell le bebwaa-isom Ujeso abe ma gim le bè yi bebwaa-isom ’igyang ana be hwo-m he ’ukwo ’uyang-yang ye gbangg. ⁶ Pisoye mi ngye ná mì kong bwee ungwu ye, ukpor mi ngye ’igyang ’ife. Bel li kaa mbee akwo puu le lî shi ashin ’ì nung amen he biwom puu. ⁷ Mi bun ’isom ’inunung Unim de men, mi bii ’iwom lè ha amen ye. Mi ndor amen ’ushu, mi ndor ’uhwo-gi umbee-likel. Mi nya shi ’ibibi â? ⁸ Nyong mi maa shi aki he liwu līme᷅n, awu bendi abongale lè he igye na᷅ a maa ke-m ashi mı᷆ zī shi aki ha amen há. Kitaa ana na᷅ mi maa kpē lè ha bendi besuso shi aki ha amen há. Ndè le ashin ’ì yi a ná ’azi á? ⁹ Nyong mi ma yi ha amen há, mi maa fem amen ’ushun le mà hwua mi igben ye, likorye bebuye abe be be lè he Umasedonia, be hwua mi igben fel gbe gyong or. Kitaa ’i ma yi na᷅ ’ı᷆ mbee be kwu nyong mı᷆ tem be há, mi ba fem amen ’ushun ye. ¹⁰ Gbé ’ì yi ’igyang a le ’igyang Ujeso Ukristi ’ì yi ha ami, hà ungwu apwomale ugi anwun, undi ù hà ndo tim he ungwu he ’iteng ’iyang-yang he ufam Akaya ye. ¹¹ Kibang a, mı᷆ kong igie anyin? Mi kong āngi le bwo ’i nyin mi lè men ye â? Unim a ngye le ’i nyin mi lè men. ¹² Mi gya ’ushu sha nyin i ná mı᷆ shi i, mî ndè le mi ka bendi abe be᷆ ko ’uhwo-bell le bebwaa-isom Ujeso ’ukwo ye, teng be pwom ungwu lè ’uhwo-bell le be sha ’itaa aki angi bel lı᷆ shi a. ¹³ Bendi bemen ana bè yi bendi a ’igyang ye, be sha beshu a, be kung iman ibell a sha ndyell ’uhwo-bell hè bendi bè kung ābe le bè yi bebwaa-isom Ujeso Ukristi. ¹⁴ Kì kwu amen he ’uhwo ye. Usetan ugyang or u kung iman a sha ndyell ’uhwo-ma hè bendi bè kung he le ù yi udengell ’ikung-gbo Unim. ¹⁵ Gbe idengell ima i kung iman shi ndyell ’uhwo-bell hè bendi bè kung ābe le bè yi bebwaa-isom begyang abell, kì kwu amen he ’uhwo ye. He umbee-likel igye anyin, be ba kpa ’ingie ashi ’i keè ha bibibi abi be᷆ shi. ¹⁶ Mi mbee bwan kong le, undi ù shi kung mi ná ’ikpel-ye undi a ye, ukpor mà mà kung mi ná ’ikpel-ye undi a or, mà kpe-m ná unde-men, mî pwom ungwu zangg ufe-ufe or. ¹⁷ Ungwu apwomale angwu mı᷆ kong i, a be lè ha Atyetyan Ujeso a ye, ù yi akpel-ye angwu ugi ugyang a. ¹⁸ Bendi gbamm be pwom ungwu ná bendi abe he igye anyin be᷆ shi a, fe na᷅ mi or mı᷆ shi ná. ¹⁹ Lingye angi mà yi lè ngi ana na᷅ lı᷆ shi amen mà yi lè ’uhwo ambwele ha bikpel-ye. ²⁰ Mà yi lè ’uhwo ambwele ha bendi abe be᷆ ngyo amen ná ifee, abe be᷆ kpe kung binunung bīme᷅n, abe be᷆ kpe kung biwom abi bì yi ke men, abe be᷆ kung amen he ’ukpo ye, abe be᷆ kpam amen abwo he anaa. ²¹ Ishwia or i sha-m likorye ’ushell ’u ma bong mi le mì shi biwom bimen ana ye. Gbe ’ì yi lè undi há angwu ’ì yi lè ’iwom ashi u᷆ pwom ungwu lè shi, mi angwu mı᷆ kong akpel-ye mi de le, kì yi lè biwom abi mı᷆ pwom ungwu lè bi gbe gyong. ²² Bendi bemen ana, mà bè yi Ihibru a or, mi or mì yi Ihibru a; mà bè yi bendi Izwell a or, mi or mì yi Izwell a; mà bè yi igia Ebraham a or, mi or mì yi igia ima a. ²³ Mà be sha aki Ujeso Ukristi a or, mi shi āngi hwò ābe. Mi kong igie anyina, pwom ungwu na ’ikpel-ye undi. Mi shi aki a dyam hwò ābe. Be fe-m he igaadye hwò ābe ’ugbe gbamm, be kpam mi ikwun hwò ābe ’ugbe gbamm, mi naa he ashi lihwu hwò ābe ’ugbe gbamm. ²⁴ Kugbe ’adyong, bendi Ijuus be kpam mi ingwu idong-si lisi lè ngi lihwo lè ngi idyong-inde. ²⁵ Bendi Urom be kpam mi ’angyakpa ’ugbe ’akie. Bendi be maa mi akor ’ugbe ken. Kinong ’i paa lè mi fe he lishor ’ugbe ’akie; kugbe ahwu ken, mi kwu he afee umbwo liti ken lè ’usu ken. ²⁶ He ’unyong gbamm nyong mı᷆ gye litan, mi tan he begyong he afee umbwo, begyong he abwo bezi, begyong he abwo bendi begi begyang, begyong he abwo bendi abe bè yi Ijuus a ye, begyong he abong akaandi, begyong he ’igbaa-libeb, begyong he umbwo ukaandi, begyong ha bendi abe be᷆ lam le bè yi bende-gi bendi Unim. ²⁷ He ’unyong ’uyang-yang mi kpa ’ingie sha aki akaa-akaa, mi kpo ’unde, itung i ndo mi, umbwo u gyor mi. Mbee ’unyong puu, mi kwa lè ashi mı᷆ zī ye, mi shi lè ushu ye, mi shi lè inditen ye. ²⁸ Fem abin puu tyang, he liti liyang-yang, ugim gbe lè awu bendi abongale puu u ka-m ’unyong ashwele ye. ²⁹ Gbe undi ù yi kang-kang he ’ukwo Unim ye, ki fel mi ná mi or mì yi kang-kang ye nà. Gbe undi a mbu he ’iban, ki ban mi he lityam kangg. ³⁰ Gbe ’ì mā ma᷆ yi le mì pwom ungwu, hà mi pwom ungwu he biwom abi bı᷆ tyung le mi mbu gyan a. ³¹ Unim angwu ù yi Atyam Atyetyan Ujeso, u shi Unim uma, ù kpē ipee ngyor igye kpamm, a ngye le mi bà uman ye. ³² Leěti nyong mi ma yi he ’ubong Udamasikos, atie-lishi ’ubong angwu a ma yi he ’ubwo Usu Aletas, a ma fe bendi-akang ndor he ungwu likong le nyong mı᷆ be le mî gbe há hè be bè kwu-m. ³³ Bendi be ma hà kung mi wom he ’itetel, be tye indi fe shi, be nem gbe lè ’itetel ana he uwindo he uging lè ndor he itang lè he igye, mi hà fem lè há, buu hwaa.

¹ Kì yi kpe-kpe le mì pwom ungwu, mà na ungwu apwomale ù yi lè lifem ye or. Kanaa-anaa i mi ndo da amen biwom abi Atyetyan Ujeso a tyung mi. ² Mi ngye undi angwu a bong ha Ujeso Ukristi, angwu ’i fel aze lihwo lè ngi ande ná be ma kpe kung he gye he ushu Unim, kipi ashi ’i kwob gye he ’usi hwò ’usi puu. (Hà a gye há lè inyiahwo or, hà a ndè itam a or, mi ngye ye. Unim ufe-ufe na᷅ a ngye ashina.) ³ Mi mbee bwan kong le, mi ngye le undi anwun, be ma kung he gye lè he he ’iteng igor ashi be᷆ ko le Uparadas. (Hà a ma te há lè inyiahwo or, hà a ndè itam a or, mi ngye ye. Unim ufe-ufe na᷅ a ngye.) Nya na᷅ undi umen ana a gyo biwom abi undigye u᷆ mbe lityam bun ābi kong or, ngwu ù bun ābi mbee or ye. ⁵ Mi pwom ungwu gbe lè undi umen ana, mi pwom ungwu gbe lè ’uhwo-gi ’ugyang a ye. Gbe mi ma pwom ungwu he ’uhwo ’ugi ’ugyang or, hà mi pwom he biwom abi mi mbu gyan a. ⁶ Gbe mi kee le mi pwom ungwu, hà mi sha akpel-ye a ye, likorye hang mi kong ’igyang a. Ukpor mi pwom ungwu ye, likorye mi kee le undi ù gim le mi fel ngbebb gbe gyong aki agi angi a ndè lè atong-shi, lè igie igi angi a gyo lè ’utyung ye. ⁷ Leěti Unim a ma bong le ugilale ù be hwaa lè mi, angwu ù yi ná ’idang ashi ’ı᷆ tim undi he inyiahwo nà, teng mi fel dim he ’uhwo biwom abi Unim a tyung mi. Ugilale umen ana ù yi ná undi aki Usetan angwu u᷆ fem mi ’ushun le mì ndè le mì fel he idim ye he ’uhwo biwom abina. ⁸ Mi ma tim Atyetyan Ujeso anung ’ugbe ’akie le ù kpe kung ugilale anwun lè ha ami. ⁹ A ma fan mi le: "Ukpell angwu mi ka-a he inung igi ù kwun-a ’igyor. Nyong ahwu undi u᷆ mbu gyan he ’iwom ’iyang-yang, nya na᷅ u᷆ ndè ikeb ikaandi igi sho yilididi." Ashin na᷅ ’i tan lè shi ambwele-gyan ugi a ke-m igor a, likorye lè nya ambwele-gyan ugi ana na᷅ ikeb Ujeso Ukristi ı᷆ be kwu ha ami. ¹⁰ Ashina na᷅ ’i tan lè shi ’i ngbebb mi le mì ngyor kwu he libwo anyin, mì kpe ’ingie, be kong bia mi faale ashi mi shi ban, be teb lè mi, be kwom akwo biwom abi mi kam le mi sha. Mi bong biwom abina puu he ’uhwo Ujeso Ukristi, likorye nyong mı᷆ mbu gyan he ’iwom ’iyang-yang, Unim u sha-m mi kwa lè ikeb. ¹¹ Men ma shi-m mi fel kong ná ’ikpel-ye undi nà. Mi ngwee mi pee ’uhwo-gi. Kì yi le hang men na᷅ ma᷆ kong mi he ungwu ’inunung. Mà na mì yi he ’ukpo ye or, mi ngye le bendi abe be᷆ ko ’uhwo-bell le bebwaa-isom Ujeso Ukristi abe men ma kung ābe le bè yi bebwaa-isom ’igyang be hwo-m he ’ukwo ’uyang-yang ye gbangg. ¹² Leěti nyong mi ma yi he liwu līme᷅n, mi ma mbu ’uhwo tyung amen le mì yi unwaa-isom Ujeso Ukristi a, mi ma shi bisu biwom atyetye-atyetye abi bı᷆ kwu bendi he ’uhwo, bi kwun ābe ungwu. ¹³ Mi teb lè men hwò awu bendi abongale angi a teng a? Ashi le bwo mı᷆ fem amen ’ushun ukwob ye na᷅ ma᷆ gim le mi teb lè men hwà awu bendi abongale angi a teng a? Kusi, mi tim amen anung, mà tyang ke-m he umbeb ugi anwun. ¹⁴ Mi kam mà le mî be ha amen há he ’ugbe ahwu lekie. Mi ba bii amen le mà ke-m ukpell uyang-yang ye, mi kee amen agyang a, mi kee biwom bīme᷅n a ye. Kì yi le bebwani na᷅ be᷆ kam biwom ndor he ’usi ke betyabell ye, kì yi le betyabell na᷅ be᷆ kam biwom ndor he ’usi ke bebwaa-bell. ¹⁵ Mi ufe, mi yal gor he akungale biwom bigi puu, fe-fe lè ’uhwo-gi or, ke shi aki kpell amen. Bwo, mi ufe, ki nyin mi lè men kangg, kibang a, men ufe, ki nyin amen lè mi zangg a? ¹⁶ Kanaa-anaa i, ma fel bong le mi maa teb lè men le mà kwob mi ye a? Mà na ma fel bong ná or, undi-iso ù so-i gim le mi ma shi beshu a lam amen ma shi aki angi a᷆ kwu lè lifem ke-m. ¹⁷ Mí nya fel sha amen za᷆ gba ha bendi abe mi shii som hwaa lè men a? ¹⁸ Mi na᷅ mi ma fe Utaitus ’ingie le ù be ha amen há, mi som ungwiye undi Unim le ù be utung ha ahe. Ma nya da-m le Utaitus na᷅ a ma shi amen zi a? Ndè le ma ngye le bel lè he lì yi ugim ken he aki ashele, likpe lityan li shi ’itaa ken? ¹⁹ Pisoye ma gim le, abi li kong puu li kong ābi ha amen kin likpong a. Dia! Li kong nya a na Ujeso Ukristi a kee li le lì kong he ’ushu Unim a. Bebuye, kiwom ’iyang-yang ashi lı᷆ shi, li sha āshi hè ’ì kpell amen fe Unim a. ²⁰ Mì yi lè ’ushell le nyong mi wu ha amen há, mi nda amen ma kwa atyetye lè ha ’itaa mi kee, men ma nde-m mi kwu atyetye lè ha ’itaa ma kee. Mi mbee shi lè ’ushell le mi ba ndà he liwu līme᷅n ’i kwa lè atangale he abwo fel akwu-akwu, lityam abanale fe biwom bende, ingywo, kunyim, atye abuale, ibia abiale, idim lè ’ushwan. ²¹ Mì yi lè ’ushell le nyong mi wu ha amen há, Unim angwu ù yi usu ugi, u ba sha ishwia i sha-m, mi kwu lè ’imbwee he ’uhwo bendi gbamm abe be᷆ shi bibibi, abe be tyang abwo lè likpe libibi or, ngwu akpela atanale or ye.

¹ Kugbe ahwu lekie na᷅ mi ndo be ha amen há i. Kì yi nya a na be fee he ’ushia Unim a le: "Gbe undi a kong ’iwom fe unde-ma, gbe bendi befee ha bekie be bong le a shi ná, befe be ndè or, be gyo or lè ’uhwo-bell a, bè kpe likong limen ana." ² Leěti nyong mi ma be ha amen há he ’ugbe ahwu lefee, mi ma tuu bendi abe be shi ’iban lè abe be teng ’ubwo he ’utyung. Kanaa-anaa i ná mì yi ’igbe-igbe lè ha amen i or, mì so-i tuu amen ’ubwo he ’utyung le, nyong mí wu ha amen há, undi uyang-yang u kpa ’ingie ashi ’i keè ha likpe lima. ³ Ashina ’i tyung amen le Ujeso Ukristi ù yi ha ami, ufe na᷅ u᷆ kong ha amen. Ù yi die-die fe men ye; ikeb ima i sha aki he liwu līme᷅n. ⁴ Mà na ’ì yi ’itaa ana or, a bong keb ’uhwo-ma le hè be bè maa he bee he ’ikpakpaa, gbe he ikeb Unim na᷅ ù yi uwum. Gbé bel li keb ’uhwo-tyan gbe he agwaale ha ahe, ikeb Unim imen ana na᷅ ı᷆ shi li lı᷆ kwu bewum ipel ha ahe, le lî ngye ’ukwo ahwu lì tan lè men. ⁵ Mà shun ’uhwo-men hè men mà ndè le hà mà so naa genn he ’ukwo Unim or. He ’igyang, Ujeso Ukristi ù yi ha amen atyam, ki ze le ma ngye ashin ye a? Gbe ’ì yi ’itaa ana a ye, hà ma mbu gyan he ’ukwo Unim. ⁶ Mi fe lityam le ma ba ngya le bel lì yi bendi abe be mbu gyan he aki Unim ye a. ⁷ Li kong ha Unim le mà shi ’ibibi ye, le hè ’ì tyung le li shi ngbebb-ngbebb a ye. Li shi ná le hè men mà shi likpe linunung, mà na ’ì yi bendi ná li mbu gyan he aki Unim or. ⁸ Kigyang ashi Unim a tyung li, bel lì yi lè ikeb le li kwom ashi ’ukwo ye, lì kee-kee yi lè ikeb le li sha biwom he ’ukwo ’igyang ’ufe-ufe a. ⁹ Mà na li tyung ikeb ityan ha amen ye or, gbe ma naa genn, ma hwò igilale, li kwa lè igor kangg. Li mbee kong ha Unim le likpe līme᷅n lì kwu linunung yilididi. ¹⁰ Atan-lengi angwu mi fee ’ushia ahwun hwaa lè men ná mi wa wu ha amen há ye i, ù yi le he liti angi mı᷆ wu há, hè ’ì kwu lè ’iwom ashi ’ı᷆ shi-m mı᷆ naa he ikeb angi Atyetyan Ujeso Ukristi a ke-m ben amen ye. Atyetyan Ujeso a ma ke-m ikeb le mì kpell amen mà naa genn a, a ma ke-m ángi le mì kpē men mbu imbu a ye. ¹¹ Bebuye, ’i fel mbee ati. Mà fe ikeb kangg shi likpe linunung mbee akekel puu, ma kpe utebb ugi. Ma gyo bende, ma kwu ikwun-ikwun ha bende, le hè Unim angwu u᷆ ke benyin lè ikwun, ù kwu utung ha amen. ¹² Nà bebwanam bende gbe ha Ujeso Ukristi, mà gaa bende lè uko lè uko. ¹³ Bendi Unim puu be kong lè men. ¹⁴ Kukwun ahwu Atyetyan Ujeso Ukristi u᷆ ke bendi, lè benyin abe Unim ù yi lè be ha bendi, lè utyang gbe ha Ukatia Kunyong Unim, bì kwu ha amen puu.