1 Timothy

¹ Mi Uporl angwu mì yi unwaa-isom Ujeso Ukristi na᷅ mı᷆ fee ’ushia ahwun. Unim angwu ù yi Undi-likpan utyan befe lè Ujeso Ukristi angwu bel lı᷆ ndor lishi ha ahe he biwom puu, befe na᷅ be shi-m mì yi unwaa-isom Ujeso. ² Mi fee ’ushia ahwun hwaa lè wo Utimoti. Wo fel mi ná unwaa-gi ugyang a likorye wo pwom mi bong ha Unim. Unim Atyetyan befe lè Atyetyan Ujeso Ukristi bè hā ka-a ’ukwun, be kwu lè beshi ha awo, be shi hè ’ì kwun-a he lityam kpatiaa. ³ He ’unyong ahwu mi ma ndo gye he ’ubong Umasedonia, mi ma ka-a utebb kangg le wò kwu he ’ubong Efesos. Kanaa-anaa nyin or, mi kee-a le wò ngyor kwu há ha-a à ndè le wo swan de bendi abe be᷆ hwua biwom atyetye lè ha ’igyang ashi mi hwua amen. ⁴ Wò tye be uten le bè tyang bitim ikorli ilaa abunale; be tyang ungwu apwomale gbe lè biwom abi betiebell be maa shi. Bimen i bi sha bendi be fa ifung likor-likor. Bi kpell bendi le bè shi ’iwom ashi Unim a kam ndor ābe le bè shi ye. Kiwom ’imen ashi Unim a kam ndor i, undi u ngya āshi gba he abongale ha Unim a. ⁵ Atan-lengi angwu ’i shi Unim a ke-m uten angwu mi ka-a le wò tye bendi bemen ana, ù yi le, hè ’ì shi bendi bè kwu lè benyin. Benyin abe ’itel i be ba lè he lityam angi lì yi gelalala; be be lè he ugim angwu a ngye ná ù shi ’iwom ashi ’ì yi kpa-kpa; be be lè lityam afele ha Unim faale ilam. ⁶ Bendi gbamm be kung biwom abi bì yi ’igyang i ndor he itang. He atan-lengi anwun, be pwell ’ukwo, fel he bikukong abi akpel-ye. ⁷ Be kee le be kwa bendi abe be᷆ hwua bendi iten Unim, ki shi le biwom abi befe-gyang be᷆ kong lè ungwu ubell or, bi nung ābe ye. ⁸ Bel li ngye le Iten Unim i ngbebb, gbe ’ì yi le bendi be ndor āngi dell-dell. ⁹ Kì yi le lì ngye le Unim a shi iten imen i ke bendi benunung a ye, a shi āngi ke bendi bebibi abe be kwom ’utyung, be᷆ ke iten ife ye, lè abe be ngye Unim or, ngwu bè pwom he or ye, lè bendi abe biwom Unim or bı᷆ nung abe ye, lè abe be᷆ gwu betyabell lè bendabell, lè abe be᷆ gwu bendi, lè abe be᷆ tan akpela, lè bengikye abe be᷆ gbe ipel ha bende-bell bengikye, lè abe be᷆ zì kwu bendi, lè abe be᷆ tam le be kong ’igyang, ukpor bè yii bà uman, lè abe be᷆ shi biwom abi bi teng iteng puu abi bì yi atyetye lè ha ’igyang ashi li hwua amen. Bendi abe ’itel i na᷅ Unim a shi iten ima ke be. ¹¹ Kigyang ashi mi hwua amen i, kì yi ’isom ’inunung ashi Unim a kung āshi fe-m he ’ubwo a. Kisom ’inunung ’ì yi gbe lè ifem Unim, Unim angwu ufe-gyang ù yi ’ukwun a lè ’uhwo-ma. ¹² Mi pee Atyetyan Ujeso Ukristi, angwu a ke-m ’iken ashi mı᷆ shi aki ama. Mi pee he likorye a ndè le mi kpè le ù fe lityam ha ami, a gia kung mi le mì shi-e aki. ¹³ Leěti mi maa kong bia he, mi teb lè he, mi fe-e ishwia he ’uhwo. He biwom abi mi shi-e i puu or, a tyung beshi ha ami likorye mi ma ngye-e or, ngwu mì bong ha ahe mà ye a. ¹⁴ Atyetyan Ujeso Ukristi a ma tyung inung ima ha ami kangg; u shi-m mi fel fe lityam ha ahe; u shi-m mi fel lè benyin ha bendi. U kung abongale lè benyin ka bendi abe be gwaa ipel ha ahe. ¹⁵ Kigyang ashin na᷅ ’ì yi le bendi puu bè bong. Kigyang ashi há ’ì yi le Ujeso Ukristi a be he igye anyin le he-e ù be kpan bendi-iban. Mi-i shi biban hwò bendi puu. He atan-lengi anwun na᷅ a tyung beshi bema ha ami angwu mi shi biban hwò puu, le he-e ù shi bendi bè ndè shob lityam angibale lima. A shi ashin tyung ’itaa a ke bendi puu abe be᷆ be bong ha ahe, be be kwu lè likpan ’unyong angi lı᷆ ngyor igye kpamm. ¹⁷ Kì yi le bendi bè kung ipee lè ifem ke-e ufe angwu ufe-ufe na᷅ ù yi Unim ugyang, u shi Usu angwu u᷆ ngyor igye kpamm; ufe u hwa᷆ ye, undi u nde-e lè ashi he igye anyin ye. Kì ngyor ná li kong. ¹⁸ Unwaa-gi Utimoti, mi kung likong anyin fa-a he ’ubwo le ha-a à hwua bendi. Ashin ’i shi nya a na igie angi bendi abe be᷆ tye ugie ’isom Unim be tye ugie gbe lè wo leěti. Igie imen i, ì ka-a ikeb ha-a à kwu ’uhwo ndo ’ukye ngbebb-ngbebb ná undi Unim. ¹⁹ Wo-ò gye ’ushu fe lityam ha Ujeso Ukristi, wo mbee kwu lè ugim angwu a ngye ná ù shi a᷆shi ’ì yi kpa-kpa. Kì yi lè bendi abe be᷆ shi a᷆shi ’ì yi kpa-kpa ná ugim ubell a de be ye. He atan-lengi anwun, be do abongale ubell, nya a na ’inong lishor ’ı᷆ ti fe he ’ukor he lishor ’ı᷆ ban nà. ²⁰ He liwu bendi abe be᷆ do abongale, kì yi Uhimenayes lè Alezanda. Mi tyang ābe ke Usetan, usu bibibi, le hè shi ’ì hwua ābe le bè tem kong bia Unim ye.

¹ Ukpi-ikwu mi kee le mi tebb amen le mà kong ha Unim ke bendi puu. Mà bii he le ù kpell ābe; ma keb ’uhwo-men ke-e, pee he. ² Ki ngbebb le mà kong ha Unim ke besu lè bekaandi abe be᷆ kam bendi, hè li lì kwu lè ikwun, li shi a᷆shi ’ı᷆ keè ha Unim, li mbee shi likpe linunung he akwo puu. ³ Ki ngbebb le mà kong ha Unim ’itaa ana. Unim ugyang angwu u᷆ kpan li or, ki ngbebb he ná. ⁴ Ufe a kee le bendi puu bè kwu lè likpan ’unyong, u kee le bè ngye ’igyang. ⁵ Unim ù kee-kee yi ken a. Ki kee-kee shi lè undi ken a angwu a naa he ’udyan Unim lè bendigye he-e ù gwell ābe. Undi angwu há ù yi Ujeso Ukristi. ⁶ Ujeso Ukristi a kung ’uhwo-ma ke pong bendi puu. A shi ashin he ’unyong kpa-kpa ahwu Unim a kee le ù kpan bendi puu. ⁷ Ashin na᷅ ’ì yi atan-lengi angwu Unim a waa kung mi ná unwaa-isom uma, a som mi le mì lè hwua bendi he abong angi à yi Ijuus a ye, le bè bong ha ’isom ashi ’ì yi ’igyang. Mi kong ’igyang a, mi bà uman a ye. ⁸ Mi kee le he ’iteng ’iyang-yang bengikye be᷆ kong ha Unim, be kung ’uhwo-bell shang gbangg ke Unim, bè kung abwo abell he ’usi nya a na be᷆ kong ha Unim. Kì yi le he ’unyong ahwu be᷆ kong ha Unim bè kwu lè ingywo ha bende or, ngwu bè kwu lè ifung he atyam abell or ye. ⁹ Bengingye or, mi kee ābe le bè tyung likpe linunung, be bwee ’uhwo-bell he ’uhwo ūkee᷅. Bè kwu lè ugim ununung gbe lè ’ukwo ahwu bè bwee, ná bè tim igil ibell or, bihwom bibell or bì kaa ’ate he ’uhwo ūkee᷅, ¹⁰ hè be bè tyung likpe linunung nya a na be fel bendi Unim i. ¹¹ Bè mbu ’uhwo kwu womm he liwu ’ipi bengikye be᷆ hwua ’iwom. ¹² Mi-i bong bengingye le bè fel lè bengikye or, ngwu bè hwua ābe ’iwom or ye. Ki yi ngbebb-ngbebb le bengingye bè kwu womm he liwu bendi abongale. ¹³ Má ngye le Unim a ma mbe Adam a ’ushu, saa u há mbe Ifu. ¹⁴ Usetan or a ma lam Adam a ye, a ma lam Ifu a. Ufe na᷅ a ma ban uten Unim. ¹⁵ Mà na or, Unim u ba kpan ungingye gbà he bebwaa ahwanale, gbe a mā ma᷆ ngyor naa he lityam afele ha Ujeso Ukristi, u shi lè benyin ha bendi, u kwu utaa-utaa he akwo ama puu, u mbee tyung bendi likpe linunung.

¹ Likong likaandi na᷅ mı᷆ kong i. Gbe undi a kee le u kwa ukaandi liwu bendi abongale, hà a gia aki anunung. ² Ukaandi angwu ’itel i, kì yi kpe-kpe le ù kwu faale uben. Ù kee-kee kwu lè ungye ken a, u kwu dangg, u ngye ná ù kwu ’uhwo-ma, u kwu undi angwu u᷆ gim ugim kpa-kpa, u ndor ’uhwo-ma utaa-utaa, u tyung likpe linunung, u kwu undi angwu ’i ngbebb he le ù kpē begaandi ha ahe ushu, u kpè le ù hwua bendi ’iwom, ³ u kwu undi ibwom a ye, u kwu undi linaa ashele ye, u kwu mbiloo, u kwu ikwun ha bendi, u kwu undi ’igyor únde a ye. ⁴ U kam ushu uma ngbebb-ngbebb, u teng bebwaa-ma he ’ukwo ahwu be᷆ ke-e ife. ⁵ Gbe undi a ngye ná ù kam ushu uma ugyang or mbee ye, ù hà ndo kam liwu bendi abongale mbee ye. ⁶ Ù kwu undi ufufe a he abongale ha Unim ye, teng ’i sha he u fel he idim, Unim u maa he ushe nya a na a maa usu bibibi. ⁷ Ù kwu undi angwu bendi ’ubong be᷆ ke-e ife, hè Usetan, usu bibibi, ù fe-e ishwia he ’uhwo gbe he alamale uma ye. ⁸ Bendi abe be waa le bè kpell shi aki he liwu bendi abongale, kì yi kpe-kpe le befe or bè kwu lè likpe linunung. Bè kwu bendi ingwu ifee a ye. Bè ngwo bingwungwo abi bikaa-bikaa a ye; be kee lifem he ’ukwo ’ubibi a ye; ⁹ be ngyor naa genn he ashele ’igyang ashi Unim a fem tyung li, be kwu lè ugim nwongg gbe lè ’igyang ’imen ana. ¹⁰ Mà gil ābe ndè; gbe be gbe ugilale, saa ma hà ke be libwo le bè shi aki he liwu bendi abongale. ¹¹ Bengye-bell or bè kwu lè likpe linunung. Bè bun ibubun ye; be ngye ná bè kwu ’uhwo-bell; be shi biwom puu dell-dell a. ¹² Undi angwu u᷆ shi aki he liwu bendi abongale, kì yi le ù kwu lè ungye ken a, u kam ushu uma ngbebb-ngbebb. ¹³ Bendi-ukpell abe be᷆ shi aki abell he liwu bendi abongale ngbebb-ngbebb, be sha bendi be fa lityam ha abe, bè ha᷅ kwa lè ikeb le be bun porr da bendi gba lè Ujeso Ukristi angwu be bong ha ahe. ¹⁴ Mì yi lè ugim le hang mi be kong lè wo akikye. Mi fee ’ushia ahwun hwaa lè wo le gbe mi mā ma᷆ shwie be ye, ha-a à ngye ná lı᷆ shi a᷆shi lı᷆ shi ná bendi Unim. Bendi Unim na᷅ bè yi liwu bendi abongale ha Unim angwu ù yi uwum. Liwu bendi abongale na᷅ lı᷆ kwu ’igyang ashi Unim naa genn. ¹⁶ Biwom ’undyell abi bel li bong ha abi, bí kwu he ’uhwo kangg. Bì yi le: Ujeso a bel fel undigye, hà be he igye anyin. Ukatia Kunyong Unim ù shi ’ì nung bendi le Ujeso ù yi ’igyang. Idengell Unim i nde-e. Bendi be bun gbe lè he de bendi abong puu. Bendigye be bong ha ahe. Unim u kung he gye he lifung-atabe lè ke-e ifem.

¹ Ukatia Kunyong Unim a bun gboo de li le iti-ishi bendi besuso be ba tyang abongale ha Unim. Be fel ba ka ife he biwom abi ikeb ibibi angi ı᷆ bè iman i hwua, be shi ābi. ² Ihwuale anyin i ba lè ha bendi-uman abe be᷆ tem ndè shob ’iwom ashi ’ì yi ’igyang ye a, likorye ikeb ibibi i shi igim ibell i fel ikaa-ikaa. ³ Bendi abe ’itaa i, be hwua bendi le ’i ngbebb le bè bee libee ye, be tel bitaa azi bisuso. Ki shi le Unim a shi azi amen i le bendi abe be bong ha ahe, be ngye ’igyang, hè be bè pee he, be kung āngi zī a. ⁴ Kiwom ’iyang-yang ashi Unim a shi ’i ngbebb. Kì yi lè ’iwom ashi le bendi Unim bè tel ye. Kì yi ngbebb-ngbebb le bè zī ābe pee Unim ipee. ⁵ Gbe be shi ashin, kiwom ’iyang-yang ’i fel ’itaa-itaa he ’uhwo igie Unim lè akongale ha ahe ke shi. ⁶ Gbe wo kung biwom abin hwua bebuye bendi Unim, hà wo shi aki Ujeso Ukristi ngbebb-ngbebb. Biwom abi wo bong ha abi i, bi shi-a wo kwa kang-kang he ’ukwo Unim nya a na wo shi ’igyang ashi bel li hwua-a. ⁷ Wo-ò swan ikorli ilaa. Ki nyin Unim lè ngi ye. Hwua ’uhwo-gang, ha-a à ndè le wo sha likpe angi li ngbebb Unim. ⁸ Bendi besuso be hwua agwo abell le hè ngi à kwu kang-kang. Ashin ’i ban ye. Ukpor gbe ma kam àtyám āme᷅n ndor le à fe Unim, hà ashin ’i ngbebb hwò puu, likorye Unim a ke úkyébb le bendi abe be᷆ shi ’imen i be kwa lè likpan ’unyong ’anaa-anaa nyin, be kwu lè ngi ngyor igye kpamm. ⁹ Likong likaandi angi lì yi le bendi puu bè bong na᷅ mı᷆ kong i. ¹⁰ Lī kwa ’uhwo kangg sha aki Unim likorye li ndor lishi ha Unim angwu ù yi uwum, u shi Undi-likpan bendi puu, mbee-mbee lè bendi abe be bong ha ahe. ¹¹ Wo-ò kong ha bendi lè ikeb kangg, wo hwua ābe biwom abin. ¹² Wò shī tyang bendi bè fel nda-a ilaa-ilaa le bwo wò yi ’isun ye. Ukpor wò shi likpe linunung angi lı᷆ tyung bendi Unim ná ’ì yi le bè kwu. Shi ashin he biwom abi wo᷆ kong lè abi wo᷆ shi. Kì mbee yi le wò tyung ābe likpe linunung he ’ukwo ahwu ’ı᷆ nyin-a lè bendi lè ’itaa wo fe lityam ha Unim lè ’itaa wò yi gelalala faale ’iban. ¹³ Biwom abin na᷅ wò shi há nyong mi. Bo igie Unim de bendi he ’ugbo. Fe ābe ingie le bè shi igie Unim, wo ke be uhwuale. ¹⁴ Naa lityam tyang ’uke aki ashele ahwu Ukatia Kunyong Unim a ka-a ye. Kuke ’ugang ’umen na᷅ ’u ma be hwaa lè wo he ’unyong ahwu bendi abe be᷆ tye ugie ’isom Unim be tye ugie he ikeb Unim, nyong bekaandi he liwu bendi abongale be ma pwom-a abwo kong ha Unim ka-a. ¹⁵ Shi biwom abin, wo kung ’uhwo-gang keb ke bi hè bendi puu bè ndè ná wo᷆ gye ’ushu ngbebb-ngbebb. ¹⁶ Wò kang ’uhwo-gang; wo baā he biwom abi wo᷆ hwua bendi. Gye ’ushu he ashele biwom abin. Gbe wo shi ná, wo ba kpan ’uhwo-gang, wo mbee kpan bendi abe be gyo biwom abi wo hwua.

¹ Ki ngbebb le wò kong ha bekaashi bengikye faale ife ye, kong ha abe ná wo᷆ kong ha betia á nà. Kung ishomate ná bebwanaa nà. ² Wò mbee kung bekaashi bengingye ná benaa nà. Wo kung bebwaasul ná bebwanaa nà, ukpor ugim ugang gbe lè be ù kwu utaa-utaa. ³ Ndè gbe lè bengye-uhwuu abe bè yi lè undi ye. ⁴ Gbe ungye-uhwuu ù yi lè bebwaa or, igia or, kì yi ke bebwaa abe há le bè ngye ’ukwo kpa-kpa ahwu bè ndè gbe lè bendi bebell, ná ’ì yi ke bendi Unim le bè shi. Gbe be shi ashin, hà be shi betyabell lè betiebell ’itaa ken ná betyabell lè betiebell be ma shi ābe a. Ashin na᷅ Unim a kee. ⁵ Ungye-uhwuu angwu ’ima ’i yi ’igyang-igyang le ù yi lè undi ye, a ndor lishi ha Unim; ishu or, kusu or, u᷆ kong ha Unim, u bii he ukpell ke ’uhwo-ma. ⁶ Ukpor ungye-uhwuu angwu a fel he ’ugwu lè ishagba ashele, mà na u᷆ tan ana or, a hwō mà. ⁷ Kong ashin ha abe lè ikeb kangg hè be bè shi likpe linunung hè bendi bè bia ābe ye. ⁸ Kigyang-igyang, gbe undi u᷆ ndè gbe lè behwan-ma ye, u ndè gbe lè ushu uma ugyang or ye, hà a tyung le a bong ha Ujeso Ukristi ’igyang a ye. Undi angwu ’itel i, a ban àshì hwò bendi abe be bong ha Unim ye. ⁹ Gbe wò fee azen bengye-uhwuu fe he ’ushia, ungye-uhwuu angwu a gbe gyong aze asi akie ye, wo fee he ye. Angwu a bee lè ukyebb ken a ye, wo fee he ufe or ye titi. ¹⁰ Kì yi le bè kwu bengye-uhwuu abe bendi be᷆ kong ’inunung gbe lè be he aki anunung angi be᷆ shi; be tyung bebwaa-bell ’ukwo ’ununung; be kpe begaandi he ishu ibell; be to bendi Unim abee; be kpell bendi abe be᷆ kpe ’ingie; be shi binunung bitaa atyetye-atyetye he akwo puu; be kung ’ùnyōng ’ubell puu shi binunung. ¹¹ Shī fee azen bengye-uhwuu abe bè so bebwaasul ye, likorye pisusoye be ba tyang Ujeso Ukristi he ’igyor libee abeeale. ¹² Gbe be mā ma᷆ shi ná, hà ’i ba ba lè ’ingie ka ābe, likorye be ban ukpi-ikwu ukyebb ubell angwu be ke Ujeso Ukristi. ¹³ Ki mbee shi le, be fel ban ’unyong tan indyebb yam-yam-yam. Ashi ’i hà ban hwò puu, kì yi le, be ndo bun ungwu, geb lè ungwu tye he biwom bendi, be bun ibubun angi ì yi le hang be bun ye. ¹⁴ Gbé ’ì yi le be sha abin, mi kee le bengye-uhwuu abe bè so bebwaasul bè gye libee lè hwan bebwaa, be ndè gbe lè ishu ibell, hè bendi-linaa betyan bè ndè libwo angi bè kong bia li ye. ¹⁵ Kì yi lè bengye-uhwuu abe be kung ’ukwo ahwu kpa-kpa ndor he itang or mà, be fel pwom Usetan, usu bibibi a. ¹⁶ He atan-lengi anwun, gbe ’ì yi lè ungingye angwu a bong ha Ujeso Ukristi, bendi bema bè gia yi bengye-uhwuu, ufe ù ndè gbe lè be. Ufe ù tem kung bengye-uhwuu abe bema ndor bendi abongale a le bè ndè gbe lè be ye, hè bendi abongale bè kwu lè ’ukwo le bè ndè gbe lè bengye-uhwuu abe bè yi lè undi ye. ¹⁷ Bekaandi abe be᷆ shi aki Unim ngbebb-ngbebb, mbee-mbee lè abe bè kung ikeb ibell puu ke he igie Unim abunale lè ahwuale bendi, kì yi ngbebb-ngbebb le bè fem ābe he akele ubell únde hwò bebell. ¹⁸ Be fee he ’ushia Unim le: "Bigundu abi bı᷆ sha-a aki he utia, wò shī nyim ābi lizi kung indindi bua ābi he ungwu ye." Be mbee fee le: "Ki ngbebb le undi angwu u᷆ shi aki, ù zī." ¹⁹ Gbe undi ututeb a be bun da-a le ukaandi a shi ’iban, wo-ò shī bong ye, hà gbe bè yi befee ha bekie abe be bun da-a gbe lè he. ²⁰ Bendi puu abe be᷆ gye ’ushu shi biban, ben ābe he ’ugbo, hè bendi abe be teng bè baā ’ushell. ²¹ He ’ushu ahwu Unim or, Ujeso Ukristi or, idengell ima or, mi tuu-a, wo Utimoti, ’ubwo he ’utyung le wò kpe itebb angi mi ka-a puu. Shī kpam àshì wu ’iban undi uyang-yang, ngwu wò fel shell undi or ye. ²² Shī buu ibuu fe abwo bong le undi ù kpi aki Unim ashele ye; wo gbe lè abwo agang fe he biban bendi ye; wo ndor ’uhwo-gang gelalala faale ’iban. ²³ Wo-ò ngwo umbwo ufe-ufe a ye, ngwo ’utyuo zangg he ’uhwo lifung angi lı᷆ teb lè wo. ²⁴ Biban abi bendi besuso be᷆ shi, bì yi he igye gboo; undi uyang-yang a ngye le be ba za᷆ libi he ushe Unim. Biban bendi abi bì so he ’undyell or, bi ba fem he igye gboo lè he ’ushu. ²⁵ Kitaa a ken, binunung or bì yi he igye gboo; mà abi bì so he ’undyell or, bi ba ngyor he ’undyell ye.

¹ Ifee puu ì shi ugim gbe lè betyabell le bè yi bendi abe befe ifee be᷆ ke be ife kangg a, hè bendi bè kong bia lizen Unim lè biwom abi lı᷆ hwua ye. ² Ifee angi betyabell be bong ha Ujeso Ukristi a, i fel bia ābe le bwo bè yi bendi Unim a ye. Kì yi ngbebb-ngbebb le ifee imen i, ì fel shi aki betyabell hwò bebell abe be teng, likorye betyabell bemen abe ’i nyin ābe lè be i be bong ha Ujeso. Kì yi kpe-kpe le wò hwua abin, wo bun ābi de bendi. ³ Gbe ’ì yi lè undi angwu u᷆ hwua biwom abi bì yi atyetye, u bong ha ’igyang ashi Atyetyan Ujeso Ukristi ye, u swan biwom abi li hwua gbe lè ’ukwo ahwu lì pwom Unim, ⁴ undi umen i ù yi lè idim, u ngye ’iwom ye. Ù yi ná bendi abe ’ı᷆ nyin ābe le bè fe ifung he biwom abi bı᷆ kpell undi ye, be fe ifung he biwom likor. Ifung i shi bendi be ban lityam fe biwom bende, be gie bende bikwu, be ndo kong bia bende, be bun ibubun fe bende. ⁵ Bendi abe ’itel i, be fel lè igim liketye, be tem ngye ’igyang ye, be shwan ’ushwan mbee ’unyong. Be gim le gbe be fe Unim, hà ’i sha ābe be mbwa ’ingbebb. ⁶ Kì yi ’igyang a le undi angwu u᷆ fe Unim, gbe ’i kwun he ’igyor lè biwom abi ù yi lè bi, hà a mbu ’ingbebb he ashi Unim a. ⁷ He ’unyong ahwu li be he igye anyin, li be abubwo. Kitaa ’imen i na᷅ nyong lı᷆ gbe tyang igye anyin, lı᷆ gye abubwo. ⁸ He atan-lengi anwun, gbe lì yi lè lizi lè inditen, kì kwun li ’igyor. ⁹ Bendi abe be᷆ kee ’ingbebb, be mbwa he ugilale, bigyor ilaa bibell bi be lè ’ibibi. Kibibi ashi há ’i kwu ābe ná ’ikpamkpor ’ı᷆ kwu inyia nà. Ki shi ābe be tyang afele Unim gbangg. He ashin, ki be lè linim ke be. ¹⁰ Benyin únde na᷅ bè yi ’ikwu bibibi puu. Le bwo bendi bè yi lè ’igyor kangg le hang be kwu lè únde, be kung abongale ubell ha Ujeso Ukristi ndor he itang. Ashin ’i be lè bingie gbamm ke be. ¹¹ Wo angwu wò yi undi Unim i, wò naa ’igbe-igbe lè he biwom bibibi abin. Kaa kangg ha-a à kwu ununung, wo shi a᷆shi ’i ngbebb Unim, wo gye ’ushu bong ha Ujeso, wo kwu lè benyin ha bendi, wo ngib lityam naa genn, wo kwu mbiloo. ¹² Kwu ’uhwo kangg ndo ’ukye ahwu abongale ha Unim ha-a à kwu lè likpan ’unyong angi lı᷆ ngyor igye kpamm. Likpan limen i na᷅ Unim a ko-a le ha-a à kwu lè ngi, he ’unyong ahwu wo ma naa he ashi bendi gbamm, kong gboo le wo bong ha Ujeso Ukristi. ¹³ Unim angwu u᷆ ke biwom or, bendi or, likpan lè Ujeso Ukristi angwu a ma naa kong gboo he ’ushu Usu Upalet, he ’ushu ’ubell na᷅ mı᷆ ka-a iten anyin. ¹⁴ Ngye dangg le wo shi iten imen i yilididi. Shī ban āngi he ’ukwo ’uyang-yang ye kpamm Ujeso Ukristi u gbe tem be. ¹⁵ Gbe ’unyong ’u be fel há, Unim u ba sha he u ba. Unim angwu ’ukwun puu ’ù yi he ’ubwo ’uma, igye i shi he ’ubwo ’uma, ù yi Usu besu, u shi Atyam bekaandi puu. ¹⁶ Ufe-ufe na᷅ u᷆ ngyor igye kpamm. Ù yi he ’udyan ’ikung-gbo ashi ’ì yi lè undi angwu u᷆ die ngie há kpee-kpee ye. Kì yi lè undi he igye anyin angwu a bè nde-e ngye or, ngwu ù ha᷅ be nde-e or ye. Ifem ì kwu ke-e; kusu ’uma ’ù kwu ngyor igye kpamm. Kì ngyor ná mi kong. ¹⁷ Bendi abe be mbu ’ingbebb he biwom igye anyin, ke be utebb lè ikeb kangg le bè fel he idim ye, be kung ugim ubell ndor ha abi ye, likorye bì yi ngyor igye ye. Ki ngbebb le bè kung ugim ubell ndor ha Unim hwan. Unim na᷅ u᷆ ke bendi biwom puu, u ke li biwom biyang-yang le lì kwu lè igor. ¹⁸ De be le bè shi binunung hè be bè zī ’azu he binunung ashele hwan. Bè kwell ’akwukwell ye, be kwu bendi abe be᷆ ke ’uke. ¹⁹ Gbe be mā ma᷆ shi abin, hà be kam biwom ndor a᷆bi bı᷆ be kpell ābe lè he ’ushu. Ashin ’i sha ābe be kwa lè likpan ligyang angyell. ²⁰ Utimoti, wo-ò kang biwom abi Unim a kung fa-a he ’ubwo i. Swan ikorli ilaa lè ifung akpel-ye angi bendi besuso be᷆ ko le lingye. ²¹ Bendi besuso be pwom ungwu le bè yi lè lingye. He ashin be kung ’ukwo ’ugyang ndor he itang, tem bong ha Ujeso Ukristi ye. Unim ù hā ke men puu ’ukwun.