1 Thessalonians

¹ Mi Uporl lè Usalas lè Utimoti na᷅ lı᷆ fee ’ushia ahwun. Li fee āhwu hwaa lè men liwu bendi abongale angi he Utesalonaika, men abe mà yi ke Unim Atyetyan lè Atyetyan Ujeso Ukristi. Unim ù hā ke men ’ukwun, u shi hè ’ì kwun amen he atyam kpatiaa. ² He ’unyong ’uyang-yang li pee Unim he ’uhwo ’umen, li mbee kong ha ahe ke men mbee ’unyong. ³ Li well mbee ’unyong he ’ushu Unim Atyetyan ná ma kwu ’iken kangg ha abongale lè benyin he aki ashele, ma ndor lishi kpebaa ha Atyetyan Ujeso Ukristi. ⁴ Bebuye, li ngye le ’i nyin Unim lè men, u waa kung amen le ma kwu bema. ⁵ Nyong li ma bun ’isom ’inunung gbe lè Ujeso de men, li bun āshi he igie angi ityan a ye, li bun he ikeb Ukatia Kunyong Unim a. Li bun āshi likorye li ngye dangg le li bun ’igyang a. Má ngye likpe lityan nyong li ma yi utung ha amen há. Li maa sha ’iwom ’iyang-yang hè ’ì ngbebb amen he ’uhwo a. ⁶ Men ma kung abee atyan lè angi Atyetyan. Mà na ma kpe ’ingie kangg or, ma kpe ’isom ’inunung lè igor angi ı᷆ be lè ha Ukatia Kunyong Unim. ⁷ He ashina ma fel ’itaa a ndor bendi abongale puu he Umasedonia lè Akaya le bè ndè lè ha amen. ⁸ He ’uhwo ’umen bendi mbee igegem puu be gyo ’isom ’inunung gbe lè Atyetyan Ujeso Ukristi, be gyo he Umasedonia lè Akaya ufe-ufe a ye, ukpor bendi mbee igegem puu be gyo gbe lè abongale ūme᷅n ha Unim. He ashina, bel lì tem yi lè ashi lì kong gbe lè men ye. ⁹ Mbee bipi puu bendi be kong ná ma ma shi li ngbebb-ngbebb nyong li ma be ha amen há, lè ’itaa ma tyang ikem ashele, ma fel fe Unim ugyang angwu ù yi uwum. Ufe-ufe na᷅ ù yi Unim. ¹⁰ Be mbee kong ná ma kwu nyong Unwaa-ma angwu u᷆ be lè he lifung-atabe. Ufe na᷅ ù yi Ujeso angwu Unim a wum lè he lihwu, u kpan li lè he ingywo Unim angi ı᷆ be lè há.

¹ Bebuye, men-agyang má ngye le abele utyan ha amen há a ma yi ’idideng ye. ² Má ngye ná bendi Ufilipai be ma ke li ’ingie, be mbee bia li mà ukpong li hà be ha amen há. Mà na or, Unim a ma kpell li li bun ’isom ’inunung ’ima porr de men, bendi bè yii teb lè bel or. ³ Yi le li ma shi umbeb or, ngwu lì fe ’ibibi he lityam a or, nyong li maa bun ’isom ’ima de men ná ye, li shi lè ugim le li lam amen a ye. ⁴ Ukpor li maa bun likorye Unim a waa kung li, u kung igie ima fe li he abwo le lì bun a. Unim angwu a ngye igim ityan na᷅ li kee le li sha nyin he, bendigye a ye. ⁵ Men-agyang ma ngye dangg le li maa kong ha amen lè benyin kwom he ungwu ufe-ufe a ye, ma ngye le li maa kaa le lî lam kpe men biwom a ye. Unim ù yi ushada utyan. ⁶ Li maa kee ipee bendigye a ye, mà lè ha amen or, mà undi uyang-yang or ye. ⁷ Ná bebwaa-isom Ujeso Ukristi li ma kpè le li da amen le mà kwob li, ukpor li ma tem fel ndà gba lè men ná anam unwaa u᷆ ndè gbe lè bebwaa-ma nà. ⁸ Le bwo ’i ma nyin li lè men kangg, li ma kam le li bun igie Unim ife-ife a da amen ye, ukpor li ma kam le li kung ’uhwo-tyan or ka he ’uhwo ’umen. ⁹ Bebuye, ma well ná nyong li maa bun igie Unim de men, li maa shi aki lè abwo atyan. Li maa sha āngi ishu or, kusu or, lî nde le li ba lè ’ingie a ka amen ye. ¹⁰ Men-agyang mà yi ushada utyan, Unim or u shi ushada utyan le, li ma tyung likpe ngbebb-ngbebb há nyong li ma yi utung ha amen abe ma bong ha Ujeso. Àtyám atyan a ma yi ataa-ataa faale ’iban, li shi benunung, li shi faale ungwu atimale. ¹¹ Má ngye le li ma kam amen ngbebb-ngbebb he ’uken-uken ná ātyām unwaa u᷆ kam bebwaa-ma nà. ¹² Li tebb amen, li fe men ingie, li tim amen anung le mà ndor ’uhwo-men he ’ukwo ahwu ’u ngbebb Unim angwu a ko amen le ma be he Kiteng-usu ’ima, be kwu ipel ha ahe he ifem ima. ¹³ Li mbee pee Unim mbee ’unyong, likorye nyong ma gyo igie Unim angi li ma bun de men, ma kpe ngi igor-igor. Ma ma ngye le i be lè ha bendigye a ye, ma ngye dangg le ì yi igie Unim a, ma ngye le i sha aki ha amen abe ma bong ha Unim. ¹⁴ Bebuye, men or ma kpe ’ingie ’itaa ken ha awu bendi abongale Unim abe he Ujudia abe bè yi ke Ujeso Ukristi. Nya a na men ma kpe ’ingie he abwo bendi ’ubong ’ūme᷅n, na᷅ befe or be kpe he abwo bendi ’ubong ’ubell Ijuus. ¹⁵ Bendi Ijuus na᷅ be ma gwu Atyetyan Ujeso, be gwu bendi abe be᷆ tye ugie ’isom Unim, be ndó li bel. Abi be shi bi ngbebb Unim ye, be shi bendi-linaa bendi puu. ¹⁶ Be kaa le be kwom li ’ukwo le lì bun igie Unim de men abe mà yi Ijuus a ye ye, teng ma kwa lè likpan ’unyong. Kitaa ana na᷅ biban bibell bi sho yilelele. Ingywo Unim i fel so ābe he lishi or mà. ¹⁷ Bebuye, bwo li tyang amen he ’anwaa ’unyong zangg, mà na lı᷆ tem ndè men lè atong-shi ye or, li gim gba lè men he lityam lityan. Lì yi lè ’igyor kangg le hang li ndè men. ¹⁸ He ashina li maa kaa lè ikeb ityan puu le lî be ha amen há. Mi Uporl lè ’uhwo-gi mi kaa le mi ba ha amen há gbe gyong ’ugbe ken, ukpor Usetan a kwom mi ’ukwo. ¹⁹ Men, nya a na abe be teng, na᷅ mà yi ukpi-ikwu lishi andorale lè igor ityan, ma shi atan-lengi angwu lı᷆ be yal gor he ’ushu Atyetyan Ujeso le li hwò ’ukye nyong u᷆ be be. ²⁰ Kigyang-igyang, men na᷅ mà yi ìfém ityan lè igor ityan.

¹ He umbee-likel li tem ngib mbee ye. He ashina li bong le bel ufe-ufe lì ngyor kwu he Atens, ² li som Utimoti unwandatyan hwaa lè men. Ufe na᷅ bel lè he lı᷆ shi aki Unim he abunale ’isom ’inunung gbe lè Ujeso Ukristi. Li som he le he-e ù fe men ingie le mà naa genn he abongale ūme᷅n, ³ le hè undi ūme᷅n ken or ù tyang ’igyang he ’uhwo bingie ye. Men má ngye dangg le ’ì yi kpe-kpe le bel bendi Unim lì kpe ’ingie. ⁴ Nyong li ma so ha amen há, li ma de men ndor he itang le ’ì yi kpe-kpe le bel puu lì kpe ’ingie. Men-agyang ma ndè le ashi li ma de men, ki shi nya a dell-dell. ⁵ Ashin na᷅ ’i tan lè shi mi som Utimoti be ha amen há le mî ngye ná ma᷆ gye ’ushu lè abongale ūme᷅n. Ugim ugi gbe lè men a kpo mi ’unde, mi ma yi lè ’ushell le hà Usetan, usu bibibi, a lam amen ma tem item le hè aki angi li shi he liwu līme᷅n, lì shi āngi wu abwo likor or. ⁶ Kanaa-anaa i Utimoti a tem lè ha amen há, a de li ’iwom ashi ’ı᷆ ke li igor kangg. A de li le mà yi naa genn he abongale lè benyin. U mbee de li le, mbee ’unyong puu ma gim gba lè bel igor-igor, ma mbee shi lè ’igyor le hang ma nda li nya a na bel or lì yi lè ’igyor le hang li nde men. ⁷ Bebuye, he ashin, mà na lı᷆ kpe bingie or, biwom gbamm bi kem fe li or, ki kwun li he lityam kpatiaa likorye li gyo le mà yi naa genn he abongale. ⁸ Bwo ’ì yi le mà yi naa genn he ’ukwo Atyetyan Ujeso, bel li fel lè igor kangg. ⁹ Kì yi lè ’itaa ashi lı᷆ pee Unim he ’uhwo ’umen ’ı᷆ kwun li igor ye, likorye lì yi sho lè igor he ’ushu ’uma he ’uhwo ’umen. ¹⁰ Ishu or, kusu or, bel li kong ha Unim kangg le lì ndè ’ukwo be ndè men, li kpell amen ma gye ’ushu he abongale. ¹¹ Bel li ka ushang le Unim Atyetyan lè Atyetyan Ujeso Ukristi bè buu li ’ukwo le lì be ndè men. ¹² Atyetyan Ujeso ù hā kpell amen mà gye ’ushu kwu lè benyin ha bende gbe gyong, ma kwu lè be ha bendi puu nya a na bel lì yi lè be ha amen. ¹³ Kitaa ana na᷅ u᷆ fe men ingie le mà naa genn le hè men mà be kwu faale uben, ma kwu betaa-betaa faale ’iban he ’ushu Unim Atyetyan nyong Atyetyan Ujeso u᷆ tem be lè bendi bema puu.

¹ Bebuye, ashi lı᷆ mbee kong ’ì yi le, bel li hwua āmen ma ngye ná ’ì yi le mà shi hè men mà shi nyin Unim. Kigyang-igyang ma shaa sha nya a na li hwua amen. Lè lityam lityan puu li tim amen anung he lizen Atyetyan Ujeso le mà gye ’ushu shi nya ’itaa ana. ² Má ngye itebb angi li ke men he lizen Atyetyan Ujeso. ³ Kiwom ashi Unim a kee ’ì yi le mà kwu betaa-betaa faale ’iban. Ki shi kpe-kpe le mà gbe lè abwo fe he akpela ye gbangg. ⁴ Undi ūme᷅n uyang-yang ù ndè le a kwu ’uhwo-ma he-e ù kwu utaa-utaa faale ’iban, u kwu lè ife. ⁵ Mà ndè le ma kwu lè ’igyor akpela ná bendi abe be ngye Unim ye ana á ye. ⁶ Mà ndè le undi a shi ’iban ha unde-ma he likong limen i ye, likorye Unim u ka bendi puu abe be shi bitaa biwom abina ’ingie nya a na li de men, li tuu amen ’ubwo he ’utyung. ⁷ Unim a ko li le lì be shi bibibi a ye, ukpor a ko li le lì be kwu betaa-betaa faale ’iban á. ⁸ He ashin undi uyang-yang angwu a swan ashin, a swan undigye a ye, a swan Unim angwu a ke men Ukatia Kunyong uma a. ⁹ Gbe lè ashi le ’ì nyin amen lè bende, kì tem yi lè ashi mì kong gbe lè shi ye, likorye Unim ugyang a hwua amen ná ’ì nyin amen lè bende. ¹⁰ Kigyang-igyang, ki nyin amen lè bendi Unim tang mbee ufam Umasedonia puu. Ukpor lì so-i fa amen ingie le mà gye ’ushu lè benyin bēme᷅n gbe gyong. ¹¹ Mà kwu ’iken kangg hè men mà kwu mbiloo, ma geb lè ungwu tang he likong bendi ye, ma shi aki lè abwo āme᷅n nya a na li ma tebb amen. ¹² Gbe ma shi ná, bendi abe bè yi bendi abongale a ye or be ka amen ife, ma tem kwu nyong undi ye. ¹³ Bebuye, li kee le ’ì nung amen nwongg gbe lè bendi abe be hwō, hè ’ì fel ban amen he lityam ná ’ı᷆ ban bendi abe be ndor lishi awumale lè he lihwu ye ana ye. ¹⁴ Bel puu li bong le Ujeso a ma hwō, u tem wum lè he lihwu. He ashina li bong le nyong Ujeso u᷆ be tem be, Unim u ba ba lè bendi utung ha ahe abe be ma bong ha ahe, mà ukpong be hà hwō. ¹⁵ Biwom abi li de men i bi be lè ha Atyetyan Ujeso ugyang a, le bel abe lı᷆ be so bewum he igye i nyong Atyetyan Ujeso u᷆ tem be, li ba gba tyang ābe ye. ¹⁶ He liti limen ana Unim u ba gaa lingmam, atie-lishi idengell Unim u gaa lingmam, usom Unim u gwee. Atyetyan Ujeso u ba shul lè he lifung-atabe ba he bibu. Bendi abe be ma bong ha Ujeso Ukristi mà ukpong be hà hwō, befe na᷅ be᷆ be wum lè he lihwu ’ushu. ¹⁷ Bel abe lı᷆ be so bewum he igye i, Unim u ba nyòng kung li utung ha abe la kpee ha Atyetyan Ujeso he ’usi bibu. Kung lè há liti limen ana li fel ngyor kwa ipel ha ahe ngyor igye kpamm. ¹⁸ Bwo abin bì yi ’igyang a, mà fe bende ’ingie he biwom abin.

¹ Bebuye, gbe lè liti lè ’unyong ahwu biwom abin bı᷆ be shi, kì tem hwaa yi ’indee-indee le hang mi fee amen gbe lè bi ye, ² likorye men-agyang ma ngye dangg le he Liti angi Atyetyan Ujeso u᷆ tem be, u tya imbul ba nya a na uzi a. ³ He ’unyong ahwu bendi be᷆ be de le, "Ki kwun li he ’uhwo, kushell ’ù tem yi ye," ukong ubibi u tye be imbul kpu ná uzwaa u᷆ tye ungingye lizam, be ba hwaà ye. ⁴ Ukpor bebuye, men ufe mà yi he ’ifufebb a ye. He ashina Liti limen ana lì be tye men imbul ná uzi u᷆ tye bendi imbul ana ye. ⁵ Men ufe mà yi bendi ’ikung-gbo a; mà yi he ’ikung-gbo a, bel lè men lì yi he ’ifufebb ye. ⁶ He ashina mà lì mbu ’unde ná abe be teng be᷆ mbu ye, lì kwu lè ’akang, li kwu dangg. ⁷ Lè ’usu na᷅ bendi be᷆ mbu ’unde, lè ’usu ’umen na᷅ bendi be᷆ bwom ibwom. ⁸ Ukpor bel ufe lì yi he ’ikung-gbo, he ashina mà lì kwu lè ’akang. Mà lì gye ’ushu bong ha Ujeso, li kwu lè benyin, likorye abongale lè benyin bì yi ná aliga ’índe᷆ angi ishogya ı᷆ shī kwuu ’akem le hè ’iwom ’ì do ābe ye á. Lì kwu lè lishi andorale he likpan ’unyong, likorye lishi andorale li shi ná ’ishilishi ’ukye ashi ishogya ı᷆ shī kwuu lishi le hè ’iwom ’ì do lishi libell ye. ⁹ Unim a waa kung li le lì be kpe ’ingie he ushe uma a ye, ukpor a gia li le lì kwu lè likpan ’unyong gbe ha Atyetyan Ujeso Ukristi a. ¹⁰ A hwō he ’uhwo ’utyan le he ’unyong ahwu u᷆ tem be, lî gye lè kwu ipel ha ahe, mà lì so bewum he igye i or, mà lì hwo mà or. ¹¹ He ashina, mà gye ’ushu fe bende ingie, ma kpell bende nya a na ma shaa shi kpam-kpam. ¹² Bebuye, li tim amen anung le mà ke bekaandi abe be᷆ shi aki Atyetyan he liwu līme᷅n ife, be tebb amen. ¹³ He ’uhwo aki angi be᷆ shi, mà kwu lè ife lè benyin kangg ha abe. Men-agyang mà kwu ikwun-ikwun ha bende. ¹⁴ Bebuye, li tim amen anung le mà tebb bendi lihwun, ma fe bendi ’ushell ingie, ma kpell àbe bè yi kang-kang he ’ukwo Unim ye, ma kwu lè lityam angibale ha bende. ¹⁵ Mà ndè le ma tem bende utyang ye, ukpor mà shi ashin ’ì fel aki āme᷅n a le mbee ’unyong mà shi ’inunung ha bende lè bendi puu. ¹⁶ Mà yal gor mbee ’unyong. ¹⁷ Mà kong ha Unim mbee ’unyong. ¹⁸ He ’iwom ’iyang-yang ashi ’i kem fe men, mà pee Unim. Ashina na᷅ ’i ngbebb Unim le men abe ma gwaa ipel ha Ujeso Ukristi mà shi. ¹⁹ Mà kwom Ukatia Kunyong Unim he ’ukwo ’uyang-yang ye. ²⁰ Kisom Unim ashi abe be᷆ tye ugie ’isom ’ima be᷆ kong, mà kung āshi idal-idal ye. ²¹ Kiwom ’iyang-yang, mà shun āshi li-li-li ndè le hà ’i be lè ha Unim á or. Mà kpē àshi ’i ngbebb. ²² Mà fe abwo ha ’iyang-yang ashi ’ì yi ’ibibi a ye. ²³ Mi kong ha Unim le ufe-gyang angwu u᷆ ke ikwun, ù hā kam lityam līme᷅n lè ’ūnyōng ’ūme᷅n lè inyiahwo īme᷅n hè ’iwom ’ì do amen ye, hè men mà kwu betaa-betaa gelalala faale uben he ’ushu Atyetyan Ujeso Ukristi nyong u᷆ tem be. ²⁴ Unim na᷅ a ko amen le mà kwu bebwaa-ma, u ba sha biwom puu abi a kyebb amen. ²⁵ Bebuye, mà kong ha Unim ke li bel or titi. ²⁶ Ma kong li lè bendi abongale puu ha amen há, mà gaa ābe lè uko lè uko ná bendi Unim be᷆ shi a. ²⁷ He lizen Atyetyan Ujeso, mi da amen le mà ndè le be bo ’ushia ahwun de bendi abongale puu. ²⁸ Atyetyan Ujeso Ukristi ù hā ke men ’ukwun.