1 Peter
11 Mi Ipita angwu mì yi unwaa-isom Ujeso Ukristi na᷅ mı᷆ fee ’ushia ahwun. Mi fee āhwu hwaa lè men abe Unim a waa kung ke ’uhwo-ma abe mà yi he Upontes, Ugalesha, Ukapadosia, Eshia lè Bitinia. Leěti ma ma paa wu mbee biteng abina, mà yi begaandi a há. 2 Leěti hell na᷅ Unim Atyetyan a ma shi ugim fe-e lishi le mà kwu bebwaa-ma, a kung Ukatia Kunyong uma a shi amen ma fel ta-ta ke-e. A shi ashina le hè men mà ke Ujeso Ukristi ife, gbe he lihwu lima he ’ikpakpaa àtyám amen a fel ataa-ataa gelalala he ashi Unim. Unim ù hā gye ’ushu ke men ’ukwun, u shi ’i kwun amen he atyam kpatiaa. 3 Ipee ì kwu ke Unim, Atyam Atyetyan Ujeso Ukristi! U shi Unim uma. Unim a tyung beshi kangg ha abel, a ke li likpan lifufe gbe he awumale Ujeso Ukristi lè he lihwu. Awumale uma ana na᷅ a shi li li fel lè lishi andorale le li ba kwa lè likpan ipel ha ahe. 4 Lì mbee yi lè lishi andorale le li ba kwa lè likpan lè biwom binunung bimen ana puu abi Unim a kam ndor bebwaa-ma. A kam biwom bimen ana ndor ābe he lifung-atabe a, hè bi bì kwu ngyor igye kpamm, bi ban ye, bi zī mbee ye. 5 Unim u mbee kung ikeb ima kam amen nya a na ma᷆ gye ’ushu fe lityam ha ahe, le he ’unyong ahwu igye ı᷆ mbee, kì nung undi uyang-yang nwongg le Unim a kpan amen. 6 He ashina mà yal gor he ’uhwo biwom abi Unim u᷆ kam ndor amen i, mà na ’unyin i àtyám āme᷅n à yi lè ’imbwee he ’uhwo bingie atyetye-atyetye abi bı᷆ be hwaa lè men i or. Mà ngye le bingie bimen ana bì yi he ’anwaa ’unyong zangg a. 7 Atan-lengi angwu bingie bimen i bı᷆ be hwaa lè men ù yi le hè ’ì tyung le lityam afele līme᷅n ha Ujeso Ukristi lì yi dell-dell. Igold angi ì yi ke igye anyin a or, bendi be kung ’ìndē a kaa āngi nda le ì yi gelalala. Kitaa ’imen na᷅ ’ì yi gbe lè lityam afele angi lì yi ’indee-indee hwò igold, be kaa amen nda ’anaa-anaa i, le hè Unim ù pee amen, u fem amen kangg he ’uhwo abongale ūme᷅n he Liti angi Ujeso Ukristi u᷆ tem be tyung ’uhwo-ma. 8 Mà na ma ndè Ujeso Ukristi lè ashi mà ye or, ki nyin amen lè he, ma fe lityam ha ahe, ma gor igor ì yi angi be᷆ kong a ye. 9 Gbe ma gye ’ushu fe lityam ha ahe, ma kpa likpan ’unyong angi lı᷆ ngyor igye kpamm. 10 Leěti bendi abe be᷆ tye ugie ’isom Unim be maa kong gba lè ’inunung ’ikaandi ashi Unim a de le u ba ka amen. Be maa kee kangg le hè be bè ngye ’ukwo ahwu Unim u᷆ be kpan bendi. 11 Ukatia Kunyong Ujeso Ukristi angwu a ma yi he atyam abell, a maa da ābe ná Ujeso Ukristi u᷆ be kpē ’ingie, saa bendi be hà fem he. Be ma kaa kangg le hè be bè ngye ’unyong ahwu ashin ’ı᷆ be shi, lè ’itaa ’ı᷆ be kwu. 12 Unim a ma shi ’i nung bendi abe be maa tye ugie ’isom ’ima le befe be sha aki ka ’uhwo-bell a ye, be sha ka amen a. Biwom bimen i na᷅ bendi abe be bun ’isom ’inunung de men, be de men gbe lè bi nya a na Ukatia Kunyong umen angwu u᷆ be lè he lifung-atabe a ke be ikeb. Idengell Unim or i kee ná ı᷆ shi hè ngi ì nde biwom bimen i. 13 He ’uhwo biwom abi Unim a kam ndor amen ana, mà ndor igim īme᷅n le hè men mà shi a᷆shi Unim a kee. Mà kwu gbelakaa ye, mà kung atong-shi āme᷅n ndor he likpan ’unyong angi Unim u᷆ be ke men he inung ima nyong Ujeso Ukristi u᷆ be kung ’uhwo-ma tyung he igye gboo. 14 Mà gye ’ushu ke Unim ife, biwom bibibi abi ma ma yi lè ’igyor ábi kangg nyong ma ma wa ngye igie Unim ye ana, mà ndè le ma keb àshī āme᷅n he itang ke bi ye gbangg. 15 Le bwo Unim angwu a ko amen le mà kwu bebwaa-ma ù yi utaa-utaa gelalala faale ’iban, men or mà kwu betaa-betaa gelalala faale ’iban he biwom puu abi ma᷆ shi. 16 Kì yi nya a na be fee ndor he ’ushia Unim leěti le Unim a de le: "Kì yi kpe-kpe le mà kwu betaa-betaa gelalala faale ’iban nya a na ufe Unim ù yi utaa-utaa gelalala faale ’iban." 17 Nyong ma᷆ kong ha Unim, ma᷆ ko he le Ada, mà well le Atyamen umen ana u maa undi uyang-yang ushe keè he ashi a shi a, u shell ’ushu undi ye. He atan-lengi anwuna nyin i ná mà so he igye i, mà fe-e he biwom puu abi ma᷆ shi. 18 Má ngye le Ujeso Ukristi a pong amen le hè men mà fel porr lè he likpe lìtı᷅m angi betiemen be maa hwua amen likor-likor a. Úndē angwu ù yi kwom hen igye i na᷅ a ma kung pong amen ye. 19 Anung Ujeso Ukristi angi à yi he ’ukpo ’indee-indee na᷅ a ma kung pong amen. Ujeso Ukristi ù yi ná unwaa utia angwu undi u᷆ lè shang Unim nà, ù yi utaa-utaa gelalala, kì yi lè ’ibibi zangg or ha ahe ye gbangg. 20 Leěti mà ukpong Unim u hà shi igye anyin, a ma shi ugim fe-e lishi le Ujeso Ukristi u ba kpan bendi. He i ’unyong ahwu igye i ndo mbee i, a ma be he-e ù kpan li. 21 Gbe he ’uhwo Ujeso Ukristi na᷅ men ma fel fe lityam ha Unim angwu a wum he lè he lihwu, u ke-e libwo likaandi angi lì yi lè ife kangg. He atan-lengi anwuna men ma fe lityam ha Unim, ma mbee kung àshì āme᷅n ndor ha ahe. 22 Men ma fel betaa-betaa, likorye ma ke ife he biwom abi Unim a tyung amen, ki mbee nyin amen lè bende bendi Unim lityam ken. He ashina undi uyang-yang ù kung lityam lima puu lè ikeb ima puu tyung benyin ha unde-ma mbee ’unyong. 23 Unim a tem lè men hwàn gbe he igie ima angi ı᷆ be lè likpan. Igie ima imen ana ì yi ngyor igye. Undigye angwu u᷆ hwō na᷅ a ke men likpan limen ana ye, Unim angwu u᷆ hwō ye na᷅ a ke men ángi. 24 Be fee ndor he ’ushia Unim leěti le: "Bendigye puu be hwa᷆ nya a na abia, kunung ’ubell ’u shī ’ìhwú liti ken nya a na bibubo a. 25 Ukpor igie Unim ife, ì yi ngyor igye kpamm!" Igie Unim imen ana na᷅ ì yi ’isom ’inunung ashi be ma bun de men.
21 Le bwo Unim a tem lè men hwàn, mà kung abwo āme᷅n lè he bibibi puu. Mà tem lam bendi ye, ma tem kwu ingwu ifee ye, ma tem ban lityam fe ’iwom undi ye, ma tem kong bia bendi ye. 2 Mà kwu ná bebwaa befufe, befe bè yi lè ’igyor ábı᷆ bendabell mbee ’unyong. Men or mà kwu lè ’igyor agyoale igie Unim igyang angyell angi ı᷆ shi amen ma᷆ kaa kpè kwu kpamm Unim u gbe kpan amen he liti umbee-likel. 3 Mà kwu lè ’igyor ashin likorye men-agyang ma ndè ná Atyetyan Ujeso Ukristi a ngbebb inung ’indee-indee or mà. 4 Mà be hwaa lè Atyetyan Ujeso Ukristi angwu ù yi uwum ngyor igye kpamm. Bendigye be swan he, he ashina ù yi ’itaa ken ha ’ukor ’umen ahwu bendi be swan le ’ù yi lè lifem ye ana. Ukpor Unim a gia kung he, u shi lè lifem kangg he ashi Unim. 5 Men or mà yi lè likpan lifufe. Mà tyang Unim ù gwaa amen ’iteng ken tye ushom Ukatia Kunyong uma ná undi u᷆ kung akor tye ushom. Mà yi ná ikwu-lihwan ashi ’ì yi ta-ta ke ashangale Unim. Mà kung ’uhwo-men shang gbangg ke Unim gbe ha Ujeso Ukristi. Gbe ma shi ashin, ki nyin Unim kangg. 6 Mi kong ashin likorye be fee he ’ushia Unim le Unim a de le: "Mi Unim, mi kung ’ukor fe lìshií ushom ugi he Uzayon. Mi gia kung ’ukor ’umen ana, kù yi he ’ukpo ke-m kangg. Undi uyang-yang angwu u᷆ fe lityam ha angwu ù yi ’ukor ’umen i, u fá hē ishwia he ’uhwo ye." 7 Men abe ma fe lityam ha ahe, ù yi lè lifem kangg ke men. Ukpor abe be fe lityam ha ahe ye, be ba nda le: "Kukor ’umen ahwu bendi abe be᷆ tye ushom be swan le ’u ngbebb he ushom atyele ye ana, kufe na᷅ ’u tem fel kwu ushom naa genn." 8 Unim a mbee kong he ’ushia ’uma le: "Kukor ’umen ana na᷅ bendi be᷆ be gbaa mbu." Atan-lengi angwu be᷆ mbu ù yi le be ke igie Unim ife ye. Leěti hell na᷅ Unim a ma kong ndor le ’ì kwu ’itaa ana. 9 Men ufe mà yi liwu bendi angi Unim a gia kung, mà yi bendi abe ma᷆ shang Unim, abe ma᷆ fe Unim angwu ù yi Usu ukaandi. Mà yi ’ubong ahwu Unim a gia ’u fel ta-ta ke-e ’uhwo-ma. Ma fel bendi bema ufe-ufe a. A gia kung amen le hè men mà bun de bendi gboo gbe lè ’inunung ashi a shi ’i kwu he ’uhwo ná a fem amen lè he ’ifufebb be he ’ikung-gbo ashi ’i dyam ’indee-indee. 10 Leěti men ma ma yi bendi Unim a ye, ukpor ’anaa-anaa i ma fel bendi Unim a. Unim a ma wa yi lè beshi ha amen ye, ukpor ’anaa-anaa i a fel lè beshi ha amen. 11 Bedim-gi lityam, mà well le mà yi begaandi a, mà yi kwu hen igye ikwu. He ashina mi tim amen anung le, mà kung abwo lè he bibibi biwom abi agwo à yi lè ’igyor ábi, likorye biwom bimen i bi ndo ’ukye ha likpan lifufe angi Unim a ke men. 12 Nyin i ná mà yi ipel ha bendi abe be ngye Unim ye i, mà gye ’ushu shi likpe linunung le hè ’unyong ’uyang-yang be᷆ kong le ma shi bibibi, hè be bè ndè shob le ma sha ’inunung a. He ashina be kung ipee ke Unim he Liti angi u᷆ die fel kpee-kpee ha abe. 13 - 14 He ’uhwo Atyetyan Ujeso Ukristi, mà keb ’uhwo-men ke undi uyang-yang angwu ù yi he libwo andele gbe lè bendi. Mà ’ì yi undi angwu a gyan li he ’ubong puu a or, mà idengell ima angi a waa ndor le ì ke bendi bebibi ’ingie, i pee a᷆be be shi ’inunung a or, mà keb ke be. 15 Ashi Unim a kee amen le mà shi ’ì yi le, mà shi a᷆shi ’ì yi kpa-kpa hè men mà shib ingwu bikpel-ye bendi abe be ngye Unim ye. 16 Mà ndor ’uhwo-men ná bendi abe bè tem yi he abwo lifee ye. Mà fel gim le bwo mà tem yi he abwo lifee ye mà, ma fel sha ’ibibi ’itaa ma kee ye. Ukpor mà ndor ’uhwo-men ná ifee Unim. 17 Mà kung undi uyang-yang ilaa-ilaa ye; kì nyin amen lè bende bendi Unim, ma ke a᷆ngwu a gyan li he ’ubong puu ife, ma shell Unim. 18 Men abe mà yi bebwaa ushom bendi, mà keb ’uhwo-men ke betyamen, ma mbee shell ābe kangg. Mà shi ashin ha betyamen puu, mà abe bè yi benunung abe be᷆ gim ’inunung gbe lè men or, mà abe bè yi bekaa-bekaa or. 19 Undi angwu be᷆ ke-e ’ingie likor-likor faale ashi a shi, gbe a kpē shī igor-igor, likorye a kee le u sha nyin Unim, hà a shi a᷆shi ’ı᷆ nyin Unim. 20 Ukpor undi angwu a shi ’ibibi a, be hà kpam he, gbe u᷆ kpē ìkwūn imen ana igor-igor, ayang ù ha᷅ pee he he ashina? U kpa ’ingie ashi ufe-gyang a be lè shi ke ’uhwo-ma a. Ukpor undi angwu u᷆ shi a᷆shi ’ì yi kpa-kpa, gbe a ngib lityam kpē ’ingie he ’uhwo ashele ashi ’ì yi kpa-kpa, hà a shi a᷆shi ’i nyin Unim. 21 Kukwo ahwuna na᷅ Unim a ko amen le mà gbe. Mà well le Ujeso Ukristi or titi a kpē ’ingie shi ’inunung ke men. Ki ngbebb le mà pwom he shi ná ufe a shi hè men mà pwom abee ama. 22 Ufe, bwo ukong-ukong a shi ’iban ngye ye, u bè uman ngye ye gbang-gbang. 23 Bendi be maa buu he atye, ukpor u tem lè ngi buu ābe ye. Nyong be maa ke-e ’ingie, a ma kong fe be ’ushell le u ba sha ’iwom ha abe ye, ukpor a ma kung ’iwom ’iyang-yang fe Unim he ’ubwo, Unim angwu u᷆ maa ushe kpa-kpa mbee ’unyong puu. 24 Bingie abi bi ma yi ke li he ’uhwo biban bityan, a ma kung bife a so, nyong be ma maa he bee he ’ikpakpaa. A shi ashina le lî mbeè lè abwo lè he ’iban gbang-gbang, li fel kung likpan angi lı᷆ be lè ha ahe sha a᷆shi Unim a kee. Le bwo be ma do he, men ma mbeē. 25 Leěti men ma ma yi ná ìtiā angi i mbeb ’ukwo, ukpor ’anaa-anaa i ma tem item, ma fel pwom Ujeso Ukristi angwu u᷆ ndè gbe lè men. Ufe na᷅ u᷆ kam amen le hè ’iwom ’ì do amen ye.
31 Men bengye or, ungye-libee uyang-yang ù keb ’uhwo-ma ke ukyema. Mà shi ashin, le gbe ungye angwu ukyema u᷆ fe Unim ye, pisoye u gie ugim uma fel fa Unim gba he likpe linunung ungye-ma. 2 Mà na ungye a buu ungwu kong ’iwom ha ahe gbe lè likong Unim ye or, u nda ná ungye ù yi lè ife, u mbee ndè ná likpe lima lì yi litaa-litaa faale uben. 3 Mà kung igim īme᷅n ndor he idem-idem-idem abweeale le hè men mà tyung bendi ’ùnùng ’ūme᷅n ye. Biwom ná igil aniale lè ashele ishagba i, afele ashor umbell lè biwell-atyung lè bikeb-abwo gbam-gbam, afele bihwom abi bı᷆ kaa ’ate shi ’ugwu, likpe anyina li ngbebb ye. 4 Ukpor, kiwom ashi ma᷆ shi hè ’ì shi amen mà ngbebb ’unung ’ì yi likpe linunung angi lı᷆ be lè he atyam āme᷅n; mà kwu mbiloo, ma kwu lè ’uhwo ambwele. Kunung ahwu ’itaa i ’u hwa᷆ umbwo ye, ku mbee shi lè lifem kangg he ashi Unim. 5 Kitaa ana na᷅ bengingye besuso abe leěti be ma fe lityam ha Unim be maa tyung ’unung ’ubell, be ma tyung āhwu gbe he akebale ’uhwo-bell ke bekyebell. 6 Undi ken lè he liwu libell ù yi Usara. A maa ka ukyema Ebraham ife, u ko he le "Atyagi." Men ma kwa ’itaa ken ha Usara, gbe ma shi a᷆shi ’ì yi kpa-kpa. Ashin ’i sha amen ma kwa lè ’ushell ye. 7 Men bekyebb or titi, mà tyung likpe linunung ha bengye-men. Mà ngye le bè yi kang-kang ná men ye. He ashina mà ke be ife. Mà ke be ife likorye men lè befe puu ma kpa likpan angi Unim u᷆ ke bendi ’uke. Mà shi ’itaa ana hè akongale ūme᷅n ha Unim ù be lè lifem ke men, hè ’iwom ’ì kwuǔ hē ’ukwo ye. 8 Kiwom ashi mi kee le mi kong fa likong anyin lishi ’ì yi le, men puu mà kwu ugim ken, ma ngye igben bende, ma kwu lè benyin ha bendi Unim likorye bè yi bebwandamen a, mà ngbebb lityam ha bende, ma keb ’uhwo-men ke bende. 9 Gbe undi a shi ’ibibi ha undi ūme᷅n, ù tem lè shī shì angwu há ye. Gbe undi a buu undi ūme᷅n atye, ù tem lè ngi buu angwu há ye. Ashin na᷅ ’i ngbebb le ù shi, ù kong ha Unim le ù ke angwu há ’ukwun. Mà well le ashi ’ı᷆ shi Unim a ko amen ’ì yi le he-e ù shi ’inunung ha amen a. 10 Be fee he ’ushia Unim le: "Undi angwu a kee le u kwa lè igor, u kee le ’ì ngbebb he he ’uhwo, ù kung ungwu uma kong ’ibibi ye, u bè uman ye. 11 Ù kung abwo ama lè he ’ibibi ashele, u fel shi binunung hwan, u kaa kangg he-e u fel lè ikwun. 12 Unim u kang bendi benunung, u dang ’utyung gyo ābe nyong be᷆ kong ha ahe. Ukpor abe be᷆ shi bibibi, ù yi linaa ha abe." 13 Gbe ma᷆ kaa lè ikeb īme᷅n puu le hè men mà shi a᷆shi ’ì yi kpa-kpa, ayang ù nya do amen? Kì yi lè undi ye. 14 Mà bendi bè fel ke men ’ingie likorye ma shi a᷆shi ’ì yi kpa-kpa or, Unim u sha ’inunung ha amen. He ashin mà kwu lè ’ushell bendi abe be᷆ ke men ’ingie ye, kì waa men ufung or ye. 15 Mà shi Ujeso Ukristi ù kwu Usu ūme᷅n, mà ke-e ife. Mà kam he ’unyong ’uyang-yang hè men mà fan undi uyang-yang angwu u᷆ bii amen atan-lengi angwu ma bong ha Ujeso Ukristi. 16 Mà ndè le nyong ma᷆ fan ābe, mà mbu ’uhwo fan ābe lè ife kangg. Mbee ’unyong puu mà shi a᷆shi ma ngye le ’ì yi kpa-kpa, le gbe undi u᷆ kong ’ibibi gbe lè men, u mbee kong bia amen, hè ishwia ì shi-e likorye u nda ná likpe līme᷅n li ngbebb nya a na ’ì yi le likpe undi Unim lì kwu. 17 Ki ngbebb le undi angwu u᷆ shi a᷆shi ’ì yi kpa-kpa, ù kpe ’ingie he ’uhwo ashi gbe ’ì yi ugim Unim á hwò a᷆shi le ù kpē ’ingie he ’ibibi ashele. 18 Ujeso Ukristi or a ma kpē ’ingie le he-e ù kpan li lè he biban bityan. Nya he ’ugbe a ken a mbeè aki amen ana puu. Ujeso Ukristi angwu ù yi ununung a ma hwō he ’uhwo ’utyan, bel abe lì yi benunung ye, le he-e ù be lè bel hwaa lè Unim. Bendi be gwu inyiahwo ima, ukpor Unim a shi ’ūnyōng ’uma ’ù yi ’uwum. 19 Nya he ’unyong ’umen ana ’ūnyōng ’uma ’u ma gye he ’ipi Unim a kwu idengell ima angi i kpo utebb uma ngib fe, lè kong ha angi. 20 Idengell imen ana na᷅ leěti i maa ke Unim ife ye, há ’unyong ’umen ana nyong Unim a maa ngib lityam kwu nyong Unuwa le ù tān ’īnōng. Bendi bedyong-ikie befe-befe na᷅ be ma ngwee há ’inong, be hwaa lihwu umbwo. 21 Umbwo umen ana a tyung ’itaa akpanale gbe he umbwo akibale a. Nyong be᷆ kib undi he umbwo, be kib he le he-e ù kwob taa umbe lè he inyiahwo a ye, ukpor ù yi ’itaa a ashi ’ı᷆ tyung le undi u tim Unim anung le ù to taa he lityam lima lè he ’iban. Unim u kpan amen likorye Ujeso Ukristi a wum lè he lihwu. 22 A wum gye he lifung-atabe, ù yi kwu he ’ubwo lizen Unim. Nya na᷅ idengell Unim puu i fel he ’ubwo ’uma, kiwom ’iyang-yang ashi ’ì yi lè ikeb ’i fel he ’ubwo ’uma.
41 Men mà ngye le leěti Ujeso Ukristi a ma kpē ’ingie he agwo. He ashina mà kwu lè ’itaa lityam angi ufe a ma yi lè ngi hè men mà naa genn. Mi kong ashina likorye undi angwu a kpē ’ingie he agwo nya a na Ujeso Ukristi, ù tem gya ’ushu sha ’iban ye. 2 He ashina, lè ’igbe ná mà yi he igye i, mà tem bong biwom igye àbi bendigye bè yi lè ’igyor ábi bì kpē men ityuu ye. Mbee ’unyong puu mà shi a᷆shi ’ı᷆ nyin Unim hwan. 3 Leěti ma maa ban ’unyong sha biwom abi bı᷆ nyin bendi abe be ngye Unim ye. Ma ban ’unyong ’u kpè! Há ’unyong ’umen ana men ma maa sha ’iwom ’ibibi ’iyang-yang he ’akem ’āme᷅n, ma maa tyang biwom igye abi bendigye be᷆ kee bi kpē kung atyam āme᷅n. Ma maa za᷆ igye fa he ’uhwo; ma maa gbong awu ngwa bingwungwo kangg; ma maa fa ikem, ki shi le ’i tel Unim ’indee-indee. 4 Ukpor ’anaa-anaa i mà tem yi lè abwo ipel ha abe he ashele biwom bibibi abina ye. He ashina, ki kwu ābe he ’uhwo, be kong ban amen. 5 Kunyong ’u ba lè há ahwu Unim u᷆ be maa ushe bendi abe be kong ban amen. Be ba buu ungwu ubell da Unim abi be shi puu. Unim ù fel yi kwu u nyong ’unyong ’umen ana he-e ù maa bendi bewum lè abe be hwō ushe a. 6 Ashin na᷅ ’i tan lè shi undi a ma bun ’isom ’inunung de abe be hwō mà or titi, le hè be bè kwu lè likpan ’unyong nya a na Unim ù yi lè ngi. Mà na be hwō nya a na bendi puu be᷆ hwō i or, ashin ’ì yi ushe angwu Unim a maa ābe. 7 Ki fel teng ’anwaa ’unyong zangg a hè ’iwom ’iyang-yang he igye anyin ’ì mbee. He ashin mà naa genn, ma baa ’uhwo-men le hè men mà kong ha Unim mbeè. 8 Kiwom ashi ’í dyam hwò puu ’ì yi le, mà gye ’ushu kwu lè benyin ha bende lityam ken, likorye undi angwu ù yi lè benyin u tyang biban bendi ka abe, mà na bi go gbamm or. 9 Nyong bendi be᷆ be ha amen ishom, mà kpe be igor-igor, ma ndè le ma mbwee ’ushu fe be ye. 10 Unim a ke undi uyang-yang ’uke aki ashele atyetye gbe he ikeb Ukatia Kunyong uma. He ashina, undi uyang-yang ù kung ’uke ahwu Unim a fe-e he ’ubwo kpell unde-ma. 11 Undi angwu Unim a ke-e ikeb le ù bun igie ima a, ù bun āngi ná Unim a ke-e. Undi angwu Unim a ke-e ufe le ù kpell bendi a, ù kung ikeb puu angi Unim a ke-e kpell ābe. Mà shi ’itaa ana hè bendi bè kung ipee ke Unim he ’iwom ’iyang-yang ashi ma᷆ shi gbe ha Ujeso Ukristi. Ufe na᷅ ifem puu lè ikeb puu bì yi ke-e ngyor igye kpamm. Kì ngyor ná mi kong. 12 Bedim-gi lityam, bingie bikaa-bikaa abi bı᷆ be kem fe men ana, bì kwu amen he ’uhwo ye. Mà fel nde bi ná biwom abi bwo ukong-ukong bi shi ngye ye a ye. Bingie bimen ana bi kaa amen hè Unim ù ndè ná ma naa genn a. 13 Mà yal gor igor likorye ma fe abwo he bingie abi Ujeso Ukristi a ma kpe. Mà gor ’itaa ana le hè liti angi ifem Ujeso Ukristi ı᷆ be fem he igye gboo, hè men mà yal gor lè ibubo he ungwu. 14 Gbe bendi be᷆ kong ban amen le bwo mà yi ke Ujeso Ukristi a, hà ’ì yi ’iwom ’inunung a ke men. Nyong ma᷆ kpē ’ingie ’itaa ana, Ukatia Kunyong Unim ù yi ha amen. Ukatia Kunyong umen ana a dyam ’indee-indee. 15 Ukpor, gbe ma shi bibibi, ma gwu bendi, ma zì ’azi, ma tyua anaa, gbe ma᷆ kpē ’ingie he ashele abina, kingie ashi ’itaa ana ’ì yi lè lifem ke men ye. Undi ūme᷅n ken or ù be lè ’itaa ’ingie ashina so ’uhwo-ma he lishi ye. 16 Ukpor undi angwu u᷆ kpē ’ingie le bwo u᷆ pwom Ujeso Ukristi a, ishwia ì shi-e ye. Ù pee Unim likorye bendi be ndè shob he le ù yi ke Ujeso Ukristi a. 17 Kunyong ahwu Unim u᷆ maa bendi ushe ’u kpi mà. Unim u maa bendi bema begyang a ushe ’ushu. Bwo ’ì yi le u maa li bel bendi bema begyang or ushe, bendi abe be᷆ ke ’isom ’inunung ashi Unim ife ye, ushe ubell u ba kwa ubibi ná a? 18 Be fee he ’ushia Unim le: "Gbe undi ununung or a ndè ’ingie mà ukpong u hà hwaa linim Unim, ki ba kwa ’ibibi kangg ka bendi bebibi abe be᷆ ke Unim ife ye." 19 He atan-lengi anwuna bendi abe be᷆ kpē ’ingie le bwo Unim na᷅ a tyang āshi le ’ì be hwaa lè be, bè gye ’ushu lè ’inunung ashele, bè kung ’uhwo-bell fe Unim he ’ubwo, Unim angwu a mbe li puu. Unim u gie igie ye.
51 Mì yi lè utebb angwu mi kee le mi ka amen bekaandi bendi abongale. Men ma ngye le mi or mì yi ukaandi a ná men a, mi ndè lè àshì agi ná Ujeso Ukristi a ma kpē ’ingie. Bel ha amen li ba kwa lè abwo ipel he ifem Ujeso Ukristi nyong Unim u᷆ be fem he he ashi bendi puu. 2 Ashina na᷅ ’ì yi atan-lengi angwu mi ke men utebb le, mà ndè gbe lè bendi abe Unim a kung fe men he abwo, mà ndè gbe lè be ná undi angwu u᷆ kam ìtiā u᷆ ndè gbe lè ngi. Mà ndè gbe lè be ná be kwu amen he ikeb a ye, mà shi āshī igor-igor. Mà shi āshī he ’uhwo únde a ye, likorye ’igyor únde ’ì yi ’iwom ’ibibi a. Ukpor mà shi āshī likorye mà yi lè benyin le ma nda gba lè be a. 3 Bendi abe Unim a kung fe men he abwo le mà kam ana, mà kam ābe he ikeb a ye. Ukpor likpe līme᷅n lì kwu ngbebb-ngbebb le hè bendi bemen ana bè pwom abee āme᷅n. 4 Gbe ma shi ’itaa ana, liti angi Ujeso Ukristi angwu u᷆ ndè gbe lè bel puu u᷆ be be, u ba ka amen abe ma hwò ’ukye, kuke ahwe᷅le ahwu ’u dyam ’indee-indee, ku mbee hwō umbwo ye. 5 Men bebwaa-idem, mà ke bekaandi bēme᷅n ife. Men puu mà keb ’uhwo-men ke bende, ma kam hè men mà kpell bende, likorye be fee he ’ushia Unim le: "Unim ù yi linaa ha bendi idim, ukpor u sha ’inunung ha abe be keb ’uhwo-bell." 6 He ashina mi mbee da amen le, mà keb ’uhwo-men ke Unim angwu ù yi lè ikeb puu, le gbe ’unyong ’uma ’u fel, he-e ù kung amen gye he ’usi. 7 Mà kung ’iwom ’iyang-yang ashi ’ı᷆ fem amen ’ushun fe-e he ’ubwo, likorye u ka amen ukpell uyang-yang angwu ma kee. 8 Mà kwu gbelakaa ye, ma baā ’uhwo-men, likorye Usetan, usu bibibi, angwu ù yi linaa ha amen u baà amen. U baà amen ná ’ugaba ’u᷆ baà kee àshi ’ù zī nà. 9 Mà naa ’ukye ha ahe, ma ke-e libwo ye gbangg. Mà gye ’ushu fe lityam ha Unim, ma naa genn. Ma well le bebwandamen mbee igegem puu he igye i be kpa ’ingie nya a na men ma᷆ kpē i. 10 Mà well le ’inunung ’iyang-yang ’i ba lè ha Unim a. Ufe na᷅ a ko amen le hè men mà kwu ipel ha Ujeso Ukristi kwu lè abwo he ifem ima ngyor igye kpamm. Gbe ma kpē ’ingie he ’anwaa ’unyong zangg, ufe-gyang u ba tem lè men kam, u ke men ikeb hè men mà naa genn faale abwo aweeale. 11 Mà lì pee Unim angwu ù yi lè ikeb ngyor igye kpamm. Kì ngyor ná mi kong. 12 Usalas na᷅ a kpell mi fee ’anwaa ’ushia aken. Mi ngye-e ná ungwiye undi Unim angwu a kpè le bè fe lityam ha ahe. Biwom abi mi fee i, mi fee ābi le mî fe men ingie, mi mbee de men le abi mi fee gbe lè inung Unim i bì yi ’igyang. He ashina mà naa genn he ’igyang. 13 Bendi Unim abe hen Ubabilon abe Unim a gia kung le bè fel bema ná a gia amen ana, be kong lè men. Unwaa-gi Umak or a kong lè men. 14 Ná bebwanam bende abe be᷆ fe Ujeso Ukristi, mà gaa bende lè uko lè uko. Agaale anwuna a tyung le ’i nyin amen lè bende. Men puu abe mà yi ke Ujeso Ukristi, Unim ù shi hè ’ì kwun amen he atyam kpatiaa.