1 John

¹ Kushia ahwu lı᷆ fee hwaa lè men i, li fee āhwu gba lè ukpi-ikwu undi angwu a ma yi kung lè há linde-linde mà ukpong igye anyin i há kpi. Bel-agyang li gyo he lè atyung, li nde-e lè ashi. Li nde-e li-li-li, li mbee tyua he abwo or. Ufe na᷅ ù yi Igie Unim angi i be lè likpan ke li. ² Likpan limen i, Unim a shi āngi li be he igye gboo le bendi be fel nda āngi lè ashi. Bel li nde ngi; li da amen gba lè likpan limen li ndè lè ashi atyan i a. Li bun da amen gba lè likpan ligyang angyell angi lı᷆ yi ngyor igye. Leěti likpan limen i li ma yi ipel ha Unim Atyetyan, saa a hà som āngi be tyung li. ³ Biwom bimen abi bel li nde lè ashi atyan, li mbee gyo ābi lè atyung atyan na᷅ lı᷆ de men gbe lè bi le bi fel li ukem, li fel utyang ken. Utyang utyan angwu li ngwee li ngweě he ha Unim Atyetyan lè Unwaa-ma Ujeso Ukristi. ⁴ Bel li fee abin hwaa lè men le hè igor ityan ì kwu yilidididi. ⁵ Kisom ashi Unwaa Unim ugyang a bun de li na᷅ bel or lı᷆ bun de men i. Kì yi le, Unim ù yi ’ikung-gbo; kì yi lè ’ifufebb ha ahe zangg or ye. ⁶ Gbe bel li de le li ngwee utyang ha Unim, ki shi le lì so he ’ifufebb, hà li bà uman a, hà biwom abi lı᷆ shi or bì yi ’igyang a ye. ⁷ Ukpor gbe bel or lı᷆ tan he ’ikung-gbo ná ufe ù yi he ’ikung-gbo, hà li ngwee utyang ha bende, anung Unwaa-ma Ujeso a to taa li lè he biban bityan puu shi li li fel betaa-betaa gelalala. ⁸ Gbe li de le lì yi lè ’iban ye, hà li lam ’uhwo-tyan ilam, li ngye ’igyang ashi ’ı᷆ be lè ha Unim ye gbangg. ⁹ Ukpor gbe li bun he igye gboo de Unim le li shi ’iban, Unim u tyang biban bityan bimen ana ka li, u to taa li ábi shi li li fel betaa-betaa gelalala, likorye Unim ù yi ununung, u bel igie ye. ¹⁰ Gbe li de le li wa shi ’iban ngye ye, ashin ’i ze le li da le Unim ù yi undi-uman a, li ngye igie ima ye gbangg.

¹ Bebwaa-gi lityam, mi fee abin hwaa lè men le hè men mà shi ’iban ye a. Ukpor gbe undi a tem lè shi ’iban, lì yi lè undi angwu ù yi gelalala faale ’iban. Ufe na᷅ ù yi ipel ha Unim, u᷆ yi kong ha ahe ke li. Undi umen ana na᷅ ù yi Ujeso Ukristi. ² Gbe he ’uhwo-ma na᷅ Unim u᷆ tyang biban bityan ke li. Biban bityan bife-bife na᷅ Unim u᷆ tyang ke gbe he ’uhwo-ma ye, u tyang biban ka bendigye mbee igegem puu he igye i. ³ Kì yi lè ’iwom ken ashi ’ı᷆ tyung le li ngye Unim ’igyang-igyang. Kiwom ashi há ’ì yi ife angi lı᷆ ke iten ima. ⁴ Undi uyang-yang angwu u᷆ kong le ufe a ngye Unim, gbe u᷆ ndor iten ima ye, hà ù yi undi-uman a, a ngye ’igyang ashi ’ı᷆ be lè ha Unim ye gbangg. ⁵ Ukpor undi angwu u᷆ shi a᷆shi Unim u᷆ kong, ufe na᷅ benyin Unim bè yi yilididi ha ahe lityam. Kì yi lè ’iwom ’isuso ashi ’ı᷆ tyung li le li ngwee befee kpebaa ha Unim. ⁶ Undi uyang-yang angwu a de le ufe a ngwee befee kpebaa ha Unim, ù shi likpe ná Ujeso Ukristi a ma shi. Kife na᷅ ’ı᷆ tyung le a ngwee befee ha Unim. ⁷ Bedim-gi lityam, uten Unim angwu mı᷆ fee de men gbe lè he i, ù yi angwu ufufe a ye. Ù yi uten umen angwu men ma gyo kung lè há ’unyong ahwu ma kpi ’ikwu fe Ujeso Ukristi a. Uten umen ùtı᷅m i ù yi ’isom Unim ashi ma gyo kpam-kpam a. ⁸ Mà na or, kì yi lè ’iwom ’ifufe he uten umen i. Ujeso Ukristi ugyang a tyung li le uten umen i ù yi ufufe ’igyang; men-agyang or titi ma tyung le ù yi ná ’igyang. Bel li ngye le ù yi ufufe ’igyang likorye ’ifufebb ’i ndor àshì ’i ndo mbee, kikung-gbo ’igyang ashell ’i kpi ataale mà. ⁹ Undi uyang-yang angwu u᷆ gim há le ufe ù yi he ’ikung-gbo, gbe u᷆ tel unde-ma, hà ù so he ’ifufebb kpamm be wu i ná ’ì yi. ¹⁰ Ukpor undi uyang-yang angwu ’i nyin he lè unde-ma undi Unim, hà ufe ù yi he ’ikung-gbo, kì yi lè ’iwom ashi ’ı᷆ shi-e u᷆ gbaa mbu ye. ¹¹ Undi uyang-yang angwu u᷆ tel unde-ma undi Unim, hà ù yi he ’ifufebb, litan lima puu li shi he ’ifufebb. He ashina u tan a be-be-be-be likorye ’ifufebb ’i hwuǎ hē àshì. ¹² Bebwaa-gi lityam, mi fee abin hwaa lè men le bwo Unim a tyang biban bīme᷅n ke men gbe he ashi Ujeso Ukristi a shi a. ¹³ Bekaandi, mi fee abin hwaa lè men likorye men ma ngye Ujeso umen angwu ù yi kung lè há linde-linde mà ukpong igye i hà kpi. Bebwaa-idem, mi fee abin hwaa lè men le bwo men ma hwò Usetan, usu bibibi. ¹⁴ Bebwaa-gi lityam, mi fee abin hwaa lè men likorye men ma ngye Atyetyan Unim. Bekaandi, mi fee abin hwaa lè men likorye men ma ngye Ujeso umen angwu ù yi kung lè há linde-linde mà ukpong igye i hà kpi. Bebwaa-idem, mi fee abin hwaa lè men likorye men mà yi kang-kang, ma naa genn, igie Unim i shi ha amen atyam, ma hwò Usetan, usu bibibi. ¹⁵ Mà kung àshì āme᷅n ndor he benyin igye anyin lè biwom abi bì yi hen a ye. Undi uyang-yang angwu a mā ma᷆ kung àshì ama ndor he benyin igye anyin a, hà ’ì yi lè ’ukwo ahwu ’ı᷆ mbee nyin he lè Unim Atyetyan ye gbangg. ¹⁶ Biwom igye bimen ana na᷅ bì yi i: biwom abi bendigye bè yi lè ’igyor kangg le be kwa lè bi ka ’uhwo-bell; biwom abi bendigye be᷆ ndè, be fel lè ’igyor le be kwa lè bi; biwom puu abi bendigye be᷆ pwom ungwu lè bi he igye anyin. Biwom bimen i puu bi ba lè há igye anyin a, bi ba lè ha Unim Atyetyan a ye. ¹⁷ Má ngye le igye anyin i ndo mbee, biwom abi bì yi hen abi bendi bè yi lè ’igyor ábi ana, bife or bi ndo mbee. Ukpor undi uyang-yang angwu u᷆ shì a᷆shi ’i nyin Unim, ufe u nim ye, u kwa ngyor igye kpamm. ¹⁸ Bebwaa-gi, kunyong ahwu igye anyin ì mbee ’u fel kpee-kpee. Kunyong ’umen i na᷅ Undi-linaa Ujeso u᷆ be nya a na be bè de men. Kì yi faale ifung, bel puu li ndè le ’anaa-anaa i bendi gbamm abe bè yi bendi-linaa Ujeso Ukristi be fel hen mà. Ashin ’i tyung li le ’unyong ahwu igye anyin ì mbee ’u fel kpee-kpee. ¹⁹ Mà na bendi-linaa bemen ana be waa gbe lè ha abel liwu a or, kì bè yi lè ’unyong ahwu be ma yi ungwu ken ha abel ye. Kì be kwu le bè yi ungwu ken ha abel, hang be ngyor kwu ipel ha abel. Ukpor be gbe tyang li, agbele ubell tyang li a tyung gboo le be ma yi ungwu ken ha abel ye. ²⁰ Men ufe, Ujeso Ukristi a ma ke men Ukatia Kunyong uma le men puu mà ngye ’igyang. ²¹ Mi fee ashin hwaa lè men le bwo ma ngye ’igyang ye a ye. Mi fee le bwo ma ngye ’igyang a. Ma mbee ngye le uman lè ’igyang bi gwaa ha bende ye. ²² Bwo ’ì yi ’itaa ana mà, fe ayang ù hà yi undi-uman? Undi-uman ù yi undi angwu a swan le Ujeso ù yi Ukristi, Undi-likpan angwu Unim a som be he igye anyin a ye. Undi angwu u᷆ swan Unim Atyetyan lè Unwaa-ma ana na᷅ ù yi undi-linaa Ujeso Ukristi. ²³ Undi uyang-yang angwu a swan Unwaa Unim, hà a swan-swan lè Unim Atyam or titi. Ukpor undi angwu a kpē Unwaa Unim, hà a kpe-kpe lè Unim Atyam or titi. ²⁴ He ashin mi da amen le, biwom abi ma gyo kung lè há ’unyong ahwu ma kpi ma᷆ fe Ujeso Ukristi, mà tyang ābi bì gye ’ushu ngyor kwu he atyam āme᷅n. Biwom bimen ma gyo kung lè há ukpi-ikwu ana, gbe ma tyang ābi bi gye ’ushu ngyor kwu he atyam āme᷅n, hà men or ma gya ’ushu ngyor kwa ipel ha Unwaa Unim lè Unim Atyetyan ngyor igye kpamm. ²⁵ Mà well úkyébb angwu Ujeso Ukristi a kyebb li le li kwa ipel ha Unim ngyor igye kpamm. ²⁶ Mi bè kong biwom abin gbe lè bendi bemen abe be᷆ kee le be lam amen ana. ²⁷ Ukpor men ufe, Ujeso Ukristi a ke men Ukatia Kunyong Unim angwu ù yi ha amen atyam. He ashin undi angwu u᷆ hwua amen ’igyang ù tem baā amen ye, likorye Ukatia Kunyong Unim umen ana u hwua amen biwom puu. Biwom puu abi u᷆ hwua amen bì yi ’igyang, u lam amen ye gbangg. He ashin mi mbee bwan da amen le, biwom abi a hwua amen, mà ke bi ife, hè men mà gye ’ushu kwu ipel ha Ujeso Ukristi. ²⁸ Bebwaa-gi, mi mbee da amen le mà ngyor kwu ipel ha Ujeso Ukristi le hè liti limen angi u᷆ tem be ana, lî kwu lè ’ushell ye, ishwia or i tem shi li ye. ²⁹ Bwo men ma ngye le Ujeso Ukristi ù yi ununung, ki kung nung amen le undi uyang-yang angwu u᷆ shi ’inunung ù yi unwaa Unim a.

¹ Mà ndè ’igegang benyin abe Unim Atyetyan a tyung ha abel. Le bwo ’i nyin he lè bel, a shi li li fel bebwaa-ma. Kì yi faale atyangale le lì yi bebwaa Unim a. Atan-lengi angwu bendi abe bè yi ke igye i be᷆ ndè shob le lì yi bebwaa Unim a ye ù yi le be ngye-e ufe-gyang or ye. ² Bedim-gi lityam, kanaa-anaa i, bel li fel bebwaa Unim or mà. Kitaa ìtí lı᷆ be fel, ki wa nung li dangg ye. Ukpor li ngye le nyong Ujeso Ukristi u᷆ be be, li ba fel ’itaa ken ha ahe likorye li ba nda he gboo. ³ Undi uyang-yang angwu a ndor lishi ha ahe le ashina ’i ba kwa ná, u ndè le a ndor ’uhwo-ma gelalala nya a na ufe ù yi gelalala. ⁴ Undi uyang-yang angwu u᷆ shi ’iban, hà u ban iten Unim á. Kiban na᷅ ’ì yi abanale iten Unim. ⁵ Men má ngye le atan-lengi angwu Ujeso Ukristi a ma be he igye anyin ù yi le he-e ù fem kung li lè he ’iban a. Ma mbee ngye le ’ì yi lè ’iban ha ahe ye gbangg. ⁶ Bwo ’i tyung li gboo le undi uyang-yang angwu u᷆ gye ’ushu ngyor kwu ipel ha Ujeso Ukristi, u gya ’ushu sha ’iban ye; he ashina undi uyang-yang angwu a gye ’ushu shi ’iban, hà ’i ze le a wa nde-e or, ngwu ù ngye-e or ye. ⁷ Bebwaa-gi, mà baa teng undi u lam amen. Mà well le undi angwu u᷆ shi biwom he ’ukwo ahwu Unim a kee, hà ù yi ununung gelalala nya a na Ujeso Ukristi ù yi ununung gelalala. ⁸ Ukpor undi uyang-yang angwu u᷆ gye ’ushu shi ’iban, ù yi unwaa usu bibibi a likorye usu bibibi umen ana a shi ’iban kung lè há ukpi-ikwu igye a. Kife na᷅ ’i shi Ujeso, Unwaa Unim, a ma be he igye anyin le he-e ù be mbee lè biwom puu abi usu bibibi ana a shi. ⁹ Undi uyang-yang angwu ù yi unwaa Unim a, u gya ’ushu sha ’iban ye, likorye likpe Unim angi lì yi ha ahe li ngyor kwa ipel ha ahe. Ù tem gya ’ushu sha ’iban mbee ye, likorye ù yi unwaa Unim a. ¹⁰ Undi uyang-yang angwu u᷆ shi biwom he ’ukwo ’ununung ye, ki nyin he lè unde-ma ye, hà ù yi unwaa Unim a ye. Gbe he ashin na᷅ bendi be᷆ ngye atyetye bebwaa Unim lè bebwaa usu bibibi umen ana. ¹¹ Kisom ashi men ma gyo kung lè há ’unyong ahwu ma kpi ma᷆ fe Ujeso Ukristi, kì yi le, kì nyin li lè bende kpe-kpe-kpe. ¹² Bel lì kwu ná Uken a ma yi ana ye. Ma gyo le a ma yi unwaa usu bibibi a, a ma fe ukaa gwu unwanam Ebell. Kibang ’i ma shi-e ngwu a gwu-e? A ma gwu-e likorye biwom abi ufe Uken a shi bi ban, ukpor abi unwanam ufe a shi bi ngbebb. ¹³ Bebuye, nyong ahwu bendi abe bè yi ke igye anyin be᷆ tel amen, kì shī kwu amen he ’uhwo ye. ¹⁴ Li ngye le bel ufe li buu hwaa lè he abwo lihwu, li fel lè likpan mà. Ashin ’ì yi ná likorye ’anaa-anaa nyin ’i fel nyin li lè bende-tyan. Ki nung gboo le undi uyang-yang angwu ’i nyin he lè unde-ma ye, hà ’i ze le undi umen ana ù so he abwo lihwu. ¹⁵ Gbe undi uyang-yang a tel unde-ma, hà ù yi undi ’ihwu a. Li ngye ashin dangg le undi ’ihwu ù yi lè likpan ’unyong ye. ¹⁶ Kiwom ashi ’i ma shi leěti na᷅ ’i tyung li ashi ’i ze le benyin. Kiwom ashi há ’ì yi le Ujeso Ukristi a ma kung likpan lima ke he ’uhwo ’utyan. Kì yi kpe-kpe le bel or lì kung likpan lityan ke he ’uhwo bende-tyan. ¹⁷ Undi uyang-yang angwu ù yi lè ’iwom, u᷆ ndè unde-ma angwu ù yi lè ’iwom ye, ukpor u᷆ bel àshì ama ndor hell, hà ’i ze le benyin Unim bè yi ha ahe lityam ye gbang-gbang-gbang. ¹⁸ Bebwaa-gi, bwo biwom abin bì yi ’itaa ana mà, gbe li de le ’i nyin li lè bende, lì shi biwom ha bende abi bı᷆ tyung le lì yi lè benyin ’igyang-igyang, lì kong he ungwu ufe-ufe a le lì yi lè benyin ye. ¹⁹ Gbe ’i nyin li lè bende ’igyang a, hà li ngye dangg le lì yi bendi abe bè yi he ’igyang. Kimen ana na᷅ ’ı᷆ mbee shi àtyám atyan a kwu lè ikwun ’unyong ’uyang-yang lı᷆ be he ’ushu Unim. ²⁰ Mà igim ityan ì fel ben li le li shi ’iban or, li ngye le Unim a dyam hwò igim ityan, u mbee ngye biwom puu. ²¹ Bedim-gi lityam, he ashina gbe ’ì yi ’igyang a le igim ityan i ben li ye, hà ashin ’i ze le ’unyong ’uyang-yang lı᷆ naa he ’ushu Unim li kwa porr faale ’ushell. ²² Hà Unim or u ka li ’iwom ’iyang-yang ashi li bii lè ha ahe likorye li ndor iten ima, li mbee shi a᷆shi ’ı᷆ nyin he. ²³ Uten angwu Unim a ke li ù yi le, lì fe lityam ha Unwaa-ma, Ujeso Ukristi, li mbee kwu lè benyin ha bende nya a na a tye li uten. ²⁴ Undi uyang-yang angwu u᷆ ndor iten Unim hà a gwaa ha Unim kpebaa, Unim or u gwaa ha ahe kpebaa. Kiwom ashi ’i shi li li ngye dangg le ù yi gwaa ha abel kpebaa ’ì yi Ukatia Kunyong uma angwu a ke li.

¹ Bedim-gi lityam, bendi gbamm abe be᷆ bè uman le be tya ugie ’isom Unim be paa wu mbee igegem puu hen igye. He ashin mà fe lityam ha bendi puu abe be᷆ de le bè yi lè Ukatia Kunyong Unim ana ye. Mà shun li-li-li hè men mà ndè shob dangg le hà bè yi lè Ukatia Kunyong Unim a or, hà ufe a ye or. ² Ashi ’ı᷆ shi amen ma᷆ ndè shob le hà undi umen ana ù yi lè Ukatia Kunyong Unim a or ’ì yi le, undi uyang-yang angwu a bong gboo le Ujeso Ukristi a ma be he igye i ná undigye, hà ù yi lè Ukatia Kunyong Unim a. ³ Ukpor undi uyang-yang angwu a swan le Ujeso Ukristi a ma be he igye i ná undigye ye, hà ù yi lè Ukatia Kunyong Unim a ye. Undi umen ana a be lè ha Undi-linaa Ujeso Ukristi umen ana a. Ufe na᷅ ma maa gyo le u ba ba. Kigyang-igyang, a be or mà, a fel hen igye. ⁴ Bebwaa-gi, men ufe mà yi bebwaa Unim a, ma hwò bendi-uman bemen ana mà, likorye angwu ù yi ha amen ù yi lè ikeb hwò angwu ù yi ha bendi abe bè yi ke igye anyin. ⁵ Bendi-uman bemen ana bè yi ke igye anyin a. He ashina be kong gba lè biwom igye anyin bife-bife a, bendi abe bè yi ke igye anyin be gyo ābe. ⁶ Ukpor bel ufe lì yi bebwaa Unim a. Undi angwu a ngye Unim, u dang ’utyung gyo li, ukpor undi angwu a ngye Unim or, ngwu ù kwu unwaa Unim a or ye, u gyo li ye. Kitaa ana na᷅ lı᷆ ngye le hà undi ù yi lè Ukatia Kunyong Unim angwu u᷆ tyung ’igyang a or, hà a be lè ha Undi-linaa Ujeso Ukristi angwu u᷆ lam bendi a or. ⁷ Bedim-gi lityam, mà lì gye ’ushu kwu lè benyin ha bende. Benyin be ba lè ha Unim a. He ashin undi uyang-yang angwu ù yi lè benyin, hà ’i tyung le ù yi unwaa Unim a, u mbee ngye Unim. ⁸ Undi uyang-yang angwu ù yi lè benyin ye, hà a ngye Unim ye, likorye Unim na᷅ ù yi usu benyin. ⁹ Kitel i na᷅ Unim a tyung benyin bema gboo ha abel, a som ’ugbe Unwaa-ma a ken be he igye anyin, le lì fel lè likpan ’unyong gbe he ’ubwo ’uma. ¹⁰ Ashin na᷅ ’ì yi benyin. Kì yi le ’i ma nyin li bel lè Unim a ye; Unim na᷅ ’i ma nyin he ufe lè bel, nyong a som Unwaa-ma angwu a be hwō le gbe ha ahe, Unim ù tyang biban bityan ke li. ¹¹ Bedim-gi lityam, bwo ’i nyin Unim lè bel ’i go ’itaa ana, kì yi kpe-kpe le ’ì nyin li, bel or, lè bende. ¹² Kì yi lè undi angwu a wa ndè Unim lè ashi ngye ye. Mà na or, gbe ’i nyin li lè bende, Unim u gwaa ha abel, benyin bema be kwu yilidididi he atyam atyan. ¹³ Ashi ’i shi li li ngye dangg le li gwaa ha Unim, ufe u gwaa ha abel, ’ì yi le, a ke li Ukatia Kunyong uma. ¹⁴ Bel li ndè le Unim Atyetyan a ma som Unwaa-ma be le ù be kpan bendigye, li bun da bendi gba lè ashin a. ¹⁵ Undi uyang-yang angwu a bong le Ujeso ù yi Unwaa Unim a, hà Unim ù yi gwaa ha undi umen ana, ufe u shi gwaa ha Unim. ¹⁶ Bel li ngye le ’i nyin Unim lè bel, li fe lityam ha benyin bema bemen ana. Unim na᷅ ù yi usu benyin. Undi uyang-yang angwu u᷆ gye ’ushu tyung benyin, hà ù yi gwaa ha Unim, Unim u shi gwaa ha ahe. ¹⁷ Kukwo ahwuna na᷅ benyin be᷆ kwu yilididi ha abel, le hè Liti angi Unim u᷆ be tang ushe bendi puu, lî kwu lè ’ushell ye. Li ba kwa faale ’ushell likorye likpan lityan he igye i lì yi ’itaa ken ha angi Ujeso Ukristi. ¹⁸ He ’ipi benyin abe be᷆ be lè ha Unim bè yi, kushell ’u kwa nya ye, likorye gbe benyin Unim bè yi yilididi ha abel, be ndō ’ushell lè ha abel gbang-gbang. Undi u kwa lè ’ushell nyong ù fel yi kwu u᷆ nyong ’ingie a. Ashina ’i ze le, gbe undi ù yi lè ’ushell, hà benyin Unim bè yi ha ahe lityam yilididi ye. ¹⁹ Bel lì yi lè benyin, likorye ’i nyin Unim a lè bel ’ushu. ²⁰ Undi uyang-yang angwu a de le ’i nyin he lè Unim, ù yii tel unde-ma, ù yi undi-uman a, likorye unde-ma angwu u᷆ nde-e lè ashi, gbe ’i nyin he lè he ye, kì hà ndo nyin he lè Unim angwu u᷆ nde-e ye ye. ²¹ Uten angwu Unim a tye li ù yi le, undi uyang-yang angwu ’i nyin he lè Unim, kì nyin he lè unde-ma or titi.

¹ Undi uyang-yang angwu a bong le Ujeso ù yi Ukristi, Undi-likpan angwu Unim a som be he igye anyin a, hà undi umen ana ù yi unwaa Unim a. Gbe ’i nyin li lè ātyām unwaa, ki nyin li lè unwaa-ma or titi. ² He ashin lí ngye le gbe ’i nyin li lè Unim, li mbee ndor iten ima, hà ’i nyin li lè bebwaa-ma or titi. ³ Ife angi lı᷆ ke iten Unim na᷅ ı᷆ tyung le ’i nyin li lè Unim. Iten ima i dyam gbe li ashele ye, ⁴ likorye undi uyang-yang angwu ù yi unwaa Unim a, ù yi lè ikeb le u hwà igye ibibi anyin. Kiwom ashi lı᷆ kung hwò igye imen i ’ì yi abongale le Ujeso ù yi Unwaa Unim a. ⁵ Undi angwu a bong le Ujeso ù yi Unwaa Unim a, ufe-ufe na᷅ u᷆ kwu lè ahwe᷅le umen ana. ⁶ Ujeso Ukristi na᷅ a ma be he igye i, u tyung ’uhwo-ma gbe he umbwo akibale, u tyung ’uhwo-ma gbe he anung angi a wu nyong a ma hwō. Ki ma yi umbwo ufe-ufe a ye; umbwo lè anung na᷅ bı᷆ tyung le ù yi Unwaa Unim. Ukatia Kunyong Unim or titi a naa ushada le ’ì yi ’igyang a le Ujeso ù yi Unwaa Unim a. He ashin bel li ngye dangg le ’ì yi ’igyang a likorye Ukatia Kunyong Unim u bà uman ye. ⁷ Biwom bì yi bikie abi Unim a kung tyung li le ’imen i ’ì yi ’igyang a. ⁸ Biwom bimen bikie ana bì yi Ukatia Kunyong Unim, lè umbwo akibale lè anung angi Ujeso a ma wu he ’uhwo ’utyan. Puu abi bì yi ’itaa ken. ⁹ Nyong bendigye be᷆ kong gbe lè biwom abi be ndè, li kpa ābi. Unim ufe, ima igie i dyam hwò; ufe-gyang na᷅ a de li le Ujeso Ukristi ù yi Unwaa-ma. ¹⁰ He ashin undi uyang-yang angwu a bong ha Unwaa Unim, u ngya ha ahe lityam le ashi ’imen i ’ì yi ’igyang a. Ukpor undi uyang-yang angwu a bong àshi Unim a kong ye, hà u da le Unim ù yi undi-uman a, likorye a bong àshi Unim a kong gbe lè Unwaa-ma ye. ¹¹ Ashin ’i ze le, Unim a shi li li fel lè likpan ’unyong, li kwa ipel ha ahe ngyor igye kpamm; li fel lè likpan limen ana gbe he ’ubwo Unwaa-ma. ¹² Undi uyang-yang angwu a fel lè Unwaa Unim, hà ù yi lè likpan limen i, ukpor undi uyang-yang angwu a fel lè Unwaa Unim ye, hà ù yi lè likpan limen i ye. ¹³ Mi fee ’ushia ahwun hwaa lè men abe ma bong ha Unwaa Unim, le hè men mà ngye le ma fel lè likpan ’unyong angi lı᷆ ngyor igye mà. ¹⁴ He ’unyong ’uyang-yang lı᷆ be he ’ushu Unim, li kwa lè ’ushell ye, likorye li ngye le ’iwom ’iyang-yang ashi li bii lè ha ahe u gyo li, gbe li shi biwom abi bì yi he ugim uma a. ¹⁵ Bwo li ngye le he ’unyong ’uyang-yang lı᷆ bii ’iwom lè ha ahe u gyo li, ashin ’i shi li li mbee ngye le li kpē ashi li bii lè ha ahe ana or mà. ¹⁶ Undi uyang-yang angwu a tang lè unde-ma, undi Unim, u shi ’iban, gbe ’iban ashi há ’ì yi ashi ’ı᷆ be lè lihwu a ye, ù kong ha Unim ke undi umen ana le Unim ù ke-e likpan. Kì yi faale atyangale le Unim u ka he likpan. Ashin ’ì kee-kee yi ke bendi abe be᷆ shi ’iban ashi ’ı᷆ be lè lihwu ye a. Kiban ashi ’ı᷆ be lè lihwu ’ife, undi angwu a shì āshi, mi de le mà kong ha Unim le ù ke-e likpan ye. ¹⁷ Likpe liketye liyang-yang lì yi ’iban a, ukpor biban bisuso bi ba lè lihwu ye. ¹⁸ Bel lí ngye le undi uyang-yang angwu ù yi unwaa Unim a, u gya ’ushu sha ’iban ye, likorye Ujeso Ukristi, Unwaa Unim, u kang he le hè Usetan, usu bibibi, ù do he ye. ¹⁹ Lí ngye le lì yi bebwaa Unim a, mà na igye puu ì yi he ’ubwo Usetan or. ²⁰ Lí ngye le Ujeso Ukristi, Unwaa Unim, a be he igye i be buu li àshì le lì fel ngye Unim angwu ufe-ufe na᷅ ù yi Unim ugyang. Lì yi gwaa ha Unim angwu ù yi ’igyang, li shi gwaa ha Ujeso Ukristi, Unwaa-ma. Ufe na᷅ ù yi Unim ugyang. Likpan angi lı᷆ ngyor igye kpamm li be lè ha ufe a. ²¹ Bebwaa-gi, mà baa ’uhwo-men hè men mà ndè le mà gbe lè abwo fe he ikem ye. Ì yi Ùnīm a ye.