1 Corinthians

1 Corinthians

¹ Mi Uporl angwu Unim a waa kung mi le mì kwu unwaa-isom Ujeso Ukristi, bel ha unwandatyan Usosteniz na᷅ lı᷆ fee ’ushia ahwun. ² Li fee āhwu hwaa lè men, liwu bendi abongale angi he Ukorint, men puu abe Unim a waa kung le mà kwu bendi bema a, men abe mà yi gwaa ipel ha Ujeso Ukristi nya a na bendi puu he ’iteng ’iyang-yang abe bè yi he ’ubwo Ujeso Ukristi bè yi bendi Unim a. Ujeso Ukristi ù yi Atyabell, u shi Atyetyan or titi. ³ Unim Atyetyan befe lè Atyetyan Ujeso Ukristi bè hā ke men ’ukwun, be shi hè ’ì kwun amen he atyam kpatiaa. ⁴ Mbee ’unyong puu, mi pee Unim he ’uhwo ’umen, likorye a ke men ’ukwun kangg gbe he agwaale ūme᷅n ha Ujeso Ukristi. ⁵ Men abe mà yi gwaa ipel ha Ujeso Ukristi, Unim a ke men beke gbamm atyetye-atyetye. A shi biwom bima bi nung amen dangg, u ke men ikeb angi ma᷆ bun biwom bimen i de bendi. ⁶ Biwom abi leěti ma keb ma᷆ gyo gbe lè Ujeso Ukristi bi kaa kwu idaa he átyám āme᷅n. ⁷ He ashina, kì yi lè ’uke ahwu Unim u᷆ ke ahwu ’u᷆ gyan lè men ye nyin i ná ma fel kwu ma᷆ nyong ’unyong ahwu Atyetyan Ujeso Ukristi u᷆ tem be be i. ⁸ Ujeso Ukristi ugyang na᷅ u᷆ shi amen ma᷆ naa genn lè wu he umbee-likel liti igye anyin le nya he Liti limen Atyetyan Ujeso Ukristi u᷆ be be ana, hè men mà zī libi ye. ⁹ Unim na᷆ a waa kung amen le mà be kwu utyang ha Unwaa-ma Ujeso Ukristi, angwu ù yi Atyetyan. Unim ù yi ingwu ifee ye. ¹⁰ Bebuye, mi kung Atyetyan Ujeso Ukristi tim amen anung le mà kwu ikwun ha bende, mà tang he abwo fel akwu-akwu ye, mà gwaa ha bende, ma kwu ugim ken. Likong liyang-yang, mà kong āngi igie ken. ¹¹ Bebuye, mi kong ashin likorye bendi besuso lè he ’ikwu-lihwan Uklowi be de-m le ’ushwan ’ù yi he liwu līme᷅n. ¹² Be de-m le ma tang he abwo fel akwu-akwu. Bendi-iso be da le befe bè yi ke Uporl a, besuso be de le befe bè yi ke Aporlos a, besuso be de le befe bè yi ke Ipita a, besuso be de le befe bè yi ke Ujeso Ukristi a. ¹³ Ma kaa le ma kung ikeb Ujeso Ukristi hwua he akwu-akwu â? Mi Uporl na᷅ be ma maa bee he ’ikpakpaa he ’uhwo ’umen à? Be ma kib amen he umbwo he lizen ligi, mi Uporl â? Mà de-m. ¹⁴ Mi pee Unim le mi ma kib undi he umbwo he liwu līme᷅n ye, mi ma kee-kee kib Ukrispes lè Ugayas befe-befe a. ¹⁵ He ashin, kì yi lè undi angwu ù nya de le mi ma kib amen he umbwo he lizen ligi ye. ¹⁶ (Kye! Mi well mà, mi ma kib bendi Ustefenas or titi he umbwo. Fem aben tyang, mi gim le mi ma tem kib undi ususo he umbwo ye.) ¹⁷ Ujeso Ukristi a som mi le mì tan kib bendi he umbwo a ye, a som mi le mì tan bun ’isom ’inunung gbe lè he de bendi a. Nyong mı᷆ bun ’isom ’imen ana, mi kong he ungwu abyele a, ngwu mì bun āshi he lishi abyele undigye a ye, hè ’ì nung nwongg le lihwu Ujeso Ukristi he ’ikpakpaa life-life na᷅ lì yi lè ikeb. ¹⁸ Bendi abe bè so he ’ukwo linim, be nda ’isom gba lè lihwu Ujeso Ukristi he ’ikpakpaa ná ’iwom akpel-ye á nà. Ukpor bel abe li fel he ’ukwo likpan ’unyong ufe, li ngye le ikeb Unim i sha aki gba he ’isom ’ima. ¹⁹ Be ma fee he ’ushia Unim leěti le Unim a de le: "Bendi abe be bi lishi angi igye anyin, mi sha lishi abyele libell li fel ’idideng zii; mi shi bendi abe be ngye ’ushia, kushia angyele ’ubell ’u fel ’iwom likor." ²⁰ Bwo ashin ’ì yi ’itaa i, bendi abe be bi lishi angi igye anyin a, lishi abyele libell lì yi ’idideng zii! Bendi abe be᷆ hwua bendi Iten Ijuus, lingye libell li ba kpell ābe ye! Bendi abe be᷆ fe ifung mbee ’unyong, ifung ibell i ba kpell ābe ye! Unim a tyung le lishi abyele angi igye anyin lì yi umbeb a. ²¹ Unim angwu a ngye biwom puu a ma nde gia le bendi abe he igye i bè ngye-e gbe he lishi abyele libell a ye. Ki ngbebb he le ù kpan bendi abe be bong ha ’isom ashi lı᷆ bun, mà na bendi abe he igye i be᷆ kung āshi ná ’iwom akpel-ye a or. ²² Bendi Ijuus be kee le be nda bikwele-uhwo abi bı᷆ tyung le ’isom Unim ’ì yi ’igyang a. Bendi Igrik be kee le be ngya Unim gba he lishi abyele libell ligyang. ²³ Ukpor, kiwom ashi bel lı᷆ bun de bendi ’ì yi gbe lè Ujeso Ukristi angwu be ma maa bee he ’ikpakpaa. Kisom ’imen ana ’i ban bendi Ijuus he lityam kangg, be swan āshi. Bendi abe bè yi Ijuus a ye, be ndà āshi ná ’iwom akpel-ye. ²⁴ Ukpor, bendi abe Unim a waa kung le bè kwu bendi bema, mà bè yi Ijuus or, bè yi Ijuus a ye or, bé ngye le Ujeso Ukristi a tyung ikeb Unim, u tyung lishi abyele Unim. ²⁵ Kiwom ashi Unim a shi hè bendi bè ndè shi ná akpel-ye nà, kì yi dangg hwò lishi abyele bendigye. Ashi Unim a shi hè bendi bè nde shi le ’ì yi ndyor-ndyor, kì yi lè ikeb hwò ikeb puu angi bendigye bè yi lè ngi. ²⁶ Bebuye, mà gim ’itaa bendi abe ma ma yi, ukpong Unim a hà waa kung amen le mà fel bendi bema. He ashi bendigye, bendi lè he liwu līme᷅n abe bè yi dangg be ma go ye. Bendi abe be kpè he ashi bendigye be ma go ye. Abe bendi igye anyin be maa nde be ná besu bendi be ma go ye. ²⁷ Men ufe, bendi abe bè yi ke igye i be maa nde men ná bikpel-ye bendi nà. Ukpor Unim a waa kung amen le mà kwu bendi bema, le hè ishwia ì shi a᷆be be kung ’uhwo-bell le be bi lishi ana. U mbee waa kung amen abe mà yi ndyor-ndyor he ashi bendi abe bè yi ke igye anyin le hè ishwia ì shi a᷆be be kung ’uhwo-bell le bè yi lè ’ugogo ana. ²⁸ A mbee waa kung bendi abe bendi abe bè yi ke igye be᷆ kong bia ābe, be kung ābe he ’ukpo ye, be nyiī ābe ndor gye he ufaa. Bendi bemen ana na᷅ Unim a waa kung he-e ù shi bendi abe bè yi ’indee-indee he igye anyin hè be bè ndè shob le bè yi he ’ukpo ye gbangg. ²⁹ He ashin, kì yi lè undi angwu u᷆ pwom ungwu he ’ushu Unim mbee ye. ³⁰ Kì kee-kee yi gbe ha Unim a le bel li fel gwaa ipel ha Ujeso Ukristi. Unim u shi li li fel bi lishi gbe ha ahe. Ufe umen na᷅ a pong li lè he lifee ’iban, u shi li li fel kpa-kpa he ashi Unim. He ashina a shi li li fel bendi Unim. ³¹ He abin puu, kì yi nya a na be fee he ’ushia Unim a. Be fee le: "Undi angwu a kee le u pwom ungwu, ù kee-kee pwom ungwu he ashi Unim a shi a."

¹ Bebuye, leěti he ’unyong ahwu mi ma be ha amen há le mi bun ’undyell ahwu Unim a fem tyung li, mi maa kong he ungwu abyele a ye. ² Kunyong ’umen ahwu mi ma yi he liwu līme᷅n ana, mi ma ndè gia le mi kee-kee gim gba lè Ujeso Ukristi ufe-ufe, mbee-mbee lè lihwu lima he ’ikpakpaa. ³ He ’unyong ’umen ana mi ma yi lè ikeb ye, mi ma yi lè ’ushell kangg. ⁴ Nyong mi maa bun ’isom Unim de men, mi ma kung lingye undigye a lam kwu amen ye, ukpor Ukatia Kunyong Unim lè ikeb Unim na᷅ bi maa shi ’ı᷆ nung amen le ’isom ana ’ì yi ’igyang a. ⁵ He ashin, kikwu abongale ūme᷅n ha Ujeso Ukristi ’ì yi he lingye undigye a ye, kì yi he ikeb Unim a. ⁶ Mà na or, bendi abe Ukatia Kunyong Unim a kam igim ibell, kisom ’ityan ’i sha ābe be bya lishi. Ukpor ’ì yi lishi abyele undigye ná angi besu igye lè bendi abe he igye i bè yi lè ngi i a ye, befe, baale ikeb ibell ı᷆ mbee. ⁷ Lishi abyele angi lı᷆ bun gbe lè ngi lì yi lishi abyele Unim angi leěti li ma yi he ’undyell a. Leěti mà ukpong igye anyin i hà kpi, Unim a ma kam le ’ì kwu ná le hè li lì be fel lè abwo he Kusu ’uma. ⁸ Biwom bimen Unim a kam ana bi nung besu igye anyin ye gbangg. Bì nung ābe, hang be ma maa Ujeso Ukristi Atyetyan bee he ’ikpakpaa ye, ufe angwu ù yi Usu besu. ⁹ Kì yi nya a na leěti be ma fee he ’ushia Unim a le: "Biwom abi Unim a kam ndor bendi abe ’i nyin ābe lè he, bi dyam gbe gyong ’iwom ’iyang-yang ashi undigye a ndè, u gyo, u gim." ¹⁰ Unim a tyung li biwom abin gbe ha Ukatia Kunyong uma. Biwom puu bi nung Ukatia Kunyong uma umen ana, mà lè ’undyell Unim or. ¹¹ Undi u ngya ugim unde-ma ye; undi ugyang ufe-ufe na᷅ u᷆ ngye-e. Kitaa a ken undi ù hà ndo ngya ugim Unim ye; Ukatia Kunyong Unim na᷅ u᷆ ngye-e. ¹² Ukatia Kunyong Unim angwu Unim a ke li, a be lè há igye anyin a ye, ù yi angwu uma ugyang a. Beke abe Unim a ke li le lì shi aki, Ukatia Kunyong uma umen angwu ù yi ha abel ana na᷅ u᷆ shi ābe be᷆ nung li. ¹³ Ashin ’i ze le, nyong li bun de bendi gbe lè biwom abi Unim a ke li, li bun ābi lè he lingye angi undigye a hwua li a ye, Ukatia Kunyong Unim na᷅ a hwua li ábi. Bel li bun biwom Unim da bendi abe Ukatia Kunyong Unim ù yi ha abe a. ¹⁴ Undi uyang-yang angwu Ukatia Kunyong Unim ù yi ha ahe ye, ù hà ndo kpa biwom abi Ukatia Kunyong Unim u᷆ ke ye. U ndà ābi nya a na biwom akpel-ye a, bi nung he ye, likorye Ukatia Kunyong Unim ufe-ufe na᷅ u᷆ shi ābi bı᷆ nung undi. ¹⁵ Ukpor undi uyang-yang angwu Ukatia Kunyong Unim ù yi ha ahe, u fel ngya likpe biwom abin puu, mà na bendi abe bè yi ke igye anyin, ki nung ābe lè ashi ufe u᷆ shi ye or. ¹⁶ Kì yi nya a na be fee he ’ushia Unim a le: "Kì yi lè undi angwu a ngye ugim Unim ye. Kì yi lè undi angwu u᷆ ke Unim utebb ye." Ukpor bel ufe, li fel ngya ugim Ujeso Ukristi likorye Ukatia Kunyong Unim ù yi ha abel.

¹ Ukpor, bebuye, mà na Ukatia Kunyong Unim ù yi ha amen or, nyong mi ma yi ha amen há, ki maa ndee mi ná mı᷆ hwua amen ná hang mì hwua bendi abe bè yi lè Ukatia Kunyong Unim, likorye ma tyang igim īme᷅n agyang á ì so-i teng amen. Mà so ’isun gbe lè biwom Ujeso Ukristi. ² Há he ’unyong ’umen ana, mi maa ka amen àbí a, mi maa ka amen lizi ligyang a ye, likorye ma ma wa kaa kpè he ’ukwo Unim ye. Kpamm be wu ’unyin i or, ma wa kaa kpè ye. ³ Mà so-i sha akpe a ná bendi abe bè yi ke igye anyin a. Mā shwan lè bende, ma tel bende ’unyong ’uyang-yang. Ashin ’i nya tyung le igim īme᷅n agyang na᷅ ı᷆ teng āme᷅n ye a? Akpe āme᷅n à so a ná angi bendi abe bè yi ke igye anyin a! ⁴ Nyong undi-iso he liwu līme᷅n u᷆ de le ufe ù yi ke Uporl a, ususo u de le ufe ù yi ke Aporlos a, ma sha akpe bya le ma ngye Ujeso Ukristi or ye. ⁵ Ayang ù yi Aporles? Ayang ù yi Uporl? Bel lì kee-kee yi bebwaa-isom abe Unim a som hwaa lè men le hè men mà bong ha Ujeso Ukristi a. Bel, undi-undi a maa sha aki angi Unim a ma ke-e le ù shi a. ⁶ Bel lì yi ná bendi útia᷆ nà; mi kwan íkwa᷆n, Aporlos u wu bikwukwan umbwo, ukpor Unim na᷅ u᷆ shi bikwukwan bı᷆ mbi, u shi ābi bi kaā. ⁷ Ki nung nwongg le, undi angwu u᷆ kwan íkwa᷆n or, angwu u᷆ wu bikwukwan umbwo a or, bè yi he ’ukpo ye. Unim ufe-ufe na᷅ ù yi he ’ukpo a ken, likorye ufe na᷅ u᷆ shi bikwukwan bı᷆ mbì, u shi ābi bi kaā. ⁸ Undi angwu u᷆ kwan íkwa᷆n or, angwu u᷆ wu bikwukwan umbwo a or, be sha aki ken a. Unim u ba ka undi-undi lifem angi li keè ha aki angi a shi. ⁹ Bel a puu befee li gwu abwo fe ’iteng ken li sha Unim a aki. Men ufe mà yi ná ùtiá Unim a. Men mà mbee yi ná ushom angwu Unim u᷆ tye nà. ¹⁰ Unim a ke-m ikeb angi mı᷆ kwu ná undi angwu a ngye ushom atyele dangg. Mi-i tye lìshií, undi-iso u tye ugeng. Undi uyang-yang ù baā ná u᷆ tye ushom nya líshiı᷆ ana, ¹¹ likorye Unim a kung Ujeso Ukristi ufe-ufe a ndor ná lìshií liwu bendi abongale, kì tem yi lè lìshií lisuso pel ha ahe ye. ¹² Bendi besuso be kung igold lè isiliba lè bínde᷆ binunung abi bı᷆ taa bitaa atyetye-atyetye tya ushom nya líshiı᷆ limen ana; besuso be kung ìkwán lè igwan lè bikpaa-ikwul a tye ushom nya. ¹³ Liti li ba ba angi aki undi uyang-yang a᷆ be fem tyung he igye gboo. He Liti limen angi Ujeso Ukristi u᷆ be ana, Unim u ba kung ’ìndē gil aki undi uyang-yang, hè bendi bè ndè le a ngbebb à? Kìndē ’i ba tyung ’itaa aki undi uyang-yang, hà à yi anunung or, hà à yi abibi or. ¹⁴ Gbe ushom angwu undi a tye nya, kìnde ’i shi-e na ana or, a shī ye, Unim u ba ka undi umen ana ashi ’i keè ha aki ama. ¹⁵ Ukpor, undi uyang-yang angwu ushom uma a shī ’ìnde, Unim u ba ka he ’iwom ye. Mà na or, Unim u ba kpan he, ukpor u ba kpan nya a na undi angwu ’ìnde ’i la shī gwu-e, a fel buù hwaa ihwaa a. ¹⁶ Men má ngye dangg le mà yi ushom Unim, Ukatia Kunyong Unim u shi ha amen. ¹⁷ Undi uyang-yang angwu a ban ushom Unim ana, Unim u mbee lè he, likorye Unim a shi ushom ana ù yi ta-ta ke-e ufe-gyang a, ki shi le men-agyang na᷅ mà yi ushom umen ana. ¹⁸ Undi uyang-yang ù lam ’uhwo-ma ye. Gbe ’ì yi lè undi he liwu līme᷅n angwu u᷆ kung ’uhwo-ma le ufe a ngye ’iwom ’indee-indee, ù bel fel ná undi angwu a ngye ’iwom ye, he-e ù fel lè lingye ligyang angyell. ¹⁹ Mi kong ashin likorye he ashi Unim lingye angi igye anyin lì yi akpel-ye ugyang zii. Kì yi nya a na be ma fee he ’ushia Unim a le: "Bendi abe be ngye lingye angi igye anyin, Unim u kwa ābe he beshu bebell." ²⁰ Be mbee fee le: "Unim a ngye le igim bendi abe be ngye lingye angi igye anyin ì yi lè lifem ye." ²¹ He ashin mi da amen le undi ù kung undigye pwom ungwu de le ufe ù yi ke anwun a, ufe ù yi ke anwuna a ye, ye. Má ngye le biwom puu bì yi bimen a. ²² Mà Uporl or, mà Aporlos or, mà Ipita or, bè yi ke men a. Biwom puu he igye i, likpan or, lihwu or, bì yi ke men a. Biwom abi ’unyin i or, abi ’uhwo or, bì yi ke men a. ²³ Men ufe, mà yi he ’ubwo Ujeso Ukristi, Ujeso Ukristi u shi he ’ubwo Unim.

¹ Mi kee le mà ngye dangg le bel li sha aki he ’ubwo Ujeso Ukristi a, ma mbee ngye le Unim a kung ’undyell ’uma fe li he ’ubwo le hè li lì hwua bendi. ² Undi uyang-yang angwu átyám a ke-e aki le ù shi, kiwom ashi ’i dyam hwò puu le ù shi ’ì yi le ù fe átyám he akwo puu. ³ Kitaa ’iyang-yang ashi ma gim gbe lè mi, kì yi-m he ’ukpo ye. Kitaa ashi undigye uyang-yang u᷆ gim gbe lè mi, ki shi-m he ’ukpo ye. Mi-gyang or mi shi ugim fe-e lishi gbe lè ’uhwo-gi, le hà ashi mı᷆ shi ’i ngbebb or, ki ngbebb ye or, ye. ⁴ Mà na mi ngye umbeb uyang-yang angwu mi shi ye, ukpor mi na᷅ mı᷆ ke ’uhwo-gi likpong ye, Unim na᷅ u᷆ be tang ushe. Hà ù be ke-m likpong or, hà libi or, mi ngye ye. ⁵ He ashin, mà tem de bendi le, anwun a shi ’i ngbebb, anwuna ufe a shi ’i ngbebb ye, ye. Mà ndor ’unyong ahwu há ’ù be. Há he liti limen Ujeso Ukristi u᷆ be be ana, biwom abi ’unyin i bì yi he ’undyell, u ba fem ābi puu tyung he igye gboo, u be lè igim bendigye he igye. Nya liti limen ana, Unim u ba pee undi uyang-yang ná ’ì yi le ù pee he. ⁶ Bebuye, mi kong biwom abin puu gbe lè ’uhwo-gi lè Aporlos le hè men mà hwua gbe ha abel ná ma᷆ shi nya a na be fee he ’ushia Unim. Undi uyang-yang he liwu līme᷅n ù fel he ungwu apwomale gbe lè undi ken or, u bia angwell ye. ⁷ Wo gim ’uhwo-gang ha i le wò yi ayang undi a? Kì yi lè ’iwom ashi wò yi lè shi, ashi Unim na᷅ a ka-a ye bee? Bwo Unim na᷅ a ka-a ’iyang-yang, kibang a, wò ha᷅ pwom ungwu fel ná wo-gyang na᷅ wo shi a᷆bi wò yi lè bi nà? ⁸ Má gim le ’ì tem yi lè ashi ’ı᷆ baa amen ye a? Mà de-m. Ma kung ’uhwo-men ná ma fel lè biwom puu a bee? Ma fel kung ’uhwo-men ná besu a, mà na bel ufe li ndè ’uhwo-tyan ná besu a ye a? Mà fel besu ’igyang a, hang ’i ngbebb mi kangg, lî fel besu utung ha amen. ⁹ Kì yi-m ná Unim a ndor li, bel bebwaa-isom Ujeso Ukristi a, he libwo angi li zen hwò puu nà. Lì yi ná bendi abe be tang ushe le bè gwu ābe a. Bel li naa nyin gboo hè idengell Unim or, bendigye or, bè ndè li hè ’ì kwu ābe he ’uhwo. ¹⁰ He ’uhwo Ujeso Ukristi, bel li fel bikpel-ye he ashi bendigye puu, ukpor men ma gim le ma fel bi lishi ’indee-indee gbe he agwaale ipel ha Ujeso Ukristi. Bel lì yi lè ikeb ye, ukpor men ma gim le mà yi lè ikeb. Bendi be fem amen, ukpor be bia li bel. ¹¹ Kpamm be wu ’unyin i, itung i ndo li, umbwo u gyor li, li tan uten-ibong, bendi be kpam li ikwun, li shi lè ùshù ye. ¹² Li sha aki lè abwo atyan mbee ’unyong. Nyong bendi be᷆ buu li atye, li da ābe le: "Unim ù ke men ’ukwun." Nyong bendi be᷆ ke li ’ingie, li ngib lityam. ¹³ Nyong bendi be᷆ kee li likong, li kaa lî kwu ikwun-ikwun ha abe. Kpam be wu ’unyin i, bè so-i ndà li lì yi a ná abung he itemke a. ¹⁴ Mi fee biwom abin hwaa lè men le mî fe men ishwia he ’uhwo a ye, mi fee ābi likorye mi kee le mi ka amen utebb ná bebwaa-gi lityam a. ¹⁵ Mà mà kwu lè bendi asisilisi asisilisi abe be᷆ tyung amen ’ukwo Ujeso Ukristi or, atyamen ufe ù kee-kee yi ken a. Mì yi atyamen a, likorye ma gwaa ’uhwo-men ipel ha Ujeso Ukristi gbe he ’isom ’inunung ashi gbe lè Ujeso ashi mi ma bun de men. ¹⁶ He ashin, mi tim amen anung le mà kung he abee agi. ¹⁷ Ashina na᷅ ’ı᷆ shi-m mı᷆ som Utimoti be ha amen há, le he-e ù well amen ’itaa mì shi likpe he ’ukwo Ujeso Ukristi. Kitaa ’imen ana na᷅ mı᷆ hwua awu bendi abongale mbee igegem puu. Mà gyo Utimoti likorye ù yi unwaa-gi lityam he ’ukwo Ujeso Ukristi, u shi undi angwu u᷆ fe Atyetyan Ujeso Ukristi lityam ken. ¹⁸ Bendi besuso há he liwu līme᷅n be fel he idim adimale, hà be gim le mì tem ba ba ha amen há ye a or? ¹⁹ Gbe Unim a bong, hà baale mı᷆ be ha amen há. He ’unyong ’umen ana mi ba ngya dangg le ikeb Unim ì nya yi ha bendi idim bemen ana à, hà be kpa ’ihwee likor a or. ²⁰ Unim ù yi Usu he ungwu a ye, ù yi Usu he ashele lè ikeb a. ²¹ Kibang ashi men ma᷆ kee? Ma kee le mì be ha amen há lè linaa a, hà ma gie akpe āme᷅n le mì be há he ikwun-ikwun be tyung amen le ’i nyin mi lè men a?

¹ Kiwom ashi mi gyo ’i kwun mi abwo! Mi gyo le akpela à yi he liwu līme᷅n, undi u nda᷆ ipel ha ungye atyam or. Bendi abe be ngye Unim a ye or, be sha ’itete ’ibibi ashina ye. ² Bwo ma ngye ’ibibi ’imen i gia, kibang a, mà so he idim adimale? Ndè le hang ’i ban amen iban? Ki shi le hang ma ma ndō undi umen angwu a shi ’itete ’ibibi ashina lè he liwu līme᷅n nya ’ukwo-ukwo! ³ Mà na mì yi ha amen há ye or, lityam ligi life lì yi ipel ha amen. He lizen Atyetyan Ujeso, mi tang likong angi gbe lè undi angwu a shi ’itete ’ibibi ashin nya a na hang mì kwu há liwu līme᷅n. Ashin na᷅ ’ì yi le mà shi: mà gbong liwu he lizen Atyetyan Ujeso, lityam ligi li kwa ipel ha amen, mà kung ikeb Atyetyan Ujeso, ⁵ kung undi umen ana fe Usetan he ’ubwo, le hè inyiahwo ima ì ban, le he-e ufe-gyang ù be kpan he Liti angi Atyetyan Ujeso u᷆ tem be he igye i. ⁶ Idim īme᷅n i ngbebb ye! Má ngye ityang angi i de le: "Be sha iyist zangg fa he ibred, iyist i gbo kpa mbee ibred puu sha ibred i mbwee." ⁷ He ashin, mà mbee lè ’iban ’imen ana lè he liwu līme᷅n likorye ki gbo ná iyist nà. Mà mbee lè shi hè men mà fel betaa-betaa. Kigyang-igyang men abe ma bong ha Ujeso Ukristi ma fel betaa-betaa likorye Ujeso Ukristi a hwō he ’uhwo ’umen. Ufe ù yi ná ùtiā angwu be᷆ gwu shang Unim he ’unyong ’ipam ashi be᷆ ko le Kipam Agbele-gyong. ⁸ He ashin, mà lì mbee lè abwo atyan lè he ’iban ’iyang-yang, mà lì kwu betaa-betaa, lì pwom ’ukwo ahwu kpa-kpa lityam ken. He ashina, li ba fel ná ibred angi ì yi lè iyist ye gbangg. Kitaa ana na᷅ lı᷆ shi ’ipam ’imen ana he ’ukwo ahwu kpa-kpa. ⁹ He ’ushia ahwu mi ma fee hwaa lè men, mi ma de men le mà ngwee utyang ha bendi akpela ye. ¹⁰ Bendi igye abe be᷆ fe Unim ye, abe be tan akpela, be shi lè ukpombell ubwaa, be zì ’azi, be shi ikem, bendi aben na᷅ mi kong gbe lè be ana ye. Lè ’igbe ná mà yi he igye i, kì yi lè ’ukwo ahwu ma᷆ tang ’uhwo-men lè ha abe ye. ¹¹ Ukpor ashi mi de men ’ì yi le, undi angwu a de le ufe ù yi undi abongale a, gbe ù so-i tan akpela, u shi lè ukpombell ubwaa, u shi ikem, u bia bendi, u bwom ibwom, u zì ’azi, mà ngwee utyang uma ye. Mà zī lizi or abwo ipel ha ahe ye. ¹² Bendi abe bè yi bendi Unim a ye, mì yi lè ikeb le mi da le be shi ’i ngbebb or, be shi ’i ngbebb ye or, ye. Unim na᷅ u᷆ tang ābe ushe. Bendi Unim na᷅ bel lì yi lè ikeb le li da le be shi ’i ngbebb, be shi ’i ngbebb ye. Mà shi nya a na be ma fee he ’ushia Unim le: "Mà ndō undi ubibi lè he liwu līme᷅n."

¹ Gbe undi he liwu līme᷅n ù yi lè ikpe ha unde-ma, undi Unim, ki nya ngbebb le ù tyang bendi Unim lè ko he ushe ha bendi abe bè yi bendi Unim a ye a? Kì yi le ù mbe lityam shi ’itete ’iwom ’itaa ana ye! ² Ki ze i le má ngye le bendi Unim be ba maa bendi abe bè yi ke igye anyin puu ushe ye a? Bwo men ma᷆ bé maa bendi igye anyin ushe, kibang a, ma᷆ kong inwaa ikpe anyin lè ’uhwo-men ye? ³ Idengell Unim or, bel bendi Unim li ba maa āngi ushe. Bwo lı᷆ be maa idengell Unim or ushe, li kpè le li kong ànaà angi he igye i. ⁴ Gbe ’ì nya yi le linaa li be hwaa lè men or, má nya kung āngi lè hwaa lè bendi abe bè yi lè abwo he liwu bendi abongale ye a le bè kong a? ⁵ Ishwia ’ì shi amen! Mi ngye dangg le ’ì yi lè undi he liwu līme᷅n angwu a bi lishi le u kong ikpe he liwu līme᷅n, bendi Unim. ⁶ Fe ’ibang ’ì hà yi atan-leshi angwu men ma᷆ ko bende ushe ha bendi abe bè yi bendi Unim a ye? ⁷ Kì yi ibia a ke men le mà ko bende ushe, mà ha amen liwu ligyang or. Ki ngbebb le mà tyang bendi bè shi ban amen hwò a᷆shi le mà ko bende ushe! Ki mbee ngbebb le mà tyang bendi bè shi amen zi! Ashina ’i ngbebb hwò a᷆shi le men mà ko bende ushe. ⁸ Ukpor, ashi le men mà tyang bendi hwan bè shi bibibi ha amen, men na᷅ mà ha᷅ tem fel shi ban bendi, ma shi ābe zi, ma shi bimen i shi-shi ha bende or. ⁹ Men má ngye dangg le bendi abe be᷆ shi bibibi be ba kwa lè abwo he Kusu Unim ye. Mà tyang bè lam amen ye! Bendi abe be᷆ tan akpela, bendi abe be᷆ shi ikem, bendi abe be᷆ ban bengye lè bekyebb bendi, bendi abe be᷆ gbe ipel ha bende-bell bengikye, ¹⁰ bendi abe be᷆ zì ’azi, bendi abe be᷆ ban lityam fe biwom bendi, bendi abe be᷆ bwom ibwom, bendi abe be᷆ kong bia bendi, bendi abe be᷆ leb kpe biwom bendi, bendi puu abe be᷆ shi biwom abin be kwa lè abwo he Kusu Unim ye. ¹¹ Leěti men besuso ma maa sha bibibi bimen i, ukpor Unim a tyang biban bīme᷅n ke men, shi amen ma fel betaa-betaa, u shi amen ma fel ta-ta ke-e ufe-gyang. Gbe ha Ujeso Ukristi lè Ukatia Kunyong Unim angwu lı᷆ fe-e, men ma fel kpa-kpa he ashi Unim. ¹² Bendi besuso há liwu līme᷅n be da le ’ì yi lè ashi ’ı᷆ tel ābe ye. Kì yi ’igyang a le ’ì yi lè ashi ’ı᷆ tel li bel, bendi Unim, ye, ukpor biwom puu na᷅ bı᷆ kpell li ye. Mi or, kì yi lè ashi ’ı᷆ tel mi ye, ukpor mì hà ndo bong ’iwom le ’ì kpe-m ityuu, mi fel ufee áshi ye. ¹³ Bendi besuso be mbee da le, Unim a shi azi ndor ’indakam a, u shi ’indakam ndor azi a. Ashina ’ì yi ’igyang a, ukpor azi or, kindakam or, bi ba mbee. Atan-lengi angwu Unim a shi inyiahwo undigye ù yi le hè undi ù kung āngi tan akpela a ye, ukpor a shi āngi ke undigye le he-e ù kung āngi fe Atyetyan Ujeso Ukristi a, likorye Atyetyan Ujeso Ukristi na᷅ u᷆ kam inyiahwo undigye. ¹⁴ Nya a na Unim a ma kung ikeb ima wum Atyetyan Ujeso Ukristi lè he lihwu na᷅ u᷆ be kung āngi wum li bel or titi lè he lihwu. ¹⁵ Men má ngye dangg le mà yi agwo he inyiahwo Ujeso Ukristi a. Ki nya ngbebb le undi ù kung ligwo lè he inyiahwo Ujeso Ukristi shi āngi lì fel ligwo he inyiahwo undi akpela a? Kpaa ye o! Unim ù bong ye! ¹⁶ Undi angwu a gbe ipel ha undi akpela, hà befe a puu befee be fel ná undi ken. Li ngye ashin likorye be ma fee he ’ushia Unim le: "Ungikye lè ungingye abe be gwaa ’iteng ken, be fel anung ken." ¹⁷ Ukpor undi angwu a gwaa ’uhwo-ma ipel ha Atyetyan Ujeso Ukristi, befe lè ahe be fel lityam ken. ¹⁸ Bwo ashin ’ì yi ’itel i, mi da āme᷅n le, mà kung abwo āme᷅n gbang-gbang lè he akpela. Biban abi bi teng puu abi undi u᷆ shi ābi bi ban inyiahwo ima ye, ukpor undi angwu a tan akpela, u ban inyiahwo ima igyang a. ¹⁹ Men mà ngye dangg le inyiahwo īme᷅n ì yi ushom angwu Ukatia Kunyong angwu Unim a ke men u᷆ kwu a. Men mà tem yi lè ’uhwo-men ye, Unim na᷅ a fel lè men, ²⁰ likorye a kung anung Ujeso Ukristi a ndyebb amen. He ashin, kì yi le mà kung inyiahwo īme᷅n fem Unim.

¹ Mî fan amen biwom abi ma fee mi gbe lè bi. Gbe lè libee, gbe undi a ndè gia le ufe u kpebb ungye ye, ashina ’i ngbebb. ² Ukpor, bwo ’ì yi lè ’indee ná bendi abe be kpebb bengye ye be᷆ kwu faale akpela atanale, ki ngbebb le ungikye uyang-yang ù kwu lè uma ungye, ungingye uyang-yang ù kwu lè uma ukyebb. ³ Kì yi le ùkyēbb ù shi ha ungye-ma he ’ukwo ahwu ’ù yi kpa-kpa le ukyebb ù shi; ki shi le ungye ù shi ha ukyema he ’ukwo ahwu ’ù yi kpa-kpa le ungye ù shi. ⁴ Ungye ù yi lè ’uhwo-ma ye, ù yi he ’ubwo ukyema a; ùkyēbb u shi lè ’uhwo-ma ye, ù yi he ’ubwo ungye-ma a. ⁵ He ashin, ùkyēbb lè ungye bè tang ’igbor andēle gbam ye, kee-kee kwom le gbe befe a puu befee be bong le be sha āshi he ’anwaa ’unyong zangg le hè be bè kung ’ùnyong ’umen ana kong ha Unim. Nyong be mbee, be tem be ukem le hè Usetan ù ndè libwo shi ābe bè shi ’iban ye, likorye be kwa ’uhwo-bell mbee ye. ⁶ Gbe lè likong libee i, mi ke uten a le mà bee kpe-kpe ye. Ashi mi kong ’ì yi le gbe undi a bee, hà ’i ban ye. ⁷ Mi ufe a, ki ngbebb mi gbe undi uyang-yang u᷆ kwu faale libee ná mì yi i. Ukpor Unim a mbe undi uyang-yang atyetye; a ke undi-iso ikeb le ù shi ashin, u ke undi-iso ikeb le ù shi ashell. ⁸ Utebb anwun na᷅ mi kee le mi ka bengye-uhwuu lè abe bè wa yi lè libee ye: ki ngbebb le bè ngyor kwu faale libee ná mì yi i. ⁹ Ukpor gbe bè nya ngib lityam kwu faale libee mbee ye, bè gye ’ushu bee. Ashi le bè bee ’i ngbebb hwò a᷆shi le ’igyor libee ’ì kpe kung àtyám abell. ¹⁰ Bendi abe be bee mà, mi ka ābe uten le, ungye ù ban libee lè ha ukyema ye, ukyebb ù ndō ungye-ma ye. Uten anwun, mi-mi na᷅ mi tye-e ye, Atyetyan Ujeso Ukristi ugyang na᷅ a tye-e. Ukpor gbe ungye a ban libee lè ha ukyema, ù tem gye libee lisuso ye. Gbe ’ì yi ná a ye, hà ù tem lè bee lè ukyema. ¹² Utebb angwu mı᷆ ke bendi abe be teng i ù yi ugim ugi a, Atyetyan Ujeso Ukristi na᷅ a tyung mi ye. Mi de le, gbe undi Unim uyang-yang ù yi lè ungye angwu ù yi undi Unim a ye, u᷆ kam le u gya ’ushu bee lè he, ù ndó he ye. ¹³ Undi Unim uyang-yang angwu a bee lè ùkyēbb angwu ù yi undi Unim a ye, u᷆ kam le u gya ’ushu kpebb he, ù ban libee lè ha ùkyēbb ana ye. ¹⁴ Mi kong ashin likorye ùkyēbb angwu ù yi undi Unim a ye, Unim a kpe-e ná ùkyēbb ungingye angwu a bong ha ahe a. Ungye angwu ù yi undi Unim a ye, Unim a kpe-e ná ungye ungikye angwu a bong ha ahe a. Kì kwu ná a ye, hang bebwaa-bell bè yi ke Unim a ye, ukpor ’igyang-igyang, Unim a kpe bebwaa-bell ’itaa ana le bè yi ke-e ufe a. ¹⁵ Ukpor gbe undi angwu ù yi undi Unim a ye ana a kee le u ban libee, mà tyang he ù ban āngi. Gbe a ban āngi, angwu ù yi undi Unim, mà ungikye or, mà ungingye or, a ban uten Unim ye. Ki ngbebb Unim le lì kwu he ikwun. ¹⁶ Men bengye, mà well le pisoye bekyemen be ba fel lè likpan ’unyong gba he ’uhwo-men. Men bekyebb, mà well le pisoye bengye-men be be fel lè likpan ’unyong gbe he ’uhwo-men. ¹⁷ Uten angwu mi ke awu bendi abongale puu na᷅ ù yi i. Kiwom ashi ’ì yi ’indee-indee ’ì yi le, undi uyang-yang ù tan he ’ukwo ahwu Unim a ke-e ikeb le ù tan, ù ngyor kwu he libwo angi a ma yi nyong Unim a ma ko he le ù pwom Ujeso Ukristi. ¹⁸ Undi angwu a ma te᷆n ukpong Unim u hà ko he, ù kaa le he-e ù tem fel ’ididim ye. Undi angwu a ma wa ten he ’unyong ahwu Unim a ma ko he ye, ù tem ten ye. ¹⁹ Mà undi ù ten or, ù ten ye or, kì yi he ’ukpo ye. Ukpor ashi ’ì yi he ’ukpo ’ì yi le, bendi bè shi biwom abi Unim a de le bè shi. ²⁰ Undi uyang-yang ù ngyor kwu he libwo angi a ma yi nyong Unim a ma ko he le ù pwom Ujeso Ukristi. ²¹ Undi angwu a ma yi ùfeè a he ’unyong ahwu Unim a ma ko he, kì shi ban he ye. Mà na or, gbe a ndè libwo le u fem lè he abwo lifee, ù fem. ²² Ukpor mà ù kwu ufee a he ’unyong ahwu Unim a ma ko he or, ù ngye le Unim a pell he tyang abwo lè he ’iban, likorye a gwaa ipel ha Atyetyan Ujeso Ukristi. Ki mbee shi le undi angwu a ma yi ùfeè a ye he ’unyong ahwu Unim a ma ko he, a fel ùfeè Ujeso Ukristi. ²³ Men ma fel ke-e ufe a, likorye a pong amen lè anung ama. He ashin, mà tem yi ìfeè bendigye a ye, ma fel ìfeè Ujeso Ukristi a. ²⁴ Bebuye, mi da amen le mà ngyor kwu he libwo angi ma ma yi nyong Unim a ma ko amen nya a na mà yi gwaa ipel ha Unim i. ²⁵ Mî mbee kong gbe lè ikyebb-akpee lè bengingye abe bè wa yi lè libee ye. Atyetyan Ujeso Ukristi a wa ke-m uten gbe lè be ye, mi de men ugim ugi. Kì yi le mà gyo mi likorye gbe he inung Unim mì yi undi angwu mi kpè le mà fe lityam ha ami. ²⁶ Mi gim le ’i ngbebb le undi ù ngyor kwu he libwo angi ù yi. Mi kong ashin likorye bingie bikaa-bikaa bi fel he ati angi ’unyin i. ²⁷ Gbe undi a kpebb ungye mà, ù shī ndó he ye. Gbe undi a wa kpebb ungye mà ye, ù tem kpebb ye. ²⁸ Mà na mı᷆ kong ashina or, gbe undi a de le ufe u kpebb ungye, hà a shi ’iban a ye. Gbe unwan ungingye a de le u gya libee, hà ufe or a shi ’iban a ye. Ukpor bendi abe be bee mà, be kpa bingie he igye anyin. He ashin ’ì yi le mi a, hang mì tebb amen le mà geb lè abwo tye he bingie bimen i ye. ²⁹ Bebuye, ashi mı᷆ kong ’ì yi le, kunyong ahwu igye anyin ı᷆ mbee ’u teng gbungg ye. He ashin, kung lè ha ’unyin, bendi abe bè yi lè bengye bè fe Unim fel ná bè yi lè bengye ye nà. ³⁰ Bendi abe be᷆ kpe bingie bè fe Unim fel ná be kpa ’ingie a ye nà. Bendi abe be᷆ yal gor, bè fe Unim fel ná be yal gor ye nà. Bendi abe be᷆ shi ūshī, bè fe Unim ufe-ufe, bè kung àshì ndor he biwom bibell ye. ³¹ Undi uyang-yang angwu ù yi lè biwom abi u᷆ shi he igye anyin, ù kung lityam lima ndor he biwom bimen ana ye, likorye igye ná ì yi ’unyin i, baale ı᷆ mbee. ³² Kì yi-m le biwom bì ke men ’ingie ye. Undi angwu a kpebb ungye ye, ū kung ugim uma ndor he biwom abi Atyetyan Ujeso Ukristi a, ù yii gim ná ù shi nyin he. ³³ Ukpor undi angwu a kpebb ungye, ū kung ugim uma ndor he biwom abi igye anyin a, ù yii gim ná ù shi nyin ungye-ma. ³⁴ He ashin, a fel lè igim ifee ha ahe lityam. Ashi mı᷆ kong gbe lè bengikye, kì yi ke bengingye or titi. Ungingye or, unwan ungingye or angwu a gye libee ye, u kung ugim uma ndor he biwom abi Atyetyan Ujeso Ukristi a, ù yii gim ná ù kung lityam lima lè inyiahwo ima puu ke Unim. Ukpor angwu a gye libee, u fel kung ugim uma ndor he biwom abi igye anyin a, ù yii gim ná ù shi nyin ukyema. ³⁵ Mi kong biwom abin le mî kpell amen a, mi kaa le mî kwu amen he ikeb a ye. Mi kee amen le mà shi a᷆shi ’ì yi kpa-kpa le hè men mà fe Atyetyan Ujeso Ukristi lityam ken. ³⁶ He likong undi angwu u᷆ naà ungye, gbe a gim le likpe lima he ’uhwo unwaa angwu ungingye li ngbebb ye, u fel lè ’igyor unwan ungingye ana kangg le a ndè shi le ’ì yi kpe-kpe le bè bee, ù gye ’ushu kpebb he ná ’ì yi he ugim uma. Gbe a shi ná, hà a shi ’iban a ye. ³⁷ Ukpor gbe undi ugyang a gie ugim uma lè ’uhwo-ma, zam izam le ù tem kpebb unwaa angwu a naà ana ye, undi-iso na᷅ a kwu-e he ikeb ye, ugim anwuna a be lè he lityam lima ligyang, ù ngye dangg le ugim uma ù yi kpa-kpa. Gbe a kpebb he ye, hà a shi ’iban ye. ³⁸ Igie igi ì yi le, gbe undi a ndè gia le u kpebb unwaa angwu a naà, a shi ’i ngbebb, ukpor undi angwu a ndè gia le ù tem kpebb he ye, hà a shi ’i ngbebb hwò a᷆shi le ù kpebb he. ³⁹ Kì yi le ungye ù ngyor bee lè ukyema lè ’igbe ná ùkyēbb ù yi uwum. Ukpor gbe ùkyēbb a hwō, hà a fel lè libwo le u bee lè ukyebb ususo angwu a nyin he. Gbe angwu há ù yi undi Unim a, mà ’i mbee. ⁴⁰ Mà na or, he ugi ugim, u ngyor kwa faale libee ’i ngbebb he hwà a᷆shi le ù mbee lè bee lè ukyebb ususo. Mi gim le mi kong biwom abin ’itaa Ukatia Kunyong Unim a teng mi a.

¹ Mi kee le mi mbee kong gba lè biwom abi be kung shang ikem. Men ma de le bel puu lì yi lè lingye. Kì yi ’igyang a, ukpor ’itaa lingye ashina ’i sha undi u fel he idim. Ukpor benyin na᷅ be᷆ kpell undi u᷆ kaa kpè he ’ukwo Unim. ² Undi uyang-yang angwu u᷆ kung ’uhwo-ma le a ngye lingye, he ashin ’i tyung le ù yi lè lingye ligyang angyell ye. ³ Kiwom ashi ’ì yi ’indee-indee na᷅ ’ì yi le ’ì nyin undi lè Unim. Undi angwu ’i nyin he lè Unim na᷅ Unim u᷆ ngye-e ná unwaa-ma. ⁴ Gbe lè likong azele biwom abi be shang ikem, men ma de le ikem i naa he lizen ’iwom a ye. Ma mbee de le Unim ù kee-kee yi ken a. Bel li ngye le ashin ’ì yi ’igyang a. ⁵ Mà ’ì kwu lè biwom gbamm he ’usi or, he igye i or, abi bendi be᷆ fe bi fel ná bì yi Unim a nà, be mbee kung ābi bi fel besu bebell or, ⁶ ukpor bel ufe, li ngye le Unim ù kee-kee yi ken a. Unim umen ana na᷅ ù yi Atyetyan angwu a shi biwom puu, ufe umen na᷅ a mbe li le lì fe-e. Kì kee-kee yi lè undi ken a angwu ù yi Usu utyan; undi angwu há ù yi Ujeso Ukristi. Unim a shi biwom puu gbe he ’ubwo ’uma a; likpan lityan or li ba lè ha ufe a. ⁷ Bel li ngye le ikem i naa he lizen ’iwom a ye, ukpor ’ì yi lè bendi Unim besuso abe be ngye ashin ye. Bendi abe ’itaa ana abe leěti be maa shi ikem, kì yi abe ná biwom abina bì yi ke ikem a nà. Bwo bè yi igim ifee gbe lè bi, gbe be kung ābi zī, hà be shi ’iban. ⁸ Lizi na᷅ lı᷆ shi li lı᷆ fel benunung he ashi Unim ye. Gbe li zī lizi angi be shang ikem ye, ki do li ye; gbe li zī āngi, ki kpell li ye. ⁹ Kiwom ashi ’ì yi ’indee-indee ’ì yi le, men abe mà yi lè lingye le Unim a ke men ikeb le mà zī ’iwom ’iyang-yang, mà baa hè men mà shi a᷆be bè yi lè lingye Unim limen ana ye bè shi ’iban ye. ¹⁰ Gbe undi angwu ù yi lè lingye anyin ye a nda-a awo angwu wò yi lè ngi wo᷆ zī lizi he abee ūkèm, pisoye ’i sha he u la za᷆ ’itaa lizi ana titi. ¹¹ Kitaa ana na᷅ lingye ligang lı᷆ shi undi umen ana u᷆ tyang ’ukwo ahwu kpa-kpa. Unwanaa angwu Ujeso Ukristi a hwō ke-e, ki nya sha ná a, wo᷆ shi ’iwom ashi ’ı᷆ teng he gye he ’ukwo liketye? ¹² Gbe wo shi ná, hà wo shi ’iban ha bebwanaa, likorye wo shi ābe be shi ’iwom ashi be gim le ’ì yi kpa-kpa ye. He ashin, wo shi ha befe-befe a ye, wo shi ha Ujeso Ukristi or titi. ¹³ He atan-lengi anwun, mi ufe a, gbe ’ì yi le ’iwom ashi mı᷆ zī ’i sha unwandagi u mbwa he ’iban, mi tyang ’iwom ashi há azele, mî teng unwandagi gye he ’iban ye.

¹ Mi-gyang mi ngye le mì yi porr le mi sha ’iwom ’iyang-yang ’itaa mi kee. Men má ngye dangg le mì yi unwaa-isom Atyetyan Ujeso Ukristi angwu mi nde-e lè ashi agi a. Mi na᷅ mi be lè men hwaa lè Atyetyan Ujeso Ukristi. ² Mà bendi abe be teng bè swan le mì yi unwaa-isom Atyetyan a ye or, men ufe ma bong le mì yi ufe a. Men mà yi ’iwom ashi ’ı᷆ tyung le Unim a ko mi le mì kwu unwaa-isom Atyetyan. ³ Gbe undi a swan le mì yi unwaa-isom Atyetyan a ye, kitaa ana na᷅ mı᷆ fan he. ⁴ Ki nya ngbebb le bè ke-m ’iwom he aki angi mı᷆ shi ye a? ⁵ Kì nya yi lè ’iwom ashi ’ı᷆ kwuu mi ’ukwo le mì kpebb ungye, lî bel ha ahe lì tan mbee bipi bee? Kitaa ana na᷅ Ipita lè bebwaa-isom Atyetyan abe be teng lè bebwanam Atyetyan be᷆ shi. ⁶ He liwu bebwaa-isom Atyetyan, bel ha Ubanabas na᷅ ’ì yi le lì shi aki lè abwo atyan hà kwob ’uhwo-tyan a? ⁷ Kì yi lè undi ishogya angwu u᷆ kwob ’uhwo-ma ye. Kì yi lè undi útiā angwu u᷆ zī biwom utia uma ye ye. Ayang undi angwu u᷆ tyang bityuale, ukpor u ngwo idung ábı᷆ ábī ye? ⁸ Ashi mı᷆ kong i ’i be lè he ugim undigye a ye, Iten angi Unim a ke Umosis i kong ’itaa a ken. ⁹ Iten imen ana i de le: "Undi ù ndè le a kung undindi bua ’igundu he ungwu he ’unyong ahwu ’ı᷆ shi aki he utia ye." Ashi Unim a kong ana ’ì yi ke bigundu â? ¹⁰ Dia, ashi a kong ’ì yi ke li bel a. Be fee āshi ndor he ’uhwo ’utyan a. Bel li ngye ashin likorye undi utia angwu u᷆ teb abwom, ù teb lè lishi andorale he lifem angi u᷆ be kpē. Undi angwu u᷆ fem agbudyu, u fem lè lishi andorale he lifem angi u᷆ be kpe. ¹¹ Nya a na undi u᷆ kwan biwom ha ahe utia na᷅ bel lı᷆ bun igie Unim de men, igie Unim ana i fel lè lifem he likpan līme᷅n. Ki ngbebb kangg le men abe ma ndè lifem lè he aki atyan mà ke li ukwob. ¹² Gbe men ma bong le abi mà yi lè bi, ma ka bendi likor, ki ngbebb le mà shi li bel hwò ābe. Mà na lì yi lè ikeb le hang li bii amen ukwob he aki angi li shi or, li bii amen ye. Li bong le li kpa ’ingie ’iyang-yang lî nde le li sha ’iwom ashi ’ı᷆ kwom bendi ’ukwo le bè be bong ha Ujeso Ukristi ye. ¹³ Men má ngye le bendi abe be᷆ shi aki he Ushom Unim, be za᷆ lè há Ushom Unim a; bendi abe be waa ābe ndor le bè shang Unim, be za᷆ lè he biwom abi be᷆ shang Unim a. ¹⁴ Kì yi ’itaa a ken ke bendi abe be᷆ bun ’isom ’inunung gbe lè Ujeso. Atyetyan Ujeso Ukristi a ke uten le, bendi bè ke be ukwob he aki ’isom ’imen ana abunale angi be᷆ shi. ¹⁵ Mà na Atyetyan a ke uten le bè ke bendi abe be᷆ bun igie Unim ’iwom keè ná ’i fong ābe or, mi bii amen le mà ke-m ’iwom ngye ye. Ná mi fee i or, mi fee bii amen ’iwom a ye; mi hwa᷆ ’i ngbebb mi hwà ashina. Mi kee le mi bia ’uhwo-gi ye. ¹⁶ Mi kong ashin likorye, mà na mı᷆ bun ’isom ’ununung gbe lè Ujeso or, ashina ’i sha-m mi fel he idim ye. Mi-i sha aki angi Unim na᷅ a ke-m le mì shi a. Ki kwa ’ibibi ka-m, gbe mi bun ’isom ’inunung ’imen ana ye. ¹⁷ Kì be kwu le mi-gyang na᷅ mi gia kung le mi sha aki anyin, hang mi sha āngi ndor lishi ha lifem. Ukpor mi-gyang na᷅ mi gia aki anyin ke ’uhwo-gi ye, Unim na᷅ a kung āngi fe-m he ’ubwo le mì shi-e. ¹⁸ Kibang ashi ’ì hà yi lifem ligi? Mi kpa lifem gba he abunale ’isom ’inunung ’imen ana faale àbiālē ’iwom lè ha undi. Biwom abi mì yi lè ikeb le mi bii bendi le bè ke-m he aki anyin or, mi bii ābe ye. ¹⁹ Mì yi lè ’uhwo-gi, mì yi he ’ubwo undi ye. Mà na or, mi keb ’uhwo-gi fel he ’ubwo bendi puu, mî nde le mi ba lè bendi gbamm hwaa lè Atyetyan Ujeso Ukristi. ²⁰ Nyong mì yi ipel ha bendi Ijuus, mi fel sha likpe Ijuus, mî nde le mi ba lè Ijuus hwaa lè Ujeso Ukristi. Mà na Iten angi Unim a ma ke Umosis i bua mi ye or, nyong mì yi ipel ha bendi abe be᷆ ndor Iten imen ana, mi or titi mi fel ndor Iten imen ana, mî ndè le mi ba lè bendi bemen ana hwaa lè Ujeso Ukristi. ²¹ Nyong mì yi ipel ha bendi abe bè yi he ’ubwo Iten angi Unim a ma ke Umosis ye or, mi fel ’itaa ken ha abe, mî ndè le mi ba lè be hwaa lè Ujeso Ukristi. Ashin ’i ze le mì tem kung iten Unim he ’ukpo ye a ye, ukpor mì yi he ’ubwo uten Ujeso Ukristi a. ²² Nyong mì yi ipel ha bendi abe be ngye dangg ashi ’ì yi kpa-kpa ke be le bè shi ye or, mi fel ’itaa ken ha abe, mî ndè le mi sha ābe be fa Ujeso Ukristi kpa-kpa. Libwo liyang-yang angi undi ù yi, mi or mi kung ’uhwo-gi ndor he libwo limen ana, mî ndè le mi sha ’iwom ’iyang-yang ashi ’ı᷆ be lè bendi hwaa lè Unim he-e ù kpan ābe. ²³ Mi sha biwom abin puu he ’uhwo ’isom ’inunung gbe lè Ujeso, mî ndè le mi kwa lè abwo he binunung abi ’isom ’inunung ’imen ana ’ı᷆ be lè bi ke bendi. ²⁴ Men má ngye le nyong bendi be᷆ paa akye, bendi gbamm be buu, ukpor undi ken ufe-ufe na᷅ u᷆ kpē ’uke. He ashin, mà fe ikeb buu kangg hè men mà kpē ’uke ’umen ana. ²⁵ Undi angwu a kee le u paa akye, u kam ’uhwo-ma ngbebb-ngbebb. Bendi abe be᷆ paa akye be kam ’uhwo-bell buu hè be bè kpē ’uke. Kuke ’umen ahwu be᷆ ndor lishi ana ’ù yi ahwu ’u᷆ be ban, ukpor bel li kam ’uhwo-tyan buu lî be kpē ’uke ahwu ’u᷆ ban ye a, ku ngyor igye kpamm. ²⁶ Mi ufe, mi buu ndor àshì sii gya he ’ubi a. Mì yi ná undi angwu u᷆ geb gada-gada-gada a ye. ²⁷ Mi bong kpa bingie puu likorye mi kee le mi angwu mı᷆ bun ’isom ’inunung gbe lè Ujeso de bendi, mi-gyang mì tem be mbu gyan ye.

¹ Bebuye, mi kee amen le mà well likong betietyan abe be maa pwom Umosis he ’igbaa-libeb. Kibu ’i maa teng ābe, tyung ābe ’ukwo. Befe puu be ma tan he abee gyong umbwo ukaandi angwu be᷆ ko le Umbwo ubwaa. ² Nya he ’ibu lè umbwo bimen ana na᷅ be ma kib ābe he umbwo. Umbwo akibale anwuna na᷅ a tyung le be ma gwaa ipel ha Umosis. ³ Befe puu be ma zī lizi angi Unim a ma ke be he ’ukwo ahwu ’u᷆ kwu he ’uhwo. ⁴ Befe puu be ngwo umbwo angwu Unim a ma ke be he ’ukwo ahwu ’u᷆ kwu he ’uhwo. Umbwo umen be ma ngwo ana a ma be lè he utie-ukor angwu a maa tan utung ha abe. Kukor ’umen ana ’u ma yi Ujeso Ukristi a. ⁵ Mà na Unim a ma shi abin puu ke be or, kugii ’ubell gbamm ’u ma shi biwom abi bi shi Unim a ma fel he ingywo. He ashina, befe gbamm be ma hwō wu mbee bipi há he libeb. ⁶ Biwom abi bi shi fe be bi tuu li ’ubwo he ’utyung le lì kwu lè ’igyor bibibi ashele ná betietyan be maa shi ana ye. ⁷ Befe besuso be maa fa ikem nya a na be ma fee he ’ushia Unim. Be fee le: "Bendi be ma kwu ko shi ’ipam, zī azi, ngwo betyuo, be bo ’inaa ngyor angyor kel-kel fe ’atelakpa." Men ufe, mà fe ikem ye. ⁸ Bel lì gbe lè abwo atyan fe he akpela atanale ye. Besuso be maa fel tan akpela, he ashina, bendi asi lisi ’ugbe asi akie be ma hwō he liti ken. ⁹ Bel lì gil Unim ye. Besuso be ma gil Unim hè be bè ndè ashi u᷆ shi, he ashina Unim a ma som ìshiı᷅ ibibi, i ma lè ngmam gwu ābe. ¹⁰ Bel lì nem inem ye. Besuso be maa fel nem inem, he ashina, Unim a ma som udengell uma, a ma lè gwu ābe. ¹¹ Biwom abi bi ma shi fe betietyan ana, bì yi utebb a ke bendi. Be fee ābi ndor le hè lì bel abe lì so bewum he ’unyong ahwu igye i ndo mbee i, lì hwua ’iwom lè há a. ¹² He ashin, undi uyang-yang angwu a de le a naa genn, ù baa ’uhwo-ma he-e ù mbu nyong ugilale u᷆ be hwaa lè he ye. ¹³ Kì yi lè ugilale angwu a be hwaa lè men angwu bendi besuso be wa kpe-e ye ye. Unim u sha úkyébb uma, ù hà ndo bong le ugilale angwu a dyam hwò ikeb īme᷅n ù be hwaa lè men ye. U ka amen ikeb angi ma᷆ naa genn kpe-e, he ashin, a shi ’ukwo ke men ahwu ma᷆ fem lè há. ¹⁴ Bedim-gi lityam, he ’uhwo biwom abina mi da amen le mà fe abwo he ikem ashele ye. ¹⁵ Men mà yi bendi abe be ngye ’iwom a. Biwom abi mı᷆ kong i, mà shun ābi li-li hè ’ì nung amen le bì yi ’igyang a. ¹⁶ He ’unyong ahwu lı᷆ kpē agwo Unwaa Unim, li kung ugbaala ’utyuo, li pee Unim, li kung ngwo. Nya a na lı᷆ ngwo, li gwaa ipel ha Ujeso Ukristi gbe he anung ama. Nyong lı᷆ kung ibred bun, li pee Unim, li kung āngi zī. Nya a na lı᷆ zī, li gwaa ipel ha Ujeso Ukristi gbe he inyiahwo ima. ¹⁷ Mà na bel abe lı᷆ zī ibred ana li go or, ibred angi lı᷆ zī ì yi ’ikem ken a or, ashin ’i tyung le bel lì yi ūbībī ken. ¹⁸ Mà shi ugim gbe lè likpe ’ubong Ijuus; bendi abe be᷆ zī biwom abi be᷆ kung shang Unim, be gwaa ’uhwo-bell ipel ha Unim angwu bé shang he biwom bimen ana. ¹⁹ Ashin ’i hà tyung li le ana? Mi fel kong i le ikem or, abi be᷆ kung shang āngi or, bì yi ’iwom â? ²⁰ Dia, ukpor ashi mı᷆ kong ’ì yi le, nyong bendi ikem be᷆ shang āngi, be shang ka ikeb ibibi a, be shang ka Unim a ye. Mi kee amen le mà gwaa ’uhwo-men ha ikeb ibibi ye. ²¹ Undi ù hà ndo ngwa ugbaala Atyetyan, u tem lè ngwo ugbaala angwu ikeb ibibi ye. Undi ù hà ndo kpa agwo Unwaa Unim, u tem lè kpē ángi ikeb ibibi ye. ²² Bel lì fe ukaa kee le li sha Unim he-e ù fel he ingywo fe li a? Lì yi lè ikeb le li naa, gbe a ngywo a? ²³ Men ma da le ’ì yi lè ashi ’ı᷆ tel amen ye. Kì yi ná, ukpor biwom puu na᷅ bı᷆ kpell bendi ye. Kì yi ’igyang a le ’ì yi lè ashi ’ı᷆ tel amen ye, ukpor biwom puu na᷅ bı᷆ kpell bendi hè be bè kaā he likong Unim ye. ²⁴ He ’iwom ’iyang-yang ashi undi u᷆ shi, ù shi a᷆shi ’ì kpell unde-ma hwan, ù shi a᷆shi ’ì kpell he ufe-gyang ufe-ufe a ye. ²⁵ Kì tel amen le mà zī inyia angi be᷆ ndyebb zī he ’ate ye. Nyong ma zī āngi, ufung or ù waa amen ye. ²⁶ Mi kong ashin likorye be ma fee he ’ushia Unim le: "Igye ì yi he ’ubwo Unim a, biwom puu abi bì yi hen bi shi he ’ubwo Unim a." ²⁷ Gbe undi angwu ù yi undi Unim a ye a ko-a lizi, gbe wo bong te, wo zī lizi liyang-yang angi a shi-a. Ndè le wo kwu lè ufung awaale ye. ²⁸ Ukpor, gbe undi a shi-a wo ngye le inyia angi be shi-a lizi ì yi angi be shang ukem a, wo shī zī ye, mà na wo-gyang wo ngye le ’i tel ye or. He ’uhwo undi angwu a da-a, wo shī zī ye, likorye ufe u gim le ’ì yi liketye ka-a le wò zi. Pisoye undi-iso u bii le: "Ki shi ná a, kiwom ’i tel mi le bwo undi-iso a de le ’ì yi liketye á? ³⁰ Gbe mı᷆ pee Unim he ashi mı᷆ zī, ki shi ná a, bendi be᷆ de le mi shi ’iban a, gbé mı᷆ zī àshi mi pee Unim he ’uhwo ashi ána᷆ á?" ³¹ Mi fan angwu há le ’i ngbebb, ukpor ù well le, kitaa ’iwom ’iyang-yang ashi u᷆ zī lè ’itaa ’iwom ’iyang-yang ashi u᷆ ngwo lè ’iwom ’iyang-yang ashi u᷆ shi, ù shi āshi he ’ukwo ahwu ’ı᷆ be lè ipee ke Unim. ³² Ndè le wo shi ’iwom ashi ’ı᷆ be lè ingywo ke undi ye, mà Ijuus or, Ijuus a ye or, liwu bendi abongale or. ³³ Kitaa ana na᷅ mi or mi kaà le mî shi nyin undi uyang-yang he ’iwom ’iyang-yang ashi mı᷆ shi. Mi sha a᷆shi ’ı᷆ kpell i-mi a ye, mi sha biwom he ’ukwo ahwu ’u᷆ kpell bendi gbamm hè be bè fel lè likpan ’unyong.

¹ Men mà pwom abee agi nya a na mi pwom abee Ujeso Ukristi. ² Mi pee amen kangg likorye ma well igie igi he ’iwom ’iyang-yang ashi ma᷆ shi, ma mbee shi ihwuale angi mi ma hwua amen. ³ Ukpor, mi kee le ’ì nung amen le, Ujeso Ukristi na᷅ ù yi lìshī ungikye uyang-yang, ùkyēbb u shi lìshī ungingye uyang-yang, Unim u shi lìshī Ujeso Ukristi. ⁴ Nyong ungikye u᷆ kong ha Unim or, nyong u᷆ kpē ’isom lè ha Unim kong or, gbe a shī ’iwom he líshī, hà a ke lìshī lima ife ye. ⁵ Ukpor bengingye befe, ungingye uyang-yang angwu u᷆ kong ha Unim or, nyong u᷆ kpē ’isom lè ha Unim kong or, gbe a shī ’iwom he líshī lima ye, hà a ke lìshī lima ife ye. Gbe a shī ’iwom he líshī ye, kì yi ’itaa ken ha ahwaāle lishi. ⁶ Gbe ungingye a shī ’iwom he líshī lima ye, ki ban a ná hang a kwan lishi á. Bwo li ngye le ’ì yi ibia a ke ungingye gbe a gem igil ima or, gbe a hwaā āngi or, he ashin ù shī ’iwom he líshī lima. ⁷ Atan-lengi angwu ’ì yi le ungikye ù shī ’iwom he líshī ye ù yi le, Unim a mbe-e bi ’uhwo-ma, u mbee tyung ifem Unim, ukpor ungingye ufe u tyung ifem ukyema a. ⁸ Bel li ngye le Unim a ma kung ukeb ungikye a mbe ungingye, a ma kung ukeb ungingye a mbe ungikye ye. ⁹ Unim a ma mbe ungikye a ke ungingye ye, a ma mbe ungingye a ke ungikye. ¹⁰ Ashin na᷅ ’i tan lè shī ungingye ù shī ’iwom he líshī hè ’ì tyung le a ke ukyema ife, hè idengell Unim or ì ngywo ye. ¹¹ Mà na ’ì yi ’itaa ana or, bendi abe be bong ha Atyetyan Ujeso bè ngye le, faale ungingye, ungikye u kwa ye, faale ungikye, ungingye u kwa ye. ¹² Nya a na leěti Unim a ma kung ukeb ungikye a mbe ungingye na᷅ ’unyin i ungingye u᷆ hwan ungikye. Ukpor lí ngye le Unim na᷅ a mbe bendi lè biwom puu. ¹³ Men-agyang mà ndè ashin li-li hè men mà ndè, ki nya ngbebb le ungingye ù kong ha Unim faale ’iwom ashēle he líshī bee? ¹⁴ Undi uyang-yang a ngye dangg le, kì yi ibia a ke ungikye angwu a ndor igil. ¹⁵ Ukpor bengingye befe, igil andorale ì yi abe idem a, likorye Unim a ke be igil le hè be bè kwu lìshī litaa ye a. ¹⁶ Gbe ’ì yi lè undi angwu a fe ifung gbe lè abin, undi angwu há ù ngye le bel or, awu bendi Unim he ’iteng ’iyang-yang or, li bong le undi uyang-uyang ù shi abin he ’ukwo ’ususo fem ahwun tyang ye. ¹⁷ Kì yi lè likong lisuso angi mi kee le mi ka amen utebb gba lè ngi. He likong limen i mi pee amen ye, likorye nyong ma᷆ kpee liwu le ma fa Unim, ma sha akpe angi a᷆ ke ukpell a ye, ma sha a᷆ngi a᷆ do amen ido a. ¹⁸ Ukpi-ikwu linaa lì yi le nyong ma᷆ kpee liwu, mi gyo le ma tang he abwo fel akwu-akwu. Mi gim le pisoye ’ì yi ’igyang a. ¹⁹ Kì yi lè atangale he abwo he liwu līme᷅n hè bendi bè ngye àbe be᷆ fe Ujeso Ukristi lityam ken. ²⁰ Nyong ma᷆ gbong le hè men mà zī lizi ukem, kukwo ahwu ma᷆ shi, ma kpā agwo Unwaa Unim a ye. ²¹ Mi kong ashin likorye, nyong ma᷆ zī lizi, undi-undi u za᷆ lima, bendi-iso bè yi he ibwom, besuso, itung i ndo ābe. ²² Aye! Mà yi lè ishom angi mà kwu zī lizi, ngwo ’utyuo ye a ukpor? Kibang a, ma᷆ bia bendi Unim, ma be lè ishwia ke a᷆be bè yi lè ’iwom ye? Mì de men he ’imen i le ana a? Mì nya pee amen he ashi ma shi ana a? Kpaa ye, mì hà ndo pee amen ye gbangg. ²³ Leěti Unim a ma tyung mi ’iwom ashi mi or mi ndo hwua amen i. Kiwom ashi há ’ì yi le, he ’usu ahwu be ma ndyebb Atyetyan Ujeso zi, Atyetyan a ma kung ibred, kwu he ’ubwo, ²⁴ u pee Unim. A hà kung āngi bun kung de le: "Ashin na᷅ ’ì yi agwo agi angi mi ke he ’uhwo ’umen. Mà gye ’ushu shi ashin le hè men mà well gbe lè mi." ²⁵ Be zī ’i mbee puu, nya ’itaa ken, a mbee kung ugbaala ’utyuo kwu he ’ubwo de le: "Kutyuo ahwun ’u tyung ’iwom ’ifufe ashi Unim a kong ndor le u sha ka amen gba he anung agi. Mà gye ’ushu shi ashin ’unyong ’uyang-yang ma᷆ ngwo āhwu mâ well gbe lè mi." ²⁶ Kife na᷅ ’i tan lè shi ’unyong ’uyang-yang ma᷆ zī ibred ’itel i, ma ngwo ’utyuo ’itel i, kung lè ha ’unyin i kpamm Atyetyan Ujeso u gbe tem be, mā tyung gboo le a hwō ke li. ²⁷ He ashin, undi uyang-yang angwu a zī ibred imen i, u ngwo ’utyuo ’umen i he ’ukwo ahwu kpa-kpa a ye, a bia inyiahwo Atyetyan Ujeso lè anung ama. ²⁸ He ashin undi uyang-yang ù kpi ’ikwu shun ’uhwo-ma ndè le ù yi kpa-kpa he ashi Unim, saa u hà zī ibred, u ngwo ’utyuo. ²⁹ Undi uyang-yang angwu a zī ibred anyin, u ngwo ’utyuo ahwun faale afaale a kpe bi ná inyiahwo Atyetyan Ujeso, u ba lè ushe Unim a swa ’uhwo-ma he líshī. ³⁰ Ashin na᷅ ’i tan lè shi bendi gbamm he liwu līme᷅n bè tem yi kang-kang ye, besuso be shi go-go ye, besuso be hwō. ³¹ Ukpor gbe li shun ’uhwo-tyan ngbebb-ngbebb, Unim u ka li ’ingie ye. ³² Atan-lengi angwu u᷆ ke li ’ingie ù yi le he-e ù tebb li le he ’unyong ahwu u᷆ be tang libi ke bendi abe bè yi ke igye anyin, hè li bel lì zī likpong. ³³ Bebuye, ashina na᷅ ’i tan lè shi mi de men le nyong ma᷆ gbong le ma za᷆ lizi ukem, mà kwu nyong bende. ³⁴ Gbe itung ı᷆ ndo undi, ù zī lizi lè he ūshù mà ukpong u hà be, le hè men mà be ukem be shi biwom he ’ukwo ahwu ’u᷆ be be lè ushe Unim so ’uhwo-men he lishi ye. Gbe lè biwom abi bi teng, nyong mı᷆ be be ha amen há, mà mi ka amen utebb gba lè bi.

¹ Bebuye, beke aki ashele abe Ukatia Kunyong Unim u᷆ ke bendi, mi kee le bè nung amen nwongg. ² Men má ngye dangg le leěti nyong ma ma wa bong ha Ujeso Ukristi ye, be maa mbeb amen fel tan lè men som-som he afele ikem, ki shi le ikem ì yi iwum ye. ³ He ashin mi kee le ’ì nung amen nwongg le gbe Ukatia Kunyong Unim na᷅ a ke undi ikeb le ù kong, ù hà ndo da le, "Kì ban Ujeso shiee!" ye. Ki shi lè undi angwu u᷆ de le, "Ujeso ù yi Atyetyan a," faale afaale Ukatia Kunyong Unim na᷅ a teng he ye. ⁴ Beke aki ashele abe Ukatia Kunyong Unim u᷆ ke bendi bè yi atyetye-atyetye, ukpor ufe-gyang ù kee-kee yi a ken a. ⁵ Aki angi Atyetyan Ujeso a ke bendi le bè shi à yi bitaa atyetye-atyetye, ukpor ufe-gyang ù kee-kee yi a ken a. ⁶ Bendi be sha aki ana he akwo atyetye-atyetye, ukpor Unim angwu a ke be ikeb angi be᷆ shi āngi ù kee-kee yi a ken a. ⁷ Ukatia Kunyong Unim u fem biwom tyung undi-undi, u ke be ikeb angi be᷆ shi biwom abi há he ’ukwo ahwu ’ı᷆ kpell bendi Unim puu. ⁸ Ukatia Kunyong Unim u ka bendi besuso ’uke ahwu be᷆ kong biwom gbe he lishi abyele Unim. Ufe umen a ken na᷅ u᷆ mbee ke bendi besuso ’uke ahwu be᷆ kong biwom abi u᷆ fem tyung ābe. ⁹ Ukatia Kunyong Unim umen a ken na᷅ u᷆ ke bendi besuso ikeb angi be᷆ bong le Unim u sha bitaa biwom bisuso. Ufe umen a ken u᷆ ke bendi besuso ikeb angi be᷆ mbee angmam. ¹⁰ U ka bendi besuso ikeb angi be᷆ shi bikwele-uhwo, u ke besuso ikeb angi be᷆ kpe ’isom lè ha Unim kong, u ke besuso ikeb angi be᷆ ndè shob biwom abi bı᷆ be lè ha Ukatia Kunyong Unim lè abi bı᷆ be lè ha ufe a ye, u ke besuso ikeb angi be᷆ kong igie abong angi be hwua ihwua ye, u ke besuso ikeb angi be᷆ bun likpe igie imen ana kong. ¹¹ Ukatia Kunyong Unim a ken na᷅ u᷆ ke undi-undi ikeb angi u᷆ shi aki ana, u ke undi-undi ’iwom atyetye ashi u᷆ shi, u ka ’itaa ’i ngbebb he ufe-gyang a. ¹² Men ma ngye le he inyiahwo undigye, inyiahwo ì yi ken a, ukpor ì yi lè agwo gbamm. Mà na agwo à yi gbamm, a gwaa fel ’iwom ken a. Kitaa ana na᷅ Ujeso Ukristi or ù yi. ¹³ Bel puu, mà Ijuus or, mà Ijuus a ye or, mà ifee or, mà bebwaa or, nyong li gwaa ipel ha Ujeso Ukristi gbe ha Ukatia Kunyong Unim, li fel inyiahwo ken likorye li kpe Ukatia Kunyong Unim ken. ¹⁴ He inyiahwo undigye, kì kee-kee yi lè ligwo ken a ye, kì yi lè agwo gbamm. ¹⁵ Kì be kwu le ’ubee undi ú nya da le, le bwo ’ufe ’ù yi ’ubwo a ye, kù tem yi ligwo he inyiahwo undi a ye. Mà ’ù kong ná or, kù so ligwo he inyiahwo undigye a. ¹⁶ Kì be kwu le ’utyung ú nya da le, le bwo ’ufe ’ù yi utong-shi a ye, kù tem yi ligwo he inyiahwo undigye a ye. Mà ’ù kong ná or, kù so ligwo he inyiahwo undigye a. ¹⁷ Kì be kwu le undigye ubo-ubo ù kee-kee yi utong-shi ufe-ufe a, hang u sha ná a, u᷆ gyo igyo? Kì be kwu le ù kee-kee yi ’utyung ’ufe-ufe a, hang u sha ná a, u᷆ nung inung? ¹⁸ Ukpor nya a na ’ì yi, Unim a fe ligwo liyang-yang he inyiahwo undigye he ’iteng ashi ’i ngbebb he a. ¹⁹ Kì be kwu le ligwo lì kee-kee yi ken a, hang ’ì yi lè inyiahwo ye. ²⁰ Nya a na ’ì yi, kì kee-kee yi lè ligwo ken a ye, ukpor agwo à yi bitaa atyetye-atyetye angi a gwaa he ’iteng ken, a hà bel fel inyiahwo undigye. ²¹ He ashina, kì yi lè ’ukwo ahwu utong-shi u᷆ de ’ubwo le, ki gbee he lè hwu ye ye. Lìshī or, kì yi lè ’ukwo ahwu lı᷆ de ’ubee le, ki gbee āngi lè hwu ye ye. ²² He inyiahwo undigye, agwo angi à yi li ná à yi kang-kang ná bende-bell ye, afe na᷅ lı᷆ kwu faale ngi mbee ye. ²³ Agwo angi lı᷆ gim le à yi he ’ukpo ye, afe na᷅ lı᷆ kam āngi hwò a᷆ngi a teng. Agwo angi lı᷆ kee le bendi bè ndè ngi ye, afe na᷅ lı᷆ shī ndyell āngi kangg. ²⁴ Ukpor agwo angi ishwia ı᷆ shi li lè ngi ye, li tyang āngi. Unim a shi inyiahwo he ’ukwo ahwu ’u᷆ shi li lı᷆ ke agwo angi à yi lè ife ye ife hwò a᷆ngi a teng. ²⁵ A shi ashin le hè agwo à shi linaa ha bende ye, ukpor hè ligwo liyang-yang lì ndè gbe lè bende bizang-bizang. ²⁶ Gbe ligwo ken lı᷆ kpe ’ingie, angi a teng puu a kpe ’ingie utung ha angi; gbe undi a fem ligwo ken, angi a teng a yal gor utung ha angi. ²⁷ Men ufe, mà yi inyiahwo Ujeso Ukristi a; undi-undi ù yi ligwo nya he inyiahwo ima imen ana. ²⁸ He liwu bendi abongale, Unim a waa bendi abe be᷆ shi aki bitaa atyetye-atyetye. A kpi ’ikwu waa bendi abe be᷆ kwu bebwaa-isom Ujeso Ukristi. Utepwom, u waa àbe be᷆ kpe ’isom lè ha ufe-gyang kong. He lekie, u waa àbe be᷆ hwua bendi igie ima. A waa besuso ke be ’uke ahwu be᷆ shi bikwele-uhwo, u ke besuso ’uke ahwu be᷆ mbee angmam, u ke besuso ’uke ahwu be᷆ kpell bendi, u waa besuso ke be ’uke ahwu be᷆ kam liwu, u mbee ke besuso ’uke ahwu be᷆ kong igie abong angi be hwua ihwua ye. ²⁹ Bendi puu na᷅ bè yi bebwaa-isom Ujeso Ukristi ye. Bendi puu na᷅ be᷆ kpe ’isom lè ha Unim kong ye. Bendi puu na᷅ be᷆ hwua bendi igie Unim ye. Bendi puu na᷅ be᷆ shi bikwele-uhwo ye. ³⁰ Bendi puu na᷅ be᷆ mbee angmam ye. Bendi puu na᷅ be᷆ kong igie abong angi be hwua ihwua ye ye. Bendi puu na᷅ be᷆ bun likpe igie abong ana kong ye. ³¹ Men ufe, mà ndor lishi ha Unim le ù ke men beke aki ashele abe bè yi ’indee-indee hwò puu. Kiwom ashi ’i dyam hwò biwom puu ashi mi ndo kong gbe lè shi, kì yi benyin.

¹ Mà mì yi lè ikeb le mi kong igie abong puu lè angi idengell Unim or, ukpor gbe mì yi lè benyin ye, hà mi kpa ’ihwee ná ’igbang-gbang ’itaa lè undelibi a. ² Mà mì kwu lè ikeb le mi kpa ’isom lè ha Unim kong, mà mì ngye biwom puu lè ugim Unim puu, mì kwu lè ’itaa abongale ashi le mi da ukwell le ù kwuo, u kwuo or, ukpor gbe mì yi lè benyin ye, hà mì yi lè lifem ke bendi ye. ³ Mà mì kung biwom bigi puu hwua ke bendi-likaa, mà mi kung inyiahwo igi ke le bè ting shī ’inde or, ukpor gbe mì yi lè benyin ye, ki kwa lè lifem ka-m ye. ⁴ Benyin be sha undi u mbwa ’uhwo, u ngbebb inung, u ban lityam fe ’iwom undi ye, u pwom ungwu ye, u dim idim ye. ⁵ Benyin be sha undi u sha likpe liketye ye, u gim ’uhwo-ma ufe-ufe ye, u gbel ’agbugbel ye, u fe ’ibibi he lityam ha undi ye. ⁶ Benyin be sha undi u gor fa bibibi abi bendi be᷆ shi ye, be sha undi u gor fa binunung abi bendi be᷆ shi a. ⁷ Benyin be sha undi u kpam àshì wu ’iban ashi bendi be᷆ shi fe-e mbee ’unyong, u fe lityam ha bendi mbee ’unyong, u ndor lishi binunung mbee ’unyong, u naa genn he biwom puu mbee ’unyong. ⁸ Benyin bè yi ngyor igye kpamm. Ukpor abe be᷆ kpe ’isom lè ha Unim kong befe, kunyong ’u ba lè há, ahwu aki abell a᷆ mbee. Abe Ukatia Kunyong Unim a ke be ikeb le bè kong igie abong angi be hwua ye, kunyong ’u ba àhwu ashin or ’ı᷆ be mbee. Kitaa lingye angi lì yi lè ngi ’unyin i, kunyong ’u ba àhwu life or lı᷆ be mbee. ⁹ Biwom abina bi ba mbee likorye ’anaa-anaa i, li wa ngye biwom puu ye, Unim u wa de li biwom puu le lì kong de bendi ye. ¹⁰ Nya he liti limen ana nyong Unim u᷆ shi biwom puu bı᷆ sho yilididi, bigem abi li ngye ’unyin i bi mbee. ¹¹ Leěti nyong mi ma so unwaasun, mi maa kong likong ná unwaasun, mi gim ugim ná unwaasun, mi ndè ’īndè ná unwaasun. Ukpor nyong mi kaa kpè, mi mbee lè abi ’isun ana. ¹² Kanaa-anaa i, kukwo ahwu lı᷆ nde biwom ’ù yi ná lı᷆ nde he ’inde-ushu ashi ’ì yi ndib-ndib nà. Ukpor há he ’unyong ’umen ana li ba nda biwom puu gboo. Kanaa-anaa i, mi wa ngye biwom puu ye, ukpor há he ’unyong ’umen ana mi ba ngya biwom puu yilididi nya a na Unim a ngye-m yilididi. ¹³ Kì yi lè biwom bikie abi bı᷆ ngyor igye, bì yi abongale lè lishi andorale lè benyin. He biwom bikie i, benyin be dyam hwò puu.

¹ He ashina, mà kaa kangg hè men mà kwu lè benyin ha bendi, ma mbee kwu lè ’igyor kangg le Ukatia Kunyong Unim ù ke men ikeb angi ma᷆ shi biwom abi bı᷆ kpell liwu bendi abongale. Kiwom ashi ’i dyam hwò na᷅ ’ì yi le mà kwu lè ’igyor hè men mà kpe ’isom lè ha Unim kong. ² Mi kong ashin likorye undi angwu Ukatia Kunyong Unim a ke-e ikeb u᷆ kong igie abong angi a hwua āngi ye, u kong ha Unim a, u kong ha bendigye a ye, likorye igie angi u᷆ kong i nung ābe ye. U kong biwom ’undyell Unim gba he ikeb Ukatia Kunyong Unim a. ³ Ukpor undi angwu u᷆ kpe ’isom lè ha Unim kong, ufe u kong ha bendigye a, hè ’ì kpell ābe, ki fe be ingie, shi ābe bè naa genn. ⁴ Undi angwu u᷆ kong igie abong angi a hwua āngi ye, ki kpell he ufe-gyang a, ukpor undi angwu u᷆ kpe ’isom lè ha Unim bun kong, ki kpell liwu bendi abongale puu. ⁵ Ki ngbebb mi le gbe he ikeb Ukatia Kunyong Unim mà kong igie abong angi ma hwua āngi ye, ukpor ’i mbee ngbebb mi fel hwò le mà kpe ’isom lè ha Unim bun kong. Undi angwu u᷆ kpe ’isom lè ha Unim bun kong ù yi lè lifem ke bendi hwò angwu u᷆ kong igie abong angi a hwua āngi ye, gbe ’ì yi lè undi angwu u᷆ bun likpe igie ima ana kong ye, le hè ’ì kpell liwu bendi abongale. ⁶ Bebuye, gbe mi nya be ha amen há, mi kong he igie angi ma ngye ye ufe-ufe a, igie igi i nya kpell amen a? I kee-kee kpell amen gbe mi mbee de men ’iwom ashi Unim a fem tyung mi, mi kpe ’isom lè ha Unim bun de men, mi mbee hwua amen igie Unim hè men mà ngye-e gye he ’ushu a. ⁷ Ndor li ndè, biwom ná upipi lè ’igbelemu abi bì yi biwum ye i, gbe undi a gwee he kong likpe ye, u kem āshi kong likpe ye, ki nya sha ná a, undi u᷆ ngye likpe ábi? ⁸ Usom or titi, gbe be gwee he kong likpe ye, undi u nya sha ná a, u᷆ ngye àshi u᷆ kam? ⁹ Kitaa ’imen ana na᷅ ’ì yi men or titi. Gbe ma kong igie abong angi ma hwua ye, ma kong igie angi ı᷆ nung bendi a ye, ki nya sha ná a, undi u᷆ ngye likpe igie imen ana? Ma kong wa ’idideng a. ¹⁰ Igie abong he igye i, i go gbamm, ukpor iyang-yang ì yi lè likpe. ¹¹ Gbe undi a kong abong angi mi ngye ngi ye, mi kwa ugaandi a ka he, ufe u kwu ugaandi a ke-m. ¹² Kimen i ’ì yi ke men or titi. Bwo mà yi lè ’igyor le Ukatia Kunyong Unim ù ke men ikeb angi ma᷆ shi biwom, mà kaa kangg kung āngi shi biwom abi bı᷆ kpell liwu bendi abongale. ¹³ He ashina, undi uyang-yang angwu u᷆ kong igie angi Ukatia Kunyong Unim a ke-e le ù kong, ù bii Unim le ù ke-e ikeb angi u᷆ bun likpe igie ana kong. ¹⁴ Mi kong ashin likorye gbe mi kong igie abong angi mi hwua ye, Ukatia Kunyong Unim na᷅ u᷆ teng ’abell ’agi, ashi mı᷆ kong ’i nung mi mi-gyang or ye. ¹⁵ Fe ’ibang ashi ’i hà ngbebb le mì shi? Ashi ’ì yi le mì shi ’ì yi le, mì kong ha Unim he ikeb Ukatia Kunyong uma, mi mbee kong ha Unim he igie angi ı᷆ nung mi. Mi gyam ’ugyam pee Unim he ikeb Ukatia Kunyong Unim, mi mbee gyam he igie angi ı᷆ nung mi. ¹⁶ Gbe ná a ye, gbe undi a pee Unim he igie angi Ukatia Kunyong Unim u᷆ ke-e, ki nya sha ná a, undi angwu akongale he ikeb Ukatia Kunyong Unim ’ı᷆ nung he ye u bong le "amen" he ipee ima? Igie angi u᷆ kong i nung he ye. ¹⁷ Pisoye ipee ima i ngbebb kangg, ukpor i kpell undi angyell ye. ¹⁸ Mi pee Unim le mi kong he igie ifufe he ikeb Ukatia Kunyong Unim hwà amen puu. ¹⁹ Mà na or, he liwu bendi abongale, ki ngbebb mi le mì kong akpe adyong he igie angi ı᷆ nung bendi hwò a᷆shi le mì kong akpe asisilisi asisilisi he igie angi ı᷆ nung bendi ye. ²⁰ Bebuye, mà shi ugim ná bebwani a ye. Gbe lè ’iban ashele, mà kwu ná bebwaa abwo atong, ukpor he ugim agimale ufe, mà gim ná bendi abe be kaa kpè. ²¹ He ’ushia Unim be fee le: "Unim a de le, mi ba kong ha bendi begi gba ha bendi ugugem abe be᷆ kong igie atyetye-atyetye. Mà na or, be ba gyo mi ye." ²² Ashin ’i tyung le nyong bendi be᷆ kong he igie isuso he ikeb Ukatia Kunyong Unim, kì yi ’iwom ashi ’i tyung a᷆be be bong ha Ujeso Ukristi ye le Unim na᷅ u᷆ kong a. Kì yi ’iwom ashi ’i tyung a᷆be be bong ha Ujeso Ukristi a ye. Ukpor nyong bendi be᷆ kpe ’isom lè ha Unim bun kong, ashin ’ì yi he ’uhwo abe be bong ha Ujeso Ukristi a, kì yi he ’uhwo abe be bong ha ahe ye a ye. ²³ Nyong bendi abongale puu be᷆ kpee liwu, gbe befe puu be kong he igie atyetye-atyetye he ikeb Ukatia Kunyong Unim, gbe bendi abe be ngye biwom abin ye lè abe be bong ha Ujeso Ukristi ye, be be há he liwu libell, be da le: "Mā ngyor lityuo!" ²⁴ Ukpor gbe bendi puu be kpe ’isom lè ha Unim bun kong, gbe bendi abe be ngye biwom abin ye lè abe be bong ha Ujeso Ukristi ye, be be há he liwu libell, igie ibell i sha ābe undi-undi u shun lityam lima, u nde shob ’iban ’ima. ²⁵ Igie ibell i tyung he biwom ’undyell abi bì yi ha ahe lityam. He ashina, u keb he itang fe Unim, u kong le: "Kigyang-igyang Unim ù yi he liwu līme᷅n." ²⁶ Mà dang ’utyung gyo utebb angwu mi kee le mi ka amen. Nyong ma᷆ kpee liwu, undi-iso ù kwu lè ’ugyam ahwu ma᷆ gyam, undi-iso u hwua amen igie Unim, undi-iso u kong a᷆shi Unim a fem tyung he, undi-iso u kong ’isom he igie isuso he ikeb Ukatia Kunyong Unim, undi-iso u bun likpe ’isom ana kong. Mà shi ’iwom ’iyang-yang he ’ukwo ahwu ’ı᷆ kpell liwu bendi abongale lì kaa he likong Unim. ²⁷ Gbe bendi be᷆ kong he igie isuso he ikeb Ukatia Kunyong Unim, bè kong bendi befee ufe-ufe a, ukpor gbe be gbe gyong befee, bè kwom bekie. Bè kong he ’uken-uken, undi u bun kong likpe áshi befe be kong ana. ²⁸ Ukpor gbe ’ì yi lè bendi nya liwu abe Ukatia Kunyong Unim a ke be ikeb angi be᷆ bun likpe igie ana kong ye, hà befe abe be᷆ kong he igie isuso he ikeb Ukatia Kunyong Unim ana bè shib ungwu, bè kong ha Unim he lityam. ²⁹ Bendi abe be᷆ kpe ’isom lè ha Unim kong or, bè kong bendi befee a, gbe be gbe gyong befee, bè kwom bekie. Bendi abe be teng bè shun ’isom ana li-li ndè. ³⁰ Gbe undi ù yi naa ’inaa u᷆ kpe ’isom lè ha Unim kong, gbe Unim a tyung undi angwu ù yi kwu ko ’iwom le ù kong, angwu ù yi naa ’inaa ù kwu ko. ³¹ Kì yi le mà kpe ’isom lè ha Unim kong he ’uken-uken, le hè undi uyang-yang ù hwua kpe ’iwom, u kpe ingie. ³² Bendi abe Ukatia Kunyong Unim a ke be ikeb angi be᷆ kpe ’isom lè ha Unim kong, bè yi lè ikeb le be teng ikeb anyina, ³³ likorye kihwee tem-tem ’i ngbebb Unim ye, ukpor a kee li le lì kwu ikwun-ikwun. He awu bendi Unim puu, nyong ma᷆ kpee liwu, ³⁴ bengingye bè shib ungwu. Ki tel le bè kong likong, be ke ife nya a na be fee he ’ushia Iten. ³⁵ Gbe ’ì yi lè ’iwom ashi be kee le be ngya, bè kwu kpamm lè bii bekyebell he ushu. Kì yi ’iwom ishwia a ke bengingye le bè kong likong he liwu bendi abongale. ³⁶ A!A! Ma gim le igie Unim i kpi lè ha amen há a? Men ufe-ufe na᷅ ma gyo igie Unim a? Mà de-m! ³⁷ Gbe ’ì yi lè undi angwu u᷆ ndè ’uhwo-ma le ù yi lè ikeb angi u᷆ kpe ’isom lè ha Unim kong, pisoye u mbee gim le Ukatia Kunyong Unim a ke-e beke aki ashele abe be teng, kì yi le ù ndè shob le biwom abi mi fee hwaa lè men i, Atyetyan Ujeso Ukristi ugyang na᷅ a kong ābi. ³⁸ Gbe ’ì yi lè undi angwu a kpe ashin ye, hà undi ù kpe-e ye. ³⁹ Ashi mı᷆ de men ’ì yi le, mà kwu lè ’igyor kangg le ma kpa ’isom lè ha Unim kong, ukpor mà kwom undi ’ukwo he akongale he igie isuso he ikeb Ukatia Kunyong Unim ye. ⁴⁰ Mà shi biwom puu he ’ukwo kpa-kpa, ma shi ābi he ’uken-uken.

¹ Bebuye, mi well amen ’isom ’inunung gbe lè Ujeso Ukristi ashi leěti mi ma bun de men, ashi men ma bong kpe shi, ma shi āshi lityam ken. ² Gbe he ’isom ’imen ana na᷅ Unim u᷆ kpan amen, gbe ma kung lityam ken gbe ’ushu shi a᷆shi mi bun de men, gbe ’ì yi le ma bong ha ’isom ’imen ana ’igyang-igyang a. ³ Mi ma kung biwom abi Atyetyan Ujeso Ukristi a ma tyung mi abi bì yi ’indee-indee hwò ’iyang-yang fe men he ’ubwo. Kife na᷅ ’ì yi le Ujeso Ukristi a hwō le he-e ù kpan li lè he biban bityan nya a na leěti be ma fee le u ba sha. ⁴ Nyong a ma hwō, be ma ngi-e, he liti lekie Unim a ma wum he lè he lihwu nya a na leěti be ma fee le u ba sha. ⁵ Nyong a wum, a ma te lè ’uhwo-ma lè tyung Ipita, a hà mbee te lè ’uhwo-ma lè tyung bendi-utung bema abe lihwo lè be befee. ⁶ A hà mbee te lè ’uhwo-ma lè tyung bendi gbe gyong asi lisi lè bendi asi adyong he ’iteng ken abe leěti be maa tan utung ha ahe. He liwu ábe be ma nde-e, be già hwō, ukpor gbamm ubell bè so bewum. ⁷ A ma mbee te lè ’uhwo-ma lè tyung Ujems, u mbee lè tyung bebwaa-isom bema puu. ⁸ He umbee-likel gbangg, a be lè ’uhwo-ma tyung mi. Ashin ’i ma yi a ná unwaa angwu be hwan he he ’unyong kpa-kpa ye a. ⁹ He liwu bebwaa-isom Ujeso, mi na᷅ mì yi ’isun hwò puu, mi kpè le bè ko mi le unwaa-isom uma or ye, likorye leěti mi maa ka bendi Unim ’ingie. ¹⁰ Ukpor Unim a tyung inung ha ami, fe na᷅ a shi-m mì yi ná mì yi i. Inung Unim ana i ban ’idideng ye, i be lè lifem linunung, likorye mi shi aki hwò bebwaa-isom Ujeso Ukristi puu. Ukpor mi shi āngi he ikeb igi a ye, inung lè ikeb Unim na᷅ bi shi aki gbe ha ami. ¹¹ Mà mi or, mà bebwaa-isom Ujeso Ukristi abe be teng a or, bel puu li bun ’isom ’imen a ken a gbe lè Ujeso Ukristi ashi men ma bong ha ashi. ¹² Bwo ’isom ashi lı᷆ bun ’i de le Unim a wum Ujeso Ukristi lè he lihwu, kibang a, men besuso ma᷆ de le undi u ba wum lè he lihwu ye? ¹³ Kì be kwu le undi u wum lè he lihwu ye, hang ashin ’i ze le Unim a wum Ujeso Ukristi lè he lihwu ye. ¹⁴ Kì be kwu le Unim a wum Ujeso Ukristi lè he lihwu ye, hang ashin ’i ze le kisom ’ima ashi lı᷆ bun ana ’ì yi ’iwom a ye, hà abongale ūme᷅n or ù yi ’iwom a ye. ¹⁵ Hà ’i mbee ze le bel li bà uman a gbà lè Unim, likorye bel li bun da bendi le Unim a wum Ujeso Ukristi lè he lihwu. Ukpor gbe ’ì yi le Unim u wum undi lè he lihwu ye, hà a wum Ujeso Ukristi or lè he lihwu ye. ¹⁶ Gbe ’ì yi le Unim u wum bendi lè he lihwu ye, hà Ujeso Ukristi or, a wum he lè he lihwu ye. ¹⁷ Kì be kwu le a wum Ujeso Ukristi lè he lihwu ye, hang abongale ūme᷅n ù yi ’iwom a ye, hà ’i ze le Unim a wa tyang biban bīme᷅n ke men ye. ¹⁸ Hà ashin ’i mbee ze le bendi abe leěti be ma bong ha Ujeso Ukristi, saa be hà hwō, be nim inim ngyor igye kpamm. ¹⁹ Gbe lishi andorale lityan ha Ujeso Ukristi lì kee-kee yi kwom he likpan angi he igye anyin a, hà lì yi beshi-beshi hwà bendigye puu. ²⁰ Ukpor ’ì yi ’igyang a le Unim a wum Ujeso Ukristi lè he lihwu. He liwu bendi abe be hwō, Unim a wum he ufe a ’ushu, hè ’ì tyung le Unim u ba wum àbe be teng or titi. ²¹ Kitaa ashi undi ken a shi lihwu li fel he igye anyin, kitaa ’imen i na᷅ undi ken a shi le hè bendi bè fel wum lè he lihwu. ²² Nya a na bendi puu be᷆ hwō likorye be be ubu lè ha Adam, kitaa ’imen i na᷅ Unim u᷆ kung likpan lifufe ke bendi puu abe be gwaa ipel ha Ujeso Ukristi. ²³ Kiwom ’iyang-yang ’i sha he ’unyong ahwu Unim a ndor a. Ujeso Ukristi a wum ’ushu; bendi abe bè yi ke-e be ba wum titi he ’unyong ahwu Ujeso Ukristi u᷆ be tem be. ²⁴ He umbee-likel, igye anyin i ba mbee. Nya he ’unyong ’imen ana Ujeso Ukristi u ba mbee lè ’iwom ’iyang-yang ashi ’ì yi lè ikeb he ’usi or, hen itang or; u hà tem lè Kusu ke Unim Atyam le ù fel Usu biwom puu. ²⁵ Kanaa-anaa i Ujeso Ukristi u kwa Usu kpamm Unim u hwò bendi-linaa bema, u tem ābe abee fe he itang he-e ù kung ābe fe-e he ’ubwo. ²⁶ Undi-linaa angwu Unim u᷆ be mbee lè he umbee-likel ù yi lihwu. ²⁷ Kì yi nya a na be fee he ’ushia Unim le: "Unim a shi ’iwom ’iyang-yang ’i fel he ’ubwo Unwaa-ma." Ukpor ashi be fee le ’iwom ’iyang-yang ’ì yi he ’ubwo Ujeso Ukristi ana, ki nung nwongg le Unim ugyang ufe ù yi he ’ubwo ’uma a ye, likorye ufe na᷅ a kung biwom puu fe Ujeso Ukristi he ’ubwo. ²⁸ Unim a kung biwom puu fe-e he ’ubwo, ufe-gyang Ujeso Ukristi Unwaa Unim a hà kung ’uhwo-ma fe Unim he ’ubwo, Unim angwu a kung biwom puu fe-e ufe he ’ubwo. Kitaa ana na᷅ Unim u᷆ fel Usu biwom puu, biwom puu bi fel ūbībī ken he ’ubwo ’uma. ²⁹ Hà bendi abe be kib ābe he umbwo he ’uhwo bendi bebell abe be hwō ufe? Kì be kwu le Unim u ba wum bendi lè he lihwu ye, kibang a, be᷆ hà kib ābe he umbwo he ’uhwo bendi bebell abe be hwō? ³⁰ Gbe ’ì yi le undi u ba wum lè he lihwu ye, kibang a, mı᷆ tan he begyong mbee ’unyong puu? ³¹ Bebuye, mi bong lihwu he liti liyang-yang. Mi bà uman a ye nya a na mı᷆ bè uman a ye nyong mı᷆ de le mi yal gor le men ma gwaa ipel ha Ujeso Ukristi Atyetyan a. ³² Leěti nyong mi ma yi he ’ubong Efesos, bendi be maa kee ’ukwo ahwu be᷆ gwu-m; ki ma yi nya a na mi ndo ha inyia ibibi a. Kì be kwu le bendi abe be hwō, Unim u wum ābe ye, hang ’ibang ’ì yi lifem ligi he ’ingie ashi mı᷆ bong kpē? Gbe abe be hwō bè tem wum ye, hà ’i ngbebb le lì shi ná bendi betyan be᷆ kong le, "Mà lì shi bipam, zī bizizi, ngwo bingwungwo, likorye baale lı᷆ hwō." ³³ Mà tyang bendi bè lam amen ye. Má ngye le: "Ūtyàng ubibi u sha undi u tyang likpe linunung." ³⁴ Mà tyang abwo lè akpel-ye! Mà kung abwo lè he biban ashele! Men besuso ma ngye Unim ye gbangg! Mi kong ashin le hè ishwia ì shi amen a. ³⁵ Pisoye undi-iso u bii le: "Undigye angwu a hwō, u tem wum ná a? Gbe a wum, kibang ’itaa inyiahwo angi u᷆ fel lè ngi?" ³⁶ Wo angwu wo᷆ bii ’ibibi ’itaa ana, wò yi kpel-ye! Wó ngye le ùtǒng ’iwom angwu undi u᷆ kwan, u hwa᷆, saa u hà mbi. ³⁷ Kiwom ashi undi u᷆ kwan ’i kwa ùtǒng a, pisoye ùtǒng ukwul, pisoye bitaa ìtǒng bisuso, bi kwa ná nyong bı᷆ mbu bı᷆ kwu a ye. ³⁸ Unim u sha ùtǒng angwu undi a kwan u kaa fel ùkwán. Kitaa ùtǒng uyang-yang u kaa fel ’ima ’itaa ukwan ná Unim a shi-e. ³⁹ Biwom puu abi bì yi biwum, bì yi ’itaa ken ye. Bendigye bè yi lè ’itaa inyiahwo ken; bitaa inyia atyetye-atyetye bi shi lè bitaa inyiahwo atyetye-atyetye, linyun li shi lè ibell inyiahwo, ìkwǎn i shi lè ibell inyiahwo. ⁴⁰ Biwom abi bì yi he ’usi bì yi atyetye lè ha abi bì yi he itang; kunung biwom abi he ’usi ’ù yi atyetye lè ha ’unung biwom abi he itang. ⁴¹ Kunung libwee ’ù yi atyetye, ahwu ’ufell ’u shi atyetye, ahwu ikpen ’u shi atyetye. Ukpen uyang-yang ù yi atyetye lè ha unde-ma. ⁴² Kì yi ’itaa ken ha bendi abe be wum lè he lihwu. Likwom lì yi ná ùtǒng ’iwom; nyong be kung āngi ngì, li hwee; nyong Unim u᷆ wum undi umen ana lè he lihwu, u fel lè inyiahwo angi i hwee ye. ⁴³ Nyong be᷆ ngi likwom li ngbebb ’unung ye, li kwu lè ikeb ye, ukpor nyong undi umen ana u᷆ tem wum lè he lihwu, u fel lè inyiahwo angi i ngbebb ’unung, i shi lè ikeb. ⁴⁴ Inyiahwo angi be᷆ ngi ì yi àngi igye anyin a, ukpor nyong undi umen ana u᷆ wum, u fel lè inyiahwo angi ushu Unim a. Bwo ’ì yi lè inyiahwo angi igye anyin, kì yi lè inyiahwo angi ushu Unim. ⁴⁵ Be fee he ’ushia Unim le: "Unim a ma shi Adam angwu a ma yi ukpi-ikwu undi a ma fel uwum." Umbee-likel Adam angwu ù yi Ujeso Ukristi ù yi Ukatia Kunyong angwu u᷆ ke likpan. ⁴⁶ Inyiahwo angi ushu Unim na᷅ ì yi ’ushu ye, angi igye anyin na᷅ ì yi ’ushu. ⁴⁷ Ukpi-ikwu undi umen ana a be lè he itang a, Unim a kung itang a mbe-e, ukpor Undi angwu a be umbee-likel a be lè ha Unim a. ⁴⁸ Bendi abe bè yi he igye anyin, bè yi ná angwu Unim a kung itang mbe-e nà; abe bè yi ipel ha Unim be shi ná Undi angwu a be lè ha Unim. ⁴⁹ Nya a na ’unyin i lì yi ná angwu Unim a kung itang mbe-e, na᷅ he liti ken lı᷆ be kwu ná Undi angwu a be lè ha Unim. ⁵⁰ Bebuye, ashi mı᷆ de men ’ì yi le bendi be ta lè inyiahwo angi igye anyin gya he Kiteng-usu Unim ye. Kiwom ashi ’ı᷆ hwee ’i ngyor igye ná a? ⁵¹ Mà gyo! Mi ndo da amen ’undyell. Bel puu na᷅ lı᷆ be hwō ye, ukpor bel puu li ba gie. ⁵² Nya he ’unyong ’umen ana usom u ba gwee, bendi abe be hwō be ba wum lè inyiahwo angi ı᷆ hwō ye. Nya ’ukwo-ukwo li ba gie ná utong-shi u᷆ kib kpeb. ⁵³ Inyiahwo angi ı᷆ hwō, i hwee i, kì yi kpe-kpe le ì gie fel a᷆ngi ı᷆ hwō ye, i hwee ye. ⁵⁴ Nyong ahwu inyiahwo ityan i gie ’itaa ana, hà ’i shi nya a na be fee he ’ushia Unim le: "Unim a hwò lihwu. Ikeb lihwu i mbee." ⁵⁵ "Lihwu, wò tem hwǎ li ye! Wò tem yi lè ikeb angi wo᷆ do li ye." ⁵⁶ Gbe he ’iban na᷅ lihwu lì yi lè ikeb le li gwa li; gbe he Iten angi Unim a ke na᷅ li ngye ’iban, ngwu ’i fel lè ikeb he likpan lityan. ⁵⁷ Ukpor mà lì pee Unim likorye a shi li li hwò ’iban lè lihwu gbe ha Atyetyan Ujeso Ukristi. ⁵⁸ Bebuye lityam, he ashin mà naa genn, mà tyang ’iwom ’ì gie amen ugim ye, mà gye ’ushu shi aki Atyetyan Ujeso Ukristi lityam ken, bwo men-agyang ma ngye le aki angi ma᷆ shi-e a ba kwa ’idideng ye.

¹ Gbe lè únde angwu ù yi le mà gbong hè men mà kpell bendi Unim he awu bendi abongale he Ujeruselem, men mà shi ’itaa ken ná mi de awu bendi abongale angi he Ugalesha le à shi. ² He ukpi-ikwu liti utyong Beke, undi uyang-yang ù già únde uma ndor, u kam he ndor ke aki Unim amen ana. Undi uyang-yang ù ke ’itaa Unim a ke-e. Mà shi ashin le hè ’unyong ahwu mı᷆ be be há, hè men mà tem tyam he ashi kee únde ikee ye. ³ Nyong mı᷆ be wu ha amen há, mi ba fee ’ushia ka bendi abe men ma waa, mi som ābe, be kung ’ushia ana lè únde ūme᷅n lè ke he Ujeruselem. ⁴ Gbe bel puu li ndè le ’i ngbebb le mi or mì te há, mà befe or bè te utung ha ami. ⁵ Mi kam hen le mi gya he Umasedonia. Nyong mi mbee lè há, mi ba ba ha amen há. ⁶ Mi gim le mi ba bà kwa ha amen há, pisoye mi kwu há mbee lè ’akwuo puu. Nyong mı᷆ bo le mi gya he ’iteng ’iyang-yang ashi mı᷆ be gye, ma hà teng mi ngbebb-ngbebb. ⁷ Mi kee le mi ba ha amen há gba ’inaa-inaa ye. Mi kee le mi kwa ha amen há gba ’igbe, gbe Atyetyan Ujeso Ukristi a bong. ⁸ Ukpor mi kwa hen he Efesos nyin kpamm la wa he Kipam Upentikos. ⁹ Unim a buu ’ukwo ke-m hen le mì shi aki akaandi angi a᷆ be lè lifem kangg ke aki Unim, mà na ’ì yi lè bendi-linaa hen gbamm abe be᷆ kee le be kwom mi ’ukwo or. ¹⁰ Nyong Utimoti u᷆ be ha amen há, mà ndè le ma shi-e hè ’ì kwu-e he lityam kpatiaa, likorye u sha aki Atyetyan Ujeso Ukristi nya a na mı᷆ shi a. ¹¹ He ashina, undi uyang-yang ù bia he ye. Men mà teng he ngbebb-ngbebb he-e ù be tem ligye lè ’ukwun be hwaa lè mi. Bel ha bebuye abe hen li ndor lishi lima. ¹² Gbe lè Aporlos angwu ù yi unwandatyan undi Unim, mi tim he anung ’ugbe ibwan-ibwan le ù fe utung ha bendi Unim besuso be ha amen há. Ukpor a ndè shi ’i ngbebb he le ù be he ’unyong ahwun ye, u ba ba nyong a ndè libwo. ¹³ Mà kwu lè ’akang, mà naa genn he igie Unim angi ma bong, mà wee abwo ye, ma naa genn. ¹⁴ Kiwom ’iyang-yang ashi ma᷆ shi, mà shi āshi lè benyin. ¹⁵ Bebuye, men má ngye le Ustefenas lè bendi bema na᷅ be ma kpi ’ikwu bong ha Ujeso Ukristi ’ushu he ’ubong Akaya. Be mbee kung ’uhwo-bell ke le be sha aki kpell bendi Unim. ¹⁶ Mi tim amen anung le mà ke bendi abe ’itaa ana ife, mbee lè undi uyang-yang angwu u᷆ shi aki utung ha abel. ¹⁷ Mì yi lè igor kangg le Ustefenas lè Ufortunatas lè Akayikas be be nde-m, likorye nyong mi ndè be, ki fel mi a ná mi ndè men puu á. ¹⁸ Be fe-m ingie nya a na be fe men ingie a. Mà ke be ife angi ’ì yi le mà ke be. ¹⁹ Bendi Unim puu he awu bendi abongale angi he Eshia be kong lè men. Akwila lè Uprisila lè liwu bendi abongale angi lı᷆ kpee fe Unim ha abe ushom, be kong lè men lityam ken likorye ma gwaa ipel ha Atyetyan Ujeso. ²⁰ Bendi Unim hen puu be kong lè men. Nà bebwanam bende gbe ha Ujeso Ukristi, mà gaa bende lè uko lè uko. ²¹ Mi Uporl na᷅ mi fee he abwo agi hwaa lè men. Mi fee le: Mi Uporl, mi kong lè men. ²² Gbe ’ì yi lè undi angwu ’i nyin he lè Atyetyan Ujeso ye, kì ban he shiee. "Aye, wo Atyetyan Ujeso, hā be akikye!" ²³ Atyetyan Ujeso ù hā ke men ’ukwun. ²⁴ Kí nyin mi lè men puu likorye bel puu li gwaa ipel ha Ujeso Ukristi.