TITUS

TITUS

¹ Humbani si Paulus, juak-juak ni Naibata anjaha apostel ni Jesus Kristus, laho manogu-nogu halak na pinilih ni Naibata hubani haporsayaon ampa pangarusion bani hasintongan in, na mardomu hubani hadaulaton, ² maronjolan hubani pangarapan bani hagoluhan na so ra bois, na dob humbani mulani iparbagah Naibata, na so siparladung in, ³ anjaha ipatalar do hataNi in bani panorangni, marhitei parambilanon na dob niondoskonNi bakku, romban hubani pangkatahon ni Naibata, Sipaluah hita, ⁴ marayak si Titus, anakku na tongon, marhitei haporsayaon riap in: Idop ni uhur ma bam ampa damei humbani Naibata Bapa ampa humbani Kristus Jesus, Sipaluah hita. ⁵ Ase hutadingkon pe ho i Kreta, ai ma, ase ipatorsa ho horja na tading ope, anjaha ipabangkit ho sintua bani ganup huta, songon na dob huaturhon bam, ⁶ ai ma dalahi na so dong sihataon bani, paramangon ni sada naboru, pardakdanak na porsaya, na so adong pamandangon bani parlahou anjaha seng jungil. ⁷ Ia parmahan, sijolom anak kunsi ni Naibata, ulang ma panurakon; ulang sihorjahon uhur-uhurni, ulang pargila-gila, ulang parmabuk, ulang paringor, ulang na marpansarian humbani na so dalanni, ⁸ tapi sipartamuei ma, na malas uhur bani na madear, siparuhur, na bonar, na pansing, sirajai diri, ⁹ na marsijoloman bani hata na sintong in, domu bani pangajaran in, ase margogoh ia, mangojur marhitei pangajaran na pintor in, age maminsang sipanlawan. ¹⁰ Tapi buei do halak, na jungil, sibuei sahap ampa na pakahouhon, tarlobih humbani parugama Jahudi. ¹¹ Maningon pasipon do pamangan ni sidea, ai igeori sidea do bulat-bulat rumah tangga marhitei na mangajarhon na so patut, laho mambuat duit sihailahononkon. ¹² Sahalak humbani sidea, ai ma nabi ni sidea sandiri, mangkatahon: Halak Kreta, parladung do ai tong, binatang panoroh, sitahar boltok. ¹³ Sintong do hasaksian ai; halani ai gomos ma paminsangmu bani sidea, ase dear sidea ibagas haporsayaon, ¹⁴ anjaha ulang be ipatangi-tangi sidea turi-turian ni halak Jahudi pakon titah-titah ni jolma, na marbalik humbani hasintongan in. ¹⁵ Borsih do haganup bani halak na borsih; tapi bani halak na butak, na so porsaya, seng dong na borsih, ai domma butak uhur ni sidea ampa panggora ni uhur ni sidea. ¹⁶ Ihatahon sidea, domma itanda Naibata, tapi iparnalang do Ia marhitei horja ni sidea; ai hagigi do sidea anjaha seng sipambalosi, seng tarpakei bani atap aha pe horja na madear.

¹ Tapi anggo ho, hatahon ma, na domu hubani pangajaran na pintor in: ² Ojur ma dalahi na matua maruhur na torang, daulat, porman, sintong ibagas haporsayaon, ibagas holong pakon ibagas hasabaron. ³ Sonai homa naboru na matua, marparlahou ma sidea songon halak na mapansing, ulang sipanukas, ulang homa hatagihan bani anggur, tapi sipodahkon na madear ma, ⁴ ase tartogu-togu sidea naboru na poso ope mangkaholongi paramangonni ampa dakdanakni, ⁵ porman, sopan, na bujur mamorluhon horja i rumah, unduk dompak paramangonni bei, ase ulang hona risa hata ni Naibata. ⁶ Podahi homa dalahi na maposo, ase marhahormaton. ⁷ Ia ho, ibagas haganup, maningon sitiruan ma ibagas horja namadear, pitah anjaha ringgas bani pangajarion; ⁸ sihatahon podah na sintong, na seng dong sihataon, ase maila sipanlawan ai, halani seng dong na bajan sihatahononni dompak hita. ⁹ Jabolon pe maningon balosanni do tuanni, pamalasonni uhurni ibagas haganup, ulang manlawan-lawan, ¹⁰ ulang manangko, tapi ipatuduhkon ma haganup habujuron, ase marsangap pangajaran na humbani Naibata, Sipaluah hita, ibagas haganup. ¹¹ Ai domma mulgap idop ni uhur ni Naibata bahen haluahon ni haganup jolma. ¹² Iajari do hita marhiteihon idop ni uhurNi marnalangkon uhur na so daulat ampa hisap-hisap dunia on, ase iparlahouhon hita hapormanon, hapintoran, ampa hadaulaton i dunia on, ¹³ sanggah na paima-imahon hita bani hatuahon na niaraphonta in pakon partalar ni hamuliaon ni Naibata na banggal in ampa Kristus Jesus, Sipaluah hita, ¹⁴ na mamberehon diriNi manghophop hita, laho manobus hita humbani haganup hajahaton, anjaha urasonNi bani diriNi sada bangsa, ase Ia simadaSi, na mangkaringgashon sagala horja namadear. ¹⁵ In ma hatahon, podahkon anjaha akimhon hubani halak humbani gok ni uhurmu. Ulang ma dong na mapas bam.

¹ Paingat ma sidea, ase unduk anjaha pambalosi bani pamarentah ampa siparkuasa, janah sirsir bani sagala horja na madear, ² ulang sipanrisai atap bani ise pe, ulang siparingor, basar anjaha lamlam bani haganup halak. ³ Ai dihut do hita hinan halak na oto, seng sipambalosi, na kahou, pinarjabolon ni bagei ni hisap-hisap ampa rosuh-rosuh, ibagas hajahaton ampa subil; jolma hagigi do hita anjaha na marsidomdoman. ⁴ Tapi talarhonsi halayakon ampa holong ni uhur ni Naibata, Sipaluah hita, ⁵ ipaluah do hita, sedo halani horja hapintoran na binahenta, tapi halani idop ni uhurNi do, marhitei pandidion pangulakion tubuh ampa habayuon marhitei Tonduy Napansing, ⁶ na dob niuseihonNi banta unjah, marhitei Jesus Kristus, Sipaluah hita, ⁷ ase gabe pintor hita halani idop ni uhurNi, anjaha gabe sitean hagoluhan na sadokah ni dokahni, domu hubani pangarapan in. ⁸ Hatengeran ni uhur do hata in, anjaha ipindo uhurhu, ase gomos ma panaksihonmu bani hata in, ase sidea, na dob porsaya bani Naibata, ra mangharinggashon horja na madear; in ma na madear anjaha na marguna bani jolma. ⁹ Tapi lembangi ma sual-sual haotoon ampa pasal tarombo-tarombo, parsalisihan ampa paringoran pasal titah in, ai seng marguna in anjaha sisoya-soya do. ¹⁰ Siparpodah na kahou, dob ipaingat ho ia sahali dua hali, tulak ma ia, ¹¹ ai ibotoh ho do, na dob marbalik do halak sisonai anjaha mardousa; anjaha ia sandiri mamapaisi. ¹² Ia dob husuruh si Artemas ampa si Tikikus bam, papodas ma roh manjumpahkon ahu hu Nikopolis, ai ijai do ahu sihol soh sanggah musim borgoh. ¹³ Si Semas, sibotoh titah in, ampa si Apollos, porluhon ma pabingkathon sidea, ase ulang hurangan sidea atap bani aha pe. ¹⁴ Hasomanta pe iguruhon ma mampongkuthon horja na madear, laho mansarihon na porlu pakeion, ase ulang lang marbuah sidea. ¹⁵ Manongos tabi do bam haganup na rap pakon ahu. Padas tabinami bani na manghaholongi hanami ibagas haporsayaon. Idop ni uhur ma mangkasomani nasiam haganup!