ROM

ROM

¹ Ahu Paulus, juak-juak ni Jesus Kristus, na tardilo gabe apostel, na pinapulig mangambilankon Ambilan Namadear na humbani Naibata, ² na pinarbagahNi ai hinan ibagas Surat na pansing in marhitei nabi-nabiNi, ³ pasal AnakNi, na tubuh humbani ginompar ni si Daud ia dagingNi, ⁴ anjaha na pinabangkit gabe Anak ni Naibata ibagas hagogohon, mangihutkon Tonduy Na pansing, marhitei na puho humbani na matei, ai ma Jesus Kristus, Tuhanta in. ⁵ Hum-Bani do ijalo hanami idop ni uhur ampa jabatan apostel, laho manuankon haporsayaon ampa pambalosion bani goranNi, i tongah-tongah ni bangsa sipajuh begu-begu, ⁶ humbani sidea do homa nasiam, nasiam na dob nidilo ni Jesus Kristus. ⁷ Nasiam haganup, na i huta Rom, na hinaholongan ni Naibata, na mapansing anjaha na tardilo: Idop ni uhur ma bani nasiam ampa damei humbani Naibata Bapanta ampa Tuhan Jesus Kristus! ⁸ Parlobei huhatahon ma tarima kasih bani Naibatangku marhitei Jesus Kristus halani nasiam haganup, ai tarambilan do haporsayaonnasiam i sab dunia on. ⁹ Naibata, na hubalosi ibagas tonduyhu marhitei na mangambilankon Ambilan Namadear ni AnakNi in, Ia do saksingku, paboa na so marnamaronti ahu mardingat nasiam. ¹⁰ Tongtong do hupangindo ibagas tonggongku, andohar boi ahu marayak nasiam, atap antigan pe, domu hubani rosuh ni Naibata. ¹¹ Ai masihol do uhurhu mangidah nasiam, andohar tarbere ahu deba bani nasiam sibere-bere partonduyon, laho patoguhkon haporsayaonnasiam, ¹² artini ai, ase dapotan gogoh age ahu humbani nasiam halani haporsayaonta rombang. ¹³ Tapi sihol ma botohonnasiam, ale hasoman, na dob gati do husurahon marayak nasiam, ase marbuah ahu bani nasiam songon na bani bangsa na legan, tapi tarlanglang do ronsi sonari. ¹⁴ Parutang do ahu bani halak Gorik age bani bangsa na legan, bani halak na pentar-pentar age bani halak na bodoh, ¹⁵ halani ai do ase husurahon mangambilankon Ambilan Namadear in age bani nasiam i huta Rom. ¹⁶ Ai seng huhailahon Ambilan Namadear in, ai hagogohon ni Naibata do in paluahkon sagala na porsaya, halak Jahudi parlobei, dob ai halak Gorik. ¹⁷ Ai ipatalar do ijin hapintoron ni Naibata, humbani haporsayaon hubani haporsayaon, songon na dob tarsurat in: Na manggoluh do parpintor in halani haporsayaonni. ¹⁸ Ai ipatalar do ringis ni Naibata hun nagori atas dompak sagala jolma na so daulat anjaha na geduk, na mangambat hasintongan in marhitei hagedukon. ¹⁹ Halani pambotoh pasal Naibata, torang do bani sidea, ai Naibata sandiri do pabotohkon ai bani sidea. ²⁰ Ai boi do taridah biak ni Naibata na ponop in, ai ma hagogohonNi na manongtong in ampa hanaibataonNi, timbangon ni uhur humbani pambahenanNi ai, dob itompa dunia on, ase ulang adong sidalian ni sidea. ²¹ Halani age pe ibotoh sidea adong Naibata, seng ipasangap sidea Ia songon Naibata, anjaha seng ipuji, gabe ipaoto-oto pingkiranni ma sidea, anjaha golap ma pingkiran ni sidea na so marpangarusion ai. ²² Iagan na maruhur sidea, hape na oto do. ²³ Itukar sidea do hasangapon ni Naibata na manongtong in bani gana-gana ni jolma na laho salpu in, bani manuk-manuk, binatang ampa sipanjulur. ²⁴ Halani ai iondoskon Naibata do sidea ibagas hisap-hisap ni uhur ni sidea hu habutakon, pala ipabutak sidea dagingni samah sidea. ²⁵ Itukar sidea do hasintongan ni Naibata gabe ladung, gabe isombah anjaha ibalosi sidea ma na tinompa gantih ni Panompa, sipujion ronsi sadokah ni dokahni. Amen. ²⁶ Halani ai iondoskon Naibata ma sidea bani hisap-hisap habadoron; iubah parinangon ni sidea do hasomalan na patut hubani ulah na so somal. ²⁷ Sonai homa dalahi, itadingkon do ruhut pardomuan bani parinangonni, gabe garang ma sidea ibagas hahisapon, pala dalahi samah dalahi mambahen habadoron, gabe sonai ma ijalo sidea upah ni hakahouon ni sidea bani dirini bei. ²⁸ Halani lang iporluhon sidea na mananda Naibata, gabe iondoskon Naibata ma sidea bani paruhumon na so margagan, ase ihorjahon na so patut. ²⁹ Gok do sidea bani masam ni hagedukon, hajahaton, hasamboron, uhur haut, latei, pamunuhon, paringoran, uhur sipakulah-kulah ampa akal-akal. ³⁰ Sidea, ai ma sipanghata-hatai, munsuh ni Naibata, sipanrisai, na jungkat, sigijang uhur, sibuei hata, paruhur na masambor, silawan na matoras, ³¹ na so maruhur, siosei padan, na so mambotoh holong ampa idop ni uhur. ³² Ibotoh sidea do namin aturan ni Naibata, na mangkatahon patut do marutang hosah na mangkorjahon sisonai, hape tong do ihorjahon, tapi seng pitah ihorjahon sidea, marosuh do sidea tene bani na mangkorjahon ai.

¹ Halani ai seng tarapiti ho dirimu, ale jolma sipanguhum, atap ise pe ho. Ai marhitei na manguhum halak na legan, iuhum ho do dirimu sandiri, ai na sonai do homa idalankon ho, ale sipanguhum! ² Ai ibotoh hita, domu hubani hasintongan do mangonai uhum ni Naibata hubani na mangkorjahon na sonai ai. ³ Ai iagan ho, ale jolma, tarsimbili ho uhum ni Naibata, anggo iuhum-uhumi ho na mangkorjahon na sonai, hape dihut do ho mambahensi? ⁴ Atap na mapas do uhurmu bani dear ni layakNi na buei in, bani panganjuonNi age lumbang ni uhurNi? Seng ibotoh ho, dear layak ni Naibata sihol manogu ho bani hamubahon ni uhur? ⁵ Tapi halani hengkeng ni uhurmu ampa uhurmu na so ra mubah in, ipajunjun ho do bam ringis bani ari parsogop ni ringis ai ampa partalar ni uhum ni Naibata na pintor ai, ⁶ na mambalaskon bani ganup domu hubani horjani bei: ⁷ Ai ma hagoluhan na sadokah ni dokahni bani halak na golgol mangkorjahon na madear, anjaha na mangindahi hasangapon, hamuliaon ampa na manongtong ai, ⁸ tapi ringis ampa gila do bani halak sipanlawan anjaha na so ra mambalosi hasintongan in, ai ma sipambalosi bani hagedukon. ⁹ Hamarsikon ampa biar do sogop bani uhur ni sagala jolma, na mangkorjahon hajahaton, bani halak Jahudi parlobei, sonai homa bani halak Gorik. ¹⁰ Tapi hasangapon, hamuliaon ampa damei do bani sagala na mangkorjahon na madear, halak Jahudi parlobei, sonai homa halak Gorik. ¹¹ Ai seng siidah rupa Naibata. ¹² Ai sagala sipardousa, na so martitah, magou do homa lang martitah; anjaha sagala na mardousa, sipartitah, uhumon ni titah do. ¹³ Ai seng na mambogei titah in pintor ilobei ni Naibata, tapi na mangkorjahon titah in do pintoranni. ¹⁴ Ai sipajuh begu-begu pe, na so martitah in, ihorjahon do humbani biakni na pinindo ni titah in; ase sidea sandiri ma gabe titah bani sidea na so martitah in. ¹⁵ Hunjai ma taridah, paboa na dob tarsurat do na pinindo ni titah in ibagas uhur ni sidea. Anjaha panggora ni uhur ni sidea pe dihut do manaksihon, anjaha pingkiran ni sideea marsiaduan atap marsiapitan, ¹⁶ ai ma bani ari, rohkonsi Naibata, manguhumi sagala na ponop bani jolma in marhitei Kristus Jesus, domu hubani na huambilanhon in. ¹⁷ Igoran ho do dirimu Jahudi, marhatengeran do ho bani titah in, anjaha Naibata ipangunsagahkon ho. ¹⁸ Ibotoh ho do rosuhni, anjaha ibotoh ho do manimbangi na malo ampa na so malo, niajaran ni titah in. ¹⁹ Talup do ho, nini uhurmu pambobai na mapitung, panondang bani halak na ibagas hagolapan, ²⁰ pamodahi bani na hurang uhur, sipangajari bani na etek, ai dong do bam habotohon ampa hasintongan pasal titah in. ²¹ Hape halak na legan ipodahi ho, tapi dirimu sandiri lang ipodahi ho. Ho do mangkatahon, seng bulih manangko. ²² Ihatahon ho, ulang marbangkis, hape ho do marbangkis. Magigi do ho bani gana-gana, hape panrampok do ho i rumah panumbahan. ²³ Ipangunsagahkon ho do titah in, tapi ipahiri ho do Naibata marhitei panlanggaronmu bani titah in. ²⁴ Songon na tarsurat in: Mahiri do goran ni Naibata i tongah-tongah ni sipajuh begu-begu halani nasiam. ²⁵ Marguna do parsunaton in, anggo idalankon ho titah in. Tapi anggo panlanggar do ho bani titah in, gabe seng marguna be parsunaton in bam. ²⁶ Ase anggo idalankon na so tarsunat in pinindo ni titah in, ai lang hiraon ma ia, na so tarsunat ai, songon na tarsunat? ²⁷ Ai lang na so marsunat ai ma, anggo idalankon titah in, na manguhumi ho, simada hata ampa parsunaton in, anggo ilanggar ho titah in? ²⁸ Ai sedo pardarat ai Jahudi na sintong, anjaha sedo bani daging ai parsunaton na tongon. ²⁹ Tapi Jahudi na sintong, ai ma Jahudi parbagas ai, anjaha parsunaton na botul, ai ma na ibagas uhur ai, marhitei Tonduy sedo marhitei surat ni titah. Sisonai ma dapotan puji-pujian, sedo humbani jolma, tapi humbani Naibata do.

¹ Ase aha ma hasurungan ni Jahudi, anjaha aha ma gunani parsunaton ai? ² Buei do, ibagas haganup. Parlobei, ondosan ni hata ni Naibata do sidea. ³ Ai sonaha? Anggo seng porsaya deba, mintor halani na so porsaya ai ma sidea gabe seda habujuron ni Naibata? ⁴ Seng sonai. On do tene, parsintong do Naibata, tapi parladung do haganup jolma, songon na tarsurat in: Ase pintor Ham bani hata-Mu, anjaha monang Ham ibagas panguhumon-Mu. ⁵ Tapi anggo hagedukonta mambahen jongjong hapintoran ni Naibata, aha ma sihatahononta? Ai na so adil ma Naibata, anggo ipadalan ringisNi? Sahap hajolmaon do sahapkai. ⁶ Seng sonai. Ambit sonai, ija ma taruhum Naibata dunia on? ⁷ Tapi anggo ladungku pabanggal habonaron ni Naibata gabe hasangaponNi, mase uhumonNi ope ahu songon pardousa? ⁸ Ai lang dearan ma horjahon hita na masambor ase roh na madear? Patut do hona uhum halak sisonai ai. ⁹ Ase sonaha ma? Marhasurungan do hita? Otik pe lang. Domma hupatorang: Halak Jahudi pe atap halak Gorik, rap ginom-goman ni dousa do, ¹⁰ songon na tarsurat in: Seng dong na pintor, sahalak pe lang. ¹¹ Seng dong na maruhur, seng dong na pindah-pindah bani Naibata. ¹² Haganup do manlembang, rap na so margagan do sidea; seng dong sihorjahon na madear, sahalak pe lang. ¹³ Tanoman na ngangang do tolonan ni sidea, dilah ni sidea mansahapkon ladung; bisa ni ulog darih do i toruh ni bibir ni sidea. ¹⁴ Gok do babah ni sidea bani bura-bura ampa hata podou. ¹⁵ Hinsah do nahei ni sidea manduruskon daroh. ¹⁶ Hamagouan ampa hamarsikon do ibagas dalan ni sidea, ¹⁷ ia dalan hadameion in, seng ibotoh. ¹⁸ Seng dong biar dompak Naibata ibagas pangidah ni sidea. ¹⁹ Tapi ibotoh hita do, bani na ginom-goman ni titah in do haganup hata ni titah in, ase sip sagala pamangan, anjaha marsalah ganup sindunia on ilobei ni Naibata. ²⁰ Ai marhitei na mangkorjahon titah seng adong jolma na dapotan hapintoran i lobei ni Naibata. Ai marhitei titah panandaion bani dousa do roh. ²¹ Tapi sonari domma torang hapintoran ni Naibata, sedo humbani titah, songon sinaksihon ni titah in ampa nabi-nabi, ²² ai ma hapintoran ni Naibata, na das marhitei haporsayaon bani Jesus Kristus hubani haganup na porsaya. ²³ Ai seng dong ubahni, sabonar haganup do sidea mardousa, anjaha seng dong sipujion i lobei ni Naibata. ²⁴ Gabe ipintori do sidea marhitei silayak-layak halani idop ni uhurni, hinorhon ni panobusion na ibagas Kristus Jesus. ²⁵ Ia do ipajongjong Naibata gabe hitei pardearan marhitei haporsayaon bani darohNi ai, laho patalar hapintoranNi, halani domma isalpuhon dousa sapari ibagas sabar ni uhurNi, ²⁶ laho patalar hapintoranNi bani panorang sonari, ase pintor Ia, anjaha ipintori na porsaya bani Jesus. ²⁷ Ase adong ope siunsagahononkon? Seng dong be ai. Marhitei titah ja do? Marhitei titah horja do? Lang, tapi marhitei titah haporsayaon in do. ²⁸ Ase on do ijolom uhurta: Marhitei haporsayaon do ipintori jolma, sedo marhitei na mangkorjahon titah. ²⁹ Ai pitah Jahudi do simada Naibata? Ai lang dihut do bangsa sipajuh begu-begu? Nai ma tongon, dihut do bangsa sipajuh begu-begu! ³⁰ Ai sada do Naibata na mamintori na tarsunat marhitei haporsayaon ni sidea ampa na so marsunat halani haporsayaon ni sidea. ³¹ Ase na manrumbakkon titah do hita halani haporsayaon in? Seng sonai, tapi na pajongjongkon titah in do hita.

¹ Jadi aha ma hatahononta, na dapot si Abraham, ompungta ai mangihuthon pardagingon? ² Porini ipintori si Abraham halani horjani, adong do sipangunsagahkononni, tapi seng dompak Naibata. ³ Aha do na hinatahon ni Surat in? Na porsaya do si Abraham bani Naibata, gabe ai ma ihira gabe hapintoranni. ⁴ Bani halak siparhorja, upah do ai ihira, sedo songon idop ni uhur, tapi songon hakni do. ⁵ Bani halak na so marhorja, tapi na porsaya bani Sipintori halak na jahat in, haporsayaonni ai do ihira gabe hapintoranni. ⁶ Sonai homa si Daud, iparhatuah do halak na gabe pintor ihira Naibata, seng humbani horjani: ⁷ Martuah ma halak na dob sinasap salahni, anjaha na dob nirungkub dousani! ⁸ Martuah ma halak, anggo lang ihira Tuhan in dousani bani! ⁹ Ise do na iparhatuah ijai? Halak na marsunat do hansa, atap dihut do na so marsunat? Ai ihatahon hita do: Ihira do haporsayaon ni si Abraham gabe hapintoranni. ¹⁰ Ai sonaha do iparhirahon bani? Dob marsunat do ia, atap lape marsunat? Sedo dob marsunat, tapi sanggah lang marsunat ope. ¹¹ Ijalo do parsunaton ai songon tanda atap lak ni hapintoran na humbani haporsayaon ai, sanggah lape tarsunat ia, ase bapa ia bani sagala na porsaya na so marsunat, gabe iparhirahon homa bani sidea hapintoran ai. ¹² Bapa do ia homa bani na marsunat, tapi seng asal tarsunat, sihol ma iirikkon haporsayaon ni si Abraham, bapanta ondi, sanggah lape marsunat ia. ¹³ Ai seng marhitei titah in roh bagah-bagah bani si Abraham atap bani ginomparni, paboa ia do sitean dunia on, tapi marhitei hapintoran na humbani haporsayaon in do. ¹⁴ Ai ambit sihorjahon titah in do gabe sipanean, seng marguna be haporsayaon in, anjaha seng be asi bagah-bagah in. ¹⁵ Ai ringis do ihorjahon titah in, tapi anggo seng dong titah, seng dong panlanggaron. ¹⁶ Ase humbani haporsayaon in do in, ase maronjolan bani idop ni uhur, totap bagah-bagah in bani haganup ginomparni, seng pitah bani na humbani sipartitah, tapi dihut do bani na porsaya songon si Abraham. Ia do bapa ni hita haganup, ¹⁷ (songon na tarsurat in: Hubahen do ho gabe bapa ni buei bangsa) ilobei ni Naibata, na hinaporsayaanni ai, Sipagoluh na dob matei anjaha na mandilo na so adong hinan gabe adong. ¹⁸ Marimbang sagala pangarapan do haporsayaonni na mangarap ai, ase gabe bapa ni buei bangsa ia, domu hubani hata ai: Sonai ma magira ginomparmu. ¹⁹ Anjaha seng roh galekni haporsayaonni paidah-idah angkulani na matei-matei ai, age pe domma hira-hira saratus tahun umurni, sonai age mangidah si Sara na dob hasayoban ai. ²⁰ Seng ra bungbang uhurni manadingkon haporsayaonni bani bagah-bagah ni Naibata, tapi lambin toguhni do tene haporsayaonni anjaha ipasangap do Naibata. ²¹ Tenger tumang do uhurni, paboa tuk do kuasa ni Naibata pasaudkon bagah-bagahNi. ²² Halani ai do ase ihira ai gabe hapintoranni. ²³ Hata "iparhirahon bani", seng pitah halani ia tumang, ase tarsurat ai, ²⁴ tapi dihut do halani hita, anjaha iparhirahon do ai banta, na porsaya bani Sipapuho Jesus, Tuhanta in, humbani na matei. ²⁵ Ai iondoskon do Ia halani panlanggaronta, anjaha ipagoluh halani pamintorion banta.

¹ Ase, dob ipintori hita halani haporsayaon, mardamei ma hita pakon Naibata, marhitei Tuhanta Jesus Kristus. ² MarhiteihonSi do boi masuk hita hubani idop ni uhur haporsayaon, ai ma hajongjonganta nuan, anjaha megah do hita halani pangarapan bani hasangapon ni Naibata. ³ Tapi seng pitah ai, megah do homa hita ibagas hamarsikon, ai ibotoh hita, ihorhon hamarsikon ai do hasabaron; ⁴ hasabaron ai mangkorhon hatalupon, anjaha hatalupon ai mangkorhon pangarapan. ⁵ Anjaha pangarapan ai seng paroh habadoron, ai domma iuseihon hubagas uhurta holong ni uhur ni Naibata marhitei Tonduy Napansing, na dob binereNi banta. ⁶ Ai sanggah galek ope hita, ijai ma tongon matei Kristus manghopkop parjahat. ⁷ Ai payah do dong na ra matei manghopkop parpintor; ra, adong do na barani matei manghopkop halak na bujur. ⁸ Tapi Naibata, domma ipatalar holong ni uhurNi ai banta, ai ma marhitei na matei Kristus manghopkop hita, sanggah pardousa ope hita. ⁹ Ase lambin maluah ma hita nuan humbani ringis in marhiteihonSi, dob ipintori hita ibagas darohNi ai. ¹⁰ Ai anggo ipadamei hita pakon Naibata sanggah munsuhNi ope hita, marhitei parmatei ni Anakni in, ai lang lambin maluah ma hita, na dob pinadameiNi in, dob manggoluh Ia? ¹¹ Tapi seng pitah ai, megah do homa hita ibagas Naibata, marhitei Tuhanta Jesus Kristus, ai marhiteihonSi do ijalo hita nuan pardameian in. ¹² Halani ai, songon na masuk dousa in hu dunia on marhitei sada halak, anjaha marhitei dousa in roh hamateian, anjaha sonai ma das hamateian in bani haganup jolma, halani haganup sidea mardousa. ¹³ Ia dousa domma i dunia on hinan, age seng roh hinan ope titah in, tapi dousa seng ihira, anggo seng dong titah. ¹⁴ Tapi hamateian in domma manggomgomi humbani si Adam nari das hubani si Musa, age pe seng dos pardousaon ni sidea hubani panlanggaron ni si Adam; usihan ni na sihol roh do ia. ¹⁵ Tapi silayak-layak ai seng songon panlanggaron ai. Ai anggo halani panlanggaron ni sada halak matei na mabuei in, daoh do surungan das bani na mabuei in idop ni uhur ni Naibata ampa silayak-layak, marhitei pangidopi ni sada jolma, in ma Jesus Kristus in. ¹⁶ Anjaha silayak-layak ai pe seng songon pangkorhon ni dousa ni na sada halak ai. Ai ihorhon uhum halani sada panlanggaron do hamagouan, tapi ihorhon silayak-layak ai do pamintorion humbani buei panlanggaron. ¹⁷ Ai anggo manggomgomi hamateian marhitei na sada halak ai halani panlanggaronni ai, lobihni ai ma halak na manjalo idop ni uhur na marlobih-lobih ampa silayak-layak hapintoran in, manggoluh anjaha manggomgomi marhitei na sada in, in ma Jesus Kristus. ¹⁸ Ase songon panlanggaron ni sada halak mangkorhon uhum hamagouan bani haganup jolma, sonai do marhitei pamintorion ni sada halak das hapintoran na pagoluhkon bani haganup jolma. ¹⁹ Ai songon marhitei panlawanon ni sada jolma gabe mardousa simbuei in, sonai do marhitei pambalosion ni na Sada in bahenonni pintor simbuei in. ²⁰ Jadi roh ma titah in patambah panlanggaron; tapi tambah pe dousa, lambin tambah do idop ni uhur. ²¹ Ase, songon na manggomgomi lobei dousa marhitei hamateian, sonai do age idop ni uhur in manggomgomi marhitei hapintoran na mangkorhon hagoluhan na sadokah ni dokahni marhitei Jesus Kristus Tuhanta in.

¹ Ase, aha ma hatahononta? Nunutonta ma mardousa, ase lambin tambah idop ni uhur? ² Seng sonai! Hita, na dob matei bani dousa in, sonaha tarbahen hita be manggoluh ibagas in? ³ Na so ibotoh nasiam do, haganup hita, na tardidi ibagas Kristus Jesus, hubagas hamateianNi do hita tardidi? ⁴ Jadi na dob rap tartanom do hita rap pakonSi marhitei pandidion in, ase songon Kristus Jesus, na dob pinapuho humbani na matei marhitei hasangapon ni BapaNi, sonai homa hita mardalan ibagas goluh na baru. ⁵ Ai anggo domma sangkabona hita pakonSi ibagas na songon parmateiNi ai, sada do homa hita pakonSi ibagas parpuhoNi ai. ⁶ Ai ibotoh hita, na dob tarsilang do hajolmaonta na buruk in rap pakonSi, ase iparseda badan pardousaon, ase ulang ra be hita parjabolonan ni dousa, ⁷ ai barang ise na dob matei, maluah do ia humbani dousa. ⁸ Tapi, anggo domma matei hita rap pakon Kristus ihaporsayai uhurta, rap manggoluh ma hita homa pakonSi. ⁹ Ibotoh hita, ia Kristus, dob puho Ia humbani na matei, seng matei be; seng irajai hamateian in be Ia. ¹⁰ Ia matei pe Ia, sahali ai do matei halani dousa; ia manggoluh nuan, manggoluh bani Naibata do. ¹¹ Sonai ma hira nasiam dirinasiam: Matei bani dousa, tapi manggoluh bani Naibata ibagas Kristus Jesus. ¹² Ase, ulang be dousa ai manrajai ibagas badannasiam na ra matei in, laho mambalosi hisap-hisapni. ¹³ Anjaha ulang ma ondoskon nasiam pagorinasiam bani dousa in, gabe sinjata ni hajahaton, tapi ondoskon nasiam ma dirinasiam bani Naibata, songon na dob pinagoluh humbani na matei, anjaha pagorinasiam pe, bani Naibata ma in, gabe sinjata ni hapintoran. ¹⁴ Ai seng rajaan ni dousa in be nasiam, ai seng titah be manggomgomi nasiam, tapi idop ni uhur do. ¹⁵ Ase, sonaha do? Mardousai ma hita, halani seng be titah manggomgomi hita, tapi idop ni uhur do? Seng sonai! ¹⁶ Ai lang ibotoh nasiam, bani ise iondoskon nasiam dirinasiam gabe jabolon pambalosi, jabolon ma nasiam bani na binalosannasiam ai, atap jabolon ni dousa hu hamateian, barang pambalosi bani hapintoran. ¹⁷ Tapi tarima kasih ma bani Naibata, ai age pe jabolon ni dousa hinan nasiam, tapi gabe pambalosi do nasiam sonari humbani gok ni uhurnasiam bani ruhut ni pangajarion, na dob das bani nasiam. ¹⁸ Ai dob lopas nasiam humbani dousa in, gabe pambalosi do nasiam bani hapintoran. ¹⁹ Ruhut ni jolma ma huhatahon halani hagalekon ni dagingnasiam. Ai songon na dob niondoskon nasiam pagorinasiam pambalosi bani habutakon ampa na so uhum, laho mangkorjahon na so uhum in, sonai ma nuan ondoskon nasiam pagorinasiam bani hapintoran, laho papansingkonsi. ²⁰ Tongon sanggah jabolon ni dousa nasiam, bebas do nasiam humbani hapintoran. ²¹ Tapi aha do buahni jumpah nasiam? Sihailaonkon anggo sonari bani nasiam, ai hamateian do ujungni. ²² Tapi sonari, dob bebas nasiam humbani dousa, dob gabe pambalosi nasiam bani Naibata, adong do buahnasiam hu hapansingon; anjaha ujungni ai ma hagoluhan na sadokah ni dokahni. ²³ Ai upah halani dousa, ai ma hamateian, tapi silayak-layak ni Naibata do hagoluhan na sadokah ni dokahni marhitei Kristus Jesus Tuhanta in.

¹ Ai lang ibotoh nasiam, nasiam sanina (hubani na mambotoh titah do hatangkon), na igomgomi titah do jolma, sadokah manggoluh ia? ² Sada naboru, na dob tarsangkut do ia marhitei titah bani paramangonni, sadokah manggoluh dalahi ai, tapi anggo domma matei dalahi ai, bebas ma naboru ai humbani titah dompak dalahi ai. ³ Halani ai parbangkis do ia goranon, anggo laho ia bani dalahi na legan, sanggah manggoluh ope paramangonni. Tapi, anggo domma matei dalahi ai, bebas ma ia humbani titah, seng be parbangkis ia goranon, anggo laho ia bani dalahi na legan. ⁴ Sonai ma nasiam, ale hasoman, domma matei nasiam bani titah in marhitei daging ni Kristus, ase na legan simada nasiam, ai ma na dob puho humbani na matei in, ase marbuah hita bani Naibata. ⁵ Ai, sanggah ibagas daging hita, margogoh do hisap pardousaon in ibagas pagorinta halani titah in, gabe na parbuahkon hamateian. ⁶ Tapi sonari domma sirang hita humbani titah in, matei bani sipanjolomi hita hinan, ase pambalosi hita ibagas habayuon ni Tonduy in, ulang be ibagas haburukon ni surat ni titah in. ⁷ Ase sonaha ma hatahononta? Dousa do titah in? Seng sonai! Tapi seng na hutanda dousa, anggo seng marhitei titah in. Ai seng na hubotoh hisap-hisap in, ambit lang ihatahon titah in: Ulang ho marhahisapon. ⁸ Marbona humbani titah in, ipuhoi dousa in do ibagas ahu bagei ni hisap-hisap; ai matei do dousa, anggo seng adong titah. ⁹ Manggoluh do ahu hinan, seng martitah. Tapi roh ma titah in, gabe manggoluh ma dousa in. ¹⁰ Tapi anggo ahu matei do, ase gabe hamateian do bakku titah in, sihorhon hagoluhan namin. ¹¹ Ai marbona hunjai, ipaoto-oto anjaha ipamatei dousa in do ahu marhitei titah in. ¹² Ase na pansing do titah in, pansing do tonah ni Naibata, pintor anjaha dear. ¹³ Ai gabe hamateian do bakku na madear in? Seng sonai! Tapi dousa in do paroh hamateian bakku marhitei na madear, ase talar dousa in, anjaha tidak jahatni na tarlobih in marhitei titah in. ¹⁴ Ai ibotoh hita, partonduyon do titah in; tapi paruhur daging do ahu, na dob tarjual bani dousa. ¹⁵ Ai seng huarusi na hubahen in; ai seng na huharosuhkon ai huhorjahon, tapi na huhagigihon ai do hulahoi. ¹⁶ Tapi anggo huhorjahon na so huharosuhkon, na husatujui ma hadearon ni titah in. ¹⁷ Ase sedo ahu, na mangkorjahon ai, tapi dousa ai do na marianan ibagas ahu. ¹⁸ Ai hubotoh do, seng dong na madear marianan ibagas ahu, ai ma ibagas dagingku. Ia sihol ni uhur jumpah do namin bakku, tapi na mandalankon na madear seng dong jumpah. ¹⁹ Ai seng huhorjahon na madear, na hinarosuhkonkai, tapi na sambor, na so huharosuhkon do hubahen. ²⁰ Jadi anggo hubahen na so huharosuhkon, seng ahu na mangkorjahon ai, tapi dousa ai do na marianan ibagas ahu. ²¹ Ase on ma titah na jumpah ahu ibagas diringku: Na madear do husurahon sihol bahenonku, tapi na masambor do huhorjahon. ²² Ai ihamalaskon jolma parbagas na bakku ai do namin titah ni Naibata, ²³ tapi huidah do titah na legan ibagas pagori ni dagingku, na marmunsuh dompak titah na ibagas uhurhu, gabe ipatunduk do ahu bani titah ni dousa, na adong ibagas pagoringku. ²⁴ Aih, ahu jolma na masombuh on. Ise ma na paluahkon ahu humbani angkula hamateian on? ²⁵ Tarima kasih ma bani Naibata marhitei Jesus Kristus Tuhanta in. Ase, sonai ma nuan: Ahu sandiri mambalosi titah ni Naibata marhitei uhurhu ibagas, tapi marhitei daging, titah ni dousa do.

¹ Ase, seng mangonai be nuan uhum bani halak na ibagas Kristus Jesus, (na so marparlahou marguru hubani daging, tapi marguru bani Tonduy do). ² Ai titah ni tonduy hagoluhan na ibagas Kristus Jesus do na mamardekahon ahu humbani titah ni dousa ampa hamateian. ³ Ai dob seng margogoh be titah in, pinagalek ni daging, isuruh Naibata ma Anakni sandiri marrupa daging pardousaon, marhalanihon ni dousa. Gabe sonai ma ihonahon uhum bani dousa in, ibagas daging ai, ⁴ ase jumpah ma hapintoran na pinangindo ni titah in banta, hita na marparlahou mangihutkon Tonduy, seng mangihutkon daging. ⁵ Ai pardagingon do iparuhurhon na mangihutkon daging, tapi partonduyon do iparuhurhon na mangihutkon Tonduy in. ⁶ Ai hamateian do hauhuron ni daging, tapi hauhuron ni Tonduy ai ma hagoluhan ampa hadameion. ⁷ Ia hauhuron ni daging ai ma hamunsuhon dompak Naibata; seng ra tunduk in bani titah ni Naibata, ai seng tarbahensi. ⁸ Halak na ibagas daging seng tarbahensi pamalas uhur ni Naibata. ⁹ Ia nasiam, seng ibagas daging, tapi ibagas Tonduy do, anggo tongon Tonduy ni Naibata marianan ibagas nasiam. Tapi anggo seng Tonduy ni Kristus bani jolma, seng Kristus simadasi. ¹⁰ Tapi anggo Kristus ibagas nasiam, matei do tongon badan halani dousa, tapi manggoluh do tonduy halani hapitoran. ¹¹ Tapi anggo marianan ibagas nasiam Tonduy ni na mamuhoi Jesus humbani na matei, pagoluhon ni Sipuhoi Jesus humbani na matei in do age badannasiam na ra matei in, marhitei Tonduyni na marianan ibagas nasiam. ¹² Ai pe ale hasoman, parutang do hita, tapi sedo bani daging, ase marparlahou marguru hubani daging. ¹³ Ai anggo marguru hu daging nasiam marparlahou, maningon matei do nasiam; tapi anggo ipamatei nasiam horja ni daging marhitei Tonduy in, manggoluh ma nasiam. ¹⁴ Ai sagala na binobahon ni Tonduy ni Naibata, ai ma anak ni Naibata. ¹⁵ Ai seng ijalo nasiam tonduy jabolon ase mangulaki biar, tapi tonduy anak do ijalo nasiam; marhitei in do hita mardilo: Abba, Ham Bapa! ¹⁶ Tonduy in do manaksihon rap pakon tonduyta, paboa anak ni Naibata do hita. ¹⁷ Ai anggo anak hita, dihut ma panean, panean bani Naibata, hasoman panean ni Kristus. Anggo hasomanNi hita manaron, gabe hasomanNi ma homa hita ibagas hasangapon. ¹⁸ Ai huhira, sitaronon bani panorang sisonari seng satimbang in marimbang hasangapon, na sihol sipatalaron ope banta. ¹⁹ Ai masihol do sagala na tinompa in paima-imahon panorangni, ase ipatalar anak ni Naibata. ²⁰ Ai bani na lang do ipatunduk na tinompa in, seng humbani rosuhni, tapi halani na patundukkonsi do, ase dong pangarapan, ²¹ ai simardekahononkon do age na tinompa in, humbani parjabolonan ni hamagouan hu hamardekaon hasangapon ni anak ni Naibata. ²² Ai ibotoh hita do, rap marhoih anjaha mangarou do sagala na tinompa in ronsi sonari. ²³ Ambah ni ai, age hita, na dob manjalo limbuah ni Tonduy in, marhoih do ibagas uhurta, paima-imahon haanakon, ase maluah pamatangta. ²⁴ Ai ase marpangarapan do, ase ipaluah hita. Ai anggo naidah na niarapkon in, seng pangarapan be ai; ai anggo domma naidah, mase arapkonon be ai. ²⁵ Tapi, anggo mangarap do hita bani na so niidah ope, sabar ma hita paima-imahonsi. ²⁶ Tapi age Tonduy in, iurupi do hita bani hagalekonta. Ai seng ibotoh hita, barang aha do na patut sipindoonta, gabe iapiti Tonduy in do hita marhitei hoih na so tarhatahon. ²⁷ Tapi ibotoh Sitanda uhur in do paruhuron ni Tonduy in, ai marguru bani rosuh ni Naibata do pangapitini bani halak na mapansing in. ²⁸ Ai ibotoh hita do, haganup do manumpak hubani na madear bani sagala na marholong ni uhur bani Naibata, na nidiloNi humbani sura-suraNi hinan. ²⁹ Ai na tinandaNi hinan, ai do itodoh, ase usih sidea hubani rupa ni AnakNi in, ase Ia ma na parlobei tubuh humbani sanina na buei in. ³⁰ Ai na tinandaNi hinan, ai do idilo, anjaha na nidiloNi, ai do ipintori, anjaha na pinintoranNi, ai do ipasangap. ³¹ Ai pe, aha ma hatahononta pasal ai? Anggo Naibata hasomanta, ise ma imbangta? ³² Seng ilioi AnakNi sandiri, tapi iondoskon do mangkophop hita haganup; mintor lang ma layak-layakkononNi rap pakonSi haganupan ai banta? ³³ Ise ma na mangaduhon na pinilih ni Naibata? Naibata do na mamintori. ³⁴ Ise ma na mandabuh uhum? Domma matei Kristus Jesus, lobih ni ai ope tene, domma mulak manggoluh, i siamun ni Naibata do Ia mangapiti hita. ³⁵ Ise manirang hita humbani holong ni uhur ni Kristus? Hamarsikon do atap hasosakan, parburuon do atap lohei, hatalanjangon do atap mara atap podang do? ³⁶ Songon na tarsurat in: Halani Ham do hanami ibunuhi layur ari, songon biri-biri si sayaton do hanami ihira. ³⁷ Tapi ibagas haganupan ai monang do hita halani na mangkaholongi hita ai. ³⁸ Tenger do uhurhu, seng tarbahen sirang hita humbani holong ni uhur ni Naibata, na ibagas Kristus Jesus Tuhanta in, barang bahenon ni hamateian, barang hagoluhan, barang malekat, barang siparkuasa, barang na masa sonari, barang na sihol masa, barang hagogohon pe, ³⁹ barang bahenon ni na i atas age na i toruh, ronsi sagala na tinompa na legan pe.

¹ Sintong do na huhatahon on ibagas Kristus, seng marladung ahu, dihut do panggora ni uhurhu manaksihon marhitei Tonduy Na pansing, ² paboa pusok tumang do uhurhu anjaha tongtong marborit ni uhur ibagas. ³ Ipangindo uhurhu do age bali humbani Kristus halani saninangku, hasomanku sabangsa mangihutkon pardagingon. ⁴ Bangsa Israel do sidea, simada hak haanakon, hasangapon, parpadanan, titah, parugamaon, bagah-bagah, ⁵ ampa ompung ni bangsa in, anjaha humbani sidea do roh Kristus mangihutkon pardagingon, Naibata na mangatasi haganup, na tarpuji ronsi sadokah ni dokahni, Amen. ⁶ Tapi sedo na gabe lang asi hata ni Naibata. Ai seng haganup na marasal humbani Israel, margoran Israel ai. ⁷ Anjaha seng haganup ginompar ni si Abraham anak ni si Abraham, tapi: Na susur humbani si Isak do goranon ginomparmu. ⁸ Artini ai: Sedo anak ni daging anak ni Naibata, tapi anak na pinarbagah-bagah ai do ihira anak na tongon. ⁹ Ai sonon do hata ni bagah-bagah ai: Sonon musimni use, roh do Ahu, anjaha adong ma ijai sada anak bani si Sara. ¹⁰ Seng pitah ai buktini, tapi dihut do si Rabekka, na boratan rumah humbani sada halak, ai ma si Isak, ompungta ai. ¹¹ Ai sanggah lape tubuh ope sidea, lang ope ihorjahon na madear barang na masambor, ase totap sura-sura ni Naibata domu hubani pamilihonni. ¹² Seng marguru bani pambahenan, tapi pitah bani na mandilo tumang do, ihatahon do hubani: Maningon sikahanan do pambalosi bani sianggian. ¹³ Songon na tarsurat ai homa: Holong do uhurhu bani si Jakob, tapi sogam do bani si Esau. ¹⁴ Ai pe, aha ma hatahononta? Ai lang songon na geduk ma Naibata? Seng sonai. ¹⁵ Ai ihatahon do hubani si Musa: Maidop do uhurHu bani na Huidopi, anjaha marontou do uhurHu bani siontouan ni uhurHu. ¹⁶ Ase seng marguru bani rosuh ni jolma atap horjani, tapi bani idop ni uhur ni Naibata do. ¹⁷ Ai sonon do nini surat in hubani Parao: Halani on do ase Hupabangkit ho, ase Hupatalar kuasangKu marhitei ho, ase tarambilan goranKu hu sab dunia on. ¹⁸ Ase iidopi do na sihol siidopanNi, anjaha ipahengkeng do na sihol sipahengkengonNi. ¹⁹ Ra ihatahon ham do bakku: Mase mansalahkon ope Ia? Ai ise boi manlawan harosuhNi? ²⁰ Ale jolma, ai ise ma ho, na pag manjabab Naibata? Mintor hatahonon ni na pinauli ma bani na paulihonsi: Mase ma sonon ahu ibahen ham? ²¹ Ai lang markuasa sitopa hudon, laho manjadihon humbani sangkimpal tanoh halampung, deba parugas bani na sangap anjaha deba nari bani na dorun? ²² Tapi sonaha ma, laho pataridahkon ringisNi anjaha pabotohkon kuasaNi, marsabar ni uhur do Naibata manganju parugas siringisan, na pinasirsir hinan hu hamagouan, ²³ ase ipabotohkon habayakon ni hasangaponNi bani parugas siidopan, ai ma na pinasirsirNi hinan bani hasangapon, ²⁴ ai ma hita, na dob nidiloNi, seng pitah humbani Jahudi tumang, tapi dihut do homa humbani sipajuh begu-begu? ²⁵ Songon na hinatahonNi ai bani surat ni si Hosea: GoranonKu ma na so bangsangKu hinan bangsangKu, anjaha na so hinaholongan hinan haholonganKu. ²⁶ Anjaha, bani ianan ai, dob hinatahon lobei bani sidea: "Seng bangsangku hanima", pala ijai ma sidea goranon anak ni Naibata na manggoluh in. ²⁷ Ai idilohon si Jesaya do pasal bangsa Israel: Age pe na sa buei ni horsik na i topi ni laut buei ni anak ni Israel, pitah teba-tebani do na maluah. ²⁸ Ai pasaudon ni Tuhan in do hataNi i tanoh on gok anjaha podas. ²⁹ Songon na dob jinahaan ni si Jesaya hinan: Ambit lang itebai Tuhan Zebaot bonih banta, usih do hita bani Sodom ampa Gomora. ³⁰ Ase aha ma hatahononta? Sipajuh begu-begu na so mangindahi hapintoran, manjalo hapintoran, ai ma hapintoran na humbani haporsayaon. ³¹ Tapi Israel, na mangindahi titah hapintoran in, seng das hujai. ³² Halani aha? Ai ma halani seng humbani haporsayaon, tapi humbani horja do, gabe tartolsu sidea bani batu partolsuan in, ³³ songon na tarsurat in: Tonggor ma, hupatibal do i Sion sada batu partolsuan ampa sada batu gingging parsangsian, anjaha seng sipabadoron na porsaya Bani.

¹ Ale hasoman, ipangindo uhurhu do anjaha hutonggohon do sidea bani Naibata, andohar maluah. ² Ai husaksihon ma pasal sidea, paboa na pongkut uhur ni sidea dompak Naibata, tapi seng maruhur. ³ Ai seng itanda sidea hapintoran ni Naibata anjaha ipindahi sidea do, pajongjongkon hapintoran ni sidea sandiri, seng unduk sidea bani hapintoran ni Naibata. ⁴ Ai Kristus do ujung ni titah in, laho mamintori sagala na porsaya. ⁵ Ai isurathon si Musa do, paboa jolma na mangkorjahon hapintoran, na maronjolan bani titah, ai do na manggoluh marhitei ai. ⁶ Tapi hapintoran na humbani haporsayaon mangkatahon sonon: Ulang ma hatahon ibagas uhurmu: Ise ma na manaik hu nagori atas, ai ma, mangalop Kristus hunjai? ⁷ Atap: Ise ma tuad hu nagori toruh, ai ma, mangarahkon Kristus humbani na matei? ⁸ Tapi sonon do ihatahon: Dohor do bamu hata in, ibagas pamanganmu anjaha ibagas uhurmu. Ai ma hata haporsayaon, na niambilankonnami. ⁹ Ai maluah ma ham, anggo isaksihon ham marhitei pamanganmu Tuhan Jesus, anjaha ihaporsayai ham ibagas uhurmu, na dob ipuhoi Naibata Ia humbani na matei. ¹⁰ Ai marhitei uhur do halak porsaya, laho hu hapintoran, anjaha marhitei pamangan manaksihon laho hu haluahon. ¹¹ Ai ihatahon surat in do: Sagala na porsaya Bani, seng pabadoron. ¹² Ai seng dong ubahni halak Jahudi age halak Gorik, ai Sada do Tuhan ni haganup, na manlayak-layakkon habayakonNi bani haganup na mandiloSi. ¹³ Ai sagala na mandilo Goran ni Tuhan in, sai paluahon do. ¹⁴ Tapi sonaha ma pardilo ni sidea Bani na so hinaporsayaon ni sidea? Tapi sonaha ma pangkaporsayai ni sidea bani na seng ongga ibogei sidea? Sonaha ma pambogei ni sidea, anggo seng dong na mangambilankon? ¹⁵ Sonaha ma marambilan sidea, anggo lang adong na marsuruh? Songon na tarsurat in: Jenges ni in langkah ni siambilankon na madear. ¹⁶ Tapi seng haganup na mambalosi Ambilan Namadear in, ai nini si Jesayas do: Ham Tuhan, ise ma na porsaya bani ambilannami? ¹⁷ Ai humbani na manangar ambilan do roh ni haporsayaon, anjaha ambilan ai roh humbani hata ni Kristus. ¹⁸ Tapi on ma hatahononku: Ai na so ibogei sidea do nani? Domma namin! Na dob das do sora ni sidea hu sab tanoh on, anjaha ronsi ujung ni dunia on do barita ni sidea. ¹⁹ Tapi ningku use: Seng nani ibotoh Israel ai? Parlobei si Musa do na mangkatahon: Bahenonku ma hanima marsimburu mangidah na so bangsa in, anjaha papuhoonku ma ringisnima dompak bangsa na so maruhur. ²⁰ Pag do si Jesayas mangkatahon: Na so mangindahi Ahu, ai do jumpahan, anjaha talar do Ahu bani na so sungkun-sungkun Bangku. ²¹ Tapi bani Israel ihatahon do: Layur-layur ari do hupaherbang tanganku bani bangsa na so mambalosi anjaha na manlawan.

¹ Ase husungkun ma: Ai na iambukkon Naibata do bangsaNi? Seng sonai! Ai halak Israel do age ahu, humbani ginompar ni si Abraham, marga Benjamin. ² Seng iambukkon Naibata bangsaNi, na dob tinandaNi hinan. Na so ibotoh nasiam do na hinatahon ni surat in pasal si Elias, sanggah na mangadu-adu ia bani Naibata pasal halak Israel: ³ Ham Tuhan, domma ibunuhi sidea nabi-nabi-Mu, iparreong anjap-anjap-Mu, anjaha sahalak ahu mando na tading manggoluh, anjaha hosahku pe sihol do buaton ni sidea. ⁴ Tapi aha do balos ni Naibata na roh hubani? Husarihon do Bangku pitu ribu halak, na so marsombah bani naibata Baal! ⁵ Sonai homa bani panorang sonari, adong do teba-teba na tading, na pinilih marhitei idop ni uhur. ⁶ Tapi anggo humbani idop ni uhur, seng be humbani horja, ai ambit sonai, seng goranon be ai idop ni uhur. ⁷ Ase sonaha do? Na pinindahan ni halak Israel, seng jumpah sidea, tapi halak na pinilih ai jumpahsi do ai; ia na legan ai domma ipahengkeng uhurni, ⁸ songon na tarsurat ai: Ibere Naibata do bani sidea tonduy na tarpodom, mata na so marpangidah ampa pinggol na so marbinogei ronsi sadari on. ⁹ Anjaha si Daud pe ihatahon do: Meja ni sidea gabe tirangkap ampa siding ma bani sidea, gabe partolsuan ampa pambalason ma tene! ¹⁰ Ipagolap ma mata ni sidea, ase ulang marpangidah, anjaha tanggurung ni sidea gundung ma tongtong! ¹¹ On do na huhatahon: Na sihol tompas do sidea, ase tartolsu? Seng sonai! Tapi panlanggaron ni sidea do gabe haluahon bani halak sipajuh begu-begu, ase marsimburu sidea pasal ai. ¹² Tapi, anggo panlanggaron ni sidea gabe habayakon ni dunia on, anjaha hahurangan ni sidea ai gabe habayakon ni sipajuh begu-begu, ai lang lobih ni ai ma, anggo masuk sidea haganup? ¹³ Hubani nasiam sipajuh begu-begu do hatangkon: Halani apostel bani sipajuh begu-begu do ahu, sangap do hubahen jabatankin, ¹⁴ andohar marsimburu hubahen hasomanku sabangsa, andohar maluah deba humbani sidea. ¹⁵ Ai anggo gabe pardameian do bani dunia on na tarbuang ai sidea, ai lang hagoluhan humbani na matei ma in, anggo tarjalo use sidea? ¹⁶ Ai anggo pansing ruti na parlobei igalangkon ai, pansing ma age aguan na tading ai; anjaha anggo pansing uratni, pansing ma age dangkahni. ¹⁷ Tapi anggo irampingkon deba rantingni, ase boi ho, na marasal humbani hayu jetun harangan hinan, isumbathon hujai, gabe parrupei ho bani hayu jetun, na gok minak ai, ¹⁸ ulang ma gijang uhurmu dompak ranting ai. Anggo gijang uhurmu, ingat ma, sedo ho na mangusung urat ai, tapi niusung ni urat ai do ho. ¹⁹ Sihol hatahononmu: Irampingkon pe ranting ai, ase ahu do isumbatkon hujai! ²⁰ Dear! Halani na so porsaya do sidea ase irampingkon, tapi halani haporsayaon do ase jongjong ho. Ulang ma gijang uhurmu, tapi mabiar ma tene! ²¹ Ai anggo seng ipaturut Naibata ranting hinan, ho pe sabonar seng paturutonNi. ²² Ai, pe tonggor ma layak ni Naibata ampa korasNi: Koras do Ia dompak na dob tompas ai; layak do Ia dompak ho, anggo totap ho ibagas halayakonNi in, anggo lang, rotaponNi do age ho! ²³ Sidea pe, anggo seng martahan sidea ibagas na lang porsaya ai, sumbathononni do; margogoh do Naibata manumbathon sidea use. ²⁴ Ai anggo irampingkon ho humbani hayu jetun harangan hinan, gabe isumbathon ho hubani hayu jetun na sinuan, marlawanan hubani biak hinan, lambin sidea ma lang tarsumbathonsi bani hayu jetun hinan? ²⁵ Seng marosuh uhurhu, ale hasoman, seng ibotoh nasiam pasal rusia on, ase ulang mangunsagah nasiam bani pambotohnasiam. Na dob sogop do lobei hahengkengon bani deba bangsa Israel, paima gok bilangan ni sipajuh begu-begu masuk, ²⁶ anjaha marhitei na sonai maluah haganup Israel, songon na tarsurat in: Na roh ma hun Sion Sipaluah, padaohonNi ma hajahaton hun Jakob! ²⁷ Anjaha on ma padanku pakon sidea, anggo hubuat ma dousa ni sidea. ²⁸ Ase domu hubani Ambilan Namadear in, munsuh do sidea halani nasiam, tapi domu hubani pamilihon in, haholongan do sidea halani ompung na lobei. ²⁹ Ai seng ongga manosal Naibata pasal sibere-bereNi ampa pandiloonNi. ³⁰ Ai hinan seng sibalosi Naibata nasiam, tapi sonari jumpahan idop ni uhur do, halani na so porsaya ai sidea. ³¹ Sonai ma sidea sonari seng pambalosi, gabe dapotan idop ni uhur nasiam, ase jumpahan idop ni uhur homa sidea. ³² Ai domma iondoskon Naibata haganup hubani uhur na so mambalosi, ase idopanNi use haganup. ³³ Bagasni in tene habayakon, hapentaran ampa habotohon ni Naibata! Na so tarpareksa do uhumNi, anjaha na so taririk-irik do dalanNi! ³⁴ Ai ise ma na mambotoh pingkiran ni Tuhan in? Ise do sipanuturi Bani? ³⁵ Ise do na parlobei mambere Bani, ase Ia mambalas use bani? ³⁶ Ai hum-Bani, marhiteihon-Si anjaha hu-Bani do haganupan in. Bani ma hasangapon sadokah ni dokah ni Amen!

¹ Ai pe, hupaingat ma nasiam sanina marhitei idop ni uhur ni Naibata: Ondoskon nasiam ma angkulanasiam gabe galangan na manggoluh, na susi anjaha na hinarosuhkon ni Naibata, in ma parsombahonnasiam na maruhur! ² Anjaha ulang ma sarupa nasiam pakon dunia on, tapi mubah ma marhitei habayuon ni uhur, ase boi nasiam manimbangi atap aha do rosuh ni uhur ni Naibata, ai ma na madear, harosuh ampa na gokan dear. ³ Ase marhitei idop ni uhur na binereni hubakku, huhatahon ma bani ganup nasiam: Ulang ma gijang hira nasiam dirinasiam lobih humbani na patut, tapi pandei ma nasiam maruhur, ganup ma domu hubani banggal ni haporsayaon, na binagihon ni Naibata bani. ⁴ Ai songon hita marpagori na buei do bani sada badan, tapi seng sahorja pagori ai haganup, ⁵ sonai do homa hita, na buei ai, sada badan ibagas Kristus, tapi pagori bei do hita samah hita. ⁶ Palegan-legan do sibere-bere banta domu hubani idop ni uhur na binere banta. Anggo panjahaion, sihol ma domu hubani haporsayaon. ⁷ Anggo horja marugas, horja marugas ma; anggo pangajarion, mangajari ma! ⁸ Anggo horja mamodahi, ai ma; anggo na marsibere-bere, ibagas bulus ni uhur ma; anggo na mambobahon, marringgas ni uhur ma; anggo na marsilayak-layak, humbani malas ni uhur ma. ⁹ Ulang ma marsipakulah-kulah holong ni uhur in! Hagigihon nasiam ma na jahat in, parayak ma na madear! ¹⁰ Marsihaholongan ma nasiam ibagas holong parsaninaon! Marsilobei-lobeian ma nasiam marsipasangapan! ¹¹ Ulang ma surut ringgas ni uhurnasiam, hinsah ma ibagas tonduy, sisir ma mambalosi Tuhan in! ¹² Marmalas ni uhur ma nasiam mangarap, sabar bani hamarsikon, golgol bani tonggo! ¹³ Sarihon nasiam ma na porlu bani halak na mapansing; haporluhon ma partamueion! ¹⁴ Pasu-pasu nasiam ma na marburu nasiam, pasu-pasu ma, ulang burai! ¹⁵ Marmalas ni uhur ma nasiam rap pakon na marmalas ni uhur, tangis ma pakon na tangis! ¹⁶ Sada ma uhurnasiam samah nasiam; ulang ma hagijangon ai pingkiri nasiam, tapi hatoruhon ma parayak; ulang ma na pandei nasiam iagan uhurnasiam! ¹⁷ Ulang ma balaskon nasiam na jahat balas ni na jahat; porluhon nasiam ma na madear i lobei ni haganup halak. ¹⁸ Anggo tarbahen, sibar ni na tarhorjahon nasiam, mardamei ma nasiam pakon haganup halak. ¹⁹ Nasiam, na hinaholongan, ulang ma nasiam mambalas, tapi padas nasiam ma ringis in bani Naibata, ai tarsurat do: Bangku do pambalason, Ahu pe mambalaskon, nini Tuhan in. ²⁰ Ai pe, anggo loheian munsuhmu, bere mangan ia; anggo horahan ia, bere minum! Ai anggo ibahen ham sonai, na pajunjun narnar do ham bani uluni. ²¹ Ulang ma talu ham ibahen na jahat, tapi taluhon ham ma na jahat in marhitei na madear.

¹ Unduk ma ganup halak bani pamarentah na markuasa. Ai seng dong pamarentah anggo seng na humbani Naibata, na dong ai pe Naibata do manotapkon ai. ² Ase, na manlawan aturan ni Naibata do na manlawan pamarentah. Anjaha na manlawan ai, jaloonni do uhum bani. ³ Ia pamarentah seng sihabiaran ai bani sihorjahon na madear, tapi bani sihorjahon na jahat do. Marosuh ham seng mabiar bani pamarentah? Na dear ma horjahon, ase dapotan puji-pujian ham humbani sidea. ⁴ Juak-juak ni Naibata do sidea, laho mambahen na madear bamu. tapi, anggo na jahat ihorjahon ham, patut do mabiar ham, ai seng gurou-gurou podang na binoanni ai. Juak-juak ni Naibata do sidea, laho mangkonahon uhum bani sihorjahon hajahaton. ⁵ Halani ai patut do unduk hita, seng pitah halani ringis ai, tapi homa halani panggora ni uhur in. ⁶ Halani ai galar nasiam ma balasting. Pagawei ni Naibata do sidea na tongtong mardiateihon pasal in. ⁷ Galar nasiam ma bani ganup halak na patut situngguonni. Balasting bani na patut manjalosi, sohei bani haondosanni, biar bani na patut habiaran anjaha sangap bani na patut pasangapon. ⁸ Ulang ma marutang nasiam age bani ise pe, sobali na marsihaholongan, ai na mangkaholongi hasoman, in do na manggoki titah in. ⁹ Ai titah na mangkatahon: "Ulang ho marbangkis, ulang ho mamunuh, ulang ho manangko, ulang ho manguhur-uhuri," ronsi titah na legan pe, on do rimpunni: Haholongi ma hasomanmin songon dirimu! ¹⁰ Ia holong in seng ibahen na jahat dompak hasoman; ase holong do hagogok ni titah in. ¹¹ Ambah ni ai, ibotoh nasiam do, sonaha panorang on, paboa na jumpah ma panorangni puho humbani na modom, ai domma lambin dohor haluahonta nuan, marimbang mulai porsaya hita. ¹² Na laho salpu ma borngin, na dohor ma siang ni ari. Ai pe, tanggali hita ma pambahenan hagolapan, anjaha pakei hita ma sinjata haliharon! ¹³ Tipak ma parlahouta songon na patut arian, ulang marmangan-mangan ampa marminum-minum, ulang marhabutakon ampa uhur na so maila, ulang maringor ampa marsimburu! ¹⁴ Tapi pakei nasiam ma Tuhan Jesus Kristus, anjaha ulang ma balosi nasiam dagingnasiam, laho mamuhoi hisap-hisapni.

¹ Anju nasiam ma na galek marhaporsayaon, ulang ma marsalisih pasal pingkiran. ² Porsaya do na sada boi panganonni haganup, tapi na galek ai sayur-sayuran do hansa ipangan. ³ Na mangankon ulang ma mapas uhurni bani na so mangankon; anjaha na mangorom pe ulang ma iuhum-uhumi na mangankon, ai na dob ijalo Naibata do age ia. ⁴ Ai ise do ham, mambahen na iuhumi ham jabolon ni halak na legan? Marguru bani tuanni do ia, atap na jongjong ia barang na tompas. Tapi totap do ia, ai tarpatotap Tuhan in do ia. ⁵ Bani uhur ni na deba, marsisurungan do ari, bani uhur ni na legan, dos do ari in. Ganup ma marsijoloman bani hatengeran ni uhurni bei. ⁶ Na papansing ari in, bani Tuhan in ma ipapansing in: na mangankon, halani Tuhan in ma ipangan, ai bani Naibata do ia martarima kasih; anjaha na mangorom, halani Tuhan ma ia mangorom, anjaha bani Naibata ma ia martarima kasih. ⁷ Ai ganup hita seng manggoluh bani dirinta, anjaha ganup hita seng matei bani dirinta. ⁸ Ai manggoluh pe hita, manggoluh bani Tuhan in do, anjaha matei pe hita, matei bani Tuhan in do. Ase manggoluh barang matei pe hita, tong do bani Tuhan in hita. ⁹ Ai ase matei pe Kristus anjaha mulak manggoluh, ase Ia do Tuhan ni na matei age na manggoluh. ¹⁰ Ia ham, mase ma uhum-uhumonmu hasomanmu, anjaha mase ma mapas uhurmu bani hasomanmu? Ai lang haganup do hita maningon jongjong i lobei ni paratas ni Naibata? ¹¹ Ai tarsurat do: Na manggoluh do Ahu, nini Tuhan. Bangku do manrogop sagala towod, anjaha sagala dilah mangakui Naibata. ¹² Ase ganup do hita marbalos pasal dirinta bei i lobei ni Naibata. ¹³ Ase ulang be hita marsiuhum-uhuman! Tapi dearan ma naputushon, ulang be nabahen partolsuan atap parsangsian bani sanina. ¹⁴ Torang do hubotoh marhitei Tuhan Jesus, na so adong na butak hinan, tapi gabe butak do ai bani na mangahapkon ai butak. ¹⁵ Ai anggo ipusoki ham uhur ni hasomanmu marhitei na pinanganmu, seng be mardalan ibagas holong ham. Ulang ma magou hasomanmu halani sipanganon, ai na dob matei do Kristus manghophopsi. ¹⁶ Ulang ma na madear ai bani nasiam, gabe sirisaon ni halak. ¹⁷ Ai sedo sipanganon barang siinumon harajaon ni Naibata, tapi hapintoran ampa damei ampa malas ni uhur do ibagas Tonduy Napansing. ¹⁸ Ai anggo pambalosi ham bani Kristus pasal ai, harosuh ni Naibata ma ham anjaha harga bani jolma. ¹⁹ Halani ai parayak hita ma na padameihon ampa na patorsa-torsahon hita samah hita! ²⁰ Ulang ma parseda horja ni Naibata halani sipanganon. Haganup do namin pansing, tapi gabe hasedaon do ai bani sada halak, anggo sangsi ia ibagas na mangankon ai. ²¹ Dearan ma, ulang mangan gulei, ulang minum anggur, atap mangkorjahon aha pe, anggo mambahen parsangsian do ai bani hasomanmu. ²² Ia adong pe haporsayaonmu, bamu ma ai i lobei ni Naibata. Martuah ma halak, na so mansalahkon dirini be, pasal na dob hinadearhon ni uhurni. ²³ Ise na sangsi, tapi ipangan do, domma hona uhum, halani seng humbani haporsayaon ai. Ai sagala na so tubuh humbani haporsayaon, dousa do.

¹ Tapi hita na margogoh in, patut do manganju hagalekon ni na hurang gogoh, anjaha ulang ma rosuhta sandiri pindahi hita. ² Ganup ma hita mambahen rosuh ni uhur ni hasoman, gabe hadearonni, laho pauli-ulihonsi. ³ Ai Kristus pe seng rosuhNi sandiri ipindahi, songon na tarsurat in: Risa-risa ni na manrisai Ham mangonai do hu-Bangku! ⁴ Ai sagala na tarsurat hinan, bahen podah banta do ai, ase tarsurat ai, ase marpangarapan hita halani hasabaron ampa apoh-apoh na ibagas Surat in. ⁵ Tapi Naibata, simada hasabaron ampa apoh-apoh ma mambere bani nasiam hasadaon ni uhur samah nasiam mangihutkon rosuh ni Kristus Jesus, ⁶ ase sauhur anjaha sasora ma nasiam mamuji Naibata, Bapa ni Tuhanta Jesus Kristus. ⁷ Halani ai marsijaloan ma nasiam, songon panjalo ni Kristus banta, bahen hasangapon ni Naibata. ⁸ Ai huhatahon ma bani nasiam, na dob gabe pambalosi do Kristus bani na tarsunat halani hasintongan ni Naibata, laho patotapkon bagah-bagah, na hubani ompung na lobei, ⁹ anjaha sipajuh begu-begu pe pasangaphon Naibata do halani idop ni uhur-Ni, songon na tarsurat in: Halani ai pujionku do Ham itongah-tongah ni sipajuh begu-begu, anjaha dodingkononku do goran-Mu. ¹⁰ Anjaha ihatahon use: Marmalas ni uhur ma nasiam sipajuh begu-begu rap pakon bangsaNi! ¹¹ Dob ai use: Puji ma Tuhan in, nasiam haganup sipajuh begu-begu, anjaha haganup ma bangsa mamujiSi. ¹² Anjaha si Jesaya pe, nini do: Adong ma urat ni si Jesse, anjaha jongjong ma na manggomgom sipajuh begu-begu. Bani do mangarap sipajuh begu-begu. ¹³ Tapi Naibata, simada pangarapan in ma manlayak-layakhon bani nasiam hagogok ni malas ni uhur ampa damei marhitei haporsayaon, ase lambin tambah nasiam marpangarapan marhitei gogoh ni Tonduy Napansing. ¹⁴ Ahu pe torang do hubotoh, nasiam saninangku, paboa na dob gok do nasiam bani na madear, marisi bani haganup habotohon, anjaha boi marsipodah-podahan samah nasiam. ¹⁵ Tapi sonai pe, mapagtu do ahu manurat bani deba surathu bani nasiam, songon na pasingatkon nasiam, halani idop ni uhur na binere ni Naibata bakku, ¹⁶ ai gabe siparugas bani Kristus Jesus ampa gabe malim ni Ambilan Namadear na humbani Naibata bani bangsa sipajuh begu-begu, ase gabe galangan na hinarosuhkon ni Naibata sidea haganup, na pinapansing ibagas Tonduy Napansing. ¹⁷ Ibagas Kristus Jesus, adong do na mambahen megah uhurhu pasal horjangku i lobei ni Naibata. ¹⁸ Ai seng barani ahu, mangkatahon atap aha pe, sobali na binahen ni Kristus marhitei ahu, ai ma laho manogunogu sipajuh begu-begu, hu pambalosion ibagas hata ampa pambahenan, ¹⁹ marhasoman hagogohon ni tanda ampa halongangan, ibagas hagogohon ni Tonduy Napansing, gabe das huambilankon Ambilan Namadear na humbani Kristus, mamungkah hun Jerusalem ampa nagori inggotni ai das ronsi Iliria. ²⁰ Hasangaponku do huhira na mangambilankon Ambilan Namadear in bani ianan, na so tarbogei ope ijai Goran ni Kristus, ase ulang ahu songon na pauli rumah bani onjolan ni halak na legan, ²¹ tapi songon na tarsurat in ma: Marpangidah ma na so dapotan barita pasalsi, anjaha mangarusi ma na so ongga mambogeisi. ²² On do halani mambahen gati tarabat ahu marayak nasiam. ²³ Tapi anggo nuan, seng adong be sihorjahononku i nagori ai; anjaha domma piga-piga tahun hinan ihasiholi uhurhu marayak nasiam, bani pardalananku na laho hu Spania. ²⁴ Ai arap do uhurhu, idahonku nasiam sanggah na montas ahu, anjaha taruhkonnasiam ahu hujai, dob lobei sombuh uhurhu otik mangidah nasiam. ²⁵ Tapi hu Jerusalem ope langkahku sonari, laho marugas bani halak na pansing ai, ²⁶ ai iputushon kuria na i Mekedonia ampa na i Akaya do, mambahen tumpak pangurupion bani hasoman na mapansing na hurangan i Jerusalem. ²⁷ Domma sonai iputuskon sidea, ai parutang do sidea tongon bani sidea ai. Ai anggo gabe parrupei sipajuh begu-begu bani arta partonduyon na adong bani sidea, patut do sipajuh begu-begu mangurupi sidea pasal na porlu bani pardagingon. ²⁸ Anggo domma husaloseihon ai anjaha hupadas buah ai bani sidea, sihol do ahu bingkat hu Spania, anjaha singgah bani nasiam. ²⁹ Tapi hubotoh do, anggo roh ahu bani nasiam, ibagas hagogok ni pasu-pasu ni Kristus do ahu roh. ³⁰ Tapi ojur-ojurhu bani nasiam, ale hasoman, marhitei Tuhanta Jesus Kristus ampa marhitei holong ni uhur ni Tonduy in: Hasomani nasiam ma ahu maruntol marhitei na manonggohon ahu bani Naibata, ³¹ andohar ipaluah ahu humbani halak na so porsaya i Judea, anjaha iharosuhkon halak na mapansing ai horjangku na hu Jerusalem ai, ³² andohar marmalas ni uhur ahu das bani nasiam, domu hubani rosuh ni Naibata, boi marsaran bani nasiam. ³³ Naibata Pardamei in ma mangkasomani nasiam ganup. Amen.

¹ Huondoskon ma bani nasiam botouta si Poibe, siparugas i kuria Kenkerea, ² ase ijalo nasiam ia ibagas Tuhan in, songon na patut bani halak na mapansing, anjaha iurupi nasiam ia bani sagala horja, anggo porlu urupan. Ai na dob gabe sipangurupi do ia bani buei halak, age bakku pe. ³ Padas nasiam ma tabingku bani si Priska ampa bani si Akila, hasomanku pangkorja ibagas Kristus Jesus, ⁴ na ra mamberehon borgokni laho mangkophop ahu, gabe seng pitah ahu martarima kasih bani sidea, tapi haganup kuria na humbani sipajuh begu-begu. ⁵ Tabingku homa bani kuria na martumpu i rumahni. Tabingku bani si Epenetus, haholongankin, bunga tubuh bani Kristus i Asia. ⁶ Tabingku bani si Maria, na buei mangkalojahon nasiam. ⁷ Tabingku bani si Andronikus ampa si Junias, hasomanku samarga anjaha hasomanku tartutup, sidear barita bani apostel-apostel in, anjaha na parlobei ibagas Kristus ase ahu. ⁸ Tabingku bani si Ampliatus, na huhaholongi ibagas Tuhan in. ⁹ Tabingku bani si Urbanus, hasomanta sahorja ibagas Kristus, sonai bani si Stakis, haholongankin. ¹⁰ Tabingku bani si Apelles, na tahan ibagas Kristus. Tabingku bani hasoman sarumah ni si Aristobulus. ¹¹ Tabingku bani si Herodion, hasomanku samarga. Tabingku bani hasoman sarumah ni si Narkissus, na adong ibagas Tuhan in. ¹² Tabingku bani si Tripena ampa si Triposa, na ra loja halani Tuhan in. Tabingku bani si Persis, haholongan in, na ra loja tumang halani Tuhan in. ¹³ Tabingku bani si Rupus, na pinilih ni Tuhan in, sonai bani inangni, na songon inang homa bakku. ¹⁴ Tabingku bani si Asinkritus, si Plegon, si Hermes, si Patrobas, si Hermas, age bani sanina na rap pakon sidea. ¹⁵ Tabingku bani si Pilologus, si Julia, si Nereus ampa botouni ai, bani si Olimpas ampa bani haganup hasoman ni sidea na pansing in. ¹⁶ Marsitabian ma nasiam marhitei summah na mapansing. Padas tabi do bani nasiam ganup kuria ni Tuhan in. ¹⁷ Hupaingat ma nasiam, saninangku, jaga ma nasiam bani halak, na mambahen parsalisihan ampa parsangsian marhitei na manlawan podah, na dob jinalo nasiam. Padaoh nasiam ma dirinasiam humbani sidea. ¹⁸ Ai halak na sonai, sedo Tuhanta Kristus in na binalosanni ai, tapi boltokni do, anjaha marhitei sahap na lampot-lampot ampa na mantin-mantin ipaoto-oto sidea do halak paruhur na saluju. ¹⁹ Na tarbarita do age ija pambalosionnasiam, anjaha malas do uhurhu pasal ai. Tapi huparsinta do ase pentar ma nasiam pasal na madear, anjaha pitah dompak na masambor. ²⁰ Tapi Naibata Pardamei in podas do ropukanni sibolis hu toruh ni naheinasiam. Idop ni uhur ni Tuhanta Jesus Kristus ma mangkasomani nasiam! ²¹ Manongos tabi do bani nasiam si Timoteus, hasomanku sahorja, sonai si Lusius, si Jason ampa si Sosipater, hasomanku samarga. ²² Mangkatahon tabi bani nasiam ibagas Tuhan in, ahu si Tertius, sisurat surat on. ²³ Mangkatahon tabi bani nasiam si Gayus, na manamuei ahu ampa haganup kuria in, sonai homa si Erastus, bendahara kota in, ampa si Kuartas, sanina in. ²⁴ Idop ni uhur ni Tuhanta Jesus Kristus ma mangkasomani nasiam ganup! Amen. ²⁵ Tapi Bani ma, na boi margogohi nasiam, domu hubani Ambilan Namadear na huambilankon ampa barita pasal Jesus Kristus, domu hubani pangungkabon ni rusia in, na pinonophon humbani na basaia, ²⁶ tapi domma ipatalar anggo nuan, anjaha marhitei surat ni nabi-nabi ipabotohkon bani sagala bangsa, domu hubani tonah ni Naibata na manongtong in, laho mamboan sidea hu haporsayaon ampa pambalosion: ²⁷ Bani Naibata parhapentaran na sasada in ma hasangapon ronsi sadokah ni dokahni marhitei Jesus Kristus! Amen.