PANGUNGKABON

PANGUNGKABON

¹ On ma pangungkabon ni Jesus Kristus, na binerehon ni Naibata hu Bani, laho patuduhkon hubani juak-juakNi na laho podas masa; jadi isuruh ma malekatNi pabotohkon ai bani juak-juakNi, si Johannes. ² Isaksihon do hata ni Naibata pakon hasaksian pasal Jesus Kristus, ai ma haganup na dob niidahni. ³ Martuah ma na mambasa pakon na mambogei hata ni panjahaion on, na marimbagaskon na tarsurat ibagas on, ai dohor ma panorangni. ⁴ Humbani si Johannes hubani na pitu kuria i Asia: Idop ni uhur ma bani nasiam pakon damei hum Bani, na dong sonari, na dob dong hinan ampa na laho roh, pakon humbani tonduy na pitu na i lobei ni hotakNi, ⁵ ampa humbani Jesus Kristus, saksi na bonar in, na parlobei tubuh humbani na matei, sigomgom sagala raja ni dunia on. Ia, na manghaholongi hita anjaha na paluahkon hita humbani dousanta marhitei darohNi, ⁶ na manjadihon hita gabe harajaon hamalimon bani Naibata Bapani: Bani ma hasangapon pakon hagogohon ronsi sadokah ni dokahni! Amen. ⁷ Tonggor ma, na roh ma Ia marhasoman hombun, anjaha idahon ni sagala mata ma Ia, sonai homa sidea na mamantom-Si; jadi mandoruh ma sagala bangsa na i tanoh on marhalani-Si. Sonai ma tongon. Amen. ⁸ Ahu do Alpa pakon Omega, Bonani pakon Ujungni, nini Tuhan Naibata, na dong sonari, na dob dong hinan pakon na laho roh, Pargogoh na so tarimbang. ⁹ Ahu si Johannes, sanina nasiam anjaha hasoman nasiam ibagas sitaronon pakon ibagas harajaon ampa ibagas hasabaron ibagas Jesus Kristus; i pulou Patmos do ahu ijia halani hata ni Naibata pakon halani panaksihon bani Jesus. ¹⁰ Ibagas Tonduy do ahu bani ari ni Tuhan in; jadi hubogei ma i pudingku sora na maling songon sora ni tarompit, ¹¹ na manghatahon: Atap aha na niidahmu, suratkon ma in bani sada buku anjaha tongoshon ma bani kuria na pitu ai, ai ma Epesus, Simirna, Pergamon, Tiatira, Sardes, Piladelpia pakon Laodikea. ¹² Jadi marhusor ma ahu dompak sora na marsahap pakon ahu ai. Sanggah na marhusor ai ahu, huidah ma pitu parsuluhan omas. ¹³ Anjaha i tongah-tongah ni parsuluhan ai adong ma sada songon Anak ni Jolma, na marbaju ganjang das hu naheiNi anjaha na margondit omas bani tontonNi. ¹⁴ Lopak do uluNi pakon jambulanNi songon ambulu ni biri-biri silopak, songon salju, anjaha songon gara ni apuy do ia mataNi. ¹⁵ NaheiNi songon tombaga na ilala ibagas panloburan, soraNi songon parhasak ni bah banggal. ¹⁶ Ijolom do pitu bintang ibagas tanganNi siamun, anjaha humbani pamanganNi luar do podang sidua mata na marot, anjaha bohiNi marsinalsal songon mataniari sanggah hadetenganni. ¹⁷ Sanggah huidah Ia, tompas ma ahu songon na matei i lobei ni naheiNi. Jadi itampeihon ma tangan siamunni hubakku, nini ma: Ulang mabiar! Ahu do Naparlobei pakon Naparpudi, ¹⁸ anjaha na manggoluh. Na dob matei do Ahu, anjaha tonggor ma, na manggoluh do Ahu ronsi sadokah ni dokahni, anjaha Bakku do anak kunsi ni hamateian pakon nagori toruh. ¹⁹ Ase suratkon ma na niidahmu, ai ma na masa sonari, age na laho masa ope i pudi ni on. ²⁰ Anjaha on do rusia pasal bintang na pitu, na niidahmu bani tangan siamunKu pakon parsuluhan omas na pitu in: Ia bintang na pitu in, in ma malekat ni kuria na pitu in, anjaha na pitu parsuluhan in, in ma na pitu kuria in.

¹ Surathon ma bani malekat ni kuria Epesus: On do hata ni na manjolom bintang na pitu bani tangan siamunni, anjaha na mardalan-dalan i tongah-tongah ni parsuluhan na pitu in: ² Hubotoh do sagala horjamu pakon paruntolonmu ampa hasabaronmu, anjaha na so tarpataron-taron ham halak parjahat. Iuji ham do na mangkatahon, apostel sidea, hape sedo na tongon; parladung do sidea jumpah ham. ³ Marsabar ni uhur do ham, manaron do ham halani goranKu, anjaha seng marnaloja ham. ⁴ Tapi adong do panghurangi ni uhurhu dompak ham, ai ma: Itadingkon ham do holong ni uhurmu na bani mungkahni ondi. ⁵ Ingat ma, hunja ham madabuh, paubah ham ma uhurmu, anjaha horjahon ma horjamu songon na bani mungkahni! Anggo lang, roh ma Ahu hubamu, hupadaoh ma parsuluhanmu in humbani iananni, anggo lang ipaubah ham uhurmu. ⁶ Tapi on adong do bamu: Ihagigihon ham do pambahenan ni halak Nikolai. Ahu pe huhagigihon do ai. ⁷ Itangihon na marpinggol ma na hinatahon ni Tonduy in hubani kuria in: Na monang in do bereonku mangan humbani hayu hagoluhan, na i Paradeiso ni Naibata. ⁸ Surathon ma bani malekat ni kuria Simirna: On do hata ni na Parlobei pakon na Parpudi, na dob matei anjaha na dob mulak manggoluh. ⁹ Hubotoh do hamarsikonmu pakon hasombuhonmu, tapi na bayak do ham, ampa parpahiri ni halak na manghatahon Jahudi sidea, hape seng tongon, tapi tumpuan ni sibolis do. ¹⁰ Ulang habiarhon sagala sitaronon, na sihol roh bamu. Tonggor ma, dabuhon ni sibolis ma atap piga nasiam hubagas tutupan, ase iuji nasiam anjaha marsik ma nasiam sapuluh ari dokahni. Sai bujur ma ham ronsi matei, dob ai berehononku ma bamu sortali hagoluhan ai! ¹¹ Sagala na marpinggol itangihon ma na hinatahon ni Tonduy in bani kuria in. Na monang in seng anjai mahua ia bahenon ni hamateian na paduahon in. ¹² Surathon ma bani malekat ni kuria Pergamon: On do hata ni na manjolom podang sidua mata na marot ai. ¹³ Hubotoh do, ija ham marianan, ai ma dohor bani hotak ni sibolis in. Marsijoloman do ham bani goranKu, seng iparnalang ham haporsayaonmu Bakku, age sanggah panorang ni si Antipas, saksikku hatengeran ni uhurhu in, na dob ibunuh i lobei nasiam bani ianan ni sibolis in. ¹⁴ Tapi adong do otik panghurangi ni uhurhu dompak ham: Adong do deba nasiam na mangihutkon podah ni si Bileam, na mangajari si Balak mambahen jarot bani halak Israel, gabe ipangan sidea na ginalangkon bani sisombah-sombahon anjaha marriah-riahi. ¹⁵ Sonai homa, adong do deba nasiam na mangihuthon pangajaran ni halak Nikolai. ¹⁶ Paubah ham ma uhurmu! Anggo lang, podas ma Ahu roh, marmunsuh dompak sidea marhitei podang ni pamanganKu. ¹⁷ Sagala na marpinggol itangihon ma na hinatahon ni Tonduy in bani kuria in. Bani na monang in ma bereonku manna na ponop in, anjaha bereonku ma bani batu putih ampa goran na baru, na tarsurat bani batu ai, na so binotoh ni atap ise sobali na manjalosi. ¹⁸ Surathon ma bani malekat ni kuria Tiatira: On do hata ni Anak ni Naibata, na marmata songon gara ni apuy anjaha naheini songon tombaga. ¹⁹ Hubotoh do sagala horjamu pakon holong ni uhurmu pakon haporsayaonmu pakon pansarihonmu pakon hasabaronmu ampa pambahenanmu na parpudi on, na bueinan humbani na parlobei ai. ²⁰ Tapi adong do panghurangi ni uhurhu dompak ham: Ipaturut ham do si Isebel, naboru ai, na mangkatahon nabi ia, gabe iajari anjaha ipakahou do juak-juakKu, ase marriah-riahi sidea anjaha ipangan galangan, na ginalangkon bani sisombah-sombahon. ²¹ Domma hubere panorang bani, ase ipaubah uhurni, tapi seng ra ia paubahkon uhur humbani parriah-riahonni ai. ²² Tonggor ma, bahenonku ma ia boritan iatas podomanni, anjaha hasomanni marbangkis ai dabuhonku do hu hamarsikon banggal, anggo lang ipaubah sidea uhurni manadingkon horjani ai. ²³ Anjaha dakdanak ni sidea bois do bahenonku matei, ase ibotoh ganup kuria in, paboa Ahu do sipareksa piah-piah pakon atei-atei, anjaha hubalashon bani ganup nasiam romban hubani horjani bei. ²⁴ Tapi bani nasiam na legan ai i Tiatira, na so mangirikhon pangajaran ai, anjaha na so mambotoh rusia ni setan na bagas-bagas ai, songon na hinatahon ni sidea, huhatahon ma bani nasiam: Seng be tampeihononku siporsanon na legan bani nasiam. ²⁵ Tapi, aha na dong bani nasiam, jolom nasiam ma ai poltik, ronsi roh Ahu. ²⁶ Bani na monang in pakon bani na mangkorjahon horjangKu das hu ujung, bereonKu do kuasa bani, manrajai bangsa parbegu. ²⁷ Parmahanonni ma sidea marhitei tungkot bosi anjaha rosakonni do sidea songon hudon tanoh, songon Ahu na dob manjalo kuasa in humbani BapangKu, ²⁸ anjaha berehononku do hubani bintang buhasiang. ²⁹ Sagala na marpinggol itangihon ma na hinatahon ni Tonduy in bani kuria in.

¹ Suratkon ma bani malekat ni kuria Sardes: On do hata ni Partonduy na pitu na humbani Naibata pakon Parbintang na pitu in: Hubotoh do sagala horjamu, na targoran do ham manggoluh, hape na matei do ham. ² Puho ma ham, anjaha pargogohi ham ma hasomanmu na tading in, na laho matei in; ai seng dong jumpah Ahu horjamu na gokan dear i lobei ni NaibatangKu. ³ Halani ai ingat ma aha na jinalomu anjaha aha na binogeimu, ramothon ham ma ai, anjaha paubah uhurmu. Anggo lang ham puho, roh ma Ahu songon panangko, anjaha seng botohonmu panorangni, sadihari parrohKu bamu. ⁴ Tapi dong do piga-piga halak bani nasiam i Sardes, na so pabutakkon pakeianni; sidea ma na sihol mardalan rapkon Ahu marpakeian putih, ai sidea do na talup. ⁵ Bani na monang in do hiohononkon pakeian putih, anjaha seng sasaponKu goranni humbani buku hagoluhan in. SaksihononKu do goranni i lobei ni Naibata ampa i lobei ni malekatNi. ⁶ Sagala na marpinggol itangihon ma na hinatahon ni Tonduy in hubani kuria in. ⁷ Surathon ma bani malekat ni kuria Piladelpia: On do hata ni Napansing anjaha Nasintong in, na manjolom anak kunsi ni si Daud, na mangungkab, anjaha seng dong na boi manutup, na manutup, anjaha seng dong na boi mangungkab. ⁸ Hubotoh do sagala horjamu. Tonggor ma, domma Huungkab i lobeimu labah, na so boi tutupon ni barang ise pe. Ai age pe otik gogohmu, idalankon ham do HatangKu, anjaha seng iparnalang ham goranKu. ⁹ Tonggor ma, huboan ma halak humbani tumpuan ni setan, na manghatahon Jahudi sidea, hape seng tongon, parladung do sidea. Tonggor ma, parohonKu do sidea marsombah bani jampal ni naheimu, ase ibotoh sidea, paboa na holong do uhurHu bamu. ¹⁰ Halani iramotkon ham do hata hasabaron na humbakku, Ahu pe ramothononKu ma ham bani ari parlajouan, na sihol roh hu sab dunia on, laho manlajou sagala na mangiankon tanoh on. ¹¹ Barah ma Ahu roh! Jolom ham ma na dong bamu, ulang dong na mambuat sortalimu! ¹² Na monang in do bahenonKu gabe basikah ibagas rumah ni NaibatangKu, seng anjai mandarat be ia hunjai; anjaha surathononKu ma goran ni NaibatangKu bani pakon goran ni huta ni NaibatangKu, ai ma Jerusalem na baru, na susur hun nagori atas humbani NaibatangKu, sonai homa goranKu na bayu in. ¹³ Sagala na marpinggol itangihon ma na hinatahon ni Tonduy in hubani kuria in! ¹⁴ Surathon ma bani malekat ni kuria Laodikea: On do hata ni si Amen, Saksi na bujur anjaha na bonar, mula ni panompaon ni Naibata. ¹⁵ Hubotoh do sagala horjamu: Seng sai ngilu, seng sai milas ham. Ambit ngilu ma namin atap milas! ¹⁶ Tapi, halani danggol-danggol sisilon ham, seng ngilu seng milas, utahhononKu ma ham humbani pamanganKu. ¹⁷ Ihatahon ham: Na bayak do ahu anjaha marnah na dong, seng hurangan ahu. Seng ibotoh ham, na madoyuk do ham hape anjaha na masombuh, na musil, na mapitung anjaha na talanjang. ¹⁸ Hupodahi ma ham mamboli omas hum Bakku, na dob pinapitah bani apuy, ase tongon bayak ham, sonai age pakeian putih sihiouhononmu, ase ulang taridah hailaonmu halani hatalanjangonmu, sonai age minak mamminaki matamu, ase marpangidah ham. ¹⁹ Ai sagala na Huhaholongi, ai do Hupinsang anjaha Huajar. Ase pongkuthon ma, anjaha paubah ham ma uhurmu! ²⁰ Tonggor ma, na jongjong do Ahu i lobei ni labah in manghartuki. Atap ise na mambogei sorangKu anjaha iungkab labah ai, masuk ma Ahu hubani, mangan ma Ahu rap pakonsi anjaha ia rap pakon Ahu. ²¹ Bani na monang in do berehononKu hundulan bani hotakKu rap pakon Ahu, songon Ahu, dob monang, hundul rap pakon BapangKu bani hotakNi ai. ²² Sagala na marpinggol itangihon ma na hinatahon ni Tonduy in hubani kuria in.

¹ Dob salpu ai, mangkawah ma ahu, jadi tonggor ma, tarbuka ma sada labah i nagori atas. Anjaha sora na hubogei bani mulani ai, na marsora songon sora ni tarompit hubakku, nini ma: Naik ma ho hujon, ase Hupatuduhkon bam na maningon laho masa, dob salpu on. ² Jadi mintor ibagas Tonduy ma ahu, anjaha tonggor ma, adong do sada paratas i nagori atas, anjaha adong do na hundul bani paratas ai. ³ Ia rupaNi na hundul ai songon intan jaspis pakon sardis do. Dong do sada halibitongan manliotisi paratas ai songon intan samarah rupani. ⁴ Inggot paratas ai adong do dua puluh ompat hotak, hundulan ni dua puluh ompat sintua, na marhiou silopak anjaha marsortali omas bani ulu ni sidea. ⁵ Anjaha luar do humbani paratas ai hilap ampa sora pakon longgur. Gara do pitu suluh i lobei ni paratas ai, ai ma na pitu Tonduy ni Naibata. ⁶ I lobei ni paratas ai adong ma songon laut kasa usih songon kristal. I tongah-tongah ni paratas ai pakon inggotni ai, adong do ompat pargoluh, parmata na buei i lobei ampa i pudi. ⁷ Pargoluh na parlobei ai usih do songon singa, pargoluh na paduahon songon lombu jonggi, pargoluh na patoluhon marbohi songon jolma, anjaha na paompathon usih songon manuk-manuk nanggordaha na habang. ⁸ Ganup pargoluh na ompat ai marhabong do onom bei; marmata na buei inggot ampa ibagas. Seng marsaran sidea arian borngin manghatahon: Na pansing, na pansing, na pansing do Tuhan Naibata, Sigomgom haganupan, na dob dong hinan, na dong nuan pakon na laho roh. ⁹ Siap hali, sanggah ibere pargoluh ai hasangapon pakon hamuliaon pakon tarima kasih bani na hundul i atas paratas ai, na manggoluh ronsi sadokah ni dokahni, ¹⁰ manrogop ma na dua puluh ompat sintua ai i lobei ni na hundul bani paratas ai, isombah ma Ia na manggoluh sadokah ni dokahni, itibalhon ma sortali ni sidea hulobei ni paratas ai, anjaha ihatahon ma: ¹¹ Ham Tuhan Naibatanami, na talup do ham manjalo hasangapon, hamuliaon pakon hagogohon, ai Ham do na manompa sagala na dong; humbani rosuhmu do ase manjadi in haganup anjaha tartompa.

¹ Dob ai huidah ma bani tangan siamun ni na hundul bani paratas ai sada buku, na marsurat hun darat pakon hun bagas, na ilak marhitei pitu lak. ² Anjaha huidah ma sada malekat na gogoh, na mandilohon maling: Ise ma na talup mangungkab buku in pakon mananggali lakni in? ³ Tapi seng dong barang ise i nagori atas, age i tanoh, age i toruh ni tanoh, na boi mambuka buku ai atap manonggor hu bagas. ⁴ Gabe tangis-tangis ma ahu, halani seng dong na talup mangungkab buku ai atap manonggor hu bagas. ⁵ Jadi nini sada humbani sintua ai ma hubakku: Ulang ham tangis! Tonggor ma, domma monang singa na humbani marga Juda, urat ni si Daud. Ia do na boi mambuka buku in pakon mananggali lakni. ⁶ Anjaha huidah ma i tongah-tongah ni paratas ai pakon pargoluh na ompat ai ampa sintua ai jongjong sada Anak ni Biri-biri, songon na dob isambolih, pitu do tandukni anjaha pitu do matani, ai ma na pitu Tonduy ni Naibata, na dob isuruh hu sab tanoh on. ⁷ Jadi roh ma Anak ni Biri-biri ai, ijalo ma buku ai hun tangan siamun ni na hundul iatas paratas ai. ⁸ Jadi dob ijalo buku ai, manrongop ma pargoluh na ompat ai ampa sintua na dua puluh ompat ai i lobei ni Anak ni Biri-biri ai; haganup do sidea manjolom husapi pakon pinggan omas gok bani na misbou, ai ma tonggo ni halak na pansing. ⁹ Idodingkon sidea ma doding na bayu, nini ma: Na talup do Ham manjalo buku in pakon mambuka sagala lakni; ai na dob tarbunuh do Ham anjaha marhitei darohmu itobus Ham do bani Naibata jolma humbani ganup morga, hata, pangku pakon bangsa, ¹⁰ anjaha ijadihon Ham do sidea bani Naibatanta gabe sada harajaon ampa malim-malim, anjaha manrajai sidea i atas tanoh in. ¹¹ Jadi sanggah mangkawah ahu, gabe hubogei ma sora ni buei malekat inggot paratas ai ampa pargoluh ai ampa sintua-sintua ai; ia bilangan ni sidea marlaksa-laksa anjaha marribu-ribu do. ¹² Marsora na maling do sidea manghatahon: Na talup do Anak ni Biri-biri, na dob tarsambolih in, manjalo kuasa, habayakon, hapentaron, hagogohon, hasangapon, hamuliaon ampa puji-pujian. ¹³ Jadi hubogei ma sagala na tinompa na i nagori atas, i tanoh pakon i toruh ni tanoh ampa ibagas laut, haganup na ibagas ai manghatahon: Puji-pujian, hasangapon, hamuliaon ampa hagogohon ronsi sadokah ni dokahni ma bani na hundul i atas paratas in pakon bani Anak ni Biri-biri in! ¹⁴ Anjaha ihatahon pargoluh na ompat ai ma: Amen! Anjaha manrogop ma sintua-sintua ai anjaha marsombah.

¹ Dob ai huidah ma, ibuha Anak ni Biri-biri ai ma sada lak humbani na pitu ai. Jadi hubogei ma sada humbani pargoluh na ompat ai marsora songon longgur mangkatahon: Roh Ma! ² Mangkawah ma ahu, gabe huidah ma sada huda putih. Marsior do na mangajak huda ai, ibere do bani sortali, anjaha misir ma ia songon parmonang laho marhamonangan. ³ Jadi dob ibuha lak na paduahon, hubogei ma pargoluh na paduahon mangkatahon: Roh ma! ⁴ Jadi luar ma sada huda na legan, gerger songon apuy. Ibere do bani na mangajak huda ai kuasa mambuat damei hun tanoh on, ase marsibunuhan sidea; lanjar ibere do bani sada podang na banggal. ⁵ Sanggah ibuha lak na patoluhon, hubogei ma sora ni pargoluh na patoluhon mangkatahon: Roh ma! Jadi huidah ma adong sada huda sibirong, anjaha adong do sada timbangan bani tangan ni na mangajak ai. ⁶ Anjaha hubogei ma sora hun tongah-tongah ni pargoluh na ompat ai mangkatahon: Satumba boras hargani sadinar, tolu tumba andolei hargani sadinar! Tapi ulang ma parseda minak pakon anggur. ⁷ Jadi dob ibuha lak na paompathon, hubogei ma sora ni pargoluh na paompathon mangkatahon: Roh ma! ⁸ Mangkawah ma ahu gabe huidah sada huda silabu; ia goran ni na mangajak huda ai Hamateian do, anjaha nagori toruh do mangihutkonsi. Ibere do bani sidea kuasa bani saparompat ni tanoh on, ase ibunuh marhitei podang, lohei, sampar ampa binatang panoroh na i tanoh on. ⁹ Jadi dob ibuha lak na palimahon, huidah ma itoruh ni anjap-anjap ai tonduy ni sagala na sinayat halani hata ni Naibata ampa halani panaksihon ni sidea. ¹⁰ Marsora na maling do sidea mardilo-dilo, nini ma: Piga dokah nari do, Ham Tuhan na pansing anjaha na sintong, ase manguhumi Ham anjaha iluluhon Ham darohnami dompak na marianan i tanoh in? ¹¹ Jadi ibere ma bani sidea hiou putih sada bei, anjaha ihatahon ma bani sidea ase sabar tongkin nari, paima gok bilangan ni juak-juak hasoman ni sidea ampa sanina ni sidea, na laho bunuhon ope songon sidea. ¹² Jadi huidah ma, sanggah na ibuha lak na paonomhon, masa ma lalou bolon, gabe marbirong ma mata ni ari songon guni horuy anjaha ganup bulan ai songon daroh. ¹³ Anjaha bintang na i langit ai mardabuhan ma hu tanoh, songon pardudur ni buah ni hayu ara, sanggah idugur logou na mapor. ¹⁴ Masab ma langit songon surat ginulung, anjaha sagala pulou pakon dolog mosor humbani iananni hinan. ¹⁵ Anjaha sagala raja ni tanoh on pakon na sangap-sangap pakon puanglima pakon halak na bayak pakon na markuasa, sagala jabolon ampa halak na mardeka, marponop bei ma sidea hubagas liang pakon batu na i dolog. ¹⁶ Nini sidea ma bani dolog ampa batu: Jombai ma hanami anjaha rungkub ma hanami humbani bohi ni na hundul bani paratas in ampa humbani ringis ni Anak ni Biri-biri in, ¹⁷ ai domma roh ari ni ringisni na banggal in; anjaha ise ma na boi manahan in?

¹ Dob ai huidah ma ompat malekat jongjong bani na ompat suhi-suhi ni tanoh on, manjolom na ompat logou ni tanoh on, ase ulang mangombus logou hu tanoh, laut ampa haganup hayu. ² Anjaha huidah ma homa sada malekat na legan, naik hun hapoltakan ni mata ni ari, manjolom sap ni Naibata na manggoluh in. Maling do ia mardilo-dilo bani malekat na ompat ai, na dob manjalo kuasa laho mansedahon tanoh pakon laut in, ³ nini ma: Ulang parseda nasiam lobei tanoh pakon laut, age hayu pe, paima isap hanami sagala juak-juak ni Naibatanta bani pardompakanni. ⁴ Anjaha hubogei do buei ni sagala na dob marsap ai: Saratus ompat puluh ompat ribu humbani haganup marga ni Israel. ⁵ Humbani marga Juda sapuluh dua ribu na dob marsap, humbani marga Ruben sapuluh dua ribu, humbani marga Gad sapuluh dua ribu, ⁶ humbani marga Aser sapuluh dua ribu, humbani marga Naptali sapuluh dua ribu, humbani marga Manasse sapuluh dua ribu, ⁷ humbani marga Simeon sapuluh dua ribu, humbani marga Lepi sapuluh dua ribu, humbani marga Isasar sapuluh dua ribu, ⁸ humbani marga Sebulon sapuluh dua ribu, humbani marga Josep sapuluh dua ribu, humbani marga Benjamin sapuluh dua ribu, na dob marsap. ⁹ Dob salpu ai, huidah ma humpulan na banggal, na so boi bilangan ni atap ise, humbani ganup bangsa, suku, marga, ampa hata jongjong i lobei ni paratas ai pakon i lobei ni Anak ni Biri-biri ai, marhiouhon hiou putih anjaha manjolom bulung ni palem. ¹⁰ Maling do sora ni sidea mardilohon: Bani Naibatanta, na hundul bani paratas in do haluahon, ampa bani Anak ni Biri-biri in! ¹¹ Anjaha jongjong ma sagala malekat inggot paratas ai ampa inggot sintua ampa pargoluh na ompat ai, anjaha manrogop ma sidea i lobei ni paratas ai marsombah bani Naibata, ¹² nini ma: Amen! Puji-pujian pakon hasangapon, hapentaron pakon tarima kasih, hamuliaon pakon hagogohon ampa kuasa ma bani Naibatanta in ronsi sadokah ni dokahni! Amen. ¹³ Jadi marsahap ma sada humbani sintua ai, nini ma dompak ahu: Ise do siparhiou putih in, anjaha hunja do in roh? ¹⁴ Jadi huhatahon ma dompaksi: Ham tuanku, ham do mambotohsi. Jadi nini ma dompak ahu: In ma, na dob roh humbani hamarsikon banggal ai; domma iburihi sidea hiou ni sidea anjaha ipaputih ibagas daroh ni Anak ni Biri-biri in. ¹⁵ Halani ai sai i lobei ni paratas ni Naibata do sidea marugas Bani arian pakon borngin ibagas rumahni, anjaha Ia, na hundul bani paratas ai ma, paherbangkon lampo-lamponi iatas ni sidea. ¹⁶ Seng be loheian sidea, lang be horahan, lang be hona milas ni ari sidea atap aha na milas pe; ¹⁷ ai parmahanon ni Anak ni Biri-biri na i tongah-tongah ni paratas ai do sidea, anjaha arahkononni do sidea hubani bah tubuh hagoluhan, anjaha apusan ni Naibata ma sagala iluh humbani mata ni sidea.

¹ Sanggah ibuha lak na papituhon ai, sip ma haganup i nagori atas tar satongah jam dokahni. ² Jadi huidah ma malekat na pitu ai, na jongjong i lobei ni Naibata, anjaha ibere ma bani sidea pitu tarompit. ³ Dob ai roh ma sada malekat na legan jongjong hu lambung ni anjap-anjap panggalangan ai, manjolom sada pardahupaan omas. Ibere ma bani buei dahupa, ase igalangkon ai mangurupi tonggo ni halak na pansing bani anjap-anjap omas ai i lobei ni paratas ai. ⁴ Gabe naik ma timus ni dahupa ai mangurupi tonggo ni halak na pansing, humbani tangan ni malekat ai hu lobei ni Naibata. ⁵ Dob ai ibuat malekat ai ma pardahupaan ai anjaha igoki ma ai bani apuy na humbani anjap-anjap ai, anjaha igijigkon ma ai hu tanoh; jadi masa ma longgur, sora, hilap pakon lalou. ⁶ Jadi marugas ma sipitu malekat ai, na manjolom tarompit na pitu ai, laho manompul ai. ⁷ Gabe isompul malekat na parlobei ai ma tarompitni, jadi masa ma sira-sira pakon apuy marsaor daroh; iuseihon ma ai hu tanoh, gabe mosog ma sapartolu ni tanoh pakon sapartolu ni hayu, anjaha mosog ma homa haganup poyon-poyon na maratah. ⁸ Dob ai isompul malekat na paduahon ai ma tarompitni, gabe adong ma songon dolog na banggal anjaha na gara igijigkon hu laut; gabe daroh ma sapartolu ni laut in, ⁹ lanjar matei ma sapartolu ni na tinompa na manggoluh i laut, anjaha maseda sapartolu ni sagala kapal. ¹⁰ Dob ai isompul malekat na patoluhon ai ma tarompitni, gabe madabuh ma hun langit sada bintang na banggal, na gara songon suluh, lanjar idabuhi ma sapartolu ni bah mardalan pakon bah tubuh. ¹¹ Ia goran ni bintang ai Apsintos (hapaeton) do; gabe paet ma sapartolu ni bah in, lanjar matei ma buei jolma ibahen bah na gabe mapaet ai. ¹² Dob ai isompul malekat na paompathon ai ma tarompitni, gabe hona bogbog ma sapartolu ni mataniari pakon sapartolu ni bulan ampa sapartolu ni bintang, gabe golap ma sapartoluni bei, gabe seng marsinondang be sapartolu ni arian, sonai age borgin. ¹³ Dob ai mangkawah ma ahu, gabe hubogei ma sada manuk-manuk nanggordaha habang i tongah langit, na marsora na maling mangkatahon: Bursik, bursik, bursik ma sagala na mangianhon tanoh in, pangkorhon ni sora na tading ai ope, ai ma tarompit ni malekat na tolu nari, na sihol manompul tarompit ope.

¹ Dob ai isompul malekat na palimahon ai ma tarompitni, gabe huidah ma madabuh sada bintang hun langit hu tanoh; ibere ma hubani anak kunsi ni ruang partoruh ai. ² Jadi ibuha ma ruang partoruh ai, gabe naik ma timus humbani ruang ai, songon timus ni pamurunan banggal, gabe golap ma mata ni ari pakon awang-awang ibahen timus na humbani ruang ai. ³ Anjaha mangkaluar ma balang humbani timus ai hu tanoh in, anjaha ibere ma bani sidea kuasa songon kuasa ni gansip golang na i tanoh in. ⁴ Jadi iparentahkon ma bani sidea, ase ulang ikahua poyon-poyon na i tanoh in, sonai sagala na maratah atap hayu aha pe, tapi pitah jolma hansa, na so marsap bani pardompakanni humbani Naibata. ⁵ Seng ipalopas sidea mambunuh jolma, pitah mangarsik-arsik hansa lima bulan dokahni; pangarsik ni sidea ai usih songon pambahen ni gansip golang sanggah idoit jolma. ⁶ Bani panorang ai pindahan ni jolma ma hamateian, tapi seng jumpahsi; sihol do namin uhur ni sidea matei, tapi lintun do hamateian in humbani sidea. ⁷ Ia rupa ni balang ai, usih do songon huda na sirsir laho hu parmunsuhan; adong do bani uluni sortali na songon omas, anjaha bohini songon bohi ni jolma do. ⁸ Marjambulan do sidea songon jambulan ni naboru, anjaha iponni songon ipon ni singa. ⁹ Marbaju-baju porang do sidea usih hubani baju-baju bosi; ia sora ni habong ni sidea songon sora ni buei gareta porang do, tinarik ni buei huda na marpojong hu parmunsuhan. ¹⁰ Marihur do sidea songon ihur ni gansip golang anjaha marsorod; bani ihur ni sidea ai do kuasa ni sidea laho mangarsik-arsik jolma lima bulan dokahni. ¹¹ Dong do sada raja bani sidea, ai ma malekat hun ruang partoruh, na margoran Abaddon bani hata Heber anjaha Apollion (sipangagou) bani hata Gorik. ¹² Domma salpu bursik-bursik na parlobei; tonggor ma, roh ope dua nari ipudi ni on. ¹³ Dob ai isompul malekat na paonomhon ma tarompitni, jadi hubogei ma sada sora hun tanduk na ompat na bani anjap-anjap omas, na i lobei ni Naibata. ¹⁴ Ihatahon ma dompak malekat na paonomkon, na martarompit ai: Paluah ma malekat na ompat ai, na sangkut ilambung ni bah Eprat na banggal ai! ¹⁵ Jadi ipaluah ma malekat na ompat ai, na dob pinasirsir bani jamni, arini, bulanni pakon tahunni laho mamunuh sapartolu ni manisia. ¹⁶ Ia bilangan ni tentara na marhuda ai duaratus juta do; hubogei do bilangan ni sidea. ¹⁷ Sonon do huidah huda pakon na mangajaksi ibagas panonggoranku: Ipakei sidea do baju-baju bosi na gerger songon apuy, mahonda tumang anjaha magorsing songon hirtah. Ulu ni huda ni sidea songon ulu ni singa, anjaha kaluar do humbani babahni apuy, timus pakon hirtah. ¹⁸ Marhitei pangarsikon na tolu in matei tarbunuh do sapartolu ni manisia, ai ma pangkorhon ni apuy, timus pakon hirtah, na kaluar humbani babah ni sidea. ¹⁹ Ai ibagas babah pakon ihur ni sidea do gogoh ni huda ai; ai usih hubani ulog do ihur ni sidea na marulu ai, marhitei ai do sidea mambahen hasedaon. ²⁰ Ia jolma na tading ai, na so binunuh ni hamarsikon ai, lanjar do seng ipaubah sidea uhurni humbani na hinorjahon ni tangan ni sidea, ase ulang be namin marsombah bani setan-setan pakon bani gana-gana na humbani omas, pirak, tombaga, hayu atap batu, na so tarbahen mangidah, manangar atap mardalan pe. ²¹ Seng ipaubah sidea uhur ni sidea manadingkon pamunuhon, uti-utian, habutakon pakon panangkoon ni sidea.

¹ Dob ai huidah ma sada malekat na legan, na gogoh, turun hun nagori atas, marhiouhon hombun, halibitongan i atas uluni, bohini songon mataniari anjaha naheini songon basikah na humbani apuy. ² Ijolom do bani tanganni sada buku etek-etek na buha. Anjaha idogeihon do naheini siamun hu atas laut, anjaha nahei sambilouni hu tanoh. ³ Mardilo-dilo ma ia maling, songon singa na maraum; sanggah na mardilo-dilo ai ia, marhata ma na pitu longgur ai. ⁴ Dob marhata longgur na pitu ai, sihol manurat ma ahu; tapi hubogei ma sora hun nagori atas manghatahon: Lak ma na hinatahon ni longgur na pitu in, ulang surathon! ⁵ Dob ai ipagostong malekat, na huidah jongjong i atas laut pakon tanoh ai ma tanganni dompak datas. ⁶ Marbija ma ia marhitei Naibata na manggoluh ronsi sadokah ni dokahni, na dob manompa langit pakon isini, tanoh pakon sagala na i atasni ampa laut pakon na dong ibagas: Seng paganjangon be panorang, ⁷ tapi bani panorang ni sora ni tarompit na sihol sompulon ni malekat na papituhon ai, ijai ma gok rusia ni Naibata, songon na dob hinatahonNi bani juak-juakNi, nabi-nabi ai. ⁸ Ia sora na dob hubogei ai hun nagori atas, marsahap do use bakku, nini ma: Laho ma, buat ma buku na buha ai, na i tangan ni malekat ai, na jongjong i atas laut pakon tanoh ai. ⁹ Dob ai huparayak ma malekat ai, huhatahon ma hubani, ase ibere bakku buku ai. Jadi nini ma hubakku: Na ma, pangan ma, gabe paet do in bani boltokmu, tapi tobu do songon manisan ni lobah anggo bani pamanganmu. ¹⁰ Jadi hubuat ma buku ai hun tangan ni malekat ai anjaha hupangan ma ai; anjaha tobu do ai bani pamanganku songon manisan, tapi dob hupangan ai, gabe paet ma ibagas boltokhu. ¹¹ Jadi ihatahon ma dompak ahu: Maningon ulakanmu ope manjahai dompak suku pakon bangsa ampa hata age dompak buei raja-raja.

¹ Dob ai ibere ma bakku sada buluh songon tungkot sibar-sibar anjaha nini ma: Jongjong ma ho, sibar ma rumah ni Naibata pakon anjap-anjap in ampa na marsombah ibagas in. ² Tapi alaman pardarat ni rumah panumbahan in ulang sibar, laosi ma in, ai domma iondoshon in bani bangsa sipajuh begu-begu. Dogei-dogeian ni sidea ma huta na pansing in ompat puluh dua bulan dokahni. ³ Anjaha bereonKu do kuasa bani saksingKu na dua ai, ase manjahai sidea saribu dua ratus onom puluh ari dokahni, marhiouhon guni. ⁴ Sidea ma na dua hayu jetun pakon na dua parsuluhan, na jongjong i lobei ni Tuhan simada tanoh on. ⁵ Anggo adong na sihol mansedahon sidea, kaluar ma apuy humbani babah ni sidea mamboiskon munsuhni; anggo dong na sihol mansedahon sidea, sonai ma maningon matei sidea. ⁶ Na markuasa do sidea mangkunsi langit, ase ulang roh udan sadokah panorang manjahai sidea. Na markuasa do sidea paubahkon bah gabe daroh anjaha manghonahon bagei sitaronon bani tanoh in, atap sonaha hotopni nini uhur ni sidea. ⁷ Anggo domma idobkon sidea hasaksian ni sidea, tangkog ma binatang ai hun ruang partoruh ai, laho marmunsuh dompak sidea, taluhononni ma sidea anjaha bunuhonni. ⁸ Ragei ma bangkei ni sidea i alaman ni huta na banggal in, na margoran mangihutkon partonduyon Sodom pakon Masir, ijai do homa Tuhan ni sidea tarsilang. ⁹ Jadi idahon ni buei bangsa, suku, hata pakon marga ma bangkei ni sidea tolu satongah ari dokahni, anjaha seng ilopas sidea tanomon bangkei ni sidea ai. ¹⁰ Jadi sagala na mangiankon tanoh on, marmalas ni uhur ma anjaha marmegah-megah mangidah sidea, pala marsitongosan siluah samah sidea, halani nabi na dua on do sipangarsik-arsik hinan bani na mangiankon tanoh on. ¹¹ Dob salpu tolu satongah ari, sorap ma Tonduy hagoluhan na humbani Naibata bani sidea, jongjong ma sidea, jadi mabiar tumang ma sagala na mangidah sidea. ¹² Ibogei sidea ma sora na maling hun nagori atas, na mangkatahon bani sidea: Naik ma hujon! Jadi naik ma sidea hu nagori atas ibagas hombun, iidah munsuh ni sidea. ¹³ Bani panorang ai masa ma lalou banggal, marumbak ma saparsapuluh ni huta ai, matei ma bani lalou ai pitu ribu halak, mabiar ma sagala na tading, anjaha ipasangap sidea ma Naibata na i nagori atas. ¹⁴ Domma salpu bursik-bursik na paduahon; tonggor ma, barah ma roh hamagouan na patoluhon. ¹⁵ Dob ai isompul malekat na papituhon ai ma tarompitni, jadi masa ma sora na gogoh i nagori atas, na mangkatahon: Domma ondos bani Tuhanta pakon bani KristusNi harajaon ni dunia on, manrajai ma Ia ronsi sadokah ni dokahni. ¹⁶ Ia sintua na dua puluh ompat ai, na hundul bani hotakni bei i lobei ni Naibata, manrogop ma marsombah bani Naibata. ¹⁷ Nini sidea ma: Na mangkatahon tarima kasih do hanami Bamu, Ham Tuhan Naibata, Sigomgom haganup, na dong sonari ampa na dob dong hinan, halani na dob ijalo Ham kuasaMu na banggal in anjaha bangkit Raja Ham. ¹⁸ Manringis do sagala bangsa, gabe roh do ringisMu; jumpah ma panorangni, ase hona uhum sagala na dob matei lanjar mambere upah bani juak-juakmu, nabi-nabi ai, pakon halak na pansing ronsi sagala na mangkabiari goranMu, na etek ampa na banggal, sonai homa laho mansedahon siparseda tanoh in. ¹⁹ Dob ai ungkab ma rumah panumbahan ni Naibata i nagori atas, gabe taridah ma poti parpadananNi ibagas rumah panumbahan ai, anjaha masa ma hilap, sora-sora pakon longgur ampa lalou pakon sira-sira na banggal-banggal.

¹ Dob ai taridah ma sada tanda na banggal i nagori atas: Sada naboru marhiou mata ni ari, bulan i toruh ni naheini anjaha sapuluh dua bintang sortali ni uluni. ² Na boratan rumah do ia anjaha mandoruhi ibahen boritni ampa pangarouon laho mantubuhkon anak. ³ Dob ai taridah ma tanda na legan i nagori atas: Sada naga na banggal songon apuy, pitu do uluni, sapuluh tandukni anjaha pitu sortali harajaon bani uluni. ⁴ Isarad ihurni do sapartolu ni bintang na i langit anjaha idabuhkon ma ai hu tanoh. Jadi jongjong ma naga ai i lobei ni naboru na laho tubuhan tuah ai, laho mambondut dakdanakni ai tubuhkonsi. ⁵ Jadi itubuhkon ma sada anak, na sihol marmahan sagala bangsa sipajuh begu-begu marhitei tungkot bosi. Jadi tarangkat ma anakni ai hulobei ni Naibata pakon paratasNi ai, ⁶ anjaha maporus ma naboru ai hu halimisan bani sada ianan na pinasirsir ni Naibata, ase ijai ipatorsa-torsa ia saribu dua ratus onom puluh ari dokahni. ⁷ Anjaha masa ma porang i nagori atas; marporang ma si Mikael rap pakon sagala malekatni marmunsuh dompak naga ai. Jadi naga ai pe rap pakon sagala malekatni roh ma marporang. ⁸ Tapi seng tahan sidea, anjaha seng dong be ianan bani sidea i nagori atas. ⁹ Jadi idabuhkon ma naga na bolon ai, ulog na basaia ai, na margoran sibolis pakon setan, na pakahouhon haganup dunia on; hu tanoh do ia idabuhkon rap pakon sagala malekatni. ¹⁰ Dob ai hubogei ma sada sora na maling i nagori atas, na manghatahon: Domma das sonari haluahon pakon hagogohon pakon harajaon ni Naibatanta ampa kuasa ni KristusNi; ai domma idabuh sipanukasi, na manukasi saninanta arian borngin i lobei ni Naibata. ¹¹ Domma italuhon sidea ia marhitei daroh ni Anak ni Biri-biri in pakon marhitei hata na sinaksihon ni sidea, anjaha seng ihargahon sidea hosahni ronsi matei. ¹² Halani ai marmalas ni uhur ma ham nagori atas pakon sagala na marianan ibagas! Tapi bursik ma tanoh pakon laut in, ai domma susur sibolis in bennima, marah tumang, ai ibotoh pondok mando panorangni. ¹³ Tapi dob ididah naga ai, na dob idabuhkon ia hu tanoh, iayak-ayak ma naboru na mantubuhkon anak ai. ¹⁴ Jadi ibere ma bani naboru ai dua habong ni manuk-manuk nanggordaha na banggal, ase habang ia bani iananni hu halimisan, ase ijai ma ia ipatorsa-torsa sada panorang, dua panorang pakon satongah panorang daoh humbani panonggor ni ulog ai. ¹⁵ Jadi ibursikkon ulog ai ma bah humbani babahni songon bah banggal hun pudi ni naboru ai, ase iayubkon bah banggal ai ia. ¹⁶ Tapi iurupi tanoh ai do naboru ai, ipatanggak ma babahni anjaha ibondut ma bah banggal ai, na binursikkon ni naga ai humbani babahni. ¹⁷ Jadi manringis ma naga ai dompak naboru ai, gabe laho ma ia marmunsuh dompak ginomparni na tading ai, sagala na mandalankon titah ni Naibata pakon na manjolom hasaksian pasal Jesus. ¹⁸ Jadi jongjong ma ia i topi ni laut ai.

¹ Jadi huidah ma mandarat humbagas laut ai sada binatang, sapuluh do tandukni anjaha pitu uluni. Bani tandukni ai adong do sapuluh sortali anjaha goran-goran panrisaion do bani uluni ai. ² Ia binatang na huidah ai songon begu do rupani, naheini songon nahei ni gipul anjaha babahni songon babah ni singa. Ibere naga ai ma gogohni bani, sonai age hotakni ampa kuasa banggal. ³ Huidah do sada humbani uluni ai ugahan, sihamateihononni namin; hape malum do ugahni sihamateihononkonni ai. Jadi longang ma ganup tanoh on mangidah binatang ai. ⁴ Isombah sidea ma naga ai, sibere kuasa bani binatang ai; binatang ai pe isombah sidea ma, nini: Ise ma na doskon binatang in, anjaha ise ma na mangasup mangimbangsi? ⁵ Ibere ma bani sada babah, na mangkatahon hata pangenjengon pakon panrisaion; ibere ma kuasa bani mandalankon ai ompat puluh dua bulan dokahni. ⁶ Ibuha ma babahni manrisai Naibata, manrisai goranNi pakon iananNi pakon na marianan i nagori atas. ⁷ Ibere ma kuasa bani mammunsuhi halak na pansing pakon mantaluhon sidea; ibere do homa hubani kuasa manggomgomi sagala marga, suku, hata pakon bangsa. ⁸ Anjaha sombahon ni haganup pangisi ni tanoh on ma ia, sagala na so tarsurat goranni humbani mula ni dunia on bani buku hagoluhan ni Anak ni Biri-biri ai, na dob tarbunuh ai. ⁹ Sagala na marpinggol, itangihon ma! ¹⁰ Sagala sipanaban maningon tartaban do; sagala sipamunuh marhitei podang maningon matei do bunuhon ni podang. Ibagas ai sabar anjaha porsaya do halak na mapansing. ¹¹ Dob ai huidah ma sada binatang na legan mandarat hun tanoh, dua do tandukni songon tanduk ni biri-biri, anjaha songon parsahap ni naga ai do parsahapni. ¹² Idalankon do sagala kuasa ni binatang na parlobei ai i lobeini. Isuruh do tanoh on pakon sagala na marianan ibagas, manombah binatang na parlobei ai, simada ugah hamateian na dob malum ai. ¹³ Ibahen do tanda na banggal, pala ipaturun apuy hun langit hu tanoh i lobei ni jolma. ¹⁴ Ipakahou do sagala na marianan i tanoh in marhitei tanda halongangan, na ibere hubani sidalankononni i lobei ni binatang ai; ai ihatahon do bani sagala na mangiankon tanoh in, mambahen gana-gana bani binatang ai, na dob ugahan hinan ibahen podang, hape manggoluh do. ¹⁵ Ibere do kuasa bani mambere hosah bani gana-gana ni binatang ai, gabe boi marsahap gana-gana ni binatang ai, anjaha isuruh do na mambunuh sagala na so manombah gana-gana ni binatang ai. ¹⁶ Anjaha isuruh ma haganup, na etek ampa na magodang, na bayak ampa na musil, halak na mardeka pakon jabolon, mambahen tanda bani tanganni atap bani pardompakanni, ¹⁷ ase ulang boi atap ise mamboli atap manjual, anggo seng dong bani tanda ai, ai ma goran ni binatang ai atap bilangan ni goranni. ¹⁸ Ibagas on porlu hauhuron. Barang ise na maruhur, ietong ma bilangan ni binatang ai: Bilangan ni sada jolma do ai, anjaha onom ratus onom puluh onom do bilangan ai.

¹ Jadi mangkawah ma ahu, anjaha tonggor ma, jongjong do Anak ni Biri-biri in i atas dolog Sion anjaha rap pakonsi saratus ompat puluh ompat ribu halak; tarsurat do goranNi pakon goran ni BapaNi bani pardompakan ni sidea. ² Hubogei ma sora hun nagori atas songon parhasak ni buei bah banggal anjaha songon pardobur ni longgur na maling; ia sora na hutangar ai, songon sora ni husapi na giniut ni parhusapi do. ³ Idodingkon sidea do doding na baru i lobei ni paratas ai ampa i lobei ni pargoluh na ompat ai ampa sintua ai; sahalak pe seng dong na boi mangguruhon doding ai, sobali sisaratus ompat puluh ompat ribu halak ai, na tinobus hun tanoh in. ⁴ Sidea do na so pabutakhon dirini bani naboru; songon anakboru na so haliaban do sidea. Iirikkon sidea do Anak ni Biri-biri in, atap huja pe Ia laho. Sidea do na dob tinobus humbani hajolmaon, limbuah bani Naibata pakon bani Anak ni Biri-biri in. ⁵ Seng dong dapot ladung bani pamangan ni sidea. Seng dong tikas bani sidea. ⁶ Huidah ma sada malekat na legan habang i tongah langit; adong do bani Ambilan Namadear sisadokah ni dokahni, siambilankononni bani na mangiankon tanoh in, bani haganup bangsa, marga, hata pakon suku, ⁷ anjaha maling do sorani mangkatahon: Habiari nasiam ma Naibata anjaha pasangap ma Ia, ai domma jumpah panorang ni panguhumonNi! Sombah nasiam ma Ia, sitompa langit pakon tanoh pakon laut pakon sagala bah tubuh! ⁸ Jadi mangihut ma malekat na legan, ai ma na paduahon, ihatahon ma: Domma madabuh, domma madabuh Babilon na banggal in, na mambahen mabuk sagala bangsa marhitei anggur sipagarang uhur parbangkison. ⁹ Dob ai mangihut ma bani sidea malekat na legan, ai ma na patoluhon, na manghatahon maling: Barang ise na manombah binatang ai ampa gana-ganani, anjaha na manjalo tanda ai bani bohini atap bani tangani, ¹⁰ maningon inumonni do anggur hamarahon ni Naibata, na dob pinasirsir seng maragu ibagas panginuman hamarahonni; siarsik-arsikon do ia ibagas apuy pakon hirtah i lobei ni sagala malekat na pansing in ampa i lobei ni Anak ni Biri-biri in. ¹¹ Naik ma timus ni hamarsikon ni sidea ronsi sadokah ni dokahni. Seng jumpahan parsaranan arian borgin sagala na manombah binatang ai pakon gana-ganani, sonai sijalo tanda ni goranni ai. ¹² Ibagas on sabar do uhur ni halak na pansing, siramothon titah ni Naibata pakon haporsayaon bani Jesus. ¹³ Jadi hubogei ma sora hun nagori atas, na mangkatahon: Surathon ma: Martuah ma na matei ibagas Tuhan in humbani sonari nari. Tongon, nini Tonduy in, na marsaran ma sidea humbani halojaon ni sidea, ai na mangihut ma bani sidea na hinorjahon ni sidea. ¹⁴ Dob ai mangkawah ma ahu, anjaha tonggor ma: Sada hombun na lopak, anjaha i atas hombun ai hundul sahalak na usih hubani Anak ni Jolma in, marsortali omas bani uluNi anjaha sasabi na marot bani tanganni. ¹⁵ Jadi haluar ma sada malekat na legan hun rumah panumbahan ai, na mardilo-dilo marhitei sora na maling hubani na hundul i atas hombun ai: Sabihon ma sasabimu anjaha sabi ma, ai jumpah ma panorang sabion, ai masak tumang ma sisabion na i tanoh in. ¹⁶ Jadi isabihon na hundul i atas hombun ai ma sasabini hu tanoh in, isabi ma tanoh in. ¹⁷ Luar ma homa malekat na legan hun rumah panumbahan na i nagori atas in, ia pe manjolom sasabi na marot do. ¹⁸ Anjaha luar ma humbani anjap-anjap ai sada malekat na legan na markuasa pasal apuy, na mandilohon marhitei sora na maling hubani na manjolom sasabi na marot ai, nini: Sabihon ma sasabimu na marot in, buati ma haganup buah ni hayu anggur na i tanoh in, ai domma mabei buahni. ¹⁹ Jadi isabihon malekat ai ma sasabini hu tanoh in, ibuati ma sagala buah ni hayu anggur na i tanoh in, anjaha igijigkon ma ai hu kilang hamarahon ni Naibata na banggal ai. ²⁰ Idarat ni huta ai do idogei buah anggur ai, gabe mandarat ma daroh humbani pangilangan ai pala das hubani kokang ni huda, saribu onom ratus stadia daohni.

¹ Dob ai huidah ma sada tanda na legan i nagori atas, banggal anjaha halongangan: Pitu malekat manjolom pitu sitaronon na parpudi, ai marhiteihon ai ma marpunsa ringis ni Naibata. ² Jadi huidah ma na songon laut kasa marsaor apuy, anjaha i topi ni laut kasa ai jongjong do sagala na dob monang mangimbang binatang ai ampa gana-ganani ampa bilangan ni goranni, manjolom husapi ni Naibata. ³ Anjaha idodingkon sidea do doding ni si Musa, juak-juak ni Naibata, pakon doding ni Anak ni Biri-biri in, nini: Banggal anjaha halongangan do sagala horjamu, Ham Tuhan Naibata, Sigomgom haganup; pintor anjaha sintong do sagala dalanmu, Ham Raja ni sagala bangsa! ⁴ Ise ma na so manghabiari Ham, ale Tuhan, janah na so pasangaphon goranMu? Ai Ham do hansa na pansing, anjaha sagala bangsa roh ma marsombah Bamu, ai domma talar panguhumMu na pintor in. ⁵ Jadi dob salpu ai mangkawah ma ahu, anjaha mungkab ma rumah panumbahan, lampo-lampo hasaksian ai, i nagori atas. ⁶ Jadi kaluar ma hun rumah panumbahan ai sipitu malekat, na manjolom sitaronon na pitu ai, anjaha hiou putih na marlinang-linang do pakeian ni sidea anjaha margondit omas bani tontonni. ⁷ Jadi roh ma sada humbani pargoluh na ompat ai mambere hubani sipitu malekat ai pitu batil omas, na gok bani ringis ni Naibata, na manggoluh ronsi sadokah ni dokahni. ⁸ Jadi gok timus ma rumah panumbahan ai ibahen hasangapon ni Naibata pakon hagogohonNi; seng boi age ise masuk hu rumah panumbahan ai, paima marujung na pitu sitaronon na humbani sipitu malekat ai.

¹ Dob ai hubogei ma sora na maling hun rumah panumbahan ai hubani malekat na pitu ai: Misir ma nasiam, useihon nasiam ma batil na pitu in, ianan ni ringis ni Naibata, hubani tanoh in. ² Jadi misir ma na parlobei ai, iuseihon ma batilni hu tanoh in. Jadi masa ma bayoh na bajan anjaha na sambor bani jolma, na dob manjalo tanda ni binatang ai anjaha sisombah gana-ganani. ³ Dob ai iuseihon na paduahon ai ma batilni hu laut; jadi gabe daroh ma ai songon daroh ni na matei, lanjar matei ma sagala na manggoluh i laut ai. ⁴ Dob ai iuseihon na patoluhon ai ma batilni hubani bah banggal pakon bah tubuh, anjaha gabe daroh ma ai. ⁵ Jadi hubogei ma malekat sigomgom bah manghatahon: Na pintor do Ham, na dong sonari ampa na dong hinan, Ham na mapansing, halani sonai panguhumMu; ⁶ ai iuseihon sidea do daroh ni halak na pansing pakon nabi-nabi, gabe daroh do ipainumkon Ham bani sidea; patut do ai bani sidea. ⁷ Anjaha hubogei do humbani anjap-anjap ai sora na manghatahon: Tongon, Ham Tuhan Naibata, Sigomgom haganupan, sintong anjaha pintor do uhumMu in. ⁸ Dob ai iuseihon na paompathon ai ma batilni hubani mata ni ari; ibere ma bani mata ni ari kuasa mammosoghon jolma in marhitei apuy. ⁹ Jadi mosog ma jolma in ibahen milasni na parah ai, gabe irisai sidea ma goran ni Naibata, na markuasa bani sagala sitaronon ai; lanjar do seng i paubah sidea uhurni laho pasangaphonSi. ¹⁰ Dob ai iuseihon na palimahon ai ma batilni bani hotak ni binatang ai, gabe golap ma harajaonni ai, anjaha marsiharat dilahni bei ma sidea halani boritni, ¹¹ gabe irisai sidea ma Naibata ni nagori atas ai halani boritni ampa bayoh niarou ni sidea ai, tapi lanjar do seng ipaubah sidea uhurni manadingkon parlahou ni sidea ai. ¹² Dob ai iuseihon na paonomhon ai ma batilni hu bah Eprat na banggal ai, gabe horah ma bahni, ase ipasirsir dalan ni raja-raja na hun hapoltakan ni mata ni ari. ¹³ Jadi huidah ma kaluar humbani babah ni naga ai pakon humbani babah ni binatang ai pakon humbani pamangan ni nabi sipakulah-kulah ai tolu tonduy na mabutak songon tiktikan. ¹⁴ Ai ma tonduy ni setan-setan na mambahen tanda-tanda, na bingkat marayak raja-raja ni sab dunia on, laho patumpuhon sidea hu parporangan bani ari na banggal ai, ari ni Naibata, Sigomgom haganupan. ¹⁵ Tonggor ma, na roh ma Ahu songon panangko. Martuah ma na jaga anjaha na manramothon hiouni ase sirsir, ase ulang talanjang ia mardalan, gabe taridah hailaonni. ¹⁶ Jadi ipatumpu ma sidea bani sada ianan, na margoran Harmagedon bani hata Heber. ¹⁷ Dob ai iuseihon na papituhon ai ma batilni hu awang-awang, jadi tarbogei ma sora na maling hun rumah panumbahan ai, humbani paratas ai, manghatahon: Domma saud! ¹⁸ Dob ai masa ma hilap, sora pakon longgur, masa ma homa lalou bolon, songon na so ongga masa, sadokah dong jolma manisia i tanoh on, lalou na sonai bolonni. ¹⁹ Jadi mabolah ma huta na banggal ai bolah tolu, mangkarumbak ma huta ni bangsa-bangsa, anjaha Babel na banggal ai pe seng ihalupahon Naibata laho painumhon hubani panginuman, na gok anggur hamarahonNi na banggal ai. ²⁰ Magou ma sagala pulou, anjaha dolog pe seng dong be jumpah. ²¹ Anjaha madabuh ma sira-sira na banggal, boratni satalenta, hun langit bani jolma, gabe irisai jolma ma Naibata halani sitaronon humbani sira-sira ai; ai parah do sitaronon ai.

¹ Dob ai roh ma sada humbani malekat na pitu ai, na manjolom batil na pitu ai, marsahap ma ia hubakku, nini ma: Roh ma, ase hupatuduhkon bam uhum bani boru jalang na banggal ai, na hundul bani bah na mabuei ai. ² Hasomanni marbangkis do raja-raja ni tanoh in, anjaha mabuk do ganup pangisi ni dunia on ibahen anggur parbangkisonni ai. ³ Jadi iboan ma ahu ibagas tonduy hubani sada halimisan. Jadi huidah ma sada naboru, hundul bani sada binatang sigerger, na gok bani goran panrisaion, pitu do uluni anjaha sapuluh tandukni. ⁴ Ia pakeian ni naboru ai hiou saholat pakon hiou hasumba do, na ilampis bani omas, intan pakon mutiha; adong do bani tanganni panginuman omas, gok marisi hagigi pakon habutakon ni parbangkisonni. ⁵ Bani pardompakanni tarsurat do sada goran na marrusia: Babel na banggal in, inang ni sagala parbangkison pakon hagigi na i tanoh on. ⁶ Jadi huidah do naboru ai mabuk ibahen daroh ni halak na mapansing ampa daroh ni saksi-saksi ni Jesus. Longang tumang do uhurhu mangidahsi. ⁷ Gabe ihatahon malekat ai ma dompak ahu: Mase longang uhurmu? Hupatugah ma hubam rusia ni naboru on pakon rusia ni binatang na mambobansi ai, na marulu pitu anjaha na martanduk sapuluh ai. ⁸ Ia binatang na niidahmai, na manggoluh do ai hinan, sonari lang be, anjaha naik ma ai use hun ruang partoruh ai, laho masuk hu hamagouan; anjaha sagala pangisi ni tanoh in, na so tarsurat goranni bani buku hagoluhan humbani tombei ni dunia on, longang ma mangidah binatang ai, na dob dong hinan, sonari seng dong be, hape roh use. ⁹ Ibagas on porlu do pangarusion na marhasoman hauhuron! Na pitu ulu ai, ai ma pitu dolog, na hinundulan ni naboru ai, anjaha pitu raja do ai. ¹⁰ Lima hunjai domma madabuh, na sada adong ope, na sada nari lang roh ope; anjaha anggo roh, tongkin do hansa ia adong. ¹¹ Ia binatang, na adong hinan, anjaha sonari seng dong be, ai do na pawaluhkon, anjaha humbani na pitu ai do ai, anjaha nalaho ma ia hu hamagouan. ¹² Ia na sapuluh tanduk niidahmai, ai ma sapuluh raja, na so manjalo harajaonni ope. Tapi jaloon ni sidea do kuasa songon raja-raja sajam dokahni rap pakon binatang ai. ¹³ Sauhur do sidea anjaha ibere sidea do gogoh pakon kuasa ni sidea bani binatang ai. ¹⁴ Marmunsuh ma sidea dompak Anak ni Biri-biri in, tapi taluhononkon ni Anak ni Biri-biri in do sidea; ai Ia do tuan ni sagala tuan anjaha Raja ni sagala raja. Halak na raphonSi ai pe monang do, ai ma sagala na nidilo, na pinilih anjaha na porsaya. ¹⁵ Dob ai nini ma dompak ahu: Ia sagala bah na niidahmai, na hinundulan ni boru jalang ai, ai ma bangsa-bangsa, halak simbuei, suku pakon hata. ¹⁶ Ia tanduk na sapuluh ai, na niidahmai, pakon binatang ai, domdoman ni sidea ma boru jalang ai, lungunan ma bahenon ni sidea ia anjaha talanjang, panganon ni sidea ma dagingni, anjaha tutungon ni sidea ma ia bani apuy. ¹⁷ Ai ipuhoi Naibata do uhur ni sidea, laho pasaudkon sura-sura ni uhurNi, laho pasadahon sura-sura ni sidea, laho mangondoshon harajaon ni sidea bani binatang ai, ronsi saud hagogok ni hata ni Naibata. ¹⁸ Ia naboru, na niidahmai, ai ma huta na banggal in, na manggomgomi raja-raja na i tanoh on.

¹ Dob salpu ai huidah ma sada malekat na legan, susur hun nagori atas, na markuasa na banggal, jadi isondangi hasangaponni ma tanoh in. ² Jadi mardilo-dilo ma ia marhitei sora na maling, nini ma: Domma madabuh, domma madabuh Babilon na bolon in, domma gabe ianan ni setan-setan ai ampa parponopan ni sagala tonduy na mabutak, pakon harang ni sagala manuk-manuk na mabutak, sihagigihononkon. ³ Ai na dob minum do sagala bangsa humbani anggur parbangkisonni, na pagaranghon ai, anjaha raja-raja ni tanoh in marriah-riahi do pakonsi, anjaha gabe bayak do partiga-tiga ni tanoh in marhitei banggal ni hadoharonni. ⁴ Dob ai hubogei ma use sora na legan hun nagori atas manghatahon: Kaluar ma nasiam, ale bangsaKu, hun tongah-tongahni, ase ulang saor nasiam bani dousani, anjaha ulang dihut nasiam ihonai sitarononni. ⁵ Ai domma sundol ronsi langit sagala dousani, anjaha idingat Naibata do sagala hajahatonni. ⁶ Balashon nasiam ma hubani romban hubani pambahenanni bani nasiam, marlompit ma balashon nasiam na binahenni ai; marlompit ma saorhon nasiam bani panginuman, na sinaorni bani nasiam. ⁷ Honahon ma hubani na maborit ampa hamarsikon ansa buei ni hamuliaon ampa hamantinonni hinan. Ai nini do ibagas uhurni: Marparatas do ahu songon raja naboru, sedo na mabalu ahu seng anjai idahonku pusok ni uhur. ⁸ Halani ai ibagas sadari do roh bani sitarononni: Hamateian, pusok ni uhur ampa lohei, dob ai tutungon ma ia bani apuy, ai na gogoh do Tuhan Naibata, na manguhumsi. ⁹ Tangisan anjaha doruhan ni raja-raja ni tanoh in ma ia, ai ma hasomanni marbangkis anjaha marhabutakon sanggah na iidah sidea timus ni apuy, na manutungsi ai. ¹⁰ Mandaoh-daoh mando sidea jongjong halani biar mangidah sitarononni ai, nini: Aih, aih, ale huta Babel na bolon in anjaha na toguh in! ibagas sajam do mangonai uhum bam. ¹¹ Tangis anjaha marhoru do partiga-tiga ni tanoh on mangidahsi, halani seng dong be na mamboli boniaga ni sidea, ¹² ai ma boniaga omas pakon pirak, mata intan, mutiara, hiou putih, hasumba, sitora, hiou sigerger pakon sagala hayu na misbou-misbou, pakon masam ni parugas na pinauli humbani gading, pakon parkakas na pinauli humbani hayu na maharga, humbani tombaga, bosi ampa batu marmar, ¹³ ambah ni ai kulit manis pakon minak na morum, hamonan, mir pakon dahupa, anggur, minak jetun, topung pakon gandum, lombu pakon biri-biri, huda pakon gareta, jabolon pakon jolma. ¹⁴ Buah ni hayu pe, na hinarosuhkon ni uhurmu, mosor do humbam, anjaha sagala hajengeson ampa hajombuton magou do humbam, seng anjai jumpah be ai. ¹⁵ Halak na martiga-tigahon ai, na dob bayak marhitei ai. jongjong do mandaoh-daoh, halani mabiar mangidah sitarononni, tangis anjaha mandoruhi, nini: ¹⁶ Aih, aih, huta na banggal in, na marhiou hiou putih, saholat ampa hasumba, nilampis bani omas, mata intan pakon mutiara! Ibagas sajam do mahansur habayakon na sonai! ¹⁷ Anjaha haganup kapiten ni kapal ampa halak siparlayar, halak siparhorja i kapal ampa na marpansarian hun laut, jongjong do sidea mandaoh-daoh, ¹⁸ anjaha doruh-doruh mangidah timus ni apuyni ai, nini: Huta ja ma na songon huta na banggal an? ¹⁹ Inahkon sidea ma orbuk bani uluni, sanggah na tangis-tangis anjaha na mandoruhi ai, nini: Aih, aih, huta na banggal in, na mambahen bayak sagala siparkapal na i laut marhitei artani! Ibagas sajam do seda haganupan ai! ²⁰ Marmalas ni uhur ma pasalsi, ale nagori atas, ale halak na mapansing, apostel ampa nabi-nabi! Ai domma idabuh Naibata uhum bani halani nasiam. ²¹ Jadi roh ma sada malekat na gogoh mangangkat sada batu na salosung banggalni, anjaha idabuhkon ma ai hu laut, nini ma: Sonai ma sampakhononhon huta Babel na banggal in, anjaha seng anjai jumpah be. ²² Seng tarbogei be ibagas ho sora ni parhusapi pakon sipandoding, sipartulila, pakon sipartarompit; seng jumpah be ibagas ho situkangi atap aha pe, anjaha sora hun losung pe seng tarbogei be ibagas ho; ²³ anjaha sinondang ni sada palita pe lang be marsinalsal ibagas ho, anjaha sora ni siparunjuk pakon tunanganni seng tarbogei be i tongah-tongahmu. Ai partiga-tigamu do gabe halak na sangap-sangap i tanoh on, anjaha sagala bangsa kahou do ibahen uti-utianmu; ²⁴ anjaha ibagas huta ai do jumpah daroh ni nabi-nabi pakon halak na mapansing, sonai homa daroh ni haganup na dob binunuh i atas tanoh in.

¹ Dob salpu ai hubogei ma sora na gogoh humbani humpulan banggal i nagori atas, mangkatahon: Haleluya! Haluahon pakon hasangapon ampa hagogohon, Naibatanta do simada ai, ² Ai sintong anjaha pintor do uhumni; ai domma iuhumi boru jalang na banggal ai, na dob mangagou tanoh in marhitei parriah-riahonni, anjaha ibalashon do hubani daroh ni juak-juakni ³ Dob ai ihatahon sidea ma paduahalihon: Haleluya! Anjaha naik do timusni ai ronsi sadokah ni dokahni. ⁴ Jadi manrogop ma sintua na dua puluh ompat ai pakon pargoluh na ompat ai marsombah bani Naibata, na hundul bani paratas ai, nini: Amen! Haleluya! ⁵ Anjaha roh ma sada sora humbani paratas ai, mangkatahon: Puji nasiam ma Naibatanta, nasiam haganup juak-juakni, na mangkabiariSi, na etek age na banggal! ⁶ Jadi hubogei ma songon sora ni jolma mabuei, songon sora ni buei bah banggal, songon sora ni longgur na gogoh, manghatahon: Haleluya! Ai domma manrajai Tuhan Naibatanta, Sigomgom haganup. ⁷ Marmalas ni uhur ma hita anjaha marolob-olob, anjaha bere hita ma hasangapon Bani! Ai jumpah ma pesta parunjukon ni Anak ni Biri-biri in, domma sirsir parinangonni. ⁸ Domma ibere hubani hiou putih na borsih sipaheionni. Ia hiou putih ai, ai ma horja hapintoran ni halak na mapansing. ⁹ Anjaha nini ma hubakku: Surathon ma: Martuah do na niontang bani pesta parunjukon ni Anak ni Biri-biri in. Dob ai ihatahon ma hubakku: Hata on tongon do hata humbani Naibata. ¹⁰ Jadi manrogop ma ahu i lobei ni naheini laho manombahsi, tapi nini ma dompak ahu: Ulang sonin, hasomanmu juak-juak do ahu anjaha hasoman juak-juak ni saninamu, na manjolom hasaksian ni Jesus. Naibata do sisombahonmu! Ai hasaksian ni Jesus, ai ma tonduy ni panjahaion. ¹¹ Dob ai huidah ma mungkab nagori atas, anjaha tonggor ma, sada huda na putih, anjaha na mangajak ai margoran do Haposan anjaha Parsintong, anjaha ibagas hapintoron do Ia manguhumi anjaha mamorang. ¹² Songon gara ni apuy do matani, anjaha buei do sortali bani uluni; adong do goranni tarsurat, na so binotoh ni age ise, sobali Ia sandiri. ¹³ Ipakei do hiou na nironjamhon bani daroh anjaha goranNi ai ma: Hata ni Naibata. ¹⁴ Mangihut do Bani sagala bala na i surga mangajak huda putih. Hiou na putih anjaha na borsih do pakeian ni sidea. ¹⁵ Mandarat do humbani pamanganni podang na marot, sitampulhononni bani bangsa-bangsa. Parmahanonni ma sidea marhitei tungkot bosi, anjaha Ia do mandogei pangilangan anggur ni ringis banggal ni Naibata, Sigomgom haganup. ¹⁶ Tarsurat do goranni bani hiouNi pakon binongeiNi: Raja ni sagala raja anjaha Tuhan ni sagala tuan. ¹⁷ Dob ai huidah ma sada malekat jongjong ibagas mata ni ari, anjaha mandilohon marhitei sora na gogoh bani manuk-manuk na i awang-awang na gijang in: roh ma hanima martumpu bani pesta mangan-mangan bolon ni Naibata. ¹⁸ laho manganhon daging ni raja-raja, daging ni puanglima pakon halak na gogoh, daging ni sagala huda pakon daging ni na mangajaksi, daging ni sagala halak na mardeka pakon jabolon, age na etek age na banggal. ¹⁹ Jadi huidah ma binatang ai ampa raja-raja ni tanoh on rap pakon bala ni sidea martumpu laho marmunsuh dompak na mangajak huda ai pakon balani. ²⁰ Gabe tartangkap ma binatang ai rap pakon nabi sipakulah-kulah ai, na dob mambahen tanda-tanda i lobeini, parhiteianni paoto-otohon sagala na manjalo tanda ni binatang ai pakon na manombah gambaranni. Manggoluh do na dua ai idabuhkon hu laut apuy na gajag marhasoman hirtah. ²¹ Ia na tading ai ibunuh do marhitei podang na kaluar humbani pamangan ni na mangajak huda ai, gabe bosur ma sagala manuk-manuk ibahen daging ni sidea.

¹ Dob ai huidah ma sada malekat susur hun nagori atas, na manjolom anak kunsi ni ruang partoruh anjaha gari banggal do bani tanganni. ² Jadi itangkap ma naga ai, ulog na basaia ai, ai ma sibolis pakon setan, anjaha igarihon ma ia saribu tahun dokahni. ³ Idabuhkon ma ia hu ruang partoruh, itutup anjaha ilak ma i atasni, ase ulang be ipakahou sagala bangsa, paima gok na saribu tahun ai. Dob salpu ai maningon paluahon do ia tongkin. ⁴ Jadi huidah ma buei paratas anjaha adong do na hundul i atasni, ibere ma bani sidea kuasa manguhumi. Anjaha huidah ma tonduy ni sagala na hona tampul uluni halani na manaksihon Jesus pakon halani hata ni Naibata, sagala na so manombah binatang ai atap gambaranni pe, anjaha na so manjalo tanda bani pardompakanni atap bani tanganni. Mulak manggoluh do sidea anjaha manrajai rap pakon Kristus saribu tahun dokahni. ⁵ Ia na matei na legan, seng mulak manggoluh, paima salpu na saribu tahun ai. Ai ma parpuhoon na parlobei. ⁶ Na martuah anjaha na pansing do halak na marrupei bani parpuhoon na parlobei ai. Seng markuasa be hamateian na paduahon ai bani sidea, gabe malim ni Naibata pakon Kristus do sidea anjaha mamarentah rap pakonsi saribu tahun dokahni. ⁷ Dob salpu na saribu tahun ai, ipaluah ma sibolis ai humbani tutupanni. ⁸ Jadi luar ma ia pakahouhon sagala bangsa na bani na ompat deisa ni tanoh on, ai ma Gok pakon Magog, laho patumpuhon sidea hu parmunsuhan; ia bilangan ni sidea songon horsik na i topi ni laut do. ⁹ Jadi tangkog ma sidea hu hanopan na bolag ai, anjaha ihubu ma bala ni halak na pansing pakon huta na hinaholongan ai; gabe madabuh ma apuy hun nagori atas, ai ma na mamboiskon sidea. ¹⁰ Anjaha sibolis ai, na pakahouhon sidea ai, idabuh ma hu laut apuy pakon hirtah, hu ianan ni binatang pakon nabi sipakulah-kulah ai, ase iarsik-arsik arian pakon borgin ronsi sadokah ni dokahni. ¹¹ Dob ai huidah ma sada paratas na banggal anjaha na putih ampa Na hundul i atasni ai. Mandompakkon bohini maporus do tanoh pakon langit, seng dong be jumpah ianan bani sidea. ¹² Dob ai huidah ma sagala na matei, na banggal pakon na etek, jongjong i lobei ni paratas ai; jadi iungkab ma buku-buku. Dob ai iungkab ma sada buku na legan, ai ma buku hagoluhan ai, gabe iuhum ma na matei ai mangihutkon na tarsurat ibagas buku-buku ai, romban hubani horja ni sidea bei. ¹³ Jadi ibere laut ai ma sagala na matei ibagas ai, anjaha hamateian pakon nagori toruh ai pe ibere ma sagala na matei na ijai ai; jadi iuhum ma ganup sidea domu hubani horja ni sidea. ¹⁴ Ia hamateian pakon nagori toruh ai idabuh ma hubagas laut apuy ai. Ai ma hamateian na paduahon, laut apuy ai. ¹⁵ Barang ise na so jumpah tarsurat bani buku hagoluhan ai, idabuhkon ma ia hubagas laut apuy ai.

¹ Dob ai huidah ma langit na bayu pakon tanoh na bayu; ai domma salpu langit na parlobei ai pakon tanoh na parlobei ai, laut ai pe seng dong be. ² Anjaha huidah ma huta na pansing ai, ai ma Jerusalem na bayu, susur hun nagori atas, humbani Naibata, na pinasirsir songon tunangan na pinajagar marayak paramangonni. ³ Dob ai hubogei ma sada sora na gogoh humbani paratas ai, mangkatahon: Tonggor ma, on ma ianan ni Naibata i tongah-tongah ni jolma; marianan ma Ia i tongah-tongah ni sidea, anjaha sidea ma bangsaNi anjaha Naibata sandiri saor bani sidea. ⁴ Anjaha apusanNi ma sagala iluh humbani mata ni sidea, seng dong be hamateian, age pusok ni uhur age partangison age halojaon seng dong be, ai domma salpu na parlobei in. ⁵ Dob ai nini Na hundul bani paratas ai ma: Tonggor ma, bayu do hubahen haganup. Ambahni ai ihatahon do: Surathon ma in, hatengeran anjaha sintong do hata in. ⁶ Lanjar ihatahon ma hubakku: Domma saud! Ahu do Alpa pakon Omega, bonani pakon ujungni. Bereonku do minum halak na horahan humbani bah tubuh hagoluhan, seng pala marpamboli. ⁷ Na monang in do manean ai haganup, Ahu ma gabe Naibata bani, anjaha ia ma gabe anak Bakku. ⁸ Tapi halak siparbiar, na so porsaya, na butak, pamunuh, parriah-riah, partabas-tabas, parnaibata na legan ampa sagala parladung, parrupei do bani laut na gara ibahen apuy pakon hirtah. Ai ma hamateian na paduahon. ⁹ Dob ai roh ma sahalak humbani na pitu malekat ai, na manjolom batil na pitu ai, na marisi hamarsikon parpudi na pitu ai, marsahap ma ia dompak ahu, nini ma: Roh ma, ase hupatuduhkon bam tunangan ai, parinangon ni Anak ni Biri-biri in. ¹⁰ Jadi iboan ma ahu ibagas tonduy hubani sada dolog na banggal anjaha na gijang, anjaha ipatuduhkon ma hubakku huta na pansing ai, ai ma Jerusalem, na susur hun nagori atas, humbani Naibata, ¹¹ ibagas hasangapon ni Naibata. Sinalsalni usih hubani mata intan na maharga, songon mata intan jaspis na marlinang-linang. ¹² Banggal janah gijang do tembokni, horbanganni sapuluh dua do anjaha sapuluh dua malekat i atasni; anjaha tarsurat do goran-goran ijai, ai ma goran ni marga ni halak Israel na sapuluh dua ai: ¹³ Dompak purba tolu horbangan dompak utara tolu horbangan, dompak dangsina tolu horbangan anjaha dompak pastima tolu horbangan. ¹⁴ Sapuluh dua do batu onjolan ni tembok ni huta ai, anjaha tarsurat do ijai goran ni na sapuluh dua apostel ni Anak ni Biri-biri in. ¹⁵ Ijolom na marsahapkon ahu ai do sada tungkot sibar-sibar na humbani omas, laho manibar huta ai, horbanganni ampa tembokni. ¹⁶ Marompat suhi do pou-pou ni huta ai, dos do ganjangni pakon bolagni. Isibar ma huta ai marhitei sibar-sibar ai: Sapuluh dua ribu stadia. Dos do ganjangni pakon bolagni pakon gijangni. ¹⁷ Isibar ma homa tembok ni huta ai: Saratus ompat puluh ompat asta; sibar-sibar ni jolma do sibar-sibar ni malekat ai. ¹⁸ Ia onjolan ni tembok ni huta ai mata intan jaspis do, anjaha huta ai sandiri omas pitah do, lihar songon kasa. ¹⁹ Ipajagar do onjolan ni tembok ni huta ai marhitei bagei ni batu na maharga: Onjolan na parlobei jaspis do, na paduahon sapir, na patoluhon kalsedon, na paompathon samarah, ²⁰ na palimahon sardonik, na paonomhon sardion, na papituhon kerisolit, na paualuhkon beril, na pasiahkon topasion, na pasapuluhkon kerisopras, na pasapuluh sadahon kiasin, na pasapuluh duahon ametis. ²¹ Ia na sapuluh dua horbangan ai, sapuluh dua mutiha do, ganup horbangan ipauli humbani sada mutiha; ia alaman ni huta ai omas pitah do songon kasa na lihou. ²² Seng dong huidah rumah panumbahan ibagas huta ai, ai Tuhan Naibata, Sigomgom haganup do na gabe rumah panumbahan ijai, rap pakon Anak ni Biri-biri in. ²³ Seng porlu bani huta ai mata ni ari atap bulan, laho manondangisi; ai hasangapon ni Naibata do na paliharhonsi anjaha Anak ni Biri-biri in do panondangni. ²⁴ Mardalani ma bangsa-bangsa ibagas sinalsalni, anjaha boanon ni raja-raja ni tanoh on ma hamuliaon ni sidea hubagas. ²⁵ Seng pala itutup horbanganni arian, ai seng masa ijai borgin. ²⁶ Boanon ni sidea ma hasangapon pakon hamuliaon ni sagala bangsa hubagas huta ai. ²⁷ Tapi seng anjai masuk hubagas huta ai sagala na mabutak, na mangkorjahon hagigi pakon ladung, pitah na dob tarsurat bani buku hagoluhan ni Anak ni Biri-biri ai do hansa.

¹ Dob ai ipatuduhkon ma hubakku sada bah banggal hagoluhan, lihou songon kasa, na luar humbani paratas ni Naibata pakon Anak ni Biri-biri in. ² I tongah-tongah ni alaman ni huta ai pakon angkup topi ni bah ai, dong do hayu hagoluhan, na marbuah sapuluh dua hali satahun, na mamberehon buah siap bulan; ia bulung ni hayu ai gabe hamalumon do ai bani bangsa-bangsa. ³ Seng be dong na hona bura ijai. Paratas ni Naibata pakon Anak ni Biri-biri in do jongjong ijai, anjaha juak-juakNi marugas Bani. ⁴ Idahon ni sidea ma bohiNi, anjaha goranNi tarsurat bani pardompakan ni sidea. ⁵ Seng masa be ijai borgin, seng porlu be bani sidea sondang ni suluh atap sondang ni mata ni ari, ai sondangan ni Tuhan Naibata ma sidea, anjaha manrajai ma sidea ronsi sadokah ni dokahni. ⁶ Jadi ihatahon ma hubakku: Ia hata on hatengeran ni uhur do anjaha sintong; isuruh Tuhan Naibata, simada tonduy ni nabi-nabi do malekatNi, laho patuduhkon hubani juak-juakNi na laho barah masa. ⁷ Tonggor ma, barah do Ahu roh! Martuah ma na manramotkon hata ni panjahaion na ibagas buku on! ⁸ Ahu, si Johannes, do na mambogei anjaha na mangidah na masa in. Jadi dob hubogei anjaha huidah, manrogop ma ahu anjaha marsombah hulobei ni nahei ni malekat, na patuduhkon ai hubakku. ⁹ Jadi nini ma dompak ahu: Ulang sonai! Ai hasomanmu juak-juak do ahu anjaha hasoman juak-juak ni saninamu, nabi-nabi ai, ampa na manramothon hata ni buku on. Naibata ma sombah! ¹⁰ Dob ai nini ma dompak ahu: Ulang ma lak hata panjahaion ni buku on! Ai dohor ma panorangni. ¹¹ Halak sihorjahon hajahaton inunut ma mambahen na jahat, anjaha halak na butak lambin mambutaki dirini; tapi halak parpintor manghorjahon hapintoran, anjaha halak na pansing papansing dirini. ¹² Tonggor ma, podas do Ahu roh! Huboan do upah, laho mambalas hubani ganup halak romban hubani na hinorjahonni bei. ¹³ Ahu do Alpa pakon Omega, Na parlobei pakon Na parpudi, Bonani pakon Ujungni. ¹⁴ Martuah ma sagala na mamburihi hiouni, gabe marhak sidea marrupei bani hayu hagoluhan ai, anjaha boi masuk hun horbangan ai hubagas huta ai. ¹⁵ I darat ma anggo baliang pakon sipartabas pakon parbangkis pakon pamunuh pakon parnaibata na legan ampa sagala na mangkarosuhkon anjaha na mangkorjahon ladung. ¹⁶ Ahu, Jesus, marsuruh malekatHu bani nasiam, manaksihon on bani kuria in. Ahu do Urat pakon marga ni si Daud, Bintang buha siang, na marsinalsal in. ¹⁷ Jadi ihatahon Tonduy pakon tunangan ai ma: Roh ma Ham! Anjaha na mambogei ai pe ihatahon ma: Roh ma Ham! Barang ise na horahan, roh ma; na marhasihol, ijalo ma bah hagoluhan in seng pala marpamboli. ¹⁸ Ahu manaksihon bani sagala na mambogei hata ni panjahaion na bani buku on: Anggo adong na manambahi hujin, tambahan ni Naibata ma bani hamarsikon na tarsurat ibagas buku on. ¹⁹ Anggo adong halak na mambuati hata na ibagas buku panjahaion on, buaton ni Naibata ma rupeini na bani hayu hagoluhan in ampa na bani huta na pansing in, na tarsurat ibagas buku on. ²⁰ Ihatahon sisaksihon on: Tongon, barah do Ahu roh! Amen! Roh ma Ham, Tuhan Jesus! ²¹ Idop ni uhur ni Tuhan Jesus ma manghasomani nasiam haganup! Amen.