PILIPPI

PILIPPI

¹ Humbani si Paulus ampa si Timoteus, juak-juak ni Kristus Jesus, bani haganup halak na pansing ibagas Kristus Jesus, na marianan i Pilippi, raphon sintua ampa siparugas: ² Idop ni uhur ma bani nasiam ampa damei humbani Naibata Bapanta ampa humbani Tuhan Jesus Kristus! ³ Mangkatahon tarima kasih do ahu bani Naibatangku siap huingat nasiam. ⁴ Tongtong ibagas ganup tonggongku pasal nasiam ganup, ibagas malas ni uhur do ahu na martonggo ai, ⁵ mardingat saor nasiam bani Ambilan Namadear in humbani mungkahni ronsi nuan. ⁶ Anjaha tenger do uhurhu: Ia, na dob mamungkah horja na madear ibagas nasiam, dobhononNi do in das ronsi ari ni Kristus Jesus. ⁷ Patut do sonin uhurhu pasal nasiam haganup, halani ibagas uhurhu do nasiam, ai parrupei do nasiam ganup bani idop ni uhur na hubakku, sanggah na tartutup ai ahu age sanggah na martahankon ampa na pajonamkon ambilan namadear ai. ⁸ Ai Naibata do saksingku pasal banggal ni siholhu bani nasiam haganup marhitei holong ni atei ni Kristus Jesus. ⁹ Anjaha on do hutonggohon, ase lambin marbanggal holong ni uhur nasiam marisi habotohon ampa pangarusion na gok, ¹⁰ gabe boi nasiam mananda na ija siporlunan, ase pitah nasiam, anjaha seng dong sihataon bani ari ni Kristus, ¹¹ gok bani buah-buah hapintoran, na roh marhitei Jesus Kristus, bahen hasangapon ampa puji-pujian bani Naibata. ¹² Ipangindo uhurhu do nasiam sanina, ase ibotoh nasiam, paboa lambin manumpak bani hamajuon ni Ambilan Namadear do na masa bakku, ¹³ pala do tarbotoh bani ganup pangisi ni tangsi ai ampa bani haganup na legan ai, paboa halani Kristus do na targari ai ahu, ¹⁴ gabe roh tengerni do uhur ni bueinan sanina ai bani Tuhan in, anjaha roh boranini mangkatahon hata ni Naibata seng mabiar-biar. ¹⁵ Deba tongon homa manaksihon Kristus humbani uhur subil ampa paringoran, tapi deba nari humbani bujur ni uhur do. ¹⁶ Humbani jinuljul ni holong ma anggo on, halani ibotoh sidea, halani na martahankon Ambilan Namadear do, ase tartutup ahu. ¹⁷ Tapi na legan ai nani mangambilankon Kristus humbani uhur na maringor, seng humbani uhur na pitah, ase tambah nini uhur ni sidea sitaronon bakku na targari on. ¹⁸ Ase sonaha do? Atap na sonaha pe pardalan ni ai, marsipakulah-kulah atap maruhur na sintong, asal ma tarambilan Kristus; pasal ai malas do uhurhu. ¹⁹ Tongon, malas do uhurhu, ai hubotoh gabe marujung bani hatuahon do on bakku halani tonggo nasiam ampa halani pangurupi ni Tonduy ni Jesus Kristus. ²⁰ Ai in do na huhasiholhon, anjaha mangarap ahu seng anjai tarmela ahu ibagas atap aha pe, tapi marhasoman hinsah ni uhur, songon nasaindokah age sonari, maningon marsangap Kristus marhitei angkulangku, marhitei goluhku barang parmateihu. ²¹ Ai Kristus do hagoluhan bakku, anjaha untung do hamateian. ²² Tapi anggo marbuah do horjangku hinorhon ni goluh ni daging on, gabe lang hubotoh barang aha do sipilihonku. ²³ Haduasi do manosak ahu: Masihol do uhurhu misir, ase rap pakon Kristus, ai daoh do dearan ai, ²⁴ tapi porlunan do marianan ibagas daging halani nasiam. ²⁵ Anjaha marhatengeran hujai, hubotoh do, paboa manggoluh ope ahu anjaha marianan pakon nasiam haganup, laho pamajuhon ampa pahinsah haporsayaon nasiam, ²⁶ ase lambin tambah pamuji nasiam bani Kristus Jesus marhitei ahu, rohkonsi ahu use bani nasiam. ²⁷ Hansa, marparlahou ma nasiam domu hubani Ambilan Namadear ni Kristus, ase barang sanggah na roh ai ahu, huidah bani nasiam, barang age sanggah padaoh-daoh, hubogei bani nasiam, totap nasiam jongjong ibagas hasadaon ni tonduy, marsada ni uhur, marporang manghophop haporsayaon bani Ambilan Namadear in. ²⁸ Anjaha ulang ma ra nasiam pabiar-biaran ni imbang pasal atap aha pe, ai ma tanda ni hamagouan bani sidea, tapi bani nasiam tanda ni haluahon do, anjaha humbani Naibata do in. ²⁹ Ai domma ibere bani nasiam, seng pitah porsaya bani Kristus, tapi dihut do marsitaronon halani-Si. ³⁰ Maruntol do nasiam nuan, songon na niidah nasiam ijia bakku, anjaha na binogei nasiam nuan bakku.

¹ Anggo adong apoh-apoh ibagas Kristus, pakon ojur-ojur ibagas holong ni uhur, pakon parsaoran ni Tonduy, pakon ontou ni uhur ampa idop ni uhur, ² goki nasiam ma malas ni uhurhon: Sada ma paruhuron nasiam, sada ma haholongon nasiam, sauhur, sapingkiran ma nasiam! ³ Ulang ma maruhur haut atap marhasangapon na lumei, tapi ibagas toruh ni uhur hira nasiam ma hasoman nasiam lobihan humbani nasiam sandiri! ⁴ Ulang ma na porlu bani nasiam paruhurhon nasiam, tapi dihut ma na bani hasoman! ⁵ Songon paruhuron ni Kristus Jesus ma paruhuron nasiam! ⁶ Age pe marrupa Naibata Ia, sedo songon nirampas ihira uhurNi usihNi ai bani Naibata, ⁷ tapi ipalumei do diriNi anjaha ipakei rupa ni jabolon, gabe usih bani jolma do Ia, anjaha rumang jolma jumpah Bani. ⁸ Ipatoruh do diriNi, na gabe pambalosi do Ia ronsi matei, pala matei tarsilang. ⁹ Halani ai do ase ipagijang Naibata Ia, anjaha ilayak-layakkon Bani sada goran, na mangatasi sagala goran, ¹⁰ ase manowod anjaha marsombah ibagas goran ni Jesus sagala na i nagori atas pakon na i atas tanoh on, age na i toruh ni tanoh, ¹¹ anjaha sagala pamangan marhatongonkon, Jesus Kristus do Tuhan, bahen hasangapon ni Naibata Bapa. ¹² Ai pe nasiam na hinaholongan ni uhurhu, songon totap ni pambalosion nasiam na saindokah, lang pitah sanggah i lambung nasiam ahu, tapi tarlobih ma nuan, sanggah daoh ahu: Marhasoman biar pakon gobir ma haporluhon nasiam haluahon nasiam; ¹³ ai Naibata do mangkorjahon ibagas nasiam sura-sura ampa na pasaudhon ai, mangihutkon rosuh ni uhurNi. ¹⁴ Bani sagala pambahen nasiam, ulang ma nasiam marungut-ungut barang maruhur sangsi, ¹⁵ ase ulang adong sihataon bani nasiam, tapi pitah ma, gabe anak ni Naibata, na so martikas itongah-tongah ni sundut na geduk anjaha siparbalik; ijin ma nasiam marsinondang songon bintang i dunia on, ¹⁶ marsijoloman bani hata hagoluhan in, bahen puji-pujian bakku bani ari ni Kristus, paboa na so soya parlumbaonku anjaha sedo na so marguna halojaonku. ¹⁷ Ai porini iduruskon darohku gabe galangan ampa parsombahon, mangkopkop haporsayaon nasiam, malas anjaha megah do uhurhu rap pakon nasiam haganup. ¹⁸ Sonai ma homa malas ma uhur nasiam, anjaha marmalas ni uhur ma nasiam rap pakon ahu. ¹⁹ Tapi arap do uhurhu ibagas Tuhan Jesus, podas ma si Timoteus suruhonku bani nasiam, andohar marhinsah ni uhur age ahu, anggo domma hubogei sonaha pasal nasiam. ²⁰ Ai seng adong be hasomanku na marparuhuron songonsi, na ra mansarihon nasiam humbani uhur na bujur. ²¹ Ai haganup do sidea mangindahi na porlu bani dirini bei, seng be na porlu bani Kristus Jesus. ²² Pasal hataluponni ibotoh nasiam do: Songon anak rap pakon bapa marhorja do ia pakon ahu bani Ambilan Namadear in. ²³ Arap do uhurhu mintor suruhonku do ia, ijin hubotoh, sonaha pasal langkahku. ²⁴ Tapi tenger do uhurhu ibagas Tuhan in, ahu sandiri pe podas do roh. ²⁵ Anjaha domma huputuskon porlu do marsuruh bani nasiam si Epaproditus, sanina in, hasomanku sahorja ampa saparuntolon, na sinuruh nasiam, mamboan na porlu bakku, ²⁶ ai masihol do ia bani nasiam haganup, anjaha rusak do ia, halani tarbogei bani nasiam naboritni ai. ²⁷ Anjaha tongon parah hinan do naboritni, pala narus matei; tapi maidop do uhur ni Naibata mangidahsi, seng pitah mangidahsi tene, dihut do mangidah ahu, ase ulang mardapot-dapot pusok ni uhurhu. ²⁸ Domma hupapodas marsuruhsi, ase marmalas ni uhur nasiam mangidahsi, anjaha ahu pe hunlumbang uhurhu. ²⁹ Ai pe, malas ma panjalo nasiam bani ibagas Tuhan in, anjaha sangap ma bahen nasiam halak na sonin. ³⁰ Ai halani horja ni Kristus narus do ia matei, anjaha iajamkon do hosahni laho manggoki pangidangion nasiam bakku.

¹ Ambah ni ai, nasiam sanina, marmalas ni uhur ma nasiam ibagas Tuhan in! Manurathon in hun gati bani nasiam, seng borat uhurhu, ai patotap uhur nasiam do in. ² Jaga ma nasiam bani baliang, jaga bani parhorja na jahat, jaga bani parsunaton na lepak! ³ Ai hita do siparsunat na tongon, siparsombah ibagas Tonduy ni Naibata siparmegah-megah ibagas Kristus Jesus, na so martenger ni uhur bani daging, ⁴ porini pe adong do namin sipangunsagahkononku ibagas daging. Ai anggo adong halak na legan, na mangagan adong sipangunsagahkononni ibagas daging, ahu bueinan: ⁵ Tarsunat bani ari paualuhkon, marasal humbani halak Israel, humbani marga Benjamin, halak Heber anjaha tubuh humbani halak Heber, halak Parisei mangihutkon titah in, ⁶ garang mardakdaki kuria in, seng dong sihataon ibagas hapintoran mangihutkon titah. ⁷ Tapi paruntungan hinan pe bakku, harugian do in huhira halani Kristus. ⁸ Tongon haganup do harugian huhira marimbang hamuliaon ni panandaion bani Kristus Jesus, Tuhankin. MarhalaniSi harugian do bakku ganupan ai, anjaha tompoh-tompoh do ai huhira, ase bakku Kristus, ⁹ ase ibagas Ia ahu jumpah, seng marhapintoran sandiri marhitei titah, tapi marhitei haporsayaon ibagas Kristus do, ai ma hapintoran na humbani Naibata, maronjolan bani haporsayaon, ¹⁰ ase hutanda Ia ampa hagogohon ni parpuhoonNi ai ampa hasadaon bani sitarononNi ai, gabe songonSi ibagas parmateiNi, ¹¹ andohar das ahu hubani parpuhoon humbani na matei. ¹² Seng ope, na dob jumpah ahu ma ai, atap na dob gokan dear ma ahu; tapi sai huparayak do ase jumpah ahu, halani na dob tinangkap ni Kristus Jesus ahu. ¹³ Nasiam sanina, lape huhira, na dob jumpah ahu ai, tapi on do tene: Huhalupahon do na i pudingku, huparayak na i lobeihu, ¹⁴ dompak tujuan ai do hupojong, dompak upah hamonangan ni pandiloon na humbabou, na humbani Naibata ibagas Kristus Jesus. ¹⁵ Barang piga hita na gokan dear, in ma paruhurhon hita; anjaha anggo legan ope pingkiran nasiam pasal atap aha pe, age ai patalaron ni Naibata do bani nasiam. ¹⁶ Asal ma torus dalani hita dalan na dob nidalananta. ¹⁷ Nasiam sanina, usihi nasiam ma ahu, anjaha pardiatei nasiam ma na marparlahou songon hanami, siusihan nasiam. ¹⁸ Ai buei do na marparlahou, gabe munsuh ni silang ni Kristus; anjaha pasal sidea domma gati huhatahon bani nasiam, anjaha anggo sonari marhasoman iluh do huhatahon bani nasiam. ¹⁹ Hamagouan do ujung ni sidea, boltokni do iparnaibata, sihamelahononkon do ihasangapkon, anjaha na i tanoh on iparuhurhon. ²⁰ Ai warga nagori atas do hita, hunjai do ipaima-ima hita Sipaluah hita, in ma Tuhanta Jesus Kristus in. ²¹ PaubahonNi do angkulanta na dorun on, gabe doshon angkulaNi na sangap in, domu hubani hagogohonNi, na boi patundukkon haganupan ai Bani.

¹ Halani ai, nasiam sanina, na huhaholongi anjaha na huhasiholi, malas ni uhur bakku ampa sortalingku, sai sonin ma nasiam totap ibagas Tuhan in, nasiam hinaholongan. ² Nasiam Oiodia ampa Sintike, hupaingat ma nasiam marsada ni uhur ibagas Tuhan in. ³ Anjaha hupindo homa bamu, ham hasomanku sahorja na botul, urupi ma parinangon in, in ma hasomanku marporang manghophop Ambilan Namadear in, rap pakon si Klemens ampa hasomanku sahorja na legan ai, na dob ibagas buku hagoluhan in goran ni sidea. ⁴ Marmalas ni uhur ma nasiam tongtong ibagas Tuhan in; huulaki ma mangkatahon: Marmalas ni uhur ma! ⁵ Habasaron nasiam ai, sihol ma talar ai bani haganup halak! Dohor do Tuhan in. ⁶ Ulang ma haru uhur nasiam pasal atap aha pe, tapi pabotohkon nasiam ma pangindoan nasiam bani Naibata marhasoman tonggo, elek-elek ampa tarima kasih. ⁷ Anjaha damei ni Naibata, na mangatasi haganup paruhuron, in ma manramothon uhur ampa pingkiran nasiam ibagas Kristus Jesus! ⁸ Ambahni ai, nasiam sanina, paruhurhon nasiam ma sagala na sintong, na hormat, na pintor, na borsih, na jenges, na dear bogeion atap biak na madear atap na patut sipujion. ⁹ Anjaha aha na ginuruhon nasiam, na jinalo, na binogei ampa na niidah nasiam humbakku, ai ma horjahon nasiam; anjaha Naibata Sipardamei in ma mangkasomani nasiam. ¹⁰ Malas tumang do uhurhu ibagas Tuhan in, halani mangulaki use nasiam nuan mansarihon na porlu bakku. Tongtong do ipingkirhon nasiam pasal ai, tapi na so adong do hasompatan bani nasiam. ¹¹ Seng halani hurangan ahu, ase huluarhon ai, ai domma huguruhon, mangkadearhon na adong. ¹² Hubotoh do manggoluh ibagas na hurang, hubotoh do ibagas na marlobih-lobih; domma ilatih ahu bani haganup, bosur pakon loheian, marlobih-lobih pakon hurangan pe. ¹³ Haganup do tarhorjahon ahu marhiteihon Ia, na margogohi ahu. ¹⁴ Tapi tene, dear do pambahenan nasiam in, ai itatap nasiam do hasosakanku. ¹⁵ Ai ibotoh nasiam halak Pilippi do, na so adong, sobali nasiam, kuria na hubahen hasomanku, mambahen parhiraan pasal na binere pakon na nijalo, sanggah na mamungkah mangambilankon Ambilan Namadear in, dob na hutadingkon Makedonia; ¹⁶ ai hu Tessalonika pe domma itongos nasiam na porlu bakku sahali dua hali. ¹⁷ Sedo sibere-bere ai na hupindahi; tapi buahni ai do na hupindahi, na gabe idou bani nasiam. ¹⁸ Domma hujalo haganup, anjaha marlobih-lobih do ahu. Marlobih-lobih tumang do ahu nuan, dob hujalo tinongos nasiam marhitei si Epaproditus, ai ma uap na misbou, galangan na hinamalaskon ampa hinarosuhkon ni Naibata. ¹⁹ Tapi gokan ni Naibatangku do sagala na porlu bani nasiam, domu hubani habayakonNi na sangap ai, ibagas Kristus Jesus! ²⁰ Anjaha hasangapon ma bani Naibata, Bapanta in, ronsi sadokah ni dokahni. Amen. ²¹ Padas nasiam ma hata tabi humbakku bani ganup halak na mapansing in ibagas Kristus Jesus! Manongos tabi do homa bani nasiam sanina-sanina, na rap pakon ahu. ²² Manongos tabi do haganup halak na mapansing in bani nasiam, tarlobih ma ai na hun rumah ni Kesar. ²³ Idop ni uhur ni Tuhan Jesus Kristus ma mangkasomani tonduy nasiam.