MARKUS

MARKUS

¹ On ma mula ni Ambilan Namadear pasal Jesus Kristus. ² Songon na tarsurat bani nabi Jesaya: Tonggor ma, Husuruh ma suruhanKu parlobeimu, sipatorsa dalanmu! ³ Sora ni na mardilo-dilo i halimisan: Pasirsir ma dalan ni Tuhan in, pintor ma bahen sidalananNi. ⁴ I halimisan do si Johannes mandidihon anjaha mangambilankon pandidion hamubahon ni uhur bahen hasasapan ni dousa. ⁵ Jadi roh ma hubani haganup parnagori Judea pakon par-Jerusalem, gabe ipadidihon sidea ma dirini hubani i bah Jordan, dob isopotkon bei dousani. ⁶ Anggo si Johannes, ambulu ni unta do hiouni, huling-kuling gonditni anjaha sipanganonni balang pakon manisan ni lobah. ⁷ On do ambilanni: Roh ma hun pudingku sigogohan humbakku, seng talup ahu paunduk diringku mangharhari tali ni sipatuni. ⁸ Ia ahu, bah do hudidihon bani nasiam, tapi anggo Ia, Tonduy Na pansing do didihononNi bani nasiam. ⁹ Bani panorang ai roh ma Jesus hun Nasaret na i Galilea, jadi tardidi ma Ia i bah Jordan, ididi si Johanes. ¹⁰ Mandarathonsi Ia hun bah ai, iidah ma buha langit, anjaha sogop ma Tonduy ai hu Bani marrupahon asas. ¹¹ Anjaha tarbogei ma sora hun nagori atas: Ho do Anak na hinaholongan ni uhurHu, rosuh do uhurHu Bam. ¹² Dob ai mintor ijuljul Tonduy ai ma Ia hu halimisan. ¹³ Ase i halimisan ma Ia ompat puluh ari dokahni ilajou sibolis; rap pakon binatang do Ia ijai, tapi malekat do marugas Bani. ¹⁴ Dob tartutup si Johannes, roh ma Jesus hu Galilea mangambilankon Ambilan Namadear ni Naibata: ¹⁵ Domma jumpah panorangni; domma dohor harajaon ni Naibata. Paubah nasiam ma uhur nasiam anjaha haporsayai nasiam ma Ambilan Namadear in! ¹⁶ Sanggah mardalan Ia i topi ni tao Galilea, iidah ma si Simon pakon si Andareas, sanina ni si Simon ai mangamburhon jala ni sidea; ai panjala do sidea. ¹⁷ Jadi nini Jesus ma dompak sidea: Eta, ihutkon nasiam ma Ahu, Hubahen pe nasiam sijala jolma! ¹⁸ Jadi mintor itadingkon sidea ma jala ai anjaha irikkon ma Ia. ¹⁹ Dob idalani hundaoh otik, iidah ma si Jakobus, anak ni si Sebedeus, ampa si Johannes, saninani ai; ibagas parau do sidea paturei-tureihon jala ni sidea. ²⁰ Jadi mintor idilo ma sidea; anjaha itadingkon sidea ma bapa ni sidea, si Sebedeus, ibagas parau ai rap pakon halak upahan ni sidea, lanjar laho ma sidea mangihutkonsi. ²¹ Jadi laho ma sidea hu huta Kapernaum; mintor masuk ma Ia hu rumah parguruan sanggah ari Sabat laho mangajari. ²² Longang ma uhur ni halak mambogei pangajaranNi, ai marhidorat do pangajaranNi, sedo songon sibotoh surat. ²³ Adong ma i rumah parguruan ai sada halak na siniaran ni toduy na mabutak, mardilo ma ia, ²⁴ nini: Mangaha Ham roh bannami, Ham Jesus par-Nasaret? Roh do Ham hape laho mangagou hanami. Hubotoh do ise Ham: Napansing ni Naibata. ²⁵ Jadi isorgang Jesus ma ia, nini ma: Sip ma ho, mandarat ma ho humbani! ²⁶ Jadi isarad tonduy na mabutak ai ma ia, anjaha marsora na gogoh luar ma ia humbani. ²⁷ Jadi longang ma sidea haganupan, pala marsisungkunan samah sidea, nini: Aha do on? Pangajaran na baru do on anjaha na marjumbalang; ipaksa do tonduy na butak, gabe ibalosi do Ia. ²⁸ Jadi mintor sar ma baritaNi inggot nagori Galilea. ²⁹ Dob kaluar hun rumah parguruan ai, mintor laho ma Ia hu rumah ni si Simon pakon si Andareas rap pakon si Jakobus ampa si Johannes. ³⁰ Tibal do anturang ni si Simon, pane-paneon, jadi mintor ipatugah sidea ma ai Bani. ³¹ Idohori ma ia, ijamah ma tanganni laho pajongjongkonsi, jadi itadingkon pane-pane ai ma ia, lanjar marugas ma ia bani sidea. ³² Tapi dob bod ari dob sundut mataniari, ipamboan halak ma hu Bani na boritan pakon na setanon. ³³ Haganup parhuta ai marhumpul do i lobei ni labah ai. ³⁴ Jadi buei do na boritan, na marbagei-bagei naboritni, ipamalum, anjaha buei do setan-setan iusir, anjaha seng ilopas setan-setan mansahapkon, na dob itanda sidea Ia. ³⁵ Girah sogod, golap-golap ope, puho ma Ia, lanjar luar misir bani ianan na lungun laho martonggo. ³⁶ Jadi iirikkon si Simon pakon hasomanni ai ma Ia. ³⁷ Dob jumpah sidea Ia, nini sidea ma dompakSi: Haganup halak mangindahi Ham! ³⁸ Tapi ihatahon ma bani sidea: Laho ma hita bani ianan na legan, hu dusun-dusun na dohor an, ase dihut ijai Ahu marambilan; ai halani ai do, ase roh Ahu. ³⁹ Jadi laho ma Ia marambilan bani parguruan ni sidea, bani sab nagori Galilea, anjaha iusir do setan-setan. ⁴⁰ Jadi roh ma hu Bani sada halak na gadamon, ielek-elek ma Ia anjaha isombah lanjar ihatahon: Anggo ra Ham, tarpasusi Ham do ahu! ⁴¹ Jadi maidop ma uhurNi, isurdukkon ma tanganNi, ijamah ma ia lanjar nini ma hubani: Ra do Ahu, susi ma ham! ⁴² Jadi mintor tanggal ma gadam ai humbani, gabe susi ma ia. ⁴³ Ipaingat ma ia pangkei-pangkei, dob ai mintor isuruh ma ia laho, ⁴⁴ lanjar ihatahon ma hubani: Jaga ham, ulang das ipatugah-tugah ham in age bani ise! Tapi laho ma ham patidakkon dirimu bani malim, galangkon ham ma na tinitahkon ni si Musa, paboa na dob susi ham, gabe hasaksian bani sidea. ⁴⁵ Tapi ai pe ia luar, ipungkah ma mambaritahon ampa pasarhon na masa ai, gabe seng tarbahen Jesus be masuk hu huta bani na talar; tapi idarat bani ianan na lungun mando Ia, anjaha marrohan do halak hu-Bani hunja-hunja pe.

¹ MulakhonSi Ia hu huta Kapernaum, ai ma piga-piga ari ipudi ni ai, jadi tarbogei ma na dob i rumah Ia. ² Jadi martumpu ma buei halak, pala seng siat be i lobei ni labah ai, gabe iambilankon ma bani sidea Hata ai. ³ Dob ai roh ma halak mamboan na oyangon hu Bani, ompat halak do na marusungsi. ⁴ Tapi halani seng boi idohori sidea Ia halani na mabuei ai, ibuha sidea ma tayub i babou ni ianan ai; jadi itantan ma hujai podoman hatibalan ni na oyangon ai. ⁵ Mangidah haporsayaon ni sidea ai Jesus, nini ma dompak na oyangon ai: Ambia, domma sasap dousamu! ⁶ Tapi dong do deba hundul ijai sibotoh surat, na mangkatahon ibagas uhurni: ⁷ Mase sonai parsahap ni halak on? Manrisai do Ia! Ise boi manasap dousa sobali Naibata tumang? ⁸ Jadi mintor ibotoh Jesus ma ibagas uhurNi, na sonai pingkiran ni sidea i bagas, gabe nini ma dompak sidea: Mase sonai pingkiran ni uhur nasiam? ⁹ Naija do urahan hatahonon bani na oyangon on: "Domma sasap dousamu", atap nahatahon: "Jongjong ma ho, boan ma podomanmu, mardalan ma"? ¹⁰ Tapi ase ibotoh nasiam na markuasa do Anak ni Manisia in i tanoh on manasap dousa, nini ma dompak na oyangon ai: ¹¹ Huhatahon ma bam: "Jongjong ma ho, boan ma podomanmu anjaha mulak ma hu rumahmu". ¹² Jadi mintor jongjong ma ia, ibuat ma podomanni lanjar laho hu darat, inonoi haganup sidea, pala longang sidea haganup. Ipuji sidea ma Naibata, nini ma: Lape ongga iidah hanami na sonin! ¹³ Jadi laho ma Ia use hu darat, hu topi tao, jadi roh ma haganup na mabuei ai hu Bani, gabe iajari ma sidea. ¹⁴ Jadi sanggah na mardalan ai, iidah ma si Lepi, anak ni si Alpeus, hundul i kantor sohei; jadi ihatahon ma bani: Irikkon ma Ahu! Jadi jongjong ma ia laho mangirikkonsi. ¹⁵ Jadi masa ma, sanggah na hundul Ia mangan i rumahni ai, buei do sijalo sohei pakon pardousa mangkasomani Jesus ampa susianNi ai mangan; ai buei do sidea na mangirikkonSi. ¹⁶ Dob iidah sibotoh surat na humbani Parisei, mangan Ia rapkon pardousa pakon sijalo sohei, nini sidea ma dompak susianni: Rapkon sijalo sohei ampa pardousa do Ia mangan tene! ¹⁷ Tapi dob ibogei Jesus ai, nini ma dompak sidea: Seng porlu doktor bani na jorgit, bani na boritan do! Seng roh Ahu laho mandilo parpintor, tapi pardousa do. ¹⁸ Anggo susian ni si Johannes pakon halak Parisei siparpuasa do. Jadi roh ma sidea, nini ma hu Bani: Mase susian ni si Johannes pakon susian ni Parisei marpuasa do, hape susianMu lang? ¹⁹ Nini Jesus ma dompak sidea: Mintor tarbahen halak na marpesta parunjukon ma marpuasa, sadokah rap ope pakon sidea siparunjuk ai? Sadokah rap ope pakon sidea siparunjuk ai, seng tarbahen sidea marpuasa. ²⁰ Tapi na roh ma arini, buaton ma siparunjuk ai humbani sidea; jadi bani ari ai ma sidea marpuasa. ²¹ Seng dong halak, na mandungkapkon hiou na baru bani hiou na dob madotei, ai rigat do use na nidungkapkon na bayu ai hubani na buruk ai, gabe roh bangbangni ma rigatni ai. ²² Anjaha seng dong halak, na pauseihon anggur na baru hubani gusi huling-kuling na buruk; ai rigatkonon ni anggur ai do gusi huling-kuling na buruk ai, gabe mambur ma anggur ai, anjaha maseda gusi ai. Tapi anggur na bayu bani gusi huling-kuling na bayu ma. ²³ Jadi santorap sanggah ari Sabat, mamontas ma Ia hun tongah-tongah ni juma; jadi ipungkah susianNi ma mamutiki buyur ni omei sanggah na mardalan ai. ²⁴ Jadi nini Parisei ma dompakSi: Tonggor ma, na binahen ni sidea in, na so bulih horjahonon bani ari Sabat! ²⁵ Jadi nini ma dompak sidea: Ai seng ongga ibasa nasiam nani na binahen ni si Daud, sanggah tarsosak ia anjaha na loheian ai ia rap pakon hasomanni? ²⁶ Imasuki do rumah ni Naibata sanggah panorang ni si Abyatar, sintua ni malim ai, anjaha ipangan do ruti galangan ai, na so malo panganon ni age ise sobali ni malim-malim, anjaha ibere do homa hunjai bani hasomanni. ²⁷ Anjaha nini ope bani sidea: Halani jolma do, ase iadongkon ari Sabat, sedo halani ari Sabat ase itompa jolma. ²⁸ Halani ai Anak ni jolma in do Tuhan ni ari Sabat homa.

¹ Dob ai masuk ma Ia use hubagas sada rumah parguruan. Dong ma ijai sahalak na matei lopah tanganni. ² Igompangi sidea ma Ia atap ra do Ia pamalumkonsi bani ari Sabat, ase dong dalan bani sidea mangaduhonSi. ³ Jadi nini ma dompak halak partangan na matei lopah ai: Jongjong ma ho hu tongah-tongah on! ⁴ Lanjar ihatahon ma bani sidea: Aha do na patut bahenon bani ari Sabat, na madear do atap na jahat, pagoluhkon do atap mamunuh? Tapi sip ma sidea. ⁵ Jadi ikawahkon ma sidea ibagas marah pakon pusok ni uhur halani tendel ni uhur ni sidea. Anjaha ihatahon ma bani halak ai: Pagostong ma tanganmu! Jadi ipagostong ma tongon, jadi malum ma tanganni ai. ⁶ Jadi luarhonsi Parisei ai, mintor ibahen sidea ma partahian pakon halak Herodiani, barang sonaha bahenon ni sidea laho mamunuhSi. ⁷ Jadi surut ma Jesus rapkon susianNi dompak tao ai. Buei tumang do halak hun Galilea pakon hun Judea mangirikkonSi, ⁸ sonai homa hun Jerusalem pakon nagori Idumea pakon na hun dipar ni bah Jordan pakon na hun Tirus ampa Sidon; buei do halak na roh hu Bani, dob ibogei sidea buei ni na binahenNi ai. ⁹ Jadi isuruh ma susianNi pasirsirhon sada parau Bani halani na mabuei ai, ase ulang isosak sidea Ia. ¹⁰ Ai buei tumang do sidea ipamalum, gabe marurup ma sagala na boritan roh manjamahSi. ¹¹ Anjaha sagala partonduy na mabutak, dob iidah sidea Ia, marsombah ma hu Bani lanjar dilo-dilo: Ham do Anak ni Naibata! ¹² Tapi gomos do sidea ipalumba, ase ulang ipatugah-tugah sidea pasal Ia. ¹³ Dob ai tangkog ma Ia hu sada dolog, jadi idilo ma hu lobeiNi halak harosuh ni uhurNi, gabe roh ma sidea hu Bani. ¹⁴ Ipabangkit ma sapuluh dua halak bahen hasomanNi, sisuruhonNi marambilan, ¹⁵ anjaha na markuasa mangusir setan-setan. ¹⁶ Ase ipabangkit ma na sapuluh dua on: Si Simon na igoran homa si Petrus; ¹⁷ si Jakobus, anak ni si Sebedeus, pakon si Johannes, sanina ni si Jakobus ai. Igoran do sidea Boanerges, artini: anak ni longgur. ¹⁸ Ambah ni ai si Andareas, si Pilippus, si Bartolomeus, si Mateus, si Tomas, si Jakobus anak ni si Alpeus, si Tadeus, si Simon halak Kana, ¹⁹ pakon si Judas Iskariot, partahi-tahi ai. ²⁰ Jadi masuk ma Ia hubagas sada rumah. Marurup ma use roh jolma, pala seng sompat sidea mangan. ²¹ Dob ibogei sindohorni ai, roh ma sidea laho mangalopSi, halani nini halak: Na podouan do Ia. ²² Ia sibotoh surat na roh hun Jerusalem, nini sidea do: Na siniaran ni Belsebul do Ia, anjaha mangunsagahkon kopala ni setan do iusir setan-setan ai. ²³ Jadi idilo ma sidea hu lobeiNi, anjaha marlimbaga ma Ia marsahap pakon sidea: Sonaha ma ra setan mangusir hasomanni setan? ²⁴ Anggo marsalisih sada harajaon samahsi, seng anjai totap harajaon ai. ²⁵ Anjaha anggo adong sada rumah tangga marsalisih samahsi, seng anjai totap be rumah tangga ai. ²⁶ Ase anggo marsilawanan setan ai samahsi anjaha marsalisih, seng totap be ia, tapi na laho bois ma ia. ²⁷ Seng boi imasuki halak rumah ni halak na gogoh, laho manrampas ugasni, anggo lang lobei isangkut na gogoh ai; dob ai pe ase tarbuatsi ugas-ugasni. ²⁸ Na sintong do hatangkon bani nasiam: Tarsasap do sagala dousa ni jolma, ronsi panrisaion ni sidea; ²⁹ tapi halak na mangapasi Tonduy Napansing, seng dapotan hasasapan ni dousa ia ronsi sadokah ni dokahni; mangonai do bani utangni ai ronsi sadokah ni dokahni. ³⁰ Sonai ma ihatahon, halani nini sidea: Partonduy na mabutak do Ia. ³¹ Jadi roh ma inangNi pakon saninaNi, i darat do sidea jongjong, anjaha isuruh sidea ma na mandiloSi. ³² Hundul do na mabuei ai manliotiSi, nini sidea ma dompakSi: Tonggor ma, i darat an do inangMu, saninaMu pakon botouMu, laho mangindahi Ham! ³³ Ibalosi ma sidea, nini ma: Ise do goranon inangKu anjaha ise do saninangKu? ³⁴ Jadi ikawahkon ma na hundul manliotiSi ai, nini ma: On do inangKu, on do saninangKu! ³⁵ Ai na mangkorjahon harosuh ni Naibata, ai do saninangKu, ai do botouHu, ai do inangKu!

¹ Jadi iulaki Jesus ma use mangajari i topi tao ai. Martumpu ma buei halak hu lobeiNi, pala imasuki sada parau na i tao ai, lanjar hundul ma ijai. I topi tao ai do anggo halak na mabuei ai ganup. ² Jadi buei ma iajarhon bani sidea marhitei limbaga, nini ma bani sidea marhitei pangajarionNi ai: ³ Tangar ma! Na laho do sada halak panabur manaburhon bonihni. ⁴ Jadi sanggah na manabur ai ia, madabuh ma deba bonih ai hu dalan, gabe roh ma manuk-manuk mamagutisi. ⁵ Na deba nari madabuh hu tanoh na batuon, na so sadiha hapal tanohni, jadi mintor tubuh ma, halani na so bagas ai tanohni. ⁶ Tapi sanggah na lambin gijang ari, melus ma ai lanjar matei, halani na so marurat ai. ⁷ Ia na deba nari madabuh do hu tongah-tongah ni parhupi-hupian; lambin marbanggal ma ai rap pakon hupi-hupi ai; ipisat ma ai, gabe seng saud marbuah. ⁸ Anjaha na deba nari use, madabuh do hu tanoh na madear; tubuh ma ai, manggargar anjaha marbuah, adong do na tolu puluh lompit ampa na saratus lompit. ⁹ Lanjar nini ma: Barang ise parpinggol na marpanangar, itangar ma ai! ¹⁰ Jadi sanggah sahalakSi mando tading, isungkun halak na mangkasomaniSi ampa na sapuluh dua ai ma Ia pasal limbaga ai. ¹¹ Gabe ihatahon ma bani sidea: Ibere do bannima rusia ni harajaon ni Naibata, tapi bani halak na i darat, marhitei limbaga do ganup ipadas ai, ¹² ase, age pe ikawahkon sidea ai, seng iidah, anjaha age pe ibogei, seng iarusi, ase ulang mubah uhur ni sidea anjaha sasap dousa ni sidea. ¹³ Dob ai nini ma dompak sidea: Seng iarusi hanima limbaga in? Anggo sonai, sonaha ma boi arusan nima ganup limbaga in? ¹⁴ Ia sipanabur ai, hata ai do isaburhon. ¹⁵ Ia na bani dalan ai, ai ma halak panaburan ni hata ai; anjaha dob ibogei sidea hata ai, mintor roh do sibolis mambuat hata na dob sinaburhon hu bagas uhur ni sidea ai. ¹⁶ Anjaha sonai do homa na sinaburhon bani tanoh na batuon ai, dob ibogei sidea hata ai, mintor malas do uhur ni sidea mambogei ai; ¹⁷ tapi seng marurat ai i bagas uhur ni sidea, tongkin hansa tahan sidea. Ai anggo masa hamarsikon atap parburuon halani hata in, mintor surut do sidea. ¹⁸ Anjaha na deba nari ai ma na sinaburhon hu tongah-tongah ni hupi-hupi ai. Ibogei sidea do hata ai, ¹⁹ tapi masuk ma hu bagas uhur ni sidea holsoh-holsoh parduniaon, panarik ni habayakon sipangoto-otoi in, ampa hisap-hisap na legan, jadi ipisat ma hata ai, gabe seng saud marbuah. ²⁰ Tapi na sinaburhon bani tanoh na madear ai, ai ma halak na mambogei hata in anjaha na manjalosi, gabe marbuah, adong na tolu puluh lompit, onom puluh lompit ampa saratus lompit. ²¹ Dob ai ihatahon ma bani sidea: Ai adong do halak na pagara palita, ase inahkon ai i toruh ni tapongan atap i toruh ni podoman? Ai lang hu atas ni parpalitaan do ai inahkon? ²² Ai seng dong na ponop, na so talar use, anjaha seng dong rusia, na so tarbotoh use. ²³ Barang ise parpinggol na marpanangar, itangar ma in! ²⁴ Nini ope dompak sidea: Paruhurhon hanima ma na binogei nima! Parsuhatan na sinuhatkon nima do suhatkonon bannima, tambahkononNi ope tene bannima. ²⁵ Ai halak na marnadong, bereon ope bani, tapi halak na marnalang, buaton ope na adong bani hinan. ²⁶ Dob ai nini ma: Ia harajaon ni Naibata, ai ma songon pambahen ni halak, na manaburhon bonih hu jumani. ²⁷ Na modom do ia borngin, anjaha puho arian. Martumbor do ai, dob ai marbuhutanoh, na so pamotohan ni parjuma ai. ²⁸ Ai humbani gogohni sandiri ipatubuh tanoh ai do lobei hayuni, dob ai buyurni, dob ai gandum na porngis i bagas buyurni ai. ²⁹ Anjaha dob masak gandum ai, mintor isuruh ma panabi, ai jumpah ma pariama. ³⁰ Dob ai nini ma: Hubani aha ma pausihonta harajaon ni Naibata? Hubani aha ma limbagahononta? ³¹ Usih do ai bani batu ni loharum. Sanggah isaburhon ai hu tanoh, ai do silumatan humbani sagala batu ni suan-suanan. ³² Tapi dob isaburhon, podas do ai banggal, gabe gijangan humbani sagala suan-suanan na boi siparlowohon; mardangkahi do ai banggal-banggal, gabe boi do marasari manuk-manuk na i awang-awang i toruh ni linggomni. ³³ Isahapkon do hata ai bani sidea, marhitei buei limbaga na sonai, domu hubani na tarjalo sidea. ³⁴ Seng dong ihatahon bani sidea, anggo seng marhitei limbaga; tapi pulig do ipatorang haganupan ai bani susianNi. ³⁵ Lanjar bani na sadari ai, bodhonsi ari, nini Jesus ma dompak susianNi: Laho ma hita marparau hu dipar ai! ³⁶ Jadi isuruh sidea ma mulak halak na mabuei ai, anjaha iboan sidea ma Jesus, sonai tumang, ibagas parau ai. Adong do parau na legan mangirikkon sidea. ³⁷ Dob ai roh ma haba-haba na doras, anjaha gilumbang pe mangkajomba ma hu bagas parau, gabe igoki bah ma parau ai. ³⁸ Tapi modom do anggo Jesus, marbantal, hampit pudi ni parau ai. Ipuhoi sidea ma Ia, nini: Ham Guru! Ai seng parduli Ham, age magou hita? ³⁹ Jadi puho ma Ia, ihata ma logou ai, anjaha nini ma dompak tao ai: Sip ma! Soh! Jadi soh ma logou ai, anjaha minop tao ai. ⁴⁰ Dob ai nini ma dompak sidea: Mase ma mabiar hanima? Ai seng dong ope haporsayaon nima? ⁴¹ Jadi mabiar tumang ma sidea, anjaha nini ma samah sidea: Ai ise do on, ase logou ampa tao pe mambalosiSi?

¹ Dob ai das ma sidea hu dipar ni tao ai, hu nagori Gerasa. ² Jadi sanggah na mandarat ai Ia hun parau ai, mintor roh ma hun tanoman sada halak na setanon manjumpahkonSi. ³ I tanoman do ia marianan, anjaha seng dong na manangkutsi, age marhitei rantei. ⁴ Ai domma gati isangkut tangan ampa naheini, tapi irutuskon do rantei na bani tanganni ampa na bani naheini ai, seng dong na boi patundukkonsi. ⁵ Arian borngin sai i tanoman do ia atap i pardologan; sai doruh-doruh do ia, anjaha ibogbogi dirini bani batu. ⁶ Sanggah na tinatapni Jesus humbani na daoh, roh ma ia marlintun, lanjar manrogop i lobeini, ⁷ anjaha marsora na gogoh ma ia dilo-dilo, nini ma: Mangaha Ham roh bakku, Jesus, Anak ni Naibata, Sigijangan in? Marhitei goran ni Naibata, huelek-elek ma Ham, ulang ma arsik Ham ahu! ⁸ Halani domma ihatahon Jesus hubani: Luar ma ho humbani halak on, ale setan! ⁹ Dob ai isungkun ma ia: Ai ise do goranmu? Jadi nini ma mambalosi: Legion do goranku, ai buei do hanami. ¹⁰ Jadi sai ielek-elek ma Ia, ase ulang iusir sidea hun nagori ai. ¹¹ Jadi adong ma bani raboyon na ijai ai sada hulanan banggal babuy, manggagati. ¹² Jadi ielek-elek sidea ma Ia; Suruh Ham ma hanami hubani babuy ai, ase ai imasuki hanami. ¹³ Jadi ibalosi ma sidea, gabe luar ma tonduy na butak ai, anjaha imasuki ma babuy ai. Anjaha babuy na sahulanan ai pe, adong do ai hira-hira dua ribu; marpojong ma ai hun tolping ai hu bagas tao ai, gabe marmateian ma, mogap i bagas tao ai. ¹⁴ Anjaha parmahan ai pe maporus ma; ibaritahon sidea ma ai bani halak na i huta-huta ampa na i juma. Jadi marrohan ma sidea, laho mangidah na dob masa ai. ¹⁵ Jadi das ma sidea bani Jesus, anjaha iidah sidea ma na setanon, na siniaran ni Legion ai hinan, hundul dear marpakeian anjaha torang maruhur, gabe mabiar ma sidea. ¹⁶ Anjaha halak na mangidah na masa ai pe, ibaritahon ma hubani sidea pasal na siniaran ni setan ai ampa pasal babuy ai. ¹⁷ Jadi ielek-elek sidea ma Ia, ase laho Ia hun nagori ni sidea ai. ¹⁸ Dob ai sanggah na laho masuk Ia hu parau ai, ielek-elek na setanon ondi ma Jesus, atap boi do ia mangkasomaniSi. ¹⁹ Tapi seng ipalopas, tapi ihatahon ma hubani: Mulak ma ho hu rumahmu, hubani diha-dihamu! Patugah ma bani sidea, buei ni nabinahen ni Tuhan in bam, ampa pangidopiNi bam. ²⁰ Ia pe mulak ma hu rumahni, anjaha ibaritahon ma i Dekapolis, banggal ni na binahen ni Jesus hubani, gabe longang ma halak haganup. ²¹ Jadi dob das use Jesus marparau hu dipar ai, marurup ma roh halak na mabuei ai hu Bani, sanggah i topi ni tao ai ope Ia. ²² Anjaha roh ma homa sada halak kopala ni parguruan ai, goranni si Jairus; jadi dob iidah Jesus, manrogop ma ia i lambung ni naheiNi, ²³ anjaha sai ielek-elek ma Ia, nini ma: Mangkatarhatos do nuan borungku. Roh ma Ham, tampeihon Ham ma tanganMu bani, ase malum ia anjaha manggoluh. ²⁴ Jadi laho ma Jesus rap pakonsi, anjaha buei do halak na mangirikkonSi, pala marsiasak-asakan sidea inggot hu Bani. ²⁵ Jadi adong ma ijai sada naboru, na dob sapuluh dua tahun sai roh marnunut pantang ni hiouni. ²⁶ Domma buei panaronanni humbani sipanambari, anjaha bois do artani bahen partambarni, tapi seng marnidok, lambin parahni do tene naboritni ai. ²⁷ Jadi dob ibogei barita ni Jesus, roh ma ia rap pakon halak na mabuei ai hun pudi, anjaha ijamah ma hiouNi, ²⁸ ai nini uhurni do i bagas: Hujamah gelah hiouNi ai, malum ma huahap. ²⁹ Jadi mintor maronti ma roh daroh ai, anjaha iahapkon ma bani angkulani, na dob malum ia. ³⁰ Anjaha iahapkon Jesus ma, na luar ai gogoh humbani diriNi, gabe marhusor ma Ia dompak halak na mabuei ai anjaha nini ma: Ise manjamah hiouHu? ³¹ Jadi nini susianNi ai ma hu Bani: Idah Ham ma panosak ni halak na mabuei in Bamu, mase ma ihatahon Ham: Ise manjamah hiouHu? ³² Tapi ikawahkon ma inggot laho mangidah atap ise do na mambahen ai. ³³ Jadi mabiar ma naboru ai anjaha hitir-hitir, ai ibotoh do aha na dob masa bani, gabe roh ma ia manrogop hu lobeiNi, anjaha ipatugah ma haganup hu Bani sonaha na sasintongni. ³⁴ Tapi nini ma dompakSi: Haporsayaonmu do na paluahkon ham, inang! Mulak ma ham ibagas damei, anjaha malum ma naboritmu in! ³⁵ Sanggah na marsahap ai ope ia, adong ma na roh hun rumah ni sintua ni parguruan ai na patugahkon: Domma matei borumu! Mase sunsahanmu be Guru in? ³⁶ Tapi seng iparuhurhon Jesus hata ni halak na roh ai, gabe ihatahon ma hubani sintua ai: Ulang mabiar! Porsaya ma lah! ³⁷ Anjaha ise pe lang na ilopas Jesus mangirikkonSi, sobali si Petrus, si Jakobus ampa si Johannes, sanina ni si Jakobus ai. ³⁸ Jadi das ma sidea hu rumah ni sintua ni parguruan ai, gabe iidah ma na gosou, na tangis-tangis anjaha na mandoruhi gogoh-gogoh. ³⁹ Anjaha dob masuk Ia, nini ma dompak sidea: Mase ma gosou nasiam anjaha tangis-tangis? Seng na matei dakdanak in, na modom do! ⁴⁰ Jadi itartawai sidea ma Ia. Dob isuruh sidea haganup mandarat, iarahkon ma bapa ampa inang ni dakdanak ai, sonai homa na mangkasomanisi ai, gabe masuk ma sidea hu kamar hatibalan ni dakdanak ai. ⁴¹ Ijolom ma tangan ni dakdanak ai, anjaha nini ma hubani: Talita kumi! artini: Ale Boru, Ahu mangkatahon bam, puho ma! ⁴² Jadi mintor puho ma dakdanak ai, lanjar mardalan, ai domma das umurni sapuluh dua tahun, gabe longang tumang ma sidea. ⁴³ Tapi gomos ma sidea ipandang, ase ulang adong na mambotoh ai; lanjar ihatahon ma ase ibere ia mangan.

¹ Jadi bingkat ma Ia hunjai, laho hu huta hagodanganNi, anjaha iirikkon susianNi do Ia. ² Anjaha sanggah ari Sabat mangajar ma Ia i rumah parguruan. Jadi longang ma halak simbuei na manangar ai, nini sidea ma: Hunja do in roh Bani? Hapentaran aha do na binere in Bani? Anjaha sonaha do, ase boi jadi halongangan na sonai marhitei tanganNi? ³ Ai lang Ia do tukang in, anak ni si Maria, abang ni si Jakobus, si Joses, si Judas ampa si Simon? Ai lang i lambungta do botouNi? Jadi sangsi ma sidea pasalSi. ⁴ Tapi nini Jesus ma dompak sidea: Sabonar na so marsangap do nabi anggo i tanoh hagodanganni, i tongah-tongah ni diha-dihani ampa i rumahni sandiri. ⁵ Anjaha seng tarhorjahonsi tanda halongangan ijai, pitah piga-piga halak do hansa tarpamalumsi, marhitei na manampeihon tanganni bani sidea. ⁶ Jadi longang ma uhurNi, halani na so porsaya ai sidea. Lanjar isiari ma huta-huta na i nagori ai, laho mangajari. ⁷ Dob ai idilo ma na sapuluh dua halak ai, lanjar isuruh ma sidea mardua-dua, anjaha ibere ma bani sidea kuasa dompak tonduy na mabutak. ⁸ Ihatahon do bani sidea, ase ulang iboan atap aha hu pardalanan, barang ruti, barang tas, barang duit i bagas gondit sobali ni tungkot. ⁹ Boi do sidea marsipatu, tapi ulang ma marbaju dua lapis. ¹⁰ Ihatahon do homa bani sidea: Anggo masuk hanima hu sada rumah, ijai ma hanima soh, paima bingkat use. ¹¹ Anggo adong sada huta, na so ra manjalo hanima, barang na so ra manangihon hanima, tadingkon hanima ma ai, anjaha pirpirhon hanima ma orbuk na longkot bani nahei nima, bahen hasaksian bani sidea. ¹² Jadi bingkat ma sidea marambilan mangkatahon paubahkon uhur. ¹³ Buei do setan iusir sidea, anjaha buei homa na boritan iminaki, gabe malum iahap sidea. ¹⁴ Tarbogei ma pasal Jesus bani raja Herodes, ai domma tarbarita goranNi, gabe nini ma: Domma puho si Johannes Pandidi humbani na matei, ai do ase sonai marhagogohon Ia. ¹⁵ Na legan mangkatahon: Si Elias do in. Na legan use mangkatahon: Nabi do ia, usih songon nabi-nabi na legan ai. ¹⁶ Tapi dob ibogei si Herodes ai, nini ma: Si Johannes, na dob hutampul ondi uluni, ai do na puho humbani na matei. ¹⁷ Ai isuruh si Herodes do ijia na manangkap si Johannes anjaha na manutupsi halani si Herodias, parinangon ni anggini, si Pilippus, na binuatni ai gabe jolmani. ¹⁸ Ai ihatahon si Johannes do hubani si Herodes: Seng bulih buatonmu nasianggimu! ¹⁹ Halani ai sogam ma uhur ni si Herodias mangidahsi; sai sihol do bunuhonni ia, tapi seng tarpasaudsi. ²⁰ Ai si Herodes pe mabiar do mangidah si Johannes, ai ibotoh halak parpintor do ia anjaha na susi, gabe iondingi ma ia. Anggo itangar ambilanni, sosak tumang do iahap, tapi marosuh do ia manangarsi. ²¹ Tapi jumpah ma panorang na dear honsi, ai ma ari partubuh ni si Herodes, sanggah na mambahen pesta-pesta ia bani pagawai-pagawai tinggi, panglima-panglima, ampa na sangap-sangap i Galilea. ²² Masuk ma ijia boru ni si Herodias lanjar manortor i lobei ni sidea, gabe malas ma uhur ni si Herodes ampa tamueini ai ibahen. Jadi nini raja ai ma bani anak boru ai: Pindo ma hubakku atap aha rosuh ni uhurmu, sai bereonku do ai bam. ²³ Pala do ibijahon bani: Atap aha pangindoanmu, ronsi satongah ni harajaonku, sai na bereonku do. ²⁴ Jadi laho ma ia, isungkun ma inangni: Aha ma pindoonku? Jadi nini ma: Ulu ni si Johannes Pandidi ma pindo! ²⁵ Jadi tarolos ma ia masuk hulobei ni raja ai, nini ma mangindo: Bere ham ma bakku sonari ulu ni si Johannes Pandidi i atas pinggan! ²⁶ Pusok tumang ma uhur ni raja ai, tapi halani bijani ai bani tamueini ai, seng ra ia manulak pangindoanni ai. ²⁷ Jadi mintor isuruh raja ai ma upasni sahalak, ihatahon ma mangalop ulu ni si Johannes. Laho ma halak ai, iponggol ma ulu ni si Johannes i tutupan; ²⁸ iboan ma ai i atas ni sada pinggan, lanjar ibere ma bani anak boru ai, anjaha anak boru ai ma padaskon ai bani inangni. ²⁹ Dob ibogei susianni pasal ai, roh ma sidea, ibuat sidea ma bangkei ni ai lanjar itanom. ³⁰ Dob ai mulak ma susian ai bani Jesus, ipatugah sidea ma haganup na hinorjahon ampa na niajarhon ni sidea. ³¹ Nini Jesus ma hubani sidea: Laho ma hita bani ianan na lungun, ase marsaran otik. Ai buei do halak na laho roh bani sidea, gari mangan seng sompat. ³² Jadi laho ma sidea marparau hu sada ianan na lungun, laho papuligkon diri, ³³ tapi buei do halak mangidah anjaha na mambotoh huja sidea laho, gabe marrohan ma sidea hun huta-huta ai mardalan nahei laho hujai, anjaha i lobei sidea do Ia. ³⁴ Sanggah mandarat Jesus, iidah ma halak na mabuei ai, jadi maidop ma uhurNi mangidah sidea, ai songon biri-biri na so marparmahan do sidea, gabe buei ma ipodahkon bani sidea. ³⁵ Jadi marayak bod ari, roh ma susianNi hu Bani, nini ma: Ianan na lungun do on, anjaha domma bod ari. ³⁶ Suruh Ham ma sidea, ase boi sidea laho hu dusun-dusun ampa huta-huta na inggot in, laho mamboli sipanganon bani sidea. ³⁷ Tapi nini Jesus ma mambalosi sidea: Bere hanima ma sidea mangan! Nini sidea ma hu Bani: Ai maningon laho do hanami mamboli ruti harga dua ratus dinar, laho mambere sidea mangan otik? ³⁸ Jadi nini ma dompak sidea: Piga dong ruti bannima? Tonggor lobei! Dob ipapangkei sidea, nini ma: Lima ruti ampa dua dengke. ³⁹ Dob ai isuruh ma sidea hundul ganupan bani poyon-poyon ai, sasaholmouan. ⁴⁰ Jadi hundul ma sidea marsasaratus ampa marlima-lima puluh saholmouan. ⁴¹ Dob ai ibuat Jesus ma ruti na lima ampa dengke na dua ai, ikawahkon ma hu atas, ipasu-pasu ma ai anjaha ipartopik. Ipambere ma ai bani susianNi ai, ase sidea use mamberei halak na mabuei ai. Anjaha dengke na dua ai pe ibagihon ma bani sidea haganup. ⁴² Mangan do sidea haganup, anjaha bosur bei. ⁴³ Ipatumpu sidea ma teba-teba humbani ruti ampa humbani dengke ai, gok sapuluh dua bantei. ⁴⁴ Ia buei ni na mangan ruti ai, dong do lima ribu dalahi. ⁴⁵ Sanggah na palaohon halak na mabuei ai ope Ia, mintor ijuljul Jesus ma susianni ai masuk hu parau, laho palobeihon hu dipar, hu Betsaida. ⁴⁶ Anjaha dob misir halak ganup, tangkog ma Ia hu dolog, laho martonggo. ⁴⁷ Dob golap ari domma i tongah tao parau ai, anjaha sahalak Jesus mando i darat. ⁴⁸ Iidah ma sidea sunsah manlugai halani logou na roh hun lobei. Hira-hira tahuak dayok na parlobei roh ma Ia manjumpahkon sidea mardalan i atas bah, anjaha songon na sihol lopusanNi ma sidea. ⁴⁹ Tapi mangidahSi na mardalan ai i atas bah, iagan sidea ma begu-begu do ai, gabe mandoruhi ma sidea. ⁵⁰ Haganup do sidea na mangidah ai anjaha gobir bei do. Jadi mintor iparsahapkon ma sidea, nini ma: Tenger ma uhur nima! Ahu do on! Ulang mabiar! ⁵¹ Lanjar naik ma Ia manjumpahkon sidea hubagas parau ai, anjaha logou pe minop ma. Jadi lambin longang tumang ma sidea, ⁵² ai na masa pasal ruti ai pe seng ope iartihon sidea, ai mapir ope uhur ni sidea. ⁵³ Dob mandipar das ma sidea hu nagori Genesaret, jadi marlabuh ma sidea ijai. ⁵⁴ Anjaha mandaratkonsi sidea hun parau ai, mintor itanda halak do Ia. ⁵⁵ Jadi idalani sidea ma ganup nagori ai, anjaha ipamboan sidea ma sagala na boritan bani podomanni bei barang ija ibogei sidea adong Jesus. ⁵⁶ Anjaha huja pe Ia laho, hu dusun-dusun atap hu huta-huta atap hu kota pe, iparpatibal halak ma na boritan i alaman, anjaha ipindo sidea ma bani Jesus, ase ilopas sidea pala manjamah sisi ni pakeianni gelah. Anjaha haganup halak na manjamah ai, malum do.

¹ Dob ai, sanggah roh martumpu hu Bani Parisei ampa deba humbani sibotoh surat, na roh hun Jerusalem, ² jadi iidah sidea ma deba susianNi mangan ruti marhitei tangan na butak, ai ma, seng palobei marburih. ³ Ia halak Parisei ampa haganup halak Jahudi, seng ra mangan anggo lang palobei tangkas iusah tanganni mangihutkon adat ni na lobei. ⁴ Anjaha anggo mulak hun tiga, seng mangan sidea, anggo lang palobei maridi; anjaha buei ope adat na legan idalankon sidea, songon na mamurihi panginuman, gendi ampa gusi tombaga. ⁵ Jadi isungkun Parisei ampa sibotoh titah ai ma Ia: Mase ma lang iihutkon susianMu adat ni ompung na lobei, ai mangan ruti do sidea marhitei tangan na butak? ⁶ Jadi nini ma dompak sidea: Sintong do panjahaion ni si Jesaya pasal nasiam, ale sipakulah-kulah, songon na tarsurat ai: Ipasangap bangsa on do Ahu marhitei bibirni, tapi uhurni daoh do hum Bakku! ⁷ Soya do pambahenan ni sidea pasangapkon Ahu, ai titah-titah ni jolma do ipodahkon sidea. ⁸ Tading do titah ni Naibata ibahen nasiam, halani mandalankon adat na humbani jolma. ⁹ Nini ope bani sidea: Patut ma tongon iparnalang nasiam titah ni Naibata, halani mandalankon adat nasiam. ¹⁰ Ai ihatahon si Musa do namin: Pasangap ma bapamu ampa inangmu! Ambah ni ai: Barang ise na mamurai bapani atap inangni maningon bunuhon do. ¹¹ Tapi nasiam mangkatahon: Barang ise na mangkatahon bani bapani atap inangni: "Korban"! artini: Sagala na patut pangurupingku bamu, domma na galangkon. ¹² Jadi seng be ilopas nasiam ia mambahen atap aha bani bapani atap inangni, ¹³ gabe iparseda nasiam do hata ni Naibata marhitei adat-adat na pinadalan nasiam in. Anjaha buei do na sonin idalankon nasiam. ¹⁴ Dob ai idilo ma use halak na mabuei ai, nini ma dompak sidea: Nasiam haganup, tangihon ma Ahu anjaha parimbagaskon nasiam ma. ¹⁵ Seng butak jolma halani na masuk hun darat hu bagas dirini, tapi na luar humbani jolma ai, ai do na pabutakkonsi. ¹⁶ Parpinggol na marpanangar, itangihon ma in! ¹⁷ Dob masuk Ia hu rumah, holang humbani na mabuei ai, isungkun susianNi ma Ia pasal limbaga ai. ¹⁸ Jadi nini ma dompak sidea: Dihut do hape hanima seng mangarusi ai? Ai seng dapot uhur nima, na so tarbahen butak jolma bahenon ni sagala na masuk hun darat hu bagas dirini? ¹⁹ Ai seng masuk ai hu bagas uhurni; hu bagas boltokni do ai laho, dob ai kaluar bani ianan na suhi. (Marhitei ai torang pansing do sagala sipanganon). ²⁰ Tapi nini ma use: Na kaluar humbani jolma, ai do pabutakkonsi. ²¹ Ai humbagas, humbani uhurni jolma do roh uhur na jahat, parriah-riahon, panangkoon, pamunuhon, ²² parbangkison, pangkauton, hajahaton, panipuon, parsondukbungkason, subil, panreheion, gijang ni uhur ampa pamunuhon. ²³ Haganup hajahaton ai humbagas do rohni, ai do na pabutak jolma. ²⁴ Dob ai bingkat ma Ia hunjai, laho hu nagori Tirus. Masuk ma Ia hu bagas sada rumah, nini uhurNi, ase ulang adong na mambotoh ai, tapi seng tarponopkon. ²⁵ Tapi mintor tarbogei do ai bani sada naboru, adong do sada boruni siniaran ni setan. Jadi roh ma ia, manrogop hu lobei ni naheiNi. ²⁶ Ia naboru ai, parbegu do, bangsa Sirofenisia, jadi ipangindo ma hu Bani, ase iusir setan ai humbani boruni ai. ²⁷ Tapi nini ma mambalosisi: Bosur ma lobei dakdanak; ai seng patut buaton ruti humbani dakdanak, laho mamberehon ai bani baliang. ²⁸ Jadi marbalos ma ia, nini ma hu Bani: Tongon do ai Tuhan, tapi ipangan baliang na i toruh ni meja do rimah-rimah ni dakdanak. ²⁹ Jadi nini Jesus ma hubani: Halani hatamu ai, laho ma ham, domma mandarat setan ai humbani borumu ai. ³⁰ Laho ma tongon ia, jadi jumpahsi ma boruni ai modom-modom i podoman, anjaha setan ai domma luar. ³¹ Dob ai itadingkon ma use nagori Tirus, manlopusi Sidon laho dompak tao Galilea, gabe das ma Ia hu nagori Dekapolis. ³² Jadi adong ma na mamboban hu Bani sada halak na nengel anjaha longah, anjaha ipindo ma hu Bani, ase itampeihon tanganNi hujai. ³³ Jadi iarahkon Jesus ma ia hubani na suhi, holang humbani halak na mabuei ai; ipamasuk ma jari-jariNi hu bagas pinggol ni halak ai, martijur ma Ia anjaha ijamah ma dilahni, ³⁴ lanjar mangkawah ma Ia dompak datas, marhosah ganjang, dob ai nini ma: Hepata! artini: Mungkab ma! ³⁵ Jadi mungkab ma tongon pinggolni anjaha harhar sangkut-sangkut ni dilahni, gabe dear ma parsahapni. ³⁶ Ipandang ma sidea, ase ulang ipatugah-tugah na masa ai atap bani ise pe. Tapi lambin ipandang, lambin iompot sidea do mambaritahon ai. ³⁷ Jadi longang tumang ma sidea, nini ma: Dear do haganup ibahen: Gabe marpambogei do na nengel, anjaha marsahap ia na longah.

¹ Bani panorang ai, sanggah martumpu use buei halak, anjaha seng dong sipanganon bani sidea, jadi idilo Jesus ma susianNi anjaha nini ma dompak sidea: ² Maidop do uhurHu mangidah halak na mabuei on, ai domma tolu ari iihutkon sidea Ahu, anjaha seng dong sipanganon bani sidea. ³ Anggo Husuruh sidea mulak lang palobei mangan, gayuran ma sidea i tongah dalan, ai parhuta na daoh do sidea deba. ⁴ Jadi ibalosi susian ai ma Ia: Hunja ma boi buaton ruti, laho pabosur sidea i halimisan on? ⁵ Jadi isungkun ma sidea: Piga do adong ruti bannima? Nini sidea ma: Pitu! ⁶ Dob ai isuruh ma halak na mabuei ai hundul i tanoh. Ibuat ma ruti na pitu ai, anjaha dob ihatahon tonggo tarima kasih, ipartopik ma ai anjaha ipambere bani susianNi, ase iidangkon sidea ai bani halak na mabuei ai. ⁷ Dong do homa dengke otik bani sidea. Dob ipasu-pasu, isuruh ma ase ibagihon. ⁸ Jadi mangan ma sidea bosur bei, lanjar ipatumpu ma teba-teba ai gok pitu tapongan. ⁹ Adong do sidea ompat ribu halak. Dob ai isuruh ma sidea mulak, ¹⁰ anjaha Ia pe, masuk ma hu bagas parau rap pakon susianNi ai, gabe das ma sidea hu nagori Dalmanuta. ¹¹ Roh ma halak Parisei, jadi ipungkah sidea ma marsual pakonSi. Ipindo sidea ma tanda hun langit, laho manlajouSi. ¹² Marhasoman hoih-hoih humbagas uhurNi, nini Jesus ma: Mase ma mangindo tanda na sasundut on? Na sintong do Hatangkon bani nasiam: Seng porlu bereon tanda bani na sasundut on! ¹³ Jadi itadingkon ma sidea, anjaha masuk ma use hubagas parau, lanjar laho mandipar. ¹⁴ Tapi lupa do susian ai mamboan ruti, anjaha pitah sada do hansa ruti i bagas parau ai. ¹⁵ Jadi ipalumba ma sidea, nini: Pangkei anjaha jaga ma hanima pasal ragi ni Parisei ampa ragi ni si Herodes. ¹⁶ Jadi marsahap ma sidea samah sidea: Ai ma da, halani na so mamboan ruti ai hita. ¹⁷ Jadi dob ibotoh ai nini ma dompak sidea: Mase ma isahapkon hanima, na so adong ai ruti bannima? Seng ope ibotoh hanima anjaha iarusi hanima? Tong ope mapir uhur nima? ¹⁸ Ai lang marpangidah hanima, age adong mata nima? Ai lang marpambogei hanima, age adong pinggol nima? ¹⁹ Ai seng idingat hanima be sanggah na Hupartopik ondi lima ruti bani na lima ribu halak ondi, anjaha piga tapongan teba-tebani ipatumpu hanima? Nini sidea ma Bani: Sapuluh dua. ²⁰ Anjaha na pitu ruti ondi bani na ompat ribu halak ondi, piga tapongan do teba-tebani ipatumpu hanima? Nini sidea ma hu Bani: Pitu! ²¹ Jadi nini ma dompak sidea: Seng ope iarusi hanima? ²² Das ma sidea hu Betsaida. Adong ma na mamboban hu Bani sada halak na mapitung, anjaha ielek-elek sidea ma Ia, ase ijamah halak ai. ²³ Jadi ijamah ma tangan ni halak na mapitung ai, iarahkon ma ia hu darat ni huta ai, itijuri ma matani, itampeihon ma tanganni hubani, anjaha isungkun ma: Domma adong iidah ho? ²⁴ Jadi mangkawah ma ia, nini ma: Huidah do jolma, tapi songon bona ni hayu do huidah sidea mardalan. ²⁵ Dob ai iulakkon Jesus ma mannahkon tanganNi bani matani; ia pe mangkawah ma, gabe malum ma, anjaha lihar ma ganup iidah. ²⁶ Dob ai isuruh ma ia mulak hu rumahni, nini ma: Ulang ma masuki huta in. ²⁷ Dob ai laho ma Jesus rap pakon susianNi hu huta-huta dohorhon Kesarea Pilippi. I tongah dalan Nini ma manungkun susianNi: Ise do Ahu ihatahon halak? ²⁸ Jadi ibalosi sidea ma Ia: Deba mangkatahon si Johannes Pandidi, na deba si Elias, anjaha na deba nari use, sada humbani nabi ai. ²⁹ Dob ai isungkun ma sidea: Ia hanima, ise do Ahu nini uhur nima? Nini si Petrus ma mambalosi: Ham do Kristus in! ³⁰ Jadi ipalumba ma sidea, ase ulang ipatugah-tugah pasalSi age bani ise. ³¹ Dob ai ipungkah ma mangajari sidea: Ia anak ni jolma in, maningon buei do sitarononNi, ambukkonon ni pangintuai-pangintuai, sintua ni malim ampa sibotoh surat do Ia, anjaha bunuhonni, anjaha dob salpu tolu ari mulak manggoluh. ³² Anjaha torang-torang do ipatugah hata ai. Jadi iarahkon si Petrus ma Ia, anjaha ipaingat ma Ia. ³³ Marhusor ma Ia, ikawahkon ma susianNi ai, anjaha ihata ma si Petrus, nini ma: Laho ma ho bolis hun lambungkon! Ai seng uhur ni Naibata iparuhurhon ho, uhur ni jolma do. ³⁴ Dob ai idilo Jesus ma na mabuei ai rap pakon susianNi ai, nini ma dompak sidea: Barang ise na sihol mangirikkon Ahu, iparnalang ma dirini, iporsan ma silangni, anjaha iirikkon ma Ahu. ³⁵ Ai barang ise na sihol paluahkon hosahni, ai do na magouan hosah, tapi barang ise na magouan hosah halani Ahu ampa halani Ambilan Namadear, ai do pagoluhkonsi. ³⁶ Ai aha ma gunani bani jolma, age ganup dunia on bani, anggo magou do tonduyni? ³⁷ Ai aha ma tarbere jolma, bahen tobus ni tonduyni? ³⁸ Ase anggo adong na maila halani Ahu barang halani Hatangkin i lobei ni bangsa parbangkis anjaha pardousa on, Anak ni jolma in pe maila do pasalsi, anggo roh ma Ia i bagas hasangapon ni BapaNi rap pakon malekat na mapansing in.

¹ Lanjar nini ma dompak sidea: Na sintong do Hatangkon bani nasiam: Adong do deba humbani na jongjong ijon, na so mandagei hamateian, anggo lape iidah sidea roh harajaon ni Naibata ibagas hagogohon. ² Dob salpu onom ari iarahkon Jesus ma si Petrus, si Jakobus ampa si Johannes, iboan ma sidea pulig hu atas dolog na gijang. Mubah ma rupaNi iidah sidea. ³ Marlinang-linang ma pakeianNi, putih sahalian, seng dong sipanusi na boi mambahen sonai lopakni i atas tanoh on. ⁴ Dob ai taridah ma bani sidea si Elias ampa si Musa, marsahapi pakon Jesus. ⁵ Jadi nini si Petrus ma marsahapkon Jesus: Guru, dear ni in hita ijon. Ipauli hanami ma ijon tolu sopou-sopou, sada Bamu, sada bani si Musa, anjaha sada bani si Elias. ⁶ Ai seng ibotoh aha sihatahononni, ai mabiar tumang do sidea. ⁷ Roh ma sada hombun manlinggomi sidea, anjaha tarbogei ma sada sora hum bagas hombun ai, na mangkatahon: On do AnakKu haholongan ni uhurHu, tangihon ma Ia! ⁸ Anjaha sanggah na mangkawah sidea inggot, ise pe lang adong iidah sidea sobali Jesus rap pakon sidea. ⁹ Jadi sanggah susur sidea hun dolog ai, ipalumba ma sidea, ase ulang ipatugah na niidah ni sidea bani halak, anggo seng ope puho Anak ni jolma in humbani na matei. ¹⁰ Iparimbagaskon sidea do hata ai, anjaha marsisungkunan do sidea pasal arti ni hata "na puho humbani na matei ai", ¹¹ Jadi isungkun sidea ma Jesus: Mase ihatahon sibotoh surat, maningon palobei roh do si Elias? ¹² Nini ma mambalosi sidea: Tongon, maningon roh do lobei si Elias patorsahon haganup. Tapi sonaha do tarsurat pasal Anak ni jolma in? Ai lang maningon buei do Ia manaron anjaha maningon apason do Ia? ¹³ Tapi Huhatahon ma bannima: Domma roh si Elias, jadi uhur-uhur ni sidea do ibahen hubani, songon na dob tarsurat hinan pasalsi. ¹⁴ Sanggah na das ai sidea hubani susian na legan ai, iidah sidea ma buei halak manginggoti sidea, anjaha sibotoh surat marsual pakon sidea. ¹⁵ Dob iidah halak na mabuei ai roh Jesus, longang ma sidea manjumpahkonSi laho manabiSi. ¹⁶ Jadi isungkun ma sidea: Aha do na sinahapkon nasiam pakon sidea? ¹⁷ Jadi marbalos ma hu Bani sada humbani halak na mabuei ai: Guru, huboan do anakkon Bamu, ai isiari setan silongah do ia. ¹⁸ Anggo siar ma setan ai bani, anjaha isontak-sontakkon ma ia, gabe marguboh ma pamanganni, derek-derek iponni anjaha jorgong angkulani. Domma hupindo namin bani susianMu, ase iusir setan ai, tapi seng mangasup sidea. ¹⁹ Tapi nini ma mambalosi sidea: Bangsa na so porsaya! Sadiha dokah nari Ahu pakon nasiam? Sadiha dokah nari paanju-anjuonKu nasiam? Boan nasiam ma ia hu Bakku! ²⁰ Jadi iboan sidea ma ia hu Bani. Ijin iidah setan ai Jesus, mintor ipantompashon ma ia, gabe dabuh ma hu tanoh, marguling-guling anjaha marguboh babahni. ²¹ Isungkun Jesus ma bapani ai: Domma sadiha dokah mangonai on bani? Balos ni bapani ai: Humbani sietek-etekonni nari. ²² Domma gati igulangkon ia hu bagas apuy ampa bah, sihol mambunuhsi. Tapi anggo dong do kuasaMu, holong ma uhurMu, urupi Ham ma hanami. ²³ Jadi ibalosi Jesus ma ia: Ihatahon ho, anggo adong do kuasaMu. Haganup do boi bani na porsaya. ²⁴ Mintor idilohon bapa ni dakdanak ai ma gogoh: Porsaya do ahu! Urupi Ham ma ahu na so marhaporsayaon on. ²⁵ Dob iidah Jesus lambin marurup roh halak na mabuei ai, isorgang ma setan ai, nini ma: Ale setan silongah anjaha sinengel, Ahu mangkatahon bam: Luar ma ho humbani, anjaha ulang be masuk ho hubani! ²⁶ Gabe mandoruh ma setan ai, ipantompaskon ma dakdanak ai lanjar luar ma. Hira bangkei mando dakdanak ai, pala buei halak na mangkatahon: Domma matei ia. ²⁷ Tapi itangkap Jesus ma tanganni, itogu ma ia laho pajongjongkonsi. ²⁸ Dob masuk Ia hu bagas sada rumah, isungkun susianNi ai ma Ia pulig: Mase ma lang mangasup hanami mangusirsi? ²⁹ Jadi nini ma dompak sidea: Anggo tonduy na samasam on, seng tarusir, anggo lang marhitei tonggo ampa parpuasaon. ³⁰ Dob bingkat sidea hunjai, ibontas sidea ma nagori Galilea. Tapi seng marosuh Jesus, ibotoh halak pasal ai, ³¹ ai na mangajari susianNi ai do Ia, anjaha nini ma dompak sidea: Ondoskononkon do Anak ni jolma in hu tangan ni halak, anjaha bunuhon ni sidea ma Ia; tapi dob ibunuh, puho do Ia use, dob salpu tolu ari. ³² Tapi seng iarusi sidea na hinatahonNi ai, anjaha mabiar do sidea manungkun hu Bani. ³³ Dob ai das ma sidea hu huta Kapernaum, anjaha dob das sidea i rumah, isungkun ma sidea: Aha do na sinahapkon nasiam i tongah dalan ai? ³⁴ Tapi sip do sidea, ai isahapkon sidea do i dalan ai, barang ise sidea sibanggalan. ³⁵ Jadi hundul ma Jesus, idilo ma na sapuluh dua ai, ihatahon ma bani sidea: Barang ise na sihol parlobei, parpudi ma ia bani haganup anjaha, juak-juak bani haganup halak. ³⁶ Jadi idilo ma sada dakdanak, ipajongjong ma ia i tongah-tongah ni sidea anjaha ialehon, lanjar nini ma bani sidea: ³⁷ Barang ise na manjalo sada dakdanak na sonon halani goranKu, Ahu do na jinaloni ijai, anjaha barang ise na manjalo Ahu, sedo Ahu jinaloni ijai, na marsuruh Ahu do. ³⁸ Nini si Johannes ma hubani Jesus: Guru, iidah hanami do sada halak na so mangirikkon hita mangusir setan marhitei goranMu, jadi ilarang hanami ma ia halani na so hita ai iirikkon. ³⁹ Jadi nini Jesus ma: Ulang ma larang hanima ia, ai halak na mambahen horja hagogohon marhitei goranKu, seng tumaram pahirionni Ahu. ⁴⁰ Ai na so manlawan hita, hasomanta do ai. ⁴¹ Na sintong do Hatangkon bannima: Na mambere hanima bah inumon sasangkir i bagas goranKu, halani Kristus simada hanima, seng na magou upahni ai. ⁴² Tapi barang ise na mambahen sangsi sada humbani na etek-etek on, na porsaya Bakku, dearan ma igantungkon losung batu bani borgokni, laho mangunobkonsi hu bagas laut. ⁴³ Anggo sangsi ho halani tanganmu, rotap ma in. Ai dearan do marsada tangan ho masuk hu hagoluhan, humbani na mardua tangan masuk hu naraka, hu bagas apuy na so ra miloh, ⁴⁴ bani ianan, na so ra matei gilokni, anjaha na so ra miloh apuyni. ⁴⁵ Anggo sangsi ho halani naheimu, rotap ma in. Ai dearan do tempang ho masuk hu hagoluhan, humbani na marnahei dua iambukkon ho hu bagas naraka, ⁴⁶ bani ianan na so ra matei gilokni, anjaha na so ra mintop apuyni. ⁴⁷ Anggo sangsi ho ibahen matamu, pulsitkon ma in. Ai dearan do marmata salopah ho masuk hu harajaon ni Naibata, ulang mardua mata ho iambukkon hu naraka, ⁴⁸ bani ianan na so ra matei gilokni anjaha na so ra miloh apuyni. ⁴⁹ Ai maningon garamon do haganup marhitei apuy. ⁵⁰ Na marguna do garam ai. Tapi anggo mambar daini, aha ma bahenon paporadkon ai? Sai margaram ma hanima, anjaha mardamei samah hanima.

¹ Dob ai misir ma Jesus hunjai anjaha das ma Ia hu nagori Judea, na i dipar ni bah Jordan. Jadi marrohan ma use halak na mabuei ai hu Bani, gabe iajari ma sidea, songon na somal ibahen. ² Roh ma piga-piga halak Parisei hu Bani, anjaha isungkun sidea ma Ia, laho manlajouSi, atap na bulih do sirangkonon ni halak parinangonni. ³ Tapi nini ma mambalosi sidea: Ai aha do ihatahon si Musa bani nasiam? ⁴ Balos ni sidea: Ipalopas si Musa do halak mambahen surat sirang, laho paulakkon parinangonni. ⁵ Jadi nini Jesus ma bani sidea: Halani hengkeng ni uhurnima do, ase isuratkon si Musa aturan ai. ⁶ Tapi humbani mungkah ni panompaon pe dalahi ampa naboru do sidea itompa. ⁷ Halani ai tadingkonon ni dalahi do bapani ampa inangni, laho padomuhon dirini hubani parinangonni. ⁸ Gabe sada daging do sidea na dua ai. Ase seng be sidea dua, tapi sada daging do. ⁹ Ai pe, na dob pinadomu ni Naibata, seng bulih sirangon ni jolma. ¹⁰ Dob mulak sidea hu rumah, isungkun susianNi ma Ia use pasal ai. ¹¹ Jadi nini ma dompak sidea: Na paulakkon parinangonni, dob ai ibuat na legan, parbangkis do ia ijai. ¹² Naboru ai pe, anggo isirangkon dirini humbani paramangonni, anjaha laho bani halak na legan, parbangkis do. ¹³ Dob ai adong ma na mamboan dakdanak hu Bani, ase ijamah, tapi ipandang susianNi ai do sidea. ¹⁴ Mangidah ai Jesus, sogam ma uhurNi, nini ma dompak sidea: Paturut hanima ma dakdanak in roh hu Bakku, ulang pandang hanima sidea, ai bani halak sisonin do harajaon ni Naibata. ¹⁵ Na sintong do Hatangkon bannima: Na so manjalo harajaon ni Naibata songon dakdanak, seng anjai masuk ia hujai. ¹⁶ Jadi irohop ma sidea anjaha itampeihon ma tanganNi bani sidea, laho mamasu-masu sidea. ¹⁷ Sanggah na luar Ia hu dalan ai, roh ma sada halak marlintun hubani, lanjar manrogop ma ia manungkunSi: Ham Guru, sidear uhur! Aha do sibahenonku, ase dapot ahu hagoluhan sisadokah ni dokahni? ¹⁸ Jadi nini Jesus ma hubani: Mase ma ihatahon ham Ahu sidear uhur? Seng dong sidear uhur sobali Naibata. ¹⁹ Ibotoh ham do titah in: Ulang ho mamunuh! Ulang ho marbangkis! Ulang ho manangko! Ulang ho ra manaksihon hata na so tongon! Ulang ho manrampok! Maningon pasangaponmu do bapamu pakon inangmu! ²⁰ Tapi nini ma mambalosi: Ham guru! Haganupan ai domma hudalankon humbani sietek-etekonku nari. ²¹ Jadi holong ma uhur ni Jesus mangidahSi, nini ma hubani: Sada do na hurang bamu. Laho ma ham, jual ham ma haganup na dong bamu, anjaha pamberei ma ai bani na masombuh, ase mararta ham i nagori atas. Dob ai roh ma ham, irikkon ham ma Ahu! ²² Tapi mambogei hata ai borat ma uhurni, jadi mulak ma ia ibagas pusok ni uhur, ai pararta na buei do ia. ²³ Jadi ikawahkon Jesus ma inggot, anjaha nini ma hubani susianNi ai: Mahol ni ai masuk halak na marnah na dong hu bagas harajaon ni Naibata. ²⁴ Ia susian ai longang do pasal hata ni ai. Jadi nini Jesus ma use bani sidea: Ale ambia! Maholni ai halak na martenger ni uhur bani arta masuk hu bagas harajaon ni Naibata! ²⁵ Urahan do masukan ni unta lubang ni jarum, ase halak na bayak masuk hu bagas harajaon ni Naibata. ²⁶ Jadi lambin longang ma sidea, nini sidea ma samah sidea: Ise ma, anggo sonai, boi maluah? ²⁷ Ikawahkon Jesus ma sidea, lanjar nini ma: Seng boi ai bani jolma, tapi bani Naibata boi do! Ai haganup do tarbahen Naibata. ²⁸ Dob ai nini si Petrus ma hubani Jesus: Tonggor ma, haganup do itadingkon hanami, laho mangihutkon Ham! ²⁹ Nini Jesus ma hubani: Na sintong do Hatangkon bannima: Sagala na manadingkon rumahni, saninani, botouni, inangni, bapani, dakdanakni barang jumani pe halani Ahu ampa halani Ambilan Namadear, ³⁰ lompit saratus ma nuan jaloonni i tanoh on rumah, sanina, botou, inang, anak ampa juma sonai pakon parburuon; anjaha ambahni ai bani dunia na sihol roh hagoluhan sisadokah ni dokahni. ³¹ Tapi buei do na parlobei hinan gabe parpudi, anjaha na parpudi hinan gabe parlobei. ³² Sanggah mardalan sidea, tangkog hu Jerusalem, Jesus do mardalan i lobei ni sidea, gabe longang ma sidea, anjaha na mangirikkonSi ai mabiar do. Idilo ma use na sapuluh dua ai, anjaha ipatugah ma bani sidea, aha na laho masa Bani. ³³ Na tangkog ma hita hu Jerusalem, jadi ondoshononkon ma Anak ni jolma in bani sintua ni malim ampa sibotoh surat. Uhumon ni sidea ma Ia marutang hosah, anjaha ondoshonon ni sidea ma Ia bani halak parbegu. ³⁴ Pahirion ni sidea, tijuranni, lonsinganni, anjaha bunuhon ni sidea ma Ia, anjaha dob salpu tolu ari mulak manggoluh do Ia. ³⁵ Dob ai roh ma manjumpahkonSi, si Jakobus ampa si Johannes, anak ni si Sebedeus na dua ai, nini sidea ma hu Bani: Ham guru, adong pangindoan nami, sibereonMu bannami namin. ³⁶ Jadi nini ma hubani sidea: Ai aha ipindo uhur nima sibahenonKu bannima? ³⁷ Nini sidea ma hu Bani: Bahen Ham ma hanami hundul bani hasangaponMu in, sada hampit siamunMu, na sada nari hampit sambilouMu. ³⁸ Tapi nini Jesus ma hubani sidea: Seng ibotoh hanima na pinindo nima in. Mintor tarinum hanima ma panginuman siinumonKai? Mintor tarparidi hanima paridian siparidionKai? ³⁹ Jadi nini sidea ma hu Bani: Tarbahen hanami do. Nini Jesus ma hubani sidea: Tongon namin, inumon nima do panginuman siinumonKai, anjaha paridion nima do paridian siparidionKai, ⁴⁰ tapi na mambahen hundul i siamunHu atap i sambilouHu, seng saguru Bakku ai, tapi bani na dob tinontuhon hinan do ai. ⁴¹ Dob tarbogei ai bani na sapuluh nari ai, marah ma sidea mangidah si Jakobus pakon si Johannes. ⁴² Jadi idilo Jesus ma sidea, nini ma dompak sidea: Ibotoh hanima do, irajai sigomgomi bangsa do rayatni, anjaha ikuasai na sangap-sangapni do sidea. ⁴³ Ulang ma sonai anggo bannima! Tapi barang ise hanima na sihol sangap, ai ma gabe juak-juak bennima! ⁴⁴ Anjaha barang ise hanima na sihol parlobei, ai ma gabe jabolon ni haganup. ⁴⁵ Ai Anak ni jolma in pe, seng roh Ia ase iidangi halak, tapi laho mangidangi do, anjaha mamberehon hosahNi bahen tobus ni buei halak. ⁴⁶ Jadi das ma sidea i Jeriko. Sanggah na misir ai Ia hun Jeriko rap pakon susianNi ampa halak na mabuei ai, adong do na hundul i topi dalan ai, sada halak na mapitung, sipangindo-indo, ai ma si Bartimeus, anak ni si Timeus. ⁴⁷ Dob ibogei, Jesus na hun Nasaret do ai hape, dilo-dilo ma ia, nini ma: Ham Jesus, Anak ni si Daud, idop ma uhurMu bakku! ⁴⁸ Buei do na maminsangsi ase sip namin, tapi lambin igogohi do mandilohon: Ham Anak ni si Daud, idop ma uhurMu bakku! ⁴⁹ Jadi soh ma Jesus, nini ma: Dilo hanima ma ia! Jadi idilo sidea ma ia, nini ma hubani: Tenger ma uhurmu, jongjong ma ho, idilo do ho! ⁵⁰ Ia pe ipadaoh ma salimutni, jongjong ma ia, lanjar laho bani Jesus. ⁵¹ Iparsahapkon Jesus ma ia, nini ma: Aha ipangindo uhurmu bahenonKu bam? Jadi nini na mapitung ai ma hu Bani: Ham Guru, marpangidah ma namin matangku! ⁵² Jadi nini Jesus ma hubani: Laho ma ho! Haporsayaonmin do na pagoluhkon ho! Jadi mintor marpangidah ma ia, lanjar iirikkon ma Jesus bani pardalananni.

¹ Sanggah na lambin dohor sidea hu huta Jerusalem, ai ma hu Betpage ampa Betania, na bani dolog Jetun ai, isuruh Jesus ma dua halak humbani susianNi, ² nini ma hubani sidea: Laho ma hanima hu dusun na i lobei nima in, anjaha masukhonsi hanima hujai, jumpah hanima ma sada anak ni halode tambat, na so ongga ope hona ajak. Tanggali anjaha boan hanima ma ai hujon! ³ Jadi anggo adong na mangkatahon bannima: Aha do na binahen nima in! Hatahon hanima ma: Porlu do in bani Tuhan in, anjaha podas do in paulakonni hujon. ⁴ Jadi laho ma sidea, anjaha jumpah sidea ma anak ni halode ai, tambat bani sada labah hampit darat i alaman ai, gabe itanggali sidea ma. ⁵ Jadi adong ma halak na jongjong ijai, na mangkatahon bani sidea: Aha do na binahen nasiam in, itanggali nasiam do anak ni halode in! ⁶ Jadi ihatahon sidea ma songon na hinatahon ni Jesus bani sidea, gabe ipaturut ma. ⁷ Itogu sidea ma anak ni halode ai bani Jesus, ipaherbang sidea ma hiouni bani gurungni, dob ai iajak Jesus ma ai. ⁸ Buei do halak na paherbangkon hiouni bani dalan ai; na deba paserakkon bulung-bulung na maratah, na itagili sidea hun tongah juma. ⁹ Halak na mardalan i lobei ampa na mangihut hun pudi mandilohon: Hosianna! Pinuji ma na roh ibagas goran ni Tuhan! ¹⁰ Pinuji ma harajaon ni Bapanta si Daud na sihol roh in! Hosianna ma bani ianan na gijang! ¹¹ Jadi masuk ma Ia hu Jerusalem, hu rumah panumbahan ai, anjaha dob ikawahkon haganup inggot, laho ma Ia hu Betania rap pakon susianNi na sapuluh dua ai, ai domma bod ari. ¹² Anjaha patarni ai, dob misir sidea hun Betania, malohei ma iahap Jesus. ¹³ Anjaha iidah ma humbani na daoh sada hayu ara na marbulung. Laho ma Ia hujai, laho mangindahi buahni Bani. Tapi dob das Ia hujai, pitah bulung tumang do jumpahSi, ai seng ope panorangni marbuah. ¹⁴ Jadi nini ma hubani hayu ai: Ronsi antigan pe seng panganon ni atap ise be buahmu! Ibogei susianNi ai do nahinatahonNi ai. ¹⁵ Dob ai das ma sidea hu Jerusalem. Jesus pe masuk ma hu rumah panumbahan ai, anjaha iusir ma siparjualan ampa sipamboli i rumah panumbahan ai. Ipantunggalingkon ma meja ni situkari duit ampa bangku-bangku ni sijual asas. ¹⁶ Seng ipalopas bontason ni halak na marsiboanon hu rumah panumbahan ai. ¹⁷ Jadi iajari ma sidea, Nini ma: Ai lang tarsurat do, rumah partonggoan ni haganup bangsa do goranon rumahKu? Hape ibahen nasiam do in gabe liang ni panrampok. ¹⁸ Jadi ibogei sintua ni malim ampa sibotoh surat ma ai, gabe ipindahi sidea ma dalan laho mamunuhSi; ai mabiar do sidea, ai ganup do halak na mabuei ai longang mambogei podahNi. ¹⁹ Anjaha anggo bod ma ari, luar do sidea manadingkon huta ai. ²⁰ Anjaha sanggah na mamontas sidea patarni ai, iidah sidea ma na dob hangar hayu ai ronsi uratni. ²¹ Taringat ma si Petrus, gabe nini ma hu Bani: Guru, tonggor Ham ma! Domma hangar hayu ara na pinapaanmu ondi. ²² Jadi nini Jesus ma mambalosi sidea: Porsaya ma hanima bani Naibata! ²³ Na sintong do Hatangkon bannima: Anggo adong na mangkatahon bani dolog on: Tarangkat ma, madabuh ma hu laut ai, anjaha seng sangsi ia i bagas uhurni, tapi porsaya do na maningon jadi do ai, sai na saud do ai idahonni. ²⁴ Halani ai Huhatahon ma bennima: haganupan, na pinindo nima bani tonggo nima, sai na das do ai bannima, asal ma porsaya hanima, maningon jaloon nima do ai. ²⁵ Anjaha anggo jongjong hanima martonggo, sasap hanima ma anggo adong pangkurangi nima bani halak, ase isasap Bapanima na i nagori atas ai age salah nima. ²⁶ Tapi anggo seng isasap hanima, seng homa sasapon ni Bapanima na i nagori atas ai age salah nima. ²⁷ Jadi das ma sidea use i Jerusalem. Anjaha sanggah mardalan-dalan Ia i rumah panumbahan ai, roh ma hu Bani sintua ni malim, sibotoh surat ampa pangintuai-pangintuai, ²⁸ anjaha nini sidea ma hu Bani: Marhitei kuasa aha do ihorjahon Ham in? Ise do na mambere kuasa in Bamu, laho mangkorjahon in? ²⁹ Tapi nini Jesus ma hubani sidea: Adong do sungkunonKu bani nasiam, balosi nasiam ma Ahu, ase Hupatugah bani nasiam, atap kuasa ja Hupangunsagahkon, mambahen ai. ³⁰ Ia pandidion ni si Johannes, na hun nagori atas do ai atap humbani jolma do? Balosi nasiam ma Ahu! ³¹ Jadi martimbang-timbang ma sidea, nini ma: Anggo ihatahon hita hun surga, hatahononni ma: Mase ma lang porsaya nasiam bani? ³² Tapi porini ihatahon hita: Humbani jolma do? Mabiar do sidea bani bangsa ai, ai nabi do si Johannes nini uhur ni bangsa ai haganup. ³³ Jadi nini sidea ma mambalosi Jesus: Seng ibotoh hanami! Jesus pe nini ma hubani sidea: Ahu pe, seng patugahonKu bani nasiam, atap marhitei kuasa aha hubahen ai.

¹ Dob ai marsahap ma Ia marhitei limbaga bani sidea, nini ma: Adong ma sada halak na manombei pohon anggur, ihondor ma ai inggot, ihurak ma pangilangan, anjaha ipaturei ma sada manara. Ipasewahon ma pohon ai hubani parjuma-juma, dob ai laho ma ia hu nagori na legan. ² Jadi bani panorangni isuruh ma juak-juakni marayak parjuma-juma ai, ase ijalo humbani sidea deba humbani buah ni pohon anggur ai. ³ Hape itangkap sidea do ia, ibogbogi, lanjar isuruh mulak sonin, mangambei. ⁴ Isuruh ma use bani sidea juak-juak na legan, tapi ibogbogi sidea ma ai anjaha ipahiri. ⁵ Dob ai isuruh ma use na legan, tapi ibunuh sidea ma age ai. Buei ope na legan isuruh, ibogbogi do ai deba, na deba nari ibunuh. ⁶ Adong ope anakni sada hinaholongan ni uhurni. Ai ma parpudi isuruh bani sidea, ai nini uhurni: Tontu malang do uhur ni sidea mangidah anakhon. ⁷ Tapi nini parjuma-juma ai ma samah sidea: On do panean ai! Eta, bunuh hita ma ia, ase banta siteanonni in! ⁸ Jadi itangkap sidea ma ia, ibunuh ma, anjaha iambukkon hu darat ni pohon anggur ai. ⁹ Aha ma bahenon ni tuan simada pohon anggur ai? Roh ma ia, boiskononni ma parjuma-juma ai, anjaha ondoskononni ma pohon anggur ai bani halak na legan. ¹⁰ Ai seng ongga ibasa nasiam hata na tarsurat on: Batu, na niambukkon ni tukang rumah, ai do gabe batu palas parsuhi. ¹¹ Tuhan do na mambahen ai, anjaha halongangan do ai bani matanta. ¹² Jadi ipindahi sidea ma dalan laho manangkapsi, tapi mabiar do sidea bani halak na mabuei ai. Ai ibotoh, sidea do tinuju ni limbaga nongkan. Jadi laho ma sidea, itadingkon ma Ia. ¹³ Dob ai isuruh sidea ma deba humbani halak Parisei ampa humbani juak-juak ni si Herodes, laho manangkapSi marhitei parsahapNi. ¹⁴ Jadi roh ma sidea mangkatahon hu Bani: Ham Guru, ibotoh hanami, pintor do Ham, seng mabiar age bani ise, ai seng sitonggor jumbak Ham, anjaha sintong-sintong do ipodahkon Ham dalan ni Naibata. Ai patut do bereon balasting bani Kesar atap lang? ¹⁵ Tapi ibotoh Jesus do sipakulah-kulah ni sidea ai, gabe nini ma dompak sidea: Mase ma ilajou nasiam Ahu? Bere nasiam ma Bakku dinar sada, ase huidah! ¹⁶ Jadi iboan sidea ma. Nini ma hubani sidea: Gambaran pakon surat ni ise do on? Jadi nini sidea ma hu Bani: Gombaran ni kesar do! ¹⁷ Jadi nini Jesus ma hubani sidea: Bere ma bani kesar na humbani kesar, anjaha na humbani Naibata bani Naibata. Jadi longang ma sidea pasalSi. ¹⁸ Dob ai roh ma hu Bani halak Sadukei, na so marhatongonkon, adong parpuhoon humbani na matei, jadi isungkun sidea ma Ia, nini ma: ¹⁹ Ham Guru! Isuratkon si Musa do banta: Anggo matei sada halak, itadingkon parinangonni lang mardakdanak, maningon pagodangon ni anggini do naboru ai, laho pajongjong ginompar bani abangni ai. ²⁰ Ase adong ma pitu halak na marsanina: Mambuat boru ma sikahanan ai, jadi matei ma ia, lang martinading. ²¹ Jadi ibuat na paduahon ai ma naboru ai, lanjar matei ma ai, lang martinading. Patoluhon ai pe sonai do. ²² Sonai do sidea hapitusi, seng martinading. Ipudi ni ganupan ai, matei ma homa naboru ai. ²³ Bani ari parpuhoon ai, ise do sidea simada naboru ai? Ai ganup do na pitu ai ongga marjolmahonsi. ²⁴ Nini Jesus ma hubani sidea: Ai lang na kahou ma nasiam in, halani seng iarusi nasiam Surat in, age hagogohon ni Naibata? ²⁵ Ai anggo puho ma sidea humbani na matei, seng be mompo atap laho sidea, tapi songon malekat na i nagori atas ai ma sidea. ²⁶ Anjaha pasal parpuhoon ni halak na dob matei, ai seng ongga ibasa nasiam ibagas buku ni si Musa, ibagas barita pasal naporon ai, na hinatahon ni Naibata hubani si Musa: Ahu do Naibata ni si Abraham, si Isak ampa si Jakob? ²⁷ Sedo Naibata ni na matei Ia, Naibata ni na manggoluh do. Kahou tumang do nasiam. ²⁸ Jadi roh ma sada halak humbani Parisei ai, na dob mambogei parsualan ai, anjaha na mangahapkon tongon ni pambalosiNi ai bani sidea, nini ma manungkunSi: Na ija do sibanggalan humbani titah in ganupan? ²⁹ Ibalosi Jesus ma: On do sibanggalan: Bogei ma, ale Israel, Tuhan, Naibatanta, sahalakSi do Tuhan. ³⁰ Anjaha maningon haholonganmu do Tuhan Naibatamu humbani gok ni atei-ateimu, humbani gok ni hosahmu, humbani gok ni uhurmu ampa humbani gok ni gogohmu! ³¹ Na paduahon, ai ma: Maningon haholonganmu do hasomanmu doskon dirimu. Seng dong be titah na legan sibanggalan hunjon. ³² Jadi nini sibotoh surat ai ma hu Bani: Tongon do Guru, domu hu hasintongan do na hinatahonMu ai, ai ma, sada do Naibata, anjaha seng dong na legan sobaliSi. ³³ Anjaha mangkaholongiSi humbani gok ni atei-atei, humbani gok ni uhur ampa humbani gok ni gogoh anjaha mangkaholongi hasoman doskon diri, banggalan do ai humbani ganup galangan situtungon age galangan na legan pe. ³⁴ Dob ibogei Jesus pandeini ai marbalos, nini ma hubani: Seng sadiha daoh nari be ham hun harajaon ni Naibata! Anjaha ise pe lang be, na pag marsungkun-sungkun hu Bani. ³⁵ Sanggah mangajari Jesus i bagas rumah panumbahan ai, nini ma hubani sidea: Mase ma ihatahon sibotoh surat, Anak ni si Daud do Kristus in? ³⁶ Si Daud sandiri do mangkatahon marhitei Tonduy Napansing: Nini Tuhan in do dompak Tuhanku: Hundul ma ho hu siamunHon, paima Hubahen sagala munsuhMu sidogeian ni naheiMu. ³⁷ Si Daud sandiri do manggoransi Tuhan, sonaha ma ia Anakni? Marosuh do halak na mabuei ai manangar hataNi. ³⁸ Lanjar ihatahon do ibagas pangajaranNi ai: Jaga ma nasiam dompak sibotoh surat, na marosuh mardalani marbaju ganjang, na mangkarosuhkon, ase itabi halak i tiga, ³⁹ na mangharosuhkon hundulan parlobei i rumah parguruan, ampa hundulan na sangap i parpestaan; ⁴⁰ halak na mambondut rumah ni na mabalu, anjaha na marsipakulah-kulah marhitei tonggo na ganjang. Uhum siboratan do jaloon ni sidea. ⁴¹ Jadi sanggah na hundul Ia tontang ni poti idop ni uhur ai, ikawahkon ma pambahen ni halak na mabuei ai mandabuhkon duitni hu bagas poti ai, anjaha buei do halak na bayak mandabuhkon buei-buei. ⁴² Anjaha roh do sada naboru na mabalu, na miskin, idabuhkon ma hujai dua rimis, ai ma sasen. ⁴³ Jadi idilo Jesus ma susianNi, nini ma hubani sidea: Sintong do na Huhatahon on bannima: Bueinan do na nidabuhkon ni na mabalu na miskin an, hu bagas poti idop ni uhur in, marimbang haganup na mandabuhkon ai. ⁴⁴ Ai humbani lobih-lobihni do idabuhkon sidea bei; tapi anggo naboru an, ibagas hahuranganni idabuhkon do haganup na dong bani, haganup hagoluhanni.

¹ Sanggah luar Jesus hun rumah panumbahan ai, marsahap ma hu Bani sada humbani susian ai: Guru, tonggor Ham ma, sonaha dear ni batu-batu ai ampa rumah-rumah ai! ² Tapi nini Jesus ma hubani: Iidah ho do rumah-rumah na banggal ai? Seng paturuton age dua batu na patindih, na so rosakkononKu. ³ Anjaha, sanggah na hundul Ia i dolog Jetun tontang ni rumah panumbahan ai, pulig ma Ia isungkun si Petrus, si Jakobus, si Johannes pakon si Andreas. ⁴ Patugah Ham ma bennami, antigan ma masa ai, anjaha aha tandani, paboa laho masa ma ganupan ai? ⁵ Jadi ihatahon Jesus ma hubani sidea: Jaga ma hanima, ase ulang ipakahou halak hanima. ⁶ Ai buei ma halak na roh marhitei goranKu, na mangkatahon: Ahu do in! Anjaha buei do na kahou bahenon ni sidea. ⁷ Anjaha anggo ibogei hanima porang ampa barita ni porang, ulang ma hanima tarsonggot! Ai maningon masa do ai, tapi seng ai ope ujungni. ⁸ Ai marsilawanan ma bangsa-bangsa anjaha harajaon samah harajaon, masa ma homa lalou marsasanagori, sonai homa lohei. Pamungkah ni pangarouon ai ma ai. ⁹ Tapi jaga ma hanima bani diri nima! Ai ondoskonon ni sidea do hanima hu pangadilan, longsinganni do hanima i parguruan, anjaha pajongjongon i lobei ni panguhum ampa raja halani Ahu, gabe hasaksian bani sidea. ¹⁰ Anjaha ambilankonon do lobei Ambilan Namadear in bani ganup bangsa. ¹¹ Anjaha anggo itogu halak hanima laho ondoskononkon, ulang ma sunsah uhur nima pasal sihatahonon nima, tapi aha na iberehon bannima bani panorang ai, ai ma hatahon hanima, ai sedo hanima na marsahap ijai, tapi Tonduy Napansing do. ¹² Anjaha ondoskononkon ni sanina do saninani ase ibunuh, sonai homa bapa dompak anakni. Anjaha anak pe manlawan do dompak namatorasni anjaha ibunuh sidea. ¹³ Anjaha domdoman ni haganup halak do hanima halani goranKu. Tapi na tahan ronsi ujungni do paluahon. ¹⁴ Tapi anggo iidah hanima hasamboron na majangin ai, ai ma bani na so patut iananni (iparimbagaskon na mambasa on ma ai), ijai ma maporus na i nagori Judea hu dolog! ¹⁵ Halak na i atas ni rumahni, ulang ma pala tuad ia, anjaha ulang ma pala masuk ia hu bagas rumah, laho mambuat atap aha hunjai. ¹⁶ Na i juma pe ulang ma pala mulak mangalop hiouni. ¹⁷ Tapi magou ma naboratan rumah ampa na painumhon bani panorang ai. ¹⁸ Tapi martonggo ma hanima, ase ulang masa ai sanggah musim borgoh. ¹⁹ Ai masa do bani ari ai sitaronon, na so ongga masa olat ni panompaon ni Naibata bani na tinompaNi ai ronsi nuan, hu lobeian on pe seng masa be. ²⁰ Anjaha ambit lang iorui Tuhan ari ai, seng anjai maluah age sada jolma. Tapi halani na pinilihni ai do, ase iorui. ²¹ Anjaha anggo adong na mangkatahon bennima: "Tonggor ma, ijon do Kristus in!" atap: "Tonggor ma, ijai do Ia," ulang ma haporsayai hanima ai. ²² Ai na roh do Kristus parladung pakon nabi parladung, anjaha bahenon ni sidea do tanda pakon halongangan laho pakahouhon na tarpilih in, ambit na tarbahensi. ²³ Tapi jaga ma hanima, domma hulumbahon hinan in bannima! ²⁴ Tapi bani panorang ai, dob salpu sitaronon ondi, manggolapi ma mataniari, anjaha seng marsinalsal be bulan. ²⁵ Mardabuhan ma bintang hun langit, anjaha hagogohon ni parlangitan pe mandugur ma. ²⁶ Dob ai idahon ni sidea ma Anak ni Jolma in roh marhitei hombun marhasoman hagogohon ampa hasangapon banggal. ²⁷ Dob ai suruhonNi ma malekatni patumpuhon na pinilihNi ai humbani desa na ualuh in, hun ujung ni tanoh das hu ujung ni langit. ²⁸ Tapi humbani hayu ara in ma guruhon hanima usihanni ai. Anggo martunasi ma pusukni anjaha luar bulungni, ibotoh hanima do, dohor ma partahunan milas. ²⁹ Usih hujai, anggo iidah hanima ma masa ondi, botoh hanima ma, na dohor ma parrohni ai. ³⁰ Sintong do na Huhatahon on bannima: Seng anjai salpu na sansundut on, anggo lang lobei masa haganupan ai. ³¹ Salpu pe langit ampa tanoh on, anggo hatangKin seng anjai salpu in. ³² Tapi anggo ari ampa panorangni seng dong na mambotoh ai age malekat i nagori atas, age Anak ni jolma in pe, sobali Bapa in. ³³ Jaga anjaha puho ma hanima, ai seng ibotoh hanima, sadihari panorangni ai. ³⁴ Usih do ai songon bani sada halak, na laho hu tanoh na legan: Itadingkon do rumahni, ibere kuasa bani juak-juakni, ganup marsihorjahon horjani bei, anjaha sijaga labah iparentahkon, ase marjaga-jaga. ³⁵ Halani ai jaga ma hanima, ai seng ibotoh hanima parroh ni tuan simada rumah ai, barang bod ari, barang tongah borngin, barang tahuak dayok, barang girah sogod. ³⁶ Anjaha ulang ma jumpahSi hanima tarpodom, bani na roh ai Ia sompong. ³⁷ Na Huhatahon bannima, bani haganup do ai Huhatahon: Puho ma hanima!

¹ Dua ari nari marayak pesta Paska ampa mangan ruti na so niigaran, ipindahi sintua ni malim ampa sibotoh surat ma akal, laho manangkap anjaha mamunuh Jesus. ² Tapi nini sidea ma: Ulang ma sanggah mata ni pesta ai, ase ulang lutu halak na mabuei in ³ Jadi sanggah i Betania Ia, i rumah ni si Simon na gadamon hinan ai, sanggah na hundul Ia laho mangan, roh ma sada naboru mamboan sada botol, na marisi minak nardus na maharga, na so maragu. Ibolahkon ma botol ai, iuseihon ma minak ai bani ulu ni Jesus. ⁴ Tapi adong ma na marungut-ungut samah sidea: Mase ma iparsoya-soya minak in? ⁵ Boi hinan do jualon minak in lobih tolu ratus dinar, laho mangidopi na masombuh. Jadi igilai sidea ma naboru ai. ⁶ Tapi nini Jesus ma: Paturut ma ia. Mase ma isunsahi hanima ia? Na dear do na binahenni in Bakku! ⁷ Ai tongtong do adong na masombuh i tongah-tongah nima, anjaha sadihari marosuh hanima, boi do bahenon nima na madear bani sidea; tapi anggo Ahu seng tongtong rap pakon hanima. ⁸ Olat ni na tarbahensi do na binahenni in; na manlobei do ia mamminaki angkulangKu songon na laho mananom. ⁹ Sintong do na Huhatahon on bennima: Barang ija pe i sab dunia on iambilankon use Ambilan Namadear on, sahapkononkon do age na binahenni in gabe baritani. ¹⁰ Ia si Judas Iskariot, ai ma sada humbani na sapuluh dua ai, laho do marayak sintua ni malim, laho mantahihon Jesus bani sidea. ¹¹ Mambogei ai, malas ma uhur ni sidea, lanjar ibagahkon sidea ma mambere duit bani. Jadi ipindahi si Judas ma panorang na dearhonsi, laho mangondoskonSi. ¹² Bani ari parlobei ni mangankon ruti na so niigaran, ai ma bani ari panayaton ni biri-biri Paska, nini susian ai ma bani Jesus: Huja ma hanami laho ipindo uhurMu, laho pasirsirhon panganon Paska ai? ¹³ Jadi isuruh ma dua halak susianNi, nini ma hubani sidea: Laho ma hanima hu huta in, pajumpah ma hanima holi pakon sada halak, na mamboban bah sahudon. Irikkon hanima ma ia! ¹⁴ Hatahon hanima ma hubani siparrumah, na nimasukan nima ai: Tonah ni Guru in: Ija do adong kamar, iananKu mangan Paska rap pakon susianKu? (bd. 11:13.) ¹⁵ Jadi patuduhkononni ma bannima sada kamar pardatas na lumbang, na dob dear ipasirsir. Ijai ma patorsa hanima banta! ¹⁶ Susian ai pe laho ma, imasuki sidea ma huta ai, jadi jumpah sidea ma songon na hinatahonni ai bani sidea, gabe ipasirsir sidea ma Paska ai. ¹⁷ Ase dob bod ari, roh ma Jesus ampa susianNi na sapuluh dua ai. ¹⁸ Anjaha sanggah na hundul ai sidea mangan, nini Jesus ma: Na sintong do hatangkon bannima, sada humban nima, na rap mangan pakon Ahu, mangondoskon Ahu. ¹⁹ Jadi pusok ma uhur ni sidea, sada-sada ma sidea mangkatahon hu Bani: Sedo ahu ai? ²⁰ Jadi nini ma hubani sidea: Sada humbanima na sapuluh dua, ai ma na rap pakon Ahu manornobkon hubagas pinggan on. ²¹ Tongon, sai na marujung do namin Anak ni jolma in songon na tarsurat in, tapi bursik ma halak na mangondoskon Anak ni jolma in. Rahanan ma ambit ulang tubuh jolma na sonai ai! ²² Jadi sanggah na mangan ai sidea, ibuat Jesus ma ruti, ipasu-pasu ma, ipartopik anjaha ibere ma hubani sidea, lanjar ihatahon: Jalo hanima ma, dagingKu do on! ²³ Dob ai ibuat ma panginuman, anjaha dob ihatahon tarima kasih, ibere ma ai bani sidea, gabe haganup ma sidea minum hunjai. ²⁴ Lanjar ihatahon ma bani sidea: DarohKu do on, daroh parpadanan in, na niduruskon mangkopkop buei halak. ²⁵ Na sintong tumang do na Huhatahon on bannima: Seng anjai inumonKu be humbani buah ni hayu anggur in das hubani ari ai; ijai ma inumonKu na baru i bagas harajaon ni Naibata. ²⁶ Jadi dob idodingkon sidea doding puji-pujian ai, laho ma sidea hu dolog Jetun. ²⁷ Jadi nini Jesus ma hubani sidea: Haganup do hanima laho sangsi Bakku songon na tarsurat ai: BogboganKu ma parmahan in, gabe mambur merap ma biri-biri in. ²⁸ Tapi dob puho Ahu humbani na matei lobeianKu ma hanima hu Galilea. ²⁹ Jadi ihatahon si Petrus ma hu Bani: Age ganup sidea sangsi, tapi ahu lang. ³⁰ Tapi nini Jesus ma hubani: Na sintong do na Huhatahon on bam: Saborngin on, sanggah lape martahuak dayok padua halihon porsouonmu ma Ahu tolu hali. ³¹ Tapi lambin igogohkon do mangkatahon: Age pe ipamatei ahu rap pakon Ham, seng anjai parnalangonku Ham. Lanjar sonai do hata ni sidea ganup. ³² Das ma sidea bani sada ianan na margoran Getsemane. Ihatahon Jesus ma hubani susianNi: Hundul ma hanima ijon, sanggah martonggo Ahu. ³³ Dob ai iarahkon ma si Petrus, si Jakobus ampa si Johannes. Jadi mulai ma majangin anjaha bulinsah iahap. ³⁴ Jadi nini ma hubani sidea: Pusok tumang do uhurHu, songon na matei do. Ijon ma hanima lobei soh anjaha puho! ³⁵ Dob ai laho ma Ia dompak lobei otik, manrogop ma Ia i tanoh anjaha martonggo, andohar isalpuhon panorang ai humbani anggo tarbahen. ³⁶ Nini do: Abba, Bapa, haganup do tarbahen Ham! Salpuhon Ham ma panginuman on hum Bakku, tapi sedo saguru rosuh ni uhurHu, uhurMu do! ³⁷ Dob ai roh ma Ia, jadi modom do sidea jumpahSi, gabe ihatahon ma hubani si Petrus: O Simon modom do ho hape? Seng mangasup ho puho pala sajam? ³⁸ Puho ma hanima anjaha martonggo, ase ulang masuk hanima hu bagas parlajouan. Ai rosuh do namin tonduy, tapi galek do daging. ³⁹ Dob ai laho ma use Ia martonggo, lanjar hata nongkan ai do ihatahon. ⁴⁰ Jadi sanggah na roh ai Ia use, modom do sidea jumpahSi, ai tartunduh tumang do mata ni sidea. Jadi seng ibotoh sidea be, aha hatahononni Bani. ⁴¹ Dob ai sanggah na roh Ia patolu halihon, nini ma dompak sidea: Nunutan nima ope modom anjaha marsaran? Sungkup ma in! Domma jumpah panorangni! Tonggor ma, ondoskononkon ma Anak ni Jolma in hu bagas tangan ni halak pardousa. ⁴² Jongjong ma hanima, laho ma hita! Tonggor ma, domma dohor sipantahihon Ahu! ⁴³ Mangkatahon ai ope Ia, mintor das ma si Judas, ai ma sahalak humbani na sapuluh dua ai; anjaha rap pakonsi buei do halak na marpodang, na marpukul-pukul, suruhan ni sintua ni malim, sibotoh surat ampa pangintuai-pangintuai. ⁴⁴ Tapi domma ipabotohkon sipantahihon ai hinan tanda bani sidea, nini: Ia in na husummah, ai ma Ia. Tangkap nasiam ma Ia, anjaha pangkei-pangkei ma boan nasiam Ia! ⁴⁵ Jadi daskonsi ia, mintor ijumpahkon ma Jesus, anjaha nini ma: Rabbi! Lanjar isummah ma Ia. ⁴⁶ Mardas tangan ma sidea Bani, lanjar itangkap ma Ia. ⁴⁷ Sada humbani na jongjong ijai ai manintak podangni, itampul ma juak-juak ni sintua ni malim ai, gabe mistak ma pinggolni. ⁴⁸ Jadi nini Jesus ma hubani sidea: Songon na mandompakkon panamun do parroh nasiam on, marpodang anjaha marpukul-pukul, laho manangkap Ahu. ⁴⁹ Ari-ari do namin Ahu rap pakon nasiam i rumah panumbahan mangajari, seng itangkap nasiam Ahu! Tapi tene maningon saud do na tarsurat in. ⁵⁰ Jadi ganup ma sidea manadingkonSi, lanjar maporus. ⁵¹ Adong do sada garama, na marpakeian sanlambar hiou putih tumang, mangirikkonSi. Itangkap sidea ma ia, ⁵² tapi ihallushon ma hiouni ai, lanjar lintun seng marpakeian. ⁵³ Halak ai pe iboan ma Jesus hu lobei ni sintua ni malim; anjaha ganup sintua ni malim, pangintuai ampa sibotoh surat pe domma martumpu. ⁵⁴ Anjaha si Petrus pe iirikkon do Ia mandaoh-daoh hun pudi das hu alaman parbagas ni rumah ni sintua ni malim ai; jadi hundul ma ia ijai rap pakon upas-upas ai mandadang. ⁵⁵ Ia sintua ni malim ai ampa haganup Sanhedrin ai mangindahi hasaksian do dompak Jesus, ase boi marutang hosah Ia, tapi seng dong jumpah sidea. ⁵⁶ Ai buei namin na manaksihon ladung dompakSi, tapi seng mardomu na sinaksihon ni sidea ai. ⁵⁷ Deba jongjong manaksihon ladung dompakSi, nini ma: ⁵⁸ Itangar hanami do Ia mangkatahon: ParsedaonKu do rumah panumbahan, na pinauli ni tangan on, anjaha i bagas tolu ari pajongjongonKu ma na legan, na so pinauli ni tangan. ⁵⁹ Tapi age pe sonai, seng mardomu hasaksian ni sidea ai. ⁶⁰ Dob ai jongjong ma sintua ni malim ai hu tongah-tongah, nini ma manungkun Jesus: Ai seng balosanMu na sinaksihon ni sidea ai dompak Ho? ⁶¹ Tapi sip do Jesus, seng ibalosi age aha. Jadi isungkun sintua ni malim ai ma Ia use, nini ma: Kristus do Ho tongon, Anak ni Sipujion in? ⁶² Jadi nini Jesus ma: Ahu ma tongon! Anjaha idahon nasiam do Anak ni Jolma in hundul i siamun ni Hagogohon in, anjaha roh marhitei hombun na i langit. ⁶³ Jadi irigatkon sintua ni malim ai ma pakeianNi, anjaha nini ma: Naha, porlu ope banta saksi? ⁶⁴ Domma ibogei nasiam pangapasionNi ai bani Naibata. Naha do nini uhur nasiam? Gabe ganup ma sidea manguhumiSi, ase marutang hosah. ⁶⁵ Deba humbani sidea manijuriSi, manutup bohiNi anjaha mamastapisi, lanjar ihatahon: Manjahai ma Ham! Anjaha juak-juak ai mambogbogiSi do. ⁶⁶ Sanggah i toruh si Petrus, i alaman parbagas ai, roh ma sada juak-juak naboru ni sintua ni malim ai, ⁶⁷ anjaha dob iidah si Petrus mandadang, ikawahkon ma ia, lanjar nini ma: Ho pe nongkan rap do ampa Jesus, halak Nasaret ai! ⁶⁸ Tapi iporsou si Petrus do, nini ma: Seng hubotoh anjaha seng huarusi na hinatahonmu in. Lanjar luar ma ia hu alaman lobei-lobei, anjaha martahuak ma dayok. ⁶⁹ Iidah juak-juak naboru ai ma ia, anjaha nini ma use hubani halak na jongjong ijai: Hasoman ni sidea do age halak on! ⁷⁰ Tapi mamorsou ma ia use. Lang sadiha dokah nari nini halak na jongjong ai ma hubani si Petrus: Tongon do hasoman ni sidea, ai halak Galilea do ho! ⁷¹ Jadi ipapai ma dirini anjaha marbijai: Lang hutandai halak, na hinatahon nasiam ai! ⁷² Dob ai mintor martahuak ma dayok padua-halihon. Jadi idingat si Petrus ma na hinatahon ni Jesus hubani: Tolu hali do parnalangonmu Ahu, sanggah lape martahuak dayok paduahalihon. Jadi tangis-tangis ma ia.

¹ Jadi sianghonsi ari mambahen panriahan ma sintua ni malim rap pakon pangintuai-pangintuai, sibotoh surat ampa Sanhedrin. Isangkut sidea ma Jesus lanjar iboan, ipadas hubani si Latus. ² Isungkun si Latus ma Ia: Atene, raja ni halak Jahudi do Ham? Jadi nini ma mambalosisi: Songon na hinatahonmu ai ma tongon! ³ Buei do tukas-tukas ni sintua ni malim hu Bani. ⁴ Jadi iulaki si Latus ma manungkunsi: Ai seng balosanMu ai? Tonggor ma buei ni tukas-tukas ni sidea ai dompak Ham! ⁵ Tapi aha pe lang ibalosi Jesus, pala longang uhur ni si Latus. ⁶ Tapi sanggah ari pesta, somal do ipaluah bani sidea sada halak na tartutup domu hubani pangindoan ni sidea. ⁷ Anjaha adong ma sada halak na margoran si Barabas, na rap tartutup pakon halak panggeori, na mambunuh jolma sanggah na geor ai. ⁸ Jadi naik ma halak na mabuei ai mangindohon, ase ibahen bani sidea songon na somal. ⁹ Balos ni si Latus hubani sidea: Dear do uhur nasiam, ase hupaluah bani nasiam Raja ni Jahudi in? ¹⁰ Ai ibotoh, halani subil ni uhur do, ase iondoskon sintua ni malim Ia. ¹¹ Tapi ijuljul sintua ni malim ai ma halak na mabuei ai, ase si Barabas ipaluah bani sidea. ¹² Jadi nini si Latus ma use mambalosi sidea: Anggo sonai, aha ma ipindo uhur nasiam sibahenonku bani halak, na ginoran on: Raja ni Jahudi? ¹³ Idilohon sidea ma: Parsilangkon ma Ia! ¹⁴ Jadi nini si Latus ma: Ai aha do na jahat ibahen? Tapi lambin igogohi sidea ma mandilohon: Parsilangkon ma Ia! ¹⁵ Tapi halani sihol mambuat uhur ni halak na mabuei ai si Latus, gabe ipaluah ma si Barabas; dob hona lonsingan, iondoskon ma Jesus, ase iparsilangkon. ¹⁶ Tentara ai pe iboan ma Ia hu emper paruhuman ai (ai ma Pretorion), anjaha ipatumpu sidea ma ganup pasukan tentara ai hujai. ¹⁷ Isorungkon sidea ma hu Bani baju sigerger, anjaha idandan ranting-ranting na marduri-duri bahen sortali, lanjar inahkon sidea ma ai bani ulu ni Jesus. ¹⁸ Dob ai roh ma sidea marsombahSi, nini ma: Tabi ma Bamu, Raja ni Jahudi! ¹⁹ Ipukuli ma uluNi bani tolong, itijuri ma Ia, anjaha manrogop ma sidea laho manombahSi. ²⁰ Ase dob ipahiri-hiri sidea Ia, itanggali sidea ma hum-Bani baju sigerger ondi, anjaha isorungkon ma pakeianni hinan. Dob ai iboan ma Ia hu darat, laho mamparsilangkonSi. ²¹ Jadi ipaksa sidea ma sada halak, na montas hunjai roh hunjumani, laho mamorsan silang ai, ai ma si Simon na hun Kirene, bapa ni si Alexander ampa si Rupus. ²² Iboan sidea ma Ia hu Golgata (artini partangkurakan). ²³ Ibere sidea ma hu Bani anggur na marsaor mir, tapi seng ijalo. ²⁴ Dob iparsilangkon sidea Ia, ibagi sidea ma hiouNi; marjomput na sinurat do sidea, laho mambagi ai. ²⁵ Pukul siah do iparsilangkon sidea Ia. ²⁶ Tarsurat do i atasNi pasal halani, ase iuhum ia, ai ma: Raja ni Jahudi. ²⁷ Rap pakon Jesus adong do iparsilangkon dua halak panrampok, sada hampit siamunNi, na sada nari hampit sambilouNi. ²⁸ Gabe jumpah ma na hinatahon ni surat in: Tarhira do Ia bani halak parjahat. ²⁹ Jadi irisai sagala na montas ai ma Ia, iupir-upirhon sidea ma uluni, lanjar nini bei: Pe Ho, na sihol parsedahon rumah panumbahan in, anjaha pajongjongkonSi use i bagas tolu ari! ³⁰ Paluah ma diriMu, anjaha susur ma Ho tongon humbani hayu parsilang in! ³¹ Sonai homa do pangapasi ni sintua ni malim ampa sibotoh surat, nini ma: Ia halak na legan ipaluah, hape diriNi sandiri seng tarpaluahSi. ³² Ale Kristus, Raja ni Jahudi! Susur ma Ho tongon humbani hayu parsilang in, ase iidah hanami, ase porsaya hanami! Anjaha hasomanNi na tarsilang ai pe mangapasi do. ³³ Mulai pukul sapuluh dua das hu pukul tolu sogop ma na golap hu sab tanoh in. ³⁴ Anjaha pukul tolu gogoh ma Jesus mandilohon: Eloi, Eloi, lama sabachtani! artini: Ale NaibatangKu, NaibatangKu, mase ma tadingkononMu Ahu? ³⁵ Mambogei ai nini halak na jongjong ai ma: Bogei ma, idilo do si Elias! ³⁶ Jadi laho ma sada halak mambuat limut, isornobhon ma ai bani na migar, anjaha ilongkothon ma ai bani tolong laho mambereSi minum. Nini sidea ma: Torih hita ma, atap roh do si Elias patuadhonSi! ³⁷ Marsora na gogoh ma Jesus, jadi rotap ma hosahNi. ³⁸ Marigat ma tirei na i rumah panumbahan ai, bolah dua hun datas hu toruh. ³⁹ Dob iidah kopala ni tentera, na jongjong ai ijai, sonai parmateini, nini ma: Tongon do Anak ni Naibata halak on! ⁴⁰ Manatap-natap do humbani na daoh piga-piga naboru songon si Maria Magdalena, si Maria inang ni si Jakobus siposonan, ambah ni ai inang ni si Josep, ampa si Salome. ⁴¹ Sanggah i Galilea ope Ia, domma iirikkon sidea Ia, laho marugas hu Bani. Buei do parinangon na legan na tangkog pakonSi hu Jerusalem. ⁴² Jadi dob bod ari, anjaha halani parugasonkon ma ai, ai ma ari marayak ari Sabat, ⁴³ roh ma si Josep par Arimatea, pagori ni pangadilan tinggi, sada halak na sangap, na paima-imahon harajaon ni Naibata; ibaranihon ma dirini laho hu lobei ni si Latus mangindo bangkei ni Jesus. ⁴⁴ Longang do si Latus manangar na dob matei Jesus, gabe idilo ma kopala ni tentara ai anjaha isungkun ma ia, atap na dob dokah ma Jesus matei. ⁴⁵ Ase dob ibotoh pasal ai humbani kopala ni tentara ai, iondoskon ma bangkei ni Jesus bani si Josep. ⁴⁶ Iboli si Josep ma hiou linen na alus, anjaha ipasusur ma bangkei ai humbani parsilang ai. Ibaluti ma Ia bani hiou linen ai, anjaha ipatibal hu bagas tanoman na dob niliang, dob ai igulang ma sada batu bani babah ni tanoman ai. ⁴⁷ Iidah si Maria Magdalena ampa si Maria inang ni si Joses do, atap huja do Ia itibalhon.

¹ Ase dob salpu ari Sabat ai, iboli si Maria Magdalena pakon si Maria inang ni si Jakobus ampa si Salome ma minak na misbou, laho maminaki Jesus. ² Jadi girah sogod, bani ari parlobei dob Sabat ai, laho ma sidea hu tanoman ai, bani poltak ni mataniari. ³ Nini sidea ma samah sidea: Ise ma manggulang batu ai banta hun babah ni tanoman ai? ⁴ Anjaha sanggah na mangkawah sidea, iidah sidea ma na dob igulang batu ai; borat tumang do batu ai. ⁵ Imasuki sidea ma tanoman ai, jadi iidah sidea ma sada garama, marpakeian na lopak, hundul hampit siamun, gabe mabiar tumang ma sidea. ⁶ Tapi nini ma dompak sidea: Ulang nasiam mabiar! Ipindahi nasiam do Jesus na hun Nasaret, na dob pinarsilangkon ai. Domma puho Ia, seng ijon be Ia. Tonggor nasiam ge ianan hatibalanNi on hinan! ⁷ Tapi laho ma nasiam, patugah nasiam ma bani susianNi ampa bani si Petrus: LobeianNi do nasiam hu Galilea, songon na dob hinatahonNi hinan bani nasiam! ⁸ Sidea pe luar ma hun tanoman ai, hitir-hitir anjaha tarsonggot. Halani mabiar sidea seng ipatugah sidea ai atap hubani ise pe. ⁹ Dob puho Ia girah sogod, bani ari parlobei ni Minggu ai, ipataridahkon ma diriNi parlobei hubani si Maria Magdalena; humbani do iusir ijia pitu setan. ¹⁰ Ia pe laho ma patugahkon ai hubani halak na mangkasomani Jesus hinan, na marhoru anjaha tangis ai. ¹¹ Tapi dob ibogei sidea, na dob mulak manggoluh Ia anjaha ipataridahkon diriNi bani si Maria Magdalena, seng dong porsaya sidea. ¹² Dob ai ipataridahkon ma use diriNi ibagas rupa na legan hubani dua halak humbani sidea, sanggah laho sidea hu huta na legan. ¹³ Jadi laho ma sidea patugahkon na masa ai bani na legan ai, tapi seng porsaya age sidea. ¹⁴ Ipudini ai ipataridahkon ma diriNi bani na sapuluh sada ai, sanggah na hundul sidea mangan. Ipinsang ma sidea halani hurang porsaya sidea anjaha hengkeng uhur ni sidea, ai seng porsaya sidea bani halak na mangidahSi, dob puho Ia. ¹⁵ Dob ai nini ma hubani sidea: Laho ma hanima hu sab dunia on, ambilankon hanima ma Ambilan Namadear in bani sagala na tinompa. ¹⁶ Na porsaya anjaha tardidi dapotan haluahon tapi na so porsaya hona uhum do! ¹⁷ Anjaha on ma tanda na mangihut bani na porsaya: Marhitei goranKu usiron ni sidea do sibolis, anjaha marsahap na baru do sidea. ¹⁸ Jomputon ni sidea do ulog, anjaha age pe iinum rasun hamateian, seng pala mahua sidea; tampeihonon ni sidea do tanganni bani na boritan gabe malum ma sidea. ¹⁹ Ia Tuhan Jesus, dob marsahap Ia pakon sidea, tarangkat ma hu nagori atas, anjaha hundul ma i siamun ni Naibata. ²⁰ Tapi laho ma anggo sidea mangambilankon Ambilan Namadear in, huja-huja pe. Iurupi Tuhan in do sidea, anjaha ipatotap do ambilan ni sidea ai marhitei tanda na mangihut ai.