MATEUS

MATEUS

¹ On ma surat partuturan ni Jesus Kristus, anak ni si Daud, anak ni si Abraham. ² Anak ni si Abraham si Isak; anak ni si Isak si Jakob; anak ni si Jakob si Juda ampa saninani ai. ³ Anak ni si Juda si Peres pakon si Sera, humbani si Tamar; anak ni si Peres si Esrom; anak ni si Esrom si Aram. ⁴ Anak ni si Aram si Aminadab; anak ni si Aminadab si Nahason; anak ni si Nahason si Salmon. ⁵ Anak ni si Salmon si Boas humbani si Rahab; anak ni si Boas si Obed humbani si Rut; anak ni si Obed si Jesse. ⁶ Anak ni si Jesse raja Daud; anak ni si Daud si Salomo, humbani binuat ni si Uria. ⁷ Anak ni si Salomo si Rehabeam; anak ni si Rehabeam si Abia; anak ni si Abia si Asa. ⁸ Anak ni si Asa si Josapat; anak ni si Josapat si Joram; anak ni si Joram si Usia. ⁹ Anak ni si Usia si Jotam; anak ni si Jotam si Ahas; anak ni si Ahas si Hiskia. ¹⁰ Anak ni si Hiskia si Manasse; anak ni si Manasse si Amon; anak ni si Amon si Josia. ¹¹ Anak ni si Josia si Jekonya ampa saninani ai, ai ma bani panorang habuangan hu Babel.. ¹² Jadi dob tarbuang sidea, tubuh ma si Sealtiel, anak ni si Jekonya, dob ai si Serubabel, anak ni si Sealtiel. ¹³ Anak ni si Serubabel si Abiud; anak ni si Abiud si Eliakim; anak ni si Eliakim si Asor. ¹⁴ Anak ni si Asor si Sadok; anak ni si Sadok si Akim; anak ni si Akim si Eliud. ¹⁵ Anak ni si Eliud si Eleasar; anak ni si Eleasar si Mattam; anak ni si Mattam si Jakob. ¹⁶ Anak ni si Jakob si Josep, paramangon ni si Maria, na manubuhkon Jesus, na margoran Kristus. ¹⁷ Ase buei ni sundut humbani si Abraham das hubani si Daud ai ma sapuluh ompat sundut; anjaha humbani si Daud das hu habuangan Babel sapuluh ompat sundut, anjaha humbani habuangan Babel das hubani Kristus sapuluh ompat sundut. ¹⁸ Ia partubuh ni Jesus Kristus, sonon do: Sanggah tunangan ni si Josep ope inangni, si Maria ai, boratan rumah do ia humbani Tonduy Napansing, sanggah lape marsidohoran sidea. ¹⁹ Ia si Josep, paramangonni ai, paruhur na pintor do, anjaha seng sihol uhurni laho pabadorhonsi, gabe tubuh ma uhurni manirangkonsi sipsip. ²⁰ Tapi sanggah sonai ope sura-sura ni uhurni, iidah ma ibagas nipini malekat ni Tuhan in, na mangkatahon hubani: O Josep, anak ni si Daud, ulang ma mabiar ho mangalop si Maria gabe parinangonmu, ai na adong bani ai, ai ma na humbani Tonduy Napansing. ²¹ Tubuhan Anak ma ia, anjaha bahen ma goranni Jesus, ai paluahonNi do bangsaNi humbani dousa ni sidea. ²² Masa pe haganupan ai, ase jumpah do na hinatahon ni Tuhan in marhitei nabiNi, na mangkatahon: ²³ Tonggor ma, boratan rumah ma sada anak boru, anjaha tubuhan anak, anjaha bahenonni ma goranni Immanuel, artini: Hasomanta do Naibata. ²⁴ Jadi dob puho si Josep, idalankon ma songon na hinatahon ni malekat ai bani, saud ma ialop parinangonni ai. ²⁵ Tapi seng idohori ia, paima tubuh anak bunga tubuhni ai, anjaha igoran ma ia Jesus.

¹ Ase dob tubuh Jesus i huta Betlehem, na i Judea, sanggah panorang ni raja Herodes, roh ma halak paruhur na hun hapoltakan hu Jerusalem, ² nini sidea ma: Ija do Raja ni Jahudi na baru tubuh in? Iidah hanami do bintangNi i hapoltakan, anjaha halani ai do, ase roh hanami sihol manombahSi. ³ Jadi dob ibogei raja Herodes ai, tarsonggot ma ia rap pakon haganup parJerusalem. ⁴ Jadi ipatumpu ma haganup sintua ni malim ampa sibotoh surat ni bangsa ai, anjaha ipapangkei humbani sidea, atap ija do huta hatubuhan ni Kristus in. ⁵ Jadi nini sidea ma hubani: I huta Betlehem, na i tanoh Judea do, ai sonon do tarsurat marhitei nabi ai: ⁶ Ale Betlehem, na i tanoh Juda, sedo ho sietekan i tongah-tongah ni huta na i tanoh Juda, ai ho do huta harohan ni Raja in, na sihol marmahan Israel, bangsangKin! ⁷ Dob ai idilo raja Herodes ma paruhur ai marponop-ponop, anjaha ipatae ma humbani sidea dokahni, dob taridah bintang ai. ⁸ Dob ai isuruh ma sidea hu huta Betlehem, nini ma: Laho ma nasiam hujai, pangkei ma pindahi nasiam Dakdanak ai! Anjaha anggo domma jumpah nasiam Ia, patugah nasiam bakku, ase dihut ahu roh marsombah hu Bani. ⁹ Ase dob ibogei sidea hata ni raja ai, misir ma sidea. Anggo bintang ondi, na dob iidah sidea hinan i hapoltakan, sai mardalan do i lobei ni sidea, paima soh ai i babou ni ianan ni Dakdanak ai, ¹⁰ Mangidah bintang ai, malas tumang ma uhur ni sidea. ¹¹ Imasuki sidea ma rumah ai, gabe iidah sidea ma Dakdanak ai rap pakon si Maria inangNi ai. Dob ai manrogop ma sidea marsombah hu-Bani; ibuka sidea ma artani anjaha isombahkon ma Bani sibere-bere ni sidea: omas, dahupa ampa mir. ¹² Dob ai roh ma lumba-lumba bani sidea marhitei nipi, ase ulang pala be mulak sidea hubani si Herodes, jadi humbani dalan na legan ma sidea mulak hu nagori ni sidea. ¹³ Ase dob laho sidea, roh ma sada malekat ni Tuhan in iidah si Josep ibagas nipini, nini ma: Jongjong ma ho, boan ma Dakdanak in rap pakon inangNi, maporus ma hanima hu tanoh Masir, anjaha ijai ma hanima lobei, paima roh use hatangku, ai ipindahi si Herodes do Dakdanak in, sihol bunuhonni. ¹⁴ Jadi puho ma ia, iboan ma Dakdanak ai rap pakon inangNi bornginni ai, maporus laho hu tanoh Masir. ¹⁵ Lanjar ijai ma sidea marianan paima matei si Herodes, ase jumpah na hinatahon ni Tuhan in marhitei nabini, na mangkatahon: Hun Masir do hudilo AnakKin. ¹⁶ Dob tarbotoh bani si Herodes, na dob itipu halak paruhur ai ia, marah tumang ma ia; jadi isuruh ma hu Betlehem pakon hu nagori na inggot hujai, laho mamunuh sagala dakdanak na marumur dua tahun ampa na i toruh ni ai domu hubani panorang na dob pinapangkeini humbani halak paruhur ai. ¹⁷ Ijai ma jumpah na hinatahon marhitei nabi Jeremia: ¹⁸ Tarbogei do i Rama sora partangison pakon doruh-doruh. Itangisi si Rahel do anakni, seng ra ia apohon, ai domma bois sidea. ¹⁹ Jadi dob matei si Herodes, taridah ma malekat ni Tuhan in bani si Josep ibagas nipini i tanoh Masir, na mangkatahon: ²⁰ Jongjong ma ho, boan ma Dakdanak in rap pakon inangNi mulak hu tanoh Israel, ai domma matei na manguhurhon hosah ni Dakdanak in! ²¹ Jadi puho ma ia, iboan ma Dakdanak ai rap pakon inangNi mulak hu tanoh Israel. ²² Tapi dob ibogei, si Arkelaus do hape raja i Judea gantih ni bapani, si Herodes, jadi mabiar ma ia laho hujai. Dob ijalo podah humbani Naibata ibagas nipini, jadi laho ma ia hu nagori Galilea. ²³ Dob das ijai, laho ma ia marianan bani sada huta na margoran Nasaret, gabe jumpah ma hata ni nabi, na mangkatahon: Goranon do Ia halak Nasaret.

¹ Bani panorang ai jongjong ma si Johannes Pandidi, anjaha marambilan ma ia i halimisan Juda, ² nini ma: Paubah nasiam ma uhur nasiam, ai domma dohor harajaon nagori atas in! ³ Pasalsi do na pinatugah ni nabi Jesaya marhitei na hinatahonni: Sora na dilo-dilo i halimisan! Pasirsir nasiam ma dalan bani Tuhan in; papintor nasiam ma sidalananNi! ⁴ Ia si Johannes, ambulu ni unta do hiouni, huling-kuling do gonditni, anjaha sipanganonni balang pakon manisan ni lobah. ⁵ Jadi roh ma halak marayaksi hun Jerusalem, hun sab Judea ampa hun haganup pamah Jordan. ⁶ Jadi ididi si Johannes ma sidea i bah Jordan ai, dob isopotkon sidea bei dousani. ⁷ Dob iidah buei halak Parisei pakon Sadukei marayak pandidionni ai, nini ma hubani sidea: Nasiam ginompar ni ulog darih! Ise do na mangajari nasiam, boi maluah nasiam humbani ringis na sihol roh? ⁸ Parbuahkon nasiam ma buah na tama, paboa na dob mubah uhur nasiam, ⁹ anjaha ulang ma nini uhur nasiam ibagas: Si Abraham do bapanami! Huhatahon ma bani nasiam: Tarjadihon Naibata do anak bani si Abraham humbani batu on. ¹⁰ Domma tampei tangkei bani bona ni hayu. Ai pe, sirobohon do sagala hayu na so marbuahkon na madear, anjaha sigijigkononkon hu bagas apuy! ¹¹ Ia ahu, bah do hudidihon bani nasiam, mangkatahon paubah uhur, tapi gogohan ope humbakku na roh hun pudingku, gari mamboan sipatuni seng talup ahu. Didihononni do bani nasiam Tonduy Napansing ampa apuy. ¹² Bani tanganNi do pamurpuran, paborsihonNi ma pardogeianNi, anjaha patumpuonNi ma omeiNi hu tuanganNi, tapi lamlamNi tutungon do ai bani apuy na so ra mintop. ¹³ Ijia roh ma Jesus hun Galilea hu bah Jordan, laho padidihon diriNi hubani si Johannes. ¹⁴ Tapi manjua do si Johannes, nini ma: Ahu do namin patut didion-Mu, mase ma Ham roh bakku? ¹⁵ Tapi ibalosi Jesus ma ia: Paturut ma sonai lobei, ai sonai do patut hita manggoki sagala hapintoron! Jadi ibalosi ma. ¹⁶ Ase dob tardidi Jesus, mintor naik ma Ia hum bagas bah ai. Anjaha tonggor ma, mungkab ma langit, anjaha taridah ma susur hun langit Tonduy ni Naibata songon asas, lanjar sogop hu Bani. ¹⁷ Lanjar nini sada sora ma hun nagori atas: On do Anak, haholongan ni uhur-Hu, marosuh do uhur-Hu mangidahSi!

¹ Dob ai ibobai Toduy in ma Jesus hu halimisan, ase ilajou sibolis Ia. ² Jadi dob marpuasa Ia ompat puluh ari ompat puluh borngin, loheian ma Ia. ³ Jadi ijumpahkon sipanlajou ai ma Ia, anjaha nini ma: Anggo Anak ni Naibata do Ham, hatahon ma, ase gabe ruti batu on! ⁴ Jadi nini ma mambalosi: Tarsurat do: Sedo ruti hansa hagoluhan bani jolma, tapi haganup hata ni Naibata, na luar humbani pamanganNi. ⁵ Dob ai iarahkon sibolis ai ma Ia hu huta na mapansing ai, ipajongjong ma Ia bani anjung-anjung ni rumah panumbahan ai, ⁶ anjaha nini ma hu Bani: Anggo Anak ni Naibata do Ham, lumpathon Ham ma hu toruh, ai tarsurat do: Suruhon-Ni do malekat-Ni manatang-natang Ho, ase ulang antuk nahei-Mu bani batu! ⁷ Jadi nini Jesus ma hubani: Tapi tarsurat do homa: Seng bulih lajouonmu Tuhan Naibatamu! ⁸ Dob ai iulakkon sibolis ai ma mamboansi hubani pakpak ni dolog na gijang tumang, anjaha ipatuduhkon ma hu-Bani haganup harajaon na i dunia on ampa hasangaponni. ⁹ Jadi nini ma hu Bani: Haganupan in hubere pe Bamu, asal ma ra Ham marsombah hubakku. ¹⁰ Jadi nini Jesus ma hubani: Laho ma ho bolis! Ai tarsurat do: Tuhan Naibatamu do sisombahonmu, sahalaksi do sibalosanmu! ¹¹ Dob ai itadingkon sibolis ai ma Ia, jadi roh ma malekat-malekat marugas Bani. ¹² Dob ibogei Jesus na dob tartutup si Johannes, laho ma Ia hu Galilea. ¹³ Lanjar itadingkon ma huta Nasaret, gabe laho ma Ia marianan hu huta Kapernaum, na i topi ni tao ai, i nagori Sebulon ampa Naptali, ¹⁴ ase jumpah na hinatahon ni nabi Jesaya, na mangkatahon: ¹⁵ Nagori Sebulon ampa Naptali, na i topi ni tao ai, i dipar ni bah Jordan, nagori Galilea, ianan ni sipajuh begu-begu, ¹⁶ bangsa na marianan ibagas na golap mangidah Panondang na bolon, anjaha poltak do Panondang bani na marianan bani linggoman ni hamateian. ¹⁷ Jadi olat ni ai mamungkah ma Jesus marambilan, anjaha nini ma: Paubah nasiam ma uhurnasiam, ai domma dohor harajaon nagori atas in! ¹⁸ Jadi, sanggah na mardalani Jesus i topi ni tao Galilea, iidah ma ijai dua halak na marsanina, na manampakkon jala ni sidea hu tao ai, ai pardengke do sidea, ai ma si Simon, na ginoran Petrus, ampa saninani si Andreas. ¹⁹ Jadi nini ma dompak sidea: Eta, ihutkon nasiam ma Ahu, hubahen pe nasiam gabe sijala jolma! ²⁰ Jadi mintor itadingkon sidea ma jala ni sidea, laho mangihutkonSi. ²¹ Dob laho Ia hunjai, iidah ma use dua halak na marsanina, ai ma si Jakobus, anak ni si Sebedeus, ampa si Johannes saninani ai, hundul ibagas parau rap pakon si Sebedeus, bapa ni sidea ai, pauli-ulihon jala ni sidea. Jadi idilo ma sidea. ²² Jadi mintor itadingkon sidea ma parau ai pakon bapa ni sidea, laho mangirikkonSi. ²³ Jadi isiar Jesus ma ganup nagori Galilea, laho mangajari bani parguruan ni sidea, anjaha mangambilankon Ambilan Namadear pasal harajaon ai, lanjar pamalumhon sagala naborit ampa na niarou ni halak na ijai ai. ²⁴ Jadi tarambilan ma Ia das hu sab tanoh Siria; iboan halak ma hu lobeiNi sagala na boritan ampa na marsitaronon, na siniaran ni setan, na ubagon ampa na oyangon, gabe ipamalum ma sidea haganup. ²⁵ Jadi buei ma halak na mangirikkonSi, ai ma hun nagori Galilea, hun Dekapolis (Sapuluh huta), hun Jerusalem, hun Judea ampa hun nagori na i dipar ni bah Jordan.

¹ Anjaha mangidah halak na mabuei ai, tangkog ma Ia hu sada dolog; dob hundul Ia, roh ma susianNi ai hu-Bani. ² Dob ai ibuha ma pamanganNi, laho mangajari sidea, nini ma: ³ Martuah ma na sombuh tonduy, ai bani sidea do harajaon nagori atas in! ⁴ Martuah ma na pusok uhur, ai siapohon do sidea! ⁵ Martuah ma na lamlam uhur, ai teanon ni sidea do tanoh on! ⁶ Martuah ma na horahan loheian bani hapintoron, ai sipabosuron do sidea. ⁷ Martuah ma na idop uhur, ai siidopan do sidea. ⁸ Martuah ma paruhur na borsih, ai idahon ni sidea do Naibata! ⁹ Martuah ma sibahen damei, ai goranon do sidea anak ni Naibata! ¹⁰ Martuah ma na pinarburu ni halak halani hapintoron, ai bani sidea do harajaon nagori atas in! ¹¹ Martuah ma hanima anggo irehei halak hanima barang iparburu, barang ipatubuh-tubuh bagei ni hata na masambor, na so tongon dompak hanima halani Ahu! ¹² Malas ma uhurnima anjaha marolob-olob, ai banggal do upahnima i nagori atas, ai sonai do iparburu nabi-nabi na parlobei hun bennima. ¹³ Hanima do garam ni dunia on! Tapi anggo mambar in, aha ma bahenon paporadkon? Seng marguna be in, siambukkononkon mando in ase idogei-dogei halak. ¹⁴ Hanima do panondang ni dunia on! Seng boi ponop huta na i atas dolog. ¹⁵ Seng irungkubhon halak tumba bani suluh na pinagarani, tapi hu atas sagakan do ibahen, ase isondangi haganup na i rumah ai. ¹⁶ Sonai ma marsinalsal panondangnima i lobei ni halak, ase iidah horjanima na dear in, ase ipuji sidea Bapanima na i nagori atas in. ¹⁷ Ulang ma iagan uhurnima roh Ahu, laho manrumbakkon titah in pakon hata ni nabi-nabi; seng roh Ahu laho manrumbakkon, tapi laho pajongjongkon do. ¹⁸ Ai na sintong do Hatangkon bennima: Ronsi seda langit pakon tanoh on, na so bulih maseda humbani titah in sada titik atap sada garis pe, paima saud haganupan in. ¹⁹ Ase barang ise na manrumbakkon sada pe humbani titah sietekan in, anjaha ipodahkon sonai bani jolma, ai do goranon sietekan i harajaon nagori atas in; tapi na mandalankon anjaha na mangajarhon in, ai do goranon na banggal i harajaon nagori atas in. ²⁰ Ai Huhatahon ma bennima: Anggo seng daoh dearan hapintoronnima marimbang hapintoron ni Sibotoh Surat ampa Parisei, sabonar na so boi do hanima masuk hu harajaon nagori atas in. ²¹ Ibogei hanima do hata hubani ompung nalobei: Ulang ho mamunuh! Ia pamunuh siuhumon do. ²² Tapi Ahu mangkatahon bennima: Ise na marah bani sanina, maningon boanon do hu pangadilan. Anjaha ise na mangkatahon bani saninani "na oto", maningon boanon do hu pangadilan atas, anjaha na mangkatahon "e na gila", maningon iuhum ibagas naraka. ²³ Halani ai, anggo iboan ho galanganmu hu anjap-anjap, anjaha taringat uhurmu bani sogam ni uhur ni saninamu bam, ²⁴ tadingkon ma galanganmai i lobei ni anjap-anjap ai, laho ma ho lobei mardear ampa saninamai, dob ai pe ase roh ho mangondoskon galanganmai! ²⁵ Podas ma ho mardear pakon imbangmai, sanggah rap ope ho pakonsi i pardalanan, ase ulang iondoskon imbangmai holi ho hu panguhum, gabe iondoskon panguhum ai ho bani upasni, anjaha inahkon ho hu bagas tutupan. ²⁶ Sintong do na Huhatahon on bam: Seng bulih ho maluah hunjai, anggo lape igalar ho haganup utangmu, ronsi sarimis. ²⁷ Ibogei hanima do hata na mangkatahon: Ulang ho marbangkis! ²⁸ Tapi Ahu mangkatahon bennima: Barang ise na mangidah naboru anjaha oji ia, domma marbangkis ia ibagas uhurni. ²⁹ Anggo sangsi ho halani mata siamunmu, pulsitkon ma in anjaha ambukkon, ai dearan do magou sada pagorimu, ulang hibul angkulamu igijigkon hu bagas naraka. ³⁰ Anjaha anggo sangsi ho halani tanganmu siamun, rotap ma in anjaha ambukkon, ai dearan do magou sada pagorimu, ulang hibul angkulamu igijigkon hu bagas naraka. ³¹ Ihatahon ope: Barang ise na manirangkon na binuatni, maningon bereonni do surat sirang. ³² Tapi Ahu mangkatahon bennima: Barang ise na manirangkon binuatni, anggo seng halani parbangkison, na pabangkishonsi do ai. Parbangkis do homa na mambuat na sirang ai. ³³ Ambah ni ai, ibogei hanima do hata hubani ompung nalobei: Seng bulih bijahononmu na so tongon! Na dob nibulawankon bani Naibata, maningon galaronmu do ai! ³⁴ Tapi Ahu mangkatahon bennima: Sabonar na so bulih do hanima marbija barang marbulawan pe, age hu langit, ai paratas ni Naibata do ai; ³⁵ age hu tanoh, ai sidogeian ni naheiNi do in, age hu Jerusalem, ai huta ni Raja na banggal in do ai. ³⁶ Age bani ulumu seng bulih ho marbija, ai seng markuasa ho mambahen lopak atap birong jambulanmu age sada. ³⁷ Sonon ma hatanima: Eak, anggo eak, lang, anggo lang. Lobih hunjai, humbani na jahat ma ai. ³⁸ Ibogei hanima do hata na mangkatahon: Mata do gantih ni mata, ipon gantih ni ipon. ³⁹ Tapi Ahu mangkatahon bennima: Ulang imbang hanima na jahat! Anggo adong na manompas huyummu siamun, tarehon homa age huyummu sambilou! ⁴⁰ Anggo adong na mambahen parkara bam, laho mambuat bajumu, bere ma homa mantelmu bani! ⁴¹ Anggo adong na mamaksa ho mardalan pakonsi sabatu, irikkon ma ia dua batu. ⁴² Bere ma halak na mangindo bam! Ulang tundali na sihol manginjam humbam! ⁴³ Ibogei hanima do hata na mangkatahon: Holong ma uhurmu bani hasomanmu, tapi sogam ma bani munsuhmu! ⁴⁴ Tapi Ahu mangkatahon bennima: Haholongi hanima ma munsuhnima, anjaha tonggohon hanima ma na marburu hanima, ⁴⁵ ase gabe anak ni Bapanima na i nagori atas ai hanima, ai ipapoltak do mataniariNi bani parjahat ampa parbujur, anjaha iparoh do udan bani parpintor ampa pargeduk. ⁴⁶ Ai anggo holong uhurnima pitah bani na marholong ni uhur bennima, aha ma upahnima? Ai sijalo sohei pe, ai lang sonai do ibahen? ⁴⁷ Anjaha anggo saninanima do hansa itabi hanima, aha ma hasurungannima? Ai sipajuh begu-begu pe, ai lang sonai do ibahen? ⁴⁸ Ai pe, maningon gokan dear do hanima, songon Bapanima i nagori atas, na Gokan Dear in!

¹ Jaga ma hanima, ase ulang idalankon hanima hapintoronnima i lobei ni halak, ase iidah sidea! Anggo sonai, seng adong be upahnima humbani Bapanima na i nagori atas ai. ² Ai pe, anggo marsibere-bere ho, ulang pala tingtingkon, songon pambahen ni halak sipakulah-kulah i rumah parguruan atap i alaman, ase ipuji halak sidea. Na sintong do Hatangkon bannima: Domma ijalo sidea upah ni sidea. ³ Ase anggo marsibere-bere ho, ulang ma pala ibotoh tanganmu sambilou na binere ni tanganmu siamun, ⁴ ase ponop idop ni uhurmu; jadi Bapamu, siidah na ponop ai ma mambalas ai bam. ⁵ Anjaha anggo martonggo hanima, ulang ma songon halak sipakulah-kulah, na mangkarosuhkon jongjong martonggo i rumah parguruan atap bani sirpang-sirpang, ase iidah halak sidea. Na sintong do Hatangkon bannima: Domma ijalo sidea upah ni sidea. ⁶ Tapi anggo martonggo ho, hu kamar ma ho laho, tutup ma labah ai, anjaha martonggo ma ho bani Bapamu, na adong bani ianan na ponop ai; jadi Bapamu, siidah na ponop ai ma mambalas ai bam. ⁷ Sanggah na martonggo ai ulang ma marganjang-ganjang sahapnima songon sipajuh begu-begu, na mangagan tangihonon ni Naibata sidea, halani buei ni sahap ni sidea. ⁸ Ai pe, ulang ma songon sidea hanima! Ibotoh Bapanima do na porlu bennima, sanggah lape ipindo hanima ai hum-Bani. ⁹ Ase sonon ma tonggonima: Ham Bapanami na i nagori atas. Sai pinapansing ma Goranmu. ¹⁰ Sai roh ma harajaonMu. Sai saud ma harosuh ni uhurMu i nagori tongah on songon na i nagori atas. ¹¹ Bere Ham ma bannami sadari on hagoluhan ari-ari. ¹² Sasap Ham ma dousanami songon panasapnami bani dousa ni hasoman, na mardousa dompak hanami. ¹³ Ulang ma bobai Ham hanami hu parlajouan, tapi paluah Ham ma hanami humbani pangagou. Ai Ham do simada harajaon ampa hagogohon ampa hasangapon sadokah ni dokahni. Amen. ¹⁴ Ai anggo isasap hanima salah ni halak dompak hanima, sasapon ni Bapanima na i nagori atas ai do age dousanima. ¹⁵ Tapi anggo seng isasap hanima salah ni halak dompak hanima, seng sasapon ni Bapanima age salahnima. ¹⁶ Anggo marpuasa hanima, ulang ma borjot bohinima songon pambahen ni halak sipakulah-kulah, ai ipasambor sidea do bohi ni sidea, ase iidah halak sidea na marpuasa. Na sintong do hatangkon bennima: Domma ijalo sidea upah ni sidea. ¹⁷ Tapi anggo marpuasa ho, minaki ma ulumu, anjaha suhapi bohimu, ¹⁸ ase ulang tanda parpuasaonmai bani halak, tapi talar bani Bapamu na bani na ponop ai. Jadi Bapamu, siidah na ponop ai ma mambalaskon ai bam. ¹⁹ Ulang ma patumpu-tumpu hanima arta bennima i tanoh on, bani ianan na targagat tasik ampa ngitngit, bani ianan na tarhurak anjaha tartangko panangko! ²⁰ Tapi patumpu-tumpu hanima ma arta bannima i nagori atas, bani ianan na so targagat tasik ampa ngitngit, bani ianan na so tarhurak anjaha tartangko panangko. ²¹ Ai ija artamu, ijai do uhurmu. ²² Palita ni angkula do mata. Anggo dear matamu, lihar ma ganup angkulamu. ²³ Tapi anggo sambor matamu, golap ma haganup angkulamu. Golap ni in tene, anggo golap ma panondang na ibagas ho. ²⁴ Seng tarbalosi sada halak dua tuan. Sai sogam do uhurni bani na sada, haholonganni na sada nari; hombaranni do na sada, anjaha mapas uhurni bani na sada nari. Seng tarbalosi nasiam Naibata rap pakon Mammon! ²⁵ Ai do ase Huhatahon bannima: Ulang ma holsohan hanima pasal goluhnima pasari-sari sipanganon atap siinumon, sonai homa pasal angkulanima pasari-sari parhiouon. Ai lang harganan do hosah ase sipanganon, anjaha harganan angkula ase parhiouon? ²⁶ Tonggor hanima ma manuk-manuk na i awang-awang, na so martidah, na so manabi anjaha na so patumpuhon hu sopou; tong do iparmudu Bapanima na i nagori atas ai sidea. Ai lang bueinan ope hasurungannima marimbang ai? ²⁷ Ise ma hanima na mangasup paganjang ari-arini age saasta gelah marhitei na holsohan? ²⁸ Mase ma holsohan hanima pasal parhiouon? Pardiatei hanima ma partubuh ni bunga silundat i talun in, na so pala marhorja barang manorha! ²⁹ Tapi Huhatahon ma bennima: Gari raja Salomo, sanggah hasangaponni ai, seng adong jenges ni hiouni songon sada bunga-bunga ai. ³⁰ Ase anggo sonai iparhioui Naibata poyon-poyon na i talun in, na adong sadari on, hape patar ipuruni, samintolah hanima ma lang parhiouonni? Ee hanima siotik haporsayaon! ³¹ Ase ulang ma holsohan hanima mangkatahon: Aha ma panganonnami, aha ma inumonnami, aha ma parhiouonnami? ³² Ai sipajuh begu-begu do na mangkaporluhon sisonai ai. Ibotoh Bapanima na i nagori atas ai do na porlu ai bennima. ³³ Parlobei ma pindahi hanima harajaon ni Naibata ampa hapintoranNi, dob ai tambahkononNi do ganupan ai bannima. ³⁴ Ase ulang ma holsohan hanima pasal ari patar, ai sarihonon ni ari patar do na porlu ijai. Ganup ari sungkup bei do hasunsahanni.

¹ Ulang hanima manguhum-uhumi, ase ulang hona uhum hanima, ² ai panguhumonnima do uhumhononkon bennima, anjaha parsuhatannima do suhathononkon bennima. ³ Mase ma patorih-torihonnima silbak-silbak na bani mata ni saninamu, hape na satiang na ibagas matamu seng iidah ho? ⁴ Sonaha ma boi hatahononmu bani saninamu: Dia, hupadarat ma lobei silbak-silbak na bani matamin, hape adong na satiang bani matamu? ⁵ Ee sipakulah-kulah! Parlobei ma padarat tiang na bani matamu, dob ai pe, ase uhurhon sonaha pangumpatmu bani silbak-silbak na bani mata ni saninamu. ⁶ Ulang ma bere hanima arta na mapansing bani baliang, anjaha ulang ma amburhon mutiaramu i lobei ni babuy, ase ulang idogei-dogei ai, dob ai marhusor ia laho mandorab ho. ⁷ Pindo hanima ma, sai na bereonNi do bannima, pindahi hanima ma, sai na jumpahan do hanima, hartuki hanima ma, sai na bukaonNi do bannima. ⁸ Ai sai na manjalo do na mangindo, jumpahan na mangindahi, anjaha ungkabon bani na mangkartuki. ⁹ Ai ise ma humbannima jolma, na mambere batu bani anakni, anggo ipangindo indahan, ¹⁰ atap anggo ipangindo dengke, gabe ibere bani ulog? ¹¹ Gari hanima parjahat mambotoh mambere na madear bani anaknima, samintolah Bapanima na i nagori atas ai ma lang mambotoh mambere arta na madear bani na mangindo hum-Bani? ¹² Sagala na pinindo ni uhurnima, sibahenon ni halak bannima, ai ma bahen hanima bani sidea, ai in do hata ni titah ampa nabi-nabi. ¹³ Masuki hanima ma horbangan na sompit in, ai tahar do horbangan anjaha bolag do dalan hu hamagouan, anjaha buei do halak na masuk hujai. ¹⁴ Tapi sompit do horbangan anjaha etek do dalan na dompak hagoluhan, anjaha otik do halak na jumpahan ai. ¹⁵ Jaga ma hanima dompak nabi parladung, ai roh do sidea bannima marrupahon biri-biri, tapi uhurni ibagas begu panoroh do. ¹⁶ Humbani buahni do tandaonnima sidea. Ai boi do buaton buah ni anggur humbani rimbang atap jambu humbani latong? ¹⁷ Ai marbuahkon na madear do sagala hayu na madear, tapi sambor do buah ni hayu na masambor. ¹⁸ Seng boi hayu na madear marbuahkon na masambor; sonai homa hayu na masambor seng tarbahen marbuahkon na madear. ¹⁹ Sirobohon do sagala hayu na so marbuah na madear, anjaha iambukkon hu bagas apuy. ²⁰ Ase humbani buahni do tandaonnima sidea. ²¹ Seng haganup halak na mangkatahon Bakku "Tuhan, Tuhan!" masuk hu harajaon nagori atas ai, pitah na mandalankon harosuh ni BapangKu na i nagori atas ai do. ²² Bani ari ai buei do halak na mangkatahon Bakku: Ham Tuhan, Tuhan, ai lang manjahai do hanami marhitei goranMu? Ai lang iusir hanami do setan-setan marhitei goranMu? Ai lang ibahen hanami do buei tanda halongangan marhitei goranMu? ²³ Jadi hatahononKu ma bani sidea: Seng ongga Hutandai hanima, misir ma hanima hun lambungKu, hanima sihorjahon na ulang. ²⁴ Ase na mambogei hatangKin anjaha ihorjahon, sipausihon ma in bani halak na maruhur, na pajongjong rumahni bani batu gingging. ²⁵ Roh pe udan manalosou, marbanggal bah, anjaha doras logou mandorab rumah ai, seng marumbak, ai batu gingging do onjolanni. ²⁶ Tapi na mambogei hatangKin, hape seng ihorjahon, usih ma ia bani halak na oto, na pajongjong rumahni bani horsik. ²⁷ Dob ai roh ma udan manalosou, marbanggal bah, anjaha logou pe doras mandorab rumah ai, gabe marumbak ma rumah ai anjaha mareong. ²⁸ Jadi dob siap ihatahon Jesus hata ai, longang tumang ma halak na mabuei ai mambogei podahni ai. ²⁹ Ai marhidorat do pangajarionNi bani sidea, sedo songon pamodahi ni sibotoh surat.

¹ Sanggah tuad Jesus hun dolog ai, buei do halak na mangirikkonsi. ² Jadi roh ma sada halak na gadamon marsombah hu-Bani, nini ma: Tuhan, anggo ra Ham, tarpasusi Ham do ahu! ³ Jadi isurdukkon Jesus ma tanganni, ijamah ma ia lanjar nini ma: Ra do Ahu, susi ma ham! Jadi mintor malum ma gadamni ai. ⁴ Dob ai ihatahon Jesus ma hubani: Jaga, ulang patugah ham age bani ise. Tapi laho ma, patidak ham ma dirimu bani malim, anjaha boan ham ma galangan, songon na niaturhon ni si Musa, gabe hasaksian bani sidea. ⁵ Dob masuk Jesus hu huta Kapernaum, roh ma hubaNi sahalak kopala ni tentera mangelek-elekSi, nini ma: ⁶ Tuhan, tibal-tibal do i rumahku juak-juakku, oyangon do ia, borit do iahap. ⁷ Nini Jesus ma mambalosisi: Roh pe Ahu pamalumhonsi. ⁸ Dob ai nini kopala ni tentera ai ma mambalosi: Tuhan, seng talup ahu, roh ma Ham masuk hu rumahku; sangkababah hata gelah hatahon Ham, jadi malum ma juak-juakkai. ⁹ Gari ahu, jolma na i toruh ni parentah, anjaha na mamarentah tentara homa, anggo huhatahon bani sada halak: "Laho", jadi laho ma ia; bani halak na legan "Roh", jadi roh do ia; sonai homa bani juak-juakku "Horjahon on", jadi ihorjahon do ai. ¹⁰ Manangar ai, longang ma Jesus, jadi nini ma bani halak na mangirikkonSi ai: Na sintong do hatangkon bani nasiam: Gari bani halak Israel seng jumpah Ahu haporsayaon na sonin. ¹¹ Tapi Huhatahon ma bani nasiam: Buei do halak na roh magira hun hapoltakan pakon hun hasundutan gabe hasoman sapanganan ni si Abraham, si Isak ampa si Jakob ibagas harajaon nagori atas ai. ¹² Tapi anggo anak ni harajaon in hinan, siusiron do in bani na golap marimpot-impot; ijai ma masa partangison ampa na patungos-ngoson. ¹³ Dob ai ihatahon Jesus ma hubani kopala ni tentera ai: Laho ma ham, jumpah ham ma domu hubani haporsayaonmu ai! Jadi malum ma juak-juak ai bani panorang ai. ¹⁴ Dob masuk Jesus hu rumah ni si Petrus, iidah ma tibal anturang ni si Petrus, pane-paneon. ¹⁵ Jadi ijamah ma tanganni, lanjar laho ma pane-pane ai humbani. Hundul ma ia, anjaha iidangi ma Ia. ¹⁶ Dob golap ari, roh ma halak mamboan hu-Bani buei halak na setanon. Iusir ma setan-setan ai marhitei hataNi, anjaha ipamalum ma sagala na boritan, ¹⁷ ase jumpah na hinatahon ni nabi Jesaya, na mangkatahon: Ia do mangusung hasombuhonta anjaha iporsan do naboritta. ¹⁸ Sanggah iidah Jesus roh halak na mabuei manginggotiSi, ihatahon ma hubani susianNi ai, ase laho sidea mandipar. ¹⁹ Jadi roh ma sahalak sibotoh surat hu Bani, nini ma: Guru, sihol do ihutkononku Ham, atap huja pe Ham laho! ²⁰ Nini Jesus ma dompaksi: Na marliang do sorigala, anjaha na marasar do manuk-manuk na i awang-awang, tapi anggo Anak ni Jolma in, seng dong Bani hatibalan ni uluNi. ²¹ Sada halak na legan humbani susianNi ai mangkatahon hu Bani: Ham Tuhan, lopas Ham lobei laho ahu mananom bapangku! ²² Tapi nini Jesus ma dompaksi: Ahu ma ihutkon! Paturut ma na matei in mananom na mateini! ²³ Dob ai masuk ma Jesus hu bagas parau, jadi iihutkon susianNi ma Ia. ²⁴ Jadi roh ma haba-haba na doras i tao ai, pala isangkobi gilumbang parau ai, tapi tarpodom do anggo Ia. ²⁵ Jadi roh ma sidea mamuhoiSi, nini sidea ma: Tuhan, urupi, harom ma hita! ²⁶ Ihatahon Jesus ma hubani sidea: Mase mabiar hanima? Otikni in haporsayaonnima! Jadi jongjong ma Ia, ihata ma logou pakon tao ai, gabe minop tumang ma. ²⁷ Longang bei do jolma ai, nini: Ise do halak on, ase logou ampa tao pe mambalosi parentahNi? ²⁸ Dob das Ia i dipar, i tanoh ni halak Gadara, roh ma hun tanoman dua halak na setanon manjumpahkonSi. Jangin tumang do sidea, pala seng tarbontas atap ise dalan ai. ²⁹ Tonggor ma, mardilo-dilo do sidea mangkatahon: Mangaha Ham roh bennami, Ham Anak ni Naibata? Roh do Ham hape manunsahi hanami bani na so panorangni ope! ³⁰ Seng pala daoh humbani sidea adong do sahulanan bolon babuy manggagati. ³¹ Jadi ipindo setan-setan ai ma hum-Bani: Anggo na maningon do usironMu hanami, suruh Ham ma hanami masuk hu bagas babuy na sahulanan ai. ³² Nini Jesus ma hubani sidea: Misir ma! Jadi luar ma sidea, imasuki ma babuy ai. Anjaha tonggor ma, mardabuhan ma babuy na sahulanan ai hun salansah ai hu bagas tao ai, gabe mogap ibagas bah ai. ³³ Jadi maporus ma siparmahan babuy ai, anjaha dob das sidea i huta, ibaritahon sidea ma haganup, sonai homa na masa bani na setanon ai. ³⁴ Anjaha tonggor ma, kaluar ma haganup parhuta ai manjumpahkon Jesus. Dob pajumpah, ipindohon sidea ma hu-Bani, ase misir Ia hun tanoh ni sidea.

¹ Dob ai masuk ma Ia hu parau, laho ma mandipar, gabe das ma Ia hu hutaNi. ² Jadi iboan halak ma hu Bani sada halak na oyangon, tibal bani podomanni. Jadi dob iidah Jesus haporsayaon ni sidea, nini ma dompak na oyangon ai: Tenger ma uhurmu ambia, domma sasap dousamu! ³ Anjaha tonggor ma, deba humbani sibotoh surat marpingkir ibagas uhurni: Na mangapasi Naibata do halak on! ⁴ Tapi ibotoh Jesus do pingkiran ni sidea ai, gabe nini ma: Mase ma jahat pingkiran nasiam ibagas? ⁵ Na ija do urahan hataonkon: "Domma sasap dousamu", atap mangkatahon: "Jongjong ma ho, mardalan ma ho?" ⁶ Tapi ase ibotoh nasiam, na markuasa do Anak ni jolma in manasap dousa i tanoh on, ihatahon ma bani na oyangon ai: Jongjong ma ho, boan ma podomanmu, mulak ma ho hu rumahmu! ⁷ Jadi jongjong ma ia, lanjar mulak hu rumahni. ⁸ Mangidah ai na mabuei ai, mabiar ma sidea anjaha ipuji ma Naibata, na mambere kuasa na sonai banggalni bani jolma. ⁹ Dob laho ia hunjai, iidah Jesus ma sada halak na margoran si Mateus, hundul i kantor sohei. Nini ma hubani: Irikkon ma Ahu! Jadi jongjong ma ia, lanjar iirikkon ma Jesus. ¹⁰ Jadi sanggah mangan Jesus i rumah ai, buei do sijalo sohei pakon pardousa rap mangan pakon Jesus ampa susianNi ai. ¹¹ Mangidah ai, nini Parisei ai ma hubani susianNi ai: Mase ma rap mangan Gurunima rap pakon sijalo sohei ampa pardousa? ¹² Ibogei Jesus ma ai, gabe nini ma: Seng porlu doktor bani halak na jorgit, bani na boritan do. ¹³ Laho ma nasiam, mangguruhon arti ni hata on: Idop ni uhur do harosuh ni uhurHu, sedo galangan. Ai roh pe Ahu, sedo mandilo parpintor, halak pardousa do. ¹⁴ Dob ai roh ma hu Bani susian ni si Johannes manungkun: Mase marpuasa hanami pakon halak Parisei, hape susianMu lang? ¹⁵ Jadi nini Jesus ma hubani sidea: Mintor tarbahen ma marhoru hasoman-hasoman ni siparunjuk sadokah rap ope siparunjuk ai pakon sidea? Tapi na roh ma arini, buaton ma siparunjuk ai humbani sidea, jadi ijai ma sidea marpuasa. ¹⁶ Seng dong halak mandungkaphon hiou na baru bani hiou na dob madotei, ai rigatkonon ni hiou na baru ai do hiou na dob madotei ai, gabe roh bangbangni ma na marigat ai. ¹⁷ Seng ipausei halak anggur na baru hu bagas gusi huling-kuling na buruk, mapultak holi gusi ai, gabe mambur anggur ai anjaha maseda iananni ai. Hu bagas gusi huling-kuling na baru do nahkonon anggur na baru, jadi simpan ma haduasi ai. ¹⁸ Sanggah marsahap Ia pasal ai hubani sidea, tonggor ma, roh ma sada halak kopala ni sinagoge (rumah parguruan), manrogop hu lobeiNi, lanjar nini ma: Tongkin on ope matei borungku; tapi roh ma Ham, anjaha tampeihon Ham ma tanganMu, ase manggoluh use ia. ¹⁹ Jadi jongjong ma Jesus, iirikkon ma ia, sonai homa susianNi ai. ²⁰ Jadi adong ma sada naboru, na dob sapuluh dua tahun sai roh pantang ni hiouni; idohori ma Ia hun pudiNi lanjar ijamah ma rambu ni hiouNi, ²¹ ai nini uhurni ibagas: HiouNi gelah hujamah, malum ma ahu. ²² Jadi marhusor ma Jesus, ikawahkon ma ia, lanjar nini ma: Tenger ma uhurmu inang, haporsayaonmu do na pagoluhkon ham! Mintor malum ma naboru ai hunjai nari. ²³ Ase dob das Jesus i rumah ni kopala ai, iidah ma gosou siparsulim ampa halak na mabuei, ²⁴ jadi nini ma: Misir ma nasiam! Sedo na matei dakdanak on, na modom do. Jadi itartawai sidea ma Ia. ²⁵ Ase dob ipalaho halak na mabuei ai, masuk ma Ia, ijolom ma tanganni, gabe jongjong ma dakdanak ai. ²⁶ Jadi sar ma barita ai hu sab nagori ai. ²⁷ Sanggah laho Jesus hunjai, adong ma dua halak na mapitung mangirikkonSi, dilo-dilo: Ham Anak ni si Daud! Idop ma uhurMu bennami! ²⁸ Dob das Ia i rumah, roh ma na mapitung ai hu Bani. Jadi nini Jesus ma hubani sidea: Porsaya do nasiam, paboa na margogoh do Ahu mangkorjahon in? Nini sidea ma hu Bani: Eak Tuhan, porsaya do! ²⁹ Jadi ijamah ma mata ni sidea, lanjar nini ma: Jumpah nasiam ma songon na hinaporsayaon nasiam ai! ³⁰ Jadi buha ma mata ni sidea. Gogoh ma ipandang Jesus sidea, nini ma: Jaga ma nasiam, ulang adong na mambotoh in! ³¹ Tapi ai pe sidea luar, isahap-sahapkon sidea ma pasalSi hu sab nagori ai. ³² Sanggah na laho luar ai sidea, adong ma halak na mamboan hu-Bani sada halak na longah, na siniaran ni setan. ³³ Dob iusir setan ai, marsahap ma na longah ai. Jadi longang ma halak na mabuei ai, nini sidea ma: Seng ongga ope masa na sonin i tanoh Israel. ³⁴ Tapi halak Parisei mangkatahon: Marhitei kopala ni setan do iusir setan-setan ai. ³⁵ Jadi isiar Jesus ma sagala huta ampa dusun; mangajari do Ia bani parguruan ni sidea, iambilankon do Ambilan Namadear pasal harajaon in, anjaha ipamalum do sagala naborit ampa na niarou ni sidea. ³⁶ Jadi mangidah halak na mabuei ai, idop ma uhurNi, ai loja anjaha mambur merap do sidea songon biri-biri na so marparmahan. ³⁷ Nini ma dompak susianNi ai: Bolag do sisabion, tapi otik do siparhorja. ³⁸ Ai pe, elek-elek hanima ma simada sisabion in, ase ipaingkat siparhorja bani sisabionni in!

¹ Jadi idilo ma susianNi na sapuluh dua ai hu lobeiNi, anjaha ibere ma bani sidea kuasa dompak tonduy na mabutak, laho mangusir ai, sonai pamalum sagala na borit ampa sagala na niarou ni sidea. ² Ia goran ni apostel na sapuluh dua ai, on ma: Na parlobei; si Simon, na ginoran homa si Petrus, ampa saninani si Andreas; dob ai si Jakobus ampa si Johannes saninani ai, ai ma anak ni si Sebedeus; ³ dob ai si Pilippus ampa si Bartolomeus; si Tomas pakon si Mateus, sijalo sohei ai; dob ai si Jakobus anak ni Alpeus ampa si Tadeus; ⁴ dob ai si Simon, halak Kana ai, pakon si Judas Iskariot, na mantahihonSi ai. ⁵ Na sapuluh dua ai ma isuruh Tuhan Jesus, ipodahi ma sidea: Ulang ma laho hanima hu tanoh ni halak parbegu, anjaha ulang ma masuki hanima huta-huta ni Samaria, ⁶ tapi pitah hubani biri-biri na magou humbani Israel ma lah hanima laho. ⁷ Laho ma hanima mangambilankon, paboa domma dohor harajaon nagori atas in. ⁸ Pamalum hanima ma naborit ni na boritan, pagoluh na matei, pamalum na gadamon, usir setan-setan! Silayak-layak do in bennima, ase layak-layakkon hanima ma! ⁹ Ulang pala pasirsir hanima bennima omas barang pirak barang duit ibagas gonditnima, ¹⁰ barang bohal i pardalanan barang hiou dua, sonai sipatu atap tungkot pe, ai patut do dapotan bohal siparhorja. ¹¹ Anggo masuk hanima hu bagas sada huta atap dusun pe, pindahi hanima ma ijai na talup tondokannima, anjaha ijai ma hanima ronsi misir use. ¹² Hatahon hanima ma tabinima, laho masuk hu rumah ai. ¹³ Jadi sogop ma dameinima bani rumah ai, anggo na talup do sidea manjalosi, tapi anggo lang, mulak ma bennima dameinima ai. ¹⁴ Anggo seng ijalo sidea hanima barang seng ra sidea manangihon hanima, tadingkon hanima ma rumah ampa huta ni sidea ai, anjaha pirpirhon hanima ma dompak sidea orbuk na longkot bani naheinima. ¹⁵ Na sintong do hatangkon bennima: Hampungan do sitaronon ni Sodom pakon Gomora bani ari paruhuman magira marimbang huta ai. ¹⁶ Husuruh do hanima songon biri-biri hu tongah-tongah ni begu, halani ai maruhur ma hanima songon ulog, anjaha bujur songon asas. ¹⁷ Jaga ma hanima dompak jolma, ai ondoskononni do hanima hu paruhuman, anjaha lonsingonni do hanima bani parguruan ni sidea. ¹⁸ Toguon ni sidea do hanima hu lobei ni pamarentah pakon raja halani Ahu, gabe hasaksian bani sidea age bani sipajuh begu-begu. ¹⁹ Tapi anggo iondoskon sidea hanima, ulang ma pala holsohkon hanima pasal sihatahononnima, ai bereonNi do bennima bani panorang ai hata sihatahononnima. ²⁰ Ase, sedo hanima na marsahap ijai, tapi Tonduy ni Bapanima do na marsahap ibagas hanima. ²¹ Ondoskonon ni sanina do saninani hu hamateian, sonai bapa dompak anakni. Manlawan do anak dompak orang tuani, laho mamunuhsi. ²² Domdoman ni haganup jolma do hanima halani goranKu, tapi na tahan das hu ujungni, ai do paluahonNi. ²³ Anggo iparburu hanima bani sada huta, laho ma hanima hu huta na legan, ai na sintong do Hatangkon bennima: Seng ope ganup isiari hanima huta ni Israel, roh ma Anak ni jolma in. ²⁴ Seng lobihan susian humbani guruni atap lobihan jabolon humbani tuanni. ²⁵ Dear ma sada susian anggo dos ia songon guruni, sonai jabolon dos pakon tuanni. Anggo igoran tuan rumah Beelsebul, samintolah parrumahni ai ma lang? ²⁶ Halani ai ulang ma mabiar hanima mangidah sidea, ai seng dong na rungkub, na so tarbuka use, anjaha seng dong na ponop, na so tarbotoh use. ²⁷ Na Hupatugah bannima bani na golap, hatahon hanima ma in bani na lihar, na Huhusipkon bani pinggolnima, baritahon hanima ma in hun atas tayub. ²⁸ Ulang ma pala mabiar hanima mangidah sibunuh daging, na so boi mamunuh tonduy; tapi na markuasa mangagou angkula pakon tonduy hu naraka, ai do sihabiarannima. ²⁹ Ai lang ijual halak do dua dingis sasen? Tapi seng madabuh ai age sada hu tanoh, anggo seng ibagas botoh ni Bapanima. ³⁰ Anggo bennima, gari haganup jambulan na bani ulunima in, domma ibilang. ³¹ Halani ai, ulang ma hanima mabiar, ai harganan ope hanima humbani buei dingis. ³² Ai sagala na manaksihon Ahu i lobei ni jolma, saksihononKu do ia i lobei ni BapangKu na i nagori atas ai, ³³ tapi sagala, na marnalang Ahu i lobei ni jolma, parnalangonKu do ia i lobei ni BapangKu na i nagori atas ai. ³⁴ Ulang ma nini uhurnima, na roh Ahu, laho mamboan damei hu tanoh on. Seng na roh Ahu mamboan damei, tapi podang do. ³⁵ Na roh do Ahu tongon, paingorhon anak dompak bapani, boru dompak inangni, parumaen dompak simatuani, ³⁶ anjaha hasomanni sarumah do gabe munsuh bani jolma in. ³⁷ Barang ise na mangkaholongi bapani barang inangni lobih hum Bakku, seng talup ai Bakku; anjaha barang ise na mangkaholongi anakni atap boruni lobih hum Bakku, seng talup ai Bakku. ³⁸ Anjaha barang ise na so mamorsan silangni anjaha iirikkon Ahu, seng talup ai Bakku. ³⁹ Na manghargahon hosahni, ai do na magouan hosah, tapi na magouan hosah halani Ahu, ai do na jumpahan. ⁴⁰ Na manjalo hanima, Ahu do jinaloni ai, anjaha na manjalo Ahu, na marsuruh Ahu do jinaloni ijai. ⁴¹ Na manjalo sada nabi, halani nabi ia, jaloonni do upah ni nabi, anjaha na manjalo sada halak parpintor, halani halak parpintor ia, jaloonni do upah ni halak parpintor. ⁴² Anjaha barang ise na mamberehon bah borgoh sasangkir gelah hubani sahalak na etek-etek on, halani susianKu ia, na sintong do Hatangkon bennima, seng anjai magou upahni.

¹ Ase dob siap ipodahi Tuhan Jesus susianNi na sapuluh dua ai, misir ma Ia hunjai, laho mangajari pakon marambilan i huta ni sidea. ² Jadi dob ibogei si Johannes ibagas tutupan pasal pambahenan ni Kristus, isuruh ma na manungkunsi marhitei susianNi: ³ Ham do na sihol roh ia, atap na legan ope sipaimaonnami? ⁴ Nini Jesus ma mambalosi sidea: Mulak ma, anjaha patugah nasiam ma bani si Johannes, aha na binogei ampa na niidah nasiam: ⁵ Gabe marpangidah do na mapitung, mardalan na repat, malum na gadamon, marpanangar na nengel, mulak manggoluh na matei, anjaha bani halak na masombuh iambilankon do ambilan na madear. ⁶ Martuah ma halak na so sangsi pasal Ahu. ⁷ Dob mulak sidea, ipungkah Jesus ma mansahapkon pasal si Johannes hubani halak na mabuei ai: Aha do na sihol idahon nasiam, ase laho nasiam hu halimisan? Arung-arung na meol-eol do ibahen pangombus ni logou? ⁸ Aha do na sihol idahon nasiam? Sada halak parhiou na lampot do? Tonggor ma, i rumah ni raja do parhiou na lampot. ⁹ Aha do na sihol idahon nasiam? Sihol mangidah nabi? Tongon do na Huhatahon on bani nasiam, lobih do Ia humbani sada nabi. ¹⁰ Pasalsi do na tarsurat on: Tonggor ma, suruhonKu do suruhanKu i lobeiMu, ase ipasirsir dalan i lobeiMu. ¹¹ Sintong do na Huhatahon on bennima: Humbani jolma, na tubuh humbani naboru, seng dong na bangkit banggalan marimbang si Johannes Pandidi; tapi halak sietekan pe ibagas harajaon nagori atas, banggalan do ai humbani. ¹² Humbani panorang ni si Johannes nari sigogohan do harajaon nagori atas ai, anjaha halak na manggogohi do na dapotan ai. ¹³ Ai singgan si Johannes do panjahaion ni sagala nabi ampa titah; ¹⁴ anjaha anggo ijalo nasiam do in, ia do si Elias na sihol roh in. ¹⁵ Barang ise siparpinggol, itangar ma in! ¹⁶ Tapi hubani ise ma pausihonKu bangsa on? Usih do sidea hubani dakdanak na hundul i tiga, mardilo-dilo bani hasomanni: ¹⁷ Isompul hanami do sulim bennima tapi seng ra hanima manortor, ipabogeihon hanami do tangis-tangis, tapi seng ra hanima tangis. ¹⁸ Ai roh do si Johannes, seng parmangan, seng parminum, hape ihatahon sidea: Na setanon do ia. ¹⁹ Na roh do Anak ni jolma in, na ra mangan anjaha na ra minum, hape ihatahon sidea: Tonggor ma, halak sipapangan magou ampa sisobur anggur, huan-huan ni sijalo sohei ampa pardousa! Tapi gabe pintor do Hapentaran in marhitei pambahenanNi. ²⁰ Dob ai ipapai Jesus ma huta, iananNi sibueinan mangkorjahon hagogohonNi ai, halani seng mubah uhur ni sidea, nini ma: ²¹ Bursik ma ho Korasin! Bursik ma ho Betsaida! Ai ambit i huta Tirus pakon Sidon ipamasa hagogohon songon na masa bannima, seng tarbahen lang mubah do uhur ni sidea, marhiou guni anjaha hundul bani abuan. ²² Tapi Huhatahon ma bennima: Hampungan do sitaronon ni Tirus ampa Sidon marimbang sitarononnima bani ari paruhuman ai. ²³ Anjaha ho, ale Kapernaum, ai sipagijangon do ho ronsi langit? Sidabuhkononkon do ho ronsi apuy naraka. Ai ambit i huta Sodom ipamasa hagogohon songon na masa ibagas ho, seng tarbahen lang totap ope huta ai ronsi sadari on. ²⁴ Tapi Huhatahon ma bennima: Hampungan do sitaronon ni huta Sodom bani ari uhum ai marimbang sitarononnima! ²⁵ Bani panorang ai ma ihatahon Tuhan Jesus: Hupuji Ham Bapa, Tuhan sigomgom langit ampa tanoh on, halani iponopkon Ham do in humbani halak na maruhur ampa na pentar, tapi ipatalar Ham do in bani dakdanak. ²⁶ Eak, Bapa, ai sonin do rosuh ni uhurmu. ²⁷ Haganupan in, domma iondoskon Bapa Bakku; seng dong, na mananda Anak in, sobali Bapa in, anjaha Bapa in pe, seng dong na manandaSi, sobali Anak in, ampa na pinodahan ni Anak in, domu hubani rosuh ni uhurNi. ²⁸ Roh ma nasiam hu Bakku, nasiam na loja anjaha na boratan, ase Hupasonang nasiam. ²⁹ Jalo nasiam ma pasanganKu anjaha marguru ma nasiam hum Bakku, ai na lamlam do Ahu anjaha na toruh maruhur, ase dapotan hasonangan tonduy nasiam. ³⁰ Ai lamlam do pasanganKu, anjaha hampung do na Hupaporsankon.

¹ Bani panorang ai mardalan ma Jesus mamontas juma-juma na marisi gandum. Halani loheian iputiki susian ai ma gandum ai lanjar iguguti. ² Mangidah ai halak Parisei, nini sidea ma dompak Jesus: Tonggor ma susianMu in! Ihorjahon susianMu do na so bulih horjaonkon bani ari Sabat. ³ Jadi nini ma dompak sidea: Seng ongga gakni ibasa nasiam na binahen ni si Daud, sanggah loheian ia rap pakon hasomanni saodoran? ⁴ Imasuki do rumah ni Naibata, gabe ipangan sidea do ruti galangan na so bulih panganonni barang panganon ni hasomanni pe, pitah malim do hansa. ⁵ Barang na so ibasa nasiam do ibagas buku titah in, na so salah hape malim-malim sanggah ari Sabat i rumah panumbahan ai, age ilaosi titah ari Sabat in? ⁶ Tapi Huhatahon ma bani nasiam: Lobihan humbani rumah panumbahan do on! ⁷ Ambit iarusi nasiam, aha arti ni hata on: "Idop ni uhur do Huharosuhkon, sedo galangan," tontu seng uhumon nasiam sidea, na so marsalah in. ⁸ Ai Anak ni jolma in do Tuan ni ari Sabat. ⁹ Jadi dob misir Ia hunjai, imasuki ma rumah parguruan ni sidea. ¹⁰ Adong do ijai sada halak, matei tanganni salopah. Jadi isungkun sidea ma Ia: Ai bulih do pamalumhon naborit ari Sabat? ¹¹ Tapi nini ma dompak sidea: Ise humbani nasiam, na marnah biri-biri sada, na so mandorab anjaha manarik ai hu atas, anggo madabuh ai hu bagas godung sanggah ari Sabat? ¹² Ai lang daoh do harganan jolma marimbang biri-biri? Ase, bulih do mangkorjahon na madear bani ari Sabat. ¹³ Dob ai nini ma dompak halak ai: Papintor ma tanganmin! Jadi ipapintor ma, gabe suang ma malum songon tanganni na sada nari. ¹⁴ Jadi luar ma Parisei ai, manriah ma sidea, atap sonaha do bahenon ni sidea, laho mamunuhSi. ¹⁵ Dob ibotoh Jesus riah ni sidea ai, surut ma Ia hunjai. Buei do halak na mangirikkonSi, gabe ipamalum ma naborit ni sidea haganup. ¹⁶ Tapi ipandang do sidea, ase ulang ipatugah-tugah pasalSi, ¹⁷ ase jumpah na hinatahon marhitei nabi Jesaya, na mangkatahon: ¹⁸ Tonggor ma, juak-juakKu na Hupilih in, haholonganKu anjaha harosuh ni uhurHu do Ia. NahkononKu do Tonduy Bani, anjaha ambilankononNi do habonaron hubani bangsa parbegu. ¹⁹ Seng ra Ia maringor, seng ra Ia marsurak-surak anjaha seng marosuh Ia tarbogei hataNi bani dalan-dalan. ²⁰ Seng ponggolhononni arung-arung na dob marosak, anjaha seng intopkononNi sumbu na dob mirlop-irlop, paima monang bahenonNi uhum. ²¹ Anjaha bani goranNi do marpangarapan bangsa-bangsa. ²² Dob ai iboan ma hu Bani sada halak na setanon, na pitung anjaha na longah, jadi ipamalum ma ia, gabe marsahap anjaha marpangidah ma na longah ai. ²³ Jadi longang ma halak na mabuei ai haganup, nini sidea ma: Atap on ma Anak ni si Daud ia? ²⁴ Mambogei ai halak Parisei, nini sidea ma: Marhitei si Beelsebul, kopala ni setan-setan do ipangunsagahkon mangusir setan-setan. ²⁵ Halani ibotoh Jesus do pingkiran ni sidea, jadi nini ma dompak sidea: Ganup harajaon na marsalisih samah dirini, maseda do, anjaha ganup huta, atap rumah tangga na marsalisih samah dirini, seng totap ai. ²⁶ Ai anggo iusir setan hasomanni setan, na pabolah ma ia ai samah dirini. Sonaha ma boi totap harajaonni? ²⁷ Anjaha, anggo huusir setan marhitei Beelsebul, marhitei kuasa ni ise ma anak nasiam mangusirsi? Ai pe, sidea do na gabe panguhum bani nasiam. ²⁸ Tapi, anggo marhitei Tonduy ni Naibata do Huusir setan-setan, jadi, na dob sogop ma harajaon ni Naibata bani nasiam. ²⁹ Ai sonaha ma bulih masukan ni sada halak rumah ni sada halak na gogoh anjaha irampas ugas-ugasni, anggo seng palobei isangkut halak na gogoh ai? Dob ai pe, ase tarbuatsi ugas-ugasni. ³⁰ Na so mangkasomani Ahu, imbangKu do in, anjaha na so mangkasomani Ahu patumpuhon, na mangerap do in. ³¹ Halani ai Huhatahon ma bani nasiam: Ganup dousa ampa panrisaion ni jolma sasapon do, tapi panrisaion dompak Tonduy in seng sasapon ai. ³² Anjaha barang ise na mangkatahon hatani manlawan Anak ni Jolma in, sasapon do ai, tapi barang ise na manluarhon hatani manlawan Tonduy Napansing, seng sasapon ai, age bani dunia sonari,barang magira. ³³ Anggo dear sada hayu, dear ma buahni; anggo sambor sada hayu, sambor ma buahni; ai humbani buahni do tandaon hayu ai. ³⁴ Nasiam ginompar ni ulog darih! Sonaha ma tarbahen nasiam mansahapkon na madear, ai na jahat do nasiam? Ai in na manggoki uhur, ai do iluarhon pamangan. ³⁵ Halak na madear padaratkon hadearon humbani artani na madear ai, anjaha halak na masambor padaratkon na masambor humbani artani na masambor ai. ³⁶ Tapi huhatahon ma bennima, maningon marbalos do jolma magira bani ari uhum ai pasal sagala hata na so margagan, na hinatahonni. ³⁷ Ai marhitei hatamu do ho pintoranNi, anjaha marhitei hatamu do ho uhumonNi. ³⁸ Jadi marbalos ma Bani piga-piga halak sibotoh surat pakon Parisei, nini sidea ma: Guru, sihol idahonnami do sada tanda humbaMu. ³⁹ Tapi nini ma mambalosi sidea: Bangsa parjahat ampa parbangkis mangindo sada tanda, tapi seng sibereon ai bani, sobali tanda na bani si Jonas, nabi ai. ⁴⁰ Ai songon si Jonas tolu ari tolu borngin ibagas bituha ni dengke na banggal ai, sonai ma use Anak ni Jolma in tolu ari tolu borngin ibagas tanoh. ⁴¹ Na jongjong do magira halak Ninipe bani paruhuman ai rap pakon bangsa on, anjaha uhumon ni sidea do ia, ai ipaubah sidea do uhurni mambogei ambilan ni si Jonas. Tonggor ma, lobihan do na ijon on marimbang si Jonas! ⁴² Na jongjong do magira bani paruhuman ai raja naboru, na hun dangsina rap pakon bangsa on, anjaha uhumonni do ia, ai roh do ia hun ujung ni tanoh on laho mambogei hapentaron ni si Salomo. Tonggor ma, lobihan do na ijon on marimbang si Salomo! ⁴³ Anggo luar ma tonduy na butak ai humbani jolma, mawat-awat ma ia bani ianan dorging-dorging, laho mangindahi parsaranan, tapi lang jumpahsi. ⁴⁴ Jadi nini ma: Mulak ma lah ahu hubani ianan, na dob hutadingkon ondi. Dob das ia hujai, jumpahsi ma ianan ai lumei, hona sapu anjaha ipajagar. ⁴⁵ Dob ai misir ma ia, laho mangarahkon pitu tonduy na legan, na jahatan humbani, imasuki sidea ma ia, lanjar marianan ijai. Jadi dobni jahatan ma parlahou ni jolma ai marimbang mulani ondi. Sonai ma masa bani bangsa na jahat on. ⁴⁶ Jadi sanggah marsahapi ope Ia pakon halak na mabuei ai, jongjong do i darat inangNi pakon saninaNi, sihol marsahap pakonSi. ⁴⁷ Jadi adong ma na patugahkon Bani: Tonggor ma, jongjong do i darat inangmu pakon saninamu, sihol marsahap pakon Ham. ⁴⁸ Tapi nini ma dompak na patugahkon ai: Ise do inangKu ampa saninangKu? ⁴⁹ Jadi ipaherbang ma tanganni dompak susianNi ai, lanjar marsahap: Tonggor ma, on do inangKu ampa saninangKu. ⁵⁰ Ai na mangkorjahon harosuh ni BapangKu na i nagori atas ai, ai do anggingKu, ai do botouHu, ai do inangKu.

¹ Bani ari ai itadingkon Jesus ma rumah ai, lanjar hundul ma Ia i topi ni tao ai. ² Jadi martumpu ma buei halak hu lobeiNi, gabe inaiki Jesus ma sada parau laho hundul ijai, anjaha ganup halak na mabuei ai jongjong do i pasir ai. ³ Anjaha buei do ihatahon bani sidea marhitei limbaga, nini ma: Tonggor ma, laho do sada panabur manabur bonih. ⁴ Jadi sanggah na manabur ai ia, adong ma deba na madabuh hu dalan, dob ai roh ma manuk-manuk mamaguti. ⁵ Deba bonih ai madabuh do bani tanoh na batuon, bani na so sadiha hapal tanohni, jadi mintor tubuh ma, halani na so bagas ai tanohni. ⁶ Tapi sanggah na lambin gijang mataniari melus ma lanjar matei, halani na so marurat ai. ⁷ Anggo na deba, hu parhupi-hupian do madabuh, lanjar tubuh do hupi-hupi ai, gabe ipisat ma bonih ai. ⁸ Tapi na deba madabuh do bani tanoh na madear, gabe saud ma marbuah, saratus lompit do na deba, onom puluh lompit na deba, anjaha na deba nari tolu puluh lompit. ⁹ Barang ise na marpinggol, itangar ma ai! ¹⁰ Jadi roh ma susianNi ai manungkunSi: Mase ma marlimbaga Ham marsahap bani sidea? ¹¹ Ibalosi ma sidea, nini ma: Hu bennima ibere do habotohon pasal rusia ni harajaon nagori atas ai, tapi bani sidea lang ibere. ¹² Ai barang ise na marnadong, bereon do bani, ase marlobih-lobih ia. Tapi barang ise na so marnadong, na adong bani ai hinan pe buaton do humbani. ¹³ Ai do halani ase marlimbaga Ahu marsahap bani sidea, halani marmata pe sidea seng marpangidah, anjaha marpinggol pe sidea seng marpambogei anjaha seng iarusi. ¹⁴ Ase jumpah ma bani sidea panjahaion ni nabi Jesaya, na mangkatahon: Bogeion ni pinggol nasiam do in namin, tapi seng arusan nasiam, idahon ni mata nasiam do in namin, tapi seng tandaon nasiam. ¹⁵ Ai na dob hengkeng do uhur ni bangsa on, pinggolni hurang marpanangar anjaha ipapitpit matani, ase ulang marpangidah matani, ulang marpambogei pinggolni, ulang marpangarusion uhurni, ase ulang mulak anjaha malum sidea bahenonKu. ¹⁶ Tapi martuah do matanima halani marpangidah, ampa pinggolnima halani marpambogei. ¹⁷ Tapi sintong do na Huhatahon on bennima: Buei do nabi pakon halak parpintor na sihol mangidah na dob niidahnima, tapi seng iidah, anjaha na sihol mambogei na dob binogeinima, tapi seng ibogei. ¹⁸ Ai pe, tangar hanima ma limbaga pasal panabur ai! ¹⁹ Anggo adong na manangar hata pasal harajaon ai, tapi seng iarusi, jadi roh ma parjahat ai manrampas na dob sinaburhon ai hu bagas uhurni, ai ma na sinaburhon bani dalan ai. ²⁰ Tapi na sinaburhon bani tanoh na batuon ai, ai ma na mambogei hata ai, anjaha mintor malas do uhurni manjalosi, ²¹ tapi seng marurat ibagas dirini, parsatongkinan do hansa ai. Anggo sogop hasunsahan atap pangarsik-arsikon halani hata ai, mintor sangsi do uhurni. ²² Ia na sinaburhon bani parhupi-hupian ai, ai ma na mambogei hata ai, tapi tarpisat do hata ai anjaha seng saud marbuah, halani pangkolsohkon ni uhurni bani na i dunia on ampa halani habayakon sipanipu in. ²³ Ia na sinaburhon bani tanoh na lambutan ai, ai ma na mambogei hata ai anjaha iarusi gabe saud marbuah, adong na saratus, adong na onom puluh, adong na tolu puluh lompit. ²⁴ Dob ai ihatahon ma use limbaga na legan bani sidea, nini ma: Usih do harajaon nagori atas ai bani sada halak na manaburhon bonih na madear hu jumani. ²⁵ Tapi sanggah na modom halak ai, roh ma munsuhni manaburhon simaromei-omei hu holang-holang ni omei ai, lanjar laho hunjai. ²⁶ Tapi domma marbuhu tanoh anjaha sihol boltok omei ai, tanda ma simaromei-omei ai. ²⁷ Jadi roh ma siparhorja ai bani tuanni, nini sidea ma: Tuannami, ai lang bonih na madear do isaburhon ham hu jumamu? Hunja do simaromei-omei ai? ²⁸ Tapi nini ma dompak sidea: Munsuh do na mambahen ai. Nini parhorja ai ma hubani: Dear do nini uhurmu laho hanami patumpuhon ai? ²⁹ Jadi nini ma: Lang, tarihut holi omei ai iorbat hanima, sanggah na patumpu simaromei-omei ai hanima. ³⁰ Paturut hanima ma ai rap tubuh paima jumpah sabion. Bani panorang sabion ai Huhatahon pe bani sipanabi: Patumpu nasiam ma lobei simaromei-omei in, sangkuti nasiam sasamborkos ase itutung; tapi anggo omei in, patumpu nasiam ma Hu bagas sopouHu. ³¹ Dob ai ihatahon ma use limbaga na legan bani sidea, nini ma: Usih do harajaon nagori atas ai bani batu ni loharum, na binuat ni sada halak laho manaburhonsi hu jumani. ³² Ai do sada silumatan humbani masam ni bonih, tapi dob tubuh, gabe banggalan do ai humbani sagala lowoh simaratah, pala do songon hayu, anjaha marrohan do manuk-manuk na i awang-awang marasar bani rantingni. ³³ Dob ai ihatahon ma use limbaga na legan bani sidea: Usih do harajaon nagori atas ai bani ragi, na binuat ni sada parinangon, laho mangaguhon ai bani tolu tumba nitak paima migar haganup. ³⁴ Haganupan ai ihatahon Jesus marhitei limbaga bani halak na mabuei ai; seng marsahap Ia bani sidea anggo seng marhitei limbaga, ³⁵ ase jumpah na hinatahon ni nabi ai, na mangkatahon: UngkabonKu do pamanganKu mangkatahon limbaga, sahaphononKu do na ponop humbani tombei ni dunia on. ³⁶ Dob ipalaho halak na mabuei ai, misir ma Ia hu rumah. Jadi roh ma hu Bani susianNi ai mangkatahon: Patorang Ham ma bennami limbaga pasal simaromei-omei na i juma ai! ³⁷ Jadi nini ma mambalosi: Ia na manaburhon bonih na madear ai, ai ma Anak ni Jolma in. ³⁸ Dunia on do juma ai; ia bonih na madear ai, ai ma anak ni harajaon ai, tapi anggo simaromei-omei ai, ai ma anak ni parjahat. ³⁹ Munsuh na manaburhon ai, ai ma sibolis; pariama ai, ai ma ajal ni dunia on, anjaha malekat ni Naibata do sipanabi ai. ⁴⁰ Ase songon na pinatumpuni ai simaromei-omei ai anjaha itutung, sonai do masa bani ajal ni dunia on. ⁴¹ Ai suruhon ni Anak ni Jolma in do malekatNi, jadi patumpuon ni sidea ma humbani harajaon ai sagala sibahen parsangsian pakon sihorjahon na ulang, ⁴² gabe idabuh ma sidea hu bagas liang pamurunan; ijai ma masa partangison ampa na patungosngoson. ⁴³ Tapi anggo halak parpintor marsinalsal do songon mataniari ibagas harajaon ni Bapa ni sidea. Barang ise na marpinggol, itangihon ma! ⁴⁴ Usih do harajaon nagori atas ai bani arta na ponop ibagas sada juma, na jumpah sada halak gabe iponopkon. Dob ai laho ma ia ibagas malas ni uhurni manjuali na dong bani, jadi iboli ma juma ai. ⁴⁵ Usih do use harajaon nagori atas ai bani sada halak partiga-tiga, na mangindahi mutiara na maharga. ⁴⁶ Jadi dob jumpahsi sada mutiara na maharga tumang, laho ma ia manjual haganup na dong bani, lanjar iboli ma ai. ⁴⁷ Usih do homa harajaon nagori atas ai bani jala na sinampakkon hu bagas laut, gabe ipatumpu bagei-bagei ni dengke. ⁴⁸ Dob gok, itarik ma ai hu darat. Dob ai hundul ma sidea mamilihi, na madear inahkon hu bagas raga, tapi na so madear iambukkon do. ⁴⁹ Sonai do masa bani ajal ni dunia on. Laho do malekat-malekat manirang halak parjahat humbani halak parpintor, ⁵⁰ lanjar idabuh ma sidea hu bagas liang pamurunan; ijai ma masa partangison ampa na patungosngoson. ⁵¹ Domma iarusi hanima haganupan ai? Nini sidea ma hu-Bani: Domma. ⁵² Jadi nini ma dompak sidea: Halani ai, ganup sibotoh surat, na dob niajaran pasal harajaon nagori atas ai, usih ma ai bani sada tuan rumah, na boi padarathon humbani artani na baru ampa madokah. ⁵³ Jadi dob ipaujung Jesus pasal limbaga ai, laho ma Ia hunjai. ⁵⁴ Jadi das ma Ia hu huta hagodanganNi, anjaha iajari ma sidea ibagas rumah parguruan ni sidea. Longang do sidea, nini ma: Hunja do dapot halak on hapentaran pakon hagogohon na sonin? ⁵⁵ Ai lang Ia do anak tukang kayu in? Ai lang si Maria do goran ni inangNi, anjaha anggiNi ai ma si Jakobus, si Josep, si Simon ampa si Judas? ⁵⁶ Anjaha botouNi, ai lang haganup do i tongah-tongahta? Hunja do dapotSi haganupan in? ⁵⁷ Ase sangsi do sidea pasalSi. Tapi nini Jesus ma dompak sidea: Seng dong nabi na so ihormati, sobali i huta hagodanganni ampa i rumahni. ⁵⁸ Anjaha seng buei tarhorjahonSi ijai horja hagogohon, halani na so porsaya ai sidea.

¹ Bani panorang ai tarbogei ma barita pasal Jesus bani raja Herodes, ² gabe nini ma hubani juak-juakni: Si Johannes pandidi do ai; domma puho ia humbani na matei, ai do ase tarhorjahonsi horja na marhagogohon ai. ³ Ai na dob itangkap si Herodes do si Johannes, isangkut, dob ai ipatutupkon halani si Herodias, parinangon ni anggini, si Pilippus. ⁴ Ai ihatahon si Johannes do hubani: Seng patut bamu ia! ⁵ Sihol do namin bunuhon ni si Herodes ia, tapi mabiar do ia bani halak na mabuei ai, ai nabi do ia, nini uhur ni sidea. ⁶ Tapi bani ari partubuh ni si Herodes, manortor do boruni si Herodias ai i lobei ni tamuei-tamuei, jadi marosuh ma uhur ni si Herodes mangidahsi, ⁷ pala ibagahkon marhitei bija, mamberehon bani atap aha pe sipindoonni. ⁸ Jadi nini ma, dob iajari inangni: Bere ham ma bakku ijon i atas ni pinggan ulu ni si Johannes Pandidi! ⁹ Pusok do namin uhur ni raja ai, tapi halani bijani ampa halani tamueini ai, gabe ihatahon ma na mamberehon ai bani. ¹⁰ Isuruh ma na mamonggol ulu ni si Johannes ibagas tutupan ai. ¹¹ Iboan ma uluni ai bani sada pinggan hubani anak boru ai, gabe ibere ma ai bani inangni. ¹² Dob ai roh ma susian ni si Johannes mangalop bangkeini ai, lanjar itanom, anjaha iparayak sidea ma Jesus laho patugahkon ai. ¹³ Dob ibogei Jesus ai, misir ma Ia hunjai marparau hubani sada ianan na lungun, sahalakSi. Anjaha dob ibogei halak na mabuei ai pasal ai, iirikkon sidea ma Ia mardalan nahei, manlopusi huta-huta ai. ¹⁴ Dob mandarat Jesus, iidah ma halak na mabuei ai, gabe idop ma uhurNi mangidah sidea, anjaha ipamalum ma na boritan, na adong i tongah-tongah ni sidea. ¹⁵ Jadi dob bod ari, roh ma susianNi ai hu lobeiNi mangkatahon: Halimisan do ijon anjaha bod ma ari. Palaho Ham ma halak na mabuei in, ase laho sidea hu huta-huta ai mamboli sipanganon! ¹⁶ Tapi nini Jesus ma bani sidea: Seng pala laho sidea, bere hanima ma sidea mangan! ¹⁷ Dob ai nini sidea ma hu-Bani: Pitah lima ruti ampa dua dengke do adong bannami ijon. ¹⁸ Tapi nini ma: Boan hanima ma ai Bakku hujon! ¹⁹ Jadi isuruh ma halak na mabuei ai hundul bani poyon-poyon ai. Dob ibuat ruti na lima ai ampa dengke na dua ai, mangkawah ma Ia dompak datas, laho mangkatahon tonggo tarima kasih; ipartopik ma ruti ai, ibere ma bani susianNi ai, ase sidea mamberei halak na mabuei ai. ²⁰ Jadi mangan ma haganup anjaha bosur bei, dob ai ipatumpu ma teba-teba ai, gok sapuluh dua bantei. ²¹ Ia buei ni na mangan ai adong do hira-hira lima ribu halak dalahi, naboru pakon dakdanak seng ibilang. ²² Jadi ijuljul Jesus ma susianNi ai masuk hu parau laho manlobeiSi hu dipar, anjaha na mabuei ai pe isuruh ma mulak. ²³ Dob isuruh mulak haganup na mabuei ai, tangkog ma sahalakSi hu dolog laho martonggo. Dob golap ari, sahalakSi mando ijai. ²⁴ Ia parau ai, domma tar daoh hun topi pasir, anjaha tarsosak do sidea ibahen gilumbang ai; hun lobei do roh logou ai bani sidea. ²⁵ Jadi marayak tahuak dayok na parlobei, roh ma Jesus, manjumpahkon sidea mardalan i atas tao ai. ²⁶ Jadi dob iidah susian ai Ia mardalan i atas tao ai, bajoraon ma sidea anjaha nini ma: Begu-begu do in! Doruh-doruh ma sidea halani biarni. ²⁷ Tapi mintor iparsahapkon Jesus ma sidea, nini ma: Tenger ma uhurnima, Ahu do on! Ulang mabiar! ²⁸ Jadi nini si Petrus ma mambalosi: Tuhan, anggo Ham do in, hatahon Ham ma ahu roh Bamu, mardalan i atas bah on! ²⁹ Nini ma: Roh ma! Jadi tuad ma si Petrus hun parau ai, mardalan i atas bah ai, laho manjumpahkon Jesus. ³⁰ Tapi mangidah logou na doras ai, gabe mabiar ma ia, anjaha sanggah mulai ia mogap, mardilo ma ia: Tuhan, paluah ahu! ³¹ Jadi mintor isurdukkon Jesus ma tanganNi laho manangkapsi, lanjar nini ma: Ale siotik haporsayaon, mase bungbang uhurmu? ³² Anjaha dob naik sidea hu parau ai, minop ma logou ai. ³³ Jadi marsombah ma Bani halak na ibagas parau ai, nini ma: Tongon do Ham Anak ni Naibata! ³⁴ Dob das sidea i dipar mandarat ma sidea i Genesaret. ³⁵ Jadi dob itandai halak na ijai ai Ia, ipatugah sidea ma hu sab nagori ai, gabe ipamboan halak ma hu-Bani sagala na boritan. ³⁶ Ipindo sidea do Bani, ase ilopas jamahon ni sidea age rambu ni hiouNi gelah, jadi sagala na manjamahSi malum do.

¹ Jadi roh ma Parisei pakon sibotoh surat hun Jerusalem marayak Jesus, nini sidea ma: ² Mase ma ilanggar susianMu adat na humbani ompung na lobei? Seng iburihi sidea tanganni laho mangan. ³ Jadi nini Jesus ma mambalosi sidea: Mase ma ilanggar nasiam titah ni Naibata, halani mardingat adat nasiam ai? ⁴ Naibata do mangkatahon: "Pasangap bapamu pakon inangmu!" ambahni ai: "Na mamurai bapani atap inangni, maningon do sipamateion!" ⁵ Tapi nasiam mamodahkon: Barang ise na mangkatahon bani bapani atap inangni: "na sahira pamberengku bamu, dearan ma nagalangkon ai!" ⁶ Halak ai, seng pala be pasangaponni bapani atap inangni. Isedai nasiam do titah ni Naibata halani adat nasiam. ⁷ E nasiam sipakulah-kulah! Sintong do panjahaion ni si Jesaya pasal nasiam, na mangkatahon: ⁸ Ipasangap pamangan ni bangsa on do Ahu, tapi anggo uhur ni sidea daoh do hum Bakku. ⁹ Tapi soya do parpasangap ni sidea Bakku, ai podah ni jolma do ipodahkon sidea. ¹⁰ Jadi idilo ma halak na mabuei ai, nini ma hubani sidea: Bogei anjaha parimbagaskon nasiam ma! ¹¹ Seng gabe butak jolma halani na masuk humbani pamanganni, tapi na luar humbani pamanganni ai do pabutakkonsi. ¹² Dob ai iparayak susianNi ai ma Ia, nini ma: Domma ibotoh Ham, na dob marah do Parisei ai mambogei hata ai? ¹³ Tapi nini ma mambalosi: Siorbaton do sagala suan-suanan, na so sinuan ni BapangKu na i nagori atas ai. ¹⁴ Paturut hanima ma sidea; pambobai na mapitung do sidea manogu na mapitung. Tapi anggo na mapitung manogu na mapitung, tarrobung ma sidea haduasi. ¹⁵ Nini si Petrus ma mambalosiSi: Patorang Ham bennami limbaga ai! ¹⁶ Jadi nini Jesus ma: Ai seng iarusi hanima ope homa? ¹⁷ Ai seng ibotoh hanima, sagala na masuk hu bagas pamangan, laho hu bagas boltok, dob ai mandarat bani ianan na suhi? ¹⁸ Tapi na luar hun pamangan humbagas uhur do ai roh, anjaha ai do na pabutakkon jolma. ¹⁹ Ai humbagas uhur do tubuh pingkiran na jahat, pamunuhon, parbangkison, parriah-riahon, panangkoon, hata ladung ampa panreheion. ²⁰ Sisonai do na pabutakkon jolma, tapi mangan seng marburih, seng butak jolma halani ai. ²¹ Dob ai misir ma Jesus hunjai, laho hu nagori Tirus pakon Sidon. ²² Jadi roh ma sada boru Kanaan hun nagori ai mardilo-dilo: Idop ma uhurMu bakku, Tuhan, Anak ni si Daud! Parah do iahap borungku, iarsik-arsik setan. ²³ Tapi seng ibalosi, sangkababah hata pe lang. Jadi roh ma susianNi ai hu-Bani, nini ma: Palao Ham ma ia, ai sai iirikkon do hita anjaha dilo-dilo. ²⁴ Tapi nini ma mambalosi: Pitah hubani biri-biri na magou humbani ginompar ni halak Israel do Ahu isuruh. ²⁵ Jadi idohori naboru ai ma Ia, isombah ma Ia lanjar ihatahon: Tuhan, urupi Ham ahu! ²⁶ Tapi nini ma mambalosi: Seng patut nabuat ruti humbani dakdanak, laho mamberehon ai bani baliang. ²⁷ Balos ni puang-puang ai: Tongon, Tuhan, tapi ipangan baliang do rimah-rimah na matektek humbani meja ni tuanni. ²⁸ Nini Jesus ma mambalosisi: Inang, banggal do haporsayaonmu, saud ma songon na pinindomu ai! Jadi jorgit ma boruni ai humbani panorang ai nari. ²⁹ Dob misir hunjai, das ma Jesus hu tao Galilea, jadi tangkog ma Ia bani sada dolog, lanjar hundul ijai. ³⁰ Jadi roh ma buei tumang halak hu Bani mamboan halak na repat, na tempang, na mapitung, na longah ampa buei na legan ope, anjaha iparpatibal ma sidea i lobei ni nahei ni Jesus, gabe ipamalum ma sidea haganup. ³¹ Jadi longang ma halak na mabuei ai, halani iidah, marsahap do na longah, malum na martikas, mardalan na repat, anjaha marpangidah na mapitung, gabe ipuji sidea ma Naibata ni Israel. ³² Tapi idilo Jesus ma susianNi ai hu lobeiNi, nini ma: Maidop do uhurHu mangidah na mabuei on, ai adong ma tolu ari sidea rapkon Ahu, anjaha seng dong sipanganon bani sidea, anjaha seng ra Ahu palaohon sidea sonin loheian, ase ulang tompas sidea i tongah dalan. ³³ Jadi nini susianNi ai ma hu Bani: Hunja ma buatonta ruti i halimisan on sungkup pabosur halak na sain bueini? ³⁴ Nini Jesus ma hubani sidea: Ai adong do piga ruti isimpan hanima? Jadi nini sidea ma: Pitu ruti ampa dengke otik. ³⁵ Jadi isuruh ma na mabuei ai hundul bani tanoh, ³⁶ ibuat ma ruti na pitu ai ampa dengke ai, anjaha dob ihatahon tarima kasih, ipartopik ma ai, anjaha iberei bani susianNi ai, ase susianNi ai mamberei halak na mabuei ai. ³⁷ Jadi mangan ma sidea haganup ronsi bosur; lanjar ipatumpu sidea ma teba-tebani; gok pitu bantei. ³⁸ Ia buei ni na mangan ai, adong do ompat ribu halak dalahi, sobali naboru pakon dakdanak. ³⁹ Jadi dob isuruh mulak halak na mabuei ai, naik ma Ia hu parau, anjaha laho ma hu nagori Magdala.

¹ Dob ai roh ma Parisei pakon Sadukei manlajouSi; ipindo sidea do tanda hun langit sipatidakonNi bani sidea. ² Jadi nini ma dompak sidea: Anggo bod ma ari, nini nasiam do: Logou ma ari, ai gerger do langit. ³ Anjaha sogod-sogod: Laho roh do haba-haba sadari on, ai gerger do langit anjaha bonog. Ibotoh nasiam do manimbangi rupa ni langit, tapi tanda-tanda, na masa bani panorang on, seng ibotoh nasiam. ⁴ Bangsa parjahat anjaha parbangkis mangindo tanda; tapi seng sibereon tanda bani sidea, sobali ni tanda ni si Jonas. Jadi misir ma Ia, itadingkon ma sidea. ⁵ Jadi das ma susianNi hu dipar, lupa do hape sidea mamboan ruti. ⁶ Ihatahon Jesus ma hubani sidea: Pangkei anjaha jaga ma hanima dompak ragi ni Parisei pakon Sadukei. ⁷ Jadi isahapkon sidea ma ai samah sidea, nini ma: Halani na so mamboan ruti ai do hita ai! ⁸ Tapi ibotoh Jesus do ai, gabe nini ma: E hanima siotik haporsayaon! Mase ma isahap-sahapkon hanima na so mamboan ruti ai hanima? ⁹ Seng ope iarusi uhurnima? Seng idingat hanima be na lima ruti bani na lima ribu halak ondi, anjaha piga bantei buei ni na teba ipatumpu hanima? ¹⁰ Barang na pitu ruti bani na ompat ribu halak ondi, anjaha piga bantei buei ni na teba ipatumpu hanima? ¹¹ Sonaha, ai lang iarusi hanima, na so pasal ruti Hatangkai bennima? Jaga ma hanima pasal ragi ni halak Parisei ampa Sadukei! ¹² Jadi dapot uhur ni sidea ma, paboa sedo hape ragi ni Parisei pakon Sadukei na hinatahonni ai sijagaon, tapi podah ni sidea do. ¹³ Jadi dob das Jesus hu nagori Kesarea Pilippi, isungkun ma susianNi: Ai ise do Anak ni jolma in, nini halak? ¹⁴ Jadi nini sidea ma: Deba mangkatahon si Johannes Pandidi, na deba si Elias, na legan use si Jeremias barang sahalak humbani nabi-nabi ai. ¹⁵ Nini ma hubani sidea: Ia hanima. Ise do Ahu, nini hanima? ¹⁶ Jadi nini si Simon Petrus ma mambalosi! Ham do Kristus, Anak ni Naibata na manggoluh in! ¹⁷ Dob ai nini Jesus ma mambalosi: Martuah do ho, Simon, anak ni si Jona, ai sedo daging pakon daroh patalarhon in bam, tapi BapangKu na i nagori atas ai do. ¹⁸ Ahu pe Huhatahon ma bam: Si Petrus (batu gingging) do ho, anjaha i atas ni batu gingging ai do pajongjongonKu kuriangKu, anjaha horbangan ni nagori toruh pe seng boi taluhononni ai. ¹⁹ Hubere pe bam anak kunsi ni harajaon nagori atas in, anjaha aha na sinangkutmu i dunia on, tarsangkut ma age ai i nagori atas, anjaha aha na tinanggalanmu i tanoh on, tanggal ma ai i nagori atas. ²⁰ Dob ai ipandang do susianNi ai, ase ulang ipatugah-tugah sidea bani halak, paboa Ia do Kristus. ²¹ Hunjia nari ma ipungkah Jesus patugahkon hubani susianNi, na maningon laho do Ia hu Jerusalem, anjaha na maningon buei do Ia manaron humbani pangintuai-pangintuai, sintua ni malim ampa sibotoh surat, pala maningon bunuhon do Ia, tapi papuhoon do bani ari patoluhon. ²² Jadi iarahkon si Petrus ma Ia, ihata ma Ia, nini ma: Idop ma uhur ni Naibata Bamu, Tuhan! Ulang ma masa ai Bamu! ²³ Tapi marhusor ma Jesus, nini ma dompak si Petrus: Laho ma ho ne, bolis! Ai partolsuan do ho Bakku, ai seng na porlu bani Naibata iuhurhon ho, tapi na porlu bani jolma do. ²⁴ Jadi nini Jesus ma dompak susianNi: Barang ise na sihol mangirikkon Ahu, iparnalang ma dirini, iporsan ma silangni, anjaha iirikkon ma Ahu! ²⁵ Ai barang ise na sihol manramotkon hosahni, na mangagouhon do ai, tapi barang ise na agouan hosah halani Ahu, ai do na jumpahan. ²⁶ Ai aha ma gunani bani jolma, age ganup dunia on bani, anggo magou do tonduyni? Aha ma tarbere jolma bahen tobus ni tonduyni? ²⁷ Ai na roh do magira Anak ni Jolma in ibagas hasangapon ni BapaNi rap pakon malekatNi, jadi balashononkonNi ma bani haganup domu hubani horjani. ²⁸ Na sintong do na Huhatahon on bennima: Adong do deba humbani na jongjong ijon, na so mandai hamateian, anggo seng ope iidah sidea roh Anak ni jolma in ibagas harajaonNi.

¹ Dob salpu onom ari, iarahkon Jesus ma si Petrus ampa si Jakobus ampa si Johannes saninani ai, iboan ma sidea pulig hu sada dolog na gijang. ² Jadi mubah ma rupaNi iidah sidea, bohiNi marsinalsal songon mataniari, anjaha hiouNi lopak songon na lihar. ³ Anjaha tonggor ma, taridah ma bani sidea si Musa ampa si Elias, marsahapi pakonSi. ⁴ Jadi iparsahapkon si Petrus ma Jesus, nini ma: Sonang ni in ijon! Anggo marosuh Ham, hupauli ma ijon tolu lampo-lampo, sada Bamu, sada bani si Musa, anjaha na sada nari bani si Elias. ⁵ Mangkatahon ai ope ia, tonggor ma, roh ma sada hombun na lihar manlinggomi sidea, anjaha tarbogei ma sada sora hun hombun ai, na mangkatahon: On do Anak haholonganKu, marosuh do uhurHu Bani, tangihon hanima ma Ia! ⁶ Manangar ai susian ai, manrogop ma sidea anjaha mabiar tumang. ⁷ Jadi roh ma Jesus bani sidea, ijamah ma sidea, nini ma: Jongjong ma, anjaha ulang ma mabiar! ⁸ Tapi sanggah mangkawah sidea, seng dong atap ise iidah sidea ijai sobali Jesus tumang. ⁹ Sanggah tuad ai sidea hun dolog ai, iparentahkon Jesus ma hubani sidea, nini ma: Ulang ma patugah-tugah hanima na niidahnima ai atap bani ise pe, sadokah seng puho ope Anak ni jolma in humbani na matei. ¹⁰ Jadi isungkun susianNi ai ma Ia: Mase ma ihatahon sibotoh surat paboa maningon roh do lobei si Elias? ¹¹ Nini ma mambalosi sidea: Tongon, maningon roh do si Elias, laho patorsahon haganup. ¹² Tapi Huhatahon ma bennima: Domma roh si Elias, tapi seng itanda sidea ia; uhur-uhur ni sidea do ibahen sidea bani. ¹³ Jadi iarusi susian ai ma, si Johannes Pandidi do hape, na hinatahonNi ai bani sidea. ¹⁴ Dob das sidea hubani halak na mabuei ai, roh ma sada halak marsombah hu Bani, anjaha nini ma: ¹⁵ Tuhan, idop ma uhurMu mangidah anakku. Ubagon do ia, parah tumang iahap. Gati do ia jomba hu bagas apuy, anjaha gati homa hu bagas bah. ¹⁶ Domma huboan namin ia bani susianMu, tapi seng tarpamalum sidea ia. ¹⁷ Jadi nini Jesus ma mambalosi: E bangsa, na so porsaya anjaha na jahat! Sadiha dokah nari Ahu rap pakon hanima? Sadiha dokah nari anjuonKu hanima? Boan hanima ma ia hujon. ¹⁸ Jadi isorgang Jesus ma ia, gabe luar ma sibolis ai humbani, anjaha jorgit ma ia humbani panorang ai nari. ¹⁹ Dob ai pulig ma iparayak susian ai Jesus, nini ma: Mase ma lang mangasup hanami mangusirsi? ²⁰ Jadi nini Jesus ma dompak sidea: Halani otik ni haporsayaonnima do! Ai tongon do na Huhatahon on bennima: Anggo adong haporsayaonnima na sabatu ni losabi, hatahononnima do bani dolog an: Mosor ma hunjon hujai, gabe saud do mosor ai, anjaha seng dong na so boi bahenonnima. ²¹ Tapi anggo na samasam on, seng ra mandarat, anggo seng marhasoman tonggo ampa parpuasaon. ²² Sanggah martumpu sidea i Galilea, nini Jesus ma hubani sidea: Ondoskononhon ma Anak ni jolma in hu bagas tangan ni halak, ²³ gabe bunuhon ni sidea ma Ia, dob ai pagoluhon do Ia bani ari patoluhon. Jadi pusok tumang ma uhur ni sidea. ²⁴ Jadi dob das sidea hu huta Kapernaum, roh ma situnggu guguan rumah panumbahan hubani si Petrus, nini ma: Ai seng manggalar guguan rumah panumbahan Gurunima in? ²⁵ Nini ma: manggalar do. Sanggah na masuk ia hu rumah, i lobeii Jesus ma manungkun hubani, nini ma: Sonaha do nini uhurmu, Simon? Raja-raja na itanoh on, humbani ise do sidea manjalo guguan atap balasting? Humbani anakni do atap humbani halak na legan do? ²⁶ Dob ihatahon si Petrus: "Humbani halak na legan do", gabe ihatahon Jesus ma hubani: "Ase, seng hona anggo anak!" ²⁷ Tapi, ase ulang marah sidea halani hita, laho ma ho mangkail hu tao, dob ai sintak ma dengke na parlobei mangankon, anjaha buha ma babahni, gabe dapot ho ma ijai sada rupiah. Ai ma buat, anjaha bere ma ai bani sidea bahen guguanta.

¹ Bani panorang ai, roh ma susian ai manjumpahkon Jesus, nini sidea ma: Ai ise do sibanggalan ibagas harajaon nagori atas? ² Jadi idilo Jesus ma sada dakdanak, ipajongjong ma ia i tongah-tongah ni sidea, lanjar nini ma: ³ Sintong do na Huhatahon on bennima: Anggo lang mulak uhurnima songon sada dakdanak, sabonar na so boi do hanima masuk hu bagas harajaon nagori atas ai. ⁴ Barang ise na patoruh uhurni songon dakdanak on, ai do sibanggalan ibagas harajaon nagori atas in. ⁵ Anjaha na manjalo dakdanak na sonon, halani goranKu, Ahu do na jinaloni ijai. ⁶ Tapi barang ise na mambahen sangsi sada humbani na etek-etek on, na porsaya hu Bakku, dearan ma igantungkon losung batu bani borgokni, laho mannongnongkonsi hu bagas laut sibagasan. ⁷ Bursik ma dunia on pangkorhon ni parsangsian! Seng tarbahen lang roh namin parsangsian, tapi bursik ma jolma na parohkonsi! ⁸ Halani ai, anggo tanganmin atap naheimin do na mambahen mardousa ho, rotap anjaha ambukkon ma in, ai dearan do martangan salopah atap tempang ho masuk hu hagoluhan, humbani na mardua tangan atap mardua nahei iambukkon hu bagas apuy sisadokah ni dokahni. ⁹ Anjaha anggo matamu do na mambahen mardousa ho, pulsitkon ma in anjaha ambukkon, ai dearan do marmata sada ho masuk hu hagoluhan, humbani na marmata dua iambukon hu bagas naraka. ¹⁰ Jaga ma hanima, ase ulang mapas uhurnima mangidah sada humbani na etek-etek on. Ai Huhatahon ma bennima: Iidah malekat ni sidea do tongtong bohi ni BapangKu na i nagori atas ai. ¹¹ (Ai na roh do Anak ni jolma in paluahkon na magou). ¹² Sonaha do nini uhurnima? Anggo adong biri-biri ni sada halak saratus, anjaha kahou sada hunjai, ai lang tadingkononni ma na siah puluh siah ai i dolog, laho mangindahi na magou ai? ¹³ Anjaha anggo jumpahsi ma ai, tongon Huhatahon ma bennima, malasan do uhurni mangidah na sada ai marimbang na siah puluh siah, na so ongga kahou. ¹⁴ Sonai ma homa seng marosuh uhur ni Bapanima na i nagori atas ai, anggo magou sada humbani na etek-etek on. ¹⁵ Anggo mardousa saninamu, parayak anjaha ajari ma ia, hanima padua-dua. Anggo itangihon ho, gabe hasomanmu ma ia use. ¹⁶ Tapi anggo seng itangihon ho, arahkon ma hasomanmu sada barang dua halak, ase sinaksihon ni dua atap tolu halak ma parsahapan ai. ¹⁷ Tapi anggo seng itangihon age sidea, patugah ma ai bani kuria; anjaha anggo seng itangihon homa kuria ai, hira ma ia parbegu barang sijalo sohei. ¹⁸ Na sintong do Hatangkon bennima: Sagala na sinangkutnima i atas tanoh on, tarsangkut do homa ai i nagori atas, anjaha sagala na pinaluahnima i tanoh on, maluah do ai homa i nagori atas. ¹⁹ Ambahni ai Huhatahon ma bennima: Anggo adong dua humbannima i tanoh on, na mardos ni uhur manonggohon atap aha pe, sai na bereon ni BapangKu na i nagori atas ai do ai bani sidea. ²⁰ Ai atap ija pe martumpu dua atap tolu halak marhitei goranKu, i tongah-tongah ni sidea do Ahu. ²¹ Dob ai roh ma si Petrus, nini ma hubani: Tuhan, sibar piga hali do sasaponku salah ni hasomanku, na mardousa dompak ahu? Pala do pitu hali? ²² Nini Jesus ma dompaksi: Seng Huhatahon bam pitu hali, tapi pitu puluh hali pitu do. ²³ Halani ai tarpausih do harajaon nagori atas ai hubani sada raja na mambahen parhiraan ampa juak-juakni. ²⁴ Jadi dob ipungkah mambahen parhiraan, tarboan ma hu lobeini sada halak, na marutang sapuluh ribu talenta. ²⁵ Tapi halani seng dong panggalarni, ihatahon tuanni ai ma jualon ia, parinangonni ampa dakdanakni ronsi ganup na dong bani, bahen galar ni utangni. ²⁶ Manrogop ma juak-juak ai i lobeini, nini ma: Palumbang ham ma uhurmu, hugalar pe ganupan ai bamu! ²⁷ Jadi maidop ma uhur ni tuanni ai mangidah juak-juak ai, ipaluah ma ia anjaha ibalihon ma haganup utangni ai. ²⁸ Tapi sanggah na luar juak-juak ai, jumpahsi ma hasomanni juak-juak sahalak, na marutang hubani saratus dinar, gabe itangkap ma ia anjaha isongkik, nini ma: Galar utangmu ondi! ²⁹ Jadi manrogop ma hasomanni juak-juak ai, nini ma: Palumbang ham ma uhurmu, hugalar pe ai bamu! ³⁰ Tapi seng ra ia, laho ma ia anjaha ipatutupkon ma hasomanni ai, paima igalar utangni ai. ³¹ Jadi dob iidah hasomanni juak-juak na masa ai, pusok ma uhur ni sidea, laho ma sidea, anjaha ipatugah ma bani tuan ni sidea ai haganup pasal na masa ai. ³² Gabe idilo tuanni ai ma ia, nini ma dompaksi: Ho juak-juak na jahat! Hubalihon do haganup utangmu, halani ielek-elek ho ahu. ³³ Ai lang patut maridop ni uhur age ho hubani hasomanmu juak-juak songon ahu, na dob maridop ni uhur bam? ³⁴ Jadi marringis ma tuanni ai hubani, gabe iondoskon ma ia hubani sipangarsik-arsik, paima igalar haganup utangni ai. ³⁵ Sonai do bahenon ni BapangKu na i nagori atas ai bennima, anggo lang isasap hanima bei humbagas uhurnima salah ni hasomannima.

¹ Ase dob ipaujung Jesus parsahapan ai, itadingkon ma Galilea, gabe das ma Ia hu tanoh Judea, na i dipar ni bah Jordan. ² Buei tumang do halak na mangirikkonSi, anjaha ipamalum ma sidea ijai. ³ Jadi roh ma halak Parisei hu Bani, nini sidea ma manlajouSi: Ai bulih do sirangkonon ni sada dalahi parinangonni, asal adong atap aha halani? ⁴ Jadi nini ma mambalosi sidea: Ai seng ibasa hanima, paboa na humbani mulani do itompa Panompa in sidea dalahi pakon naboru, anjaha ihatahon: ⁵ Halani ai tadingkonon ni dalahi do bapani pakon inangni, laho padomuhon dirini hubani jolmani, anjaha gabe sadaging do sidea na dua ai? ⁶ Ase seng be dua sidea ai, tapi sada daging do. Ai pe, na dob pinadomu ni Naibata, seng bulih sirangon ni jolma. ⁷ Jadi nini sidea ma hu Bani: Anggo sonai, mase ma ititahkon si Musa bereon surat sirang laho mansirangkon? ⁸ Nini ma dompak sidea: Halani hengkeng ni uhur nasiam do, mambahen na ilopas si Musa nasiam paulakkon parinangon nasiam; tapi seng sonai anggo humbani mungkahni. ⁹ Huhatahon ma bani nasiam: Barang ise na manirangkon parinangonni, anggo seng halani parbangkison, gabe ibuat na legan, parbangkis do ia ai. ¹⁰ Jadi nini susian ai ma dompakSi: Anggo sonai do hape ruhut ni parrumah-tanggaon, rahanan ma ulang mompo. ¹¹ Tapi nini ma dompak sidea: Seng haganup halak tarbahen manjalo hata on, pitah haondosanni do hansa. ¹² Ai adong do jolma na so boi mompo, sonai humbani partubuhni; adong deba, na kinasihkon ni halak na legan, anjaha adong deba nari, na pakasihkon dirini halani harajaon nagori atas ai. Barang ise na boi manjalo hata ai, ijalo ma! ¹³ Dob ai iboan halak ma dakdanak hu Bani, ase itampeihon tanganNi bani sidea, anjaha itonggohon sidea. Tapi ipinsang susian ai ma sidea. ¹⁴ Tapi nini Jesus ma: Paturut hanima ma roh dakdanak in hu Bakku, ulang langlangi, ai bani sisonin do harajaon nagori atas ai. ¹⁵ Jadi dob itampeihon tanganNi bani sidea, misir ma Ia hunjai. ¹⁶ Dob ai roh ma sada halak manjumpahkonSi, nini ma: Guru, aha do na madear sihorjahononku, ase dapot ahu hagoluhan sisadokah ni dokahni? ¹⁷ Tapi nini ma hubani: Mase ma Ahu sungkunonmu pasal na madear? Sada do hansa paruhur na madear. Anggo sihol masuk ho hu hagoluhan, dalankon ma titah in! ¹⁸ Nini ma dompakSi: Na ija? Gabe nini Jesus ma: Ulang ho mamunuh! Ulang ho marbangkis! Ulang ho manangko! Ulang ho ra manaksihon hata na so tongon! ¹⁹ Pasangap amangmu pakon inangmu! Anjaha: Haholongi ma hasomanmu songon dirimu! ²⁰ Nini anak garama ai ma hu Bani: Domma hudalankon haganupan ai. Aha ope hahuranganku? ²¹ Jadi nini Jesus ma hubani: Anggo sihol uhurmu gok dear ho, laho ma, jual ma haganup na dong bam, pambere ma bani na masombuh, ase mararta ho i nagori atas. Dob ai roh ma ho mangirikkon Ahu! ²² Mambogei hata ai anak garama ai, laho ma ia ibagas pusok ni uhur, ai buei do artani. ²³ Jadi nini Jesus ma dompak susianNi ai: Payah do halak na bayak masuk hu bagas harajaon nagori atas in. ²⁴ Huhatahon ma use hubennima: Urahan do masukan ni unta pinggol ni jarum, ase halak na bayak masuk hu harajaon nagori atas in. ²⁵ Mambogei ai susian ai, tarsonggot tumang ma sidea, nini ma: Ise mando maluah, anggo sonai? ²⁶ Jadi ikawahkon Jesus ma sidea, nini ma dompak sidea: Marhitei jolma, seng boi ai, tapi marhitei Naibata haganupan do boi. ²⁷ Dob ai nini si Petrus ma mambalosiSi: Ia hanami, haganup do itadingkon hanami laho mangirikkon Ham, Aha ma ulih bannami? ²⁸ Jadi nini Jesus ma hubani sidea: Na sintong do Hatangkon bennima: Magira, bani habayuon ai, bani na hundul Anak ni Jolma in bani paratas hasangaponNi ai, dihut ma hanima hundul ijai bani sapuluh dua paratas, laho manguhumi halak Israel, na sapuluh dua marga in. ²⁹ Anjaha barang ise na manadingkon rumahni, saninani, botouni, bapani, inangni, niombahni barang jumani halani goranKu, manjalo ma ai marlompit-lompit, ambahni ai teanonni ma hagoluhan sisadokah ni dokahni. ³⁰ Tapi buei do na parlobei hinan gabe parpudi, anjaha na parpudi hinan gabe parlobei.

¹ Ai usih do harajaon nagori atas ai hubani sada tuan na bayak, na laho girah sogod mangindahi siparhorja bani pohon anggurni. ² Jadi dob mardos ni uhur ia pakon sidea pasal upah ni sidea, ai ma sadinar sadari, isuruh ma sidea hu pohon anggurni. ³ Anjaha sanggah na luar ia pukul siah, iidah ma halak na legan jongjong sohsoh i tiga ai, ⁴ gabe ihatahon ma bani sidea: Dihut ma homa nasiam marhorja hu pohon anggurhu! Hubere pe na patut bani nasiam! Jadi laho ma sidea. ⁵ Jadi laho ma use ia pukul sapuluh dua ampa pukul tolu, lanjar sonai do ibahen. ⁶ Anjaha sanggah na laho ia pukul lima, jadi jumpahsi ma halak na legan sonin-sonin jongjong, gabe ihatahon ma bani sidea: Mase ma sohsoh tumang nasiam layur sadari on? ⁷ Nini sidea ma hubani: Seng dong na mangarahkon hanami. Jadi nini ma hubani sidea: Dihut ma nasiam marhorja hu pohon anggurhai! ⁸ Ase dob bod ari, nini simada pohon anggur ai ma dompak juru tulisni: Dilo ma haganup siparhorja ai, galar ma upah ni sidea, mamungkah humbani na masuk parpudi das hubani na parlobei ai! ⁹ Jadi roh ma na masuk bani pukul lima, ijalo bei ma sadinar. ¹⁰ Dob ai roh ma na masuk parlobei ai, iagan sidea ma lobih jaloon ni sidea, hape age sidea sadinar bei do ijalo. ¹¹ Tapi manjalo ai, marungut-ungut ma sidea dompak tuan na bayak ai, ¹² nini sidea ma: Ia halak na parpudi masuk on, na marhorja pitah sajam hansa, ipados ham do sidea pakon hanami, na manaronkon torik ni horja pakon milas ni ari layur sadari on. ¹³ Tapi nini ma marbalos dompak sahalak humbani sidea: Ambia, seng dong hubahen bam na so pintor! Ai lang na dob manriah do hita pasal na sadinar in! ¹⁴ Jalo ma bagianmu anjaha laho ma ho! Tapi sihol do uhurhu, mambere bani na parpudi on songon na bam ai. ¹⁵ Ai lang patut, domu hubani rosuhku hubahen pasal na dong bakku? Serleng matamu halani layak ahu? ¹⁶ Sonai ma gabe parlobei na parpudi hinan, anjaha na parlobei hinan gabe parpudi. ¹⁷ Sanggah na laho Jesus tangkog hu Jerusalem, iarahkon ma pulig susianNi na sapuluh dua ai, anjaha nini ma bani sidea i tongah dalan ai: ¹⁸ Na tangkog ma hita hu Jerusalem, ondoskononkon ma Anak ni jolma in bani sintua ni malim ampa sibotoh surat, anjaha uhumon ni sidea ma Ia marutang hosah. ¹⁹ Dob ai ondoskonon ni sidea ma Ia hubani sipajuh begu-begu, ase ipahiri, ilonsingi anjaha iparsilangkon, anjaha bani ari patoluhon papuhoon do Ia. ²⁰ Jadi roh ma inang ni anak ni si Sebedeus rap pakon anakni hu Bani, isombah ma Ia laho padaskon pangindoanni. ²¹ Jadi nini ma hubani: Aha ipindo uhurmu? Nini ma mambalosi: Lopas Ham ma hundul anakku na dua on ibagas harajaonMu, sada bani siamunMu, na sada nari bani sambilouMu! ²² Tapi nini Jesus ma mambalosi: Seng ibotoh hanima na pinindonima. Mintor tarinum hanima ma siinumon, na sihol inumonKu? Nini sidea ma: Tarbahen hanami do! ²³ Dob ai nini ma dompak sidea: Tongon, inumonnima do siinumonKai, tapi seng saguru Bakku na mambahen hundul i siamunHu barang i sambilouHu; Bapa do pasirsirhon ai bani haondosanni. ²⁴ Mambogei ai na sapuluh ai, sogam ma uhur ni sidea mangidah na dua halak na marsanina ai. ²⁵ Tapi ipatumpu Jesus ma sidea, nini ma: Irajai sigomgomi bangsa do rayatni, anjaha ikuasai na sangap-sangapni do sidea. ²⁶ Ulang ma sonai anggo bennima, tapi barang ise na sihol sangap i tongah-tongahnima, ai ma gabe sipangidangi bennima, ²⁷ anjaha barang ise hanima na sihol parlobei, ai ma gabe jabolon bennima. ²⁸ Songon Anak ni Jolma in pe, seng roh Ia ase iidangi halak, tapi ase mangidangi do, anjaha iberehon do hosahNi bahen tobus ni buei jolma. ²⁹ Sanggah luar sidea hun Jeriko, buei do halak na mangirikkonSi. ³⁰ Anjaha tonggor ma, adong do dua halak na mapitung hundul i topi dalan; dob ibogei Jesus na mamontas ai, mardilo-dilo ma sidea: Ham Tuhan, Anak ni si Daud, idop ma uhurMu bennami! ³¹ Ipinsang na mabuei ai ma sidea ase sip namin, tapi lambin gogoh do sidea dilo-dilo: Ham Tuhan, anak ni si Daud, idop ma uhurMu bennami! ³² Jadi maronti ma Jesus anjaha isuruh ma sidea roh hu Bani, nini ma: Aha ipindo uhur nasiam bahenonKu bani nasiam? ³³ Nini sidea ma hu Bani: Tuhan marpangidah ma namin matanami! ³⁴ Jadi maidop ma uhur ni Jesus mangidah sidea, lanjar ijamah ma mata ni sidea; jadi mintor marpangidah ma matani sidea, gabe iirikkon ma Jesus.

¹ Sanggah roh sidea hundohor hu Jerusalem anjaha das sidea hu Betpage, na i dolog Jetun, isuruh Jesus ma dua halak susianNi manlobeiSi, ² nini ma hubani sidea: Laho ma hanima hu dusun na i lobeinima ai, anjaha mintor dapot hanima do ijai tambat halode sada rap pakon anakni. Tanggali ma, anjaha boan ma hu Bakku! ³ Jadi anggo adong na mangkatahon atap aha bennima, balosi hanima ma: "Porlu do in bani Tuhan in!" jadi mintor lopasonni. ⁴ Tapi masa pe sonin, ase jumpah na hinatahon ni nabi, ⁵ na mangkatahon: Hatahon ma bani boru Sion: Tonggor ma, Rajamu roh bam, lamlam maruhur, anjaha mangajak halode boru-boru ampa anak ni halode boban. ⁶ Jadi laho ma susian ai, anjaha ibahen sidea ma songon na hinatahon ni Jesus bani sidea. ⁷ Iboan sidea ma halode ai rap pakon anakni ai, itampeihon ma hiou ni sidea hu atasni, anjaha Jesus pe hundul ma i atasni. ⁸ Deba humbani halak na mabuei ai mangamparhon hiouni bani dalan ai, na deba nari managili ranting ni hayu lanjar ierap bani dalan ai. ⁹ Ia halak na mabuei ai, na mardalan i lobeiNi ampa na mangirikkonSi hun pudi, nini bei ma mangolobkon: Hosianna bani Anak ni si Daud! Pinasu-pasu ma na roh ibagas goran ni Tuhan. Hosianna ma i nagori atas. ¹⁰ Sanggah na masuk ai Ia hu Jerusalem, guntar ma ganup huta ai, nini bei ma: Ai ise do in? ¹¹ Nini halak na mabuei ai ma: On ma nabi ai, Jesus, na hun huta Nasaret, na i nagori Galilea! ¹² Jadi masuk ma Jesus hu rumah panumbahan, anjaha iusir ma hunjai sagala siparjualan ampa sipamboli, ipantunggalingkon ma meja ni situkari duit ampa bangku-bangku hundulan ni sijual asas, ¹³ lanjar nini ma dompak sidea: Ihatahon surat in do: Rumah partonggoan do goran ni rumahKu, tapi gabe liang ni panamun do in ibahen hanima. ¹⁴ Dob ai marrohan ma hu Bani, hu rumah panumbahan ai, na mapitung ampa na repat, gabe ipamalum ma sidea. ¹⁵ Dob iidah sintua ni malim ampa sibotoh surat tanda halongangan na binahen ni Jesus ampa dakdanak na marsurak-surak ai i rumah panumbahan, mangakatahon: "Hosianna bani Anak ni raja Daud!" marah ma sidea. ¹⁶ Nini sidea ma hu Bani: Ibogei Ham do na hinatahon ni sidea in? Jadi nini Jesus ma hubani sidea: Hubogei do! Ai lang ongga ibasa nasiam: Humbani pamangan ni dakdanak ampa na inuman do ipasirsir Ham puji-pujian Bamu? ¹⁷ Dob ai itadingkon ma sidea, luar hun huta ai laho hu Betania, lanjar marborngin ijai. ¹⁸ Tapi patar ni ai, sogod, sanggah na laho mulak hu Jerusalem, malohei ma iahap. ¹⁹ Iidah ma sada hayu ara i topi dalan ai, jadi laho ma Ia hujai, tapi seng dong jumpahsi sobali bulung, gabe ihatahon ma bani hayu ai: Hunjon hujanan seng anjai marbuah be ho! Jadi mintor melus ma hayu ara ai. ²⁰ Mangidah ai susian ai, longang ma sidea, lanjar nini ma: Mase ma mintor melus hayu ara in? ²¹ Jadi nini Jesus ma mambalosi sidea: Na sintong do Hatangkon bennima: Anggo porsaya hanima anjaha seng sangsi, seng pitah songon na bani hayu ara in tarbahen hanima, tapi lobih do hunjai; anggo ihatahon hanima bani dolog an: "Mosor ma anjaha madabuh hu laut!" gabe saud ma sonai. ²² Anjaha sagala na pinindonima ibagas tonggonima, sai na jaloonnima do, anggo porsaya hanima. ²³ Sanggah na masuk ai Ia hu rumah panumbahan, roh ma sintua ni malim ampa pangintuai-pangintuai ni bangsa ai hu Bani, tudu sanggah mangajari Ia, nini sidea ma: Marhitei kuasa aha do ibahen Ham ganupan in? Anjaha ise do na mambere kuasa in Bamu? ²⁴ Jadi nini Jesus ma mambalosi sidea: Ahu ma lobei manungkun nasiam, anjaha anggo domma ibalosi nasiam Ahu, Ahu pe patugahonKu ma bani nasiam, atap marhitei kuasa aha do Hubahen ai. ²⁵ Ia pandidion ni si Johannes, na hunja do ai? Hun nagori atas do atap humbani jolma? Jadi martukar pingkiran ma sidea samah sidea, nini ma: ²⁶ Anggo ihatahon hita: "Hun nagori atas do," hatahononni ma hubanta: "Mase lang ihaporsayai nasiam Ia?" Anggo ihatahon hita: "Humbani jolma do," sihabiaranta do halak na mabuei in, ai nabi do si Johannes, nini uhur ni jolma haganup. ²⁷ Jadi nini sidea ma mambalosi Jesus: Seng ibotoh hanami! Anjaha Ia pe, nini ma dompak sidea: Ahu pe, seng patugahonKu bani nasiam atap marhitei kuasa aha Hubahen in. ²⁸ Tapi sonaha do nini uhur nasiam? Adong ma dua anak ni sada halak. Laho ma ia hubani sikahanan, nini ma: Laho ma ho, anakku, sadari on mangkorja hu pohon anggurta! ²⁹ Balosni ni anak ai ; seng pot ahu. tapi use manosal do ia anjaha laho. ³⁰ Dob ai laho ma halak ai hubani anak na paduahon ai, anjaha ihatahon ma homa songon nongkan ai. Nini anaka ai ma mambalosi: Dear, bapa. Tapi seng laho ia. ³¹ Ise do sidea na dua ai na mandalankon ai! Jadi nini sidea ma mambalosi: “Na parlobei ai” Gabe nini Jesus ma hubani sidea: Na sintong do Hatangkon bani nasiam: Lobeian ni sijalo sohei pakon boru jalang do nasiam masuk hu bagas harajaon ni Naibata. ³² Ai na roh do si Johannes hubani nasiam bani dalan hapintoron, tapi seng porsaya nasiam bani, tapi anggo sijalo sohei ampa boru jalang porsaya do. Iidah nasiam do ai namin, tapi lanjar do seng isolsoli nasiam uhur nasiam laho mangkaporsayaisi. ³³ Bogei nasiam ma sada limbaga na legan. Adong ma sada tuan na bayak, na mamungkah sada pohon anggur. Ihondor ma ai, inggot, ihurak ma pangilangan ni anggur ibagas, anjaha ipauli ma sada manara. Ipasewahon ma pohon ai hubani piga-piga parjuma-juma, dob ai laho ma ia hu nagori na legan. ³⁴ Dob jumpah panorang mambuat buahni, isuruh ma juak-juakni hubani parjuma-juma ai laho manjalo buahni. ³⁵ Tapi itangkap parjuma-juma ai ma juak-juakni ai, adong na ibogbogi, adong na ibunuh anjaha adong na ipargijig bani batu. ³⁶ Iulaki tuan ai ma use marsuruh juak-juakni, bueinan humbani na parlobei ai, tapi sonai do homa ibahen bani sidea. ³⁷ Dob ni isuruh ma anakni bani sidea, ai nini uhurni: tontu malang do uhur ni sidea bani anakkin! ³⁸ Dob iidah parjuma-juma ai anakni ai, nini sidea ma samah sidea: On do sitean pohon in! Eta, bunuh hita ma ia, ase banta siteanonni ai. ³⁹ Jadi itangkap sidea ma ia, isarad hu darat ni pohon anggur ai, lanjar ibunuh. ⁴⁰ Anggo roh simada pohon anggur ai, aha ma sibahenonni bani parjuma-juma ai? ⁴¹ Nini sidea ma hu-Bani: Tontu bunuhonni ma siparjahat ai, anjaha pohon anggurni ai ondoskononni hubani parjuma-juma na legan, na ra mamberehon buahni bani panorangni. ⁴² Jadi nini Jesus ma hubani sidea: Ai seng ongga ibasa nasiam ibagas Surat in: Batu na niambukhon ni tukang rumah, ai do gabe palas parsuhi; pinamasa ni Tuhan do in, anjaha halongangan do in bani matanta? ⁴³ Halani ai Huhatahon ma bani nasiam: Sibuaton ma humbani nasiam harajaon ni Naibata, anjaha berehonon bani bangsa na legan, na ra mambere buahni. ⁴⁴ Anjaha barang ise, na madabuh bani batu on, mapuntar do, anjaha barang ise nidabuhanni, marosak do. ⁴⁵ Mambogei limbaga ai mangahap ma malim pakon Parisei, ai sidea do na hinatahonni ijai. ⁴⁶ Jadi ipindahi sidea ma dalan laho manangkapSi, tapi mabiar do sidea bani halak na mabuei ai, ai nabi do Ia nini uhur ni sidea.

¹ Dob ai iulaki Jesus ma marsahap bani sidea marhasoman limbaga, nini ma: ² Tarpausih do harajaon nagori atas ai bani sada raja, na mambahen pesta parunjokon bani anakni. ³ Jadi isuruh ma juak-juakni mandilo na dob niontang ai hinan hubani pesta ai, tapi seng ra roh sidea. ⁴ Isuruh ma use juak-juak na legan, nini ma: Patugah hanima ma bani na dob niontang in: Tonggor ma, domma sirsir pestangku, domma isayat lombu pakon pinahan na dob pinamombur, domma sirsir haganup! Ai pe roh ma nasiam bani pesta parunjukon in. ⁵ Tapi hampung do uhur ni sidea pasal ontangan ai, gabe laho bei ma, deba hu jumani, na deba nari hu partiga-tigaonni. ⁶ Na legan manangkap juak-juakni ai, iarsik ma anjaha ibunuh. ⁷ Jadi manggila ma raja ai, gabe isuruh ma tenterani mamboiskon haganup pamunuh ai, anjaha manutung huta ni sidea. ⁸ Dob ai nini ma hubani juak-juakni: Domma namin sirsir pesta parunjukon in, tapi seng talup na niontang ai. ⁹ Halani ai, laho ma hanima bani ganup sirpang ni dalan, anjaha arahkon hanima ma hu pesta parunjukon on sagala halak na jumpah hanima. ¹⁰ Jadi laho ma juak-juak ai hubani sagala dalan, anjaha ipatumpu sidea ma haganup jolma na jumpah sidea, parjahat age na bujur, gabe gok ma parpestaan ai bani tamuei-tamuei. ¹¹ Sanggah na masuk raja ai manorih tamuei ai, iidah ma sada halak na so marpakeian pesta, ¹² gabe nini ma hubani: Na sonaha do parmasukmu hujon ambia, ai seng marpakeian pesta ho? jadi sip ma ia. ¹³ Dob ai nini raja ai ma dompak juak-juakni: Sangkut hanima ma naheini pakon tanganni, anjaha usir hanima ma ia hu darat bani ianan na golap; ijai ma masa partangison ampa na patungosngoson. ¹⁴ Ai buei do na nidilo, tapi otik do na tarpilih. ¹⁵ Dob ai laho ma Parisei manriah samah sidea, atap sonaha do bahenon ni sidea mambahen tardapot Ia marhitei hataNi. ¹⁶ Jadi isuruh sidea ma susian ni sidea rap pakon juak-juak ni si Herodes marayak Jesus, laho manungkun hu-Bani: Ham Guru, ibotoh hanami, na pintor do Ham, anjaha sintong-sintong do dalan ni Naibata iajarhon Ham; seng mabiar Ham age bani ise, ai seng siidah bohi Ham! ¹⁷ Ai pe, patugah Ham ma bennami atap sonaha do pingkiranMu: Ai patut do bereon balasting bani Kesar atap lang? ¹⁸ Tapi ibotoh Jesus do jahat ni uhur ni sidea ai, gabe nini ma: E nasiam sipakulah-kulah! Mase ma ilajou nasiam Ahu? ¹⁹ Patuduhkon nasiam ma hu Bakku duit balasting in! Jadi ipatuduhkon sidea ma Bani sada dinar. ²⁰ Jadi nini ma dompak sidea: Gambaran ampa surat ni ise do on? ²¹ Nini sidea ma: Gombaran ni Kesar! Jadi nini ma dompak sidea: Ai pe, bere ma bani Kesar, na humbani Kesar, anjaha bere ma bani Naibata, na humbani Naibata! ²² Mambogei ai longang ma uhur ni sidea, jadi laho ma sidea, itadingkon ma Ia. ²³ Bani ari ai, roh ma hu-Bani Sadukei, ai ma, na so marhatongonkon adong parpuhoon humbani na matei, jadi isungkun sidea ma Ia, nini: ²⁴ Guru, nini si Musa: Anggo adong matei sada halak, lang martinading, parayakon ni anggini ma parinangonni ai, laho pajongjong ginompar bani saninani ai. ²⁵ Jadi adong ma bannami pitu halak na marsanina; mompo ma sikahanan ai, dob ai matei lang martinading, gabe bani tinodohkonni ai ma parinangon ni ai. ²⁶ Sonai do na paduahon ampa na patoluhon ronsi na papituhon. ²⁷ Parpudi humbani sidea haganup matei ma homa naboru ai. ²⁸ Jadi bani ari parpuhoon ai, ise do humbani sidea na pitu ai simada naboru ai, ai ganup do sidea marjolmahonsi? ²⁹ Tapi nini Jesus ma mambalosi sidea: Na kahou do nasiam, ai seng ibotoh nasiam Surat in age hagogohon ni Naibata! ³⁰ Ai bani ari parpuhoon ai seng dong siparunjuk atap na laho, tapi songon malekat do sidea i nagori atas. ³¹ Tapi pasal parpuhoon ni na dob matei, ai seng ongga ibasa nasiam, na hinatahon ni Naibata bani nasiam: ³² Ahu do Naibata ni si Abraham, Naibata ni si Isak anjaha Naibata ni si Jakob? Ia Naibata, sedo Naibata ni na matei, tapi Naibata ni na manggoluh do. ³³ Jadi longang ma halak na mabuei ai mambogei pangajarionNi ai. ³⁴ Tapi dob ibogei Parisei, na dob ipasip Jesus halak Sadukei, jadi martumpu ma sidea. ³⁵ Anjaha sada halak humbani sidea, ai ma sada sibotoh surat, mambahen sungkun-sungkun Bani laho mangujiSi. ³⁶ Guru, na ija do titah sibanggalan humbani titah in? ³⁷ Jadi nini Jesus ma: Maningon haholonganmu do Tuhan Naibatamu humbani gok ni uhurmu, humbani gok ni tonduymu ampa humbani gok ni pingkiranmu. ³⁸ In ma titah sibanggalan anjaha na parlobei. ³⁹ Na paduahon on pe dos do pakon in: Maningon haholonganmu do hasomanmu doskon dirimu. ⁴⁰ Titah na dua on do manrimpun sagala titah pakon hata ni nabi-nabi. ⁴¹ Tapi sanggah na martumpu ai ope Parisei ai, isungkun Jesus ma sidea, nini ma: ⁴² Sonaha do pingkiran nasiam pasal Kristus in? Anak ni ise do Ia? Nini sidea ma hu Bani: Anak ni si Daud! ⁴³ Nini ma dompak sidea: Tapi sonaha ma ai, igoran si Daud do Ia Tuhan, niajaran ni Tonduy in, ai ihatahon do: ⁴⁴ Nini Tuhan in do dompak Tuhanku: Hundul ma Ho hu siamunKu, paima Hubahen munsuhMu sidogei-dogeian ni naheiMu! ⁴⁵ Anggo igoran si Daud do Ia Tuhan, sonaha ma Ia anakni? ⁴⁶ Jadi ise pe lang na boi mambalosiSi, anjaha humbani panorang ai nari sahalak pe lang be na pag manungkunSi.

¹ Dob ai iparsahapkon Jesus ma halak na mabuei ai ampa susianNi, ² nini ma: Kursi ni si Musa do na hinundulan ni sibotoh surat pakon Parisei. ³ Halani ai, horjahon anjaha irikkon nasiam ma sagala niajarhon ni sidea bani nasiam, tapi ulang ma usihi nasiam pambahenan ni sidea, ai mangkatahon do hansa sidea, seng dong anggo ihorjahon. ⁴ Irahuti sidea do siboanon na borat, anjaha iampeihon ma ai bani abara ni jolma, tapi sidea sandiri marhitei jari-jari pe seng ra manggiut ai. ⁵ Sagala pambahenan ni sidea ihorjahon sidea do, ase iidah jolma. Halani ai ipabolag sidea do tali tonggo ni sidea anjaha ipaganjang rambu ni pakeianni. ⁶ Marosuh do sidea, hundul bani ianan na sangap bani parpestaan, sonai homa bani hundulan lobei-lobei bani parguruan, ⁷ ambahni ai, bani tabi ni halak i tiga, anjaha ase igoran halak sidea rabbi (guru). ⁸ Tapi anggo nasiam, ulang ma ra nasiam igoran halak rabbi (guru), ai sada do Guru bani nasiam, anjaha na marsanina do nasiam ganup. ⁹ Ulang ma parbapa nasiam atap ise i tanoh on, ai sada do Bapa nasiam, ai ma na i nagori atas ai. ¹⁰ Ulang ma homa ra nasiam goranon pambobai, ai sada do Pambobai nasiam, ai ma Kristus in. ¹¹ Tapi barang ise sisangapan i tongah-tongah nasiam, ia ma sipangidangi bani nasiam. ¹² Ai barang ise na pagijang dirini, sipatoruhon do, tapi barang ise na patoruh dirini, ai do sipagijangon. ¹³ Bursik ma nasiam sibotoh surat ampa Parisei, nasiam sipakulah-kulah, ai itutup nasiam do harajaon nagori atas in i lobei ni jolma. Nasiam sandiri seng masuk, anjaha halak, na sihol masuk ilanglangi nasiam do masuk. ¹⁴ Bursik ma nasiam sibotoh surat ampa Parisei, nasiam sipakulah-kulah, ai ibondut nasiam do rumah ni naboru na mabalu marhitei tonggo sipakulah-kulah na ganjang-ganjang. Halani ai borat do uhum na mangonai bani nasiam. ¹⁵ Bursik ma nasiam sibotoh surat pakon Parisei, nasiam sipakulah-kulah, na mandalani laut ampa tanoh, laho manarik pala sahalak bani ugama nasiam, anjaha dob saud ia masuk, gabe anak ni naraka do ia ibahen nasiam, lompit dua jahatan humbani nasiam. ¹⁶ Bursik ma nasiam pambobai na mapitung, na mangkatahon: Barang ise na marbija hu rumah panumbahan seng mahua ai, tapi barang ise na marbija hu omas na i rumah panumbahan, ai do na hona sibijaon. ¹⁷ E nasiam na oto anjaha na mapitung! Na ija do sisurungan, omas ai do atap rumah panumbahan na papansingkon omas ai? ¹⁸ Ambahni ai ihatahon nasiam do: Na marbija hu anjap-anjap seng mahua ai, tapi barang ise na marbija hu galangan na i atasni ai, ai do na hona sibijaon. ¹⁹ E nasiam na mapitung! Na ija do sisurungan, galangan ai do atap anjap-anjap na papansingkon galangan ai? ²⁰ Barang ise na marbija hu anjap-anjap marbija do ai hujai ampa hu haganup na i atasni ai. ²¹ Na marbija hu rumah panumbahan, marbija do ai hujai ampa hubani na mangiankon ai. ²² Na marbija hu nagori atas, marbija do ai hu paratas ni Naibata, ampa hubani na manghunduli ai. ²³ Bursik ma nasiam sibotoh surat ampa Parisei, nasiam sipakulah-kulah! Igalar nasiam do parsapuluhan ni hosaya, humangei ampa huning, tapi tading do ibahen nasiam titah siharganan, ai ma hapintoron, idop ni uhur ampa habujuron. Sihorjahononkon do na sada on, tapi ulang tading na legan. ²⁴ Nasiam pambobai na mapitung! Itapis nasiam do rongit hu darat, tapi anggo unta ibondut nasiam do. ²⁵ Bursik ma nasiam sibotoh surat pakon Parisei, nasiam sipakulah-kulah! Ai ipaborsih nasiam do darat ni mangkuk ampa pinggan, hape ibagas gok do ai marisi panrampokon ampa uhur haut. ²⁶ E Parisei na mapitung! Parbagas ni panginuman in ma lobei borsih, ase borsih age pardaratni ai. ²⁷ Bursik ma nasiam sibotoh surat pakon Parisei, nasiam sipakulah-kulah! Ai usih do nasiam bani tanoman na hinapur, na dear idahon hun darat, tapi ibagas gok holi-holi ni na matei ampa sagala na mabutak. ²⁸ Sonai do homa nasiam, pintor idahon ni halak hun darat, tapi gok do sipakulah-kulah ampa hajahaton ibagas. ²⁹ Bursik ma nasiam sibotoh surat pakon Parisei, nasiam sipakulah-kulah! Ai ipauli nasiam do tanoman ni nabi-nabi, anjaha ipajagar nasiam do tugu ni halak parpintor. ³⁰ Nini nasiam: Ambit manggoluh hanami bani panorang ni ompung-ompungnami, seng anjai dihut hanami parsalah bani daroh ni nabi-nabi ai! ³¹ Ase isaksihon nasiam do hape, anak ni sibunuh nabi-nabi ai do nasiam! ³² Ai pe, goki nasiam ma suhat-suhat hajahaton ni ompung nasiam! ³³ Nasiam ulog anjaha anak ni ulog darih! Sonaha ma panlembangi nasiam bani uhuman ni naraka? ³⁴ Halani ai, tonggor ma, Ahu do marsuruh bani nasiam nabi-nabi, halak na maruhur ampa sibotoh surat, deba humbani sidea bunuhon anjaha parsilangkonon nasiam do, anjaha deba nari humbani sidea lonsingan nasiam do i rumah parguruan nasiam anjaha parburuon nasiam hun huta na sada hu huta na sada nari, ³⁵ ase mangonai bani nasiam ma sagala daroh ni halak parpintor, na madurus i tanoh on, olat ni daroh ni si Abel na pintor ai ronsi daroh ni si Sakarias, anak ni si Barakya, na binunuh nasiam i holang-kolang ni rumah panumbahan ampa anjap-anjap ai. ³⁶ Sintong do na Huhatahon on bani nasiam: Haganupan in mangonai do bani bangsa on! ³⁷ Jerusalem, Jerusalem, sibunuh nabi-nabi, anjaha sipargijig na sinuruh marayak ham! Domma piga hali sihol patumpuonKu anakmu, songon indung ni dayok patumpuhon anakni hu toruh ni habongni, tapi seng ra ham. ³⁸ Tonggor ma, maningon tarulang ma rumah nasiam. ³⁹ Ai Huhatahon ma bani nasiam, seng idahon nasiam be Ahu humbani sonari nari, paima ihatahon nasiam: Pinasu-pasu ma na roh ibagas Goran ni Tuhan!

¹ Dob ai laho ma Jesus luar hun rumah panumbahan ai. Jadi iparayak susianNi ai ma Ia, anjaha ipatuduhkon sidea ma Bani rumah-rumah na masuk hu rumah panumbahan ai. ² Tapi nini ma hubani sidea: Iidah hanima do ganupan in? Sintong do na Huhatahon on bennima: Seng paturuton ijai dua batu patindih na so rosakkononkon. ³ Sanggah hundul Ia i dolog Jetun ai, roh ma pulig susian ai hu Bani, nini ma: Patugah Ham ma bennami, antigan ma masa ai, anjaha aha ma tanda ni parohMu ampa ajal ni dunia on? ⁴ Jadi nini Jesus ma mambalosi sidea: Jaga ma, ulang ma ipakahou halak hanima! ⁵ Ai buei do halak na roh marhitei goranKu, na mangkatahon: "Ahu do Kristus" jadi buei ma na kahou bahenon ni sidea. ⁶ Tapi bogeionnima ma pasal porang ampa barita ni porang. Jaga, ulang tarsonggot hanima, ai maningon masa do ai, tapi seng ope ai ujungni. ⁷ Ai marsilawanan do bangsa dompak bangsa, anjaha harajaon dompak harajaon, masa ma lohei ampa lalou bani buei nagori. ⁸ Tapi haganupan ai mungkah ni pangarouon ai ope. ⁹ Ondoskonon ni halak do hanima, ase iarsik anjaha ibunuh; anjaha domdoman ni sagala bangsa do hanima halani goranKu. ¹⁰ Jadi buei ma halak na marbalik, gabe marsitahi-tahian anjaha marsidomdoman ma. ¹¹ Buei ma marrohan nabi sipakulah-kulah, anjaha buei do na kahou ibahen. ¹² Jadi halani martambah-tambah hajahaton, lambin borgohni ma holong ni uhur ni jolma bueinan. ¹³ Tapi barang ise na tahan das hu ujung, ai do na maluah. ¹⁴ Anjaha ambilankononkon do Ambilan Namadear on pasal Harajaon in i sab dunia on, laho manaksihon bani haganup bangsa, dob ai pe ase roh ujungni. ¹⁵ Halani ai, anggo iidah hanima ma bani ianan na mapansing in hasamboron na majangin ai, na dob nilumbahon ni nabi Daniel (iparuhurhon na mambasa on ma ai), ¹⁶ jadi maporus ma halak na i Judea hu dolog. ¹⁷ Halak na i atas ni rumahni, ulang pala be tuad mangalop ugas-ugasni hun rumah ai. ¹⁸ Na i juma ulang be mulak hu rumah mangalop pakeianni. ¹⁹ Tapi bursik ma na boratan rumah ampa na painumhon dakdanak bani panorang ai. ²⁰ Tapi martonggo ma hanima ase ulang ma sanggah musim borgoh atap ari Sabat hanima na maporus ai. ²¹ Ai banggal tumang do haparngiton ai, humbani mungkah ni dunia on ronsi sonari seng ongga masa ope na sonai ai, anjaha seng masa be na sonai. ²² Anjaha, ambit seng ipapondok ari ai, sahalak pe seng adong na maluah. Tapi halani na tarpilih in do, ase ipapondok ari ai. ²³ Anjaha anggo adong na mangkatahon bennima: "Tonggor ma, ijon do Kristus in", atap: "Ijai do Ia," ulang ma porsaya hanima. ²⁴ Ai na roh do Kristus siparladung ampa nabi siparladung, mambahen tanda na banggal ampa halongangan, laho pakahouhon na dob tarpilih in, ambit na tarbahen. ²⁵ Tonggor ma, domma Hupalumba hinan hanima. ²⁶ Halani ai, anggo adong na mangkatahon bennima: "I halimisan do Ia," ulang ma laho hanima hujai. Atap ihatahon sidea: "I kamar do Ia," ulang ma porsaya hanima! ²⁷ Ai songon hilap na mardejeb i hapoltakan anjaha marsinalsal das hu hasundutan, sonai do parroh ni Anak ni Jolma in. ²⁸ Ai ija adong bangkei, hujai do roh marurup haluhuy. ²⁹ Tapi sompong, salpuhonsi haparngiton na bani panorang ai, manggolapi ma mata ni ari, seng be ibere bulan sinalsalni, mardabuhan ma bintang-bintang hun langit, anjaha dugur ma hagogohon ni parlangitan. ³⁰ Jadi taridah ma i langit tanda ni Anak ni Jolma in, gabe mandoruhi ma ganup bangsa na i tanoh on, ai idahon ni sidea ma Anak ni Jolma in roh i atas ni hombun ni langit, marhasoman hagogohon ampa hasangapon banggal. ³¹ Anjaha suruhonNi ma malekatNi martarompet na gogoh parsorani, jadi patumpuon ni sidea ma halak na dob pinilih ai humbani desa na ualuh in, hun ujung ni langit na sada das hubani na sada nari. ³² Tapi humbani hayu ara an ma hanima marguru: Anggo martunasi ma anjaha marbulungi ibotoh hanima do, paboa dohor ma partahunan milas. ³³ Sonai ma homa, anggo iidah hanima ma masa ai, botoh hanima ma, paboa dohor ma ai. ³⁴ Sintong do na Huhatahon on bannima: Seng anjai salpu na sasundut on paima masa haganupan ai. ³⁵ Ai na laho salpu do langit pakon tanoh on, tapi anggo hatangKu seng anjai salpu. ³⁶ Tapi anggo pasal arini ampa panorangni, seng dong na mambotohsi, age malekat na i nagori atas, age Anak in; pitah Bapa in do. ³⁷ Ai songon sanggah panorang ni si Noak, sonai do parroh ni Anak ni Jolma in. ³⁸ Ai sanggah lape roh bah na sumbang ai, marmangan-mangan anjaha marminum-minum do sidea, marunjuk anjaha palahohon, paima jumpah ari parmasuk ni si Noak hu bagas parau ai, ³⁹ anjaha lanjar do seng mambotoh sidea pasal ai, ronsi na roh bah na sumbang ai mangogapkon sidea haganup. Usih hujai do parroh ni Anak ni jolma in. ⁴⁰ Bani panorang ai adong ma dua halak i juma, na sada ijalo, na sada nari itadingkon. ⁴¹ Dua halak rap manduda, na sada ijalo, na sada nari itadingkon. ⁴² Ai pe, jaga ma hanima, ai seng ibotoh hanima ari parroh ni Tuhannima! ⁴³ Tapi ingat hanima ma on: Ambit ibotoh tuan rumah pukul piga borngin roh panangko, tontu marjaga-jaga do ia, anjaha lang palopasonni rumahni hona bongkar. ⁴⁴ Halani ai tagam ma hanima, ai na roh ma Anak ni jolma in bani panorang na so niagaknima. ⁴⁵ Ai ise do juak-juak na bujur anjaha na maruhur, na pinabangkit ni tuanni, laho mambere jabolonni mangan bani panorangni? ⁴⁶ Martuah ma juak-juak, na mangkorjahon sonai jumpah tuanni bani parrohni ai. ⁴⁷ Sintong do na Huhatahon on bennima: Pabangkitonni ma ia manramotkon haganup na dong bani. ⁴⁸ Tapi anggo juak-juak na jahat do ia, na marsahap ibagas uhurni: "Dokah ope ase roh tuankai", ⁴⁹ gabe ipungkah ma mangarsik hasomanni juak-juak anjaha mangan minum rap pakon parmabuk, ⁵⁰ jadi rohkonsi tuanni bani panorang na so niagakni, anjaha bani panorang na so binotohni, ⁵¹ gabe agouhononni ma ia, anjaha bereonni ma bani parbagianan dos pakon sipakulah-kulah. Ijai ma masa partangison ampa na patungosngoson.

¹ Anjaha tarpausih do harajaon nagori atas ai hubani sapuluh anak boru, na bingkat marsiboan suluhni, laho mangalo-alo siparunjuk. ² Lima humbani sidea na oto do, tapi na lima nari maruhur do. ³ Ia na oto ai iboan do namin suluhni, tapi seng mamboan minak sidea. ⁴ Tapi anggo na maruhur ai, iboan do minak bani iananni rap pakon suluh ni sidea. ⁵ Halani dokah ase roh siparunjuk ai, tartunduh ma sidea haganup lanjar tarpodom. ⁶ Tapi tongah borngin, adong ma na dilo-dilo: Tonggor ma, siparunjuk in! Roh ma mangalo-alosi! ⁷ Jadi puho ma ganup anakboru ai, anjaha ipasirsir bei ma suluhni. ⁸ Nini naboru na oto ai ma bani na maruhur ai: Bere nasiam ma deba minak nasiam in, ai na laho miloh ma suluhnami! ⁹ Tapi nini na maruhur ai ma mambalosisi: Lang! Seng sungkup holi bannami ampa bani nasiam. Dearan ma boli nasiam bani nasiam humbani panjual minak. ¹⁰ Tapi sanggah na laho ai ope sidea mamboli minak, roh ma siparunjuk ai, jadi masuk ma na dob sirsir ai hinan rap pakonsi hu pesta parunjukan ai, anjaha itutup ma labah ai. ¹¹ Salpu ai roh ma naboru na legan ai, nini ma: Ham tuan, ham tuan, buha ham ma labah on bennami! ¹² Tapi nini mambalosi: Sintong do hatangkon bennima: Seng hutandai hanima! ¹³ Halani ai jaga ma hanima, ai seng ibotoh hanima arini pakon panorangni. ¹⁴ Usih do homa ai bani sada halak, na laho mardalani hu nagori na legan, gabe idilo ma juak-juakni, laho mangondoskon artani bani sidea. ¹⁵ Ibere ma bani na sada lima talenta, bani na sada nari dua, anjaha bani na legan use sada, ganup domu hubani gogohni, dob ai misir ma ia. ¹⁶ Mintor do laho sijalo na lima talenta ai, mantiga-tigahon ai, gabe dapotsi ma lima talenta. ¹⁷ Sonai homa sijalo na dua talenta ai, dapotsi do dua talenta. ¹⁸ Tapi anggo na manjalo na sada talenta ai ihurak ma tanoh, laho mamonopkon duit ni tuanni ai. ¹⁹ Dob dokah mulak ma tuan ni juak-juak ai, anjaha ibahen ma parhiraan pakon sidea. ²⁰ Jadi roh ma na manjalo silima talenta ai, anjaha ibere ma na lima talenta nari ai, nini ma: Tuannami, lima talenta do ipadas ham bakku; tonggor ma, lima talenta nari na husari. ²¹ Nini tuanni ai ma hubani: Dear ma ai, ale juak-juak sidear uhur anjaha hatengeran. Hatengeran ni uhur do ho bani na otik, ondoskononku ma buei hubam. Masuk ma ho hubagas pesta malas ni uhur ni tuanmu! ²² Dob ai roh ma na manjalo sidua talenta ai, nini ma: Tuannami, dua talenta do ipadas ham bakku, tonggor ma, dua talenta nari na husari! ²³ Nini tuanni ai ma hubani: Dear ma ai, ale juak-juak sidear uhur anjaha hatengeran. Hatengeran ni uhur do ho bani na otik, ondoskononkon ma buei hubam. Masuk ma ho hu bagas pesta malas ni uhur ni tuanmu! ²⁴ Roh ma homa na manjalo sisada talenta ai, nini ma: Tuannami, hubotoh paruhur na koras do ham, na manabi na so sinuanmu anjaha na patumpuhon na so tinidahkonmu. ²⁵ Jadi mabiar do ahu, gabe laho ma ahu mamonophon talentamu ai hu bagas, tanoh. Nam ma artamu on! ²⁶ Tapi nini tuanni ai ma mambalosisi: E ho juak-juak na jahat anjaha parrayoh! Ibotoh ho do hape, ahu manabi na so sinuanku, anjaha patumpuhon na so tinidahkonku. ²⁷ Anggo sonai, ai lang patut ma namin pasimpankononmu duitkon hubani halak sipabungahon duit, ase hujalo in rap pakon bungani bani parrohku? ²⁸ Ai pe, buat nasiam ma talenta in, anjaha bere nasiam ma hubani simada na sapuluh ai. ²⁹ Ai bereon do bani ganup na marnadong ase marlobih-lobih ia, tapi sibuaton do humbani na so marnadong na adong bani hinan. ³⁰ Anjaha usir nasiam ma juak-juak na so margagan in hubani na golap marimpot-impot! Ijai ma masa partangison ampa na patungosngoson. ³¹ Tapi anggo roh ma Anak ni Jolma in ibagas hasangaponNi rap pakon haganup malekatNi, hundulanNi ma ijai paratas hasangaponNi ai. ³² Dob ai martumpu ma hu lobeiNi haganup bangsa, jadi sirangonNi ma sidea songon pambahen ni parmahan na manirang biri-biri boru-boru humbani biri-biri tunggal. ³³ Jadi pajongjongonNi ma boru-boru ai hu siamunNi, tapi bajar ai hu sambilouNi do. ³⁴ Dob ai hatahonon ni Raja ai ma hubani na i siamunNi ai: Roh ma nasiam na pinasu-pasu ni BapangKu, jalo nasiam ma harajaon in, na dob pinasirsir bani nasiam humbani mula ni tanoh on! ³⁵ Ai na loheian do Ahu, ibere nasiam do Ahu mangan, na horahan do Ahu, ibere nasiam do Ahu minum; na mampar-ampar do Ahu, iarahkon nasiam do Ahu; ³⁶ seng marhiou Ahu, gabe iparhioui nasiam do Ahu; na boritan do Ahu, gabe itorih nasiam do Ahu, anjaha na tartutup do Ahu, gabe roh do nasiam marayak Ahu. ³⁷ Dob ai hatahonon ni parpintor ai ma mambalosisi: Tuhan, nantigan iidah hanami Ham loheian, gabe ibere hanami Ham mangan, barang horahan, gabe ibere hanami Ham minum? ³⁸ Nantigan iidah hanami Ham mampar-ampar, gabe ijalo hanami Ham, barang seng marhiou, gabe iparhioui hanami Ham? ³⁹ Nantigan iidah hanami Ham boritan barang tartutup, gabe iparayak hanami Ham? ⁴⁰ Dob ai balosan ni Raja ai ma sidea: Sintong do na Huhatahon on bani nasiam: Haganup na binahen nasiam bani sada halak anggingKu na etek-etek on, na hu Bakku do in ibahen nasiam. ⁴¹ Dob ai hatahononNi ma bani na i sambilouNi ai: Misir ma nasiam hum Bakku, nasiam na binuraan, hubani apuy sisadokah ni dokahni, na pinasirsir bani sibolis ampa bani malekatni. ⁴² Ai na loheian do Ahu, seng ibere nasiam mangan, na horahan do Ahu, seng ibere nasiam minum. ⁴³ Na mampar-ampar do Ahu, seng iarahkon nasiam Ahu, na so marhiou do Ahu, seng iparhioui nasiam; na boritan do Ahu anjaha tartutup, seng itorih nasiam. ⁴⁴ Sidea pe balosan ni sidea ma Ia, nini ma: Tuhan, nantigan iidah hanami Ham loheian, horahan, mampar-ampar, seng marhiou, boritan anjaha tartutup, hape lang ipatorsa-torsa hanami Ham? ⁴⁵ Dob ai hatahononNi ma mambalosi sidea: Sintong do na Huhatahon on bani nasiam, na so binahen nasiam age aha bani sada halak na etek-etek on, hu Bakku do na so binahen nasiam ijai. ⁴⁶ Jadi misir ma sidea hubani na maparngit sadokah ni dokahni, tapi halak parpintor ai hu hagoluhan sadokah ni dokahni.

¹ Ase dob marujung ihatahon Jesus haganup hata ondi, nini ma dompak susianNi: ² Ibotoh hanima do, haduan ma pesta Paska, ijai ma ondoskononkon Anak ni jolma in, ase iparsilangkon. ³ Martumpu ma ijia sintua ni malim ampa pangintuai ni bangsa ai hu rumah ni sintua ni malim Kayafas; ⁴ manriah ma sidea atap akal ja do bahenon, laho manangkap Jesus ampa mamunuhSi. ⁵ Jadi ihatahon sidea ma: Ulang ma bani pesta ai, ase ulang geor halak na mabuei in. ⁶ Sanggah i huta Betania Jesus, i rumah ni si Simon, na gadamon ai, ⁷ roh ma hu Bani sada naboru mamboan botol, na marisi minak na maharga tumang, lanjar iuseihon ma ai bani uluNi, sanggah mangan Ia. ⁸ Mangidah ai susian ai, sogam ma uhur ni sidea, nini ma: Rugi ni in! ⁹ Boi do harga jualon in, anjaha bolini ai ibere bani na masombuh. ¹⁰ Tapi ibotoh Jesus do ai, gabe nini ma dompak sidea: Mase ma isunsahi hanima puang-puang on? Pambahenan na madear do na binahenni in Bakku. ¹¹ Ai tongtong do adong na masombuh rap pakon hanima, tapi anggo Ahu, seng tong-tong rap pakon hanima. ¹² Ai iuseihon pe minak ai bani angkulangKu, ibahen do ai na songon pananomHu. ¹³ Sintong do na Huhatahon on bennima: Ija pe iambilankon Ambilan Namadear on i sab dunia on, baritahononkon do age na binahenni on, gabe pardingatan bani. ¹⁴ Dob ai laho ma sada halak humbani na sapuluh dua ai, ai ma na margoran si Judas Iskariot, marayak sintua ni malim, ¹⁵ nini ma: Aha sihol bereon nasiam bakku, ase hupadas Ia bani nasiam? Jadi igalar sidea ma bani tolu puluh duit pirak. ¹⁶ Anjaha hunjai nari ipindahi uhurni ma panorang na dearhonsi, laho mantahihon Jesus. ¹⁷ Bani ari parlobei ni mangankon ruti na so niigaran, roh ma susian ai bani Jesus, nini ma: Ija do ipangindo uhurMu pasirsironnami Bamu panganon Paska ai? ¹⁸ Jadi nini ma: Laho ma hanima hu huta in, marayak si anu, anjaha hatahon ma hubani: Hata ni guru in: Dohor ma panorangKu, ibagas rumahmu do Ahu sihol mangan Paska rap pakon susianKu. ¹⁹ Jadi ibahen susian ai ma songon na hinatahon ni Jesus bani sidea; iugaskon sidea ma panganon Paska ai. ²⁰ Ase dob bod ari hundul ma Ia mangan rap pakon susianNi na sapuluh dua ai. ²¹ Sanggah na mangan ai sidea, nini ma: Sintong do na Huhatahon bennima: Sada humbennima sihol mantahihon Ahu! ²² Jadi pusok tumang ma uhur ni sidea, gabe ipangkatahon sidea bei ma hu Bani: Sedo ahu ai? ²³ Jadi nini ma mambalosi: Na manurdukkon tanganni rap pakon Ahu hu bagas pinggan, ai ma na mantahihon Ahu. ²⁴ Tong do namin ujung ni Anak ni jolma in, songon na dob tarsurat hinan, tapi bursik ma halak na mantahihon Anak ni jolma in. Rahanan ma namin, ambit ulang tubuh jolma na sonai ai. ²⁵ Dob ai si Judas pe, na mantahihonsi ai, marsahap ma: Ai ahu do ai, Guru? Jadi nini Jesus ma hubani: Ho do ai, songon na hinatahonmai ²⁶ Jadi sanggah na mangan ai sidea, ibuat Jesus ma ruti, ipasu-pasu ma, iponggoli anjaha ibere ma hubani susianNi, lanjar ihatahon: Jalo hanima ma, anjaha pangan ma, dagingKu do on! ²⁷ Dob ai ibuat ma panginuman ai, ihatahon ma tarima kasih, ibere ma ai bani sidea, lanjar ihatahon: Haganup ma hanima manginum hunjin! ²⁸ Ai darohKu do on, daroh parpadanan, na niuseihon mangkopkop buei jolma, bahen hasasapan ni dousa. ²⁹ Tapi Huhatahon ma bennima: Seng be inumonKu humbani sonari nari humbani buah ni hayu anggur on das hubani panorang ai, ijai ma inumonKu na baru rap pakon hanima ibagas harajaon ni BapangKu. ³⁰ Jadi dob idodingkon sidea doding puji-pujian ai, luar ma sidea laho hu dolog Jetun. ³¹ Jadi nini Jesus ma dompak sidea: Haganup do hanima sangsi Bakku saborngin on, ai tarsurat do. LonsinganKu ma parmahan in, gabe marserak ma biri-biri na sahulanan in. ³² Tapi dob puho Ahu humbani na matei, lobeianKu ma hanima hu tanoh Galilea. ³³ Jadi nini si Petrus ma mambalosiSi: Age pe ganup sidea sangsi Bamu, anggo ahu seng anjai sangsi. ³⁴ Nini Jesus ma hubani: Sintong do Hatangkon bam: Ibagas borngin on, paima martahuak dayok, tolu hali do Ahu parnalangonmu. ³⁵ Nini si Petrus ma hu-Bani: Age pe ipamatei ahu rap pakon Ham, seng parnalangonku Ham. Sonai do homa hatani haganup susian ai. ³⁶ Dob ai das ma Jesus rap pakon susian ai hu sada pohon na margoran Getsemane. Nini ma hubani susianNi: Hundul ma hanima lobei ijon, sadokah laho Ahu martonggo ijai. ³⁷ Jadi iarahkon ma rap pakonSi si Petrus ampa anak ni si Sebedeus na dua ai. Sogop ma hu Bani pusok ni uhur ampa habulinsahon, ³⁸ gabe nini ma hubani sidea: Pusok tumang do uhurHu, hira na matei do. Ijon ma hanima, anjaha puho ma hanima rap pakon Ahu. ³⁹ Laho ma Ia otik dompak lobei, manrogop ma Ia martonggo, nini ma: Ham BapangKu, anggo boi, salpuhon Ham ma panginuman on hum Bakku! Tapi seng marguru hubani rosuhKu, tapi marguru bani rosuhMu do. ⁴⁰ Dob ai mulak ma Ia hubani susianNi ai, tarpodom do sidea jumpahSi, gabe nini ma dompak si Petrus: Seng tarbahen hanima hape puho rap pakon Ahu pala sajam? ⁴¹ Jaga ma anjaha puho ma, ase ulang masuk hanima hu parlajouan. Hinsah do namin tonduy, tapi galek do anggo daging. ⁴² Dob ai laho ma Ia padua-halihon martonggo, nini ma: Ham BapangKu, anggo seng boi salpu panginuman on, anggo na maningon inumonKu do, sai saud ma harosuh ni uhurMu. ⁴³ Mulak ma Ia use, gabe jumpahSi ma sidea tarpodom, ai borat do salibon ni sidea. ⁴⁴ Jadi itadingkon ma sidea, iulakkon ma martonggo patolu halihon, ihatahon ma hata nongkan ai. ⁴⁵ Dob ai laho ma Ia manjumpahkon susianNi ai, nini ma dompak sidea: Nunutonnima ope modom ampa marsaran? Tonggor ma, domma dohor panorangni, ondoskononkon ma Anak ni jolma in hu tangan ni pardousa. ⁴⁶ Jongjong ma hanima, laho ma hita! Tonggor ma, domma dohor na sihol mantahihon Ahu. ⁴⁷ Sanggah na mangkatahon ai ope Ia, tonggor ma, roh ma si Judas, sada humbani na sapuluh dua ai, rap pakon buei halak na marpodang anjaha manjolom bogbog-bogbog, sinuruh ni sintua ni malim ampa pangintuai ni bangsa ai. ⁴⁸ Ia sipartahi-tahi ai domma ibere hinan tanda bani sidea, nini: Ia in na husummah, ai ma Ia, tangkap nasiam ma! ⁴⁹ Jadi mintor idohori ma Jesus, nini ma: Tabi ma Bamu, Guru! lanjar isummah ma Ia. ⁵⁰ Tapi nini Jesus ma hu-Bani: Mangaha ho hujon, ambia? Dob ai marrohan ma sidea, ilaluhon sidea ma tanganni bani Jesus laho manangkapSi. ⁵¹ Anjaha tonggor ma, sada halak humbani na mangirikkon Jesus palaluhon tanganni, isintak ma podangni, lanjar itampulhon ma ai bani sada halak juak-juak ni sintua ni malim, gabe mistak ma pinggolni. ⁵² Jadi nini Jesus ma hubani: Sarungkon ma podangmin! Ai sagala na manampulhon podang, magou do bahenon ni podang. ⁵³ Ai na so tarbahen Ahu do, nini uhurmu, mangindo humbani BapangKu, ase ipasirsir Bakku sonari lobih humbani sapuluh dua loksa malekat? ⁵⁴ Tapi sonaha ma saud na hinatahon ni surat in, na mangkatahon, paboa na maningon masa do sonon? ⁵⁵ Bani panorang ai ma ihatahon Jesus bani halak na mabuei ai: Songon na laho manangkap panrampok do nasiam roh manjumpahkon Ahu, marpodang anjaha manjolom bogbog-bogbog. Ari-ari do namin hundul Ahu i rumah panumbahan mangajari, tapi seng itangkap nasiam Ahu. ⁵⁶ Tapi masa do ganup on, ase jumpah na hinatahon ni nabi-nabi. Jadi haganup ma susianNi ai manadingkonSi, laho maporus. ⁵⁷ Ase dob itangkap sidea Jesus, iboan sidea ma Ia hubani sintua ni malim Kayapas, ai domma martumpu ijai sibotoh surat ampa pangintuai-pangintuai. ⁵⁸ Tapi iirikkon si Petrus do Ia mandaoh-daoh das hu alaman ni sintua ni malim ai. Masuk ma ia hubagas lanjar hundul pakon juak-juak ai, laho mangidah atap sonaha ujungni. ⁵⁹ Tapi anggo sintua ni malim ai ampa haganup anggota ni Pangadilan Tinggi ai mangindahi hasaksian ladung do dompak Jesus, ase boi Ia marutang hosah. ⁶⁰ Tapi seng dong dapot sidea, age pe buei na mambere hasaksian ladung. Dobni adong ma dua halak, ⁶¹ na mangkatahon: Ihatahon halak on do: Tarbahen Ahu do manrumbakkon rumah ni Naibata, anjaha pajongjongkon ai use ibagas tolu ari. ⁶² Jadi jongjong ma sintua ni malim ai, ninima dompakSi: Ai seng balosanMu na sinaksihon ni sidea ai dompak Ho? ⁶³ Tapi sai sip do Jesus. Dob ai nini sintua ni malim ai ma hu Bani: Hupabija ma Ho bani Naibata na manggoluh in, ase ipatugah Ho bennami, barang na tongon do Ho Kristus, Anak ni Naibata! ⁶⁴ Nini Jesus ma hubani: Songon na hinatahonmu ai ma tongon! Tapi Huhatahon ma bani nasiam: Humbani sonari nari, idahon nasiam ma Anak ni jolma in hundul i siamun ni Pargogoh in, anjaha roh iatas ni hombun ni langit. ⁶⁵ Jadi irigatkon sintua ni malim ai ma bajuNi, nini ma: Iapasi do Naibata! Pindahan ope saksi? Tonggor ma, domma ibogei nasiam pangapasionNi in! ⁶⁶ Naha do nini uhur nasiam? Jadi nini sidea ma mambalosi: Maningon marutang hosah do Ia! ⁶⁷ Jadi itijuri sidea ma bohiNi anjaha itenjui. Na legan mamastapiSi, lanjar ihatahon: ⁶⁸ Manjahai ma Ho bannami, ale Kristus, ise do na mamastap Ho? ⁶⁹ Ia si Petrus hundul do i darat i alaman ai. Jadi roh ma sada naboru manjumpahkonsi, nini ma: Ho pe hasoman ni Jesus na hun Galilea ai do! ⁷⁰ Jadi iporsou ma i lobei ni sidea haganup, nini ma: Seng hubotoh na hinatahonmu ai! ⁷¹ Sanggah na luar ia hu horbangan ai, iidah sada naboru na legan ma ia, nini ma dompak halak na ijai ai: On ma sada hasoman ni Jesus, na hun Nasaret ai! ⁷² Jadi iulaki ma mamorsou, pala marbija: Seng hutandai Halak ai! ⁷³ Tapi tongkin nari, marrohan ma na ijai ai manjumpahkon si Petrus, nini sidea ma dompaksi: Tongon, dihut do ho sada humbani sidea, ai parsahapmai do patandahon ho! ⁷⁴ Jadi mamura-murai ampa marbijai ma ia, nini ma: Seng hutandai Halak ai! Jadi mintor martahuak ma dayok. ⁷⁵ Gabe idingat si Petrus ma na hinatahon ni Jesus hubani: Paima martahuak dayok, tolu hali do porsouonmu Ahu. Dob ai laho ma ia hu darat tangis sosombopon.

¹ Siangkonsi ari, manriah ma haganup sintua ni malim pakon pangintuai-pangintuai ni bangsa ai pasal Jesus, laho pamateihonsi. ² Isangkut ma Ia anjaha iboan, laho mangondoskonSi bani si Latus, panggomgomi ai. ³ Dob iidah si Judas, na mantahihonSi ai, na hona uhum do hape Ia, manosal ma ia, ipaulak ma sitolu puluh pirak ondi bani sintua ni malim ampa pangintuai-pangintuai, ⁴ nini ma: Domma mardousa ahu, daroh ni Halak na so marsalah do hutahihon! Tapi nini sidea ma: Seng urusannami ai! Ho ma na pabotoh-botoh ai! ⁵ Jadi isampakkon ma pirak ai hubagas rumah panumbahan ai, dob ai laho ma ia mandoloskon dirini. ⁶ Tapi ibuat sintua ni malim ma duit ai, nini ma: Seng bulih pamasukon in hubagas parartaan ni rumah panumbahan, ai boli ni daroh do in! ⁷ Dob manriah sidea, ibolihon sidea ma ai bani tanoh ni sipauli hudon bahen tanoman ni halak dagang. ⁸ Halani ai do, ase igoran ianan ai tanoh daroh ronsi sadari on. ⁹ Gabe jumpah ma hata ni nabi Jeremia, na mangkatahon: Ibuat sidea ma duit pirak na tolu puluh ai, ai ma boli na dob tinontuhon i tongah-tongah ni anak ni Israel, ¹⁰ anjaha ibere sidea ma ai mamboli tanoh ni sipauli hudon, songon na hinatahon ni Tuhan in bakku. ¹¹ Jongjong do Jesus i lobei ni panggomgomi ai, anjaha isungkun panggomgomi ai ma Ia, nini ma: Atene, Ham do raja ni halak Jahudi? Jadi nini Jesus ma: Songon na hinatahonmu ai ma tongon. ¹² Anjaha sanggah na mangadu-adu ai sintua ni malim ampa pangintuai ni bangsa ai dompakSi, seng dong marbalos Ia. ¹³ Jadi nini si Latus ma hu Bani: Ai seng itangar Ham buei ni na sinaksihon ni sidea ai dompak Ham? ¹⁴ Tapi sangkababah hata pe lang ibalosi ia, pala longang tumang panggomgomi ai. ¹⁵ Tapi somal do ipaluah panggomgomi ai bani pesta ai sada halak na tartutup, atap ise na tinodoh ni halak na mabuei ai. ¹⁶ Jadi adong ma ijia sada halak na tartutup na tarbarita hajahatonni, na margoran si Barabas. ¹⁷ Jadi sanggah na tumpu ai sidea, nini si Latus ma dompak sidea: Ise do iparsinta nasiam paluahonku, si Barabas do, atap Jesus, na margoran Kristus? ¹⁸ Ai ibotoh do, halani subil ni uhur ni sidea do, ase iondoskon sidea Ia. ¹⁹ Anjaha sanggah na hundul ai si Latus bani kursi paruhuman ai, martonah ma parinangonni hubani, nini: Ulang das ikahua ham Halak na pintor in, ai susah tumang do huahap na borngin ibagas nipingku marhalanihonSi. ²⁰ Tapi sai iojur-ojur sintua ni malim ampa pangintuai ni bangsa ai do halak na mabuei ai, ase ipangindo sidea paluahon si Barabas, tapi bunuhon anggo Jesus. ²¹ Nini panggomgomi ai ma mambalosi sidea: Ise humbani sidea na dua on iparsinta nasiam paluahonku? Jadi nini sidea ma: Si Barabas! ²² Nini si Latus ma hubani sidea: Jadi, aha ma sibahenonku bani Jesus, na ginoran Kristus? ²³ Haganup do sidea mangkatahon: Parsilangkon ma Ia! ²⁴ Jadi dob iidah si Latus, na so siat be hatani, lambin tambah tene georni, ia pe ibuat ma bah pamurihi tanganni i lobei ni halak na mabuei ai, anjaha nini ma: Seng marsalah ahu pasal daroh ni Halak on! Nasiam ma na pabotoh-botoh in! ²⁵ Nini haganup halak na mabuei ai ma mambalosi: Marsapata bennami ampa bani dakdanaknami pe darohNi ai. ²⁶ Dob ai ipaluah ma si Barabas, tapi anggo Jesus, dob ilonsingi, iondoskon ma bani sidea, ase iparsilangkon. ²⁷ Jadi iboan tentara ni panggomgomi ai ma Jesus hu rumah paruhuman, anjaha ipatumpu sidea ma ganup pasukan ai hu Bani. ²⁸ Itanggali sidea ma hiouNi, anjaha isorungkon ma Bani baju sigerger. ²⁹ Idandan sidea ma duri bahen sortaliNi, itampeihon ma ai bani uluNi; ibere ma tolong bani tangan siamunNi, dob ai marsombah ma sidea hu lobeiNi, laho pahiri-hirihonSi, nini sidea ma: Tabi ma Bamu, ale Raja ni Jahudi! ³⁰ Lanjar itijuri sidea ma Ia, ibuat ma tolong ai humbani tanganNi anjaha ilonsingkon bani uluNi. ³¹ Jadi siapkonsi ipahiri sidea Ia, itanggali sidea ma baju-baju sigerger ai hum Bani, isorungkon sidea ma use bajuNi hinan bani, dob ai iboan ma Ia, ase iparsilangkon. ³² Sanggah na luar sidea, jumpah sidea ma sada halak Kirene, na margoran si Simon, ia ma ipaksa sidea mamorsan hayu parsilangNi ai. ³³ Jadi dob das sidea bani sada ianan, na margoran Golgata (artini partangkurakan), ³⁴ ibere sidea ma Ia minum anggur na marsaor pogu; dob idai, seng ra be Ia minum ai. ³⁵ Dob iparsilangkon sidea Ia, ibagi-bagi sidea ma hiouNi marhitei na manjomput na sinurat; ³⁶ lanjar hundul ma sidea ijai manjagaSi. ³⁷ Ilongkothon sidea do hu atas ni uluni surat, na patugahkon salahNi. Hatani: On do Jesus, Raja ni Jahudi! ³⁸ Rap pakonSi iparsilangkon sidea do dua halak panrampok, sada hampit siamunNi, na sada nari hampit sambilouNi. ³⁹ Anjaha halak na mamontas hunjai pahiri-hirihonSi, anjaha iupir-upirhon uluni, nini: ⁴⁰ E Ho, na sihol parsedahon rumah panumbahan in, anjaha na sihol pajongjongkonsi ibagas tolu ari! Paluah ma diriMu, anggo na tongon do Ho Anak ni Naibata! Turun ma Ho hun hayu parsilang in! ⁴¹ Usih hujai do parpahiri ni sintua ni malim, sibotoh surat ampa pangintuai ni bangsa ai, nini sidea: ⁴² Na legan ipaluah, tapi diriNi sandiri seng tarpaluahSi. Raja ni Israel do Ia, ai pe turun ma Ia hun hayu parsilang in, ase porsaya hanami Bani. ⁴³ Martenger ni uhur do Ia bani Naibata: Ia ma na paluahkonSi sonari, anggo na tongon do Naibata marosuh Bani, ai nini do: Anak ni Naibata do Ahu! ⁴⁴ Lanjar sonai do parpahiri ni panrampok ai, na rap iparsilangkon pakonsi. ⁴⁵ Tapi humbani tongah ari ronsi pukul tolu, golap do sab tanoh in. ⁴⁶ Anjaha hira-hira pukul tolu marsora na gogoh ma Jesus, nini ma: Eli, Eli, lama sabachtani? Artini: Ale NaibatangKu, NaibatangKu, mase ma itadingkon Ham Ahu? ⁴⁷ Mambogei ai, nini deba halak na jongjong ijai ai ma: Na mandilo si Elias do Ia ai! ⁴⁸ Jadi mintor marlintun ma sahalak humbani sidea mangalop limut, isornobkon ma ai bani na migar, anjaha ilongkothon bani tolong laho painumkonSi. ⁴⁹ Tapi na legan mangkatahon: Paturut lobei, ase naidah, atap na roh do si Elias paluahkonSi. ⁵⁰ Iulaki Jesus ma use marsora na gogoh, dob ai iondoskon ma ToduyNi. ⁵¹ Anjaha tonggor ma, marigat ma tirei na i rumah panumbahan ai hun datas hu toruh, bolah dua, anjaha tanoh on dugur, batu gingging mangkabolah, ⁵² tanoman mangkabuha, anjaha puho ma buei halak na mapansing, na dob matei, ⁵³ luar do sidea hun tanoman, dob na puho ai Ia, anjaha laho hu huta na mapansing ai pataridahkon dirini bani buei halak. ⁵⁴ Ase dob iidah kopala ni tentara ai, ampa sidea sijagai Jesus lalou ampa haganup na masa ai, mabiar tumang ma sidea, nini ma: Tongon do Anak ni Naibata Ia! ⁵⁵ Adong do ijai buei naboru, na jongjong manatap-natap humbani na daoh, ai ma na dob mangirikkon Jesus hun Galilea, laho marugas Bani. ⁵⁶ Sidea ai, ai ma si Maria Magdalena, si Maria inang ni si Jakobus ampa si Josep, ampa inang ni anak ni si Sebedeus. ⁵⁷ Jadi dob bod ari, roh ma sada halak na bayak, na margoran si Josep, na hun huta Arimatea, na dob gabe susian ni Jesus. ⁵⁸ Laho ma ia hubani si Latus mangindo bangkei ni Jesus, gabe isuruh si Latus ma na padaskon ai bani. ⁵⁹ Jadi ijalo si Josep ma bangkeiNi, ibaluti ma bani hiou linnen na borsih; ⁶⁰ itibalhon ma ai hu bagas tanomanni sandiri, na baru ope, na pinatuhilhonni bani dolog batu, anjaha dob igulang batu banggal bani babah ni tanoman ai misir ma ia. ⁶¹ Ia si Maria Magdalena ampa si Maria na sada nari, hundul-hundul do ijai, tontang ni tanoman ai. ⁶² Patarni ai, ai ma ari, dob salpu ari parugasan ai, martumpu ma sintua ni malim ampa Parisei hulobei ni si Latus, nini sidea ma: ⁶³ Ham tuan, idingat hanami do, ongga do ihatahon sipangoto-otoi ondi sanggah goluhni: Na puho do Ahu bani ari patoluhon! ⁶⁴ Ai pe, suruh ham ma, ase ijaga tanoman ai das hubani ari patoluhon, ase ulang roh susianni ai manangkonsi, gabe ihatahon hubani halak na mabuei in, na dob puho Ia humbani na matei, gabe samboran use holi sipaoto-oto na parpudi on humbani na parlobei ondi. ⁶⁵ Jadi nini si Latus ma dompak sidea: Adong ma parjaga ai! Laho ma nasiam, jagai nasiam ma ai pangkei-pangkei! ⁶⁶ Dob ai laho ma sidea, ramot ma ibahen tanoman ai marhitei na manlak ai ampa na mambahen parjaga hujai.

¹ Tapi sanggah mulai ope marlangat-langat ari, bani ari parlobei dob salpu Sabat, roh ma si Maria Magdalena ampa si Maria na sada nari manonggor tanoman ai. ² Anjaha tonggor ma, masa do lalou bolon, ai tuad do malekat ni Tuhan hun nagori atas, idohori ma batu ai, iguling ma ai lanjar hundul i atasni. ³ Ia rupani songon hilap do, anjaha pakeianni putih songon salju. ⁴ Jadi hitir-hitir ma parjaga ai ibahen biar ni uhur ni sidea, hira na matei do. ⁵ Tapi nini malekat ai ma dompak naboru ai: Ulang mabiar nasiam! Ai hubotoh do, Jesus, na dob pinarsilangkon, ai do na pinindahan nasiam. ⁶ Seng ijon be Ia, ai domma puho Ia, songon na hinatahonNi hinan. Padohor nasiam ma, tonggor nasiam ge ianan hatibalanni on! ⁷ Podas ma nasiam laho hubani susianNi patugahkon na dob puho Ia humbani na matei. Lobeianni do nasiam laho hu Galilea, anjaha ijai ma idahon nasiam Ia. Tonggor ma, domma hupatugah ai bani nasiam. ⁸ Jadi podas ma sidea misir hun tanoman ai, mabiar anjaha marmalas ni uhur tumang; marlintun do sidea laho patugahkon ai bani susianNi ai. ⁹ Tapi roh ma Jesus manjumpahkon sidea, nini ma: Damei ma bani nasiam. Jadi idohori sidea ma Ia, irohop sidea ma naheiNi lanjar manrogop i lobeiNi. ¹⁰ Jadi ihatahon Jesus ma hubani sidea: Ulang nasiam mabiar, laho ma nasiam patugahkon bani susianKu, ase laho sidea hu Galilea. Ijai ma idahon ni sidea Ahu! ¹¹ Sanggah na misir ai sidea, tonggor ma, roh ma piga-piga parjaga ai hu huta, ibaritahon sidea ma haganup na masa ai bani sintua ni malim. ¹² Jadi martumpu ma sidea rap pakon pangintuai-pangintuai ai, anjaha dob marriah, ibere sidea ma buei duit bani tentara ai, ¹³ nini sidea ma: Hatahon nasiam ma: Borngin, sanggah tarpodom hanami, roh do susianNi manangkoSi. ¹⁴ Anjaha anggo tarbotoh on bani panggomgomi, hanami pe marsahap pakonsi, ase ulang susah nasiam. ¹⁵ Jadi ijalo sidea ma duit ai, anjaha ibahen sidea ma songon na hinatahon ai bani sidea. Rarat do barita on i tongah-tongah ni halak Jahudi ronsi sadari on. ¹⁶ Ia susian na sapuluh sada ai laho do hu Galilea, hu sada dolog, na dob pinatuduhkon ni Jesus hinan bani sidea. ¹⁷ Anjaha dob iidah sidea Ia, isombah sidea ma Ia, tapi adong ope na sangsi. ¹⁸ Jadi roh ma Jesus hundohor bani sidea, nini ma: Domma ondos Bakku sagala kuasa na i nagori atas ampa na i tanoh on. ¹⁹ Laho ma hanima, podahi hanima ma sagala bangsa, ase gabe susianKu sidea, anjaha didi hanima ma sidea hu bagas goran ni Bapa, Anak ampa Tonduy Napansing. ²⁰ Ajari hanima ma sidea mangkorjahon sagala na dob hutitahkon bennima. Tonggor ma, sai na hasomananKu do hanima ganup ari, ronsi roh ujung ni dunia on.