LUKAS

LUKAS

¹ Domma buei namin halak na manlajou manuratkon barita ni na masa, na tarjadi i tongah-tongahta, ² songon na pinadas hubanta marhitei sidea na mangidah ai humbani mungkahni, anjaha na dob gabe juak-juak bani Hata in; ³ anjaha ahu pe huputushon do uhurhu manuratkon ai jojor bamu, ale Teopilus, na pinarsangapan, dob lobei hupareksa ganupan ai humbani mungkahni, ⁴ ase ibotoh ham hasintongan ni sagala pahara, na dob niajarhon bamu. ⁵ Sanggah si Herodes raja i tanoh Judea, adong ma sada malim humbani golongan ni si Abia, na margoran si Sakarias, ampa parinangonni, boru Aron, na margoran si Elisabet. ⁶ Pintor do sidea haduasi i lobei ni Jahowa, anjaha iparlahouhon sidea do titah ampa aturan ni Tuhan in, seng dong sipandangon. ⁷ Seng dong anak bani sidea, ai na lambang do si Elisabet, anjaha matua ma sidea haduasi. ⁸ Jadi masa ma, sanggah si Sakarias, mangihuthon horin ni golonganni mandalankon horja hamalimon i lobei ni Naibata, ⁹ gabe ia ma masuk hu rumah ni Tuhan in manutung dahupa, dob marjomput na sinurat sidea mangihuthon hasomalan ni malim. ¹⁰ I darat do ango halak na mabuei ai martonggo sanggah panorang manutung dahupa ai. ¹¹ Jadi taridah ma hubani malekat ni Tuhan in, jongjong hampit siamun ni anjap-anjap pardahupaan ai. ¹² Tarsonggot ma si Sakarias mangidah ai anjaha mabiar. ¹³ Tapi nini malekat ai ma hubani: Ulang ho mabiar, ale Sakarias, ai domma hona tangihon tonggomu; tubuhkonon ni parinangonmu ma bam sada anak, anjaha bahen ma goranni si Johannes. ¹⁴ Malas ma uhurmu anjaha marmegah-megah, anjaha buei do halak na marmalas ni uhur halani partubuhni ai. ¹⁵ Ai banggal do ia i lobei ni Tuhan in. Seng siinum anggur ampa sagala minuman na koras ia, anjaha gokan ni Tonduy Napansing do ia humbani partapaan nari. ¹⁶ Buei do anak ni Israel pasuangonni bani Tuhan, Naibata ni sidea. ¹⁷ Anjaha ia ma parlobei ni Tuhan ibagas tonduy ampa hagogohon ni si Elias, laho pasuangkon uhur ni bapa bani anakni, ampa uhur na so ra mambalosi hubani uhur na bonar, laho pasirsirhon bani Tuhan in sada bangsa na torsa. ¹⁸ Jadi nini si Sakarias ma bani malekat ai: Hunja ma botohonku ai? Ai domma matua ahu, anjaha parinangonku pe domma matua. ¹⁹ Nini malekat ai ma mambalosisi: Si Gabriel do ahu, na jongjong i lobei ni Naibata, isuruh do ahu marsahap pakon ho, ampa mamboan ambilan malas ni uhur on bam. ²⁰ Tapi longah ma ho, seng tarbahen ho be marsahap das bani ari parmasa ni ai, halani na so porsaya ai ho bani hatangkin, ai ma na sihol sipamasaon bani panorangni. ²¹ Ia halak na mabuei ai, sai paima-imahon do bani si Sakarias, anjaha longang do sidea, mase sonai dokahni ia i rumah panumbahan ai. ²² Dob luar ia, seng be boi ia marsahapkon sidea, gabe mangahap ma sidea, na dob adong do niidahni i rumah panumbahan ai. Marusihan mando ia bani sidea, tapi anggo ia lanjar longah ma. ²³ Ase dob gok panorangni marugas, mulak ma ia hu rumahni. ²⁴ Seng piga dokah nari boratan rumah ma si Elisabet, parinangonni ai; marponop-ponop ma ia lima bulan dokahni. ²⁵ Nini: Pambahen ni Tuhan do on bakku, sanggah na kinawahkonNi ai ahu, laho mambuat habadoronku i lobei ni halak. ²⁶ Salpu onom bulan isuruh Naibata ma malekat Gabriel hu sada huta i tanoh Galilea, na margoran Nasaret, ²⁷ marayak sada anak-boru, tunangan ni sada dalahi, na margoran si Josep, humbani ginompar ni si Daud; si Maria do goranni. ²⁸ Masuk ma malekat ai marayaksi, anjaha nini ma: Tabi ma bamu, ale na niidopan! Ihasomani Tuhan do ham! ²⁹ Tapi tarsonggot do ia pasal hata ai, anjaha iparuhurhon do, atap aha do arti ni hata tabi ai. ³⁰ Jadi nini malekat ai ma hubani: Ulang ma mabiar ham Maria, ai dapotan idop ni uhur do ham humbani Naibata. ³¹ Tonggor ma, boratan rumah ma ham anjaha tubuhan anak; bahen ma goranNi Jesus. ³² Banggal do Ia use, goranon do Ia Anak ni Sitimbulan in; bereon ni Naibata do Bani paratas ni si Daud, bapaNi ai. ³³ RajaanNi do ginompar ni si Jakob sadokah ni dokahni, anjaha seng dong ujung ni harajaonNi ai. ³⁴ Dob ai nini si Maria ma hubani malekat ai: Sonaha ma parjadi ni ai, ai seng dong hutanda dalahi? ³⁵ Jadi nini malekat ai ma mambalosisi: Sogopan ni Tonduy Napansing ma ham, anjaha linggoman ni hagogohon ni Sitimbulan in; halani ai: Napansing do goranon na sihol tubuh in, Anak ni Naibata. ³⁶ Anjaha tonggor ma, si Elisabet pe, sindohormu ai, na dob targoran lambang, domma boratan rumah, paonom bulankon ma nuan. ³⁷ Ai seng dong na so boi bani Naibata. ³⁸ Jadi ihatahon si Maria ma: Tonggor ma, jabolon ni Tuhan in do ahu. Sai saud ma hubakku songon na hinatahonmu in! Dob ai itadingkon malekat ai ma ia. ³⁹ Bani panorang ai laho ma si Maria, ipapodas ma laho hu tanoh pardologan ai, hu sada huta na i Juda. ⁴⁰ Masuk ma ia hu rumah ni si Sakarias, anjaha itabi ma si Elisabet. ⁴¹ Mambogei tabi ni si Maria ai mangunsal ma na etek-etek, na ibagas partapaanni ai, jadi gok Tonduy Napansing ma si Elisabet. ⁴² Marsora na gogoh ma ia, lanjar nini ma: Ho do na pinasu-pasu i tongah-tongah ni parinangon, anjaha na pinasu-pasu do na pinarorotmin. ⁴³ Mase ma masa on bakku, inang ni Tuhanku roh marayak ahu? ⁴⁴ Ai tonggor ma, ijin das sora ni tabimai bani pinggolhu, mintor mangunsal do dakdanak, na ibags boltokku, halani malas ni uhurni. ⁴⁵ Martuah ma ho, halani ihaporsayai ho, na maningon saud do na hinatahon ni Tuhan bam! ⁴⁶ Jadi nini si Maria ma: Ipatimbul uhurhu do Tuhan in! ⁴⁷ Marmegah-megah do tonduyhu mangidah Naibata, Sipaluah ahu. ⁴⁸ Ai itatap do haetekon ni jabolonNi on. Tonggor ma, ai olat ni on parhatuahon ni sagala sundut ma ahu. ⁴⁹ Ai banggal do na binahen ni Pargogoh in bakku. Napansing do goranNi ai. ⁵⁰ Ai marsundut-sundut do idop ni uhurNi bani na mangkabiariSi. ⁵¹ Hagogohon do ihorjahon tanganNi; mambur merab do ibahen sigijang maruhur. ⁵² Ipaturun do siparkuasa humbani paratas ni sidea, tapi ipatimbul do halak na etek. ⁵³ Na madear do igoki bani na loheian, tapi halak na bayak lumei do ipalaho. ⁵⁴ Iurupi do Israel, juak-juakni in, mardingat idop ni uhurni ai, ⁵⁵ songon na hinatahonni bani ompungta, hubani si Abraham ampa hubani ginomparni sadokah ni dokahni. ⁵⁶ Hira-hira tolu bulan do si Maria marianan rap pakon si Elisabet, dob ai mulak ma ia hu rumahni. ⁵⁷ Jadi gok ma panorang bani si Elisabet, ase tubuhan tuah ia, gabe itubuhkon ma sada anak. ⁵⁸ Dob ibogei romban rumahni ampa sindohorni, na dob maridop ni uhur banggal Tuhan in hubani, marmalas ni uhur ma sidea rap pakonsi. ⁵⁹ Bani ari paualuhkon roh ma sidea, laho manunat na etek-etek ai; ibahen sidea ma goranni si Sakarias mangihutkon goran ni bapani. ⁶⁰ Tapi nini inangni ai ma mambalosi: Lang ai, si Johannes do goranni bahenon! ⁶¹ Jadi nini sidea ma: Seng dong na margoran sisonai sindohormu! ⁶² Marusihan ma sidea mangindo humbani bapani, atap ise do goranni bahenon ipangindo uhurni. ⁶³ Jadi ipangindo ma panuratan, isuratkon ma: Si Johannes do goranni! Jadi longang ma sidea ganup. ⁶⁴ Anjaha mintor mungkab ma pamanganni, suang parsahapni, anjaha marsora ma ia mamuji Naibata. ⁶⁵ Jadi mabiar ma ganup romban rumahni, anjaha isahap-sahapkon halak do na masa ai i sab pardologan Juda. ⁶⁶ Anjaha ganup na manangar ai iparuhurhon do barita ai, nini sidea ma: Na gabe aha ma holi nani dakdanak ai? Ai ihasomani tangan ni Tuhan do ia. ⁶⁷ Jadi gok Tonduy Napansing ma si Sakarias, bapani ai, gabe manjahai ma ia, nini ma: ⁶⁸ Pinuji ma Naibata ni Israel, halani itohu do bangsaNi anjaha ibahen partobusni. ⁶⁹ Ipajongjong do banta tanduk haluahon i rumah ni si Daud, juak-juakNi ai, ⁷⁰ songon na hinatahonNi marhitei pamangan ni nabini na susi in humbani sapari nari, ai ma: ⁷¹ PaluahonNi do hita humbani munsuhta, ampa humbani tangan ni sagala na marsogam ni uhur banta; ⁷² idopanNi do bapanta, anjaha ingatonNi do padanni na mapansing ai. ⁷³ Ai ma bulawanNi, na binulawanhonni bani si Abraham, bapanta ai, ⁷⁴ paboa bereonNi do hubanta, ase hita, dob marhaluahon humbani tangan ni munsuhta, seng marhabiaran boi marugas i lobeiNi. ⁷⁵ ibagas hapansingon ampa hapintoron, sadokah hita manggoluh. ⁷⁶ Ia ho, ale ambia, goranon do ho nabi ni Sitimbulan, ai parlobei ni Tuhan in do ho, laho patureihon dalanNi, ⁷⁷ laho mambere bani bangsaNi habotohon pasal haluahon marhitei hasasapan ni dousa ni sidea, ⁷⁸ halani idop ni uhur ni Naibatanta do mambahen roh sinalsal hun datas marayak hita, ⁷⁹ laho manondangi halak na hundul ibagas hagolapan ampa linggom ni hamateian, anjaha patuduhkon langkahta bani dalan hadameion. ⁸⁰ Ia dakdanak ai lambin banggal do anjaha margogoh ibagas tonduy; anjaha sai i halimisan do ia das bani panorang talar ia bani bangsa Israel.

¹ Jadi roh ma ijia parentah humbani kesar Augustus, ase isurathon sagala jolma na ibagas gomgomanni. ² Panuratan na parlobei ma ai, sanggah si Kerenius manggomgomi tanoh Siria. ³ Jadi misir ma haganup, ase isuratkon, ganup hu huta hasusuranni bei. ⁴ Misir ma homa si Josep hun Galilea, hun huta Nasaret, laho hu Judea, hu huta ni si Daud, na margoran Betlehem, halani hun marga ampa humbani ginompar ni raja Daud ia. ⁵ laho pasuratkon dirini rap pakon si Maria, tunanganni ai, na dob boratan rumah ai. ⁶ Anjaha sanggah na ijai sidea, jumpah ma panorangni tubuhan tuah ia. ⁷ Jadi itubuhkon ma anak bunga tubuhni, ibaluti ma bani ampan, anjaha ipatibal bani panggagatan, halani seng dong ianan bani sidea i rumah parbornginan. ⁸ Jadi adong ma parmahan marborngin i sampalan na bani ianan ai, manjagai pinahan ni sidea. ⁹ Jadi roh ma sada malekat marayak sidea, anjaha marsinalsal ma sangap ni Tuhan inggot sidea, gabe mabiar tumang ma sidea. ¹⁰ Tapi nini malekat ai ma hubani sidea: Ulang mabiar hanima! Tonggor ma, ai ambilan malas ni uhur banggal do huboan bannima, parulihan ni ganup bangsa. ¹¹ Ai domma tubuh bannima saborngin on, i huta ni si Daud, Sipaluah in, in ma Kristus Tuhan in! ¹² On ma partinandaan bannima: Jumpahon nima do sada na etek-etek, ibaluti bani ampan, tibal bani panggagatan. ¹³ Jadi sompong adong ma hasoman ni malekat ai, buei bala parnagori atas, ipuji sidea ma Naibata, nini ma: ¹⁴ Hasangapon ma bani Naibata na i babou, damei ma i tanoh on bani jolma hinarosuhkonNi in. ¹⁵ Dob laho malekat ai humbani sidea dompak nagori atas, nini parmahan ai ma samah sidea: Laho ma hita hu Betlehem mangidah na masa ai, na pinabotohkon ni Tuhan in banta. ¹⁶ Jadi podas ma sidea laho hujai, anjaha jumpah sidea ma tongon si Maria ampa si Josep ampa Dakdanak ai ibagas panggagatan. ¹⁷ Ase dob iidah sidea Ia, ipatugah sidea ma sahap na dob ihatahon bani sidea pasal Dakdanak ai. ¹⁸ Anjaha haganup na manangar ai, longang bei do pasal na hinatahon ni parmahan ai bani sidea. ¹⁹ Ia si Maria iparimbagaskon do haganup hata ai, anjaha ipingkirpingkiri ibagas uhurni. ²⁰ Mulak ma parmahan ondi, ipasangap anjaha ipuji sidea do Naibata halani haganup na tinangar ampa na niidah ni sidea, songon na dob hinatahon hinan bani sidea. ²¹ Dob jumpah ari paualuhkon ai ma panorang parsunatonkon Bani, jadi ibahen ma goranni Jesus, songon panggoran ni malekat ai paima solat ia. ²² Ase dob gok panorang pangurasion Bani magihutkon aturan ni si Musa, iboan sidea ma Ia hu huta Jerusalem, laho mangondoskonSi bani Tuhan in, ²³ songon na tarsurat ibagas titah ni Tuhan in; "Sagala dalahi bunga tubuh ni inangni, maningon pansing do goranon bani Tuhan in", ²⁴ lanjar mamboan galangan, songon na niaturhon ibagas titah ni Tuhan in, ai ma dua kuhuy atap dua anak ni asas. ²⁵ Jadi adong ma sada halak i Jerusalem, na margoran si Simeon, halak na bonar anjaha na daulat, na paimaimahon Sipangapoh na bani Israel; marianan do Tonduy Napansing bani. ²⁶ Anjaha domma ipabotohkon Tonduy Napansing bani, na so idahonni hamateian, anggo seng palobei iidah Kristus ni Tuhan in, ²⁷ Jadi roh ma ia hu rumah panumbahan ijuljul Tonduy ai. Anjaha sanggah na iboan namatorasni Jesus, Dakdanak ai hu bagas laho mambahen hu Bani mangihutkon adat na niaturhon ni titah ai, ²⁸ jadi iabing si Simeon ma Dakdanak ai, ipuji ma Naibata, nini ma: ²⁹ Lopas Ham ma sonari Tuhan jabolonMu misir ibagas damei, songon na hinatahonMu in, ³⁰ ai domma iidah matangku haluahon na hum-Bamu, ³¹ na pinasirsirMu i lobei ni sagala bangsa, ³² sada Panondang, na laho manondangi sipajuh begu-begu, anjaha hasangapon bani bangsaMu halak Israel. ³³ Jadi longang ma uhur ni bapani pakon inangni mambogei hatani ai, ai ma pasal Na etek-etek ai. ³⁴ Anjaha ipasu-pasu si Simeon ma sidea, nini ma bani si Maria, inangni ai: Tonggor ma, na tinaktakkon do on gabe pardabuhan ampa parjongjongan bani buei Israel, anjaha gabe tanda silawanon. ³⁵ Anjaha ho pe tolpusan ni podang do tonduymu; masa pe ganupan ai, ase talar pingkiran ni buei uhur. ³⁶ Anjaha adong do homa sada nabi naboru, na margoran si Hanna, boru ni si Penuel, humbani marga Aser. Domma matua ia, anjaha pitu tahun do ia marparamangon, dob laho. ³⁷ Domma mabalu ia, anjaha ualuh puluh ompat tahun ma umurni. Seng meret ia hun rumah panumbahan ai, sai marpuasa anjaha martonggo do ia mangidangi Naibata arian pakon borngin. ³⁸ Roh do ia homa bani panorang ai, ipuji ma Naibata anjaha isahap-sahapkon do pasalSi bani haganup na mangkasiholhon haluahon ni Jerusalem. ³⁹ Ase dob idobkon sidea haganupan ai mangihutkon titah ni Tuhan in, mulak ma sidea hu Galilea, hu Nasaret, huta ni sidea ai. ⁴⁰ Ia Dakdanak ai lambin banggalni do, lambin margogoh anjaha maruhur tumang, anjaha ihasomani idop ni uhur ni Naibata do Ia. ⁴¹ Anjaha siap tahun do laho namatorasNi hu Jerusalem marpesta Paska. ⁴² Jadi dob marumur Ia sapuluh dua tahun, rap tangkog ma sidea songon na somal hu pesta ai. ⁴³ Dob salosei sidea na marpesta ai sanggah na mulak ai sidea, tading do Jesus, Dakdanak ai, i Jerusalem, seng pamotohan ni namatorasNi. ⁴⁴ Iagan sidea, na dob rap Ia pakon odoran ni sidea, jadi idalani sidea ma parsadarian, laho mangindahiSi i tongah-tongah ni sindohor ampa na tinanda. ⁴⁵ Jadi halani lang jumpah, mulak ma sidea hu Jerusalem, laho mangindahiSi. ⁴⁶ Dob salpu tolu ari, jumpah sidea ma Ia i rumah panumbahan, hundul i tongah-tongah ni guru-guru, manangihon hata ni sidea lanjar manungkun-nungkun. ⁴⁷ Longang do haganup na mabogeiSi, halani torus ni uhurNi ampa balosNi. ⁴⁸ Jadi dob iidah sidea Ia, tarsonggot ma sidea. Nini inangNi ma hu Bani: Mase ma sonin pambahenMu, anaha? Tonggor ma, rusak do uhurhu pakon bapamu mangindahi Ho! ⁴⁹ Jadi Nini ma hubani sidea: Mase ma pala pindahan nasiam Ahu? Ai lang ibotoh nasiam, na patut do Ahu ibagas rumah ni BapangKu? ⁵⁰ Tapi seng iarusi sidea hata na hinatahonNi ai bani sidea. ⁵¹ Jadi mulak ma Ia rap pakon sidea hu Nasaret, anjaha pambalosi do Ia bani sidea. Iparimbagaskon inangNi do ganup na masa ai ibagas uhurni. ⁵² Anjaha lambin tambah do hapentaran ni Jesus sonai angkulaNi, anjaha iharosuhkon Naibata ampa jolma do Ia.

¹ Pasapuluh-lima-tahunkon dob manrajai Kesar Tiberias, sanggah si Pontius Latus manggomgomi Judea, sanggah si Herodes manrajai i Galilea, si Pilipus saninani ai i Iturea ampa Tarakonitis, si Lusanias i nagori Abilene, ² sanggah hasintua-malimon ni si Hannas ampa si Kayapas, roh ma hata ni Naibata hubani si Johannes, anak ni si Sakarias, i halimisan. ³ Jadi laho ma ia hu sab nagori na bani bah Jordan, anjaha iambilankon ma ambilan hamubahon ni uhur, laho pasasapkon dousa, ⁴ songon na tarsurat ibagas buku panjahaion ni nabi Jesaya: Sora ni na mardilo-dilo i halimisan: Parsirsir ma dalan bani Tuhan in, pintor ma bahen sidalananni! ⁵ Maningon tambusan do sagala habungan anjaha parondohon sagala dolog ampa buttu-buttu; maningon papintoron do na mareluk-eluk, anjaha padosdoson do dalan na marholbung-holbung. ⁶ Anjaha idahon ni sagala jolma ma haluahon na humbani Naibata! ⁷ Jadi ihatahon ma bani halak na mabuei ai na roh padidihon dirini hubani: Nasiam ginompar ni ulog! Ise do na mangajarhon bani nasiam, boi nasiam maluah humbani ringis na sihol roh in? ⁸ Parbuahkon nasiam ma buah, tanda ni na dob mubah uhur! Ulang das ihatahon nasiam ibagas uhur nasiam: Si Abraham do bapa nami! Ai huhatahon ma bani nasiam, tarjadihon Naibata do anak ni si Abraham humbani batu on. ⁹ Domma tampei hapak bani urat ni hayu. Sirobohon do sagala hayu na so madear parbuahni, anjaha sigijigkonon do hubagas apuy. ¹⁰ Jadi isungkun na mabuei ai ma ia; Aha ma sibahenon nami? ¹¹ Nini ma mambalosi sidea: Ise na marbaju dua, ibere ma sada bani na so marbaju, anjaha na marnah sipanganon pe, sonai ma ibahen. ¹² Roh do age sijalo sohei padidihon dirini, nini sidea ma: Guru, aha do sibahenon nami? ¹³ Jadi ihatahon ma bani sidea: Ulang ma tunggu nasiam lobih humbani na niaturhon bani nasiam! ¹⁴ Dihut do tentara roh manungkunsi: Ia hanami, aha do sibahenon nami! Jadi ibalosi ma: Ulang ma sunsahi, anjaha ulang ma dalankon nasiam odoh-odoh age bani ise! Hasonangkon nasiam ma gaji nasiam! ¹⁵ Halani ibagas na paima-imahon do bangsa ai, anjaha ganup sidea sungkun-sungkun uhurni ibagas pasal si Johannes, atap ia do Kristus ai, ¹⁶ gabe nini si Johannes ma mambalosi sidea haganup: Ahu do tongon mandidihon nasiam bani bah, tapi na roh ma sigogohan humbakku, anjaha mananggali tali ni sipatu-Ni pe seng talup ahu. Didihononni ma bani nasiam Tonduy Napansing pakon apuy. ¹⁷ Bani tanganNi do pamurpuran, anjaha paborsihonNi ma pardogeianNi; patumpuonNi ma omei husopouNi, tapi tutungonNi do anggo lam-lamni hubagas apuy na so ra miloh. ¹⁸ Buei ope na legan itarsingati bani bangsa ai, laho mangambilankon Ambilan Namadear bani sidea. ¹⁹ Ia raja Herodes, hona hata do ia ibahen si Johannes, halani si Herodias, parinangon ni saninani, ampa halani sagala hajahaton na hinorjahon ni si Herodes ai. ²⁰ Tapi tambah ni ganupan ai, ipamasuk ma si Johannes hubagas tutupan. ²¹ Sanggah na tardidi halak na mabuei ai haganup, dihut do Jesus tardidi. Jadi, sanggah martonggo Ia, mungkab ma langit. ²² Anjaha susur ma Tonduy Napansing marrupa asas hu Bani, anjaha tarbogei ma sora hun langit, na mangkatahon: Ho do anak haholonganKu, marosuh do uhurHu Bam! ²³ Ia Jesus, sanggah mulai mangajari Ia, adong ma umurNi kira-kira tolu puluh tahun, anjaha mangihutkon pingkiran ni halak, Ia, ai ma anak ni si Josep, anak ni si Eli, ²⁴ anak ni si Mattat, anak ni si Lepi, anak ni si Melki, anak ni si Janai, anak ni si Josep, ²⁵ anak ni si Mattatias, anak ni si Amos, anak ni si Nahum, anak ni si Hesli, anak ni si Naggai, ²⁶ anak ni si Maat, anak ni si Mattatias, anak ni si Semein, anak ni si Josek, anak ni si Joda, ²⁷ anak ni si Johanan, anak ni si Resa, anak ni si Serubabel, anak ni si Sealtiel, anak ni si Neri, ²⁸ anak ni si Melki, anak ni si Addi, anak ni si Kosam, anak ni si Elmadam, anak ni si Er, ²⁹ anak ni si Josua, anak ni si Elieser, anak ni si Jorim, anak ni si Mattat, anak ni si Lepi, ³⁰ anak ni si Simeon, anak ni si Juda, anak ni si Josep, anak ni si Jonam, anak ni si Eliakim, ³¹ anak ni si Melea, anak ni si Menna, anak ni si Mattata, anak ni si Natan, anak ni si Daud, ³² anak ni si Jessei, anak ni si Obed, anak ni si Boas, anak ni si Salmon, anak ni si Nahasson, ³³ anak ni si Aminadab, anak ni si Admin, anak ni si Arni, anak ni si Hesron, anak ni si Peres, anak ni si Juda, ³⁴ anak ni si Jakob, anak ni si Isak, anak ni si Abraham, anak ni si Tera, anak ni si Nahor, ³⁵ anak ni si Seruk, anak ni si Rehu, anak ni si Peleg, anak ni si Heber, anak ni si Sala; ³⁶ anak ni si Kainan, anak ni si Arpaksad, anak ni si Sem, anak ni si Noak, anak ni si Lamek, ³⁷ anak ni si Metusala, anak ni si Henok, anak ni si Jared, anak ni si Mahaleel, anak ni si Kenan; ³⁸ anak ni si Enos, anak ni si Set, anak ni si Adam, anak ni Naibata.

¹ Gok bani Tonduy Napansing mulak ma Jesus hun bah Jordan. Ibobai Tonduy ai ma Ia hu halimisan, ² anjaha ilajou sibolis ai ma Ia ompat puluh ari dokahni. Seng dong mangan atap aha pe Ia bani panorang ai, jadi dob salpu ai, malohei ma iahap. ³ Jadi nini sibolis ai ma hu Bani: Anggo tongon do Ham anak ni Naibata, hatahon Ham ma batu on gabe ruti! ⁴ Tapi ibalosi Jesus ma ia: Tarsurat do: Seng pitah ruti tumang hagoluhan ni Jolma. ⁵ Dob ai ibobai ma Ia bani ianan na gijang, anjaha ibagas na sangkidop mata ipatuduhkon ma Bani sagala harajaon na i dunia on. ⁶ Lanjar ihatahon sibolis ai ma hu Bani: Bamu pe hubere ganup kuasa on ampa hasangaponni ai, ai domma bakku iondoskon ai, anjaha hubere do ai hubani halak harosuh ni uhurhu. ⁷ Anggo ra Ham marsombah bakku, Bamu ma haganupan in. ⁸ Jadi nini Jesus ma mambalosisi: Tarsurat do: Tuhan Naibatamu do sisombahonmu, anjaha sahalaksi do hansa sibalosanmu! ⁹ Dob ai ibobai ma Ia hu Jerusalem, ipajongjong ma Ia bani anjung-anjung ni rumah panumbahan ai, anjaha nini ma hu Bani: Anggo Anak ni Naibata do Ham, lumpatkon Ham ma hunjon hu toruh. ¹⁰ Ai tarsurat do: HatahononNi do malekatni halani ho, ase ijagai ho, ¹¹ anjaha tatang-tatangon ni sidea ma ho, ase ulang tarantuk naheiMu bani batu! ¹² Tapi nini Jesus ma mambalosisi: Ihatahon do homa: Seng bulih lajouonmu Tuhan Naibatamu! ¹³ Jadi, dob salpu idalankon sibolis ganup parlajouan ai, itadingkon ma Ia, paima jumpah panorangni use. ¹⁴ Jadi mulak ma Jesus hu Galilea, ibagas hagogohan ni Tonduy ai, anjaha sar ma baritaNi bani ganup nagori ai inggot. ¹⁵ Mangajari do Ia bani parguruan ni sidea, anjaha haganup do mamujiSi. ¹⁶ Jadi roh ma Ia hu Nasaret, huta hagodanganNi ai; mangihutkon hasomalanni, masuk ma Ia hu parguruan ai sanggah ari Sabat, anjaha jongjong ma Ia laho mambasa. ¹⁷ Jadi ibere ma hu Bani buku ni nabi Jesayas; iungkab ma ai, gabe jumpahSi ma na tarsurat sonon: ¹⁸ Tonduy ni Tuhan in do sogop hu Bakku, ai iminaki do Ahu, laho mangambilankon ambilan na madear bani halak na masombuh. Isuruh do Ahu laho patugahkon haluahon bani na tartutup ampa mambahen marpangidah use na mapitung, laho paluahkon halak na niodoh-odoh, ¹⁹ ampa patugahkon tahun paridop ni uhuran ni Tuhan in. ²⁰ Dob ai igulung ma buku ai, ipaulak ma ai bani siparugas, lanjar hundul. Jadi nono ma hu Bani ganup mata ni halak na i parguruan ai. ²¹ Jadi ihatahon ma hubani sidea: Sadarion ma jumpah na tarsurat in, na binogei nasiam in. ²² Haganup do sidea marhatongonkon, anjaha longang bei do sidea manangar hata na mantin, na luar humbani pamanganNi ai, gabe nini sidea ma: Ai lang anak ni si Josep do Ia? ²³ Jadi nini ma hubani sidea: Hatahonon nasiam do namin Bakku hata ni limbaga on: Ale doktor, pamalum dirimu! Sagala na binogei nami pasal na binahenMu i Kapernaum, lanjar ai ma bahen ijon, i huta hagodanganmon! ²⁴ Tapi Nini ma: Sintong do na Huhatahon on bani nasiam: Seng adong nabi na marsangap i nagorini sandiri. ²⁵ Ibagas hasintongan Huhatahon ma bani nasiam: Buei do namin naboru na mabalu i tanoh Israel bani panorang ni si Elias, sanggah na tartutup langit ai tolu tahun onom bulan, sanggah na masa lohei maningting i tanoh on, ²⁶ tapi seng isuruh si Elias atap hubani ise sidea, tapi hu Sarpat do, na i nagori Sidon, hubani sada naboru na mabalu. ²⁷ Anjaha buei do na gadamon i Israel bani panorang ni nabi Elisa, tapi seng dong humbani sidea na gabe malum, pitah si Naeman halak Siria ai do, ²⁸ Jadi marah tumang ma haganup na i parguruan ai, dob ibogei sidea ai, ²⁹ gabe jongjong ma sidea, iusir sidea ma Ia hu darat ni huta ai, das hu salansah ni dolog, hajongjongan ni huta ni sidea ai, laho manggulangkonSi hu toruh. ³⁰ Tapi laho ma Ia, montas hun tongah-tongah ni sidea. ³¹ Jadi tuad ma Ia hu Kapernaum, ai ma sada huta i Galilea, anjaha iajari ma sidea sanggah ari Sabat. ³² Jadi longang ma sidea pasal pangajarionNi ai, ai marhidorat do hatani ai. ³³ Anjaha adong do i parguruan ai sada halak partonduy setan na mabutak. Gogoh-gogoh do ia mardilo-dilo: ³⁴ Ham Jesus na hun Nasaret! Ai roh do Ham sihol mangagou hanami? Hubotoh do atap ise Ham, ai ma Napansing ni Naibata! ³⁵ Tapi isorgang Jesus ma ia, nini ma: Sip anjaha luar ma humbani! Jadi isampakkon setan ai ma ia hu tongah-tongah, anjaha luar ma ia humbani, tapi seng mahua ia ibahen. ³⁶ Jadi longang ma uhur ni sidea ganupan, anjaha nini sidea ma samah sidea: Hata na sonaha do on? Ipaksa do tonduy na mabutak marhitei kuasa ampa gogoh, gabe mandarat do. ³⁷ Jadi sar ma baritani ai bani ganup ianan, bani nagori na inggot hujai. ³⁸ Laho ma Jesus hun parguruan ai, anjaha masuk ma Ia hu rumah ni si Simon. Ia anturang ni si Simon, parah do panei-paneini, gabe itarsingathon sidea ma pasalsi hu Bani. ³⁹ Jadi roh ma Ia jongjong hu lambungni, anjaha mangonai hata ma Ia bani panei-panei ai, gabe laho ma panei-panei ai humbani. Mintor jongjong ma ia, marugas bani sidea. ⁴⁰ Dob sundut mata ni ari, ipamboan halak ma hu Bani na boritan ni bei, na marbagei-bagei niarouni. Itampeihon ma tanganNi bani ganup sidea, laho pamalum sidea. ⁴¹ Kaluar do setan-setan humbani buei halak, lanjar mardilo-dilo: Anak ni Naibata do Ham! Tapi isorgangi do sidea, anjaha lang ilopas sidea marsahap, halani ibotoh sidea, Ia do Kristus ai. ⁴² Tapi dob siang ari, laho ma Ia hudarat bani ianan na lungun. Ipindahi halak na mabuei ai do Ia, anjaha dob jumpah sidea, sihol do jolomon ni sidea Ia, ase ulang laho Ia humbani sidea. ⁴³ Tapi Nini ma hubani sidea: Maningon ambilankononKu do homa Ambilan Namadear pasal harajaon ni Naibata age bani huta na legan ai, ai halani ai do ase isuruh Ahu. ⁴⁴ Jadi laho ma Ia marambilan bani sagala parguruan ni halak Jahudi.

¹ Bani na sahali, sanggah jongjong Jesus i topi ni tao Galilea, anjaha halak na mabuei ai marurup roh hu Bani, laho manangar hata ni Naibata, ² iidah ma dua parau i topi pasir ni tao ai; ia pardengke ai domma luar mamurihi jala ni sidea. ³ Jadi imasuki ma sada parau ai, si Simon do ompunganni ai, anjaha ipangindo ma hubani, ase ilugahon parau ai ganggang otik hun pasir. Hundul do anggo Ia mamodahi na mabuei ai hun parau ai. ⁴ Ase dob maronti Ia marambilan, nini ma hubani si Simon: Lugahon ma hubani sibagasan, anjaha sampakkon hanima ma jala nima, ase jumpahan hanima. ⁵ Jadi nini si Simon ma mambalosi: Guru, torus do hanami saborngin on loja manjalai, tapi seng dong dapotan; tapi mangusagahkon hataMu ra do ahu mangamburhon jala ai. ⁶ Jadi dob ibahen sidea sonai, gabe dapot sidea ma buei dengke, pala marigat jala ni sidea. ⁷ Jadi ihilap sidea ma hasoman ni sidea na bani parau na legan ai, ase roh sidea mangurupi. Roh ma sidea, anjaha igoki sidea ma haduasi parau ai, pala narus-narus harom. ⁸ Mangidah ai si Simon Petrus, manrogop ma ia i lobei ni nahei ni Jesus anjaha nini ma: Laho ma Ham humbakku Tuhan, ai halak pardousa do ahu! ⁹ Ai longang do uhurni ampa uhur ni hasomanni halani dengke na dapot sidea ai, ¹⁰ sonai homa si Jakobus ampa si Johannes, anak ni si Sebedeus, hasoman ni si Simon ai. Jadi nini Jesus ma hubani si Simon: Ulang ho mabiar! Hunjon hujanan gabe sijala jolma ma ho. ¹¹ Dob itogu sidea parau ai hu darat, itadingkon sidea ma haganupan ai, anjaha iirikkon sidea ma Ia. ¹² Sanggah bani sada huta Jesus, adong ma sada halak na parah gadamni. Dob iidah Jesus manrogop ma ia mangindohon: Ham Tuhan, anggo ra Ham, tarpasusi Ham do ahu! ¹³ Jadi isurdukkon Jesus ma tanganNi, ijamah ma ia, anjaha nini ma: Ra do Ahu, borsih ma ho! Jadi mintor magou ma gadam ai humbani. ¹⁴ Ipandang Jesus ma ia, ase ulang ipatugah-tugah ai bani halak. Tapi ihatahon do hubani: Laho ma ho, patuduhkon ma dirimu hubani malim. Dob ai galangkon ma na tinitahkon ni si Musa, halani na dob borsih ho, bahen hasaksian bani sidea! ¹⁵ Tapi lambin sar ma baritani, gabe roh ma martumpu buei halak, laho manangar hataNi ampa laho mangindo hamalumon humbaNi naborit ni sidea. ¹⁶ Tapi surut ma Ia bani ianan na lungun, anjaha martonggo ma Ia ijai. ¹⁷ Bani na sadari mangajari do Ia, anjaha adong do hundul ijai Parisei ampa guru siajarhon titah, ai ma na roh humbani huta-huta na i Galilea ampa Judea, age na hun Jerusalem. Anjaha marhorja do kuasa ni Tuhan in Bani laho pamalumhon. ¹⁸ Anjaha tonggor ma, roh do piga-piga halak mamboan sada halak na oyangon, na tibal bani podomanni; ilajou sidea do mamboansi hu bagas, laho patibalhonsi i lobei ni Jesus. ¹⁹ Tapi seng tarpamasuk sidea ia halani ponjotni, gabe ipanaik sidea ma tayub ai. Iungkab sidea ma ai, anjaha itantan sidea ma tibal ia, bani podomanni, sangkan hu lobei ni Jesus. ²⁰ Mangidah haporsayaon ni sidea ai Jesus, nini ma: Domma sasap dousamu ambia! ²¹ Jadi marpingkir-pingkir ma sibotoh titah ampa Parisei ai ibagas uhur ni sidea, nini ma: Ise do on? Sipahiri Naibata do on! Ise boi manasap dousa sobali Naibata tumang? ²² Tapi ibotoh Jesus do pingkiran ni uhur ni sidea ai, jadi nini ma mambalosi sidea: Aha do ipingkiri nasiam ibagas uhur nasiam? ²³ Na ija do urahan hatahonon: Domma sasap dousamu, atap hatahonon: Jongjong ma anjaha mardalan ma ho? ²⁴ Tapi ase ibotoh nasiam, na markuasa do Anak ni jolma in i tanoh on manasap dousa, nini ma hubani na oyangon ai: Ahu mangkatahon bam: Jongjong ma ho, boan ma podomanmin, anjaha mulak ma ho hu rumahmu! ²⁵ Jadi mintor jongjong ma ia iidah sidea; iangkat ma podomanni ai, mulak ma ia hu rumahni, anjaha ipapuji-puji do Naibata. ²⁶ Gabe longang ma haganup, anjaha ipuji sidea ma Naibata. Gok biar ma sidea, nini ma: Halongangan na so ongga masa do iidah hanami sadari on. ²⁷ Dob salpu ai luar ma Ia, anjaha iidah ma sada halak sijalo sohei, na margoran si Lepi, hundul i kantor sohei. Nini ma hubani: Irikkon ahu! ²⁸ Jadi jongjong ma ia, itadingkon ma haganup, laho mangirikkonSi. ²⁹ Ibahen si Lepi ma pesta mangan-mangan na banggal bani Jesus i rumahni, anjaha buei do sijalo sohei ampa halak na legan rap mangan pakon sidea ijai. ³⁰ Jadi marungut-ungut ma Parisei ampa sibotoh surat pasal ai, nini ma hubani susianni: Mase ma mangan anjaha minum nasiam rap pakon sijalo sohei ampa pardousa? ³¹ Jadi nini Jesus ma mambalosi sidea: Seng porlu doktor bani na jorgit, bani na boritan do! ³² Seng roh Ahu mandilo halak parpintor, tapi halak pardousa do, ase ipaubah uhurni. ³³ Tapi nini sidea ma hu Bani: Gati do marpuasa anjaha martonggo susian ni si Johannes, sonai homa susian ni Parisei, tapi mangan minum do anggo susianMu. ³⁴ Jadi nini Jesus ma hubani sidea: Ai tarbahen do marpuasa hasoman-hasoman ni siparunjuk, sadokah rap ope siparunjuk ai ampa sidea? ³⁵ Tapi na roh ma panorangni, buaton ma siparunjuk ai humbani sidea, jadi bani panorang ai ma sidea marpuasa. ³⁶ Anjaha ihatahon ma sada limbaga bani sidea: Seng dong halak na ra manrigatkon hiou na baru, laho mandungkaphon ai bani hiou na buruk. Anggo sonai rigat ma hiou na baru ai, anjaha seng homa tangkup pandungkap na baru ai bani na buruk ai. ³⁷ Anjaha seng homa ipausei halak anggur na baru hubani gusi huling-huling na buruk; anggo ibahen sonai, pultakkonon ni anggur na bayu ai ma iananni ai, gabe mambur ma anggur ai, anjaha iananni ai pe seda ma. ³⁸ Tapi anggur na baru hubagas gusi huling-huling na baru do ipausei ai. ³⁹ Anjaha na somal manginum anggur na madokah seng ipangindo na baru, ai nini do: Dear do anggur na madokah ai.

¹ Bani sada ari Sabat, sanggah na mamontas Ia hun juma, ipamputikkon susianNi ma buyur-buyur ni gandum, ipuyu-puyu ma ai, lanjar ipangan ma. ² Jadi dong ma deba halak Parisei na mangkatahon: Mase ma ihorjahon hanima na so patut bani ari Sabat? ³ Nini Jesus ma mambalosi sidea: Seng ongga ibasa nasiam aha ibahen si Daud sanggah loheian ia, ia ampa hasomanni saodoran? ⁴ Masuk do ia hu rumah ni Naibata, ibuat anjaha ipangan do ruti galangan, ai ma na so bulih panganon ni atap ise sobali malim, anjaha ibere do deba ai bani hasomanni. ⁵ Lanjar ihatahon ma bani sidea: Tuhan ni ari Sabat do homa Anak ni Jolma in. ⁶ Bani ari Sabat na legan masuk ma Jesus hu rumah parguruan laho mangajari. Adong do ijai sada halak, matei tangan siamunni. ⁷ Ionggopi sibotoh surat ampa Parisei ai do Ia, ai ma atap ra do Ia pamalum naborit sanggah ari Sabat, ase adong dalan ni sidea mangaduhonSi. ⁸ Tapi ibotoh Jesus do pingkiran ni sidea ai, jadi nini ma dompak partangan na matei ai: Jongjong ma ho hu tongah-tongah on! Jadi jongjong ma ia hujai. ⁹ Jadi nini Jesus ma dompak sidea: Aha do na patut horjahonon sanggah ari Sabat, mambahen na madear do atap mambahen na jahat, pagoluhkon hosah do atap parsedahon ai? ¹⁰ Jadi sanggah na kinawahkonNi ai sidea haganup inggot, nini ma dompak halak ai: Pagostong ma tanganmin! Ibahen ma sonai, gabe malum ma tanganni ai. ¹¹ Marah tumang ma sidea, lanjar manriah ma sidea atap aha do sibahenon dompak Jesus. ¹² Bani panorang ai tangkog ma Jesus hu dolog, laho martonggo; layur saborngin ai martonggo Ia hubani Naibata. ¹³ Anjaha dob siang ari, idilo ma susianni ai, anjaha ipilih ma sapuluh dua humbani sidea, anjaha igoran ma sidea apostel, ¹⁴ ai ma: si Simon, na ginoran si Petrus, ampa si Andreas saninani ai; si Jakobus ampa si Johannes; si Pilippus ampa si Bartolomeus; ¹⁵ si Mateus ampa si Tomas; si Jakobus anak ni si Alpeus ampa si Simon, na margoran Zelot; ¹⁶ si Judas anak ni si Jakobus, ampa si Judas Iskariot, na gabe sipartahi-tahi ai. ¹⁷ Jadi tuad ma Ia pakon sidea, lanjar jongjong ma Ia bani sada ianan na hanopan, rap pakon buei susianNi ampa buei halak hun sab Judea ampa Jerusalem, hun topi laut ni Tirus ampa Sidon, ¹⁸ na marrohan, laho manangar hataNi ampa ase ipamalum sidea humbani naborit ni sidea; ipamalum do age na niodar-odar ni setan. ¹⁹ Haganup na mabuei ai sihol manggiutSi, ai luar do gogoh humbani, na pamalum haganup. ²⁰ Jadi sanggah na kinawahkonNi ai susianNi ai, nini ma: Martuah ma hanima na masombuh, ai bannima do harajaon ni Naibata! ²¹ Martuah ma hanima na loheian nuan, ai sipabosuran do hanima! Martuah ma hanima na tangis nuan, ai tartawa do hanima use! ²² Martuah ma hanima anggo ihasogamhon anjaha itulak halak hanima, anggo irisai hanima anjaha iambukkon goran nima, halani sambor nini uhurni, halani Anak ni Jolma in. ²³ Malas ma uhur nima bani panorang ai anjaha marolob-olob, ai tonggor ma, banggal do upah nima i nagori atas, ai sonai do ibahen bapa ni sidea bani nabi-nabi. ²⁴ Tapi bursik ma hanima na bayak, ai domma ijalo hanima apoh-apoh na bannima. ²⁵ Bursik ma hanima na marbosur-bosur nuan, ai loheian ma hanima use. Bursik ma hanima na tartawa nuan, ai tangis anjaha doruh-doruh ma hanima use. ²⁶ Bursik ma hanima, anggo haganup halak mamuji-muji hanima, ai sonai do ibahen bapa ni sidea bani nabi sipakulah-kulah ai. ²⁷ Tapi huhatahon ma bani nasiam sipanangi-nangi: Haholongi nasiam ma munsuh nasiam, na madear ma bahen nasiam bani na marsogam ni uhur bani nasiam. ²⁸ Pasu-pasu nasiam ma na mamurai nasiam, tonggohon nasiam ma na mandoruni nasiam. ²⁹ Anggo adong na mamastap huyummu, tarehon ma na salopah nari; anjaha anggo ibuat hioumu, ulang engkar age baju-bajumu. ³⁰ Sagala na mangindo humbamu, bere; anjaha halak na dob mambuat barangmu, ulang tunggu ai humbani. ³¹ Songon na pinindo nasiam bahenon ni halak bani nasiam, sonai ma bahen nasiam bani sidea. ³² Ai anggo ihaholongi nasiam na marholong ni uhur bani nasiam, aha ma ulih nasiam ijai? Ai age pardousa ihaholongi do na marholong ni uhur bani sidea. ³³ Anjaha anggo ibahen nasiam na madear hubani sibahen na madear bani nasiam, aha ma ulihnasiam ijai? Ai age pardousa sonai do ibahen. ³⁴ Anjaha anggo papinjamkon nasiam bani halak, laho mangarapkon balas humbani, aha ma ulih nasiam ijai? Ai halak sipardousa pe painjamkon do hubani hasomanni pardousa, anjaha ijalo do use ulak ni duitni. ³⁵ Tapi haholongi nasiam ma munsuhnasiam, bahen nasiam ma na madear, anjaha papinjamhon nasiam ma, ulang pala mangarapkon balos. Jadi banggal ma upah nasiam, gabe anak ni Sitimbulan in ma nasiam; ai layak do Ia, age bani halak, na so mambotoh martarima kasih ampa bani halak parjahat. ³⁶ Gabe paridop ni uhur ma nasiam, songon Bapa nasiam, paridop ni uhur in. ³⁷ Ulang ma nasiam manguhum-uhumi, ase ulang hona uhum nasiam! Ulang ma nasiam mamapai, ase ulang hona papa nasiam! Paluah nasiam, ase ipaluah nasiam! ³⁸ Bere nasiam ma, ase ibere bani nasiam! Parsuhatan na madear, na nionjat, na nidugur anjaha na pinajunjun bereonni bani abingan nasiam; ai parsuhatan, na sinuhatkon nasiam do, suhatkonon bani nasiam. ³⁹ Ihatahon do homa limbaga on bani sidea: Mintor tartogu na mapitung ma hasomanni na mapitung? Ai lang rap tarrobung ma sidea haduasi? ⁴⁰ Seng lobih susian marimbang guruni; tapi ganup, anggo gok ma parguruanni, dos ma ia songon guruni. ⁴¹ Mase ma pala patorih-torihanmu silbak-silbak na bani mata ni hasomanmu, hape tiang na bani matamu lang iidah ho? ⁴² Mase ma hatahononmu bani hasomanmu: Mahua huumpat lobei silbak-silbak na bani matamin, ambia, hape tiang na bani matamin lang iidah ho? Ee ho sipakulah-kulah, parlobei ma umpat tiang na bani matamin, dob ai pe, ase iidah ho torang sonaha pangumpatmu bani silbak-silbak na bani mata ni hasomanmu. ⁴³ Seng dong hayu na madear marbuahkon na bajan, barang hayu na bajan marbuahkon na madear. ⁴⁴ Ai humbani buahni do tartandai ganup hayu. Ai seng tarbuat jambu humbani tatada, anjaha seng tarbuat buah anggur humbani rimbang. ⁴⁵ Halak sidear uhur padaratkon na madear humbagas arta na madear na ibagas uhurni; anjaha halak na jahat padarathon na jahat humbagas arta na jahat na ibagas uhurni. Ai in na manggoki uhur, ai do iluarhon pamangan. ⁴⁶ Mase ma ihatahon nasiam Bakku: Tuhan, Tuhan! hape lang ihorjahon nasiam na Huhatahon? ⁴⁷ Sagala na roh hu Bakku, anggo ibogei hatangKin anjaha ihorjahon, Hupatugah ma bani nasiam usihanni ai: ⁴⁸ Usih do ia ai bani sada halak, na pajongjong rumah, na mangkurak bagas anjaha na pajonamhon ai bani batu gingging. Marbanggal pe bah, anjaha idorab pe rumah ai, tapi seng tardugursi, halani toguh do ipajonam. ⁴⁹ Tapi na mambogei hatangKai, tapi seng idalankon, usih ma ai bani halak, na pajongjong rumah bani tanoh, na seng maronjolan bani batu; idorab bah ai ma ai, gabe mintor marumbak ma, anjaha jangin do parrumbak ni rumah ai.

¹ Ase dob salpu ihatahon Jesus haganup hataNi ondi bani na mabuei ai, masuk ma Ia hu Kapernaum. ² Jadi adong ma ijai sada juak-juak ni kopala ni tentara, na hinarga ni tuanni, boritan do ia, pala mangkatarhatos. ³ Dob ibogei kopala ni tentara ai barita ni Jesus, isuruh ma pangintuai ni halak Jahudi marayakSi, laho mangelek-elekSi, ase roh Ia pamalum juak-juakni ai. ⁴ Jadi dob das sidea bani Jesus, gomos ma pangajar-ajari ni sidea Bani, nini ma: Patut do tangihononMu ia. ⁵ Ai holong do uhurni bani bangsanta, anjaha ia do na pajongjong parguruanta. ⁶ Jadi laho ma Jesus rap pakon sidea. Tapi sanggah lang daoh be Ia hun rumah ai, isuruh kopala ni tentara ai ma hasomanni mangkatahon hu Bani: Tuhan, ulang pala loja Ham! Ai lang talup ahu, masukanmu pala rumahku. ⁷ Halani ai do homa, ase seng talup huahap ahu sandiri marayak Ham. Hatahon Ham ma sangkababah hata gelah, ase malum juak-juakkai. ⁸ Ai halak na i toruh ni parentah do ahu, anjaha i toruhku pe adong do tentara. Anggo huhatahon bani na sada: Laho! gabe laho do ia. Atap hubani na legan: Roh! gabe roh do ia. Atap hubani juak-juakku: Bahen ai! jadi ibahen do. ⁹ Mambogei ai longang ma Jesus, lanjar marhusor ma Ia marsahap bani halak na mabuei, na mangirikkonSi ai: Huhatahon ma bani nasiam: Gari bani halak Israel, seng adong jumpah Ahu haporsayaon na sonon. ¹⁰ Jadi mulak ma hu rumah na sinuruh ai, anjaha domma malum jumpah sidea juak-juak ai. ¹¹ Dob salpu ai, laho ma Ia hubani sada huta na margoran Nain; susianNi do hasomanNi saodoran ampa buei jolma. ¹² Marayak horbangan ni huta ai sidea, tonggor ma, iusung halak ma hu darat sada halak na matei, ai ma anak ni sada puang-puang na mabalu; buei do singkuta ai manaruhkon. ¹³ Mangidah na mabalu ai Tuhan in, mabangor ma uhurNi, jadi ihatahon ma hubani: Ulang tangis ham! ¹⁴ Lanjar idohori ma batang ai, ijamah ma, jadi sonto ma na mangusung ai, anjaha ihatahon ma: Ale garama, Ahu mangkatahon bam, puho ma! ¹⁵ Jadi hundul ma halak na dob matei ai, ipungkah ma marsahap, anjaha iondoskon ma ia bani inangni ai. ¹⁶ Gabe mabiar ma sidea haganup, anjaha ipuji sidea ma Naibata, nini ma: Domma jongjong i tongah-tongahta sada nabi bolon, anjaha itatap Naibata do bangsaNi. ¹⁷ Sar ma baritani ai hu sab nagori Judea, ronsi hu ganup nagori na inggot ai. ¹⁸ Ibaritahon susian ni si Johannes ma ganupan ai hubani. ¹⁹ Jadi idilo ma susianni dua halak hu lobeini, lanjar isuruh ma sidea marayak Tuhan in, laho manungkun hu Bani: Ai Ham do na sihol roh in, atap na legan ope paimaon nami? ²⁰ Ase dob das halak ai hu lobeiNi, ihatahon sidea ma: Isuruh si Johannes pandidi do hanami marayak Ham, laho manungkun: Ai Ham do na sihol roh ai, atap na legan ope paimaon nami? ²¹ Bani panorang ai, sanggah pamalumhon buei halak do Ia humbani bagei-bagei ni naborit, sitaronon ampa tonduy na jahat, anjaha buei do na mapitung marpangidah ibahen. ²² Ibalosi ma sidea nini ma: Laho ma nasiam mambaritahon bani si Johannes na niidah ampa na binogei nasiam: Na gabe marpangidah do na mapitung, mardalani na repat, gabe borsih na gadamon, marpanangar na nengel, mulak manggoluh na matei, ambilan na madear iambilankon do bani halak na masombuh, ²³ anjaha martuah ma na so sangsi Bakku! ²⁴ Anjaha dob laho suruhan ni si Johannes ai, itarsingati ma si Johannes bani halak na mabuei ai: Aha do na sihol idahon nasiam, ase roh nasiam hu halimisan on? Arung-arung na niombus ni logou do? ²⁵ Na sihol mangidah aha do, ase luar nasiam? Halak parhiou na lampot do? Tonggor ma, i rumah bolon do siparhiou na jenges ampa sipangan na mantin-mantin. ²⁶ Na sihol mangidah aha do, ase luar nasiam? Nabi do? Ai ma tongon. Huhatahon ma bani nasiam: Lobihan do Ia humbani nabi. ²⁷ Ia do na hinatahon ni surat in: SuruhonKu ma suruhanKu, parlobeimu, sipaturei dalanMu i lobeiMu! ²⁸ Huhatahon ma bani nasiam: Seng dong na tubuh humbani naboru sibanggalan marimbang si Johannes; tapi sietekan pe ibagas harajaon ni Naibata, banggalan do ai humbani. ²⁹ Ia na mabuei ai haganup, na manangar ai, ampa sijalo sohei, pintor do Naibata iahap sidea, ai ijalo do pandidion humbani si Johannes. ³⁰ Tapi anggo halak Parisei ampa sibotoh surat itulak sidea do sura-sura ni Naibata na bani sidea, ai seng ra sidea padidihon dirini hubani. ³¹ Ase hubani ise ma pausihonKu halak na sasundut on? Usih hubani ise ma sidea? ³² Usih do sidea hubani dakdanak na hundul i tiga, na marsidiloan: Isompul hanami do sarunei i lobei nima, tapi seng manortor hanima, ipabogeihon hanami do tangis-tangis, tapi seng tangis hanima. ³³ Ai roh do si Johannes pandidi, na seng mangan ruti anjaha na seng minum anggur, hape ihatahon nasiam: Na setanon do ia. ³⁴ Roh do Anak ni jolma in, na mangan anjaha minum, hape ihatahon nasiam: Tonggor ma sipangan magou ampa siparminum-minum, huan-huan ni sijalo sohei ampa pardousa. ³⁵ Tapi gabe pintor do Hapentaran in marhitei haganup anak-anakni. ³⁶ Dob ai iarahkon sada halak Parisei ma Ia mangan, jadi masuk ma Ia hu rumah ni Parisei ai, lanjar hundul ma ijai. ³⁷ Anjaha tonggor ma, roh ma sada naboru pardousa, pangisi ni huta ai, dob ibotoh, na dob hundul Ia i rumah ni Parisei ai; iboan do sada botol alabaster marisi minak na morum. ³⁸ Mariluh-iluh do ia roh hun pudi mandohori nahei ni Jesus; iarbahi ma naheiNi ai marhitei iluh-iluhni, iapusi ma ai marhitei jambulanni, isummah ma anjaha iminaki ma naheiNi ai marhitei minak na misbou ai. ³⁹ Mangidah ai, marpingkir ma Parisei na mangarahkonSi ai hu rumahni: Ambit nabi do halak on, tandaonNi do naboru na manjamahSi on, anjaha botohonNi do parlahouni, ai pardousa do ia. ⁴⁰ Jadi nini Jesus ma mambalosisi: Ale Simon, adong do sihatahononKu bamu. Balosni: Ham Guru, hatahon Ham ma! ⁴¹ Adong ma dua halak paridouan ni sada halak sipaanakkon duit; utang ni na sahalak lima ratus dinar, na sada nari lima puluh. ⁴² Halani seng targalar sidea ai, ibalihon ma utang ni sidua halak ai. Ise do humbani sidea siholongan uhurni bani? ⁴³ Nini si Simon ma mambalosi: Nini uhurhu, parutang sibueinan, na binalihon ai do. Balos ni Jesus hubani: Sintong do timbanganmu ai. ⁴⁴ Sanggah na nidompakkonni ai naboru ai, nini Jesus ma dompak si Simon: Iidah ham do naboru on? Roh do Ahu hu rumahmu, seng ibere ham bah pamurihi ni naheiHu, tapi anggo ia, iluhni do ibahen mangarbahi naheiHu anjaha iapusi bani jambulanni. ⁴⁵ Seng isummah ham Ahu, tapi anggo ia, masukkonsi Ahu, seng marparsaranan manummah naheiHu. ⁴⁶ Seng homa iminaki ham ulungKu, tapi anggo ia, iminaki do naheiHu bani minak na misbou. ⁴⁷ Halani ai Huhatahon ma bamu: Domma sasap dousani na buei in, mambahen banggal holong ni uhurni. Halak na otik hona sasap dousani, otik do holong ni uhurni. ⁴⁸ Lanjar nini ma hubani naboru ai: Domma sasap ganup dousamu ai! ⁴⁹ Gabe nini hasomanni sapanganan ma samah sidea: Ise do on, ase dihut ampa dousa isasap? ⁵⁰ Ambahni ai ihatahon Jesus ma bani naboru ai: Haporsayaonmu do na paluahkon ham. Mardamei ma ham mulak.

¹ Salpu ai ibontas Jesus ma sagala huta-huta ampa dusun, laho marambilan, mamaritahon harajaon ni Naibata. Na sapuluh dua ai do hasomanNi, ² sonai homa deba naboru, na dob pinamalumNi humbani tonduy na jahat ampa naborit, ai ma si Maria, na margoran si Magdalena, na tinadingkon ni pitu setan. ³ ampa si Johanna, parinangon ni si Kusa, sijolom anak kunsi ni si Herodes, ampa si Susanna ampa buei halak na legan, na mangurupi sidea marhitei na dong bani. ⁴ Ase dob martumpu buei jolma anjaha marrohan hu Bani halak humbani huta-huta ai, nini ma marhitei limbaga: ⁵ Laho ma sada halak panabur manaburhon bonih. Jadi sanggah na manabur ai ia, adong ma deba na madabuh hu dalan, gabe tardogei ma anjaha ipaguti manuk-manuk na i awang-awang. ⁶ Na deba madabuh bani batu, tapi dob tubuh, melus ma, halani lang marbah. ⁷ Na deba madabuh hu tongah-tongah ni parhupi-hupian; rap tubuh ma hupi-hupi ai pakon ai, gabe ipisat ma. ⁸ Ia na legan ai madabuh ma bani tanoh na madear, anjaha dob tubuh iparbuahkon ma saratus lompit. Dob ihatahon sonai, idilohon ma: Barang ise na marpinggol, na marpambogei, itangihon ma! ⁹ Jadi dob isungkun susian ai, atap aha do arti ni limbaga ai, ¹⁰ gabe Nini ma: Ibere do bennima habotohon pasal rusia ni harajaon ni Naibata, tapi bani halak na legan pitah marhitei limbaga do, ase ulang iidah age pe ikawahkon, anjaha seng iarusi age pe ibogei. ¹¹ Anjaha on do arti ni limbaga ai: Ia bonih ai; ai ma hata ni Naibata. ¹² Anggo na bani dalan ai, ai ma na mambogei ai; dob ai roh ma sibolis, ibuat ma hata ai humbagas uhur ni sidea, ase ulang porsaya anjaha maluah sidea. ¹³ Ia na bani batu ai, ai ma na marmalas ni uhur manjalo hata ai dob ibogei; tapi seng marurat ai, sangombas do sidea hansa porsaya, anjaha bani panorang parlajouan marbalik ma sidea. ¹⁴ Tapi anggo na madabuh hubani parhupi-hupian ai, ai ma na mambogei ai; tapi tarpisat do hata ai ibagas goluh ni sidea halani holsoh, habayakon ampa hisap-hisap ni goluh on, gabe seng saud matoras buahni. ¹⁵ Tapi anggo na bani tanoh na madear ai, ai ma na manimpan hata na binogeini ai ibagas uhur na bonar anjaha na madear, gabe saud ma marbuah ibagas sabar ni uhur. ¹⁶ Seng dong halak na mannahiti palita, dob ai irongkobkon tumba hujai, barang inahkon ai hu toruh ni podoman; hu parpalitaan do ibahen, ase iidah sagala na roh palita ai. ¹⁷ Ai seng dong na ponop, na so talar use; anjaha seng dong rusia na so tarbotoh use anjaha talar. ¹⁸ Halani ai, pangkei ma hanima, sonaha pambogei nima! Ai bani na marnadong, bereon ope bani, tapi na so marnadong, buaton ope humbani na adong ai bani, nini uhurni. ¹⁹ Dob ai roh ma inangNi pakon anggiNi marayakSi, tapi seng tarbahen sidea das hu lobeiNi halani buei ni jolma. ²⁰ Jadi adong ma na patugahkon hu Bani: Jongjong do idarat an inang ampa anggiMu; sihol idahon ni sidea do Ham. ²¹ Tapi nini Jesus ma mambalosi sidea: Ia inangKu ampa anggingKu, ai ma na mambogei ampa na mangkorjahon hata ni Naibata. ²² Bani na sadari masuk ma Ia hu parau rap pakon susianNi, lanjar nini ma hubani sidea: Dipari hita ma tao on! Dob ai laho ma sidea. ²³ Sanggah na marparau ai sidea, tarpodom ma Ia. Roh ma ampilaos hu tao ai, gabe masuk ma bah hubagas parau ai, jadi tarsosak ma sidea. ²⁴ Ijumpahkon sidea ma Ia, nini sidea ma mamuhoiSi: Guru, guru, magou ma hita. Jadi dob puho Ia, hona hata ma logou ampa bah na margilumbang ai ibahen, gabe soh ma anjaha minop. ²⁵ Tapi nini ma dompak sidea: Ija do haporsayaon nima? Mabiar do anggo sidea anjaha longang, anjaha nini sidea ma samah sidea: Ise do nani halak on? Logou ampa bah pe iparentah do, anjaha itangihon do Ia! ²⁶ Jadi marlayar ma sidea hu nagori Gerasa, na padipar-dipar pakon Galilea. ²⁷ Sanggah na mandarat ai Ia, pajumpah ma Ia pakon sada halak parhuta ai, na setanon do ia; anjaha domma dokah seng ra be ia marhiou anjaha seng be i rumah marianan, tapi i tanoman mando. ²⁸ Dob iidah Jesus, mandoruhi ma ia lanjar manrogop i lobeiNi, anjaha nini ma marsora na gogoh: Mangaha Ham roh bakku, Jesus, Anak ni Naibata Sitimbulan in huelek-elek ma Ham, ulang arsik Ham ahu! ²⁹ Ai ihatahon Jesus do luar setan ai humbani jolma ai. Domma gati isoroh setan ai ia, gabe igari anjaha ibayangkon ma ia, laho manjagaisi, tapi irutuskon do gari ai anjaha ialai setan ai ma ia hu halimisan. ³⁰ Jadi isungkun Jesus ma ia: Ise do goranmu? Gabe ibalosi ma: Legiun. Ai buei do setan-setan siar bani. ³¹ Lanjar ielek-elek sidea ma Ia, ase ulang ipaksa sidea tuad hu nagori toruh. ³² Tapi adong do ijai, bani raboyon ai, babuy sahulanan bolon manggagati; jadi ipindo ma, ase ilopas sidea masuk hujai, gabe ibalosi ma. ³³ Jadi luar ma setan-setan ai humbani jolma ai, anjaha imasuki sidea ma babuy ai, gabe mardabuhan ma babuy na sahulanan ai hun raboyon ai hubagas tao ai, lanjar marmogapan. ³⁴ Dob iidah parmahan ai na masa ai, maporus ma sidea, ibaritahon sidea ma ai i huta ai ampa i ladang. ³⁵ Jadi marrohan ma halak ai, laho mangidah na masa ai. Das ma sidea bani Jesus, anjaha jumpah sidea ma halak, na dob tinadingkon ni setan-setan ai, marhiou anjaha torang maruhur, hundul i lambung nahei ni Jesus, gabe mabiar ma sidea. ³⁶ Jadi ipatugah halak na mangidah ai ma bani sidea, sonaha parmalum ni na siniaran ni setan-setan ai. ³⁷ Jadi ielek-elek haganup pangisi ni nagori inggot ni Gerasa ai ma Ia, ase surut Ia humbani sidea, ai mabiar tumang do sidea. Jadi masuk ma Ia hu parau ai, lanjar mulak ma. ³⁸ Ia halak, na tinadingkon ni setan-setan ondi, ipangindo do Bani, atap boi do ia mangkasomaniSi. Tapi isuruh ma ia mulak, nini ma: ³⁹ Mulak ma ho hu rumahmu, baritahon ma haganup na binahen ni Naibata hu bam! Jadi laho ma ia, ibaritahon ma bani haganup huta ai, haganup na binahen ni Jesus hubani. ⁴⁰ Ase dob mulak Jesus, ialo-alo halak na mabuei ai ma Ia, ai haganup do sidea paima-imahonSi. ⁴¹ Jadi roh ma sada halak, na margoran si Jairus; sintua ni parguruan do ia. Manrogop ma ia i lobei ni nahei ni Jesus mangindohon, ase roh Ia hu rumahni, ⁴² ai laho matei do boru sasadani, na marumur sapuluh dua tahun. Sanggah na laho hujai Ia, iasak-asak halak na mabuei do Ia. ⁴³ Jadi adong ma sada naboru, na dob sapuluh dua tahun sai marnunut roh pantang ni hiouni, anjaha seng dong na boi pamalumhonsi. ⁴⁴ Roh ma ia hun pudini, anjaha ijamah ma rambu ni hiouNi, gabe mintor soh ma daroh ai. ⁴⁵ Jadi nini Jesus ma: Ise do, na manjamah Ahu in? Dob haganup mangkatahon lang, nini si Petrus ampa hasomanni ai ma: Guru, na mabuei in do maronjat-onjat manosak Ham! ⁴⁶ Tapi nini Jesus ma: Adong do na manjamah Ahu, ai Huahap do luar gogoh humbangKu. ⁴⁷ Ase dob iidah naboru ai, na so tarponopkon hape pambahenan ai, roh ma ia hitir-hitir, ipajojor ma i lobei ni haganup na mabuei ai aha halani, ase ijamah Ia, ampa parmalumni bani na satongkin ai. ⁴⁸ Jadi Nini ma hubani: Haporsayaonmu do na pamalum ham anakKu, mulak ma ham ibagas damei! ⁴⁹ Mangkatahon ai ope Ia, adong ma na roh hun rumah ni sintua ni parguruan ai, na mangkatahon: Domma matei borumu, ulang pala be lojai ham Guru in! ⁵⁰ Mambogei ai Jesus, ibalosi ma ia: Ulang ham mabiar, porsaya ma lah, sai manggoluh do ia. ⁵¹ Dob das Ia hu rumah ai, seng ilopas barang ise pe masuk sobali si Petrus, si Johannes ampa si Jakobus, ambah ni ai bapa ampa inang ni dakdanak ai. ⁵² Doruh-doruh do haganup manangisi na matei ai. Tapi nini Jesus ma: Ulang nasiam tangis! Ai seng matei ia, na modom do! ⁵³ Jadi ipartatawai sidea ma Ia, halani ibotoh sidea, na dob matei do ia. ⁵⁴ Tapi itangkap ma tanganni, idilohon ma: Puho ma ho, boru! ⁵⁵ Gabe mulak ma tonduyni, jadi mintor puho ma, anjaha ihatahon Jesus ma bereon ia mangan. ⁵⁶ Longang do namatorasni ai; tapi ihatahon ma bani sidea, ase ulang ipatugah-tugah na masa ai.

¹ Dob ai ipatumpu ma na sapuluh dua ai; ibere ma bani sidea gogoh ampa kuasa mangimbang sagala setan-setan ampa pamalum naborit. ² Isuruh ma sidea mamaritahon harajaon ni Naibata ampa pajorgithon halak. ³ Nini ma hubani sidea: Ulang ma boan hanima atap aha pe hu pardalanan, barang tungkot, barang ranjut, barang ruti, barang duit, barang dua baju pe. ⁴ Anggo masuk hanima bani sada rumah, ijai ma hanima tondok, lanjar hunjai ma hanima misir use. ⁵ Anggo adong na so manjalo hanima, pirpirhon hanima ma orbuk na longkot bani nahei nima, sanggah na laho hanima hun huta ai bahen hasaksian dompak sidea. ⁶ Jadi laho ma sidea, idalani sidea ma huta-huta ai, laho mangambilankon Ambilan Namadear, ampa pamalumhon atap ija-ija pe. ⁷ Raja Herodes pe, ibogei do haganup na masa ai, gabe mabiar ma ia, halani adong deba halak na mangkatahon, na dob ipapuho do si Johannes humbani na matei; ⁸ na deba nari mangkatahon na dob roh do si Elias, anjaha na legan use, paboa na dob mulak manggoluh do sada halak humbani nabi na basaia. ⁹ Tapi ihatahon si Herodes ma: Anggo si Johannes domma hutampul uluni, tapi ise do on, na hubogei on baritani? Anjaha ipangindo uhurni do sihol idahonni Ia. ¹⁰ Dob mulak apostel ai ibaritahon sidea ma hubani Jesus haganup na binahen ni sidea ai, gabe iarahkon ma sidea surut bani sada huta na margoran Betsaida. ¹¹ Dob ibotoh na mabuei ai pasal ai, irikkon sidea ma Ia; ijalo Jesus ma sidea, ibaritahon ma bani sidea pasal harajaon ni Naibata, anjaha ipamalum ma sagala na porlu sipamalumon. ¹² Marayak bod ari, roh ma na sapuluh dua ai mangkatahon hu Bani; Pamisir Ham ma na mabuei in, ase laho sidea hu huta-huta ampa hu parjuma-juma na inggot in, mangindahi tondokan ampa sipanganon, ai halimisan do iananta on. ¹³ Tapi nini ma hubani sidea: Bere hanima ma sidea mangan! Jadi nini sidea ma: Seng dong banta lobih humbani lima ruti ampa dua dengke, anggo seng laho hanami mamboli sipanganon bani halak na mabuei on ganup. ¹⁴ Ai adong do ijai hira-hira lima ribu halak dalahi. Anjaha nini ma hubani susianNi ai: Hatahon hanima ma sidea hundul marsasatumpuan, lima puluh satumpuan. ¹⁵ Ibahen sidea ma sonai, ipahumpul ma sidea haganup. ¹⁶ Jadi ibuat Jesus ma ruti na lima ai ampa dengke na dua ai, anjaha dob mangkawah Ia dompak datas anjaha ihatahon tarimakasih, ipartopik ma ai, anjaha iberei ma bani susianNi, ase sidea mambagihon bani na mabuei ai. ¹⁷ Mangan ma sidea anjaha bosur bei do haganup; ipatumpu do teba-teba na lobih ai, gok sapuluh dua bantei. ¹⁸ Bani na sahali, sanggah martonggo Ia sahalaksi, rapkonsi do susian ai. Jadi isungkun ma sidea: Ise do Ahu, nini halak simbuei? ¹⁹ Jadi nini sidea ma mambalosi: Si Johannes pandidi do; na legan mangkatahon si Elias, anjaha na legan use sada humbani nabi na basaia, na dob mulak manggoluh. ²⁰ Tapi nini ma hubani sidea: Ia hanima, ise do Ahu nini hanima? Jadi nini si Petrus ma mambalosi: Kristus ni Naibata do Ham! ²¹ Jadi pangkei ma sidea ipalumba, ase ulang ipatugah-tugah ai age bani ise. ²² Lanjar ihatahon ma: Ia Anak ni Jolma in, maningon buei do sitarononNi, ambukkonon ni pangintuai-pangintuai, sintua ni malim ampa sibotoh surat do Ia, dob ai bunuhonni, anjaha mulak manggoluh do bani ari patoluhon. ²³ Tapi nini ma hubani sidea haganup: Barang ise na sihol mangirikkon Ahu, iparnalang ma dirini, iporsan ma silangni ari-ari laho mangihutkon Ahu. ²⁴ Ai magouan hosah do na sihol paluahkon hosahni, tapi na magouan hosah halani Ahu, ai do na pagoluhkonsi. ²⁵ Ai aha ma gunani bani jolma, age ganup dunia on dapotsi, anggo magou anjaha hona uhum ia marhitei ai? ²⁶ Ai barang ise na maila halani Ahu ampa halani hatangKin, pailaon ni Anak ni jolma in do ia, sanggah na roh Ia ibagas hasangaponNi ampa hasangapon ni Bapa in rap pakon malekat na susi in. ²⁷ Tapi tongon do na Huhatahon on bannima: Adong do deba na jongjong on ijon, na so mangahap hamateian ope, anggo lape iidah roh harajaon ni Naibata. ²⁸ Hira-hira ualuh ari, dob salpu parsahapan ai, iarahkon Jesus ma si Petrus, si Johannes ampa si Jakobus tangkog hu sada dolog, laho martonggo. ²⁹ Jadi, sanggah na martonggo ai Ia, mubah ma rupa ni bohiNi, anjaha pakeianNi pe lopak ma marlinang-linang. ³⁰ Anjaha tonggor ma, adong do dua halak marsahap-sahap pakonSi, ai ma si Musa ampa si Elias, ³¹ na marhasangapon idahon, anjaha isahapkon sidea do pasal ujung ni langkahNi, sidobkononNi i Jerusalem. ³² Tarpodom do anggo si Petrus ampa hasomanni na dua ai. Tapi dob puho sidea, iidah sidea ma Jesus ibagas hasangaponNi ampa sidua halak, na jongjong i lambungNi ai. ³³ Anjaha sanggah na sihol laho ai sidea humbani Jesus, nini si Petrus ma hu Bani: Guru, dearni in ijon hita! Ipauli hanami ma tolu sopou-sopou, sada Bamu, sada bani si Musa anjaha sada bani si Elias; seng ibotoh, aha na hinatahon ni ai. ³⁴ Mangkatahon ai ope ia, roh ma sada hombun manlinggomi sidea, gabe mabiar ma sidea, sanggah na masuk sidea hubagas hombun ai. ³⁵ Jadi roh ma sada sora humbani hombun ai, na mangkatahon: On do AnakKu, na Hupilih in, tangihon nasiam ma Ia! ³⁶ Dob salpu marhata sora ai, sasada Jesus mando jumpah sidea ijai. Sip do sidea, seng ipatugah sidea na niidah ni sidea ai atap hubani ise pe bani panorang ai. ³⁷ Patarni ai, sanggah tuad sidea hun dolog ai, roh ma buei halak manjumpahkonSi. ³⁸ Jadi tonggor ma, adong ma sada dalahi humbani na mabuei ai mandilohon: Guru, sombahku Bamu, marpanatap ma Ham bani anakkon, sasadasi do anakku. ³⁹ Tonggor Ham ma, anggo irotol setan ai ia, sompong ma ia mandoruh; isontap-sontap do ia ronsi na marguboh pamanganni; igosam-gosam do ia, anjaha mahol do ia surut humbani. ⁴⁰ Domma huelek-elek namin susianmu on, ase iusir namin setan ai, tapi seng mangasup sidea. ⁴¹ Jadi nini Jesus ma mambalosi: Bangsa, na so porsaya anjaha kahou! Sadiha dokah nari Ahu rap pakon hanima, anjaha paanju-anjuonKu hanima? Boan ham ma anakmu in hujon! ⁴² Sanggah na roh ai ia, idorab setan ai ma ia anjaha ipugulhon. Tapi isorgang Jesus ma setan na jahat ai anjaha ipamalum ma dakdanak ai; iondoskon ma ia bani bapani. ⁴³ Haganup do longang pasal kuasa ni Naibata na banggal ai. Sanggah na longang ai haganup halani pambahenanni ai, Nini ma hubani susianNi ai: ⁴⁴ Tangihon hanima ma hatangKon: Ondoshononkon ma Anak ni Jolma in hu tangan ni halak. ⁴⁵ Tapi seng iarusi sidea hata ai, ponop do ai humbani sidea; anjaha mabiar do sidea manungkunSi pasal hata ai. ⁴⁶ Jadi tubuh ma pingkiran i tongah-tongah ni sidea pasal ise do sidea sibanggalan. ⁴⁷ Tapi ibotoh Jesus do pingkiran ni sidea ai, gabe ialop ma sada dakdanak, ipajongjog ma ai i lambungNi, ⁴⁸ anjaha ihatahon ma bani sidea: Na manjalo dakdanak on ibagas goranKu, Ahu do na jinaloni ijai, anjaha na manjalo Ahu, na marsuruh Ahu do jinaloni ai. Ai barang ise sietekan i tongah-tongah nima, ia do na banggal. ⁴⁹ Tapi nini si Johannes ma mambaloSi: Guru, iidah hanami do sada halak mangusir setan marhitei goranMu, gabe ipandang hanami ma ia, halani seng siirikkon Ham ia songon hanami. ⁵⁰ Tapi nini Jesus ma hubani: Ulang pandang hanima ia, ai ise na so mangimbang hanima, hasoman nima do. ⁵¹ Jadi dob lambin dohor ari parbankitNi, idompakkon ma bohiNi mardalan hu Jerusalem. ⁵² Isuruh ma suruhan parlobeiNi. Jadi laho ma sidea, imasuki sidea ma sada huta ni halak Samaria, laho patorsa parbornginan Bani. ⁵³ Tapi seng ra sidea manjaloSi, halani na laho hu Jerusalem ai Ia. ⁵⁴ Mangidah ai susianNi, si Jakobus ampa si Johannes, ihatahon sidea ma: Tuhan, dear do uhurMu ihatahon hanami turun apuy hun datas, mamboiskon sidea? ⁵⁵ Tapi marhusor ma Ia, anjaha ihata ma sidea, nini ma: Lang ibotoh hanima, atap tonduy aha do na bannima? ⁵⁶ Jadi hu huta na legan ma sidea laho. ⁵⁷ Sanggah mardalani sidea, nini sada halak ma hu Bani: Sai irikononku do Ham, barang huja pe Ham laho! ⁵⁸ Tapi nini Jesus ma hubani: Na marliang do sorigala, anjaha na marasar do manuk-manuk na i awang-awang, tapi anggo Anak ni jolma in, hatibalan ni uluni pe seng dong. ⁵⁹ Bani na legan ihatahon: Irikkon ma Ahu! Tapi nini ma: Lopas Ham lobei ahu, laho mananom bapa! ⁶⁰ Tapi nini hubani: Paturut ma na matei mananom na mateini, tapi anggo ho, laho ma mamaritahon harajaon ni Naibata. ⁶¹ Sada halak na legan use mangkatahon: Huirikkon pe Ham Tuhan, tapi lopas Ham lobei ahu martading hata hubani sinrumahku. ⁶² Tapi nini Jesus ma hubani: Na manjamah tinggala anjaha na mangkawah dompak pudi, seng talup masuk ai bani harajaon ni Naibata.

¹ Dob salpu ai ipilih Tuhan Jesus ope pitu puluh halak nari, anjaha isuruh ma sidea mardua-dua gabe parlobeiNi hubani ganup huta ampa ianan, na sihol siparayakonNi. ² Ihatahon do bani sidea: Bolag do namin sabion, tapi otik do siparhorja. Ai pe pindo hanima ma bani Simada sisabion in, ase isuruh siparhorja bani sisabionni in. ³ Laho ma hanima. Songon biri-biri do hanima hasuruh hu tongah-tongah ni begu. ⁴ Ulang boan hanima parduitan, barang tas barang sipatu; anjaha ulang tabi hanima halak i tongah dalan. ⁵ Laho masuk hu sada rumah, parlobei ma hatahon hanima: Damei ma bani nasiam i rumah on! ⁶ Anjaha anggo adong ijai anak hadameion, sogop ma bani damei nima; tapi anggo seng dong, mulak ma ai bennima. ⁷ I rumah ai ma hanima tondok, mangan anjaha inum hanima ma humbani na adong bani sidea, ai patut do dapotan upah siparhorja; ulang ma mosor-osor tondokan nima. ⁸ Anggo masuk hanima bani sada huta, anjaha ijalo do hanima, pangan hanima ma na niidangkon bennima. ⁹ Pamalum hanima ma na boritan, na adong ijai, anjaha hatahon hanima ma bani sidea: Domma dohor harajaon ni Naibata bani nasiam! ¹⁰ Tapi anggo imasuki hanima sada huta, hape seng ijalo sidea hanima, laho ma hanima hu alaman ni sidea, anjaha hatahon hanima ma: ¹¹ Age orbuk ni huta nasiam on, na longkot bani nahei nami, ipirpirhon hanami ma mulak bani nasiam; tapi botoh nasiam ma, domma dohor parroh ni harajaon ni Naibata. ¹² Huhatahon ma bannima: Hampungan do sitaronon ni Sodom bani ari ai marimbang sitaronon ni huta sisonai. ¹³ Bursik ma ho Korasin. Bursik ma ho Betsaida! Ai ambit i huta Tirus ampa Sidon ipamasa hagogohon, na dob pinamasa bannima, girah do paubahon ni sidea uhur ni sidea, marhiou guni, hundul bani orbuk. ¹⁴ Ase hampungan do sitaronon ni Tirus ampa Sidon bani ari uhum ai, marimbang sitaronon nima. ¹⁵ Anjaha ho Kapernaum, ai sipagijangon do ho ronsi langit? Sidabuhkononkon do ho das hu nagori toruh! ¹⁶ Na manangihon hanima, Ahu do tinangihonni, anjaha na manulak hanima, Ahu do tinulakni; tapi na manulak Ahu, na marsuruh Ahu do tinulakni ijai. ¹⁷ Ibagas malas ni uhur do mulak sipitu puluh halak ai, nini sidea ma: Tuhan, tunduk do age setan-setan bannami halani goranMu. ¹⁸ Tapi nini ma dompak sidea: Huidah do sibolis in madabuh hun langit songon hilap. ¹⁹ Tonggor ma, domma Hubere bannima kuasa mandogei ulog ampa gansip golang, sonai kuasa manlawan sagala hagogohon ni munsuh in; anjaha seng tarkahua sidea hanima. ²⁰ Tapi ulang ma malas uhur nima, halani na tunduk ai setan-setan bannima, tapi malas ma uhur nima, halani domma tarsurat goran nima i nagori atas. ²¹ Anjaha bani panorang ai marolob-olob ma Ia ibagas Tonduy Napansing, nini ma: Hupuji Ham Bapa, Tuhan sigomgom nagori atas ampa tanoh on, halani iponophon Ham do in humbani halak na pentar ampa na maruhur, hape ipatalar Ham do in hubani na saluju maruhur. Eak Bapa, sonin do iharosuhkon uhurMu. ²² Haganupan do iondoskon Bapa Bakku, anjaha seng dong na mananda Anak in, sobali Bapa in, anjaha Bapa in pe, seng dong na manandasi sobali Anak in, ambah ni ai na pinodahan ni Anak in mangihutkon rosuh ni uhurNi. ²³ Dob ai idompakkon ma pulin susianNi ai, nini ma: Martuah ma mata, na mangidah na niidah nima. ²⁴ Ai Huhatahon ma bannima: Buei do nabi-nabi ampa raja-raja, na masihol mangidah na niidah nima, hape seng iidah, anjaha na sihol, mambogei na dob binogei nima, hape seng ibogei. ²⁵ Dob ai jongjong ma sada sibotoh titah manlajouSi, nini ma: Guru, aha do sibahenonku, ase tartean ahu hagoluhan sisadokah ni dokahni? ²⁶ Gabe nini Jesus ma hubani: Aha do tarsurat bani titah in? Sonaha do ibasa ham? ²⁷ Jadi nini mambalosi: Maningon haholonganmu do Tuhan Naibatamu humbani putih ni atei-ateimu, humbani gok ni tonduymu, humbani bois ni gogohmu ampa humbani gok ni uhurmu, anjaha hasomanmin songon dirimu! ²⁸ Dob ai nini ma hubani: Sintong do balosmu in; bahen ham ma sonai, gabe manggoluh ma ham! ²⁹ Tapi sihol do pintoranni dirini, gabe nini ma dompak Jesus: Ai ise do goranon hasomanku? ³⁰ Jadi nini Jesus ma mambalosi: Adong ma sada halak na tuad hun Jerusalem, laho hu huta Jeriko, gabe isamun panamun ma ia. Irampas sidea do ia, ibalbali, dob ai laho, itadingkon ia tarhatos. ³¹ Tudu ma mamontas sada malim hun dalan ai, iidah do ia, tapi ilaosi do. ³² Sonai homa sada halak Lepi, das do bani ianan ai, iidah do ia, tapi ilaosi do homa. ³³ Tapi mamontas ma hujai sada halak Samaria; dob iidah ia, idop ma uhurni bani, ³⁴ idohori ma ia, ibaluti ma ugahni ai, anjaha idaisi ma ai bani minak ampa anggur. Dob ai ipahundul ma ia bani halodeni sandiri, iboan ma ia hu parbornginan, lanjar ipatorsa-torsa. ³⁵ Patarni ai ibuat ma dua dinar, ibere ma ai bani simada rumah ai, anjaha nini ma: Patorsa-torsa ham ma ia, anjaha anggo lobih hunjon harugianmu, hugalari pe sanggah mulak ahu. ³⁶ Ise do humbani sitolu halak ai, hasoman bani na tarsamun ai, nini uhurmu? ³⁷ Jadi nini ma: Na maridop ni uhur bani. Gabe nini Jesus ma hubani: laho ma ham, bahen ma sonai! ³⁸ Sanggah na mardalani sidea, masuk ma Jesus hubagas sada huta, anjaha dong ma ijai sada naboru, na margoran si Marta, na manjalosi hu rumahni. ³⁹ Ia anggini, na margoran si Maria, hundul-hundul do i lobeini Tuhan in manangihon hataNi, ⁴⁰ tapi anggo si Marta, hosei tumang do marugas. Jadi ipadohor ma bani Jesus anjaha nini ma: Tuhan, ai lang iidah Ham, na ipaturut anggingkin do sahalak ahu marugasi? Hatahon Ham ma ia mangurupi ahu! ⁴¹ Jadi nini Tuhan in ma mambalosisi: Marta! Marta! Buei do isarihon anjaha isunsahkon uhurmu! ⁴² Sada do na porlu! Ipilih si Maria do rupei sidearan, seng sibuaton ai humbani.

¹ Martonggo ma Jesus santorap bani sada ianan, anjaha salpuhonsi ai, nini sahalak susianni ma hu Bani: Tuhan, ajari Ham ma hanami martonggo, songon na binahen ni si Johannes hubanisusianni. ² Jadi nini ma hubani sidea: Anggo martonggo hanima, sonon ma hatahon hamina: Ham Bapanami, sai pinapansing ma goranMu. Sai roh ma harajaonMu. ³ Bere Ham ma bannami hagoluhannami siganup ari. ⁴ Sasap Ham ma dousa nami, ai hanami pe isasap hanami do haganup na marsalah dompak hanami. Anjaha ulang ma bobai Ham hanami hu parlajouan. ⁵ Lanjar Nini ma dompak sidea: Ise humbannima, na marhuan-huan bani sada halak, gabe laho ia tongah borngin hubani mangkatahon: Ambia, bere lobei bakku tolu kibul rutimin, ⁶ ai roh do hasomanku hun pardalanan, anjaha seng dong sipanganon berehononku bani. ⁷ Jadi marbalos ma ia humbagas, nini ma: Ulang sunsahi ahu! Domma tutup labah, anjaha domma modom dakdanakku rap pakon ahu. Seng tarbahen ahu be jongjong, laho mamberehon ai bam. ⁸ Huhatahon ma bannima: Anggo lang ra puho ia, laho mambere ai bani, halani parhuan-huanon, tapi lang tarbahensi lang puho, laho mambere sagala na porlu bani, halani hajungilonni mangindo. ⁹ Halani ai huhatahon ma bannima: Pangindo hanima ma, sai na bereon do bannima; pindahi hanima ma, sai na jumpahan do hanima, anjaha hartuki hanima ma, sai na ungkabon do bannima! ¹⁰ Ai sai na manjalo do sagala na mangindo, sai na jumpahan do sagala na mangindahi, anjaha sai na ungkabon do bani sagala na mangkartuki. ¹¹ Ise humbani nasiam bapa, na mambere batu bani anakni anggo ipangindo ruti, atap ulog anggo ipangindo dengke, ¹² atap gansip golang anggo ipangindo tolur? ¹³ Gari nasiam na jahat mambotoh mambere na madear bani anak nasiam, samintolah Bapa nasiam na i nagori atas ai ma lang bereonNi Tonduy Napansing bani sagala na mangindo hum Bani? ¹⁴ Santorap iusir Jesus ma sada setan silongah. Jadi dob mandarat setan ai, marsahap ma na longah ai, gabe longang ma halak na mabuei ai. ¹⁵ Tapi deba humbani sidea mangkatahon: Marhitei Beelsebul, raja ni setan do iusir setan-setan ai. ¹⁶ Na legan use mangindo tanda hun langit laho manlajouSi. ¹⁷ Tapi itanda Jesus do pingkiran ni sidea, gabe ihatahon ma bani sidea: Maseda do sagala harajaon, na marsalisih samah dirini anjaha marsirumbakan ma rumahni. ¹⁸ Anjaha anggo marsalisih sibolis samah dirini, mintor sonaha ma pardong ni harajaonni ai? Ihatahon nasiam tene, Huusir setan ai marhitei Beelsebul! ¹⁹ Tapi, anggo Huusir setan-setan mangunsagahkon Beelsebul, ise ma ipangunsagahkon anak nasiam laho mangusirsi? Ai pe sidea ma na manguhumi nasiam. ²⁰ Tapi anggo Huusir setan-setan marhitei tangan ni Naibata, na dob sogop ma harajaon ni Naibata bani nasiam. ²¹ Anggo ijagai sada halak na gogoh, siparsinjata na sirsir rumahni, sonang ma ugas-ugasni. ²² Tapi anggo roh mandorabsi sigogohan humbani anjaha italuhon ia, buatonni ma humbani sagala sinjata hatengeran ni uhurni ai, anjaha bagi-bagihononni ma ai. ²³ Na so mangkasomani Ahu, imbangKu do ai, anjaha na so hasomanKu patumpuhon, na mangerap do ai. ²⁴ Anggo mandarat tonduy na mabutak ai humbani sada jolma, idalani ma ianan na horah, laho mangindahi parsaranan, tapi halani seng dong jumpahsi nini ma: Mulak ma ahu bani ianan, na dob hutadingkon ondi. ²⁵ Jadi, dob roh ia, domma isapu anjaha ipajagar jumpahsi. ²⁶ Dob ai laho ma ia, iarahkon ma pitu setan na legan sijahatan humbani, jadi imasuki ma ai laho marianan ijai, gabe bajanan ma parlahou ni jolma ai bani ujungni marimbang mungkahni. ²⁷ Sanggah na mangkatahon ai Ia, marsora na gogoh ma sada naboru hun tongah-tongah ni jolma na mabuei ai, nini ma hu Bani: Martuah ma na manubuhkon anjaha na painumhon Ham! ²⁸ Tapi nini ma: Martuah ma na mambogei hata ni Naibata anjaha na marimbagashon ai! ²⁹ Jadi sanggah na lambin martumpu ai halak na mabuei ai, ipungkah ma mangkatahon: Na jahat do na sasundut on. Tanda do ipangindo, tapi seng bereon tanda bani sidea sobali tanda ni si Jona. ³⁰ Ai songon si Jona gabe tanda bani parhuta Ninipe, sonai ma Anak ni jolma in bani na sasundut on. ³¹ Na jongjong do magira bani paruhuman ai raja naboru na hundangsina dompak bangsa on, laho manguhumi sidea, ai roh do ia hun ujung ni tanoh on, laho mambogei hapentaron ni si Salomo. Tonggor ma, lobihan do on marimbang raja Salomo. ³² Na jongjong do magira bani paruhuman ai halak Ninipe dompak na sasundut on, laho manguhumi in, ai ipaubah sidea do uhur ni sidea, mambogei ambilan ni si Jona. Tonggor ma, lobihan do on marimbang si Jona. ³³ Seng dong halak na mannahiti lampu, anjaha inahkon ai bani ianan na ponop barang hu toruh ni tapongan, tapi hu atas ni sagakan do ai ibahen, ase iidah halak na roh sinalsalni ai. ³⁴ Palita ni daging do mata. Anggo jorgit matamu, lihar ma ganup angkulamu, tapi anggo sambor do, golap ma angkulamu. ³⁵ Ai pe, jaga ma, ase ulang golap sondang na ibagas ham in. ³⁶ Ase anggo lihar do haganup angkulamu, seng dong na golap ijai, gabe lihar ma haganupan ai, songon sanggah marsinalsal suluh bamu. ³⁷ Sanggah na marsahap ai ope Ia, iarahkon sada halak Parisei ma Ia mangan; jadi masuk ma Ia lanjar hundul ma. ³⁸ Tapi longang do Parisei ai, halani iidah, lang palobei marburih Ia laho mangan. ³⁹ Jadi nini Tuhan in ma hubani: Anggo nasiam Parisei, darat ni panginuman ampa pinggan do ipaborsih nasiam; tapi uhur nasiam parbagas ai gok uhur haut do ampa hajahaton. ⁴⁰ Ee, hanima na oto! Sitompa pardaratni, ai lang Ia do homa sitompa parbagasni? ⁴¹ Tapi bere ma na ibagas ai songon silayak-layak, gabe borsih ma haganup bennima. ⁴² Tapi bursik ma hanima Parisei, ai igalar hanima do parsapuluhan ni hosaya, longa ampa lowoh simaratah, tapi seng parduli hanima bani uhum ampa holong na humbani Naibata. Sihorjahononkon do on, tapi ulang ma tading na legan. ⁴³ Bursik ma hanima Parisei, ai iharosuhkon hanima do hundul bani hundulan lobei-lobei i parguruan ampa bani hata tabi i tongah tiga. ⁴⁴ Bursik ma hanima, ai usih do hanima bani tanoman na so tanda, gabe idogei halak, na so pambotohanni. ⁴⁵ Jadi marbalos ma sahalak sibotoh titah, nini ma hu Bani: Ham Guru, marhitei hataMu ai dihut do hanami sambor ibahen Ham. ⁴⁶ Jadi nini ma: Bursik ma age hanima sibotoh titah, ai ipaporsankon hanima do bani jolma siporsanon na so tarboan, tapi hanima sandiri seng ra manggiut ai age marhitei jari-jari tumang. ⁴⁷ Bursik ma hanima, ai ipauli hanima do tanoman ni nabi-nabi, hape ompung nima do mambunuh sidea. ⁴⁸ Ase isaksihon hanima do pambahenan ni ompung nima, anjaha iharosuhkon hanima do pambahenan ni sidea ai; sidea do na mambunuh nabi-nabi ai, hanima paulihon tanoman ni sidea. ⁴⁹ Halani ai nini hapentaran ni Naibata do: SuruhonKu do bani sidea nabi ampa apostel, bunuhon anjaha pardakdakon ni sidea ma deba hunjai, ⁵⁰ ase Hubalaskon bani na sasundut on daroh ni haganup nabi ampa apostel, na dob durus humbani tombei ni tanoh on, ⁵¹ mamungkah humbani daroh ni si Abel das hubani daroh ni si Sakarias, na tarbunuh i holang-holang ni anjap-anjap ampa rumah panumbahan. Sintong do hatangKon bannima: Luluhononku do in bani na sasundut on. ⁵² Bursik ma hanima sibotoh titah, ai irampok hanima do anak kunsi ni habotohon. Hanima sandiri seng masuk, anjaha halak na sihol masuk, ilanglangi hanima do. ⁵³ Ase dob misir Jesus hunjai, ipungkah sibotoh surat ampa Parisei ma manggompangiSi pangkei-pangkei, anjaha marbagei-bagei ma na isungkunhon sidea hu Bani; ⁵⁴ igompangi sidea do Ia, andohar hona Ia marhitei hataNi.

¹ Sanggah na marrohan halak na mabuei, na marribu-ribu ai, pala marsidogeian sidea, gabe ipungkah Jesus ma marsahap bani susianNi ai, nini ma: Jaga ma hanima pasal ragi ai, ai ma sipakulah-kulah ni Parisei. ² Ai seng dong na rungkub, na so tidak use, anjaha seng dong rusia, na so botohon use. ³ Halani ai sagala na hinatahon nima ibagas na golap, tarbogei do ai use ibagas na lihar, anjaha na hinusipkon nima bani pinggol ibagas kamar, tingtingkononkon do ai use hun tayub ni rumah. ⁴ Tapi Huhatahon ma bannima huan-huanKu: Ulang ma habiari hanima sibunuh angkula, ai legan ni ai aha pe lang tarkahua sidea be. ⁵ Tapi Hupatuduhkon ma bannima na patut sihabiaran nima. Habiari hanima ma Ia, na markuasa mambunuh anjaha na mambuangkon hubagas apuy naraka. Eak, Huhatahon ma bannima, Ia ma habiari hannima! ⁶ Ai lang ijual halak do lima dingis harga lima sen? Tapi sada pe lang hunjai, na ihalupahon Naibata. ⁷ Gari jambulan na bani ulu nima haganup do ibilang. Ulang ma mabiar, harganan do hanima marimbang buei dingis. ⁸ Huhatahon ma bannima: Ganup na manaksihon Ahu i lobei ni jolma saksihonon ni Anak ni Jolma in do ia i lobei ni malekat ni Naibata. ⁹ Tapi na marnalangkon Ahu i lobei ni jolma, parnalangon do ai i lobei ni malekat ni Naibata. ¹⁰ Anjaha ganup na mangkatahon hatani dompak Anak ni jolma in, tarsasap do ai, tapi na mangapasi Tonduy Napansing, seng tarsasap ai. ¹¹ Anggo tarboan hanima hulobei ni parguruan, hulobei ni kopala-kopala ampa siparkuasa, ulang ma haru hanima pasal balos ampa sihatahonon nima. ¹² Ai Tonduy Napansing do mangajarhon bannima bani panorang ai pasal sihatahonon nima. ¹³ Adong ma sahalak humbani halak na mabuei ai, na mangkatahon hu Bani: Guru, hatahon Ham ma saninangku, ase ibagi siteanon nami ai rap pakon ahu. ¹⁴ Tapi nini ma hubani: Ambia! Ise pabangkit Ahu gabe panguhum barang sibagi tean-teanan bannima? ¹⁵ Lanjar ihatahon ma bani sidea: Jaga ma hanima ramotkon hanima ma diri nima dompak sagala uhur haut! Ai age marlobih-lobih halak, seng humbani artani ai goluhni. ¹⁶ Gabe ihatahon ma sada limbaga bani sidea, nini ma: Adong ma sada halak na bayak, buei do gogoh ni jumani. ¹⁷ Jadi marpingkir ma ia ibagas uhurni sonon: Aha ma sibahenonku? Ai seng dong be hasiatan ni gogoh ni jumangku. ¹⁸ Gabe nini ma: On ma hubahen: Huparseda ma tuanganku, anjaha hupauli ma sibanggalhononni ai, ase hujai hupatumpu ganup omei ai ampa artangku haganup. ¹⁹ Anjaha ningku ma bani tonduyhu: Ale tonduyhu, domma sirsir buei artamu, sungkup piga-piga tahun on. Ai pe, marsaran ma ho, mangan, minum anjaha marmalas ni uhur. ²⁰ Tapi nini Naibata ma hubani: Ee ho na oto! Saborngin on ma buaton hosahmu humbam. Anjaha na pinasirsirmin bani ise ma in? ²¹ Sonai ma ujung ni halak, na patumpu-tumpu arta bani dirini, anggo seng bayak ia bani Naibata. ²² Jadi nini Jesus ma dompak susianNi: Halani ai huhatahon ma bannima: Ulang ma holsohkon hanima hosahnima pasari-sari sipanganon barang angkula nima mansarihon parhiouon. ²³ Ai harganan do hosah humbani sipanganon sonai angkula humbani parhiouon. ²⁴ Tonggor hanima ma kawak ai: Seng martidah sidea, seng manabi, seng margudang anjaha seng marsopou, tapi iparmudu-mudu Naibata do sidea. Ai lang daoh do surungan hanima marimbang manuk-manuk? ²⁵ Ise hanima boi paganjang ari-ari ni goluhni age saasta gelah, marhitei holsoh ni uhurni? ²⁶ Ase, anggo mambahen na otik ai pe lang mangasup hanima, mase ma pala holsohan hanima pasal na legan-legan ai? ²⁷ Papangkei hanima ma partubuh ni silundat in, na so pala manorha atap martonun. Huhatahon ma bannima: Gari si Salomo ibagas sagala hasangaponni ai, seng ongga marpakeian songon sada humbani bunga-bunga in. ²⁸ Ase anggo sonai iparhioui Naibata poyon-poyon, na dong sadari on i ladang in, hape patar domma ipuruni, samintolah hanima ma lang parhiouanNi? E hanima siotik haporsayon? ²⁹ Ase ulang ma pindah-pindah uhur nima bani sipanganon atap siinumon, anjaha ulang ma bungbang pasal ai. ³⁰ Halak parbegu na i tanoh on do mangindahi sisonai ai, tapi ibotoh Bapa nima do, na porlu do ai bennima. ³¹ Asal ma ipindahi hanima harajaonNi, dob ai tambahkononNi do ai bannima. ³² Ulang ma mabiar, ale hulanan na etek! Ai na dob iharosuhkon Bapa nima do, mamberehon harajaonNi ai bannima. ³³ Jual hanima ma na adong bannima anjaha marsibere-bere ma. Bahen hanima ma bennima ranjut na so ra buruk, arta i nagori atas, na so ra bois, na so tardohori panangko anjaha na so targagat ngitngit. ³⁴ Ai atap ija arta nima, ijai do uhur nima. ³⁵ Sai margondit ma binongei nima anjaha gara ma lampu nima. ³⁶ Anjaha usih ma hanima bani jolma na paima-imahon tuanni, sadihari ia roh hun parunjukan, ase mintor iungkab ia rohkonsi ia mangkartuki. ³⁷ Martuah ma juak-juak ai, na puho jumpah tuanni bani parrohni ai. Na sintong do hatangkon bannima: Gonditanni ma dirini, hatahononni ma sidea hundul mangan, anjaha jongjong ma ia marugas bani sidea. ³⁸ Anggo roh ia bani runda paduahon atap patoluhon, anjaha jumpahsi sidea sonai, martuah ma sidea. ³⁹ Tapi botoh hanima ma on: Anggo ibotoh tuan rumah, sadihari panorang ni panangko roh, puho do ia, seng palopasonni rumahni hona bongkar. ⁴⁰ Hanima pe, jaga ma, ai na roh do Anak ni jolma in bani panorang, na so panagaman nima. ⁴¹ Jadi nini si Petrus ma: Tuhan, bannami do ihatahon Ham limbaga ai atap bani haganup do? ⁴² Gabe ihatahon Tuhan in ma: Ise ma sijolom anakkunsi, hatengeran ni uhur anjaha na maruhur, sipabangkiton ni tuanni manggomgom juak-juakni, laho mambere bohal ni sidea bani panorangni. ⁴³ Martuah ma juak-juak ai, na mangkorjahon sonai jumpahon ni tuanni bani parrohni ai. ⁴⁴ Sintong do na Huhatahon on bennima: Pabangkitonni do ia manramotkon sagala na adong bani. ⁴⁵ Tapi anggo ihatahon juak-juak ai ibagas uhurni: Dokah ope, ase roh tuankai, gabe ipungkah ma mambogbogi juak-juak dalahi ampa juak-juak naboru ai, anjaha mangan minum ia marmabuk-mabuk, ⁴⁶ Jadi roh ma tuan ni juak-juak ai bani panorang na so panagamanni, ampa bani panorang na so binotohni, anjaha tampulonni ma ia, anjaha bahenonni ma rupeini dos songon na so porsaya. ⁴⁷ Ia juak-juak, na mambotoh harosuh ni tuanni, hape seng marugas ia, anjaha seng ihorjahon harosuh ni uhurni, buei ma lonsing-lonsing tarononni, ⁴⁸ Tapi na so mambotohsi, gabe ihorjahon na patut sihataon, otik do tarononni. Ai buei do situngguon humbani pamberean na buei, anjaha bani ise buei iondoskon, lambin buei do ipindahi humbani. ⁴⁹ Na roh do Ahu manggijigkon apuy hu tanoh on, anjaha masihol do uhurhu ase gara ai! ⁵⁰ Adong do paridian na maningon siparidihononkon Bakku, anjaha bobor tumang do uhurHu paima saud ai. ⁵¹ Ai iagan uhur nima do, roh Ahu, laho mambere damei hu atas tanoh on? Lang, Huhatahon ma bannima, panirangon do tene. ⁵² Ai hunjon hujanan marsilawanan do lima halak ibagas sada jabu, na tolu manlawan na dua, anjaha na dua manlawan na tolu. ⁵³ Adong do parlawanon, bapa dompak anakni anjaha anak dompak bapani, inang dompak boruni anjaha boru dompak inangni, simatua dompak parumaenni anjaha parumaen dompak simatuani. ⁵⁴ Ihatahon do homa dompak halak na mabuei ai: Anggo iidah nasiam naik hombun i hasundutan, mintor ihatahon nasiam do: Na roh ma udan, jadi saud do sonai. ⁵⁵ Anjaha sanggah marombus logou hun dangsina, ihatahon nasiam do: Na roh ma logou ni ari, jadi saud do. ⁵⁶ E nasiam sipakulah-kulah, ibotoh nasiam do manimbangi rupa ni tanoh on ampa langit ai, tapi panorang on, mase lang iartihon nasiam? ⁵⁷ Mase ma lang itimbangi nasiam bani nasiam, aha na pintor? ⁵⁸ Sanggah laho ho rap pakon imbangmu marayak pamarentah, porluhon ma mardear pakonsi sanggah i tongah dalan, ase ulang itogu ho hubani panguhum, gabe iondoskon panguhum ai ho bani upas, anjaha upas ai pamasuk ho hubagas tutupan. ⁵⁹ Huhatahon ma bam, seng anjai luar ho hunjai, paima igalar ho ronsi na sarimis.

¹ Bani panorang ai adong ma na roh patugahkon hu Bani pasal halak Galilea, na dob madurus darohni ibahen si Latus, anjaha saor bani galangan ni sidea. ² Jadi nini Jesus ma mambalosi sidea: Na iagan uhur nima do mardousanan halak Galilea ai marimbang haganup halak Galilea, halani sonai mangonai bani sidea? ³ Huhatahon ma bennima: Lang, tapi anggo seng mubah uhur nima, lanjar sonai do hanima haganup magou use. ⁴ Barang na iagan hanima do banggalan salah ni sisapuluh ualuh halak ai, na matei idondoni manara na i Siloam ai, marimbang haganup halak na marianan i Jerusalem? ⁵ Huhatahon ma bennima: Lang, tapi anggo seng mubah uhur nima, lanjar sonai do hanima haganup magou use. ⁶ Dob ai ihatahon ma limbaga on: Adong ma hayu ara ni sada halak, na sinuanni i pohon anggurni; jadi roh ma ia mangindahi buahni, hape seng dong jumpahsi. ⁷ Gabe ihatahon ma hubani sihorjahon pohon anggurni ai: Tonggor ma, domma pala patolu-tahunkon roh ahu mangindahi buah ni hayu ara on, hape seng dong. Roboh ma in, mase ma soya tanoh in bahenon ni in? ⁸ Tapi nini mambalosi: Tuan nami, paturut ham ma lobei in satahun on, ase sompat husangkul tanoh inggot ni in, anjaha hubahen napu hujin, ⁹ andohar marbuah hu lobeian on; tapi anggo seng ra be, naroboh ma. ¹⁰ Jadi mangajari ma Ia bani sada parguruan sanggah ari Sabat. ¹¹ Anjaha tonggor ma, adong ma ijai sada naboru na siniaran ni tonduy na jahat. Domma sapuluh ualuh tahun ia boritan, suhung do angkulani, anjaha seng boi ia jongjong dirgak. ¹² Dob iidah Jesus ai, idilo ma ia anjaha nini ma hubani: Ham inang, maluah ma ham humbani naboritmu in! ¹³ Lanjar itampeihon ma tanganNi hubani; gabe mintor dirgak ma ia, anjaha ipuji ma Naibata. ¹⁴ Ia sintua ni parguruan ai, sogam do uhurni, halani na pamalum naborit ai Jesus sanggah ari Sabat, gabe nini ma hubani halak na mabuei ai: Onom ari do pangkorjahononkon; ijai ma nasiam roh, ase ipamalum nasiam, ulang ma sanggah ari Sabat. ¹⁵ Jadi nini Tuhan in ma mambalosisi: Ale sipakulah-kulah, ai lang haganup do nasiam, age bani ari Sabat paluahkon lombuni atap halodeni humbani harang, laho pasiburhon ai? ¹⁶ Ia naboru on, ai ma boru ni si Abraham, na dob sinangkut ni setan sapuluh ualuh tahun dokahni, mintor lang ma patut tanggalan sangkut-sangkut on bani ari Sabat? ¹⁷ Jadi dob ihatahon sonai, maila ma haganup imbang-imbangNi ai, tapi marmalas ni uhur do haganup halak na mabuei ai, halani haganup pambahenanNi na marmulia ai. ¹⁸ Dob ai ihatahon ma: Usih huja do harajaon ni Naibata, anjaha huja do ai pausihonKu? ¹⁹ Usih do ai hubani batu ni loharum, na binuat ni halak laho manaburhon ai hu jumani. Jadi tubuh ma, anjaha roh do manuk-manuk na i awang-awang marasar bani dangkahni. ²⁰ Jadi nini ma use: Huja do pausihonKu harajaon ni Naibata? ²¹ Usih do ai bani ragi, na binuat ni sada naboru, laho manaorhon ai bani itak tolu tumba, paima marragi ganupan ai. ²² Jadi ibontas Jesus ma huta ampa dusun laho mangajari, sanggah bani pardalananNi dompak Jerusalem. ²³ Jadi nini sada halak ma hu Bani: Tuhan, otik do gakni na saud maluah? ²⁴ Tapi Nini ma dompak sidea: Maruntol ma nasiam masuk hun labah na sompit in! Ai Huhatahon ma bani nasiam: buei do namin na manlajou masuk, tapi lang boi. ²⁵ Anggo jongjong ma holi simada rumah ai, anjaha itutup labah ai, idarat ma nasiam jongjong hartuk-hartuk marsahap: Tuhan, ungkab Ham ma! tapi hatahononNi ma: Seng hubotoh na roh hunja nasiam! ²⁶ Gabe hatahonon nasiam ma: Na rap mangan minum do hanami pakon Ham, anjaha iajari Ham do hanami i alaman nami. ²⁷ Dob ai hatahononNi ma: Seng Hubotoh na roh hunja nasiam. Laho ma hun lobeiHu, nasiam ganup sihorjahon na so pintor! ²⁸ Ijai ma masa doruh-doruh ampa na patungosngoson, sanggah na iidah nasiam si Abraham, si Isak, si Jakob ampa haganup nabi-nabi ai ibagas harajaon ni Naibata, tapi anggo nasiam tarbuang hu darat. ²⁹ Ijai ma roh na hun hapoltakan ampa hasundutan, na hun utara ampa dangsina, hundul mangan ibagas harajaon ni Naibata. ³⁰ Anjaha tonggor ma, adong do na parpudi gabe parlobei, anjaha na parlobei gabe parpudi. ³¹ Bani panorang ai roh ma deba Parisei mangkatahon hu Bani: Laho ma Ham, misir hunjon, ai sihol bunuhon ni si Herodes do Ham. ³² Gabe Nini ma dompak sidea: Laho ma nasiam, hatahon nasiam ma bani sorigala ai: Tonggor ma, Ahu mangusir setan-setan ampa pamalum na boritan sadari on ampa patar, anjaha ari patoluhon marujung ma langkahKu. ³³ Tapi maningon mardalan do Ahu sadari on, patar ampa bani ari na mangihut Hujai, ai seng bulih matei nabi anggo idarat ni Jerusalem. ³⁴ Jerusalem, Jerusalem, sibunuh nabi-nabi anjaha sipargijig bani batu halak na sinuruh marayak ham! Gati do namin sihol patumpuonku anakmu, songon indung ni dayok, na patumpuhon anakni hu toruh ni habongni, tapi seng ra ham! ³⁵ Tonggor ma, tarulang ma rumah nasiam. Tapi Huhatahon ma bani nasiam: Seng idahon nasiam be Ahu, paima ihatahon nasiam: Pinasu-pasu ma na roh marhitei goran ni Tuhan!

¹ Jadi masa ma, sanggah na masuk Ia hu rumah ni sada halak sintua ni Parisei bani ari Sabat, laho mangan domma ijai sidea manggompangiSi. ² Jadi adong ma ijai, i lobeiNi, sada halak na busungon. ³ Jadi nini Jesus ma manungkun sibotoh titah ampa Parisei ai: Ai bulih do pamalumon naborit bani ari Sabat atap lang? ⁴ Tapi sip do anggo sidea. Jadi ijamah ma halak ai, ipamalum ma, lanjar isuruh ma mulak. ⁵ Anjaha nini ma hubani sidea: Ise humbani nasiam, anggo tarrobung hubagas parigi anakni atap lombu nasiam, ai lang mintor itarik nasiam do ai hu atas, age bani ari Sabat? ⁶ Tapi seng tarbalosi sidea hataNi ai. ⁷ Dob ai ihatahon ma sada limbaga bani na nidilo ai, halani iidah mamilihi ianan situnggungan sidea, Nini ma dompak sidea: ⁸ Anggo idilo ham hu pesta parunjukan, ulang ma hundul ham bani hundulan ianan sisangapan, atap adong niontangni sangapan humbamu, ⁹ gabe roh holi suhut ai, na mangontang ham ampa ia, mangkatahon bamu: Bani ma ianan in! Jadi maila ma ham hundul bani ianan sitoruhan. ¹⁰ Tapi anggo hona ontang ham, laho anjaha hundul ma ham bani ianan sitoruhan, ase anggo roh na mangontang ham ai, mangkatahon bamu: Hu atashon ma ham hundul! Jadi sangap ma ham idahon ni ganup hasomanmu na niontang ai. ¹¹ Ai sagala na pagijang dirini, patoruhon do, tapi na patoruh dirini, sipagijangon do. ¹² Ihatahon ma homa hubani na mangontangSi ai: Anggo ibahen ham pesta-pesta sanggah arian atap bodari, ulang ma dilo ham huan-huan atap saninamu, hade-hade atap parhutamu na bayak-bayak, ase ulang idilo sidea use ham, gabe ibalas ai use bamu. ¹³ Tapi anggo mambahen pesta-pesta ham, dilo ham ma na masombuh, na marsining, na repat ampa na mapitung. ¹⁴ Gabe martuah ma ham, ai seng tarbalos sidea ai bamu, tapi marbalos do ai bamu bani parpuhoon ni halak parpintor. ¹⁵ Sada humbani na mangan ai, dob ibogei ai, nini ma hu Bani: Martuah ma na mangan i harajaon ni Naibata! ¹⁶ Jadi nini Jesus ma mambalosi: Adong ma sada halak na marpesta banggal; buei do iontang hujai. ¹⁷ Jadi bani mata ni pesta ai isuruh ma juak-juakni mangkatahon bani na dob niontangni ai: Roh ma nasiam, ai domma sirsir haganup! ¹⁸ Tapi adong bei do sidalian ni sidea haganup. Nini na parlobei ai ma hubani: Baru mamboli juma do ahu, maningon laho do ahu manorih ai. Ulang pala sonaha uhurmu! ¹⁹ Na legan mangkatahon: Baru mamboli horbou do ahu lima pasang; laho ma ahu mamareksa ai. Ulang pala sonaha uhurmu! ²⁰ Na legan use mangkatahon: Baru mambuat boru ope ahu, halani ai seng tarbahen ahu roh. ²¹ Dob mulak juak-juak ai, ipatugah ma ai bani tuanni ai. Jadi marah ma tuan ai, ihatahon ma bani juak-juakni ai: Laho ma ho podas hu pasar ampa hu dalan na i huta on, arahkon ma halak na masombuh, na marsining, na mapitung ampa na repat. ²² Jadi, dob mulak, nini juak-juak ai ma: Domma saud na hinatahonmu ai, ale tuan nami, tapi lumbang ope. ²³ Jadi ihatahon tuan ai ma bani juak-juak ai: Laho ma ho hu darat bani dalan na bolon ampa topi ni dalan, gogohkon ma sidea masuk ase gok rumahku! ²⁴ Tapi Huhatahon ma bennima: Sahalak pe lang humbani na niontang hinan bulih mandai sipanganon na Hupasirsir in. ²⁵ Sahali sanggah buei jolma mardalan mangirikkonSi, jadi marhusor ma Ia mandompakkon sidea, lanjar nini ma: ²⁶ Barang ise na roh hu Bakku, seng tarbahensi gabe susianKu, anggo seng sogam uhurni bani bapani, inangni, parinangonni, niombahni, saninani, botouni ronsi hosahni sandiri. ²⁷ Seng tarbahen gabe susianKu halak, na so mamorsan silangni, laho mangirikkon Ahu! ²⁸ Ise ma humbani nasiam, na sihol pajongjong sada menara, na so hundul lobei mangetong na porlu hujai, atap na sungkup do laho mandobkon horja ai? ²⁹ Ase ulang holi, anggo domma ipauli onjolanni, hape seng tuk gogohni mandobkon, gabe igora-gora halak na mangidah ai ia. ³⁰ nini sidea hubani: Ipungkah halak on do pajongjongkon, hape seng tardobkonsi. ³¹ Atap raja ja ma, na laho marporang pakon raja na legan, na so parlobei hundul marpingkir-pingkir, atap na tardompakkonsi do marhasoman salaksa tentara imbangni ai, na roh mandorabsi marhasoman dua laksa? ³² Tapi anggo seng tarbahensi, tontu suruhonni do suruhan mangindo pardameian, sanggah daoh ope munsuh ai. ³³ Nasiam pe, seng tarbahen atap ise pe humbani nasiam gabe susianKu, anggo seng tartadingkonsi haganup na dong bani. ³⁴ Na marguna do garam, tapi anggo mambar daini, aha ma bahenon paporadkon ai? ³⁵ Seng marguna ai hu juma atap bahen napu, siambukkonon mando ai. Barang ise na marpinggol, na marpanangar, itangihon ma ai.

¹ Somal do sijalo sohei ampa sipardousa roh hundohor hu Bani, laho manangar hataNi. ² Jadi marungut-ungut ma halak Parisei ampa sibotoh surat, nini sidea ma: Ijalo on do sipardousa, anjaha rap mangan do Ia pakon sidea. ³ Gabe ihatahon Jesus ma limbaga on bani sidea: ⁴ Ise ma humbani nasiam sahalak parbiri-biri saratus, anggo magou sada hunjai, na so manadingkon na siah puluh siah nari ai i parmahanan, laho mangindahi na so taridah ai, ronsi na jumpahsi ai? ⁵ Anjaha dob jumpahsi, itampeihon ma ai bani abarani halani malas ni uhurni. ⁶ Daskonsi ia hu rumahni, idilo ma martumpu huan-huanni ampa romban rumahni, nini ma bani sidea: Marmalas ni uhur ma nasiam rap pakon ahu, halani jumpah ahu do biri-biringku na magou ai. ⁷ Huhatahon ma bani nasiam: Usih hujai, bueinan do malas ni uhur i nagori atas mangidah sada pardousa, na ra paubahkon uhurni, ase mangidah siah puluh siah parpintor, na so pala paubahkon uhur ni sidea. ⁸ Atap dong do nani naboru siparduit sapuluh rupiah, anggo magou sada hunjai, na so pagarahon palita, anjaha manapui rumahni, laho mangindahi duitni na magou ai, paima jumpahsi ai? ⁹ Anjaha dob jumpahsi, idilo ma martumpu huan-huanni ampa romban rumahni, nini ma: Marmalas ni uhur ma nasiam rap pakon ahu, ai domma jumpah ahu duitku na magou ai. ¹⁰ Huhatahon ma bani nasiam: Usih hujai do masa malas ni uhur i lobei ni malekat ni Naibata mangidah sahalak sipardousa, na paubahkon uhurni. ¹¹ Dob ai nini ma use: Adong ma dua anak ni sada halak. ¹² Gabe ihatahon sianggian ai ma dompak bapani ai: Bapa, bere ham ma bakku humbani arta in, na sahira parbagiananku. Jadi ibagihon ma artani ai bani sidea. ¹³ Anjaha seng pala piga ari ipudi ni ai, ipatumpu sianggian ai ma haganup parbagiananni ai, dob ai laho ma ia hu nagori na daoh, anjaha ijai ma iparbois-bois artani ai marhitei goluh na so marrantei. ¹⁴ Dob iboiskon haganupan ai, masa ma lohei maningting i nagori ai, anjaha ia pe mulai ma marhahurangan. ¹⁵ Jadi laho ma ia tondok bani sada halak parnagori ai, gabe isuruh ma ia marmahan babuy hu jumani. ¹⁶ Ipindo uhurni do manggoki boltokni bani hulit-hulit ni indahan ni babuy ai, tapi seng dong na mamberesi bani. ¹⁷ Jadi ipaulak ma uhurni hu bagas, nini ma: Buei ni in gajian ni bapa, na marlobih-lobih bani sipanganon, hape ahu, matei gayuran do ijon. ¹⁸ Misir mando ahu marayak bapa, huhatahon ma hubani: Ham bapa, domma mardousa ahu hu nagori atas ampa bamu. ¹⁹ Seng talup be ahu goranon anakmu, bahen ham ma ahu songon sada halak gajian bamu. ²⁰ Jadi misir ma ia marayak bapani ai. Tapi daoh ope ia, domma itatap bapani ai ia, gabe maidop ma uhurni; marlintun ma ia manjumpahkonsi, irohop ma ia anjaha isummah. ²¹ Marsahap ma anak ai bani: Ham bapa, domma mardousa ahu hu nagori atas ampa hubamu, seng talup be goranon ahu anakmu! ²² Tapi nini bapa ai ma dompak jabolonni: Boan hanima ma pakeian sijengesan, anjaha pakeihon hanima ma ai bani! Bahen hanima ma sada tintin bani jari-jarini ampa sipatu bani naheini! ²³ Alop hanima ma anak ni lombu na pinamombur ai, anjaha sayat ma, ase mangan hita anjaha marmalas ni uhur. ²⁴ Ai na dob matei do anakkon gabe mulak manggoluh, na dob magou do ia, gabe jumpah use. Jadi marmalas ni uhur ma sidea. ²⁵ Tapi i juma do anakni sikahanan ai. Jadi rohkonsi ia hun dohor hu rumah, ibogei ma sora ni musik ampa na manortor. ²⁶ Gabe idilo ma sahalak humbani jabolon ai, ipapangkei ma atap aha do na masa. ²⁷ Jadi nini ma hubani: Domma roh anggimu, jadi isayat bapanta do lombu pinamombur ai, halani jorgit do ia mulak. ²⁸ Jadi marah ma ia, anjaha seng ra roh hu rumah, gabe roh ma bapani mangajar-ajarisi. ²⁹ Tapi nini ma mambalosi bapani ai: Martahun-tahun ma ahu mambalosi ham, anjaha seng ongga hulanggar parentahmu. Tapi anak ni hambing pe lang ongga ibere ham bakku, ase marmalas ni uhur ahu ampa huan-huanku. ³⁰ Hape rohkonsi anakmu, na mamboiskon artamu rap pakon boru jalang, gabe isayat ham do anak ni lombu na pinamombur in. ³¹ Jadi nini ma hubani: Ambia, tongtong do ho rap pakon ahu, anjaha haganup na dong bakku in, ho do simadasi. ³² Tapi patut do hita marmalas ni uhur anjaha marmegah-megah, ai na dob matei do anggimon gabe manggoluh, anjaha na dob magou do ia, gabe jumpah.

¹ Ihatahon ope homa bani susianNi ai: Adong ma sada halak na bayak, anjaha adong do sada sijolom anak kunsi bani. Tarbogei ma hubani, na iparbois-bois sijolom anak kunsi ai do artani. ² Jadi idilo ma ia, nini ma hubani: Aha do in, na hutangar pasal ho? Patuduh ma paretongan ni na hinorjahonmu! Ai seng tarbahen be ho sijolom anak kunsi. ³ Jadi marpingkir ma sijolom anak kunsi ai ibagas uhurni: Aha ma sibahenonku, ai lopaskonon ni tuanku mando ahu humbani horjangku? Manangkul seng dong gogohku, mangindo-indo mela do ahu. ⁴ On ma tene sibahenonku, ase ijalo sidea ahu hu rumah ni sidea, anggo lopas ahu humbani horjangkai. ⁵ Jadi sada-sada ma idilo sagala paridouan ni tuanni ai hu lobeini, nini ma hubani na parlobei roh ai: Sadiha utangmu bani tuanta? ⁶ Balosni: Saratus gusi minak. Jadi nini ma hubani: On ma surat ni utangmu, podashon hundul anjaha suratkon ma: lima puluh! ⁷ Bani na legan use ihatahon: Ia ho, sadiha do utangmu? Nini ma: Saratus sumpit omei. Ihatahon ma hubani: On ma surat ni utangmu, suratkon ma: ualuh puluh! ⁸ Jadi ipuji tuan ai ma sijolom anak kunsi paruhur na geduk ai, halani pentar ni pambahenanni ai. Ai pandeinan do anak ni dunia on humbani anak haliharon in marsaor pakon hasomanni sauhur. ⁹ Ahu pe, huhatahon ma bennima: Pindahi hanima ma bannima huan-huan marhitei Mammon na geduk in, ase anggo bois in, ijalo hanima hubagas ianan sisadokah ni dokahni. ¹⁰ Anggo hatengeran ni uhur halak bani na otik, hatengeran ni uhur do ia age bani na buei, anjaha anggo geduk ia bani na otik, geduk do homa age bani na buei. ¹¹ Anggo seng hatengeran ni uhur hanima pasal Mammon na geduk in, ise ma na ra mangondoskon bannima arta na tongon ai? ¹² Anjaha anggo seng hatengeren ni uhur hanima pasal barang ni halak na legan, ise ma na ra mamberehon bannima na dong Bannami. ¹³ Seng tarbalosi sada jabolon dua tuan, sogamanni do na sada, haholonganni do na sada nari; hombaranni do na sada, anjaha mapas bani na sada nari. Seng tarbalosi hanima Naibata rap pakon Mammon. ¹⁴ Haganupan ai itangar halak Parisei, na surakah bani duit, gabe irisa-risai sidea ma Ia. ¹⁵ Jadi nini ma dompak sidea: Ia nasiam, ipapintor-pintor nasiam do diri nasiam i lobei ni jolma, tapi itanda Naibata do uhur nasiam, ai na timbul bani jolma, ai do hagigi bani Naibata. ¹⁶ Sibar si Johannes do titah in ampa nabi-nabi. Hunjai nari iambilankon ma ambilan na madear pasal harajaon ni Naibata, anjaha haganup do halak marompot sihol masuk hu bagas. ¹⁷ Tapi urahan do salpu langit ampa tanoh humbani sada titik ni titah in magou. ¹⁸ Parbangkis do ganup na manirangkon parinangonni anjaha ibuat na legan; parbangkis do homa na mambuat naboru na sinirangkon ni dalahi ni ai. ¹⁹ Adong ma sada halak na bayak, na marpakeian beledu sigerger ampa hiou putih na alus, ari-ari do ia marpesta. ²⁰ Tapi adong ma sada halak na masombuh, na margoran si Lasarus, tibal-tibal i lobei ni labah ni na bayak ai; gok bayoh do angkulani. ²¹ Iparsinta uhurni do mangankon rima-rima, na mardabuhan humbani meja ni halak na bayak ai; tapi baliang do na roh mandilati bayohni ai. ²² Matei ma halak na masombuh ai, anjaha iboan malekat ma ia hu abingan ni si Abraham. Matei ma homa na bayak ai, lanjar itanom ma, ²³ anjaha hun nagori toruh ai, iananni mandagei na parngit ai, mangkawah ma ia hu babou, gabe iidah ma bani na daoh, si Abraham ampa si Lasarus i abinganni. ²⁴ Jadi dilo-dilo ma ia, nini ma: Ale ompung Abraham! Idop ma uhurmu bakku, suruh ham ma si Lasarus manornobhon ujung ni jari-jarini bani bah, laho palamlam dilahku, ai borit do huahap ibagas apuy on. ²⁵ Tapi nini si Abraham ma: Ingat ma, ambia, na dob ijalo ho na madear, sanggah manggoluh ho, tapi anggo si Lasarus on na maparngit do. Anggo nuan apohon ma ia ijon, tapi mandagei na parngit mando anggo ho. ²⁶ Ambah ni ai, lombang bagas do holang-holang nami ampa hanima, ase ulang boi halak na hunjon hujin, anjaha na hunjin pe seng boi mandipar bennami hujon. ²⁷ Nini ma use: Anggo sonai do, hupangindo ma bamu ompung, suruh ham ma ia hu rumah ni bapa, ²⁸ ai adong ope lima nari saninangku, ase ipalumba sidea, ase ulang dihut sidea masuk bani ianan na parngit on. ²⁹ Tapi nini si Abraham ma: Adong do bani sidea surat ni si Musa ampa nabi, ai ma itangihon. ³⁰ Jadi nini ma: Lang sonai, ompung Abraham; tapi ambit adong sahalak humbani na dob matei roh marayak sidea, sai na paubahon ni sidea do uhur ni sidea. ³¹ Tapi ibalosi ma: Anggo seng itangihon sidea si Musa pakon nabi-nabi, seng anjai balosan ni sidea, age adong na puho humbani na matei.

¹ Ihatahon ma hubani susianNi ai: Seng tarbahen lang roh parsangsian, tapi bursik ma na parohkonsi. ² Dearan do bani halak sisonai ai, igantungkon losung batu bani borgokni anjaha inongnongkon ia hu laut, humbani na sangsi ibahen sahalak na etek-etek on. ³ Jaga hanima ma diri nima! Anggo mardousa hasomanmu, pagolpa ma ia, jadi anggo ipaubah uhurni, sasap ma dousani. ⁴ Anjaha porini pitu hali ia ibagas na sadari marsalah dompak ho, anjaha pitu hali ia roh hubam mangkatahon: "Jora ma ahu", maningon sasaponmu do ai. ⁵ Dob ai nini apostel ai ma dompak Tuhan in: Tambahi Ham ma haporsayaonnami! ⁶ Jadi nini Tuhan in ma: Anggo adong haporsayaon nima na sabatu ni loharum, boi do hatahonon nima bani hayu ara on: Morbat ma ho, anjaha tarsuan ma ho hu laut! gabe balosanni do hanima. ⁷ Porini adong humban nima na marnah jabolon, sipaninggala atap siparmahan pe ai, mintor hatahononni ma hubani, sanggah mulak ia hun juma: Podas ma roh hujon, hundul ma ho mangan! ⁸ Tapi ai lang hatahonon nima do hubani: Patorsa sipanganonku, mamonting ma, idangi ma ahu mangan ampa minum, dob ai pe ase mangan anjaha minum ho! ⁹ Mintor martarima kasih ma ia hubani jabolon ai, halani ihorjahon na niaturhoni ai! ¹⁰ Sonai do homa hanima: Anggo domma ihorjahon hanima ganup na pinarentahkon bannima, hatahon hanima ma: Jabolon na so margagan do hanami, sibar horja na patut do hansa ilahoi hanami. ¹¹ Sanggah mardalan Ia dompak Jerusalem, ibontas ma parbalogan ni Samaria ampa Galilea. ¹² Sanggah na laho masuk Ia hubagas sada huta, ijumpahkon sapuluh halak na gadamon ma Ia, na jongjong mandaoh-daoh. ¹³ Ipagomos sidea ma sorani, nini ma: Jesus, Guru, idop ma uhurmu bannami! ¹⁴ Dob iidah sidea, nini ma: Laho ma nasiam, patuduhkon nasiam ma dirinasiam bani malim! Anjaha sanggah na laho ai sidea, gabe susi ma sidea. ¹⁵ Sada humbani sidea, dob iidah na dob malum ia, mulak ma, lanjar ipuji do Naibata marhasoman sora na gogoh. ¹⁶ Manrogop ma ia hu lobei ni Jesus, mangkatahon tarima kasih Bani. Anjaha halak Samaria do ai. ¹⁷ Tapi nini Jesus ma mambalosi: Ai lang sapuluh do sidea na dob malum ai? Ija do na siah nari? ¹⁸ Ai seng dong hape na ra mulak pasangaphon Naibata, sobali halak na legan bangsa on? ¹⁹ Lanjar Nini ma hubani: Jongjong ma ham, laho ma! Haporsayaonmu do na paluahkon ham! ²⁰ Isungkun Parisei ma Ia: Antigan ma roh harajaon ni Naibata? Jadi nini ma mambalosi sidea: Seng marpanrantam idahon parroh ni harajaon ni Naibata. ²¹ Anjaha seng tarhatahon: Tonggor ma "ijon do!" atap: "ijai do!" Ai i tongah-tongah nasiam do harajaon ni Naibata. ²² Dob ai nini ma hubani susianNi ai: Na roh ma arini, siholan ma hanima sihol mangidah sada ari ni Anak ni jolma in, tapi seng idahon nima ai. ²³ Anjaha hatahonon ni sidea do bannima: Tonggor ma, ijai do! Tonggor ma, ijon do! Ulang ma laho hanima hujai anjaha ulang ma irikkon! ²⁴ Ai songon hilap na mardejep, na mambahen siang langit hun ujung hu ujung, sonai do pasal Anak ni jolma in bani arini ai. ²⁵ Tapi maningon buei do lobei tarononni; ambukkonon ni na sasundut on do Ia. ²⁶ Songon na masa bani panorang ni si Noak, sonai do masa bani panorang ni Anak ni jolma in. ²⁷ Mangan minum do sidea, mambuat boru anjaha palahohon boru, das bani panorang ni si Noak masuk hubagas parau ai; jadi roh ma bah na sumbang ai mamboiskon sidea haganup. ²⁸ Songon na masa bani panorang ni si Lot: Mangan minum do sidea, mamboli anjaha manjual, manuan anjaha pajongjong rumah. ²⁹ Tapi bani panorang parlaho ni si Lot hun huta Sodom, turun ma udan apuy pakon hirtah hun babou, laho mamboishon sidea haganup. ³⁰ Sonai ma masa bani ari ai, talarhonsi Anak ni jolma in. ³¹ Ise bani ari ai iatas tayub, anjaha ugas-ugasni adong ibagas rumah ai, ulang ma pala ia turun laho mangalop ai; anjaha na i juma pe ulang ma pala mulak. ³² Ingat ma parinangon ni si Lot, ³³ Agoan hosah ma na sihol paluahkon hosahni, tapi na agoan hosah, ai do na pagoluhkonsi. ³⁴ Huhatahon ma bannima: Bani na saborngin ai adong ma dua halak sapodoman, sada ijalo, na sada nari itadingkon do. ³⁵ Rap manduda ma dua naboru, sada ijalo, tapi na sada nari itadingkon do. ³⁶ Adong ma dua halak i juma, sada ijalo, tapi na sada nari itadingkon do. ³⁷ Jadi nini sidea ma mambalosiSi: Ija ma ai Tuhan? Jadi Nini ma bani sidea: Ija adong bangkei, hujai do martumpu kawak.

¹ Dob ai ihatahon ma bani sidea sada limbaga, laho patorangkon paboa maningon tongtong do sidea martonggo, seng bulih lengah, ² nini ma: Adong ma sada panguhum ibagas sada huta, seng mabiar ia bani Naibata anjaha seng parduli bani jolma. ³ Anjaha adong do homa i huta ai sada naboru na mabalu, na marnunut roh marayaksi, mangkatahon: Pintori ham ma ahu dompak imbangkai! ⁴ Dokah do seng ra ia lobei. Tapi nini ma use ibagas uhurni: Tongon, seng huhabiari Naibata, anjaha seng parduli ahu bani jolma, ⁵ tapi huurus ma lah parkara ni naboru na mabalu on, ase ulang roh be ia manunsahi ahu. ⁶ Dob ai nini Tuhan in ma: Tangar hanima ma hata ni panguhum na geduk ai! ⁷ Ia Naibata, mintor lang ma pintoranNi na pinilihNi, na mandiloSi arian pakon borngin? Ai padokah-dokahonNi ma bani sidea? ⁸ Huhatahon ma bennima: Podas ma sidea pintoranNi! Tapi anggo roh Anak ni jolma in, adong do nani jumpahonNi haporsayaon i atas tanoh on? ⁹ Dob ai ihatahon ma sada limbaga pasal halak na martenger ni uhur bani dirini, na mangkatahon pintor sidea, na mapas bani hasomanni, nini ma: ¹⁰ Adong ma dua halak na tangkog hu rumah panumbahan martonggo, halak Parisei do na sada, anjaha sijalo sohei do na sada nari. ¹¹ Jadi dorgak ma Parisei ai jongjong, anjaha sonon ma tonggoni ibagas uhurni: Ham Naibata, tarima kasih ma huhatahon Bamu, halani seng dos ahu pakon halak na legan, panrampok, pargeduk, parbangkis barang songon sijalo sohei an. ¹² Dua hali saminggu ahu marpuasa, anjaha huparsapuluh do sagala sinaringku. ¹³ Ia halak sijalo sohei ai mandaoh-daoh do ia jongjong, gari mangkawah dompak nagori atas seng barani ia. Tapi itompas ma tontonni, lanjar nini ma: Ham Naibata, idop ma uhurmu bakku pardousa on! ¹⁴ Huhatahon ma bennima: Pintoran do on laho mulak ase na sada an. Ai sipatoruhon do sagala na pagijang dirini, tapi na patoruh dirini sipagijangon do! ¹⁵ Iboan sidea do homa dakdanak hu lobeiNi, ase ijamah sidea. Tapi mangidah ai susian ai, ipandang ma sidea. ¹⁶ Tapi idilo Jesus ma sidea, Nini ma: Lopas hanima ma roh dakdanak in Bakku, ulang ma pandang hanima sidea, ai bani sisonin do harajaon ni Naibata! ¹⁷ Sintong do na Huhatahon on bennima: Na so manjalo harajaon ni Naibata songon dakdanak, seng anjai masuk ia hujai. ¹⁸ Jadi isungkun sada halak sipambobai ma Ia, nini ma: Ham Guru, sidear uhur, aha do sibahenonku, ase tartean ahu hagoluhan na sadokah ni dokahni? ¹⁹ Jadi nini Jesus ma hubani: Mase ihatahon ham Ahu sidear uhur? Seng dong sidear uhur sobali Naibata. ²⁰ Ibotoh ham do titah in: Ulang ho marbangkis! Ulang ho mamunuh! Ulang ho manangko! Ulang ra ho manaksihon hata na so tongon! Pasangap bapamu pakon inangmu! ²¹ Jadi nini ma: Haganupan ai domma hudalankon humbani sietek-etekonku nari. ²² Manangar ai Jesus, Nini ma hubani: Sada mando na hurang bamu! Jual ham ma haganup na dong bamu, anjaha pambere ma ai bani halak na masombuh, gabe mararta ma ham i nagori atas. Dob ai roh ma ham, irikkon ham ma Ahu! ²³ Manangar ai pusok ma uhurni, ai na bayak tumang do ia. ²⁴ Mangidah ai Jesus, nini ma: Maholni in masuk halak na bayak hubagas harajaon ni Naibata! ²⁵ Urahan do masukan ni unta ruang ni jarum, ase sada halak na bayak masuk hubagas harajaon ni Naibata. ²⁶ Jadi nini halak na manangar ai ma: Anggo sonai, ise ma boi maluah? ²⁷ Nini ma: Na so tarbahen bani jolma, tarbahen Naibata do. ²⁸ Jadi nini si Petrus ma: Itadingkon hanami do na dong bannami, laho mangirikkon ham. ²⁹ Gabe ihatahon ma bani sidea: Na sintong do hatangKon bannima: Sagala na manadingkon rumahni barang parinangonni barang saninani barang namatorasni barang niombahni halani harajaon ni Naibata, ³⁰ maningon marlompit do jaloonni i dunia on, ambahni ai hagoluhan sisadokah ni dokahni bani dunia magira. ³¹ Jadi iarahkon Jesus ma na sapuluh dua ai, nini ma dompak sidea: Tonggor ma, na tangkog ma hita hu Jerusalem, anjaha saud ma bani Anak ni joma in haganup, na dob tarsurat marhitei sagala nabi. ³² Ai ondoshonon ma Ia bani sipajuh begu-begu, gabe apasanni anjaha pahirionni anjaha tijuranni ma Ia, ³³ lonsingan anjaha bunuhonni ma Ia, dob ai mulak manggoluh do Ia bani ari patoluhon. ³⁴ Tapi otik pe lang iarusi sidea pasal ai; ponop do hata ai humbani uhur ni sidea, seng ibotoh sidea na hinatahonNi ai. ³⁵ Jadi sanggah na dohor Ia hu Jeriko, adong ma sada halak na mapitung, hundul-hundul i dalan ai mangindo-indo. ³⁶ Manangar halak na mabuei, na mamontas ai, ipapangkei ma atap aha do na masa. ³⁷ Gabe ipatugah halak ma bani: Jesus na hun Nasaret montas. ³⁸ Jadi dilo-dilo ma ia, nini ma: Ham Jesus, Anak ni si Daud, idop ma uhurmu bakku! ³⁹ Jadi ihata halak na parlobei ai ma ia, ase sip namin. Tapi lambin ipagomos do dilo-dilo: Ham Anak ni si Daud, idop ma uhurmu bakku! ⁴⁰ Jadi soh ma Jesus, anjaha ihatahon ma, ase iboan ia hu lobeiNi. Dob dohor ia, isungkun ma ia: ⁴¹ Aha ipindo uhurmu bahenonKu bamu? Jadi ihatahon ma: Ham Tuhan, marpangidah ma namin matangku! ⁴² Jadi ihatahon Jesus ma hubani: Marpangidah ma ham! Haporsayaonmu do na paluahkon ham. ⁴³ Jadi mintor marpangidah ma matani, iirikkon ma Jesus lanjar ipuji ma Naibata. Mangidah ai halak na mabuei ai, ipuji sidea ma Naibata.

¹ Masuk ma Jesus hu Jeriko, lanjar montas ma Ia hunjai. ² Jadi adong ma ijai sada halak, kopala ni sijalo sohei, na margoran si Sakeus; na bayak do ia. ³ Ipindo uhurni do sihol mangidah rupa ni Jesus, tapi seng tarbahensi halani halak na mabuei ai, ai parbadan na pondok do ia. ⁴ Gabe marlintun ma ia dompak lobei, ipanangkih ma sada hayu anak, ase taridahsi Ia, ai hunjai do dalan sibontasonni. ⁵ Dob das Jesus bani ianan ai, mangkawah ma Ia hu atas, anjaha nini ma hubani: Ale Sakeus! Podas ma susur, ai maningon tondok do Ahu i rumahmu sadari on! ⁶ Jadi podas ma ia susur, anjaha ijalo ma Ia ibagas malas ni uhur. ⁷ Jadi mangidah ai, marungut-ungut ma sidea haganup, nini ma: Tondok do Ia hape bani sada halak pardousa! ⁸ Jongjong ma si Sakeus, ihatahon ma bani Tuhan in: Eak Tuhan, satongah humbani artangku hubere ma bani halak na masombuh, anjaha anggo adong na hutipu, ompat lompit ma ai hupaulak. ⁹ Jadi ihatahon Jesus ma hubani: Jumpahan haluahon do rumah on sadari on, ai anak ni si Abrahan do homa ia. ¹⁰ Ai na roh do Anak ni jolma in mangindahi anjaha paluahkon na magou. ¹¹ Sanggah na tangi ai sidea bani hataNi, inunut Jesus ma marlimbaga, halani dohor ma Ia hu Jerusalem, anjaha iagan sidea, mintor sipatalaron ma harajaon ni Naibata. ¹² Jadi Nini ma: Adong ma sada halak na sangap, na laho hu nagori na daoh, laho manjalo harajaon bani, dob ai mulak do ia use. ¹³ Jadi idilo ma sapuluh halak juak-juakni, ibere ma bani sidea sapuluh kati pirak, anjaha nini ma hubani sidea: Tiga-tigahon hanima ma on ronsi na mulak ahu! ¹⁴ Tapi sogam do uhur ni hasomanni warga negara mangidahsi, gabe i suruh sidea ma suruhan hun pudini, mangkatahon: Seng ra hanami, halak on manrajai hanami! ¹⁵ Ase dob ijalo harajaon ai, mulak ma ia, anjaha isuruh ma na mandilo juak-juakni ai, na dob manjalo duit ai, sihol mambotoh pasal untung ni sidea bei. ¹⁶ Jadi roh ma na parlobei ai, nini ma: Ham tuan nami, sapuluh kati do untung ni na sakati ondi! ¹⁷ Gabe nini ma hubani: Dear ma ai, ale juak-juak na madear! Halani hatengeran do ho bani na otik, sapuluh huta ma kuasaanmu. ¹⁸ Dob ai roh ma na paduahon ai, nini ma: Ham tuan nami, lima kati do untung ni na sakati ondi! ¹⁹ Jadi nini ma homa hubani: Ia ho, lima huta ma gomgomanmu! ²⁰ Dob ai roh ma na legan ai, nini ma: Ham tuan nami, na ham ma pirakta na sakati ondi, ai hubungkus do in ibagas saputanganku. ²¹ Ai biar do uhurhu mangidah ham, halani halak na koras do ham. Ibuat ham do na so ninahkonmu anjaha ipariamai ham do na so sinuanmu. ²² Nini ma hubani: Ale juak-juak na jahat, domu hubani hatamin do uhumanku ho! Ibotoh ho do hape halak na koras do ahu, sibuat na so hunahkon anjaha na marpariamai na so husuan. ²³ Mase ma lang ipabungahon ho duitkin, ase hutunggu in rap pakon bungani bani parrohku? ²⁴ Jadi nini ma hubani na jongjong ijai: Buat hanima ma bagianni ai, anjaha bere hanima ma ai bani parbagian na sapuluh ai! ²⁵ Jadi nini sidea ma hubani: Ham tuan nami, domma sapuluh kati bani! ²⁶ Huhatahon ma bennima: Bani ganup na marnadong bereon do, tapi buaton do humbani na so marnadong na adong bani hinan. ²⁷ Tapi anggo munsuhkai, na so ra rajaankai, boan hanima ma hujon, anjaha bunuh ma sidea i lobeihu. ²⁸ Jadi dob ihatahon sonai, itoruskon Jesus ma mardalan, laho tangkog hu Jerusalem. ²⁹ Jadi dashonsi Ia dohorhon Betpage ampa Betania, na bani dolog, na margoran Jetun ai, isuruh ma dua halak humbani susian ai, ³⁰ anjaha nini ma: Laho ma hanima hu huta na i lobei nima in, anjaha masukhonsi hanima, jumpah hanima ma tambat ijai anak ni halode, na so ongga ihunduli halak. Tanggali hanima ma ai, lanjar boan ma hujon! ³¹ Jadi anggo adong na manungkun hanima: Mase itanggali hanima in? hatahon hanima ma: Porlu do in bani Tuhan in. ³² Dob ai laho ma na sinuruh ai, anjaha jumpah sidea ma songon na hinatahonNi ai bani sidea. ³³ Sanggah na mananggali anak ni halode ai sidea, ihatahon simadasi ai ma bani sidea: Mase itanggali nasiam anak ni halode in? ³⁴ Jadi ibalosi sidea ma: Na porlu do in bani Tuhan in! ³⁵ Jadi itogu sidea ma ai bani Jesus; iamparhon sidea ma hiou ni sidea hu atas ni halode ai, anjaha ipahundul sidea ma Jesus hu atas ni ai. ³⁶ Anjaha, sanggah na montas ai Ia, iamparhon sidea ma hiou ni sidea bani dalan ai. ³⁷ Tapi laho manjumpahkon tuadan na i dolog Jetun ai, mamungkah malas ma uhur ni susian na buei ai, ipuji sidea ma Naibata marsora na gogoh halani haganup hagogohon, na dob niidah ni sidea, ³⁸ nini ma: Napuji ma Raja in, na roh marhitei goran ni Tuhan! Damei do i surga, anjaha hasangapon ma i babou! ³⁹ Deba humbani Parisei, na adong i tongah-tongah ni halak na mabuei ai, mangkatahon hu Bani: Guru, pandang ham ma susianmu in. ⁴⁰ Jadi Nini ma marbalos: Huhatahon ma bani nasiam: Porini sip sidea, dilo-dilo ma batu in! ⁴¹ Jadi, sanggah na lambin dohor Ia, anjaha taridah ma huta ai, gabe itangisi ma ai, ⁴² Nini ma: Ambit itanda ham ma namin bani ari on na padamei ham! Tapi ponop do in nuan humbani matamu. ⁴³ Na roh ma ari bamu, hubuon ni munsuhmu ma ham, inggotanni anjaha sosakanni ma ham liot. ⁴⁴ Anjaha panepneponni ma ham rap pakon anakmu, na i tongah-tongahmu in, anjaha seng paturutonni age dua batu patindih, halani seng itandai ham panorang panohuon bamu. ⁴⁵ Dob ai masuk ma Jesus hu rumah panumbahan ai, jadi iusir ma hunjai siparjualan. ⁴⁶ Nini ma hubani sidea: Tarsurat do, rumah partonggoan do RumahKu, hape liang ni panamum do in ibahen nasiam. ⁴⁷ Anjaha ari-ari do Ia mangajari i rumah panumbahan ai. Ia sintua ni malim ai ampa sibotoh titah ai ampa pambobai ni bangsa ai, ipindahi sidea do dalan laho mamunuhSi, ⁴⁸ tapi seng ibotoh sidea, aha sibahenon ni sidea, ai sai longkot do uhur ni na mabuei Bani, marosuh do sidea mambogeiSi.

¹ Bani na sadari, sanggah na mangajari halak na mabuei ai Ia i rumah panumbahan, anjaha mangambilankon Ambilan Namadear, roh ma marayakSi sintua ni malim pakon sibotoh surat ampa pangintuai-pangintuai, ² anjaha nini sidea ma hu Bani: Hatahon Ham ma bannami: Marhitei kuasa ja do ibahen Ham in? Atap: Ise do na mambere kuasa in Bamu? ³ Jadi Nini ma mambalosi: Ahu pe, adong do sisungkunonku bani nasiam. Hatahon nasiam ma Bakku. ⁴ Ia pandidion ni si Johannes, na hun surga do ai, atap humbani jolma? ⁵ Jadi martimbang ma sidea samah sidea: Anggo ihatahon hita: Hun surga, gabe hatahononni ma hubanta: Mase ma lang porsaya nasiam bani? ⁶ Tapi anggo ihatahon hita: Humbani jolma do, pargijigon ni halak na mabuei in ma hita bani batu, ai porsaya do sidea, nabi do si Johannes. ⁷ Jadi ibalosi sidea ma: Seng ibotoh hanami, atap na hunja do ai. ⁸ Jesus pe ihatahon ma bani sidea: Ahu pe seng patugahonku bani nasiam, atap marhitei kuasa ja Hubahen in. ⁹ Anjaha ihatahon ma limbaga on bani halak na mabuei ai: Adong ma sada halak na mambuka pohon anggur, jadi ipasewahon ma ai bani piga-piga halak parjuma-juma, dob ai laho ma ia hu nagori na legan, mardokah-dokah. ¹⁰ Bani panorangni isuruh ma juak-juakni bani parjuma-juma ai, ase ibere sidea deba gogoh ni pohon anggur ai bani. Tapi ibogbogi parjuma-juma ai do ia, anjaha isuruh ma ia mulak sonin. ¹¹ Jadi isuruh use ma juak-juakni na legan; tapi ia pe homa hona bogbog anjaha bador do ibahen sidea, anjaha isuruh ma ia mulak mangambei tangan tumang. ¹² Isuruh ma use na patoluhon, tapi ia pe hona ugahan do anjaha hona usir. ¹³ Dob ai nini simada pohon anggur ai ma: Aha ma sibahenonku? Husuruh ma anak haholongan ni uhurhin, ra malang do sidea bani. ¹⁴ Tapi dob iidah parjuma-juma ai ia, manriah ma sidea, nini ma samah sidea: On do sipanean ai. Bunuh hita ma ia, ase hita simada parbagiananni ai. ¹⁵ Jadi isarad sidea ma ia hu darat ni pohon ai, lanjar ibunuh ma. Aha ma nani bahenon ni simada pohon ai bani sidea? ¹⁶ Na roh ma ia mamunuh parjuma-juma ai, anjaha ondoskononni ma pohon anggur ai bani halak na legan. Tapi manangar ai, nini sidea ma: Palis ma in! ¹⁷ Tapi ikawahkon ma sidea, lanjar nini ma: Ai aha do arti ni na tarsurat on: Batu na niambukkon ni tukang rumah in, ai do gabe batu palas parsuhi-suhi. ¹⁸ Marosak do sagala na dabuh bani batu in, anjaha maropuk sagala na nidabuhanni. ¹⁹ Jadi ipindahi sibotoh surat ampa sintua ni malim ma dalan, laho manangkapSi bani panorang ai, ai ibotoh sidea, sidea do tinuju ni limbaga ai, tapi mabiar do sidea bani halak na mabuei ai. ²⁰ Laho manggompangiSi, isuruh sidea ma mata-mata, na maruhur sipakulah-kulah, andohar tartangkap sidea Ia marhitei parsahapni, ase tarondoskon sidea Ia bani pamarentah, bani kuasa ni panguhum ai. ²¹ Jadi nini sidea ma manungkunSi: Guru, ibotoh hanami pintor do parsahapMu ampa pamodahionMu, anjaha seng siidah bohi Ham, sintong do tene ipodahkon Ham dalan ni Naibata. ²² Patut do bereonta balasting bani Kesar, atap lang? ²³ Tapi ibotoh Jesus do akal ni sidea ai, gabe nini dompak sidea: ²⁴ Patuduh nasiam ma Bakku sada dinar! Gambaran pakon surat ni ise do on? Jadi nini sidea ma: Gambaran ni Kesar. ²⁵ Gabe nini ma dompak sidea: Anggo sonai, bere nasiam ma bani Kesar na Kesar simadasi, anjaha bani Naibata na Naibata simadasi. ²⁶ Ase seng mangasup sidea, mambahen halilitan Ia marhitei sahapNi i lobei ni halak na mabuei in. Tapi longang do sidea halani balosni ai, lanjar sip mando sidea. ²⁷ Gabe roh ma deba halak Sadukei, ai ma na so marhatongonkon adong parpuhoon humbani na matei, jadi isungkun sidea ma Ia: ²⁸ Guru nami, isuratkon si Musa do bannami: Anggo matei sada halak na dob marhajabuan, tapi lang martinading, maningon paganjangon ni anggini do parinangon ai, laho pajongjong ginompar bani saninani ai. ²⁹ Ase adong ma pitu halak na marsanina. Mompo ma sikahanan, dob ai matei ma ia, seng martinading. ³⁰ Dob ai ipaganjang na paduahon ma naboru ai, ³¹ dob ai na patoluhon, sonai torus das bani na papituhon. Seng martinading sidea bani parmatei ni sidea. ³² Dobni naboru ai pe matei ma. ³³ Ai pe, bani parpuhoon ai, ise ma humbani sidea simada parinangon ai, ai hapitusi do sidea marjolmahonsi. ³⁴ Jadi nini Jesus ma bani sidea: Anak ni dunia on do na mompo anjaha na laho, ³⁵ tapi halak na dob talup hu hagoluhan simagira ampa hu parpuhoon humbani na matei, seng marunjuk barang laho be. ³⁶ Ai seng tarbahensi be matei, usih ma sidea bani malekat, anjaha anak ni Naibata ma sidea, dob parrupei sidea bani parpuhoon ai. ³⁷ Paboa sipapuhoon do magira na dob matei ai, si Musa pe itarsingati do pasal ai, sanggah bani naporon na sampurguk ai, ai igoran do ijai Tuhan in "Naibata ni si Abraham, Naibata ni si Isak anjaha Naibata ni si Jakob." ³⁸ Sedo Naibata ni na matei Ia, Naibata ni na manggoluh do, ai haganup do sidea manggoluh Bani. ³⁹ Jadi nini deba sibotoh surat ma mambalosi: Sintong do hataMu ai! ⁴⁰ Anjaha seng be pag sidea manungkun atap aha pe Bani. ⁴¹ Jadi nini Jesus ma dompak sidea: Mase ma adong na mangkatahon, anak si Daud do Kristus in? ⁴² Ai si Daud sandiri do mangkatahon bani buku Psalmen: Nini Tuhan in do bani Tuhanku: Hundul ma Ho hu siamunKon, ⁴³ paima Hubahen sagala munsuhMu gabe sidogeian ni naheiMu. ⁴⁴ Ase igoran si Daud do Ia Tuhan, mase ma anakni Ia? ⁴⁵ Jadi sanggah natangi halak namabuei ai haganup, Nini ma hubani susianNi ai: ⁴⁶ Jaga ma hanima mangidah sibotoh surat, na marosuh medang-edang marbaju ganjang, na sihol hona tabi i tiga, na mangkaporluhon hundul i lobei-lobei i parguruan ampa bani ianan sisangapan i parpestaan. ⁴⁷ Ibondut sidea do rumah ni na mabalu marhitei tonggo sipakulah-kulah na ganjang. Uhum siboratan do jaloon ni sidea use.

¹ Sanggah mangkawah Ia, iidah ma halak na bayak mandabuhkon sibere-bereni hubagas poti parartaan. ² Iidah ma homa naboru na mabalu, na masombuh, mannahkon dua rimis. ³ Jadi ihatahon ma: Sintong do na huhatahon on bani nasiam: Bueinan do na ninahkon ni na mabalu na masombuh on marimbang haganupan ai. ⁴ Ai haganup sidea humbani lobih-lobihni bei do inahkon sidea gabe sibere-bereni, tapi ia parinangon on, humbani hahuranganni do inahkon haganup na adong bani, na sahira goluhni. ⁵ Adong ma deba halak, na manarsingati rumah panumbahan ai, na dob pinajagar marhitei batu na majenges ampa siluah ni halak, gabe nini Jesus ma: ⁶ Iidah hanima pe haganupan in, na roh ma arini, seng paturuton be ijin dua batu patindih, na so rosakkononkon. ⁷ Jadi isungkun sidea ma Ia, nini ma: Andigan ma masa ai, Guru? Anjaha aha ma tandani, laho masa ai? ⁸ Jadi Nini ma: Jaga ma hanima, ulang ma kahou hanima! Ai buei ma na roh manoluk goranKu, na mangkatahon: Ahu do Ia, ampa, "Domma jumpah panorangni". Ulang ma iirikkon hanima sidea. ⁹ Tapi anggo ibogei hanima barita ni hamunsuhon ampa hageoron, ulang ma hanima tarsonggot, ai maningon masa do ai lobei, tapi lang ope mintor dapot ujungni. ¹⁰ Nini ope bani sidea: Marsiporangan do holi bangsa hu bangsa, harajaon hu harajaon. ¹¹ Masa ma lalou na maparah, sampar marsasanagori ampa lohei sonai homa panonggoti ampa tanda na banggal hun langit. ¹² Tapi paima masa ai, tangkapon anjaha pardakdakon ni sidea do hanima. Ondoshonon do hanima hu parguruan anjaha masukkonon hubagas tutupan, boanon do hanima hu lobei-lobei ni raja-raja ampa siparkuasa halani goranKu. ¹³ Lanjar in ma dalan bennima, laho manaksihon Ahu. ¹⁴ Ingat hanima ma: Seng pala sarihonon nima pasal sihatahonon nima ijai. ¹⁵ Ai Ahu do mamberehon bannima kuasa marsahap ampa hapentaron, na so boi imbangon atap jabapon ni munsuh nima. ¹⁶ Gari namatoras ampa sanina, sindohor ampa huan-huan mangondoshon hanima; anjaha bunuhonni do deba hanima. ¹⁷ Domdoman ni haganup jolma do hanima halani goranKu. ¹⁸ Tapi sada jambulan pe lang bulih magou humbani ulu nima. ¹⁹ Marhitei hasabaron do maluah hosah nima. ²⁰ Tapi anggo iidah hanima huta Jerusalem iinggoti tentara, botoh hanima ma, dohor ma parsedani. ²¹ Ai pe maporus ma hu dolog na i Judea, na ibagas huta in kaluar ma hunjin, anjaha na i juma ulang mulak hu huta in. ²² Ai ari pambalasan do in, ase saud ganup na tarsurat in. ²³ Sunsah ma na boratan rumah ampa ni painumhon bani panorang ai, ai sogop ma hasosakan banggal hu tanoh on ampa ringis bani bangsa on. ²⁴ Ragei ma sidea bunuhon ni mata ni podang, anjaha hona boan tartaban hu tongah-tongah ni sagala bangsa. Dogei-dogeian ni halak parbegu ma huta Jerusalem, paima gok panorang ni parbegu. ²⁵ Dob ai masa ma tanda bani mata ni ari, bani bulan ampa bani bintang pe, anjaha rusak ma sagala bangsa i tanoh on anjaha bajoraon halani hasak ni laut in ampa gilumbangni. ²⁶ Tarhatos ma jolma in halani biarni managam na sihol masa hu atas tanoh on, ai dugur ma hagogohon ni parlangitan. ²⁷ Dob ai idahon ni sidea ma Anak ni jolma in roh marhitei hombun ibagas hagogohon ampa hasangapon banggal. ²⁸ Anggo mamungkah masa ma ganupan ai, jongjong ma nasiam, padirgak ma ulu nasiam, ai dohor ma haluahonnasiam. ²⁹ Jadi ihatahon ma sada limbaga bani sidea: Tonggor hanima ma hayu ara in ampa hayu na legan in! ³⁰ Anggo marpusuki ma iidah hanima, botoh hanima ma, na dohor ma partahunan milas. ³¹ Usih hujai ma, dob iidah hanima masa ganupan ai, botohon nima ma na dohor ma harajaon ni Naibata. ³² Tongon do na Huhatahon on bannima: Seng anjai salpu na sansundut on, anggo lape masa ganupan ai. ³³ Langit ampa tanoh salpu do, tapi anggo hatangKai seng anjai salpu. ³⁴ Tapi jaga ma hanima bani diri nima, ulang ma boratan uhur nima halani parminum-minumon ampa parmabukon ampa holsoh-holsoh bani na i dunia on, gabe sompong songon tirangkap roh ari ai mandorab hanima. ³⁵ Ai maningon roh do ai bani haganup na marianan iatas tanoh on. ³⁶ Tapi jaga ma hanima anjaha martonggo ma tongtong, ase margogoh hanima manimbili sagala na sihol roh ai, laho jongjong i lobei ni Anak ni Jolma in. ³⁷ Arian i rumah panumbahan ai do Ia mangajari, tapi borngin luar do Ia, marborngin i dolog, na margoran Jetun. ³⁸ Anjaha girah sogod roh ma halak na mabuei ai manjumpahkonSi i rumah panumbahan laho manangar hataNi.

¹ Tapi dohor ma ari raya mangan ruti na so marragi, na ginoran Paska. ² Anjaha sai ipingkiri sintua ni malim ampa sibotoh surat do dalan, laho mamunuh Jesus, ai mabiar do sidea bani halak na mabuei ai. ³ Tapi imasuki setan ma si Judas, na margoran Iskariot, ai ma sada halak humbani na sapuluh dua ai. ⁴ Gabe laho ma ia manriah pakon sintua ni malim ampa kopala ni sijaga rumah panumbahan ai, atap sonaha do dalan, laho mangondoskonSi bani sidea. ⁵ Jadi malas ma uhur ni sidea, anjaha ibagahkon sidea ma mamberehon duit bani. ⁶ Ihadearhon uhurni ma ai, lanjar ipindahi ma panorang na dearhonsi, laho mangondoskon Jesus bani sidea, seng pala ibotoh halak na mabuei in. ⁷ Dob ai jumpah ma panorangni mangan ruti na so marragi, ai ma panayatonkon bani biri-biri Paska. ⁸ Jadi isuruh Jesus ma si Petrus ampa si Johannes, Nini ma: Laho ma hanima pasirsirhon Paska banta, ase mangan hita. ⁹ Gabe nini sidea ma hu Bani: Huja ma nini uhurMu parsirsiron nami ai? ¹⁰ Dob ai nini ma dompak sidea: Masukhonsi hanima hu huta in, pajumpah ma hanima pakon sada halak na mamboan gusi na marisi bah; irikkon hanima ma ia hu rumah na minasukanni. ¹¹ Hatahon hanima ma hubani simada rumah ai: Tonah ni Guru in bamu: Ija do kamar, iananKu mangan Paska rap pakon susianKu? ¹² Jadi patuduhononni ma bannima sada kamar pardatas na lumbang, na dob niamparan; ijai ma pasirsir hanima. ¹³ Jadi laho ma sidea, jumpah sidea ma na pinatugahni ai bani sidea, gabe ipasirsir sidea ma Paska ai. ¹⁴ Ase dob jumpah panorangni, hundul ma Ia rap pakon Apostel ai. ¹⁵ Dob ai Nini ma dompak sidea: Masihol tumang do uhurhu mangankon biri-biri Paska on rap pakon hanima, paima sogop Bakku sitarononKai. ¹⁶ Ai Huhatahon ma bannima: Seng anjai panganonKu be in, ronsi hagogokni ai ibagas harajaon ni Naibata. ¹⁷ Dob ai ibuat ma sada panginuman, anjaha dob ihatahon tonggo tarima kasih, nini ma: Jalo hanima ma, anjaha bagi hanima ma samah hanima! ¹⁸ Ai Huhatahon ma bannima: Mulai humbani sonari, seng inumonKu be humbani buah ni anggur, das bani na roh harajaon ni Naibata. ¹⁹ Jadi ibuat ma ruti, anjaha dob ihatahon tonggo tarima kasih, itopiki anjaha ibere ma ai bani sidea, lanjar Nini ma: DagingKu do on, na binere mangkopkop hanima; bahen hanima ma sonin, gabe pardingatan Bakku. ²⁰ Sonai homa do panginuman ai, dob salpu sidea mangan, ihatahon ma: Ia panginuman on, padan na baru do in, marhitei darohKu, na niduruskon mangkopkop hanima. ²¹ Tapi tonggor ma, tangan ni halak na mantahihon Ahu do hape rap pakon Ahu i meja on! ²² Dalanan ni Anak ni jolma in do namin songon na dob tinontuhon Bani, tapi bursik ma halak na mantahihonSi. ²³ Jadi marsisungkunan ma samah sidea, atap ise do humbani sidea na sihol mandalankon ai. ²⁴ Jadi tubuh ma paringoran i tongah-tongah ni sidea, ai ma pasal atap ise do sidea sibanggalan. ²⁵ Gabe nini Jesus ma dompak sidea: Raja-raja ni bangsa-bangsa do mandalankon kuasa bani rayatni, anjaha na sangap-sangap ni sidea igoran do sidear gabei. ²⁶ Tapi ulang ma sonai anggo bannima! Sibanggalan bannima, ai ma gabe songon siposoan, anjaha na mamarentah, ai ma gabe songon siparugas. ²⁷ Ai ise do sibanggalan, na hundul mangan ai do atap siparugas ai do? Tapi i tongah-tongah nima, Ahu do songon siparugas. ²⁸ Hanima do na tahan i lambungKu ibagas haganup sitarononKu. ²⁹ Anjaha ondoskononKu ma bannima Harajaon in, songon na dob iondoskon Bapa in hu Bakku, ³⁰ ase mangan anjaha minum hanima bani mejangKu bani harajaonKai, hundul bani paratas, laho manguhumi halak Israel na sapuluh dua marga in. ³¹ O Simon, Simon, domma ipangindo sibolis in, sihol segeonni hanima songon boras. ³² Tapi Ahu do manonggohon ho, ulang miloh haporsayaonmu, anjaha dob mulak use uhurmu, pargogohi ma uhur ni saninamu. ³³ Tapi nini si Petrus ma: Tuhan, sirsir do ahu rap tartutup ampa matei ampa Ham. ³⁴ Nini Jesus ma: Huhatahon ma bam Petrus: Seng martahuak dayok ope borngin on, domma iparnalang ho tolu hali, na so tinandamu Ahu. ³⁵ Lanjar nini ma dompak sidea: Sanggah Husuruh hanima seng marparduitan, seng marranjut anjaha seng marsipatu, ongga do hanima hurangan? Jadi ihatahon sidea ma: Lang! ³⁶ Gabe Nini ma dompak sidea: Tapi anggo nuan, na marparduitan iboan ma ai, sonai homa ranjut, anjaha na so marpodang, ijual ma sabingni, laho mamboli podang. ³⁷ Ai Huhatahon ma bannima: Maningon saud do na tarsurat pasal Ahu, na mangkatahon: Tarhira do Ia bani parjahat! Ai na dob tinontuhon pasal Ahu, saud ma nuan. ³⁸ Gabe ihatahon sidea ma: Tuhan, adong do dua podang ijon. Nini ma hubani sidea: Sungkup ma in! ³⁹ Dob ai laho ma Ia hu darat, hu dolog Jetun, songon na somal; anjaha susianNi ai do mangirikkonSi. ⁴⁰ Ase dob das Ia hujai, nini ma dompak sidea: Martonggo ma hanima, ase ulang masuk hanima hubagas parlajouan! ⁴¹ Jadi ipapulig ma diriNi humbani sidea, tuk gijigon batu daohni; manrogop ma Ia lanjar martonggo sonon: ⁴² Ham Bapa, anggo dear uhurMu, salpuhon Ham ma panginuman on hum Bakku! Tapi sedo uhurHu, uhurMu do na saud. ⁴³ Jadi taridah ma Bani sada malekat hun nagori atas, laho mampargogohiSi. ⁴⁴ Anjaha bani paruntolonNi ai, lambin igogohi ma martonggo, jadi mangkatektek ma songon daroh hadogasni hu tanoh. ⁴⁵ Jadi jongjong ma Ia humbani na martonggo ai, ijumpahkon ma susianNi ai, hape tarpodom do sidea dapotsi halani pusok ni uhur. ⁴⁶ Jadi nini ma dompak sidea: Mase modom hanima? Puho ma hanima anjaha martonggo, ase ulang masuk hanima hubagas parlajouan! ⁴⁷ Mangkatahon ai ope Ia, roh ma buei halak, nibobahon ni sada halak, na margoran si Judas, ai ma sada halak humbani na sapuluh dua ai. Ijumpahkon ma Jesus, laho manummahSi. ⁴⁸ Tapi nini Jesus ma dompaksi: O Judas, panummahon do hape ibahen ho mangondoskon Anak ni jolma in? ⁴⁹ Jadi dob iidah hasoman ni Jesus na sihol masa ai, nini sidea ma: Tuhan, itampulhon hanami ma podang on? ⁵⁰ Jadi itampul sahalak humbani sidea ma juak-juak ni sintua ni malim ai, gabe rotap ma pinggolni siamun. ⁵¹ Jadi nini Jesus ma mambalosi: Sungkup ma ai! Ijamah ma pinggol ai, anjaha ipamalum ma ia. ⁵² Jadi nini ma hubani sintua ni malim, kopala upas ni rumah panumbahan ampa pangintuai-pangintuai ai, na roh manangkapsi: Songon na manjumpahkon panrampok do parroh nasiam, marpodang anjaha marantuk-antuk. ⁵³ Ari-ari do Ahu rap pakon nasiam i rumah panumbahan, seng itangkap nasiam Ahu. Tapi on ma panorang nasiam ampa kuasa ni hagolapan in. ⁵⁴ Dob itangkap Ia, iboan sidea ma Ia hu rumah ni sintua ni malim ai, tapi mandaoh-daoh do si Petrus mangirikkonsi. ⁵⁵ Ipagara sidea do apuy i tongah ni alaman lanjar hundul ma maringgot, si Petrus pe hundul do rap pakon sidea ijai. ⁵⁶ Iidah sada juak-juak naboru ma ia hundul ibagas sinalsal ni apuy ai, iserleng ma ia, anjaha nini ma: Hasomanni do age halak on! ⁵⁷ Tapi iporsou do, nini ma: Seng hutandai Ia, inang! ⁵⁸ Tongkin nari iidah sada halak na legan ma ia, nini ma: Ai lang hasoman ni sidea do ho? Tapi nini si Petrus ma: Lang, dahkam! ⁵⁹ Dob salpu hira-hira sajam, nini sada halak na legan ma mangonjolhon: Tongon do ai, dihut do ia hasomanni, ai halak Galilea do ia. ⁶⁰ Tapi nini si Petrus ma: Seng hubotoh na hinatahonmu ai, dahkam! Mangkatahon ai ope ia, mintor martahuak ma dayok. ⁶¹ Jadi marhusor ma Tuhan in, ikawahkon ma si Petrus, gabe idingat si Petrus ma hata ni Tuhan in, na hinatahonNi hubani: Lape martahuak dayok borngin on, domma, parnalangonmu Ahu tolu hali. ⁶² Jadi luar ma ia hu darat, tangis gogoh-gogoh. ⁶³ Ia halak na manjolomi Jesus, ipahiri-hiri anjaha ilonsingi do Ia. ⁶⁴ Itutup sidea do mata ni Jesus anjaha isungkun ma: Jahai ma: Ise do na manlonsingi Ho? ⁶⁵ Buei ope panghirion na legan ihatahon sidea Bani. ⁶⁶ Anjaha dob siang ari, marrunggu ma pangintuai ni bangsa ai, sintua ni malim ampa sibotoh surat, anjaha tarboan ma Ia Hu lobei ni harungguan ni sidea. Nini sidea ma: Anggo Ho do Kristus in, hatahon ma bennami! ⁶⁷ Jadi nini ma dompak sidea: Age Hupatugah ai bani nasiam, seng anjai porsaya nasiam. ⁶⁸ Anjaha anggo manungkun Ahu, seng balosan nasiam. ⁶⁹ Tapi hunjon hujanan hundul ma Anak ni jolma in hampit siamun ni hagogohon ni Naibata. ⁷⁰ Jadi haganup ma sidea mangkatahon: Ase Anak ni Naibata do Ho? Jadi ihatahon ma dompak sidea: Songon na hinatahon nasiam: Ahu do in tongon! ⁷¹ Dob ai nini sidea ma: Ai pala ope pindahanta saksi? Ai domma itangar hita sandiri ai humbani pamanganni.

¹ Dob ai misir ma sidea haganup na marrunggu ai, iboan sidea ma Ia Hulobei ni si Latus. ² Iaduhon sidea ma Ia, nini ma: Na dapot hanami do on pakahouhon bangsanami, anjaha ipandang do bereon balasting bani Kesar, anjaha ihatahon, Kristus, Raja do Ia. ³ Jadi nini si Latus ma manungkunSi: Raja ni Jahudi do Ham tongon? Jadi nini ma mambalosisi: Songon na hinatahonmu ai ma! ⁴ Jadi nini si Latus ma dompak sintua ni malim ampa halak na mabuei ai: Seng dong dapot ahu salah ni Halak on. ⁵ Tapi lambin igogohi sidea do mangkatahon: Geor do ibahen bangsa in marhitei pangajarionNi i sab tanoh Judea, mamungkah hun Galilea das hujon. ⁶ Manangar ai si Latus, isungkun ma atap halak Galilea do Ia. ⁷ Anjaha dob ibotoh, na humbani gomgoman ni si Herodes do Ia, isuruh ma Ia hulobei ni si Herodes, ai tudu i Jerusalem do ia ijia. ⁸ Dob iidah si Herodes Jesus, malas ma uhurni, ai domma dokah hinan sihol idahonni Ia, dob itangar baritani, anjaha iarap uhurni do, idahonni sada tanda sibahenonNi. ⁹ Buei do isungkun hu Bani, tapi seng ibalosi Jesus ia. ¹⁰ Ijai do sintua ni malim ampa sibotoh surat, anjaha gogoh do pangaduhon ni sidea Bani. ¹¹ Ia si Herodes ampa tentarani, ipahiri anjaha iapasi do Ia, dob ai isuruh ma Ia mulak hubani si Latus marpakeian na harga. ¹² Mulai bani ari ai marhuan ma si Herodes ampa si Latus, i lobei ni ai marsidomdoman do sidea. ¹³ Dob ai idilo si Latus ma martumpu sintua ni malim, pangintuai-pangintuai ampa halak na mabuei ai, gabe nini ma dompak sidea: ¹⁴ Iboan nasiam do bakku Halak on, sipabalik bangsa, nini nasiam. I lobei nasiam do hupareksa Ia, tapi seng dong jumpah ahu salah bani Halak on, domu hubani pangaduan nasiam ai. ¹⁵ Si Herodes pe sonai do, isuruh do Ia mulak bennami, ase seng dong pambahenanni, na patut mambahen marutang hosah Ia. ¹⁶ Halani ai nalonsingi ma Ia, ase napaluah. ¹⁷ Ai aturan do ai, paluahonni sada halak bani sidea sanggah pesta ai. ¹⁸ Tapi sasora do sidea haganup mandilohon: Bunuh Ia! Si Barrabas ma paluah bannami! ¹⁹ Ia si Barrabas on hona tutup do halani pambarontakan ampa pambunuhon na masa i kota ai. ²⁰ Jadi iulaki si Latus ma marsahapkon sidea, ai sihol paluahonni do Jesus. ²¹ Tapi sai dilo-dilo ma sidea: Parsilangkon ma Ia, parsilangkon ma! ²² Dob ai ihatahon ma patolu-halihon bani sidea: Ai aha do na jahat ibahen? Seng dong jumpah ahu Bani na boi mambahen marutang hosah Ia. Halani ai nalonsingi ma Ia, ase napaluah. ²³ Tapi ipagogoh sidea bei ma sorani mangindohon hubani, ase iparsilangkon Ia, gabe saud ma surak-surak ni sidea ai. ²⁴ Jadi iputushon si Latus ma pasaudkon pangindoan ni sidea ai. ²⁵ Ipaluah ma halak na pinindo ni sidea ai, na tinutup ai halani manggeori ampa mambunuh, tapi Jesus ipadas ma bani rosuh-rosuh ni sidea. ²⁶ Sanggah na mamboanSi ai sidea, itangkap sidea ma sada halak, na margoran si Simon, na hun Kirene, na roh hun jumani; hubani ma ipaporsankon sidea silang ai, laho mamboan ai paihut-ihut Jesus. ²⁷ Buei do halak humbani bangsa ai ampa puang-puang na mangirikkonsi, na marhoru anjaha na tangis-tangis marhalanisi. ²⁸ Jadi idompakkon Jesus ma sidea, Nini ma: Nasiam boru Jerusalem, ulang ma Ahu tangisi nasiam, tapi diri nasiam ma tangisi nasiam ampa anak nasiam! ²⁹ Ai na roh ma arini, hatahonon ni halak ma ijai: Martuah ma na lambang, ampa parinangon na so ongga tubuhan tuah, ampa adop na so ongga painumhon! ³⁰ Ijai ma hatahonon ni halak bani dolog: "Jobjobi ma hanami!" ampa bani dolog-dolog: "Rungkubi ma hanami!" ³¹ Ai anggo sonon pambahen ni sidea bani hayu na matah, bani hayu na masak, sonaha ma nani? ³² Adong ope iboan dua halak nari parjahat, sibunuhon rap pakonSi. ³³ Ase dob das sidea bani ianan na margoran partangkurakan, iparsilangkon sidea ma Ia ijai rap pakon parjahat na dua ai, na sada hu siamunNi anjaha na sada nari hu sambilouNi. ³⁴ Jadi nini Jesus ma: Ham Bapa, marpangulaki ma uhurMu, ai seng ibotoh sidea na binahenni ai! Marjomput na sinurat do sidea marbagi hiouNi. ³⁵ Jongjong do ijai halak na mabuei ai manonggor, tapi manrehei do pambobai ni sidea, nini ma: Na legan ipaluah, mahua dirini ma ipaluah, anggo na tongon do Ia Kristus, na pinilih ni Naibata! ³⁶ Tapi dihut do tentara ai mandoruniSi, ipadohor sidea ma, laho mamberehon na migar Bani, ³⁷ lanjar nini sidea ma: Anggo raja ni Jahudi do Ho, paluah ma dirimu! ³⁸ Dong do homa tarsurat i babouNi: On do raja ni Jahudi. ³⁹ Tapi sada humbani parjahat na gantung ai manreheiSi: Ai lang Kristus do Ho? Paluah ma dirimu ampa hanami! ⁴⁰ Jadi marbalos ma hasomanni ai, nini ma mangkatasi: Seng ihabiari ho hape Naibata, age pe rap hona uhum hita? ⁴¹ Uhum na pintor do mangonai banta, ai ijalo hita do upah ni pambahenanta. Tapi anggo Ia, seng dong ihorjahon na so patut. ⁴² Lanjar nini ma: Ham Jesus, ingat Ham ma Ahu, anggo das ma Ham bani harajaonMu. ⁴³ Jadi nini Jesus ma hubani: Sintong do hatangkon bam: Sadari on rap pakon Ahu ma ho i Paradeiso! ⁴⁴ Anjaha hira-hira pukul sapuluh dua, sogop ma na golap hu sab tanoh in das hu pukul tolu. ⁴⁵ Ai manggolapi do mata ni ari, anjaha marigat do tirei, na i rumah panumbahan ai, bolah dua. ⁴⁶ Dob ai marsora na gogoh ma Jesus, nini ma: Ham Bapa! Hubagas tanganMu ma Huondoshon tonduyHu. Jadi dob ihatahon sonai, rotap ma hosahNi. ⁴⁷ Mangidah na masa ai kopala ni tentara ai, ipasangap ma Naibata, nini ma: Tongon do, halak na pintor do on! ⁴⁸ Anjaha ganup halak na mabuei ai, na roh hujai, marsitompuk tontonni bei ma mangidah na masa ai, lanjar mulak ma. ⁴⁹ Tapi mandaoh-daoh do jongjong mangidahSi sagala na manandaiSi, sonai naboru na mangirikkonSi hun tanoh Galilea. ⁵⁰ Jadi adong ma sada halak na margoran si Josep, pagori ni rapot bolon, paruhur na bujur anjaha na pintor. ⁵¹ Seng dear uhurni bani riah ampa pambahenan ni sidea ai. Hun Arimatea, na i tanoh Judea do ia, anjaha dihut do ia paima-imahon harajaon ni Naibata. ⁵² Laho ma ia bani si Latus mangindo bangkei ni Jesus. ⁵³ Ipaturun ma bangkei ai, ibaluti ma bani hiou putih, anjaha ipatibal ma hubagas tanoman na niliangkon bani batu, seng ongga ope tibal barang ise ijai. ⁵⁴ Ari parugasonkon do ijia, anjaha laho mulai ma Sabat. ⁵⁵ Tapi dihut do deba naboru-naboru, na roh rap pakonsi hun Galilea; ipardiatei sidea do tanoman ai ampa partibal ni bangkei ai. ⁵⁶ Dob ai mulak ma sidea, anjaha ipasirsir sidea ma rium-riuman ampa minak na misbou. Layur ari Sabat ai marsaran do sidea, domu hubani titah in.

¹ Tapi bani ari parlobei dob Sabat ai, roh ma sidea girah sogod hu tanoman ai mamboan rium-riuman, na dob pinasirsir ni sidea ai. ² Tapi domma igulingkon batu ai hun tanoman ai jumpah sidea. ³ Anjaha dob masuk sidea, seng dong be jumpah sidea bangkei ni Tuhan Jesus. ⁴ Anjaha sanggah na jut ai uhur ni sidea pasal ai, jadi jongjong ma i lambung ni sidea dua halak parhiou na marlinang-linang. ⁵ Tapi sanggah tarsonggot ai sidea anjaha unduk mangkawah dompak tanoh, jadi nini halak ondi ma hubani sidea: Mase ipindahi nasiam na manggoluh bani ianan ni na matei? ⁶ Seng ijon Ia, domma puho. Ingat nasiam ma na hinatahonNi ai bani nasiam, sanggah i Galilea ope Ia. ⁷ Ai ihatahon do, paboa maningon ondoshonon do Anak ni jolma in hubagas tangan ni pardousa anjaha parsilangkononkon, tapi mulak manggoluh do ari patoluhon. ⁸ Jadi idingat sidea ma hataNi ondi. ⁹ Mulak ma sidea hun tanoman ai, ibaritahon sidea ma haganupan ai bani na sapuluh sada ai ampa bani haganup na legan ai. ¹⁰ Si Maria Magdalena ma ai, ambahni ai si Johanna ampa si Maria, inang ni si Jakobus, ampa na legan ai na rap pakon sidea, ipatugah sidea ma ai bani apostel ai. ¹¹ Hira turi-turian do ai, nini uhur ni sidea, seng ihaporsayai sidea ai. ¹² Tapi laho ma si Petrus marlintun hu tanoman ai, itungkir ma hubagas, tapi seng dong iidah sobali hiou putih pambalutini ai. Dob ai mulak ma ia, longang uhurni pasal na masa ai. ¹³ Bani na sadari ai adong ma dua halak humbani sidea na laho hu sada huta, na margoran Emmaus, hira-hira sapuluh sada batu do daohni hun Jerusalem, ¹⁴ anjaha marsahapi do sidea samah sidea pasal na masa ai. ¹⁵ Jadi sanggah na marsahapi ai sidea anjaha marsipatorangan, roh ma Jesus mandohori sidea, rap mardalan pakon sidea. ¹⁶ Tapi mubah do panonggor ni sidea ibahen, ase ulang itanda sidea Ia. ¹⁷ Jadi nini ma dompak sidea: Aha do na sinahapkon nasiam in i tongah dalan on? Sonto ma sidea, anjaha horu do sidea idahon. ¹⁸ Dob ai marbalos ma sada halak, na margoran si Kleopas, nini ma dompakSi: Pitah Ham do gakni na marianan i Jerusalem na so mambotoh na masa ijai bani panorang on? ¹⁹ Jadi nini ma dompak sidea: Sonaha? Nini sidea ma mambalosi: Ai ma pasal Jesus, halak Nasaret in, ai ma nabi na gogoh ibagas horja ampa hata i lobei ni Naibata ampa haganup bangsa in, ²⁰ anjaha sonaha pangondoskon ni sintua ni malim ampa pambobainta Bani ase hona uhum Ia, marutang hosah anjaha iparsilangkon. ²¹ Tapi mangarap hinan do hanami, Ia ma na paluahkon Israel. Anjaha patolu-arihon ma sadari on, dob na masa ai. ²² Anjaha adong do deba naboru hun tongah-tongah nami, na mambahen tarsonggot hanami, girah do sidea nasogod laho hu tanoman ai. ²³ Seng dong jumpah sidea bangkeiNi ai, tapi mulak do sidea patugahkon, na dob iidah sidea do malekat, na mangkatahon, na manggoluh do Ia. ²⁴ Anjaha dong do deba humbannami na laho hu tanoman ai; jumpah sidea do tongon songon na hinatahon ni puang-puang ai, tapi anggo Ia, seng adong iidah. ²⁵ Jadi nini ma dompak sidea: E nasiam, na hurang uhur, anjaha na mahol mangkaporsayai na hinatahon ni nabi-nabi! ²⁶ Ai lang maningon sonai do marsitaronon Kristus in, laho masuk hu hasangaponNi in? ²⁷ Jadi jojor ma humbani si Musa ampa humbani sagala nabi ipatorang bani sidea sagala na tarsurat pasalSi. ²⁸ Jadi dohor ma sidea bani huta siparayakon ni sidea ai, anjaha ipakulah ma manorushon pardalananNi, ²⁹ tapi igogohkon sidea ma mangarahkonSi, nini ma: Tondok ma Ham bannami, ai laho bod ma ari anjaha manabad ma mata ni ari! Jadi masuk ma Ia, tondok bani sidea. ³⁰ Anjaha sanggah na hundul Ia rap pakon sidea mangan, ibuat ma ruti, ihatahon ma tonggo tarima-kasih, dob ai itopiki ma ai anjaha ibere ma bani sidea. ³¹ Ijai ma buka mata ni sidea, gabe itanda sidea ma Ia; anjaha Ia pe magou ma humbani pangidah ni sidea. ³² Jadi nini sidea ma samah sidea: Ai lang gara do uhurta ibagas, sanggah na pinarsahapkonNi ai hita i tongah dalan, laho patorangkon banta na tarsurat in? ³³ Jadi mintor misir ma sidea mulak hu Jerusalem, gabe tumpu ma jumpah sidea na sapuluh sada ai ampa hasoman ni sidea. ³⁴ Nini sidea ma: Tongon do, domma puho Tuhan in, anjaha ipataridahkon do diriNi bani si Simon! ³⁵ Anjaha sidea pe ibaritahon ma na masa itongah dalan ai, ampa panandai ni sidea Bani, sanggah na manopiki ruti ai Ia. ³⁶ Mangkatahon ai ope sidea, jongjong ma Jesus i tongah-tongah ni sidea. ³⁷ Gabe tarsonggot ma sidea anjaha mabiar, iagan sidea begu-begu do na niidah ni sidea ai. ³⁸ Jadi nini ma dompak sidea: Mase ma tarsonggot hanima? Mase ma sungkun-sungkun uhur nima ibagas? ³⁹ Tonggor hanima ma tanganKu ampa naheiHu, paboa Ahu do on. Jamah hanima ma Ahu, anjaha tonggor ma, ai anggo tonduy seng mardaging barang marholi-holi, songon na adong iidah hanima Bakku. ⁴⁰ Sanggah na mangkatahon ai ipatuduhkon ma tanganNi ampa naheiNi bani sidea. ⁴¹ Tapi lanjar ope seng porsaya sidea, halani malas ampa longang ni uhur ni sidea, gabe ihatahon ma bani sidea: Adong do ijon bannima sipanganon? ⁴² Jadi ibere sidea ma Bani dengke na pinanggang samponggol. ⁴³ Ai ma ijalo, lanjar ipangan ma ai ipaidah-idah sidea. ⁴⁴ Jadi nini ma dompak sidea: On ma hatangKu, na dob Huhatahon bannima, sanggah rap ope Ahu pakon hanima, ai ma, maningon saud do haganup na tarsurat pasal Ahu ibagas titah ni si Musa, buku ni nabi-nabi ampa bani buku Psalm. ⁴⁵ Jadi ibuhai ma uhur ni sidea, ase iarusi ma na tarsurat ai. ⁴⁶ Ihatahon ma bani sidea: Sonai do tarsurat, maningon marsitaronon do Kristus in, anjaha mulak manggoluh bani ari patoluhon. ⁴⁷ Anjaha ambilanonkon do marhitei GoranNi hamubahon ni uhur bahen hasasapan ni dousa, hubani sagala bangsa, mamungkah hun Jerusalem. ⁴⁸ Hanima do saksi pasal ai. ⁴⁹ Anjaha suruhonKu do bennima na pinarbagah-bagah ni Bapa in. Tapi soh ma lobei hanima i huta on, paima isorungkon bannima hagogohon na hun datas. ⁵⁰ Jadi iarahkon ma sidea hu darat, dohor hu Betania. Jadi ipaherbang ma tanganNi laho mamasu-masu sidea. ⁵¹ Jadi sanggah na mamasu-masu ai Ia, sirang ma Ia humbani sidea, tarangkat hu surga. ⁵² Manrogop ma sidea manombahsi, dob ai mulak ma sidea hu Jerusalem, marmalas ni uhur banggal. ⁵³ Anjaha tongtong do sidea i rumah panumbahan mamuji-muji Naibata. Amen.