JAKOBUS

JAKOBUS

¹ Humbani si Jakobus, juak-juak ni Naibata ampa Tuhan Jesus Kristus, marayak na sapuluh dua marga na merap in: Tabi ma bani nasiam! ² Nasiam sanina, hira nasiam ma in malas ni uhur tumang, anggo madabuh nasiam hu bagas bagei ni parlajouan, ³ anjaha botoh nasiam ma, na mangkorhon hasabaron do parlajouan na hubani haporsayaon nasiam. ⁴ Anjaha hasabaron ai mangkorhon horja na gokan dear, ase gabe gokan dear nasiam, seng dong sihataon anjaha seng marhahurangan. ⁵ Tapi anggo adong i tongah-tongah nasiam na hurangan bani hauhuron, ipindo ma ai hubani Naibata, na layak mambere bani haganup, anjaha seng marpangayah, jadi bereonni ma ai hubani. ⁶ Tapi ibagas haporsayaon ma ia mangindo, ulang bungbang, ai halak na bungbang uhur usih do ai hubani gilumbang ni laut, na pinalindak-lindak anjaha nionjar ni logou. ⁷ Ulang ma iagan uhur ni halak sisonai, adong jaloonni atap aha humbani Tuhan in, ⁸ ai halak na mardua uhur, na geor do ai bani haganup dalanni. ⁹ Ipuji sanina na toruh uhur in ma dirini halani hagijangonni, ¹⁰ tapi na bayak in halani hatoruhonni; ai na laho salpu do ia songon bunga ni poyon-poyon. ¹¹ Ai na poltak ma mata ni ari rap pakon milasni, jadi melus ma poyon-poyon ai, marurus bungani, anjaha rupani na jenges ai pe magou ma. Sonai ma laho melus na bayak in ibagas langkah-langkahni. ¹² Martuah ma halak na tahan bani parlajouan, ai dob monang ia bani parlajouan ai, jaloonni ma sortali hagoluhan, na dob pinarbagah ni Naibata bani na marholong ni uhur Bani. ¹³ Ulang ma adong na mangkatahon, sanggah na tarlajou ia: Na tarlajou do ahu humbani Naibata! Ai seng boi hona lajou Naibata laho mangkorjahon na jahat, anjaha Ia sandiri seng adong na ilajou. ¹⁴ Tapi hona lajou do halak, anggo itarik-tarik anjaha iompan-ompani hisap-hisap ni uhurni sandiri ia. ¹⁵ Jadi anggo marbanggal ma hisap-hisap ni uhur ai, itubuhkon ma dousa, anjaha dob gok dousa ai, itubuhkon ma hamateian. ¹⁶ Ulang ma nasiam kahou, nasiam sanina na hinaholongan. ¹⁷ Haganup sibere-bere na madear, anjaha haganup silayak-layak na gokan dear, ai ma na roh hun datas, humbani Bapa ni na lihar; seng ra mubah Ia anjaha seng dong na golap Bani halani partukaran. ¹⁸ Marhitei sura-sura ni uhurNi itubuhkon do hita marhitei hata hasintongan in, ase hita gabe limbuah ni sagala na tinompaNi. ¹⁹ Ingat nasiam ma, nasiam sanina na hinaholongan: Ganup halak, ringgas ma ia manangi-nangi, asok marsahap anjaha lambat manringis. ²⁰ Ai seng ihorhon marah ni jolma hapintoran i lobei ni Naibata. ²¹ Halani ai ambukkon nasiam ma sagala na mabutak ampa sagala masam ni hajahaton, anjaha jalo nasiam ma ibagas halamlamon hata na sinuan ibagas uhur nasiam, na tarbahen paluahkon tonduy nasiam. ²² Gabe sihorjahon hata in ma nasiam, ulang panangi-nangi tumang, na paoto-otohon dirini sandiri. ²³ Ai panangi-nangi bani hata in, anggo seng ihorjahon, usih ma ai bani halak na patonggor-tonggor rupa ni bohini bani sormin. ²⁴ Iidah do namin rupani, dob ai laho ma ia, gabe mintor lupa ma ia, atap sonaha do rupani ai. ²⁵ Tapi na manorih torus hu bagas titah hamardekaon na gokan dear ai, anjaha totap ijai, seng sipanangi-nangi na urah lupa ia, tapi sihorjahon hata in ma ia tene, martuah ma ia ibagas na mandalankon ai. ²⁶ Anggo adong na mangkatahon ibagas uhurni, na daulat ia, hape lang irantei dilahni, ipaoto-oto uhurni do ia ai, na parsuma do parugamaonni ai. ²⁷ On do parugamaon na borsih anjaha na so dong sihataon bani uhur ni Naibata, Bapa in, ai ma manorih na tading maetek ampa na mabalu ibagas hamarsikonni, anjaha manjagai diri ulang butak marhitei dunia on.

¹ Nasiam saninangku, ulang ma ibagas na mangidah-idah bohi nasiam marhaporsayaon bani Tuhanta Jesus Kristus, na marmulia in. ² Umpamani, roh ma sada halak partintin omas ampa na marpakeian na majenges hu parguruan nasiam, anjaha roh homa sada halak na miskin marhiou na marigat-rigat. ³ Jadi dob iidah nasiam parhiou na majenges ai, gabe ihatahon nasiam hubani: "Hundul ma ham ijon, bani sidearan on," tapi bani na miskin ai ihatahon nasiam: "Ijai ma ho jongjong barang hundul ijon i lambung ni naheihon," ⁴ ai lang domma mambahen parlegan-leganan nasiam ijai i tongah-tongah nasiam, anjaha manguhumi nasiam marhitei pingkiran na jahat? ⁵ Tangihon nasiam ma, ale sanina na hinaholongan: Ai lang na masombuh i dunia on do ipilih Naibata, ase bayak sidea ibagas haporsayaon anjaha panean bani harajaon, na dob pinarbagahNi hinan bani na marholong ni atei Bani? ⁶ Tapi idoruni nasiam do na masombuh in. Ai lang halak na bayak in do na mangarsik-arsik anjaha na manarad-narad nasiam hu paruhuman? ⁷ Ai lang sidea do na pasambor-samborhon Goran na dear in, na dob ipartigorankon bani nasiam? ⁸ Sibahen na madear ma nasiam tongon, anggo gok idalankon nasiam titah ni Harajaon in, domu hubani hata ni Surat in: Haholongi ma hasomanmin songon dirimu! ⁹ Tapi, anggo siidah-idah bohi nasiam, na mardousa do nasiam ijai, gabe patalaron ni titah in ma nasiam songon sipanlanggar. ¹⁰ Porini pe idalankon sada halak haganup titah in, hape ilanggar sada, parsalah do ia bani haganup. ¹¹ Ai Ia na mangkatahon: "Ulang ho marbangkis!" lanjar Ia do mangkatahon: "Ulang ho mamunuh!" Ase pori ni pe seng marbangkis ho, hape mamunuh do, panlanggar do ho bani titah in. ¹² Bani parsahap atap horja pe ingat nasiam ma: Siuhumon do nasiam bahenon ni titah hamardekaon in. ¹³ Ai uhum na so maridop ni uhur do bani na so mandalankon idop ni uhur, tapi monang do idop ni uhur marimbang uhum. ¹⁴ Aha ma gunani, nasiam saninangku, anggo ihatahon sada halak, adong bani haporsayaon, tapi seng dong pangkorjahonni? ¹⁵ Porini dong sanina atap botou, na so marhiou anjaha hurangan bani sipanganon ari-ari, ¹⁶ gabe adong humbani nasiam, na mangkatahon hubani: "Laho ma nasiam ibagas damei, malas ma pangahap nasiam anjaha bosur ma nasiam," hape seng dong ibere nasiam bani, aha ma gunani ai? ¹⁷ Haporsayaon in pe sonai do. Anggo seng dong horjani, na dob matei do ai ibagas dirini. ¹⁸ Tapi ra do adong halak na mangkatahon: Bamu ma haporsayaon, bakku parhorjaan! Patuduhkon ham ma bakku haporsayaonmu, na so pala adong horjani, ase hupatuduhkon bamu haporsayaon in marhitei horjangku. ¹⁹ Na porsaya do ham: Sada do hansa Naibata. Dear ma ai. Setan-setan pe porsaya do anjaha hitir-hitir. ²⁰ Tapi sihol ma botohonmu, ale jolma na oto, na so marguna do haporsayaon, anggo seng adong horjani. ²¹ Ai lang humbani horja do ipintori ompungta si Abraham, dob na binoanni ai si Isak, anakni ai, hu panggalangan? ²² Iidah ham ma ijai, na rap marhorja do haporsayaonni ampa pangkorjahonni, anjaha marhitei horja ai gabe gokan dear haporsayaon ai. ²³ Jadi jumpah ma na hinatahon ni Surat in: Ihaporsayai si Abraham do Naibata, anjaha ai ma ihira bani gabe hapintoranni, anjaha igoran do ia "huan-huan ni Naibata". ²⁴ Ase idah nasiam ma: Humbani horja do ipintori jolma, seng humbani haporsayaon tumang. ²⁵ Sonai do age si Rahab, boru jalang ai, ai lang humbani horjani do ia ipintori, dob na jinaloni ai suruhan ai, anjaha isuruh sidea humbani dalan na legan? ²⁶ Ai songon badan, na so martonduy, matei do, sonai do matei age haporsayaon, na so marhorja.

¹ Nasiam sanina, ulang ma buei nasiam na ra gabe guru, ai ibotoh hita, uhum na lobih borat do jaloonta. ² Ai ganup hita gati marsalah; anggo adong na so marsalah bani sahap, ai ma halak na gokan dear, na boi manrantei haganup angkulani. ³ Anggo ibahen hita rantei bani babah ni huda, ase ibalosi hita, gabe marguru hubanta do ganup badanni ai. ⁴ Tonggor ma, age kapal ai, na sonai banggalni, anjaha nionjar-onjar ni logou na gogoh, ipatontang-tontang do marhitei amudi na etek tumang, atap dompak ja uhur ni pangamudi ai. ⁵ Sonai do homa dilah in, pagori na etek do in, tapi buei do sahap-sahapni. Tonggor ma, etek pe apuy, boi do mosog ibahen harangan na bolag. ⁶ Apuy do age dilah in. Dunia na gok hagedukon do dilah in i tongah-tongah ni pagorinta, ipabutak do haganup dagingta anjaha ipagajag panggulmiton ni goluhta, marhitei apuy na roh hun naraka. ⁷ Ia sagala bagei ni binatang, manuk-manuk, ulog ampa dengke tarpalomuk do, anjaha domma lomuk ibahen jolma, ⁸ tapi seng tarpalomuk age sada jolma pe anggo dilah in, panjahati na so ra soh do in, gok bisa hamateian. ⁹ Marhitei in do hita mamuji Tuhanta, Bapa in; lanjar in do ipakei hita mamurai jolma, na tinompa domu hubani rupa ni Naibata. ¹⁰ Humbani sada pamangan kaluar pasu-pasu ampa papa-papa. Nasiam sanina, ulang ma sonai! ¹¹ Mintor adong ma sada bah tubuh, na marjullak-jullakkon na matobu ampa na mapaet? ¹² Nasiam sanina, mintor tarbuahkon hayu ara ma buah ni hayu jetun, atap hayu anggur marbuahkon buah ni hayu ara? Sonai do homa, seng tarjullak-jullakkon bah tubuh na porad bah na matobu. ¹³ Ise humbani nasiam na maruhur anjaha na pentar? Ipatuduhkon ma horjani marhitei parlahouni na madear, ibagas halamlamon ni hapentaran. ¹⁴ Tapi anggo ijolom-jolom nasiam ibagas uhur nasiam parsimburuon na mapaet ampa paringoran, ulang ma puji nasiam diri nasiam anjaha marladung nasiam dompak hasintongan. ¹⁵ Sedo in hauhuron na roh hun datas; na hun tanoh on do in, humbani uhur ni jolma, humbani sibolis. ¹⁶ Ai ijin adong parsimburuon ampa paringoran, ijai ma adong hageoron ampa haganup bagei ni horja hajahaton. ¹⁷ Tapi ia hauhuron na humbabou ai sabonar borsih do ai, ambah ni ai ra mardamei, lamlam, pambalosi, gok idop ni uhur ampa buah-buah ni hadearon, seng singapit-apit ampa lang marsipakulah-kulah. ¹⁸ Anjaha buah ni hapintoran ibagas damei do ai isaburhon bani halak na mangkorjahon hadameion.

¹ Hunja do roh ni parmunsuhon ampa partinggilon, na bani nasiam? Ai lang humbani hisap-hisap nasiam do, na marsilawanan ibagas pagori nasiam? ² Na marsura-sura do nasiam, tapi lang dapotan; mamunuh nasiam anjaha marsimburu, lanjar seng marulih nasiam. Na marsiimbangan do nasiam anjaha marporang, tapi seng dong bani nasiam, halani seng ipindo nasiam. ³ Mangindo do namin nasiam, tapi seng manjalo, halani salah pangindo nasiam, ai sihol parbois-boiskonon nasiam do ai marhitei hisap-hisap nasiam. ⁴ Nasiam parbangkis, ai lang ibotoh nasiam, ia parhuan-huanon dompak dunia on hamunsuhon dompak Naibata do in? Ase, na sihol huan-huan ni dunia on, ipajongjong do dirini gabe munsuh ni Naibata. ⁵ Atap iagan nasiam, gurou-gurou do na hinatahon ni Surat in: Parsimburu do Tonduy in, na dob ibahen marianan ibagas hita? ⁶ Tapi lambin bueini do idop ni uhur ibere. Halani ai do ase ihatahon: Ilawan Naibata do sigijang uhur, tapi ibere do idop ni uhur bani na toruh maruhur. ⁷ Ai pe, ondoskon nasiam ma diri nasiam bani Naibata; lawan nasiam ma sibolis in, jadi maporus ma ia humbani nasiam. ⁸ Padohor nasiam ma bani Naibata, jadi padohoronNi ma bani nasiam. Paborsih nasiam ma tangan nasiam, nasiam pardousa, anjaha papitah nasiam ma uhur nasiam, nasiam na mardua uhur! ⁹ Marhoru ma nasiam, tangis anjaha doruh-doruh. Mubah ma tawa nasiam gabe partangison, malas ni uhur nasiam gabe pusok ni uhur! ¹⁰ Patoruh nasiam ma uhur nasiam i lobei ni Tuhan in, jadi pagijangonni ma nasiam. ¹¹ Ulang ma nasiam marsipahata-hataan, nasiam sanina! Barang ise na manghatai anjaha na manguhum-uhumi hasomanni, na manghatai anjaha na manguhum-uhumi titah in do ia ai. Tapi anggo iuhumi ham titah in, seng be sihorjahon titah in ham ai, tapi panguhum do. ¹² Sada do Sibere titah anjaha Panguhum, na boi paluahkon ampa mangagou. Tapi, ise ma ham, ase uhumonmu hasomanmu? ¹³ Ee nasiam, na mangkatahon: Sadari on atap patar laho ma hanami hu kota ai, ase ijai hanami soh pala satahun on, martiga-tiga ampa mansari-sari. ¹⁴ Hape pasal ari patar pe seng ibotoh nasiam. Ai aha do goluh nasiam in? Usih do nasiam bani timus, na taridah tongkin, dob ai seng taridah be. ¹⁵ Gantih ni ai, sonon ma patut hatahonon nasiam: Anggo marosuh Tuhan in anjaha manggoluh hanami, bahenonnami ma on atap ai. ¹⁶ Hape mangenjeng do nasiam anjaha sombong; na jahat do pangenjengon na sonai ai. ¹⁷ Ase, na mambotoh mambahen na madear, hape seng ihorjahon, na mardousa do ia ijai.

¹ Ee nasiam na bayak, tangis anjaha doruh-doruh ma nasiam halani sitaronon, na sihol roh bani nasiam. ² Domma busuk habayakon nasiam, domma ngitngiton hiou nasiam. ³ Domma tasikon omas ampa pirak nasiam, anjaha tasik ai, saksi ma ai dompak nasiam, anjaha gagatonni ma daging nasiam songon apuy. Na patumpu-tumpu arta do hape nasiam sanggah panorang parpudi. ⁴ Tonggor ma, upah ni halak siparhorja, na manabi i juma nasiam, na ijolomi nasiam ai, doruh-doruh do, anjaha dilo-dilo ni sipanabi ai domma das bani pinggol ni Tuhan Zebaot. ⁵ Marmewah-mewah anjaha marlobih-lobih do goluh nasiam i tanoh on. Ipamombur-mombur nasiam do diri nasiam hubani ari pamotongan. ⁶ Iuhum anjaha ibunuh nasiam do halak parpintor; seng dong ilawan sidea nasiam. ⁷ Ai pe, nasiam sanina, sabar ma nasiam das hubani ari parroh ni Tuhan in! Ai parjuma pe, ipaima-ima do buah na maharga hun tanoh in, anjaha sabar do ia paima-imahon udan partidahonkon ampa udan paima pariama. ⁸ Nasiam pe sabar ma, patotap nasiam ma uhur nasiam, ai dohor ma parroh ni Tuhan in. ⁹ Ulang ma nasiam marsiungut-ungutan samah nasiam, nasiam sanina, ase ulang hona uhum nasiam. Tonggor ma, domma jongjong Panguhum in bani labah. ¹⁰ Nasiam sanina, nabi-nabi, na marsahap ibagas Goran ni Tuhan in, sidea ma bahen nasiam tiruan ibagas sitaronon ampa hasabaron. ¹¹ Iparhatuah hita do halak na sabar. Ibogei nasiam do hasabaron ni si Job, anjaha iidah nasiam do sonaha dobni ibahen Tuhan in, ai parontou ni uhur banggal do Tuhan in anjaha paridop ni uhur. ¹² Tapi i lobei ni haganup, nasiam saninangku, ulang ma nasiam marbija, barang hubani langit barang hubani tanoh barang hubani na legan. Hatahon nasiam ma: "Eak" anggo eak ma, atap "Lang," anggo lang ma, ase ulang hona uhum nasiam. ¹³ Anggo adong na marsitaronon i tongah-tongah nasiam, martonggo ma ia. Anggo adong na marmalas ni uhur, idodingkon ma doding puji-pujian. ¹⁴ Anggo adong na boritan i tongah-tongah nasiam, idilo ma sintua ni kuria in, ase itonggohon anjaha iminaki ia ibagas goran ni Tuhan in. ¹⁵ Jadi paluahon ni tonggo haporsayaon in ma na boritan ai, anjaha pajongjongon ni Tuhan in ma ia; anjaha sasap ma dousani, anggo adong ihorjahon. ¹⁶ Ai pe, marsisopothon dousani bei ma nasiam anjaha marsitonggoan, ase malum nasiam. Na margogoh tumang do pangkorhon ni tonggo ni halak parpintor, anggo ihabujurhon. ¹⁷ Jolma do si Elias, sabiak pakon hita; pongkut do ia martonggo, ase ulang roh udan, gabe seng roh udan i tanoh in tolu tahun onom bulan dokahni. ¹⁸ Dob ai iulaki ma martonggo, gabe ibere langit in ma udan, anjaha ipantubuhkon tanoh in buahni. ¹⁹ Nasiam sanina, anggo adong humbani nasiam na kahou humbani hasintongan in, hape adong na mambobansi mulak, ²⁰ ibotoh ma: Barang ise na mamboan pardousa mulak humbani hakahouonni, na paluahkon tonduyni do ia ai humbani hamateian anjaha manrungkub buei dousa.