GALATIA

GALATIA

¹ Humbani si Paulus, ai ma apostel, sedo humbani jolma atap marhitei sada jolma, tapi marhitei Jesus Kristus anjaha marhitei Naibata Bapa do, na dob papuhohonSi humbani na matei, ² rap pakon sanina in haganup, na mangkasomani ahu, hubani kuria-kuria na i nagori Galatia. ³ Idop ni uhur ma bani nasiam ampa damei humbani Naibata Bapa pakon humbani Tuhanta Jesus Kristus, ⁴ na dob mamberehon diriNi halani dousanta, laho paluahkon hita humbani dunia sisonari, na jahat on, mangihutkon uhur ni Naibata Bapanta. ⁵ Bani ma hasangapon ronsi sadokah ni dokahni. Amen. ⁶ Longang do uhurhu, halani sonin podasni nasiam marbalik hum-Bani, na dob mandilo nasiam marhitei idop ni uhur ni Kristus, laho mangihutkon Ambilan Namadear na legan, ⁷ ai seng adong na legan. Tapi adong do halak na manggeori uhur nasiam, anjaha na sihol paubahkon Ambilan Namadear ni Kristus. ⁸ Tapi porini hanami, atap malekat na hun nagori atas pe, mangambilankon Ambilan Namadear bani nasiam, legan humbani na dob niambilankonnami, hona papa ma ia. ⁹ Songon na dob ihatahon hanami hinan, sonari pe sonai do huhatahon: Anggo adong na mangambilankon Ambilan Namadear bani nasiam, legan humbani na dob jinalo nasiam, hona papa ma ia. ¹⁰ Rosuh-rosuh ni jolma do na hupindahi ijai, atap rosuh ni Naibata do? Na mantin bani pinggol ni jolma do na hupindahi? Ambit sonai, seng sintong ahu juak-juak ni Kristus. ¹¹ Ai hupatugah ma bani nasiam sanina, ia Ambilan Namadear na huambilankon in, sedo na humbani jolma in. ¹² Ai seng hujalo atap huguruhon in humbani jolma, tapi marhitei pangungkabon ni Jesus Kristus do. ¹³ Ai domma ibogei nasiam parlahouhu, sanggah ibagas ha-Jahudion ope ahu, sonaha parahni parburungku bani kuria ni Naibata, laho parsedahon ai. ¹⁴ Surungan do ahu humbani buei hasomanku magodang mangkorjahon ha-Jahudion, ai na tarlobih do pongkut ni uhurhu manghaporluhon aturan-aturan na humbani ompungnami. ¹⁵ Tapi ipapulig Naibata do ahu, humbani parnaibataan nari, anjaha idilo do ahu halani idop ni uhurni, ¹⁶ anjaha marosuh do Ia patalarhon Anakni in bakku, ase huambilankon Ia bani halak sipajuh begu-begu. Seng lobei marguru ahu ijia bani daging ampa daroh, ¹⁷ anjaha seng tangkog ahu hu Jerusalem, marayak apostel, na dob parlobei humbakku; tapi hu tanoh Arab do ahu laho. Dob ai use mulak ma ahu hu Damaskus. ¹⁸ Dob salpu tolu tahun, tangkog ma ahu hu Jerusalem, laho marayak si Kepas, anjaha tondok ma ahu bani sapuluh lima ari dokahni. ¹⁹ Tapi seng adong huidah apostel na legan, sobali si Jakobus, sanina ni Tuhan in. ²⁰ Ia na husurat on bani nasiam, i lobei ni Naibata do on, paboa sedo na marladung ahu. ²¹ Dob ai laho do ahu hu nagori Siria ampa Silisia. ²² Tapi seng itanda kuria ni Kristus, na i nagori Judea, anggo bohingku. ²³ Pitah na tarbogei do bani sidea: "Na marburu hita ijia, ia do sonari mangambilankon haporsayaon, na pinarsedani ijia." ²⁴ Jadi ipasangap sidea ma Naibata halani ahu.

¹ Ipudi ni ai, dob salpu sapuluh ompat tahun, tangkog ma ahu use hu Jerusalem rap pakon si Barnabas; anjaha huboan do homa si Titus. ² Tapi mangihutkon pangungkabon do na tangkog ai ahu. Anjaha hupatorang ma bani sidea Ambilan Namadear na huambilankon bani halak sipajuh begu-begu, tarlobih ma ai hubani na sangap-sangap ai, ase ulang soya parlintunonku hu lobeian on age na dob in. ³ Gari si Titus, hasomankin, halak Gorik in, seng ipaksa ase tarsunat. ⁴ Tapi adong do deba sanina na so haru sanina, na pasamak-samakkon dirini, na roh masuk bannami, laho manggompangi hamardekaon na adong bannami ibagas Jesus Kristus, laho patunduk hanami bani parjabolonon. ⁵ Tapi tongkin pe lang tunduk hanami bani sidea, ase totap bani nasiam hasintongan ni Ambilan Namadear in. ⁶ Tapi sidea na marsangap ai (atap ise sidea hinan, seng penting bakku ai, ai seng siidah bohi Naibata), seng adong itambahi sidea bani na adong bakku hinan. ⁷ Tapi suharni ai do, iidah sidea do, na dob iondoskon do bakku Ambilan Namadear hubani halak na so marsunat, songon si Petrus hubani halak na marsunat. ⁸ Ai Ia, na pabangkithon si Petrus gabe apostel bani halak na tarsunat, lanjar Ia do pabangkithon ahu bani halak na so marsunat. ⁹ Anjaha dob iidah sidea idop ni uhur na dob binere bakku, ai ma si Jakobus, si Kepas ampa si Johannes, na songon tiang iahap hasoman, gabe ijabat-tangani sidea ma ahu pakon ni Barnabas, ai ma tanda ni parsaoran, paboa hanami hubani sipajuh begu-begu, tapi sidea hubani na marsunat, ¹⁰ asal ma iingat hanami halak na masombuh; anjaha saud do huporluhon mandalankon ai. ¹¹ Tapi sanggah roh si Kepas hu Antiokia, dumpar do hulawan ia, halani torang adong salahni. ¹² Ai paima roh piga-piga halak suruhan ni si Jakobus, rap mangan do ia pakon sipajuh begu-begu, tapi dob roh sidea, surut ma ia anjaha ipaholang ma dirini, halani biar ni uhurni bani sidea na marsunat ai. ¹³ Anjaha halak Jahudi na legan ai pe dihut do marsipakulah-kulah, pala do age si Barnabas dihut bani hasipakulah-kulahon ni sidea ai. ¹⁴ Tapi dob huidah, na so pintor be langkah ni sidea domu hubani hasintongan ni Ambilan Namadear in, ningku ma dompak si Kepas i lobei ni sidea haganup: Anggo ham, sada halak Jahudi, manggoluh mangihutkon adat ni sipajuh begu-begu, sedo adat ni Jahudi, sonaha ma boi paksaonmu halak sipajuh begu-begu, mangihutkon adat Jahudi? ¹⁵ Halak Jahudi do hanami mangihutkon partubuh, sedo pardousa humbani sipajuh begu-begu. ¹⁶ Tapi ibotoh hanami do, na so dapotan hapintoran jolma marhitei na mangkorjahon titah, tapi marhitei haporsayaon bani Jesus Kristus do. Halani ai, hanami pe, marhaporsayaon do bani Kristus Jesus, ase ipintori hanami marhitei haporsayaon bani Kristus, sedo marhitei na mangkorjahon titah, ai marhitei na mangkorjahon titah, seng adong na dapotan hapintoran. ¹⁷ Tapi anggo pardousa do jumpah age hanami, na sihol pintor marhitei Kristus, ai lang juak-juak ni dousa ma age Kristus? Lang ale! ¹⁸ Tapi anggo hupauli ase na dob huparseda, hupajongjong do diringku sipanlanggar. ¹⁹ Ai domma matei ahu bani titah in marhitei titah in, ase manggoluh ahu bani Naibata. Raphon Kristus in do ahu tarsilang. ²⁰ Seng be ahu na manggoluh in nuan, tapi Kristus do manggoluh ibagas ahu. Ia manggoluh pe ahu nuan ibagas daging, ai ma manggoluh ibagas haporsayaon bani Anak ni Naibata, na manghaholongi ahu anjaha na mamberehon diriNi manghophop ahu. ²¹ Seng hutulak idop ni uhur ni Naibata, ai ambit adong hapintoran marhitei titah, soya ma parmatei ni Kristus.

¹ E nasiam, halak Galatia na so maruhur! Ise do na mandormai nasiam? Ai domma pala targambar bani panonggor nasiam Jesus na tarsilang in. ² Pitah on sihol botohonku humbani nasiam: Humbani horja titah do ijalo nasiam Tonduy in, atap humbani Ambilan haporsayaon do? ³ Sonin ma hape nasiam maoto? Ibagas Tonduy do ipungkah nasiam; hape sonari ibagas daging do pangujungini ibahen nasiam? ⁴ Mintor soya ma panaronon nasiam na buei in? Eak, anggo tongon soya-soya. ⁵ Ia, na mambere Tonduy in bani nasiam, anjaha na mangkorjahon hagogohon ibagas nasiam, ai sonaha, marhitei horja titah atap marhitei Ambilan haporsayaon do in? ⁶ Songon si Abraham: Porsaya do ia bani Naibata, jadi ai do ihira bani gabe hapintoranni. ⁷ Ase botoh nasiam ma, halak na porsaya, ai do anak ni si Abraham. ⁸ Surat in pe domma ibotoh hinan, paboa marhitei haporsayaon do pintoran ni Naibata sipajuh begu-begu, gabe ibaritahon do hubani si Abraham: Marhitei ho do pasu-pasuon haganup bangsa. ⁹ Ase, halak na porsaya in do ipasu-pasu rap pakon si Abraham na porsaya in. ¹⁰ Ai haganup halak, na sihol manggoluh humbani na mangkorjahon titah, ikuasai papa do, ai tarsurat do: Hona papa do ganup, na so totap ibagas haganup na tarsurat ibagas buku titah in, ase ihorjahon ai. ¹¹ Tapi torang do, paboa seng adong na pintor i lobei ni Naibata bahenon ni titah in, ai "Parpintor humbani haporsayaon do na manggoluh". ¹² Tapi seng humbani haporsayaon anggo titah in, ai na mangkorjahonsi, ai do na manggoluh bahenonni in. ¹³ Itobus Kristus do hita humbani papa ni titah in, marhitei na hona papa Ia manghophop hita, ai tarsurat do: Hona papa do haganup na targantung bani hayu, ¹⁴ ase ibagas Kristus Jesus sogop bani halak sipajuh begu-begu pasu-pasu na bani si Abraham, ase marhitei haporsayaon ijalo hita Tonduy na pinarbagah-bagah in. ¹⁵ Nasiam sanina, hasomalan na masa bani jolma ma huhatahon: Parpadanan ni jolma, anggo domma totap ai, seng iosei ai, atap itambahi. ¹⁶ Ia bagah-bagah ai, hubani si Abraham ampa hubani ginomparni do ihatahon. Seng ihatahon: "Ampa bani sagala ginomparni", songon hubani na buei, tapi hubani sada halak do: "Ampa hubani ginomparmu", ai ma Kristus. ¹⁷ On do na huhatahon ijai: Ia padan, na dob pinatotap ni Naibata, seng boi sundat in bahenon ni titah, na roh ompat ratus tolu puluh tahun i pudini in, gabe lumei bagah-bagah in ibahen. ¹⁸ Ai anggo humbani titah do paneanon in, seng be humbani bagah-bagah in; tapi marhitei bagah-bagah do ibere Naibata in bani si Abraham. ¹⁹ Ase bahen aha do titah in? Itambahkon do in halani panlanggaron, paima roh Ginompar, simada bagah-bagah in, iparentahkon marhitei malekat-malekat marparhiteian sada siholang. ²⁰ Ia siholang sedo na paturei-tureihon salopah tumang, tapi sada do anggo Naibata. ²¹ Ase na mangimbang bagah-bagah ni Naibata do titah in? Lang ale! Ai ambit ibere titah na margogoh pagoluhkon, humbani titah in ma tongon hapintoran. ²² Tapi itutup Surat in do haganup hubagas dousa, ase marhitei haporsayaon bani Jesus Kristus ibere bagah-bagah in bani na porsaya. ²³ Tapi paima roh haporsayaon, tartutup do hita ibagas kuasa ni titah, anjaha ikunsi managam haporsayaon, na sihol sipatalaron ope. ²⁴ Ase siparorot do titah in banta, paima roh Kristus, ase humbani haporsayaon hita ipintori. ²⁵ Tapi dob roh haporsayaon in, seng be ibagas kuasa ni siparorot in hita. ²⁶ Ai haganup do nasiam anak ni Naibata marhitei haporsayaon bani Kristus Jesus. ²⁷ Ai haganup nasiam, na tardidi hubagas Kristus, Kristus do iparhiouhon nasiam. ²⁸ Seng dong be ijai Jahudi barang Gorik, jabolon barang halak na mardeka, dalahi barang naboru, ai sada do nasiam haganup ibagas Kristus Jesus. ²⁹ Tapi anggo Kristus simada nasiam, ginompar ni si Abraham do nasiam, anjaha panean mangihutkon bagah-bagah in.

¹ Tapi on do na huhatahon: Sadokah danak ope panean in, seng dong leganni humbani jabolon, age pe ia tuan simada haganup, ² tapi itoruh ni kuasa ni sipanramoti ampa sijolom anak kunsi do ia, das bani panorang, na tinontuhon ni bapani hinan. ³ Sonai do homa hita: Sadokah danak hita, iparjabolon kuasa ni unsur-unsur ni dunia on do hita. ⁴ Tapi dob gok panorangni, isuruh Naibata ma Anakni, tubuh humbani naboru, ginomgoman ni titah, ⁵ ase itobus na ginomgoman ni titah in, ase ijalo hita hak haanakon. ⁶ Tapi halani anak nasiam, isuruh Naibata do hubagas uhurta Tonduy ni Anakni in, na mandilohon: Abba, Bapa! ⁷ Ase, seng be jabolon ham, tapi anak do. Tapi anggo anak, lanjar panean ma, marhitei Naibata. ⁸ Tapi ijia, sanggah lape itandai nasiam Naibata, ibalosi nasiam do naibata-naibata, na so Naibata mangihutkon hadirionni. ⁹ Tapi sonari, domma itanda nasiam Naibata, atap sasintongni, Naibata do na mananda nasiam. Mase ma nasiam marbalik use, mulak hubani kuasa ni unsur-unsur na so margogoh anjaha na lumei, ase balosan nasiam ai use? ¹⁰ Gabe siramotkon ari, bulan, panorang na tinontuhon pakon tahun do nasiam. ¹¹ Mabiar do uhurhu pasal nasiam, atap na soya do halojaonku manghopkop nasiam. ¹² Nasiam sanina, hupindo ma bani nasiam, songon ahu ma nasiam, ai ahu pe songon nasiam do. Seng ongga na so pintor ibahen nasiam bakku. ¹³ Tapi ibotoh nasiam do, ibagas hagalekon ni daging do huboan Ambilan Namadear bani nasiam bani mulani ondi. ¹⁴ Anjaha sanggah na tarlajou nasiam halani pardagingonku, seng magigi barang mapas uhur nasiam pasal ai, tapi songon malekat ni Naibata do ijalo nasiam ahu, songon Kristus Jesus do tene. ¹⁵ Ija do nuan hatuahon nasiam in? Ai husaksihon ma bani nasiam, sihol buaton nasiam do ijia mata nasiam, laho mambere ai bakku, ambit na tarbahen. ¹⁶ Ai na gabe imbang nasiam do ahu, halani huhatahon bani nasiam hasintongan? ¹⁷ Seng pitah haringgason ni sidea ai bani nasiam, tapi sihol padaraton ni sidea do nasiam, ase ringgas nasiam manghophop sidea. ¹⁸ Dear do tongtong marringgas ni uhur nasiam dompak na madear, anjaha ulang ma pitah sanggah i lambung nasiam ahu. ¹⁹ Nasiam niombahku, na dob huarou use, paima manjadi rupa ni Kristus ibagas nasiam. ²⁰ Iparsinta uhurhu do, ase itongah-tongah nasiam ahu sonari, anjaha tarpadear-dear ahu sorangku, ai jut do uhurhu pasal nasiam. ²¹ Nasiam na marosuh gomgoman ni titah in, hatahon nasiam ma bakku: Ai lang domma ibogei nasiam titah in? ²² Tarsurat do ijai: Dua do anak ni si Abraham, sada humbani jabolonni naboru anjaha na sada nari humbani boru mardeka ai. ²³ Tapi mangihutkon daging do partubuh ni na humbani boru jabolon ai, tapi humbani bagah-bagah do na humbani boru mardeka ai. ²⁴ Limbaga na mararti do in. Ai padan na dua in do sidea: Na sada hun dolog Sinai, na manubuhkon anak gabe jabolon, ai ma si Hagar. ²⁵ Ai Hagar ai ma dolog Sinai i tanoh Arab, anjaha usih ma ai bani Jerusalem sisonari, ai jabolon do ai rap pakon niombahni. ²⁶ Tapi Jerusalem na iatas ai, ai do boru mardeka ai, anjaha ai do inang banta. ²⁷ Ai tarsurat do: Marmalas ni uhur ma ho na lambang, na so tubuhan tuah; marolob-olob ma ho anjaha marsora na gogoh, na so mangarou anak. Ai buei do niombah ni na punjung in, bueinan humbani na marparamangon. ²⁸ Tapi nasiam sanina, anak bagah-bagah do nasiam mangihuthon si Isak. ²⁹ Tapi ijia age sonari, iparburu na tubuh mangihutkon daging do na tubuh mangihutkon Tonduy. ³⁰ Tapi aha do nini Surat in? Usir ma boru jabolon in rap pakon anakni, ai seng bulih anak ni boru jabolon in rap manean pakon anak ni boru mardeka in. ³¹ Ase, nasiam sanina, sedo anak ni boru jabolon hita, tapi anak ni boru mardeka do.

¹ Ase mardeka hita, ai do ase imardekahon Kristus hita. Totap ma nasiam jongjong, anjaha ulang be ra nasiam patundukon ni pasangan parjabolonon! ² Ahu si Paulus manghatahon bani nasiam: Anggo ipasunathon nasiam diri nasiam, otik pe lang marguna be Kristus bani nasiam. ³ Huulaki ma manaksihon bani haganup jolma: Na pasunathon diri, maningon horjahononni do haganup titah in. ⁴ Na dob sirang do nasiam humbani Kristus, anggo sihol pintor nasiam marhitei na mangkorjahon titah, domma madabuh nasiam humbani idop ni uhur. ⁵ Ai na paima-imahon do hita bani hapintoran siaraphonon ai marhiteihon Tonduy, maronjolan bani haporsayaon. ⁶ Ai ibagas Kristus Jesus marsunat atap lang marsunat, seng dong gogoh ni ai, tapi haporsayaon sihorjahon holong ai do. ⁷ Dear hinan do pardalan nasiam, ise do na manlanglangi nasiam, gabe seng be pambalosi nasiam bani hasintongan in? ⁸ Pangojur-ojuron na sonai, seng humbani na mandilo nasiam roh ni ai. ⁹ Ragi na otik mambahen migar ganup itak na niagu. ¹⁰ Tenger do uhurhu bani nasiam marhitei Tuhan in, seng na margoling uhur nasiam. Tapi barang ise pe na manggeori nasiam, sai porsanonni do uhum na hubani. ¹¹ Anjaha ahu, nasiam sanina, ambit huambilankon parsunaton, mase ma pala parburuon ahu? Ambit sonai, maronti ma parsangsian halani silang in. ¹² Ikasih ma namin na manggeori nasiam. ¹³ Ai hu hamardekaan do nasiam tardilo, nasiam sanina, tapi ulang ma pakei nasiam hamardekaon nasiam in gabe bonsir mambalosi daging, tapi marsibalos-balosan ma nasiam ibagas holong. ¹⁴ Ai haganup titah in ibagas hata na sangkababah on do rimpunni: Haholongi ma hasomanmin songon dirimu! ¹⁵ Tapi anggo marsiharatan anjaha marsipanganan nasiam samah nasiam, jaga ma nasiam, ase ulang marsisedaan nasiam. ¹⁶ Tapi on do na huhatahon: Marguru bani Tonduy in ma nasiam marparlahou, anjaha ulang ma suhun-suhuni nasiam hisap-hisap ni daging in. ¹⁷ Ai na mangimbang tonduy do sura-sura ni daging, anjaha na mangimbang daging do sura-sura ni tonduy; na marsilawanan do in, ase lang tarpasaud nasiam, pinindo ni uhur nasiam. ¹⁸ Tapi, anggo Tonduy do na mambobahon nasiam, seng be ginomgoman ni titah in nasiam. ¹⁹ Tapi talar do horja ni daging, ai ma: Parriah-riahon, habutakon, goluh na so marrantei, ²⁰ marnaibata na legan, hadatuon, parmunsuh-munsuhon, partinggilon, parsimburuon, ringis, uhur haut, parbolah-bolahon, parlegan-leganon, ²¹ subil, parmabukon, marpoya-poya ampa na usih hujai. Songon na dob huhatahon bani nasiam ijia, sonai do age sonari: Sihorjahon na sonai, seng teanon ni ai harajaon ni Naibata. ²² Tapi on do buah ni Tonduy: Holong, malas ni uhur, damei, lumbang ni uhur, habasaron, halayakon, haporsayaon, halamlamon ampa panrajaion diri. ²³ Seng marlawan titah dompak na sonai ai. ²⁴ Tapi halak na ginomgoman ni Kristus Jesus, iparsilangkon do dagingNi, hisap-hisapni ampa rosuh-rosuhni. ²⁵ Anggo domma ipagoluh Tonduy in hita, mardalan ma hita homa mangihuthon Tonduy in. ²⁶ Ulang ma parayak hita hasangapon na lumei, ulang ma marsipagila-gilaan, anjaha ulang ma marsilateian.

¹ Nasiam sanina, anggo dong tardapot halak ibagas sada panlanggaron, nasiam na marpartonduyon ma patorsa-torsahonsi marhitei tonduy halamlamon, tapi jaga dirimu, ase ulang dihut ham tarlajou. ² Marsiurupan ma nasiam, mamorsan na borat in, ai marhiteihon ni in idalankon nasiam do titah ni Kristus. ³ Ai anggo ipajuntul-juntul halak dirini, hape aha pe lang ia, na paoto-otohon dirini do ai. ⁴ Tapi ganup ma mamareksa horjani bei; jadi halani dirini tumang ma ia mamuji-muji diri, sedo halani na legan, ⁵ ai ganup do adong siporsanonni bei. ⁶ Tapi patut do na niajaran bani Hata ni Naibata mambere humbani sagala artani bani na mangajarisi. ⁷ Ulang ma kahou nasiam, seng ra Naibata apasan! Ai ia in itidahkon halak, ai do sabionni. ⁸ Na manidahkon bani dagingni, manabi do humbani dagingni hamagouan; tapi na manidahkon bani tonduy, manabi do humbani tonduy hagoluhan sisadokah ni dokahni. ⁹ Tapi ulang ma marnaloja hita mambahen na madear, ai na manabi do use hita bani panorangni, anggo seng gabe galek hita sonari. ¹⁰ Ai pe, halani sompat ope, horjahon hita ma na madear bani haganup halak, tapi bueinan bani hasomanta sahaporsayaon. ¹¹ Tonggor nasiam ma, sonaha banggal-banggal ni huruf na husurat bani nasiam marhitei tanganku sandiri. ¹² Haganup na marsura-sura sangap bani pardagingon, ai do na mamaksa nasiam ase tarsunat, pitah, ase ulang marsitaronon sidea halani silang ni Kristus. ¹³ Ai gari sidea, siparsunat ai, seng idalankon titah in, tapi ihasiholhon sidea do, ase tarsunat nasiam, ase boi sidea mamuji diri marhitei daging nasiam. ¹⁴ Tapi daoh ma humbakku na mamuji diri, anggo lang halani silang ni Tuhan Jesus Kristus! MarhiteihonSi domma tarsilang dunia on bakku, anjaha ahu bani dunia on. ¹⁵ Atap na marsunat atap na so marsunat, seng dong age aha artini ai, tapi na tinompa na baru ai do. ¹⁶ Anjaha haganup na marparlahouhon ruhut sisonai ai, damei ampa idop ni uhur ma bani sidea, sonai homa bani Israel ni Naibata. ¹⁷ Hu lobeian on ulang adong be na manlojai ahu, ai hupaboan-boan do tanda ni ugah ni Jesus bani angkulangku. ¹⁸ Idop ni uhur ni Tuhanta Jesus Kristus ma mangkasomani tonduy nasiam, nasiam sanina! Amen.