EPESUS

EPESUS

¹ Humbani si Paulus, apostel ni Kristus Jesus, humbani rosuh ni uhur ni Naibata, hubani halak na pansing i Epesus, na porsaya bani Kristus Jesus. ² Idop ni uhur ma bani nasiam ampa damei humbani Naibata Bapanta, pakon Tuhan Jesus Kristus. ³ Napuji ma Naibata, Bapa ni Tuhan Jesus Kristus, na dob mamasu-masuhon banta bagei ni pasu-pasu partonduyon hun nagori atas ibagas Kristus. ⁴ Ai ipilih do hita ibagas Ia, sanggah lape itombei dunia on, ase pansing hita anjaha lang panurakon i lobeiNi, ibagas holong ni uhur. ⁵ Itotapkon hinan do hita Bani, gabe anak niainNi marhitei Jesus Kristus, mangihutkon rosuh ni uhurNi, ⁶ gabe puji-pujian bani idop ni uhur ni na marmulia in, na niidopkonNi banta ibagas na Hinaholonganni in. ⁷ Ibagas Ia do dapot hita haluahon marhitei darohNi, ai ma hasasapan ni panlanggaron, domu hubani habayakon ni idop uhurNi, ⁸ na unjah binerehonni banta ibagas hapentaron ampa hauhuron. ⁹ Ipabotohkon do banta rusia ni sura-sura ni uhurNi domu hubani haputusan ni uhurNi, na dob tinotaphonNi hinan ibagas DiriNi. ¹⁰ Isurahon do bani gok ni panorangni, pasadahon haganup, na adong i nagori atas ampa na iatas tanoh on, itoruh ni sada ulu, ai ma Kristus. ¹¹ Ibagas Ia do ipilih hita, na dob tinontuhonNi hinan domu hubani sura-suraNi, ai ma Naibata sipasaud haganupan ai, domu hubani rosuh ni uhurNi, ¹² ase tarpuji hasangaponNi marhitei hita, na dob mangarap hinan bani Kristus in. ¹³ Anjaha ibagas Ia do nasiam, dob ibogei nasiam hata hasintongan in, ai ma Ambilan Namadear pasal haluahon nasiam, anjaha ibagas Ia dob porsaya nasiam Bani, ilak nasiam marhitei Tonduy Napansing, na pinarbagah-bagah in, ¹⁴ ai ma sikoram ni siteanonta in, bahen haluahon ni na hinophopNi, ase tarpuji hasangaponNi in. ¹⁵ Ase ahu pe, dob hubogei, pasal haporsayaon nasiam bani Tuhan Jesus ampa holong ni uhur nasiam bani haganup halak na pansing in, ¹⁶ seng maronti ahu mangkatahon tarima kasih halani nasiam, mardingat nasiam, sanggah na martonggo ahu, ¹⁷ andohar ibere Naibata ni Tuhanta Jesus Kristus, Bapa ni hasangapon in bani nasiam Tonduy hapentaron ampa pangungkabon, laho manandaSi. ¹⁸ Sai ipalihar Naibata ma mata ni uhur nasiam, ase ibotoh nasiam aha do arta siaraphononkon halani pandiloonNi ai, anjaha sonaha surung ni hasangapon, siteanon na hum Bani, bani halak na mapansing in; ¹⁹ anjaha sonaha sulur ni habanggalon ni KuasaNi in banta, na porsaya halani horja hagogohon na surung in, ²⁰ na hinorjahonNi bani Kristus, sanggah na pinapuhoNi ai Ia humbani na matei, anjaha ipahundul hu siamunNi i nagori atas, ²¹ hu atas ni sagala harajaon ampa kuasa ampa hagogohon ampa hamuliaon, ampa haganup goran, na targoran, seng pitah i dunia on, tapi dihut do bani na roh magira. ²² Haganup do ipatunduk hu toruh ni naheiNi, anjaha ipabangkit do Ia kopala ni haganup, bani kuria in, ²³ in ma angkulaNi, hagogokNi, na manggoki haganup ibagas haganup.

¹ Nasiam pe, na dob matei hinan halani panlanggaron ampa dousa nasiam, ² ai ma na hinorjahon nasiam hinan mangihutkon panorang ni dunia on, mangihutkon rosuh ni na markuasa i awang-awang ai, ai ma tonduy na marhorja nuan ibagas jolma na so siat hata. ³ Raphon sidea do hinan age hita haganup manghorjahon hisap-hisap ni dagingta, ai ma ibagas na ipaihut-ihut hita sura-sura ni daging in hinan ampa rosuh-rosuhni; jadi jolma sigilaan do hita humbani biakta hinan, songon na legan ai. ⁴ Tapi Naibata, na bayak bani idop ni uhur, halani holongNi na banggal in banta, ⁵ ipagoluh do hita raphon Kristus, sagala na dob matei ibagas panlanggaron (halani idop ni uhur do, ase maluah nasiam). ⁶ Anjaha rap pakon Kristus Jesus do hita ipapuho, anjaha ipabangkit do hita hu gomgoman nagori atas ibagas Kristus Jesus, ⁷ ase ipatuduhkon bani panorang na sihol roh ope, surung ni habayakonNi marhitei banggal ni habasaronni banta ibagas Kristus Jesus. ⁸ Ai humbani idop ni uhur do ase maluah nasiam, marhitei haporsayaon; sedo binahen nasiam, sibere-bere ni Naibata do. ⁹ Sedo humbani horja, ase ulang adong na mamuji diri. ¹⁰ Ai jadi-jadianNi do hita, na tinompa ibagas Kristus Jesus, bani horja na madear; hujai do hita ipasirsir Naibata hinan, ase ibagas ai hita marparlahou. ¹¹ Halani ai, nasiam sipajuh begu-begu hinan ibagas pardagingon, nasiam "na so siparsunat" igoran halak siparsunat ibagas daging marhitei tangan, ingat nasiam ma: ¹² Ijia sirang do nasiam humbani Kristus; idarat ni warga Israel do nasiam, seng marulih bani padan bagah-bagah, seng marpangarapan, anjaha seng adong Naibata bani nasiam i tanoh on. ¹³ Tapi anggo sonari, ibagas Kristus Jesus do nasiam; anjaha daoh pe nasiam ijia, gabe ipadohor daroh ni Kristus do nasiam sonari. ¹⁴ Ai Ia do pardameian banta, na pasadahon na dua ai, anjaha na parsedahon dingding bolat-bolat ai, ai ma hamunsuhon ai. ¹⁵ Ai ibagas dagingNi do iparseda titah in rap pakon tonah-tonah ampa aturan-aturanNi, ase itompah ibagas diriNi na dua ai, gabe sada jolma na baru, bani na pinajongjongNi damei. ¹⁶ Anjaha ipadear do na dua ai ibagas angkula na sada ai bani Naibata marhitei silang ai; ai ijai do ibunuh hamunsuhon ai. ¹⁷ Dob roh Ia, ibaritahon do damei bani nasiam na daoh, damei homa bani na dohor. ¹⁸ Ai marhiteihonSi adong do dalan marayak Bapa in, banta haduasi ibagas sada Tonduy. ¹⁹ Ase lang be panginsolat atap partoloh nasiam, tapi hasoman saharajaon ni halak na mapansing do, anjaha hasoman sarumah ni Naibata. ²⁰ Ipauli do nasiam iatas ni onjolan ni apostel ampa nabi; Kristus Jesus sandiri do batu parsuhi ijin. ²¹ Ibagas Ia do mardomu ganup rumah in anjaha lambin banggalni, gabe rumah panumbahan na mapansing ibagas Tuhan in. ²² Ibagas Ia do homa nasiam ipauli-uli, gabe ianan ni Naibata ibagas Tonduy in.

¹ Halani ai, ahu si Paulus, na tarrantei halani Kristus Jesus, halani nasiam sipajuh begu-begu. ² Tontu domma ibogei nasiam pasal jabatan mandalankon idop ni uhur ni Naibata, na dob pinadasni ai hubakku, laho paturei-tureihon nasiam. ³ Marhitei pangungkabon do ipabotohkon bakku rusia ai, songon na dob husuratkon hinan otik pasal ai. ⁴ Bani na mambasa ai, boi ma botohon nasiam sonaha pangarusionku bani rusia ni Kristus. ⁵ Seng ipabotohkon ope ai bani anak ni jolma bani sundut sapari, tapi domma ipatalar ai nuan bani apostelNi na pansing in ampa nabi-nabiNi, ibagas Tonduy, ⁶ paboa dihut halak sipajuh begu-begu hasoman panean anjaha hasoman saangkula anjaha hasoman parrupei bani bagah-bagah na ibagas Kristus Jesus, marhitei Ambilan Namadear in. ⁷ Na dob gabe siparugas ni ai do ahu, domu hubani idop ni uhur na binere ni Naibata hubakku, domu hubani pangkorhon ni hagogohon ni ai. ⁸ Hubakku, sietekan humbani haganup halak na mapansing in, ibere idop ni uhur on, ai ma mangambilankon bani sipajuh begu-begu habayakon ni Kristus, na so tardadap in, ⁹ anjaha patorangkon sonaha dalan parsaud ni rusia ai, na ponop humbani mulani ibagas Naibata, Sitompa haganup, ¹⁰ ase ipatandahon ma sonari, marhitei kuria in, buei ni masam ni hapentaron ni Naibata bani sipanrajai anjaha na markuasa i nagori atas, ¹¹ domu hubani na sinurahon-Ni humbani mula ni mulani, gabe ipasaud ibagas Kristus Jesus, Tuhanta in. ¹² MarhiteihonSi jumpah hita do hinsah ni uhur ampa dalan masuk ibagas tenger ni uhur halani haporsayaon Bani. ¹³ Halani ai, hupindo ma bani nasiam, ase ulang mandolei nasiam mangidah sitarononku, na manghopkop nasiam, ai hasangapon nasiam do in. ¹⁴ Halani ai, manrogop do ahu i lobei ni Bapa in. ¹⁵ Marpanggorani hu-Bani do sagala bapa ni bangsa-bangsa, na i nagori atas age nai tanoh on, ¹⁶ ase, domu hubani habayakon ni hasangaponNi in, ibere gogoh ampa kuasa marhitei TonduyNi bani jolma parbagas nasiam, ¹⁷ ase marianan Kristus marhitei haporsayaon ibagas uhur nasiam, gabe totap nasiam marurat anjaha maronjolan bani holong, ¹⁸ ase boi nasiam rap pakon haganup halak na pansing in mangarusi sonaha ganjangni ampa bolagni, bagasni ampa gijangni, ¹⁹ anjaha mananda holong ni uhur ni Kristus, na mangatasi sagala pangarusion, ase das ma bani nasiam haganup hagogok ni Naibata. ²⁰ Tapi tarbahen-Si do lobih humbani na pinindonta barang na piningkiranta, domu hubani hagogohon na marhorja ibagas hita. ²¹ Bani ma hasangapon ibagas kuria in ampa ibagas Kristus marsundut-sundut ronsi sadokah ni dokahni Amen.

¹ Ase ahu, na tarsangkut halani Tuhan in, huelek-elek ma nasiam: Parlahouhon nasiam ma na talup, domu hubani pandiloon na dob das bani nasiam! ² Martoruh ni uhur botul ma, marlamlam anjaha marlumbang ni uhur, marsianjuan ma nasiam ibagas uhur na holong! ³ Haporluhon nasiam ma manramothon hasadaon ni tonduy, marhitei panrahut ni damei. ⁴ Sada daging anjaha sada tonduy, songon nasiam na tardilo ibagas sada pangarapan bani pandiloon ai, ⁵ sada Tuhan, sada haporsayaon, sada pandidion, ⁶ sada Naibata, ai ma Bapa ni haganup, sigomgomi haganup, sitorusi haganup ampa siiani haganup. ⁷ Tapi bani ganup do hita ibere idop ni uhur ai domu hubani ukuran ni pambere ni Kristus. ⁸ Ai do ase nini: Naik do Ia hu atas, iboan raphon-Si na tartaban; ibere do sibere-bere bani jolma. ⁹ Tapi naik ma Ia, ai lang mararti ma ai, paboa na dob tuad do Ia lobei hubani ianan na itoruh ni tanoh? ¹⁰ Ia, na dob tuad ai, lanjar Ia do na naik huatas ni haganup nagori atas, ase igoki haganup. ¹¹ Lanjar Ia do mambere deba gabe apostel, deba nabi, deba evangelis, deba use parmahan ampa pangajari, ¹² laho pasirsirhon na mapansing in bani horja diakoni, laho pauli-ulihon daging ni Kristus in, ¹³ ase das hita haganup hu hasadaon ni haporsayaon ampa habotohon bani Anak ni Naibata, gabe jolma na gok, matoras anjaha gok songon Kristus, ¹⁴ ase ulang be hita danak, na pinalindak-lindak anjaha na binoanboan ni ganup logou ni ajaran, marhitei horja akal-akal ni jolma, marhitei sipaoto-oto na laho pakahouhon. ¹⁵ Gabe parhasintongan hita tene ibagas holong, anjaha lambin magodang ibagas haganup, mangayaki Ia, Ulu in, in ma Kristus. ¹⁶ Hum-Bani do haganup angkula in ipadomu anjaha iparapat, marhitei ganup urat-urat pangurupi, gabe lambin magodang daging in domu hubani horja ni ganup pagori bani bagianni bei, pinauli-uli ibagas holong. ¹⁷ On do hatangku anjaha husaksihon ibagas Tuhan in: Ulang ma nasiam marparlahou songon halak sipajuh begu-begu, na mangihutkon pingkiran sisoya-soya. ¹⁸ Paruhur na golap do sidea, holang humbani goluh ni Naibata, halani haotoon ni uhur ni sidea, pakon halani mapir ni uhur ni sidea. ¹⁹ Lang be ibotoh sidea na maila, gabe iondoskon ma dirini hubani na marpoya-poya anjaha ihorjahon sagala habutakon marhasoman uhur haut. ²⁰ Tapi anggo nasiam, seng sonai iguruhon nasiam pasal Kristus. ²¹ Ai Lang domma ibogei nasiam baritaNi, anjaha iajarhon pasal-Si domu hubani hasintongan na adong ibagas Jesus? ²² Tanggali nasiam ma jolma na buruk in, ai ma parlahou sisapari ai, ai laho magou do in hinorhon ni hisap-hisap sipaoto-oto. ²³ Anjaha gabe bayu ma nasiam ibagas tonduy ni uhur nasiam ²⁴ Anjaha pakei nasiam ma jolma na baru, na tinompa usih hubani Naibata, ibagas hapintoran ampa hapansingon na botul. ²⁵ Halani ai ambukkon nasiam ma ladung in anjaha hatahon nasiam ma na sintong, ganup dompak hasomanni jolma, ai pagori do hita samah hita. ²⁶ Anggo manggila nasiam ulang ma mardousa! Ulang ma sundut mataniari, lang mintop ringis nasiam. ²⁷ Ulang ma pasiat nasiam sibolis in! ²⁸ Sipanangko hinan, ulang be manangko, tapi ra ma ia loja, anjaha ihorjahon tanganni ma na madear, ase adong siberehononni bani na hurangan. ²⁹ Ulang ma luar hata na mabutak humbani pamangan nasiam, tapi na madear ma, na boi pauli-ulihon na hurang, ase dapotan ulih, na mambogeisi. ³⁰ Anjaha ulang ma pusoki nasiam Tonduy Napansing ni Naibata, na dob tinokanhon bani nasiam bani ari haluahon in. ³¹ Sagala riting ni uhur, gila, marah, sorgang-sorgang, panrisaon ampa sagala hajahaton, sai ipadaoh ma humbani nasiam. ³² Tapi basar ma nasiam samah nasiam, paridop ni uhur, anjaha sirsir marsisasapan dousa, songon panasap ni Naibata bani dousa nasiam ibagas Kristus.

¹ Ai pe, sitiru Naibata ma nasiam, songon anak na hinaholongan! ² Anjaha marparlahou ma nasiam ibagas haholongan, songon Kristus na manghaholongi nasiam, anjaha ibere do dirini manghophop hita, gabe siluah ampa galangan bani Naibata, gabe uap na misbou. ³ Tapi parriah-riahon ampa bagei ni habutakon atap uhur haut pe, ulang ma tarsobut bani nasiam, songon na patut bani halak na pansing. ⁴ Sonai homa sihamelahononkon, hata sumsam, atap huria-huria na so patut, tapi sidearan ma sahap tarima kasih. ⁵ Ai botoh anjaha ingat nasiam ma: Anggo bani harajaon ni Kristus ampa Naibata, seng dong siteanon ni siparriah-riah, barang halak na mabutak, barang paruhur haut, ai sibalosi na so Naibata do in. ⁶ Ulang ma ra nasiam paoto-otoon ni atap ise pe marhitei hata-hata na lumei, ai halani ai do mangonai ringis ni Naibata bani halak na so mambalosi. ⁷ Halani ai, ulang ma nasiam ra marhasomanhon sidea! ⁸ Ai golap hinan do nasiam, tapi sonari lihar do nasiam ibagas Tuhan in; marparlahou ma nasiam songon anak haliharon; ⁹ ai buah-buah ni haliharon ai ma sagala halayakon, hapintoran ampa hasintongan. ¹⁰ Paruhurhon nasiam ma, atap aha do harosuh ni Tuhan in! ¹¹ Ulang ma saor nasiam bani horja hagolapon, na so adong buahni, tapi patalar nasiam ma ai rahanan. ¹² Ai gari manarsingati na hinorjahon ni sidea ibagas na ponop, hamelaon do ai. ¹³ Tapi maningon talar do ai, haganup, pinatalar ni haliharon in, ai sagala na pinatalar, lihar ma ai. ¹⁴ Halani ai, nini do: Puho ma ho na modom in, anjaha puho ma humbani na matei, gabe sondangan ni Kristus ma ho. ¹⁵ Halani ai paruhurhon ma, sonaha patut parlahou nasiam, ulang ma songon halak na so maruhur, tapi songon halak siparuhur ma, ¹⁶ pangkei manggunahon panorang, ai ari hasunsahan do nuan. ¹⁷ Halani ai ulang ma maoto nasiam, tapi arusi nasiam ma, atap aha harosuh ni Tuhan in. ¹⁸ Anjaha ulang ma mabuk nasiam halani anggur, ai hamagouan do ibagas ai, tapi gok Tonduy ma nasiam! ¹⁹ Marsahap ma nasiam samah nasiam marhitei doding Psalm, doding puji-pujian ampa doding partonduyon, dodingkon anjaha puji nasiam ma Tuhan in ibagas uhur nasiam! ²⁰ Tongtong ma nasiam mangkatahon tarima kasih halani haganup bani Naibata Bapa, ibagas goran ni Tuhanta Jesus Kristus! ²¹ Marsibalosan ma nasiam, ibagas biar mangidah Kristus! ²² Nasiam parinangon, balosi nasiam ma paramangon nasiam, songon pambalosi nasiam bani Tuhan in. ²³ Ai paramangon in do ulu ni parinangonni, songon Kristus ulu ni kuria in, sipaluah angkula, (kuria in). ²⁴ Songon pambalosi ni kuria in bani Kristus, sonai ma pambalosi parinangon bani paramangonni ibagas haganup. ²⁵ Nasiam paramangon, haholongi nasiam ma parinangon nasiam, songon Kristus na manghaholongi kuria in anjaha ibere diriNi manghophopsi, ²⁶ ase ipapansing in, marhitei na ipaborsih marhitei na mandidihon bah ibagas Hata in, ²⁷ ase Ia sandiri pasirsir Kuria in Bani, sangap, seng martikas, seng marringut barang marhahurangan atap aha pe, tapi ase pansing tene anjaha seng dong sihataon. ²⁸ Sonai do patut haholongan ni paramangon parinangonni bei, songon angkulani sandiri. Na mangkaholongi parinangonni, dirini do hinaholonganni ijai. ²⁹ Seng ongga isogami jolma daging ni, tapi iparmudu-mudu anjaha isarihon do ai, songon pambahen ni Kristus bani kuria in, ³⁰ ai pagori ni angkulani do hita. ³¹ Halani ai tadingkonon ni halak do bapani ampa inangni, laho mangkasomani parinangonni, anjaha gabe sada daging do sidea na dua ai. ³² Ia rusia on banggal do; tapi bani Kristus ampa kuria in do hulimbagahon in. ³³ Ase ganup ma nasiam marsihaholongi parinangonni bei songon dirini sandiri, anjaha parinangon pe ihabiari ma paramangonni.

¹ Nasiam dakdanak, balosi nasiam ma namatoras nasiam ibagas Tuhan in, ai in do na pintor. ² "Pasangap bapamu pakon inangmu!" in do titah na parlobei marhasoman bagah-bagah, ³ ai ma, "ase martuah ho anjaha dokah manggoluh i tanoh on!" ⁴ Nasiam bapa, ulang pasoru-soru nasiam dakdanak nasiam; pagodang-godang nasiam ma sidea ibagas ajar ampa podah ni Tuhan in! ⁵ Anjaha nasiam jabolon, balosi nasiam ma kopala nasiam na i tanoh on, marhasoman biar ampa gobir, ibagas bujur ni uhur, songon bani Kristus. ⁶ Ulang ma pambalosi sanggah iidah tuan nasiam tumang, songon na mambuat-buat uhur ni jolma, tapi songon jabolon ni Kristus ma horjahon nasiam rosuh ni Naibata, humbani gok ni uhur nasiam. ⁷ Humbani bujur ni uhur ma nasiam mambalosi, songon bani Tuhan in, sedo bani jolma. ⁸ Ai ibotoh nasiam do, suang do jaloon ni ganup humbani Tuhan in, anggo adong na madear na hinorjahonni, barang jabolon ia atap jolma na bebas pe. ⁹ Anjaha nasiam kopala-kopala, sonai ma bahen nasiam bani sidea, anjaha parontihon nasiam ma na sorgang-sorgang in, ai ibotoh nasiam do, i nagori atas do Tuhan ni sidea ampa Tuhan nasiam, anjaha seng siidah bohi Ia. ¹⁰ Ambahni ai, Lambin margogoh ma nasiam ibagas Tuhan in ampa ibagas gogoh ni kuasaNi in. ¹¹ Pakei nasiam ma pakeian sinjata na humbani Naibata, ase boi tahan nasiam dompak akal-akal ni sibolis in. ¹² Ai seng maruntol hita manlawan daroh pakon daging, tapi dompak sipanrajai do, siparkuasa, sigomgomi dunia hagolapan on, tonduy hajahaton na i awang-awang ai. ¹³ Halani ai, jalo nasiam ma pakeian sinjata na humbani Naibata, ase tarbahen nasiam manlawan bani ari na jahat ai, anjaha totap jongjong, dob italuhon nasiam ganupan in. ¹⁴ Ase, jongjong ma nasiam, margondit hasintongan bani binongei nasiam, marbaju bosi hapintoran, ¹⁵ anjaha nahei marsipatu ringgas ni uhur, laho mangambilankon Ambilan Namadear, pardameian in. ¹⁶ Ambah ni ganupan in, jalo nasiam ma gantar haporsayaon in, ai tarintopi nasiam do marhitei in haganup panah apuy ni parjahat in. ¹⁷ Jalo nasiam ma homa tangkuluk bosi haluahon ampa podang ni tonduy, ai ma hata ni Naibata. ¹⁸ Martonggo ma nasiam barang sadihari pe ibagas Tonduy in, ibagas tonggo ampa elek-elek, anjaha puho ampa golgol manonggohon haganup halak na susi in, ¹⁹ age ahu pe, ase ibere bakku hatani, anjaha iungkab pamanganku laho pabotohkon rusia ni Ambilan Namadear in marhasoman hinsah ni uhur, ²⁰ (halani in do ase marhorja ahu songon suruhan na tarrantei), ase marhinsah ni uhur ahu manghatahonsi, songon na patut. ²¹ Tapi, ase ibotoh nasiam na masa bakku ampa horjangku, patugahon ni si Tikikus do bani nasiam ganupan in, ai ia do sanina na hinaholongan anjaha siparugas hatengeran ni uhur ibagas Tuhan in. ²² Halani in do ase husuruh ia marayak nasiam, ase boi botohon nasiam na masa bannami, anjaha ase iapohi uhur nasiam. ²³ Damei ma bani sagala sanina ampa holong raphon haporsayaon humbani Naibata Bapa in ampa humbani Jesus Kristus. ²⁴ Idop ni uhur ma manghasomani haganup, na marholong ni uhur bani Tuhanta Jesus Kristus, na totap sadokah ni dokahni.