KOLOSSE

KOLOSSE

¹ Humbani si Paulus, apostel ni Kristus Jesus Marhitei rosuh ni Naibata, ampa si Timoteus sanina in, ² marayak halak na mapansing na i Kolosse ampa sanina na porsaya bani Kristus in: Idop ni uhur ma bani nasiam ampa damei humbani Naibata, Bapanta in. ³ Mangkatahon tarima kasih do hanami tongtong bani Naibata, Bapa ni Tuhanta Jesus Kristus, ibagas tonggonami bani nasiam, ⁴ ai ibogei hanami do pasal haporsayaon nasiam bani Kristus Jesus ampa holong ni uhur nasiam dompak haganup halak na mapansing in, ⁵ halani pangarapan, na dob pinasirsir bani nasiam i nagori atas. Domma ibogei nasiam hinan pasal in marhitei hata hasintongan in, in ma Ambilan Namadear in. ⁶ In ma na dob adong bani nasiam, age i sab dunia on; na marbuah do in anjaha lambin marbanggal, songon na bani nasiam, mulai humbani panorang, dob ibogei nasiam anjaha itanda nasiam idop ni uhur ni Naibata ibagas hasintongan. ⁷ Sonin do iguruhon nasiam humbani si Epapras, hasomannami juak-juak, na hinaholongan, ia do parugas hatengeran ni Kristus manghopkop nasiam, ⁸ anjaha ia do patugahkon bannami holong ni uhur nasiam ibagas Tonduy. ⁹ Halani ai, mulai humbani panorang dob ibogei hanami in, seng maronti hanami manonggohon nasiam anjaha mangindo, ase igoki bani nasiam panandaion pasal rosuh ni uhurni, marhasoman sagala hapentaran ampa pangarusion partonduyon, ¹⁰ ase marparlahou na talup nasiam bani Tuhan in, gabe harosuh tumang Bani, marbuah nasiam bani sagala horja na madear, anjaha martambah bani nasiam panandaion pasal Naibata, ¹¹ gabe ipargogohi tumang nasiam domu hubani gogoh ni hasangaponni in, mangkorhon hasabaron ampa hatahanon marhasoman malas ni uhur; ¹² martarima kasih bani Naibata, na dob pataluphon nasiam marparbagianan bani siteanon ni halak na mapansing ibagas haliharon. ¹³ Ia do, na paluahkon hita humbani kuasa ni hagolapan, anjaha ipapindah do hita hu bagas harajaon ni Anak, na hinaholongan ni uhurNi in. ¹⁴ Ibagas Ia do adong banta haluahon, ai ma hasasapan ni dousa. ¹⁵ Anjaha Ia do usihan ni Naibata na so taridah in, na parlobei tubuh humbani sagala na tinompa, ¹⁶ ai marhiteihonsi do itompa haganup, na i nagori atas ampa na i tanoh on, na taridah pakon na so taridah, atap paratas pe ai atap harajaon atap gomgoman atap kuasa. Haganupan ai itompa marhiteihonsi anjaha marhadoban hu-Bani. ¹⁷ Parlobei do Ia humbani haganup, anjaha ganupan in marhiteihonSi do torus adong. ¹⁸ Ia do ulu ni badan in, in ma kuria in. Ia do parmulaan, na parlobei tubuh humbani na matei, ase Ia na parlobei bani haganup. ¹⁹ Ai ibagas Ia do itontuhon Naibata, marianan hagogokNi in, ²⁰ anjaha padear haganup marhiteihonSi bani diriNi, na i tanoh on age na i nagori atas, dob ipajongjong damei marhitei darohni na madurus in bani hayu pinarsilang. ²¹ Anjaha nasiam na daoh hinan anjaha munsuh marhitei paruhuron ampa horja hajahaton, ²² ipadear Jesus nuan ibagas daging hajolmaonNi, marhitei parmateiNi, laho pajongjongkon nasiam ase pansing, lang dong sihataon anjaha sipinsangon i lobeiNi. ²³ Asal ma marianan nasiam jonam, anjaha toguh ibagas haporsayaon, anjaha lang ra mosor humbani pangarapan na binogei nasiam ibagas Ambilan Namadear, na binaritahon bani haganup na tinompa, na itoruh ni langit, anjaha ahu, si Paulus do gabe siparugas bani in. ²⁴ Malas do uhurhu nuan ibagas sitaronon manghophop nasiam, anjaha ibagas dagingku hugoki na so jumpah ope bani na tinaron ni Kristus, laho manghophop angkulani, in ma kuria in. ²⁵ Na dob gabe siparugas ni in do ahu, domu hubani jabatan, na pinadas ni Naibata bakku halani nasiam, laho padaskon hata ni Naibata, ²⁶ in ma rusia in, na ponop marabad-abad ampa marsundut-sundut; tapi sonari ipatalar do bani halak na mapansingni in. ²⁷ Hubani sidea do pabotohkonon ni Naibata surung ni hamuliaon ni rusia on, i tongah-tongah ni sipajuh begu-begu, ai ma: Kristus ibagas nasiam, pangarapan in bani hasangapon. ²⁸ Ia do ibaritahon hanami; ipaingat anjaha iajari hanami do sagala jolma pasal sagala hapentaron, laho pajongjongkon ganup jolma gokan dear ibagas Kristus. ²⁹ Halani in do ase loja anjaha maruntol ahu, domu hubani hagogohonNi na marhorja gogoh ibahen ibagas ahu.

¹ Tapi ipangindo uhurhu do, ase ibotoh nasiam, sonaha banggal ni halojaonku manghophop nasiam ampa sidea na i Laodikea, ampa haganup, na so ongga mangidah bohingku ope, ² ase tarapoh uhur ni sidea, ase marpardomuan ibagas holong, ase bayak bani pangarusion na gok, anjaha ase itandai sidea pasal rusia ni Naibata, in ma Kristus in. ³ Ibagas Ia do ponop sagala arta na marisi hapentaran ampa habotohon. ⁴ Huhatahon pe in, ase ulang adong na mangoto-otoi nasiam marhitei pandei ni parsahap. ⁵ Ai padaoh-daoh pe ibagas pardagingon, rap pakon nasiam do ahu ibagas tonduy, marmalas ni uhur mangidah partorsani bani nasiam ampa partotap ni haporsayaon nasiam bani Kristus. ⁶ Ai pe, songon panjalo nasiam bani Kristus Jesus, Tuhan in, sonai ma marparlahou nasiam ibagas Ia, ⁷ marurat anjaha ipauli-uli ibagas Ia, jonam marhaporsayaon, songon na dob niajarhon bani nasiam, anjaha lambin martarima kasih. ⁸ Jaga ma nasiam, ase ulang adong halak na mangagou nasiam marhitei hapentaron dunia ampa sipaoto-oto na lumei, na maronjolan bani tonah-tonah ni jolma, bani kuasa ni unsur-unsur dunia on, seng bani Kristus. ⁹ Ai ibagas Ia do marianan haganup hagogok ni hanaibataon marrupahon angkula, ¹⁰ anjaha ibagas Ia do gabe gok nasiam; Ia do kopala ni sagala pamarentahan ampa kuasa. ¹¹ Lanjar ibagas Ia do nasiam tarsunat, sedo binahen ni tangan, ai ma mananggalhon daging pardousaon, marhitei parsunaton na ibagas Kristus. ¹² Ai tartanom do nasiam rap pakonSi ibagas pandidion in, anjaha ibagas ai do homa nasiam ipapuho rap pakonSi marhitei haporsayaon bani hagogohon ni Naibata, na papuhohonSi humbani hamateian. ¹³ Ase nasiam, na matei hinan ibagas panlanggaron ampa ibagas daging na so tarsunat in, rap pakonSi do nasiam ipapuho, dob isasap sagala panlanggaronta, ¹⁴ marhitei na isasap surat utang dompak hita, ai ma paraturan na mangimbang hita, anjaha ipadaoh do ai hun tongah-tongahta, ipakuhon bani silang ai. ¹⁵ Irampas do sinjata humbani siparkuasa ampa sipargogoh; talar do ipatontonkon sidea, marhamonangan do Ia dompak sidea. ¹⁶ Ai pe, ulang ma iuhumi halak nasiam halani sipanganon ampa siinumon barang halani pesta barang poltak ni bulan barang halani ari Sabat pe. ¹⁷ Halinoh ni na sihol roh ai do in, tapi Kristus do anggo badanni. ¹⁸ Ulang ma ra nasiam rampason pasal upah hamonangan nasiam marhitei halak, na mangkarosuhkon parnalangon diri ampa parsombahon bani malekat, na mangunsagah bani na niidahni ibagas alatan ni tonduyni, na pabanggal-banggal diri, lang maralasan, marhitei pingkiran pardagingon, ¹⁹ tapi lang totap marsijoloman bani ulu in, ai ma na mansarihon angkula in anjaha padomuhon marhitei urat-urat ampa ringring, gabe marbanggal domu hubani ranggian ni Naibata. ²⁰ Anggo domma matei nasiam rap pakon Kristus dompak kuasa unsur-unsur ni dunia on, mase ma ra nasiam paksaon marhitei paraturan-paraturan, songon halak na manggoluh i dunia on: ²¹ Ulang jamah on, ulang pangan, ulang giut! ²² Haganupan ai magou do anggo domma hona pakei. Titah ampa podah-podah ni jolma tumang do ai. ²³ Tongon, songon na marisi hapentaran do ai idahon, ai ionjolhon do hadaulaton, na marnalangkon diri, na mangarsik-arsik angkula; tapi seng na marguna ai manlawan hisap ni daging.

¹ Ase anggo domma ipapuho nasiam rap pakon Kristus, pindahi nasiam ma na i atas ai; ijai do Kristus hundul i siamun ni Naibata. ² Na i babou ai ma paruhurhon nasiam, ulang ma na i atas tanoh on. ³ Ai domma matei nasiam, anjaha ponop do goluh nasiam rap pakon Kristus ibagas Naibata. ⁴ Tapi, anggo talar ma Kristus, hagoluhanta in, ijai ma talar age nasiam rap pakonSi ibagas hasangapon. ⁵ Ai pe, bunuh nasiam ma pagori nasiam, na i tanoh on: Parriah-riahon, habutakon, hisap-hisap, sura-sura jahat ampa uhur haut, ai ma parnaibataon na legan, ⁶ ai halani ai do roh ringis ni Naibata. ⁷ Anjaha ai do idalankon nasiam hinan, sanggah ibagas ai ope goluh nasiam. ⁸ Tapi sonari, ambukkon nasiam ma haganupan in: Ringis, gila hajahaton, panrisaon ampa hata sumsam humbani pamangan nasiam. ⁹ Ulang ma marsiladungan nasiam, ai domma itanggali nasiam jolma na buruk in rap pakon pambahenanni, ¹⁰ anjaha domma ipakei nasiam na baru in, na pinabaru domu hubani rupa ni na manompasi, ase marpangarusion. ¹¹ Ijai seng dong ubah ni halak Gorik atap halak Jahudi, na marsunat atap na so marsunat, bangsa na legan atap na so maju, jabolon atap halak na bebas, ai Kristus do haganup ibagas haganup. ¹² Ai pe, nasiam na dob pinilih ni Naibata, na mapansing anjaha na hinaholongan, pakei nasiam ma biak paridop ni uhuran, habasaron, toruh ni uhur, halamlamon, ampa lumbang ni uhur, ¹³ marsianju-anjuan anjaha marsisasapan dousa, anggo marpanghurangi uhur ni na sada dompak hasomanni; songon na dob isasap Kristus dousa nasiam, sonai ma homa nasiam marsisasapan. ¹⁴ I atas ni ganupan ai dalankon nasiam ma holong, ai in do rahut-rahut ni sagala hadearon. ¹⁵ Anjaha damei ni Kristus ma manrajai ibagas uhur nasiam, ai hujin do nasiam tardilo gabe sada angkula. Gabe sipartarima kasih ma nasiam. ¹⁶ Gugun ma hata ni Kristus marianan i tongah-tongah nasiam; marhasoman gok hapentaron ma nasiam marsiajaran anjaha marsipaingatan marhitei doding Psalm, doding puji-pujian ampa doding partonduyon; dodingkon nasiam ma Naibata ibagas uhur nasiam maruhur tarima kasih. ¹⁷ Anjaha sagala horja nasiam, marhitei hata atap pambahenan, horjahon nasiam ma haganup in ibagas goran ni Tuhan Jesus, anjaha martarima kasih bani Naibata, Bapa in, marhiteihonsi. ¹⁸ Nasiam parinangon, balosi nasiam ma paramangon nasiam, songon na talup ibagas Tuhan in. ¹⁹ Nasiam paramangon, haholongi nasiam ma parinangon nasiam, anjaha ulang ma kasar dompak sidea. ²⁰ Nasiam dakdanak, balosi nasiam ma namatoras nasiam ibagas haganup, ai in do rosuh ni Tuhan in. ²¹ Nasiam bapa, ulang ma makorastu nasiam dompak niombah nasiam, ase ulang mandolei sidea. ²² Nasiam jabolon, balosi nasiam ma tuan nasiam na i tanoh on ibagas haganup; ulang ma pambalosi bani mata nasiam, songon na mambuat uhur ni jolma, humbani bulus ni uhur ma, halani biar bani Tuhan in! ²³ Humbani gok ni uhur ma horjahon nasiam sagala horja nasiam, songon na bani Tuhan in, sedo bani jolma, ²⁴ ai ibotoh nasiam, jaloon nasiam do humbani Tuhan in siteanon ai balos ni in; sibalosi Kristus Tuhan in ma nasiam. ²⁵ Ai na mangkorjahon hagedukon, jaloonni do pambalason bani hagedukon, na hinorjahonni ai, ai seng dong na martonggor jumbak ijai.

¹ Nasiam tuan-tuan, bahen nasiam ma na pintor ampa na patut bani jabolon nasiam, ingat nasiam: Adong do homa bani nasiam Tuhan i nagori atas. ² Tongtong ma nasiam martonggo, anjaha puho ma pasal ai marhasoman tarima kasih. ³ Tonggohon nasiam ma homa hanami, ase ibere Naibata labah na ungkab bannami mangambilankon hata in, mangkatahon rusia pasal Kristus, ai halani in do ahu targari, ⁴ ase hupatalar in, songon na patut pangkatahonku. ⁵ Marpantas ni uhur ma nasiam marparlahou dompak halak na i darat; pargunahon nasiam ma panorang. ⁶ Sai tongtong ma jenges hata nasiam, songon na ginaraman, ase ibotoh nasiam, sonaha patut marbalos bani ganup halak. ⁷ Patugahon ni si Tikikus do bani nasiam haganup na masa bakku; sanina na hinaholongan do ia, siparugas na bujur, anjaha hasoman sahorja ibagas Tuhan in. ⁸ Husuruh do ia bani nasiam, ase ibotoh nasiam na masa bannami, anjaha ase iapoh uhur nasiam. ⁹ Dihut do homa si Onesimus, sanina na hinaholongan, na bujur in, ai ma na humbani nasiam on ai. Patugahon ni sidea ma bani nasiam sagala na masa bannami. ¹⁰ Manongos tabi do bani nasiam si Aristarkus, hasomanku tartutup, ampa si Markus, panogolan ni si Barnabas. Domma ijalo nasiam hata pasalsi, ase anggo roh ma ia bani nasiam, jalo nasiam ma ia. ¹¹ Sonai homa si Jesus, na margoran si Justus. Pitah sidea do humbani halak Jahudi hasomanku sahorja ibagas harajaon ni Naibata; na gabe apoh-apoh do sidea bakku. ¹² Manongos tabi do bani nasiam si Epapras, na roh humbani nasiam on, juak-juak ni Kristus Jesus; tongtong do ia maruntol manonggohon nasiam, ase gokan dear nasiam jongjong anjaha atok ibagas haganup, na hinarosuhkon ni Naibata. ¹³ Ahu ma manaksihon pasalsi, paboa buei tumang do halojaonni manghophop nasiam ampa hasoman na i Laodikea pakon na i Hierapolis. ¹⁴ Manongos tabi do bani nasiam si Lukas, doktor in. ¹⁵ Padas nasiam ma tabingku bani sanina na i Laodikea ampa bani si Nimpas ampa bani kuria na martumpu i rumahni. ¹⁶ Dob ibasa surat on i tongah-tongah nasiam, ibasa ma homa on i kuria Laodikea; anjaha surat na hu Laodikea ai pe basa nasiam ma homa. ¹⁷ Hatahon nasiam ma hubani si Arkippus: Jaga ma, ase tohonan na dob jinalomu ibagas Tuhan in, torsa idalankon ho in! ¹⁸ On ma tabi humbakku, si Paulus, na sinurat ni tanganku. Dingat nasiam ma ahu, na tarrantei on. Idop ni uhur ma bani nasiam.