LAHOAN NI APOSTEL

LAHOAN NI APOSTEL

¹ Bani surathu na parlobei in, ale Teopilus, husurathon do pasal haganup na binahen ampa podah na pinungkah ni Jesus, ² das ronsi na tarangkat Ia, dob lobei ibere parentah marhitei Tonduy Napansing bani apostel-apostel, na dob pinilihNi ai. ³ Dob salpu hamarsikon na tinaronNi ai, ipataridahkon do diriNi manggoluh bani sidea marhitei buei tanda, ai ma ibagas siompatpuluh ari na pinataridahkonNi ai diriNi bani sidea, lanjar mansahapkon pasal harajaon ni Naibata. ⁴ Sanggah na rap Ia pakon sidea, iparentahkon ma bani sidea: Ulang ma laho hanima hun Jerusalem, tapi paima hanima ma na binagahkon ni Bapa, na dob ibogei hanima hum Bakku. ⁵ Ia si Johannes bah do ididihon, tapi Tonduy Napansing do didihononKu bani nasiam, seng pala piga ari nari. ⁶ Jadi sanggah na martumpu ai sidea, isungkun sidea ma Ia, nini ma: Ham Tuhan, pajongjongonMu ma sonari use harajaon in bani Israel? ⁷ Nini ma hubani sidea: Seng urusan nima ai, mambotoh adanganni atap panorangni, na dob tinontuhon ni Bapa in ibagas kuasaNi sandiri. ⁸ Tapi jaloon nima ma hagogohon ni Tonduy Napansing na sogop bennima, anjaha gabe saksingKu ma hanima i Jerusalem ampa i sab Judea ampa i Samaria ampa das hu ujung ni tanoh on. ⁹ Jadi dob ihatahon sonai, tarangkat ma Ia inonoi sidea, dob ai ilingodi hombun ma Ia humbani panonggor ni sidea. ¹⁰ Sanggah na ituludkon sidea ai Ia laho hu nagori atas, jongjong ma dua halak parhiou silopak i lambung ni sidea, ¹¹ na mangkatahon: Nasiam halak Galilea, mase ma sai jongjong nasiam kawah-kawah dompak datas? Anggo Jesus ai, na tarangkat hun lobei nasiam hu nagori atas, sonai do roh Ia, songon na niidah nasiam ai Ia naik hu nagori atas. ¹² Dob ai mulak ma sidea hu Jerusalem hun dolog ai, na margoran dolog Jetun; dohor do ai hun Jerusalem, sada pardalanan Sabat do daohni. ¹³ Dob das sidea, tangkog ma sidea hu kamar pardatas ai, ianan ni sidea ai, ai ma si Petrus ampa si Johannes, si Jakobus ampa si Andreas, si Pilippus ampa si Tomas, si Bartolomeus ampa si Mateus, si Jakobus anak ni si Alpeus, ampa si Simon Selotes, ampa si Judas anak ni si Jakobus. ¹⁴ Sidea ai do haganup na mannunut marsada ni uhur martonggo rap pakon parinangon-parinangon ampa si Maria, inang ni Jesus, sonai homa anggiNi ai. ¹⁵ Bani panorang ai ma jongjong si Petrus i tongah-tongah ni sanina-sanina ai, bueini adong do hira-hira saratus dua puluh halak, nini ma: ¹⁶ Nasiam hasoman sanina, maningon saud do hata ni Surat in, na dob nilumbahon ni Tonduy Napansing hinan marhitei pamangan ni si Daud, ai ma pasal si Judas, na gabe pambobai ni sitangkap Jesus. ¹⁷ Masuk hinan do ia hubani bilangannami, anjaha dihut do ia bani jabatan on. ¹⁸ Dapotsi do sanlambar tanoh humbani upah hajahaton ai; anjaha sanggah na tungkap ia madabuh, mapultak ma dagingni, gabe mandarat ma ganup bituhani. ¹⁹ Anjaha haganup do pangisi ni Jerusalem mambotoh ai, mambahen igoran tanoh ai ibagas sahap ni sidea: Akeldamah, artini: tanoh daroh. ²⁰ Ai tarsurat do i bagas buku Psalm: Sai halong ma iananni ai, anjaha ulang ma adong na mangiankon ai! Ambah ni ai: Jaloon ni na legan ma jabatanni! ²¹ Halani ai maningon adong do humbani sidea na mangkasomani hanami, sadokah marhujai-hujon Tuhan Jesus i tongah-tongahta, ²² olat ni pandidion ni si Johannes nari das hubani partarangkatNi ai humbanta, na gabe hasoman nami manaksihon pasal parpuhoonNi ai. ²³ Jadi ipajongjong sidea ma dua halak, ai ma si Josep, na margoran si Barsabas anjaha na ginoran homa si Justus, ampa si Matias. ²⁴ Jadi martonggo ma sidea, nini ma: Ham Tuhan, sitanda uhur ni haganup jolma, patuduh Ham ma barang ise do humbani na dua on ipilih Ham, ²⁵ gabe sijalo jabatan diakon ampa apostel, na dob tinadingkon ni si Judas, na dob laho marayak siparayakonni. ²⁶ Lanjar manjomput na sinurat ma sidea, jadi dapot ma si Matias, gabe tarhira ma ia hasoman ni apostel na sapuluh dua ai.

¹ Jadi sanggah jumpah ari Pentakosta, martumpu do sidea haganup bani sada ianan. ² Jadi roh ma sompong sora hun langit songon parombus ni logou na gogoh montas, gabe igoki ma rumah ianan ni sidea na hundul ai. ³ Jadi taridah ma bani sidea usih hubani dilah ni apuy na marjilam-jilam, anjaha sogop ma bani ganup sidea. ⁴ Gabe gok Tonduy Napansing ma sidea ganupan, jadi mamungkah marsahap na legan ma sidea ganupan, songon pambere ni Tonduy in bani sidea mansahapkonsi. ⁵ Tapi adong ma halak Jahudi na marianan i Jerusalem, ai ma halak na daulat humbani sagala bangsa na i toruh ni langit. ⁶ Sanggah na masa ai sora ai, martumpu ma na mabuei ai; jadi longang ma sidea, ai ganup do sidea mambogei hata ai ibagas sahapni bei. ⁷ Jadi malitonduy ma sidea anjaha longang, nini sidea ma: Ai lang halak Galilea do sidea haganup na marsahap in? ⁸ Mase ma ganup hita mambogei ibagas hata ni tanoh hatubuhanta bei? ⁹ Hita, halak Partia pakon Media pakon Elamit ampa na marianan i Mesopotamia, i Judea ampa Kappadosia, i Pontus ampa i Asia, ¹⁰ i Prigia, Pampilia, Masir ampa i nagori Libia na hampit Kirene, ampa halak Rom na marianan ijon, halak Jahudi ampa parguru, ¹¹ halak Kreta ampa halak Arab; ibagas hatanta bei do ibogei hita sidea mansahapkon habanggalon ni Naibata. ¹² Jadi longang ma sidea haganup, jut bei ma uhurni, nini ma samah sidea: Ai aha do artini in? ¹³ Tapi manrisai do na deba, nini ma: Na bosurtu do in bani anggur na matobu. ¹⁴ Jadi jongjong ma si Petrus rap pakon na sapuluh sada ai, ipagogoh ma sorani anjaha iparsahapkon ma sidea: Nasiam halak Jahudi ampa haganup na marianan i Jerusalem, botoh nasiam ma on, anjaha parimbagaskon nasiam ma hatangku! ¹⁵ Seng na mabuk hanami on, songon pangagan ni uhur nasiam, ai pukul siah ope ari, ¹⁶ tapi na hinatahon ni nabi Joel do na masa on, ai nini do: ¹⁷ Bani ari parpudi, nini Naibata, useihononKu do humbani TonduyHu bani sagala daging, jadi manjahai ma anak nasiam, sonai borunasiam, anjaha marnipi ma namatua nasiam. ¹⁸ Age bani jabolonKu dalahi ampa jabolonKu naboru bani panorang ai, useihononKu do humbani TonduyHu, ase manjahai sidea. ¹⁹ Anjaha bahenonKu do halongangan bani langit i babou, anjaha tanda bani tanoh i toruh, ai ma daroh apuy ampa timus na maripul. ²⁰ Mataniari ai gabe golap ma, anjaha bulan gabe daroh, parlobei ni ari parroh ni Tuhan in, na banggal anjaha na marmulia in. ²¹ Jadi sagala na mandilo Goran ni Tuhan in, maluah ma. ²² Nasiam halak Israel, tangihon nasiam ma hata on: Ia Jesus, na hun Nasaret in, in ma na dob pinatandahon ni Naibata bani nasiam marhitei hagogohon, halongangan ampa tanda, na binahen ni Naibata marhiteihonSi i tongah-tongah nasiam, songon na binotohnasiam, ²³ na dob niondoskon mangihutkon sura-sura ni Naibata na totap in ampa humbani pamotohanNi hinan, Ia do na dob iparsilangkon anjaha ibunuh nasiam marhitei tangan ni na so martitah. ²⁴ Tapi ipapuho Naibata do Ia, dob itanggali haparngiton ni hamateian, ai seng tarjolomi hamateian in Ia. ²⁵ Ai ihatahon si Daud do pasal ai: Huidah do Tuhan in tongtong i lobeihu, ai i siamunhu do Ia, ase ulang dugur ahu. ²⁶ Halani ai malas do uhurhu, anjaha marolob-olob dilahku; dagingku pe marsaran do halani pangarapan. ²⁷ Ai seng paturuton-Mu tonduyhu i nagori toruh, anjaha seng lopason-Mu na pansing-Mu mangidah hamarsikon. ²⁸ Ipabotohkon Ham do bakku dalan hagoluhan, gokan-Mu do bakku malas ni uhur i lobei-Mu. ²⁹ Nasiam sanina, huhatahon ma bani nasiam torang-torang, ia ompungta si Daud matei do anjaha hona tanom, anjaha i tongah-tongahta do tanomanni ronsi sadari on. ³⁰ Halani nabi do ia, anjaha ibotoh, na dob ibijahon Naibata do bani, pabangkiton sahalak humbani ginomparni bani paratasni, ³¹ ibagas botohni hinan domma isahapkon pasal parpuhoon ni Kristus in, ai ma na so paturuton Ia i nagori toruh, atap idahon ni dagingni hamasikon. ³² In ma Jesus, na dob pinapuho ni Naibata, haganup do hanami manaksihon ai. ³³ Dob ipagijang Ia hu siamun ni Naibata, anjaha ijalo Tonduy Napansing na pinarbagah-bagah in humbani Naibata, gabe iuseihon ma in songon na niidah anjaha ibogei nasiam. ³⁴ Ai seng si Daud naik hu nagori atas, tapi ihatahon do: Nini Tuhan in dompak Tuhanku: ³⁵ Hundul ma Ho hu siamun-Hon, paima Hubahen munsuh-Mu, gabe sidogei-dogeian bani nahei-Mu. ³⁶ Ase torang ma ibotoh haganup bangsa Israel: Ia Jesus na pinarsilangkon nasiam in, domma ipabangkit Naibata gabe Tuhan anjaha Kristus. ³⁷ Manangar ai, itorusi ma uhur ni sidea, gabe ihatahon sidea ma hubani si Petrus ampa hubani hasomanni Apostel: Aha ma sibahenonnami, nasiam hasoman! ³⁸ Ihatahon si Petrus ma hubani sidea: Paubah nasiam ma uhurnasiam, anjaha padidihon nasiam ma ganup nasiam hubagas Goran ni Jesus Kristus, bahen hasasapan ni dousanasiam, ase ijalo nasiam sibere-bere ni Tonduy Napansing. ³⁹ Ai bani nasiam do bagah-bagah in ampa bani anaknasiam ampa bani haganup halak na daoh, sidiloon ni Tuhan Naibatanta ope. ⁴⁰ Buei ope hata na legan isaksihon, laho mangojur sidea, nini do: Paluah nasiam ma diri nasiam, humbani bangsa na geduk on! ⁴¹ Jadi tardidi ma haganup na manjalo hatani ai, anjaha adong do hira-hira tolu ribu halak na tambah bani na sadari ai. ⁴² Anjaha totap do sidea bani podah ni apostel ampa ibagas parsaoran, ibagas na manopiki ruti ampa na martonggo. ⁴³ Sogop do uhur na mabiar bani haganup; buei do halongangan ampa tanda ibahen apostel ai. ⁴⁴ Sai sada do ganup na porsaya ai, anjaha parbagianan rup do ihira sidea arta ni sidea. ⁴⁵ Ijuali sidea do arta ampa barang-barang ni sidea, ibagihon ma ai bani haganup, domu hubani haporluanni bei. ⁴⁶ Anjaha ganup ari do sidea sauhur i rumah panumbahan; jojor rumah do sidea manopiki ruti, anjaha ibagas malas ni uhur ampa uhur na bulus do ijalo sidea sipanganon ai. ⁴⁷ Ipuji sidea do Naibata anjaha rosuh do uhur ni simbuei mangidah sidea. Anjaha ganup ari do itambahi Tuhan in na dapotan haluahon bani kuria ai.

¹ Jadi rap tangkog ma si Petrus ampa si Johannes hu rumah panumbahan, pukul tolu, bani panorang martonggo. ² Anjaha adong ma sada halak na repat humbani partubuhni iboan halak hujai. Siap ari do itaruhkon sidea ia hu lambung ni horbangan ni rumah panumbahan ai, na margoran Horbangan Na Jenges, laho mangindo sibere-bere humbani halak na masuk hu rumah panumbahan ai. ³ Jadi sanggah iidah halak na repat ai si Petrus ampa si Johannes sihol masuk hu rumah panumbahan ai, ipindo ma sibere-bere. ⁴ Tapi ikawahkon si Petrus ampa si Johannes ma ia, nini sidea ma: Tonggor ma dompak hanami! ⁵ Jadi ikawahkon ma sidea, iarap uhurni adong jaloonni humbani sidea atap aha. ⁶ Tapi nini si Petrus ma: Pirak pakon omas seng dong bakku, tapi na dong bakku ai ma hubere bam: Marhitei Goran ni Jesus Kristus na hun Nasaret in, mardalan ma ho! ⁷ Lanjar itangkap ma tanganni siamun, laho pajongjongkonsi, jadi mintor totap ma hae-haeni ampa towodni. ⁸ Mintor ijongjongkon ma lanjar mardalan, masuk ma ia rap pakon sidea hu rumah panumbahan ai mangentes-entes anjaha mirjak-irjak lanjar mamuji Naibata. ⁹ Iidah haganup halak na mabuei ai do ia, na mardalan anjaha na mamuji-muji ai bani Naibata. ¹⁰ Tapi ibotoh sidea do, ia do na hundul mangindo-indo i lambung ni horbangan na jenges ai; longang do sidea anjaha himong mangidah na masa bani ai. ¹¹ Tapi halani na sai odor ai ia pakon si Petrus ampa si Johannes, marurup ma roh haganup halak na mabuei ai bani sidea, bani ianan na margoran surambih ni si Salomo, halani longang ni uhur ni sidea. ¹² Mangidah ai si Petrus, nini ma dompak halak na mabuei ai: Nasiam halak Israel, mase longang uhurnasiam pasal on, mase ma sai hanami ikawahkon nasiam, songon gogohnami sandiri atap hadaulatonnami mambahen na mardalan halak on? ¹³ Na ipasangap Naibata ni si Abraham, si Isak ampa si Jakob, Naibata ni ompungta in do Jesus juak-juakni in, na iondoskon anjaha na iparsilangkon nasiam in i lobei ni si Latus, age pe paluahon do Ia namin mangihutkon timbanganni. ¹⁴ Iparnalang nasiam do Napansing anjaha Napintor in, tapi ipindo nasiam do paluahon bani nasiam pamunuh in. ¹⁵ Pambobai hu hagoluhan do ibunuh nasiam. In ma na dob ipapuho Naibata humbani na matei, anjaha hanami do saksi pasal ai. ¹⁶ Halani haporsayaon bani Goran ni Jesus do, ase ipargogohi Goran ni halak on, songon na niidah, anjaha na tinanda nasiam on; ibere haporsayaon na humbani Tuhan in do hamalumon bani i lobei nasiam haganupan. ¹⁷ Ai pe, nasiam sanina, huahap, na hurang mambotoh do nasiam, ase ihorjahon nasiam in, sonai age pangintuai nasiam. ¹⁸ Tapi na ipasaud do na dob pinatugahni hinan marhitei pamangan ni ganup nabi, ai ma: Sitaron na marsik do Kristusni. ¹⁹ Ase paubah nasiam ma uhurnasiam, anjaha mulak ma nasiam, ase tarsasap dousanasiam, ²⁰ andohar roh panorang malas ni uhur hun lobei ni Tuhan in, anjaha ase isuruh bani nasiam Jesus Kristus, songon na dob sinurahonni hinan, ²¹ ai ma na dob ijalo nagori atas lobei, paima roh panorang parsuang ni haganup, na dob hinatahon ni Naibata humbani na hinan marhitei pamangan ni nabiNi na pansing in. ²² Ai ihatahon si Musa do: Pajongjongon ni Tuhan Naibata do sada nabi humbani sanina nasiam songon ahu on, Ia do sitangihonon nasiam pasal haganup sihatahononni bani nasiam. ²³ Tapi sagala na so manangihon nabi ai, boishononkon do humbani bangsa in! ²⁴ Anjaha sagala nabi na ongga marsahap, mamungkah humbani si Samuel ampa na ipudini ai, pasal ari on do ibaritahon sidea. ²⁵ Nasiam do anak ni nabi-nabi ai anjaha parrupei bani padan na binahen ni Naibata bani ompungta, sanggah na hinatahonni ai bani si Abraham: Anjaha marhitei ginomparmai dapotan pasu-pasu do haganup bangsa na i tanoh on. ²⁶ Bani nasiam do parlobei ipapuho Naibata juak-juakNi, anjaha isuruh do ia, mamasu-masu nasiam, sagala na mulak humbani hajahatonni bei.

¹ Sanggah na marsahap ai ope sidea bani na mabuei ai, roh ma mandorab sidea malim, kopala ni rumah panumbahan ai ampa halak Sadukei, ² marah halani iajari sidea na mabuei ai, anjaha iambilankon sidea parpuhoon humbani na matei ibagas Jesus. ³ Itangkap ma sidea, anjaha ipamasuk hubagas tutupan ronsi patar ni ai, ai domma bod ari. ⁴ Tapi buei do na manangar ambilan ai, gabe porsaya, anjaha adong do bilangan ni dalahi na gabe porsaya lima ribu halak. ⁵ Patarni ai martumpu ma i Jerusalem pangintuai-pangintuai ampa sibotoh surat, ⁶ rap pakon si Hannas, sintua ni malim ai, si Kayapas, si Johannes, si Aleksander ampa haganup sindohor ni sintua ni malim ai. ⁷ Jadi ipajongjong ma sidea hu tongah-tongah anjaha isungkun ma sidea: Marhitei kuasa aha atap marhitei goran ni ise do ibahen nasiam ai? ⁸ Jadi gok Tonduy Napansing ma si Petrus, ihatahon ma bani sidea: Nasiam pambobai ampa pangintuai-pangintuai ni bangsa on. ⁹ Anggo pareksaon ma hanami sadari on, halani pambahenan na madear bani sada halak na boritan, atap marhitei aha do ia, ase malum, ¹⁰ botoh nasiam ma haganup ampa haganup bangsa Israel: Marhitei Goran ni Jesus Kristus na hun Nasaret ai do, ai ma na pinarsilangkon nasiam, tapi na pinapuho ni Naibata humbani na matei, marhitei ai do, ase jongjong halak on malum i tongah-tongah nasiam. ¹¹ Ia do in, batu na niambukkon ni nasiam tukang, na dob gabe batu parsuhi. ¹² Anjaha seng dong haluahon ibagas atap ise na legan, ai seng dong goran na legan i toruh ni langit ibere bani jolma, parhiteianta hu haluahon. ¹³ Dob iidah sidea hinsah ni uhur ni si Petrus ampa si Johannes ai, anjaha ibotoh homa, sedo halak sijamah surat sidea, tapi jolma na somal do, gabe longang ma uhur ni sidea; itanda do sidea, ai ma na rap pakon Jesus do sidea hinan. ¹⁴ Anjaha iidah sidea do homa jongjong ijai rap pakon sidea halak na dob pinamalum ai, gabe seng tarhatahon sidea be atap aha pe. ¹⁵ Ihatahon sidea ma, ase luar sidea lobei hun parrapotan ai, gabe manriah ma sidea samah sidea: ¹⁶ Aha ma sibahenonta bani halak on? Ai torang do talar na binahen ni sidea ai, ibotoh ganup parhuta Jerusalem, seng tarporsou hita. ¹⁷ Tapi, ase ulang lambin rarat ai bani halak na mabuei in, gogoh ma sidea palumba hita, ase ulang be sidea marsahap atap hubani ise pe marhitei goran ai. ¹⁸ Dob ai idilo ma sidea, anjaha ilarang ma, na so bulih be sidea marsahap atap mangajari marhitei Goran ni Jesus. ¹⁹ Tapi nini si Petrus ampa si Johannes ma mambalosi sidea: Nasiam ma manimbangi, atap na pintor ma ai i lobei ni Naibata, anggo balosan hanami bani nasiam ase bani Naibata. ²⁰ Ai seng tarbahen hanami lang mangkatahon na dob iidah ampa ibogei hanami. ²¹ Jadi dob ipalumba sidea gomos, ipaluah ma sidea, ai seng jumpah sidea dalan, laho manguhumi sidea halani na mabuei ai, ai haganup do mamuji Naibata halani na masa ai. ²² Ai lobih ma ompat puluh tahun umur ni halak na pinamalum ai marhitei tanda halongangan ai. ²³ Dob maluah sidea, laho ma sidea marayak hasoman ni sidea, anjaha ibaritahon ma bani sidea haganup, na hinatahon ni sintua ni malim ampa pangintuai ai bani sidea. ²⁴ Jadi dob ibogei sidea ai, sasora ma sidea martonggo bani Naibata, nini ma: Ham Tuhan, Ham do manjadihon langit, tanoh pakon laut ampa haganup isini! ²⁵ Ham do marsahap marhitei Tonduymu, humbani pamangan ni ompung nami si Daud, juak-juak-Mu ai, sonon: Mase oga-oga bangsa parbegu, anjaha na so marguna ipingkiri bangsa-bangsa? ²⁶ Jongjong do raja-raja ni tanoh on, anjaha martumpu do siparkuasa, laho mangimbang Tuhan in, ampa na mininakanNi? ²⁷ Ai tongon do, na dob martumpu do i huta on si Herodes, si Pontius Latus, rap pakon bangsa parbegu ampa bangsa Israel, laho mangimbang Jesus, juak-juak-Mu Napansing in, na dob mininakan-Mu in, ²⁸ laho pasaudkon, na dob tinontuhon-Mu hinan marhitei kuasa-Mu ampa sura-sura-Mu. ²⁹ Ai pe, Ham Tuhan, tonggor Ham ma asup-asup ni sidea in, anjaha bere Ham ma bani jabolon-Mu hinsah ni uhur, laho mangkatahon hata-Mu! ³⁰ Surdukkon Ham ma tangan-Mu, laho mambahen hamalumon, tanda ampa halongangan marhitei Goran ni Jesus, juak-juak-Mu Napansing in! ³¹ Jadi dob martonggo sidea, dugur ma ianan partumpuan ni sidea ai, anjaha gok Tonduy Napansing ma sidea haganup, gabe marhinsah ni uhur ma sidea mangkatahon hata ni Naibata. ³² Ia halak na porsaya na satumpuan ai sauhur do anjaha sada tonduy. Seng dong humbani sidea na mangkatahon ia sandiri simada na dong bani, tapi parbagianan rup do ai ihira. ³³ Anjaha marhagogohon banggal do apostel ai manaksihon parpuhoon ni Tuhan Jesus, anjaha igoki idop ni uhur banggal do sidea haganup. ³⁴ Ai seng dong atap ise sidea na hurangan; ai haganup siparjuma atap siparrumah, ijual do ai, anjaha iboan ma boli ni na jinual ni sidea ai, ³⁵ itibalhon ma ai hu lobei ni apostel ai, dob ai ibagihon hubani na hurangan. ³⁶ Umpamani si Josep, na ginoran ni apostel-apostel ai si Barnabas, artini anak ni pangapohon, sada halak Lepi, hun pulou Kiprus, ³⁷ ijual do jumani, anjaha iboan ma bolini ai lanjar itibalhon ma i lobei ni apostel ai.

¹ Adong ma ijia sada halak na margoran si Ananias, rap pakon parinangonni, na manjualhon tanohni. ² Ibagas botoh ni parinangonni, iponopkon do deba bolini ai, deba iboan anjaha iberehon i lobei ni apostel ai. ³ Tapi nini si Petrus ma: Ale Ananias, mase ma igoki sibolis uhurmu, gabe iladungi ham Tonduy Napansing, anjaha iponophon ham deba boli ni tanoh ai? ⁴ Anggo ijolomi ham in, ai lang saguru bamu do, anjaha ijual ham pe in, ai lang tong do saguru bamu? Mase ma tubuh uhurmu mambahen na sonin? Sedo jolma na niladunganmu ijin, Naibata do! ⁵ Tapi ijin ibogei si Ananias hata ai, tompas ma ia lanjar rotap hosahni. Jadi mabiar tumang ma haganup na mambogeisi. ⁶ Jadi roh ma halak siposonan, ibaluti sidea ma bangkeini ai, dob ai iusung ma hu darat laho mananom. ⁷ Dob salpu hira-hira tolu jam roh ma parinangonni ai, tapi lape ibotoh na masa ai. ⁸ Jadi iparsahapkon si Petrus ma ia: Hatahon ma bakku, na sa on do ijual nasiam tanoh ai? Eak, na sa in do, nini. ⁹ Tapi nini si Petrus ma hubani: Mase ma sauhur nasiam manlajou Tonduy ni Tuhan in? Tonggor ma, bokas ni nahei ni na mananom paramangonmu, ham pe usungon ni sidea ma hu darat! ¹⁰ Jadi mintor tompas ma ia i lobei ni nahei ni si Petrus, lanjar rotap ma hosahni. Jadi sanggah masuk halak siposonan ai, domma matei ia jumpah sidea, iusung sidea ma ia hu darat, anjaha itanom ma hu lambung ni paramangonni. ¹¹ Jadi mabiar tumang ma haganup na sakuria ai ampa haganup na mambogei ai. ¹² Jadi masa ma buei tanda ampa halongangan marhitei tangan ni apostel ai bani na mabuei ai; sauhur do sidea haganup, martumpu do sidea i surambih ni si Salomo. ¹³ Tapi humbani na legan ai, seng dong na pag pasaorhon dirini hubani sidea; sangap do sidea iidah jolma simbuei. ¹⁴ Anjaha lambin tambah do na porsaya bani Tuhan in, buei dalahi sonai age naboru, ¹⁵ pala ipamboan sidea na boritan hu alaman, anjaha ipatibal bani podoman ampa apei, andohar hona halinoh ni si Petrus sidea sanggah montas ia. ¹⁶ Dihut do hun huta-huta na inggot ai roh buei halak hu Jerusalem, mamboan na boritan ampa na niodar-odar ni tonduy na mabutak, gabe malum ma sidea haganup. ¹⁷ Jadi martindak ma sintua ni malim ai ampa haganup na mangkasomanisi, ai ma golongan Sadukei, igoki ringis do simburu ni uhur ni sidea, ¹⁸ itangkap sidea ma apostel ai anjaha imasukkon ma sidea hu tutupan umum. ¹⁹ Tapi bornginni ai, ibuha sada malekat ni Tuhan in ma labah ni tutupan ai, iboan ma sidea hu darat lanjar nini ma: ²⁰ Laho ma nasiam hu rumah panumbahan, hatahon nasiam ma bani halak na mabuei ai pasal hata hagoluhan in! ²¹ Mambogei ai, jadi sogod ma sidea misir hu rumah panumbahan ai laho mangajari. Ia sintua ni malim ampa na mangkasomanisi, iadongkon sidea ma rapot bolon rap pakon pangintuai-pangintuai ni bangsa Israel, anjaha isuruh ma hu tutupan na mangalop sidea. ²² Tapi dob das hujai juak-juak ai, seng adong jumpah sidea ijai, gabe mulak ma sidea patugahkon ai, nini ma: ²³ Tutup tumang do namin tutupan ai jumpah hanami, anjaha parjaga jongjong i lobei ni labah ai; tapi dob iungkab hanami, ise pe lang jumpah hanami i bagas. ²⁴ Ase dob ibogei kopala ni rumah panumbahan ampa sintua ni malim ai hata ai, haru ma uhur ni sidea mamingkiri, atap na sonaha do holi dobni ai. ²⁵ Tapi roh ma sada halak na patugahkon bani sidea: Tonggor nasiam ma, i rumah panumbahan do halak na pinatutupkon nasiam ondi mangajari halak na mabuei! ²⁶ Jadi laho ma kopala ni rumah panumbahan ai rap pakon juak-juak ai mangalop sidea, tapi seng marhasoman paksa, halani mabiar sidea ipargijig halak na mabuei ai. ²⁷ Iboan ma sidea anjaha ipajongjong i lobei ni Rapot Bolon ai. Jadi ipareksa sintua ni malim ai ma sidea, nini ma: ²⁸ Gomos do ilarang hanami hanima mangajari marhitei Goran ai, hape lambin igoki hanima do huta Jerusalem marhitei podah nima, ase marsapata bannami daroh ni Halak ondi, nini uhur nima. ²⁹ Jadi nini si Petrus ampa apostel-apostel ai ma mambalosi: Maningon balosan do diri bani Naibata ase bani jolma! ³⁰ Ipapuho Naibata ni ompungta do Jesus, na binunuh nasiam marhitei na manggantungkonsi bani hayu na marsilang. ³¹ Ipagijang Naibata do Ia hu siamunNi gabe Pambobai anjaha Sipaluah, laho mambere hubani Israel hamubahon ni uhur ampa hasasapan ni dousa. ³² Hanami do saksi pasal ai ampa Tonduy Napansing, na binere ni Naibata bani na mambalosiSi. ³³ Tapi mambogei ai marah tumang ma sidea, gabe iputushon sidea ma sihol mambunuh sidea. ³⁴ Tapi jongjong ma bani rapot ai sada halak Parisei, na margoran si Gamaliel, sada sibotoh titah, na sangap bani uhur ni bangsa ai, jadi ihatahon ma, ase isuruh sidea hu darat tongkin. ³⁵ Dob ai nini ma hubani sidea: Nasiam halak Israel, pangkei ma nasiam pasal sibahenon nasiam bani halak on! ³⁶ Jongjong do ijia si Toidas, ipabanggal do dirini, pala adong ompat ratus halak na mangirikkonsi. Tapi tarbunuh do ia, gabe merap do ganup na mangirikkonsi, anjaha seng dong be. ³⁷ I pudini ai, jongjong do use si Judas, halak Galilea ai, sanggah panorang sensus ondi, anjaha buei do halak na mamberontak iarahkon; tapi ia pe tarbunuh do, anjaha merap do na mangirikkonsi ai. ³⁸ Ase ai pe, ulang ma kahua nasiam halak on, paturut nasiam ma sidea, ai anggo humbani jolma do sura-sura ampa horja on, sai na maseda do in. ³⁹ Tapi anggo humbani Naibata do, seng tarkahua nasiam sidea, ulang gabe siimbang Naibata nasiam holi. Jadi iparhatongon sidea ma hatani ai. ⁴⁰ Dob ai idilo sidea ma apostel ai; isuruh ma na manlonsingi sidea anjaha ilarang ma sidea mansahapkon Goran ni Jesus; salpu ai ipaluah ma sidea. ⁴¹ Tapi malas do uhur ni sidea luar hun rapot ai, halani boi sidea manaron hiri-hiri mangkopkop Goran ni Jesus. ⁴² Anjaha seng marnamaronti sidea i rumah panumbahan age marrumah-rumah pe, mangajari ampa mangambilankon Kristus Jesus.

¹ Bani panorang ai, dob lambin martambah buei ni susian ai, tubuh ma ungut-ungut ni halak parsahap Gorik dompak parsahap Heber, halani hurang panatapan bani na mabalu humbani sidea ibagas pangurupion ari-ari. ² Jadi ipahumpul na sapuluh dua ai ma haganup susian ai, nini ma: Seng patut iahap hanami papudionnami parambilanon bani hata ni Naibata, halani na patorsa-torsa idop ni uhur. ³ Ai pe nasiam sanina, pindahi nasiam ma hun tongah-tongah nasiam pitu halak, na dear baritani, na ginokan ni Tonduy anjaha na pantas maruhur, sipabangkitonta bani horja in. ⁴ Tapi, anggo hanami, tonggo ampa horja parambilannon ai ma horjahononnami. ⁵ Jadi rosuh ma uhur ni na sakuria ai bani hata ai, gabe ipilih sidea ma si Stepanus, sada halak na gok haporsayaon ampa Tonduy Na pansing, dob ai si Pilippus, si Porkorus, si Nikanor, si Timon pakon si Parmenas, ambah ni ai si Nikolaos, sada parguru hun Antiokia. ⁶ Ipajongjong ma sidea i lobei ni apostel ai, anjaha dob martonggo sidea, itampeihon sidea ma tanganni bani sidea. ⁷ Jadi lambin rarat ma hata ni Naibata, anjaha tambah bilangan ni susian ai i huta Jerusalem; buei do age malim, na gabe porsaya. ⁸ Ia si Stepanus gok idop ni uhur do ampa hagogohon; boi do ia mambahen halongangan ampa tanda na banggal i lobei ni na mabuei ai. ⁹ Jadi roh ma deba halak marsual dompak si Stepanus, ai ma halak na humbani parguruan, na margoran Libertini, ampa na hun Kirene, hun Alexandria, hun Kilikia ampa Asia. ¹⁰ Tapi seng tarimbang sidea hapentaranni ampa Tonduy ai, na mangajarisi. ¹¹ Jadi ijuljul sidea ma deba halak, na mangkatahon: Ibogei hanami do halak on mangkatahon hata apas-apas dompak si Musa ampa Naibata. ¹² Ipajobu-jobu sidea do halak na mabuei ai ampa pangintuai ampa sibotoh surat, gabe idorab sidea ma si Stepanus, anjaha isarad hu lobei ni Rapot Bolon ai. ¹³ Ipajongjong sidea do saksi siparladung, na mangkatahon: Seng na marnamaronti halak on mangkatai ianan na pansing in age titah in, ¹⁴ ai ibogei hanami do ihatahon: Parsedaon ni Jesus na hun Nasaret ma rumah panumbahan in, anjaha paubahonni do adat, na ijalo hita humbani si Musa. ¹⁵ Anjaha ganup do parrapot ai mannonoisi; songon bohi ni malekat do bohini iidah sidea.

¹ Jadi nini sintua ni malim ai ma: Atene, tongon do sonai? ² Jadi nini si Stepanus ma: Nasiam sanina ampa bapa-bapa, tangar nasiam ma lobei! Ipataridahkon Naibata na sangap in do Dirini hubani ompungta si Abraham, sanggah i Mesopotamia ia, sanggah lape ope ia marianan i Haran. ³ Ihatahon do hubani: Bungkas ma ho hun tanohmin ampa humbani sindohormu, laho ma ho hu tanoh sipatuduhononKu bam! ⁴ Jadi bungkas ma ia hun tanoh Kaldea, marianan ma ia i Haran. Dob matei bapani, isuruh Naibata ma ia pindah hunjai hu tanoh na niiankon nasiam on sonari. ⁵ Seng ibere ope bani parbagianan ijai, sanjongkal pe lang, tapi iparbagah do, berehononni tanoh in bani, ase ia simada in ampa ginomparni, age pe seng dong anakni. ⁶ Ai sonon do nini Naibata: Gabe panginsolat do ginomparmu i tanoh na legan; parjabolonon anjaha arsik-arsikon ni halak do sidea ompat ratus tahun dokahni. ⁷ Dob ai uhumonKu do bangsa na binalosan ni sidea ai, nini Naibata; salpu ai bungkas ma sidea hunjai, anjaha sombahon ni sidea ma Ahu bani ianan on. ⁸ Lanjar ibere ma bani sidea padan parsunaton. Dob sonai, tubuh ma bani si Abraham si Isak, bani si Isak tubuh si Jakob, anjaha bani si Jakob ompungta na sapuluh dua ai. ⁹ Halani subil ni ompungta ai bani si Josep, ijual sidea do ia hu tanoh Masir. Tapi ihasomani Naibata do ia, ¹⁰ ipaluah do ia humbani haganup hasunsahanni, anjaha ibere bani idop ni uhur ampa hauhuron i lobei ni Parao, raja ni Masir, gabe ipabangkit ma ia gabe panrajai ni tanoh Masir ampa haganup rumahni. ¹¹ Jadi masa ma lohei i sab tanoh Masir ampa tanoh Kanaan, na mangkorhon hasunsahan banggal, seng jumpahan sipanganon be ompungta. ¹² Anjaha dob ibogei si Jakob adong gandum i tanoh Masir, gabe isuruh ma hujai ompungta, ai ma na parlobei sahali. ¹³ Bani na paduahalihon ipatandahon si Josep ma dirini bani saninani ai, gabe torang ma bani Parao pasal partuturan ni si Josep. ¹⁴ Jadi isuruh si Josep ma na mangalop si Jakob ampa haganup na sapanganan bani, pitu puluh lima bueini. ¹⁵ Ase tuad ma si Jakob hu tanoh Masir, dob ai matei ma ia rap pakon ompungta ai. ¹⁶ Iboan sidea do ia hu Sikem, anjaha inahkon hu tanoman, na binoli ni si Abraham marhitei duit pirak humbani ginompar ni si Hemor i Sikem. ¹⁷ Jadi dob lambin dohor panorang na pinarbagah ni Naibata, ai ma na binulawankonni hinan bani si Abraham, lambin tambah anjaha manggargar ma bangsanta i tanoh Masir, ¹⁸ paima bangkit sada raja na legan, na so manandai si Josep. ¹⁹ Akal do ibahen mangagou bangsanta, gabe tarpaksa do ompungta mangambukkon dakdanak ni sidea na baru tubuh, ase ulang torus manggoluh. ²⁰ Bani panorang ai tubuh ma si Musa, anjaha marosuh do Naibata mangidahsi. Tolu bulan do ia iparmudu-mudu i rumah ni bapani, ²¹ dob ai itaruhkon ma hu darat, tapi ibuat boru ni Parao ma ia, anjaha ipagodang-godang ma songon anakni sandiri. ²² Iajarhon do hubani sagala hapentaran ni halak Masir, gabe margogoh ma ia bani hata ampa pambahenan. ²³ Dob marumur ia ompat puluh tahun, tubuh ma uhurni manonggor saninani, halak Israel. ²⁴ Anjaha sanggah iidah sada halak hona arsik, iurupi ma na hona arsik ai, iluluhon ma ia marhitei na mambunuh halak Masir ai. ²⁵ Iagan, dapot uhur ni saninani ai ma, paboa urupan ni Naibata ma sidea marhitei tanganni, tapi seng dapot uhur ni sidea ai. ²⁶ Patar ni ai, roh use ma ia, tudu sanggah maringori sidea, anjaha iojur ma sidea ase mardamei, nini ma: Na marsanina do nasiam, mase maringori nasiam samah nasiam? ²⁷ Tapi itulak na marsalah ai do ia, nini: Ise pabangkit ho gabe panrajai ampa panguhum bannami? ²⁸ Ai sihol bunuhonmu do ahu, songon na binunuhmu halak Masir nantuari? ²⁹ Manangar hata ai lintun ma si Musa, laho manginsolat i tanoh Midian, anjaha tubuh ma dua anak bani ijai. ³⁰ Jadi dob salpu ompat puluh tahun, taridah ma sada malekat bani i halimisan ni dolog Sinai, ibagas jilam ni apuy bani naporon. ³¹ Longang do si Musa mangidah na niidahni ai, anjaha dob idohori laho papangkeihon, tarbogei ma sora ni Tuhan in: ³² Ahu do Naibata ni ompungmu, ai ma Naibata ni si Abraham, si Isak, ampa si Jakob. Jadi hitir-hitir ma si Musa, seng pag be ia papangkeihon. ³³ Tapi nini Tuhan in ma hubani: Tanggali ma sipatumin humbani naheimu, ai tanoh na susi do ianan hajongjonganmin. ³⁴ Domma tangkas huidah hamarsikon na tinaron ni bangsaKu i tanoh Masir, domma Hutangar hoih-hoih ni sidea; anjaha turun do Ahu laho paluahkon sidea. Ai pe roh ma ho, sihol suruhonKu do ho hu tanoh Masir. ³⁵ Si Musa, na tinulak ni sidea ai, marhitei na mangkatahon: "Ise pabangkit ho gabe panrajai ampa panguhum?" ia do isuruh Naibata, gabe panrajai ampa sipaluah marhitei malekat na niidahni ai bani naporon ai. ³⁶ Iarahkon do sidea bungkas, marhitei halongangan ampa tanda na binahenni ai i tanoh Masir, i laut Sigerger ampa halimisan ompat puluh tahun dokahni. ³⁷ Si Musa, ai ma na mangkatahon bani halak Israel: Pajongjongon ni Naibata do sada nabi bani nasiam, hun tongah-tongah nasiam songon ahu on. ³⁸ Ia do ai, bani kuria na i halimisan ai rap pakon ompungta ampa malekat ai, na marsahap pakonsi i dolog Sinai. Ia do na manjalo hata na manggoluh sipadasonni hubanta. ³⁹ Tapi seng itangihon ompungta ia, itulak sidea do ia, anjaha mulak do uhur ni sidea hu tanoh Masir. ⁴⁰ Ihatahon sidea do bani si Aron: Bahen ma bannami Naibata, na mambobai hanami, ai seng ibotoh hanami, atap aha do na masa bani si Musa, na dob mangarahkon hanami luar hun tanoh Masir. ⁴¹ Jadi igana sidea ma ijia sada anak ni lombu, iboan sidea ma galangan bani gana-gana ai, anjaha marmalas ni uhur ma sidea halani bahen-bahenan ni tangan ni sidea ai. ⁴² Tapi itundali Naibata ma sidea, ipaturut ma sidea marsombah bani na pinarnaibata ni sidea i langit ai, songon na tarsurat i bagas buku ni nabi-nabi: Ai adong do isombahkon nasiam Bakku galangan sisayaton ampa sibere-bere ibagas siompat puluh tahun na i halimisan ai, ale bangsa Israel? ⁴³ Ipausung-usung nasiam do rumah ni Molok ampa bintang ni naibata Rephan ampa gana-gana na binahen nasiam gabe sisombahon nasiam. Hu dipar ni Babel ope buangkononKu nasiam. ⁴⁴ Adong do bani ompungta lampo-lampo hasaksian, usih songon na dob niaturhon ni Naibata hubani si Musa marhitei hataNi, ai ma, ase ibahen ai domu hubani usihan, na dob niidahni ai. ⁴⁵ Ai ma na ijalo ompungta, lanjar iboan rap pakon si Josua laho patundukkon bangsa-bangsa, na niusir ni Naibata i lobei ni ompungta ai, das hubani panorang ni si Daud. ⁴⁶ Jumpahan idop ni uhur do ia i lobei ni Naibata, gabe ipindo ma, ase ipalopas ia laho pasirsirhon ianan bani Naibata ni si Jakob. ⁴⁷ Tapi si Salomo do saud pajongjong rumah Bani. ⁴⁸ Tapi lang marianan Sitimbulan in i bagas rumah na pinauli ni tangan, songon na hinatahon ni nabi ai: ⁴⁹ Langit do paratas Bakku, anjaha tanoh onjolan bani naheiHu. Rumah aha ma in, na sihol paulionmu Bakku, nini Tuhan in, atap ianan aha ma na boi gabe parsaranan Bakku? ⁵⁰ Ai lang tanganKu do paulihon in ganup? ⁵¹ E nasiam sihengkeng uhur, na so marsunat uhur ampa pinggolni, ilawan nasiam do tongtong Tonduy Napansing in; usih do nasiam songon ompung nasiam ai. ⁵² Ise ma humbani nabi ai, na so pinarburu ni ompungnasiam? Ibunuh sidea do na manjaha pasal parroh ni Parpintor in, ai ma na dob tinahihon ampa na binunuh nasiam, ⁵³ nasiam sijalo titah in, na pinadas marhitei malekat, hape seng idalankon nasiam. ⁵⁴ Mambogei ai marah tumang ma uhur ni sidea, harat-harat ipon ma sidea hubani. ⁵⁵ Gok Tonduy Napansing ma si Stepanus; mangkawah ma ia dompak langit, gabe iidah ma hasangapon ni Naibata ampa Tuhan Jesus jongjong i siamunNi. ⁵⁶ Jadi nini ma: Tonggor ma, huidah do mungkab langit, anjaha Anak ni jolma in jongjong hampit siamun ni Naibata! ⁵⁷ Jadi marsurak-surak ma sidea anjaha marsitutup pinggolni bei; lanjar rap ma sidea mandorabsi. ⁵⁸ Isarad sidea ma ia hu darat ni huta ai, anjaha ipargijig bani batu. Ia saksi-saksi ai, itibalhon bei do pakeianni i lobei ni sada garama, na margoran si Saulus. ⁵⁹ Sanggah na ipargijig sidea ai si Stepanus bani batu, dilo-dilo do ia, nini: Ham Tuhan Jesus, jalo Ham ma tonduyhu! ⁶⁰ Manrogop ma ia anjaha ipagomos ma sorani mangkatahon: Ham Tuhan, ulang ma hira Ham dousa ni sidea in! Jadi dob ihatahon sonai, matei ma ia.

¹ Ia si Saulus rosuh do uhurni pasal pambunuhon ai. Jadi masa ma bani panorang ai pangayak-ayakon banggal dompak kuria na i Jerusalem. Haganup sidea, merap ma hu nagori Judea ampa Samaria, sobali ni apostel-apostel ai. ² Itanom halak na daulat maruhur ma si Stepanus, anjaha tangis tumang do sidea halani ai. ³ Ia si Saulus, iparseda do kuria ai; imasuki do rumah-rumah, anjaha isarad ma hunjai dalahi ampa naboru laho padaskon hu tutupan. ⁴ Ia halak na merap ai, isiar sidea ma sab tanoh ai lanjar mangambilankon Ambilan Namadear. ⁵ Anjaha si Pilippus pe tuad ma hu huta Samaria, iambilankon ma bani sidea Kristus in. ⁶ Jadi dob ibogei na mabuei ai ambilan ni si Pilippus, anjaha iidah homa tanda-tanda na binahenni ai, sauhur ma sidea marimbagaskonsi. ⁷ Ai buei do humbani na setanon luar tonduy na mabutak marhasoman sora na mardilo-dilo. Buei do homa na oyangon ampa na tempang ipamalum. ⁸ Jadi malas tumang ma uhur ni sidea na sahuta ai. ⁹ Tapi adong do i bagas huta ai hinan sada halak na margoran si Simon, parsibalik mata, na paoto-otohon halak Samaria ai, ai ihatahon na lobih do ia. ¹⁰ Jadi haganup ma naetek na magodang porsaya bani, nini sidea: On ma hagogohon ni Naibata, na ginoran: Tang na-Banggal! ¹¹ Ase ipairik-irik sidea pe ia, halani na dob dokah do sidea ipaoto-oto marhitei parsibalik-mataonni ai. ¹² Tapi dob porsaya sidea bani na niajarhon ni si Pilippus, ai ma pasal harajaon ni Naibata ampa Goran ni Jesus, gabe tardidi ma sidea dalahi ampa naboru. ¹³ Si Simon pe porsaya ma, anjaha dob tardidi ia, sai ipairik-irik ma si Pilippus, longang tumang ia mangindah tanda ampa hagogohon na banggal, na masa ai. ¹⁴ Anjaha dob ibogei apostel-apostel na i Jerusalem, na dob ijalo halak Samaria ai hata ni Naibata, isuruh sidea ma si Petrus ampa si Johannes marayak sidea. ¹⁵ Tuad ma sidea anjaha itonggohon ma sidea ase ijalo sidea Tonduy Napansing, ¹⁶ ai seng ope sogop Tonduy Napansing atap bani ise pe sidea, pitah tardidi ope sidea hu bagas Goran ni Tuhan Jesus. ¹⁷ Jadi itampeihon apostel ai ma tanganni bani sidea, gabe ijalo sidea ma Tonduy Napansing. ¹⁸ Dob iidah si Simon apostel ai mambere Tonduy Napansing marhitei na manampeihon tangan, roh ma ia mamboan duit bani sidea, ¹⁹ nini ma: Bere nasiam ma homa kuasa na sonin bakku, ase manjalo Tonduy Napansing halak, anggo hutampeihon tanganku bani. ²⁰ Jadi nini si Petrus ma hubani: Magou ma ho rap pakon pirakmin, ai iagan ho gakni tarboli sibere-bere ni Naibata marhitei duit! ²¹ Seng parrupei atap marhak ho bani kuasa on, ai seng pintor uhurmu dompak Naibata. ²² Ai pe, paubah ma uhurmu humbani hajahatonmin, dob ai pindo ma humbani Naibata, andohar boi tarsasap tahi-tahi ni uhurmin. ²³ Ai huidah gok pogu na paet ampa jorat hagedukon do ho. ²⁴ Jadi nini si Simon ma marbalos: Tonggohon nasiam ma ahu hubani Tuhan in, ase ulang mangonai bakku na hinatahonmu ai. ²⁵ Ase dob isaksihon anjaha ihatahon sidea hata ni Tuhan in, mulak ma sidea hu Jerusalem, lanjar mangambilankon Ambilan Namadear bani buei huta ni nagori Samaria. ²⁶ Tapi iparsahapkon malekat ni Tuhan in ma si Pilippus, nini ma: Jongjong ma ho, laho ma ho marayak tongah ari hu dalan ai, na tuad hun Jerusalem hu Gaza. Ia dalan ai lungun do. ²⁷ Jadi jongjong ma ia lanjar misir. Anjaha tonggor ma, adong do ijai sada halak Etiopia, sada pegawai istana, manteri ni Kandake, Raja naboru ni Etiopia, siramotkon haganup artani. Na laho do ia hu Jerusalem martonggo, ²⁸ anjaha na mulak ma ia nuan, hundul i bagas garetani mambasa buku ni nabi Jesayas. ²⁹ Ihatahon Tonduy in ma hubani si Pilippus: Laho ma hujai, dohori ma gareta ai! ³⁰ Laho ma si Pilippus, ibogei ma ia mambasa surat ni nabi Jesayas. Nini ma: Iarti ham do na binasamu in? ³¹ Jadi nini ma: Sonaha ma boi huartihon in, anggo seng dong na patorangkonsi bakku. Lanjar iojur ma si Pilippus naik, hundul i lambungni. ³² Ia hata ni surat, na binasani ai, ai ma: Itogu do Ia songon biri-biri hu panayatan anjaha songon anak ni biri-biri, na sipsip i lobei ni sipangguntingisi, sonai do Ia seng ibuha pamanganni. ³³ Ibagas hadorunon salosei do uhum na bani ai. Ise ma na boi manghira ginomparni? Ai tarangkat do goluhni hun tanoh on. ³⁴ Dob ai nini pagawei istana ai ma hubani si Pilippus: Husungkun ma ham, ise do na hinatahon ni nabi ai ijin? Pasal dirini do atap pasal halak na legan do? ³⁵ Dob ai marsahap ma si Pilippus marbona humbani hata ondi, ibaritahon ma bani pasal Jesus. ³⁶ Anjaha sanggah na mannunuti dalan ai, das ma sidea hubani sada bah; jadi nini pagawei ai ma: Andon ma bah! Adong ope na manlanglangi ase tardidi ahu? ³⁷ Jadi nini si Pilippus ma: Anggo na porsaya do ham humbani gok ni uhurmu, dear do! Ibalosi ma ia: Na porsaya do ahu, Anak ni Naibata do Jesus Kristus! ³⁸ Ihatahon ma marsaran gareta ai, gabe tuad ma sidea haduasi, si Pilippus ampa parpangkat ai hu bah ai, lanjar ididi ma ia. ³⁹ Tapi sanggah na tangkog ai sidea humbani bah ai, jadi iluahon Tonduy ni Tuhan in ma si Pilippus, gabe seng iidah parpangkat ai be ia; marmalas ni uhur ma ia mannunuti sidalanni. ⁴⁰ Ia si Pilippus, i Asdod do ia jumpah; sanggah na montas ai ia, iambilankon do Ambilan Namadear bani ganup huta-huta ai ronsi na das ia hu Kesarea.

¹ Ia si Saulus sai tong ope iondamhon ondam-ondam ampa pamunuhon dompak susian ni Tuhan in. Laho ma ia hubani sintua ni malim, ² ipindo ma humbani surat, siboanonni hu Damaskus bani parguruan na ijai ai, ase anggo adong jumpahsi siirikkon ugama ai, dalahi atap naboru pe, boi sangkutonni anjaha boanonni ai hu Jerusalem. ³ Tapi sanggah i tongah dalan ia, mandohori huta Damaskus, sompong ma marsinalsal sondang hun langit, inggot hu bani, ⁴ gabe tompas ma ia hu tanoh, anjaha ibogei ma sada sora, na marsahap hubani: Saul, Saul, mase pardakdakonmu Ahu? ⁵ Jadi nini ma: Ise do Ham Tuhan? Roh balos: Jesus do Ahu, na pinardakdakmin. ⁶ Tapi jongjong ma ho, masuki ma huta in, ijai pe patugahon bam sibahenonmu! ⁷ Ia hasomanni na saodoran ai, jonong do hansa, ai ibogei sidea do sora ai, tapi ise pe lang iidah. ⁸ Jadi jongjong ma si Saulus hun tanoh ai; age pe bodak matani, aha pe lang iidah. Gabe itogu sidea mando ia, laho mambobansi hu Damaskus. ⁹ Tolu ari dokahni seng marpangidah ia, anjaha seng mangan atap minum pe. ¹⁰ Jadi adong ma sada susian i Damaskus, na margoran si Ananias. Ihatahon Tuhan in ma hubani ibagas sada panonggoran: Ale Ananias! Balosni: Ijon do ahu, Tuhan! ¹¹ Jadi ihatahon Tuhan in ma hubani: Jongjong ma, laho ma ho hu dalan na margoran Dalan Sipintor, anjaha sungkun ma ijai, i rumah ni si Judas pasal sada halak na margoran si Saulus, na hun Tarsus. Jumpah ho do ia martonggo, ¹² anjaha domma iidah masuk sada halak, na margoran si Ananias, manampeihon tanganni bani, ase mulak marpangidah ia. ¹³ Tapi nini si Ananias ma mambalosi: Tuhan, hubogei do humbani buei halak pasal buei ni na jahat, ibahen hubani halak na mapansing-Mu i Jerusalem. ¹⁴ Ijon pe markuasa do ia humbani sintua ni malim, manangkuti haganup na mandilo goran-Mu. ¹⁵ Jadi nini Tuhan in ma hubani: Laho ma ho, ai ia do parugas pilihonKu laho mamboan goranKu hu lobei ni bangsa-bangsa, raja-raja ampa anak ni Israel. ¹⁶ Ahu sihol patuduhkon hubani pasal buei ni sitaronon sidageionni halani goranKu. ¹⁷ Jadi laho ma si Ananias, imasuki ma rumah ai. Itampeihon ma tanganni hubani, anjaha nini ma: Ale Saul, saninangku, isuruh Tuhan in do ahu, ai ma Jesus, na niidahmu bani pardalananmu hujon, ase suang marpangidah ho, anjaha gok Tonduy Napansing ho. ¹⁸ Jadi mintor mangkatektek ma humbani matani songon sisik, gabe mulak ma ia marpangidah; dob ai jongjong ma ia lanjar tardidi. ¹⁹ Anjaha mangan ma ia, gabe suang ma gogohni. Soh ope ia piga-piga dokah ijai rap pakon susian na i Damaskus ai. ²⁰ Anjaha mintor marambilan do ia ibagas parguruan-parguruan ai, isaksihon do Jesus, paboa Anak ni Naibata do Ia. ²¹ Longang do haganup halak na mambogeisi, nini sidea do: Ai lang ia do in, na mardakdak i Jerusalem haganup halak na mandilo Goran ni Jesus in? Na nilangkahkonni pe hujon, ai lang laho manangkuti anjaha mamboan sidea do hu sintua ni malim? ²² Tapi lambin margomos do si Saulus, gabe jut ma ibaen uhur ni Jahudi, na i Damaskus, marhitei hatorangan-hatonangan, paboa Jesus do Kristus in. ²³ Jadi, dob hundokah, manriah ma halak Jahudi, laho mamunuhsi. ²⁴ Tapi tarbogei do hubani si Saulus tahi-tahi ni sidea ai. Gabe ijagai sidea ma sagala horbangan arian pakon borngin, ase boi bunuhon ni sidea ia. ²⁵ Tapi iarahkon susian ai ma ia borngin-borngin, anjaha itantan sidea ma ia i bagas karanjang hu darat ni tembok ai. ²⁶ Ase dob das ia i Jerusalem, isuba ma pasaorhon dirini bani susian ai, tapi haganup do sidea mabiar mangidahsi, ai seng porsaya sidea, na dob gabe susian ia. ²⁷ Tapi ijalo si Barnabas ma ia, anjaha iarahkon ma hubani apostel ai; ibaritahon ma bani sidea sonaha pangidahni bani Tuhan in, na marsahapkonsi, anjaha sonaha torang ni parambilanonni i Damaskus ibagas Goran ni Jesus. ²⁸ Dob ai sai rap ma ia pakon sidea mardalani i huta Jerusalem, marhinsah ni uhur marambilan ibagas Goran ni Tuhan in. ²⁹ Marsahap anjaha marsual do ia pakon halak Jahudi parhata Gorik; tapi martahi-tahi do sidea, sihol mambunuhsi. ³⁰ Dob tarbotoh ai bani sanina-sanina ai, itaruhkon sidea ma ia tuad hu Kesarea, lanjar isuruh ma laho hu Tarsus. ³¹ Ase mardamei-damei ma kuria ai i sab Judea, Galilea ampa Samaria, anjaha lambin toguhni marparlahou ibagas biar bani Tuhan in, anjaha lambin roh bueini do sidea halani pangojur ni Tonduy Napansing. ³² Sanggah na mardalani ai si Petrus i tongah-tongah ni haganup sidea, laho do ia homa marayak halak na mapansing na i Lidda. ³³ Jadi jumpahsi ma ijai sada halak, na margoran si Eneas, na oyangon anjaha na tibal-tibal bani podomanni ualuh tahun dokahni. ³⁴ Jadi nini si Petrus ma hubani: Ale Eneas, ipamalum Jesus Kristus ma ho! Jongjong ma ho, anjaha patorsa ma podomanmu! Jadi mintor jongjong ma ia. ³⁵ Anjaha haganup do pangisi ni Lidda ampa tanoh Saron mangidahsi, gabe idompakkon sidea ma Tuhan in. ³⁶ Ia i Joppe, adong do sada halak susian naboru, na margoran si Tabita, artini Balua, na surung mangkorjahon na madear ampa mambahen idop ni uhur. ³⁷ Boritan do ia bani panorang ai lanjar matei. Dob iparidi ia, inahkon ma bani kamar pardatas. ³⁸ Dohor do huta Lidda hun Joppe; jadi dob ibogei susian ai, na i Lidda do si Petrus, gabe isuruh sidea ma dua halak laho marayaksi, mangindohon bani, ase sapodas-podasni ia roh marayak sidea. ³⁹ Jadi mintor bingkat do si Petrus, mangkasomani sidea, anjaha dob das iboan ma ia hu kamar pardatas ai. Jadi marrohan ma hubani sagala na mabalu, tangis-tangis, anjaha ipatuduhkon sidea ma bani baju-baju ampa mantel, na pinauli ni si Tabita, sanggah rap ope ia pakon sidea. ⁴⁰ Jadi isuruh si Petrus ma sidea hu darat, anjaha manrogop ma ia laho martonggo. Idompakkon ma bangkei ai, lanjar nini ma: Ale Tabita, jongjong ma! Gabe ipabodak ma matani, anjaha, dob iidah si Petrus, hundul ma ia. ⁴¹ Isurdukkon si Petrus ma tanganni, laho pajongjongkonsi. Dob ai idilo ma halak na mapansing ai ampa na mabalu ai, gabe iarahkon ma naboru ai manggoluh hu lobei ni sidea. ⁴² Jadi sar ma barita ai i sab Joppe, gabe buei ma na porsaya bani Tuhan in. ⁴³ Hundokah do ia marianan i Joppe, tondok bani sada halak, na margoran si Simon, tukang sipatu ai.

¹ Tapi adong ma i Kesarea sada halak, na margoran si Kornelius, kopala tentara bani pasukan Italia. ² Na daulat do ia anjaha na marhabiaran bani Naibata rap pakon ganup rumah tanggani. Buei do ia marsibere-bere bani bangsa in, anjaha tongtong do ia martonggo bani Naibata. ³ Bani na sadari, hira-hira pukul tolu, arian, iidah ma torang bani panonggoranni sada malekat ni Naibata, na roh marayaksi anjaha marsahap hubani: Ale Kornelius! ⁴ Ikawahkon ma ia anjaha ihatahon ibagas biar: Ai aha in Tuhan? Gabe nini ma: Ia tonggomu ampa idop ni uhurmu domma das ai hu lobei ni Naibata, anjaha idingat do ai. ⁵ Ai pe suruh ma halak hu Joppe mangalopi si Simon, na margoran homa si Petrus, ⁶ na tondok bani si Simon, tukang sipatu ai, na marrumah i topi laut. ⁷ Ase laho honsi malekat na marsahap pakonsi ai, idilo ma juak-juakni dua halak ampa sada tentara na daulat maruhur, na mangkasomanisi tongtong. ⁸ Ipatugah ma haganup ai bani sidea, dob ai isuruh ma sidea hu Joppe. ⁹ Patarni ai, sanggah i tongah dalan ope sidea marayak huta ai, naik do si Petrus hu kamar pardatas laho martonggo, ai ma hira-hira tongah arian. ¹⁰ Gabe loheian ma ia, sihol mangan ma ia. Jadi sanggah na pasirsirhon ai sidea bani, marpanonggoran ma ia. ¹¹ Iidah ma buha langit, anjaha turun ma songon hiou bolag, martali bani suhi-suhini na ompat ai, itantan hu toruh. ¹² Ibagas ai adong do bagei ni siompat nahei ampa na manjulur i atas tanoh on ampa manuk-manuk na i awang-awang. ¹³ Dob ai adong ma sada sora na marsahap hubani: Ale Petrus, jongjong ma, sayati anjaha pangan ma! ¹⁴ Jadi nini si Petrus ma: Pantang Tuhan! Seng ongga hupangan na butak atap na so borsih. ¹⁵ Dob ai roh ma use sada sora padua halihon, mangkatahon hubani: Na dob pinapansing ni Naibata ulang hatahon butak! ¹⁶ Tolu hali do masa sonai, dob ai mintor tarangkat ma hiou ai hu langit. ¹⁷ Sanggah sungkun-sungkun ope si Petrus pasal arti ni panonggoran, na niidahni ai, domma jongjong i lobei ni labah ai suruhan ni si Kornelius, na mangindahi rumah ni si Simon ai. ¹⁸ Idilohon sidea ma manungkun, atap ijai do tondok si Simon, na margoran si Petrus. ¹⁹ Anjaha sanggah na marpingkir ai ope si Petrus pasal na niidahni ai, nini Tonduy in ma hubani: Adong do dua halak, na mangindahi ho! ²⁰ Jongjong ma ho, susur ma; laho ma ho rap pakon sidea, ulang sangsi uhurmu, ai Ahu do na marsuruh sidea! ²¹ Jadi susur ma si Petrus manjumpahkon halak ai, nini ma: Ahu do na pinindahan nasiam ai! Aha do halani ase roh nasiam? ²² Dob ai nini sidea ma: Ia si Kornelius, sada kopala ni tentara, sada halak na pintor uhur anjaha sihabiari Naibata, na dear baritani bani haganup halak Jahudi, dapotan parentah do ia humbani sada malekat na mapansing, ase ialopi ham hu rumahni, laho manangihon hata humbamu. ²³ Jadi iarahkon ma sidea hu rumah, anjaha itamuei ma. Patarni ai bingkat ma ia rap pakon sidea, anjaha dihut do deba hasoman na hun Joppe mangkasomanisi. ²⁴ Patarni ai das ma sidea i Kesarea. Domma paima-imahon si Kornelius, anjaha domma ipatumpu diha-diha ampa huan-huanni. ²⁵ Sanggah na masuk ai si Petrus, ialo-alo si Kornelius ma ia, manrogop ma ia marsombah hubani. ²⁶ Tapi itogu si Petrus ma ia, nini ma: Jongjong ma ham, ahu pe jolma do. ²⁷ Anjaha turut marsahapi masuk ma sidea, anjaha domma buei halak tumpu dapotsi ijai. ²⁸ Dob ai nini ma hubani sidea: Ibotoh nasiam do, pantang do bani halak Jahudi marayak atap marsaor bani bangsa na legan. Tapi domma ipatuduhkon Naibata bakku, na so bulih goranon halak butak atap lang borsih. ²⁹ Halani ai do, ase lang manjua ahu roh, sanggah na ialopi ahu. Husungkun ma sonari: Aha do halani, ase isuruh nasiam na mangalopi ahu? ³⁰ Dob ai nini si Kornelius ma: Ompat ari na salpu, sangkan sanggah sonari, ai ma pukul tolu, martonggo do ahu i rumah on, jadi jongjong ma i lobeihu sada halak parhiou na marsinalsal. ³¹ Nini hubakku: Ale Kornelius, itangihon Naibata do tonggomu anjaha idingat do sibere-beremu. ³² Ai pe suruh ma hu huta Joppe na mandilo si Simon, na margoran si Petrus, tondok i rumah ni si Simon, tukang sipatu ai, i topi laut. ³³ Jadi mintor husuruh ma na mangalopi ham, dear do pambahenanmu in, ai mintor roh do ham. Ai pe, domma tumpu hanami haganup ijon i lobei ni Naibata, sihol manangihon haganup na tinonahkon ni Tuhan in bamu. ³⁴ Dob ai marsahap ma si Petrus, nini ma: Domma tangkas iidah uhurhu, na so siidah bohi Naibata. ³⁵ Humbani sagala bangsa tene, ijalo do sagala na mangkabiarisi anjaha na mangkorjahon hapintoran. ³⁶ Itongos do hatani hubani anak ni Israel, anjaha iambilankon do damei marhitei Jesus Kristus; Ia do Tuhan ni haganup. ³⁷ Ibotoh nasiam do haganup na masa i sab tanoh Jahudi, mamungkah i nagori Galilea, dob salpu pandidion na binaritahon ni si Johannes, ³⁸ ai ma pasal Jesus, na hun Nasaret, na mininakan ni Naibata marhitei Tonduy Napansing ampa hagogohon. Mardalani do Ia mambahen na madear ampa pamalumhon haganup na siniaran ni setan, ai ihasomani Naibata do Ia. ³⁹ Hanami do saksi pasal haganup na binahenNi i tanoh Jahudi age i Jerusalem. Ibunuh sidea do Ia, igantungkon bani hayu. ⁴⁰ Ipapuho Naibata do Ia bani ari patoluhon, anjaha ipatalar do diriNi, ⁴¹ Seng hubani haganup, tapi pitah hubani saksi-saksi do, na dob ipilih Naibata hinan, ai ma hanami, na rap mangan ampa minum pakonSi dob puho Ia humbani na matei. ⁴² Iparentahkon do bannami, mangambilankon anjaha manaksihon bani halak na mabuei, paboa Ia do in, na dob tinotapkon ni Naibata hinan, gabe panguhum bani na manggoluh ampa na matei. ⁴³ Haganup do nabi manaksihon pasalSi, paboa jaloon ni sagala na porsaya Bani do hasasapan ni dousa marhitei goranNi. ⁴⁴ Jadi sanggah ihatahon si Petrus hata ai, sogop ma Tonduy Napansing bani haganup na manangar hata ai. ⁴⁵ Haganup halak na porsaya ai, ai ma halak Jahudi, na roh mangkasomani si Petrus, longang do halani iuseihon do homa sibere-bere ni Tonduy Napansing bani halak parbegu. ⁴⁶ Ai ibogei do sidea marsahap bani hata na legan mamuji Naibata. ⁴⁷ Jadi nini si Petrus ma: Ai pag ma diri mamandang didion halak on, na dob manjalo Tonduy Napansing songon hita? ⁴⁸ Gabe ihatahon ma didion sidea marhitei Goran ni Tuhan Jesus Kristus. Dob ai ielek-elek sidea ma ia, ase marianan lobei ia i tongah-tongah ni sidea piga-piga dokah.

¹ Jadi ibogei apostel ampa sanina na i Judea ma, na dob dihut do hape sipajuh begu-begu manjalo hata ni Naibata. ² Gabe ihata na porsaya humbani Jahudi ma si Petrus, daskonsi ia i Jerusalem, nini sidea ma: ³ Masuk do ham hape hu rumah ni halak na so marsunat, anjaha rap mangan do ham pakon sidea! ⁴ Jadi jojor ma humbani mulani ipatorang si Petrus na masa ai, nini ma: ⁵ Sanggah martonggo ahu i huta Joppe, huidah ma ibagas panonggoran sada ianan songon hiou na bolag, martali haompatsi suhi-suhini, turun hun langit, itantan hu lobeihu. ⁶ Jadi sanggah na hukawahkon ai, laho papangkeihon, huidah ma binatang siompat nahei ni tanoh on, binatang sipanjulur ampa na liar ampa manuk-manuk na i awang-awang. ⁷ Anjaha hubogei ma sora na mangkatahon hubakku: Jongjong ma, Petrus, sayati ma anjaha pangan ma! ⁸ Tapi ningku ma: Lang, Tuhan! Ai lang ongga ope na butak atap na so pansing masuk hu pamanganku. ⁹ Jadi marbalos ma sora ai paduahalihon hun langit: Na dob pinapansing ni Naibata, ulang hatahon ai butak! ¹⁰ Tolu hali do masa na sonai, dob ai itarik ma haganupan ai hu langit. ¹¹ Bani panorang ai jongjong ma tolu halak i lobei ni rumah ianan nami, ai ma na sinuruh hun Kesarea, marayak ahu. ¹² Anjaha ihatahon Tonduy in do bakku, ase ulang sangsi uhurhu mangirikkon sidea. Sanina na onom halak on do mangkasomani ahu, gabe masuk ma hanami hu rumah ni halak ai. ¹³ Ibaritahon do bannami sonaha pangidahni bani malekat ai jongjong i rumahni, na mangkatahon bani: Suruh ma hu Joppe na mangalopi si Simon, na margoran si Petrus. ¹⁴ Hatahononni do bamu hata na sihol paluahkon ham ampa haganup sinrumahmu! ¹⁵ Tapi sanggah mulai ope ahu marambilan ijai, sogop ma Tonduy Napansing bani sidea, songon na hubanta mungkahni ondi. ¹⁶ Jadi taringat ma ahu bani hata ni Tuhan in, na mangkatahon: Bah do ididihon si Johannes, tapi Tonduy Napansing do didihononkon bani nasiam! ¹⁷ Jadi, anggo ibere Naibata do bani sidea sibere-bereni songon na hubanta, dob porsaya sidea bani Tuhan Jesus Kristus, sonaha ma boi ahu manlanglangi Naibata? ¹⁸ Ase dob ibogei sidea ai, sip ma sidea. Ipuji sidea ma Naibata, nini ma: Ase dihut do hape bani sipajuh begu-begu ibere Naibata hamubahon ni uhur, ase manggoluh. ¹⁹ Ia halak na merap ai, pangkorhon ni parburuon marhalanihon ni si Stepanus, laho ma hu Penesia, hu pulou Kiprus ampa hu Antiokia, anjaha marambilani do sidea, tapi pitah hubani halak Jahudi do hansa. ²⁰ Tapi adong do deba humbani sidea, na marasal hun Kiprus ampa Kirene, na roh hu Antiokia, gabe ibaritahon sidea do homa ijai Tuhan Jesus hubani halak Gorik. ²¹ Anjaha ihasomani tangan ni Tuhan in do sidea; gabe buei do na gabe porsaya, na mandompakkon Tuhan in. ²² Tarbogei ma pasal ai hu kuria na i Jerusalem, gabe isuruh sidea ma si Barnabas hu Antiokia. ²³ Das ma ia hujai, iidah ma idop ni uhur ni Tuhan in, gabe malas ma uhurni; iojur ma sidea haganup, ase poltik uhur ni sidea marsijoloman bani Tuhan in, ²⁴ ai halak sidear uhur do ia, gok Tonduy Napansing ampa haporsayaon; buei do halak na gabe tartogu bani Tuhan in. ²⁵ Jadi laho ma ia hu Tarsus, mangindahi si Saulus, anjaha dob jumpahsi iboan ma ia hu Antiokia. ²⁶ Anjaha adong do sidea, na rap ai pakon kuria ai, satahun dokahni; buei do halak na iajari sidea. I Antiokia do mulai igoran susian ai halak Kristen. ²⁷ Bani panorang ai roh ma nabi-nabi hun Jerusalem hu huta Antiokia. ²⁸ Jadi roh ma sada halak humbani sidea, na margoran si Agabus, gabe ipatugah ma marhitei Tonduy in pasal lohei maningting, na sihol sogop hu sab tanoh on, ai ma na tongon masa sanggah panrajaion ni si Klaudius. ²⁹ Jadi sapanriah ma susian ai manongos tumpak, domu hubani na tarbahensi bei, hubani sanina na i Judea. ³⁰ Saud ma ibahen sidea ai, itongos ma ai hubani sintua-sintua na ijai ai marhitei si Barnabas ampa si Saulus.

¹ Hira-hira bani panorang ai ma mardas tangan raja Herodes bani piga-piga halak pagori ni kuria ai, laho mangarsik sidea. ² Ibunuh do si Jakobus, ai ma sanina ni si Johannes, marhitei podang. ³ Anjaha dob iidah, marosuh do Jahudi mangidah ai, gabe inunut ma, itangkap ma pakon si Petrus, ai ma sanggah panorang mangankon ruti na so marragi. ⁴ Jadi dob itangkap, ipamasuk ma ia hu bagas tutupan, anjaha iondoskon ma ia jagaon ni ompat bagian siparjaga, ganup bagian ompat halak, ase dob salpu pesta ai, arahkonon ma ia hu lobei ni na mabuei, nini uhurni. ⁵ Ase sonai ma hona jaga si Petrus ibagas tutupan ai; ia kuria ai sai inunut do manonggohonsi bani Naibata. ⁶ Bornginni ai, paima ondoskononkon ni si Herodes ia, modom do ia i holang-kolang ni dua tentera, tarsangkut bani dua gari, anjaha adong do homa na manjaga i lobei ni tutupan ai. ⁷ Tapi tonggor ma, roh ma sada malekat ni Tuhan in, anjaha marsinalsal ma sada panondang i kamar ai. Idugur ma lambung ni si Petrus, laho mamuhoisi, nini ma: Podas ma puho! Anjaha mangkatektek ma gari ai humbani tanganni. ⁸ Nini malekat ai ma hubani: Marpakeian ma ho! Jadi ibahen ma sonai. Ihatahon ope bani: Pakei ma mantelmu, anjaha irikkon ma ahu! ⁹ Jadi luar ma ia anjaha irikkon ma ia; seng ibotoh atap na tongon do sonai masa bani ibahen malekat ai, ai nini uhurni, na marpanonggoran do hansa ia. ¹⁰ Jadi dob ibontas sidea parjaga na parlobei ampa na paduahon, das ma sidea hu horbangan bosi, dalan dompak huta ai. Jadi buha sandiri ma ai i lobei ni sidea, gabe luar ma sidea bani sada dalan na i huta ai, dob ai malekat ai pe sirang ma humbani. ¹¹ Jadi tarjolma ma si Petrus, nini ma: Sonari ma hubotoh torang, na dob isuruh Tuhan in do malekatNi laho paluahkon ahu humbani tangan ni si Herodes ampa humbani sura-sura ni halak Jahudi. ¹² Anjaha dob torang ai bani, laho ma ia hu rumah ni si Maria, inang ni si Johannes, na margoran homa si Markus; buei do ijai na martumpu, anjaha martonggo. ¹³ Anjaha dob ihartuk labah pardarat, laho ma sada juak-juak naboru, margoran si Rode, manangihon ai. ¹⁴ Dob itandai sora ni si Petrus do ai, halani malas ni uhurni, seng mintor ibuka labah ai, tapi marlintun ma ia hu bagas anjaha ipatugah ma, na dob i labah ai do hape jongjong si Petrus. ¹⁵ Jadi ihatahon sidea ma bani: Na podoan do ho! Tapi sai ionjolhon do hatani ai. Gabe nini sidea ma: Malekatni do ai! ¹⁶ Tapi sai inunut si Petrus do mangkartuki. Dob ibuha, iidah sidea ma ia, gabe longang ma uhur ni sidea. ¹⁷ Jadi ihilaphon ma tanganni bani sidea mangkatahon sip, gabe ibaritahon ma, sonaha parpadarat ni Tuhan in bani hun tutupan ai. Ihatahon ma: Patugah nasiam ma in bani si Jakobus ampa bani sanina-sanina in. Dob ai misir ma ia, laho bani ianan na legan. ¹⁸ Anjaha dob siang ari, bulinsah tumang ma tentera ai, manguhurhon pasal na masa ai bani si Petrus. ¹⁹ Dob isuruh si Herodes na mangindahisi, hape lang jumpah, ipareksa ma parjaga ai, anjaha iparentahkon ma bunuhon sidea. Dob ai tuad ma ia hun Jerusalem hu Kesarea, anjaha ijai ma ia marianan. ²⁰ Ia si Herodes, sogam do uhurni mangidah halak Tirus ampa Sidon. Gabe sauhur ma sidea roh manjumpahkonsi, anjaha dob jumpah sidea uhur ni si Blastus, manteri ni raja ai, ipindo sidea ma mardamei, halani humbani tanoh ni raja ai do roh ni sipanganon bani sidea. ²¹ Bani ari na dob tinotapkon ipakei si Herodes ma pakeian harajaonni; hundul ma ia bani paratasni anjaha ipadas ma hatani bani sidea. ²² Jadi idilohon na mabuei ai ma: Sora ni Naibata do in, sedo sora ni jolma! ²³ Tapi mintor ipukul malekat ni Tuhan in ma ia, halani seng bani Naibata ibere hasangapon; iharati gilok-gilok ma angkulani, lanjar matei. ²⁴ Tapi lambin manrarat do anggo hata ni Naibata. ²⁵ Ia si Barnabas ampa si Saulus mulak ma hun Jerusalem, dob ipadas sidea pangurupion ai. Iboan sidea do si Johannes, na margoran homa si Markus.

¹ Adong do i Antiokia, bani kuria na ijai ai, nabi ampa guru, ai ma si Barnabas ampa si Simon, na ginoran si Niger, si Lucius na hun Kirene, si Manahen hasoman magodang ni raja Herodes ampa si Saulus. ² Jadi sanggah martonggo anjaha marpuasa sidea bani Tuhan in, nini Tonduy Napansing ma: Papulig hanima ma Bakku si Barnabas ampa si Saulus hubani horja siondoskononKu bani sidea. ³ Jadi marpuasa ma sidea anjaha martonggo, itampeihon ma tanganni bani sidea, laho paingkathon. ⁴ Sidea pe, dob isuruh Tonduy Napansing, tuad ma hu Seloikia; hunjai markapal ma sidea hu pulou Kiprus. ⁵ Dashonsi sidea hu Salamis, iambilankon sidea ma hata ni Naibata bani rumah-rumah parguruan ni Jahudi; si Johannes do pangurupi bani sidea. ⁶ Dob ibontas sidea ganup pulou ai das hu Papos, jumpah sidea ma sada halak Jahudi, parsibalik mata anjaha nabi sipakulah-kulah, na margoran Bar-Jesus. ⁷ Tondok do ia bani panggomgomi Sergius-Paulus, sada halak na pantas maruhur. Idilo ma si Barnabas ampa si Saulus, sihol do bogeionni hata ni Naibata. ⁸ Ia si Elimas, parsibalik mata ai (ai do arti ni goranni ai), ilawan do sidea, laho manlanglangi panrajai ai, ase ulang porsaya. ⁹ Gabe inolnol si Saulus, na margoran homa si Paulus, na ginokan ni Tonduy Napansing ai ma ia, ¹⁰ nini ma: Ho, na gok akal-akal ampa hajahaton, anak ni sibolis, imbang ni sagala hapintoron! Seng maronti ope ho, papeolhon dalan ni Tuhan na pintor in? ¹¹ Ai pe, tonggor ma, mangonai ma bam tangan ni Tuhan in! Ai pe pitung ma ho, seng be idahonmu mataniari. Jadi mintor rambon anjaha golap ma iidah, dadap-dadap mando ia mangindahi na mambobaisi. ¹² Jadi porsaya ma panrajai ai, dob iidah na masa ai, anjaha longang do uhurni bani podah ni Tuhan in. ¹³ Jadi marparau ma si Paulus ampa hasomanni hun Papos, gabe das ma sidea hu Perge, na i Pampilia. Tapi itadingkon si Johannes do sidea, mulak ma ia hu Jerusalem. ¹⁴ Itoruskon sidea do mardalan hun Perge, gabe das ma sidea hu Antiokia, na i Pisidia. Bani ari Sabat, laho ma sidea hu rumah parguruan lanjar hundul ma. ¹⁵ Dob salpu ibasa titah ampa surat ni nabi-nabi, isuruh sintua ni parguruan ai ma mangkatahon bani sidea: Nasiam sanina, anggo adong hata sihatahonon nasiam bani na mabuei on, hatahon nasiam ma! ¹⁶ Jadi jongjong ma si Paulus, ihilaphon ma tanganni anjaha nini ma: Nasiam halak Israel ampa nasiam na mangkabiari Naibata, tangar nasiam ma! ¹⁷ Naibata ni bangsa Israel do mamilih ompungta, anjaha ipatimbul do bangsanta sanggah manginsolat i tanoh Masir, anjaha ipadarat do sidea hunjai marhitei tangan na pinagostong. ¹⁸ Ianju-anju do sidea hira-hira ompat puluh tahun i halimisan. ¹⁹ Dob iboiskon pitu bangsa i tanoh Kanaan, ibere Naibata ma tanoh ni sidea ai bahen parbagianan ni sidea, ai ma hira-hira ompat ratus lima puluh tahun dokahni. ²⁰ Dob ai, ibere ma bani sidea panguhum das bani si Samuel, nabi ai. ²¹ Dob ai mangindo raja ma sidea, gabe ibere Naibata ma bani sidea si Saul, anak ni si Kis, marga Benyamin, dokahni ompat puluh tahun. ²² Jadi dob ipaturun ia, ipabangkit Naibata ma si Daud gabe raja bani sidea, isaksihon do pasalsi, nini: Domma jumpah Ahu si Daud, anak ni si Jesse, harosuh ni uhurHu, sipadas sura-surangKu. ²³ Humbani ginomparni do iparoh Naibata bani Israel sipaluah in, in ma Jesus, na pinarbagah-bagah in. ²⁴ Paima roh Ia, iambilankon si Johannes do pandidion hamubahon ni uhur bani haganup halak Israel. ²⁵ Anjaha laho marujung horja ni si Johannes, nini do: Ise do ahu nini uhur nasiam? Sedo ahu Ia, niarapkon nasiam ai. I pudingku do Ia roh, hurang talup do ahu mananggali sipatuNi. ²⁶ Nasiam sanina, ginompar ni si Abraham, na mangkabiari Naibata! Hubanta do itongos hata haluahon on. ²⁷ Ia pangisi ni Jerusalem ampa kopala-kopala ni sidea, halani seng itanda sidea Ia anjaha iarusi hata ni nabi, na binasa ganup ari Sabat, gabe iuhumi sidea ma Ia, laho pasaudkon ai. ²⁸ Age pe seng dong jumpah sidea halani, ase marutang hosah Ia, ipindo sidea do humbani si Latus ase ibunuh ia. ²⁹ Ase dob ipasaud sidea haganup na tarsurat pasalsi, ipasusur sidea ma Ia humbani hayu ai, anjaha ipatibal i bagas tanoman. ³⁰ Tapi ipapuho Naibata do Ia humbani na matei. ³¹ Hundokah do ipataridahkon diriNi hubani halak, hasomanNi tangkog hun Galilea hu Jerusalem, ai ma sonari, na manaksihon bani bangsa in. ³² Ambilan namadear on do iboan hanami bani nasiam, ai ma: Domma ipasaud Naibata bagah-bagahNi na bani ompungta, hubanta, ginompar ni sidea, marhitei na ipapuho Jesus, ³³ songon na tarsurat bani Psalm dua: AnakKu do Ho, sadari on do Ho Hutubuhkon. ³⁴ Anjaha, paboa na maningon puho do Ia humbani na matei, anjaha na so mulak be Ia hu hamasikon, sonon do ihatahon: BerehononKu do Bam pasu-pasu na mapansing ampa na totap, na bani si Daud ai. ³⁵ Anjaha bani Psalm na legan ihatahon do: Seng paturutonmu Na pansing-Mu mangidah hamarsikon. ³⁶ Ia si Daud, dob ipasaud rosuh ni Naibata bani goluhni, matei do ia, anjaha itanom hu lambung ni ompungni, gabe iidah do hamarsikon. ³⁷ Tapi anggo na pinapuho ni Naibata, seng iidah hamarsikon. ³⁸ Ase nasiam sanina, botoh nasiam ma, naambilankon do bani nasiam hasasapan ni dousa marhiteihonsi, ³⁹ anjaha marhiteihonsi ipintori do sagala na porsaya humbani haganup, na so boi pintor nasiam marhitei titah ni si Musa. ⁴⁰ Ase, jaga nasiam ma, ase ulang mangonai bani nasiam, na hinatahon ni nabi-nabi: ⁴¹ Tonggor ma, nasiam sipanrehei, longang ma anjaha magou; ai hubahen do sada horja bani panorang nasiam, sada horja na so hinaporsayaan nasiam, age pe adong na mambaritahon bani nasiam! ⁴² Sanggah na luar ai sidea, ipindo halak ai ma, ase ihatahon use hata ai bani sidea bani ari Sabat na mangihut hujai. ⁴³ Dob salpu partumpuan ai, buei ma humbani halak Jahudi ampa parguru na daulat mangihutkon si Paulus ampa si Barnabas, gabe iambilani anjaha iojur ma sidea, ase totap sidea marianan ibagas idop ni uhur ni Naibata. ⁴⁴ Anjaha bani ari Sabat na mangihut hujai, martumpu ma hira haganup pangisi ni huta ai, laho mambogei hata ni Tuhan in. ⁴⁵ Tapi dob iidah Jahudi buei ni jolma ai, marsimburu ma sidea, iimbang anjaha irehei sidea ma ambilan ni si Paulus. ⁴⁶ Dob ai nini si Paulus ampa si Barnabas ma ibagas hinsah ni uhur: Patut namin bani nasiam parlobei ambilanhononkon hata ni Naibata; tapi halani itulak nasiam do in, anjaha lang talup nasiam nini uhurnasiam parrupei bani hagoluhan sisadokah ni dokahni, jadi hubani halak sipajuh begu-begu ma hanami laho. ⁴⁷ Ai sonon do itonahkon Tuhan in bennami: Hupajongjong do ho gabe panondang bani halak parbegu, ase iboan ho haluahon ronsi ujung ni tanoh on! ⁴⁸ Mambogei ai marmalas ni uhur ma parbegu, anjaha ipuji sidea ma hata ni Tuhan in, gabe porsaya ma na dob tinontuhon hinan hu hagoluhan sisadokah ni dokahni. ⁴⁹ Gabe rarat ma hata ni Tuhan in hu sab tanoh on. ⁵⁰ Tapi ipajobu-jobu halak Jahudi ma puang-puang na sangap anjaha na daulat, sonai na sangap-sangap ni huta ai, gabe ibahen sidea ma pangayak-ayakon dompak si Paulus ampa si Barnabas, lanjar iusir ma sidea hun nagori ai. ⁵¹ Jadi ipaspaskon sidea ma orbuk na longkot bani nahei ni sidea, lanjar laho ma sidea hu Ikonium. ⁵² Ia susian ai gok do bani malas ni uhur ampa Tonduy Napansing.

¹ I Ikonium pe masuk do sidea hu rumah parguruan ni Jahudi, anjaha sonai do homa ambilanni, gabe buei tumang ma na porsaya, halak Jahudi age halak Gorik. ² Ia halak Jahudi, na so ra porsaya, ipajobu-jobu anjaha ipamilas sidea ma uhur ni halak sipajuh begu-begu dompak sanina-sanina ai. ³ Hundokah do sidea ijai, marhinsah ni uhur do sidea marambilan, mangunsagahkon Tuhan in, na mambere tanda ampa halongangan sibahenon ni sidea, laho manaksihon hata idop ni uhur in. ⁴ Marbolah dua ma pangisi ni huta ai, na deba hampit halak Jahudi, anjaha na deba nari hampit apostel ai. ⁵ Jadi manriah ma halak sipajuh begu-begu, halak Jahudi ampa kopala-kopalani sihol manggosam ampa manggijigi sidea. ⁶ Dob tarbogei ai bani sidea, gabe lintun ma sidea hu huta na i nagori Likaonia, ai ma huta Listra ampa Derbe ampa huta-huta na inggot hujai; ⁷ ijai pe iambilankon sidea do Ambilan Namadear in. ⁸ Jadi adong ma sada halak i Listra, na hundul-hundul, seng margogoh naheini, repat humbani partubuhni, seng ongga boi ia mardalan. ⁹ Ibogei do si Paulus marambilan. Ikawahkon si Paulus ma ia anjaha iidah, na porsaya do ia, boi malum naboritni ai, ¹⁰ gabe ipagogoh ma sorani mangkatahon: Pintor ma onjolhon naheimin! Jadi mintor jongjong ma ia anjaha mardalani. ¹¹ Jadi dob iidah na mabuei ai na binahen ni si Paulus ai, ipagogoh sidea ma sorani, nini sidea ma ibagas hata Likaonia: Domma susur banta naibata marrupa songon jolma! ¹² Igoran sidea ma si Barnabas naibata Sois, anjaha si Paulus naibata Hermes, halani ia siparsahap. ¹³ Anjaha malim-malim ni Sois ai pe, na pinajongjong bani rumah panumbahan i lobei ni huta ai, iboan sidea ma lombu jonggi ampa bunga hu horbangan ai, laho manggalang rap pakon halak na mabuei ai. ¹⁴ Mambogei ai apostel Paulus ampa si Barnabas, irigati sidea ma hiouni, marlintun ma sidea manjumpahkon halak na mabuei ai, anjaha idilohon ma: ¹⁵ Nasiam hasoman, aha do na binahen nasiam on? Jolma do age hanami, na marpangahapan songon nasiam, na mamboan Ambilan Namadear bani nasiam, ase mulak nasiam humbani naibatanasiam na lang in hubani Naibata na manggoluh, na manompa langit, tanoh, laut ampa haganup isini. ¹⁶ Ipaturut do bani sundut na dob salpu haganup bangsa-bangsa marsidalani dalanni, ¹⁷ tapi age pe sonai, isaksihon do dirini marhitei dear layak, ai ibere do bani nasiam udan hun langit ampa partahunan na madear, anjaha ipasabou do uhurnasiam marhitei sipanganon ampa malas ni uhur. ¹⁸ Age sonai hata ai, mahol do tarlanglangi sidea halak na mabuei ai laho manggalang bani sidea. ¹⁹ Tapi roh do hujai halak Jahudi na hun Antiokia ampa Ikonium; iojur-ojur ma halak na mabuei ai, gabe ipargijig sidea ma si Paulus anjaha isarad hu darat ni huta ai, anjaha iagan sidea, domma matei ia. ²⁰ Tapi dob maringgot roh susian ai hubani, jongjong ma ia, anjaha masuk ma hu huta ai. Patarni ai laho ma ia pakon si Barnabas hu Derbe. ²¹ Dob iambilankon sidea Ambilan Namadear i huta ai, anjaha buei do iajari sidea na gabe susian, mulak ma sidea hu Listra, Ikonium ampa Antiokia, ²² laho patoguhkon uhur ni susian ai, anjaha mangojur sidea ase totap marhaporsayaon, nini sidea ma: Maningon bontasonta do buei sitaronon laho masuk hu bagas harajaon ni Naibata. ²³ Dob ipabangkit sintua bani sidea bani ganup kuria, marhasoman tonggo ampa puasa, iondoskon ma sidea bani Tuhan, na hinaporsayaan ni sidea. ²⁴ Jadi ibontas sidea ma nagori Pisidia, gabe das ma hu Pampilia. ²⁵ Anjaha dob ihatahon sidea hata in i Perge, tuad ma sidea hu Atalia. ²⁶ Hunjai ma sidea marparau hu Antiokia; ijai do hinan iondoskon sidea hubani idop ni uhur ni Naibata, laho mangkorjahon horja na hinorjahon ni sidea ai. ²⁷ Anjaha dob das sidea, ipatumpu sidea ma kuria ai, anjaha ibaritahon sidea ma haganup na binahen ni Tuhan in marhitei sidea, ampa sonaha pangungkap ni Tuhan in labah haporsayaon bani sipajuh begu-begu. ²⁸ Anjaha hundokah do sidea ijai rap pakon susian ai.

¹ Tuad ma piga-piga halak hun Judea, na mangajarhon bani sanina-sanina ai: Anggo lang tarsunat nasiam mangihuthon aturan, na binahen ni si Musa, seng boi nasiam maluah. ² Jadi gogoh ma sidea isual anjaha ilawan si Paulus ampa si Barnabas, gabe isuruh ma si Paulus ampa si Barnabas ampa hasoman deba nari hu Jerusalem marayak apostel-apostel ampa pangintuai-pangintuai, laho patorangkon parsalisihan ai. ³ Dob ipaingkat kuria ai sidea, idalani sidea ma tanoh Penisia ampa Samaria, ibaritahon sidea ma ijai parmubah ni uhur ni halak sipajuh begu-begu, gabe malas tumang ma uhur ni sanina-sanina ai ibahen. ⁴ Das honsi sidea hu Jerusalem, ialo-alo kuria ai, pakon apostel-apostel ampa pangintuai ai ma sidea, gabe ibaritahon sidea na roh ai ma buei ni na binahen ni Naibata marhitei sidea. ⁵ Tapi jongjong ma deba humbani golongan Parisei, na dob gabe porsaya, ihatahon maningon sunaton do sidea anjaha ojuron mandalankon titah ni si Musa. ⁶ Dob ai martumpu ma apostel ai ampa pangintuai ai laho mansahapkon parsahapan ai. ⁷ Dob dokah sidea marsual, jongjong ma si Petrus, nini ma bani sidea: Nasiam sanina, ibotoh nasiam do, na girah do ahu ipilih Naibata i tongah-tongah nasiam, laho patugahkon Ambilan Namadear in bani halak sipajuh begu-begu, ase porsaya sidea. ⁸ Naibata, sitanda uhur in do manaksihon sidea marhitei na mambere TonduyNi bani sidea, songon na hubanta. ⁹ Seng adong ubah ni hita pakon sidea ibahen Naibata, dob ipaborsih uhur ni sidea marhitei haporsayaon. ¹⁰ Anggo sonai, mase ma lajouon nasiam nuan Naibata, marhitei na manampeihon pasangan bani tangkuhuk ni susian in, na so tarusung bapanta atap hita pe? ¹¹ Marhitei idop ni uhur ni Tuhan Jesus do, ase maluah hita ihaporsayai uhurta; sidea pe sonai do. ¹² Dob ai sip ma haganup na martumpu ai, manangar hata ni si Barnabas ampa si Paulus, na mambaritahon buei ni tanda ampa halongangan na binahen ni Naibata i tongah-tongah ni sipajuh begu-begu marhitei sidea. ¹³ Ase dob salosei sidea marsahap, marbalos ma si Jakobus, nini: Nasiam sanina, tangihon nasiam ma hatangkon! ¹⁴ Domma ipatugah si Simon, sonaha baru on panatap ni Naibata, mamilih bani dirini na gabe bangsani humbani halak sipajuh begu-begu. ¹⁵ Anjaha mardomu do ai bani hata ni nabi-nabi, songon na tarsurat in: ¹⁶ Dob salpu in mulak ma Ahu, laho patureihon use lampo-lampo ni si Daud na dob marumbak in; ulakanKu do padearhon na dob maseda in, pajongjongonKu do use in, ¹⁷ ase ipindahi na tading in ma Tuhan, ampa haganup sipajuh begu-begu, na manjujung goranKu, ¹⁸ nini Tuhan, sibahen in, ai ma dob binotoh humbani na basaia. ¹⁹ Halani ai, mangihutkon timbanganku, lang be sisunsahan halak sipajuh begu-begu na mandompakkon Naibata. ²⁰ Tapi naaturhon ma bani sidea, ase ipantangkon ma parnaibataon na legan, parriah-riahon, mangankon daging ni pinahan na matei seng sinayat ampa daroh. ²¹ Ai humbani na basaia pe adong do bani ganup huta na mangambilankon si Musa, ai ibasa do suratni ganup ari Sabat bani parguruan. ²² Dob ai iputushon apostel-apostel, pangintuai-pangintuai ampa haganup kuria ai ma mamilih piga-piga halak hun tongah-tongah ni sidea, sisuruhon hu Antiokia rap pakon si Paulus ampa si Barnabas, ai ma si Judas, na igoran homa si Barnabas, ampa si Silas, si pambobai bani sanina-sanina ai. ²³ Ia hata ni surat, siboanon ni sidea ai, ai ma: Hanami saninanasiam, apostel-apostel ampa pangintuai-pangintuai, manongos tabi do bani nasiam hasoman na humbani sipajuh begu-begu, na marianan i huta Antiokia, nagori Siria ampa Silisia. ²⁴ Ibogei hanami, adong do piga-piga halak hun tongah-tongahnami, na so sinuruhnami, roh manggeori ampa mambumbangi uhurnasiam marhitei podah ni sidea. ²⁵ Halani ai sauhur do hanami mamilih halak sisuruhon bani nasiam rap pakon si Barnabas ampa si Paulus, na hinaholongan in, ²⁶ na ra marnalangkon hosahni halani Goran ni Tuhan Jesus Kristus. ²⁷ Ase isuruh hanami do si Judas ampa si Silas, ase dihut sidea padashon hata in bani nasiam. ²⁸ Dear ma nini Tonduy Napansing ampa hanami, na so paporsanonkon be bani nasiam, sobali na porlu on: ²⁹ Pantangkon nasiam ma galangan bani sisombahon, daroh, daging ni pinahan na matei seng sinayat ampa parriah-riahon. Anggo ibalosi nasiam in, dear ma in. Horas ma! ³⁰ Ase ipaingkat ma sidea, gabe das ma hu Antiokia; dob ipatumpu sidea na mabuei ai, ipadas ma surat ai bani sidea. ³¹ Anjaha dob ibasa surat ai, malas ma uhur ni sidea, halani hata pangapohon ai. ³² Ia si Judas ampa si Silas, nabi do homa; buei do marsahap sidea ampa sanina ai, laho margogohi sidea. ³³ Dob hundokah sidea ijai, ipaingkat sanina ai ma sidea ibagas damei, mulak hubani na marsuruh sidea. ³⁴ Ia si Silas, marosuh do uhurni tading ijai. ³⁵ Ia si Paulus ampa si Barnabas soh do lobei i Antiokia, gabe iambilankon sidea ma hata ni Tuhan in rap pakon halak na legan. ³⁶ Dob salpu piga-piga ari, nini si Paulus ma hubani si Barnabas: Laho ma hita use mangidah saninanta in, bani ganup huta na dob niambilananta bani hata ni Naibata, atap na sonaha do sidea. ³⁷ Nini uhur ni si Barnabas, sihol ma dihut arahkononkon si Johannes, na margoran si Markus. ³⁸ Tapi nini uhur ni si Paulus, seng dear be dihut ia, halani na dob itadingkon sidea i Pampilia, anjaha seng ihasomani sidea bani horja ai. ³⁹ Gabe tubuh ma paringoran i tongah-tongah ni sidea, pala sirang, gabe iarahkon si Barnabas ma si Markus marparau hu pulou Kiprus. ⁴⁰ Jadi ipilih si Paulus ma si Silas bahen hasomanni, gabe bingkat ma sidea, dob iondoskon sanina-sanina ai sidea, bani idop ni uhur ni Tuhan in. ⁴¹ Jadi idalani sidea ma Siria pakon Kilikia, laho patoguhkon uhur ni kuria ai.

¹ Dob ai das ma sidea hu Derbe ampa Listra. Ijai adong ma sada susian, na margoran si Timoteus, anak ni sada boru Jahudi na porsaya, tapi halak Gorik do anggo bapani. ² Dear do baritani isaksihon hasoman na i Listra ampa Ikonium. ³ Jadi ipangindo uhur ni si Paulus ma ia hasomanni laho. Iboan ma ia anjaha isunat, halani halak Jahudi na ijai ai, ai ganup do mambotoh halak Gorik do bapani. ⁴ Tapi sanggah na isiari sidea huta-huta ai, iondoskon ma bani sidea aturan sidalankonon ai, na dob tinotapkon ni apostel ampa pangintuai-pangintuai ai i Jerusalem. ⁵ Gabe lambin toguhni ma haporsayaon ni kuria ai, anjaha lambin tambah do bilangan ni sidea ganup ari. ⁶ Tapi ibolus sidea ma nagori Prigia ampa Galatia, halani ilanglangi Tonduy Napansing sidea mangkatahon hata in i Asia. ⁷ Jadi dob das sidea hampit nagori Misia, iuji sidea ma laho hu Bitinia, tapi lang ilopas Tonduy ni Jesus sidea. ⁸ Gabe ilopusi sidea ma Misia, anjaha tuad ma hu Troas. ⁹ Jadi taridah ma bani si Paulus sada panonggoran borngin-borngin. Jongjong ma sada halak Makedonia mangelek-eleksi, nini: Mandipar ma ham hu Makedonia, urupi ham ma hanami! ¹⁰ Jadi dob iidah panonggoran ai, mintor iuhurhon hanami ma laho hu Makedonia, ai itimbangi hanami, Naibata do na mandilo hanami, laho mangambilankon Ambilan Namadear bani sidea. ¹¹ Dob ai marparau ma hanami hun Troas torus hu Samotrake, anjaha sadari patarni ai hu Neapolis. ¹² Hunjai hu Pilippi, ai ma huta pamatang ni Makedonia anjaha jajahan ni Rom. I huta ai ma hanami soh piga-piga ari. ¹³ Sanggah ari Sabat luar ma hanami hu darat ni huta ai, hubani sada bah; hu partonggoan na niarapkon ni uhurnami, anjaha hundul-hundul ma hanami ijai marsahap-sahap pakon naboru na martumpu ijai. ¹⁴ Jadi adong ma sada naboru, na margoran si Lidia, partiga-tiga hiou sigerger, hun huta Tiatira, sisombah Naibata. Ibuka Naibata ma uhurni gabe iparimbagaskon ma na hinatahon ni si Paulus. ¹⁵ Ase dob tardidi ia rap pakon parrumahni, iojur ma hanami, nini: Anggo na tongon do ahu porsaya bani Tuhan in, nini uhurnasiam, roh ma nasiam tondok hu rumahku. Igogohkon do mangojur-ojur hanami. ¹⁶ Jadi masa ma, sanggah laho hanami hu partonggoan, pajumpah ma hanami pakon sada jabolon naboru sipartondung; buei do untung ni tuanni humbani partondungonni ai. ¹⁷ Ipaihut-ihut ma si Paulus ampa hanami lanjar mardilo-dilo: Juak-juak ni Naibata Sitimbulan in do halak on, na patugahkon dalan haluahon bani nasiam! ¹⁸ Sonai ma ibahen ganup ari. Tapi sogam do uhur ni si Paulus mangidah ai, marhusor ma ia, marsahap bani tonduy ai, nini ma: Huparentahkon ma bam marhitei Goran ni Jesus Kristus, luar ma ho humbani. Jadi luar ma ia bani na satongkin ai. ¹⁹ Tapi dob iidah tuanni ai, na so adong be pansarian siaraphonon humbani, itangkap sidea ma si Paulus ampa si Silas anjaha isarad ma hu tiga hu lobei ni pamarentah. ²⁰ Anjaha dob iboan sidea ia hubani panguhum ai, nini sidea ma: Halak Jahudi do halak on, na manggeori hutanta on. ²¹ Ibaritahon sidea do adat, na so bulih jaloon barang horjahonon nami, ai halak Rom do hanami. ²² Halak na mabuei ai pe marurup do manlawan sidea, gabe ihatahon panguhum ai ma rintakon hiou ni sidea, ase ilonsingi. ²³ Dob dokah sidea hona lonsingan, idabuh ma sidea hu bagas tutupan, anjaha iparentahkon ma bani sijaga tutupan, ase pangkei sidea ijaga. ²⁴ Domu hubani parentah, na jinaloni ai, ipamasuk ma sidea hu tutupan parbagas, anjaha poltik ma ibayangkon nahei ni sidea. ²⁵ Tapi marayak tongah borngin, martonggo ma si Paulus ampa si Silas mamuji Naibata ipatangi-tangi na tartutup ai. ²⁶ Tapi sompong ma masa lalou bolon, pala dugur onjolan ni tutupan ai, gabe mintor mangkabuha ma haganup labah, tanggal ma age gari ni sidea haganupan. ²⁷ Jadi tarpuho ma sijaga tutupan ai, anjaha dob iidah domma buha ganup labah ni tutupan ai, isintak ma podangni laho mamunuh dirini, ai iagan domma maporus ganup na tartutup ai. ²⁸ Tapi ipagogoh si Paulus ma sorani mandilohon: Ulang bahen ham hasedaon bamu, ai ijon do hanami haganup! ²⁹ Jadi ipindo ma suluh, marlintun ma ia hu bagas, anjaha manrogop ma ia hitir-hitir i lobei ni si Paulus ampa si Silas. ³⁰ Iarahkon ma sidea hu darat, nini ma: Aha ma sibahenonku, nasiam tuannami, ase maluah ahu? ³¹ Jadi nini sidea ma: Haporsayai ma Tuhan Jesus, ase maluah ham pakon parrumahmu! ³² Anjaha ihatahon sidea ma hata ni Tuhan in bani pakon bani haganup parrumahni. ³³ Anjaha bani panorang ai, bornginni ai, iarahkon ma sidea anjaha iburihi ma ugah ni sidea; dob ai mintor tardidi ma ia ampa haganup sidea na satangga. ³⁴ Iboan ma sidea hu rumahni, anjaha ipatorsa ma sipanganon bani sidea. Jadi malas ma uhurni ampa haganup sidea na sarumah, halani na dob porsaya ai sidea bani Naibata. ³⁵ Jadi dob siang ari, isuruh panguhum ai ma upas na mangkatahon: Paluah ma halak in! ³⁶ Jadi ipadas sijaga tutupan ai ma hata ai bani si Paulus, nini ma: Domma isuruh panguhum ai na mangkatahon, ase paluahon nasiam. Ai pe hu darat ma nasiam, anjaha laho ma ibagas damei! ³⁷ Tapi nini si Paulus ma bani sidea: Halak Rom do hanami, hape ilonsingi do hanami i lobei ni halak na mabuei, seng palobei ipareksa, dob ai idabuh hu tutupan. Mintor sonai ma marponop-ponop sidea, sihol paluahkon hanami? Lang sonai, maningon sidea do roh padarat hanami! ³⁸ Jadi ipatugah upas ai ma hata ai bani panguhum ai, gabe mabiar ma sidea dob ibogei halak Rom do hape sidea. ³⁹ Jadi roh ma sidea, mangelek ma sidea bani apostel ai. Dob iarahkon hu darat, iojur ma sidea, ase itadingkon huta ai. ⁴⁰ Ase dob mandarat sidea hun tutupan ai, laho ma sidea hu rumah ni si Lidia. Jadi dob iidah anjaha iapohi sanina-sanina ai, laho ma sidea.

¹ Anjaha ibontas sidea ma Ampipolis ampa Apollonia, gabe das ma sidea hu Tessalonika. Adong do ijai rumah parguruan ni halak Jahudi. ² Jadi songon na somal, masuk ma si Paulus hujai, anjaha marsahap ma ia bani sidea tolu ari Sabat tuntun humbani surat in, ³ patugahkon ampa patorangkon, paboa na maningon marsitaronon anjaha puho do use Kristus in humbani na matei, anjaha ihatahon: Jesus, na hubaritahon in bani nasiam, in do Kristus in. ⁴ Deba humbani sidea marhatongonkon ai, gabe mardomu hubani si Paulus ampa si Silas; sonai homa halak Gorik sihabiari Naibata, buei tumang, age naboru na sangap pe humbuei do. ⁵ Tapi subil do uhur ni halak Jahudi, gabe iarahkon sidea ma piga-piga jolma na jahat laho pajobu-jobu halak na mabuei ai, gabe geor ma haganup huta ai. Martumpu ma sidea i lobei ni rumah ni si Jason laho mamboan si Paulus ampa si Silas hu lobei ni sidang rayat. ⁶ Tapi halani seng jumpah sidea, isarad ma si Jason ampa piga-piga hasoman ai hu lobei ni pamarentah kota ai, lanjar mardilo-dilo: Roh do homa hubanta on sigeori sab dunia on, ⁷ anjaha si Jason do manjalo sidea ibagas rumahni. Haganup do sidea siimbang aturan ni Kesar, ai ihatahon, adong do raja na legan, ai ma Jesus. ⁸ Geor do ibahen sidea halak na mabuei ampa pamarentah kota pabogei-bogei ai. ⁹ Dob ijalo sidea pe jaminan humbani si Jason ampa halak na legan ai, ase ipaluah sidea. ¹⁰ Jadi mintor ipabingkat sanina ai ma si Paulus ampa si Silas, bornginni ai hu Beroa, anjaha dob das hujai, laho ma sidea hu rumah parguruan ni Jahudi. ¹¹ Bujuran do halak na ijai ai ase na i Tessalonika, ai malas do uhur ni sidea manjalo hata in, anjaha ganup ari do itangkasi Surat in atap na sintong do sonai. ¹² Buei do humbani sidea na gabe porsaya, nai homa buei humbani halak Gorik, na sangap naboru age dalahi. ¹³ Tapi dob ibotoh halak Jahudi na i Tessalonika, na dob ibaritahon si Paulus homa hata ni Naibata i Beroa, roh ma sidea hujai, laho pajobu-jobuhon ampa manggeori halak na mabuei ai. ¹⁴ Jadi mintor ipaingkat hasoman ai ma si Paulus laho dompak laut; tading ma anggo si Silas ampa si Timoteus ijai. ¹⁵ Das do si Paulus itaruhkon sidea ronsi Aten, anjaha dob ai mulak ma sidea, dob ijalo sidea tonahni bani si Silas ampa si Timoteus mangkatahon, ase roh sidea sapodas-podasni, mangkasomanisi. ¹⁶ Sanggah na ipaima-ima Paulus sidea i Aten, gok ringis tumang ma uhurni ibagas, mangidah buei ni gana-gana i huta ai. ¹⁷ Jadi sai iparsahapkon do i rumah parguruan halak Jahudi ampa sihabiari Naibata, sonai homa ari-ari i tiga halak na roh hujai. ¹⁸ Marsual ma deba parpilsafah Epikurei ampa Stoiki pakonsi. Deba mangkatahon: Aha do na sihol hatahonon ni sibuei sahap in? Na deba mangkatahon: Siambilankon naibata na legan do gakni on, ai ibaritahon do Jesus ampa parpuhoon humbani na matei. ¹⁹ Jadi ialop sidea ma ia, iboan ma hu Areopagus, anjaha nini sidea ma: Boi do botohonnami. Atap podah baru aha do na hinatahonmin? ²⁰ Ai songon na legan do podah na binobanmin bennami, sihol botohannami do pasal in. ²¹ Ia halak Aten haganup ampa halak na legan na ijai, seng dong panorangni dompak na legan sobali na mansahapkon ampa na mambogei pingkiran baru. ²² Ase jongjong ma si Paulus i tongah-tongah ni Areopagus ai, nini ma: Nasiam halak Aten, huidah bani haganup, pongkut do nasiam bani parugamaon. ²³ Ai sanggah na mardalani ahu, paidah-idah sisombahon nasiam, gabe jumpah ahu ma sada anjap-anjap na marsurat: Bani Naibata na so tinanda. Jadi na so tinanda, na sinombah nasiam ai, in do na sihol baritahononku bani nasiam. ²⁴ Ia Naibata, sitompa dunia on ampa haganup isini, in ma Tuhan ni langit ampa tanoh, seng marianan Ia i rumah pinauli ni tangan. ²⁵ Seng hurangan Ia, mambahen pala idangan ni tangan ni jolma Ia, ai Ia do sibere bani ganup na tinompa hagoluhan ampa hosah ampa haganupan ai. ²⁶ Humbani sada jolma do ijadihon bangsa ni manisia, ase iiani haganup sisik ni tanoh on. Itotaphon hinan do panorang ni ganup bangsa ampa parbalogan ni ianan bani sidea, ²⁷ ase ipindahi sidea Naibata, andohar tardadap sidea Ia, anjaha jumpahsi, ai seng daoh Ia humbani ganup hita. ²⁸ Ai ibagas diriNi do hita manggoluh, miut anjaha marhosah, songon na hinatahon ni deba pandoding nasiam: GinomparNi do tongon hita. ²⁹ Ai pe, anggo ginompar na marasal humbani Naibata do hita, ulang ma iagan uhurta, usih Naibata bani omas, barang bani pirak, barang bani batu na tinukangan atap na piningkiran ni uhur ni jolma. ³⁰ Domma isalpuhon panonggor ni Naibata tahun haotoon, tapi anggo nuan ihatahon do bani haganup hajolmaon, ija-ija pe, ase ipaubah uhurni, ³¹ ai domma itontuhon sada ari paruhuman bani dunia on, ibagas hapintoran, marhitei sada halak na pinilihNi. Anjaha ibere do bani haganup jolma dalan ase boi porsaya Bani, marhitei na ipuhoi Ia humbani na matei. ³² Tapi dob ibogei sidea hatani ai pasal parpuhoon, manrisai ma na deba, anjaha na deba mangkatahon: Sihol bogeionnami ope hatamu sahali nari pasal ai. ³³ Dob sonai, laho ma si Paulus hun tongah-tongah ni sidea. ³⁴ Tapi adong do deba na mangihutkonsi, na gabe porsaya, songon si Dionisius, sada pagori ni Areopagus ai, ambah ni ai sada naboru, na margoran si Damaris, ampa deba nari hasoman ni sidea.

¹ Dob ai bingkat ma si Paulus hun huta Aten laho hu huta Korint. ² Jadi jumpahsi ma ijai sada halak Jahudi, na margoran si Akila, na tubuh i Pontus, na roh baru hun Italia rap pakon parinangonni, si Priskilla, halani iparentahkon si Klaudius, maningon haganup halak Jahudi bungkas hun huta Rom. ³ Bani sidea ma ia marianan anjaha rap marhorja pakon sidea, halani sada hapandeian do sidea, ai ma martonun hiou tenda. ⁴ Marambilan do ia ganup ari Sabat i rumah parguruan, andohar marhatongon halak Jahudi ampa Gorik. ⁵ Ase dob roh si Silas ampa si Timoteus hun Makedonia, igogohi si Paulus ma marambilan, laho manaksihon bani Jahudi, paboa Jesus do Kristus in. ⁶ Halani manlawan sidea anjaha manrehei, ipaspas si Paulus ma hiouni, anjaha nini ma bani sidea: Marsapata bani nasiam ma darohnasiam! Borsih do anggo ahu. Hunjon-hujanan bani halak sipajuh begu-begu ma ahu laho. ⁷ Lanjar misir ma ia hunjai, tondok ma ia bani sada halak na margoran si Titius Justus, sihabiari Naibata; rombankon rumah parguruan ai do rumahni. ⁸ Ia si Krispus, kopala ni rumah parguruan ai, porsaya do bani Tuhan in sonai haganup parrumahni; anjaha buei do halak Korint, dob ibogei ai, na gabe porsaya anjaha tardidi. ⁹ Jadi nini Tuhan in ma bani si Paulus borngin-borngin marhitei sada panonggoran: Ulang ho mabiar, tapi hatahon ma, ulang ho sip! ¹⁰ Ai Huhasomani pe ho, sahalak pe lang dong na mangkahua ho, na sihol mangagou ho; ai buei do halak Bakku i huta on! ¹¹ Ijai ma ia marianan satahun onom bulan dokahni, mangajarhon hata ni Naibata bani sidea. ¹² Tapi sanggah si Gallio panggomgomi i Akaya, sapanriah ma halak Jahudi manlawan si Paulus, anjaha iboan ma ia hu paruhuman. ¹³ Nini sidea ma: Isahap-sahapi halak on do jolma ase mambalosi Naibata na marsilawanan bani titah in. ¹⁴ Jadi sanggah sihol marsahap si Paulus, nini si Gallio ma dompak Jahudi: Nasiam halak Jahudi! Ambit halani parkara hasalahan atap hajahaton, patut do bantuanku nasiam. ¹⁵ Tapi halani parsalisihan pasal podah ampa goran ampa titah nasiam do in, uhur nasiam ma ijin; seng ra ahu manguhumi na sonin. ¹⁶ Jadi ipalaho ma sidea hun paruhuman ai. ¹⁷ Gabe roh ma sidea haganup manangkap si Sostenes, kopala ni rumah parguruan ai, ibogbogi sidea ma ia i lobei ni paruhuman ai, tapi seng isampuri si Gallio ai. ¹⁸ Tapi hundokah ope si Paulus ijai; dob ai mamuhun ma ia humbani sanina-sanina ai, anjaha marparau ma ia hu Siria, rap pakon si Priskilla ampa si Akilla. I Kenkerea, ipasuhurhon do jambulanni halani adong bagah-bagahni. ¹⁹ Das ma sidea hu Epesus, anjaha itadingkon ma sidea ijai; ia sandiri, laho do hu rumah parguruan, laho marsahap pakon halak Jahudi. ²⁰ Ipindo sidea do, ase hundokah ia ijai, tapi seng ra ia. ²¹ Tapi sanggah na laho marsirang humbani sidea, ihatahon do: Anggo marosuh Naibata, mulak do ahu bani nasiam. Dob ai misir ma ia marparau hun Epesus. ²² Dob das hu Kesarea, tangkog ma ia hu Jerusalem, anjaha dob itabi kuria ai, tuad ma ia hu Antiokia. ²³ Ase dob hundokah ia ijai, bingkat ma ia; ibontas ma nagori Galatia ampa Prigia, laho patoguhkon uhur ni haganup susian ai. ²⁴ Tapi roh ma hu huta Epesus sada halak Jahudi, na margoran si Apollos, tubuh i huta Aleksandria; halak na pentar do ia, na torang mambotoh surat in. ²⁵ Domma iajari ia pasal dalan ni Tuhan in, hinsah do uhurni marsahap anjaha torang do pamodahionni pasal Jesus; tapi pitah pandidion ni si Johannes do ibotoh. ²⁶ Ipungkah ma ibagas hinsah ni uhur marsahap i bagas rumah parguruan. Ibogei si Akilla ampa si Priskilla ma ai, gabe iarahkon sidea ma ia, anjaha ipatorang sidea ma bani tulimat pasal dalan ni Naibata. ²⁷ Jadi sanggah na sihol laho ia hu Akaya, ihadearhon sanina-sanina ai do ai, anjaha manongos surat do sidea, mangkatahon, ase ijalo sidea ia. Anjaha dob das ijai, gabe pangurupi na banggal do ia bani halak na porsaya, marhitei idop ni uhur ni Naibata, ²⁸ ai torang-torang do italuhon halak Jahudi i lobei ni halak na mabuei, marhitei na mambuktihon humbani surat in, paboa Jesus do Kristus in.

¹ Tapi sanggah i huta Korint si Apollos, ibontas si Paulus ma bagian pardologan ni tanoh ai, anjaha das ma ia hu huta Epesus, gabe jumpahsi ma ijai deba susian ai. ² Ihatahon ma hubani sidea: Domma ijalo nasiam Tonduy Napansing, sanggah na gabe porsaya nasiam? Jadi nini sidea ma hubani: Seng ongga ibogei hanami adong Tonduy Napansing! ³ Isungkun ma sidea: Ai pandidion aha do ijalo nasiam? Balos ni sidea: Pandidion ni si Johannes do. ⁴ Nini si Paulus ma: Ia pandidion ni si Johannes, na mangkatahon paubahkon uhur do, ai iojur do halak na mabuei mangkaporsayai na sihol roh hun pudini, ai ma Jesus. ⁵ Mambogei ai, ipandidihon sidea bei ma dirini hu bagas Goran ni Tuhan Jesus. ⁶ Anjaha sanggah itampeihon si Paulus tanganni bani sidea, sogop ma Tonduy Napansing bani sidea, jadi marhata na legan ma sidea anjaha manjahai. ⁷ Adong do sidea haganup tarsapuluh dua halak na martumpu ai. ⁸ Laho do ia hu rumah parguruan, anjaha marambilani ma ia ijai tolu bulan dokahni, laho patorangkon ampa mangajarhon pasal harajaon ni Naibata. ⁹ Tapi halani ipahengkeng na deba do uhurni, anjaha lang ra porsaya, ipabajan-bajan ope tene ugama ai i lobei ni na mabuei ai, gabe itadingkon ma sidea; iarahkon ma susian ai jadi i sikolah ni si Tiranus ma ia marambilan ganup ari. ¹⁰ Adong do dua tahun masa sonai, gabe haganup ma na marianan i Asia, mambogei hata ni Tuhan in, halak Jahudi age halak Gorik pe. ¹¹ Hagogohon na sumurung do ibahen Naibata marhitei tangan ni si Paulus, ¹² pala do saputanganni atap gonditni humbani angkulani iboan halak bani na boritan, gabe laho ma naborit ai humbani sidea anjaha luar tonduy na mabutak. ¹³ Tapi adong ma deba halak Jahudi, na mardalan-dalan, halak siusir setan, na mansuba manobut Goran ni Tuhan Jesus bani na setanon, nini: Huusir ma hanima, marhitei Jesus, na niambilankon ni si Paulus! ¹⁴ Ai adong do pitu halak, anak ni sada malim ni Jahudi, na margoran si Skoia, na mambahen sisonai ai. ¹⁵ Tapi nini tonduy na butak ai ma mambalosi sidea: Hutanda do Jesus, pasal si Paulus pe hubotoh do, tapi ise do hanima? ¹⁶ Anjaha halak partonduy na butak ai pe, idorab anjaha magosam tumang ma sidea haganupan ibahen, gabe lintun ma sidea hun rumah ai, talanjang anjaha mangkaluha. ¹⁷ Ia na masa ai, tarbotoh do ai bani haganup halak Jahudi ampa halak Gorik, na marianan i huta Epesus, gabe roh ma biar bani sidea haganup, anjaha tunggung ma Goran ni Tuhan Jesus. ¹⁸ Gabe roh ma buei halak na dob porsaya, mansopotkon anjaha patugahkon horja ponopan ni sidea. ¹⁹ Anjaha buei do sihorjahon hadatuon hinan, mamboan pustaha-pustahani, lanjar itutung ma ai i lobei ni halak na mabuei; hargani, adong do itaksir lima pulu ribu duit pirak. ²⁰ Sonai ma lambin rarat hata ni Tuhan in anjaha lambin margogoh. ²¹ Dob salpu na masa ai, isurahon si Paulus ma mandalani nagori Makedonia ampa Akaya, dob ai laho hu Jerusalem, nini: Dob hunjai ahu, maningon dihut do huta Rom idahonku. ²² Jadi isuruh ma deba halak siparugas bani, ai ma si Timoteus ampa si Erastus, hu Makedonia; ia sandiri soh ope tongkin i Asia. ²³ Tapi tubuh ma ijia hageoron banggal halani ugama ai. ²⁴ Ai adong ma sada halak, tukang pirak, na margoran si Demetrius, sipauli rumah-rumah ni naibata Artemis; buei do untung iparoh bani tukang-tukang ai. ²⁵ Ipatumpu ma tukang ai ampa parhorja ni sidea, jadi nini ma: Ibotoh nasiam do, humbani horja on do pansarianta. ²⁶ Iidah anjaha ibogei nasiam do, seng pitah i Epesus on, tapi bani haganup Asia do, iojur lanjar ipagoling si Paulus buei halak. Nini, sedo na tongon naibata na pinauli ni tangan. ²⁷ Anjaha seng pitah pansarianta marmara laho seda, dihut do naibata Artemis na banggal in, na sinombah i sab dunia on, gabe hiri ma rumahni anjaha magou hamuliaonni. ²⁸ Mambogei ai gok marah ma uhur ni sidea, anjaha mardilo-dilo, nini ma: Na banggal do Artemis ni halak Epesus! ²⁹ Jadi lutu ma huta ai, anjaha marurup ma sidea, laho hu ianan panontonan, lanjar isarad ma hujai si Gayus ampa si Aristarkus, halak Makedonia ai, hasoman sapardalanan ni si Paulus. ³⁰ Sihol do si Paulus laho hu tongah-tongah ni halak ai, tapi seng ilopas susian ai. ³¹ Pala do deba pangintuai na hun Asia, na marhuan pakonsi, marsuruh na mangkatahon hubani, ase ulang laho ia hu panontonan ai. ³² Palegan-legan do hata ni surak-surak ni sidea, ai lutu tumang do partumpuan ai, anjaha bueinan do sidea na so mambotoh, atap halani aha do sidea martumpu. ³³ Domu hubani ojur ni halak Jahudi, ipalobei ma si Aleksander humbani halak na mabuei ai, anjaha ia pe, ihilaphon ma tanganni laho mambere hatorangan bani halak na mabuei ai. ³⁴ Tapi dob ibotoh sidea, halak Jahudi do ia hape, rap marsurak-surak ma sidea, hira dua jam dokahni: Banggal do Artemis ni halak Epesus! ³⁵ Jadi ipasonang juru-tulis ni huta ai ma halak na mabuei ai, nini: Nasiam halak Epesus, ise na so mambotoh, paboa huta Epesus on do siparugas bani naibata Artemis na banggal in, ampa bani gombaranni, na madabuh hun langit? ³⁶ Halani na so tarparnalang do ai, ai pe sonang ma nasiam, anjaha ulang ma tarolos atap mambahen aha pe. ³⁷ Iboan nasiam do halak on hujon, seng sirampok rumah panumbahan sidea, atap pe sipahiri sisombahonta. ³⁸ Ai pe anggo adong pangaduan ni si Demetrius ampa hasomanni tukang dompak atap ise pe, adong do paruhuman atap panguhum; sidea ma marsiaduan. ³⁹ Tapi anggo adong pangaduan nasiam na legan, bani pangadilan ma ai iputushon. ⁴⁰ Ulang das hona aduhon hita halani halutuon sisadari on, ai seng dong tarbere hita alasan pasal halutuon on. ⁴¹ Anjaha dob ihatahon ai, ipalaho ma tumpuan ai.

¹ Dob maronti na lutu ai, idilo si Paulus ma susian ai, anjaha dob marhata partadingan ia hubani sidea, bingkat ma ia hu Makedonia. ² Dob idalani nagori ai, anjaha ipatoguh uhur ni sidea marhitei hatani, jadi das ma sidea hu tanoh Gorik. ³ Tolu bulan do ia soh ijai, anjaha halani ionggopi halak Jahudi ia, sanggah na laho marparau hinan ia hu Siria, gabe ipaputus ma uhurni mulak hun Makedonia. ⁴ Na mangkasomanisi ai ma si Sopater, anak ni si Pirus, hun Beroa, si Aristarkus ampa si Sekundus, halak Tessalonik, si Gayus, hun huta Derbe pakon si Timoteus, si Tikikus, pakon si Tropimus na hun Asia. ⁵ Hun lobei do sidea laho, anjaha i Troas do hanami ipaima sidea. ⁶ Dob salpu pesta Paska, bingkat ma hanami marparau hu Pilipi, anjaha palima-arihon pajumpah ma hanami pakon sidea i Troas, anjaha soh ma hanami ijai pitu ari dokahni. ⁷ Bani ari parlobei ni minggu ai, sanggah martumpu hanami manopiki ruti, marambilan ma si Paulus bani sidea anjaha ipaganjang do ambilanni ai pala das tongah borngin halani sihol misir ia patarni ai. ⁸ Buei do suluh bani kamar pardatas ai, ianannami martumpu ai. ⁹ Jadi adong ma sada garama, na margoran si Oitikus, na hundul bani jandela; tartunduh do ia, sanggah na inunut si Paulus marambilan, gabe madabuh hu toruh humbani loteng patoluhon, anjaha domma matei sanggah hona angkat. ¹⁰ Jadi turun ma si Paulus, ijomba ma ia lanjar iabing, anjaha nini ma: Ulang nasiam lutu, ai ibagas dirini ope tonduyni! ¹¹ Dob ai mulak ma ia hu atas, itopiki ma ruti, lanjar mangan ma; dokah ope ia marsahap-sahap pakon sidea, ronsi marayak siang ari, dob ai pe ase misir. ¹² Manggoluh do garama ondi mulak hu rumahni, gabe tarapoh ma uhur ni sidea. ¹³ Parlobei do hanami masuk parau laho marlayar hu Assos, ijai do ia jaloon nami masuk parau; ai sonai do iaturhon, halani sihol mardalan darat ia. ¹⁴ Anjaha dob jumpahsi hanami i Assos, ijalo hanami ma ia masuk parau, gabe misir ma hanami marlayar hu Mitelene. ¹⁵ Dob marlayar hanami hunjai, das ma hanami patarni hu pulou Kios, patarni ai dohorhon pulou Samos, dob ai patarni ai use das ma hanami hu Miletos. ¹⁶ Ai domma iputuskon si Paulus manlopusi Epesus, ase ulang magou panorang i Asia, ai tarolos do ia, andohar das ia i Jerusalem bani ari Pentakosta. ¹⁷ Tapi isuruh do hun Miletus hu Epesus na mandilo sintua-sintua ni kuria ai. ¹⁸ Jadi dob das sidea hubani, nini ma hubani sidea: Ibotoh nasiam do parlahouhu, sadokah rap ahu pakon nasiam, olat ni ari parlobei, dob hudogei Asia. ¹⁹ Hubalosi do Tuhan in ibagas toruh ni uhur, mariluh-iluh manaron parlajouan na roh hubakku halani tahi-tahi ni Jahudi. ²⁰ Seng adong huponopkon barang aha na marguna, na so niambilankon barang pinodahkon bani nasiam i lobei ni halak na mabuei atap marrumah-rumah pe. ²¹ Tongtong do husaksihon bani halak Jahudi age bani halak Gorik, hamubahon ni uhur bani Naibata ampa haporsayaon bani Tuhanta Jesus Kristus. ²² Anggo sonari, songon na tarsangkut do ahu ibahen Tonduy in laho hu Jerusalem, anjaha seng hubotoh, barang aha na sihol masa bakku ijai. ²³ Pitah on: Bani haganup huta ilumbahon Tonduy in do, paboa tali ampa hamarsikon do sitagamonku ijai. ²⁴ Tapi seng pala harga huhira hosahku, asal ma boi hupaujung langkahku ampa horja na dob hujalo humbani Tuhan Jesus, ai ma na manaksihon Ambilan Namadear pasal idop ni uhur ni Naibata. ²⁵ Anjaha sonari, hubotoh do lang idahon ni nasiam be bohingku, haganup nasiam na huparayak laho mangambilankon harajaon ni Naibata. ²⁶ Halani ai husaksihon ma bani nasiam sadari on, na dob borsih do ahu humbani sapata ni darohnasiam, ²⁷ ai seng dong hubuati age aha, hupabotohkon do bani nasiam ganup rosuh ni Naibata. ²⁸ Halani ai jaga nasiam ma dirinasiam ampa haganup hulanan in, ai na dob ipabangkit Tonduy Napansing do nasiam mardimata in, ase iparmahani nasiam kuria ni Tuhan in, na tinobusni marhitei darohni sandiri. ²⁹ Ai hubotoh, anggo dob laho ahu, masuk ma bani nasiam begu panoroh, na so manarihon hulanan in. ³⁰ Gari hun tongah-tongah nasiam jongjong do halak na mamodahkon na lepak, laho mangojur-ojur susian in mangirikkonsi. ³¹ Halani ai jaga ma nasiam, ingat nasiam ma, na so marnamaronti ahu arian pakon borngin tolu tahun dokahni pagolpahon nasiam marhasoman iluh. ³² Ai pe huondoskon ma nasiam hubani Naibata ampa hubani hata idop ni uhurNi, na margogoh patoguhkon uhur anjaha mambere siteanon bani haganup na mapansing in. ³³ Seng ongga ipindo uhurhu omas atap pirak ampa hiou humbani atap ise pe. ³⁴ Ibotoh nasiam do, tanganku do mansarihon na porlu bakku ampa bani na mangkasomani ahu. ³⁵ Bani haganup do hupatuduhkon bani nasiam, maningon sonai do hita laho mangurupi halak na so margogoh, mardingat hata ni Tuhan Jesus, ai Ia do mangkatahon: Martuahan do na mambere ase na manjalo. ³⁶ Dob ihatahon sonai, manrogop ma ia martonggo rap pakon sidea haganup. ³⁷ Anjaha tangis ma sidea haganup, irohop anjaha isummah sidea ma si Paulus. ³⁸ Na parahni ipusokkon uhur ni sidea, ai ma hatani na hinatahonni, na so idahon ni sidea be bohini. Lanjar itaruhkon sidea ma ia hu kapal.

¹ Dob sirang hanami humbani sidea, marlayar ma hanami torus hu Kos, anjaha patarni ai hu Rodus, hunjai hu Patara. ² Anjaha dob dapot hanami kapal na laho hu Penesia, ai ma imasuki hanami, lanjar marlayar ma hanami. ³ Dob ai iidah hanami ma pulou Kiprus, ilopusi hanami ma ai hampit sambilounami, anjaha marlayar ma hanami dompak Siria, gabe das ma i Tirus; ai ijai do bongkaron muatan ni kapal ai. ⁴ Iparayak hanami ma susian ai anjaha marsaran ijai pitu ari dokahni. Marhitei Tonduy in ipalumba sidea do si Paulus, ulang tangkog namin hu Jerusalem. ⁵ Dob salpu arini hanami ijai, misir ma hanami manorushon pardalanan. Haganup do sidea manaruhkon hanami hu darat ni huta ai, parinangon age dakdanak. I topi laut ai manrogop do hanami anjaha martonggo. ⁶ Anjaha dob marjabat tangan, masuk ma hanami hu kapal, anjaha sidea pe mulak ma. ⁷ Hun Tirus marlayar ma hanami hu Ptolomais; anjaha ijai ma ujung ni parlayarannami; ijabat-tangani hanami ma hasoman-hasoman ai, anjaha ijai ma hanami marsaran sadari. ⁸ Patarni ai bingkat ma hanami, anjaha das ma hu Kesarea. Masuk ma hanami hu rumah ni si Pilippus, evangelis ai, ai ma sada humbani na pitu ai, gabe tondok bani ma hanami. ⁹ Adong ompat boruni, sipanjahai. ¹⁰ Sanggah na marsaran ai hanami piga-piga ari ijai, tuad ma hun Judea sada halak, na margoran si Agabus. ¹¹ Ijumpahkon ma hanami, ibuat ma gondit ni si Paulus, anjaha isangkuthon ma ai bani tanganni ampa naheini, lanjar ihatahon ma: Sonon do simada gondit on sangkuton ni halak Jahudi i Jerusalem, anjaha ondoshononkon hu bagas tangan ni sipajuh begu-begu. ¹² Mambogei hata ai, ielek-elek hanami ma rap pakon halak na ijai ai, ase ulang tangkog ia hu Jerusalem. ¹³ Tapi nini si Paulus ma: Aha do na binahen nasiam in, tangis mambahen galek uhurhu? Sirsir do ahu sangkuton ronsi matei i Jerusalem halani Goran ni Tuhan Jesus. ¹⁴ Halani seng ra ia ojuron, sip ma hanami, nini hanami ma: Sai saud ma harosuh ni Tuhan in! ¹⁵ Ase dob salpu ari ai, marugas ma hanami, laho tangkog hu Jerusalem. ¹⁶ Anjaha dihut do deba susian na hun Kesarea mangkasomani hanami, anjaha ibobai do hanami tondok hubani si Manason, na hun Kiprus, ai ma sada halak na dob dokah gabe susian. ¹⁷ Daskonsi hanami i Jerusalem, malas do uhur ni sanina-sanina ai manjalo hanami. ¹⁸ Anjaha patarni ai laho ma si Paulus rap pakon hanami marayak si Jakobus, anjaha roh do ganup sintua-sintua. ¹⁹ Jadi dob ipadas tabini bani sidea, ipajojor ma na binahen ni Naibata bani halak sipajuh begu-begu marhitei horjani. ²⁰ Mambogei ai ipasangap sidea ma Naibata. Dob ai ihatahon sidea ma bani: Iidah ho do sanina, marribu-ribu do halak Jahudi na dob porsaya, anjaha haganup do sidea mamponguthon titah in. ²¹ Ibogei sidea, ipodahi ho do halak Jahudi, na i tongah-tongah ni sipajuh begu-begu, ase itadingkon si Musa, anjaha ihatahon ho bani sidea, seng pala be sunaton anak ni sidea atap dalankonon adat-adat in. ²² Ai pe sonaha ma? Tontu ibogei do na dob roh ho. ²³ Halani ai bahen ma songon na hinatahonnami on bam! Adong do bannami ompat halak, na marutang bagah-bagah. ²⁴ Arahkon ma sidea, uras ma dirimu rap pakon sidea, anjaha harugihon ma papangkashon jambulan ni sidea, gabe botohon ni haganup halak ma, na so tongon do hape barita pasal ho ai, anjaha na dihut do homa ho mangkorjahon titah in. ²⁵ Ia sipajuh begu-begu, na dob gabe porsaya, domma iputushon hita anjaha na parentahkon, ase ijaga bei dirini dompak galangan bani sisombah-sombahon, daroh, na matei seng sinayat ampa panriah-riahon. ²⁶ Jadi patarni ai iarahkon si Paulus ma halak ondi, anjaha dob iuras dirini rap pakon sidea, laho ma sidea hu rumah panumbahan, laho patugahkon sadihari marujung panorang pangurason ai, anjaha sadihari padason galangan ni sidea bei. ²⁷ Tapi sanggah na laho marujung sipitu ari ai, iidah halak Jahudi na hun Asia ma ia i rumah panumbahan, jadi ipajobu-jobu sidea ma haganup halak na mabuei ai, itangkap ma ia, ²⁸ lanjar idilo-dilohon: Nasiam halak Israel, urupi nasiam ma hanami on! On ma halak ia, na mangajar-ajari halak ija-ija pe manlawan bangsanta, ampa titah in ronsi ianan on. Ambahni ai dihut do halak Gorik iarahkon hu rumah panumbahan on, anjaha ibutaki do ianan na pansing on! ²⁹ Ai iidah sidea do si Tropimus, na hun huta Epesus rap pakonsi i huta ai, gabe iagan, na dob iarahkon si Paulus do ia hu rumah panumbahan ai. ³⁰ Jadi lutu ma ganup huta ai, anjaha martumpu ma ganup halak na mabuei ai; itangkap sidea ma si Paulus, isarad ma ia hudarat ni rumah panumbahan ai, anjaha mintor itutup ma sagala labah. ³¹ Anjaha sanggah na sihol bunuhon ni sidea ia, das ma hata hubani kapiten, na dob lutu do huta ai. ³² Jadi mintor iarahkon ma tentara ampa letnan, laho mandorab sidea; dob iidah sidea kapiten ai ampa tentarani, iparontihon sidea ma mambalbali si Paulus. ³³ Laho ma kapiten ai hujai, itangkap ma si Paulus, anjaha ihatahon ma garion ia bani dua gari; ai ipareksa ma atap parja do ia ampa aha do na binahenni. ³⁴ Tapi marsihatahon hatani do na mabuei ai; anjaha halani seng jumpahsi hatorangan na sintong, halani na lutu ai, ihatahon ma boanon ia hu tangsi. ³⁵ Anjaha dob das ia bani andar ai, tentara ai mando mangusungsi, halani parurup ni halak na mabuei ai, ³⁶ ai sai mangihut do halak na mabuei ai, lanjar dilo-dilo: Bunuh ia! ³⁷ Sanggah na sihol arahkonon ni sidea ia hu bagas tangsi ai, ihatahon ma hubani kapiten ai: Boi do ahu manluar bamu? Gabe nini ma: Ibotoh ho do hape hata Gorik? ³⁸ Sedo ho hape halak Masir ai, na manlutui baru on anjaha na mangarahkon ompat ribu halak gerombolan hu halimisan? ³⁹ Jadi nini si Paulus ma: Halak Jahudi do ahu, marasal hun Tarsus na i nagori Silisia, warga kota na tarbarita ai. Hupindo atap na boi do ahu marsahap hubani halak na mabuei in! ⁴⁰ Jadi halani ilopas do, jongjong ma si Paulus bani andar ai, anjaha ihilaphon ma tanganni bani halak na mabuei ai. Jadi dob sip bei, marsahap ma ia bani sidea ibagas hata Heber, nini ma:

¹ Nasiam sanina ampa bapa, tangar nasiam ma sonari pangapition diri na huhatahon i lobei nasiam! ² Ase dob ibogei sidea, na iparsahapkon ai sidea ibagas hata Heber, lambin sip ma sidea. ³ Halak Jahudi do ahu, tubuh i Tarsus na i Silisia, tapi magodang i huta on; i lobei ni si Gamaliel do ahu iajari domu hubani hatulimaton ni titah ni ompungta, pongkut do ahu mangirikkon Naibata, songon haganup nasiam sadari on. ⁴ Huparburu do ronsi matei parugama on, husangkut anjaha hu patutupkon do dalahi age naboru, ⁵ anjaha pasal ai, sintua ni malim ampa harungguan ni pangintuai-pangintuai do saksi bakku. Humbani sidea do hujalo surat siboanon hubani sanina-sanina ai, anjaha laho ma ahu hu Damaskus, sihol manangkapi na ijai ai homa, anjaha mamboan sidea ibagas gari hu Jerusalem, ase iuhumi. ⁶ Tapi masa ma, sanggah i tongah dalan ahu, dohorhon Damaskus, hira-hira tongah arian, sompong ma marsinalsal hun datas, inggot hubakku, sinalsal na lihar tumang. ⁷ Tompas ma ahu hu tanoh, anjaha hubogei ma sora na mangkatahon hubakku: Saul! Saul! Mase ma pardakdakonmu Ahu? ⁸ Jadi ningku ma mambalosi: Ise do Ham Tuhan? Nini ma hubakku: Jesus do Ahu, na hun Nasaret, na pinardakdakmin! ⁹ Iidah hasomanku do namin sinalsal ai, tapi anggo sora ai, na marsahap pakon ahu, seng ibogei sidea. ¹⁰ Jadi ningku ma: Aha ma sibahenonku, Tuhan? Jadi ihatahon Tuhan in ma hubakku: Jongjong ma ho, laho ma ho hu Damaskus, ijai ma patugahon bam haganup na patut sihorjahononmu. ¹¹ Tapi seng marpangidah be ahu ibahen sinalsal ni sondang ai, gabe itogu hasomanku mando ahu das hu Damaskus. ¹² Anjaha dong ma ijai sada halak, na margoran si Ananias, halak na daulat domu hubani titah in, dear do baritani bani haganup Jahudi na marianan ijai. ¹³ Roh do ia hubakku nini: Ambia Saul, marpangidah ma ho! Jadi mintor marpangidah ma ahu anjaha huidah ma ia. ¹⁴ Dob ai nini ma: Domma ipilih Naibata ni ompungta ho, ase itanda ho rosuh ni uhurNi, iidah ho Parpintor in anjaha ibogei ho sandiri sorani, ¹⁵ ase gabe saksini ho bani haganup jolma pasal na niidah ampa na binogeimu. ¹⁶ Ai pe, mase ma sonai sangsi-sangsi uhurmu? Jongjong ma anjaha tardidi, paburihkon dousamu marhitei na mandilo goranNi. ¹⁷ Dob mulak ahu hu Jerusalem anjaha martonggo i rumah panumbahan, marpanonggoran do ahu. ¹⁸ Huidah do Ia mangkatahon bakku: Papodas ma misir hun Jerusalem, ai seng ra sidea manjalo hasaksianmu pasal Ahu. ¹⁹ Jadi ningku ma: Ibotoh sidea do Tuhan, na hupatutupkon anjaha hulonsingi do na porsaya Bamu bani ganup rumah parguruan. ²⁰ Anjaha sanggah na hona duruskon daroh ni si Stepanus, saksi-Mu ondi, jongjong do au homa ijai, huhadearhon do ai, anjaha ahu manjaga pakeian ni na mambunuhsi. ²¹ Jadi nini ma dompak ahu: Laho ma, ai hubani na daoh do ho suruhonKu, ai ma hubani sipajuh begu-begu. ²² Das hubani hatani on, itangihon sidea do ia; dob ai ipagogoh sidea ma sorani, nini ma: Padaoh ma jolma sisonin hun tanoh on, seng patut ia manggoluh! ²³ Tapi sai mardilo-dilo do sidea, ihilap-hilapkon pakeianni anjaha ipansaburhon orbuk hu atas. ²⁴ Jadi ihatahon kapiten ai ma ia boanon hu bagas tangsi, anjaha isuruh ma pareksaon ia marhitei na manlonsingisi, ase ibotoh mase sonai parsurak-surak ni sidea dompaksi. ²⁵ Tapi dob isangkut sidea ia bani tali huling-kuling, nini si Paulus ma dompak letnan na jongjong ijai: Ai bulih do lonsingan nasiam warga negara Rom, age lape na pareksa parkarani? ²⁶ Mambogei ai letnan ai, laho ma ia bani kapiten ai, patugahkon ai, nini ma: Ai aha do na sihol bahenonmu? Halak Rom do hape halak ai. ²⁷ Jadi roh ma kapiten ai hubani, nini ma: Patugah bakku, halak Rom do ho tongon? Balosni: Ai do! ²⁸ Dob ai marbalos ma kapiten ai: Anggo ahu, buei do rugi mamboli hak warga negara in. Tapi nini si Paulus ma: Anggo ahu, humbani partubuhku do sonai. ²⁹ Jadi mintor surut ma halak na sihol mamareksa ai. Kapiten ai pe mabiar ma, dob ibotoh halak Rom do hape si Paulus, na dob sinuruhni sangkuton. ³⁰ Patarni ai sihol ma torang botohonni, aha halani mambahen na iaduhon halak Jahudi ia; ipadarat ma ia, ihatahon ma martumpu sintua ni malim ampa rapot bolon ai, anjaha si Paulus pe itogu ma hu tongah-tongah ni sidea.

¹ Jadi ikawahkon si Paulus ma rapot bolon ai, nini ma: Nasiam hasoman, na marparlahou do ahu humbani gok ni uhurhu i lobei ni Naibata ronsi sadari on. ² Tapi ihatahon sintua ni malim Ananias ma halak na jongjong ijai mamastap babahni. ³ Jadi nini si Paulus ma hubani: Pastapon ni Naibata ma ho, ale dingding na hinapur! Na hundul do ho manguhumi ahu marguru hubani titah, hape ihatahon ho do ahu pastapon marlawan bani titah! ⁴ Dob ai nini halak na jongjong ijai ma: Ai pahirion do sintua ni malim ni Naibata? ⁵ Jadi nini si Paulus ma: Lang na hubotoh, ale hasoman, ia sintua ni malim. Ai tarsurat do: Seng bulih pahirionmu sintua ni bangsamu. ⁶ Tapi ibotoh si Paulus ma deba humbani sidea, ai ma Sadukei, na deba nari halak Parisei, gabe idilohon ma i rapot ai: Nasiam sanina! Halak Parisei do ahu, anjaha anak ni Parisei. Halani pangarapan ai ampa parpuhoon humbani na matei do, ase hu paruhuman on ahu. ⁷ Jadi dob ihatahon sonai, marsalisih ma halak Parisei pakon halak Sadukei, gabe marbolah ma rapot ai. ⁸ Ai ihatahon Sadukei do, paboa seng dong parpuhoon humbani na matei, sonai age malekat, age tonduy. Tapi anggo Parisei, iparhatongon do haduasi. ⁹ Gabe lutu tumang ma. Tapi jongjong ma deba sibotoh surat humbani golongan ni Parisei manlawan, nini ma: Seng dong jumpah hanami na jahat bani halak on. Atap na tongon do iparsahapkon Tonduy ia atap malekat ni Naibata? ¹⁰ Tapi lambin banggalni ma paringoran ai, jadi mabiar ma kapiten ai, atap sonaha iparsirak sidea si Paulus, gabe ihatahon ma tuad tentara ai laho manariksi hun tongah-tongah ni sidea, anjaha ase iboan hu tangsi. ¹¹ Anjaha bornginni ai jongjong do Tuhan in i lambungni, nini ma: Tenger ma uhurmu! Songon na dob sinaksihonmu Ahu i Jerusalem, sonai do saksihononmu Ahu i huta Rom. ¹² Dob siang ari, mambahen panriahan ma halak Jahudi, marbulawan ma sidea, seng mangan atap minum sidea, anggo lape hona bunuh si Paulus. ¹³ Adong do lobih ompat puluh halak sidea, na mambahen parbulawanan ai. ¹⁴ Iparayak sidea ma sintua ni malim ampa pangintuai-pangintuai, nini ma: Domma marbulawan hanami, na so bulih daionnami age aha, anggo seng ibunuh hanami ope si Paulus. ¹⁵ Ai pe, rap ma nasiam pakon rapot in mangindohon bani kapiten ai, ase iboan ia hu lobei nasiam, songon na laho mamareksa parkara ai hun torang, anjaha hanami pe marsiap-siap ma mambunuhsi sanggah i tongah dalan ope. ¹⁶ Tapi tarbogei do partahi-tahian ai bani panogolan ni si Paulus, gabe laho ma ia hu tangsi, patugahkon ai bani si Paulus. ¹⁷ Jadi idilo si Paulus ma sada letnan, anjaha ihatahon ma dompaksi: Arahkon ham lobei parana on bani kapiten ai, ai adong do sipatugahonni bani. ¹⁸ Jadi iarahkon ma ia, anjaha iboan ma bani kapiten ai, nini ma: Na idilo si Paulus na tartutup ai do ahu; ipindo hubakku, ase huboan parana on bamu, halani adong sihatahononni bamu. ¹⁹ Ijolom kapiten ai ma tanganni, iarahkon ma ia bani na suhi, anjaha isungkun ma ia: Ai aha do sipatugahonmu bakku? ²⁰ Jadi nini ma: Na dob manriah do halak Jahudi, mangindohon bamu, ase boanon patar si Paulus hu lobei ni rapot bolon, songon na laho mamareksa parkarani in huntorang. ²¹ Ai pe, ulang ma balosi ham sidea, ai lobih do ompat puluh halak humbani sidea, na dob marbulawan, seng mangan atap minum pe, anggo lape ibunuh sidea ia; domma marsiap-siap sidea, pitah na paimahon hatamu mando. ²² Dob sonai isuruh kapiten ai ma parana ai mulak, ihatahon ma bani: Ulang patugah atap bani ise pe, na dob ipadas ho on bakku. ²³ Jadi idilo ma dua letnan hu lobeini, nini ma: Pasirsir nasiam ma dua ratus tentara laho hu Kesarea, rap pakon pitu puluh halak tentara siajak huda, ambah ni ai dua ratus sipartanja, pukul tolu borngin. ²⁴ Pasirsir homa huda siajakon ni si Paulus, laho mamboansi horas-horas hubani gubernus Feliks. ²⁵ Lanjar ibahen ma surat sonon isini: ²⁶ Klaudius Lisias hubani na pinarsangapan gubernur Feliks. ²⁷ Na itangkap halak Jahudi do halak on; sanggah sihol bunuhon ni sidea ia, roh do ahu ampa tentera paluahkonsi, dob hubotoh halak Rom do ia. ²⁸ Laho mambotoh atap halani aha do, ase isalahkon sidea ia, gabe huarahkon ma ia hulobei ni rapot ni sidea. ²⁹ Jadi jumpah ahu ma, halani parsalisihan pasal titah ni sidea do ase iaduhon sidea ia; seng dong alasan mambahen marutang hosah ia atap tartutup. ³⁰ Tapi adong ma na patugahkon bakku pasal partahi-tahian ni sidea dompak halak on, gabe mintor ma husuruh ia bamu, anjaha huhatahon homa bani sipangadu, ase bamu ma isahapkon sihatahononni. ³¹ Ase iboan tentara ai ma si Paulus domu hubani parentah ai, iarahkon ma ia bani na saborngin ai das hu Antipatris. ³² Patarni ai isuruh ma siparhuda manaruhkonsi torus; mulak hu tangsi ma anggo sidea. ³³ Jadi das ma sidea hu Kesarea, ipadas sidea ma surat ai hubani gubernur ai, anjaha si Paulus pe iarahkon ma hu lobeini. ³⁴ Jadi dob ibasa surat ai, isungkun ma, barang hun nagori ja do ia. Anjaha dob ibotoh na hun Silisia do ia, nini ma: ³⁵ Hupareksa pe ho, anggo roh na mangaduhon ho ai. Jadi ihatahon ma, ase itahan ia i rumah paruhuman ni raja Herodes.

¹ Ase dob salpu lima ari, tuad ma si Ananias, sintua ni malim ai, rap pakon deba pangintuai ampa sada siparhata, na margoran si Tertullus; jadi ipadas sidea ma pangaduanni pasal si Paulus bani gubernur ai. ² Jadi dob idilo ia, ihatahon si Tertullus ma pangaduanni, nini ma: ³ Paboa na dapotan damei na buei do hanami marhitei usahamu, anjaha marhitei panarihonmu buei ma tambah hadearon bani bangsa on, pasal ai iakui hanami do tongtong atap ija-ija pe marhasoman tarima kasih banggal, ham Feliks, na pinarsangapan. ⁴ Tapi ase ulang madokahtu hanami patangi-tangionmu, hupangindo ma bamu, ase ra ma ham, domu hubani rosuh ni uhurmu, manangihon hanami tongkin. ⁵ Jumpah hanami do halak on songon sampar ampa panggeori bani haganup halak Jahudi i sab dunia on, anjaha pambobai ni sekte Nasarani do ia. ⁶ Iuji do homa pabutakkon rumah panumbahan, halani ai do, ase itangkap hanami ia, ase iuhumi hanami ia domu hubani titahnami. ⁷ Tapi roh ma kapiten Lisias, anjaha ibuat ma ia marhasoman paksa humbennami, ⁸ anjaha iparentahkon sagala sipangadu roh mangadap ham. Anggo isungkun ham ia, boi do botohonmu, paboa sintong do pangaduannami in. ⁹ Halak Jahudi pe dihut do mambahen pangaduan, anjaha ionjolhon sidea do, paboa sonai do tongon parkara ai. ¹⁰ Jadi dob ihilaphon gubernur ai tanganni mangkatahon, ase marsahap ia, gabe nini si Paulus ma mambalosi: Halani hubotoh, domma dokah ham panguhum bani bangsa on, hinsah do uhurhu mansahapkon hata pangapition bani diringku. ¹¹ Boi do patangkasonmu, paboa sapuluh dua ari ope salpu, dob tangkog ahu hu Jerusalem laho martonggo. ¹² Seng dong jumpah sidea ahu marsual pakon atap ise pe, barang manlutui halak na mabuei, age i rumah panumbahan, age i rumah parguruan barang i bagas huta pe. ¹³ Anjaha seng tarbuktihon sidea bamu pasal pangaduan ni sidea ai dompak ahu. ¹⁴ Tapi pasal on huakui do bamu, na hubalosi do Naibata ni ompung, mangihutkon podah ai, na ginoran ni sidea sekte, anjaha huhaporsayai do haganup na tarsurat bani titah atap marhitei nabi-nabi pe. ¹⁵ Na marpangarapan do ahu bani Naibata, paboa mulak manggoluh parpintor ampa pargeduk, songon na niarapkon ni sidea ai. ¹⁶ Halani ai do mambahen huhabujurhon, ase maruhur na borsih ahu tongtong i lobei ni Naibata ampa i lobei ni jolma. ¹⁷ Tapi dob salpu piga-piga tahun, roh ma ahu mamboan sibere-bere ampa galangan bani bangsangku. ¹⁸ Anjaha sanggah na hudalankon ai, dob salosei pangurasion, jumpah piga-piga halak Jahudi na hun Asia ma ahu, tapi seng adong marhasoman halak na mabuei barang ibagas na geor pe. ¹⁹ Sidea do na patut mangadap ham laho mangaduhon, anggo adong pangaduan ni sidea dompak ahu. ²⁰ Age sidea on pe ihatahon ma barang aha do salahku jumpah sidea, sanggah na jongjong ahu i rapot bolon ai. ²¹ Pitah hata on do na husahapkon, sanggah na jongjong ahu i tongah-tongah ni sidea: Halani parpuhoon humbani na matei do, ase jongjong ahu i lobei ni paruhuman nasiam sadari on. ²² Tapi ilalap-lalapi si Feliks ma sidea, halani torang tumang do ibotoh pasal podah ai, nini ma: Dob tuad pe kapiten Lisias, ase huputuskon parkara nasiam on. ²³ Jadi iparentahkon ma hubani kopala ni tentara, ase itahan si Paulus, tapi bebas otik, anjaha seng bulih larangon hasomanni marugas bani. ²⁴ Dob salpu piga-piga ari, roh ma si Feliks ampa parinangonni si Drusilla, boru Jahudi; isuruh ma na mangalopi si Paulus, laho mambogei hatani pasal haporsayaon bani Kristus Jesus. ²⁵ Tapi sanggah na marsahap ia pasal hapintoran, na manrajai diri ampa uhum magira, mabiar ma si Feliks, gabe nini ma: Mulak ma ho lobei; anggo adong panorangku use, hudilo pe ho. ²⁶ Mangarap do ia, ra si Paulus mambere duit bani, halani ai gati do isuruh na mangalop si Paulus, lanjar marsahap-sahap pakonsi. ²⁷ Tapi dob salpu dua tahun, roh ma si Porkius Festus manggantih si Feliks. Anjaha halani sihol do uhurni mambuat uhur ni halak Jahudi, gabe ipaturut si Feliks ma si Paulus tartahan.

¹ Dob adong tolu ari si Festus manjolom pamarentahan, tangkog ma ia hun huta Kesarea hu Jerusalem. ² Jadi roh ma hu lobeini sintua ni malim ampa kopala-kopala ni halak Jahudi mangaduhon si Paulus. ³ Ipindohon sidea ma hubani, songon idop ni uhurni bani sidea manlawan si Paulus, ase isuruh ia hu Jerusalem, tapi domma iranggihon sidea hinan manggompangisi i tongah dalan, laho mambunuhsi. ⁴ Tapi nini si Festus ma mambalosi: Na dob tartahan do si Paulus i Kesarea, ahu pe podas ma mulak hujai. ⁵ Ai pe, rap tuad ma na sangap-sangap nasiam pakon ahu, anjaha anggo adong na salah bani halak ai, ase sidea ma mangaduhonsi. ⁶ Ase dob adong ia i tongah-tongah ni sidea ualuh ronsi sapuluh ari, tuad ma ia hu Kesarea; anjaha patarni ai hundul ma ia bani kursi paruhumanni, anjaha ihatahon ma boanon si Paulus hu lobeini. ⁷ Ase dob roh ia, iinggoti halak Jahudi, na tuad hun Jerusalem ma ia, anjaha ipangkatahon sidea ma dompaksi pangaduan na borat, tapi seng tarbuktihon sidea. ⁸ Tapi nini si Paulus ma bani hata pangapition dirini: Seng mardousa ahu dompak titah ni Jahudi, barang dompak rumah panumbahan barang dompak Kesar pe. ⁹ Tapi laho mambuat uhur ni Jahudi, nini si Festus ma mambalosi si Paulus: Ra do ho tangkog hu Jerusalem, ase ijai ho huuhumi pasal haganupan ai? ¹⁰ Jadi nini si Paulus ma: Na jongjong do ahu nuan i lobei ni paruhuman ni Kesar, anjaha ijon do ahu patut iuhumi. Hubani halak Jahudi seng dong marsalah ahu, songon na torang ibotoh ham. ¹¹ Ai pe, anggo adong huhorjahon na jahat, na patut mambahen marutang hosah ahu, seng manjua ahu matei; tapi anggo seng tongon na tinukaskon ni sidea ai bakku, ise pe lang boi na padas ahu bani sidea. Naik apel do ahu bani Kesar. ¹² Ia si Festus, dob manriah ia pakon hasomanni sapanriahan, nini ma mambalosi: Mangindo apel do ho bani Kesar, ai pe bani Kesar ma ho laho! ¹³ Dob salpu piga-piga ari roh ma raja Agrippa pakon si Bernike hu Kesarea, laho manghormat si Festus. ¹⁴ Sanggah na ijai sidea barang piga-piga ari, ipatugah si Festus ma bani raja ai pasal parkara ni si Paulus, nini ma: Adong do ijon sada halak na tartutup, itadingkon si Feliks. ¹⁵ Sanggah na i Jerusalem ahu, mangadap do hubakku sintua ni malim ampa kopala-kopala ni halak Jahudi, ipindo ase hona uhum ia. ¹⁶ Jadi ningku ma mambalosi sidea: Seng adat ai bani halak Rom mangondoskon sada halak, anggo lang palobei mardumpar bohi nabahen na niaduhon ampa sipangadu, anjaha nabere panorang mangapiti dirini dompak pangaduan ai. ¹⁷ Halani ai dob tumpu sidea ijon, seng hupadokah-dokah be; patarni ai mintor hundul ma ahu bani paruhuman, anjaha huhatahon ma boanon dalahi ai. ¹⁸ Sanggah jongjong sipangadu ai, seng adong age sada salahni tarbuktihon sidea, songon niagan ni uhur hinan. ¹⁹ Tapi adong do parsalisihan ni sidea pasal ugama ni sidea pakon pasal sada halak, na margoran Jesus, na dob matei gabe mulak manggoluh, nini si Paulus. ²⁰ Tapi sanggah na sosak ahu pasal parkara ai, husungkun ma, atap na marosuh do ia laho hu Jerusalem, ase ijai ia iuhumi pasal ai. ²¹ Tapi ipindo si Paulus do ramotkononkon ia, paimahon haputusan ni na marmulia in; jadi huhatahon ma jagaon ia, paima husuruh ia bani Kesar. ²² Tapi nini si Agrippa ma hubani si Festus: Sihol do bogeionku hata ni halak ai. Jadi nini ma: Anggo sonai, patar ma bogei ham ia! ²³ Jadi patarni ai, roh ma si Agrippa ampa si Bernike marhasangapon banggal, masuk ma sidea hu kamar paruhuman rap pakon panglima-panglima ampa na sangap-sangap i huta ai, anjaha ihatahon si Festus ma boanon si Paulus hujai. ²⁴ Jadi ihatahon si Festus ma: Ham raja Agrippa ampa haganup na adong ijon rap pakon hanami, tonggor nasiam ma halak in! Halani ia do ase iparayak halak Jahudi ahu, i Jerusalem age ijon, anjaha sai idilo-dilohon, na so patut be manggoluh ia. ²⁵ Tapi torang do hubotoh na so adong do salahni mambahen patut marutang hosah ia. Halani naik apel do ia bani Kesar huputushon ma marsuruhsi hubamu. ²⁶ Tapi seng dong tarsuratkon ahu pasalsi bani tuanku; halani ai do ase huboan ia hu lobei nasiam, tapi tarlobih ma ai hu lobeimu, ale raja Agrippa, ase adong sisurathononku, dob napareksa ia. ²⁷ Ai haru do huahap, suruhon na tartahan, lang napatugah hasalahanni.

¹ Dob ai ihatahon si Agrippa ma hubani si Paulus: Dear ma marsahap ho pasal dirimu! Jadi iangkat si Paulus ma tanganni, lanjar marsahap ma ia mangapiti dirini. ² Na martuah do ahu huahap, ham raja Agrippa, halani boi ahu sadari on mambahen pangapition pasal diringku dompak sagala pangaduan ni Jahudi, ³ halani botoh tumang do ham pasal adat ampa parsalisihan ni halak Jahudi; halani ai mangindo ma ahu bamu: Sabar ma ham manangihon hatangku! ⁴ Ibotoh halak Jahudi do ganup parlahouhu humbani haetek-etekonku nari i tongah-tongah ni bangsangku i Jerusalem. ⁵ Tongon domma dokah itandai sidea ahu, anjaha ambit ra sidea, tarsaksihon sidea do, paboa na huirikkon do golongan Parisei, ai ma situlimatan pasal ugamanta. ⁶ Anjaha sonari jongjong do ahu i paruhuman, halani pangarapan ni uhur bani bagah-bagah, na binere ni Naibata bani ompungta. ⁷ Sihol das hujai do na niarapkon ni bangsanta na sapuluh dua marga in, mambahen na ibalosi sidea Naibata arian pakon borngin humbani bois ni gogoh ni sidea. Halani pangarapan ai do, ale raja nami, mambahen na iaduhon halak Jahudi ahu. ⁸ Sonaha ma, ase adong i tongah-tongah nasiam na so mangkaporsayai, paboa pagoluhon ni Naibata do na matei? ⁹ Ahu sandiri huagan do lobei, maningon patut do lawanon Goran ni Jesus na hun Nasaret in sagogoh-gogohni. ¹⁰ Anjaha sonai do hubahen i Jerusalem. Seng pitah hupatutupkon buei humbani halak na mapansing ai, marhitei kuasa na humbani sintua ni malim, tapi anggo tarbunuh sidea, huhadearhon do ai. ¹¹ Gati do huarsik sidea bani haganup rumah parguruan, andohar ra sidea manrisai; halani gila ni uhurhu, huparburu do sidea ronsi huta sidaohan. ¹² Sonai homa laho do ahu hu Damaskus marhitei kuasa ampa parpaingkat ni sintua ni malim. ¹³ Tapi sanggah i tongah dalan, ham rajanami, sanggah tongah arian, huidah ma sinalsal na liharan marimbang mataniari roh hun langit, manondangi ahu inggot ampa hasomanku saodoran. ¹⁴ Jadi martompasan ma hanami haganup hu tanoh, anjaha hutangar ma sada sora ibagas hata Heber: Saul, Saul! Mase pardakdakonmu Ahu? Sunsah ma ho manandaki suga-suga! ¹⁵ Tapi ningku ma: Ise do Ham, Tuhan? Jadi nini Tuhan in ma: Jesus do Ahu, na pinardakdakmin! ¹⁶ Tapi jongjong ma ho! Ase Hupataridahkon pe diringKu bam, on do sura-surangKu, ai ma pabangkit ho gabe juak-juak ampa saksingKu, laho manaksihon na dob niidahmu ampa na sihol pataridahonKu ope bam! ¹⁷ Hupaluah pe ho humbani bangsa on ampa humbani bangsa sipajuh begu-begu, ai hubani sidea do ho suruhonKu, ¹⁸ laho mambuka mata ni sidea, ase mulak sidea humbani hagolapan hubani haliharon, anjaha humbani kuasa ni sibolis hubani Naibata, ase ijalo sidea hasasapan ni dousa ampa rupei rap pakon halak na pansing, halani haporsayaon Bakku. ¹⁹ Halani ai, ale raja Agrippa, seng mangengkar ahu bani panonggoran na hun nagori atas ai, ²⁰ gabe huambilankon ma parlobei bani halak na i Damaskus, dob ai bani na i Jerusalem, sonai homa bani haganup na i Judea ampa halak sipajuh begu-begu, ase ipaubah uhur ni sidea anjaha mulak bani Naibata, anjaha iparlahouhon na patut domu bani uhur na dob mubah. ²¹ Halani ai do ase itangkap Jahudi ahu i rumah panumbahan, anjaha domma sihol bunuhon ni sidea ahu. ²² Tapi iurupi Naibata do ahu ronsi sadari on, mambahen boi ahu jongjong marambilan bani na etek-etek ampa na magodang, anjaha seng dong na huhatahon na so domu hubani na jinahaan ni nabi-nabi ampa si Musa, ²³ paboa, na maningon manaron do Kristus, anjaha Ia parlobei puho humbani na matei, laho mamaritahon haliharon bani bangsa in ampa bani bangsa sipajuh begu-begu. ²⁴ Halani sonai pangkatahonni mambela dirini, nini si Festus ma marsora na gogoh: Na podoan do ho Paulus! Parbinotohanmu na buei in do mambahen podoan ho. ²⁵ Nini si Paulus ma: Seng na podoan ahu, ham Festus, na pinarsangapan, tapi hata na tongon anjaha na torang do na huhatahon. ²⁶ Halani torang do in ibotoh raja in, mambahen na hinsah uhurhu mansahapkon ai bamu; ai tenger do uhurhu seng adong age sada hunjai na lingod i lobeimu, ai seng masa ai bani na ponop. ²⁷ Ham raja Agrippa, porsaya do ham bani nabi? Hubotoh na porsaya do ham! ²⁸ Jadi nini si Agrippa ma hubani si Paulus: Tongkin nari mando ase gabe Kristen ahu ibahen ho. ²⁹ Jadi nini si Paulus ma: Ipangindo uhurhu humbani Naibata, tongkin atap dokah, seng pitah ham, tapi haganup halak na adong ijon na mambogei hatangku, gabe songon ahu on ma namin sobali gari on. ³⁰ Jadi jongjong ma raja ai ampa gubernur ai ampa si Bernike ampa hasoman ni sidea, ³¹ anjaha dob holang sidea, nini sidea ma samah sidea: Seng dong ihorjahon ia, na mambahen marutang hosah ia barang tartutup pe. ³² Lanjar nini si Agrippa ma hubani si Festus: Na boi do namin maluah halak ai, ambit lang apel ia bani Kesar.

¹ Dob iputushon, na maningon marlayar ma hanami hu Italia, gabe iondoskon ma si Paulus ampa deba hasomanni na tartutup hubani sada letnan, na margoran si Julius, humbani pasukan ni Kesar. ² Masuk ma hanami hubagas sada kapal na hun Adramitium, na laho hu pelabuhan na i Asia; dob ai bingkat ma hanami, ihasomani si Aristarkus, halak Makedonia, na hun Tessalonik ai. ³ Patarni ai mandarat ma hanami i Sidon; basar do si Julius hubani si Paulus, ilopas do ia marayak hasoman, ase itamuei sidea ia. ⁴ Hunjai marlayar ma hanami manopi-nopi pulou Kiprus, halani manuhar logou, ⁵ anjaha dob nabontas laut ni Silisia ampa Pampilia, das ma hanami hu Mira na i Likia. ⁶ Ijai jumpah letnan ai ma sada kapal Aleksandria, na sihol marlayar hu Italia, gabe hujai ma hanami ipamasuk. ⁷ Piga-piga ari nanget do parlayaronnami, anjaha mahol do hanami das hu Knidus. Anjaha, torus do manuhar logou bannami; i laut ni Salmone marlayar ma hanami manopi-nopi pulou Kreta. ⁸ Anjaha dob marhasunsahan hanami na manopi-nopi ai das ma hanami bani sada ianan, na margoran Palabuhan na majenges, dohorhon huta Lasea. ⁹ Domma buei bois panorang parlayaron ai anjaha domma homa salpu panorang puasa, halani ai marmara ma manoruskon parlayaron ai, gabe ipaingat si Paulus ma sidea, nini ma: ¹⁰ Nasiam hasoman, ia parlayaronta on huidah marhasunsahan anjaha marharugian banggal do, seng pitah bani muatan ampa kapal on tumang, tapi dihut do pakon bani hosahta. ¹¹ Tapi porsayaan do letnan ai bani jurumudi ai ampa bani simada kapal ai, ase bani hata ni si Paulus. ¹² Halani hurang dear do palabuhan ai ianan pasalpuhon musim borgoh, sihol marlayar ma sidea hunjai nini uhur ni sidea bueinan, andohar boi sidea das i Penike pasalpuhon musim borgoh, ai ma sada palabuhan i Kreta, na buha dompak nariti ampa manabia. ¹³ Anjaha, sanggah jenges parombus ni logou hun dangsina gabe tarpasaud ma sura-sura ai nini uhur ni sidea, jadi iangkat sidea ma sauh, anjaha marlayar ma sidea manopi-nopi pulou Kreta. ¹⁴ Tapi seng pala piga dokah roh ma hun pulou ai haba-haba bolon, na margoran haba-haba irisanna. ¹⁵ Iluahon ma kapal ai; halani seng tardompakkonsi logou ai gabe ipaturut hanami mando, lanjar iboan ma hanami mayub-ayub. ¹⁶ Sanggah mayub-ayub hanami i topi ni sada pulou na etek, na margoran Klauda, ikuasai hanami ma sikosi ai, tongon marhasonam buei hasunsahan. ¹⁷ Anjaha dob iangkat sikosi ai huatas kapal, iusahahon sidea ma manlilit kapal ai bani tali. Anjaha halani mabiar sidea tardempar hu Sirtis, ipaturun mando layar, jadi sonai mando hanami mayub-ayub. ¹⁸ Halani sosak tumang hanami ibahen haba-haba ai, patarni ai ibuang ma muatan ni kapal ai, ¹⁹ anjaha bani ari patoluhon iambukkon sidea ma homa parugas-parugas ni kapal ai marhitei tangan ni sidea sandiri. ²⁰ Anjaha halani domma piga-piga ari seng taridah mataniari barang bintang pe, anjaha torus do homa gogoh haba-haba, putus ma arapan nami boi hanami maluah. ²¹ Anjaha halani dokah ma sidea lang mangan, jongjong ma si Paulus i tongah-tongah ni sidea, nini ma: Nasiam hasoman, ambit ma namin itangihon nasiam ahu, ulang laho hun Kreta, lang pala manaron hasunsahan ampa harugian on hita! ²² Ai pe, huojur ma nasiam marhinsah ni uhur, ai sahalak pe lang humbanta on na mahua, pitah kapal on do hansa. ²³ Ai na jongjong do na borngin i lambungku malekat ni Naibata, simada ahu anjaha na hubalosi, ²⁴ nini: Ulang ho mabiar, ale Paulus, ai maningon jongjong do ho ilobei ni Kesar, anjaha domma iondoskon Naibata bam haganup hasomanmu na sakapal in. ²⁵ Halani ai, tenger ma uhurnasiam hasoman, ai porsaya do ahu bani Naibata, maningon saud do na hinatahonni ai bakku. ²⁶ Tapi maningon tardempar do hita bani sada pulou. ²⁷ Pasapuluh-ompat-bornginkon na mumbang-umbang ai hanami i laut Adria, hira-hira tongah borngin, iahap uhur ni parkapal ai ma dohor daratan. ²⁸ Jadi idabuh sidea ma tali panibar, gabe dapot ma dua puluh holag bagasni; dob maju otik hunjai iulakkon ma use isibar, gabe dapot ma sapuluh lima holag. ²⁹ Halani mabiar tombom holi hanami bani batu karang, gabe idabuh ma ompat sauh hampit pudi-pudi ni kapal ai, paima siang ari. ³⁰ Dob ai sihol lintun ma anak kapal ai hun kapal ai, ipatoruh ma sikosi ai hu laut, iparsidalian sihol mandabuh sauh hun lobei-lobei ni kapal ai. ³¹ Jadi ihatahon si Paulus ma hubani letnan ai ampa hubani tentara ai: Anggo seng soh sidea i kapal on, seng tarbahen nasiam maluah. ³² Jadi irotap tentara ai ma tali ni sikosi ai, lanjar ipaturut mayub. ³³ Tapi marayak siang ari, iojur si Paulus ma sidea mangan, nini ma: Pasapuluh-ompat arihon ma sadari on, nasiam paima-imahon, seng mangan, aha pe lang idai nasiam. ³⁴ Halani ai huojur ma ase mangan nasiam, ai panumpak do in bani haluahonnasiam, ai sada jambulan pe lang marurus humbani ulunasiam bei. ³⁵ Ase dob ihatahon sonai, ibuat ma ruti ai, ihatahon ma tarimakasih bani Naibata i lobei ni sidea ganup, iponggoli ma ai, lanjar ipungkah ma mangankon. ³⁶ Jadi hinsah ma uhur ni sidea lanjar mangan bei ma. ³⁷ Ia bueinami i kapal ai, dua ratus pitu puluh onom halak do. ³⁸ Dob bosur sidea idabuh ma gandum ai hu laut laho pahampung parau ai. ³⁹ Dob torang ari, iidah sidea ma daratan, tapi lang itanda sidea. Iidah sidea ma sada teluk na marpasir, gabe hujai ma isura sidea padason kapal ai, anggo tarbahen. ⁴⁰ Jadi irotap sidea ma tali-tali ni sauh ai, ipaturut i laut ai, anjaha itanggali ma homa tali ni amudi ai; ipasang ma layar lobei-lobei dompak logou, ase iboan sidea hu pasir ai. ⁴¹ Jadi tarlanggar ma kapal ai bani sada gosong, lanjar ipaturut tardempar ijai. Longkot ma lobei-lobei ni kapal ai ijai, seng miut be, anjaha pudi-pudi ni kapal ai maseda ibahen gilumbang. ⁴² Sihol do tentara ai mambunuh sagala halak tahanan, ase ulang lintun sidea marhitei na marlanguy, ⁴³ tapi ilanglangi letnan ai do sura-sura ni sidea ai, halani sihol do pagoluhonni si Paulus. Iparentahkon ma na pandei marlanguy manlumpat hu laut, ase parlobei hu darat, ⁴⁴ anjaha na legan ai hun pudi martilampung papan-papan ampa ponggol-ponggol ni kapal ai. Sonai ma boi sidea ganup maluah hu darat.

¹ Dob das hanami hu darat, ibogei hanami ma Malta do goran ni pulou ai. ² Basar tumang do parpulou ai bannami. Halani roh udan anjaha borgoh homa ari, ipagara sidea ma apuy banggal anjaha isuruh hanami hundul maringgot. ³ Jadi sanggah na patumpuhon ranting-ranting si Paulus, laho mannahkon ai hubagas apuy, luar ma hunjai sada ulog darih halani milasni, lanjar ipagut ma tanganni. ⁴ Mangidah ulog ai gantung-gantung bani tangan ni si Paulus, nini parpulou ai ma samah sidea: Tontu pamunuh do halak on. Ai age pe maluah ia hun laut in, seng ipalopas sipambalas in ia manggoluh. ⁵ Tapi ipirpirhon ma ulog ai hubagas apuy, anjaha seng pala mahua ia. ⁶ Tapi anggo sidea iagan do maningon butong ma ia barang mintor matei jurgang, anjaha dob dokah ipaima sidea, tapi seng mahua ia iidah, mubah ma pingkiran ni sidea, gabe ihatahon ma, naibata do ia. ⁷ Lang daoh humbani ianan ai, adong do kobun ni kopala ni pulou ai, na margoran si Publius. Dear do panjaloni bannami, anjaha itamuei do hanami tolu ari dokahni. ⁸ Bani panorang ai tibal-tibal do bapa ni si Publius, pane-paneon anjaha disentrion. Jadi masuk ma si Paulus marayaksi, anjaha dob martonggo, itampeihon ma tanganni hubani, gabe malum ma. ⁹ Dob sonai, roh ma na boritan na legan i pulou ai, jadi malum bei ma. ¹⁰ Gabe sangap tumang ma hanami ibahen sidea, anjaha sanggah na misir hanami marlayar, ipasirsir sidea do na porlu bennami. ¹¹ Jadi dob salpu tolu bulan, bingkat ma hanami marlayar bani sada kapal Aleksandria, na martanda silinduat, na dob pasalpuhon musim borgoh i pulou ai. ¹² Das ma hanami hu Sirakusa, anjaha marsaran ma ijai tolu ari dokahni. ¹³ Hunjai manopi-nopi pasir ma hanami, anjaha das ma i Regium. Patarni marombus ma logou dangsina, gabe das ma hanami ari paduahon i Putioli. ¹⁴ Ijai pajumpah ma hanami pakon sanina-sanina, anjaha iontang do hanami rap pakon sidea pitu ari dokahni. Dob sonai, bingkat ma hanami hu huta Rom. ¹⁵ Dob ibogei sanina-sanina na ijai ai pasal hanami, roh ma sidea mangalo-alo hanami hu Appiiporum ampa Tres Taberne. Mangidah sidea ai, mangkatahon tarimakasih ma si Paulus bani Naibata, anjaha lambin tenger ma uhurni. ¹⁶ Anjaha dob das hanami hu huta Rom ilopas do si Paulus, marianan sandirian rap pakon sada tentera na manjagaisi. ¹⁷ Dob salpu tolu ari, idilo si Paulus ma kopala-kopala ni halak Jahudi, anjaha dob roh sidea, nini ma hubani sidea: Ia ahu, nasiam hasoman, seng dong hubahen barang aha bani bangsanta barang bani adat ni ompungta, hape isangkut do ahu i Jerusalem anjaha iondoskon bani halak Rom. ¹⁸ Dob ipareksa sidea ahu, sihol paluahon ni sidea do ahu, halani seng dong jumpah salahku, na mambahen marutang hosah ahu. ¹⁹ Tapi halani sai manlawan do halak Jahudi ai, gabe tarpaksa ma ahu mangindo apel bani Kesar, sedo halani adong siaduhononku dompak bangsanta. ²⁰ In do halani, ase hudilo nasiam, ase huidah anjaha huparsahapkon, ai halani pangarapan ni bangsa Israel do mambahen na hona gari ahu. ²¹ Jadi nini sidea ma dompaksi: Seng dong ijalo hanami surat ni sidea pasal ham, anjaha hasoman na roh hunjai pe, seng dong patugahkon atap aha pe na jahat pasal ham. ²² Tapi sihol do bogeionnami pingkiranmu, halani ibotoh hanami ia sekte in jumpahan parlawanan do atap ija-ija pe. ²³ Ase dob itontuhon sidea arini rap pakonsi, roh ma sidea buei marayaksi hubani iananni ai. Jadi ipatorang anjaha isaksihon ma bani sidea humbani sogod das hubani bodari pasal harajaon ni Naibata, anjaha ilajou ma mambahen marhatongon sidea pasal Jesus maronjolan bani titah ni si Musa ampa nabi-nabi. ²⁴ Deba porsaya do marhitei na hinatahonni ai, tapi na deba lang porsaya. ²⁵ Jadi marsalisih ma sidea samah sidea, gabe laho bei ma, dob lobei ihatahon si Paulus bani sidea: Sintong ma na hinatahon ni Tonduy Napansing marhitei nabi Jesaya bani ompung nasiam, ²⁶ ai nini do: Laho ma ho bani bangsa in, anjaha hatahon: Sai na bogeionmu do in, tapi lang arusanmu, anjaha sai na idahonmu do in, tapi lang tandaonmu. ²⁷ Ai domma mapir uhur ni bangsa on, anjaha pinggol ni sidea borat marbinogei; mata ni sidea itutup sidea, ase ulang marpangidah mata ni sidea, ulang marpanangar pinggolni, ulang mangarusi uhurni anjaha mulak sidea Bakku, gabe hupamalum sidea. ²⁸ Botoh nasiam ma, domma itongos Naibata haluahon on bani halak sipajuh begu-begu, anjaha tangihonon ni sidea do in. ²⁹ Ase dob ihatahon ai laho ma Jahudi ai hunjai; buei do parsualan ni sidea samah sidea. ³⁰ Dua tahun do si Paulus marianan bani rumah sewaanni ai, ijalo do sagala na roh hubani. ³¹ Marhinsah ni uhur do ia mangambilankon harajaon ni Naibata, ampa mangajarhon pasal Tuhan Jesus Kristus, anjaha seng dong na mangambat.