2 TIMOTEUS

¹ Humbani si Paulus, apostel ni Kristus Jesus marhitei rosuh ni Naibata, domu hubani bagah-bagah hagoluhan, na ibagas Kristus Jesus. ² Hubani si Timoteus, anakku na hinaholongan: idop ni uhur, holong ampa damei ma bam humbani Naibata Bapa ampa Kristus Jesus, Tuhanta in. ³ Mangkatahon tarima kasih do uhurhu bani Naibata, na huidangi humbani borsih ni panggora ni uhur, songon pangidangi ni ompung-ompungta, sanggah na hudingat ho tongtong ibagas tonggongku, arian pakon borngin. ⁴ Anggo hudingat iluh-iluhmu, ma sihol do ahu mangidah ho, ase dapotan malas ni uhur na gok ahu. ⁵ Ai hudingat do haporsayaonmu na so sipakulah-kulah in, haporsayaon, na marianan hinan homa ibagas uhur ni ompungmu naboru, si Lois, ampa inangmu, si Oinike, anjaha tenger do uhurhu, marianan homa bam. ⁶ Halani ai, hupagolpa do ho, ase iparatah-ratah ho sibere-bere ni Naibata, na bam in, marhitei na hutampeihon tanganku bam. ⁷ Ai seng tonduy biar ibere Naibata banta, tapi tonduy hagogohon, holong ampa panrajaion diri do. ⁸ Ai pe, ulang ma ho maila manaksihon Tuhanta, anjaha ulang homa maila ho pasal ahu, na tartutup halanisi; tapi dihut ma ho tene manaron halani Ambilan Namadear in ibagas gogoh na humbani Naibata. ⁹ Ai ipaluah anjaha idilo do hita marhitei pandiloon na mapansing, sedo halani pambahenanta, tapi mangihutkon sura-sura ampa idop ni uhurni do, na binereni banta ibagas Kristus Jesus, humbani mulani nari; ¹⁰ sonari nani, ipatidak marhitei partalar ni Sipaluah hita, Kristus Jesus, na parontihon hamateian, anjaha na paulgaphon hagoluhan ampa biak na so ra matei marhitei Ambilan Namadear in. ¹¹ Hujin do ahu ipabangkit gabe siparambilan, apostel ampa guru, ¹² anjaha halani in do ase manaron ahu sonon; tapi seng maila ahu, ai hutanda do Ia, na huhaporsayai, anjaha tenger do uhurhu, margogoh Ia manramothon na pinasimpanhonNi in bakku das hubani ari simagira. ¹³ Marsijoloman ma ho bani hata hasintongan, na binogeimu humbakku; ai ma tiru marhitei haporsayaon ampa holong bani Kristus Jesus. ¹⁴ Ramothon ma arta na madear, na pinasimpanhon in bam marhitei Tonduy Napansing, na marianan ibagas hita. ¹⁵ Ibotoh ho do, na dob itadingkon haganup halak na hun Asia do ahu, deba humbani sidea ai ma si Pegelus ampa si Hermogenes. ¹⁶ Sai maidop ma uhur ni Tuhan in bani rumah tangga ni si Onesiporus, ai gati do malas uhurhu ibahen, anjaha seng maila ia halani garingku. ¹⁷ Ai sanggah roh ia hu huta Rom, iporluhon do mangindahi ahu, ronsi jumpahsi ahu. ¹⁸ Sai ibere Tuhan in ma, ase jumpahan idop ni uhur ia humbani Tuhan in bani ari simagira. Anjaha ibotoh ho do torang, sonaha pangidangini bakku i huta Epesus.

¹ Ho pe, ale anakku, margogoh ma ho marhitei idop ni uhur ni Kristus Jesus, ² anjaha na binogeimu humbakku i lobei ni buei saksi, ai ma padas hubani hasoman hatengeran ni uhur, na boi mangajari halak na legan. ³ Ra ma ho marsitaronon, songon tentara ni Kristus Jesus na bujur. ⁴ Sada tentara na mandalankon tugas, seng ra ia taralit bani urusan-urusan goluh siganup ari, ase harosuh ia bani kopalani. ⁵ Halak siparlumba pe, seng boi jumpahan sortali rudang ia, anggo seng pambalosi ia bani paraturan-paraturanni. ⁶ Siparjuma, na torik marhorja, ai do na patut parlobei jumpahan gogoh ni juma ai. ⁷ Paruhurhon ma na huhatahon in, ai bereon ni Tuhan in do bam hauhuron ibagas haganupan in. ⁸ Padingat-dingat ma Jesus Kristus, na dob pinapuho humbani na matei, na humbani ginompar ni si Daud, domu hubani na huambilankon in. ⁹ MarhalanihonSi do ase marsitaronon ahu, pala hona garihon songon parjahat; tapi hata ni Naibata, seng targarihon. ¹⁰ Tapi hutaron do haganupan in halani na tarpilih in, ase dihut sidea marulih bani haluahon, na ibagas Kristus Jesus ampa bani hasangapon sisadokah ni dokahni. ¹¹ Hatengeran ni uhur do hata on: Anggo rap matei hita pakonSi, rap manggoluh ma homa hita pakonSi. ¹² Anggo sabar hita manaron, rap manrajai ma hita pakonSi; anggo iparnalang hita Ia, parnalangonNi ma age hita. ¹³ Ia lang pe hatengeran ni uhur hita hatengeran ni uhur do anggo Ia, ai seng tarparnalangSi diriNi. ¹⁴ In ma pasingat anjaha lumbahon i lobei ni Naibata, ase ulang marsual-sual na so marguna sidea, gabe hasedaon bani na mambogeisi. ¹⁵ Haringgashon ma patuduhkon, paboa na bujur ho i lobei ni Naibata, songon sada parhorja na so tarbador, na padalankon hata hasintongan in pintor-pintor. ¹⁶ Tapi simbili ma parsahapan na so marisi, na so margagan, ai lambin tambah do hajahaton ni sidea pangkorhonni ai, ¹⁷ ai songon kanker do panggagat ni podah ni sidea ai inggot, si Hemeneus ampa si Piletus ma deba sidea ai. ¹⁸ Na kahou do sidea humbani hasintongan in, ai ihatahon sidea do: "Domma masa parpuhoon in," gabe seda ibahen haporsayaon ni deba halak. ¹⁹ Tapi totap do onjolan na humbani Naibata na toguh in, anjaha hata on ma surat ni lakni: "Itanda Tuhan in do halak, na Ia simadasi; anjaha: Barang ise na mandilo goran ni Tuhan in, maningon sirang ma ia humbani hajahaton". ²⁰ Ibagas rumah na banggal, seng pitah parugas omas barang pirak adong, dihut do parugas hayu ampa tanoh, deba bani horja na sangap, na legan bani horja na so sangap. ²¹ Halak, na paborsih dirini humbani nongkan ai, ai ma gabe parugas na mapansing, na bani horja hasangapon, na marguna bani simada rumah ai, sirsir bani sagala horja na madear. ²² Lembangi ma hisap-hisap haposoon, tapi parayak ma hapintoran, haporsayaon, holong ampa damei, rap pakon halak, na mandilo goran ni Tuhan in humbani uhur na borsih. ²³ Tapi parsual-sualon haotoon ampa na so patut, simbili ma ai, ai ibotoh ho, na paroh paringoran do ai. ²⁴ Seng patut paringor-ingor anggo juak-juak ni Tuhan in, tapi parbasar do dompak haganup, pandei mangajari, sabar manaron na jahat, ²⁵ parlamlam mamodahi sipanlawan, andohar ibere Naibata bani sidea hamubahon ni uhur, laho mananda hasintongan in, ²⁶ ase tarjolma sidea, maluah humbani siding ni sibolis in, na dob manangkap sidea, laho pasaudhon rosuh-rosuhni ai.

¹ Tapi botoh ma, na roh ma ari hasunsahan bani panorang parpudi. ² Ai manghaholongi dirini ma jolma ijai, paruhur duit, parhata toal, paruhur gijang, panrisai, seng pambalosi bani na matorasni, na so mambotoh martarima kasih, parhabutakon, ³ seng parholong, na so ra madear, na so ra mardamei, si panukas-nukasi, seng ibotoh mangorom, parringis-ringis, magigi bani na madear, ⁴ sipartahi-tahi, na hampung maruhur, na pajuntul-juntulhon diri, na holongan bani hisap ni daging ase bani Naibata. ⁵ Songon-songon na daulat do sidea, tapi iparnalang sidea do gogoh ni ai. Ai pe simbili ma sisonai ai. ⁶ Halak sisonai do na ra marponop-ponop mammasuki rumah ni halak, mandormai naboru, na dob boratan ibahen dousa, na niarsik-arsik ni bagei ni hisap-hisap, ⁷ na tongtong marlajar, tapi lanjar seng boi mananda hasintongan in. ⁸ Songon si Jannes ampa si Jamberes panlawan bani si Musa, sonai do homa sidea panlawan bani hasintongan in, ai ma halak, na dob seda pingkiranni anjaha na talu ibagas haporsayaon. ⁹ Tapi seng anjai tarpasaud sidea ai torus, ai idahon ni ganup halak do haotoon ni sidea ai, songon na bani sidea halak ondi. ¹⁰ Tapi iihuthon ho do ahu bani podah, parlahou, tujuan, haporsayaon lumbang ni uhur, holong ampa hasabaron, ¹¹ bani parburuon, sitaronon, na mangonai bakku i Antiokia, Ikonium ampa Listra. Ai ma pangayak-ayakon na hutaron, tapi ipaluah Tuhan in do ahu humbani haganupan in, ¹² Tapi sagala na sihol daulat marparlahou ibagas Kristus Jesus, hona parburu do. ¹³ Ia halak parjahat ampa sipangoto-otoi sai na lambin jahat do; na mangoto-otoi do sidea anjaha hona oto-otoan. ¹⁴ Tapi anggo ho, totap ma ho bani na dob ginuruhonmu ampa na hinaporsayaanmu, ai ibotoh ho do ise na mangajarhonsi bam, ¹⁵ anjaha ibotoh ho do humbani haetek-etekonmu nari, Surat na pansing in do, na margogoh papentarhon ho, ase marulih ho bani haluahon marhitei haporsayaon bani Kristus Jesus. ¹⁶ Ai sagala Surat in sinahapkon ni Naibata do, anjaha marguna mamodahi, maminsang, pauli-ulihon ampa manogu-nogu hu hapintoran, ¹⁷ ase gokan dear siminik ni Naibata, mangasup bani sagala horja na madear.

¹ Huparentahkon ma bam i lobei ni Naibata ampa Kristus Jesus, na sihol manguhumi na manggoluh ampa na matei, ampa halani partalarni ampa harajaonni: ² Ambilankon ma hata in, haringgashon ma bani panorang na dear atap na lang dear pe, pinsang, paingat, podahi marhitei lumbang ni uhur banggal ampa pangajarion. ³ Ai roh ma panorangni, seng tartahan halak be ijai pangajaran na sintong in, tapi domu hubani rosuh ni sidea diloonni ma buei guru bani sidea, laho mambogei na mantin-mantin tangaron, ⁴ anjaha pagolingon ni sidea ma pinggolni humbani hasintongan hubani turi-turian. ⁵ Tapi anggo ho, torang ma uhurmu pasal haganup, tahan ibagas hasunsahan, dalankon horja parambilanon anjaha gok dalankon tugasmu. ⁶ Ia ahu, galanghononkon ma; domma roh panorangku laho matei. ⁷ Domma hudobkon parlawanan na madear in, hupaujung parlumbaonku anjaha ramot hubahen haporsayaon in. ⁸ Domma sirsir i lobeihu sortali hapintoran in, sibereon ni Tuhan, Panguhum na pintor in bakku bani ari simagira; tapi seng pitah bakku, bani haganup do, na manghasiholi partalarni ai. ⁹ Papodas ma roh marayak ahu! ¹⁰ Ai domma itadingkon si Demas ahu, halani na dob holong uhurni bani dunia on, lanjar laho hu Tessalonik; si Kreskens laho do hu Galatia, si Titus hu Dalmatia. ¹¹ Sahalak si Lukas mando hasomanku. Arahkon si Markus, boan ia hasomanmu, ai porlu do ia marugas bakku. ¹² Si Tikikus, husuruh do hu Epesus. ¹³ Anggo roh ho, boan ma baju panas, na hutadingkon bani si Karpus, huta Troas; sonai homa buku-buku in, siporlunan ai ma pustaha (perkamen) in. ¹⁴ Buei do hajahaton ibahen si Aleksander, tukang bosi ai, bakku; Tuhan in ma mambalashon bani domu hubani pambahenanni ai. ¹⁵ Ho pe, jaga ma ho bani, ai gomos do panlawanni bani hatanami. ¹⁶ Bani na mampartahankon diringku na parlobei ahu, sahalak pe lang adong na mangurupi, haganup do manadingkon ahu; ulang ma ibalaskon in bani sidea. ¹⁷ Tapi Tuhan in do mangkasomani anjaha margogohi ahu, ase mardalan parambilanon in marhitei ahu, gabe haganup sipajuh begu-begu mambogeisi; anjaha maluah do ahu humbani babah ni singa ai. ¹⁸ Paluahon ni Tuhan in do ahu humbani haganup hajahaton, anjaha pamasukonni ahu hu bagas harajaonNi na i nagori atas ai. Bani ma hasangapon ronsi sadokah ni dokahni. Amen. ¹⁹ Padas ma tabingku bani si Priska ampa si Akila, sonai hubani keluarga ni si Onesiporus. ²⁰ Tading do si Erestus i Korint; tapi boritan do hutadingkon si Tropinus i Milete. ²¹ Podas ma ho roh paima musim borgoh. Tabi bam humbani si Oibulus, si Pudens, si Linus, si Klaudia ampa haganup sanina. ²² Ihasomani Tuhan in ma tonduy nasiam! Idop ni uhur ma bani nasiam!