2 TESSALONIKA

¹ Humbani si Paulus, si Silpanus, ampa si Timoteus, hubani kuria Tessalonik, na ibagas Naibata Bapanta ampa Tuhan Jesus Kristus. ² Idop ni uhur ma bani nasiam ampa damei humbani Naibata Bapanta ampa Tuhan Jesus Kristus. ³ Patut tumang do hanami, nasiam sanina, tongtong mangkatahon tarima kasih bani Naibata halani nasiam. Patut do sonai, ai lambin ganda tumang do haporsayaon nasiam, anjaha martambah do holong ni uhur ni ganup nasiam samah nasiam. ⁴ Hanami sandiri mamuji-muji dirinami halani nasiam i lobei ni ganup kuria ni Naibata, halani hatotapon ampa haporsayaon nasiam ibagas sagala parburuon ampa hamarsikon, na tinaron nasiam. ⁵ In ma na patandahon pintor ni paruhuman ni Naibata, gabe talup nasiam ihira masuk hu harajaon ni Naibata; halani ai do manaron nasiam nuan. ⁶ Pintor do in tongon, nini uhur ni Naibata, mambalaskon hamarsikon bani na mangarsik-arsik nasiam, ⁷ tapi hasonangan bani nasiam, na niarsik-arsik, rap pakon hanami, bani partalar ni Tuhan Jesus tuad hun nagori atas rap pakon malekat ni hagogohonNi, ⁸ ibagas apuy na marjilam-jilam, laho mandabuh uhum bani na so mananda Naibata, anjaha na so ra mambalosi Ambilan Namadear ni Tuhanta Jesus. ⁹ Hona uhum ma sidea, ai ma hamagouan sisadokah ni dokahni, humbani bohi ni Naibata ampa humbani hasangapon ni hagogohonNi, ¹⁰ sanggah roh Ia bani ari ai, ase marsangap Ia humbani na mapansingNi anjaha longang sagala na porsaya bani, ai porsaya do nasiam tongon bani hasaksian na binoannami bani nasiam. ¹¹ Jadi martonggo do hanami tongtong pasal nasiam, ase Naibatanta ma na patalup nasiam domu hubani pandiloonNi ai, anjaha ipasaud ma ganup sura-sura na madear ampa ganup horja haporsayaon marhitei hagogohonNi, ¹² ase marsangap ma goran ni Tuhanta Jesus Kristus ibagas nasiam, sonai homa nasiam ibagas Ia, domu hubani idop ni uhur ni Naibatanta ampa Tuhan Jesus Kristus.

¹ Tapi anggo pasal parroh ni Tuhanta Jesus Kristus ampa pardasta hu Bani, mangindo ma hanami, bani nasiam sanina, ² ase ulang urah idugur nasiam humbani totap ni paruhuron, anjaha rusak ibahen marhitei tonduy ni sipartonduy atap hata, barang marhitei surat na ihatahon roh humbannami, na patugahkon, paboa na dob roh do ari ni Tuhan in. ³ Ulang ma adong na paoto-otohon nasiam atap marhitei aha pe. Ai seng anjai roh ari ai, anggo seng masa lobei parbalikon, anjaha ipatalar jolma na so parduli bani titah in, ai ma anak hamagouan ai, ⁴ na manlawan anjaha na pabangkit dirini dompak haganup na targoran naibata ampa sisombahon, na pahundul dirini i rumah ni Naibata, na maningtingkon, paboa ia do naibata. ⁵ Ai lang idingat nasiam, na dob hupatugah in hinan, sanggah rap ope ahu pakon nasiam? ⁶ Ambahni ai, ibotoh nasiam do, aha na mangambatsi nuan, paima roh panorangni patalaron ia. ⁷ Ai domma marhorja nuan gogoh ni rusia ni hajahaton ai, paima ipadaoh na mangambatsi nuan. ⁸ Dob ai pe ase patalaron siparjahat ai, tapi ripashonon ni Tuhan Jesus ma ia marhitei hosah ni pamanganni, anjaha siaphononni ma ia talarhonsi Ia bani parrohNi ai. ⁹ Humbani kuasa ni sibolis do parroh ni parjahat ai, marhasoman haganup bagei ni hagogohon ampa tanda ampa halongangan ladung, ¹⁰ ambahni ai marhasoman haganup bagei ni hajahaton sipaoto-oto bani halak na laho magou, halani lang ijalo sidea holong na humbani hasintongan in, ase maluah namin sidea. ¹¹ Halani ai isuruh Naibata do bani sidea tonduy na pakahouhon, ase porsaya sidea bani ladung, ¹² ase hona uhum sagala na so porsaya bani hasintongan in, na marosuh bani hagedukon. ¹³ Tapi na patut do hanami manghatahon tarima kasih tongtong bani Naibata halani nasiam, sanina na hinaholongan ni Tuhan in, ai ipilih Naibata do nasiam humbani mulani, ase saud nasiam maluah marhitei pangurasion ni Tonduy in ampa haporsayaon bani hasintongan in. ¹⁴ Ai hujai do nasiam idilo marhitei Ambilan Namadear, na niambilankonnami, ase parrupei nasiam bani hasangapon ni Tuhan Jesus Kristus. ¹⁵ Ase nasiam sanina, totap ma nasiam jongjong anjaha marsijoloman bani podah, na niajarhonnami bani nasiam, marhitei hata atap surat pe. ¹⁶ Ase Tuhanta Jesus Kristus pakon Naibata Bapanta, na mangkaholongi hita anjaha na mambere banta apoh-apoh na manongtong ampa pangarapan namadear marhitei idop ni uhur, ¹⁷ Ia ma mangapohi anjaha patotaphon uhur nasiam bani sagala horja ampa hata na madear.

¹ Ambahni ai, nasiam sanina, tonggohon nasiam ma hanami, ase rarat hata ni Tuhan in anjaha marsangap songon na bani nasiam, ² anjaha hanami maluah humbani halak na jungkat anjaha na jahat, ai seng haganup halak porsaya bani ambilan na madear. ³ Tapi hatengeran ni uhur do Tuhan in; pargogohanNi do nasiam anjaha ondinganNi dompak hajahaton. ⁴ Anjaha tenger do uhurnami bani Tuhan in pasal nasiam, paboa horjahonon nasiam do na hinatahonnami bani nasiam, sonari age hu lobeian on. ⁵ Sai itogu-togu Tuhan in ma uhur nasiam marholong songon Naibata, ampa marhasabaron songon Kristus. ⁶ Tapi ibagas goran ni Tuhanta Jesus Kristus, nasiam sanina, ipaingat hanami ma nasiam, sai surut ma nasiam humbani sanina na so torsa marparlahou, na so mangihutkon podah, na jinalo nasiam humbannami. ⁷ Ai ibotoh nasiam sandiri do, sonaha patut usihan nasiam hanami, ai sedo na so torsa marparlahou hanami i tongah-tongah nasiam; ⁸ seng dong ipangan hanami ruti ni atap ise pe seng margalar, tapi loja anjaha sunsah do hanami marhorja arian pakon borngin, ase ulang adong humbani nasiam na isunsahi hanami. ⁹ Sedo na so marhak hanami namin pasal ai, tapi mambere usihan do hanami bani nasiam marhitei parlahounami ibagas ai. ¹⁰ Ai age sanggah rap ope hanami pakon nasiam, domma iaturhon hanami bani nasiam: Barang ise, na so ra marhorja, ulang ma ia mangan. ¹¹ Ai tarbogei do bannami, paboa adong do deba humbani nasiam, na so torsa parlahouni, na so ra marlahoan, tapi manghorjahon na so horja do. ¹² Bani halak sisonai ai iparentahkon anjaha ipalumba hanami ma ibagas Tuhan Jesus Kristus: Marhorja ma sidea nunut, sinarini ma ipangan! ¹³ Tapi nasiam sanina, ulang ma marnaloja nasiam mambahen na madear! ¹⁴ Anggo adong na manjua mambalosi hatanami na tarsurat on, pardiatei nasiam ma ia, ulang ma ra nasiam marsaor pakonsi, ase maila ia. ¹⁵ Ulang songon munsuh ia ihira nasiam, tapi palumba nasiam ma ia songon sanina. ¹⁶ Tuhan Sipardamei in ma mambere damei bani nasiam tongtong marhitei haganup pambahenanni! Tuhan in ma manghasomani nasiam! ¹⁷ Ahu, si Paulus, manurat hata tabi on marhitei tanganku sandiri. Sonon do tanda tanganku bani sagala surathu, sonon do surathu. ¹⁸ Idop ni uhur ni Tuhanta Jesus Kristus ma manghasomani nasiam haganup!