2 PETRUS

¹ Humbani si Simon Petrus, juak-juak anjaha apostel ni Jesus Kristus, hubani sagala na dob manjalo haporsayaon, na dos hargani songon na jinalonami, marhitei hapintoran ni Naibatanta ampa Jesus Kristus, Sipaluah in. ² Sai lambin martambah ma bani nasiam idop ni uhur ampa damei, marhitei panandaion nasiam bani Naibata ampa Jesus, Tuhanta in. ³ Ibere hagogohon ni ha-NaibataonNi ai do banta sagala na porlu bahen hagoluhon pakon hadaulaton marhitei na itandai hita Ia, na mandilo hita marhitei hasangaponNi ampa hadearonNi sandiri. ⁴ Marhitei ai ibere do banta bagah-bagahNi na maharga ampa na banggal tumang, ase marhitei ai boi nasiam maporus humbani hamagouan na i dunia on, pinaroh ni hisap-hisap, anjaha gabe parrupei nasiam bani ha-Naibataonni. ⁵ Halani ai, haringgashon nasiam ma humbani sagala gogoh pataridahkon dear ni parlahou ibagas haporsayaon nasiam, dob ai hapentaron ma ibagas parlahou na madear ai; ⁶ dob ai panrajaion diri ma ibagas hapentaron ai, dob ai hasabaron ma ibagas panrajaion diri ai, dob ai hadaulaton ma ibagas hasabaron ai; ⁷ dob ai holong ni uhur bani hasoman ma ibagas hadaulaton ai, dob ai holong bani haganup ma ibagas holong ni uhur bani hasoman ai. ⁸ Ai anggo jumpah in bani nasiam anjaha martambah-tambah, seng paturutonNi nasiam rayohan anjaha seng marbuah, laho mananda Jesus Kristus, Tuhanta in. ⁹ Tapi, bani ise seng jumpah ai, halak na mapitung ma ai, anjaha parpangidah na sompit, na dob lupa bani haborsihon humbani dousa-dousani hinan. ¹⁰ Halani ai, nasiam sanina, lambin ringgasni ma nasiam patotapkon pandiloonNi ampa pamilihonNi bani nasiam; ai anggo ihorjahon nasiam in, seng ra be nasiam tompas. ¹¹ Jadi sonin ma unjah bereonNi bani nasiam hamasukan hu bagas harajaon ni Tuhanta, Jesus Kristus Sipaluah in, na totap sadokah ni dokahni. ¹² Halani ai, tongtong do husurahon pasingathon ganupan in bani nasiam, age pe domma ibotoh nasiam in, anjaha maronjolan nasiam totap ibagas hasintongan, na dob adong bani nasiam. ¹³ Ai patut do, nini uhurhu, sadokah ibagas lampo-lampo on ope ahu, pagolpaonku nasiam marhitei singat-singat, ¹⁴ ai hubotoh, podas ma tadinghononku lampo-lampo on, songon na dob pinabotohkon ni Tuhanta Jesus Kristus bakku. ¹⁵ Halani ai huporluhon do, ase tongtong tarbahen nasiam mardingat in, dob misir ahu. ¹⁶ Ai seng turi-turian na piningkiran ni halak na pentar iirikkon hanami, sanggah ipabotohkon hanami bani nasiam hagogohon ampa parroh ni Tuhan Jesus Kristus; tapi iidah matanami sandiri do hasangaponNi. ¹⁷ Ai ijalo do hamuliaon ampa hasangapon humbani Naibata Bapa, sanggah na roh Bani humbani hasangapon na majombut ai sora on: On do AnakKu, haholongan ni uhurHu; marosuh do uhurHu Bani. ¹⁸ In ma sora, na ibogei hanami roh hun nagori atas, sanggah rap hanami pakonSi i dolog na mapansing ai. ¹⁹ Jadi lambin totap ma hata panjahaion in bannami; anjaha dear ma marsijoloman nasiam hujin songon bani sada lampu na marsinalsal ibagas ianan na golap, paima siang ari, anjaha poltak bintang buha siang in ibagas uhur nasiam. ²⁰ On ma parlobei botoh nasiam: Seng jumpah hatorangan ni sagala panjahaion na tarsurat, anggo humbani uhur ni jolma sandiri. ²¹ Ai seng ongga humbani rosuh ni jolma harohan ni panjahaion; tapi binobahon ni Tonduy Napansing do, ase marsora jolma in, isuruh Naibata.

¹ Tapi adong do hinan nabi sipakulah-kulah i tongah-tongah ni bangsa Israel; sonai homa i tongah-tongah nasiam adong do guru sipakulah-kulah, na mamboan marponop-ponop podah na parsedahon, pala do parnalangon ni sidea Tuhan na manobus sidea. Marhitei ai iparoh sidea do hamagouan na podas bani sidea sandiri. ² Anjaha buei do na mangihuthon hasumsamon ni sidea, anjaha halani sidea hona risa do pangajaran na sintong in. ³ Anjaha halani uhur haut ni sidea, buaton ni sidea do untung humbani nasiam marhitei hata tipu; humbani sapari nari seng maronti uhum mangonai bani sidea, anjaha seng ipadokah-dokah hamagouan roh bani sidea. ⁴ Ai age malekat na mardousa seng ipaturut-turut Naibata, tapi idabuh do sidea hu nagori toruh, hu luhung na golap, pajagahon sidea paima paruhuman. ⁵ Anjaha dunia sisapari ai pe seng ipaturut Naibata; tapi iramothon do si Noak, parambilan hapintoran ai, rap pakon pitu halak nari, sanggah na pinarohNi ai bah na sumbang manrungkub dunia na jahat ai. ⁶ Age huta Sodom ampa Gomora imonsongkon do, laho manguhumi ai, marhitei hasedaon, bahen lumba-lumba bani siparjahat i pudini ai; ⁷ tapi ipaluah do si Lot na pintor ai, na sai marhoru tong ibahen goluh hasumsamon ni parjahat ai. ⁸ Ai marhitei na niidahni ampa na binogeini ari-ari, sai ihoruhon Tonduy ni Parpintor in do pambahenan ni sidea na so maradat in, sanggah na marianan ia i tongah-tongah ni sidea. ⁹ Ase ibotoh Tuhan in do paluahkon na daulat humbani parlajouan, halak parjahat nani ipajagahon do laho manguhumi ai magira, ¹⁰ tarlobih ma ai halak na mambalosi hisap-hisap pardagingon ni sidea na mabutak ai anjaha na mapas bani si parkuasa. Na garang do sidea, seng hitir anjaha seng maralang-alang manrisai siparhasangapon. ¹¹ Gari malekat-malekat, age pe surungan bani hagogohon ampa kuasa, seng mansahapkon uhum panrisaion dompak sidea i lobei ni Tuhan in. ¹² Ia sidea on, songon binatang na so maruhur do, na laho sitangkapon anjaha sibunuhon ase tubuh. Sai manrisai do sidea pasal na so niartihon ni sidea, gabe magou songon binatang ai; ¹³ ase ijalo sidea do balos ni pambahenan hajahaton ni sidea ai. Layur-layur ari mangan-mangan, ai do harosuh ni sidea; gok habutakon ampa sihagigihononkon do sidea, marmabuk-mabuk ibagas hisap-hisap ni sidea, sanggah na rap mangan sidea pakon nasiam. ¹⁴ Gok parbangkison do pangkawah ni sidea, seng marnamaronti mambahen dousa. Iompan-ompani do uhur ni halak na galek, maruhur haut do tong sidea. Halak na hona papa do sidea. ¹⁵ Itadingkon sidea do dalan na pintor in, gabe kahou mangirikkon dalan ni si Bileam, anak ni si Beor, na mangharosuhkon upah na geduk, ¹⁶ tapi na hona ajar halani panlanggaronni ai, ai marsahap jolma do sada halode na longah, laho manlanglangi sura-sura ni nabi ai. ¹⁷ Bah tubuh na so marbah do sidea, hombun na niombus ni halisungsung; na golap marimpot-impot do iparsirsir bani sidea. ¹⁸ Ai marhitei na manghatahon hata burnang na lumei, iompan-ompani sidea do halak na baru ope manundalhon halak na marparlahou ibagas hakahouon, marhitei pambalosion bani hisap-hisap pardagingon na so marrantei. ¹⁹ Ibagahkon sidea do hamardekaon, tapi sidea sandiri do jabolon ni hamagouan; ai in na patunduk halak, ai do na marjabolonsi. ²⁰ Ai halak na dob maluah humbani habutakon ni dunia on, marhitei na tinanda ni sidea Tuhan Jesus Kristus, Sipaluah in, hape taralit use hujai anjaha talu, janginan ma hadobanni ai humbani mungkahni hinan. ²¹ Ai dearan do bani sidea, seng ongga hinan mananda dalan hapintoran in, humbani dobkonsi itanda sidea in, marbalik use humbani titah na mapansing in, na dob pinadas bani sidea. ²² Jumpah do bani sidea hata ni limbaga na sintong on: "Mulak do baliang hubani utah-utahni, " anjaha "babuy na dob pinaridi mulak do margulu hu bagas hubang."

¹ Nasiam na hinaholongan: On ma surat na paduahon, na husurat bani nasiam, laho mamuhoi uhur na borsih bani nasiam marhitei hata sipaingat, ² ase idingat nasiam hata na dob hinatahon ni nabi-nabi na mapansing in ampa titah ni Tuhan anjaha Sipaluah in marhitei apostel nasiam. ³ On ma na parlobei botohon nasiam; Na roh ma bani ari parpudi sipanrisai, na mansahapkon risa-risa, na mambalosi hisap-hisapni sandiri, ⁴ na mangkatahon: Ija do bagah-bagah pasal parrohni ai? Ai dob matei ompung-ompungta, totap do haganup songon humbani panompaon ni dunia on. ⁵ Tapi ponop do bani sidea, ibagas na sonai pingkiran ni sidea ai, paboa marhitei hata ni Naibata do ase adong langit sapari, anjaha tanoh on humbani bah anjaha marhitei bah, ⁶ lanjar marhitei ai do magou ijia tanoh on, manongnong ibahen bah ai. ⁷ Anjaha langit pakon tanoh sisonari, iramothon do marhitei hata nongkan ai bahen panganon ni apuy, iramothon do das hubani ari paruhuman pakon hamagouan bani halak parjahat. ⁸ Tapi na sada on, ulang ma ponop humbani nasiam, na hinaholongan: Sada ari bani Tuhan in ai ma doshon saribu tahun, anjaha saribu tahun doshon sadari. ⁹ Seng ipadokah-dokah Tuhan in bagah-bagahNi, songon hinatahon ni na deba; tapi lumbang do uhurNi mangidah nasiam, ai ipangindo uhurNi ulang ma magou namin atap ise pe, tapi das ma haganup tene hu hamubahon ni uhur. ¹⁰ Tapi na roh ma ari ni Tuhan in songon panangko; mardorob ma ijai langit in laho maseda, anjaha masarsar ma unsur ni tanoh on halani apuy ai: sonai age tanoh in ampa horja na i atasni mosog ma. ¹¹ Ai pe, anggo na sihol maseda do hape haganupan in, ai lang patut ma goluh nasiam lambin pansing anjaha daulat, ¹² bani na paima-imahon anjaha na siholan nasiam bani parroh ni ari ni Naibata, bani na masarsar ai langit ibahen apuy, anjaha na malala ai unsur-unsur ai ibagas hamilason ai? ¹³ Tapi na paima-imahon do hita bani langit na baru pakon tanoh na baru, ianan ni hapintoran in, domu hubani bagah-bagahNi. ¹⁴ Ai pe, nasiam na hinaholongan, halani ai do na pinaima-ima nasiam, porluhon nasiam ma, ase jumpahSi nasiam seng martikas, lang dong sihataon, ibagas damei. ¹⁵ Hira nasiam ma lumbang ni uhur ni Tuhanta in haluahon bani nasiam, songon na dob sinurathon ni si Paulus, hasoman haholonganta ai bani nasiam, domu hubani hapentaran na dob binere bani. ¹⁶ Isahapkon do pasal on, ibagas haganup suratni. Adong do tongon deba ibagas ai na payah arusan; ai ma na pinalepak ni deba na so maruhur anjaha na so toguh, sonai age bani surat na legan; gabe hamagouanni sandiri do pambahenanni ai. ¹⁷ Ai pe, nasiam na hinaholongan, halani domma ibotoh nasiam hinan in, jaga ma nasiam, ase ulang taruyun nasiam halani hakahouon ni halak na so martitah in, anjaha madabuh humbani hajongjongan nasiam na toguh hinan. ¹⁸ Tapi lambin marbanggal ma nasiam ibagas idop ni uhur ampa panandaion bani Tuhanta Jesus Kristus, Sipaluah in. Bani ma hasangapon, sonari age ronsi sadokah ni dokahni!