2 KORINT

2 KORINT

¹ Humbani si Paulus, apostel ni Kristus Jesus, marhitei rosuh ni Naibata, pakon si Timoteus, sanina ni, humbani kuria ni Naibata, na i Korint, ampa hubani haganup halak na mapansing, na i sab Akaya. ² Idop ni uhur ma bani nasiam ampa damei humbani Naibata Bapanta ampa humbani Tuhan Jesus Kristus. ³ Puji-pujian ma bani Naibata, Bapa ni Tuhan Jesus Kristus, Bapa paridop ni uhur ampa Naibata sipangapoh in, ⁴ na mangapoh hanami ibagas sagala sitarononnami, ase tarapoh hanami hasoman na ibagas bagei ni sitaronon, hinorhon ni apoh-apoh na jinalonami sandiri humbani Naibata. ⁵ Ai songon surung ni sitaronon ni Kristus sogop bannami, sonai do homa surung ni pangapohon bannami marhitei Kristus. ⁶ Ia marsik pe iahap hanami, bahen apoh-apoh ampa huluahon do in bani nasiam; ia tarapoh hanami, gabe apoh-apoh bani nasiam do in, ase margogoh nasiam manaron sitaronon nasiam, na dos songon tinaronnami. ⁷ Anjaha pangarapannami pasal nasiam totap do, ai ibotoh hanami: Songon na dihut nasiam parrupei bani sitaronon, sonai do homa bani apoh-apoh. ⁸ Ai seng marosuh hanami, nasiam sanina, lang ibotoh nasiam sitaronon na mangonai bannami i Asia borat tumang, lobih humbani na tarporsan, pala putus ma pangarapannami manggoluh. ⁹ Tongon, matei mando hanami nini uhurnami, ase ulang dirinami ihatengerhon hanami, tapi Naibata ma, sipuhoi na dob matei. ¹⁰ Ia do na paluahkon hanami humbani hamateian, anjaha paluahonni ope, anjaha tenger do uhurnami Bani, paluahonni do age hunjon-hunjanan, ¹¹ marhitei na iurupi nasiam homa hanami marhitei tonggo, andohar buei hasoman na manghatarima-kasihkon idop ni uhur na jinalonami, pangkorhon ni tonggo ni sidea na buei ai. ¹² On do onjolan ni puji-pujiannami: Isaksihon panggora ni uhurnami do, na marparlahou hanami i lobei ni dunia on, tarlobih ma i lobei nasiam, ibagas hapansingon ampa hapolinon na humbani Naibata, sedo ibagas hapentaron pardagingon, tapi ibagas idop ni uhur ni Naibata do. ¹³ Ai seng legan arti ni suratnami humbani na binasa ampa na niarusan nasiam. Anjaha huarapkon do, ase gok ma pangarusion nasiam, ¹⁴ songon na dob mamungkah iarusi nasiam hanami, paboa hanami do puji-pujian bani nasiam anjaha nasiam puji-pujian bannami bani ari ni Tuhanta Jesus. ¹⁵ Mangunsagahkon in, adong hinan do sura-surangku marayak nasiam, ase lompit idop ni uhur jaloon nasiam, ¹⁶ Sihol tuluy do ahu hubani nasiam laho hu Makedonia, anjaha dob hun Makedonia, mulak use bani nasiam, ase nasiam paingkathon ahu laho hu Judea. ¹⁷ Marhampung ni uhur do ahu mansura-surahon in? Atap marguru hubani daging do sura-surangkin, gabe rap jumpah bakku hata eak ampa hata lang? ¹⁸ Tapi songon Naibata hatengeran ni uhur, seng marhata eak anjaha marhata lang hanami bani nasiam. ¹⁹ Ai Jesus Kristus, Anak ni Naibata, na iambilankon hanami bani nasiam, ai ma ahu, si Siluanus ampa si Timoteus, seng rap dong Bani hata eak ampa hata lang, tapi hata eak do hansa adong Bani. ²⁰ Ai sagala bagah-bagah ni Naibata marhiteihonSi do ai saud. Halani ai marhiteihonSi do hita mangkatahon Amen, bahen hasangapon ni Naibata. ²¹ Tapi Naibata do na patotapkon hanami pakon nasiam ibagas Kristus, anjaha iminaki do hanami. ²² Lanjar Ia do mambahen lak bannami, anjaha ibere do TonduyNi hubagas uhurnami songon jaminan. ²³ Tapi Naibata do hudilo saksi bani tonduyhu, halani manimbangi nasiam do, ase lang roh ope ahu hu Korint. ²⁴ Ai sedo na laho manrajai haporsayaon nasiam hanami, tapi hasoman parhorja do hanami bani malas ni uhur nasiam, ai na dob jongjong do nasiam ibagas haporsayaon.

¹ Domma hupaputus ibagas uhurhu, na so ulakanku be roh bani nasiam ibagas pusok ni uhur. ² Ai anggo hupusoki uhur nasiam, ise ma na boi pamalas uhurhu, ai lang na hupusoki in do? ³ Anjaha husurat pe on, ase ulang, anggo roh ahu, marpusok ni uhur ahu humbani na patut pamalas uhurhu; ai tenger do uhurhu bani nasiam haganup, paboa malas ni uhurhu, malas ni uhur nasiam do homa ai. ⁴ Ai ibagas buei sitaronon ampa pusok ni uhur do hubahen surat on bani nasiam, marhasoman buei iluh-iluh, sedo ase pusok uhur nasiam, tapi ase ibotoh nasiam do holong ni uhurhu na tarlobih in bani nasiam. ⁵ Tapi na mambahen pusok ni uhur ai, sedo ahu tumang pinusokanni, tapi hinaotikni, ase ulang salputu parsahaphu, nasiam haganup do tene. ⁶ Sungkup ma bani halak sisonai ai pinsang-pinsang humbani halak simbuei. ⁷ Tapi suharni ai, dearan ma sasap nasiam salahni, anjaha apoh nasiam ma ia, ase ulang ibondut pusok ni uhur na tarlobih in ia. ⁸ Halani ai huojur ma nasiam, manotapkon holong ni uhur bani. ⁹ Lanjar in do tujuan ni surathu bani nasiam, laho manguji nasiam, ase hubotoh atap pambalosi do nasiam bani haganup. ¹⁰ Barang ise na dob isasap nasiam salahni, ahu pe husasap do. Anjaha ahu pe, barang aha na husasap, halani nasiam do husasap ai, i lobei ni Kristus, ¹¹ ase ulang iakali sibolis in hita, ai sedo na so ibotoh hita uhurni ai. ¹² Tapi dob das ahu i Troas, laho mangambilankon Ambilan Namadear ni Kristus, mungkab do labah bakku ibagas Tuhan in, ¹³ tapi seng sonang uhurhu, halani seng jumpah ahu si Titus, sanina in ijai. Jadi mamuhun ma ahu hubani sidea, anjaha laho ma ahu hu Makedonia. ¹⁴ Tapi tarima kasih ma bani Naibata, na tongtong manogu-nogu hanami ibagas hamonanganNi marhitei Kristus, anjaha ipatalar do misbou ni habotohon pasalSi marhitei hanami bani haganup ianan. ¹⁵ Ai uap na misbou ni Kristus do hanami i lobei ni Naibata bani halak na maluah, age bani halak na laho magou, ¹⁶ bani na deba ai uap hamateian hu hamateian, bani na deba nari uap hagoluhan hu hagoluhon. Anjaha ise do na talup hujai? ¹⁷ Ai seng usih hanami songon na mabuei in, na mambuat untung bani diri sandiri marhitei hata ni Naibata, tapi humbani pitah ni uhur do, sinuruh ni Naibata, ihatahon hanami in i lobei ni Naibata, ibagas Kristus.

¹ Ai na mamuji-muji diri do hanami use? Atap na porlu do bannami surat hasaksian bani nasiam atap humbani nasiam, songon bani na deba? ² Nasiam do suratnami, na dob sinurat ibagas uhurnami, na tinanda anjaha na binasa ni haganup halak, ³ anjaha tanda do nasiam surat ni Kristus, na sinuratnami, na sinurat sedo marhitei tinta, tapi marhitei Tonduy ni Naibata na manggoluh in do; seng bani panuratan batu, tapi bani panuratan daging do, ai ma pusu-pusu. ⁴ Sonai do tenger ni uhurnami marhitei Kristus bani Naibata. ⁵ Seng mangasup hanami humbani dirinami, mamingkiri atap aha pe humbani dirinami, tapi Naibata do na mambahen mangasup hanami. ⁶ Ia do na mambahen mangasup hanami, gabe siparugas bani padan na baru, sedo bani surat, tapi bani Tonduy in do; ai na mamunuh do surat, Tonduy in do na pagoluhkon. ⁷ Ai gari parugason hamateian, na marsurat, na niuhir bani batu, marhasangapon do, pala seng tarbahen halak Israel mangkawahkon bohi ni si Musa halani sangap na ra salpu, na bani bohini ai, ⁸ ai lang sangapan ma parugason bani Tonduy in? ⁹ Ai anggo sangap parugason na bani uhum, ai lang sangapan ma parugason na bani hapintoran? ¹⁰ Tongon, seng sangap be na marsangap hinan ijai, halani surung ni hasangapon on. ¹¹ Ai anggo sangap na ra salpu, jadi lobihan ma sangap ni na manongtong. ¹² Halani adong bannami pangarapan na sonai, pag tumang do hanami, ¹³ seng songon si Musa, na mambahen panrungkub bani bohini, ase ulang tarkawahkon halak Israel ujung ni na laho salpu ai. ¹⁴ Tapi gabe hengkeng do uhur ni sidea. Ai ronsi sadari on, anggo ibasa sidea padan na basaia, tong do rungkub ai; lanjar seng ibuha ope, halani marhitei Kristus do hansa tarpadaoh ai. ¹⁵ Tongon, ronsi sadari on, tibal do panrungkub ai iatas uhurni sidea, anggo ibasa surat ni si Musa. ¹⁶ Tapi sadihari mulak uhur ni sidea bani Tuhan in, ibuat ma panrungkub ai. ¹⁷ Ia Tuhan in Tonduy in do in; anjaha ija Tonduy ni Tuhan in, ijai do haluahon. ¹⁸ Tapi hita haganup, marbohi na so marpanrungkub, mangidah hasangapon ni Tuhan in, songon ibagas sormin, gabe salih songon rupaNi, humbani hasangapon hu hasangapon, halani Tuhan, Tonduy in.

¹ Ai pe, halani na dob ijalo hanami jabatan on humbani idop ni uhur, seng marnaloja hanami. ² Iambukkon hanami do na ponop-ponop, sihailahononkon; seng marakal-akal hanami, anjaha seng i palsuhon hanami hata ni Naibata, tapi marhitei na mambaritahon hasintongan in talar-talar, gabe ipataridahkon hanami do dirinami bani haganup uhur panimbangion ni jolma i lobei ni Naibata. ³ Anjaha anggo tartutup Ambilan Namadear, na niambilankonnami, bani na laho magou do in tartutup. ⁴ Ai ipapitung naibata ni dunia on do pingkiran ni na so porsaya, ase ulang iidah sidea sondang ni Ambilan Namadear pasal hasangapon ni Kristus, ai ma usihan ni Naibata. ⁵ Ai sedo dirinami iambilankon hanami, tapi Kristus Jesus, Tuhan in do; ia hanami juak-juak nasiam do halani Jesus. ⁶ Halani Naibata, na dob mangkatahon; "Marsinalsal ma na lihar humbani na golap," Ia do paliharhon uhurnami, papoltak habotohon pasal sangap ni Naibata, na ibagas bohi ni Kristus. ⁷ Tapi ibagas ianan na urah mabolah do iboan hanami arta on, ase Naibata simada hagogohon na sumurung in, ulang hanami. ⁸ Ibagas haganup do hanami hona odoh-odoh, tapi lang tarpisat; marhabiaran, tapi lang putus pangarapan. ⁹ Hona ayak-ayak, tapi lang itadingkon; ipatompaskon, tapi lang maropuk. ¹⁰ Tongtong do iboan-boan hanami parmatei ni Jesus bani angkulanami, ase talar homa goluh ni Jesus ibagas angkulanami. ¹¹ Ai tongtong do hanami, na manggoluh ope, iondoskon hu hamateian halani Jesus, ase talar homa goluh ni Jesus bani dagingnami na ra matei on. ¹² Ase hamateian do marhorja ibagas hanami, tapi hagoluhan do ibagas nasiam. ¹³ Tapi halani adong do bannami Tonduy haporsayaon in, songon na tarsurat in: "Na porsaya do ahu, halani ai do ase husahaphon," hanami pe porsaya do, ai do ase marsahap age hanami, ¹⁴ halani ibotoh hanami, paboa Sipuhoi Jesus in, papuhoonni do age hanami rap pakon Jesus in, anjaha pajongjongonni rap pakon nasiam hulobeiNi. ¹⁵ Tapi haganupan in halani nasiam do, ase lambin gandani idop ni uhur in, gabe marhitei buei jolma lambin surungni homa hatarimakasihon bahen hasangapon ni Naibata. ¹⁶ Halani ai seng marnaloja hanami, ai lambin roh burukni pe hajolmaonnami pardarat on, tapi parbagas ai, ari-ari do ipabayu. ¹⁷ Ai sitaronnami sisonari anjaha na hampung porsanon, in do manjadihon bannami hasangapon na tarsulur, na tarlobih hamuliaonNi sadokah ni dokahni, ¹⁸ halani ikawahkon hanami na so taridah in, sedo na taridah in; ai tongkin do na taridah in, tapi totap do ronsi sadokah ni dokahni na so taridah in.

¹ Ai ibotoh hanami do, anggo irumbakkon lampo-lamponami na i dunia on, adong do bannami rumah humbani Naibata, rumah na so pinauli ni tangan, na totap sadokah ni dokahni i nagori atas. ² Ai sadokah ijon marhoih do hanami, anjaha masihol manolukkon ianannami na hun nagori atas ai, ³ ase marhitei na manolukkon ai, seng talanjang hanami dapot. ⁴ Ai sanggah i parlampo-lampoan on hanami, marhoih do hanami anjaha boratan, halani sihol uhurnami, ase ulang itanggali, tapi isolukkon ma lah, ase ibondut hagoluhan ai na ra matei on. ⁵ Tapi na pasirsirhon hanami hujai, ai ma Naibata, na mambere bannami Tonduy in songon sikoram. ⁶ Ase tenger do uhurnami tongtong, anjaha ibotoh hanami, daoh ope hanami humbani Tuhan in, sadokah marianan hanami ibagas angkula on, ⁷ ai ibagas haporsayaon do pardalanannami, lape ibagas na mangidah. ⁸ Tenger do uhurnami, anjaha malasan do uhurnami pindah humbani angkula on, laho marianan rap pakon Tuhan in. ⁹ Halani ai iporluhon hanami do, ase harosuhNi hanami, atap sanggah ibagas angkula atap dob tanggal humbani angkula. ¹⁰ Ai maningon talar do hita haganup i lobei ni paruhuman ni Kristus, ase ijalo bei domu hubani na hinorjahonni, sanggah ibagas angkula, atap na madear atap na masambor. ¹¹ Ai pe, halani ibotoh hanami, biar bani Tuhan in, iojur hanami do jolma in ase porsaya; tapi talar do hanami bani Naibata, anjaha arap do uhurnami, talar do homa hanami ibagas panggora ni uhur nasiam. ¹² Sedo na mangulaki hanami na mamuji-muji dirinami i lobei nasiam, tapi mambere dalan do bani nasiam, ase adong pamujion nasiam pasal hanami marimbang hasoman, na mamuji-muji diri pasal pardarat sedo pasal paruhuran. ¹³ Ai anggo siaran hanami, halani Naibata do ai; anjaha anggo maruhur hanami, halani nasiam do. ¹⁴ Ai holong ni uhur ni Kristus do na mangatur hanami, halani ibotoh hanami, anggo domma matei Na sada in manghophop haganup, na dob matei do sidea haganup. ¹⁵ Anjaha manghophop haganup do Ia matei, ase ulang manggoluh bani dirini bei na manggoluh in, tapi ase manggoluh sidea Bani, na dob matei anjaha mulak manggoluh manghophop sidea. ¹⁶ Halani ai seng itanda hanami be atap ise mangihutkon pardagingon; anjaha anggo itanda hanami pe na ijia Kristus mangihutkon pardagingon, tapi seng be sonai panandaionnami sonari. ¹⁷ Ase barang ise ibagas Kristus, na tinompa na baru ma in. Domma salpu sisapari, tonggor ma, domma gabe na baru. ¹⁸ Haganupan ai humbani Naibata do; ai Ia do padearhon hita Bani marhitei Kristus, anjaha ibere do bannami jabatan pardearan in. ¹⁹ Ai ipadear Naibata do dunia on Bani ibagas Kristus, marhitei na so i hira bani sidea panlanggaron ni sidea, anjaha iondoskon do bannami ambilan pardearan in. ²⁰ Ase utusan ni Kristus do hanami, sahira Naibata do mangojur marhitei hanami. Gantih ni Kristus do hanami mangelek: Sai ra ma nasiam padearon bani Naibata! ²¹ On do ibahen Naibata: Manghopkop hita gabe dousa do Ia, na so mananda dousa, ase gabe hapintoran ni Naibata hita ibagas Ia.

¹ Songon hasoman pangkorja, ipalumba hanami ma nasiam, ase ulang soya panjalo nasiam bani idop ni uhur ni Naibata, ² ai nini do: Bani panorang idop ni uhur do ho hutangihon, anjaha bani panorang haluahon do ho huurupi. Tonggor ma, sonari ma panorang idop ni uhur, tonggor ma, sonari ma panorang haluahon. ³ Seng mambahen partolsuan hanami atap bani aha pe, ase ulang hona risa jabatannami. ⁴ Ibagas haganup do ipatuduhkon hanami dirinami songon juak-juak ni Naibata: Ibagas hasabaron banggal, ibagas hamarsikon, ibagas hasunsahan, ibagas hasosakan, ⁵ ibagas na hona pukul, ibagas na tartutup, ibagas hageoron, ibagas halojaon, ibagas mangkar ni mata, ibagas parpuasaon, ⁶ ibagas hasusion, ibagas habotohon, ibagas lumbang ni uhur, ibagas habasaron, ibagas Tonduy Na pansing, ibagas holong ni uhur na so marsipakulah-kulah, ⁷ ibagas hata hasintongan, ibagas hagogohon ni Naibata, ai ma marhitei sinjata hapintoran i siamun ampa i sambilou; ⁸ marhitei na tarpuji ampa na hona parpahiri, marhitei hata-hata na masambor ampa hata na madear; songon halak na pakahouhon, hape parsintong do; ⁹ songon na so tinanda, hape na tinanda do; songon na laho matei, hape tonggor ma manggoluh do; songon halak na niarsik-arsik, hape seng tarbunuh; ¹⁰ songon na marhoru, hape tongtong do marmalas ni uhur; songon na miskin, hape buei do na i pabayak songon na so marnadong, hape haganup do adong bani. ¹¹ Torang-torang do panluarnami bani nasiam, halak Korint, ungkab do uhurnami. ¹² Seng sompit uhurnami mangidah nasiam, tapi uhur nasiam do na sompit. ¹³ Songon na bani anakku do hatangkon: Balos na dos hujai ma homa bahen nasiam: Palumbang nasiam ma homa uhur nasiam! ¹⁴ Ulang ma sapasangan nasiam pakon na so porsaya! Ai aha ma pardomuan ni hapintoran ampa na so uhum, anjaha aha ma parsaoran ni haliharon ampa hagolapan? ¹⁵ Aha ma pardomuan ni Kristus ampa Belial? Aha ma hasadaon ni na porsaya ampa na so porsaya? ¹⁶ Mintor ra ma mardomu rumah na mapansing ni Naibata ampa sisombah-sombahon? Ai hita do rumah na mapansing ni Naibata na manggoluh in, songon na hinatahon ni Naibata: Sihol marianan do Ahu i tongah-tongah ni sidea anjaha mardalani, gabe Naibata ni sidea ma Ahu, anjaha sidea gabe bangsangku. ¹⁷ Halani ai, luar ma hanima hun tongah-tongah ni sidea, anjaha paholang hanima ma dirinima, nini Tuhan in; ulang ma jamah hanima na butak, ase hujalo hanima! ¹⁸ Jadi gabe Bapa ma Ahu bannima, anjaha hanima gabe anak ampa boru bakku, nini Tuhan, Sigomgom haganup.

¹ Halani adong banta bagah-bagah na sonai, nasiam hinaholongan, paborsih hita ma dirinta humbani sagala na pabutakkon daging ampa tonduy, laho marayak hapansingon ibagas biar dompak Naibata. ² Jalo nasiam ma hanami; seng adong na ijahati hanami, seng adong na iparseda hanami, anjaha seng adong na iuhur-uhuri hanami. ³ Seng na laho manguhumi nasiam ase huhatahon in, ai domma huhatahon, na dob ibagas uhurnami do nasiam, ase rap matei anjaha rap manggoluh hita. ⁴ Banggal do tenger ni uhurhu bani nasiam, banggal do age pamujingku bani nasiam; tarapoh tumang uhurhu, marmalas ni uhur tumang do uhurhu ibagas haganup sitarononnami. ⁵ Ai age bani parrohnami hu Makedonia, seng marparsaranan dagingnami tapi sosak do ibagas haganup, parlawanan hun darat, biar hun bagas. ⁶ Tapi Naibata, siapoh na toruh maruhur. Ia do mangapoh hanami marhitei, parroh ni si Titus, ⁷ seng marhitei parrohni tumang, dihut do marhitei pangapohon, na jinaloni humbani nasiam; ai ibaritahon do bannami sihol ni uhur nasiam, partangis nasiam, ampa ringgas ni uhur nasiam manghophop ahu, gabe lambin malas ma uhurhu. ⁸ Ai pusok pe uhur nasiam hubahen marhitei surat ondi, seng husolsoli uhurhu. Anggo husolsoli pe lobei uhurhu, ai huidah pusok uhur nasiam tongkin ibahen surat ondi, ⁹ sonari nani malas do uhurhu, sedo halani na dob pusok ai uhur nasiam, tapi halani hamubahon ni uhur, pangkorhon ni pusok uhur ai do. Ai humbani Naibata do pusok ni uhur nasiam, ase ulang rugi nasiam halani hanami ibagas atap aha pe. ¹⁰ Ai ihorhon pusok ni uhur na humbani Naibata do hamubahon ni uhur huluahon, seng marpanosalan; tapi pusok ni uhur dunia on mangkorhon hamateian. ¹¹ Tanda nasiam ma pusok ni uhur na humbani Naibata, na mangkorhon ibagas nasiam sonai buei ni ringgas ni uhur, pangapition, ringis, biar, sihol ni uhur, pongkut ni uhur ampa paminsangon. Ibagas haganupan ai domma ipatuduhkon nasiam, paboa borsih do nasiam ijai. ¹² Ase hutongos pe surat ai bani nasiam; sedo halani parjahat ai, atap halani na jinahatanni, tapi ase talar do bani nasiam i lobei ni Naibata, ringgas ni uhur nasiam manghophop hanami. ¹³ Halani ai tarapoh do hanami. Ambah ni pangapohon na bannami ai, lambin malas do uhurnami halani malas ni uhur ni si Titus, ai sonang do tonduyni ibahen nasiam haganup. ¹⁴ Ai seng tarmela ahu, na hupapuji-puji ai nasiam dompaksi, tapi songon na ihatahon hanami haganupan in bani nasiam sintong-sintong, sonai do homa gabe sintong pamujinami dompak si Titus. ¹⁵ Anjaha lambin banggalni do holong ni uhurni bani nasiam, mardingat pambalosion nasiam haganup, sonaha panjalo nasiam bani ibagas biar ampa hitir. ¹⁶ Malas do uhurhu, halani boi ahu martenger ni uhur bani nasiam ibagas haganup.

¹ Tapi nasiam sanina, ipabotohkon hanami ma bani nasiam pasal idop ni uhur ni Naibata, na binereni bani kuria-kuria na i Makedonia. ² Ai age pe ibagas parlajouan ampa sitaronon banggal sidea, tapi ibagas haganupan ai malas tumang do uhur ni sidea, gabe surung do halayakon ni sidea, age pe miskin tumang sidea. ³ Ibere sidea do domu hubani na tarbahen sidea, husaksihon do ai, lobih humbani na tarbahen sidea tene, humbani rosuh ni sidea. ⁴ Gogoh do ipindo sidea humbannami, ase boi dihut sidea mandalankon horja idop ni uhur, laho mangurupi halak na mapansing ai. ⁵ Anjaha lobih humbani na niarapkonnami, ai diri ni sidea do parlobei ibere sidea bani Tuhan in, pakon hubannami, domu hubani rosuh ni Naibata, ⁶ gabe iojur hanami ma si Titus, ase itoruskon i i tongah-tongah nasiam horja idop ni uhur on, songon na dob pinungkahni hinan. ⁷ Tapi songon bani haganup marhasurungan nasiam, ai ma bani haporsayaon, bani hata, bani habotohon, bani sagala haringgason, bani holong dompak hanami, sihol ma sonai hasurungan nasiam age bani horja idop ni uhur on. ⁸ Sedo songon parentah hatangkon, tapi laho manguji sintong ni holong ni uhur nasiam do marimbang habujuron ni halak na legan. ⁹ Ai ibotoh nasiam do idop ni uhur ni Tuhanta Jesus Kristus, na bayak hinan, gabe miskin halani nasiam, ase bayak nasiam halani sombuhNi ai. ¹⁰ Ibagas pahara on sonon do pingkiranku sihatahononku: Dear ma ai bani nasiam, ai domma ipungkah nasiam tahun na salpu, sedo pitah na mandalankon, tapi dihut do na mansurahon. ¹¹ Ase sonari pe dalankon nasiam ma homa in, ase songon porlu ni uhur laho manriahkon, sonai ma homa mandalankon, domu hubani na tarbahen. ¹² Ai anggo adong porlu ni uhur, si hamalashononkon do ai domu hubani na adong, seng domu hubani na so adong. ¹³ Artini ai sedo ase sonang na legan, hape susah nasiam; marsipadosan ma namin. ¹⁴ Anggo sonari na lobih bani nasiam ma manggoki na hurang bani sidea, ase na lobih bani sidea manggoki na hurang bani nasiam, ase dos, ¹⁵ songon na tarsurat in: Na marnah na buei seng marlobih-lobih, anjaha na marnah na otik seng hurangan. ¹⁶ Tapi tarimakasih ma bani Naibata, na mamberehon ringgas ni uhur na sonin hubagas uhur ni si Titus, laho manghophop nasiam. ¹⁷ Na ra do ia ojuron, anjaha lambin hinsah do uhurni roh marayak nasiam humbani rosuhni sandiri. ¹⁸ Anjaha rap pakonsi isuruh hanami do sanina in, na tarpuji bani ganup kuria in, halani Ambilan Namadear in. ¹⁹ Anjaha seng pitah ai, tapi na ipabangkit kuria in do ia mangkasomani hanami bani horja idop ni uhur on, na idalankon hanami bahen hasangapon ni Tuhan in ampa laho patuduhkon ringgas ni uhurnami. ²⁰ Ibahen hanami sonai, ase ulang adong na manghata-hatai hanami pasal tumpak na banggal, na nidalankonnami, ²¹ ai ipingkiri hanami do na madear, seng pitah i lobei ni Tuhan in, tapi dihut do homa i lobei ni jolma. ²² Anjaha rap pakon sidea isuruh hanami do saninanami na legan, dob gati i uji hanami ringgas ni uhurni ibagas buei pahara, anjaha sonari lambin tambah do ringgas ni uhurni, halani banggal ni tenger ni uhurni bani nasiam. ²³ Ia si Titus, ai ma hasomanku anjaha hasoman sahorja bani nasiam, anjaha hasomannami ai, ai ma suruhan ni kuria-kuria, sipasangap Kristus. ²⁴ Ai pe, pataridahkon nasiam ma bani sidea holong ni uhur nasiam ampa pamujinami bani nasiam, i lobei ni kuria in!

¹ Ia pasal pangurupion na bani halak na mapansing, seng porlu be surathononku ai bani nasiam. ² Ai hubotoh do ringgas ni uhur nasiam, na dob pala hupapuji-puji i lobei ni halak Makedonia, paboa na dob marugas Akaya humbani na tahun in ope, anjaha haringgason nasiam ai do manjuljul sibueian hasoman ai. ³ Tapi husuruh do sanina in, ase ulang lang mararti pamujinami bani nasiam pasal ai, ase sirsir ma nasiam tongon, songon na dob huhatahon hinan; ⁴ ase ulang, anggo roh halak Makedonia rap pakon ahu, jadi jumpah nasiam lang sirsir, gabe maila hanami, ulang ma lobei nasiam ihatahon hanami, halani tenger ni uhurnami in. ⁵ Halani ai porlu do nini uhurhu, marsuruh sanina in parlobei bani nasiam, laho pasirsirhon sibere-bere hatarimakasihon, na dob ipadankon nasiam, ase sirsir ma in, songon sibere-bere na unjah, ulang ma na hinolit. ⁶ Tapi ingat nasiam ma on: Na mantidahkon otik, otik do sabionni; na mantidahkon buei, buei do sabionni. ⁷ Ganup ma jinuljul ni uhurni, ulang ma humbani borat ni uhur atap halani paksa, ai ihaholongi Naibata do halak na malas uhur mambere. ⁸ Ai markuasa do Naibata mambere unjah sagala pasu-pasu bani nasiam, ase sungkupan nasiam tongtong bani haganup, anjaha marlobih-lobih nasiam bani ganup horja na madear, ⁹ domu hubani na tarsurat in: Ia do na mambagihon, ibere do bani na miskin; totap do hapintoranni ronsi sadokah ni dokahni. ¹⁰ Anjaha na pasirsirhon bonih bani sipanabur ampa indahan bani na mangankon, pasirsiron anjaha pagandaonni do bani nasiam sisaburhononkon anjaha pabueionni buah ni hapintoron nasiam. ¹¹ Ase bani haganup nasiam ipabayak, laho mandalankon halayakon, na mangkorhon tarima kasih bani Naibata, marhitei hanami. ¹² Ia horja panumpakion on seng pitah na manungkupi hahurangan ni halak na mapansing ai in, tapi surung do pangkorhon ni ai homa marhitei buei martarima kasih bani Naibata. ¹³ Ai marhitei habujuron nasiam bani horja panumpakion on ipuji sidea do Naibata, halani ibalosi nasiam do Ambilan Namadear ni Kristus marhitei hasaksian nasiam, anjaha halani unjah nasiam marsibere-bere ibagas parsaoran nasiam pakon sidea ampa haganup halak na legan. ¹⁴ Anjaha itonggohon sidea do nasiam ibagas sihol ni uhur bani nasiam, mardingat idop ni uhur na tarsulur, na humbani Naibata bani nasiam. ¹⁵ Tapi tarima kasih ma bani Naibata halani sibere-bereni, na so tarpajojor in.

¹ Ahu, si Paulus, hupodahi ma nasiam marhitei halamlamon ampa hasabaron ni Kristus, ahu na toruh maruhur dompak nasiam anggo dumpar bohi bei, tapi na barani anggo padaoh-daoh, ² ahu mangindohon, ase anggo padumpar bohi holi, ulang pala tarpaksa ahu patuduhkon habaranionku, songon na dob husurahon martindak koras dompak deba halak, na manghira hanami manggoluh mangihutkon pardagingon. ³ Tongon ibagas daging ope hanami, tapi seng mangihutkon pardagingon hanami marporang. ⁴ Ia sinjatanami marporang sedo sinjata pardagingon, tapi gok hagogohon do humbani Naibata, laho manrumbakkon benteng-benteng. ⁵ Irumbakkon hanami do sura-sura ampa uhur hagijangon na manlawan habotohon na humbani Naibata, anjaha itaban hanami do sagala pingkiran, ase pambalosi ai bani Kristus. ⁶ Anjaha sirsir do hanami maminsang sagala naso mambalosi, anggo domma gok pambalosion nasiam. ⁷ Tonggor nasiam ma na talar i lobei nasiam in! Anggo adong na mangahap, Kristus do simadasi, iuhurhon ma on homa, paboa songon Kristus simadasi, sonai do homa hanami. ⁸ Ai anggo hutambahi pe pamujingku bani kuasa, na binere ni Tuhan in bannami, laho pauli-ulihon do, sedo laho parsedahon nasiam, seng maila ahu ibagas ai. ⁹ Ulang ma adong na mangagan, na mambiar-biari nasiam do ahu marhitei surat in. ¹⁰ Ai adong do na mangkatahon: Koras anjaha margogoh do suratni in, tapi anggo dumpar, galek do ia anjaha seng maharga hatani. ¹¹ Ipingkiri halak ai ma on, paboa sonin hadirionnami ibagas hatanami marhitei surat sanggah daoh, sonai do homa ibahen hanami sanggah dumpar. ¹² Seng barani hanami padoskon atap pausihkon dirinami bani halak na pajuntul-juntulhon dirini, na mangukur dirini marhitei ukuran ni sidea sandiri, na pausihkon dirini marhitei dirini sandiri homa. Seng dong pangarusion ni sidea. ¹³ Tapi seng ra hanami mamuji-muji dirinami ibagas na so marukuran, tapi mangihutkon ukur-ukuran na dob tinontuhon ni Naibata do bannami, na das ronsi bani nasiam homa. ¹⁴ Seng na manalpui hawajibannami hanami, songon na so ongga bani nasiam. Ai lang hanami do, na roh mamboan Ambilan Namadear pasal Kristus bani nasiam? ¹⁵ Anjaha seng tarlanjur hanami, gabe ipuji hanami dirinami marhitei buah ni horja ni halak na legan. Tapi arap do uhurnami lambin toguhni ma haporsayaon nasiam ibagas nasiam, ase lambin bolagni ma parhorjaan, na itotapkon bannami, ¹⁶ laho mangambilankon Ambilan Namadear bani nagori-nagori sidaohan ope humbani nasiam, tapi lang pala manalpui balog parhorjaan ni halak na legan, anjaha manghamegahkon buah ni horja ni sidea. ¹⁷ Tapi na mamuji dirini, marhitei Tuhan in ma ia mamuji! ¹⁸ Ai sedo halak na mamuji dirini, na totap botul, tapi na niuji ni Tuhan in do.

¹ Sai ra ma nasiam otik manganju habodohonku! Nai ma tene, anju nasiam ma ahu! ² Ringis ni Naibata do na adong bakku manghophop nasiam; ai domma hupatunangankon nasiam bani sada dalahi, anjaha hupasirsir nasiam bani Kristus songon sada anak boru na so haliaban. ³ Tapi biar do uhurhu songon si Hawa nasiam, na pinaoto-oto marhitei akal-akal ni ulog, gabe seda pingkiran nasiam, anjaha manirpang humbani bulus ni uhur dompak Kristus. ⁴ Halani ihadearhon nasiam do, anggo adong na roh mangambilankon Kristus legan humbani na iambilankon hanami, anjaha ijalo nasiam do tonduy na legan, na so jinalo nasiam hinan, barang ambilan na madear na legan, na so jinalo nasiam hinan. ⁵ Tapi nini uhurhu, seng etekan ahu marimbang apostel na banggal in. ⁶ Tapi anggo hurang pandei pe ahu bani hata, tapi lang anggo bani habotohon; tongtong do ipataridahkon hanami ai bani nasiam ibagas haganup. ⁷ Atap na mardousa do ahu, halani hupatoruh diringku, ase ipagijang nasiam, ai ma, halani huambilankon Ambilan Namadear na humbani Naibata bani nasiam, seng pala mangindo upah? ⁸ Humbani kuria na legan do hubuati, hujalo upah humbani sidea, laho marhorja bani nasiam. ⁹ Anjaha ia hurangan pe ahu i tongah-tongah nasiam, seng husunsahi age ise; ai sanina, na roh hun Makedonia, ai do patukkon na hurang bakku. Tongtong do hujaga diringku, ase ulang husunsahi nasiam, sonai do homa hulobeian on. ¹⁰ Halani hasintongan ni Kristus na ibagas ahu, puji-pujian on seng bulih langlangon bakku i nagori Akaya. ¹¹ Halani aha? Halani na so holong do uhurhu bani nasiam? Naibata do mambotohsi. ¹² Tapi na hubahen nuan, age hulobeian on pe bahenonku do, laho manlanglangi paruhuran ni halak do, na marsura-surahon ase dos hanami pakon sidea bani pamujion in. ¹³ Ia sidea, apostel parladung do, parhorja sipakulah-kulah, na pausih-usihkon dirini bani apostel ni Kristus. ¹⁴ Seng pala longang uhur ijai, ai age sibolis ipausih-usih do dirini bani malekat haliharon. ¹⁵ Seng pala ganjil ai, anggo juak-juakni pausih-usihkon dirini bani juak-juak ni hapintoran. Domu hubani horjani do ujung ni sidea bei. ¹⁶ Huulaki ma mangkatahon: Ulang ma adong na mangagan na bodoh ahu. Tapi anggo sonai do, jalo nasiam ma ahu songon na bodoh, ase tarpuji-puji ahu diringku otik. ¹⁷ Ia na huhatahon on, seng huhatahon in mangihutkon pingkiran ni Tuhan in, tapi songon na bodoh do, domu hubani pambahen ni na mamuji-muji diri. ¹⁸ Halani buei na mamuji-muji diri mangihutkon pardagingon, dihut ma ahu mamuji-muji diri. ¹⁹ Ai lang malas do uhur nasiam manganju halak na bodoh, halani pentar nasiam? ²⁰ Tongon sabar do nasiam, anggo iparjabolon halak nasiam, anggo ionsop daroh nasiam, anggo ibuati parbagianan nasiam, anggo adong na pagijang-gijang dirini, anggo ipastap nasiam. ²¹ Hamelaon do namin hatangkon, ra na galek do hanami ijai. Tapi, anggo adong barang ise na pag mangunsagahkon atap aha pe, ahu pe barani do mangunsagah. Haotoon do namin hatangkon. ²² Halak Heber do sidea? Ahu pe homa. Halak Israel do sidea? Ahu pe homa. Ginompar ni si Abraham do sidea? Ahu pe homa. ²³ Juak-juak ni Kristus do sidea? Haotoon do hatangkon: Lobihan do ahu. Lobihan manaron torik ni horja, gati tartutup, gati hona bogbog, gati ibagas parmaraan hamateian. ²⁴ Lima hali ma ahu ilonsingi halak Jahudi, opat puluh pukul hurang sada. ²⁵ Tolu hali ma ahu ibogbogi, sahali ipargijig bani batu, tolu hali harom, sadari saborngin mumbang-umbang i laut bolag, ²⁶ gati i pardalanan, marmara i bah banggal, marmara ibahen panrampok, marmara humbani bangsangku sandiri, marmara humbani bangsa sipajuh begu-begu, marmara ibagas huta, marmara i halimisan, marmara i laut, marmara i tongah-tongah ni sanina sipakulah-kulah. ²⁷ Loja do ahu anjaha sunsah, gati mangkar matangku, loheian anjaha horahan, gati marpuasa, marborgoh anjaha hurangan hiou. ²⁸ Sobali ni in, adong ope na mandondon ahu ari-ari, ai ma na mansarihon haganup kuria in. ²⁹ Ise na galek, seng dihut ahu galek? Ise na gabe sangsi ibahen halak, seng dihut milas uhurhu? ³⁰ Anggo maningon mamuji diri ahu, hagalekonkin ma hupapuji-puji. ³¹ Ia Naibata, Bapa ni Tuhan Jesus, na tarpuji ronsi sadokah ni dokahni, ibotoh do na so marladung ahu. ³² I Damaskus, ijagai wakil ni raja Aretas do huta Damaskus, laho manangkap ahu. ³³ Jadi ibagas karanjang ma ahu itantan humbani jandela hudarat ni tembok, gabe maluah humbani tanganni.

¹ Maningon mamuji diri, age seng marguna namin; ase patugahonku ma panonggoran ampa pangungkabon na humbani Tuhan in. ² Hutanda sada jolma ibagas Kristus; sapuluh ompat tahun ma dob salpu ai (atap na ibagas angkula ia seng hubotoh, atap na idarat ni angkula ia seng hubotoh, Naibata do mambotohsi), na tarangkat do halak ai ronsi lapis patoluhon ni nagori atas. ³ Anjaha hutanda do jolma ai (tapi atap na ibagas angkula ia ijia, atap sirang humbani angkula, seng hubotoh, Naibata do mambotohsi), ⁴ na tarangkat do ia ronsi Paradeiso, anjaha ibogei do hata, na so tarhatahon, na so boi tarsahaphon jolma. ⁵ Pasal halak ai mamuji-muji ma ahu, tapi pasal diringku seng mamuji-muji ahu sobali halani hagalekonkin. ⁶ Ai anggo hupapuji-puji pe diringku, seng na so maruhur ahu ijai, ai na sintong do hatangku. Tapi huhorom mando ai, ase ulang lobih ahu ihira halak humbani na niidahni bakku ampa na binogeini humbakku. ⁷ Anjaha, ase ulang huhagijangkon pangungkabon na tarsulur na hubakku ai, ibere do bakku sada duri ibagas dagingku, ai ma suruhan ni sibolis, na manghantam ahu, ase ulang hupagijang diringku. ⁸ Tolu hali ma hupangindo humbani Tuhan in, ase tanggal in humbakku. ⁹ Jadi nini ma hubakku: Sungkup do idop ni uhurHu bam, ai ibagas hagalekon do gabe gok hagogohon. Ase dearan ma hupuji diringku halani hagalekon, ase sogop bakku hagogohon ni Kristus. ¹⁰ Halani ai sonang do uhurhu ibagas hagalekon, hahirion, hasunsahan, parburuon ampa hasosakan halani Kristus, ai sanggah galek ahu, iuji do ahu margogoh. ¹¹ Na dob gabe maoto ahu hape! Nasiam do na mamaksa ahu sonai. Patut do namin palobeion nasiam ahu. Ai seng adong tadingku humbani apostel na banggal in, age pe na lang ahu. ¹² Napamasa do namin tanda ni apostel i tongah-tongah nasiam ibagas sagala hasabaron, marhitei tanda ampa halongangan pakon hagogohon. ¹³ Ai aha ma adong hatadingan nasiam marimbang kuria na legan in, sobali ni na so husunsahi in nasiam? Sasap nasiam ma hasalahankin! ¹⁴ Tonggor nasiam ma, domma pala patoluhalihon sirsir ahu marayak nasiam, anjaha sedo na laho manunsahi ahu. Ai sedo na adong bani nasiam sihol pindahanku, tapi nasiam sandiri do. Ai seng patut anak patumpu-tumpu arta bani namatorasni, tapi namatorasni do bani anakni. ¹⁵ Tapi malas do uhurhu mambere, lanjar mamberehon diringku manghophop tonduy nasiam. Anggo lobih panghaholongingku bani nasiam, mase ma hurang ahu ihaholongi? ¹⁶ Sonai pe ai, seng husunsahi nasiam, tapi halani parakal ahu, gabe hubuat do uhur nasiam ibagas akal. ¹⁷ Ai adong mambuat untung ahu humbani nasiam, marhitei halak na husuruh bani nasiam? ¹⁸ Huojur do tongon si Titus, anjaha husuruh sanina in manghasomanisi. Ai adong do mambuat untung si Titus humbani nasiam? Ai lang ibagas sada Tonduy do hanami marparlahou? Ai lang sada do bokas iirikkon hanami? ¹⁹ Domma ipingkir uhur nasiam hinan, na mamintori diri do hanami i lobei nasiam? I lobei ni Naibata, ibagas Kristus ihatahon hanami: Haganupan ai, nasiam hinaholongan, laho pauli-ulihon nasiam do. ²⁰ Ai mabiar do ahu, atap lang dapot ahu nasiam bani parrohku, domu hubani na pinindo ni uhurhu, anjaha ahu pe seng jumpah nasiam songon na pinindo ni uhur nasiam, anjaha mabiar do ahu, atap adong do i tongah-tongah nasiam paringoran, parsimburuon, ringis, uhur haut, hata tundal, panrisaon, uhur hagijangon ampa hageoron. ²¹ Sai ulang ma ipatoruh Naibatangku ahu i tongah-tongah nasiam bani parrohku use, gabe pala tangis ahu halani buei halak na mardousa hinan, na so manolsoli uhurni pasal habutakon, parriah-riahon ampa hasumsamon, na hinorjahon ni sidea.

¹ Patoluhalihon ma ahu roh sonari marayak nasiam. Sipaputuson do sagala parsahapan marhitei hasaksian ni dua atap tolu halak saksi. ² Songon na dob hupatugah bani parrohku paduahalihon ijia, sonai age sonari, age pe lang ijin ahu, ahu patugahkon use bani sidea, na mardousa hinan, sonai homa bani haganup halak na legan, paboa roh honsi ahu holi, seng maralang-alang ahu atap bani ise pe. ³ Ipangindo nasiam do tene tanda, atap na tongon do marsahap Kristus marhitei ahu, na seng galek bani nasiam, tapi marhagogohon do i tongah-tongah nasiam. ⁴ Ai tarsilang pe Ia halani hagalekon, tapi manggoluh do Ia marhitei hagogohon ni Naibata. Anjaha hanami pe galek do ibagas Ia, tapi manggoluh do rap pakonsi marhitei hagogohon ni Naibata i tongah-tongah nasiam. ⁵ Lajou nasiam ma diri nasiam, atap na ibagas haporsayaon do nasiam, pareksa nasiam ma diri nasiam. Ai na so ibotoh nasiam do bani diri nasiam, paboa na ibagas nasiam do Jesus Kristus? Anggo lang, na so talup ma nasiam. ⁶ Tapi arap do uhurhu, botohon nasiam do, paboa sedo na so talup hanami. ⁷ Tapi martonggo do hanami bani Naibata, ase ulang ihorjahon nasiam na jahat, sedo ase talup hanami idahon, tapi ase ihorjahon nasiam do na madear, hanami na songon na so talup idahon. ⁸ Ai seng adong gogohnami mangimbang hasintongan in, tapi manghophop hasintongan in do. ⁹ Ai malas do uhurnami anggo galek hanami, tapi margogoh ia nasiam. Lanjar in do tonggonami, ase lambin toguh uhur nasiam. ¹⁰ Husurat do on, sanggah holang ope ahu, ase ulang roh honsi ahu, koras ahu mamakei kuasa na binere ni Tuhan in bakku. laho pauli-ulihon, sedo laho parsedahon. ¹¹ Ambah ni ai, nasiam sanina, malas ma uhur nasiam, sai ra ma nasiam patorsaon, sai ra ma nasiam palumbaon, sauhur ma nasiam, sai mardamei ma nasiam, anjaha ihasomani Naibata parholong anjaha pardamei in ma nasiam. ¹² Marsitabian ma nasiam marhitei summah na mapansing. ¹³ Idop ni uhur ni Tuhanta Jesus Kristus ampa holong ni uhur ni Naibata pakon parsaoran ni Tonduy Napansing ma manghasomani nasiam haganup!