1 TIMOTEUS

¹ Humbani si Paulus, apostel ni Kristus Jesus, marhitei parentah ni Naibata, Sipaluah hita, ampa Kristus Jesus Pangarapanta, ² hubani si Timoteus, anakku na botul ibagas haporsayaon: Idop ni uhur, holong ni uhur ampa damei ma bam humbani Naibata Bapa ampa Kristus Jesus Tuhanta! ³ Sanggah na bingkat ahu hu Makedonia, domma huhatahon bam, ase soh ho lobei i Epesus, laho palumbahon deba halak, ase ulang ipodahkon pangajaran na legan, ⁴ ulang ra saor bani turi-turian barang bani tarombo-tarombo na so marbona marujung, na patubuhkon bueinan parsalisihan marimbang parsombahon bani Naibata ibagas haporsayaon. ⁵ Ia tujuan ni titah in, in ma holong na roh humbani uhur na borsih ampa panggora ni uhur na madear ampa haporsayaon na pitah. ⁶ Deba halak, halani manlembang hunjai, marbalik do bani hata-hata na lumei, ⁷ marsura-sura do gabe guru bani titah in, age pe seng iarusi na hinatahon ni sidea atap na sinaksihon ni sidea pe. ⁸ Tapi ibotoh hita do, dear do titah in, anggo domu hubani tujuanni ipargunahon in, ⁹ marhitei na mambotoh, sedo bani halak parpintor ibere titah in, tapi bani na so martitah ampa na so pambalosi do, bani na so mar-Naibata ampa pardousa, bani halak na so pansing ampa na mabutak, bani halak sibunuh bapani ampa sibunuh inangni sibunuh jolma, ¹⁰ bani parriah-riah, na marjolmahon dalahi, pamangus, parladung, sibijahon na so tongon, ampa haganup na legan na marlawanan dompak pangajaran na sintong in, ¹¹ na maronjolan hubani Ambilan Namadear, na niondoskon bakku, ai ma pasal hasangapon ni Naibata na martuah in. ¹² Mangkatahon tarima kasih do ahu bani na margogohi ahu, in ma Kristus Jesus Tuhanta in, ai ihira do ahu hatengeran ni uhur, gabe ipabangkit do ahu bani horja parugason on, ¹³ ahu, sipanrisai, siparburu ampa siunsagahkon gogohku hinan. Tapi jumpahan idop ni uhur do ahu, ai ibagas na so hubotoh do huhorjahon ai, ibagas na so parsaya; ¹⁴ anjaha linir do bakku idop ni uhur ni Tuhanta rap pakon haporsayaon ampa holong na ibagas Kristus Jesus. ¹⁵ Hatengeran ni uhur do hata on anjaha talup jaloon: Domma roh Kristus Jesus hu tanoh on, laho paluahkon pardousa, anjaha ahu ma pardousa sibanggalan. ¹⁶ Tapi halani on do ase jumpahan idop ni uhur ahu: Sihol parlobei ibagas diringku patidakon ni Kristus Jesus lumbang ni uhurni na gok in, gabe usihan bani na sihol porsaya Bani, ase bani hagoluhon na sadokah ni dokahni. ¹⁷ Hamuliaon ampa hasangapon sisadokah ni dokahni ma bani Raja na marmulia in, Naibata na manongtong, na so boi idahon, na sasada in! Amen. ¹⁸ Tonah on huondoskon do bam, ale anakku Timoteus, romban hubani hata panjahaion hinan pasal ho, ase domu hujai iporangkon ho porang na madear in, ¹⁹ ibagas haporsayaon ampa panggora ni uhur na borsih. Marhitei na mangambukkon ai, adong do deba na harom ibagas haporsayaon, ²⁰ songon si Himeneus ampa si Aleksander, na dob huondoskon hubani sibolis, ase marhitei ai hona ajar sidea, gabe seng be manrisai sidea.

¹ Ai pe on do sipaingathu parlobei humbani haganup. Sihol ma dalanhononkon pangindoan, partonggoon, pangapition ampa hatarimakasihon manghophop haganup jolma, ² manghophop raja-raja ampa haganup siparkuasa, ase boi hita sonang anjaha mardamei-damei manggoluh, daulat anjaha hormat ibagas haganup. ³ Dear do in, anjaha harosuh ni Sipaluah hita, ai ma Naibata, ⁴ na mangkarosuhkon, ase haganup jolma maluah anjaha das mananda hasintongan in. ⁵ Ai sada do Naibata, anjaha sada do siholang ni Naibata pakon jolma, ai ma jolma Kristus Jesus in, ⁶ na mamberehon diriNi gabe tobus manghophop haganup; in ma sisaksihononkon bani panorang na dearhonsi. ⁷ Hujin do ahu ipabangkit gabe parambilan ampa apostel, guru bani sipajuh begu-begu ibagas haporsayaon ampa hasintongan; sintong do hatangku, seng marladung ahu. ⁸ Ai pe iparsinta uhurhu do, sihol ma martonggo sagala dalahi bani ganup ianan, manombahkon tangan na pansing, ulang ibagas ringis atap paringoran. ⁹ Anjaha naboru-naboru pe, hormat anjaha bulus ma pamakeini, ulang ma marjambulan na marpanjagar na malobihtu, barang irungkub dirini bani omas atap mata intan atap pakeian-pakeian na maharga-maharga, ¹⁰ tapi marhitei pambahenan na madear ma, songon na patut bani naboru, na mangaku, na daulat ia i lobei ni Naibata. ¹¹ Masip ma naboru ibagas na marguru, marunduk ni uhur tumang. ¹² Seng hulopas naboru mangajari barang manrajai dalahi, tapi sip ma ia. ¹³ Ai parlobei do si Adam itompa, dob ai pe ase si Hawa; ¹⁴ anjaha sedo si Adam hona paoto-oto; naboru ai do hona paoto-oto, gabe manlanggar. ¹⁵ Tapi maluah do ia marhitei na mantubuhkon anak, anggo totap ia ibagas haporsayaon ampa holong pakon hapansingon marhasoman hahormaton.

¹ Hata na sintong do on: Halak na sihol gabe parmahan ibagas kuria, sipindahi horja na madear do ai. ² Halani ai, ia parmahan ibagas kuria, ulang ma adong sihataon bani, pargotong ni sada naboru, torang maruhur, pandei, hormat marparlahou, sipartamuei, na pandei mangajari, ³ ulang parminum, ulang parringis tapi parlamlam ma; ulang siparingor, anjaha ulang simata duit. ⁴ Halak na pandei mangatur rumah tanggani ma ai, pardakdanak sibalosi ajar, hormat ibagas haganup. ⁵ Ai anggo seng ibotoh manrajai rumah tanggani, sonaha ma boi ia patorsahon kuria ni Naibata? ⁶ Ulang ma halak na baru masuk Kristen, ase ulang gabe gijang uhurni jadi madabuh hu bagas uhum ni sibolis. ⁷ Maningon dear baritani bani halak pardarat, ulang madabuh ia jadi sirisaan ampa hubagas siding ni sibolis. ⁸ Sonai homa siparugas maningon hormat do, seng sipardua hata, seng parminum, seng simata duit. ⁹ Maningon marsijoloman sidea bani rusia ni haporsayaon in ibagas panggora ni uhur na borsih. ¹⁰ Maningon siujion do homa lobei sidea; dob torang nani, seng dong sihataon bani sidea, ai pe ase boi sidea gabe siparugas. ¹¹ Sonai homa parinangon ni sidea maningon hormat do, ulang sihata-hatai hasoman, torang maruhur anjaha bujur bani haganup. ¹² Ia siparugas, maningon paramangon ni sada naboru do, na mambotoh manrajai anakni ampa rumah tanggani. ¹³ Sidalankon horja parugason ai dear-dear, tontu lambin marsangap do, anjaha lambin martenger ni uhur ibagas haporsayaon bani Kristus Jesus. ¹⁴ Mangarap do ahu, podas do ahu roh marayak ho, tapi husurathon do on bam, ase, ¹⁵ porini hun dokah ahu roh, gabe ibotoh ho sonaha patut marparlahou ibagas rumah ni Naibata, in ma kuria ni Naibata na manggoluh in, tiang ampa onjolan ni hasintongan in. ¹⁶ Banggal do tongon rusia ni hadaulaton in: Ia domma talar ibagas daging, iparhatongon hapintoranNi marhitei Tonduy, taridah bani malekat, iambilankon bani sipajuh begu-begu, ihaporsayai i dunia on, tarangkat hu hasangapon.

¹ Tapi torang do ihatahon Tonduy in, paboa bani panorang parpudi adong ma deba na marbalik humbani haporsayaon in, marhitei na mambalosi tonduy sipangoto-otoi ampa podah-podah ni sibolis, ² marhitei hasipakulah-kulahon ni sihatahon ladung, na pinapaan ni panggora ni uhurni: ³ Ilarang sidea do marhajabuan anjaha iparentahkon mangorom sipanganon, na jinadihon ni Naibata, na patut sijaloon ni halak na porsaya ampa na dob mananda hasintongan in namin marhasoman tarima kasih. ⁴ Ai sagala na jinadihon ni Naibata dear do ai, anjaha seng pantang, anggo marhasoman tarima kasih najalo ai, ⁵ halani gabe pansing do ai marhitei hata ni Naibata ampa tonggo. ⁶ Anggo in ipodahkon ho bani sanina in, juak-juak na madear ma ho bani Kristus Jesus, manggoluh humbani hata haporsayaon ampa humbani pangajaran na madear, na niirikkonmin. ⁷ Turi-turian na so margagan, na hinarosuhkon ni naboru-naboru na matua, tulakkon ma ai. Pasomal-somal ma dirimu mangkorjahon hadaulaton. ⁸ Ai otik do guna ni latihan badan, tapi hubani haganup do marguna hadaulaton in, ai hagoluhan sisonari ampa simagira iparbagah. ⁹ Hatengeran do hata in, anjaha talup jaloon ni haganup jolma. ¹⁰ Ai do ase loja hita anjaha maruntol, halani mangarap hita bani Naibata na manggoluh in, Sipaluah bani haganup jolma, tarlobih bani na porsaya. ¹¹ In ma titahkon anjaha ajarhon! ¹² Ulang ma adong na marmapas ni uhur bam halani haposoonmu, tapi gabe siusihan ma ho bani na porsaya, ibagas hata, parlahou, holong ni uhur, haporsayaon age hapormanon. ¹³ Nunuti ma mambasa surat na mapansing in, mamodahi ampa mangajari paima roh ahu. ¹⁴ Ulang ma hampung uhurmu pasal sibere-bere idop ni uhur na adong bam in, na pinadas hu bam marhitei panjahaion ampa na manampeihon tangan marhitei sintua-sintua. ¹⁵ Dalankon ma in anjaha parlahouhon, ase talar hasurunganmu bani ganup halak. ¹⁶ Jaga ma ho bani dirimu ampa bani pangajaran in; totap ma ho ibagas in, ai anggo ihorjahon ho in, na paluahkon dirimu do ho ijin sonai age na manangihon ho.

¹ Ulang ma sorgangi na matua, tapi paingat ma ia songon bapa, anjaha na maposo songon sanina, ² naboru na matua songon inang anjaha naboru siposonan songon botou, ibagas sagala hahormaton. ³ Pasangap ma naboru na mabalu, na botul mabalu. ⁴ Tapi, anggo marniombah atap marpahompu do na mabalu ai, iparlajari sidea ma lobei mansarihon ibagas hadaulaton parrumah ni sidea sandiri, mambahen pambalason dompak toras-toras ni sidea ai, ai do harosuh ni Naibata. ⁵ Anggo na mabalu na botul, na seng mardiha-diha, mangarap do ia bani Naibata, anjaha torus do ia, mangindo ampa martonggo arian pakon borngin; ⁶ tapi sihorjahon hisap-hisap, na dob matei do ai, age manggoluh ope ia. ⁷ In ma parentahkon, ase ulang sihataon sidea. ⁸ Tapi, anggo adong barang ise, na so mansarihon diha-dihani, tarlobih ma parrumahni sandiri, na dob marnalangkon haporsayaon do ia ai, anjaha jahatan do ia marimbang na so porsaya. ⁹ Naboru na mabalu, na boi sidaftarhononkon, ai ma na dob marumur onom puluh tahun, sahali ope hansa laho, ¹⁰ na dear horjani isaksihon halak, na pagodang-godangkon anakni dear-dear, malas uhurni martamuei, ra mamburihi nahei ni halak na mapansing, sipangurupi bani halak na tarsosak, anjaha iporluhon sagala horja na madear. ¹¹ Tapi ulang ma daftarhon naboru na mabalu na poso, ai anggo oji tumang sidea holi, ai ma na manirang sidea humbani Kristus, sihol do ase sidea marhajabuan, ¹² gabe hona uhum, marhitei na iosei sidea padanni ai hinan. ¹³ Ambah ni ai, parrayoh do sidea, martandangi hun rumah hu rumah; seng pitah parrayoh, tapi hertep do sidea anjaha mangalop manaruhkon hata, mansahapkon na so patut sihatahononkon. ¹⁴ Halani ai, ipangindo uhurhu do ase marhajabuan na maposo na mabalu, tubuhan tuah, iurus rumah tanggani, ase ulang adong dalan bani imbang, laho manrisai hita, ¹⁵ ai domma adong deba na marbalik mangirikkon sibolis in. ¹⁶ Tapi anggo adong naboru na mabalu bani sada halak naboru na porsaya, ia ma lobei patorsa-torsahonsi; ulang ma iborati kuria in, ase tarpaturei-turei na mabalu na botul. ¹⁷ Sintua-sintua na bujur mandalankon hasintuaonni, lompit do hiraon hasangapon hubani sidea, tarlobih hubani na mandalankon parambilanon ampa pangajarion. ¹⁸ Ai ihatahon surat in do: "Seng bulih tutupon babah ni lombu na mardogei," anjaha: "Na patut do marupah siparhorja". ¹⁹ Ulang tangihon pangaduan dompak sada sintua, anggo seng sinaksihon ni dua atap tolu halak. ²⁰ Pinsang ma sipardousa i lobei ni sagala hasoman, ase mabiar halak na legan. ²¹ I lobei ni Naibata, ampa Kristus Jesus, ampa malekat na tarpilih in, hu parentahkon ma bam manramotkon haganupan in, ulang maralang-alang, ulang manonggor jumbak. ²² Ulang mapodastu ho manampeihon tangan bani halak, anjaha ulang saor ho bani dousa ni na legan; ramothon dirimu, ase borsih ho. ²³ Ulang be pitah bah inum, tapi inum ma anggur otik-otik, halani boltokmu, ai gati do ho boritan. ²⁴ Bani na deba halak, talar do dousani, sanggah lape sogop uhum; tapi bani na legan mangihut hun pudi. ²⁵ Sonai homa horja na madear talar do, anjaha age na so talar ai ope, seng boi ponop ai.

¹ Sagala halak na marhorja songon jabolon, ihira ma tuanni patut sipasangapon ibagas haganup, ase ulang hona risa goran ni Naibata ampa ajaran in. ² Tapi jabolon, na martuankon halak na porsaya, ulang ma moru parpasangapni bani, halani sanina ia; tapi lambin ibalosi ma ia, halani na porsaya ia anjaha sanina na hinaholongan, na buei marsilayak-layak. In ma ajarhon anjaha podahkon. ³ Barang ise na mangajarhon ajaran na legan, na so romban hubani hata hasintongan ni Tuhanta Jesus Kristus ampa ajaran na mardomu hubani hadaulaton in, ⁴ na pajuntul-juntulhon diri do ai, anjaha na so marpambotoh, na gila marsual-sual do ai ampa martongkar, na parohkon subil, paringoran, risa-risa, tukas-tukas na jahat, ⁵ ampa parsalisihan na manorus humbani halak na dob seda uhurni, na dob magouan hasintongan in, na mangagan pansarian do hadaulaton in. ⁶ Pansarian banggal do tongon hadaulaton in, anggo marhasoman uhur na sonang. ⁷ Ai seng adong iboan hita hu tanoh on, anjaha aha pe lang tarboan hita laho luar. ⁸ Halani ai, anggo adong banta sipanganon ampa parhiouon, hasonangkon hita ma in. ⁹ Ia halak na sihol bayak, madabuh do hu bagas parlajouan ampa siding ampa bagei ni hisap-hisap haotoon, na mangagou anjaha na mandabuhkon jolma in hubagas hamagouan ampa hasedaon. ¹⁰ Ai urat ni sagala hajahaton do uhur na holongan bani duit, in do isura-surahon na deba, mambahen kahou humbani haporsayaon, gabe iaikkon buei sitaronon bani dirini. ¹¹ Tapi ho, siminik ni Naibata, maporus ma ho hunjai. Parayak ma hapintoran, hadaulaton, haporsayaon, holong ni uhur, hasabaron ampa lamlam ni uhur. ¹² Habujurhon ma porang haporsayaon na madear in, tangkap hagoluhan sisadokah ni dokahni, ai hujai do ho idilo, anjaha ibahen ho do pangakuan na madear in i lobei ni buei saksi. ¹³ Huparentahkon ma bam i lobei ni Naibata, sipagoluh haganup, ampa i lobei ni Kristus Jesus, na mambahen hasaksian namadear i lobei ni si Pontius Latus: ¹⁴ Dalankon ma titah in, seng martikas, seng panurakon, ronsi talar Tuhanta Jesus Kristus. ¹⁵ Ai jumpahkonsi panorangni, talar ma la bahenon ni Namartuah in, Pargogoh sisada-sada in, Raja ni sagala raja anjaha Tuhan ni sagala tuan, ¹⁶ na sada in, na so ra matei, siiani haliharon na so tardohori, na so ongga niidah ni jolma, anjaha seng boi idahon. Bani ma hasangapon ampa hagogohon sadokah ni dokahni. Amen. ¹⁷ Hatahon ma bani na bayak i dunia on: Ulang gijang uhur ni sidea, ulang marhatengeran bani habayakon na so totap in; tapi bani Naibata ma martenger ni uhur, na unjah mamberehon banta sihamalashononta. ¹⁸ Mangkorjahon na madear ma sidea, bayak bani horja na madear, paruhur na unjah anjaha ringgas marsilayak-layak, ¹⁹ ai ma parhiteian bani sidea, patumpuhon arta na madear bani panorang na sihol roh, ase itangkap sidea goluh na sintong. ²⁰ Ale Timoteus, ramothon ma na dob jinalomu; lembangi parsahapan na so daulat ampa parsual-sualan, na salah ginoran "habotohon". ²¹ In do iirikkon deba halak, gabe manlembang humbani haporsayaon. Idop ni uhur ma mangkasomani nasiam!