1 TESSALONIKA

¹ Humbani si Paulus, si Silpanus pakon si Timoteus, hubani kuria na i Tessalonik, na ibagas Naibata Bapa pakon Tuhan Jesus Kristus: Idop ni uhur ma bani nasiam ampa damei! ² Mangkatahon tarima kasih do hanami tongtong hubani Naibata halani nasiam haganup, anjaha itarsingati hanami do nasiam ibagas tonggonami. ³ Idingat hanami do totap i lobei ni Naibata horja haporsayaon nasiam, horja holong nasiam ampa hatotapon ni pangarapan nasiam bani Tuhanta Jesus Kristus. ⁴ Ai ibotoh hanami do, nasiam na hinaholongan ni Naibata, na dob pinilihNi do nasiam, ⁵ ai pangambilankonnami bani Ambilan Namadear in bani nasiam seng pitah ibagas hata masa ai bani nasiam, tapi homa ibagas hagogohon ampa ibagas Tonduy Napansing do, marhasoman atok ni uhur na gok. Ibotoh nasiam do, sonaha marparlahou hanami i tongah-tongah nasiam, halani nasiam. ⁶ Ase domma gabe sipaniru nasiam bannami ampa bani Tuhan in, ai ibagas buei sitaronon do ijalo nasiam hata in, marhasoman malas ni uhur na humbani Tonduy Napansing, ⁷ gabe siusihan do nasiam bani sagala na porsaya i Makedonia ampa i Akaya. ⁸ Ai humbani nasiam do tarambilan hata in, seng pitah i Makedonia ampa Akaya, tapi bani ganup ianan do sar haporsayaon nasiam bani Naibata, gabe seng pala be taringatannami pasal ai. ⁹ Ai sidea sandiri do mambaritahon pasal sonaha parmasuknami bani nasiam, anjaha sonaha parmubah nasiam humbani sisombah-sombahon hubani Naibata, laho mambalosi Naibata Namanggoluh ampa Nasintong in, ¹⁰ anjaha paima-imahon bani AnakNi roh hun nagori atas, na pinapuhoNi humbani na matei, ai ma Jesus, na paluahkon hita humbani ringis na sihol roh.

¹ Ai ibotoh nasiam sandiri do, nasiam sanina, na so soya parrohnami bani nasiam. ² Ai age pe marsitaronon hinan anjaha hona arsik hanami i Pilippi, songon na binotoh nasiam, marhinsah ni uhur do hanami ibagas Naibata, mangambilankon bani nasiam Ambilan Namadear na humbani Naibata, ibagas buei parlawanan. ³ Ia pamodahionnami, sedo ibagas hakahouon ai barang hasipakulah-kulahon barang akal-akal, ⁴ tapi songon na dob niakuhon ni Naibata hanami gabe haondosan ni Ambilan Namadear in, sonai do ihatahon hanami, sedo ase harosuh hanami bani jolma, tapi bani Naibata do, siuji uhurnami. ⁵ Ai seng ongga hanami marhata lemes-lemes, songon na binotoh nasiam, barang marakal-akal laho mambuat arta, Naibata do saksi pasal ai; ⁶ barang mangindahi sangap hanami humbani jolma, atap humbani nasiam, atap humbani na legan pe, age pe songon apostel ni Kristus boi hanami namin marhatunggungon. ⁷ Tapi basar do hanami i tongah-tongah nasiam songon parinangon patorsa-torsa niombahni. ⁸ Sonai ma, halani masihol hanami bani nasiam, ihamalashon uhurnami do mamberehon bani nasiam, sedo pitah Ambilan Namadear in, tapi dihut do hosahnami, halani na dob holong uhurnami bani nasiam. ⁹ Ai idingat nasiam do, nasiam sanina, halojaon ampa hasunsahannami: Arian pakon borngin do hanami marhorja, ase ulang marhaboratan age ise nasiam. Sonin do pangambilankonnami bani nasiam Ambilan Namadear na humbani Naibata. ¹⁰ Nasiam do saksi, Naibata homa, paboa daulat, pintor anjaha seng panurakon parlahounami dompak nasiam, na porsaya, ¹¹ ai ibotoh nasiam do, sonaha hanami songon bapa hubani niombahni mamodahi nasiam sada-sada, mangojur anjaha pabijahon nasiam, ¹² ase marparlahou na patut nasiam dompak Naibata, na dob mandilo nasiam hu bagas harajaonNi ampa hasangaponNi. ¹³ Halani ai mangkatahon tarima kasih do hanami tongtong bani Naibata, ai ijalo nasiam do hata ni Naibata, na binogei nasiam humbannami, ijalo nasiam do in, sedo songon hata ni jolma, tapi songon hata ni Naibata do, ai in do in tongon, gabe marpangkorhon ibagas uhur nasiam na porsaya. ¹⁴ Nasiam sanina, na dob gabe paniru do nasiam bani kuria ni Naibata na i nagori Judea, na ibagas Kristus Jesus, ai manaron na parngit do nasiam humbani hasoman nasiam sabangsa, songon sidea na niarsik-arsik ni halak Jahudi, ¹⁵ na mambunuh Tuhan Jesus ampa nabi-nabi, na mangayak-ayak hanami anjaha na mambahen sogam ni uhur ni Naibata, imbang ni haganup jolma, ¹⁶ na manlarang hanami mangambilankon ambilan namadear bani sipajuh begu-begu, ase andohar maluah sidea. Sonai ma tongtong igoki sidea suhat-suhat ni dousa ni sidea. Jadi sogop ma bani sidea ringis ai bani ujungni. ¹⁷ Ia hanami, nasiam sanina, dob lingod nasiam tongkin humbannami lingod bani panonggor, tapi sedo bani uhur, lambin ihaporluhon hanami do marhasoman uhur na masihol tumang sihol mangidah bohi nasiam. ¹⁸ Halani ai, sihol roh do hanami marayak nasiam, ahu tene si Paulus, sahali barang dua hali, tapi tarlanglang do hanami ibahen sibolis in. ¹⁹ Ai ise do pangarapan bannami, malas ni uhur ampa sortali puji-pujian sobali nasiam i lobei ni Tuhanta Jesus Kristus, bani parrohNi ai? ²⁰ Tongon, nasiam do hasangapon ampa malas ni uhur bannami.

¹ Jadi halani lang be tartahan hanami siholnami, gabe isurahon hanami ma, ase pitah hanami ma lobei tading i huta Aten, ² anjaha isuruh hanami ma si Timoteus, sanina in, anjaha juak-juak ni Naibata bani Ambilan Namadear ni Kristus, laho patotaphon nasiam ibagas haporsayaon nasiam anjaha pagolpa-golpa nasiam, ³ ase ulang adong na madabuh halani hamarsikon on. Ibotoh nasiam sandiri do, in do rupeita. ⁴ Ai sanggah rap ope hanami pakon nasiam, domma ilumbahon hanami hinan bani nasiam, na maningon sogop do sitaronon banta, songon na dob masa torang ibotoh nasiam. ⁵ Jadi halani seng tartaron ahu be, gabe husuruh ma, ase boi botohonku pasal haporsayaon nasiam, ai mabiar do ahu, atap na dob hona lajou do nasiam ibahen sipanlajou in, gabe soya ma halojaonnami. ⁶ Tapi sonari, dob mulak si Timoteus humbani nasiam, anjaha iboan barita na madear pasal haporsayaon nasiam pakon holong ni uhur nasiam, anjaha ipatugah habujuron nasiam mardingat hanami ampa sihol ni uhur nasiam mangidah hanami, songon sihol ni uhurnami bani nasiam, ⁷ gabe tarapoh ma hanami halani nasiam, nasiam sanina, halani haporsayaon nasiam, ibagas haganup hasunsahan ampa sitarononnami, ⁸ ai na manggoluh ma hanami sonari, anggo totap nasiam jongjong ibagas Tuhan in. ⁹ Ai tarima kasih na sonaha ma boi hatahononnami bani Naibata, bahen balos ni haganup malas ni uhur na iahap hanami i lobei ni Naibata mardingat nasiam? ¹⁰ Borngin ampa arian gomos do hanami martonggo, andohar boi idahonnami bohi nasiam anjaha gokannami atap aha na hurang bani haporsayaon nasiam. ¹¹ In pe, Naibata Bapanta ampa Tuhanta Jesus ma na parandang langkahnami bani nasiam! ¹² Anjaha Tuhan in ma na manggoki ampa na manambahi holong ni uhur nasiam samah nasiam, age bani haganup, songon hanami mangkaholongi nasiam. ¹³ Sai ipatoguh ma uhur nasiam, gabe boi nasiam jongjong i lobei ni Naibata Bapanta, pansing anjaha seng panurakon bani parroh ni Tuhanta Jesus rap pakon haganup na pansingNi.

¹ Ambah ni ai, nasiam sanina, ipangindo anjaha ipodahi hanami ma nasiam ibagas Tuhan Jesus; songon na dob ibogei nasiam humbennami, ai ma pasal sonaha nasiam patut manggoluh anjaha gabe harosuh bani Naibata, anjaha songon na nidalankon nasiam nuan ai, lambin martambah ma nasiam ibagas Ia. ² Ai ibotoh nasiam do aturan na binerenami bani nasiam marhitei Tuhan Jesus. ³ On do harosuh ni Naibata, ase pansing ma nasiam, ase daoh ma nasiam humbani parriah-riahon, ⁴ ase ganup ma nasiam mambotoh marbinuat ibagas hapansingon ampa hahormaton, ⁵ ulang ma mangihuthon hisap-hisap na garang, songon sipajuh begu-begu, na so mananda Naibata, ⁶ ase ulang adong na manlanggar, anjaha irugii saninani ibagas pahara ai (pansarian), ai parlulu do Tuhan in pasal haganupan ai, songon na dob ipatugah anjaha isaksihon hanami hinan bani nasiam. ⁷ Ai seng hu habutakon hita idilo Naibata, tapi bani hapansingon do. ⁸ Halani ai, barang ise na manulak ai, sedo jolma na tinulakni, tapi Naibata do, na mambere TonduyNi Napansing bani nasiam. ⁹ Tapi pasal holong ni uhur dompak sanina, seng pala porlu be pasingaton nasiam marhitei surat, ai Naibata sandiri do mangajari nasiam marsihaholongan, ¹⁰ anjaha tongon idalankon nasiam do sonai bani haganup sanina na i Makedonia. Tapi ipodahi hanami do, nasiam sanina, ase lambin sonai ibahen nasiam. ¹¹ Anjaha haporluhon nasiam ma ase parsip nasiam marsiurus urusanni bei anjaha marhorja ma tangan nasiam, songon na dob iparentahkon hanami bani nasiam. ¹² Ase marparlahou na patut ma nasiam idahon ni pardarat, anjaha ulang mangarap humbani halak. ¹³ Seng marosuh hanami, nasiam sanina, seng dong pambotoh nasiam pasal halak na dob modom in, ase ulang pusok uhur nasiam songon halak na legan, na so marpangarapan. ¹⁴ Ai anggo porsaya hita, na dob matei do Jesus anjaha puho, sonai ma homa marhitei Jesus, arahkonon ni Naibata do na dob modom in rap pakonSi. ¹⁵ Ai hata ni Tuhan in do na ihatahon hanami bani nasiam: Hita, na manggoluh, na tading ronsi parroh ni Tuhan in, seng lobeianta sidea, na dob modom in. ¹⁶ Ai Tuhan in sandiri ma tuad hun nagori atas marhasoman surak-surak, parentah pakon hata ni raja ni malekat, anjaha tarbogei ma tarompit ni Naibata. Jadi puho ma parlobei na matei ibagas Kristus. ¹⁷ Dob sonai, hita na manggoluh in, na tading in ope, tarikonNi ma hita rap pakon sidea ibagas hombun, laho mangalo-alo Tuhan in hu awang-awang, jadi tongtong ma hita rap pakon Tuhan in. ¹⁸ Ase marsiapohan ma nasiam marhitei hata in.

¹ Tapi anggo pasal panorangni atap musimni, nasiam sanina, seng pala suratonnami bani nasiam. ² Ai ibotoh nasiam sandiri do torang, paboa songon panangko borngin do parroh ni Ari ni Tuhan in. ³ Anggo ihatahon halak: "Damei do anjaha sonang", jadi sompong ma roh hamagouan ai bani sidea, songon pangarouan bani na boratan rumah, anjaha seng dong haporusan. ⁴ Tapi nasiam sanina, seng ibagas na golap nasiam, ulang ma hasiangan nasiam songon panangko. ⁵ Ai haganup do nasiam anak ni na lihar anjaha anak arian, seng borngin atap na golap simada hita. ⁶ Ase ulang ma hita tarpodom songon halak na legan, tapi puho ma hita anjaha torang maruhur. ⁷ Ai borngin do modom na modom in, anjaha borngin do mabuk na mabuk in. ⁸ Tapi, halani humbani na siang hita, torang ma uhurta, anjaha pakei hita ma baju bosi haporsayaon ampa haholongan ampa tangkuluk pangarapan bani haluahon. ⁹ Ai seng, ase sigilaan hita itotaphon Naibata, tapi ase jumpahan hagoluhan do marhitei Tuhanta Jesus Kristus, ¹⁰ na dob matei manghophop hita, ase barang na puho hita, barang na modom, manggoluh hita rap pakonSi. ¹¹ Halani ai marsipodahan ma nasiam anjaha marsipauli-ulian, songon na binahen nasiam. ¹² Tapi ielek-elek hanami ma nasiam sanina: Hormat ma bani na manghalojahon nasiam, bani na mambobahon nasiam ibagas Tuhan in, bani na mamodahi nasiam, ¹³ anjaha sangap tumang ma bahen nasiam sidea ibagas holong halani horja ni sidea. Mardamei ma nasiam samah nasiam. ¹⁴ Anjaha iojur hanami do nasiam sanina: Palumba nasiam ma halak, na so torsa marparlahou, apohi nasiam siotik uhur, anju bani na galek, marlumbang ni uhur dompak haganup. ¹⁵ Jaga ma nasiam, ase ulang adong mambalaskon na jahat balas ni na jahat, tapi na madear ma parayak nasiam tongtong samah nasiam, age bani haganup halak. ¹⁶ Tongtong ma nasiam marmalas ni uhur, ¹⁷ totap martonggo, ¹⁸ martarima kasih pasal haganup, ai in do na pinindo ni Naibata humbani nasiam marhitei Kristus Jesus. ¹⁹ Ulang ma intopi nasiam Tonduy in, ²⁰ ulang ma marhampung ni uhur pasal panjahaion, ²¹ tapi uji nasiam haganup, jolom nasiam ma na madear, ²² anjaha simbili nasiam ma sagala masam ni na masambor. ²³ Naibata sipardamei in ma mambahen tang pansing nasiam, anjaha Ia ma manramothon tonduy, uhur ampa daging nasiam, ase pansing, seng panurakon bani parroh ni Tuhanta Jesus Kristus! ²⁴ Hatengeran ni uhur do Ia, na mandilo nasiam, anjaha pasaudonNi do in. ²⁵ Nasiam sanina, tonggohon nasiam ma hanami. ²⁶ Padas nasiam ma tabi bani haganup sanina in marhitei summah na mapansing. ²⁷ Hupabija ma nasiam bani Tuhan in, pabasahon nasiam surat on bani haganup sanina. ²⁸ Idop ni uhur ni Tuhanta Jesus Kristus mangkasomani nasiam!